49-1-1a

༼ཐ༽ ༄༅། ༈ །མདོ་སྡེ་སྣ་ཚོགས་ཀྱི་སྐོར་བཞུགས་སོ། །
(黃)  經藏第十部

49-1-1b

༄༅༅།   །རྒྱ་གར་སྐད་དུ།  ཨཱརྱ་མ་ཧཱ་པ་རི་ནིརྦཱ་ཎ་ནཱ་མ་མ་ཧཱ་ཡཱ་ན་སཱུ་ཏྲཱ། 
བོད་སྐད་དུ། འཕགས་པ་ཡོངས་སུ་མྱ་ངན་ལས་འདས་པ་ཆེན་པོ་ཐེག་པ་ཆེན་པོའི་
མདོ།  བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་
ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་
འདས་གྲོང་ཁྱེར་ཀུ་ཤི་ན། ཆུ་ཀླུང་གསེར་ལྡན་གྱི་འགྲམ་གྱད་གྱི་ཉེན་ཀོར་ཤིང་སཱ་ལ་
ཟུང་གི་ཚལ་ན་བཞུགས་ཏེ། དེ་ན་བཅོམ་ལྡན་འདས་དགེ་སློང་བྱེ་བ་འབུམ་ཕྲག་
བརྒྱད་བཅུས་བསྐོར་ཅིང་མདུན་གྱིས་བལྟས་ཏེ། དཔྱིད་ཟླ་ཐ་ཆུངས་ཟླ་བ་ཉ་བའི་ནང་
པར་ཡོངས་སུ་མྱ་ངན་ལས་འདའ་བའི་དུས་དང་ཉེ་བར་གྱུར་པ་ན། སེམས་ཅན་ཐམས་

49-1-2a

ཅད་ཀྱི་རང་རང་གི་ཡུལ་གྱི་སྐད་དུ་ཤིན་ཏུ་ཟུར་ཕྱིན་པར་དོན་བརྡ་སྤྲོད་པའི་ཚིག་རྣམས་ཀྱིས། སྲིད་པའི་རྩེ་མོ་མན་ཆད་གོ་བར་མཛད་དེ། དེང་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་འཇིག་རྟེན་ཐམས་ཅད་ལ་ཐུགས་བརྩེ་བ་ཅན། འཇིག་རྟེན་ཐམས་ཅད་སྐྱོབ་པ། སེམས་ཅན་ཐམས་ཅད་ལ་སྒྲ་གཅན་ཟིན་དང་འདྲ་བར་གཟིགས་པ་སྐྱབས་ཆེན་པོའི་གནས་དང་གཞི་བོར་གྱུར་
པ་ཐུབ་པ་ཆེན་པོ་ཡོངས་སུ་མྱ་ངན་ལས་འདས་པར་འགྱུར་རོ་ཞེས་བཀའ་སྩལ་ཏེ། སེམས་ཅན་ཐམས་ཅད་ཀྱི་ཞུ་བ་ལུང་བསྟན་པ་ཐ་མ་ལ་དེ་ལྟ་བུའི་གསུང་རྣམས་བྱུང་བར་གྱུར་ཏོ། །གཞན་ཡང་དེའི་ཚེ་བཅོམ་ལྡན་འདས་
ཉིད་ཀྱི་ཞལ་ནས་འོད་ཟེར་སྣ་ཚོགས་འདི་ལྟ་སྟེ། སྔོན་པོ་དང་སེར་པོ་དང་དམར་པོ་དང་དཀར་པོ་དང་ཤེལ་གྱི་ཁ་དོག་དང་རྡོའི་སྙིང་པོའི་ཁ་དོག་ལྟ་བུ་དག་བྱུང་སྟེ། འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་
གྱི་ཁམས་དང་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ། སེམས་ཅན་དམྱལ་བ་དང་དུད་འགྲོ་དང་ཡི་དགས་དང་ལྷ་མ་ཡིན་དང་གཤིན་རྗེའི་འཇིག་རྟེན་གྱི་སེམས་ཅན་དེ་དག་ལ་ཕོག་ནས། དེའི་མོད་ལ་ཉོན་མོངས་པའི་
མུན་པ་ཐམས་ཅད་དང་ངན་སོང་དང་། མི་ཁོམ་པ་ཐམས་ཅད་རྒྱུན་ཆད་པར་གྱུར་ཏོ། །དེ་ནས་མྱ་ངན་ཆེན་པོས་ནོན་ཏེ་ཚིག་འཐུན་པར་ཀྱེ་མ་ཁེབས་སོ་ཁེབས་སོ་ཞེས་ཀྱང་ཟེར་ཏོ། །ཀྱི་ཧུད་ཀྱི་ཧུད་ཅེས་ཀྱང་སྐད་ཆེར་འབོད་ཅིང་
ལག་པ་བརྐྱང་བས་ཀྱང་མགོ་བོ་ལ་རྡོབས་ཤིང་ལུས་འདར་ཞིང་ཤིན་ཏུ་ངུའོ། །དེའི་ཚེ་ས་ཆེན་པོ་ནགས་ཚལ་དང་བཅས་རི་དང་བཅས་པའི་རྒྱ་མཚོའི་མཐས་གཏུགས་པ་ཡང་རབ་ཏུ་གཡོས་ཏེ། སེམས་ཅན་དེ་དག་ཀྱང་གཅིག་
ལ་གཅིག་འཛིན་ཅིང་། འདི་སྐད་དུ་གྲོགས་པོ་དག་རིངས་གྲོགས་པོ་དག་རིངས། གྱད་ཡུལ་གྱི་གྲོང་ཁྱེར་ཀུ་ཤིར་འདོང་ངོ་འདོང་ངོ་། །དེ་བཞིན་གཤེགས་པའི་ཞབས་ལ་ཕྱག་འཚལ་ཏེ། ཡོངས་སུ་མྱ་ངན་ལས་

49-1-2b

འདའ་བར་གཤེགས་པ་ལས་བཟློག་ལ་བསྒྲིམ་མི་དགོས་པར་བསྐལ་པའམ། བསྐལ་པ་ལས་ལྷག་པར་ཡང་བཞུགས་པར་གསོལ་བ་གདབ་བོ་ཞེས་ཟེར་ཏོ། །གཅིག་ལ་གཅིག་འཇུས་ནས་འདི་སྐད་དུ། ཀྱེ་མ་འཇིག་རྟེན་
སྟོངས་པར་འགྱུར་རོ། །ཀྱེ་མ་སེམས་ཅན་རྣམས་ཀྱི་བསོད་ནམས་ཀྱི་ལས་ཀྱི་རྣམ་པར་སྨིན་པ་ནི་ཟད་དོ། །ལས་མི་བཟད་པ་ནི་བྱུང་ངོ་། །ཚེ་དང་ལྡན་པ་དག་མྱུར་ཅིག །ཚེ་དང་ལྡན་པ་དག་མྱུར་ཅིག །དེ་བཞིན་གཤེགས་
པ་ཡང་དག་པར་རྫོགས་པའི་སངས་རྒྱས་དེང་གི་ཡུད་ཙམ་འདི་ལ་ཡོངས་སུ་མྱ་ངན་ལས་འདའ་བར་འགྱུར་རོ། །ཀྱེ་མ་འཇིག་རྟེན་སྟོངས་པར་འགྱུར་རོ། །ཀྱེ་མ་འཇིག་རྟེན་སྟོངས་པར་འགྱུར་རོ། །དེ་བཞིན་གཤེགས་པ་
མི་བཞུགས་ན། བདག་ཅག་མགོན་མེད་པ་དང་རྩ་ལག་མེད་པ་དང་། ཕོངས་པར་ཇི་ལྟར་འགྱུར་ཞིག་གུ། བདག་ཅག་གི་ཐེ་ཚོམ་དང་སོམ་ཉི་ཅི་དང་ཅི་ཡོད་པ་དེ་དང་དེ་དག་ཞུ་བར་བྱའོ་ཞེས་ཀྱང་ཟེར་ཏོ། །ཉན་ཐོས་ཆེན་པོ་
འདི་དག་ཀྱང་དེ་ན་འཁོད་དེ་འདི་ལྟ་སྟེ་གནས་བརྟན་ཀཱ་ཏྱཱ་ཡ་ན་ཆེན་པོ་དང་གནས་བརྟན་བཀྐུ་ལ་དང་གནས་བརྟན་ཉེ་དགའ་བོ་དང་དེ་དག་ལ་སོགས་པ་གཞན་དག་ཀྱང་དེ་ན་འཁོད་དེ། དེ་དག་ལ་འོད་ཟེར་གྱིས་ཕོག་ནས། འདར་རབ་
ཏུ་འདར། དམ་དམ་རབ་ཏུ་དམ་དམ། འཁྲུགས་རབ་ཏུ་འཁྲུགས། བརྟབས་རབ་ཏུ་བརྟབས། འུར་འུར་རབ་ཏུ་འུར་འུར། འཁམས་རབ་ཏུ་འཁམས། རྨུགས་རབ་ཏུ་རྨུགས། རེངས་རབ་ཏུ་རེངས་ཏེ། དེ་དག་ལ་
སོགས་པ་དག་དུ་གྱུར་ནས་ཆས་སོ། །དེའི་ཚེ་དགེ་སློང་ས་ཡ་ཕྲག་བརྒྱད་སོ་ཤིང་ཟོས་ནས་ཕྱིར་བྱུང་སྟེ། གནས་བརྟན་དེ་དག་ལ་འོད་ཟེར་གྱི་སྣང་བ་དེས་ཕོག་ནས་ཤིན་ཏུ་རིངས་པར་ཁ་གདོང་བཀྲུས་ཏེ་གཅིག་ལ་གཅིག་འཇུས་
སོ། །དེ་བཞིན་གཤེགས་པའི་སྲས་དེ་དག་ཐམས་ཅད་ཀྱང་དགྲ་བཅོམ་པ། དབང་ཐོབ་པ་བྱ་བ་བྱས་པ། བྱེད་པ་བྱས་པ་ཅང་ཤེས་པ་གཙོ་བོ་ཆེན་པོ། །ཆེན་པོ་སྟོང་པ་ཉིད་ཀྱིས་རང་གི་དོན་ཐོབ་པ། ཙན་དན་ཆེན་པོ་ལྟ་བུའི་

49-1-3a

གཡོག་འཁོར་དང་ལྡན་པ་སེང་གེ་ལྟ་བུའི་གཡོག་འཁོར་དང་ལྡན་པ་ཤ་སྟག་སྟེ། དེ་ལ་སོགས་པའི་ཡོན་ཏན་དཔག་ཏུ་མེད་པ་དང་ལྡན་པ་དེ་དག་ཐམས་ཅད་སྔ་དྲོ་ཉི་མ་འཆར་ཀར་ཡན་ལག་ཐམས་ཅད་ཀྱི་བ་
སྤུ་རྒྱ་སྐྱེགས་ཀྱི་ཤིང་གི་མེ་ཏོག་ལྟར་རྩ་དམར་བ་ནི་ལངས། མིག་ནི་མཆི་མ་ཁྲག་ལྟ་བུས་གང་སྟེ། མཆོག་ཏུ་སྡུག་བསྔལ་བའི་ཚོར་བ་དང་ལྡན་ནས། སེམས་ཅན་ཐམས་ཅད་ལ་ཕན་པ་དང་བདེ་བ་དང་སྙིང་བརྩེ་བའི་ཕྱིར་དང་། 
གདུལ་བར་བྱ་བའི་དབང་གི་དོན་དུ་ཐེག་པ་ཆེན་པོའི་མཆོག་ཏུ་གསང་བ། སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་ཆོས་ཀྱི་སྒོའི་ཚུལ་བཤད་པར་བྱ་བའི་ཕྱིར། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། 
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་འབུམ་བསྐོར་བ་བྱས་ནས། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་ཏུ་འཁོད་དོ། །དེའི་ཚེ་ཀོ་ཏ་ཀའི་བུ་
མོ་རབ་བཟངས་མ་ལ་སོགས་པ་དགེ་སློང་མ་བྱེ་བ་འབུམ་ཕྲག་དྲུག་ཐམས་ཅད་ཀྱང་། དགྲ་བཅོམ་པ་ཟག་པ་ཟད་པ། དབང་ཐོབ་པ་བྱ་བ་བྱས་པ་བྱེད་པ་བྱས་པ་ཁུར་བོར་བ། ཉོན་མོངས་པ་མེད་པ། གཙོ་མོ་ཆེན་མོ། ཆེན་
པོ་སྟོང་པ་ཉིད་ཀྱིས་རང་གི་དོན་ཐོབ་པ་ཤ་སྟག་སྟེ། འདི་ལྟ་སྟེ་ཀོ་ཏ་ཀའི་བུ་མོ་དགེ་སློང་མ་རབ་བཟང་མ་དང་དགེ་སློང་མ་ཉེ་དགའ་མོ་དང་དགེ་སློང་མ་རྒྱ་མཚོ་བློ་གྲོས་དང་དེ་ལ་སོགས་པ་དགེ་སློང་མ་བྱེ་བ་འབུམ་ཕྲག་དྲུག་སྔ་དྲོ་ཉི་མ་
འཆར་ཀར་ཡན་ལག་ཐམས་ཅད་ཀྱི་བ་སྤུ་རྒྱ་སྐྱེགས་ཀྱི་ཤིང་གི་མེ་ཏོག་ལྟར་རྩ་དམར་བ་ནི་ལངས། མིག་ནི་མཆི་མ་ཁྲག་ལྟ་བུས་གང་སྟེ། མཆོག་ཏུ་སྡུག་བསྔལ་བའི་ཚོར་བ་དང་ལྡན་ནས། སེམས་ཅན་ཐམས་ཅད་ལ་ཕན་པ་
དང་བདེ་བ་དང་སྙིང་བརྩེ་བའི་ཕྱིར་དང་གདུལ་བར་བྱ་བའི་དབང་གི་དོན་དུ་ཐེག་པ་ཆེན་པོའི་མཆོག་ཏུ་གསང་བ། སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་ཆོས་ཀྱི་སྒོའི་ཚུལ་བཤད་པར་བྱ་བའི་ཕྱིར། བཅོམ་ལྡན་

49-1-3b

འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་འབུམ་བསྐོར་བ་བྱས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་
གཅིག་ཏུ་འཁོད་དོ། །འཁོར་དེ་ན་དགེ་སློང་མ་འཁོད་པ་རྣམས་ཀྱང་བྱང་ཆུབ་སེམས་དཔའ་མི་མཆོག་ས་བཅུ་ཐོབ་པ་ཤ་སྟག་སྟེ། གདུལ་བའི་དབང་གི་ཕྱིར་བུད་མེད་ཀྱི་གཟུགས་དང་བུད་མེད་ཀྱི་དབྱིབས་དང་ཤ་དང་ཁྲག་དང་རྒྱུས་
པ་མང་པོ་དང་རུས་པའི་ལུས་འཆང་བ་རྟག་ཏུ་ཚད་མེད་པ་བཞི་བསྒོམ་པ་དང་ལྡན་པ་བདག་ཉིད་ཀྱིས་སངས་རྒྱས་ཀྱི་ཡུལ་གྱི་ཆོ་འཕྲུལ་ཆེན་པོའི་དོན་བྱེད་ནུས་པ་ཤ་སྟག་གོ། །གཞན་ཡང་དེའི་ཚེ་བྱང་ཆུབ་སེམས་དཔའ་རྒྱ་མཚོས་
བྱིན་ལ་སོགས་པ་བྱང་ཆུབ་སེམས་དཔའ་གང་གཱའི་ཀླུང་གི་བྱེ་མ་སྙེད་ཐམས་ཅད་ཀྱང་མི་མཆོག་ས་བཅུ་ཐོབ་པ། ཐབས་ཀྱིས་ལུས་འཆང་བ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱ་མཚོས་བྱིན་དང་། 
བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་དང་། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་། ཐེག་པ་ཆེན་པོ་ཐོས་པར་འདོད་པ་ཐེག་པ་ཆེན་པོ་ལ་ཞུགས་པ། ཐེག་པ་
ཆེན་པོས་བཀྲེས་པ་ཐེག་པ་ཆེན་པོ་ལ་སྲེད་པ་ཐེག་པ་ཆེན་པོ་ལ་སེར་སྣ་མེད་པ། འཇིག་རྟེན་ཐམས་ཅད་དང་འཐུན་པར་བྱེད་ནུས་པ་ཤ་སྟག་དང་། བདག་ཅག་རྒལ་ནས་གཞན་བསྒྲལ་བར་བྱའོ་སྙམ་སྟེ། སྔོན་གྱི་བསྐལ་པ་
བྱེ་བ་སྙེད་དུ་ཚུལ་ཁྲིམས་ཀྱི་བཀོད་པའི་དམ་བཅའ་བ་ལེགས་པར་བླངས་པ། འཛིན་པའི་སྤྱད་པ་སྤྱོད་པ་ཤ་སྟག་དང་། དེ་བཞིན་དུ་བདག་ཅག་གྲོལ་ནས་གཞན་དགྲོལ་བར་བྱའོ་སྙམ་པ་དང་། དེ་བཞིན་དུ་དཀོན་མཆོག་གསུམ་
གྱི་གདུང་མི་འཆད་པར་བྱའོ་སྙམ་པ་དང་། ཆོས་ཀྱི་འཁོར་ལོ་བསྐོར་བར་བྱའོ་སྙམ་པ་དང་། གོ་ཆ་ཆེན་པོ་བགོ་བར་བྱའོ་སྙམ་དུ་སེམས་པ་ཤ་སྟག་དང་། དེ་བཞིན་དུ་ཡོན་ཏན་དཔག་ཏུ་མེད་པ་དང་ལྡན་པ་དང་། བུ་གཅིག་པ་

49-1-4a

ལ་བྱ་བ་བཞིན་དུ་སེམས་ཅན་ཐམས་ཅད་ལ་སྙོམས་པར་ལྟ་བ་ཤ་སྟག་སྟེ། དེ་དག་ཐམས་ཅད་སྔ་དྲོའི་ཉི་མ་འཆར་ཀར་ཡན་ལག་ཐམས་ཅད་ཀྱི་བ་སྤུ་རྒྱ་སྐྱེགས་ཀྱི་ཤིང་གི་མེ་ཏོག་ལྟར་རྩ་དམར་བ་ནི་ལངས། 
མིག་ནི་མཆི་མ་ཁྲག་ལྟ་བུས་གང་སྟེ། མཆོག་ཏུ་སྡུག་བསྔལ་བའི་ཚོར་བ་དང་ལྡན་ནས་སེམས་ཅན་ཐམས་ཅད་ལ་ཕན་པ་དང་བདེ་བ་དང་སྙིང་བརྩེ་བའི་ཕྱིར་དང་གདུལ་བར་བྱ་བའི་དབང་གི་དོན་དུ། ཐེག་པ་ཆེན་པོའི་མཆོག་དུ་
གསང་བ་སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་སྒོའི་ཚུལ་བཤད་པར་བྱ་བའི་ཕྱིར། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་
ལྡན་འདས་ལ་ལན་འབུམ་བསྐོར་བ་བྱས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་ཏུ་འཁོད་དོ། །ཡང་དེའི་ཚེ་བསླབ་པའི་གཞི་ལྔ་བླངས་ཤིང་། ཚུལ་ཁྲིམས་དང་ཆོ་ག་དང་ཡོན་
ཏན་དང་ལྡན་པའི་དགེ་བསྙེན་འོད་དྲི་མ་མེད་པར་གྲགས་པའི་རྒྱལ་པོ་ལ་སོགས་པ་དགེ་བསྙེན་གང་གཱའི་ཀླུང་གཉིས་ཀྱི་བྱེ་མ་སྙེད་ཐམས་ཅད་ཀྱང་ཟུང་དང་ཟུང་དུ་ཤེས་པར་འདོད་པ་ཤ་སྟག་སྟེ། སྡུག་བསྔལ་བ་དང་བདེ་བ་དང་རྟག་པ་དང་མི་རྟག་པ་དང་བདག་ཡོད་
པ་དང་བདག་མེད་པ་དང་སྟོང་པ་དང་སྟོང་པ་མ་ཡིན་པ་དང་དེ་ཁོ་ན་དང་དེ་ཁོ་ན་མ་ཡིན་པ་དང་སྐྱབས་དང་སྐྱབས་མ་ཡིན་པ་དང་སེམས་ཅན་དང་སེམས་ཅན་མེད་པ་དང་བརྟན་པ་དང་བརྟན་པ་མ་ཡིན་པ་དང་ཞི་བ་དང་ཞི་བ་མ་ཡིན་པ་དང་འདུས་བྱས་
དང་འདུས་མ་བྱས་དང་ཐེར་ཟུག་དང་ཐེར་ཟུག་མ་ཡིན་པ་དང་ཡོངས་སུ་མྱ་ངན་ལས་འདས་པ་དང་ཡོངས་སུ་མྱ་ངན་ལས་འདས་པ་མ་ཡིན་པ་ལ་སོགས་པའི་ཁྱད་པར་དང་ཁྱད་པར་དུ་འཕགས་པ་ཤེས་པར་འདོད་པ་ཤ་སྟག་སྟེ། འདི་
ལྟ་སྟེ་དགེ་བསྙེན་འོད་དྲི་མ་མེད་པར་གྲགས་པའི་རྒྱལ་པོ་ཞེས་བྱ་བ་དང་། དགེ་བསྙེན་རབ་སྦྱིན་ལ་སོགས་པ་དགེ་བསྙེན་ཐེག་པ་ཆེན་པོ་ཐོས་པར་འདོད་ལ་ཐོས་ནས་ཀྱང་གཞན་དག་ལ་བསྟན་པར་བྱའོ་སྙམ་དུ་དམ་བཅས་ཤིང་

49-1-4b

ཚུལ་ཁྲིམས་བླངས་པ། ཐེག་པ་ཆེན་པོས་སྐོམ་ལ་ངོམས་ནས་ཀྱང་གཞན་སྐོམ་པ་དག་ངོམས་པར་བྱའོ་སྙམ་དུ་དམ་བཅས་པ་ཐེག་པ་ཆེན་པོ་ལ་སྲེད་པ། ཐེག་པ་ཆེན་པོ་ལ་སེར་སྣ་མེད་པ་འཇིག་རྟེན་ཐམས་ཅད་དང་འཐུན་པར་
བྱེད་ནུས་པ་ཤ་སྟག་དང་བདག་ཅག་རྒལ་ནས་གཞན་བསྒྲལ་བར་བྱའོ། །བདག་ཅག་གྲོལ་ནས་གཞན་དགྲོལ་བར་བྱའོ། །དཀོན་མཆོག་གསུམ་གྱི་གདུང་མི་ཆད་པར་བྱའོ། །ཆོས་ཀྱི་འཁོར་ལོ་བསྐོར་བར་བྱའོ་སྙམ་དུ་སློབ་པར་འདོད་
པ། གོ་ཆ་ཆེན་པོ་བགོས་པ་བསླབ་པ་རྣམས་ལ་སེམས་གུས་པ་དང་། དེ་བཞིན་དུ་ཡོན་ཏན་གྲངས་མེད་པ་དང་ལྡན་པ། བུ་གཅིག་པ་ལ་བྱ་བ་བཞིན་དུ་སེམས་ཅན་ཐམས་ཅད་ལ་སྙིང་རྗེ་དང་ལྡན་པ་ཤ་སྟག་སྟེ། དེ་དག་ཀྱང་ཉི་མ་
འཆར་ཀར་དེ་བཞིན་གཤེགས་པའི་གདུང་ཞུགས་ལ་བཞེན་པའི་ཕྱིར་རེ་རེས་ཀྱང་ཙན་དན་དང་ཨ་ག་རུ་དང་ཐང་ཤིང་གི་མཆོག་དང་ཙན་དན་ས་མཆོག་པའི་བུད་ཤིང་རྣམས་དང་ཡམ་སྲེག་ཤིང་དྲི་བསུང་དང་ལྡན་པ་ཡོན་ཏན་ཅན་ལྔ་སྟོང་ལྔ་སྟོང་
ཁྱེར་ཏེ་འོངས་སོ། །དེ་ལ་ཡམ་སྲེག་ཤིང་སྣ་རེ་ཞིང་ཡང་གསེར་ཀྱི་སྐུད་པ་རིན་པོ་ཆེ་སྣ་བདུན་རིགས་བདུན་དང་ལྡན་པས་སྤྲས་པས་དཀྲིས་པ། རི་མོ་ལ་བྲིས་པ་ཁོ་ན་བཞིན་དུ་འདུག་པ། རང་བཞིན་གྱིས་གཞོན་ཤ་ཅན་ལེགས་པར་
བཅོས་པ་ཤ་སྟག་སྟེ། སྣ་རེ་ཞིང་ཡང་འོད་རྣམ་པ་སྣ་ཚོགས་དང་ལྡན་པའི་ཕུང་པོ་ཆེན་པོ། མདོག་སྔོ་བ་དང་བར་བར་ཁ་གཅིག་ཏུ་མདོག་དཀར་ཁ་ཅིག་དུ་སྔོ་སྐྱ་ཁ་ཅིག་ཏུ་རྩ་དམར་ཁ་ཅིག་ཏུ་སེར་བ་མིག་དུ་སྡུག་པར་བྱ་བ་ཤ་སྟག་གོ། །བམ་
པོ་རེ་རེའི་གཡོགས་མའི་ཕྱར་བུ་ཡང་རིན་པོ་ཆེ་སྣ་བདུན་ལས་བྱས་པ་ཤ་སྟག་གོ། །ཆིངས་མའི་ཐེ་གུ་མང་པོ་རེ་རེ་ཞིང་ཡང་ལྡོང་རོས་ཀྱི་མདོག་ལྟ་བུ་དང་ཟར་མའི་མེ་ཏོག་གི་མདོག་ལྟ་བུ་དང་སྔོན་པོ་དང་སེར་པོ་རྣམས་ཀྱིས་བར་བར་དུ་སྤེལ་བ་ཤ་སྟག་
གོ། །དེ་ལ་ཆིངས་མའི་ཐེ་གུ་མང་པོ་རེ་རེ་ཞིང་ཡང་གསེར་ཐགས་ཀྱི་མཆོག་རྣམ་པར་དག་པ། ཡུལ་མང་པོར་གྲགས་པ་དག་གིས་སྤེལ་བ་ཤ་སྟག་གོ། །དེ་ལ་ཡམ་སྲེག་ཤིང་སྣ་རེ་རེ་ཞིང་ཡང་སྤོས་དྲི་བསུང་ཞིམ་པོ་དང་མེ་ཏོག་ཕྲེང་དང་། 

49-1-5a

གུར་གུམ་གྱི་ཕྱེ་མ་དང་ལྡན་པར་བྱས་པ། གསེར་ཐགས་ཀྱིས་གཡོགས་པ་དར་སྣས་བརྒྱན་པ་རིན་པོ་ཆེ་སྣ་བདུན་གྱི་ཤུགས་སྔོན་པོ་དང་སེར་པོ་དང་སྔོ་སྐྱ་དང་དཀར་པོ་དང་བཙོད་ཀ་ལྟ་བུ་དག་གི་ནང་དུ་བཅུག་པ། 
ཡུལ་ཀ་ལིང་ཀའི་རས་དང་ཟར་མའི་རས་དང་ཟབ་དར་དང་། རྒྱ་དར་གྱི་མཆོག་རྣམས་ཀྱིས་དཀྲིས་པ། མེ་ཏོག་མང་པོས་བརྒྱན་པ་བྱུག་པ་དྲི་བསུང་ཞིམ་པོ་དག་གིས་བྱུགས་པ་ཤ་སྟག་གོ། །ཡམ་སྲེག་ཤིང་སྣ་རེའི་ཤིང་རྟ་རེ་རེ་
ཞིང་ཡང་རིན་པོ་ཆེ་སྣ་བདུན་གྱིས་བརྒྱན་པ་གསེར་གྱིས་མཛེས་པར་བྱས་པ་ཁ་ཅིག །ཁ་ཅིག་དུ་སྔོན་པོ་དང་དཀར་པོ་དང་བབ་ལའི་ཁ་དོག་དང་ལི་ཁྲིའི་ཁ་དོག་པས་ལྷག་པའི་འོད་གསལ་བ་དང་ལྡན་པ་ཤ་སྟག་གོ། །ཤིང་རྟ་དེ་དག་གི་
གཉའ་ཤིང་རྣམས་ཀྱང་རིན་པོ་ཆེ་སྣ་བདུན་གྱིས་བརྒྱན་པ། དཔེ་མེད་པ་རྟ་ཅང་ཤེས་མགྱོགས་པ་དག་དང་སྦྱར་བ་ཤ་སྟག་གོ། །རྟ་དེ་དག་ཀྱང་རླུང་གི་ཤུགས་པས་མགྱོགས་པ། སྤུ་ཁ་ཆུ་སྐྱར་གྱི་མདོག་དང་ལྡོང་རོས་ཀྱི་མདོག་དང་། 
སྤྲིན་གྱི་མདོག་ཅན་ཤ་སྟག་སྟེ། ཐབས་དེ་འདྲ་བའི་ཤིང་རྟ་རེ་རེའི་མདུན་ལོགས་དང་རྒྱབ་ལོགས་སུ་རྒྱལ་མཚན་དང་བ་དན་བསྒྲེང་སྟེ། རྒྱལ་མཚན་ཐམས་ཅད་ཀྱང་རིན་པོ་ཆེ་ལས་བྱས་པ་གསེར་གྱི་དྲ་བས་གཡོགས་པ་ཤ་སྟག་གོ། །
རྒྱལ་མཚན་གྱི་མདུན་ལོགས་སུ་ཡང་གདུགས་རྩིབས་དང་རྩ་བ་ནོར་བུ་དྲི་མ་མེད་པ་འོད་ཅན་ལས་བྱས་པ་མུ་ཏིག་གི་ཆུན་པོ་སྤྱངས་པ་ཤ་སྟག་ཁྱེར་རོ། །གདུགས་རེ་རེའི་མདུན་ལོགས་སུ་ཡང་གསེར་གྱི་མེ་ཏོག་ཀུ་མུ་ད་དང་ཨུད་པ་ལ་དང་། 
པདྨ་དཀར་པོ་སྡོང་བུ་བཻ་དཱུརྱ་ལས་བྱས་པ། ཟེ་བ་རྡོ་རྗེ་ལས་བྱས་པ་བུང་བ་མང་པོ་སྐད་འབྱིན་པ་དྲི་བསུང་ཞིམ་པོ་དང་ལྡན་པ། ཡིད་དུ་འོང་བ་འོད་དང་ལྡན་པ་ཆེ་བ་མང་བ་ཤ་སྟག་དང་ལྡ་ལྡི་ཆེན་པོ་ཤ་སྟག་ཁྱེར་རོ། །ལྡ་ལྡི་ཆེན་པོ་
རྣམས་ཀྱི་མདུན་དུ་ཡང་བྱང་ཆུབ་སེམས་དཔའི་སྐྱེས་པའི་རབས་ཀྱི་སྤྱོད་པ་རི་མོར་བྲིས་པ་ཆེན་པོ་དག་ཐོགས་སོ། །རི་མོའི་གཟུགས་རེ་རེའི་གློ་གཡས་གཡོན་ནས་ཀྱང་། ཟློས་གར་གྱི་གར་ཐབས་ཡུལ་དབུས་ནས་བྱུང་བ་རྣམ་པ་སྣ་

49-1-5b

ཚོགས་བྱེད་དེ། གར་ཐབས་བྱེད་པ་དེའི་ནང་ན་སིལ་སྙན་རིན་པོ་ཆེ་ལས་བྱས་པའི་རྫ་རྔ་དང་ཁར་རྔ་དང་རྔ་ཟླུམ་དང་པི་བང་དང་གླིང་བུ་དང་པི་བང་རྒྱུད་གཅིག་པ་དང་རྔ་བོ་ཆེ་དང་དུང་ལ་སོགས་པ་དག་བརྡུང་ཞིང་འབུད་དོ། །གར་ཐབས་ཀྱི་
སིལ་སྙན་དེ་དག་ལས་ཀྱང་ཀྱེ་མ་འཇིག་རྟེན་སྟོངས་པར་འགྱུར་རོ་ཞེས་བྱ་བ་དེ་ལྟ་བུའི་རྣམ་པ་བརྗོད་ཅིང་གདུང་གདུང་སྐད་དུ་དབྱངས་ལེན་ཏོ། །གར་ཐབས་ཀྱི་སིལ་སྙན་རེ་རེའི་མདུན་དུ་ཡང་མེ་ཏོག་དྲི་ཞིམ་པོ་སྣ་ཚོགས་རྣམ་པར་འཚེར་བ་
རྣམས་ཀྱི་ཕྱེ་མས། རིན་པོ་ཆེའི་སྐོན་བུ་ལེགས་པར་བཅོས་པ་གཞོན་ཤ་ཅན་དག་བཀང་བ་ཤ་སྟག་དང་། དེ་མ་ཡིན་པའི་སྐོན་བུ་མང་པོ་བལྟ་ན་སྡུག་པ། གུར་གུམ་གྱི་ཕྱེ་མས་བཀང་བ་ཤ་སྟག་ཐོགས་སོ། །དེ་དག་གི་མདུན་དུ་ཡང་
བཅོམ་ལྡན་འདས་དགེ་སློང་གི་དགེ་འདུན་གྱི་འཁོར་དང་བཅས་པ་ཁྱབ་པར་འགྱུར་བའི་ཞལ་ཟས་དག་ཁྱེར་ཞིང་འདོང་ངོ་། །ཞལ་ཟས་དེ་དག་ཀྱང་བུད་ཤིང་ཙན་དན་དམར་པོ་དང་ཨ་ག་རུ་དང་ཐང་ཤིང་གི་མེ་ཆུང་ངུས་བཙོས་པ་དང་གང་གཱའི་
ཀླུང་གི་ཆུས་བཙོས་པ་ཤ་སྟག་སྟེ། སྐྱུར་བ་དང་ལན་ཚྭའི་རོ་དང་མངར་བ་དང་སྐ་བ་དང་ཚ་བ་དང་ཁ་བའི་རོ་དང་ལྡན་པ་མདངས་སྐྱེད་པ་ཕན་པར་འགྱུར་བ་ཤ་སྟག་གོ། །ས་ལ་ཟུང་གི་དྲུང་གི་ཉེན་ཀོར་ཐམས་ཅད་ཀྱང་གསེར་གྱི་བྱེ་མ་འཇམ་
པོས་བདལ་ཏེ། ག་བུ་ཤའི་རས་དང་སྣམ་བུ་དང་བཙོས་སྣམ་དང་དྲེའུ་རྔོག་དང་ཀ་ལིང་ཀའི་རས་དང་ཟབ་དར་འཇམ་ཞིང་མདོག་དཀར་བ་རྣམས་ཀྱང་བཏིང་ངོ་། །གྲུབ་པའི་གནས་དེའི་གཞི་དཔག་ཚད་སུམ་བཅུ་རྩ་གཉིས་ཁོ་ར་ཁོར་ཡུག་
ཀྱང་གུར་གུམ་གྱིས་བྱུགས་སོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པའི་སེང་གེའི་ཁྲི་ཆེན་པོ་གསེར་ལས་བྱས་པ་རིན་པོ་ཆེ་སྣ་བདུན་གྱིས་སྤྲས་ཤིང་སྣང་བར་བྱས་པ་རི་རབ་ལྟར་ཆེ་ཞིང་འཕང་མཐོ་བ་དག་ཀྱང་བཤམས་
སོ། །གཡོགས་མ་ཡང་དེ་དག་གི་རྐྱེན་དུ་འཚམ་པ་ཤ་སྟག་གིས་གཡོགས་ཏེ། གསེར་གྱི་དྲིལ་བུ་གཡེར་ཀ་སྒྲ་སི་ལི་ལི་དང་། ཁྲོལ་ཤང་གི་སྒྲ་འབྱུང་བའི་དྲ་བ་ཅན་ཀྱི་ཡོལ་བ་རྣམས་ཀྱིས་ནི་བསྐོར། རྒྱ་དར་སྤུ་སྡུག་ཡུག་ཁྱིམ་

49-1-6a

ཆེན་པོའི་བླ་རེ་རྣམས་ནི་བྲེས། གདུགས་དཀར་པོ་རྣམས་ཀྱིས་ནི་ཉི་མཚན་བསྒྲིབས། རྔ་ཡབ་དཀར་པོ་རྣམས་ཀྱིས་ནི་གཡབས། རྒྱབ་རྟེན་གླང་པོ་ཆེའི་མཆེ་བ་ལ་ཆུ་སྲིན་མ་ཀ་ར་རྟེན་པའི་ཁ་ནས། ཟླ་བ་ཉ་
བའི་འོད་ཟེར་ལྟར་དཀར་བའི་མུ་ཏིག་གི་ཆུན་པོ་འབྱུང་ཞིང་སྤྱངས་པ་དང་ལྡན་པ་རྣམས་ནི་བཅས། ས་ཕྱོགས་རྣམས་ནི་མེ་ཏོག་དྲི་ཞིམ་པོའི་སིལ་མས་གཏོར་ཏོ། །དགེ་བསྙེན་དེ་དག་རེ་རེ་ནས་ཀྱང་འདི་སྙམ་དུ་སེམས་ཏེ། བདག་གིས་
སེམས་ཅན་ཐམས་ཅད་ལ་ཟས་འདོད་པ་རྣམས་ལ་ནི་ཟས་སྦྱིན་ནོ། །སྐོམ་འདོད་པ་རྣམས་ལ་ནི་སྐོམ་སྦྱིན་ནོ། །མགོ་བོ་དང་མིག་ལ་སོགས་པ་ཡན་ལག་དང་ཉིང་ལག་ཐམས་ཅད་འདོད་པ་རྣམས་ལ་ཡང་ཇི་ལྟར་འདོད་པ་བཞིན་དུ་སྦྱིན་
ནོ། །དབུལ་པོ་དང་བཀྲེན་པ་དང་ཕོངས་པ་རྣམས་ལ་ཡང་འདོད་པ་དང་དུག་དང་གནོད་པ་དང་མ་བརྟགས་པའི་སྦྱིན་པ་རྣམས་མ་གཏོགས་པར་གང་དང་གང་དག་ཅི་དང་ཅི་འདོད་པ་དེ་དང་དེ་དག་ཆོག་པར་སྦྱར་རོ་སྙམ་དུ་སེམས་ཀྱི། གཞན་ནི་
ཅི་ཡང་མི་སེམས་སོ། །དེ་བཞིན་དུ་དགེ་བའི་བཤེས་གཉེན་གྱི་སྡེ་ཚན། བྱང་ཆུབ་སེམས་དཔའི་སྤྱོད་པ་ལ་གནས་པ་དེ་དག་ཐམས་ཅད་ཀྱིས་བསམས་པ། དེ་བཞིན་གཤེགས་པ་ལ་བདག་གིས་བཤོས་གསོལ་ཏེ་ཡོངས་སུ་མྱ་
ངན་ལས་འདའ་བར་བྱའོ། །དེ་བཞིན་གཤེགས་པ་ལ་བདག་གིས་བཤོས་གསོལ་ཏེ། ཡོངས་སུ་མྱ་ངན་ལས་འདའ་བར་བྱའོ་སྙམ་སྟེ། སོ་སོ་ནས་དེ་འབའ་ཞིག་སྙིང་ལ་སེམས་ཤིང་ཡན་ལག་ཐམས་ཅད་ཀྱི་བ་སྤུ་རྒྱ་སྐྱེགས་
ཀྱི་ཤིང་གི་མེ་ཏོག་ལྟར་རྩ་དམར་བ་ནི་ལངས། མིག་ནི་མཆི་མ་ཁྲག་ལྟ་བུས་གང་སྟེ། མཆོག་དུ་སྡུག་བསྔལ་བའི་ཚོར་བ་དང་ལྡན་ནས། རང་རང་གི་མཆོད་པའི་ཡོ་བྱད་བུད་ཤིང་དང་ཡམ་སྲེག་ཤིང་དང་ཤིང་རྟ་དང་རྒྱལ་མཚན་དང་
གདུགས་དང་བ་དན་རྣམས་དང་ཆས་ཏེ་ཞལ་ཟས་ཀྱི་མཆོག་གིས་སྒྱུར་བའི་སྣོད་རྣམས་ཐོགས་ནས། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་

49-1-6b

འདས་ལ་སྤོས་དང་མེ་ཏོག་ཕྲེང་དང་། ཕྱེ་མ་དང་ཕྱེ་མ་ཞིབ་བུ་དང་གདུགས་དང་རྒྱལ་མཚན་དང་བ་དན་དང་བླ་རེ་རྒྱ་ཆེན་པོ་དག་གིས་མཆོད་ནས་ལན་འབུམ་བསྐོར་བ་བྱས་ཏེ། མིག་ནས་མཆི་མ་རྒྱུན་མི་ཆད་པར་ཆར་བཞིན་དུ་ཕབ་ནས། བདག་
ཉིད་ལ་སྡུག་བསྔལ་གྱི་རྣམ་པ་མང་པོ་བྱེད་ཅིང་། ཀྱེ་མ་འཇིག་རྟེན་སྟོངས་པར་འགྱུར་རོ། །ཀྱེ་མ་འཇིག་རྟེན་སྟོངས་པར་འགྱུར་རོ་ཞེས་དེ་སྐད་དུ་སྐད་པོ་ཆེ་འདོན་ཏེ། དེ་བཞིན་གཤེགས་པའི་ཞབས་དྲུང་ན་སྲོག་ཆགས་ཤི་ཤུ་མ་ར་བཞིན་
དུ་འགྲེ་ལྡོག་ཅིང་གསོལ་བ་འདེབས་ཏེ། བཅོམ་ལྡན་འདས་དེ་བཞིན་གཤེགས་པ་དགེ་སློང་གི་དགེ་འདུན་གྱི་འཁོར་དང་བཅས་པས་བདག་གིས་སྦྱར་བའི་བཤོས་གསོལ་བར་ཅི་གནང་། བཅོམ་ལྡན་འདས་བདག་ལ་ཐུགས་བརྩེ་བའི་
སླད་དུ་སྦྱིན་པའི་ཐ་མ་དེ་བཞིན་གཤེགས་པས་བཞེས་སུ་གསོལ་ཞེས་གསོལ་བ་འདེབས་སོ། །དེ་ནས་བཅོམ་ལྡན་འདས་ཐམས་ཅད་མཁྱེན་བཞིན་དུ་ཅང་མི་གསུང་བར་གྱུར་ཏོ། །དེ་དག་གིས་ལན་གཉིས་ལན་གསུམ་དུ་དེ་སྐད་ཅེས་གསོལ་ཀྱང་། 
ལན་གཉིས་ལན་གསུམ་དུ་བཅོམ་ལྡན་འདས་ཅང་མི་གསུང་བར་གྱུར་ཏོ། །དེ་ནས་དགེ་བསྙེན་གྱི་ཚོགས་དེ་དག་རེ་ཐག་ཆད་དེ་ཅང་མི་ཟེར་བར་འཁོད་ནས། བུ་གཅིག་པ་ཤི་ནས་དུར་ཁྲོད་དུ་བོར་མ་ཐག་པའི་ཕ་མ་འགྲེ་ལྡོག་པ་བཞིན་དུ་ཤིན་
ཏུ་སྡུག་བསྔལ་བར་གྱུར་ཏོ། །དེ་བཞིན་དུ་དགེ་བསྙེན་དེ་དག་ཐམས་ཅད་མཆོག་ཏུ་སྡུག་བསྔལ་བར་གྱུར་པ་ལས་ལངས་ཏེ། རང་རང་གི་མཆོད་པའི་ཡོ་བྱད་རྣམས་བསྡུས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་བསླབ་
པའི་གཞི་ལྔ་བླངས་ཤིང་ཚུལ་ཁྲིམས་དང་ཆོ་ག་དང་ཡོན་ཏན་དང་ལྡན་པ་དང་དམ་པའི་ཆོས་ཀྱི་གཅེས་པ་འཛིན་པའི་དགེ་བསྙེན་མ་ཚོང་དཔོན་གྱི་བུ་མོ་འཚོ་བའི་དཔལ་ལ་སོགས་པ་དགེ་བསྙེན་མ་གང་གཱའི་ཀླུང་གསུམ་གྱི་བྱེ་མ་སྙེད་ཐམས་ཅད་ཀྱང་
བུད་མེད་ཀྱི་གཟུགས་ཀྱིས་སེམས་ཅན་བྱེ་བ་ཕྲག་མང་པོ་ངེས་པར་སྒྲོལ་བ། ཁྱིམ་གྱི་གནས་ལ་སྨོད་པ་ཤ་སྟག་སྟེ། ལུས་འདི་ནི་ཉེས་པའི་ཁམས་བརྒྱད་བཅུ་རྩ་བཞི་ལས་ལྷགས་པས་བསྡུས་པའོ། །ལུས་འདི་ནི་སྲིན་བུའི་རིགས་བྱེ་བ་ཕྲག་

49-1-7a

བརྒྱད་བཅུ་རྩ་བཞིའི་ཟས་སོ། །ལུས་འདི་ནི་རྒྱལ་པོའི་ཁྲི་མོན་དུ་བྲུབས་པའི་དྲི་མ་མནམ་པའོ། །ལུས་འདི་ནི་ཁྱི་རོ་རུལ་པའི་དྲི་བམ་གྱིས་ལྷག་པར་སྦགས་པའོ། །ལུས་འདི་ནི་སྒོ་དགུ་ནས་མི་གཙང་བ་འཛག་པའོ། །
ལུས་འདི་ནི་ཤ་དང་ཆུ་བ་དང་རུས་པ་དང་ཁྲག་དང་ལྤགས་པའི་ཞལ་ཞལ་ཅན་རྐང་ལག་གི་ཕྱི་སྒོ་དང་ར་བ་དང་བ་གམ་ཅན། མིག་གི་སྐར་ཁུང་ཅན། མགོ་བོའི་ཡང་ཏོག་ཅན། ཡིད་རྒྱལ་པོ་ལྟ་བུའི་ཕོ་བྲང་གྲོང་ཁྱེར་ལྟ་བུའོ། །ལུས་འདི་ནི་
མཁས་པ་ཐམས་ཅད་ཀྱིས་སྤངས་ཤིང་བྱིས་པའི་སྐྱེ་བོ་དགའ་བར་བྱེད་པའི་འདོད་ཆགས་དང་ཞེ་སྡང་དང་གཏི་མུག་ལ་སོགས་པའི་ཉོན་མོངས་པ་བྱེ་བ་སྙེད་ཀྱི་སྲིན་པོ་བརྟེན་པ། འདམ་བུ་དང་ཨེ་རན་ཊ་དང་དབུ་བ་དང་ཆུ་ཤིང་ལྟ་བུར་སྙིང་པོ་མེད་པ། 
གློག་དང་རི་གཟར་པོའི་འབབ་ཆུའི་དབའ་རླབས་ལྟར་ཤིན་ཏུ་མི་བརྟན་པའོ། །སྒྱུ་མ་དང་སྨིག་རྒྱུ་དང་བྲག་ཆ་དང་ཟླ་བའི་གཟུགས་བརྙན་ལྟར་སླུ་བར་བྱེད་པ། རླུང་ཤུགས་དྲག་པོས་རྣམ་པར་དཀྲུགས་པའི་ཆུའི་ཤུགས་ཀྱིས་བརྐོས་པའི་འགྲམ་གྱི་
སྡོང་པོ་ལྟར་གཡང་ས་ན་འདུག་པའི་ཆོས་ཅན། སྤྱང་ཀི་དང་ཝ་དང་བྱ་རྒོད་དང་བྱ་རོག་རྣམས་ཀྱི་ཟས་ཡིན་ན་སུ་ཞིག་འདི་ལྟ་བུ་འཆང་བ་ལ་དགའ་བར་བྱེད། རྒྱ་མཚོའི་ཆུ་ཐམས་ཅད་སྐྲའི་རྩེ་མོས་བླངས་ཏེ། བ་ལང་གི་རྨིག་རྗེས་སུ་
བླུགས་པར་ནི་ནུས་སྲིད་ཀྱི། ལུས་ནད་བཞི་བརྒྱ་རྩ་བཞིས་གཟིར་བ་འདི་སྙིང་པོ་མེད་པ་འམ་མི་གཙང་བ་ནི་ཚིག་ཙམ་གྱིས་བསྟན་པར་མི་ནུས་སོ། །ས་ཆེན་པོ་འདི་རྒྱ་ཤུག་གི་འབྲས་བུའི་རུས་པའི་འབྲུ་ཙམ་ཤ་སྟག་དུ་བྱས་པའམ་ཡུངས་འབྲུ་
ཙམ་འམ་རྡུལ་ཕྲ་རབ་ཀྱི་རྡུལ་ཙམ་ཤ་སྟག་དུ་བྱས་པས་ནི་ཟད་པར་འགྱུར་ཡང་སྲིད་ཀྱི། ལུས་འདི་ཡོད་ཀྱི་བར་དུ་འདིའི་ཉེས་དམིགས་ནི་མཐར་ཐུག་པར་མི་འགྱུར་ཏེ། དེ་བས་ན་དམ་པའི་ཆོས་བསྲུང་བའི་ཕྱིར་འདི་མཆིལ་མ་བཞིན་དུ་དོར་
བར་བྱའོ་སྙམ་སྟེ། འདི་ལྟར་དགེ་བསྙེན་མ་དེ་དག་ཐམས་ཅད་ཆེན་པོ་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་བསྒོམས་པས་སེམས་བསྒོམས་པ་ཤ་སྟག་སྟེ། འདི་ལྟ་སྟེ་དགེ་བསྙེན་མ་འཚོ་བའི་དཔལ་ཞེས་བྱ་བ་དང་། དགེ་

49-1-7b

བསྙེན་མ་དཔལ་ཕྲེང་ཞེས་བྱ་བ་དང་། དགེ་བསྙེན་མ་ས་ག་ཞེས་བྱ་བ་དང་། དེ་ལ་སོགས་པ་ཐམས་ཅད་ཀྱང་ཐེག་པ་ཆེན་པོ་ཐོས་པར་འདོད་ལ། ཐོས་ནས་ཀྱང་གཞན་དག་ལ་བསྟན་པར་བྱའོ་སྙམ་དུ་དམ་བཅས་པ། བསྲུང་བ་
ལྷུར་ལེན་པ་བུད་མེད་ཀྱི་ལུས་ངན་ནོ་སྙམ་དུ་སྨོད་པ་དང་ལུས་སྙིང་པོ་མེད་དོ་སྙམ་དུ་སྨོད་པ་སོ་སོ་ནས་ཤས་ཆེར་སྒོམ་པ་དང་། འཁོར་བའི་འཁོར་ལོ་གཞིག་གོ་སྙམ་དུ་སེམས་པ་ཤ་སྟག་དང་། ཐེག་པ་ཆེན་པོས་སྐོམ་ལ་ངོམས་ནས་
ཀྱང་གཞན་སྐོམ་པ་དག་ངོམས་པར་བྱའོ་སྙམ་དུ་དམ་བཅས་པ་ཤ་སྟག་དང་། ཐེག་པ་ཆེན་པོ་ལ་སྲེད་པ་ཐེག་པ་ཆེན་པོ་ལ་སེར་སྣ་མེད་པ། འཇིག་རྟེན་ཐམས་ཅད་དང་འཐུན་པར་སློབ་པར་འདོད་པ་དང་། གྲོལ་ནས་གཞན་དགྲོལ་བར་བྱའོ། །
རྒལ་ནས་གཞན་བསྒྲལ་བར་བྱའོ། །དཀོན་མཆོག་གསུམ་གྱི་གདུང་མི་འཆད་པར་བྱའོ། །ཆོས་ཀྱི་འཁོར་ལོ་བསྐོར་བར་བྱའོ་སྙམ་དུ་སློབ་པར་འདོད་པ་ཤ་སྟག་དང་། གོ་ཆ་ཆེན་པོ་བགོས་པ་བསླབ་པ་རྣམས་ལ་བརྟུལ་ཞུགས་བརྟན་པ་དང་། 
དེ་བཞིན་དུ་ཡོན་ཏན་དུ་མ་དང་ལྡན་པ་དང་བུ་གཅིག་པ་ལ་བྱ་བ་བཞིན་དུ་སེམས་ཅན་ཐམས་ཅད་ལ་སྙིང་རྗེ་དང་ལྡན་པ་ཤ་སྟག་སྟེ། དེ་དག་ཀྱང་ཉི་མ་འཆར་ཀར་ཤིན་དུ་རིངས་པར་གཅིག་ལ་གཅིག་འཇུས་ཏེ། དེ་བཞིན་གཤེགས་པའི་གདུང་ཞུགས་
ལ་བཞེན་པའི་ཕྱིར། ཡམ་སྲེག་ཤིང་དགེ་བསྙེན་ཕ་རྣམས་ཀྱི་ཉིས་འགྱུར་ཁྱེར་བ་ལས་བཅོམ་ལྡན་འདས་ཀྱིས་ཞལ་ཟས་མ་བཞེས་ནས། བུ་ཤི་བ་བཞིན་དུ་མཆོག་ཏུ་སྡུག་བསྔལ་བར་གྱུར་ཏེ། ངུས་ནས་ལངས་ཏེ་ཕྱོགས་གཅིག་ཏུ་འཁོད་དོ། །
གཞན་ཡང་དེའི་ཚེ་ལིད་ཙ་བི་གཞོན་ནུ་གཙང་མ་དྲི་མ་མེད་པའི་སྙིང་པོ་ལ་སོགས་པ་ཡངས་པ་ཅན་ན་གནས་པའི་ལིད་ཙ་བི་གཞོན་ནུ་གྲོང་ཁྱེར་གྱི་ནང་ན་གནས་པ་དང་། ཕྱི་རོལ་ན་གནས་པ་དང་བཅས་པ་རྣམས་དང་། འཛམ་བུའི་གླིང་ན་གནས་
པའི་རྒྱལ་ཕྲན་བློན་པོ་དང་བཅས་པ་གང་གཱའི་ཀླུང་བཞིའི་བྱེ་མ་སྙེད་ཐམས་ཅད་ཀྱང་དམ་པའི་ཆོས་བསྲུང་བ་ལ་མཁས་པ། ཚུལ་ཁྲིམས་དང་ཆོ་ག་དང་ཡོན་ཏན་དང་ལྡན་པ། དམ་པའི་ཆོས་སུན་འབྱིན་ཅིང་རྟགས་ཅན་འཆལ་པ་རྣམས་ཀྱི་

49-1-8a

སེར་བ་ལྟ་བུར་གྱུར་པ་ཤ་སྟག་ལ་དེ་དག་ཐམས་ཅད་ཀྱང་འདི་ལྟ་བུར་འདོད་དེ། བདག་ཅག་གི་ནོར་དང་འབྲུའི་ཚོགས་དང་མཛོད་དང་བང་བའི་ཚོགས་གང་ཡིན་པ་དེ་དག་ཐམས་ཅད་ནི་བདུད་རྩི་མི་ཟད་པར་བྱ་བ་དང་བདུད་རྩི་གནས་
པར་བྱ་བའི་ཕྱིར་ཡིན་གྱིས། བདག་ཅག་གིས་དམ་པའི་ཆོས་ལ་ནན་ཏན་བྱའོ། །དམ་པའི་ཆོས་ལ་སུན་འབྱིན་ཅིང་ལོག་པར་ལྟ་བ་རྣམས་ཀྱི་ལྕེ་བཅད་པར་བྱའོ་ཞེས་ལེགས་པར་དམ་བཅས་པ་ཚུལ་ཁྲིམས་འཆལ་པ་ཚུལ་ཁྲིམས་ལ་
མི་གནས་པ་རྣམས་ནི་གོས་དཀར་པོ་གྱོན་དུ་བཅུག་སྟེ། ཁྱིམ་པའི་ལས་བྱེད་དུ་གཞུག་གོ་སྙམ་དུ་སེམས་བརྟུལ་བ། དམ་པའི་ཆོས་སྟུག་པ་ལ་ནི་བླ་མ་བཞིན་དུ་རིམ་གྲོ་བྱའོ་སྙམ་དུ་དམ་བཅས་པ། དགེ་འདུན་ལ་ཕན་པ་དང་བདེ་བར་
གནས་པར་བྱ་བའི་ཡོངས་སུ་རྫོགས་པར་བྱས་ཀྱང་དེས་ཆོག་གོ་སྙམ་དུ་སེམས་པ་དང་ཐེག་པ་ཆེན་པོ་ཐོས་པར་འདོད་ལ་ཐོས་ནས་ཀྱང་གཞན་དག་ལ་བསྟན་པར་བྱའོ་སྙམ་དུ་ཡི་དམ་བཅས་པ་ལ་བརྟན་པ་དང་། དེ་ལ་སོགས་པའི་ཡོན་ཏན་དཔག་ཏུ་
མེད་པ་དང་ལྡན་པ་ཤ་སྟག་སྟེ། འདི་ལྟ་སྟེ་ལི་ཙ་བི་གཞོན་ནུ་གཙང་མ་དྲི་མ་མེད་པའི་སྙིང་པོ་ཞེས་བྱ་བ་དང་། སྒྲིབ་པ་དག་པ་ཞེས་བྱ་བ་དང་། གང་གཱའི་ཆུ་དྲི་མ་མེད་པས་བྱིན་པ་ཞེས་བྱ་བ་དང་། དེ་ལ་སོགས་པ་ལི་ཙ་བི་གཞོན་ནུ་དེ་དག་
ཀྱང་གཅིག་ལ་གཅིག་འཇུས་ཏེ། རེ་རེས་ཀྱང་གདུང་ཞུགས་ལ་བཞེན་པའི་བུད་ཤིང་ཐང་ཤིང་གི་མཆོག་དང་ཙན་དན་དང་ཨ་ག་རུ་རྣམས་དང་ཡམ་སྲེག་ཤིང་བྱེ་བ་ཕྲག་བརྒྱད་བཅུ་རྩ་བཞི་དང་། མཆོད་པ་སྔ་མའི་ཉིས་གྱུར་རྣམས་ཁྱེར་ནས་
མཆོད་པ་རྣམས་བསྒྲགས་ཏེ། བཅོམ་ལྡན་འདས་ཀྱི་ཐད་དུ་དོང་ངོ་། །ལིད་ཙ་བི་གཞོན་ནུ་རེ་རེ་ལ་ཡང་གླང་པོ་ཆེ་བརྒྱད་ཁྲི་བཞི་སྟོང་དང་རྟ་བརྒྱད་ཁྲི་བཞི་སྟོང་དང་ཤིང་རྟ་བརྒྱད་ཁྲི་བཞི་སྟོང་དང་ཆས་སོ་ནོར་བུ་ཆུ་ཤེལ་བརྒྱད་ཁྲི་བཞི་སྟོང་དང་ཆོས་གླང་པོ་ཆེ་རེ་
རེའི་མདུན་དུ་ཡང་། ཆེ་བ་ལ་འོས་པའི་གདུགས་དང་རྒྱལ་མཚན་དང་བ་དན་དང་དར་གྱི་བླ་རེ་ཆེན་པོ་རྣམས་ཐོགས་སོ། །གདུགས་རྣམས་ཀྱི་ནང་ན་ཐུང་ངུ་གང་ཡིན་པ་དེ་ལ་ཡང་། ཁོ་ར་ཁོར་ཡུག་དུ་དཔག་ཚད་གཅིག་ཡོད་དོ། །དར་

49-1-8b

གྱི་བླ་རེ་ཆེན་པོ་རྣམས་ཀྱི་ནང་ན་ཆུང་ངུ་གང་ཡིན་པ་དེ་ལ་ཡང་ཆུ་ཞེང་དུ་དཔག་ཚད་སུམ་བཅུ་རྩ་གཉིས་ཡོད་དོ། །རྒྱལ་མཚན་རྣམས་ཀྱི་ནང་ན་ཐུང་ངུ་གང་ཡིན་པ་དེ་ལ་ཡང་འཕང་དུ་དཔག་ཚད་བརྒྱ་ཡོད་དོ། །བ་དན་རྣམས་ཀྱི་ནང་ན་ཐུང་ངུ་
གང་ཡིན་པ་དེས་ཀྱང་དཔག་ཚད་སྟོང་དུ་ཕྱིན་ཏོ། །དེ་ལྟར་དེ་དག་མཆོད་པ་རྣམས་དང་བཅས་ཏེ་བཅོམ་ལྡན་འདས་ཀྱི་ཐད་དུ་དོང་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཞལ་ཟས་ཕུལ་བ་ལས་བཅོམ་ལྡན་
འདས་ཅང་མི་གསུང་སྟེ། མ་བཞེས་ནས་མཆོག་ཏུ་སྡུག་བསྔལ་བར་གྱུར་ཏེ། རེ་ཐག་ཆད་ནས་ལངས་ཏེ་བཅོམ་ལྡན་འདས་ཀྱི་མཐུས་ཏ་ལ་བདུན་གྱི་སྲིད་ཙམ་དུ་འཕགས་ཏེ་འཁོད་དོ། །གཞན་ཡང་དེའི་ཚེ་འཛམ་བུ་གླིང་པའི་བློན་པོ་དང་། ཚོང་
དཔོན་དང་། ཁྱིམ་བདག་གང་གཱ་ལྔའི་བྱེ་མ་སྙེད་ཐམས་ཅད་ཀྱང་། ཐེག་པ་ཆེན་པོ་ལ་དད་པ། ཚུལ་ཁྲིམས་དང་ཆོ་ག་དང་ཡོན་ཏན་རྣམ་པར་དག་པ་དང་ལྡན་པ། དམ་པའི་ཆོས་སུན་འབྱིན་པ་རྣམས་ཀྱི་སེར་བ་ལྟ་བུར་གྱུར་པ་ཤ་སྟག་སྟེ། འདི་
ལྟ་སྟེ་ཁྱིམ་བདག་གི་རྒྱལ་པོ་རྣམ་པར་སྣང་བྱེད་ཅེས་བྱ་བ་དང་འགྲོ་བ་སྐྱོང་ཞེས་བྱ་བ་དང་ཆོས་སྐྱོང་ཞེས་བྱ་བ་དང་དེ་ལ་སོགས་པ་དག་ཀྱང་དེའི་ཚེ་དེར་ལྷགས་ཏེ། དེ་དག་ཐམས་ཅད་ཀྱིས་ཀྱང་རང་རང་གི་མཆོད་པས། མཆོད་པ་སྔ་མ་རྣམས་ཟིལ་གྱིས་
མནན་ནས། བཅོམ་ལྡན་འདས་ལ་མཆོད་པ་ཆེན་པོའི་ཚོགས་ཀྱིས་མཆོད་ནས་ཞལ་ཟས་མ་བཞེས་པའི་ཕྱིར། མཆོག་ཏུ་སྡུག་བསྔལ་བར་གྱུར་ཏེ་རེ་ཐག་ཆད་ནས་ལངས་ཏེ། བཅོམ་ལྡན་འདས་ཀྱི་མཐུས་ཏ་ལ་བདུན་གྱི་སྲིད་ཙམ་དུ་
འཕགས་ཏེ་འཁོད་དོ། །གཞན་ཡང་དེའི་ཚེ་རྒྱལ་པོ་མ་སྐྱེས་དགྲ་མ་གཏོགས་པར་ཡངས་པ་ཅན་གྱི་རྒྱལ་པོ་ཟླ་བ་དྲི་མ་མེད་པའི་སྙིང་པོ་གྲོང་ཁྱེར་གྱི་ནང་ན་གནས་པ་དང་ཕྱི་རོལ་ན་གནས་པའི་གཡོག་འཁོར་དང་བཅས་པ་ལ་སོགས་པ་འཛམ་བུ་གླིང་
ཐམས་ཅད་ཀྱི་གྲོང་ཁྱེར་དང་རི་ཁྲོད་ཀྱི་གྲོང་དང་ཡུལ་པོ་ཆེ་དང་ཁ་ལུངས་ཀྱི་རྒྱལ་པོ་གང་གཱའི་ཀླུང་དྲུག་གི་བྱེ་མ་སྙེད་དང་ལྷན་ཅིག་ཏུ་དཔུང་གི་ཚོགས་ཡན་ལག་བཞི་དང་བཅས་ཏེ་ལྷགས་སོ། །རྒྱལ་པོ་དེ་རྣམས་རེ་རེ་ལ་ཡང་དམག་འཁྲུག་

49-1-9a

ས་ཡ་ཕྲག་བཅྭ་བརྒྱད་བཅྭ་བརྒྱད་ཡོད་དོ། །དེ་དག་ལ་གླང་པོ་ཆེ་རྟག་ཏུ་འགྲམ་པ་ནས་རྔུལ་འཛག་པ་དག་དང་། རྟ་རླུང་གི་ཤུགས་པས་ལྷག་པར་མགྱོགས་པ་དག་ཀྱང་ཡོད་དོ། །དེ་དག་གི་མཆོད་པའི་ཡོ་བྱད་གང་ཡིན་
པ་དེ་དག་ཀྱང་མཆོད་པའི་ཡོ་བྱད་སྔ་མ་དེ་དག་ལས་ཉིས་གྱུར་གྱིས་ཆེས་བཟང་ལ་ཆེས་མང་སྟེ། དེ་ལྟ་བུའི་མཆོད་པའི་ཕུལ་དག་ཁྱེར་ནས། དཔུང་གི་ཚོགས་ཡན་ལག་བཞི་དང་བཅས་ཏེ་ལྷགས་སོ། །དེ་དག་གི་མཆོད་པ་དེ་རྣམས་ཀྱི་ནང་ན་
གདུགས་ཐུང་ངུ་གང་ཡིན་པ་དེ་ཡང་དཔག་ཚད་བརྒྱད་བཅུ་ཆུ་ཞེང་གབ་པར་འདུག་གོ། །བ་དན་གྱི་ནང་ན་ཆུང་ངུ་གང་ཡིན་པས་ཀྱང་དཔག་ཚད་བརྒྱ་སྟོང་དུ་ཕྱིན་ཏོ། །རྒྱལ་མཚན་ཕལ་པ་གང་ཡིན་པ་དེ་ལ་ཡང་འཕང་དུ་དཔག་ཚད་སུམ་
བཅུ་ཡོད་དོ། །དེ་ལྟར་ཡངས་པ་ཅན་གྱི་རྒྱལ་པོ་ཟླ་བ་དྲི་མ་མེད་པའི་སྙིང་པོ་དང་། ཉི་འོད་ཅེས་བྱ་བ་དང་། དེ་ལ་སོགས་པ་རྒྱལ་པོ་རྣམས་ཉི་མ་འཆར་ཀར་ལྷགས་ཏེ། དེ་དག་ཀྱང་དམ་པའི་ཆོས་སུན་འབྱིན་ཅིང་རྟགས་ཅན་འཆལ་པ་
རྣམས་ཀྱི་སེར་བ་ལྟ་བུར་གྱུར་པ། མཐུས་ཀྱང་སེམས་ཅན་རྣམས་དམ་པའི་ཆོས་ལ་འགོད་པར་བྱེད་པ་དང་། བདག་ཅག་གི་ནོར་དང་འབྲུའི་ཚོགས་དང་མཛོད་དང་བང་བའི་ཚོགས་གང་ཡིན་པ་དེ་དག་ནི་དམ་པའི་ཆོས་གནས་པར་བྱ་བའི་ཕྱིར་
རོ་སྙམ་དུ་སེམས་པ་ཤ་སྟག་དང་བདག་ཅག་གིས་དམ་པའི་ཆོས་ལ་ནན་ཏན་བྱའོ། །དམ་པའི་ཆོས་སུན་འབྱིན་པ་རྣམས་ཀྱི་ལྕེ་ནི་དྲུང་ནས་བཅད་དོ་ཞེས་དམ་བཅས་པ་བརྟན་པོར་བྱས་པ་ཤ་སྟག་དང་། ཐེག་པ་ཆེན་པོ་འདོད་པ་དང་། འཇིག་
རྟེན་ཐམས་ཅད་ལ་སྙིང་བརྩེ་བ་ཤ་སྟག་སྟེ། དེ་དག་གི་མཆོད་པ་རྣམས་ཀྱིས་ཡངས་པ་ཅན་ནས་གྲོང་ཁྱེར་ཀུ་ཤིའི་བར་ཐམས་ཅད་ཀུན་ཏུ་གང་བར་གྱུར་ཏོ། །དེ་དག་གི་གདུགས་ཀྱི་གྲིབ་མ་འདབ་ཆགས་སུ་འདུག་པས་ནི་ཉི་མའི་འོད་
ཀྱིས་མི་ཕོག་གོ། །དེ་དག་གི་ཁ་ཟས་ཀྱི་དྲི་བསུང་གིས་ནི་དཔག་ཚད་བཞིར་ཁྱབ་པར་གྱུར་ཏེ། དེ་དག་གིས་བཅོམ་ལྡན་འདས་ལ་རང་རང་གིས་སྦྱར་བའི་ཞལ་ཟས་བཞེས་པར་ལན་གསུམ་གྱི་བར་དུ་གསོལ་བ་བཏབ་ཀྱང་ཞལ་ཟས་མ་

49-1-9b

བཞེས་ནས་ཡིད་མི་དགའ་སྟེ་ལངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་རྒྱལ་པོ་མ་སྐྱེས་དགྲའི་བཙུན་མོ་མ་གཏོགས་པར་ཡངས་པ་ཅན་གྱི་རྒྱལ་པོའི་བཙུན་མོ་འཇིག་རྟེན་གསུམ་ན་མཛེས་མ་ལ་སོགས་པ་འཛམ་བུ་
གླིང་པའི་རྒྱལ་པོ་དང་ཚོང་དཔོན་དང་ཁྱིམ་བདག་རྣམས་ཀྱི་ཆུང་མ་གང་གཱའི་ཀླུང་བདུན་གྱི་བྱེ་མ་སྙེད་དང་ལྷན་ཅིག་ཏུ་ལྷགས་ཏེ། དེ་དག་ཐམས་ཅད་ཀྱང་བུད་མེད་ཀྱི་གཟུགས་ཀྱིས་སེམས་ཅན་མང་པོ་ངེས་པར་སྒྲོལ་བ་རྟག་ཏུ་ལུས་བསྒོམ་
པ་དང་ལྡན་པ། ཆེན་པོ་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པས་སེམས་རྣམ་པར་དག་པ་ཤ་སྟག་སྟེ། འདི་ལྟ་སྟེ་ཡངས་པ་ཅན་གྱི་རྒྱལ་པོའི་བཙུན་མོ་འཇིག་རྟེན་གསུམ་ན་མཛེས་མ་ཞེས་བྱ་བ་དང་། བཙུན་མོ་བྲི་ཡང་
གུ་ཞེས་བྱ་བ་དང་། དེ་ལ་སོགས་པ་ཐམས་ཅད་ཀྱང་སེམས་ཅན་ཐམས་ཅད་ལ་བུ་གཅིག་པ་ལ་བྱ་བ་བཞིན་དུ་སྙིང་རྗེ་དང་ལྡན་པ་ཤ་སྟག་སྟེ། གཅིག་ལ་གཅིག་འཇུས་ནས། དེ་བཞིན་གཤེགས་པའི་གདུང་ཞུགས་ལ་བཞེན་པའི་ཕྱིར། 
ཡམ་སྲེག་ཤིང་རྣམས་ཁྱེར་ཏེ་མཆོད་པ་སྔ་མ་ཐམས་ཅད་རང་རང་གི་མཆོད་པ་རྣམས་ཀྱིས་ཟིལ་གྱིས་མནན་ནས། བཅོམ་ལྡན་འདས་ལ་ཉིས་གྱུར་དུ་མཆོད་པ་བྱས་ཏེ། དེ་དག་གི་མཆོད་པའི་ཡོ་བྱད་རྣམས་ཀྱི་
རྒྱལ་མཚན་དང་བ་དན་དང་གདུགས་རྣམས་ཀྱི་འཕང་དང་ཆུ་ཞེང་གི་ཚད་ཀྱང་སྔ་མའི་ཉིས་གྱུར་བས་ལྷགས་གོ། །ཁ་ཟས་རྣམས་ཀྱི་དྲི་བསུང་ནི་དཔག་ཚད་བརྒྱད་དུ་ཁྱབ་པར་གྱུར་ཏེ། བཅོམ་ལྡན་འདས་ལ་ཕྱག་འཚལ་
ནས་ཞལ་ཟས་བཞེས་པར་གསོལ་བ་བཏབ་ཀྱང་། ཞལ་ཟས་མ་བཞེས་ནས་བཅོམ་ལྡན་འདས་ལ་སྐོར་བ་བྱེད་ཅིང་སྐྲ་འབལ་ལ་རང་རང་གི་རྒྱན་རྣམས་འཐོར་ཞིང་། སྐད་མི་སྙན་པས་ངུ་སྟེ་བུ་གཅིག་པ་ཤི་བ་བཞིན་དུ་མཆོག་ཏུ་སྡུག་བསྔལ་
བར་གྱུར་ནས་བཅོམ་ལྡན་འདས་ཀྱི་མཐུས་ས་ལ་ཟུང་གི་དྲུང་ཉིད་དུ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷ་མིག་ཡངས་ཞེས་བྱ་བ་ལ་སོགས་པ་ལྷའི་ཚོགས་གང་གཱའི་ཀླུང་བརྒྱད་ཀྱི་བྱེ་མ་སྙེད་དང་ལྷན་ཅིག་ཏུ་ལྷགས་ནས་ལྷ་དེ་

49-1-10a

དག་གིས་འདི་སྐད་ཅེས་སྨྲས་སོ། །གྲོགས་པོ་དག་ལྟོས་གྲོགས་པོ་དག་ལྟོས་མི་རྣམས་ཀྱི་མཆོད་པའི་ཡོ་བྱད་མཆོག་ཏུ་ཁྱད་པར་དུ་འཕགས་ལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ལ། མཆོད་པ་བཀུར་སྟི་ཐམས་ཅད་མཆོད་པར་འདོད་དེ། མི་རྣམས་ཀྱི་ཞལ་ཟས་ཀྱི་ཐ་མ་བཞེས་པའི་ཕྱིར། བཅོམ་ལྡན་འདས་ལ་གསོལ་བ་འདེབས་ཀྱིས། གྲོགས་པོ་དག་བདག་ཅག་གིས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་ལ་སོ་སོ་ནས་མཆོད་པ་བྱ་ཞིང་ཐ་མའི་དུས་སུ་ཞལ་ཟས་དབུལ་བར་བྱ་ན། ཇི་ལྟར་བདག་ཅག་གིས་ཕུལ་བའི་ཞལ་ཟས་དེ་བཞིན་གཤེགས་པས་གསོལ་ཏེ། ཡོངས་སུ་མྱ་ངན་ལས་འདའ་བར་དེ་བཞིན་གཤེགས་པས་
མཛད་ཅི་གུ། གྲོགས་པོ་དག་སངས་རྒྱས་འབྱུང་བ་ནི་ཤིན་ཏུ་དཀོན་ནོ། །དེ་བས་ཀྱང་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ནི་ཆེས་དཀོན་ནོ། །ཀྱེ་མ་བཅོམ་ལྡན་འདས་ཡོངས་སུ་མྱ་ངན་ལས་འདས་ན་ནི་འཇིག་རྟེན་སྟོངས་
པར་འགྱུར་རོ་ཞེས་སྨྲས་སོ། །ལྷ་དེ་དག་ཐམས་ཅད་ཀྱང་ཐེག་པ་ཆེན་པོ་ཐོས་པར་འདོད་ལ་ཐོས་ནས་ཀྱང་གཞན་དག་ལ་བསྟན་ཏོ་སྙམ་དུ་དམ་བཅས་པ། ཐེག་པ་ཆེན་པོས་སྐོམ་པ་ངོམས་ནས་ཀྱང་གཞན་སྐོམ་པ་རྣམས་ངོམས་པར་བྱའོ་སྙམ་དུ་དམ་
བཅས་པ། ཐེག་པ་ཆེན་པོ་ལ་སྲེད་པ་ཐེག་པ་ཆེན་པོ་ལ་སེར་སྣ་མེད་པ་ཐེག་པ་ཆེན་པོ་ལ་ཕྲག་དོག་དང་དུས་ཆེ་བ་དང་འཆབ་པ་དང་སྒྱུ་མེད་པ་ཐེག་པ་ཆེན་པོ་སུན་འབྱིན་པའི་སེམས་ཅན་རྣམས་ཀྱི་སེར་བ་ལྟ་བུར་གྱུར་པ། དམ་པའི་ཆོས་བསྲུང་བའི་
ཚུལ་ཁྲིམས་བླངས་པ་འཇིག་རྟེན་དང་འཐུན་པར་སློབ་པར་འདོད་པ། བདག་ཅག་རྒལ་ནས་གཞན་བསྒྲལ་བར་བྱའོ། །བདག་ཅག་གྲོལ་ནས་གཞན་དགྲོལ་བར་བྱའོ། །ཆོས་ཀྱི་འཁོར་ལོ་བསྐོར་བར་བྱའོ། །དཀོན་མཆོག་གསུམ་གྱི་གདུང་མི་འཆད་
པར་བྱའོ་སྙམ་དུ་སློབ་པར་འདོད་པ་གོ་ཆ་ཆེན་པོ་བགོས་པ་བསླབ་པ་རྣམས་ལ་དམ་བཅས་པ་བརྟན་པ་དང་དེ་བཞིན་དུ་ཡོན་ཏན་དཔག་ཏུ་མེད་པ་དང་ལྡན་པ། བུ་གཅིག་པ་ལ་བྱ་བ་བཞིན་དུ་འཇིག་རྟེན་ཐམས་ཅད་ལ་སྙིང་རྗེས་ལྟ་བ་ཤ་སྟག་སྟེ། 

49-1-10b

དེ་དག་ཀྱང་ཉི་མ་འཆར་ཀར་སྟོན་པ་ཡོངས་སུ་མྱ་ངན་ལས་འདའ་བའི་གདུང་ཞུགས་ལ་བཞེན་པའི་ཕྱིར། བུད་ཤིང་དང་ཡམ་སྲེག་ཤིང་རྣམས་ཁྱེར་ཏེ། དེ་དག་ཀྱང་སྔ་མས་ཕུལ་བའི་ཡམ་སྲེག་ཤིང་གི་ཉིས་འགྱུར་བས་བཟང་བའི་ལྷ་རྫས་དྲི་བསུང་
དང་ལྡན་པ་ཡིད་དུ་འོང་བ་མི་ལ་དཀོན་པ་ཤ་སྟག་གོ། །ཤིང་རྟ་ཡང་རྟའི་མཆོག་མགྱོགས་པ་དག་དང་སྦྱར་བ་དར་ལ་དཀར་པོས་གཡོགས་པ། གཟུགས་དང་དབྱིབས་རི་མོ་བྲིར་ཡང་མི་ནུས་པ་དྲིལ་བུ་གཡེར་ཀའི་དྲ་བ་ཅན་གྱི་ཡོལ་བས་བསྐོར་བ། དར་ཡུག་ཁྱིམ་
ཆེན་པོའི་བླ་རེ་རྒྱ་ཆེན་པོ་རྩ་བ་རི་མོ་ཅན་དག་ལ་བཙུགས་པ་དང་། གར་ཐབས་དང་རོལ་མོ་ཡིད་དུ་འོང་བ་རྣམས་ཀྱིས་མདུན་དུ་དྲངས་པ། ཁ་ཟས་ཞིམ་པོ་མང་པོ་དག་དང་། སེང་གེའི་ཁྲི་བཻ་དཱུརྱའི་རྒྱབ་རྟེན་རྩེ་མོ་ནོར་བུའི་འོད་ཀྱིས་སྣང་
བར་བྱས་པ། ཞབས་རྟེན་གསེར་ལས་བྱས་པ་དག་ཀྱང་བཤམས་པ་དང་། ས་ཕྱོགས་ཀྱང་མེ་ཏོག་དྲི་བསུང་ཞིམ་པོ་སྣ་ཚོགས་ཀྱིས་མཛེས་པར་བྱས་པ་མེ་ཏོག་གི་སིལ་མ་བཀྲམ་ཞིང་བཀོད་པ། དཔུང་གི་ཚོགས་ཡན་ལག་བཞི་ཕྱི་བཞིན་
འབྲང་བ་ཤ་སྟག་སྟེ། སོ་སོ་ནས་མཆི་མ་ཁྲག་ལྟ་བུ་མི་ཐུབ་ཅིང་མཆོག་ཏུ་སྡུག་བསྔལ་བས་གདུངས་ནས་སེམས་ཅན་ཐམས་ཅད་ལ་ཕན་པ་དང་། བདེ་བ་དང་། སྙིང་རྩེ་བའི་ཕྱིར་དང་། གདུལ་བར་བྱ་བའི་དབང་གི་དོན་དུ་ཐེག་པ་ཆེན་པོའི་
མཆོག་ཏུ་གསང་བ་སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་ཆོས་ཀྱི་སྒོའི་ཚུལ་བཤད་པར་བྱ་བའི་ཕྱིར་བཅོམ་ལྡན་འདས་ཀྱི་ཐད་དུ་དོང་སྟེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། མཆོད་པ་དང་
བཀུར་སྟིའི་མཆོག་རྣམ་པ་མང་པོ་དག་བྱས་ཏེ་བསྐོར་བ་ཡང་བྱས་ནས། བཅོམ་ལྡན་འདས་ཀྱི་འཁོར་རྣམས་ཀྱི་ཕྱིར་རང་རང་གི་བླ་གོས་ས་ལ་བཏིང་སྟེ། རང་རང་གི་རྒྱན་རྣམས་ཕོག་ཅིང་གཏོར་ནས་རང་རང་གི་སྐྲ་འབལ་ཅིང་སྐད་མི་སྙན་
པས་ངུ་སྟེ། བཅོམ་ལྡན་འདས་ལ་ཚིག་འཐུན་པར་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་གིས་སྦྱར་བའི་བཤོས་གསོལ་ཏེ་ཡོངས་སུ་མྱ་ངན་ལས་འདའ་བར་མཛད་དུ་གསོལ་ཞེས་ལན་གཉིས་ལན་གསུམ་དུ་གསོལ་

49-1-11a

བ་བཏབ་ཀྱང་བཅོམ་ལྡན་འདས་ཀྱིས་མ་བཞེས་ཏེ་ཅང་མི་གསུང་ནས་དེ་དག་རེ་ཐག་ཆད་དེ་ལངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ཀླུའི་རྒྱལ་པོ་ཕྱོགས་བཞི་ན་གནས་པ་ཀླུའི་རྒྱལ་པོ་ནོར་རྒྱས་ཀྱི་བུ་དང་
དགའ་བོ་དང་། ཉེ་དགའ་བོ་ལ་སོགས་པ་ཀླུའི་རྒྱལ་པོ་གང་གཱའི་ཀླུང་དགུའི་བྱེ་མ་སྙེད་ཤིན་ཏུ་རིངས་པར་ཉི་མ་འཆར་ཀར་ལྷ་རྣམས་ཀྱི་མཆོད་པ་ལས་ཀྱང་ཉིས་གྱུར་བས་ལྷག་པའི་མཆོད་པའི་ཡོ་བྱད་རང་རང་གི་འབྱོར་པ་དང་འཚམ་པ་དག་ཁྱེར་
ནས་བཅོམ་ལྡན་འདས་ཀྱི་ཐད་དུ་དོང་སྟེ་ཕྱག་འཚལ་ནས། ཞལ་ཟས་བཞེས་པར་གསོལ་བ་བཏབ་ཀྱང་བསམ་པ་བཞིན་དུ་མ་གྲུབ་ནས་ལངས་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་རྣམ་ཐོས་ཀྱི་བུ་ལ་སོགས་པ་གནོད་སྦྱིན་
གྱི་བདག་པོ་གཡོག་འཁོར་དང་བཅས་པ་གང་གཱའི་ཀླུང་བཅུའི་བྱེ་མ་སྙེད་གཅིག་ལ་གཅིག་འཇུས་ནས་རང་རང་གི་མཆོད་པ་རྣམས་ཀྱིས་ཀླུའི་རྒྱལ་པོ་རྣམས་ཀྱི་མཆོད་པ་སྔ་མ་ཟིལ་གྱིས་མནན་ནས། ཚོགས་ཆེན་པོ་དང་ཆས་ཏེ་ལྷགས་ནས། 
བཅོམ་ལྡན་འདས་ལ་ཕྱག་འཚལ་ཏེ་ཞལ་ཟས་བཞེས་པར་གསོལ་བ་བཏབ་ཀྱང་བཅོམ་ལྡན་འདས་ཀྱིས་ཞལ་ཟས་མ་བཞེས་ནས་ཡིད་མི་དགའ་སྟེ་ལངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ནམ་མཁའ་ལྡིང་གི་བདག་པོ་
དགྲའི་འཛའ་བོ་ཞེས་བྱ་བ་ལ་སོགས་པ་ནམ་མཁའ་ལྡིང་གི་རྒྱལ་པོ་གང་གཱའི་ཀླུང་ཉི་ཤུའི་བྱེ་མ་སྙེད་ཀྱིས་རང་རང་གི་མཆོད་པས་གནོད་སྦྱིན་གྱི་རྒྱལ་པོ་སྔ་མ་དག་གི་མཆོད་པ་རྣམས་ཟིལ་གྱིས་མནན་ནས། བཅོམ་ལྡན་འདས་ལ་ཕྱག་
འཚལ་ཏེ་ཞལ་ཟས་བཞེས་པར་གསོལ་བ་བཏབ་ཀྱང་ཞལ་ཟས་མ་བཞེས་ནས་ཡིད་མི་དགའ་སྟེ་ལངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་དྲི་ཟའི་བདག་པོ་མིས་བྱིན་གྱི་བུ་ལ་སོགས་པ་དྲི་ཟའི་བདག་པོ་གང་གཱའི་ཀླུང་སུམ་
བཅུའི་བྱེ་མ་སྙེད་ཀྱིས་མཆོད་པ་སྔ་མ་ཐམས་ཅད་པས་ཀྱང་ཆེས་མཆོག་ཏུ་གྱུར་པའི་མཆོད་པ་རྣམས་ཁྱེར་ཏེ་འོངས་ནས་དེ་བཞིན་གཤེགས་པ་ལ་མཆོད་པ་བྱས་ཏེ། རོལ་མོ་སྙན་དགུ་བྱས་ནས་ཕྱག་འཚལ་ཏེ་བཅོམ་ལྡན་འདས་ལ་

49-1-11b

ཞལ་ཟས་བཞེས་པར་གསོལ་བ་བཏབ་ཀྱང་བཅོམ་ལྡན་འདས་ཀྱིས་མ་བཞེས་ནས་དེ་དག་ཀྱང་ཡིད་མི་དགའ་བར་གྱུར་ཏེ་ལངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་མི་འམ་ཅིའི་བདག་པོ་ལེགས་མཐོང་ལ་སོགས་པ་མི་འམ་ཅིའི་བདག་པོ་གང་གཱའི་ཀླུང་བཞི་བཅུའི་བྱེ་
མ་སྙེད་ལྷགས་ཏེ་སྔ་མ་རྣམས་ཀྱི་མཆོད་པ་དེ་དག་བསྡོམས་པ་བས་ཀྱང་དེ་དག་རེ་རེའི་མཆོད་པ་ཆེས་ཁྱད་པར་འཕགས་པར་གྱུར་ཏེ། དེ་དག་ཀྱང་ཞལ་ཟས་མ་བཞེས་ནས་ཡིད་མི་དགའ་བར་གྱུར་ཏེ་ཕྱོགས་གཅིག་ཏུ་འཁོད་དོ། །གཞན་ཡང་
དེའི་ཚེ་ལྟོ་འཕྱེ་ཆེན་པོའི་བདག་པོ་ལེགས་མཐོང་ཆེན་པོ་ལ་སོགས་པ་ལྟོ་འཕྱེ་ཆེན་པོའི་བདག་པོ་གང་གཱའི་ཀླུང་ལྔ་བཅུའི་བྱེ་མ་སྙེད་ཀྱིས་མཆོད་པ་སྔ་མའི་ཉིས་གྱུར་ཁྱེར་བ་ལས་སྔ་མ་བཞིན་དུ་ཞལ་ཟས་མ་བཞེས་ནས་ཡིད་མི་
དགའ་སྟེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷ་མ་ཡིན་གྱི་བདག་པོ་བདེ་མཆོག་རིགས་ལ་སོགས་པ་ལྷ་མ་ཡིན་གྱི་བདག་པོ་གང་གཱའི་ཀླུང་དྲུག་བཅུའི་བྱེ་མ་སྙེད་ལུས་ཆེ་ཞིང་སྣང་བ་ཆེན་པོ་དང་ལྡན་པ་ལྷ་མ་ཡིན་གྱི་བསམ་པ་མེད་
པ་ཤ་སྟག་གིས་མཆོད་པ་སྔ་མའི་ཉིས་གྱུར་ཉིས་གྱུར་གྱི་མཆོད་པ་དག་ཁྱེར་ཏེ་འོངས་ཏེ། བཅོམ་ལྡན་འདས་ལ་ཕྱག་འཚལ་ནས་ཞལ་ཟས་མ་བཞེས་ཏེ་ཡིད་མི་དགའ་བར་གྱུར་ནས་ལངས་ཏེ་ཤིང་ས་ལ་ཟུང་གི་དྲུང་དུ་རང་རང་གི་གཟི་བྱིན་
གྱིས་སྣང་བར་བྱས་ཏེ་འཁོད་དོ། །གཞན་ཡང་དེའི་ཚེ་སྦྱིན་བྱེད་མའི་བུའི་བདག་པོ་གང་གཱའི་ཆུ་དྲི་མ་མེད་པ་རྗེས་བྱིན་ལ་སོགས་པ་སྦྱིན་བྱེད་མའི་བུ་གང་གཱའི་ཀླུང་བདུན་བཅུའི་བྱེ་མ་སྙེད་ལུས་ཆེ་ཞིང་སྣང་བ་ཆེན་པོ་དང་ལྡན་པ་སྦྱིན་བྱེད་མའི་བུའི་བསམ་
པ་མེད་པ་ཤ་སྟག་གིས་མཆོད་པ་སྔ་མ་ཐམས་ཅད་ལས་མཆོད་པ་ཉིས་གྱུར་ཉིས་གྱུར་བས་བཟང་བ་དག་ཁྱེར་བ་ལས་སྔ་མ་བཞིན་དུ་ཞལ་ཟས་མ་བཞེས་ནས་ཡིད་མི་དགའ་བར་གྱུར་ཏེ། ཤིང་ས་ལ་ཟུང་གི་བར་དུ་རང་རང་གི་གཟི་བརྗིད་ཀྱིས་སྣང་
བར་བྱས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་སྲིན་པོའི་བདག་པོ་འཇིགས་བྱེད་ལ་སོགས་པ་སྲིན་པོའི་དབང་པོ་གང་གཱའི་ཀླུང་བརྒྱད་བཅུའི་བྱེ་མ་སྙེད་སྲིན་པོའི་བསམ་པ་མེད་པ་ཤ་སྟག་གིས་གཟི་བརྗིད་ཆེན་པོའི་ཚོགས་ཀྱིས་

49-1-12a

ས་ལ་ཟུང་གི་དྲུང་དུ་སྣང་བར་བྱས་ནས། བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་འབྲས་བུའི་ཤིང་གི་བདག་པོ་དྲི་སྲེལ་ལ་སོགས་པ་འབྲས་བུའི་ཤིང་གི་བདག་པོ་གང་གཱའི་ཀླུང་དགུ་བཅུའི་
བྱེ་མ་སྙེད་ཀྱིས་སྔ་མའི་མཆོད་པ་ཐམས་ཅད་པས་ཉིས་གྱུར་ཉིས་གྱུར་ཀྱིས་ལྷག་པའི་མཆོད་པའི་ཚོགས་ཁྱེར་ནས་ཁུ་བྱུག་ཕོ་རྒྱགས་པ་རྣམས་དང་། བུང་བ་རྣམས་སྐད་འབྱིན་པ་དང་ལྡན་པའི་མེ་ཏོག་འཚེར་བའི་འཁྲི་ཤིང་མང་པོའི་དོག་པ་དང་། ལོ་མ་
ཁ་འབུས་པ་རྣམས་ཀྱིས་ས་ཕྱོགས་བརྒྱན་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་རིག་སྔགས་འཆང་གི་རྒྱལ་པོ་སྒྱུ་འཕྲུལ་ཆེན་པོ་ལ་སོགས་པ་རིག་སྔགས་འཆང་གི་རྒྱལ་པོ་གང་གཱའི་ཀླུང་སྟོང་གི་བྱེ་མ་སྙེད་ཀྱིས་མཆོད་པ་སྔ་མའི་ཉིས་
གྱུར་བས་ལྷག་པའི་མཆོད་པ་དག་ཁྱེར་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷ་མོ་འདོད་དགུར་སྒྱུར་བའི་གཟུགས་ཅན་ལེགས་མཐོང་མ་ལ་སོགས་པ་གང་གཱའི་ཀླུང་བྱེ་བའི་བྱེ་མ་སྙེད་ཀྱིས་ཡངས་པ་ཅན་གྱི་རྒྱལ་པོའི་བཙུན་མོའི་མཆོད་པ་
ཉིས་གྱུར་བས་ལྷག་པ་དག་ཁྱེར་ཏེ། རང་རང་གི་རྒྱན་རྣམས་བཅོམ་ལྡན་འདས་ཀྱི་སྤྱན་སྔར་ས་ལ་སྤུངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷའི་བུ་མོ་རམ་བྷ་དང་། ཨུརྦ་ཤི་ལ་སོགས་པ་ལྷའི་བུ་མོ་གང་གཱའི་ཀླུང་བྱེ་བ་ཕྲག་
བརྒྱའི་བྱེ་མ་སྙེད་མཆོད་པ་སྔ་མའི་ཉིས་གྱུར་ཉིས་གྱུར་པས་ཆེས་ལྷག་པར་མང་ཞིང་སྤ་བ་དག་གིས་མདུན་དུ་དྲངས་ཏེ་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་འབྱུང་པོའི་ཚོགས་པ་བ་སངས་ལྟར་འཁོར་བ་ཞེས་བྱ་བ་ལ་སོགས་
པ་གང་གཱའི་ཀླུང་བྱེ་བ་ཕྲག་སྟོང་གི་བྱེ་མ་སྙེད་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་འཇིག་རྟེན་སྐྱོང་བ་བཞིའི་ལྷའི་བུ་གང་གཱའི་ཀླུང་བྱེ་བ་ཕྲག་འབུམ་དང་ལྷན་ཅིག་ཏུ་མཆོད་པ་སྔ་མའི་ཉིས་གྱུར་ཉིས་གྱུར་བས་ལྷག་པ་དག་ཁྱེར་
ནས་བཅོམ་ལྡན་འདས་ལ་ཕྱག་འཚལ་ཏེ་ཞལ་ཟས་བཞེས་པར་གསོལ་བ་བཏབ་ཀྱང་བཅོམ་ལྡན་འདས་ཀྱིས་མ་བཞེས་ནས་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་རླུང་ལྷ་བཞི་རླུང་གཏོང་བའི་ལྷ་གང་གཱའི་ཀླུང་བྱེ་བ་ཕྲག་

49-1-12b

འབུམ་དང་ལྷན་ཅིག་ཏུ་དུས་མ་ཡིན་པར་ཡང་ཤིང་ལྗོན་པ་དང་། འཁྲི་ཤིང་དང་ཤིང་གེལ་པ་དང་ནགས་མ་རྣམས་དང་སྙེ་མ་དང་མེ་ཏོག་གི་འཁྲི་ཤིང་དང་། བྱི་རུ་རྣམས་ཀྱིས་ས་ཕྱོགས་རྒྱན་པར་བྱེད་ཅིང་དུས་ཚིགས་ཐམས་ཅད་ཀྱི་མེ་ཏོག་གི་དཔལ་རྣམས་
ཕྱོགས་སུ་རྒྱས་པར་བྱེད་ལ་ལོ་མ་ཁ་འབུས་པ་རྩ་བ་དམར་བ་རྣམས་ཀྱིས་ཤིང་ས་ལ་ཟུང་ཉི་མ་འཆར་ཀའི་འོད་ཟེར་སེར་པོ་ཇ་ཀོང་ཁར་འདུག་པ་བཞིན་དུ་བྱས་ནས་མཆོད་པ་སྔ་མའི་ཉིས་གྱུར་བས་ལྷག་པའི་མཆོད་པ་དག་ཁྱེར་ཏེ། བཅོམ་ལྡན་འདས་ལ་མཆོད་པ་བྱས་
ནས་སྔ་མ་བཞིན་དུ་ཤིང་ས་ལ་ཟུང་གི་དྲུང་དུ་འཁོད་དོ། །གཞན་ཡང་དེའི་ཚེ་ཆར་པ་འབེབས་པའི་ལྷ་གང་གཱའི་ཀླུང་གི་བྱེ་མ་སྙེད་སྤྲིན་ཆེན་པོ་དང་། ཆུ་སྐྱར་རྣམས་ཕྱི་བཞིན་འབྲང་ཞིང་གློག་འགྱུ་བའི་གསེབ་ནས་རྨ་བྱའི་མགྲིན་པ་ལྟར་མདོག་སྔོ་བའི་ཆར་གྱི་རྒྱུན་
འབབ་ལ། འབྲུག་སྒྲ་དལ་ནས་སྒྲོགས་པའི་སྤྲིན་དང་ལྡན་པས་ཆར་ཟིམ་བུ་བསིལ་བ་དང་འདྲེས་པའི་མེ་ཏོག་གི་ཆར་འབེབས་ཤིང་། བཅོམ་ལྡན་འདས་ལ་ཕྱག་འཚལ་ཏེ་ཞལ་ཟས་མ་བཞེས་ནས་རེ་ཐག་ཆད་དེ། དེ་བཞིན་གཤེགས་པའི་གདུང་ཞུགས་ལ་
བཞེན་པའི་མེ་བསད་པའི་ཕྱིར་ནམ་མཁའ་ཉིད་ལ་འཁོད་དོ། །གཞན་ཡང་དེའི་ཚེ་སྤོས་ཀྱི་གླང་པོ་སྒྲ་གཅན་དང་། ལུང་ཏང་མདོག་དང་། སྦྲང་རྩི་མདོག་སེལ་དང་། འདོད་དགུའི་སྤོས་ལྡན་ལ་སོགས་པ་སྤོས་ཀྱི་གླང་པོ་གང་གཱའི་ཀླུང་ཉི་ཤུའི་བྱེ་མ་སྙེད་ཐེག་
པ་ཆེན་པོ་འདོད་པ་ཤ་སྟག་གིས་སྟོན་པ་ཡོངས་སུ་མྱ་ངན་ལས་འདའ་བའི་ཕྱིར་གངས་ཀྱི་སྨན་དང་། པད་མའི་རྩ་བ་དང་། སྡོང་བུ་ཤིང་རྟ་ཆེན་པོའི་འཕང་ལོ་ཙམ་ཤ་སྟག་དང་། དགོན་པ་ཆེན་པོ་དག་ནས་པད་མ་དང་། ཨུད་པ་ལ་དང་། ཀུ་མུ་ད་དང་། པདྨ་
དཀར་པོ་དང་། རྩ་བ་དང་འབྲས་བུ་དང་རྡོ་གུ་སྣ་ཐ་དད་པ་དུ་མ་དག་སྣའི་ཐོར་ཏོས་ཕྱུང་ཞིང་ཕྱུང་ཞིང་ཁྱེར་ཏེ་རླུང་གི་ཤུགས་པས་ཀྱང་ཆེས་མགྱོགས་པ་དང་། ཤིན་ཏུ་རིངས་པར་དབྱར་གྱི་འབྲུག་སྒྲ་བཞིན་དུ་སྒྲོགས་ཤིང་ལྷགས་ནས་པད་མའི་མདབ་མ་བཅེར་བའི་སེང་
གེའི་ཁྲིའི་ལྡ་ལྡི་དག་བཤམས་ཏེ་བཅོམ་ལྡན་འདས་ལ་མཆོད་པ་བྱས་ནས་ཞལ་ཟས་མ་བཞེས་ནས་རེ་ཐག་ཆད་དེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་སེང་གེ་སེང་གེའི་སྒྲ་སྒྲོགས་པ་ཞེས་བྱ་བ་ལ་སོགས་པ་སེང་གེ་གང་གཱའི་ཀླུང་སུམ་བཅུའི་བྱེ་

49-1-13a

མ་སྙེད་སེམས་ཅན་ཐམས་ཅད་ལ་མི་འཇིགས་པ་སྦྱིན་པ་ཤ་སྟག་གིས་སེང་གེའི་རྩལ་ཆེན་པོས་སྤོས་ཀྱི་གླང་པོ་ཆེ་རྣམས་དང་འདྲ་བར་མེ་ཏོག་དང་འབྲས་བུ་རྣམས་ཁྱེར་ཏེ་རིངས་པར་ལྷགས་ནས་ཕྱོགས་གཅིག་ཏུ་འཁོད་དོ། །གཞན་ཡང་
དེའི་ཚེ་བྱ་ངང་པ་དང་། ཁྲུང་ཁྲུང་དང་ངུར་པ་དང་ཀ་དམ་པ་དང་ཟལ་མོ་དང་གཞད་དང་ཁུ་བྱུག་དང་བ་ལི་ཀ་དང་། ཀ་ལ་པིང་ཀ་དང་ཤང་ཤང་ཏེའུ་ལ་སོགས་པས་ཀྱང་སྤོས་ཀྱི་གླང་པོ་ཆེ་རྣམས་དང་འདྲ་བར་མེ་ཏོག་དང་འབྲས་བུ་ཁྱེར་ཏེ་རང་རང་གི་སྐད་ཕྱུང་ནས་
ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་སའི་སྟེང་ན་བ་དང་མ་ཧེ་མོ་དང་ར་མ་མོ་ཡོད་དོ་ཅོག་ནུ་མ་འོ་མས་བཀང་སྟེ་ཤིན་ཏུ་རིངས་པར་ལྷགས་ནས་ཤིང་ས་ལ་ཟུང་གི་དྲུང་ནས་ཕྱོགས་གཤོང་ཞིག་མཐོང་ནས། དེར་རང་རང་གི་ནུ་མ་འོ་མས་གང་བ་དེ་དག་
ལས་འོ་མ་གསེག་མ་དང་། བྱེ་མ་དང་བ་ཚས་མ་འགགས་ཤིང་ཚ་བའི་སྐྱོན་དུ་འགྱུར་བ་མེད་པ་དག་གཟགས་ཏེ། འོ་མ་དེ་དག་གི་ནང་ནས་སྦྲང་བུ་དག་བསལ་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་དྲང་སྲོང་བཟོད་པར་སྨྲ་བ་ལ་སོགས་པ་
གླིང་བཞི་ན་གནས་པའི་དྲང་སྲོང་མངོན་པར་ཤེས་པ་ལྔ་དང་ལྡན་པ་ཐེག་པ་ཆེན་པོ་འདོད་པ་ཤ་སྟག་ལ་གང་གཱའི་ཀླུང་དཀྲིགས་ཀྱི་བྱེ་མ་སྙེད་རང་རང་གི་རྫུ་འཕྲུལ་གྱི་སྟོབས་ཀྱིས་ཡམ་སྲེག་ཤིང་དང་། ཞལ་ཟས་དག་ཁྱེར་ནས་བཅོམ་ལྡན་འདས་ལ་
ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་འོད་སྲུང་ཆེན་པོ་ལ་སོགས་པ་དགེ་སློང་གི་དགེ་འདུན་ཁ་ཅིག་དང་། གནས་བརྟན་ཀུན་དགའ་བོ་ལ་སོགས་པ་མ་གཏོགས་པར་ཡུལ་ཕྱོགས་ན་གནས་པའི་དགེ་སློང་དང་། དགེ་སློང་མ་
ཇི་སྙེད་ཡོད་པ་དེ་དག་ཐམས་ཅད་ཀྱང་མ་ལུས་པར་དེར་ལྷགས་སོ། །གཞན་ཡང་དེའི་ཚེ་རི་རབ་ལ་སོགས་པ་རི་ཆེན་པོ་རྣམས་དང་། འཇིག་རྟེན་གྱི་བར་མཚམས་ཀྱི་རི་གང་གཱའི་ཀླུང་གྲངས་མེད་པའི་བྱེ་མ་སྙེད་ཀྱང་ཤིང་ལྗོན་པ་དང་། འཁྲི་ཤིང་མང་
པོ་ཉིན་མཚན་གྱི་གྲིབ་མ་བྱེད་པ་དང་། བྲག་ཟང་ཡག་གྲིབ་མ་ཆེ་བ་དང་། བྲག་ཁ་ནས་འབབ་པའི་ཆུས་གང་བ་དང་། སྨན་གཤོང་རྡོ་གུ་དང་རྩ་བ་དང་འབྲས་བུས་གང་བ་དག་ཀྱང་དེར་ལྷགས་སོ། །ལྷའི་བུ་མཐུ་བོ་ཆེའི་འདུན་མ་ཆེན་པོ་དག་ཀྱང་

49-1-13b

རི་རབ་དང་བཅས་ཏེ་མཆོད་པའི་ཕྱིར་ལྷགས་ནས། བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷའི་བུ་མཐུ་བོ་ཆེ་འོད་ཆེན་པོ་རྒྱ་མཚོ་ཆེན་པོ་བཞིའི་ནང་ན་གནས་པ་དང་། ཆུ་ཀླུང་ཆེན་པོ་དག་གི་ནང་ན་གནས་
པ་གང་གཱའི་ཀླུང་གྲངས་མེད་པའི་བྱེ་མ་སྙེད་མཆོད་པ་སྔ་མ་བས་ཆེས་ཉིས་གྱུར་གྱིས་མཛེས་པའི་མཆོད་པ་སྔོན་ཏུ་བཏང་ནས། ཉི་མའི་འོད་ཀྱིས་མར་མེའི་འོད་ཟིལ་གྱིས་མནན་པ་བཞིན་དུ་རང་རང་གི་འོད་ཀྱིས་ཉི་མའི་འོད་ཟིལ་གྱིས་མནན་ཏེ། ཉི་མ་འཆར་ཀའི་འོད་
ཀྱིས་ཤིང་མྱ་ངན་འཚང་གི་ལོ་མ་ཐམས་ཅད་དམར་ལམ་མེར་སྣང་བར་བྱེད་པ་དེ་བཞིན་དུ་རང་རང་གི་འོད་ཀྱིས་ཆུ་ཀླུང་གསེར་ལྡན་གྱི་ཆུ་དམར་ལམ་མེར་སྣང་བར་བྱས་ནས། བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །གཞན་
ཡང་དེའི་ཚེ་གྲོང་ཁྱེར་ཀུ་ཤི་ནས་ཤིང་ས་ལ་ཟུང་གི་དྲུང་གི་བར་སྐབས་ཀྱི་བར་སྣང་ལ་ཁང་བཟངས་རིའི་དབང་པོའི་རྩེ་མོ་ལྟ་བུ་ངང་པའི་ཐལ་གོང་ལྟར་དཀར་བ་ཤ་སྟག་གིས་འཁྲིགས་པར་གྱུར་ཏོ། །ས་གཞི་ནི་བསྐྱེད་མོས་ཚལ་དང་རྫིང་བུའི་ཆུ་པད་མས་
མཛེས་པར་བྱས་པ་དག་གིས་གང་བར་འདུག་སྟེ་བྱང་གི་སྒྲ་མི་སྙན་ཀྱི་བསྐྱེད་མོས་ཚལ་བས་ཀྱང་ལྷག་པར་མཛེས་སོ། །གཅིག་ཏུ་ན་དགའ་བའི་ཚལ་དང་། ཤིང་རྟ་སྣ་ཚོགས་ཅན་དང་འདྲ་བར་གྱུར་ཏེ། ས་ཕྱོགས་དེ་དག་དེ་ལྟར་དགའ་དགའ་
ལྟར་འདུག་ཀྱང་ལྷ་དང་། ལྷ་མ་ཡིན་དང་མི་དེ་དག་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ཕྱིར་ཤིན་ཏུ་ངུའོ། །གཞན་ཡང་དེའི་ཚེ་རྒྱལ་ཆེན་བཞིའི་རིས་ཀྱི་ལྷ་རྣམས་རང་རང་གི་འཁོར་ལ་འདི་སྐད་ཅེས་ཟེར་ཏོ། །གྲོགས་པོ་དག་ལྟོས། 
གྲོགས་པོ་དག་ལྟོས། ལྷ་དང་ལྷ་མ་ཡིན་དང་། མི་རྣམས་ཀྱི་དེ་བཞིན་གཤེགས་པའི་མཆོད་པའི་ལས་ཁྱད་པར་དུ་འཕགས་ལ། དེ་བཞིན་གཤེགས་པ་ལ་ཞལ་ཟས་ཀྱི་ཐ་མ་འབུལ་བ་ལ་བརྩོན་གྱིས། གྲོགས་པོ་དག་བདག་ཅག་ཀྱང་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སོ་སོ་ནས་མཆོད་པ་བྱའོ། །ཞལ་ཟས་ཀྱི་ཐ་མ་ཡང་དབུལ་བར་བྱའོ། །གལ་ཏེ་བདག་ཅག་གིས་ཕུལ་བའི་ཞལ་ཟས་ཀྱི་ཐ་མ་བཅོམ་ལྡན་འདས་ཀྱིས་བཞེས་པར་གྱུར་ན་དེ་

49-1-14a

ལས་བདག་ཅག་གིས་སྦྱིན་པའི་ཕ་རོལ་ཏུ་ཕྱིན་པ་ཆེན་པོ་ཐོབ་པར་འགྱུར་རོ་ཞེས་དེ་དག་གིས་དེ་སྐད་ཅེས་སྨྲས་ནས། གཡོག་འཁོར་མང་པོ་གྲངས་མེད་པ་དང་བཅས་པས་མཆོད་པ་སྔ་མའི་ཉིས་གྱུར་གྱི་མཆོད་པ་དང་ཞལ་ཟས་
མང་པོ་དག་ཁྱེར་རོ། །མེ་ཏོག་མང་པོ་དག་ཀྱང་ཁྱེར་ཏེ་འདི་ལྟ་སྟེ། མན་དཱ་ར་བ་རྣམས་དང་། མན་དཱ་ར་བ་ཆེན་པོ་རྣམས་དང་། ཀེ་ཀེ་རུ་ཀ་རྣམས་དང་། ཀེ་ཀེ་རུ་ཀ་ཆེན་པོ་རྣམས་དང་། མན་ཛུ་ཤ་ཀ་རྣམས་དང་། མན་ཛུ་ཤ་ཀ་ཆེན་པོ་
རྣམས་དང་། སན་ཏ་ན་ཀ་རྣམས་དང་། སན་ཏ་ན་ཀ་ཆེན་པོ་རྣམས་དང་འོད་ཅན་རྣམས་དང་། འོད་ཅན་ཆེན་པོ་རྣམས་དང་། ཀུན་ཏུ་འོད་ཅན་རྣམས་དང་། འོད་མཐའ་ཡས་པ་རྣམས་དང་། མཛེས་སྡུག་རྣམས་དང་། མཛེས་
སྡུག་ཆེན་པོ་རྣམས་དང་། དགའ་བྱེད་རྣམས་དང་། དགའ་བྱེད་ཆེན་པོ་རྣམས་དང་། དྲི་མཆོག་རྣམས་དང་། དྲི་མཆོག་ཆེན་པོ་རྣམས་དང་། སྤོས་ཀྱི་ངད་ལྡང་རྣམས་དང་། སྤོས་ཀྱི་ངད་ལྡང་ཆེན་པོ་རྣམས་དང་། ཀུན་ཏུ་ངད་ལྡང་
རྣམས་དང་། ཀུན་ཏུ་ངད་ལྡང་ཆེན་པོ་རྣམས་དང་། མཐའ་ཡས་ངད་ལྡང་རྣམས་དང་། མཐའ་ཡས་ངད་ལྡང་ཆེན་པོ་རྣམས་དང་། ལྷ་རྫས་ཀྱི་མདབ་མ་རྣམས་དང་། ཀླུང་གི་མེ་ཏོག་རྣམས་དང་། ཡོངས་འདུ་ས་བརྟོལ་རྣམས་དང་། 
དེ་ལྟ་བུ་གཞན་དག་ཀྱང་ཁྱེར་ནས་བཅོམ་ལྡན་འདས་ག་ལ་བ་དེར་དོང་སྟེ། ཉི་མའི་གཟི་བྱིན་གྱིས་སྲིན་བུ་མེ་ཁྱེར་གྱི་འོད་ཟིལ་གྱིས་མནན་པ་བཞིན་དུ་རང་རང་གི་གཟི་བྱིན་གྱིས་ཐམས་ཅད་ཀྱི་འོད་ཟིལ་གྱིས་མནན་ཏེ་ཞལ་ཟས་མ་བཞེས་ནས་
ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷའི་དབང་པོ་བརྒྱ་བྱིན་སུམ་བཅུ་རྩ་གསུམ་པའི་ལྷ་རྣམས་ཀྱི་འཁོར་དང་བཅས་པས་མཆོད་པ་སྔ་མ་དེའི་ཉིས་གྱུར་དེའི་རྐྱེན་དུ་འཚམ་པ་དེ་ན་ཡོད་པའི་མེ་ཏོག་གི་སྣ་གྲངས་དུ་མ་ཡིད་དུ་
འོང་བ་རྣམས་དང་། ཡིད་དུ་འོང་བ་ཆེན་པོ་རྣམས་དང་། དྲི་བསུང་ཆེན་པོ་རྣམས་ཁྱེར་རོ། །ཁང་བཟངས་ཆེན་པོ་རྡོ་ཐལ་གྱི་མདོག་ལྟར་དཀར་བ། ཐེམ་སྐས་ཀྱི་རིམ་པ་དང་ལྡན་པ། སྐར་ཁུང་གི་ཕྲེང་བ་དུ་མ་ཕུག་རོན་ཤུག་རྩེ་བ་དང་

49-1-14b

ལྡན་པ་དག་ཀྱང་སྤྲུལ་ནས་བཅོམ་ལྡན་འདས་ག་ལ་བ་དེར་དོང་སྟེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་
ཏོ། །བཅོམ་ལྡན་འདས་བདག་ཅག་ནི་ཐེག་པ་ཆེན་པོའི་མདོའི་སྡེ་ཚན་སྲུང་བ་ལགས་ན་བདག་ཅག་ལ་ཐུགས་བརྩེ་བའི་སླད་དུ་བདག་ཅག་གིས་ཕུལ་བའི་ཞལ་ཟས་བཞེས་སུ་གསོལ། དེ་སྐད་ཅེས་གསོལ་ཀྱང་ཞལ་ཟས་མ་བཞེས་ནས་ཕྱོགས་
གཅིག་ཏུ་འཁོད་དོ།། །། བམ་པོ་གཉིས་པ། དེའི་རྗེས་ལ་མཐར་གྱིས་འདོད་པ་ན་སྤྱོད་པའི་ལྷའི་རིས་དྲུག་པོ་རྣམས་ཀྱིས་སྟེང་གི་བར་སྣང་ལ་མཆོད་པ་དང་འོད་སྔ་མ་ལས་ཁྱད་པར་དུ་སྤགས་ནས། བཅོམ་ལྡན་འདས་ག་ལ་
བ་དེར་དོང་སྟེ། དེ་དག་གི་མཆོད་པའི་ནང་ན་གདུགས་ཕལ་པ་གང་ཡིན་པ་དེ་ཡང་ཁོ་ར་ཁོར་ཡུག་ཏུ་གླིང་བཞི་པའི་ཁྱོན་ཙམ་མོ། །བ་དན་ཕལ་པ་གང་ཡིན་པ་དེ་ཡང་རྒྱ་མཚོ་ཆེན་པོ་བཞིའི་མཐར་ཐུག་སྟེ། ཤར་ཕྱོགས་ཀྱི་རྒྱ་མཚོ་ནས་ནུབ་ཕྱོགས་
ཀྱི་རྒྱ་མཚོར་ཐུག་སྟེ། རླུང་གིས་བསྐྱོད་དམ་རླུང་གིས་ཕྱར་ན་བ་དན་དེ་དག་ལས་པི་བང་གི་སྒྲ་སྙན་པ་ཁོང་ནས་འཁྱིལ་པ་ལྟ་བུར་སྙན་པ་དག་འབྱུང་སྟེ། དེ་དག་བཅོམ་ལྡན་འདས་ལ་ཕྱག་འཚལ་ནས་ཞལ་ཟས་བཞེས་པར་གསོལ་བ་བཏབ་
ཀྱང་བཅོམ་ལྡན་འདས་ཅང་མི་གསུང་ནས་རེ་ཐག་ཆད་དེ་ཕྱོགས་གཅིག་ཏུ་འཁོད་དོ། །དེའི་ཚེ་སྲིད་པའི་རྩེ་མོར་སྐྱེས་པ་རྣམས་མ་གཏོགས་པར་གོང་མ་གོང་མའི་སེམས་ཅན་གཞན་གང་ཡིན་པ་དེ་དག་ཐམས་ཅད་བཅོམ་ལྡན་འདས་ལ་མཆོད་པ་
བྱ་བའི་ཕྱིར་མཆོད་པ་རྒྱ་ཆེན་པོའི་ཚོགས་དང་ཆས་ཏེ་ལྷགས་ནས་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །མི་མཇེད་ཀྱི་བདག་པོ་ཚངས་པ་ཡང་ཚངས་རིས་ཀྱི་ལྷའི་བུ་དཔག་ཏུ་མེད་པ་དག་གིས་བསྐོར་ཅིང་མདུན་དུ་བདར་ཏེ་རང་གི་གཟི་
བྱིན་གྱིས་ལྷ་ཐམས་ཅད་ཀྱི་གཟི་བྱིན་ཟིལ་གྱིས་མནན་ནས་མཆོད་པའི་ཚོགས་ཆེན་པོ་དང་ཆས་ཏེ་བཅོམ་ལྡན་འདས་ཀྱི་ཐད་དུ་དོང་སྟེ། དེ་དག་གི་བ་དན་ཕལ་པ་གང་ཡིན་པ་དེ་ཡང་ཚངས་པའི་འཇིག་རྟེན་ནས་འཕྱང་སྟེ་ཤིང་ས་ལ་ཟུང་གི་དྲུང་

49-1-15a

དུ་ཐུག་གོ། །དེས་ཀྱང་བཅོམ་ལྡན་འདས་ལ་ཞལ་ཟས་བཞེས་པར་གསོལ་བ་ལས་བཅོམ་ལྡན་འདས་ཀྱིས་མ་བཞེས་ནས་ཕྱོགས་གཅིག་ཏུ་འཁོད་དོ། །དེ་ནས་དེའི་ཚེ་ལྷ་མ་ཡིན་གྱི་དབང་པོ་ཐགས་ཟངས་རིས་ལྷ་མ་ཡིན་
གྱི་གཡོག་འཁོར་དཔག་ཏུ་མེད་པ་དང་བཅས་པས་ཚངས་པ་དང་དབང་པོ་གཉིས་མ་གཏོགས་པར་དེའི་བར་གྱི་ལྷ་ཡོད་དོ་ཅོག་གི་འོད་རང་གི་འོད་ཀྱིས་མོག་མོག་པོར་བྱས་ནས་དེའི་རྐྱེན་དུ་འཚམ་པའི་མཆོད་པའི་ཚོགས་དང་རྐྱེན་དུ་འཚམ་
པའི་ཞལ་ཟས་དག་དང་ཆས་ཏེ་བཅོམ་ལྡན་འདས་ཀྱི་ཐད་དུ་སོང་ངོ་། །དེའི་གདུགས་ཕལ་པ་ཡང་ཆུ་ཞེང་དུ་འཇིག་རྟེན་གྱི་ཁམས་ཆུང་ངུ་ཁྱབ་པ་ཙམ་སྟེ། དེས་ཀྱང་བཅོམ་ལྡན་འདས་ལ་ཞལ་ཟས་བཞེས་པར་གསོལ་བ་ལས་བཅོམ་
ལྡན་འདས་ཀྱིས་མ་བཞེས་ནས་ལངས་ཏེ་ཕྱོགས་གཅིག་ཏུ་འདུག་གོ། །དེ་ནས་བདུད་སྡིག་ཅན་ཆུང་མ་གྲངས་མེད་པའི་འཁོར་དང་ཆས་ཏེ། སེམས་ཅན་དམྱལ་བ་ཐམས་ཅད་ཀྱི་བར་སྲང་ཐམས་ཅད་ཕྱེ་ནས་དེ་དག་ལ་ཆུ་དང་ཁ་ཟས་ལ་
སོགས་པ་ཅི་འདོད་པ་བྱིན་ཏེ། དེ་དག་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲན་པར་གྱིས་ཤིག །སྦྱིན་པའི་ཐ་མ་ལ་རྗེས་སུ་ཡི་རང་བར་གྱིས་ཤིག་ཅེས་སྨྲས་ནས་དེ་དག་ལ་ཁྱེད་བདེ་བར་གྱུར་ཅིག་ཅེས་
ཀྱང་དབུགས་ཕྱུང་ངོ་། །སེམས་ཅན་དམྱལ་བའི་གྲོང་ཁྱེར་མཚོན་ཆས་གང་ཞིང་མེ་ཆེན་པོ་འབར་བ་རྣམས་སུ་ཡང་སྤྲིན་ཆེན་པོ་བཞིན་དུ་ཆུ་ཆེན་པོ་ཕབ་ནས་སེམས་ཅན་དམྱལ་བ་པ་རྣམས་ཀྱིས་སྔོན་མ་མྱོང་བའི་བདེ་བ་དང་ལྡན་པའི་འདུ་ཤེས་
བསྐྱེད་དེ་དེ་བཞིན་གཤེགས་པའི་མཐུས་བདུད་ཀྱི་སེམས་ཀྱི་གནས་སྐབས་དེ་ལྟ་བུར་གྱུར་ཏོ། །དེའི་འཁོར་གང་ཡིན་པ་དེ་དག་གིས་ཀྱང་གཞུ་དང་། རལ་གྲི་དང་ཐོ་བ་དང་དགྲ་སྟ་དང་། རྡོ་རྗེ་རྩེ་གཅིག་པ་དང་། མཚོན་ཀམ་པ་ན་དང་། 
ལྕགས་ཀྱི་བེར་ཀ་དང་། ལྕགས་མདའ་དང་། ཤ་ཏ་ཀ་ནི་ཧ་དང་། མདའ་དང་འཕང་མདུང་དང་། མདུང་རྩེ་གཅིག་པ་ལ་སོགས་པ་མཚོན་ཆ་རྣམ་པ་དུ་མ་ཡོངས་སུ་སྤངས་ཏེ་ཆོས་ལྷུར་ལེན་པར་གྱུར་ཏོ། །དེའི་མཆོད་པ་ཡང་ལྷ་སྔ་མ་

49-1-15b

རྣམས་ལ་མེད་པ་དེ་ལྟ་བུར་གྱུར་ཏེ། དེའི་གདུགས་ཕལ་པའི་ཆུ་ཞེང་དུ་ཡང་འཇིག་རྟེན་གྱི་ཁམས་བར་མའི་ཁྱོན་ཙམ་མོ། །དེ་ལྟར་དེ་མཐུ་ཆེན་པོ་དང་ལྡན་ཞིང་རང་གི་ཆུང་མ་རྣམས་ཀྱི་རྔ་ཡབ་ཀྱིས་གཡོབ་བཞིན་དུ་བཅོམ་ལྡན་འདས་ག་ལ་བ་
དེར་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཐལ་མོ་སྦྱར་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་དང་། འཁོར་དང་བཅས་པས་བདག་ཅག་གིས་ཕུལ་བའི་ཞལ་
ཟས་བཞེས་སུ་གསོལ། བཅོམ་ལྡན་འདས་བདག་ཅག་གིས་ད་སླན་ཆད་ཐེག་པ་ཆེན་པོའི་སླད་དུ་ཡི་དམ་བཅའ་བར་འཚལ་ཏེ། རིགས་ཀྱི་བུ་འམ་རིགས་ཀྱི་བུ་མོ་གང་སུ་ཡང་རུང་འཇིགས་པའི་སླད་དུ་འམ། རྙེད་པ་དང་བཀུར་སྟི་འཚལ་
བའི་སླད་དུ་འམ། ཐོབ་ཏུ་རེ་བའི་སླད་དུ་འམ། གཞན་གྱིས་བགྱིད་དུ་སྩལ་བ་འམ། གཞན་གྱི་ཡིད་བསྲུང་བའི་སླད་དུ་ཡང་རུང་སྟེ། ཐེག་པ་ཆེན་པོ་རྗོད་པར་བགྱིད་ན་དེའི་དོན་དུ་འཇིགས་པ་དང་། མི་དགའ་བ་ཐམས་ཅད་བསལ་བའི་
གསང་སྔགས་བཤད་པར་འཚལ་ལོ། །ཏདྱ་ཐ། ཐག་ཀེ་ཊ་ཊ་ར་ཐག་ཀེ། རོ་རུ་རེ། མ་ད་རོ་རུ་རེ། ཨཱ་ལ་མཱ་ལ་ཏཱ་ལ་སྭཱ་ཧཱ། ཆོས་སྨྲ་བ་འཁྲུལ་པ་དང་འཇིགས་པས་གནོད་པར་གྱུར་པ་རྣམས་ཆོས་ཀྱི་ཚུལ་ལ་སྤོབས་པ་བསྐྱེད་པར་
བགྱི་བ་དང་། མུ་སྟེགས་པ་རྣམས་མྱོས་པར་བགྱི་བ་དང་། དམ་པའི་ཆོས་བསྲུང་བ་དང་། བདག་དང་གཞན་བསྲུང་བའི་སླད་དུ་བདག་གིས་རང་གི་དམ་ཚིག་གིས་སྨྲས་པའི་གསང་སྔགས་འདི་གླང་པོ་ཆེའི་འཇིགས་པའམ། ནགས་ཁུང་གི་
འཇིགས་པའམ། ཆུ་ཀླུང་གི་འཇིགས་པའམ། མེའི་འཇིགས་པ་རྣམས་ཀྱི་ནང་དུ་བསྲུང་བའི་གཟུངས་སྔགས་ཀྱི་དོན་དུ་རྗོད་པ་གང་ལགས་པ་དེ་དག་ནི་རྗོད་པ་ཙམ་གྱིས་ཇི་ལྟར་རུ་སྦལ་རང་གི་ལུས་བསྲུངས་པ་དེ་བཞིན་དུ་བདག་གིས་གཡོ་དང་
སྒྱུ་མ་མཆིས་པར་དེ་དག་གི་འཇིགས་པ་ཐམས་ཅད་ལས་བསྲུང་བར་བགྱི། སྟོབས་དང་ལྡན་པར་ཡང་བགྱིད་ལགས་ན་བཅོམ་ལྡན་འདས་ཀྱིས་ད་ཞལ་ཟས་འདི་བཞེས་པར་གསོལ་ཞེས་བསྐུལ་ཏོ། །དེ་ནས་བཅོམ་ལྡན་འདས་ཀྱིས་བདུད་སྡིག་

49-1-16a

ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན་ཁྱོད་ཁ་ཟས་ཀྱི་ཕྱིར་གསོལ་བ་མ་འདེབས་ཤིག །གསང་སྔགས་ཀྱི་ཚིག་འདི་སེམས་ཅན་ཐམས་ཅད་ལ་ཕན་པའི་ཕྱིར་ཆོས་ཀྱི་སྦྱིན་པར་འགྱུར་བས་ན་བཞེས་པར་
བྱའི། ཟང་ཟིང་གི་སྦྱིན་པ་ནི་དེ་ལྟ་མ་ཡིན་གྱིས། སྡིག་ཅན་ཁྱོད་གསོལ་བ་མ་འདེབས་ཤིག་ཅེས་བཀའ་སྩལ་ནས་བཅོམ་ལྡན་འདས་ཅང་མི་གསུང་བར་གྱུར་ཏོ། །ལན་གཉིས་ལན་གསུམ་གྱི་བར་དུ་ཡང་བདུད་དང་བདུད་ཀྱི་བུ་མོ་
རྣམས་ཀྱིས་བཅོམ་ལྡན་འདས་ལ་གསོལ་བ་བཏབ་པ་ལས་མ་བཞེས་ཏེ་རེ་ཐག་ཆད་ནས་ཕྱོགས་གཅིག་ཏུ་འཁོད་དོ། །དེ་ནས་དེའི་ཚེ་ལྷའི་བུ་དབང་ཕྱུག་ཆེན་པོ་ལྷའི་བུ་དཔག་ཏུ་མེད་པ་མཐུ་དཔག་ཏུ་མེད་པ་དག་གིས་མདུན་དུ་བདར་ཏེ་རང་གི་
འོད་ཀྱིས་ཚངས་པ་དང་། ལྷའི་དབང་པོ་དང་ལྷ་མ་ཡིན་དང་། བདུད་ཀྱི་འོད་རྣམས་སྣག་ཚའི་གོང་བུ་བཞིན་དུ་འོད་མི་གསལ་བར་བྱས་ཏེ། བཅོམ་ལྡན་འདས་ཀྱི་མཆོད་པ་རྒྱ་ཆེན་པོ་ཉིས་གྱུར་བས་ལྷག་པ་དག་ཁྱེར་ནས་དེར་སོང་སྟེ། 
དེའི་མཆོད་པ་རྣམས་ཀྱི་ནང་ན་གདུགས་ཕལ་པ་གང་ཡིན་པ་དེ་ཡང་ཆུ་ཞེང་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྱབ་པར་འདུག་སྟེ། མཆོད་པ་དེ་ལྟ་བུ་སྔོན་དུ་བཏང་ནས་བཅོམ་ལྡན་འདས་ཀྱི་ཐད་དུ་ཕྱིན་ཏེ་ལན་དུ་
མ་བསྐོར་བ་བྱས་ནས་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལ་བདག་མཆོད་པ་བགྱིད་པ་ནི་
སྦྲང་བུ་མཆོད་པ་བགྱིད་པ་དང་འདྲ་སྟེ། བདག་སྦྲང་བུ་དང་འདྲ་བས་བཅོམ་ལྡན་འདས་ལ་མཆོད་པ་བགྱིད་པའི་རྔོ་ག་ལ་ཐོག་གིས་ཀྱང་བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་ཞལ་ཟས་ཀྱི་ཐ་མ་གསོལ་བར་ཅི་གནང་ཞེས་ལན་གཉིས་
ལན་གསུམ་དུ་གསོལ་བ་བཏབ་ཀྱང་ལན་གཉིས་ལན་གསུམ་དུ་བཅོམ་ལྡན་འདས་ཅང་མི་གསུང་བར་གྱུར་ཏེ། རེ་ཐག་ཆད་ནས་ལངས་ཏེ་ཕྱོགས་གཅིག་ཏུ་འདུག་གོ། །དེ་ནས་དེའི་ཚེ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་འཇིག་རྟེན་

49-1-16b

གྱི་ཁམས་གང་གཱའི་ཀླུང་གྲངས་མེད་པ་གཏམས་ཁྲག་ཁྲིག་ཀྱི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་ཡིད་འཕྲོག་སྒྲ་སྙན་མུ་ཏུག་ཅེས་བྱ་བ་ཞིག་ཡོད་དེ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའ་
དང་མཉམ་པ་ཞེས་བྱ་བ་བཞུགས་ཏེ། དེས་སྲས་ཀྱི་ཐུ་བོ་ཉན་ཐོས་ལུས་ཆེན་མཐའ་ཡས་ལ་བཀའ་སྩལ་པ། རིགས་ཀྱི་བུ་ཁྱོད་མི་མཇེད་ཀྱི་འཇིག་རྟེན་གྱི་ཁམས་སུ་སོང་ལ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ཤཱཀྱ་ཐུབ་པ་ཞེས་བྱ་བ་རིང་པོ་མི་ཐོགས་པར་ཡོངས་སུ་མྱ་ངན་ལས་འདའ་བར་འགྱུར་གྱིས། རིགས་ཀྱི་བུ་ཁྱོད་ཀྱིས་དེའི་དོན་དུ་འཇིག་རྟེན་གྱི་ཁམས་འདི་ནས་ཞལ་ཟས་ཞིམ་པོ་ཕན་པ་དག་ཁྱེར་ཏེ་སོང་ཤིག །མཆོད་པ་ཆེན་པོ་
དག་ཀྱང་ཁྱེར་ཏེ་སོང་ལ་དེ་ལ་འདི་སྐད་དུ་དེ་བཞིན་གཤེགས་པ་བཅོམ་ལྡན་འདས་ཀྱིས་ཞལ་ཟས་འདི་གསོལ་ཏེ་ཡོངས་སུ་མྱ་ངན་ལས་འདའ་བར་མཛད་དུ་གསོལ་ཞེས་གྱིས་ཤིག །ཁྱོད་ཀྱི་ཐེ་ཚོམ་དང་ཡིད་གཉིས་ཅི་དང་ཅི་ཡོད་པ་དེ་དང་དེ་དག་
ཀྱང་དེ་བཞིན་གཤེགས་པ་དེ་ཁོ་ན་ལ་ལེགས་པར་ཞུས་ཤིག་དང་། དེས་ཁྱོད་ལ་ལུང་བསྟན་པར་འགྱུར་རོ་ཞེས་བཀའ་སྩལ་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་དེས་ལེགས་སོ་ལེགས་སོ་ཞེས་གསོལ་
ནས། དེ་བཞིན་གཤེགས་པ་དེ་ལ་བསྐོར་བ་བྱས་ནས་ཞབས་ལ་མགོ་བོས་ཕྱག་འཚལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་པོ་གྲངས་མེད་པས་བསྐོར་ཅིང་མདུན་དུ་བདར་ནས་མི་མཇེད་ཀྱི་འཇིག་རྟེན་གྱི་ཁམས་འདིར་འོངས་
སོ། །དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གཡོས་རབ་ཏུ་གཡོས། འགུལ་རབ་ཏུ་འགུལ། འཁྲུགས་རབ་ཏུ་འཁྲུགས། འཁོར་རབ་ཏུ་འཁོར། འུར་འུར་རབ་ཏུ་འུར་འུར། ཤིག་ཤིག་རབ་ཏུ་ཤིག་ཤིག ། 
མེར་མེར་རབ་ཏུ་མེར་མེར། ལྡེམ་ལྡེམ་རབ་ཏུ་ལྡེམ་ལྡེམ་མོ། །དེ་ལ་སོགས་པ་བྱས་ཏེ་ས་ཆེན་པོ་རབ་ཏུ་གཡོས་སོ། །དེ་ནས་འཁོར་དེ་དག་གི་ནང་ན་ཚངས་པ་དང་། དབང་པོ་དང་། འཇིག་རྟེན་སྐྱོང་དང་། ལྷ་མ་ཡིན་དང་། དབང་ཕྱུག་ཆེན་པོ་ལ་

49-1-17a

སོགས་པ་ལྷ་རྣམས་ཀྱིས་ས་གཞི་དེ་ལྟ་བུར་གྱུར་པ་མཐོང་ནས་སྐྱི་བུང་ཞེས་བྱས་ཏེ་འཇིགས་ཤིང་ཁ་དང་ལྐོག་མ་སྐམས་ནས་འབྲོས་པར་ཆས་ཏེ་རང་རང་གི་འོད་ཀྱང་མི་མཐོང་ཞིང་འོད་ཉམས་པར་གྱུར་ཏོ། །དེ་ནས་འཁོར་དེ་ཉིད་
ཀྱི་ནང་ནས་འཇམ་དཔལ་གཞོན་ནུར་གྱུར་པ་ལངས་ཏེ་ལྷའི་ཚོགས་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་མ་འཇིགས་ཤིག་མ་འཇིགས་ཤིག །ཤར་ཕྱོགས་ལོགས་སུ་འཇིག་རྟེན་གྱི་ཁམས་གང་གཱའི་ཀླུང་གྲངས་མེད་པ་གཏམས་
ཕྲག་དཀྲིགས་ཀྱི་བྱེ་མའི་རྡུལ་ཕྲ་རབ་གྲངས་མེད་པ་སྙེད་འདས་པ་ན་འཇིག་རྟེན་གྱི་ཁམས་ཡིད་འཕྲོག་སྒྲ་སྙན་མུ་ཏུག་ཅེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའ་དང་མཉམ་
པ་ཞེས་བྱ་བ་ད་ལྟར་བཞུགས་ལ་འཚོ་ཞིང་གཞེས་ཏེ། དེ་བཞིན་གཤེགས་པ་དེས་རང་གི་སྲས་ཀྱི་ཐུ་བོ་ཉན་ཐོས་ལ་བོས་ཏེ་བཀའ་སྩལ་པ། རིགས་ཀྱི་བུ་ཁྱོད་མི་མཇེད་ཀྱི་འཇིག་རྟེན་གྱི་ཁམས་སུ་སོང་ལ། དེ་ན་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ཡོངས་སུ་མྱ་ངན་ལས་འདའ་བར་འགྱུར་གྱིས། དེ་དགེ་སློང་གི་དགེ་འདུན་དང་བཅས་པ་ལ་ཞལ་ཟས་ཀྱི་ཐ་མ་ཕུལ་ལ། ཁྱོད་ཀྱི་ཐེ་ཚོམ་དང་ཡིད་གཉིས་ཅི་དང་ཅི་ཡོད་པ་
དེ་དག་ཀྱང་ལེགས་པར་ཞུས་ཤིག་དང་དེས་ཁྱོད་ལ་ལུང་བསྟན་པར་འགྱུར་རོ་ཞེས་བཀའ་སྩལ་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་འདི་བཏང་སྟེ། བྱང་ཆུབ་སེམས་དཔའ་གྲངས་མེད་
པས་བསྐོར་ཅིང་མདུན་དུ་བདར་ནས་འདིར་འོངས་པ་དེའི་གཟི་བརྗིད་ཀྱིས་ཁྱོད་ཀྱི་འོད་ཉམས་པར་གྱུར་ཏོ། །དེ་འོང་བ་ལ་རྗེས་སུ་ཡི་རང་བར་གྱིས་ཤིག །དེ་བཞིན་གཤེགས་པ་ནམ་མཁའ་དང་མཉམ་པས་བདག་ཅག་གི་དེ་བཞིན་
གཤེགས་པ་ལ་མཆོད་པ་མཛད་པ་ལ་ཡང་ལྟོས་ཤིག་ཅེས་བྱས་སོ། །དེ་ནས་འཁོར་དེ་དག་ཐམས་ཅད་ཀྱིས་མེ་ལོང་གི་ངོས་ལ་བདག་གི་གཟུགས་མཐོང་བ་བཞིན་དུ་འཇིག་རྟེན་གྱི་ཁམས་ཐག་རིང་པོ་ན་བཞུགས་པའི་དེ་བཞིན་གཤེགས་པ་

49-1-17b

དེ་དང་འཇིག་རྟེན་གྱི་ཁམས་དེ་མཐོང་ངོ་། །དེ་ནས་འཇམ་དཔལ་གཞོན་ནུར་གྱུར་པས་འཁོར་དེ་དག་ལ་འདི་སྐད་ཅེས་སྨྲས་སོ། །ཇི་ལྟར་ཁྱོད་ཀྱིས་འཇིག་རྟེན་གྱི་ཁམས་འདི་དང་། དེ་བཞིན་གཤེགས་པ་འདི་མཐོང་བ་དེ་བཞིན་དུ་ཕྱོགས་
བཅུའི་དེ་བཞིན་གཤེགས་པ་རྣམས་དང་འཇིག་རྟེན་གྱི་ཁམས་གཞན་དག་ཀྱང་ལྟོས་ཤིག །དེ་བཞིན་གཤེགས་པ་རྣམས་ནི་འདི་ལྟར་བདག་ཉིད་ཆེ་བ་ཡིན་ཏེ་རང་རང་གི་གནས་ན་བཞུགས་བཞིན་དུ་ཡང་ཁྱེད་ལ་ཞལ་སྟོན་པར་མཛད་དོ། །
འཁོར་དེ་དག་གིས་སྨྲས་པ། ཀྱེ་མ་དེ་བཞིན་གཤེགས་པ་དེ་ལྟར་བདག་ཉིད་ཆེ་བ་ཡང་ཡོངས་སུ་མྱ་ངན་ལས་འདའ་བར་འགྱུར་བ་ལྟ་ཀྱི་ཧུད་ཅེས་བླ་ཞིང་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་
མཐའ་ཡས་བྱང་ཆུབ་སེམས་དཔའ་དཔག་ཏུ་མེད་པ་དག་གིས་བསྐོར་བ་ཡང་མཐོང་སྟེ། བྱང་ཆུབ་སེམས་དཔའ་དེའི་ལུས་ཀྱི་བ་སྤུའི་ཁུང་བུ་རེ་རེ་ནས་པད་མ་ཆེན་པོ་བྱུང་ངོ་། །པད་མ་ཆེན་པོ་རེ་རེ་ལ་ཡང་གྲོང་ཁྱེར་བདུན་ཁྲི་བརྒྱད་
སྟོང་བདུན་ཁྲི་བརྒྱད་སྟོང་ཡོད་ལ་གྲོང་ཁྱེར་དེ་དག་ཀྱང་ཡུལ་ཡངས་པ་ཅན་གྱི་ཐག་གྲུ་ཙམ་ཤ་སྟག་སྟེ། རིན་པོ་ཆེ་སྣ་བདུན་གྱི་ར་བ་དང་འོབས་བདུན་རིམ་གྱིས་བསྐོར་ལ་ཤིང་ཏ་ལའི་ཕྲེང་བ་བདུན་རིམ་གྱིས་མཛེས་པར་བྱས་པ་
ཤ་སྟག་སྟེ། འབྱོར་པ་དང་རྒྱས་པ་དང་བདེ་བ་དང་ལྡན་ཞིང་དགའ་དགའ་ལྟར་འདུག་ལ་ར་བ་དེ་དག་ཀྱང་འཛམ་བུ་ཆུ་བོའི་གསེར་གྱི་བ་གམ་ཆེན་པོ་ཤ་སྟག་གིས་བསྐོར་ཏེ། བ་གམ་ཐམས་ཅད་ཀྱི་བར་བར་ན་ཡང་ཤིང་ལྗོན་པ་གཞོན་ཤ་ཅན་
འབྲས་བུ་དང་མེ་ཏོག་དང་ལྡན་པ་སྣ་མང་པོ་དག་ཡོད་དོ། །ཤིང་ལྗོན་པ་དེ་དག་གི་ཡལ་ག་རླུང་གིས་བསྐྱོད་པ་ལས་ཀྱང་སིལ་སྙན་དགའ་བར་བྱེད་པའི་སྒྲ་སྙན་ཅིང་ཆགས་སུ་རུང་བ་འབྱུང་བ་སྣ་ལྔ་ལྔ་སྒྲོགས་ཏེ། སྒྲ་དེ་དག་གིས་སེམས་ཅན་དེ་
དག་རྩེ་ཞིང་དགའ་ལ་དགའ་མགུར་སྤྱོད་དོ། །འོབས་དེ་དག་ཐམས་ཅད་ཀྱང་ཆུ་བསིལ་ཞིང་ཤེལ་བཞིན་དུ་དང་བ་དག་གིས་གང་བར་འདུག་སྟེ། དེ་དག་གི་ནང་ཁོ་ར་ཁོར་ཡུག་ཏུ་སེམས་ཅན་དེ་དག་རིན་པོ་ཆེའི་གྲུ་དག་གིས་དགའ་ཞིང་རྒྱུ་བར་བྱེད་དོ། །

49-1-18a

ཆུ་དེ་དག་ཀྱང་པད་མ་དང་། ཨུད་པ་ལ་དང་། ཀུ་མུ་ད་ཤིང་རྟའི་འཕང་ལོ་ཙམ་ཤ་སྟག་གིས་བརྒྱན་ཏོ། །འོབས་ཀྱི་ཁོ་ར་ཁོར་ཡུག་ཀྱང་སྐྱེད་མོས་ཚལ་གྱི་ཕྲེང་བས་མཛེས་པར་བྱས་ཏེ། སྐྱེད་མོས་ཚལ་རེ་རེ་ལ་ཡང་རྫིང་བུ་ཐག་
གྲུ་དཔག་ཚད་ཕྱེད་པ་ལྔ་ལྔ་ཡོད་དོ། །རྫིང་བུའི་ཆུ་དག་ཀྱང་པད་མ་དང་ཨུད་པ་ལ་དང་། ཀུ་མུ་ད་ཁ་དོག་སྣ་ཚོགས་དྲི་ཞིམ་པོ་ཤིང་རྟའི་འཕང་ལོ་ཙམ་ཤ་སྟག་གིས་ཁེབས་པར་འདུག་ལ་ཤིང་ལྗོན་པ་མེ་ཏོག་རྒྱས་པའི་ཕྲེང་བས་མཛེས་པར་བྱས་
སོ། །སྐྱེད་མོས་ཚལ་ཁོ་ར་ཁོར་ཡུག་ན་ཡང་ངང་ངུར་དང་། ཟལ་མོ་དང་ཁྲུང་ཁྲུང་ཤུགས་དག་གིས་པད་མའི་ཟེ་འབྲུ་མྱང་བར་བྱེད་དོ། །ཁོ་ར་ཁོར་ཡུག་གི། སྐྱེད་མོས་ཚལ་དེ་དང་དེ་དག་ན། ཡང་ཁང་ཁྱིམ་དག་ཡོད་ལ། ཁང་པ་རེ་རེ་ལ་ཡང་ཆུ་
ཞེང་དུ་དཔག་ཚད་བཞི་བཞི་ཡོད་དེ་བརྩིག་པ་ནི་གསེར་དང་དངུལ་དང་བཻ་དཱུརྱ་དང་ཤེལ་ལས་བྱས། ས་གཞི་ནི་ཀེ་ཀེ་རུ་ལས་གྲུབ་པ་སྟེ། ནོར་བུའི་འཇོ་ཚར་གྱིས་སྤེལ་ཅིང་སྣང་བར་བྱས་པའི་མུ་ཏིག་གི་དོ་ཤལ་སྤྱངས་པ་དང་ལྡན་པ་གསེར་གྱི་རྟ་བབས་ཆེན་
པོ་དང་སྐར་ཁུང་དང་དྲ་བ་དག་གིས་བརྒྱན་པའི་ཁང་བཟངས་མཐོན་པོ་ས་གཞི་ནི་གསེར་གྱི་བྱེ་མ་བདལ་བ་དང་ལྡན་པ་ཤ་སྟག་གོ། །རྫིང་བུ་རྣམས་ཀྱང་འདྲུལ་བའི་ལམ་གསེར་གྱི་ཐེམ་སྐས་ཐེམ་པ་བཅྭ་བརྒྱད་དང་ལྡན་པ་དང་། མཐའ་ཐོག་ཐག་ཏུ་གསེར་
གྱི་ཆུ་ཤིང་གི་ཕྲེང་བས་མཛེས་པར་བྱས་པའི་ལྷའི་ཙན་དན་གྱི་དྲི་བསུང་ཅན་གྱི་ཆུ་དང་ལྡན་པ་ཤ་སྟག་གོ། །གྲོང་ཁྱེར་ཆེན་པོ་དེ་དག་རེ་རེའི་ནང་ན་ཡང་རྒྱལ་པོ་བརྒྱད་ཁྲི་བཞི་སྟོང་བརྒྱད་ཁྲི་བཞི་སྟོང་ཡོད་དེ། དེ་དག་ཐམས་ཅད་ཀྱང་བུད་མེད་ཀྱི་ཚོགས་
དཔག་ཏུ་མེད་པ་དཔག་ཏུ་མེད་པ་དག་གིས་བསྐོར་ཅིང་འདོད་པའི་ཡོན་ཏན་ལྔ་དང་ལྡན་ཏེ་རྩེ་ཞིང་དགའ་ལ་དགའ་མགུར་སྤྱོད་དོ། །སེམས་ཅན་གཞན་དག་ཀྱང་དེ་དང་འདྲ་སྟེ་ས་ཕྱོགས་ཀ་ཙ་ལིན་དའི་གོས་ལྟར་རེག་ན་བདེ་བ་ཙན་དན་གྱི་ཆུས་ཆག་ཆག་
བཏབ་པ། མེ་ཏོག་གི་སིལ་མས་གཏོར་བ། གཞན་དག་ན་རྩེ་ཞིང་དགའ་ལ་དགའ་མགུར་སྤྱོད་དོ། །གྲོང་ཁྱེར་ཆེན་པོ་དག་ན་ཐེག་པ་ཆེན་པོའི་སྒྲ་མ་གཏོགས་པར་ཐེག་པ་གཞན་གྱི་སྒྲ་མེད་དོ། །པད་མ་ཆེན་པོ་དེ་དག་ལ་ཡང་སེང་གེའི་ཁྲི་ཆེན་པོ་རྐང་པ་

49-1-18b

གསེར་དང་དངུལ་དང་བཻ་དཱུརྱ་དང་། ཤེལ་ལས་བྱས་པ། ཀ་ལིང་ཀའི་རས་ཀྱིས་གཡོགས་པ་ཆེ་བ་ལ་འོས་པ་འཇིག་རྟེན་གསུམ་ན་ཕུལ་དུ་བྱ་བ་ཤ་སྟག་གིས་དཀྲིས་ཏེ། སེང་གེའི་ཁྲི་དེ་དག་ལ་རྒྱལ་པོ་དེ་དག་འཁོད་ཅིང་སེམས་ཅན་གཞན་དག་ཐེག་པ་ཆེན་
པོའི་མདོ་སྡེ་རྣམས་སློབ་པར་བྱེད་དེ། རྒྱལ་པོ་དེ་དག་གི་མདུན་ན་ལ་ལ་ནི་ཡི་གེ་འདྲི། ལ་ལ་ནི་ཀློག་ལ་ལ་ནི་ཁ་དོན་སློབ་བོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་ཀྱི་བ་སྤུའི་ཁུང་བུ་ནས་སྐྱེས་པའི་པད་མ་དག་ལ་
འཁོད་པའི་སེམས་ཅན་དེ་དག་འདོད་པའི་ཡོན་ཏན་ལྔའི་དགའ་བ་དང་ལྡན་ཡང་། དེ་དག་ཡོངས་སུ་སྤངས་ནས་མྱ་ངན་གྱིས་གདུངས་ཏེ་སྨྲེ་སྔགས་འདོན་ཅིང་ཀྱི་ཧུད་ཀྱི་ཧུད་ཅེས་བླ་ཞིང་འཁོད་དེ་ཉིས་གྱུར་དུ་མཆོད་པའི་ཚོགས་འབུལ་བར་བྱེད་དོ། །དེ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་བྱང་ཆུབ་སེམས་དཔའ་དཔག་ཏུ་མེད་པས་བསྐོར་ཏེ། དེ་ལྟ་བུའི་འབྱོར་པའི་རྣམ་པ་དག་སྟོན་ཅིང་མཆོད་པའི་ཚོགས་ཆེན་པོ་དང་ཞལ་ཟས་ཆེས་རྒྱ་ཆེ་བ་དག་ཁྱེར་ཏེ་འོངས་ནས། ཞལ་
ཟས་དེ་དག་དང་པད་མ་དེ་དག་གི་དྲི་བསུང་ཚོར་བ་གང་ཡིན་པ་དེ་དག་ཀྱང་ཉོན་མོངས་པ་དང་བྲལ་བར་གྱུར་ཏོ། །བྱང་ཆུབ་སེམས་དཔའི་མཐུ་ཆེན་པོས་འཇིག་རྟེན་གྱི་ཁམས་ཐམས་ཅད་ཀྱང་མཐོང་བར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་
པོ་ལུས་ཆེན་མཐའ་ཡས་ཀྱི་ལུས་ཀྱི་ཚད་ཀྱང་ནམ་མཁའ་དང་མཉམ་པར་འདུག་སྟེ། སུས་ཀྱང་མཐོང་བར་མི་ནུས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་བཅོམ་ལྡན་འདས་ཀྱི་ཐད་དུ་སོང་སྟེ་ཞབས་ལ་མགོ་
བོས་ཕྱག་འཚལ་ནས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། །བདག་གིས་ཕུལ་བའི་ཞལ་ཟས་བཅོམ་ལྡན་འདས་ཀྱིས་བཞེས་སུ་གསོལ། དེ་ནས་བཅོམ་ལྡན་འདས་ཅང་མི་གསུང་བར་གྱུར་ཏེ། ལན་གཉིས་ལན་གསུམ་དུ་གསོལ་ཀྱང་བཅོམ་
ལྡན་འདས་ཅང་མི་གསུང་བར་བཞུགས་ནས་བྱང་ཆུབ་སེམས་དཔའ་དེ་ལངས་ཏེ་ཕྱོགས་གཅིག་ཏུ་འདུག་གོ། །དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་ལོགས་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་ཤེས་བྱ་བ་འཁོར་གྱི་ཚོགས་

49-1-19a

ཆེན་པོ་དང་ལྡན་པ་ཤ་སྟག་ལྷགས་ཏེ། དེ་དག་གི་པད་མ་དང་གྲོང་ཁྱེར་གྱི་ཚད་ཀྱང་སྔ་མ་སྔ་མ་ལས་ཉིས་གྱུར་ཉིས་གྱུར་གྱིས་ཆེ་བ་དང་། འབྱོར་པ་ཉིས་གྱུར་ཉིས་གྱུར་གྱིས་ཆེ་བ་ཤ་སྟག་དང་ཆས་ཏེ། དེ་དག་དེར་ལྷགས་ནས་བཅོམ་ལྡན་འདས་ལ་པད་མ་དག་གིས་མཆོད་པ་བྱས་ཏེ་སྔ་
མ་བཞིན་དུ་ཕྱོགས་གཅིག་ཏུ་འཁོད་དོ། །ཤིང་ས་ལ་ཟུང་གི་དྲུང་གྲུབ་པའི་གནས་དེ་ཉིད་ན་དཀྱིལ་འཁོར་སུམ་བཅུ་རྩ་གཉིས་ཀྱི་ཚད་ཀྱི་ཁྱོན་གྱི་ས་གཞི་ལ་སེམས་ཅན་མི་འཁོད་པའི་གོ་སྐབས་ཅི་ཡང་མེད་དོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་
དེ་ལྟར་ལུས་ཆེ་བ་རང་རང་གི་གཡོག་འཁོར་དག་དང་བཅས་པ་དེ་རྣམས་ཀྱང་ཁ་ཅིག་ནི་ས་ཕྱོགས་སྨྱུང་བུའི་རྩེ་མོའི་ཁྱོན་ཙམ་ལ་འཁོད་དོ། །ཁ་ཅིག་ནི་ཁབ་ཀྱི་རྩེ་མོའི་ཁྱོན་ཙམ་ལ་འཁོད་དོ། །ཁ་ཅིག་ནི་རྡུལ་ཕྲ་རབ་ཀྱི་ཁྱོན་ཙམ་ལ་བག་ཡངས་སུ་འཁོད་དོ། །
འཇིག་རྟེན་གྱི་ཁམས་རྡུལ་ཕྲ་རབ་ཀྱི་རྡུལ་སྙེད་དག་ན་བྱང་ཆུབ་སེམས་དཔའ་འཁོད་པ་གང་ཡིན་པ་དེ་དག་ཀྱང་ཐབས་དེ་ལྟ་བུར་ལྷགས་ཏེ་འཁོད་དོ། །འཛམ་བུའི་གླིང་གི་སེམས་ཅན་ཡང་ཚེ་དང་ལྡན་པ་འོད་སྲུང་དང་། གནས་བརྟན་ཀུན་དགའ་བོ་དང་། རྒྱལ་
པོ་མ་སྐྱེས་དགྲ་རྣམས་མ་གཏོགས་པར་དེར་མ་འོངས་པ་སུ་ཡང་མེད་དེ། ཐ་ན་མི་གདུག་པ་དང་། སྦྲུལ་གདུག་པ་དང་། སྡིག་པ་སྡོམ་ལ་སོགས་པ་ལས་མི་བཟད་པ་བཅུ་དྲུག་བྱེད་པ་ཡན་ཆད་ཀྱང་དེར་ལྷགས་སོ། །སྦྱིན་བྱེད་མའི་བུ་དང་། ལྷ་མ་
ཡིན་རྟག་ཏུ་འཁོན་གྱི་བསམ་པ་ཅན་ཐམས་ཅད་ཀྱང་སྡིག་པའི་ལས་སྤངས་ནས་གཅིག་ལ་གཅིག་བུ་དང་། མ་དང་སྲིང་མོ་དང་འདྲ་བར་སེམས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འཁོད་པའི་སེམས་ཅན་ཐམས་ཅད་
ཀྱང་གཅིག་ལ་གཅིག་བུ་གཅིག་པ་ལ་བྱ་བ་བཞིན་དུ་བྱམས་པར་བྱེད་དེ། འདོད་ཆེན་པོ་ནི་མ་གཏོགས་སོ། །མི་མཇེད་ཀྱི་འཇིག་རྟེན་གྱི་ཁམས་འདི་ཡང་དེ་བཞིན་གཤེགས་པའི་མཐུས་བོང་བ་དང་རྡོ་དང་། གསེག་མ་དང་རྡུ་བ་དང་ཚེར་མ་མེད་པར་གྱུར་
ཏེ་ཤིང་ལྗོན་པ་རིན་པོ་ཆེའི་འཁྲི་ཤིང་གིས་དཀྲིས་པ་མཉེན་ཞིང་རེག་ན་འཇམ་པ་དག་དང་ལྡན་ཞིང་འཇིག་རྟེན་གྱི་ཁམས་བདེ་བ་ཅན་དང་འདྲ་བར་གྱུར་ཏོ། །སེམས་ཅན་དེར་ལྷགས་པ་ཐམས་ཅད་ཀྱིས་ཀྱང་དེ་ན་འཁོད་བཞིན་དུ་ཇི་ལྟར་མེ་ལོང་གི་ངོས་ལ་རང་

49-1-19b

གི་གཟུགས་བརྙན་སྣང་བ་བཞིན་དུ་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་དང་། སངས་རྒྱས་ཀྱི་ཞིང་འབྱོར་པ་དང་ལྡན་པ་གཞན་དག་ཀྱང་མཐོང་ངོ་། །དེ་ནས་དེ་བཞིན་གཤེགས་པའི་ཞལ་ནས་འོད་ཟེར་ཁ་དོག་སྣ་ཚོགས་སྔོན་པོ་དང་སེར་པོ་དང་
དམར་པོ་དང་དཀར་པོ་དང་བཙོད་ཀ་དང་ཤེལ་གྱི་ཁ་དོག་ལྟ་བུ་དང་། མེ་ལྕེ་ལྟ་བུ་དག་བྱུང་བ་གང་ཡིན་པ་དེ་དག་གིས་བྱ་བ་གང་ཡིན་པ་དེ་དག་གི་བྱ་བ་ཐམས་ཅད་བྱས་ཏེ་ཕྱིར་ལོག་ནས་བཅོམ་ལྡན་འདས་ཉིད་ཀྱི་ཞལ་དུ་ཞུགས་ཏེ་མི་སྣང་བར་གྱུར་ཏོ། །འཁོར་
ཐམས་ཅད་ཀྱི་འོད་ཀྱང་དེས་ཟིལ་གྱིས་གནོན་པར་གྱུར་ཏོ། །དེ་ནས་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་གྱིས་འོད་ཟེར་དེ་དག་བཅོམ་ལྡན་འདས་ཀྱི་ཞལ་དུ་མི་སྣང་བར་གྱུར་པ་མཐོང་ནས་འཇིགས་ཤིང་སྐྱི་བུང་ཞེས་བྱས་ཏེ་རྒྱུ་མེད་པར་
བཅོམ་ལྡན་འདས་ཀྱི་འོད་ཟེར་རྣམས་ཕྱིར་ལོག་ནས་མི་སྣང་བར་འགྱུར་བའི་མི་རིགས་ན། གོར་མ་ཆག་པར་ཕྱོགས་བཅུ་དག་ཏུ་བྱ་བ་རྣམས་ཟིན་ནས་ད་ནི་གདོན་མི་ཟ་བར་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་འགྱུར་རོ། །བཅོམ་ལྡན་
འདས་ཀྱིས་གང་ལས་ཀྱང་ཞལ་ཟས་མ་བཞེས་ན། ཀྱེ་མ་སེམས་ཅན་ཐམས་ཅད་ལ་ཚད་མེད་པ་བཞི་སྤངས་སམ། ཅི་སྨྱུང་བར་བཞུགས་པར་ཆད་དམ། ཀྱེ་མ་ཅི་ཉི་མ་དང་ཟླ་བ་ནུབ་བམ། ཅི་དམ་པའི་ཆོས་ཀྱི་གྲུ་བྱིང་ངམ། ཀྱི་ཧུད་ཀྱི་ཧུད་ཅེས་
བླ་ཞིང་འཁོད་དོ། །དེ་ནས་དེ་དག་རང་རང་གིས་ཡན་ལག་རྣམས་རྨས་པར་བྱས་པའི་ཁྲག་གིས་ས་གཞི་འདམ་དུ་གྱུར་ཏོ། །ཆུ་ཀླུང་གསེར་ལྡན་ཡང་ཁྲག་ཏུ་འབབ་པར་གྱུར་ཏོ། །དེ་ནས་འཁོར་དེ་དག་གི་ནང་ན་གྲོང་ཁྱེར་ཀུ་ཤི་པ་མགར་བའི་བུ་དགེ་
བསྙེན་སྐུལ་བྱེད་ཅེས་བྱ་བ་དེ་མགར་བའི་བུ་བཅྭ་ལྔ་དང་ཐབས་གཅིག་ཏུ་ལངས་ཏེ། རང་རང་གི་སྤྱོད་ལམ་བཅོས་ནས་འཇིག་རྟེན་དག་ལ་བལྟས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ་བཅོམ་ལྡན་འདས་
ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་མཆི་མ་མི་ཐུབ་བཞིན་དུ་ཞབས་ལ་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་སེམས་ཅན་ཐམས་ཅད་ངེས་པར་བསྒྲལ་བའི་སླད་དུ། བཅོམ་

49-1-20a

ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ་ལ་ཞལ་ཟས་ཀྱི་ཐ་མ་དབུལ་བར་འཚལ་ཏེ། བདག་ནི་མགོན་མ་མཆིས་པ་ལགས། རྩ་ལག་
མ་མཆིས་པ་ལགས། སྐྱབས་མ་མཆིས་པ་ལགས། ཕོངས་ཏེ་རེ་བ་ལགས་ན། བཅོམ་ལྡན་འདས་ཀྱིས་བདག་གིས་ཕུལ་བའི་ཞལ་ཟས་བཞེས་ཏེ་ཡོངས་སུ་མྱ་ངན་ལས་མི་འདའ་བར་མཛད་དུ་གསོལ། བཅོམ་ལྡན་འདས་དཔེར་གསོལ་ན་
ཁྱིམ་བདག་གམ་བྲམ་ཟེ་ཤིན་དུ་དབུལ་པོ་འགའ་ཞིག་གཞན་གྱི་ཡུལ་དུ་མཆིས་ལ། བདག་ཉིད་སྤྲོ་བ་བསྐྱེད་དེ་མཐར་གྱིས་ཞིང་ལས་བརྩམས་ནས་དེས་རྨོན་གླང་རྨོ་སྐྱེན་པ་ཐོང་གཤོལ་དང་སྦྱར་བ་དག་གིས་ཞིང་ལ་རྡོ་དང་། རྡུ་བ་དང་། ཚེར་མ་མ་
མཆིས་པར་བགྱིས་ཏེ་རེ་བ་ཆེན་པོ་བསྐྱེད་ནས་སྤྲིན་ཆེན་པོ་ལས་ཆར་འབབ་པ་སྡོད་ཅིང་མཆིས་པ་དེ་བཞིན་དུ། བཅོམ་ལྡན་འདས་བདག་ནི་ལུས་ཀྱི་ཞིང་ལ་ཉེས་པ་གསུམ་དང་བཞི་དང་བྲལ་བའི་ཡིད་དང་ངག་གི་རྨོན་གླང་དང་ཤེས་པའི་ཐོང་གཤོལ་
གྱིས་ཉོན་མོངས་པ་རྣམ་པ་སྣ་ཚོགས་ཀྱི་རྡོ་དང་། རྡུ་བ་དང་། ཚེར་མ་མ་མཆིས་པར་བགྱིས་ནས་ཁྱོད་ཀྱི་ཆོས་ཀྱི་སྤྲིན་ཆེན་པོ་ལས་ཆོས་ཀྱི་ཆར་པ་འབབ་པ་ལ་སྡོད་ཅིང་མཆིས་ཏེ་དགེ་སློང་གི་དགེ་འདུན་དང་བཅས་པར་སྤྱན་འདྲེན་ན། བདག་གི་དབུལ་
བ་བསལ་བ་དང་སེམས་ཅན་ཐམས་ཅད་ལ་སྨན་པའི་སླད་དུ་བདག་གིས་ཕུལ་བའི་ཞལ་ཟས་བཞེས་སུ་གསོལ། བདག་ནི་མགོན་མ་མཆིས་པ། སྐྱབས་མ་མཆིས་པ་ལགས་ན། དེ་བཞིན་གཤེགས་པས་བདག་ལ་སྒྲ་གཅན་ཟིན་བཞིན་དུ་
གཟིགས་པར་གསོལ། དེ་ནས་བཅོམ་ལྡན་འདས་ཐམས་ཅད་མཁྱེན་པ་རྒྱལ་བ་གང་ཟག་བླ་ན་མེད་པས་མགར་བའི་བུ་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ། །སྐུལ་བྱེད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ཀྱིས་ཁྱོད་ཀྱི་ཞལ་ཟས་ཐ་མ་སྦྱིན་པའི་ཕ་རོལ་ཏུ་ཕྱིན་པ་ཆེན་པོ་བཞེས་པར་མཛད་དོ། །དེ་ནས་ལྷ་དང་མི་དང་ལྷ་མ་ཡིན་དེ་དག་གིས་སྐུལ་བྱེད་ཀྱིས་ཕུལ་བའི་ཞལ་ཟས་ཀྱི་ཐ་མ་སྦྱིན་པའི་ཕ་རོལ་ཏུ་ཕྱིན་པ་ཆེན་པོ་དེ་བཞིན་གཤེགས་པ་དགེ་སློང་

49-1-20b

གི་དགེ་འདུན་དང་བཅས་པས་བཞེས་སོ་ཞེས་ཐོས་ནས་ངོ་མཚར་རྨད་དུ་བྱུང་བའི་ཆོས་ཐོབ་སྟེ། ལེགས་སོ་ལེགས་སོ་ཞེས་སྐད་ཆེན་པོ་ཕྱུང་ནས་མགར་བའི་བུ་སྐུལ་བྱེད་ལ་འདི་སྐད་ཅེས་སྨྲས་སོ། །ཀྱེ་མགར་བའི་བུ་སྐུལ་བྱེད་ཁྱོད་སྐྱིད་དེ་བ་ཁྱོད་
ཀྱིས་མི་ལུས་ཐོབ་པ་ནི་ཕན་ཐོགས་པར་གྱུར་ཏོ། །ལེགས་པར་ཐོབ་བོ། །སྐུལ་བྱེད་འཇིག་རྟེན་ན་ཨུ་དུམ་བ་རའི་མེ་ཏོག་བཞིན་དུ་མཛེས་པ་ནི་རྙེད་པར་དཀའོ། །དེ་བས་ཀྱང་ཆེས་དེ་བཞིན་གཤེགས་པ་འབྱུང་བ་རྙེད་པར་དཀའོ། །དེ་བས་ཀྱང་དད་པ་རྙེད་པ་ཤིན་ཏུ་དཀའོ། །དེ་བས་ཀྱང་ཆེས་
ཆོས་ཐོས་པ་རྙེད་པར་དཀའོ། །དེ་བས་ཀྱང་ཆེས་དེ་བཞིན་གཤེགས་པ་ལ་ཞལ་ཟས་ཀྱི་ཐ་མ་དབུལ་བ་རྙེད་པར་དཀའོ། །དེ་བས་ན་ཞལ་ཟས་ཀྱི་ཐ་མ་སྦྱིན་པའི་ཕ་རོལ་ཏུ་ཕྱིན་པ་ཐོབ་པ་མགར་བའི་བུ་སྐུལ་བྱེད་ཁྱོད་ལ་ཕྱག་འཚལ་ལོ། །དཔེར་ན་སྟོན་ཟླ་འབྲིང་པོ་ཉ་ལ་སྤྲིན་མེད་པའི་ཚེ་ཟླ་བའི་དཀྱིལ་
འཁོར་དྲི་མ་མེད་པ་མཛེས་པ་མཐོང་བ་ན་ཟླ་བ་འབའ་ཤིག་མངོན་དུ་སྣང་བ་དེ་བཞིན་དུ་ཁྱོད་ཀྱིས་ཕུལ་བའི་ཞལ་ཟས་ཀྱི་ཐ་མ་དེ་བཞིན་གཤེགས་པས་བཞེས་པས་ན་ཁྱོད་འབའ་ཤིག་སེམས་ཅན་ཐམས་ཅད་ལ་མངོན་དུ་སྣང་ངོ་། །ཁྱོད་ལ་ཡང་དང་ཡང་དུ་
ཕྱག་འཚལ་ལོ། །སྐུལ་བྱེད་ཁྱོད་ནི་མིའི་ལུས་བྱེད་བཞིན་དུ་ལྷའི་ཡང་ལྷ་ཡིན་ནོ། །དེ་བཞིན་གཤེགས་པའི་སྲས་སྒྲ་གཅན་ཟིན་དང་འདྲའོ་ཞེས་བྱས་ནས་ཚིགས་སུ་བཅད་པ་འདི་དག་ཀྱང་སྨྲས་སོ། །ཁྱོད་ནི་མི་མ་ཡིན་ཏེ་ལྷ་མཆོག་ཡིན། །མི་མཆོག་
གཙོ་བོ་ཁྱད་པར་འཕགས་པ་སྟེ། །དེ་ཕྱིར་ཁྱོད་ལ་གསོལ་བ་འདི་སྐད་འདེབས། །སྟོན་པ་ཡོངས་སུ་མྱ་ངན་འདའ་བར་ཆས། །བདག་ཅག་ཀུན་ལ་བརྩེ་བས་སྐུལ་བྱེད་ཁྱོད། །སྐྱེ་བོ་རྣམས་ལ་ཡུན་ཏུ་ཕན་པའི་ཕྱིར། །འདིར་ནི་སྟོན་པ་དཔག་མེད་
མགོན་པོ་ལ། །བཞུགས་ཤིང་རྒྱུན་ཏུ་བདུད་རྩི་སྟོན་ཅེས་གསོལ། །སྲིད་ལས་རྣམ་གྲོལ་མྱ་ངན་འདའ་བཞེད་ལ། །གལ་ཏེ་ཁྱོད་ཀྱིས་དེ་རིང་མ་གསོལ་ན། །བདག་ཅག་ཐམས་ཅད་མ་རུང་ཤེས་པར་གྱིས། །དེ་བས་ཕན་ཕྱིར་མགོན་ལ་གསོལ་
བ་ཐོབ། །དེ་ནས་ལ་ལ་ཞིག་ཕ་མ་གཉིས་ཤི་བ་ལས་ཕྱིར་སོས་ཏེ་གསོན་པོར་འདུག་པ་མཐོང་ན་མཆོག་ཏུ་དགའ་བར་གྱུར་པ་དེ་ཁོ་ན་བཞིན་དུ་མགར་བའི་བུ་སྐུལ་བྱེད་དེ་མཆོག་ཏུ་དགའ་བར་གྱུར་ནས་ལག་པ་བརྐྱང་སྟེ། བཅོམ་ལྡན་འདས་ལ་མགོ་བོས་

49-1-21a

ཕྱག་འཚལ་ནས་ལངས་ཏེ་ཚིགས་སུ་བཅད་པ་འདི་དག་སྨྲས་སོ། །ཀྱེ་མ་དེང་བདག་རྙེད་པ་ལེགས་པར་རྙེད། །མི་ཡི་འཇིག་རྟེན་སྐྱེས་པ་འབྲས་བུ་ཡོད། །ད་ནི་རྙེད་ལ་སོགས་ལས་འབྲལ་མི་འགྱུར། །མི་བཟད་དམྱལ་བར་ཡང་ནི་
ལྟུང་མི་འགྱུར། །དེང་འདིར་རྙེད་པ་ཆེན་པོ་རྙེད་པ་འདི། །གསེར་གྱི་ཕུང་པོ་བས་ཀྱང་ལྷག་པ་ཡིན། །དཔའ་བོ་བདེ་གཤེགས་མགོན་དང་ཕྲད་པས་ན། །ཕྱིན་ཅད་བདག་ནི་དུད་འགྲོས་འཇིགས་པ་མེད། །སངས་རྒྱས་ལ་ནི་དད་པ་གཏིང་ཟུག་པ། །
དེང་རྙེད་ཨུ་དུམ་བ་རའི་མེ་ཏོག་བཞིན། །རབ་འཇིགས་ཡི་དགས་འགྲོ་བ་ཡོངས་སྤངས་ཤིང་། །ལྷ་མིན་སྐྱེ་བའི་ས་བོན་མི་བཟད་བཅོམ། །དེ་བཞིན་གཤེགས་འབྱུང་དཀོན་དང་དེང་ཕྲད་པ། །ཁབ་ཀྱི་རྩེ་མོར་ཡུངས་འབྲུ་ཆགས་པ་བཞིན། །དེ་
ལ་ཕ་རོལ་ཕྱིན་མཆོག་སྦྱིན་ཕུལ་བས། །རྟག་ཏུ་ལྷ་ཡི་འགྲོ་བར་འཕར་བར་གྱུར། །ཆུ་གནས་པད་མ་ཆུས་མི་ཆགས་པ་ལྟར། །དྲང་སྲོང་ཆེན་པོ་འཇིག་རྟེན་ཆོས་རྣམས་ཀྱིས། །ཆགས་མེད་ཕྲད་པས་སྲིད་རྩེའི་ས་བོན་ཀུན། །དྲུངས་ཕྱུང་
བདག་ཉིད་འཁོར་བའི་མཚོ་ཆེན་རྒལ། །རྒྱ་མཚོའི་ནང་གི་རུ་སྦལ་ཞར་བའི་མགྲིན། །གཉའ་ཤིང་མིག་ཏུ་ཆུད་དཀའ་འདྲ་བ་ལས། །བདེ་གཤེགས་དེང་ཕྲད་དེ་ལ་སྦྱིན་པ་ཕུལ། །དེ་ན་བདག་གིས་ཉོན་མོངས་གསོག་ཀུན་བཅོམ། །ལྷ་རྣམས་
ཀྱིས་ནི་ཞལ་ཟས་བཟང་པོ་དག །ཕུལ་ཡང་བདེ་གཤེགས་མ་བཞེས་བདག་ལས་ནི། །ཨེ་རན་ཌ་ཡི་མེ་ཏོག་འདྲ་བཞེས་དེས། །བདག་ནི་འཇིག་རྟེན་རབ་མཆོག་དཔལ་ཡོན་ཅན། །ཚངས་པ་བརྒྱ་བྱིན་ལ་སོགས་འཇིག་རྟེན་འདི། །ཐམས་
ཅད་ལྷགས་ཏེ་གུས་པར་བདག་ལ་མཆོད། །ཁྱུ་མཆོག་གནས་སུ་སོན་པ་གང་ཡིན་འདི། །སྐྱེ་བ་འདི་ཉིད་ལ་ནི་བདག་གིས་ཐོབ། །དེ་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །མགོན་ཁྱོད་མྱ་ངན་འདའ་བ་མཐོང་
ནས་ནི། །འཇིག་རྟེན་འདི་ཀུན་སྡུག་བསྔལ་གཟིར་བར་གྱུར། །དབང་མེད་ཀྱི་ཧུད་ཅེས་ནི་སྐད་ཆེར་བླ། །འདི་དག་མ་དོར་རྟག་ཏུ་སྲས་བཞིན་གཟིགས། །ལྷུན་པོའི་གསེར་གྱི་རྩེ་མོ་རབ་མཐོ་བ། །མཚོ་ཆེན་དབུས་ན་མཛེས་པར་གནས་པ་

49-1-21b

ལྟར། །ཆོས་ཀྱི་མངའ་བདག་ཁྱོད་ནི་ཆོས་སྟོན་ཅིང་། །དགེ་འདུན་དབུས་སུ་མཛེས་པར་བཞུགས་སུ་གསོལ། །ཇི་ལྟར་ཉི་མ་གཟི་ཅན་ཤར་བ་ན། །འོད་ཟེར་དག་གིས་སྤྲིན་སྲབ་སེལ་བ་ལྟར། །དྲང་སྲོང་ཆེན་པོ་ཡེ་ཤེས་སྒྲོན་ཆེན་གྱིས། །
སྐྱེ་བོ་མང་པོའི་མྱ་ངན་དེང་བསལ་མཛོད། །སེམས་ཅན་འདི་དག་ངུས་མོས་མིག་སྐྲངས་ཤིང་། །སྡུག་བསྔལ་གཅིག་པུའི་རྒྱ་མཚོའི་གཏིང་དུ་ཞུགས། །དེ་ཕྱིར་དད་པ་རྙེད་དཀའ་བསྐྱེད་མཛད་ཅིང་། །འདི་རྣམས་སྡུག་བསྔལ་ཆོད་ལ་ཡུན་དུ་
བཞུགས། །དེ་ནས་བཅོམ་ལྡན་འདས་ཀྱིས་སྐུལ་བྱེད་ལ་བཀའ་སྩལ་པ། སྐུལ་བྱེད་དེ་ནི་དེ་བཞིན་ནོ། །དེ་ནི་དེ་བཞིན་ཏེ། སངས་རྒྱས་འབྱུང་བ་ནི་ཨུ་དུམ་བ་རའི་མེ་ཏོག་བཞིན་ཤིན་དུ་རྙེད་པར་དཀའོ། །དད་པ་ཡང་རྙེད་པར་དཀའོ། །ཆོས་
ཐོས་པ་ཡང་རྙེད་པར་དཀའོ། །དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ཚེ་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ཡང་རྙེད་པར་དཀའོ། །སྐུལ་བྱེད་གཞན་ཡང་ཁྱོད་མ་ངུ་མྱ་ངན་མ་བྱེད་པར་
བདག་གིས་དེ་བཞིན་གཤེགས་པ་ལ་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ཐོབ་བོ་སྙམ་དུ་དགའ་བ་སྐྱེད་ཅིག་དང་དེ་བཞིན་གཤེགས་པ་ལ་བཅོམ་ལྡན་འདས་བཞུགས་སུ་གསོལ་ཞེས་དེ་སྐད་དུ་ཁྱོད་གསོལ་བ་
མ་འདེབས་ཤིག །སངས་རྒྱས་རྣམས་ཀྱི་ཆོས་ཀྱི་དེ་ཁོ་ན་ཉིད་ལ་རྟོགས་ཤིག །མི་རྟག་པ་ཉིད་ལ་འཇུག་པར་གྱིས་ཤིག །འདུ་བྱེད་རྣམས་ཀྱི་རང་བཞིན་ཤེས་པར་གྱིས་ཤིག་ཅེས་བཀའ་སྩལ་ནས་ཚིགས་སུ་བཅད་པ་འདི་དག་གསུངས་སོ། །
ཚེ་ནི་ཤིན་ཏུ་རིང་ཡང་འཇིག་པར་འགྱུར། །འདིར་ནི་ཐམས་ཅད་ངེས་པར་འཆི་བར་འགྱུར། །འཚོ་བའི་འཇིག་རྟེན་འཇིག་པའི་ཆོས་ཅན་ཡིན། །འབྱོར་པ་ཐམས་ཅད་རྒུད་པར་གཞོལ་བར་འགྱུར། །རྟག་ཏུ་ལང་ཚོ་རྒ་བས་ངེས་པར་འཇོམས། །
གཟུགས་བཟང་ནད་མེད་ནད་ཀྱིས་འཇིག་པར་འགྱུར། །སྲོག་ནི་འཆི་བས་རྩ་ནས་འབྱིན་པར་བྱེད། །འཇིག་རྟེན་ཀུན་ན་རྟག་པ་ཅི་ཡང་མེད། །དབང་ཕྱུག་མི་རྟག་ཚེ་ཡང་མི་རྟག་སྟེ། །སྐྱེ་བོ་སྡུག་བསྔལ་འཁོར་ལོར་རྟག་ཏུ་འཁོར། །འཇིག་

49-1-22a

རྟེན་གསུམ་ན་བརྟན་པོ་ཅི་ཡང་མེད། །སྲིད་པ་དག་ན་འགྲོ་ཀུན་སྲོག་ཏུ་འདུག །སྲིད་པ་འཇིག་པའི་ཆོས་ཅན་རབ་གཡོ་བ། །འདི་དག་ན་ནི་བདེ་བ་ཅི་ཡང་མེད། །རྒ་དང་འཆི་དང་ནད་དང་རྒུད་རྣམས་ཀྱི། །འཇིགས་
པས་རྟག་ཏུ་ཀུན་ནས་གཙེ་བར་བྱེད། །སྲིད་པ་མཐའ་མེད་མི་བརྟན་སྙིང་པོ་མེད། །ཐམས་ཅད་དགྲ་དང་འཁུ་བར་ཤེས་པར་གྱིས། །དེ་ན་འཁོར་ཞིང་ཉོན་མོངས་དྲ་བ་ཡིས། །འཇིག་རྟེན་དཀྲིས་ཏེ་དར་གྱི་སྲིན་བུ་བཞིན། །འཇིག་རྟེན་དག་ན་ཐེར་
ཟུག་གནོད་པའི་གཞི། །རྟག་ཏུ་འབྲས་ལྟར་སྡུག་བསྔལ་འབྲེལ་པ་གང་། །མི་གཙང་ལུས་དང་འདོད་པ་དེ་དག་ལ། །ཕན་འདོད་སྡུག་བསྔལ་བསལ་འདོད་སུ་ཞིག་དགའ། །མི་རྟག་འདོད་པ་རྣམས་ལ་ཆགས་པ་མེད། །ཚུལ་བཞིན་རྟོག་པས་
འདོད་ཆགས་འབྲལ་བར་འགྱུར། །དེ་ནས་ཡང་དག་མཐོང་ན་འདོད་ཆགས་འབྲལ། །དེ་དག་སྤངས་བཅད་གྲོལ་བ་ཉིད་དུ་འགྱུར། །ང་ནི་སྲིད་པའི་ཆུ་ཆེན་ལེགས་པར་རྒལ། །ང་ནི་སྡུག་བསྔལ་རྣམས་འདས་བདེ་བར་ཞུགས། །དེ་ཕྱིར་ངས་ནི་མཐའ་
ཡས་སྤྲོས་མེད་པ། །ཆགས་པ་ཀུན་བསལ་ཐར་པ་ཐོབ་པར་གྱུར། །ང་ལ་རྒ་དང་ན་དང་འཆི་བ་མེད། །ང་ལ་རྟག་ཏུ་ཚེ་ཡང་ཟད་པ་མེད། །ང་ནི་མེ་ལྟར་འབར་ཏེ་འགྲོ་འགྱུར་གྱིས། །ཁྱོད་ཀྱིས་ང་ནི་མེད་འགྱུར་མ་སེམས་ཤིག །དེ་བཞིན་
གཤེགས་ཉིད་ལྷུན་པོ་འདྲ་བར་ལྟོས། །ང་དེང་ཡང་དག་མྱ་ངན་འདའ་བར་འགྱུར། །བདེ་མཆོག་དེ་ནི་ང་ཡིས་ཆོས་ཉིད་དེ། །རྒྱལ་རྣམས་སྤྱོད་ཡུལ་ཡིན་གྱིས་ཁྱོད་མ་ངུ་། །དེ་ནས་བཅོམ་ལྡན་འདས་ལ་མགར་བའི་བུ་སྐུལ་བྱེད་ཀྱིས་འདི་
སྐད་ཅེས་གསོལ་ཏོ། །བཅོམ་ལྡན་འདས་དེ་ནི་དེ་ལགས་སོ། །དེ་ནི་དེ་ལགས་ཏེ། མྱ་ངན་ལས་འདས་པ་ནི་བདག་གིས་ཀྱང་བསམ་གྱིས་མི་ཁྱབ་ལགས་ན། སྦྲང་བུ་དང་འདྲ་བའི་སེམས་ཅན་ཐེག་པ་དམན་པ་གཞན་དག་གིས་ལྟ་སྨོས་ཀྱང་ཅི་
འཚལ། བཅོམ་ལྡན་འདས་ཀྱེ་མ་བདག་དེང་དུ་བྱང་ཆུབ་སེམས་དཔའ་མི་མཆོག་སྐལ་བ་ཆེན་པོ་དང་ལྡན་པ་མཆོད་པར་འོས། འཇམ་དཔལ་གཞོན་ནུར་གྱུར་པ་ལ་སོགས་པ་དང་། ཟག་པ་ཟད་པ་རྣམས་དང་མཉམ་པ་ཉིད་དུ་གྱུར་ཏོ། །

49-1-22b

བཅོམ་ལྡན་འདས་དཔེར་གསོལ་ན། གསར་དུ་བསྙེན་པར་རྫོགས་པ་གཞོན་ནུ་ཡང་རབ་ཏུ་བྱུང་བ་དེ་ཉིད་ཀྱི་ཉིན་པར་ནས་དགེ་འདུན་གྱི་ནང་ན་དགེ་འདུན་དུ་བགྲང་ཞིང་ཡང་དག་པར་འདུས་པར་འགྱུར་བ་དེ་བཞིན་དུ་བདག་ཀྱང་དེ་བཞིན་གཤེགས་པའི་
མཐུས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གྲངས་སུ་གཏོགས་ཤིང་ཡང་དག་པར་འདུས་ལགས་སོ། །བཅོམ་ལྡན་འདས་བདག་ནི་དེ་བཞིན་གཤེགས་པ་ཡུན་དུ་བཞུགས་པར་འཚལ་གྱི། ཁ་ཟས་ཚིག་པ་བཞིན་དུ་མྱ་
ངན་ལས་འདའ་བར་གཤེགས་པར་ནི་མི་འཚལ་ལགས་སོ། །དེ་ནས་དེའི་ཚེ་འཇམ་དཔལ་གཞོན་ནུར་གྱུར་པས་མགར་བའི་བུ་སྐུལ་བྱེད་ལ་འདི་སྐད་ཅེས་སྨྲས་སོ། །སྐུལ་བྱེད་ཁྱོད་འདི་སྐད་དུ་བདག་ནི་དེ་བཞིན་གཤེགས་པ་ཡུན་དུ་བཞུགས་
པར་འཚལ་གྱི། ཁ་ཟས་ཚིག་པ་བཞིན་དུ་མྱ་ངན་ལས་འདའ་བར་གཤེགས་པར་ནི་མི་འཚལ་ལོ་ཞེས་དེ་སྐད་མ་ཟེར་ཅིག །འདུ་བྱེད་ཀྱི་རང་བཞིན་བལྟ་བར་བྱ་མོད། དེ་ལྟར་ལྟ་བ་གང་ཡིན་པ་དེ་ནི་སྟོང་པ་ཉིད་བསྒོམ་པ་ཡོངས་སུ་རྫོགས་པར་
འགྱུར་ཏེ། དམ་པའི་ཆོས་འདོད་པས་ནི་དེ་ལྟར་བསླབ་པར་བྱའོ། །སྐུལ་བྱེད་ཀྱིས་སྨྲས་པ། བཙུན་པ་འཇམ་དཔལ་འོ་ན་ཇི་ལྟར་དེ་བཞིན་གཤེགས་པ་ལྷའི་ཡང་ལྷ་མཆོག་ཏུ་གྱུར་པ་ལ་གལ་ཏེ་འདུ་བྱེད་དུ་གྱུར་ན་ལྷའི་ཡང་ལྷར་འོས་པ་
མ་ཡིན་ནོ། །འདུ་བྱེད་རྣམས་ནི་ཆུ་བུར་བཞིན་དུ་ཤེས་ཤིང་ཤིང་རྟའི་འཕང་ལོ་བཞིན་དུ་འཁོར་བ་ཡིན་ནོ། །ལྷ་རྣམས་ནི་མཆོག་ཏུ་ཚེ་རིང་ཞེས་གྲག་ལ། དེ་བཞིན་གཤེགས་པས་ནི་ལོ་བརྒྱ་ཡང་མ་ཐུབ་སྟེ། དེ་བས་ན་དེ་བཞིན་གཤེགས་
པ་ལྷའི་ཡང་ལྷར་འོས་པ་མ་ཡིན་ནོ། །དཔེར་ན་མི་ལ་ལ་ཞིག་གྲོང་དཔོན་བྱེད་པ་ལས་དེ་མཐར་གྱིས་དབང་ཕྱུག་ཆེན་པོར་གྱུར་ནས་བློན་པོ་ཆེན་པོའི་དབང་ཕྱུག་ལས་ཀྱང་འདས་ཏེ། རང་གི་དབང་ཕྱུག་གི་འབྲས་བུ་ཆོས་ཀྱིས་རྙེད་པ་ལ་ལོངས་
སྤྱོད་པ་ལས་དེ་ཕྱིར་ཡང་བསོད་ནམས་ཟད་ཅིང་དབང་ཕྱུག་ལས་ཉམས་པར་གྱུར་ན། གཞན་གྱིས་བཀོལ་ཞིང་བརྙས་པར་འགྱུར་བ་དེ། ཅིའི་ཕྱིར་ཞེ་ན། དབུལ་པོར་གྱུར་པའི་ཕྱིར་རོ། །དེ་དང་འདྲ་བར་གལ་ཏེ་དེ་བཞིན་གཤེགས་པ་འདུ་

49-1-23a

བྱེད་དུ་གྱུར་དུ་ཟིན་ན། འཆི་བའི་རྒྱུ་ཡིན་པའི་ཕྱིར་ལྷའི་ཡང་ལྷར་འོས་པ་མ་ཡིན་ནོ། །བཙུན་པ་འཇམ་དཔལ་དེ་བས་ན་ལྷའི་ཡང་ལྷ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དེ་ལྟར་འདུ་བྱེད་དང་
འདྲ་བར་མ་ལྟ་ཤིག །འཇམ་དཔལ་གཞན་ཡང་ཅི་ཁྱོད་ཤེས་བཞིན་དུ། དེ་བཞིན་གཤེགས་པ་ལ་འདུ་བྱེད་ཀྱི་རང་བཞིན་དུ་རྟོག་པར་བྱེད་དམ། འོན་ཏེ་མ་ཤེས་པས་རྟོག་པར་བྱེད། གལ་ཏེ་དེ་བཞིན་གཤེགས་པ་འདུ་བྱེད་དང་འདྲ་ན་ནི་
འཇིག་རྟེན་གསུམ་པོ་དག་ན་ཆོས་ཀྱི་དབང་ཕྱུག་བརྙེད་པ་ལྷའི་ལྷ་མཛད་པའི་འོས་མ་ཡིན་ནོ། །དཔེར་ན་རྒྱལ་པོའི་དབང་པོ་ལ་ལ་ཞིག་ལ་གྱད་སྟོང་གི་མཆོག་ཏུ་གྱུར་པའི་གྱད་ཅིག་ཡོད་ལ། དེ་གྱད་ཐམས་ཅད་ཀྱིས་མི་ཐུབ་པའི་ཕྱིར་གྱད་སྟོང་ཐུབ་
ཅེས་བྱ་བའི་མིང་ཐོབ་སྟེ། དེ་ལ་གྱད་ཟླ་མེད་པའི་ཕྱིར་བླ་ནས་དབང་ཐང་ཆེན་པོ་འགྲུབ་ན་ཅི་གྱད་སྟོང་ཐུབ་པ་དེའི་མིང་དེ་ཐོས་ན་སྐད་གྲགས་པ་དེ་མི་བདེན་པ་ཡིན་ནམ། འོན་ཏེ་ཡོན་ཏན་ཡོད་ན་ནི་ཡོན་ཏན་ཅན་གྱི་མིང་ཐོབ་པ་ཡིན་ནོ། །དེ་བཞིན་དུ་དེ་
བཞིན་གཤེགས་པ་ཡང་ཉོན་མོངས་པའི་བདུད་དང་། ཕུང་པོའི་བདུད་དང་། ལྷའི་བུའི་བདུད་དང་། རང་བཞིན་གྱི་བདུད་ཀྱི་གྱད་ཐམས་ཅད་བཅོམ་པས་ན་གྱད་སྟོང་ཐུབ་བཞིན་དུ་ཡང་དག་པའི་ཡོན་ཏན་གྱི་སྒོ་ནས་འཇིག་རྟེན་གསུམ་པོ་དག་ཏུ་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བ་ཡིན་གྱིས་བཙུན་པ་འཇམ་དཔལ་ཁྱོད་དེ་བཞིན་གཤེགས་པ་ལ་འདུ་བྱེད་དང་འདྲ་བར་ཡོངས་སུ་མ་རྟོག་ཤིག །དཔེར་ན་ལ་ལ་ཞིག་ཕྱུག་ཅིང་ནོར་མང་བའི་རིགས་སུ་སྐྱེ་བ་བླངས་
ལ་ཚེ་ཐུང་བར་འགྱུར་བ་ཞིག་སྟེ་དེ་སྐར་མཁན་དག་གིས་མཐོང་ནས་ཁྱེའུ་འདི་ནི་ཚེ་ཐུང་ངོ་ཞེས་བསྟན་ཏེ། དེའི་ཕ་མས་དེ་སྐད་ཐོས་ན་འདི་ནི་བདག་ཅག་གི་ཁྱིམ་དུ་ཕན་པར་འགྱུར་བ་མ་ཡིན་ནོ་སྙམ་ནས་གྲངས་སུ་ཡང་མི་རྩི་ཞིང་དེ་ལ་བྱམས་པར་མི་
བྱེད་དོ། །དེ་ལྟར་སྐྱེས་པའམ། བུད་མེད་དམ། ལྷ་འམ་ཚངས་པ་ཡང་རུང་སྟེ། གང་ཚེ་ཐུང་བ་དེ་ལ་ཁྱད་དུ་གསོད་པར་གྱུར་ན། གལ་ཏེ་དེ་བཞིན་གཤེགས་པ་ཆོས་འབའ་ཤིག་ལ་ཡང་དག་པར་གཞོལ་བ་ཉིད་འདུ་བྱེད་དུ་གྱུར་དུ་ཟིན་ན་འཇིག་རྟེན་

49-1-23b

ཐམས་ཅད་ཀྱིས་བརྙས་པར་འགྱུར་རོ། །ཆོས་ཐམས་ཅད་ཀྱི་ནང་ན་ནི་ཕྱིར་ལྟུང་བ་མེད་ཅིང་ཟད་པ་མེད་པ་ལ་ཐར་པ་ཞེས་བཤད་ན་གལ་ཏེ་དེ་ལྟར་གྱུར་ན་དོན་མེད་པར་གྱུར་གྱིས། བཙུན་པ་འཇམ་དཔལ་དེ་བཞིན་གཤེགས་པ་འདུ་བྱེད་དུ་གྱུར་ཅེས་
དེ་སྐད་དུ་མ་གསུང་ཤིག །དཔེར་ན་བུད་མེད་གཞོན་ནུ་དབུལ་མོ། བཀྲེན་མ་མགོན་མེད་པ། ནད་ཀྱིས་ཐེབས་པ། བར་མ་དོར་སྡུག་བསྔལ་བར་གྱུར་པ། སྦྲུམ་པས་ཉེན་པ་ཞིག་མགོན་མེད་པ་ཁང་པ་ཞིག་ཏུ་སོང་བ་ལས་བུ་མོ་དེ་བུ་བྱུང་ནས་དེ་ན་སྔ་ནས་
གནས་པ་གཞན་དག་གིས་དེ་དེའི་ནང་ནས་བསྐྲད་དེ་ཉོན་མོངས་མ་དེ་བུ་བཙས་མ་ཐག་ཏུ་བྱིས་པ་ཁ་དམར་ཁྱེར་ནས་ལོ་ལེགས་པའི་ཡུལ་ཞིག་ཏུ་ཆས་ཏེ། སོང་བ་ལས་ལམ་དུ་ཤ་སྦྲང་དང་། སྦྲང་བུ་དང་། རླུང་དང་ཉི་ཚན་དང་། སྡིག་སྦྲུལ་གྱི་
གནོད་པས་ཉེན་པར་གྱུར་ཏེ། གང་གཱའི་ཀླུང་ཆེན་པོ་རྒལ་བར་འདོད་པ་ལས་དེ་རྒལ་བར་མ་ནུས་སོ། །ཁྱེའུ་དེ་ཁྱེར་བཞིན་དུ་གང་གཱའི་ནང་དུ་ཤི་ནས་དེ་བུ་དེ་ལ་བྱམས་པའི་བསོད་ནམས་ཀྱི་ཁྱད་པར་གྱིས་ལུས་དང་བྲལ་ཏེ་ཤི་བའི་འོག་ཏུ་ཚངས་པའི་འཇིག་རྟེན་
དུ་སྐྱེས་ཏེ། བྱམས་པའི་བསོད་ནམས་ཀྱི་ཁྱད་པར་ཇི་ལྟ་བུ་ཞིག་གིས་སྐྱེས་ཞེ་ན། བདག་ནི་ཤི་ཡང་བླའི་ཁྱེའུ་འདི་ཉེ་ཞོ་མེད་པར་ཐར་བར་བྱའོ་སྙམ་པའི་བསོད་ནམས་ཀྱི་ཁྱད་པར་གྱིས་སྐྱེས་པ་དེ་བཞིན་དུ་བཙུན་པ་འཇམ་དཔལ་སྐྱེས་བུ་དམ་པ་དམ་པའི་
ཆོས་དབྱུང་བར་འདོད་པས། དེ་བཞིན་གཤེགས་པ་འདུ་བྱེད་དུ་གྱུར་པར་བལྟ་བར་མི་བྱ་ཞིང་འདུ་ཤེས་ཀྱང་བསྒྱུར་བར་མི་བྱའོ། །གལ་ཏེ་དེ་ལྟ་བུའི་མིག་ལུས་ལ་མེད་ན་ཡང་། བཅོམ་ལྡན་འདས་ནི་བསམ་གྱིས་མི་ཁྱབ་པོ་སྙམ་དུ་ཡང་དག་པའི་ལྟ་
བ་ཅན་དུ་བྱའོ། །སེམས་ཅན་ཐམས་ཅད་ལ་ཕན་པའི་གདམས་ངག་སྟོན་པས་ནི་དེ་བཞིན་གཤེགས་པ་འདུས་མ་བྱས་པ་ཡིན་ནོ་ཞེས་བསྟན་པར་བྱའོ། །དམ་པའི་ཆོས་འབྱིན་པར་བྱེད་པས་ནི་ཇི་ལྟར་བུད་མེད་གཞོན་ནུ་དབུལ་མོས་གང་གཱའི་
ཀླུང་ལས་བུ་བསྒྲལ་བའི་ཕྱིར་རང་གི་སྲོག་དང་བསྡོས་ཏེ་འབད་པ་དེ་བཞིན་དུ་བྱའོ། །དམ་པའི་ཆོས་དབྱུང་བའི་ཐབས་བྱ་བའི་ཕྱིར་དེ་བཞིན་གཤེགས་པ་ནི་འདུས་མ་བྱས་པའོ་སྙམ་དུ་སེམས་བསྐྱེད་པར་བྱའོ། །དེ་བཞིན་གཤེགས་པ་འདུས་མ་

49-1-24a

བྱས་པར་མཐོང་ན་བདག་ཉིད་ཀྱིས་དོན་དུ་བྱ་བའི་ཐར་པའི་དོན་རྟོགས་པར་འགྱུར་རོ། །བཙུན་པ་འཇམ་དཔལ་དཔེར་ན་མི་ལ་ལ་ཞིག་ལམ་དུ་འགྲོ་བས་དུབ་པར་གྱུར་ཏེ་ཁྱིམ་གྱི་ནང་དུ་ཉལ་བ་ལས་དེའི་ཚེ་ཁྱིམ་དེ་ཐོག་ཐག་ནས་མེ་
ཆེན་པོ་འབར་ཏེ། མི་དེ་མེས་ཚིག་ན་ད་ནི་སྲོག་མེད་ཟིན་ནོ་སྙམ་ནས་ངོ་ཚ་ཤེས་པ་དང་ཁྲེལ་ཡོད་པ་དང་ལྡན་པས་བདག་ཉིད་གོས་ཀྱིས་དམ་དུ་དཀྲིས་ཏེ་སེམས་དྲན་པ་དང་ལྡན་བཞིན་དུ་ཤི་ནས་དེ་ངོ་ཚ་ཤེས་ཤིང་ཁྲེལ་ཡོད་པར་སེམས་པའི་བསོད་
ནམས་ཀྱི་འབྲས་བུས་སུམ་བཅུ་རྩ་གསུམ་པའི་རྒྱལ་སྲིད་ནི་ལན་བརྒྱད་བཅུ་བྱས། ཚངས་པའི་རྒྱལ་སྲིད་ནི་ལན་འབུམ་བྱས། མིའི་འཇིག་རྟེན་དུ་ཡང་འཁོར་ལོས་སྒྱུར་བའི་རྒྱལ་སྲིད་ལ་ལན་དུ་མ་བྱས་ཏེ་ངན་སོང་རྣམས་སུ་ཡང་མི་སྐྱེ་ལ་ལན་མང་དུ་བདེ་
བ་གཅིག་ནས་གཅིག་ཏུ་བརྒྱུད་པ་འབའ་ཤིག་ཐོབ་པ་དེ་བཞིན་དུ། འཇམ་དཔལ་ཁྱོད་སྐྱེས་བུ་དམ་པ་དག་ལྟར་མཛེམ་པར་གྱིས་ཤིག །ངོ་ཚ་ཤེས་པར་གྱིས་ཤིག །དེ་བཞིན་གཤེགས་པ་འདུ་བྱེད་ཀྱི་ཐབས་ལ་འཇུག་པ་སྤྱོད་དུ་མ་གཞུག་ཤིག །
དགེ་སློང་ཚུལ་ཁྲིམས་ཕུན་སུམ་ཚོགས་པ་དེ་བཞིན་གཤེགས་པ་འདུས་མ་བྱས་པ་ལ་དེ་བཞིན་གཤེགས་པ་འདུས་བྱས་ཡིན་ནོ་ཞེས་ཟེར་བས་ནི་མུ་སྟེགས་པར་གྱུར་ཏེ་ཤི་ཡང་བླའོ། །དེ་བཞིན་གཤེགས་པ་འདུས་མ་བྱས་ཡིན་བཞིན་དུ་དེ་བཞིན་
གཤེགས་པ་འདུས་བྱས་ཡིན་ནོ་ཞེས་ཟེར་བ་གང་ཡིན་པ་དེ་དག་ནི་བརྫུན་དུ་སྨྲ་བ་ཡིན་ནོ། །དེ་བཞིན་གཤེགས་པ་འདུས་བྱས་པ་ཡིན་ནོ་ཞེས་ཟེར་བ་རྣམས་ནི་རང་གི་ཁྱིམ་དང་འདྲ་བར་སེམས་ཅན་དམྱལ་བར་འགྲོ་བར་འགྱུར་རོ། །བཙུན་པ་འཇམ་
དཔལ་དེ་བཞིན་གཤེགས་པ་ལ་འདུས་བྱས་དང་འདྲ་བར་མ་ལྟ་ཞིག །ད་ཕྱིན་ཅད་འཁོར་བར་རྒྱུ་བ་ན་མི་ཤེས་པ་ལ་བཟླས་ཏེ་བཅོམ་ལྡན་འདས་ནི་འདུས་མ་བྱས་པའོ་སྙམ་པའི་ཤེས་པ་འབའ་ཤིག་རྟོགས་པར་གྱིས་ཤིག །དེ་ལྟར་བྱས་པ་དང་
བསྒོམ་པ་དེའི་འབྲས་བུས་ཁྱོད་མྱུར་བ་ཁོ་ནར་དེ་བཞིན་གཤེགས་པ་བཞིན་དུ་མཚན་སུམ་བཅུ་རྩ་གཉིས་དང་ལྡན་པར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པས། མགར་བའི་བུ་སྐུལ་བྱེད་ལ་འདི་སྐད་ཅེས་སྨྲས་སོ། །ལེགས་

49-1-24b

སོ་ལེགས་སོ། །ཚེ་རིང་བར་གྱུར་ཅིག །རིགས་ཀྱི་བུས་ནི་དེ་ལྟར་བྱ་བ་ཡིན་ནོ། །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་རྟག་པ་དང་། ཐེར་ཟུག་དང་། འདུས་མ་བྱས་པ་དང་བརྟན་པར་ཤེས་སོ། །ད་ལྟར་ཁྱོད་ཀྱིས་འདི་ཁོ་ན་ལྟར་འདུས་
བྱས་ཁོང་རླག་ཏུ་གཏང་བའི་སྒོ་ནས་ཤེས་པ་ལས་ན་ཁྱོད་ཀྱང་རིང་པོ་མི་ཐོགས་པར་དེ་བཞིན་གཤེགས་པ་ཇི་ལྟ་བ་བཞིན་དུ་འགྱུར་རོ། །སངས་རྒྱས་ཉིད་ཀྱིས་ཀྱང་དེ་ལྟར་འུ་བུ་ཅག་གཉིས་ཀྱིས་ཁྱད་པར་དུ་འཕགས་པའི་བསྔགས་པ་བརྗོད་དོ་
ཞེས་ཕྱིས་བསྔགས་པར་འགྱུར་རོ། །སྐུལ་བྱེད་དེ་བཞིན་གཤེགས་པའི་གཤོས་སྨྱུར་ཅིག །སྦྱིན་པ་ཐམས་ཅད་ཀྱི་ནང་ན་ནི་སྨྱུར་ཏེ་སྦྱིན་པ་མཆོག་ཡིན་ནོ། །དེ་ལ་སྨྱུར་ཏེ་སྦྱིན་ཞེས་བྱ་བ་ནི་སྦྱིན་པའི་ཕ་རོལ་ཏུ་ཕྱིན་པ་ཐམས་ཅད་ཀྱི་ས་བོན་
ལས་མྱུ་གུ་འབྱུང་བར་བྱ་བའི་ཕྱིར་གང་གི་ཚེ་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་ཡང་རུང་སྟེ། དོན་འགའ་ཞིག་གི་ཕྱིར་ལམ་དུ་ཞུགས་ནས་དུབ་པར་གྱུར་པ་དེ་དག་ལ་ཅི་ཡོད་པ་དང་། དེའི་རྐྱེན་དུ་འཚམ་
པ་དང་། བརྟགས་པའི་སྦྱིན་པ་བྱེད་པ་དེ་ནི་སྨྱུར་ཏེ་སྦྱིན་པ་ཞེས་བྱའོ། །སྐུལ་བྱེད་དེ་བཞིན་དུ་ཁྱོད་ཀྱིས་ཅི་ཡོད་པ་ལས་ཞལ་ཟས་ཀྱི་ཐ་མ་མང་ཡང་རུང་ཉུང་ཡང་རུང་། དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་ཁྱེད་
པར་ཡོད་ཀྱང་རུང་ཁྱེད་པར་མེད་ཀྱང་རུང་སྟེ་འདྲིམ་དུ་ཆུག་ཅིག །བཅོམ་ལྡན་འདས་ཡོངས་སུ་མྱ་ངན་ལས་འདའ་བར་གཤེགས་སུ་ཉེའོ། །དེ་ནས་སྐུལ་བྱེད་ཀྱིས་སྨྲས་པ། བཙུན་པ་འཇམ་དཔལ་ཁྱོད་ཁ་ཟས་ལ་ཆགས་སམ་ཅི་ན་ཞལ་
ཟས་མང་ཡང་རུང་ཉུང་ཡང་རུང་བྲིམས་ཤིག་ཅེས་བདག་གི་གཞེན་འདེབས་པར་བྱེད། བཅོམ་ལྡན་འདས་ཀྱིས་ལོ་དྲུག་གི་བར་དུ་དཀའ་བ་སྤྱོད་པ་མཛད་མཛད་ན་ཅི་ད་སྐད་ཅིག་ཙམ་ཡང་གཞེས་མི་སྤྱོད་དམ། དེ་བཞིན་གཤེགས་པ་ནི་
ཆོས་ཀྱི་སྐུ་ཡིན་ཏེ་ཞལ་ཟས་ཀྱི་སྐུ་མ་ཡིན་ན་ཅི་བཅོམ་ལྡན་འདས་ཞལ་ཟས་གསོལ་ལམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། སྐུལ་བྱེད་ཀྱིས་ཇི་སྐད་སྨྲས་པ་དེ་ནི་དེ་བཞིན་ནོ། །སྐུལ་བྱེད་ལེགས་སོ་ལེགས་

49-1-25a

སོ། །ཁྱོད་ནི་ཐེག་པ་ཆེན་པོ་ལ་ཤེས་རབ་ཆེ་བའོ། །ཁྱོད་ནི་ཐེག་པ་ཆེན་པོ་ལ་ཤེད་བྱེད་པའོ། །འཇམ་དཔལ་གྱིས་ཀྱང་འདི་སྐད་ཅེས་སྨྲས་སོ། །གལ་ཏེ་དེ་ལྟར་བཞེད་པར་གྱུར་ན་དེ་བཞིན་གཤེགས་པ་སྐུ་ཚེ་རིང་
བར་ཤོག་ཤིག །སྐུལ་བྱེད་ཀྱིས་སྨྲས་པ། ཅི་བདག་འབའ་ཞིག་ལ་བཅོམ་ལྡན་འདས་མཉེས་སམ། འོན་ཏེ་སེམས་ཅན་ཐམས་ཅད་ལ་ཡང་མཉེས། འཇམ་དཔལ་གྱིས་སྨྲས་པ། ཅི་བཅོམ་ལྡན་འདས། ལྟ་ཁྱོད་དང་། བདག་དང་། 
སེམས་ཅན་ཐམས་ཅད་ལ་ཡང་མི་མཉེས་སམ། སྐུལ་བྱེད་ཀྱིས་སྨྲས་པ། དེ་སྐད་མ་ཟེར་ཅིག །གང་ལ་མགུ་བ་ཡོད་པ་དེ་ལ་ཕྱིན་ཅི་ལོག་གི་འདུ་ཤེས་ཡོད་དེ་འུ་བུ་ཅག་ནི་དེ་ལ་སྤྱོད་དོ། །དེ་བཞིན་གཤེགས་པ་ལ་ནི་མཉེས་པ་འམ་
དགྱེས་པ་མེད་དོ། །འདི་ལྟར་དེ་བཞིན་གཤེགས་པ་ནི་བ་བེའུ་ལ་བྱམས་པའི་ཕྱིར་རྩྭ་ཟོས་ཤིང་ཟོས་ཤིང་གྲོང་ཉིད་དུ་འོང་བ་དེ་ལྟ་བུའི་བྱམས་པ་དང་ལྡན་པ་མ་ཡིན་གྱི། སེམས་ཅན་ཐམས་ཅད་ལ་ཡང་སྒྲ་གཅན་ཟིན་དང་འདྲ་བར་གཟིགས་ཏེ། 
སངས་རྒྱས་ཀྱི་ཤེས་རབ་ཀྱི་ཡུལ་ནི་དེ་ལྟ་བུ་ཡིན་ནོ། །བཙུན་པ་འཇམ་དཔལ་དཔེར་ན་རྟ་ཅང་ཤེས་དང་སྦྱར་བའི་ཤིང་རྟ་རྒྱུག་པའི་ཟླ་ལ་བོང་བུའི་ཤིང་རྟ་རྒྱུག་པ་མི་སྲིད་པ་དེ་བཞིན་དུ་འུ་བུ་ཅག་བོང་བུའི་ཤིང་རྟ་དང་འདྲ་བ་དག་གིས་དེ་བཞིན་གཤེགས་
པའི་ཤེས་རབ་དང་འདྲ་བ་དང་། དགོངས་པའི་ཚིག་དང་མཉམ་དུ་འགྲོ་བར་ནུས་རེ་སྐན། དཔེར་ན་ནམ་མཁའ་ལྡིང་དཔག་ཚད་དུ་མར་འགྲོ་བ་ནམ་མཁའ་ལ་གནས་པས་ཆུའི་ནང་ན་ཉ་དང་རུ་སྦལ་འཁོད་པ་རྣམས་མེ་ལོང་གི་ངོས་ལ་རང་གི་གཟུགས་
བརྙན་སྣང་བ་བཞིན་དུ་གསལ་བར་མཐོང་ཡང་བྱིས་པ་རྣམས་ཀྱིས་ནི་མིག་མི་གསལ་བའི་ཕྱིར་དེའི་མིག་གི་རྩལ་བརྗོད་པར་མི་ནུས་པ་དེ་བཞིན་དུ་དེ་བཞིན་གཤེགས་པའི་ཡང་དེ་དང་འདྲའོ། །འཇམ་དཔལ་གྱིས་སྨྲས་པ། སྐུལ་བྱེད་དེ་ནི་དེ་བཞིན་
ཏེ། བདག་གིས་ནི་བྱང་ཆུབ་སེམས་དཔའ་རྣམས་ཀྱི་ཆེ་བ་ཉིད་གླེང་བའི་ཕྱིར་དེ་སྐད་དུ་བརྒལ་བར་ཟད་དོ། །དེ་ནས་དེའི་ཚེ་བཅོམ་ལྡན་འདས་ཀྱི་ཞལ་ནས་འོད་ཟེར་རྣམ་པ་སྣ་ཚོགས་བཀྱེ་ནས་དེ་དག་གིས་འཇམ་དཔལ་གཞོན་ནུར་གྱུར་པའི་ལུས་ལ་

49-1-25b

ཕོག་གོ། །དེ་ནས་འཇམ་དཔལ་གྱིས་དེ་རྟོགས་ནས་མགར་བའི་བུ་སྐུལ་བྱེད་ལ་སྨྲས་པ། སྐུལ་བྱེད། དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་རིངས་ཀྱིས། དུས་སུ་བཅོམ་ལྡན་འདས་ལ་བཤོས་འདྲིམ་དུ་ཆུག་ཤིག །མ་
ཐོགས་ཤིག །རྒྱུ་མེད་པར་བཅོམ་ལྡན་འདས་ཀྱི་ཞལ་ནས་འོད་ཟེར་རྣམས་འབྱུང་བར་མི་འགྱུར་རོ། །དེ་ནས་སྐུལ་བྱེད་ཅང་མི་ཟེར་བར་འདུག་གོ། །དེ་ནས་བཅོམ་ལྡན་འདས་ཀྱིས་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ། །སྐུལ་བྱེད་ང་ཡོངས་སུ་མྱ་
ངན་ལས་འདའ་བར་འགྲོར་ངེས། དགེ་སློང་གི་དགེ་འདུན་ལ་དུས་སུ་ཟས་འདྲིམ་དུ་ཆུག་ཤིག་ཅེས་ལན་གཉིས་ལན་གསུམ་དུ་བཀའ་སྩལ་ཏོ། །དེ་ནས་སྐུལ་བྱེད་ཀྱིས་འདི་སྐད་སྨྲས་སོ། །ཀྱེ་མ་བཅོམ་ལྡན་འདས་མི་བཞུགས་ན་ནི་འཇིག་རྟེན་
སྟོངས་པར་འགྱུར་རོ། །བདག་ཅག་ཐམས་ཅད་ཀྱིས་ངུ་ཞིང་བཅོམ་ལྡན་འདས་ལ་གསོལ་བ་གདབ་བོ། །དེ་ནས་བཅོམ་ལྡན་འདས་ཀྱིས་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ། །སྐུལ་བྱེད་མ་ངུ་ཤིག །དེ་ལྟར་ལུས་ལ་རྨ་མ་འབྱིན་ཅིག ། 
མིའི་ལུས་ལ་ཆུ་ཤིང་བཞིན་དུ་སྙིང་པོ་མེད་པར་རྟོགས་ཤིག །སྨིག་རྒྱུ་བ་དང་། དབུ་བ་རྡོས་པ་དང་། སྒྱུ་མ་དང་། རྫ་མཁན་གྱིས་བྱས་པའི་སྣོད་དང་། གློག་ལྟ་བུར་ཁོང་དུ་ཆུད་པར་གྱིས་ཤིག །འདུས་བྱས་ནི་ཉེས་པ་གྲངས་མེད་པའི་འབྱུང་གནས་
ཡིན་ནོ་སྙམ་དུ་ཤེས་པར་གྱིས་ཤིག །འདུས་བྱས་ཀྱི་རང་བཞིན་ལ་ལྟོས་ཤིག །དེ་ནས་བཅོམ་ལྡན་འདས་ལ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་དང་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ། དེ་
བཞིན་གཤེགས་པ་ཡུན་རིང་དུ་བཞུགས་སུ་མི་གནང་ན་བདག་ཅིའི་སླད་དུ་མི་ངུ་ལགས། འཇིག་རྟེན་སྟོངས་ཀྱིས་མ་མཆིས་སོ། །དེ་ནས་བཅོམ་ལྡན་འདས་ཀྱིས་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ། །ང་ནི་ཁྱོད་ལ་སྙིང་བརྩེ་བ་དང་སེམས་ཅན་
ཐམས་ཅད་ལ་སྙིང་བརྩེ་བའི་ཕྱིར་ཡོངས་སུ་མྱ་ངན་ལས་འདའ་བར་བྱེད་དེ་འདི་ནི་སངས་རྒྱས་རྣམས་ཀྱི་ཆོས་ཉིད་དང་འདུས་བྱས་ཀྱི་ཆོས་ཉིད་དོ། །འདུ་བྱེད་ཐམས་ཅད་མི་རྟག་གོ་ཞེས་བྱ་བའི་ཚིགས་སུ་བཅད་པ་ཁོང་དུ་ཆུད་པར་གྱིས་ཤིག །

49-1-26a

ཆོས་ཐམས་ཅད་ནི་འདུ་བྱེད་དང་འདྲེས་པའི་ཕྱིར་སྡུག་བསྔལ་བའོ་སྙམ་དུ་རྟོགས་ཤིག །ཆོས་ཐམས་ཅད་ནི་བདག་མེད་པའོ་སྙམ་དུ་དཔྱོད་ཅིག །མི་བརྟན་པ། བརྙན་མ། ཕྱིན་ཅི་ལོག་པའོ་སྙམ་དུ་སོམས་ཤིག །
ལུས་འདི་ནི་ཉེས་དམིགས་མཐའ་ཡས་པ་དང་ལྡན་པའོ་སྙམ་དུ་ཤེས་པར་གྱིས་ཤིག །འདི་ནི་དབུ་བ་དང་འདྲ་བར་ལྟོས་ལ་མ་ངུ་ཤིག །ཡི་མ་ཆད་ཅིག །དེ་ནས་བཅོམ་ལྡན་འདས་ལ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་
ལྡན་འདས་དེ་ནི་དེ་བཞིན་དུ་མཇལ་ལགས་ན་ཧ་ཅང་སྡུག་བསྔལ་ཆེན་པོ་མི་བཟོད་ལགས་སོ། །བཅོམ་ལྡན་འདས་ཐབས་ཀྱིས་ཡོངས་སུ་མྱ་ངན་ལས་འདའ་བར་མཛད་པ་ལ་ནི་བདག་གློ་བ་རངས་ལགས་སོ། །བཅོམ་ལྡན་འདས་ཀྱིས་བཀའ་སྩལ་
པ། སྐུལ་བྱེད་ལེགས་སོ་ལེགས་སོ། །རིགས་ཀྱི་བུས་ནི་ངའི་མྱ་ངན་ལས་འདས་པ་ཐབས་དེ་ལྟར་བལྟ་བར་བྱའོ། །སྐུལ་བྱེད་སངས་རྒྱས་གཤེགས་པ་ནི་བྱ་གཞད་གཟས་ལ་འགྲོ་བ་ལྟ་བུར་ཤེས་པར་གྱིས་ཤིག །སྐུལ་བྱེད་ཚེ་རིང་བ་དང་ཚེ་
རིང་བ་མ་ཡིན་པའི་རྟགས་ཤེས་པར་གྱིས་ཤིག །སྐུལ་བྱེད་ཆོས་ཐམས་ཅད་ནི་སྒྱུ་མའི་ཆོས་ཅན་ནོ། །དེ་བཞིན་གཤེགས་པ་ནི་ཆོས་ཐམས་ཅད་ལ་ཐབས་ཀྱི་ཆོས་ཅན་ཡིན་ལ་དེ་རྣམས་ཀྱིས་ཀྱང་གོས་པར་མི་འགྱུར་བ་དེ་ནི་སངས་རྒྱས་བཅོམ་
ལྡན་འདས་རྣམས་ཀྱི་རང་བཞིན་ནོ། །སྐུལ་བྱེད་ཁྱོད་སྲིད་པའི་རྒྱ་མཚོ་ལས་ངེས་པར་རྒལ་བར་བྱ་བའི་ཕྱིར་ཞལ་ཟས་སྨྱུར་ཏེ་འོན་ཅིག །ལྷ་དང་ལྷ་མ་ཡིན་དང་མི་རྣམས་ཀྱིས་ཀྱང་ང་ལ་རང་རང་གི་མཆོད་པ་བྱས་ནས་མི་གཡོ་བའི་བདེ་བ་ཐོབ་པར་གྱུར་
ཅིག །ཁྱོད་ཀྱིས་ཀྱང་སྣོད་དུ་གྱུར་པ་ལ་དུས་སུ་སྦྱིན་པ་གྱིས་ཤིག །མ་ཐོགས་ཤིག །སྣོད་དུ་གྱུར་པ་དང་ང་དང་དེ་བཞིན་གཤེགས་པ་ཞེས་བྱ་བ་ནི་དོན་ཐ་དད་པ་མ་ཡིན་ནོ། །དེ་ནས་སྐུལ་བྱེད་ཀྱིས་ཀྱང་སེམས་ཅན་ཐམས་ཅད་ངེས་པར་བསྒྲལ་བའི་ཕྱིར་མགོ་
སྨད་དེ་མཆི་མ་བླགས་ནས་གསོལ་པ། ལེགས་སོ་ལེགས་སོ། །ལེགས་སོ་ལེགས་སོ། །བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་དེ་བཞིན་དུ་བདག་གིས་བགྱིའོ། །དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་འོག་ཏུ་ཇི་ལྟར་

49-1-26b

བལྟ་བ་དེ་ནི་བདག་ཅག་སྦྲང་བུ་དང་འདྲ་བ་རྣམས་ཀྱི་ཡུལ་ཡང་མ་ལགས། ཉན་ཐོས་དང་རང་སངས་རྒྱས་ཀྱི་ཡུལ་ཡང་མ་ལགས་སོ་ཞེས་གསོལ་ཏོ། །དེ་ནས་མྱ་ངན་བྱེད་ཅིང་ངུ་བཞིན་དུ་གཡོག་འཁོར་དང་བཅས་པས་བཅོམ་ལྡན་འདས་ལ་བསྐོར་
བ་བྱས་ཏེ་མཆོད་པ་ཆེན་པོའི་ལས་བྱས་ནས་བཅོམ་ལྡན་འདས་དང་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ཏེ་ཞལ་ཟས་ལེན་དུ་སོང་ངོ་།། །། བམ་པོ་གསུམ་པ། དེ་ནས་དེའི་ཚེ་ས་ཆེན་པོ་གཡོས་རབ་ཏུ་གཡོས། 
འགུལ་རབ་ཏུ་འགུལ། འཁྲུགས་རབ་ཏུ་འཁྲུགས། འཁོར་རབ་ཏུ་འཁོར། འུར་འུར་རབ་ཏུ་འུར་འུར། ཤིག་ཤིག་རབ་ཏུ་ཤིག་ཤིག །མེར་མེར་རབ་ཏུ་མེར་མེར། ལྡེམ་ལྡེམ་རབ་ཏུ་ལྡེམ་ལྡེམ་མོ། །དེ་ལ་སོགས་པ་བྱས་ཏེ་མི་མཁྲིས་
པའི་ནད་ཀྱིས་བརྒྱལ་བའི་གནོད་པས་ཐེབས་པ་བཞིན་དུ་ས་ཆེན་པོ་འདི་རྒྱ་མཚོ་དུག་ཅན་པའི་མཐས་གཏུགས་པ་ཚངས་པའི་འཇིག་རྟེན་མན་ཆད་ཐོག་ཐག་ཏུ་རབ་ཏུ་གཡོས་སོ། །དེ་ནས་ལྷ་དང་ལྷ་མ་ཡིན་དང་མི་དེ་དག་ཐམས་ཅད་མགོ་རྨོངས་ཏེ། 
འཇིགས་ཤིང་སྐྱི་བུང་ཞེས་བྱས་ནས་ངུ་བཞིན་དུ་ཚིག་འཐུན་པར་ཚིགས་སུ་བཅད་པ་འདི་དག་གསོལ་ཏོ། །མགོན་པོ་ཁྱོད་ལ་བདག་ཅག་རྣམས། །མགོ་བོས་ཕྱག་འཚལ་གསོལ་བ་འདེབས། །རྒྱལ་བ་ཁྱུ་མཆོག་ཁྱོད་དང་ནི། །བྲལ་ན་བདག་ཅག་
མགོན་མེད་འགྱུར། །དེང་ཁྱོད་མྱ་ངན་འདའ་འགྱུར་འདི་བསམས་ན། །བདག་ཅག་སྡུག་བསྔལ་ཤིན་ཏུ་གཏིང་ཟབ་བྱིང་། །ཐུབ་པ་བདག་ཅག་སྙིང་ནི་སྟོར་བར་གྱུར། །བ་བཞོན་རྐུན་ཁྱེར་བེའུ་ལ་ཆགས་པ་བཞིན། །མགོན་མེད་དབུལ་པོའི་མི་
ནི་ལ་ལ་ཞིག །ནད་ཀྱིས་ཐེབས་ལ་སྨན་པ་མེད་པ་དང་། །རང་དགར་བྱེད་ཅིང་ཁ་ཟས་གནོད་པ་རྣམས། །ཟ་བ་ཇི་ལྟར་འཆི་བར་འགྱུར་བ་བཞིན། །སྐྱེ་བོ་འདི་དག་ཉོན་མོངས་ནད་ཀྱིས་ཐེབས། །ཁྱོད་མེད་ཁྱོད་ཀྱི་ཆོས་ཀྱི་གསོས་མེད་པས། །
ལྟ་བའི་ཉེས་པ་བྱེད་འདྲར་འཆི་བར་འགྱུར། །དེ་བས་ཕན་ཕྱིར་འཇིག་རྟེན་མ་དོར་ཅིག །ཇི་ལྟར་གྲོང་ཁྱེར་རྒྱལ་དང་བྲལ་བ་དང་། །དབུལ་པོ་རྣམས་ལ་མུ་གེ་བྱུང་བ་དང་། །ཇི་ལྟར་དགོན་པར་སྐོམ་གྱིས་གདུངས་པ་བཞིན། །ཁྱོད་འདས་འོག་ཏུ་

49-1-27a

བདག་ཅག་དེ་འདྲར་འགྱུར། །སེམས་ཅན་གཅེས་ཁྱོད་མྱ་ངན་འདའ་བཞེད་པས། །ས་གཞི་རབ་ཏུ་གཡོས་ཤིང་ཕྱོགས་ཀྱང་འཚོལ། །རྒྱ་མཚོ་ཆེན་པོ་དག་ཀྱང་རྣམ་པར་འཁྲུགས། །བདག་ཅག་ཀུན་ཀྱང་སྡུག་ཅིང་
བསྔལ་བར་གྱུར། །དྲང་སྲོང་ཆེན་པོ་དེང་ཁྱོད་མྱ་ངན་ལས། །འདས་ན་ཉི་མའང་ས་ལ་ལྟུང་ཡང་དག །རྒྱ་མཚོ་ཆེན་པོ་དག་ཀྱང་སྐམ་པར་འགྱུར། །བདག་ཅག་ཀུན་ཀྱང་དེང་དུ་འགུམ་ལགས་གྲང་། །ཇི་ལྟར་སྟོབས་ལྡན་མིས་ནི་སྒོ་གསེབ་ནས། །
གླང་ཆེན་ཁྱེར་ཏེ་ནང་དུ་འཛུལ་བགྱིད་ན། །ཤིན་ཏུ་ཉོན་མོངས་འགྱུར་བ་དེ་བཞིན་དུ། །བདག་ཅག་ཐམས་ཅད་རབ་ཏུ་ཉོན་མོངས་གྱུར། །ཇི་ལྟར་བུ་གཅིག་འགུམ་པར་མི་འཚལ་ཞིང་། །མྱ་ངན་ཁྱོད་འདའ་བདག་ཅག་དེ་མི་འཚལ། །གལ་ཏེ་ཁྱོད་ནི་
མྱ་ངན་འདའ་བ་ལས། །མི་གཞེས་བདག་ཅག་ཐམས་ཅད་ཕོངས་པར་འགྱུར། །ཁྱོད་ནི་མྱ་ངན་འདས་ལམ་གཤེགས་མཐོང་བས། །དུད་འགྲོ་མང་པོའང་གཡར་ངན་ཆེར་བགྱིད་ན། །བདག་ཅག་ཇི་ལྟར་གཡར་ངན་མི་འཚལ་ལགས། །བདག་
ཅག་མཆིལ་མ་བཞིན་དུ་མ་དོར་ཅིག །ཉི་མ་འཆར་ཀར་རང་གི་འོད་གསལ་བས། །མུན་ནག་རྣམ་པར་བཅོམ་པ་དེ་བཞིན་དུ། །འཕྲུལ་ཅན་ཁྱོད་ཀྱིས་སྡུག་བསྔལ་མུན་བསལ་ཏེ། །དགེ་འདུན་དབུས་སུ་རི་རབ་བཞིན་དུ་བཞུགས། །བཅོམ་
ལྡན་འདས་དཔེར་གསོལ་ན། རྒྱལ་པོ་ལ་ལ་ཞིག་གི་བུ་སྡུག་ཅིང་ཕངས་པ་ཞིག་མཆིས་ལ། དེས་དེ་ཆོས་ལུགས་ཀྱི་བསྟན་བཅོས་བསླབས་ནས་འདི་སོད་ཅིག་ཅེས་བཀའ་སྩལ་པ་དེ་བཞིན་དུ་བདག་ཅག་བཅོམ་ལྡན་འདས་དམ་པའི་ཆོས་ཀྱི་འཁོར་
ལོས་སྒྱུར་བའི་སྲས་རྣམས་ཀྱང་ཡང་དག་པའི་ལྟ་བ་བསྐྱེད་ནས་བཀུམ་གྱིས་མ་མཆིས་ན། བཅོམ་ལྡན་འདས་རྒྱལ་པོའི་བུ་ཇི་བཞིན་དུ་བདག་ཅག་མི་འགུམ་པར་བཅོམ་ལྡན་འདས་དེའི་སླད་དུ་ཡུན་རིང་དུ་བཞུགས་སུ་གསོལ། ཇི་ལྟར་ལ་
ལ་ཞིག་གཞུང་གིས་རྩོད་པའི་བསྟན་བཅོས་ལ་བསྟེན་པ་ན་སྐྲག་པར་འགྱུར་བ་དེ་བཞིན་དུ་ཁྱོད་ཀྱིས་སྐྲག་པར་མ་མཛད་ཅིག །དེ་ཁོ་ན་ཉིད་མཁྱེན་བཞིན་དུ་བདག་ཅག་སེམས་ཅན་དམྱལ་བར་མཆི་བར་མ་མཛད་ཅིག །དམ་པའི་ཆོས་ཀྱི་བདུད་

49-1-27b

རྩིའི་བཅུད་ཀྱིས་ཚིམ་པར་མཛད་ཅིང་དེ་བཞིན་གཤེགས་པ་ཡུན་རིང་དུ་བཞུགས་སུ་གསོལ། ཇི་ལྟར་རྒྱལ་པོའི་བཙོན་རར་གནོད་པའི་ལས་རྣམས་ཀྱིས་དང་པོ་སྙོན་སྨོངས་པ་ན། ལ་ལ་ཞིག་གིས་ཁྱོད་ཀྱིས་ན་ཚ་ཇི་ལྟ་བུ་ཞིག་མྱོང་
ཞེས་སྨྲས་ན། དེས་དེ་ལ་སྨྲས་པ། དེ་ནི་དེ་བཞིན་ཏེ། གང་གི་ཚེ་བདག་སྡུག་བསྔལ་གྱི་ཚོར་བ་ལས་ཐར་བར་འགྱུར་བ་དེའི་ཚེ་མྱ་ངན་ལས་འདས་པ་ཡིན་ཏེ། བདེ་བ་ཉམས་སུ་མྱོང་བར་འགྱུར་རོ་ཞེས་མཆི་བ་དེ་བཞིན་དུ་བདག་ཅག་
ཐམས་ཅད་ཀྱང་ཁྱོད་བཞུགས་ན་རྒྱལ་པོའི་བཙོན་ར་ནས་ཐར་བ་བཞིན་དུ་མྱ་ངན་ལས་འདས་པ་ལགས་ན། དེའི་སླད་དུ་དེ་བཞིན་གཤེགས་པ་ཡུན་རིང་དུ་བཞུགས་སུ་གསོལ། བཅོམ་ལྡན་འདས་དཔེར་གསོལ་ན་སྨན་པ་ཚེའི་རིག་བྱེད་ཡན་
ལག་བརྒྱད་ལ་མཁས་པས་བདག་གི་བུ་ལ་ནི་རྒྱུད་ཕྱི་མ་སློབ་པར་བགྱིད་ཀྱི། སློབ་མ་ལ་ནི་བདག་དང་མཉམ་པར་འགྱུར་དུ་དོགས་ནས་སློབ་པར་མི་བགྱིད་པ་དེ་བཞིན་དུ་ཆོས་ཀྱི་རྒྱལ་པོ་སྨན་པ་ཆེན་པོ་སེར་སྣ་མི་མངའ་བ་ཁྱོད་ཀྱིས་ཐེག་པ་ཆེན་པོའི་
རྒྱུད་ཕྱི་མ་ལ་དེ་ལྟར་མི་མཛད་པར་བཅོམ་ལྡན་འདས་ཡུན་རིང་དུ་བཞུགས་སུ་གསོལ། དེ་བཞིན་དུ་ཤིང་རྟ་པ་ཤིང་རྟའི་རིག་བྱེད་ལ་མཁས་པས་བདག་གི་བུ་ལ་ནི་རྒྱུད་ཕྱི་མ་སྒྲ་གྲག་པར་ཕོག་པའི་དཔྱད་ཐམས་ཅད་སློབ་པར་བགྱིད་ཀྱི། སློབ་
མ་ལ་ནི་སློབ་པར་མི་བགྱིད་པ་དང་། རིག་པའི་གནས་གཞན་དག་ལ་ཡང་དེ་བཞིན་དུ་སྦྱར་རོ། །བཅོམ་ལྡན་འདས་དཔེར་གསོལ་ན་བྱིས་པ་དང་རྒན་པོ་འམ་ནད་པ་ལ་ལ་ཞིག་ལམ་བཟང་པོ་ལས་གོལ་ཏེ་ལམ་ངན་པར་མཆིས་ན་ཤིན་ཏུ་
སྡུག་བསྔལ་བར་འགྱུར་བ་དེ་བཞིན་དུ། བཅོམ་ལྡན་འདས་སེམས་ཅན་ལམ་ངན་པར་མཆིས་པ་རྣམས་ལུས་དང་བྲལ་བའི་འོག་ཏུ་སེམས་ཅན་དམྱལ་བ་རྣམས་སུ་སྡུག་བསྔལ་མྱོང་བར་འགྱུར་ལགས་ན། བཅོམ་ལྡན་འདས་ལམ་
སྟོན་པ་ཡུན་རིང་དུ་བཞུགས་སུ་གསོལ། ཡ་མཚན་ཅན་དགུ་བཅུ་རྩ་དྲུག་དང་། ཚིགས་སུ་བཅད་པ་བཞི་བཅུ་རྩ་ལྔ་ལ་ཡང་དེ་བཞིན་དུ་རྒྱས་པར་སྦྱར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། 

49-1-28a

དགེ་སློང་ཁྱེད་ལྷ་དང་མི་རྣམས་ལྟར་བྱིས་པའི་སྨྲེ་སྔགས་འདོན་པ་དག་མ་བྱེད་པར་བརྩོན་འགྲུས་རྩོམས་ཤིག །དེ་ནས་ལྷ་དང་ལྷ་མ་ཡིན་དང་མི་རྣམས་ཀྱིས་བཅོམ་ལྡན་འདས་ཀྱི་གསུང་བློ་གྲོས་དང་ལྡན་པ་དང་དེ་ཁོ་
ན་ཉིད་དུ་འགྲོ་བ་ཐོས་ནས་ཇི་ལྟར་བུ་གཅིག་པ་ཤི་ནས་དུར་ཁྲོད་དུ་བོར་བ་བཞིན་དུ་དེ་དག་སྡུག་བསྔལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེ་དག་ལ་ཚིགས་སུ་བཅད་དེ་བཀའ་སྩལ་པ། ཁྱེད་རྣམས་ངེས་པར་བདེ་གྱུར་ཅིག །མྱ་ངན་
མ་བྱེད་མ་ངུ་ཤིག །འདི་ནི་སངས་རྒྱས་རྣམས་ཀྱི་ཆོས། །ཐམས་ཅད་མི་སྨྲ་འཁོད་པར་གྱིས། །བག་མེད་པར་ནི་མ་གནས་པར། །བག་ཡོད་པ་ལ་དགའ་བར་གྱིས། །ཁྱེད་སྟོང་པ་དང་སྟོང་པ་མ་ཡིན་པའམ། རྟག་པ་དང་མི་རྟག་པའམ། 
སྐྱབས་དང་སྐྱབས་མ་ཡིན་པའམ། འགྲོ་བ་དང་མི་འགྲོ་བའམ། རྟེན་དང་རྟེན་མ་ཡིན་པའམ། ཐེར་ཟུག་དང་ཐེར་ཟུག་མ་ཡིན་པའམ་བརྟན་པ་དང་བརྟན་པ་མ་ཡིན་པའམ། སེམས་ཅན་དང་སེམས་ཅན་མེད་པའམ། ཡང་དག་པ་དང་ཡང་དག་པ་མ་ཡིན་པའམ། བདེན་པ་དང་
བདེན་པ་མ་ཡིན་པའམ། མྱ་ངན་ལས་འདས་པ་དང་མྱ་ངན་ལས་འདས་པ་མ་ཡིན་པའམ། གསང་བ་དང་གསང་བ་མ་ཡིན་པའམ། གཉིས་དང་གཉིས་སུ་མེད་པའམ། དེ་བཞིན་དུ་ཆོས་རྣམ་པ་དུ་མ་དག་ལ་སོམ་ཉིའམ། ཡིད་གཉིས་
སམ། ཐེ་ཚོམ་ཟ་བ་ཅི་དང་ཅི་ཡོད་པ་དེ་དང་དེ་དག་ང་ལ་ཞུས་ཤིག་དང་ཐམས་ཅད་གཅད་པར་བྱའོ། །བདུད་རྩིའི་མཆོག་ཀྱང་ཁྱེད་ལ་བསྟན་པར་བྱ་སྟེ། དེའི་འོག་ཏུ་ཡོངས་སུ་མྱ་ངན་ལས་འདའ་བར་བྱའོ། །དགེ་སློང་དག་སངས་རྒྱས་འབྱུང་བ་
རྙེད་པར་དཀའོ། །མིའི་ལུས་ཐོབ་པ་རྙེད་པར་དཀའོ། །དལ་བ་ཕུན་སུམ་ཚོགས་པ་རྙེད་པར་དཀའོ། །བཟོད་པ་དང་ཚུལ་ཁྲིམས་ཕུན་སུམ་ཚོགས་པ་མ་ཞིག་མ་རལ་བ་ཡང་ཤིན་ཏུ་རྙེད་པར་དཀའོ། །འཇིག་རྟེན་ན་དགྲ་བཅོམ་པ་འཐོབ་པ་ནི་གསེར་
གྱི་ཕྱེ་མ་དང་། ཨུ་དུམ་བ་རའི་མེ་ཏོག་བཞིན་དུ་རྙེད་པར་དཀའོ། །དགེ་སློང་དག་འདི་ལྟ་སྟེ། ས་ནི་ཐམས་ཅད་ཀྱི་སྒོ་ནས་སེམས་ཅན་ཐམས་ཅད་ཀྱི་འཚོ་བ་ཡིན་ཏེ། དེ་བཞིན་དུ་ངའི་ཆོས་བསྟན་པ་རྣམ་པ་སྣ་ཚོགས་གསང་བ་ཐར་པའི་གྲོང་ཁྱེར་

49-1-28b

གྱི་བདུད་རྩིའི་ཟས་ཀྱང་དེ་དང་འདྲ་བར་བལྟ་བར་བྱའོ། །སེམས་ཅན་ཐམས་ཅད་དང་ངའི་སྲས་དགེ་སློང་ཐམས་ཅད་ལ་དམ་པའི་ཆོས་མང་པོ་བརྟན་པོར་བཞག་གོ། །གཞན་ཡང་སེམས་ཅན་ཐམས་ཅད་ལ་ཕན་པའི་ཕྱིར་དེ་བཞིན་གཤེགས་པའི་ཡོན་
ཏན་ཆེ་བ་ཉིད་བསྒྲགས་ཏེ། ཡི་གེ་འབྲུ་གཅིག་པའི་ཐིག་ལེའི་གཏམ་ཡང་བཞག་ནས་ཡོངས་སུ་མྱ་ངན་ལས་འདའ་བར་བྱའོ། །དེ་ནས་དགེ་སློང་དེ་དག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ་ཞེས་ཐོས་ནས་མི་དགའ་བར་གྱུར་ཏེ། སྐྱི་
བུང་ཞེས་བྱས་ནས་མིག་མཆི་མས་གང་བཞིན་དུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་མང་དུ་བསྐོར་བ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སྡུག་བསྔལ་
བ་དང་། མི་རྟག་པ་དང་། བདག་མེད་པ་དང་། རྗེས་ཐམས་ཅད་ཀྱི་ནང་ན་གླང་པོ་ཆེའི་རྗེས་མཆོག་ཡིན་པར་བསྟན་ཏོ་ཞེས་གསུངས་ཏེ། དེ་ལྟར་མི་རྟག་པའི་འདུ་ཤེས་བརྟེན་ཅིང་བསྒོམས་ཏེ་མང་དུ་བགྱིས་པས་འདོད་པའི་འདོད་ཆགས་ཐམས་ཅད་
ཟད་པར་འགྱུར། གཟུགས་ཀྱི་འདོད་ཆགས་ཐམས་ཅད་ཟད་པར་འགྱུར། གཟུགས་མེད་པའི་འདོད་ཆགས་ཐམས་ཅད་ཟད་པར་འགྱུར། མ་རིག་པ་ཐམས་ཅད་ཟད་པར་འགྱུར། ལྷག་པའི་ང་རྒྱལ་ཐམས་ཅད་མ་ལུས་པ་ཡང་དག་པར་ཆད་པར་
འགྱུར་བ་ལགས་སོ། །བཅོམ་ལྡན་འདས་དཔེར་གསོལ་ན་སྟོན་གྱི་དུས་སུ་ཞིང་པས་རྨོས་ཆེར་བཏབ་སྟེ་རྩ་བ་འཛིངས་པ་ཐམས་ཅད་སེལ་བར་བགྱིད་པ་དེ་བཞིན་དུ། བཅོམ་ལྡན་འདས་མི་རྟག་པའི་འདུ་ཤེས་བསྟེན་ཅིང་བསྒོམས་ཏེ་མང་དུ་བགྱིས་པས་
འདོད་པའི་འདོད་ཆགས་ཐམས་ཅད་ཟད་པར་འགྱུར། གཟུགས་ཀྱི་འདོད་ཆགས་ཐམས་ཅད་ཟད་པར་འགྱུར། གཟུགས་མེད་པའི་འདོད་ཆགས་ཐམས་ཅད་ཟད་པར་འགྱུར། མ་རིག་པ་ཐམས་ཅད་ཟད་པར་འགྱུར། ལྷག་པའི་ང་རྒྱལ་ཐམས་ཅད་
མ་ལུས་པར་ཡང་དག་པར་ཟད་པར་འགྱུར་རོ། །ཞིང་སླས་ཐམས་ཅད་ཀྱི་ནང་ན་ནི་སྟོན་གྱི་ཞིང་སླས་མཆོག་ཏུ་བསྟན་ཏོ་ཞེས་བྱ་བ་ལ་སོགས་པ་གླང་པོ་ཆེའི་རྗེས་ལྟ་བུའི་མདོ་ལས་འབྱུང་བ་བཞིན་དུ་རྒྱས་པར་སྦྱར་རོ། །བཅོམ་ལྡན་འདས་དཔེར་

49-1-29a

གསོལ་ན། རྒྱལ་པོ་འཆི་བའི་ཚེ་བདག་གི་བཙོན་ར་བསལ་ཏེ། སེམས་ཅན་རྣམས་བཙོན་རའི་གནོད་པས་སྙོན་སྨོངས་པ་ལས་ཐར་བར་བགྱིས་ནས་དེའི་འོག་ཏུ་འཆི་བར་བགྱིད་པ་དེ་བཞིན་དུ། བཅོམ་ལྡན་འདས་ཁྱོད་
ཀྱིས་ཀྱང་སེམས་ཅན་མི་ཤེས་པ་རྣམ་པ་སྣ་ཚོགས་ཀྱི་བཙོན་རར་བྲུབས་པ་རྣམས་ཀྱིས་མི་ཤེས་པའི་འཆིང་བ་རྣམས་བཅད་ནས། དེའི་འོག་ཏུ་ཡོངས་སུ་མྱ་ངན་ལས་འདའ་བར་གཤེགས་སུ་གསོལ། བཅོམ་ལྡན་འདས་གཞན་ཡང་དཔེར་གསོལ་ན། 
སེམས་ཅན་འབྱུང་པོ་དང་ཤ་ཟའི་གདོན་གྱིས་བསླབས་པ་ལས་སྨན་པ་ཆེན་པོ་དང་ཕྲད་ན་འབྱུང་པོ་དང་ཤ་ཟའི་གདོན་རྣམས་ཀྱིས་ཐེབས་པ་ཐམས་ཅད་ལས་ཐར་བར་འགྱུར་བ་དེ་བཞིན་དུ་ཁྱོད་དང་འཇལ་ན་ཉན་ཐོས་ཀྱི་ཚོགས་ཐམས་ཅད་མི་ཤེས་པ་རྣམ་པ་སྣ་
ཚོགས་ཀྱི་འབྱུང་པོ་དང་ཤ་ཟའི་གདོན་རྣམས་ལས་ཡོངས་སུ་ཐར་བར་འགྱུར་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཁོང་དུ་ཆུད་པར་བགྱིད་ལགས་སོ། །བཅོམ་ལྡན་འདས་དཔེར་གསོལ་ན་གླང་པོ་ཆེའི་འདུལ་སྦྱོང་གི་མཁན་པོས་སྤོས་ཀྱི་གླང་པོ་ཆེ་ཞགས་
པ་ཆེན་པོས་བཅིངས་པ་ལས་གླང་པོ་ཆེའི་ཞགས་པ་དེ་བཅད་དེ་བྲོས་པ་དེ་བཞིན་དུ། བཅོམ་ལྡན་འདས་བདག་ཅག་ཀྱང་བདག་ཏུ་འཛིན་པ་དང་། བདག་གིར་འཛིན་པ་དང་། ཕྲག་དོག་དང་། མངན་འཐེན་དང་། སེར་སྣ་དང་། གཡོའི་ཞགས་པ་ཆེན་པོ་བཅད་ནས་གླང་པོ་ཆེའི་འདུལ་སྦྱོང་གི་མཁན་
པོ་ཆེན་པོ་དེ་བཞིན་གཤེགས་པའི་ལག་ཏུ་འོངས་ན་སེམས་ཅན་ཐམས་ཅད་ལས་ཉོན་མོངས་པའི་གླང་པོ་ལྔ་བཅུ་རྩ་བདུན་ཡོངས་སུ་བསལ་བར་བགྱིའོ། །བཅོམ་ལྡན་འདས་དཔེར་གསོལ་ན་གྲང་བའི་རིམས་ཀྱིས་ཐེབས་པ་སྨན་པ་ཆེན་པོའི་ཐད་དུ་མཆིས་ན་
སྡུག་བསྔལ་ལས་ཐར་བར་འགྱུར་བ་དེ་བཞིན་དུ། བཅོམ་ལྡན་འདས་བདག་ཅག་ཀྱང་ཉོན་མོངས་པ་དང་། ལོག་པར་ལྟ་བ་དང་། ལོག་པའི་འཚོ་བའི་ཉེས་དམིགས་མཐའ་ཡས་པའི་གྲང་བའི་རིམས་ནད་ཅན་གྱི་ལུས་དང་ལྡན་པ་ལས་སྨན་པ་ཆེན་
པོ་བཅོམ་ལྡན་འདས་ཀྱི་ཐད་དུ་མཆིས་ནས་སྡུག་བསྔལ་ཐམས་ཅད་ལས་རྣམ་པར་ཐར་བར་གྱུར་ཏེ་མི་གཡོ་བའི་བདེ་བ་ཡང་ཐོབ་ལགས་སོ། །བཅོམ་ལྡན་འདས་གཞན་ཡང་དཔེར་གསོལ་ན་མི་ཞིག་གིས་འབྲས་སྐྱེམས་འཚལ་ཏེ་ར་རོ་བར་གྱུར་ནས་

49-1-29b

བདག་ཉིད་ཀྱིས་ཀྱང་བདག་ཉིད་མ་འཚལ་ཏེ། ཆོས་ཀྱང་མ་འཚལ། ཆོས་མ་ལགས་པ་ཡང་མ་འཚལ། འདི་ནི་བདག་གི་མའོ། །འདི་ནི་བདག་གི་སྲིང་མོའོ། །འདི་ནི་བདག་གི་བུ་མོའོ་སྙམ་དུ་ཡང་མ་འཚལ་ལ། སྨད་ཅིང་བླ་སྟེ། ཕྱི་ས་དང་། གཅིན་གྱིས་
རང་གི་ལུས་ཀུན་བསྒོས་ཤིང་མཆིས་པ་ལས་དེའི་འོག་ཏུ་བདག་ཉིད་སངས་ཏེ་གཞི་ཅི་ལས་གྱུར་པ་ལ་མཁས་པར་གྱུར་ནས་ཆང་ནི་ཅིར་ཡང་མི་རུང་ངོ་སྙམ་དུ་སེམས་ཏེ། བདག་ནི་སྡིག་པ་ཐམས་ཅད་ལས་ཐར་ཏོ་སྙམ་ནས་ཆང་བཏུང་བ་ཅིར་ཡང་མི་རུང་བར་
ཤས་ཆེར་བསྒོམས་ཏེ་སྤོང་བར་བགྱིད་པ་དེ་བཞིན་དུ། བཅོམ་ལྡན་འདས་འཚོ་བའི་འཇིག་རྟེན་འདི་ནི་ཟློས་གར་མཁན་བཞིན་དུ་ཐོག་མ་མ་མཆིས་པ་ན་འཁོར་བ་ན་འཁོར་ཞིང་ཡོངས་སུ་འཁྱམ་པ་ན་འདི་ནི་བདག་གི་མའོ། །འདི་ནི་བདག་གི་སྲིང་མོའོ། །
འདི་ནི་བདག་གི་བུ་མོའོ་སྙམ་དུ་མ་འཚལ་ནས་མ་དང་སྲིང་མོ་དང་བུ་མོ་རྣམས་དང་ལྷན་ཅིག་ཏུ་འདོད་པའི་འདུ་ཤེས་སྤྱོད་པར་བགྱིད་དེ། འབྲས་སྐྱེམས་ཀྱི་ར་རོ་བར་གྱུར་པ་དེ་བཞིན་དུ་སྡུག་བསྔལ་རྙེད་པར་གྱུར་ལ། དེ་ནས་ངོ་ཚ་ཤེས་པའི་མི་དེ་དག་འབྲས་
སྐྱེམས་ཀྱིས་ར་རོ་བ་ལས་སངས་པ་བཞིན་ཅིར་ཡང་མི་རུང་བར་ཤས་ཆེར་བསྒོམས་ནས་སྡུག་བསྔལ་ལས་ཡང་དག་པར་འདའ་བར་འགྱུར་ལགས་སོ། །གཞན་ཡང་ཨེ་རན་ད་ལ་ནི་སྙིང་པོ་མཆིས་མི་སྲིད་པ་དེ་བཞིན་དུ་ལུས་འདི་ལ་ཡང་བདག་དང་། སེམས་
ཅན་དང་། སྲོག་དང་། གང་ཟག་དང་། ཤེད་ལས་སྐྱེས་པ་དང་། ཤེད་བུ་དང་། བྱེད་པ་པོ་མཆིས་མི་སྲིད་དེ། དེ་ལྟ་བུར་བདག་ཅག་གིས་བདག་མ་མཆིས་པའི་འདུ་ཤེས་བསྒོམས་ཏེ་མང་དུ་བགྱིས་ལགས་སོ། །དཔེར་གསོལ་ན་ཕུབ་མ་སྐོན་པ་བྱེད་པ་སྙེད་
བོར་བ་ནི་ཅིར་ཡང་མི་གཅེས་པ་དེ་བཞིན་དུ་ལུས་འདི་ལ་ཡང་བདག་མ་མཆིས་སོ། །དཔེར་གསོལ་ན་ཁ་སྲལ་གྱི་མེ་ཏོག་ལ་དྲི་བདའ་བ་མ་མཆིས་པ་དེ་བཞིན་དུ་ལུས་འདི་ལ་ཡང་བདག་མ་མཆིས་ཏེ། དེ་ལྟར་བདག་ཅག་གིས་བདག་མ་མཆིས་པའི་འདུ་ཤེས་བསྒོམས་ཏེ་མང་དུ་བགྱིས་ལགས་སོ། །བཅོམ་
ལྡན་འདས་ཀྱིས་ཀྱང་དགེ་སློང་དག་ཆོས་ཐམས་ཅད་ནི་བདག་མེད་པ་སྟེ། དེ་ལྟར་སྒོམས་ཤིག་དང་དེ་ལྟར་བསྒོམས་པ་རྣམས་ཀྱིས་བདག་ཏུ་འཛིན་པ་སྤོངས་བར་འགྱུར་རོ། །བདག་ཏུ་འཛིན་པ་ཡོངས་སུ་སྤངས་ན་མྱ་ངན་ལས་འདས་པ་ཐོབ་པར་འགྱུར་

49-1-30a

རོ་ཞེས་བཀའ་སྩལ་ཏེ། བཅོམ་ལྡན་འདས་དེ་ལྟར་ཆོས་ཐམས་ཅད་བདག་མ་མཆིས་པའི་སླད་དུ་བདག་མ་མཆིས་པའི་འདུ་ཤེས་བསྒོམས་ཏེ་མང་དུ་བགྱིས་ལགས་སོ། །གཞན་ཡང་ཇི་ལྟར་ནམ་མཁའ་ལ་བྱའི་རྗེས་
གདའ་མི་སྲིད་པ་དེ་བཞིན་དུ་བདག་མ་མཆིས་པའི་འདུ་ཤེས་བསྒོམས་ན་ལྟ་བའི་རྣམ་པ་ཐམས་ཅད་དང་བྲལ་བར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བསྒོམ་པ་དེ་ལྟར་བསྒོམ་པ་ཁྱོད་ཀྱིས་ཤེས་སམ། 
དགེ་སློང་རྣམས་ཀྱིས་གསོལ་པ། བཅོམ་ལྡན་འདས་སྡུག་བསྔལ་དང་། མི་རྟག་པ་དང་། བདག་མེད་པའི་འདུ་ཤེས་དེ་མ་ལགས་པ་བསྒོམས་ན་ནི་ཇི་ལྟར་མི་ར་རོ་ཞིང་འཁྱམ་པས་ལྷ་ཁང་དང་། སྤོ་དང་། ས་གཞི་དང་། ཉི་མ་དང་། 
ཟླ་བ་དང་། ཤིང་དང་། རི་རྣམས་མི་འཁོར་བཞིན་དུ་འཁོར་བར་མཐོང་བ་དེ་བཞིན་དུ་གང་དག་གིས་སྡུག་བསྔལ་དང་། མི་རྟག་པ་དང་། བདག་མེད་པའི་འདུ་ཤེས་མ་བསྒོམས་པའི་སེམས་ཅན་འཇིག་རྟེན་པ་དེ་དག་ནི་ར་རོ་བ་དང་འདྲ་བར་
བལྟ་བར་བགྱིའོ། །བཅོམ་ལྡན་འདས་བདག་ཅག་གིས་ནི་ཡང་དག་པར་བསྒོམས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ནི་དཔེ་འདིའི་དོན་དེ་ངས་བཤད་པར་བྱའོ། །ཁྱེད་ཀྱིས་ཚིགས་སུ་བཅད་པའི་དོན་
འདི་ལ་དོན་ནི་འདིའོ། །ཡི་གེ་ནི་འདིའོ་ཞེས་གསལ་བར་མི་ཤེས་ཏེ། ཇི་ལྟར་མི་ར་རོ་བས་ལྷ་ཁང་དང་། སྤོ་དང་། ས་གཞི་དང་། ཉི་མ་དང་། ཟླ་བ་དང་། ཤིང་དང་། རི་རྣམས་མི་འཁོར་བཞིན་དུ་འཁོར་བར་མཐོང་བ་དེ་བཞིན་དུ་འདུ་ཤེས་
ཕྱིན་ཅི་ལོག་ཏུ་མས་ཟིན་ཅིང་ཀུན་ཏུ་རྨོངས་པ་རྣམས་བདག་གོ་སྙམ་པ་དང་། རྟག་གོ་སྙམ་པ་དང་། བདེའོ་སྙམ་པ་དང་། སྡུག་གོ་སྙམ་པའི་འདུ་ཤེས་ཀུན་ཏུ་སྤྱོད་དོ། །དེ་ལ་བདག་ཅེས་བྱ་བ་ནི་སངས་རྒྱས་ཞེས་བྱ་བའི་དོན་ཏོ། །རྟག་ཅེས་བྱ་བ་ནི་ཆོས་ཀྱི་སྐུ་
ཞེས་བྱ་བའི་དོན་ཏོ། །བདེ་ཞེས་བྱ་བ་ནི་མྱ་ངན་ལས་འདས་པ་ཞེས་བྱ་བའི་དོན་ཏོ། །སྡུག་ཅེས་བྱ་བ་ནི་ཆོས་ཀྱི་ཚིག་བླ་དགས་སོ། །དགེ་སློང་དག་ཁྱེད་ཀྱིས་བཅོམ་ལྡན་འདས་བདག་ཅག་གིས་ནི་སྡུག་བསྔལ་དང་མི་རྟག་པ་དང་། བདག་མེད་པའི་འདུ་ཤེས་བསྒོམས་ལགས་སོ་ཞེས་རྒྱགས་པ་དང་

49-1-30b

ང་རྒྱལ་གྱིས་དྲེགས་པར་མ་བྱེད་ཅིག །དེ་ལྟར་རྣམ་པ་གསུམ་བསྒོམས་པར་གྱུར་ན་ནི་ངའི་བསྟན་པ་ལ་ཁྱེད་ཀྱིས་བསྒོམ་པ་རྣམ་པ་གསུམ་བསྒོམས་པ་དེ་བསྒོམ་པ་དོན་མེད་པར་འགྱུར་རོ། །སྡུག་བསྔལ་ཤེས་པར་བྱ་བ་བསྒོམ་པ་རྣམ་པ་གསུམ་པོ་
ནི་ཁྱད་པར་དང་ཁྱད་པར་གྱི་ཡང་ཁྱད་པར་རོ། །སྡུག་བསྔལ་ལ་བདེའོ་སྙམ་དུ་འདུ་ཤེས་པ་ནི་ཕྱིན་ཅི་ལོག་པའོ། །བདེ་བ་ལ་སྡུག་བསྔལ་ལོ་སྙམ་དུ་འདུ་ཤེས་པ་ནི་ཕྱིན་ཅི་ལོག་པའོ། །མི་རྟག་པ་ལ་རྟག་གོ་སྙམ་དུ་འདུ་ཤེས་པ་ནི་ཕྱིན་ཅི་ལོག་པའོ། །
རྟག་པ་ལ་མི་རྟག་གོ་སྙམ་དུ་འདུ་ཤེས་པ་ནི་ཕྱིན་ཅི་ལོག་པའོ། །བདག་མེད་པ་ལ་བདག་ཏུ་འདུ་ཤེས་པ་ནི་ཕྱིན་ཅི་ལོག་པའོ། །བདག་ཡོད་པ་ལ་བདག་མེད་པར་འདུ་ཤེས་པ་ནི་ཕྱིན་ཅི་ལོག་པའོ། །མི་སྡུག་པ་ལ་སྡུག་གོ་སྙམ་དུ་འདུ་ཤེས་པ་ནི་ཕྱིན་
ཅི་ལོག་པའོ། །སྡུག་པ་ལ་མི་སྡུག་གོ་སྙམ་དུ་འདུ་ཤེས་པ་ནི་ཕྱིན་ཅི་ལོག་པ་སྟེ། ཕྱིན་ཅི་ལོག་བཞི་པོ་འདི་དག་ཡང་དག་པར་མ་ཤེས་པར་ཁྱེད་ཀྱིས་བསྒོམ་པར་བྱ་བ་བསྒོམས་ཏེ་མང་དུ་བྱས་སོ། །ཁྱེད་ཀྱིས་བདེ་བ་ལ་སྡུག་བསྔལ་བར་བསྒོམས་
སོ། །རྟག་པ་ལ་མི་རྟག་པ་དང་། བདག་ཡོད་པ་ལ་བདག་མེད་པ་དང་། །སྡུག་པ་ལ་མི་སྡུག་པར་བསྒོམས་སོ། །འཇིག་རྟེན་པ་རྣམས་ལ་ཡང་བདེ་བ་དང་། བདག་དང་རྟག་པ་དང་། སྡུག་པ་རྣམས་ཡོད་དོ། །འཇིག་རྟེན་ལས་འདས་པ་
རྣམས་ལ་ཡང་བདེ་བ་དང་། བདག་དང་། རྟག་པ་དང་། སྡུག་པ་རྣམས་ཡོད་དེ་འདི་ལ་ཕན་ཚུན་མི་མཐུན་པ་ཡོད་དོ། །ཡི་གེ་ཞེས་བྱ་བ་ནི་འཇིག་རྟེན་པ་ཞེས་བྱ་བའི་ཐ་ཚིག་གོ། །དོན་ཅེས་བྱ་བ་ནི་འཇིག་རྟེན་ལས་
འདས་པའི་ཡེ་ཤེས་སོ། །དེ་ནས་བཅོམ་ལྡན་འདས་ལ་དགེ་སློང་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་འདུ་ཤེས་བཞི་ལ་སོགས་པ་ཕྱིན་ཅི་ལོག་དེ་བཞིན་གཤེགས་པས་ལུགས་སུ་བཞག་པ་རྣམས་ནི་བདག་ཅག་གིས་ཡུན་
རིང་མོ་ཞིག་ནས་མཐོང་ཡང་མཐོང་། བསྒོམས་ཀྱང་བསྒོམས་ལགས་ན། ད་ཇི་ལྟར་འཚལ་བ་བཀའ་སྩལ་དུ་གསོལ། །དེ་བཞིན་གཤེགས་པ་བསྐལ་པའམ། བསྐལ་པ་ལས་ལྷག་པར་ཡང་བཞུགས་སུ་གསོལ། དེ་བཞིན་

49-1-31a

གཤེགས་པས་ཅི་དང་ཅི་སྐད་དུ་བཀའ་སྩལ་པ་དེ་དང་དེ་དག་དེ་བཞིན་དུ་བདག་ཅག་གིས་བགྱི་བར་འཚལ་ལོ། །གལ་ཏེ་དེ་བཞིན་གཤེགས་པ་བཞུགས་སུ་མི་གནང་ན་བདག་ཅག་ཀྱང་སྦྲུལ་གདུག་པ་དང་ཁྱིམ་གཅིག་གི་ནང་
དུ་ལྷན་ཅིག་མཆིས་པ་མི་འཚལ་ཏེ། དེ་བཞིན་གཤེགས་པ་མི་བཞུགས་ན་ཚངས་པར་སྤྱོད་ཅིང་མཆིས་པའི་རྔོ་མི་ཐོག་གིས་ཁྱོད་ཉིད་ཀྱི་སླད་བཞིན་དུ་བདག་ཅག་ཀྱང་ཡོངས་སུ་མྱ་ངན་ལས་འདའ་བར་འཚལ་ལོ། །དེ་ནས་བཅོམ་ལྡན་འདས་
ཀྱིས་དགེ་སློང་དེ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་དེ་སྐད་མ་ཟེར་ཅིག །དགེ་སློང་དག་ངས་འོད་སྲུང་གི་ལག་ཏུ་བསྟན་པ་གཏད་པར་བྱ་སྟེ། འདི་ནི་དེ་བཞིན་གཤེགས་པ་དང་འདྲ་བར་དགེ་སློང་རྣམས་ཀྱི་རྟེན་ལྟ་བུར་འགྱུར་རོ། །
དགེ་སློང་རྣམས་དང་སེམས་ཅན་རྣམས་ཀྱི་སྐྱབས་ལྟ་བུར་འགྱུར་རོ། །དཔེར་ན་རྒྱལ་པོ་གྲོང་ཁྱེར་མང་པོའི་མངའ་བདག་གྲོང་ཁྱེར་གཅིག་ཏུ་སོང་སྟེ། ཁྱིམ་བདག་གཅིག་རྒྱལ་པོར་དབང་བསྐུར་བ་དེ་བཞིན་དུ་འཇིག་རྟེན་གྱི་ཁམས་འདིར་ངས་འོད་སྲུང་
ཆེན་པོ་དབང་བསྐུར་རོ། །དགེ་སློང་དག་ཁྱེད་ཀྱིས་སྡུག་བསྔལ་དང་། མི་རྟག་པ་དང་། བདག་མེད་པ་དང་། མི་སྡུག་པའི་འདུ་ཤེས་ཇི་ལྟར་བསྒོམ་ཞེ་ན། དགེ་སློང་དག་དཔེར་ན་སོ་ཀའི་དུས་ལ་བབ་པ་ན་སྐྱེ་བོ་རྣམས་ཀྱིས་ནགས་ཚལ་ཀྱི་ནང་དུ་ཆུ་
བསྐྱིལ་ཏེ། རང་རང་གི་རྐྱལ་པའི་ཡོ་བྱད་ཐོགས་ནས་ཆུའི་ནང་དུ་བརྩེ་བར་བྱེད་ལ། ཆུ་དེའི་ནང་དུ་གཅིག་གིས་ནོར་བུ་རིན་པོ་ཆེ་བཻ་དཱུརྱ་རིགས་དང་ལྡན་པ་ཞིག་བཞག་ནས་བཻ་དཱུརྱ་དེ་འདོད་པའི་ཕྱིར་དེ་དག་ཐམས་ཅད་ཀྱིས་རྐྱལ་པ་རྣམས་བོར་ཏེ། 
ཆུ་དེའི་ནང་དུ་འཛུལ་ནས་དེའི་ནང་ན་གྱོ་མོ་འམ་གསེག་མ་ཅི་ཡོད་པ་དག་ལ་ནོར་བུ་ཡིན་སྙམ་སྟེ་བླངས་ནས་ནོར་བུ་བདག་གིས་རྙེད་དོ། །བདག་གིས་རྙེད་དོ་ཞེས་ཟེར་ཞིང་སོ་སོ་ནས་སྟེང་དུ་བྱུང་སྟེ། རྫིང་གི་འགྲམ་དུ་འཁོད་ནས་འདི་ནི་ནོར་བུ་མ་ཡིན་ནོ་
སྙམ་པའི་འདུ་ཤེས་སྐྱེས་པར་གྱུར་ལ། རྫིང་བུ་དེའི་ཆུ་ཡང་ནོར་བུའི་འོད་ཀྱིས་ཟླ་བའི་འོད་བཞིན་དུ་མཛེས་པར་འདུག་སྟེ། དེ་དག་གིས་མཛེས་པ་དེ་མཐོང་ནས། ཨེ་མ་ནོར་བུ་སྙམ་དུ་ཡོན་ཏན་གྱི་འདུ་ཤེས་སྐྱེ་བར་འགྱུར་ཏེ། དེ་དག་གི་ནང་ནས་

49-1-31b

ཐབས་ལ་མཁས་ཤིང་ཡིད་རྣོ་བ་གཅིག་གིས་ནོར་བུ་དེ་ཡང་དག་པར་རྙེད་པ་དེ་བཞིན་དུ། དགེ་སློང་དག་ཁྱེད་ཀྱིས་ཐམས་ཅད་སྡུག་བསྔལ་བའོ། །ཐམས་ཅད་བདག་མེད་པའོ། །ཐམས་ཅད་མི་རྟག་པའོ། །ཐམས་ཅད་མི་སྡུག་པའོ་ཞེས་
ཐམས་ཅད་ཀྱི་མུ་བཟུང་ནས་བསྒོམས་ཤིང་མང་དུ་བྱས་པ་གང་ཡིན་པ་དེ་དག་ཐམས་ཅད་རྫིང་གི་ནང་གི་གྱོ་མོ་དང་གསེག་མ་བཞིན་དུ་ནོར་ཅིང་དོན་མེད་པར་གྱུར་ཏ་རེ། སྐྱེས་བུ་ཐབས་ལ་མཁས་པ་བཞིན་དུ་གྱིས་ཤིག །ཁྱེད་ཀྱིས་ཐམས་ཅད་ཀྱི་
མུ་བཟུང་ནས་གང་དང་གང་བསྒོམས་པ་དེ་དང་དེ་ཉིད་ལ་བདེ་བ་དང་བདག་དང་རྟག་པ་དང་། སྡུག་པ་ཡོད་དེ་རྣམ་པ་བཞི་པོ་དེ་དག་ནི་ཕྱིན་ཅི་མ་ལོག་པ་ཞེས་བརྗོད་པར་བྱའོ། །དེ་བས་ན་ནོར་བུ་དང་འདྲ་བར་ཆོས་ཀྱི་དེ་ཁོ་ན་ཉིད་རྟག་པའི་
འདུ་ཤེས་སྒོམས་ཤིག །དེ་ནས་བཅོམ་ལྡན་འདས་ལ་དགེ་སློང་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དགེ་སློང་དག་ཆོས་ཐམས་ཅད་ནི་བདག་མེད་པ་སྟེ། དེ་ལྟར་སྒོམས་ཤིག་དང་། དེ་ལྟར་བསྒོམ་པ་རྣམས་
ཀྱིས་ནི་བདག་ཏུ་འཛིན་པ་སྤོངས་བར་འགྱུར་རོ། །བདག་ཏུ་འཛིན་པ་སྤངས་ན་མྱ་ངན་ལས་འདས་པ་ཐོབ་པར་འགྱུར་རོ་ཞེས་བཀའ་སྩལ་ལགས་ན། བཀའ་སྩལ་པ་དེའི་དོན་ཇི་ལྟ་བུ་ལགས། བཅོམ་ལྡན་འདས་དེ་བཞིན་གཤེགས་པས་
དེའི་རྣམ་པར་དབྱེ་བ་བཀའ་སྩལ་དུ་གསོལ། བཅོམ་ལྡན་འདས་ཀྱིས་དགེ་སློང་དེ་དག་ལ་བཀའ་སྩལ་པ། དགེ་སློང་དག་ལེགས་སོ་ལེགས་སོ། །དགེ་སློང་དག་བདག་གི་ཐེ་ཚོམ་ངེས་པར་གཅད་པར་འདོད་པས་ནི་དེ་སྐད་ཅེས་དྲི་དགོས་
ཏེ་ལེགས་སོ། །དགེ་སློང་དག་དཔེར་ན་གྲོང་ཁྱེར་འགའ་ཞིག་ན་རྒྱལ་པོ་ཤེས་རབ་འཆལ་པ་ཞིག་རྒྱལ་པོ་བྱེད་དེ། རྒྱལ་པོ་དེ་ལ་སྨན་པ་ངན་པ་ཞིག་བདོག་ལ། དེ་ཡང་སྨན་པ་འཆལ་པ་ཞིག་སྟེ། བླ་ནས་དབང་ཐང་ཆེར་དབང་ལ་རྒྱལ་
པོས་ཀྱང་བཀུར་བ་ཞིག་ཡོད་པ་དེས་འོ་མ་འབའ་ཞིག་སྨན་ཡིན་པར་འཛིན་ལ། ནད་ཀྱི་གཞི་ནི་མི་ཤེས་ནས་འོ་མའི་དཔྱད་ལོག་པར་ཟིན་པ་དེ་སྐྱེ་བོ་ཐམས་ཅད་ཀྱི་རླུང་ནད་ཀྱི་སྣ་གྲངས་རྣམས་ལ་ཡང་གཏོང་བར་བྱེད། མཁྲིས་པའི་ནད་

49-1-32a

རྣམས་དང་། བད་ཀན་གྱི་ནད་རྣམས་ལ་ཡང་གཏོང་བར་བྱེད་དེ། དེ་དེ་ལྟར་བྱེད་ཀྱང་སྨན་པ་གཅེས་པ་ཁོ་ནར་འགྱུར་ལ་རྒྱལ་པོ་དེ་ཡང་འཆལ་པའི་བྱེ་བྲག་མི་ཕྱེད་པ་ཞིག་གོ། །དེ་ནས་སྨན་པ་ཚེའི་རིགས་བྱེད་ཡན་ལག་
བརྒྱད་ལ་མཁས་པ་རྒྱུད་ཕྱི་མ་ཤེས་པ་གཞན་ཞིག་ཡུལ་གཞན་ནས་གསར་དུ་འོངས་ནས་སྨན་པ་དེའི་ཐད་དུ་རྟེན་བཅས་ཏེ་སྨྲས་པ། ཁྱོད་ཀྱི་མིང་ཐོས་ནས་སློབ་པར་འཚལ་བའི་སླད་དུ་བདག་མཆིས་ཀྱིས་ཁྱོད་ཀྱིས་བདག་གི་མཁན་པོ་མཛད་དུ་
གསོལ། །དེ་ནས་སྨན་པ་འཆལ་པ་དེས་དེ་སྐད་ཅེས་ཐོས་ནས་སྨན་པ་གསར་དུ་འོངས་པ་དེ་ལ་སྨྲས་པ། ལོ་བཞི་བཅུ་རྩ་བརྒྱད་ཀྱི་བར་དུ་ང་ལ་ལེགས་པར་བསྒྲིམས་ཏེ་དཀའ་བ་སྤྱད་པས་རིམ་གྲོ་གྱིས་ལ་དེའི་འོག་ཏུ་སློབས་ཤིག་དང་ཁྱོད་སྨན་པར་འགྱུར་རོ། །
དེ་ནས་དེས་དེ་བཞིན་དུ་མཉན་ཏེ། དེ་ལྟར་བགྱིའོ་ཞེས་བྱས་ནས་དེས་མཐར་གྱིས་སྨན་པ་འཆལ་པ་དེ་མགུ་བར་བྱས་ཏེ་རྒྱལ་པོའི་ཕོ་བྲང་དུ་སོང་ནས་རྒྱལ་པོ་དེ་ལ་འདི་སྐད་ཅེས་གསོལ་ཏེ། རྒྱལ་པོ་ཆེན་པོ་ཁྱེད་ཀྱིས་རྟག་ཏུ་བསྟན་བཅོས་ཐམས་ཅད་ལ་
བརྩོན་པར་མཛོད་ཅིག་དང་། དེ་ལྟར་མཛད་ན་རྒྱལ་པོར་འོས་པར་འགྱུར་རོ། །རྒྱལ་པོས་ཀྱང་དེ་ནི་བདེན་ཏེ་རྣར་འོང་ངོ་ཞེས་བྱས་ནས་རྒྱལ་པོ་དེས་སྨན་པ་འཆལ་པ་དེ་དང་སྨན་པ་གཅིག་ཤོས་ཀྱི་བྱེ་བྲག་ཕྱེད་པར་གྱུར་ནས། སྨན་པ་ངན་པ་དེ་
ཡུལ་ཕྱོགས་ནས་བསྐྲད་དེ་སྨན་པ་བཟང་པོ་གཅིག་ཤོས་བཀུར་བར་གྱུར་ལ། དེ་ནས་སྨན་པ་དེས་ད་ནི་དུས་ལ་བབ་བོ་སྙམ་ནས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་གལ་ཏེ་བདག་ལ་མཉེས་པར་གྱུར་ན་གསོལ་བ་སྣ་
ཅིག་གསོལ་གྱིས། གལ་ཏེ་རྒྱལ་པོ་ཆེན་པོ་ཡང་དགྱེས་པ་ལྟ་ན་གནང་བར་མཛད་དུ་གསོལ། རྒྱལ་པོས་སྨན་པ་ལ་བཀའ་སྩལ་པ། ངའི་ལག་པ་གཡས་པ་མན་ཅད་ནོར་རོ་ཅོག་ལས་གསོལ་ཅིག །སྨན་པས་རྒྱལ་པོ་ལ་གསོལ་པ། རྒྱལ་པོ་
ཆེན་པོའི་སྨན་པ་འཆལ་པ་དེའི་འོ་མའི་དཔྱད་གང་ལགས་པ་དེ་ནི་དུག་ཧ་ལ་ཧ་ལ་ལགས་ན། དེས་གློ་བར་མ་ཆུད་ཀྱིས་རྒྱལ་པོ་ཁྱོད་ཀྱི་ཡུལ་ཁམས་ཐམས་ཅད་དུ་བཀས་བཏགས་ལ་སྔོན་གྱི་སྨན་པ་དེའི་འོ་མའི་དཔྱད་གང་ཡིན་པ་དེ་ནི་དུག་ཧ་ལ་ཧ་

49-1-32b

ལ་ཡིན་གྱིས་སུ་སྨན་དུ་འོ་མ་འཐུང་བ་དེ་མགོ་བོ་གཅད་དོ་ཞེས་བཀའ་གདགས་པར་གསོལ། དེ་ལྟར་མ་བགྱིས་ན་སེམས་ཅན་རྣམས་དུས་མ་ཡིན་པའི་འཆི་བས་འཆི་བར་འགྱུར་རོ། །བདག་ནི་འཚོ་བར་འགྱུར་བ་དང་། ནད་མ་མཆིས་པར་འགྱུར་བར་
འཚལ་ཏེ། ལྷ་བདག་ནི་གསོལ་བ་དེ་འཚལ་ལགས་སོ། །དེ་ནས་རྒྱལ་པོས་སྨན་པ་དེ་ལ་བཀའ་སྩལ་པ། དེ་ལྟ་ན་གསོལ་བ་ཆུང་ངུ་ཞིག་གསོལ་ཏེ་བཀའ་གདགས་པར་བྱའོ་ཞེས་བྱས་ནས་བཀའ་ཡང་བཏགས་སོ། །དེ་ནས་བཀའ་བཏགས་
པ་བཞིན་དུ་ཐམས་ཅད་དུ་ལུགས་སུ་ཆུད་པར་གྱུར་ཏོ། །དེ་ནས་སྨན་པ་དེས་རྒྱལ་པོ་དེ་ལ་ཡང་འདི་སྐད་ཅེས་གསོལ་ཏེ། ད་དུང་ཡང་ལན་གཉིས་ལན་གསུམ་གྱི་བར་དུ་དེ་བཞིན་དུ་བཀའ་གདགས་པར་གསོལ་ཞེས་བྱས་ནས་སྨན་པ་དེས་རོ་མངར་བ་
དང་། སྐྱུར་བ་དང་། ལན་ཚྭའི་རོ་དང་། ཚ་བ་དང་། སྐ་བ་དང་ཁ་བ་རྣམས་ཀྱིས་མི་རྣམས་ཀྱི་ནད་སོས་པར་བྱས་སོ། །དེ་ནས་རེ་ཤིག་ན་རྒྱལ་པོ་ནད་ཀྱིས་ཐེབས་ནས་སྨན་པ་དེ་བཀུག་སྟེ་བསྒོ་བ། ང་ནི་ཤི་ལ་ཐུག་གིས་རྒྱལ་པོའི་རྐྱེན་དང་འཚམ་
པའི་གསོལ་བ་ཅི་འདོད་པ་ཁྱོད་ལ་སྦྱིན་ནོ་ཞེས་བྱས་སོ། །དེ་ནས་སྨན་པ་དེས་རྒྱལ་པོ་དེ་ལ་གསོལ་པ། རྒྱལ་པོ་ཆེན་པོ་བདག་ནི་བརྫུན་དུ་སྨྲ་བ་ལགས་སོ། །འོ་མ་ནི་བདུད་རྩི་ལགས་ཏེ། ཁྱེད་ཀྱིས་ཞལ་ཟས་འོ་མ་དང་སྦྱར་བ་གསོལ་འཚལ་
ལོ། །དེ་ནས་རྒྱལ་པོ་དེས་སྨན་པ་དེ་ལ་བཀའ་སྩལ་པ། ཅི་ཁྱོད་མཁྲིས་པས་མྱོས་པར་བྱས་སམ། འོན་ཏེ་ང་སླུ་བར་བྱེད་དམ་ཅི་ན། སྔར་ནི་འོ་མ་དུག་ཡིན་ཟེར་ལ་ད་ནི་འོ་མ་སྨན་གྱི་མཆོག་ཡིན་ནོ་ཞེས་ཟེར། ཀྱེ་མ་སྨན་པ་སྔ་མ་བསྐྲད་པས་
ཕུང་ངོ་། །དེས་ཀྱང་འོ་མའི་དཔྱད་བསྔགས་པ་ལས་ན་དེ་ནི་སྨན་པ་ཆེན་པོ་ཡིན་གྱིས་སྨན་པ་ངན་པ་མ་ཡིན་ནོ། །ཁྱོད་ཀྱིས་འོ་མའི་དཔྱད་བྱས་པ་ནི་ཁྱོད་བདག་བསྐྲད་པའི་རྒྱུ་ཡིན་ནོ་ཞེས་བྱས་སོ། །སྨན་པས་གསོལ་པ། རྒྱལ་པོ་
ཆེན་པོ་དེ་ལྟར་གཞན་དུ་མི་དགོངས་པར་གསོལ། དཔེར་ན་ཤིང་ངམ། བརྩིག་པ་ལ་སྲིན་བུས་བརྐོས་ཏེ་ཡི་གེའི་འབྲུ་འདྲ་བར་གྱུར་པ་མཐོང་ཡང་མཁས་པ་རྣམས་ཀྱིས་སྲིན་བུས་ཡི་གེ་ཤེས་སོ་ཞེས་བརྗོད་པར་མི་བགྱི། ཡི་གེ་སྦྱར་བ་

49-1-33a

ལྟ་བུར་གྱུར་ཀྱང་ཡ་མཚན་དུ་གཟུང་བར་མི་བགྱི་བ་དེ་བཞིན་དུ། ཁྱོད་ཀྱི་སྨན་པ་སྔ་མའི་འོ་མའི་དཔྱད་ཀྱི་ལས་ཀྱང་སྲིན་བུས་བརྐོས་པའི་ཡི་གེ་བཞིན་དུ་བལྟ་བར་བགྱི་སྟེ། དེ་ནི་འོ་མ་སོ་སོའི་བྱེ་བྲག་ཀྱང་མ་འཚལ་བ་ལགས་སོ། །
རྒྱལ་པོས་སྨན་པ་དེ་ལ་སྨྲས་པ། ཀྭའི་སྨན་པ་ངན་པ་དེས་འོ་མ་སོ་སོའི་བྱེ་བྲག་ཇི་ལྟར་མི་ཤེས། སྨན་པས་གསོལ་པ། རྒྱལ་པོ་ཆེན་པོ་འོ་མ་ནི་བདུད་རྩི་ཡང་ལགས་དུག་ཀྱང་ལགས་ཏེ། དེ་ལ་བདུད་རྩི་ཞེས་བགྱི་བ་ནི་བ་གང་བེའུ་ཧ་ཅང་སྟོབས་
དང་ལྡན་པ་མ་ལགས་པ་དང་། ཆང་གི་སྙིགས་མ་མི་འཐུང་བ་དང་། ནགས་ཁུང་དང་། གཤོང་དང་ཆུ་འདམ་རྫབ་ཅན་ན་མི་གནས་པ་དང་། བ་ལང་རྫིས་ནུ་མ་མ་བཞིབས་པ་དང་། རྩྭ་བརྔས་པ་མ་གསན་པ་དང་། རང་གི་ཁྱུ་ན་འདུག་
པ་དང་། མ་ཧེའི་ཁྱུ་དང་ལྷན་ཅིག་མི་འགྲོགས་པ་དང་། དེ་ལ་སོགས་པའི་ཡོན་ཏན་རྣམས་དང་ལྡན་ལ། དེའི་འོ་མ་ལྷག་མ་ཟག་མ་བཅད་པར་རན་ཙམ་བཞོས་པའི་འོ་མ་དེ་ནི་ནད་དོ་ཅོག་ཞི་བར་བགྱིད་པ་ལགས་སོ། །དེ་ནས་རྒྱལ་པོ་ངོ་མཚར་
དུ་གྱུར་ནས་སྨན་པ་དེ་ལ་བཀའ་སྩལ་པ། མཁན་པོ་ད་ནི་ངས་ཁྱོད་ཀྱི་འོ་མའི་དཔྱད་བཟང་པོ་ཡང་ཤེས་སོ། །ངན་པ་ཡང་ཤེས་སོ། །དེ་ནས་རྒྱལ་པོས་བཀའ་བཏགས་ཏེ་འོ་མ་འཐུང་ཤིག་ཅེས་བསྒོ་བ་དང་། འབངས་ཐམས་ཅད་ཀྱིས་རྒྱལ་པོས་འོ་མ་
འཐུང་ཤིག་ཅེས་བསྒོ་བ་ཐོས་ནས་སེམས་འཁྲུགས་ཏེ། ཅི་རྒྱལ་པོ་གདོན་གྱིས་ཐེབས་སམ། འོན་ཏེ་བདག་ཅག་ལ་མཐོ་འཚམ་འམ་ཞེས་ཟེར་ཞིང་དེ་ལྟར་གྲོང་ཁྱེར་གྱི་མི་དང་འབངས་ཐམས་ཅད་རྒྱལ་པོའི་དྲུང་དུ་ལྷགས་ཏེ་རྒྱལ་པོས་དེ་དག་མཐོང་ནས་
སྨྲས་པ། སྨན་པ་འདི་ན་རེ་འོ་མ་དེ་འདྲའོ་ཞེས་ཟེར་ན་ཁྱེད་གཤེར་ཅི་ཡོད་ཅེས་བྱས་སོ། །དེ་ནས་རྒྱལ་པོ་དང་གྲོང་ཁྱེར་གྱི་མི་དང་འབངས་ཐམས་ཅད་མགུ་བར་གྱུར་ནས་སྨན་པ་ལ་མི་མཚུངས་པའི་བསྙེན་བཀུར་བྱས་ནས་འོ་མའི་དཔྱད་ལ་ཡང་
སྟེན་པར་བྱེད་པ་དེ་བཞིན་དུ། དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། 

49-1-33b

བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྨན་པ་བཟང་པོ་དང་འདྲ་བར་འཇིག་རྟེན་དུ་བྱུང་ནས་མུ་སྟེགས་པ་སྨན་པ་ངན་པ་དང་འདྲ་བ་ཐམས་ཅད་ཀྱི་ཐད་དུ་གཤེགས་ཏེ། ཐམས་ཅད་ངེས་པར་བཏུལ་ཞིང་ངེས་
པར་བཤིག་ནས་རྒྱལ་པོ་དུ་མ་མགུ་བར་མཛད་དེ། མུ་སྟེགས་པ་རྣམས་ཚར་གཅད་པའི་ཕྱིར་བདག་མེད་དོ། །སེམས་ཅན་མེད་དོ། །སྲོག་མེད་དོ། །གང་ཟག་མེད་དོ་ཞེས་གསུང་ངོ་། །མུ་སྟེགས་པ་རྣམས་ཀྱིས་བདག་བསྟན་པ་ནི་སྲིན་བུས་བརྐོས་
པའི་ཡི་གེ་དང་འདྲ་སྟེ། དེའི་ཕྱིར་ངས་སེམས་ཅན་ཐམས་ཅད་ལ་བདག་མེད་དོ་ཞེས་བསྟན་པ་སྟོན་པར་མཛད་དོ། །བདག་མེད་པ་ནི་སངས་རྒྱས་ཀྱི་ཚིག་ཡིན་ནོ་ཞེས་ཆོས་ཀྱི་བཀའ་འདོགས་པར་མཛད་ནས་ཡང་གདུལ་བར་བྱ་བ་རྣམས་ཀྱི་དབང་དང་། 
སེམས་ཅན་རྣམས་ལ་ཕན་པའི་ཕྱིར་དུས་མཁྱེན་པར་མཛད་ནས། ཆོས་ཐམས་ཅད་བདག་མེད་པར་བསྟན་པའི་སྐབས་དེ་ཉིད་དུ་སྨན་པ་བཟང་པོའི་བཞིན་ཏུ་བདག་ཡོད་དོ་ཞེས་ཡང་དག་པར་སྟོན་པར་མཛད་དེ། འཇིག་རྟེན་པ་རྣམས་ཀྱི་བདག་མཐེ་བོ་ཙམ་
དང་ཁྲེ་རྒོད་ཀྱི་འབྲུ་ཙམ་ཞེས་བྱ་བ་དེ་ལྟ་བུ་ནི་མ་ཡིན་ནོ། །འཇིག་རྟེན་པ་རྣམས་ཀྱི་བདག་ཏུ་ལྟ་བ་གང་ཡིན་པ་དེ་ལྟ་བུ་ཡང་མ་ཡིན་ཏེ། འདིར་ཆོས་ཐམས་ཅད་ནི་བདག་མེད་པ་ཞེས་བྱའོ། །ཆོས་ཐམས་ཅད་ནི་བདག་མེད་པ་ཡང་མ་ཡིན་ཏེ་བདག་ནི་དེ་
ཁོ་ན་ཉིད་དོ། །བདག་ནི་རྟག་པ་ཉིད་དོ། །བདག་ནི་ཡོན་ཏན་ཉིད་དོ། །བདག་ནི་ཐེར་ཟུག་པ་ཉིད་དོ། །བདག་ནི་བརྟན་པ་ཉིད་དོ། །བདག་ནི་ཞི་བ་ཉིད་དོ་ཞེས་སྨན་པ་བཟང་པོའི་འོ་མ་བཞིན་དུ་དེ་བཞིན་གཤེགས་པ་ཡང་དེ་ཁོ་ན་ཉིད་དང་ལྡན་པ་སྟོན་པར་
མཛད་དེ། དེ་སྒོམ་པ་ལ་འཁོར་བཞི་པོ་རྣམས་ཀྱིས་བརྩོན་པར་གྱིས་ཤིག །དགེ་སློང་དག་གཞན་ཡང་ཚུལ་ཁྲིམས་ཀྱི་གཞི་གཏོགས་པར་ཐེ་ཚོམ་དང་སུམ་ཉི་ཅི་དང་ཅི་ཡོད་པ་དེ་དག་ཁྱེད་ཀྱིས་ང་ལ་ཞུས་ཤིག་དང་། ངས་ལེགས་པར་གསུངས་
པས་ཁྱེད་རངས་པར་བྱའོ། །ང་ནི་བསྒོམ་པ་ཐམས་ཅད་ལས་གྲོལ་བ་དང་། རང་བཞིན་གྱིས་སྟོང་པ་ཆེན་པོ་སྟོན་ཏེ། དགེ་སློང་ཁྱེད་དེ་བཞིན་གཤེགས་པས་བདག་ཅག་ལ་རང་བཞིན་གྱིས་སྟོང་པ་ཆེན་པོ་མ་བསྟན་ཏོ་ཞེས་དེ་སྐད་མ་ཟེར་ཅིག །དགེ་

49-1-34a

སློང་དག་གཞན་ཡང་ཚུལ་ཁྲིམས་ཀྱི་གཞི་མ་གཏོགས་པར་ཐེ་ཚོམ་དང་སོམ་ཉི་ཅི་དང་ཅི་ཡོད་པ་དེ་དག་ཁྱེད་ཀྱིས་ང་ལ་ཞུས་ཤིག །དེ་ནས་དགེ་སློང་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཞུ་བ་ནི་བདག་ཅག་གི་ཡུལ་མ་ལགས་ཏེ། བདག་ཅག་གིས་རྔོ་མི་ཐོག་ལགས་སོ། །སངས་རྒྱས་བཅོམ་ལྡན་འདས་ཀྱང་བསམ་གྱིས་མི་ཁྱབ། ཏིང་ངེ་འཛིན་རྣམས་ཀྱང་བསམ་
གྱིས་མི་ཁྱབ། ཁྱོད་ཀྱི་གདམས་ངག་ཀྱང་བསམ་གྱིས་མི་ཁྱབ་པས་ན་བདག་ཅག་གིས་ཞུ་བའི་རྔོ་མི་ཐོག་ལགས་སོ། །བཅོམ་ལྡན་འདས་དཔེར་གསོལ་ན། མི་ལ་ལ་རྒས་ཤིང་འཁོགས་ལ་གཏུགས་པ། ལོ་བརྒྱ་ཉི་ཤུ་རྩ་དྲུག་ལོན་པ། ནད་ཀྱིས་
ཐེབས་པ་མལ་ཁྲི་ལ་མཆིས་པའི་ནད་པ་ཞིག་མཆིས་ལ་མི་ལ་ལ་ཞིག་གིས་དེའི་སུག་པར་གཏེར་གཏམས་ཏེ། ཀྱེ་མི་ཁྱོད་ཀྱིས་གཏེར་འདི་ལོང་ལ་གང་གི་ཚེ་བདག་ལོ་བཅུ་འམ་ལོ་ཉི་ཤུ་ན་བྱེས་ནས་ཕྱིར་འོངས་པ་དང་། དེའི་ཚེ་འདི་བདག་ལ་
ཕྱིར་བྱིན་ཅིག་ཅེས་བགྱིས་ནས་དེས་གཏད་དེ་མཆིས་ལ་རྒན་པོ་དེ་ཡང་བུ་མ་མཆིས་པ་ཞིག་སྟེ། མི་དེ་མཆིས་ནས་རིང་པོ་མ་ལགས་པར་མི་རྒན་པོ་དེ་གུམ་ན་མི་དེ་སླར་མཆིས་ཏེ། དེ་དེ་ལྟར་ནོར་གྱི་ཕུང་པོ་ཆེན་པོ་དང་བྲལ་བར་གྱུར་ཀྱང་སུ་
ལ་ཡང་ཇི་སྐད་བགྱིར་ཡང་མ་མཆིས་པ་དེ་བཞིན་དུ་བཅོམ་ལྡན་འདས་ཚུལ་ཁྲིམས་ཀྱི་གཞི་མ་གཏོགས་པར་བདག་ཅག་གིས་ཞུས་པ་དེ་ཡང་ཉན་ཐོས་ལ་ཡུན་རིང་དུ་གནས་པར་མི་འགྱུར་ལ། བདག་ཅག་ལ་ཡང་ཇི་སྐད་དུ་ཞུ་བའི་ཆ་མ་མཆིས་
ལགས་སོ། །བཅོམ་ལྡན་འདས་ཀྱིས་དེ་དག་ལ་བཀའ་སྩལ་པ། དགེ་སློང་རྣམས་ཀྱིས་ཞུས་པ་ནི་སེམས་ཅན་ཐམས་ཅད་ལ་ཕན་པར་འགྱུར་ཏེ། དེའི་ཕྱིར་ངས་ཞུ་བའི་སྐབས་ཕྱེ་བ་ཡིན་ནོ། །དེ་ནས་དགེ་སློང་རྣམས་ཀྱིས་འདི་སྐད་ཅེས་
གསོལ་ཏོ། །བཅོམ་ལྡན་འདས་དཔེར་གསོལ་ན། མི་གཞོན་ནུ་ལ་ལ་ལོ་ཉི་ཤུ་རྩ་དྲུག་ལོན་ཏེ། ཕྱུག་ཅིང་འཁོར་ཕུན་སུམ་ཚོགས་པ་དང་ལྡན་པ་ཞིག་མཆིས་ལ། མི་ལ་ལ་ཞིག་གིས་དེའི་སུག་པར་གཏེར་གཏམས་ཏེ། འདི་སྐད་དུ་ཀྱེ་

49-1-34b

བདག་ནི་དོན་གཉེར་དུ་འགྲོས། བདག་ཕྱིར་འོངས་པ་དང་མི་ཁྱོད་ཀྱིས་གཏེར་འདི་བདག་ལ་ཕྱིར་བྱིན་ཅིག་ཅེས་བགྱིས་ནས་མི་དེས་གཏེར་དེ་ལེགས་པར་སྦས་ཤིང་ལེགས་པར་བསྲུངས་ཏེ། དེ་སླར་མཆིས་ནས་སླར་སྩལ་བ་དེ་བཞིན་དུ་བཅོམ་ལྡན་འདས་
དམ་པའི་ཆོས་ཀྱི་དབྱིག་ལེགས་པར་གསུངས་པ་དགེ་སློང་ཀུན་དགའ་བོ་ལ་སོགས་པ་ཉན་ཐོས་ཐམས་ཅད་ལ་གཏད་ན་ནི་ཡུན་རིང་དུ་གནས་པར་མི་འགྱུར་ལགས་སོ། །དེ་ཅིའི་སླད་དུ་ཞེ་ན། འོད་སྲུང་ཆེན་པོ་ལ་སོགས་པ་ཉན་ཐོས་ཐམས་ཅད་ནི་
མི་རྟག་པའི་སླད་དུའོ། །བྱང་ཆུབ་སེམས་དཔས་ཞུས་པའི་དབྱིག་བྱང་ཆུབ་སེམས་དཔའ་རྣམས་ལ་གཏད་ན་ནི་ལོ་འབུམ་ཕྲག་མང་པོར་གནས་པར་གྱུར་ལ། འཕེལ་བར་ཡང་འགྱུར་ཞིང་བྱང་ཆུབ་སེམས་དཔའ་ཐམས་ཅད་ལ་ཡང་སྨན་པར་
འགྱུར་ལགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ནི་དེ་བཞིན་གཤེགས་པ་ལ་ཞུ་བའི་རྔོ་ཐོག་ལ། བདག་ཅག་སྦྲང་བུ་དང་འདྲ་བས་ནི་དེ་བཞིན་གཤེགས་པ་ལ་ཞུ་བའི་རྔོ་མི་ཐོག་ལགས་སོ་ཞེས་གསོལ་ནས་ཅང་མི་ཟེར་
བར་འཁོད་དོ། །དེ་ནས་བཅོམ་ལྡན་འདས་ཀྱིས་དགེ་སློང་དེ་དག་ལ་འདི་སྐད་ཅེས་བཀའ་སྩལ་ཏེ། དགེ་སློང་དག་ལེགས་སོ་ལེགས་སོ། །དགེ་སློང་དག་ཁྱེད་ཟག་པ་མེད་པས་ནི་དེ་སྐད་བྱ་བ་ཡིན་ནོ། །དགྲ་བཅོམ་པས་ནི་དེ་སྐད་བྱ་བ་ཡིན་ཏེ་ལེགས་
སོ། །དགེ་སློང་དག་ངས་ཀྱང་ཁྱེད་ཀྱིས་བསམས་པའི་དོན་དེ་སྔ་ནས་བསམས་སོ། །ངའི་ཐེག་པ་ཆེན་པོ་ནི་བྱང་ཆུབ་སེམས་དཔའི་ལག་ཏུ་གཏད་ན་རྒྱུ་གཉིས་ཀྱིས་ཡུན་རིང་དུ་གནས་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་འཁོར་རྣམས་ལ་
བཀའ་སྩལ་པ། རིགས་ཀྱི་བུ་འམ་རིགས་ཀྱི་བུ་མོ་ཚེ་རིང་པོ་དག་གཞི་གསུམ་མ་གཏོགས་པ་དང་། ཚུལ་ཁྲིམས་ཀྱི་གཞི་མ་གཏོགས་པར་ཁྱེད་ཀྱི་ཡིད་གཉིས་དང་། སོམ་ཉི་དང་། ཐེ་ཚོམ་ཅི་ཡོད་པ་ང་ལ་ཞུས་ཤིག་ཅེས་ལན་གཉིས་ལན་
གསུམ་དུ་བཀའ་སྩལ་ཏོ། །དེ་ནས་འཁོར་དེ་ཉིད་ཀྱི་ནང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྡོང་བུའི་གྲོང་དུ་སྐྱེས་པ་བྲམ་ཟེའི་རིགས་ཆེ་ཞིང་མཐོ་བའི་བུ་འོད་སྲུང་ཆེན་པོ་དང་རུས་གཅིག་པ་ཞེས་བྱ་བ་དེ་བཞིན་གཤེགས་པའི་མཐུས་

49-1-35a

སྟན་ལས་ལངས་ཏེ། བཅོམ་ལྡན་འདས་ག་ལ་བ་དེར་སོང་ནས་ཕྱག་འཚལ་ཏེ་ལན་འབུམ་བསྐོར་བ་བྱས་ནས། ལྷའི་མཆོད་པའི་ལས་ཆེན་པོ་བྱས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་
བཙུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ། བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་བྲམ་ཟེའི་རིགས་ཆེ་ཞིང་མཐོ་བའི་བུ་འོད་སྲུང་ཆེན་པོ་དང་རུས་གཅིག་པ་ཁྱོད་ཅི་དང་ཅི་འདོད་པ་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཞུས་ཤིག་དང་ངས་ཞུ་བ་ཞུས་པ་དེ་དང་དེ་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་
ཆེན་པོ་བྲམ་ཟེའི་རིགས་ཆེ་ཞིང་མཐོ་བའི་བུ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པའི་མཐུ་དང་སེམས་ཅན་ཐམས་ཅད་ཀྱི་དགེ་བའི་རྩ་བའི་མཐུས་བདག་གིས་ཞུ་བར་མི་འཚལ་
ན། བདག་ནི་སྦྲང་བུ་དང་འདྲ་ལ་དེ་བཞིན་གཤེགས་པ་ནི་ཙན་དན་ལྟ་བུའི་འཁོར་ལོ་ཆེན་པོ་དང་ལྡན་པ་ལགས། སེང་གེ་ལྟ་བུའི་འཁོར་ལོ་ཆེན་པོ་དང་ལྡན་པ་ལགས། བཻ་དཱུརྱ་དང་རྡོ་རྗེ་ཆེན་པོ་ལྟར་མི་ཕྱེད་པའི་སྐུ་མངའ་བ་ལགས། མི་ཕྱེད་པའི་
འཁོར་དང་ལྡན་པ་ལགས། ཡེ་ཤེས་རྒྱ་མཚོ་དང་ལྡན་པའི་འཁོར་ཆེན་པོ་མངའ་བ་ལགས། བྱང་ཆུབ་སེམས་དཔའ་སེམས་དཔའ་ཆེན་པོ་ཁ་ཅིག་ཡོན་ཏན་དཔག་ཏུ་མ་མཆིས་པ་དང་ལྡན་པ་དག་ཀྱང་མཆིས་ཏེ། དེ་ལྟར་དཔག་ཏུ་མ་མཆིས་
པའི་འཁོར་མངའ་བའི་དེ་བཞིན་གཤེགས་པ་ལ་དེ་བཞིན་གཤེགས་པའི་མཐུས་བདག་གིས་ཞུ་བའི་རྔོ་ཐོག་པར་གྱུར་ན། འདིར་བགྱི་བ་མང་དུ་མཆིས་ཏེ། དེ་བཞིན་གཤེགས་པའི་མཐུས་བདག་སྦྲང་བུ་དང་འདྲ་བས་ཞུ་བར་འཚལ་ལོ་ཞེས་

49-1-35b

བྱས་ནས་ཚིགས་སུ་བཅད་དེ་གསོལ་པ། ཐུབ་པ་ཅིས་ན་ཚེ་རིང་འགྱུར། །རྡོ་རྗེ་ལྟ་བུར་ཅིས་འགྱུར་ལགས། །གང་གིས་མི་ཤིགས་ཐོབ་པར་འགྱུར། །ཅིས་ན་ལུས་བརྟན་སྟོབས་ཆེན་འགྱུར། །ཇི་ལྟར་བགྱིས་ན་མདོ་སྡེ་འདིའི། །
ཕ་རོལ་ཕྱིན་པར་འགྱུར་བ་ལགས། །ཇི་ལྟར་སྲོག་ཆགས་རྣམས་ཀྱི་སེམས། །སྣ་ཚོགས་རྟོགས་ནས་སྟོན་པར་འགྱུར། །ཐུབ་པ་ཆེན་པོ་ཇི་ལྟར་ན། །རྒྱ་ཆེན་ཐོབ་ནས་སྐྱབས་སུ་འགྱུར། །ཇི་ལྟར་དགྲ་བཅོམ་མ་ལགས་ཀྱང་། །
དགྲ་བཅོམ་རྣམས་དང་མཚུངས་པར་འགྱུར། །བཅོམ་ལྡན་ཇི་ལྟར་བགེགས་བགྱིད་པའི། །བདུད་ནི་འཁོར་དུ་ཆུད་པར་འགྱུར། །བདུད་ཀྱི་ཚིག་ཀྱང་འཚལ་བ་དང་། །རྫོགས་པའི་སངས་རྒྱས་གསུང་ཡང་འཚལ། །འདྲེན་པ་
ཇི་ལྟར་དགའ་བཞིན་དུ། །འཕགས་པའི་ལམ་ཡང་སྟོན་པར་འགྱུར། །དགེ་དང་ཡང་དག་ལྡན་གྱུར་ནས། །ཕྱིན་ཅི་མ་ལོག་སྟོན་པར་འགྱུར། །ཐུབ་པ་ཆེན་པོ་ཇི་ལྟར་ན། །ལེགས་བྱེད་འགྱུར་བ་བསྟན་དུ་གསོལ། །ཐུབ་པ་
བྱང་ཆུབ་སེམས་རྣམས་ཀྱིས། །ཇི་ལྟར་བརྟག་དཀའ་ཁམས་མཐོང་འགྱུར། །ཐུབ་པ་ཇི་ལྟར་ཡི་གེ་ཡི། །ཕྱེད་ནི་རྫོགས་པར་འགྱུར་བ་ལགས། །ཇི་ལྟར་གཞད་དང་ཟལ་མོ་ཡི། །སྤྱོད་པ་དག་དང་འདྲ་བར་འགྱུར། །ཇི་ལྟར་
ཕུར་བུ་པ་བ་སངས། །ཉི་མ་དག་ཏུ་སྐྱེ་བར་འགྱུར། །ཐུབ་པ་བྱང་ཆུབ་སེམས་དཔའ་རྣམས། །ཇི་ལྟར་སེམས་ནི་མ་སྐྱེས་པར། །འདིར་ནི་འཇིགས་པ་མེད་པར་འགྱུར། །ཇི་ལྟར་ཀ་ཏའི་འབྲས་བུ་འདྲ། །ཇི་ལྟར་རྩོད་
དུས་སྐྱེས་པ་ན། །གོས་པ་མ་མཆིས་བགྱིད་པ་དང་། །ཉེས་པའི་དབྱིངས་སུ་པད་མ་ལྟར། །ཉེས་པ་དག་གིས་མི་གོས་ལགས། །ཇི་ལྟར་བྱང་ཆུབ་སེམས་དཔའ་རྣམས། །ཡུལ་ཁམས་སྨན་པ་ཆེན་པོར་འགྱུར། །ཆུ་
འགྲམ་ཀུན་ཏུ་མཉན་པར་འགྱུར། །དེ་འདིར་བདག་ལ་ལུང་བསྟན་གསོལ། །ཇི་ལྟར་སྦྲུལ་རྣམས་ལྤགས་པ་རྙིང་། །འདོར་བ་བཞིན་དུ་འགྱུར་བ་ལགས། །རིན་ཆེན་མང་པོའི་འབྱུང་གནས་དང་། །འབྲུ་དང་ཤིང་འདྲ་ཇི་

49-1-36a

ལྟར་ལགས། །བརྟན་པོ་དེ་དག་ཉན་ཐོས་དང་། །རང་སངས་རྒྱས་ཀྱི་བྱང་ཆུབ་ཀྱིས། །སྐུ་གདུང་ཇི་ལྟར་སྟོན་པར་བགྱིད། །མཐའ་ཡས་སྒོ་ཡང་ཇི་ལྟར་སྟོན། །རྒྱལ་སྲས་བརྟུལ་ཞུགས་བརྟན་པོ་རྣམས། །
ཇི་ལྟར་མི་ཕྱེད་འཁོར་དང་ལྡན། །དེ་དག་འཇིག་རྟེན་དམུས་ལོང་གི། །མིག་དང་འདྲ་བར་ཇི་ལྟར་འགྱུར། །ཐུབ་པ་ཆེན་པོ་ཇི་ལྟར་ན། །མགོ་མང་བྱེ་བ་སྟོན་པར་འགྱུར། །ཇི་ལྟར་ཟླ་བ་ཚེས་འདྲ་བར། །འཇིག་རྟེན་རྣམས་ལ་ཆོས་ཀྱང་སྟོན། །
ཇི་ལྟ་བུར་ནི་གཞའ་གསང་དུ། །ཡོངས་སུ་མྱ་ངན་འདས་པ་སྟོན། །ཇི་ལྟར་ལྷ་དང་བདུད་འདྲ་བར། །བརྟན་པོར་འགྱུར་ཞིང་དཔའ་བར་འགྱུར། །ཇི་ལྟར་ཆོས་ཀྱི་སྒོ་རྟོགས་ནས། །ཆོས་ཉིད་ཀྱང་ནི་འཚལ་བར་འགྱུར། །ཇི་ལྟར་བྱང་ཆུབ་
སེམས་དཔའ་རྣམས། །ནད་མེད་པར་ཡང་འགྱུར་བ་ལགས། །སེམས་ཅན་ཀུན་ལ་སྨན་པའི་ཕྱིར། །དེ་དག་ཇི་ལྟར་དགོངས་པ་འཆད། །ཇི་ལྟར་དགེ་བ་ལྷག་མར་བཅས། །ཇི་ལྟར་ཐེ་ཚོམ་སྤོང་བར་འགྱུར། །བློ་གྲོས་ཆེན་པོ་ཇི་ལྟར་ན། །
བྱང་ཆུབ་མཆོག་ཏུ་ཉེ་བར་འགྱུར། །ཆ་ཕྲ་གཟིགས་པ་ཁྱོད་ཉིད་ཀྱིས། །བྱང་ཆུབ་སེམས་དཔའི་སྤྱོད་པ་གསུངས། །ཆོས་རྣམས་དུ་མའི་སྒོ་དག་ཀྱང་། །འདྲེན་པ་ཁྱོད་ཀྱིས་བཀའ་སྩོལ་ཅིག །སེམས་ཅན་ཀུན་གྱི་སྨན་པ་པོ། །རྐང་གཉིས་
རྣམས་ལ་སྨན་སྟོན་ཅིག །ཐུབ་པའི་ཕུང་པོ་འདི་དག་ལས། །བདག་གིས་ཞུ་བའི་ཡུལ་མ་མཆིས། །བྱང་ཆུབ་སེམས་དཔའ་བརྟན་རྣམས་ཀྱི། །ཡུལ་ནི་ཐམས་ཅད་མཁྱེན་པ་ལགས། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་
སེམས་དཔའ་ཆེན་པོ་བྲམ་ཟེའི་རིགས་ཆེ་ཞིང་མཐོ་བའི་བུ་འོད་སྲུང་ཆེན་པོ་དང་རུས་གཅིག་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་ཇི་ལྟར་དེ་བཞིན་གཤེགས་པའི་གསང་བའི་མདོ་ཆེན་པོ་ལས་ཐམས་
ཅད་མཁྱེན་པ་དང་། ཐམས་ཅད་མཁྱེན་པ་ང་འདྲི་བར་མཛད་པ་བཞིན་དུ་འདྲི་བ་ནི་ལེགས་ཏེ་འཇིག་རྟེན་གྱི་ཁམས་གང་གཱའི་ཀླུང་མང་པོ་གྲངས་མེད་པའི་བྱེ་མ་སྙེད་ཀྱི་ཕ་རོལ་ན་ཐམས་ཅད་མཁྱེན་པ་རང་རང་གི་འཇིག་རྟེན་གྱི་ཁམས་ན་བཞུགས་

49-1-36b

པ་དག་ང་དང་ཐབས་གཅིག་ཏུ་བྱང་ཆུབ་ཀྱི་ཤིང་དྲུང་དུ་བྱང་ཆུབ་ཀྱི་ཕྱིར་རོལ་ཏེ། བྱང་ཆུབ་ཙམ་པས་དེ་བཞིན་གཤེགས་པའི་གསང་བ་བསྟན་པའི་དོན་དུ་བྱང་ཆུབ་ཀྱི་ཕྱིར་རོལ་པ་དེ་བཞིན་དུ་ཁྱོད་ཀྱང་སེམས་ཅན་ཐམས་ཅད་ལ་ཕན་པའི་ཕྱིར་ཡོན་
ཏན་མིང་གཅིག་པའི་ཚུལ་ཐམས་ཅད་མཁྱེན་པའི་ཡུལ་འདྲི་ཞིང་འདུག་གོ། །དེ་ནས་བཅོམ་ལྡན་འདས་ལ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ནི་ཐམས་ཅད་མཁྱེན་པའི་ཡུལ་ཞུ་བའི་རྔོ་
མི་ཐོག་མོད་ཀྱི་ཅུང་ཟད་ཅིག་ཞུ་བར་འཚལ་ལོ། །བཅོམ་ལྡན་འདས་དཔེར་གསོལ་ན་སྦྲང་བུས་གནམ་དང་རྒྱ་མཚོའི་ཕ་མཐར་མཆི་བ་འམ། རྒྱ་མཚོའི་ཆབ་འཚལ་བའི་རྔོ་ཐོག་པ་དེ་ནི་མི་སྲིད་ལགས་སོ། །བཅོམ་ལྡན་འདས་དེ་བཞིན་དུ་
བདག་ནི་སྦྲང་བུ་འདྲ་ལ་བཅོམ་ལྡན་འདས་ནི་ནམ་མཁའ་དང་རྒྱ་མཚོ་དང་འདྲ་ཞིང་ཡེ་ཤེས་ཟབ་མོ་ཆོས་དང་ལྡན་པ་ལགས་སོ། །བཅོམ་ལྡན་འདས་དཔེར་གསོལ་ན། རྒྱལ་པོའི་གཙུག་གི་ནོར་བུ་དཀོར་བས་རང་གི་སྤྱི་བོས་བླང་བ་དེ་བཞིན་དུ་
བདག་གིས་ཀྱང་ཆོས་བཀའ་སྩལ་པ་ཡང་དག་པར་བླང་བར་འཚལ་ན། ཤེས་རབ་རྒྱ་བསྐྱེད་པའི་སླད་དུ་བཅོམ་ལྡན་འདས་ཀྱིས་བཀའ་སྩལ་དུ་གསོལ། བཅོམ་ལྡན་འདས་ཀྱིས་མཚུངས་པ་མེད་པ་ཡོངས་སུ་བཤད་དུ་གསོལ། བདག་
ཞུ་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉོན་ཅིག །ལས་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཚེ་རིང་བར་གྱུར་པ་དང་། ལས་གང་གིས་བྱང་ཆུབ་ཀྱི་རྒྱུར་འགྱུར་བ་དེ་བཟུང་བའི་
སེམས་ཀྱིས་ཉོན་ཅིག་དང་། ལས་ཀྱི་འབྲས་བུ་དེས་ན་བྱང་ཆུབ་ཀྱི་རྒྱུ་སྐྱེ་བར་འགྱུར་རོ། །ཐོས་ནས་ཀྱང་གཞན་དག་ལ་སྟོན་ཅིག་རིགས་ཀྱི་བུ་ངས་ཀྱང་ལས་དེ་བྱས་ཤིང་གཞན་དག་ལ་ཡང་བསྟན་པས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཐོབ་པར་གྱུར་ཏོ། །རིགས་ཀྱི་བུ་དཔེར་ན་མི་ལ་ལ་ཞིག་བུ་གཅིག་པ་ཐར་བར་བྱ་བའི་ཕྱིར་རྒྱལ་པོའི་བཙོན་རའི་ནང་དུ་འགྲོ་བ་དེ་བཞིན་དུ་བྱང་ཆུབ་སེམས་དཔའ་ཚེ་རིང་བར་འདོད་པས་ཀྱང་སེམས་ཅན་ཐམས་ཅད་ལ་བུ་གཅིག་པའི་

49-1-37a

འདུ་ཤེས་བསྒོམ་པར་བྱའོ། །དེ་ལྟར་བསྒོམས་ན་འཚེ་བ་ཐམས་ཅད་སྤོང་བར་འགྱུར་ལ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་ལྡན་པར་འགྱུར་ཞིང་། 
སྲོག་གཅོད་པ་སྤོང་བར་འགྱུར་བ་དང་། ཆོས་སྤྱོད་པར་འགྱུར་རོ། །རིགས་ཀྱི་བུ་གཞན་ཡང་སེམས་ཅན་དཔག་ཏུ་མེད་པ་དག་བསླབ་པའི་གཞི་ལ་འགོད་པར་འགྱུར། དགེ་བ་བཅུའི་ལས་ཀྱི་ལམ་ལ་ཡང་འགོད་པར་འགྱུར་རོ། །གལ་
ཏེ་ནུས་ན་སེམས་ཅན་དམྱལ་བ་དང་། ལྷ་མ་ཡིན་དང་། གཤིན་རྗེའི་འཇིག་རྟེན་དང་། དུད་འགྲོར་སྐྱེ་བ་རྣམས་དང་། ལས་མི་བཟད་པ་བྱེད་པའི་སེམས་ཅན་རྣམས་ངེས་པར་བསྒྲལ་བའི་ཕྱིར་འགྲོ་བ་ཐམས་ཅད་ཀྱི་རྗེས་སུ་འཇུག་པར་
བྱེད་ཅིང་། གྲོལ་ནས་གཞན་དགྲོལ་བར་བྱའོ་སྙམ་ནས་དེ་ལ་འཛིན་པ་དང་དྲན་པའི་སེམས་དང་ལྡན་པར་འགྱུར་ཏེ། ལེགས་པར་བྱས་པའི་རྣམ་པར་སྨིན་པ་དང་། རྒྱུ་དང་འཐུན་པ་དེས་ན་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་མཆོག་ཏུ་ཚེ་རིང་བར་འགྱུར་ལ། ཡེ་ཤེས་ཀྱི་དབང་ཕྱུག་ཏུ་འགྱུར་ཞིང་འཆི་བ་མེད་པར་འགྱུར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་
གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་ཅི་ལས་བསམས་ཏེ་སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམ་པར་བགྱི། བཀའ་སྩལ་པ། དེའི་དོན་ཇི་ལྟ་བུ་ལགས། བཅོམ་ལྡན་འདས་
གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམ་པར་བགྱི་འཚལ་ན་ཚིག་དེ་ནི་མི་འདོད་པར་བགྱི་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བསྟན་པ་འདི་ལ་
སེམས་ཅན་ཁ་ཅིག་ཚུལ་ཁྲིམས་འཆལ་པ། མཚམས་མ་མཆིས་པར་བགྱིད་པ་དང་དམ་པའི་ཆོས་སུན་འབྱིན་པ་དག་ཀྱང་མཆིས་ན་ཅི་ལགས་སེམས་ཅན་དེ་ལྟ་བུ་དག་ལ་ཡང་བུ་གཅིག་པའི་འདུ་ཤེས་བསྒོམ་པར་བགྱི་ལགས་སམ། 

49-1-37b

བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་དེ་ལྟ་ལོས་ཀྱང་མོད། ང་ནི་སེམས་ཅན་ཐམས་ཅད་ལ་སྒྲ་གཅན་ཟིན་བཞིན་དུ་ལྟའོ། །འོད་སྲུང་ཆེན་པོ་དང་རུས་གཅིག་པས་གསོལ་པ། བཅོམ་ལྡན་འདས་འོ་ན་
བསྙེན་པར་རྫོགས་པའི་འཁོར་དག་པ་རྣམས་ཀྱིས་བཅྭ་ལྔའི་གསོ་སྦྱོང་ལ་བབ་པའི་ཚེ། །གཞོན་ནུ་མ་དྲངས་པ། ལུས་མ་སྦྱངས་པ། བསྙེན་པར་མ་རྫོགས་པ་ཞིག་བརྩིག་པའི་གྲྭ་ཞིག་ཏུ་ཡིབ་སྟེ་ཉན་པ་ན། ཅིའི་སླད་དུ་བཅོམ་ལྡན་
འདས་ཀྱིས་གནང་ནས་གནོད་སྦྱིན་གྱི་རྒྱལ་པོ་ལག་ན་རྡོ་རྗེས་རྡུལ་ཞིབ་མོ་བཞིན་ཕྱེ་མར་རླགས་ལགས། ཀྱེ་མ་དེས་དེ་བཀུམ་པ་ནི་ལག་ན་རྡོ་རྗེས་ཧ་ཅང་དྲགས་ལགས་སོ། །དེ་ལྟ་ན་ཇི་ལྟར་བཅོམ་ལྡན་འདས་སེམས་ཅན་ཐམས་ཅད་ལ་
སྒྲ་གཅན་ཟིན་དང་འདྲ་བར་གཟིགས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་སྐད་མ་ཟེར་ཅིག །གཞོན་ནུ་དེ་ནི་སྤྲུལ་པ་ཡིན་ཏེ། དམ་པའི་ཆོས་སུན་འབྱིན་པ་རྣམས་ཚར་གཅད་པ་དང་བསྐྲད་པར་བྱ་བའི་ཕྱིར་
གནོད་སྦྱིན་གྱི་རྒྱལ་པོ་ལག་ན་རྡོ་རྗེས་དེ་ལྟར་བསྟན་པར་ཟད་ཀྱི། དམ་པའི་ཆོས་སུན་ཕྱུང་ཡང་རུང་འདོད་ཆེན་པ་ཡང་རུང་སྟེ་གསད་དུ་མི་རུང་ངོ་། །རྒྱུ་སོགས་པའི་སྲོག་གཅོད་པ་ནི་བྱེད་མི་ཕོད་དོ། །རིགས་ཀྱི་བུ་གཞན་ཡང་ཇི་ལྟར་རྒྱལ་པོ་
འམ། བློན་པོ་ཆེན་པོ་དག་དམ་པའི་ཆོས་སུན་འབྱིན་པ་བརླག་པར་བྱེད་པ་དེ་བཞིན་དུ་ང་ནི་བརླག་པར་བྱ་ཞེས་མི་ཟེར་མོད་ཀྱི་དེ་དག་ཉིད་ཀྱི་ཆོས་མ་ཡིན་པའི་འབྲས་བུ་མངོན་སུམ་དུ་སྨིན་པར་ཟད་དོ། །དེ་བཞིན་གཤེགས་པ་ཐམས་ཅད་
མཁྱེན་པ་ནི་དེ་རྣམས་ཀྱི་དོན་དུ་མི་འཇིགས་པ་སྦྱིན་ཞིང་འོད་ཟེར་གཅིག་གམ་གཉིས་གཏོང་བར་མཛད་དེ། གལ་ཏེ་འོད་ཟེར་དེས་དེ་དག་ལ་མ་ཕོག་ན་ནི་འཆི་བར་འགྱུར་ཏེ་དེར་དེ་བཞིན་གཤེགས་པས་ཅི་བྱར་ཡང་མེད་དོ། །རིགས་ཀྱི་བུ་
གཞན་ཡང་གལ་ཏེ་ཁྱོད་ཀྱིས་བརྟག་དཀའ་བ་བལྟ་བར་ནུས་པ་ལྟ་ན་ངས་ཁྱོད་ལ་རྒྱུ་གཞན་ཡང་བསྟན་པར་བྱ་སྟེ། ཡུལ་སོ་སོ་ན་ཚུལ་ཁྲིམས་དང་ཆོ་ག་དང་ཡོན་ཏན་རྣམས་ཐ་དད་པ་ཡོད་ལ། དེར་དེ་བཞིན་གཤེགས་པ་ཡོངས་སུ་མྱ་

49-1-38a

ངན་ལས་འདས་པའི་འོག་ཏུ་དགེ་སློང་དག་དམ་པའི་ཆོས་ཁོལ་དུ་འབྱིན་པར་འདོད་པ་ལ་རྒྱལ་པོས་སྟོན་པ་མེད་པའི་ཕྱིར་གནོད་པ་བྱེད་པ་ལས་རྒྱལ་པོ་དེ་རྒྱལ་པོ་གཞན་གྱིས་བཟློག་སྟེ་དེས་མཐུ་ཆུང་བར་བྱས་ནས་རྒྱལ་པོ་དེ་
ཆོས་ལ་གནས་པར་གྱུར་ན། རྒྱལ་པོ་གཅིག་ཤོས་དེ་ལ་བསོད་ནམས་ཆེན་པོར་འགྱུར་ཞེས་ང་སྨྲའོ། །དེ་ཅིའི་ཕྱིར་ཞེ་ན། རྒྱལ་པོ་གཅིག་ཤོས་ཀྱི་ཉེས་པ་ཆེན་པོའི་གཞི་ཞི་བར་བྱེད་པའི་ཕྱིར་རོ། །རིགས་ཀྱི་བུ་གཞན་ཡང་དཔེར་ན་ཞིང་
ངམ་ཁྱིམ་དུ་དུག་ཤིང་ངམ་སྙེ་ལོང་སྐྱེས་ན་རྩ་ནས་དབྱུང་དགོས་པ་དེ་བཞིན་དུ་ཚུལ་ཁྲིམས་འཆལ་པ་རྣམས་དང་། དམ་པའི་ཆོས་སུན་འབྱིན་པ་རྣམས་བྲན་བཞིན་དུ་ཚར་གཅད་པར་ངས་གནང་ངོ་། །གང་དག་དེ་རྣམས་ཚར་གཅོད་པར་མི་
བྱེད་པ་དེ་དག་ནི་ངའི་བསྟན་པ་ལས་ཤིན་ཏུ་རིང་བ་ཡིན་ནོ། །གང་དག་དེ་རྣམས་ཚར་གཅོད་པར་བྱེད་པ་དེ་དག་ནི་ངའི་སློབ་མ་དང་། ངའི་ཉན་ཐོས་ཡིན་ནོ། །འོད་སྲུང་ཆེན་པོ་དང་རུས་གཅིག་པས་གསོལ་པ། གལ་ཏེ་དེ་བཞིན་གཤེགས་
པ་དེ་སྐད་གསུང་ན་ནི་སེམས་ཅན་ཐམས་ཅད་ལ་སྒྲ་གཅན་ཟིན་བཞིན་དུ་གཟིགས་པའང་མ་ལགས། སྟེའུ་དང་ཙན་དན་ལྟ་བུ་ཞེས་བགྱི་བའི་མིང་ཡང་རླག་པར་འགྱུར་ན་དམ་པའི་ཆོས་སུན་འབྱིན་པ་རྣམས་ཇི་ལྟར་ཚར་གཅད་པའི་རིགས་
ལགས། དེ་བཞིན་གཤེགས་པས་དེ་ལྟར་བགྱིད་དུ་སྩལ་བའི་མི་རིགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་དཔེར་ན་ཁྱིམ་བདག་གམ། ཚོང་དཔོན་ནམ། སྡེ་དཔོན་ནམ། བློན་པོའམ། 
རྒྱལ་པོ་ཡང་རུང་བ་ཞིག་གིས་རང་གི་བུ་སྡུག་ཅིང་ཕངས་ལ་མཆོག་ཏུ་མཛེས་ཤིང་བྱད་གཟུགས་ཕུན་སུམ་ཚོགས་པ་རྣམས་སློབ་དཔོན་གྱི་ལག་ཏུ་གཏད་ནས་སློབ་དཔོན་དེ་ལ་འདི་སྐད་སྨྲས་ཏེ། བདག་གི་བུ་འདི་རྣམས་འདུལ་བ་དང་། ཆོ་ག་
དང་། སྤྱོད་ཡུལ་དང་། རིག་པ་རྣམས་བསླབ་པའི་ཕྱིར་ཁྱོད་ལ་གཏད་ཀྱིས། འདི་རྣམས་ཁྱོད་ཀྱིས་འདུལ་བ་དང་། ཆོ་ག་དང་སྤྱོད་ཡུལ་དང་རིག་པ་རྣམས་སློབས་ཤིག །ཆོས་ཤིག །གལ་ཏེ་བདག་གི་བུ་འདི་བཞི་ལས་གསུམ་ནི་བརྡེག་

49-1-38b

པ་དང་། བསྡིགས་པ་དང་། ཚར་གཅད་པ་རྣམས་ཀྱིས་ཤི་བར་གྱུར་ལ། གཅིག་ནི་གསོན་པོར་འདུག་སྟེ། གཅིག་ལོགས་པར་གྱུར་ན་གསུམ་ནི་ཤི་ཡང་སླ་སྟེ། གསུམ་ནི་ཤི་གཅིག་ནི་ལོབས་པ་དེ་ལ་ཅི་སློབ་དཔོན་གྱིས་ནི་སྡིག་པ་མི་དགེ་
བའི་ལས་བྱས་ཤེས་བྱའམ། བཅོམ་ལྡན་འདས་དེ་ནི་མ་ལགས་ཏེ། དེ་ལ་ནི་གཉི་ག་ལ་ཡང་སྡིག་པའི་ལས་སུ་མི་འགྱུར་ལགས་སོ། །དེ་ཅིའི་སླད་དུ་ཞེ་ན། དེ་ལ་ནི་འཁོན་གྱི་བསམ་པ་མ་མཆིས་ཏེ། དེ་ལྟར་བགྱིས་ན་བསོད་ནམས་
མང་པོ་འཕེལ་བར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ནི་དམ་པའི་ཆོས་སུན་འབྱིན་པའི་སེམས་ཅན་རྣམས་ལ་སྒྲ་གཅན་ཟིན་བཞིན་དུ་གཟིགས་ཏེ། བུ་རྣམས་
སློབ་དཔོན་གྱི་ལག་ཏུ་གཏོད་པ་བཞིན་དུ་རྒྱལ་པོ་དང་། བློན་པོ་དང་། དགེ་བསྙེན་རྣམས་ཀྱི་ལག་ཏུ་གཏོད་པར་མཛད་དོ། །དེ་ནས་རྒྱལ་པོ་དང་། བློན་པོ་དང་། དགེ་བསྙེན་དེ་དག་གིས་བྱིས་པ་གཡེལ་བ་དེ་དག་ཚར་གཅོད་པར་བྱེད་ན། 
ཅི་དེ་ལ་དེ་བཞིན་གཤེགས་པ་ལ་སྡིག་པའི་ལས་སུ་འགྱུར་ཞེས་བྱའམ། བཅོམ་ལྡན་འདས་དེ་ནི་མ་ལགས་ཏེ། རྒྱལ་པོ་དང་། བློན་པོ་དང་། དགེ་བསྙེན་རྣམས་ལ་ཡང་སྡིག་པའི་ལས་སུ་མི་འགྱུར་ན་དེ་བཞིན་གཤེགས་པ་གོས་པ་མི་
མངའ་བ་ལྟ་ལ་གོས་པར་ག་ལ་འགྱུར་ཏེ། དེ་དག་ཉིད་ཀྱི་ཡོན་ཏན་དང་སྤྱོད་པ་བསྲུང་བའི་སླད་དུ་མི་འདོད་བཞིན་དུ་ཚར་གཅོད་པར་བས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་ན་བུ་གཅིག་པའི་འདུ་ཤེས་སྒོམ་པ་ཡིན་ཏེ། གང་
དག་དེ་ལྟར་སྒོམ་པ་དེ་དག་གིས་ནི་བུ་གཅིག་པའི་འདུ་ཤེས་བསྒོམས་པར་འགྱུར་རོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམ་པར་བྱའོ། །དེ་ལྟར་བྱས་ན་སེམས་
ཅན་ཐམས་ཅད་ལ་ཏིང་ངེ་འཛིན་བསྒོམ་པ་བསྒོམས་པར་འགྱུར་རོ། །དེས་ན་མཆོག་ཏུ་འཚེ་བ་མེད་པ་དག་པར་འགྱུར་ཏེ། དེས་ན་བྱང་ཆུབ་སེམས་དཔའ་ཚེ་རིང་བ་དང་། མཆོག་ཏུ་ཚེ་རིང་བ་དང་། ཚེ་རབས་དྲན་པར་འགྱུར་རོ། །འོད་སྲུང་

49-1-39a

ཆེན་པོ་དང་རུས་གཅིག་པས་གསོལ་པ། སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཚེ་རིང་བར་འགྱུར་ལགས་སམ། བཅོམ་ལྡན་འདས་
ཀྱིས་བཀའ་སྩལ་པ། དེ་ལྟ་ལོས་ཀྱང་མོད། འོད་སྲུང་ཆེན་པོ་དང་རུས་གཅིག་པས་གསོལ་པ། བཅོམ་ལྡན་འདས་དཔེར་གསོལ་ན་གཏམ་རྒྱུད་མཁན་ཞིག་གིས་ལྟད་མོ་པའི་འཁོར་གྱི་ནང་དུ་མ་ལ་ཕུ་དུད་བྱ་བའི་རིགས་པའི་གཏམ་སྣ་ཚོགས་
བགྱིས་ལ། རང་གི་ཁྱིམ་དུ་མཆིས་ནས་མཆོག་ཏུ་དཀའ་བ་བགྱིད་བགྱིད་པའི་མ་ལ་དབྱུག་པ་དང་། ཕག་དུམ་དང་། བོང་བ་དང་། རྡོ་དག་གིས་གནོད་པ་བགྱིད་པ་དེ་བཞིན་དུ། བཅོམ་ལྡན་འདས་ཉིད་ཀྱིས་བཀའ་སྩལ་པ། སེམས་ཅན་ཐམས་ཅད་
ལ་བུ་གཅིག་པའི་འདུ་ཤེས་བསྒོམས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཚེ་རིང་བ་དང་། མཆོག་ཏུ་ཚེ་རིང་བ་དང་། ཚེ་རབས་དྲན་པ་དང་། མི་འཆི་བ་དང་། ཐེར་ཟུག་པ་དང་། བརྟན་པར་འགྱུར་རོ་ཞེས་གསུངས་ན་ཅིའི་
སླད་དུ་བཅོམ་ལྡན་འདས་ཉིད་སྐུ་ཚེ་ཐུང་ལགས། ཅི་སླུ་བ་མཛད་དམ། འོན་ཏེ་བཅོམ་ལྡན་འདས་ཉིད་ཀྱིས་སེམས་ཅན་ཐམས་ཅད་ལ་དགྲ་བཞིན་དུ་གཟིགས་གཟིགས་སམ། ཀྱེ་མ་བཅོམ་ལྡན་འདས་ཀྱིས་ནི་དཀའ་བ་མཛད་མཛད་དོ། །
མིའི་ལྟར་རྩིས་ན་ལོ་བརྒྱ་ཡང་མི་ཐུབ་སྟེ། དེ་བཞིན་གཤེགས་པ་འདི་ཁོ་ན་ལྟར་སྐུ་ཚེ་ཐུང་བ་ལགས་ན། བཅོམ་ལྡན་འདས་ཀྱིས་སྔོན་བྱང་ཆུབ་སེམས་དཔའ་མཛད་པའི་ཚེ་དེ་སྙེད་ཀྱི་སྲོག་ཅིག་བཅད་ལགས། འདི་ཁོ་ན་ལྟར་སྐུ་ཚེ་ཐུང་བ་
ལས་ན་དེ་བཞིན་གཤེགས་པ་ཉིད་ཀྱིས་མཆོག་ཏུ་མི་བཟད་པའི་ལས་མཛད་ལགས་གྲང་། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ལ་འདི་ཁོ་ན་ལྟར་མ་རྒྱ་ཤིག་མ་རྒྱ་ཤིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་མཆོག་ཏུ་སྐུ་ཚེ་རིང་ངོ་། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་

49-1-39b

ནི་མཆོག་ཏུ་བརྟན་པའོ། །མཆོག་ཏུ་ཞི་བའོ། །མཆོག་ཏུ་ཐེར་ཟུག་པའོ། །མཆོག་ཏུ་རྟག་པའོ། །འོད་སྲུང་ཆེན་པོ་དང་རུས་གཅིག་པས་གསོལ་པ། བཅོམ་ལྡན་འདས་ཇི་ལྟར་ན་དེ་བཞིན་གཤེགས་པ་མཆོག་ཏུ་སྐུ་ཚེ་རིང་ལགས། 
བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་དཔེར་ན་ཆུ་ཀླུང་གང་གཱ་དང་། ཡ་མུ་ན་དང་། ས་ར་ཡུ་དང་། ཧིང་གུ་ལ་ལ་སོགས་པ་ཆུ་ཀླུང་ཆེན་པོ་རྣམས་དང་། ཆུ་བྲན་གཞན་རྣམས་རྒྱ་མཚོ་ཆེན་པོ་ཁོ་
ནའི་ནང་དུ་འབབ་པ་དེ་བཞིན་དུ། འོད་སྲུང་ཆེན་པོ་དང་རུས་གཅིག་པ་ལྷ་ཡུལ་དང་སའི་སྟེང་གི་ཚེའི་ཆུ་ཀླུང་ཡོད་དོ་ཅོག་ཐམས་ཅད་ནི་དེ་བཞིན་གཤེགས་པའི་རྒྱ་མཚོ་ཁོ་ནར་འབབ་སྟེ། དེ་ལྟར་ན་དེ་བཞིན་གཤེགས་པ་མཆོག་ཏུ་སྐུ་ཚེ་རིང་
ངོ་། །འོད་སྲུང་ཆེན་པོ་དང་རུས་གཅིག་པ་གཞན་ཡང་འདི་ལྟར་ཆུ་ཀླུང་ཆེན་པོ་བཞི་མ་དྲོས་པའི་ནང་ནས་འབྱུང་བ་དེ་བཞིན་དུ་ཚེ་རིང་བའི་ཚོགས་ཐམས་ཅད་ཀྱང་དེ་བཞིན་གཤེགས་པ་ལས་འབྱུང་ངོ་། །འདི་ལྟར་རྟག་པ་ཐམས་ཅད་ཀྱི་ནང་
ན་ནི་ནམ་མཁའ་མཆོག་ཏུ་རྟག་པ་ཡིན་ལ། དེ་བཞིན་གཤེགས་པ་ཡང་ནམ་མཁའ་བཞིན་དུ་རྟག་གོ། །འདི་ལྟར་ཞི་བར་བྱེད་པ་ཐམས་ཅད་ཀྱི་ནང་ན་ནི་མར་འབའ་ཞིག་མཆོག་ཏུ་ཞི་བར་བྱེད་པ་ཡིན་ལ། དེ་བཞིན་གཤེགས་པ་ཞི་བ་
དང་བསིལ་བར་གྱུར་པ་ཡང་མར་དང་འདྲ་བའི་ཆོས་སྟོན་ཏོ། །འོད་སྲུང་ཆེན་པོ་དང་རུས་གཅིག་པས་གསོལ་པ། བཅོམ་ལྡན་འདས་གལ་ཏེ་དེ་བཞིན་གཤེགས་པ་མཆོག་ཏུ་སྐུ་ཚེ་རིང་བ་ལགས་ན་སེམས་ཅན་ཐམས་ཅད་ལ་སྨན་
པའི་སླད་དུ་བཅོམ་ལྡན་འདས་བསྐལ་པའམ། བསྐལ་པ་ལས་ལྷག་པར་ཡང་ཡུན་རིང་དུ་བཞུགས་ཤིང་སྤྲིན་ཆེན་པོ་བཞིན་དུ་དམ་པའི་ཆོས་ཀྱི་ཆར་ཡང་རབ་ཏུ་དབབ་ཏུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་
ཆེན་པོ་དང་རུས་གཅིག་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་མཐར་ཐུག་པར་འགྱུར་བའི་འདུ་ཤེས་མ་སྐྱེད་ཅིག །འོད་སྲུང་ཆེན་པོ་དང་རུས་གཅིག་པ་འདི་ན་དགེ་སློང་ངམ། 

49-1-40a

དགེ་སློང་མ་འམ། དགེ་བསྙེན་ནམ། དགེ་བསྙེན་མ་འམ་འདི་ལས་ཕྱི་རོལ་ཡང་རུང་སྟེ། མངོན་པར་ཤེས་པ་ལྔ་ལ་དབང་ཐོབ་པ་དེ་ཡང་བསྐལ་པའམ་བསྐལ་པ་ལས་ལྷག་པར་གནས་ཤིང་ནམ་མཁའ་ལ་འཆག་པར་ཡང་བྱེད། 
ཉལ་བར་ཡང་བྱེད་ལ། མཆན་གཡོན་ལོགས་ནས་མེ་དང་འདྲ་བར་འབར་བར་བྱེད་པ་དང་། དེ་བཞིན་དུ་ཆོས་གཞན་དུ་དུད་པ་འཐུལ་བ་ལྟ་བུར་ཡང་སྟོན། ཚེའི་ཚད་ཀྱང་ཇི་སྲིད་དུ་འདོད་པ་དེ་སྲིད་དུ་སྣུར་བར་བྱེད་དོ། །མདོར་ན་ཇི་ཙམ་དུ་འདོད་པ་དང་། 
ཇི་ཙམ་དུ་དགའ་བ་དེ་ཙམ་དུ་སྟོན་པར་བྱེད་དེ་འདི་དག་ནི་མངོན་པར་ཤེས་པ་ལྔ་ལ་དབང་ཐོབ་པའི་ཡོན་ཏན་ཡིན་ནོ། །གལ་ཏེ་མངོན་པར་ཤེས་པ་ལྔ་ཐོབ་པ་ཡང་དེ་ལྟར་བདག་ཉིད་འཚོ་བའི་དབང་ཕྱུག་ལ་དབང་བྱེད་ན་དེ་བཞིན་གཤེགས་པ་དབང་དུ་མ་བརྙེས་
པ་ལྟ་ཅི་སྟེ་དེ་ལྟ་བུ་ལ་མངའ་མི་མཛད། དེ་བཞིན་གཤེགས་པ་བསྐལ་པའམ། བསྐལ་པ་ལས་ལྷག་པར་ཅི་སྟེ་མི་བཞུགས་ཀྱིས། དེ་བཞིན་གཤེགས་པ་རྟག་པ་དང་། བརྟན་པ་དང་། ཐེར་ཟུག་པ་ཡིན་པར་ཁོང་དུ་ཆུད་པར་གྱིས་ཤིག །འཇིག་
རྟེན་འདི་ན་སྤྲུལ་པའི་ལུས་ནི་ཤའི་ལུས་མ་ཡིན་ཏེ། དེང་དེ་བཞིན་གཤེགས་པ་དུག་སྨན་ལ་རྟོན་པའི་སྐུ་ཡོངས་སུ་འདོར་བར་མཛད་དོ་སྙམ་དུ་ཡང་ཁོང་དུ་ཆུད་པར་གྱིས་ཤིག །རྟག་པ་དང་། བརྟན་པ་དང་ཐེར་ཟུག་ཅེས་བྱ་བའི་བསྟན་པ་མཆོག་
ལ་ཡང་བརྩོན་པར་གྱིས་ཤིག །འོད་སྲུང་ཆེན་པོ་དང་རུས་གཅིག་པས་གསོལ་པ། གལ་ཏེ་དེ་བཞིན་གཤེགས་པ་རྟག་པ་ལགས་ན་འཇིག་རྟེན་པ་དང་འཇིག་རྟེན་ལས་འདས་པར་ཁྱད་པར་ཅི་མཆིས་ལགས། འཇིག་རྟེན་པ་ཡང་བདག་ཅག་གི་
ཚངས་པ་ནི་རྟག་པ་སྟེ་ཐོག་མའི་དུས་ནས་བྱུང་བ་ཡིན་ནོ་ཞེས་མཆི་བ་དང་ཁྱད་པར་ཅི་མཆིས། གལ་ཏེ་དེ་བཞིན་གཤེགས་པ་རྟག་པ་ལགས་ན་ཁྱད་པར་མ་མཆིས་པར་འགྱུར་ལགས་སོ།། །། བམ་པོ་བཞི་པ། 
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེར་ན་ཚོང་དཔོན་ནམ་ཁྱིམ་བདག་གཅིག་ལ་བ་ལང་སྣ་ཚོགས་སྤུ་མདོག་དུ་མ་རིགས་དང་རྒྱུད་མང་པོ་ཁྱུ་གཅིག་ཅིང་ལྷས་གཅིག་པ་དུ་མ་བྱེ་བ་སྙེད་ཡོད་ལ། དེས་བ་ལང་དེ་དག་བ་ལང་རྫིའི་

49-1-40b

ལག་ཏུ་གཏད་དེ་མར་ཞིམ་པོ་ཟ་ལ། བ་ལང་རྫི་རྣམས་ཀྱང་ལྷས་སྐྱོང་ཞིང་ཞོ་དང་འོ་མ་བསྲུབས་པ་ལས་ཕྱི་ཞིག་ན་བ་ལང་གི་བདག་པོ་དེ་རང་གི་ཚེ་ཟད་ནས་ཤི་སྟེ། ཤི་བའི་འོག་ཏུ་ནགས་ན་རྒྱུ་བའི་ཆོམ་ཤོད་ཀྱིས་བ་ལང་དེ་དག་ཕྲོགས་ནས་དེ་དག་ཆུང་མ་
མེད་པས་རང་རང་གིས་འོ་མ་བསྲུབས་ཏེ། དེ་དག་གིས་བསྲུབས་པ་ལས་འོ་མ་ཡིན་པའི་ཕྱིར་འོ་མ་དེ་དག་ལས་མར་གྱི་དྲི་ཡང་མི་བྲོ་ལ་ཞོར་ཡང་མ་རུང་། དར་བར་ཡང་མ་རུང་། པྲིས་མར་ཡང་མ་རུང་ན་མར་དུ་ལྟ་ག་ལ་འགྱུར་ཏེ། འོ་མའི་རང་བཞིན་
ལས་ཀྱང་ཉམས་ནས་དེ་དག་གིས་དེ་ཆུས་བསླད་དེ་བདག་གིས་མར་ལོངས་སྤྱད་པར་བྱའོ། །བདག་གིས་མར་ལོངས་སྤྱད་པར་བྱའོ་སྙམ་དུ་སེམས་པ་བཞིན་དུ་འཇིག་རྟེན་པ་སངས་རྒྱས་ཀྱི་ཆོས་ཀྱི་རྒྱུ་འཐུན་པ་ལས་བྱུང་བ་ནོར་དང་ཆོས་རྒྱས་པ་རྣམས་
ཀྱང་དེ་དང་འདྲ་སྟེ། གང་གི་ཚེ་སངས་རྒྱས་བཅོམ་ལྡན་འདས་རྣམས་བ་ལང་གི་ལྷས་ཀྱི་བདག་པོ་བཞིན་དུ་ཡོངས་སུ་མྱ་ངན་ལས་འདས་པའི་འོག་ཏུ་འཇིག་རྟེན་པ་ཆོམ་ཤོད་དང་འདྲ་བ་རྣམས་ཀྱིས་ཀྱང་ཚུལ་ཁྲིམས་དང་ཆོ་ག་དང་འདུལ་བ་དང་། སྤྱོད་
ཡུལ་རྣམས་དང་། སེམས་ཅན་གྱི་ཁམས་རྣམས་གུད་དུ་བསྒྱུར་ནས་སེམས་ཅན་ཡོད་དོ། །སྲོག་ཡོད་དོ། །གང་ཟག་ཡོད་དོ་སྙམ་དུ་སེམས་ཤིང་ཐར་པ་ནི་འདི་ལྟ་བུ་ཞིག་གོ། །སྤྱོད་པ་ནི་འདི་ལྟ་བུ་ཞིག་གོ་སྙམ་ནས་སྤྱོད་པ་དང་། སེམས་ཅན་དང་། 
ཐར་པ་དང་རྟག་པ་དང་། དེ་ཁོ་ན་ཉིད་མ་ཤེས་ཏེ། དོན་གཞན་ལ་བརྩོན་པས་ཐར་པ་ཡང་མི་ཐོབ་ལ། ཚུལ་ཁྲིམས་དང་ཆོ་ག་དང་སྤྱོད་ཡུལ་དང་འདུལ་བ་དང་རྟག་པ་དང་དེ་ཁོ་ན་ཉིད་ཀྱང་མི་རྙེད་དེ། མི་རྒོད་ཀྱི་མར་བཞིན་དུ་འཇིག་རྟེན་པ་རྣམས་ཀྱིས་
ཆོས་ཀྱི་དེ་ཁོ་ན་ཉིད་མི་འཐོབ་ལ། དེ་དག་སེམས་ཅན་ཚངས་པས་སྤྲུལ་པ་ནི་རྟག་གོ་སྙམ་དུ་འཛིན་ཅིང་བདག་གི་ནི་ཐར་པ་ཡིན་ནོ་སྙམ་དུ་ཡང་འཛིན་ལ། ཆོམ་ཤོད་པ་རྣམས་ཀྱི་འོ་མ་བཞིན་དུ་དེ་ཁོ་ན་ཉིད་ནི་མི་ཤེས་སོ། །དེ་དག་ཚངས་པར་སྤྱོད་པའི་
རྒྱུ་དང་། གཞན་གྱི་ཆུང་མ་སྤངས་པའི་རྒྱུ་དང་། ཕ་མ་ལ་ཕུ་དུད་བྱས་པའི་རྒྱུས་ན། ཆོམ་ཤོད་པ་རྣམས་ཀྱི་འོ་མ་མ་རུང་བའི་ལྷག་མ་ཙམ་ཞིག་ཡོད་པ་བཞིན་དུ་མཐོ་རིས་ཀྱི་བདེ་བ་ཤས་ཤས་ཙམ་ཞིག་ཐོབ་སྟེ་ལོངས་སྤྱོད་པར་བྱེད་ལ། དེ་དག་གིས་

49-1-41a

ཕ་མ་ལ་ཕུ་དུད་བྱ་བ་ཇི་ལྟ་བུ་ཡིན་པ་ཡང་མི་ཤེས། གསུམ་ལ་སྐྱབས་སུ་འགྲོ་བ་ཇི་ལྟ་བུ་ཡིན་པ་ཡང་མི་ཤེས། གཞན་གྱི་ཆུང་མ་སྤང་བ་ཇི་ལྟ་བུ་ཡིན་པ་ཡང་མི་ཤེས། རྟག་པ་ཇི་ལྟ་བུ་ཡིན་པ་ཡང་མི་ཤེས་སོ། །དེ་ལ་སངས་
རྒྱས་ཀྱི་སྤྲུལ་པ་ནི་མི་རྟག་པ་ཡིན། བརྫུན་པ་ཡིན་ཏེ། དེས་ན་འཇིག་རྟེན་པ་རྣམས་དེ་བཞིན་གཤེགས་པ་མི་རྟག་གོ་མི་བརྟན་ནོ་སྙམ་དུ་འཛིན་ཏེ། དེ་བས་ན་མི་རྟག་པའི་གཉེན་པོར་དེ་བཞིན་གཤེགས་པ་རྟག་གོ་ཞེས་བྱ་བ་ལ་བརྩོན་པར་བྱའོ། །རིགས་
ཀྱི་བུ་དེ་ནས་བ་ལང་གི་ལྷས་དེའི་སྐལ་བ་ཅན་གྱི་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ལ་ཆོམ་ཤོད་པ་དེ་དག་གིས་ཀྱང་འཁོར་ལོས་སྒྱུར་བའི་རྒྱལ་པོའི་བསོད་ནམས་ཀྱི་མཐུས་དེ་བ་ལང་གཅིག་ཀྱང་མེད་པར་མི་བྱེད་དོ། །དེ་ནས་ནགས་ན་
རྒྱུ་བའི་ཆོམ་ཤོད་པ་དེ་དག་གིས་བ་ལང་གི་ལྷས་དེ་བོར་ཏེ་འགྲོ་བར་འགྱུར་རོ། །དེ་ནས་འཁོར་ལོས་སྒྱུར་བའི་རྒྱལ་པོའི་ཁྱིམ་བདག་རིན་པོ་ཆེས་བ་ལང་གི་ལྷས་དེ་ཉམས་སུ་ལེན་པར་འགྱུར་ཏེ། ཁྱིམ་བདག་རིན་པོ་ཆེ་དེས་རང་གི་བློས་བ་ལང་གི་ལྷས་
དེའི་འོ་མའི་དེ་ཁོ་ན་ཉིད་ཀྱི་ཐབས་ཤེས་པར་འགྱུར་ལ། བ་རྣམས་ཀྱི་འོ་མ་ཡང་འཁོར་ལོས་སྒྱུར་བའི་རྒྱལ་པོའི་བསོད་ནམས་ཀྱིས་ཉིས་འགྱུར་དུ་བཞོར་ཡོད་པར་འགྱུར་བ་དེ་བཞིན་དུ་ཆོས་ཀྱི་འཁོར་ལོས་སྒྱུར་བའི་སངས་རྒྱས་འཇིག་རྟེན་དུ་བྱུང་ནས། 
བ་ལང་གི་ལྷས་དང་འདྲ་བའི་འཇིག་རྟེན་པ་ཐམས་ཅད་ཡོངས་སུ་འཛིན་པར་མཛད་ན་རྟག་པའི་སྒྲ་ནི་དེ་བཞིན་གཤེགས་པ་འབའ་ཤིག་གི་རྗེས་སུ་འཐུན་གྱི། འཇིག་རྟེན་པ་ཆོམ་ཤོད་དང་འདྲ་བ་རྣམས་ཀྱིས་ནི་སངས་རྒྱས་ཀྱི་སྒྲ་དང་རྟགས་ཀྱིས་
གནས་ཀྱང་ཐོབ་པར་མི་འགྱུར་རོ། །དེ་བཞིན་གཤེགས་པའི་ཉན་ཐོས་རྣམས་ནི་ཁྱིམ་བདག་རིན་པོ་ཆེ་བཞིན་དུ་དམ་པའི་ཆོས་ཀྱི་བ་ལང་གི་ལྷས་ཉམས་སུ་ལེན་པར་བྱེད་དེ། སེམས་ཅན་བསོད་ནམས་དང་ལྡན་པ་རྣམས་ཀྱི་དོན་དུ་ཆོས་ཀྱི་
འོ་མ་འཇོ་བར་བྱེད་དོ། །རིགས་ཀྱི་བུ་རྒྱུ་དེས་ན་དེ་བཞིན་གཤེགས་པ་རྟག་པ་དང་། བརྟན་པ་དང་ཐེར་ཟུག་པ་ཡིན་ལ། འཇིག་རྟེན་པ་རྣམས་ལ་ནི་རྟག་པའི་ཆོས་མེད་དེ། རྟག་པའི་སྒྲ་དེ་ནི་དེ་བཞིན་གཤེགས་པ་སངས་རྒྱས་རྣམས་འབའ་

49-1-41b

ཤིག་ལ་ཡོད་ཅེས་ང་ཟེར་རོ། །ད་ལྟར་ན་རིགས་ཀྱི་བུའམ། རིགས་ཀྱི་བུ་མོ་རྣམས་ཀྱིས་སངས་རྒྱས་བཅོམ་ལྡན་འདས་ནི་རྟག་པའོ། །སངས་རྒྱས་བཅོམ་ལྡན་འདས་ནི་ཐེར་ཟུག་པའོ་ཞེས་དེ་ལྟར་ཤེས་པར་གྱིས་ཤིག །སེམས་ཅན་གང་དག་
རྟག་ཅེས་བྱ་བའི་ཡི་གེ་གཉིས་སྒོམ་པ་དེ་དག་ནི་རིང་པོ་མི་ཐོགས་པ་ཁོ་ན་ངའི་གོ་འཕང་དང་ལྷག་ཆད་མེད་པ་ཐོབ་པར་འགྱུར་རོ། །རིགས་ཀྱི་བུ་གང་གི་ཚེ་རྟག་གོ་ཞེས་བྱ་བའི་ཡི་གེ་གཉིས་སྒོམ་པ་ནུབ་པར་འགྱུར་བ་དེའི་ཚེ་དེ་བཞིན་གཤེགས་པ་
ཡོངས་སུ་མྱ་ངན་ལས་འདའ་བར་འགྱུར་ཏེ། དེ་ནི་སངས་རྒྱས་རྣམས་ཀྱི་ཆོས་ཉིད་དོ། །གསོལ་པ། སངས་རྒྱས་རྣམས་ཀྱི་ཆོས་ཉིད་ཅེས་བཀའ་སྩལ་པ་དེའི་དོན་ཅི་ལགས། བཅོམ་ལྡན་འདས་བདག་ནི་ཆོས་གླེངས་པ་འདི་རྟོགས་པར་
འཚལ་ན། བཅོམ་ལྡན་འདས་ཀྱིས་ཚིག་འདི་ཇི་ལྟ་བུ་ལགས་པ་རྒྱས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཆོས་ཉིད་ཅེས་བྱ་བ་ནི་ལུས་ཡོངས་སུ་འདོར་བ་སྟེ། ལུས་ཡོངས་སུ་འདོར་བ་ཞེས་བྱ་བ་དེ་ནི་སྨད་པའི་
ཚིག་ཡིན་པར་ཤེས་པར་གྱིས་ཤིག །གསོལ་པ། དེ་བཞིན་གཤེགས་པས་སྐུ་བོར་ནས་སླར་ཡང་སྐུ་ལེན་ཏམ་མི་ལེན་པ་བདག་ཞུ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་སྐད་མ་ཟེར་ཅིག །འདི་ནི་ཆོས་ཉིད་
དཔྱོད་པ་ཡིན་ཏེ། རིགས་ཀྱི་བུ་དཔེར་ན་འདུ་ཤེས་མེད་པ་རྣམས་ལ་གཟུགས་ཀྱི་ཕུང་པོ་དང་། འདུ་ཤེས་ཀྱི་ཕུང་པོ་གཉིས་མེད་ན་སེམས་ཅན་དེ་དག་ཇི་ལྟར་གནས། ཇི་ལྟར་གདའ། ཇི་ལྟར་སྣང་། དེ་དག་གི་འདུ་ཤེས་ཇི་ལྟར་འཇུག་ཅེས་འདྲི་
བ་འདི་ནི་སངས་རྒྱས་ཀྱི་ཡུལ་ཡིན་ནོ། །རིགས་ཀྱི་བུ་འདུ་ཤེས་མེད་པའི་ལྷ་རྣམས་ཀྱི་གཟུགས་དང་། གནས་དང་སྤྱོད་ལམ་དང་བདེ་བ་རྣམས་ཇི་ལྟར་བསྟན་པར་བྱ་ཞེས་ཕྱིན་ཆད་དེ་སྐད་མ་འདྲི་ཤིག །འདི་ནི་ཉན་ཐོས་དང་རང་སངས་རྒྱས་ཀྱི་ཡུལ་
མ་ཡིན་ཏེ། འདི་ནི་སངས་རྒྱས་ཀྱི་སྤྱོད་ཡུལ་ཡིན་ནོ། །རིགས་ཀྱི་བུ་དེ་ལྟར་ན་དེ་བཞིན་གཤེགས་པའི་སྐུ་ནི་སངས་རྒྱས་འབའ་ཤིག་གི་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱི་ཡུལ་མ་ཡིན་ནོ། །དེ་བཞིན་གཤེགས་པ་གང་ན་

49-1-42a

གནས་པ་དང་། གང་ན་སྣང་བ་ནི་ཁྱོད་ཀྱི་ཡུལ་ཡང་མ་ཡིན་གྱིས། སངས་རྒྱས་བཅོམ་ལྡན་འདས་ནི་ཐབས་བསམ་གྱིས་མི་ཁྱབ་པའི་སྐུ་ཡིན་ནོ་སྙམ་དུ་ཁྱེད་ཀྱིས་གནས་པར་གྱིས་ཤིག །རིགས་ཀྱི་བུ་ཆོས་དང་དགེ་སློང་
གི་དགེ་འདུན་ལ་ཡང་རྟག་པའི་འདུ་ཤེས་ཡང་དང་ཡང་དུ་བསྒོམ་པར་གྱིས་ཤིག །གཞི་གསུམ་ལ་ཐ་དད་པར་མ་བྱེད་ཅིག །མི་རྟག་པའམ། མི་བརྟན་པའམ། ཐེར་ཟུག་པ་མ་ཡིན་པ་འམ། ཞི་བ་མ་ཡིན་པའམ། ཐར་པ་མ་ཡིན་པའི་རྣམ་པར་
ཡང་མ་སྒོམ་ཤིག ། རིགས་ཀྱི་བུ་འམ་རིགས་ཀྱི་བུ་མོ་གང་དག་གཞི་གསུམ་གྱི་བདག་ཉིད་ཆེན་པོ་ལ་དེ་ལྟར་མི་སྒོམ་པ་དེ་དག་གི་སྐྱབས་སུ་འགྲོ་བ་ནི་དག་པ་ཡིན་ནོ་ཞེས་ང་ཟེར་རོ། །དེ་ལྟར་ན་རྟག་པ་བསྒོམ་པ་ནི་བསམ་གྱིས་མི་ཁྱབ་སྟེ། རིགས་ཀྱི་
བུ་དཔེར་ན་ཤིང་ཡོད་ན་གྲིབ་མ་ཡོད་ཀྱི། ཤིང་མེད་ན་གྲིབ་མ་མེད་པ་དེ་བཞིན་དུ་དེ་བཞིན་གཤེགས་པ་རྟག་པ་དང་སྐྱབས་སུ་འགྱུར་གྱི། གལ་ཏེ་མི་རྟག་ན་ལྷ་དང་མི་རྣམས་ཀྱི་སྐྱབས་སུ་འོས་པ་མ་ཡིན་ནོ། །གསོལ་པ། བཅོམ་ལྡན་འདས་ཅི་
ལགས། མཚན་མོ་མུན་པའི་ནང་ན་ཤིང་ལྗོན་པའི་གྲིབ་མ་སྣང་ཞེས་བགྱི་འམ་མི་སྣང་ཞེས་བགྱི། བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་ཤིང་ལྗོན་པ་ཡོད་པའི་གྲིབ་མ་ཅིའི་ཕྱིར་མེད་ཅེས་བརྗོད་པར་བྱའོ། །དེ་ལྟ་མོད་ཀྱི་ཤའི་
མིག་གིས་ནི་མི་མཐོང་སྟེ། དེ་བཞིན་དུ་དེ་བཞིན་གཤེགས་པ་ཡང་རྟག་པ་དང་། བརྟན་པ་དང་། ཐེར་ཟུག་པ་ཡིན་ཏེ། ཐེར་ཟུག་པ་ཡིན་གྱིས་ཀྱང་མཚན་མོ་མུན་པའི་ནང་ན་ཤིང་ལྗོན་པའི་གྲིབ་མ་ཤའི་མིག་གིས་མི་མཐོང་བ་དེ་བཞིན་དུ་དེ་
བཞིན་གཤེགས་པ་ཡོངས་སུ་མྱ་ངན་ལས་འདའ་བར་མཛད་པས་རྟག་པ་དང་། བརྟན་པ་དང་། ཐེར་ཟུག་པ་ཡིན་བཞིན་དུ་མཚན་མོ་མུན་པའི་ནང་ན་ཤིང་ལྗོན་པའི་གྲིབ་མ་བལྟར་མི་སྣང་བས་སེམས་ཅན་རྣམས་དེ་བཞིན་གཤེགས་པ་མི་རྟག་གོ་
སྙམ་དུ་ཡོངས་སུ་རྟོག་གོ། །གལ་ཏེ་ང་དང་ཆོས་དང་། དགེ་འདུན་རྟག་པའི་འདུ་ཤེས་ཁྱོད་ཀྱི་ཕ་མ་ལ་མེད་ན་གསུམ་ལ་སྐྱབས་སུ་འགྲོ་བ་མ་དག་གོ་ཞེས་ང་ཟེར་རོ། །ཕ་མ་གཉིས་ལ་གཞི་གསུམ་རྟག་པར་བསྟན་ན་ནི་བྱང་ཆུབ་སེམས་དཔའ་སེམས་

49-1-42b

དཔའ་ཆེན་པོ་གསུམ་ལ་སྐྱབས་སུ་སོང་བའི་དགེ་བསྙེན་ཅེས་བྱ་བའི་མིང་ཁྱོད་ཀྱིས་ཐོབ་པར་འགྱུར་རོ། །གསོལ་པ། དེང་སླན་ཆད་བདུན་རྒྱུད་ཀྱི་རིགས་ཚུན་ཆད་དང་། ཕ་མ་གཉིས་ལ་བཅོམ་ལྡན་འདས་དང་། ཆོས་དང་དགེ་འདུན་རྟག་གོ་
ཞེས་བགྱི་བར་འཚལ་ལོ། །ཀྱེ་མ་སངས་རྒྱས་བཅོམ་ལྡན་འདས་ནི་བསམ་གྱིས་མི་ཁྱབ་བོ་ཞེས་ཀྱང་བསླབ་པར་འཚལ་ལོ། །གཞན་དག་ལ་ཡང་བསྟན་པར་འཚལ་ལོ། །གང་དག་བདག་གིས་བསྟན་པ་ལྟར་མི་འཛིན་ཅིང་མི་རྟག་པར་སྨྲ་
བའི་སེམས་ཅན་ངན་པ་དེ་དག་ལ་ནི་བདག་གིས་སེར་བ་བཞིན་དུ་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །དམ་པའི་ཆོས་སྲུང་བའི་རིགས་ཀྱི་བུས་ནི་དེ་ལྟར་བྱ་དགོས་ཏེ། རིགས་ཀྱི་བུ་ཁྱོད་ལེགས་
སོ། །དེ་ལྟར་ན་འཚེ་བ་མེད་པ་ལ་ཞུགས་པ་ཡིན་ཏེ། འཚེ་བ་མེད་པའི་ལས་ཀྱི་འབྲས་བུ་ཆེན་པོ་དེས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཚེ་ཡང་རིང་བར་འགྱུར་ལ། ཚེ་རབས་ཀྱང་དྲན་པར་འགྱུར་རོ། །འཚེ་བ་མེད་པའི་ཕུང་
པོ་སྟེ་དང་པོའོ།། །། རིགས་ཀྱི་བུ་ད་ནི་དེ་བཞིན་གཤེགས་པ་རྟག་པའི་སྐུ་དང་མི་ཤིགས་པའི་སྐུ་དང་། རྡོ་རྗེའི་སྐུ་དང་། ཤའི་སྐུ་མ་ཡིན་པ་དང་། ཆོས་ཀྱི་སྐུར་ལྟོས་ཤིག །གསོལ་པ། གལ་ཏེ་དེ་བཞིན་གཤེགས་པ་
ཡོངས་སུ་མྱ་ངན་ལས་འདའ་བར་མཛད་ན་ནི་བདག་དེ་ལྟར་མི་ལྟ་ལགས་སོ། །གལ་ཏེ་ཡོངས་སུ་མྱ་ངན་ལས་འདའ་བར་གྱུར་ན་གཞིག་ཏུ་རུང་བའི་སྐུ་དང་། ཐལ་བའི་སྐུ་དང་། ཤའི་སྐུར་བལྟ་བར་འཚལ་ལོ། །བཀའ་སྩལ་པ། རིགས་ཀྱི་བུ་མིའི་
ལྟ་བུར་སོབ་སོབ་པོའི་ལུས་དང་གཞིག་ཏུ་རུང་བའི་ལུས་ཤེས་དེ་སྐད་མ་ཟེར་ཅིག །འོད་སྲུང་ཆེན་པོ་དང་རུས་གཅིག་པ་དེ་བཞིན་གཤེགས་པ་ནི་བསྐལ་པ་བྱེ་བ་ཕྲག་དུ་མ་ནས་མི་ཤིགས་པའི་སྐུ་དང་ལྡན་ཞིང་མིའི་ལུས་མ་ཡིན། ལྷའི་ལུས་མ་
ཡིན། སྲིད་པ་ཐམས་ཅད་ཀྱི་ལུས་མ་ཡིན། ཤའི་ལུས་མ་ཡིན་ཏེ། དེ་བཞིན་གཤེགས་པའི་སྐུ་ནི་ལུས་མེད་པ། མ་སྐྱེས་པ་མ་འགགས་པ། ཡོད་པ་མ་ཡིན་པ། འཇུག་པ་མེད་པ། མཐར་ཐུག་པ་མེད་པ། གནས་པ་མེད་པ། རྣམ་པར་

49-1-43a

ཤེས་པ་མེད་པ། ཀུན་ཏུ་སྤྱོད་པ་མེད་པ། ཤིན་ཏུ་དག་པ། ཅི་ཡང་མ་ཡིན་པ། ཟིན་པ་མ་ཡིན་པ། རྐང་པ་མེད་པ། གནས་པ་མེད་པ། འགྱུར་བ་མེད་པ། མྱོང་བ་མེད་པ། མ་འདྲེས་པ། མི་ཤེས་པ། ཤེས་
པར་བྱར་མེད་པ། རྣམ་པར་རིག་ཏུ་མི་བཟོད་པ། བསམ་གྱིས་མི་ཁྱབ་པ། བསམ་དུ་མེད་པ་རྣམ་པར་ཤེས་པ་མེད་པ། སེམས་དང་བྲལ་བ། སེམས་མཉམ་པ་ཉིད། སེམས་མཉམ་པ་ཉིད་དུ་འགྲོ་བ། འབབ་པ་མེད་པ། འོང་བ་དང་། འགྲོ་བ་
ཡོངས་སུ་ཆད་པ། མ་བཅད་པ། གཅད་དུ་མེད་པ། གླགས་མེད་པ། རྫས་མ་ཡིན་པ། མ་བྱུང་བ། སྤྱོད་པ་མེད་པ། རྟོག་པ་མེད་པ། མིང་མེད་པ། ཡོངས་སུ་མ་གྲུབ་པ། མྱོང་བ་མ་ཡིན་པ། མི་མངོན་པ། ཡུལ་མེད་པ། གཞི་མེད་པ། མུན་པ་
མེད་པ། སྣང་བ་མེད་པ། ཞི་བ་མ་ཡིན་པ། རབ་ཏུ་ཞི་བ་མ་ཡིན་པ། ཞི་བ་དང་བྲལ་བ། དག་པ། རྣམ་པར་དག་པ། ཅི་ཡང་མེད་པ། ལེན་པ་མེད་པ། ཆགས་པ་མེད་པ། ཉོན་མོངས་པ་མེད་པ། ཉོན་མོངས་པ་དང་བྲལ་བ། མི་གནས་པའི་ཚུལ་གྱིས་
གནས་པ། གཟུང་དུ་མེད་པ། འཕོ་བ་མེད་པ། འཕོ་བར་བྱར་མེད་པ། ཆོས་མ་ཡིན་པ། ཆོས་མ་ཡིན་པ་མེད་པ། ཞིང་མ་ཡིན་པ། ཞིང་དུ་མ་གྱུར་པ་མ་ཡིན་པ། མི་ཟད་པ། ཟད་པར་བྱར་མེད་པ། ཟད་པ་དང་བྲལ་བ། ཟད་པ་མེད་པ། 
སྐད་ཅིག་པ། སྐད་ཅིག་པ་དང་བྲལ་བ། སྐད་ཅིག་པ་མ་ཡིན་པ། མ་འཁྲུགས་པ། ཡི་གེ་དང་ཐིག་ལེ་ཡོངས་སུ་སྤངས་པ། སྒྲ་ཡོངས་སུ་སྤངས་པ། བཤད་པ་ཡོངས་སུ་སྤངས་པ། བསྒོམ་པ་ཡོངས་སུ་སྤངས་པ། བསམ་པ་ཡོངས་སུ་སྤངས་
པ། ལྡན་པ་མ་ཡིན་པ། མི་ལྡན་པ་མ་ཡིན་པ། ཚད་མེད་པ། ཚད་མེད་པ་མ་ཡིན་པ། འགྲོ་བ་མེད་པ། འོང་བ་མེད་པ། གཉིས་སུ་མེད་པ། རྩོམ་པ་མེད་པ། ནུས་པ་མེད་པ། མཚན་མེད་པ། མཚན་གྱིས་རྟོགས་པར་བྱར་མེད་པ། མཚན་
གྱིས་བརྒྱན་པ། ཤིན་ཏུ་བརྟན་པ། ཤིན་ཏུ་ཞི་བ། གདུང་བ་དང་བྲལ་བ། ལྟུང་བར་མི་བྱེད་པ། བལྟར་མེད་པ། རྗེས་སུ་ཕྱེ་བ། དེ་བཞིན་ཉིད། དེ་ཁོ་ན་ཉིད། སྒྲོལ་བ་མེད་པའི་ཚུལ་གྱིས་སེམས་ཅན་ཐམས་ཅད་སྒྲོལ་བ། ཐར་པར་བྱེད་པ་མེད་

49-1-43b

པའི་ཚུལ་གྱིས་ཐར་པར་བྱེད་པ། དག་པར་བྱེད་པ་མེད་པའི་ཚུལ་གྱིས་དག་པར་བྱེད་པ། གྲོལ་བར་བྱེད་པ་མེད་པའི་ཚུལ་གྱིས་གྲོལ་བར་བྱེད་པ། སྟོན་པ་པོ་གཉིས་སུ་མེད་པའི་ཚུལ་གྱིས་སྟོན་པ་པོ་མཉམ་པ། མཉམ་པ་མེད་པ་དང་མཉམ་པ། 
དཔག་ཏུ་མེད་པ་དང་མཉམ་པ། ནམ་མཁའ་དང་མཉམ་པ། གནས་མེད་པ་དང་མཉམ་པ། སྐྱེ་བ་མེད་པ་དང་མཉམ་པ། དམིགས་སུ་མེད་པ་དང་མཉམ་པ། མཉམ་པ་མེད་པ་དང་མཉམ་པར་གྱུར་པ། ཞི་བ་རབ་ཏུ་ཞི་བ་ཉེ་བར་ཞི་བ་རྟེན་
མེད་པ། ཚད་མེད་པ་སྤྱོད་པ་སྒྱུར་བ། མི་ལྡོག་པར་ངེས་པར་འཛིན་པ་ཐམས་ཅད་བཅད་པ། ཕུལ་བ་མེད་པ། གཉིས་སུ་མེད་པ་སྟོན་པ། རྣམ་པར་རིག་པར་བྱེད་པ་མེད་པའི་ཚུལ་དང་། སྦྱོར་བ་མེད་པའི་ཚུལ་གྱིས་རང་བཞིན་གྱི་ངོ་བོ་
ཉིད། རིང་པོ་མ་ཡིན་པ། ཟླུམ་པོ་མ་ཡིན་པ་ཕུང་པོས་རབ་ཏུ་ཕྱེ་བ་མ་ཡིན་པ། ཁམས་ཀྱིས་རབ་ཏུ་ཕྱེ་བ་མ་ཡིན་པ། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན་པ། འདུས་བྱས་ཀྱི་རྣམ་པར་རྟོག་པ་མེད་པ། འདུས་བྱས་ཀྱི་རྣམ་པར་རྟོག་པའི་
གནས་མེད་པ། འཕེལ་བ་མེད་པ། འགྲིབ་པ་མེད་པ། གཞལ་དུ་མེད་པ། གཞལ་དུ་མེད་པ་མ་ཡིན་པ། རྣོ་བ་རྣོ་བ་མ་ཡིན་པ། མཆོད་དུ་མེད་པ། མཆོད་དུ་མེད་པ་མ་ཡིན་པ་སྟེ། དེ་ལྟར་དེ་དེ་བཞིན་གཤེགས་པའི་སྐུ་ནི་ཡོན་ཏན་དཔག་
ཏུ་མེད་ཅིང་བསམ་གྱིས་མི་ཁྱབ་པ་དང་ལྡན་པ་ཡིན་ལ། སུས་ཀྱང་མ་ཤེས། མ་མཐོང་། མ་ཐོས། བྱེ་བྲག་མ་ཕྱེད། རྣམ་པར་མ་ཤེས། ཡོད་པ་མ་ཡིན་པ། ཚིག་ཏུ་བརྗོད་དུ་མི་རུང་བ། འཇིག་རྟེན་གྱི་ཁོངས་སུ་མ་འདུས་པ། རྒྱུ་ལས་
ཀྱང་མ་བྱུང་བ། རྒྱུ་མེད་པ་ལས་ཀྱང་མ་བྱུང་བ། སྐུ་དེ་ནི་ཐམས་ཅད་དུ་རྣམ་པར་རྟོག་པ་དང་། རྣམ་པར་རྟོག་པ་མེད་པའི་མཚན་ཉིད་རྣམས་དང་། མཚན་གྱི་གཞི་དང་། མཚན་དང་། བགྲང་བ་དང་། བསྒྲེ་བ་རྣམས་ཀྱིས་རྣམ་པར་རིག་པར་
བྱེད་མི་ནུས་པར་མྱ་ངན་ལས་འདའ་བར་གཤེགས་པ་ཡང་མ་ཡིན། མི་གཤེགས་པ་ཡང་མ་ཡིན་ཏེ། དེ་བཞིན་གཤེགས་པ་ནི་ཡོན་ཏན་དཔག་ཏུ་མེད་པ་དང་ལྡན་ནོ། །འོད་སྲུང་ཆེན་པོ་དང་རུས་གཅིག་པ་དེ་བཞིན་གཤེགས་པའི་སྐུ་ནི་དེ་བཞིན་

49-1-44a

གཤེགས་པ་ཉིད་ཀྱིས་མཚན་མའི་དངོས་པོ་རྣམས་ཀྱི་སྒོ་ནས་ཐུགས་སུ་ཆུད་པར་སྤྱོད་ཀྱི། ཉན་ཐོས་དང་རང་སངས་རྒྱས་ཐམས་ཅད་ཀྱིས་ནི་མི་ནུས་སོ། །དེ་བཞིན་གཤེགས་པ་དེ་ལྟ་བུའི་ཡོན་ཏན་དང་ལྡན་པ་ཤའི་སྐུ་
མ་ཡིན་པ་ལ་ཁམ་པའི་སྣོད་བཞིན་དུ་ནད་དམ། གནོད་པ་འམ། འཇིག་པར་ག་ལ་འགྱུར། འཇིག་པ་དང་། ན་བ་དང་། མྱ་ངན་ལས་འདའ་བར་སྟོན་པ་གང་ཡིན་པ་དེ་ནི་གདུལ་བར་བྱ་བའི་དབང་གི་ཕྱིར་ཡིན་པར་བལྟ་བར་བྱའོ། །དེ་བས་ན་དེང་ཕྱིན་ཆད་
དེ་བཞིན་གཤེགས་པའི་སྐུ་རྡོ་རྗེ་ལྟར་མི་ཤིགས་ཤིང་མཁྲེགས་པར་ཡིད་ལ་གྱིས་ཤིག །གཞན་དག་ལ་ཡང་ཤའི་སྐུ་མ་ཡིན་ནོ་ཞེས་སྟོན་ཅིག །དེ་བཞིན་གཤེགས་པ་ནི་ཆོས་ཀྱི་སྐུ་ཡིན་པར་ཁོང་དུ་ཆུད་པར་གྱིས་ཤིག །འོད་སྲུང་ཆེན་
པོ་དང་རུས་གཅིག་པས་གསོལ་པ། བཅོམ་ལྡན་འདས་དེ་ལྟར་ན་དེ་བཞིན་གཤེགས་པ་ཡོན་ཏན་དེ་ལྟ་བུ་དང་ལྡན་པ་ལ་སྙུན་དང་མི་རྟག་པ་དང་འཇིག་པ་ག་ལ་ཞིག་མཆིས་ཏེ། དེང་སླན་ཆད་དེ་བཞིན་གཤེགས་པ་ནི་ཆོས་ཀྱི་སྐུ་སྟེ། 
རྟག་པ་དང་། བརྟན་པ་དང་། ཐེར་ཟུག་པ་དང་། ཞི་བའོ་ཞེས་གཞན་དག་ལ་ཡང་བསྟན་པར་འཚལ་ན། རྡོ་རྗེ་ལྟ་བུར་མི་ཤིགས་པའི་སྐུ་འདི་ཇི་ལྟར་འགྲུབ་པར་འགྱུར་ལགས། སྐུ་འདི་ལྟ་བུར་རྒྱུ་ཅི་ལས་འགྲུབ་ལགས། བཅོམ་ལྡན་འདས་
ཀྱིས་བཀའ་སྩལ་པ། ངའི་སྐུ་འདི་ལྟ་བུ་ནི་དམ་པའི་ཆོས་སྲུང་བའི་བསོད་ནམས་ལས་གྲུབ་པ་ཡིན་ནོ། །རིགས་ཀྱི་བུ་དམ་ཆོས་སྲུང་བའི་དགེ་བསྙེན་གྱིས་ནི་བསླབ་པའི་གཞི་ལྔ་བླང་བར་མི་བྱའོ། །དགེ་བསྙེན་གྱི་འདུལ་བ་ཡང་སྤྱད་པར་མི་
བྱའོ། །ཚུལ་ཁྲིམས་དང་། ཆོ་ག་དང་ཡོན་ཏན་དང་ལྡན་པའི་དགེ་སློང་རྣམས་བསྲུང་བའི་ཕྱིར་མདའ་གཞུ་དང་། རལ་གྲི་དང་མདུང་ཐུང་ཁ་ལེབ་ལག་ཏུ་ཐོགས་པར་བྱའོ། །གསོལ་པ། དགེ་སློང་དག་ལས་སྲུངས་མ་དང་ལྷན་ཅིག་མི་འཁོད་པར་
གཅིག་པུ་ཤིང་དྲུང་དུ་སྟན་བཏིང་བ་ལ་མཆིས་པ་གང་ལགས་པ་དེ་དག་ནི་དགེ་སློང་ཞེས་བགྱི་བ་ལགས་པས་སྲུངས་མ་དང་ལྷན་ཅིག་འཁོད་པ་གང་ལགས་པ་དེ་དག་ནི་ཁྱིམ་བདག་མགོ་རེག་ཅེས་བགྱི་བ་ལགས་སོ། །བཅོམ་ལྡན་འདས་ཀྱིས་

49-1-44b

བཀའ་སྩལ་པ། རིགས་ཀྱི་བུ་ཁྱིམ་བདག་མགོ་རེག་ཅེས་དེ་སྐད་མ་ཟེར་ཅིག ། འདི་ན་དགེ་སློང་ལ་ལ་མལ་སྟན་སར་པ་ལ་འདུག་ཅིང་དེ་ཟན་ཟོས་ནས་གཅིག་པུ་ཕྱོགས་གཅིག་ན་མི་སྨྲ་བར་འདུག་སྟེ། བསམ་གཏན་བྱེད་ལ་ལུས་ཀྱི་རང་བཞིན་
ལ་ཡང་ལྟ་བར་བྱེད་དོ། །སེམས་ཅན་འོངས་པ་རྣམས་ལ་ཡང་སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། བསོད་ནམས་ཀྱི་གཏམ་དང་། བསོད་ནམས་ཀྱི་རྣམ་པར་སྨིན་པའི་གཏམ་དང་། ཆོག་ཤེས་པ་དང་བསྙུང་བའི་ཆོས་
སྟོན་ལ། སེང་གེའི་སྒྲ་སྒྲོགས་པར་ཡང་མི་བྱེད། སེང་གེ་ལྟ་བུའི་འཁོར་ཡང་མི་འཆང་། རྟགས་ཅན་འཆལ་པ་ཚར་གཅད་པའི་ཕྱིར་ཡང་སྟོན་པར་མི་བྱེད་པའི་དགེ་སློང་དེ་ནི་སྐྱེ་བོ་ཐམས་ཅད་ལ་ཕན་པའི་ཕྱིར་ཞུགས་པ་ཡང་མ་ཡིན། བདག་
ལ་ཕན་པའི་ཕྱིར་ཞུགས་པ་ཡང་མ་ཡིན་ཏེ། ཉོན་མོངས་པ་ཞན་པ་ཡིན་པས་ཚུལ་ཁྲིམས་དང་ལྡན་པ་ཚངས་པར་སྤྱོད་པ་ཙམ་དུ་ཟད་དོ། །དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་གཞན་ཞིག་ནས་གཞན་ཞིག་ན་མལ་སྟན་སར་པ་ལ་འདུག་ཅིང་
སེང་གེའི་སྒྲ་སྒྲོགས་ཏེ། སེམས་ཅན་ཐམས་ཅད་ལ་ཕན་པ་དང་། བདེ་བའི་ཕྱིར་གསུང་རབ་ཡན་ལག་དགུ་མདོ་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་
དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་རྣམས་སྟོན་ཏེ། མདོ་འདི་ལ་དགེ་སློང་བྲན་དང་། བྲན་མོ་དང་། བ་ལང་དང་། མ་ཧེ་ལ་སོགས་པ་རྫས་ངན་པ་འཆང་བ་
རྣམས་ཆད་པས་གཅད་པར་བཤད་པ་ནི་བདག་ཅག་གི་རྐྱེན་དུ་འཚམ་པ་ཡིན་ཏེ། མདོ་ཆེ་གེ་མོ་ཞིག་ལས་ཀྱང་རབ་ཏུ་བྱུང་བ་རྫས་ངན་པ་འཆང་བ་རྣམས་བཅོམ་ལྡན་འདས་ཀྱིས་རྒྱལ་པོ་ཆེ་གེ་མོ་ཞིག་ལ་ཆད་པས་གཅོད་དུ་བཅུག་སྟེ། 
ཚུལ་ཁྲིམས་འཆལ་པ་རྣམས་ནི་གོས་སྐྱ་བོ་གྱོན་དུ་བཅུག་གོ་ཞེས་སྟོན་ཅིང་དེ་དེ་ལྟར་སེང་གེའི་སྒྲ་སྒྲོགས་པ་ལ་ཚུལ་ཁྲིམས་འཆལ་པ་རྣམས་ཀྱིས་དཀྲུགས་མ་བྱས་ཏེ། སྲོག་བཅད་དུ་ཟིན་ཀྱང་དགེ་སློང་དེ་ལ་ནི་ཚུལ་ཁྲིམས་དང་ལྡན་པ། བདག་

49-1-45a

ལ་ཕན་པ་དང་། གཞན་ལ་ཕན་པ་ལ་ཞུགས་པ་ཞེས་ང་ཟེར་རོ། །རྒྱུ་དེས་ན་རྒྱལ་པོ་དང་། བློན་པོ་དང་། དགེ་བསྙེན་རྣམས་ལ་དམ་པའི་ཆོས་བསྲུང་བའི་ཕྱིར་ངས་དགེ་སློང་རྣམས་བསྲུང་བར་ཡང་གནང་། ཁྱིམ་
བདག་མགོ་རེག་རྣམས་ཆད་པས་གཅོད་དུ་ཡང་གནང་ངོ་། །དེ་ལ་ཚུལ་ཁྲིམས་འཆལ་པ་གང་ཡིན་པ་དེ་དག་ནི་ཁྱིམ་བདག་མགོ་རེག་ཅེས་བྱ་སྟེ། དེ་ནི་ཚུལ་ཁྲིམས་དང་ལྡན་པའི་ཚིག་བླ་དགས་མ་ཡིན་ནོ། །རིགས་ཀྱི་བུ་སྔོན་བྱུང་བ་འདས་པའི་
དུས་ན་བསྐལ་པ་གྲངས་མེད་པའི་སྔ་རོལ་ཏུ་གྲོང་ཁྱེར་ཀུ་ཤི་འདི་ཉིད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགའ་སྐྱེད་ཅེས་བྱ་བ་འཇིག་རྟེན་དུ་བྱུང་སྟེ། །དེའི་ཚེ་འཇིག་རྟེན་གྱི་ཁམས་འདི་བདེ་བ་ཅན་བཞིན་
དུ་ཡངས་པར་གྱུར་ཏེ། དེའི་ཚེ་སེམས་ཅན་དག་བདེ་བ་ཅན་གྱི་བྱང་ཆུབ་སེམས་དཔའ་རྣམས་བཞིན་དུ་བྲུ་བས་ཉམ་ཆུང་བ་མེད་དོ། །དེ་ནས་དེ་བཞིན་གཤེགས་པ་དེ་ལོ་བྱེ་བ་ཕྲག་དུ་མ་བཞུགས་བཞུགས་ནས་གྲོང་ཁྱེར་འདི་ཉིད་དང་གནས་འདི་
ཉིད་དུ་མྱ་ངན་ལས་འདས་སོ། །དེ་ནས་དེའི་བསྟན་པ་ལོ་བྱེ་བ་ཕྲག་དུ་མའི་བར་དུ་གནས་གནས་ནས། གང་གི་ཚེ་བསྟན་པ་གནས་པ་དེའི་ལྷག་མ་ལོ་བཞི་བཅུ་ལུས་པ་དེའི་ཚེ་དམ་པའི་ཆོས་ནུབ་ཏུ་ཆ་བའི་དུས་ན་དགེ་སློང་སངས་རྒྱས་བྱིན་ཞེས་
བྱ་བ་གཡོག་འཁོར་མང་པོ་དང་ལྡན་པ་སེང་གེའི་སྒྲ་སྒྲོགས་པ་གསུང་རབ་ཡན་ལག་དགུའི་ཆོས་སྟོན་པ་ཞིག་བྱུང་སྟེ། དེ་བྲན་དང་། བྲན་མོ་དང་། བ་ལང་དང་། མ་ཧེ་ལ་སོགས་པ་རྫས་ངན་པ་འཆང་བ་ལོག་པའི་ཆོས་སྟོན་པ་ཚུལ་ཁྲིམས་འཆལ་པ་
སྡང་བའི་སེམས་དང་ལྡན་པ་རྣམས་ཀྱིས་ཐོས་ནས་བསད་པའི་སེམས་བསྐྱེད་དེ། ཚུལ་ཁྲིམས་འཆལ་པའི་ཕྱོགས་རྣམས་གཅིག་ཏུ་བསྡོངས་ནས་མཚོན་ཆ་སྣ་ཚོགས་ལག་ན་ཐོགས་ཏེ་དགེ་སློང་དེའི་ཐད་དུ་དོང་ངོ་། །ང་ཡང་དེའི་ཚེ་རྒྱལ་པོ་
སྲིད་སྦྱིན་ཞེས་བྱ་བར་གྱུར་ཏེ། རྒྱལ་པོ་དེས་གཏམ་དེ་ཐོས་ནས་དམ་པའི་ཆོས་བསྲུང་བའི་ཕྱིར་དགེ་སློང་དེའི་ཐད་དུ་སོང་སྟེ་དེ་དག་དང་གཡུལ་བཀྱེའོ། །དེ་ནས་ཆོས་སྨྲས་པ་དེ་ལ་དེ་དག་གིས་མ་ཚུགས་སོ། །རྒྱལ་པོ་དེ་ནི་རལ་གྲི་དང་། མདུང་ཐུང་ཁ་ལེབ་དང་། རྡོ་རྗེ་རྩེ་གཅིག་པ་

49-1-45b

དང་། མདའ་རྣམས་ཀྱིས་ལུས་ལ་མ་གཙགས་པའི་ས་མཚམས་ཡུངས་འབྲུ་ཙམ་ཡང་མེད་པར་གྱུར་ཏོ། །དེ་ནས་དགེ་སློང་དེས་རྒྱལ་པོ་དེ་དེ་ལྟར་གྱུར་པ་མཐོང་ནས་ལེགས་སོ་ཞེས་སྨྲས་ཏེ་དམ་པའི་ཆོས་བསྲུང་བས་ནི་དེ་ལྟར་བྱ་དགོས་སོ། །ཁྱོད་ནི་
ཆོས་དཔག་ཏུ་མེད་པའི་སྐལ་བ་ཅན་དུ་འགྱུར་རོ་ཞེས་བྱས་སོ། །དེ་ནས་རྒྱལ་པོ་དེས་དགེ་སློང་དེའི་ཚིག་ཐོས་ནས་ཤི་བའི་འོག་ཏུ་དེ་བཞིན་གཤེགས་པ་མི་འཁྲུགས་པའི་འཇིག་རྟེན་གྱི་ཁམས་སུ་སྐྱེས་སོ། །དེར་སེམས་ཅན་གང་རྗེས་སུ་ཡི་རང་
བར་གྱུར་པ་རྣམས་དང་། གཡུལ་འགྱེད་པ་གང་ཡིན་པ་དེ་དག་ཐམས་ཅད་ཀྱིས་ཀྱང་བྱང་ཆུབ་ཐོབ་པར་གྱུར་ཏོ། །དེ་བཞིན་གཤེགས་པ་མི་འཁྲུགས་པའི་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བའི་འཇིག་རྟེན་གྱི་ཁམས་སུ་དེ་
བཞིན་གཤེགས་པ་མི་འཁྲུགས་པའི་རྣམ་པ་ཞེས་བྱ་བ་ཞིག་ཀྱང་བྱུང་ངོ་། །དགེ་སློང་སངས་རྒྱས་བྱིན་ཡང་རྒྱལ་པོ་དེ་ཤི་བའི་རྗེས་ལ་ཤི་ནས་དེ་བཞིན་གཤེགས་པ་མི་འཁྲུགས་པའི་བསྟན་པ་ལ་ཉན་ཐོས་ཀྱི་མཆོག་ཏུ་གྱུར་ཏོ། །རྒྱལ་པོ་དེ་ཡང་
ཉན་ཐོས་གཉིས་པར་གྱུར་ཏོ། །དེ་ལྟར་ན་དམ་པའི་ཆོས་ནུབ་པའི་ཚེ་དམ་པའི་ཆོས་བསྲུང་བར་བྱའོ། །དེའི་ཚེ་རྒྱལ་པོར་གྱུར་པ་དེ་ནི་ང་ཡིན་ནོ། །དགེ་སློང་དེ་ནི་སངས་རྒྱས་འོད་སྲུང་ཡིན་ཏེ་དེ་ནི་ཡོངས་སུ་མྱ་ངན་ལས་འདས་སོ། །དེ་ལྟར་ན་དམ་
པའི་ཆོས་བསྲུང་བའི་འབྲས་བུ་ནི་དཔག་ཏུ་མེད་དེ། འབྲས་བུ་རྣམ་པར་དག་པ་དེས་ན་ང་ཡང་རྨ་བྱ་མདོངས་རི་མོ་ཅན་མང་པོས་བརྒྱན་པ་ལྟ་བུར་གྱུར་ཏེ། མི་ཤིགས་པའི་སྐུ་དང་ཆོས་ཀྱི་སྐུ་མཉེས་པར་གྱུར་ཏོ། །འོད་སྲུང་ཆེན་པོ་དང་རུས་གཅིག་
པས་གསོལ་པ། དེ་བཞིན་གཤེགས་པ་ནི་རྡོ་ལ་བརྐོས་པའི་ཡི་གེ་བཞིན་དུ་རྟག་པའི་སྐུ་དང་ལྡན་ལགས་སོ། །བཀའ་སྩལ་པ། རིགས་ཀྱི་བུ་དེ་བས་ན་དམ་པའི་ཆོས་བསྲུང་བར་འདོད་པས་ནི་དགེ་སློང་ངམ། དགེ་སློང་མའམ། དགེ་བསྙེན་ནམ། 
དགེ་བསྙེན་མ་གང་ན་ཡོད་པ་དེར་བསྲུང་བར་བྱའོ། །དགེ་བསྙེན་དམ་པའི་ཆོས་བསྲུང་བའི་འབྲས་བུ་ནི་རྒྱ་ཆེའོ། །རིགས་ཀྱི་བུ་དེ་བས་ན་དགེ་སློང་རྣམས་མཚོན་ཆ་ལག་ན་ཐོགས་པའི་དགེ་བསྙེན་དག་གིས་མདུན་དུ་བདར་ཏེ་རྒྱུ་བར་བྱའོ། །

49-1-46a

ཐེག་པ་ཆེན་པོ་འདི་ལ་ནི་དགེ་བསྙེན་གྱིས་བསླབ་པའི་གཞི་ལྔ་བླང་བར་མི་བྱ་སྟེ། དམ་པའི་ཆོས་བསྲུང་བའི་ཕྱིར་ལག་ན་མཚོན་ཆ་ཐོགས་ཤིང་དགེ་སློང་རྣམས་བསྲུང་བར་བྱའོ། །གསོལ་པ་ཅི་ལགས་དགེ་སློང་གང་
དག་དེ་ལྟ་བུའི་དགེ་བསྙེན་ལག་ན་མཚོན་ཆ་ཐོགས་པ་དང་ལྷན་ཅིག་འགྲོགས་ཤིང་རྒྱུ་བ་དེ་དག་སློབ་དཔོན་ལགས་སམ། འོན་ཏེ་སློབ་དཔོན་མ་ལགས། ཚུལ་ཁྲིམས་འཆལ་པ་ཞེས་བགྱི་འམ། འོན་ཏེ་མི་བགྱི་ལགས། བཅོམ་ལྡན་འདས་
ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་འོག་ཏུ་ནང་འཁྲུག་འབྱུང་བ་དང་ཡུལ་བཅོམ་པ་དག་འབྱུང་བར་འགྱུར་ཏེ། དུས་ངན་པར་གྱུར་པ་དེའི་ཚེ་མུ་གེའི་ཉེས་པས་ཕལ་ཆེར་རབ་ཏུ་འབྱུང་ཞིང་
མགོ་རེག་ཏུ་འགྱུར་ཏེ། དེ་དག་གིས་དགེ་སློང་ཚུལ་ཁྲིམས་དང་། ཆོ་ག་དང་། ཡོན་ཏན་དང་། སྤྱོད་པ་ཕུན་སུམ་ཚོགས་པ་དང་ལྡན་པ་དག་སྐྲོད་པར་འགྱུར། གསོད་པར་འགྱུར་ཏེ། དེར་དགེ་སློང་ཚུལ་ཁྲིམས་དང་ལྡན་པ་རྣམས་ཀྱིས་གྲོང་
དང་། གྲོང་ཁྱེར་དང་། རི་ཁྲོད་ཀྱི་གྲོང་དག་ཏུ་ཇི་ལྟར་རྒྱུ་བར་བྱ་སྟེ། དེ་ལྟ་བུ་དག་གི་དུས་ན་དགེ་སློང་ཚུལ་ཁྲིམས་དང་ལྡན་པ་སློབ་དཔོན་དུ་གྱུར་པ་རྣམས་ལམ་དུ་འགྲོ་བ་ན་རང་གི་སྲོག་བསྲུང་བའི་ཕྱིར་མཚོན་ཆ་ལག་ན་ཐོགས་པ་དག་དེར་འགྲོ་
བར་ངས་གནང་ངོ་། །དགེ་བསྙེན་རྣམས་དང་། ཁྱིམ་བདག་དང་། རྒྱལ་པོ་དང་། བློན་པོ་རྣམས་ཀྱིས་དགེ་སློང་ཚུལ་ཁྲིམས་དང་ལྡན་པ་བསྲུང་བའི་ཕྱིར་མཚོན་ཆ་འཆང་བ་དེ་ཡང་ཚུལ་ཁྲིམས་ཡིན་ཞེས་ང་ཟེར་ཏེ། འོན་ཀྱང་གསད་པར་
ནི་མི་བྱའོ། །དགག་པའི་ཕྱིར་མཚོན་ཆ་བཅང་བར་བྱ་སྟེ། དེ་ནི་མཆོག་ཏུ་མཁས་པའི་ཚུལ་ཁྲིམས་ཡིན་ནོ། །སློབ་དཔོན་ནི་ཐེག་པ་ཆེན་པོའི་གདམས་ངག་སྟོན་པ་དང་། ཡང་དག་པར་ལྟ་བ་དང་། རུང་བ་མ་ཡིན་པའི་གདུགས་དང་། འབྲུ་
མར་གྱི་སྣོད་དང་། འབྲས་བུའི་རྣམ་གྲངས་རྣམས་སྤངས་པ་དང་། རྒྱལ་པོ་དང་བློན་པོ་རྣམས་ལ་མི་སྟེན་པ་དང་། རྙེད་པའི་ཕྱིར་སྦྱིན་པ་པོ་རྣམས་ལ་དགའ་བ་དང་སྙན་པར་སྨྲ་བ་མ་ཡིན་པ་དང་། སྤྱོད་ལམ་ཕུན་སུམ་ཚོགས་པ་དང་། ཚུལ་

49-1-46b

མེད་པའི་དགེ་སྦྱོང་གི་དངོས་པོ་སེལ་བ་དང་། ཚུལ་ཁྲིམས་དང་ལྡན་པ་དང་དགེ་བའི་ཆོས་ཅན་དང་། རྒྱ་མཚོ་དང་འདྲ་བའི་བློ་གྲོས་འཆང་བ་དང་། བྱད་གཟུགས་དང་། ཆ་བྱད་དང་། རྙེད་པ་དང་བཀུར་སྟི་གཞན་མི་འདོད་པ་དང་། ཆོག་ཤེས་
ཤིང་ཡོ་བྱད་བསྙུངས་པ་སྟོན་པ་གང་ཡིན་པ་སྟེ། དེ་ནི་སློབ་དཔོན་ཞེས་བྱའོ། །དེ་ནི་འཁོར་རྙེད་པ་དང་བཀུར་སྟི་འདོད་པའི་རང་གི་འཁོར་གྱི་དགེ་འདུན་གང་ཡིན་པ་དེ་དག་ནི་ཟློག་པར་བྱེད་དོ། །དེ་ལ་དགེ་འདུན་ཡང་རྣམ་པ་གསུམ་སྟེ། ཚུལ་ཁྲིམས་
འཆལ་པ་དང་འདྲེས་པ་དང་། བྱིས་པའི་དགེ་འདུན་དང་། རང་བཞིན་གྱི་དགེ་འདུན་ནོ། །དེ་ལ་ཚུལ་ཁྲིམས་འཆལ་པ་དང་འདྲེས་པའི་དགེ་འདུན་ནི་དེས་ཟློག་པར་བྱེད་དེ། ཚུལ་ཁྲིམས་འཆལ་པ་དང་འདྲེས་པའི་དགེ་འདུན་ཞེས་བྱ་བ་ནི་ཚུལ་
ཁྲིམས་འཆལ་པ་རྣམས་འབའ་ཤིག་དང་འཐུན་པར་བྱེད་དེ། དེ་དག་ཚར་གཅོད་པར་མི་བྱེད་ཅིང་ཟང་ཟིང་གི་ཕྱིར་དེ་དག་དང་ལྷན་ཅིག་ཏུ་སྤྱོད་པ་འཐུན་པར་བྱེད་པ་གང་ཡིན་པ་སྟེ། ཚུལ་ཁྲིམས་དང་ལྡན་དུ་ཟིན་ཀྱང་དེ་དག་དང་ལྷན་ཅིག་
ཏུ་གནས་པས་ཚུལ་ཁྲིམས་འཆལ་པ་ཁོ་ན་ཡིན་པའི་གྲངས་སུ་འགྲོ་བར་འགྱུར་རོ། །འདི་ནི་ཚུལ་ཁྲིམས་འཆལ་པ་དང་འདྲེས་པ་ཞེས་བྱ་སྟེ་དེའི་ཚུལ་མེད་པ་ཟློག་པར་བྱེད་པའི་ཕྱིར་སློབ་དཔོན་ཞེས་བྱའོ། །བྱིས་པའི་དགེ་འདུན་ཞེས་བྱ་
བ་ནི་དགོན་པ་པ་དང་། བསོད་ནམས་ཞན་པ་དང་། རྨུགས་པ་རྣམས་ཡིན་ཏེ། སྐབས་དབྱེ་བ་དང་། གསོ་སྦྱོང་རྣམས་ཀྱི་དུས་སུ་རང་གི་འཁོར་ཉི་ཚེ་དག་པར་བྱེད་ཀྱི་ཚུལ་ཁྲིམས་འཆལ་པ་རྣམས་དག་པར་མི་བྱེད་པར་དེ་དག་དང་ལྷན་ཅིག་
ཏུ་འདྲེ་བར་གནས་པ་དེ་ནི་བྱིས་པའི་དགེ་འདུན་ཞེས་བྱ་སྟེ། རྨུགས་པ་དེ་དག་གི་ཚུལ་མ་ཡིན་པ་སེལ་བར་བྱེད་པའི་ཕྱིར་སློབ་དཔོན་ཞེས་བྱའོ། །རང་བཞིན་གྱི་དགེ་འདུན་ནི་བདུད་བྱེ་བ་སྙེད་ཀྱིས་ཀྱང་མི་ཤིགས་པ་ཡིན་ཏེ། དེ་ནི་བྱང་ཆུབ་
སེམས་དཔའི་དགེ་འདུན་རང་བཞིན་གྱིས་རྣམ་པར་དག་པའོ། །ཚུལ་ཁྲིམས་འཆལ་པའི་དགེ་འདུན་རྣམ་པ་གཉིས་ཟློག་པར་བྱེད་པ་གང་ཡིན་པ་དེ་དག་ནི་སློབ་དཔོན་ཞེས་བྱའོ། །འདུལ་བ་འཛིན་པ་ཞེས་བྱ་བ་ནི་གདུལ་བར་བྱ་བའི་དབང་

49-1-47a

གིས་བསླབ་པའི་གཞི་དེ་དང་དེ་དག་ཤེས་ཏེ་རྔམས་ཆེན་པོ་ཡང་ཤེས་སོ། །རྔམས་ཆུང་ངུ་ཡང་ཤེས་སོ། །འདུལ་བ་མ་ཡིན་པ་ནི་བཙན་པར་མི་བྱེད་དོ། །འདུལ་བ་ནི་བཙན་པར་བྱེད་དོ། །འདུལ་བར་བྱ་བའི་དབང་
ཇི་ལྟར་ཤེས་ཤེ་ན། བྱང་ཆུབ་སེམས་དཔའ་གདུལ་བར་བྱ་བའི་དབང་གིས་གྲོང་ཁྱེར་དུ་འགྲོ་བ་ཡོད་དོ། །དེ་ནི་བུད་མེད་དང་། གར་མཁན་མོའི་མདུན་ཁང་དང་། ཡུགས་ས་མོའི་ཁྱིམ་དང་། སྨད་འཚོང་མའི་མ་གཏོགས་པར་ཁྱིམ་གྱི་ནང་ངམ་
མདུན་ཁང་གང་དུ་འགྲོ་འདོད་ཀྱང་རུང་སྟེ། དེ་ལ་དེར་འགྲོ་བའི་དུས་ངེས་པ་མེད་དོ། །བྱང་ཆུབ་སེམས་དཔའི་དགེ་སློང་གིས་ནི་ལོ་གྲངས་མང་པོར་ཡང་གྲོང་ཁྲོད་དུ་རྒྱུ་བར་བཟོད་ཀྱི་ཉན་ཐོས་ཀྱི་དགེ་སློང་གིས་ནི་མ་བཟོད་དོ། །རྔམས་ཆེན་པོ་དང་། 
རྔམས་ཆུང་ངུ་ཇི་ལྟར་ཤེས་ཤེ་ན། རྔམས་ཆེན་པོ་ཞེས་བྱ་བ་ནི་དེ་བཞིན་གཤེགས་པས་དོན་གྱི་དམིགས་བྱུང་བ་གང་གཟིགས་ན་ནི་དེ་ལྟར་གཟིགས་པའི་འོག་ཏུ་ཕས་ཕམ་པ་བཞི་པོ་འདི་ལྟ་བུ་ཕྱིན་ཆད་མ་བྱེད་ཅིག །གལ་ཏེ་ཁྱེད་ཀྱིས་བྱས་
ན་རབ་ཏུ་འབྱུང་དུ་མེད་པར་འགྱུར་རོ་ཞེས་བསླབ་པའི་གཞི་འཆའ་བར་མཛད་པ་དེ་ནི་རྔམས་ཆེན་པོ་ཞེས་བྱའོ། །རྔམས་ཆུང་ངུ་ཞེས་བྱ་བ་ནི་འདི་ན་ལ་ལ་ཞིག་གིས་དོན་གྱི་དམིགས་བྱུང་བ་གཅིག་ཅིག་བྱས་ལ། བསླབ་པའི་གཞི་དེ་དམ་པོར་མ་བྱས་
པ་དེ་བཞིན་གཤེགས་པས་ལན་གསུམ་གྱི་བར་དུ་གཟིགས་ཀྱང་བསླབ་པའི་གཞི་གཞན་འཆའ་བར་མཛད་དེ་དེ་ནི་ཕྱིར་གསོ་བ་ཚང་པ་ཞེས་བྱ་སྟེ་རྔམས་ཆུང་ངུ་ཞེས་བྱའོ། །དེ་ཡང་ལྷག་མ་དང་བཅས་པའི་འདུལ་བ་ནི་བཙན་པར་བྱེད་དོ། །རུང་བ་མ་ཡིན་
པའི་སྦྱིན་པའི་ཕན་ཡོན་གང་ལས་བྱུང་བའི་འདུལ་བ་དེ་ནི་བཙན་པར་མི་བྱེད་དོ། །འདུལ་བ་ལ་སློབ་པར་བྱེད་དོ། །ཚུལ་ཁྲིམས་འཆལ་པ་ནི་ཚུལ་ཁྲིམས་སྤངས་ལ་ཆོས་གོས་རྣམས་དང་བཅས་ཤིང་གཞོན་ནུ་ཆེན་པོ་ཡིན་ནོ། །དེ་ནི་དེའི་འདུལ་བ་ཡང་
བཙན་པར་མི་བྱེད་ལ་གང་འདུལ་བ་ལ་སྣང་བ་དེ་ལ་དེ་མཆོག་ཏུ་ཆོག་ཤེས་པར་བྱེད་དོ། །སངས་རྒྱས་ཀྱི་གསུང་རབ་ལས་རྐྱེན་དུ་འཚམ་པ་སྟོན་པར་བྱེད་དོ། །དེ་ལས་བཏུས་པ་དེ་ལ་ཡང་འདུལ་བ་ཞེས་ང་ཟེར་ཏེ། དེ་ནི་འདུལ་བ་འཛིན་པ་ཡིན་ནོ། །

49-1-47b

ཡི་གེ་གཅིག་ཀྱང་ཤེས་ཏེ། གང་ཡི་གེ་གཅིག་ཤེས་པ་དེ་ལྟ་བུ་ནི་འཇིག་རྟེན་ན་འདུལ་བ་འཛིན་པ་ཡིན་ཏེ། འདི་ནི་མདོ་སྡེ་ལ་འདུལ་བ་འཛིན་པ་ཞེས་བྱའོ། །དེ་ལྟར་ན་དེ་བཞིན་གཤེགས་པའི་བསྟན་པ་ནི་དཔག་ཏུ་མེད་དོ། །དེ་བཞིན་གཤེགས་པ་ནི་བསམ་
གྱིས་མི་ཁྱབ་བོ། །གསོལ་པ། བཅོམ་ལྡན་འདས་དེ་བཞིན་གཤེགས་པ་ལྟ་ལགས་ཀྱང་བསམ་གྱིས་མི་ཁྱབ་ལགས། རྟག་པ་དང་བརྟན་པ་དང་། ཐེར་ཟུག་དང་ཞི་བ་ལགས་ཏེ་བསམ་གྱིས་མི་ཁྱབ་བོ་ཞེས་གཞན་དག་ལ་ཡང་བསྟན་པར་འཚལ་ལོ། །
བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་ལེགས་སོ་ལེགས་སོ། །དེ་བཞིན་གཤེགས་པ་ནི་རྡོ་རྗེ་ལྟར་མི་ཤིགས་པའི་སྐུ་འཛིན་པ་ལ་ཞུགས་པ་ཡིན་ཏེ། དེ་ལྟར་ཡང་དག་པའི་ལྟ་བ་དང་། བསླབ་པ་ལ་གུས་པར་བྱའོ། །
དེ་བཞིན་གཤེགས་པ་རྡོ་རྗེ་ལྟར་མི་ཤིགས་པའི་སྐུ་དང་ལྡན་པར་ཡང་དག་པར་ལྟ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་ཇི་ལྟར་མེ་ལོང་གི་ངོས་ལ་རང་བཞིན་གྱིས་གཟུགས་བརྙན་སྣང་བ་དེ་བཞིན་དུ་དོན་དམ་པའི་སྐུ་གསལ་བར་མཐོང་ངོ་། །
རྡོ་རྗེ་ལྟར་མི་ཤིགས་པའི་སྐུའི་ཕུང་པོ་ཞེས་བྱ་སྟེ་གཉིས་པའོ།། །། རིགས་ཀྱི་བུ་གཞན་ཡང་ད་ནི་མདོ་འདིའི་མིང་དང་ཡོན་ཏན་དང་། ཚུལ་ཁྲིམས་ཡང་དག་པར་གཟུང་བར་གྱིས་ཤིག །མདོ་འདིའི་མིང་ཐོས་ན་སེམས་ཅན་རྣམས་འགྲོ་བ་བཞིར་འགྲོ་
བར་འགྱུར་བ་དེ་ནི་མི་སྲིད་དེ་མདོ་ཆེན་པོ་འདིའི་ཡོན་ཏན་དང་ཚུལ་སངས་རྒྱས་མང་པོས་བསྟན་པ་དེ་ལྟ་བུ་ངས་བསྟན་པར་བྱའོ། །གསོལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཇི་ལྟར་མདོ་འདིའི་མིང་ཡང་དག་པར་འཛིན་པ་ལགས། 
ཇི་ལྟར་མདོ་འདིའི་མིང་འཛིན་པའི་གྲངས་སུ་གཏོགས་པ་ལགས། བཀའ་སྩལ་པ། མདོ་འདི་ནི་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་སྟེ། ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་
བཟང་བ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། རྡོ་རྗེ་ལྟ་བུའི་གཏེར་དང་ཆེ་བར་གྲགས་པ་ཡིན་ནོ། །རིགས་ཀྱི་བུ་དཔེར་ན་གང་གཱ་དང་ཡ་མུ་ན་ལ་སོགས་པ་ཆུ་ཀླུང་བརྒྱད་ནི་རྒྱ་མཚོ་ཆེན་པོ་ཁོ་ནར་འབབ་པ་

49-1-48a

དེ་བཞིན་དུ། ཉོན་མོངས་པ་རྣམ་པ་སྣ་ཚོགས་བྱེ་བ་སྙེད་ཀྱི་རང་བཞིན་གྱི་བདུད་ལ་སོགས་པ་བདུད་ཐམས་ཅད་ལས་རྣམ་པར་རྒྱལ་བ་ནི་ཡོངས་སུ་མྱ་ངན་ལས་འདས་པ་ཆེན་པོ་ལུས་འདོར་ཞིང་འཆི་བ་འདི་ཁོ་ན་ཉིད་དུ་འདུ་བར་འགྱུར་ཏེ། 
དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །གཞན་ཡང་དཔེར་ན་སྨན་དཔྱད་རིག་པ་གསུམ་ལ་སོགས་པའི་རིག་པ་རྣམས་ནི་རང་རང་གི་རྒྱུད་ཕྱི་མ་ཁོ་ནར་ཡོངས་སུ་འདུ་བར་འགྱུར་བ་དེ་བཞིན་དུ་དེ་བཞིན་གཤེགས་པས་གསུངས་པའི་དགོངས་
པའི་ཚིག་གསང་བའི་ཆོས་ཀྱི་སྒོ་རྣམ་པ་སྣ་ཚོགས་ཐམས་ཅད་ཀྱང་ཡོངས་སུ་མྱ་ངན་ལས་འདས་པ་ཆེན་པོ་ཁོ་ནའི་ཁོངས་སུ་འདུ་བར་འགྱུར་བས་ན། དེའི་ཕྱིར་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །དཔེར་ན་དབྱར་གྱི་དུས་སུ་ཞིང་པས་གཤོལ་ཆེན་
པོས་རྨོས་ཏེ་ས་བོན་བཏབ་ནས་ས་བོན་འགྲུབ་པར་འདོད་ལ། གྲུབ་ནས་ནི་ཐམས་ཅད་གྲུབ་པའི་མཐར་ཐུག་པ་དེ་ཡིན་པའི་ཕྱིར་འདོད་པ་མེད་པར་འགྱུར་བ་དེ་བཞིན་དུ་སེམས་ཅན་རྣམས་ཀྱིས་མདོ་ཐམས་ཅད་ཀྱི་ཏིང་ངེ་འཛིན་བསྒོམས་ཟིན་ནས་ཀྱང་མདོ་
གཞན་གྱི་བཅུད་འདོད་པར་བྱེད་ལ། མདོ་འདིའི་བཅུད་ནི་ཐམས་ཅད་གྲུབ་པའི་མཐར་ཐུག་པ་དང་། འདིས་སེམས་ཅན་ཐམས་ཅད་སྲིད་པ་ཐམས་ཅད་ལས་རྒལ་བར་འགྱུར་བ་ཡིན་ནོ། །རིགས་ཀྱི་བུ་དཔེར་ན་རྗེས་ཀྱི་སྣ་གྲངས་ཅི་ཡང་རུང་བ་དེ་དག་ཐམས་ཅད་
ནི་གླང་པོའི་རྗེས་ཀྱི་ཁོངས་སུ་འདུ་བར་འགྱུར་ཏེ། གླང་པོ་ཆེའི་རྗེས་ནི་དེ་དག་གི་ནང་ན་མཆོག་ཅེས་བྱ། རབ་མཆོག་ཅེས་བྱ། གཙོ་བོ་ཞེས་བྱ་བ་དེ་བཞིན་དུ་རིགས་ཀྱི་བུ་མདོ་འདིའི་ཏིང་ངེ་འཛིན་ཅི་ཡང་རུང་བ་དེ་དག་ཐམས་ཅད་ནི་ཡོངས་སུ་མྱ་ངན་ལས་
འདས་པ་ཆེན་པོ་ཁོ་ནའི་ཁོངས་སུ་འདུ་བར་འགྱུར་ཏེ། མདོ་འདིའི་ཏིང་ངེ་འཛིན་ཐམས་ཅད་ཀྱི་ནང་ན་ཡོངས་སུ་མྱ་ངན་ལས་འདས་པའི་མདོ་ཆེན་པོ་མཆོག་ཅེས་བྱ། རབ་མཆོག་ཅེས་བྱ། གཙོ་བོ་ཞེས་བྱའོ། །རིགས་ཀྱི་བུ་གཞན་ཡང་དཔེར་ན་སྟོན་གྱི་དུས་སུ་
ལོ་ཏོག་བཏབ་པ་ནི་རྨོས་ཐམས་ཅད་ཀྱི་མཆོག་ཅེས་བྱ། རབ་མཆོག་ཅེས་བྱ། གཙོ་བོ་ཞེས་བྱ་བ་དེ་བཞིན་དུ་ཡོངས་སུ་མྱ་ངན་ལས་འདས་པའི་མདོ་ཆེན་པོའི་རྟག་པ་ཉིད་ཀྱི་གཤོལ་ཆེན་པོས་རྨོས་པ་ནི་མདོ་ཐམས་ཅད་ཀྱི་མཆོག་ཅེས་བྱ། རབ་མཆོག་

49-1-48b

ཅེས་བྱ། གཙོ་བོ་ཞེས་བྱའོ། །དེ་བཞིན་དུ་ཐམས་ཅད་ལ་ཡང་སྦྱར་བར་བྱ་སྟེ། འདིར་དཀར་པོའི་ཕྱོགས་ཀྱི་ཐབས་དང་སྦྱར་རོ། །ཉན་ཐོས་ཀྱི་ཐེག་པའི་ཡང་དག་པར་ལྡན་པའི་མདོའི་རྣམ་པར་དབྱེ་བ་ཡང་འདིར་སྦྱར་བར་བྱའོ། །རིགས་ཀྱི་བུ་གཞན་ཡང་
དཔེར་ན་མཁྲིས་པ་རྒྱས་པའི་ནད་ཀྱིས་ཐེབས་པ་ལ་ནི་མར་དང་། མངར་བ་བརྒྱད་ཀྱི་སྨན་འབའ་ཤིག་ལྷག་པར་ཕན་པ་དེ་བཞིན་དུ་དེ་བཞིན་གཤེགས་པའི་དགོངས་པའི་ཚིག་གི་མཁྲིས་པ་རྒྱས་པའི་ནད་ཀྱིས་ཟིན་པ་ལ་ཡང་ཐེག་པ་ཆེན་པོའི་མདོ་སྡེ་དང་། 
མྱ་ངན་ལས་འདས་པ་ཆེན་པོའི་མངར་བ་བརྒྱད་ཀྱི་སྨན་འབའ་ཞིག་ལྷག་པར་ཕན་ཏེ། འདིར་མངར་བ་བརྒྱད་གང་ཞེ་ན། རྟག་པ་དང་། བརྟན་པ་དང་། ཐེར་ཟུག་དང་། ཞི་བ་དང་། བསིལ་བའི་རང་བཞིན་དང་། རྒ་བ་མེད་པ་དང་། འཆི་བ་མེད་པ་དང་། 
དྲི་མ་མེད་པ་དང་། བདེ་བ་སྟེ། འདི་རྣམས་ནི་འདིར་མངར་བ་བརྒྱད་ཅེས་བྱ་སྟེ། གང་གི་ཕྱིར་མངར་བ་ཆེན་པོ་ཡིན་པས་ན་དེའི་ཕྱིར་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མིང་དང་
ཡོན་ཏན་དང་ཚུལ་དེ་ལ་གནས་ན་ཡོངས་སུ་མྱ་ངན་ལས་འདས་པ་རྣམ་པ་དུ་མ་སྟོན་ཏེ། དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །རིགས་ཀྱི་བུ་འམ། རིགས་ཀྱི་བུ་མོ་ཡོངས་སུ་མྱ་ངན་ལས་འདས་པ་ཆེན་པོ་འདིས་མྱ་ངན་ལས་འདའ་
བར་འདོད་པས་ནི་དེ་བཞིན་གཤེགས་པ་དང་། ཆོས་དང་དགེ་འདུན་རྟག་གོ་ཞེས་བྱ་བ་ལ་བརྩོན་པར་བྱའོ། །རིགས་ཀྱི་བུ་འམ། རིགས་ཀྱི་བུ་མོ་ཡོངས་སུ་མྱ་ངན་ལས་འདས་པ་ཆེན་པོའི་སྤྱད་པ་སྤྱོད་པར་འདོད་པས་ནི་དེ་བཞིན་གཤེགས་པ་རྟག་
གོ་ཞེས་བྱ་བ་ལ་བརྩོན་པར་བྱའོ། །གསོལ་པ། ཀྱེ་མ་བཅོམ་ལྡན་འདས་དེ་བཞིན་གཤེགས་པ་བསམ་གྱིས་མི་ཁྱབ་ལགས་སོ། །ཆོས་བསྟན་པ་བསམ་གྱིས་མི་ཁྱབ་ལགས་སོ། །དགེ་འདུན་ཡོན་ཏན་གྱི་ཚོགས་དང་ལྡན་པ་བསམ་གྱིས་མི་
ཁྱབ་ལགས་སོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་འདི་ཡང་བསམ་གྱིས་མི་ཁྱབ་ལགས་སོ། །འདི་ལ་གང་དག་བཀའ་བཞིན་དུ་བྱེད་པ་དེ་དག་ནི་ཡང་དག་པར་འཛིན་པའི་སེམས་ཅན་ལགས་སོ། །དེ་དག་ནི་མཆོད་རྟེན་

49-1-49a

ལྟ་བུ་ལགས་སོ། །གཞན་ནི་མྱ་ངན་དུ་བགྱི་བ་ལགས། མི་ཤེས་པའི་དགོན་པ་ན་འཁོད་པ་ལགས་སོ། །མདོའི་མིང་གི་གཏན་ཚིགས་དང་ཡོན་ཏན་གྱི་ཚུལ་ཞེས་བྱ་སྟེ་གསུམ་པའོ།། །། རིགས་ཀྱི་བུ་འདི་ལ་བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་ནི་མྱ་ངན་ལས་འདས་པ་ཆེན་པོའི་མདོ་ཆེན་པོ་ལས་ཆོས་ཀྱི་སྣམ་གྲངས་རྣམ་པ་བཞི་སྟོན་པར་བྱེད་དེ། སྣམ་གྲངས་རྣམ་པ་བཞི་གང་ཞེ་ན། རང་གི་ལྷག་པའི་བསམ་པ་ཞེས་བྱ་བ་དང་། གཞན་གྱི་ལྷག་པའི་
བསམ་པ་ཞེས་བྱ་བ་དང་། འདྲི་བའི་དབང་ཞེས་བྱ་བ་དང་། དོན་གྱི་དམིགས་བྱུང་བའི་དབང་ཞེས་བྱ་བ་སྟེ་བཞི་པོ་ནི་དེ་དག་ཡིན་ནོ། །དེ་ལ་རང་གི་ལྷག་པའི་བསམ་པ་ཞེས་བྱ་བ་ནི་དེ་བཞིན་གཤེགས་པས་གང་ལ་གཟིགས་ནས་ཆོས་སྟོན་པར་མཛད་པ་
སྟེ། དཔེར་ན་ཤིང་གི་ཕུང་པོ་འབར་ཞིང་སྣང་བར་གྱུར་པ་གཟིགས་ནས་དགེ་སློང་དག་གང་དག་དེ་བཞིན་གཤེགས་པ་ལས་གསང་བ་སྣ་ཚོགས་ཐོས་ན་འདི་ནི་བདུད་ཀྱིས་སྨྲས་པ་ཡིན་ནོ་ཞེས་གཞན་དག་ལ་ཟེར་ཞིང་། རང་བཟོའི་ཚིག་འབྲུ་སྣ་ཚོགས་
རྣམས་ལ་དེ་བཞིན་གཤེགས་པས་གསུངས་པ་ཡིན་ནོ་ཞེས་བྱས་ནས་སངས་རྒྱས་བཅོམ་ལྡན་འདས་དང་། ཆོས་དང་དགེ་སློང་གི་དགེ་འདུན་ནི་མི་རྟག་གོ་ཞེས་ཟེར་བ་བས་ནི་ཤིང་གི་ཕུང་པོ་འབར་བ་འདི་ལ་ཀུན་ནས་རེག་ཅིང་པང་དུ་བླངས་ཀྱང་སླའོ། །
གང་དག་བདུད་ཀྱིས་སྨྲས་པའོ་ཞེས་ཟེར་བ་དང་། གང་དག་ཕྱིན་ཅི་ལོག་གི་ཆོས་དེ་འཛིན་པར་བྱེད་པ་དེ་དག་ནི་བརྫུན་དུ་སྨྲ་བའོ། །དེ་བཞིན་གཤེགས་པ་མི་རྟག་གོ་ཞེས་བྱ་བའི་ཚིག་སྨྲ་བ་བས་ནི་ཤིང་གི་ཕུང་པོ་འབར་བ་འདི་ལ་ལྕེས་ཀུན་ནས་རེག་པར་
བྱས་ཏེ་ཤི་ཡང་སླའི་ཚིག་དེ་ནི་མཉན་པར་ཡང་མི་བྱའོ། །དེ་བཞིན་གཤེགས་པ་རྟག་པའོ་ཞེས་འདོགས་མི་ནུས་པ་དེ་དག་ནི་མྱ་ངན་དུ་བྱ་བ་ཡིན་ནོ། །སངས་རྒྱས་བཅོམ་ལྡན་འདས་ནི་བསམ་གྱིས་མི་ཁྱབ་བོ། །དེ་བཞིན་དུ་དེའི་རྗེས་སུ་བསྟན་
པ་དང་ཉན་ཐོས་ཀྱི་དགེ་འདུན་ཡང་བསམ་གྱིས་མི་ཁྱབ་བོ་སྙམ་དུ་གཟུང་བར་བྱའོ། །དེ་ལ་སོགས་པ་ཤིང་གི་ཕུང་པོ་འབར་བ་ཞེས་བྱ་བ་མན་ཅད་ནི་རང་གི་ལྷག་པའི་བསམ་པ་ཞེས་བྱ་བའི་སྣ་གྲངས་སོ། །གཞན་གྱི་ལྷག་པའི་བསམ་པ་ཞེས་བྱ་བ་ནི་

49-1-49b

བཅོམ་ལྡན་འདས་ཆོས་སྟོན་ཅིང་བཞུགས་པ་ན་བུད་མེད་གཞོན་ནུ་གསར་དུ་བུ་བྱུང་བ་ལ་ལ་ཞིག་བཅོམ་ལྡན་འདས་ཀྱི་ཐད་དུ་འོངས་ནས་ཕྱོགས་གཅིག་ཏུ་འདུག་སྟེ་སེམས་ཤིང་འདུག་གོ། །དེ་ནས་བཅོམ་ལྡན་འདས་ཀྱིས་དེའི་བསམ་པ་ཐུགས་སུ་
ཆུད་ནས་ཆོས་སྟོན་པར་མཛད་དེ། དཔེར་ན་བུད་མེད་བུ་ལ་བྱམས་པའི་ཐབས་མཁས་པས་ཇི་ཙམ་འཇུ་ནུས་པའི་དྲོད་ཤེས་ནས་རང་གི་མཛུབ་མོའི་ཐོར་ཏོས་བདག་གི་བུ་ཆུང་ངུ་མར་བལྡག་ཏུ་བཅུག་པ་བཞིན་ནོ་ཞེས་གསུངས་སོ། །དེ་ནས་བུད་
མེད་དེས་འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་འདས་ཀྱིས་ནི་བདག་གི་སེམས་ཀྱི་རྟོག་པ་ཐུགས་སུ་ཆུད་ནས་ལྷག་ཆད་མེད་པར་བཀའ་སྩལ་ཏེ། བདག་སློབ་ཏུ་སྩལ་པ་ཁོ་ན་བཞིན་ལགས་སོ། །བཅོམ་ལྡན་འདས་བདག་གིས་
དེང་བྱིས་པ་ལ་མཛུབ་མོའི་ཐོར་ཏོས་ཆབ་མར་སྩལ་པ་དྲག་པར་འགྱུར་ཏེ་དེས་ན་འདི་མ་ཞུ་བར་གྱུར་ལགས་སོ། །བཅོམ་ལྡན་འདས་ཅི་ལགས། བདག་གི་ཁྱེའུ་འདི་ཚེ་རིང་བར་འགྱུར་རམ། འོན་ཏེ་ཚེ་ཐུང་བར་གྱུར་པ་བཅོམ་ལྡན་འདས་དེ་
བཞིན་གཤེགས་པས་བསྟན་དུ་གསོལ། བཀའ་སྩལ་པ། ཁྱོད་ཀྱི་བུ་འདི་བདེ་བ་དང་ལྡན་ཞིང་ཚེ་རིང་བར་འགྱུར་རོ། །དེ་ནས་བུད་མེད་དེ་མགུ་བར་གྱུར་ནས་གསོལ་པ། ཁྱོད་ཀྱི་བདེན་པའི་ཚིག་གིས་བདག་ཤིན་ཏུ་མགུ་ལགས་སོ། །དེ་ལྟར་
དེ་བཞིན་གཤེགས་པ་ནི་གདུལ་བར་བྱ་བའི་དབང་ལ་གཟིགས་ཤིང་འཇུ་བ་དང་མི་འཇུ་བའི་ཉམ་སྟོབས་དང་སྦྱར་ནས་ཆོས་ཐམས་ཅད་བདག་མེད་པ་དང་། སྡུག་བསྔལ་བར་སྟོན་པར་མཛད་དོ། །གལ་ཏེ་བཅོམ་ལྡན་འདས་ཀྱིས་སྟོབས་ཆེ་
ཆུང་དང་མ་སྦྱར་བར་སེམས་ཅན་རྣམས་ལ་རྟག་པའི་གསང་བ་བསྟན་དུ་ལགས་ན་ཆབ་མར་མ་ཞུ་བ་དང་འདྲ་བར་སེམས་ཅན་རྣམས་ཆབ་འཚལ་བར་འགྱུར་ལགས་སོ། །བཀའ་སྩལ་པ། ཆེ་ཞེ་ལེགས་སོ་ལེགས་སོ། །རིགས་ཀྱི་བུ་
མོས་ནི་དེ་ལྟར་བྱ་དགོས་སོ། །ཆེ་ཞེ་གཞན་ཡང་གང་གི་ཚེ་ཁྱོད་ཀྱི་བུ་གོམ་པ་འདོར་ནུས་པར་གྱུར་པ་དེའི་ཚེ་ཁ་ཟས་སྣུམ་པ་གང་དང་གང་བྱིན་པ་དེ་དང་དེ་འཇུ་ནུས་པར་འགྱུར་རོ། །བཅོམ་ལྡན་འདས་དེ་ནི་བཀའ་མད་དོ། །བཀའ་སྩལ་པ། 

49-1-50a

ཅི་དང་པོའི་ཟས་ཀྱིས་མགུ་བར་འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། ཆེ་ཞེ་དེ་བཞིན་དུ་གང་གི་ཚེ་ངའི་ཉན་ཐོས་རྣམས་ཀྱིས་བྱིས་པ་ཆུང་ངུ་ཉུང་ངུ་ཟ་བ་དང་འདྲ་བ་དེའི་ཚེ་ང་
མར་དང་འདྲ་བ་སྡུག་བསྔལ་དང་། མི་རྟག་པ་དང་སྟོང་པ་དང་བདག་མེད་པའི་དོན་དུ་སྟོན་ཏོ། །གང་གི་ཚེ་ཁྱོད་ཀྱི་བུ་སྐྱེས་པ་བཞིན་དུ་ཉན་ཐོས་ཆེན་པོར་གྱུར་ཏེ། སྟོབས་ཆེར་སྐྱེས་ཤིང་ཐེག་པ་ཆེན་པོ་འདོད་པར་གྱུར་པ་དེའི་ཚེ་ནི་ང་ཡང་རོ་དྲུག་དང་
ལྡན་པའི་ཁ་ཟས་ཆེན་པོ་དང་འདྲ་བའི་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་སྟོན་ཏོ། །དེ་ལ་རོ་དྲུག་པོ་རྣམས་གང་ཞེ་ན། སྡུག་བསྔལ་གྱི་སྐྱུར་དང་། མི་རྟག་པའི་ལན་ཚྭ་དང་། བདག་མེད་པའི་ཚ་བ་དང་། བདེ་
བའི་མངར་བ་དང་། བདག་ཡོད་པའི་བསྐ་བ་དང་། རྟག་པའི་ཁ་བ་རྣམས་ཏེ། རོ་དྲུག་པོ་འདི་རྣམས་ཉོན་མོངས་པའི་བུད་ཤིང་དང་སྒྱུ་མའི་མེས་བཙོས་པའི་ཟས་ཡོངས་སུ་མྱ་ངན་ལས་འདས་པ་ཆེན་པོའི་དེ་ཁོ་ན་ཉིད་ཀྱི་འབྲས་ཅན་ཞིམ་པོ་ངའི་
ཉན་ཐོས་རྣམས་ཟ་བར་འགྱུར་རོ། །ཆེ་ཞེ་གཞན་ཡང་དཔེར་ན་ཁྱོད་གཞན་གྱིས་བོས་སམ། གཞན་གྱི་གཙུག་པུད་བཅའ་བའི་ཕྱིར་གྲོང་གཞན་དུ་འགྲོ་བར་འདོད་པ་ན་བུ་ངན་པ་རྣམས་བོར་ཏེ་བུ་བཟང་པོ་རྣམས་བླངས་ནས་གཏེར་གསང་བ་རྣམས་སྟོན་
པར་བྱེད་དམ། བཅོམ་ལྡན་འདས་དེ་ནི་བཀའ་མད་དེ། བུ་ངན་པ་ཚུལ་མ་མཆིས་པ་ནོར་གྱི་སྐལ་བ་ཅན་མ་ལགས་པ་དེ་དག་ལ་ནི་བདག་ནོར་སྟོན་པར་མི་བགྱིད་ལགས་ཀྱི། བདག་ནི་བུ་བཟང་པོ་ཁྱིམ་སོ་འཛིན་པ་ཁྱིམ་གྱི་དོན་སྒྲུབ་པ་རྫས་བསྟན་པར་
འོས་པ་དེ་དག་ལ་སྟོན་པར་བགྱིད་ལགས་སོ། །བཀའ་སྩལ་པ། ཆེ་ཞེ་དེ་བཞིན་དུ་གང་གི་ཚེ་ཡོངས་སུ་མྱ་ངན་ལས་འདས་པ་ཆེན་པོར་འགྲོ་བའི་བྱ་བ་བྱེད་པ་དེའི་ཚེ་དེ་བཞིན་གཤེགས་པ་གསང་བ་སྣ་ཚོགས་ཀྱི་དགོངས་པའི་ཚིག་མ་ལུས་པར་ཉན་ཐོས་
རྣམས་ལ་སྟོན་ཏེ་དེར་སྲས་རྣམས་ལ་དད་པ་སྦྱིན་པར་མཛད་དོ། །ཆེ་ཞེ་དཔེར་ན་ཁྱོད་བྱེས་སུ་སོང་བ་ན་བུ་ངན་པ་རྣམས་ཁྱོད་མ་ཤི་བར་ཤིའོ་སྙམ་དུ་སེམས་སམ། བཅོམ་ལྡན་འདས་དེ་ནི་བཀའ་མད་དོ། །བཀའ་སྩལ་པ། དེ་ནས་ཁྱོད་ཕྱིར་འོངས་པ་

49-1-50b

དེ་དག་གིས་མཐོང་བ་དེ་བཞིན་དུ་ཆེ་ཞེ་ང་ལ་མི་རྟག་གོ་སྙམ་དུ་འདུ་ཤེས་མ་བྱེད་ཅིག །དེང་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་ཤི་བའི་འདུ་ཤེས་བཞིན་དུ་དེ་ལྟར་མ་འཛིན་ཅིག །གང་དག་རྟག་ཏུ་དེ་བཞིན་
གཤེགས་པ་རྟག་པ་དང་། བརྟན་པ་དང་ཐེར་ཟུག་པའོ་སྙམ་དུ་འཛིན་པ་དེ་དག་གི་ཁྱིམ་ན་ནི་དེ་བཞིན་གཤེགས་པ་བཞུགས་ཏེ་འདི་ནི་གཞན་གྱི་ལྷག་པའི་བསམ་པ་ཞེས་བྱའོ། །འདྲི་བའི་དབང་ཞེས་བྱ་བ་ནི་འདི་ན་ལ་ལ་ཞིག་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཞུ་བར་བྱེད་དེ། བཅོམ་ལྡན་འདས་ཇི་ལྟར་བགྱིས་ན་བདག་གིས་སུ་ལ་ཡང་ཅི་ཡང་མ་སྩལ་བར་འཇིག་རྟེན་དུ་སྦྱིན་པ་པོར་གྲགས་པའི་གཏམ་སྙན་པ་ཐོབ་པར་འགྱུར་ལགས། དེ་བཞིན་
གཤེགས་པས་དེ་ལ་དེ་སྐད་ཅེས་བཀའ་སྩལ་ཏོ། །ཆགས་པ་མེད་པ་ལ་བྲན་དང་བྲན་མོ་བླང་བར་སྟོབས་ཤིག །གཏན་དུ་ཚངས་པར་སྤྱོད་པ་ལ་བུ་མོའི་སྦྱིན་པ་གྱིས་ཤིག །ཤ་མི་ཟ་བ་ལ་ཤ་ཟར་ཆུག་ཤིག །ཆང་མི་འཐུང་བ་ལ་ཆང་འཐུང་དུ་
ཆུག་ཤིག །དུས་སུ་ཟ་བ་ལ་དུས་མ་ཡིན་པར་ཟས་བྱིན་ཅིག །མེ་ཏོག་ཕྲེང་དང་རྒྱན་མི་ཐོགས་པ་ལ་ཕྱེ་མ་དང་། སྤོས་དང་། མེ་ཏོག་དང་། བདུག་པ་རྣམས་བྱིན་ཅིག །དེ་དག་གི་དུས་ཤེས་པར་གྱིས་ལ་མགྲོན་དུ་བོས་ཤིག་དང་། ཁྱོད་ཀྱིས་
དེ་ལྟར་བྱས་ན་འཇིག་རྟེན་འདིར་སྦྱིན་བདག་གི་རྒྱལ་པོ་ཡིན་ནོ། །ཞེས་གྲགས་པ་ཆེན་པོར་འགྱུར་ཏེ་བསོད་ནམས་འཕེལ་བར་ནི་མི་འགྱུར་རོ།། །། བམ་པོ་ལྔ་པ། དེ་ནས་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་
ཏོ། །ཤ་མི་འཚལ་བ་ལ་གཟུད་པ་ནི་ཆེད་ཆེར་བགྱི་བ་ལགས་ན་ཤ་མི་འཚལ་བ་ལ་ཤ་འཚལ་དུ་སྩལ་ན་ནོངས་པར་མི་འགྱུར་ལགས་སམ། བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །ཁྱོད་ཀྱིས་ངའི་དགོངས་པ་རིག་སྟེ། དམ་པའི་
ཆོས་སྲུང་བས་ནི་དེ་ལྟར་བྱ་དགོས་སོ། །རིགས་ཀྱི་བུ་ད་ཕྱིན་ཅད་ངའི་ཉན་ཐོས་རྣམས་ཤ་ཟ་བར་མི་གནང་ངོ་། །ཡུལ་འཁོར་གྱི་བསོད་སྙོམས་ནི་བུའི་ཤ་དང་འདྲའོ་ཞེས་བྱ་ན་ཤ་བཟའ་བར་ངས་ཇི་ལྟར་གནང་། ཤ་ཟ་བ་ནི་བྱམས་པ་ཆེན་པོ་ཆད་པར་

49-1-51a

འགྱུར་རོ་ཞེས་ངས་བསྟན་ཏོ། །གསོལ་པ། བཅོམ་ལྡན་འདས་འོ་ན་ཇི་ལྟར་མུ་གསུམ་ཡོངས་སུ་དག་པའི་ཤ་བཟའ་བར་གནང་ལགས། བཀའ་སྩལ་པ། མུ་གསུམ་ཡོངས་སུ་དག་པ་འདི་ནི་ངས་རིམ་གྱིས་བསླབ་པའི་གཞི་
བསྡམ་པའི་ཕྱིར་དེང་ངས་བོར་རོ། །གསོལ་པ། བཅོམ་ལྡན་འདས་ཅི་ལས་དགོངས་ཏེ་དོན་ཆེད་ཀྱི་མུ་དགུ་དང་། ཤ་རྣམ་པ་བཅུ་སྤང་བ་བཀའ་སྩལ་ལགས། བཀའ་སྩལ་པ། ཚིག་བཞག་པ་དེ་དག་ཀྱང་ཤ་མི་བཟའ་བར་བསྡམ་པའི་ཕྱིར་བཅད་དོ། །
གསོལ་པ། བཅོམ་ལྡན་འདས་ཅི་ལས་དགོངས་ཏེ་ཤ་དང་ཉ་ཤ་བཟའ་བ་ཡང་ཁ་ཟས་བཟང་པོར་གསུངས་ལགས། བཀའ་སྩལ་པ། ངས་ནི་ཤ་དང་ཉ་ཤ་ཁ་ཟས་བཟང་པོར་མ་གསུངས་ཀྱི། ངས་ནི་བུ་རམ་ཤིང་དང་། འབྲས་སཱ་ལུ་དང་། འབྲུ་དང་། 
གྲོ་དང་། ནས་དང་། སྲན་སྡེའུ་དང་། སྲན་དྲེའུ་རྣམས་དང་། མངར་བག་ཁ་ར་དང་། ལི་ཁ་ར་དང་། སྦྲང་རྩི་དང་། མར་དང་། འོ་མ་དང་། འབྲུ་མར་རྣམས་ཁ་ཟས་བཟང་པོར་གསུངས་སོ། །ངས་ནི་ལུས་གཡོགས་པའི་ཕྱིར་གོས་སྣ་ཚོགས་ཀྱང་
ཁ་དོག་ངན་པར་བསྒྱུར་བར་བྱའོ་ཞེས་བསྟན་ན་ཤ་བཟའ་བའི་རོ་ལ་ཆགས་པ་ལྟ་ཅི་སྨོས། གསོལ་པ། དེ་ལྟ་ན་ནི་བའི་བཅུད་རྣམ་ལྔ་དང་། ཏིལ་དང་། འབྲུ་མར་ཤིང་གི་ཁུ་བ་དང་། དུང་དང་། ཟབ་དར་ལ་སོགས་པ་ཡང་ཁྲིམས་སུ་བཅའ་བའི་
རིགས་ལགས་སོ། །བཀའ་སྩལ་པ། གཅེར་བུ་པའི་ལྟ་བ་མ་འཛིན་ཅིག །ང་ནི་འདུ་ཤེས་གཞན་གྱིས་ད་ཁྱོད་ལ་བསླབ་པའི་གཞི་བཅའ་བར་བྱ་སྟེ། མུ་གསུམ་གྱི་ཤ་ཡང་མི་བཟའ་བར་བསྡམས་སོ། །དོན་ཆེད་དུ་བྱས་པ་ཁྱོད་ཀྱིས་རིག་པ་དེ་ཡང་
བསྡམས་སོ། །ཤ་རྣམ་པ་བཅུ་ལ་མ་གཏོགས་པ་དེ་ཡང་སྤངས་སོ། །ཤི་བའི་ཤ་ཡང་སྤངས་སོ། །ཤ་ཟ་བ་ནི་འགྲོ་ཡང་རུང་འདུག་ཀྱང་རུང་སྟེ། སྲོག་ཆགས་ཐམས་ཅད་དེའི་དྲི་ཚོར་ནས་དེས་འཇིགས་ཏེ། དཔེར་ན་མིས་ཤིང་ཀུན་ནམ་སྒོག་པ་
ཟོས་ན་མིའོ་ཅོག་གི་སེམས་མ་དད་པར་འགྱུར་ཞིང་མི་མཐུན་པར་འགྱུར་ལ་མི་མང་པོ་ཚོགས་པ་འམ། སྐྱེ་བོ་མང་པོས་གང་བའི་ནང་དུ་སེམས་ཅན་དེ་དག་གིས་ཆེ་གེ་མོ་ཞིག་གིས་ཟོས་སོ་ཞེས་ཤེས་པ་དེ་བཞིན་དུ་སྲོག་ཆགས་ཐམས་ཅད་ཀྱིས་ཤ་ཟ་བའི་

49-1-51b

མི་ངོ་ཤེས་ཏེ། དེ་དག་གིས་དྲི་ཚོར་ནས་འཆི་བའི་འཇིགས་པས་སྐྲག་པར་འགྱུར་ཏེ། དེ་རྒྱུ་ཞིང་འགྲོ་བ་ན་ཆུ་དང་། སྐམ་ས་དང་། ནམ་མཁའ་ལ་གནས་པའི་སྐྱེ་བོ་རྣམས་སྐྲག་སྟེ། བདག་ཅག་འདིས་གསད་དུ་འོང་ངོ་སྙམ་ནས་འཁམས་ནས་ཀྱང་འཆི་བར་
འགྱུར་རོ། །རྒྱུ་དེ་དག་གིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤ་མི་ཟའོ། །གདུལ་བར་བྱ་བའི་དབང་གིས་ནི་ཤ་ཟ་བ་ལྟ་བུར་ཡང་སྟོན་མོད་ཀྱི། ཁ་ཟས་ཐ་མལ་པ་ཡང་མི་ཟ་ན་ཤ་ལྟ་ཅི་སྨོས། རིགས་ཀྱི་བུ་ང་འདས་པའི་འོག་ཏུ་
ལོ་བརྒྱ་ཕྲག་མང་པོ་འདས་པ་ན་རྒྱུན་ཏུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་རྣམས་མེད་པར་གྱུར་ལ། དམ་པའི་ཆོས་གཏན་ཞིག་པའི་ཚེ་དགེ་སློང་འདུལ་བ་དང་མ་མོ་འཛིན་པ། རྟོག་པ་སྣ་ཚོགས་ཅན། 
རང་གི་ལུས་གསོ་བར་བྱེད་པ། ཤ་སྣ་ཚོགས་གཅེས་པར་འཛིན་པ། ཁམས་འཁྲུགས་པ་དང་། བཀྲེས་པ་དང་། སྐོམ་པས་གཟིར་བ། ཆ་ལུགས་འཇིགས་འཇིགས་ལྟར་འདུག་པ། བ་ལང་རྫི་འདྲ་བ། བྱ་བ་འདྲ་བ། ཆོས་གོས་ཚོན་ཅན་གྱི་རྟགས་
འཆང་བ། བྱི་ལའི་བརྟུལ་ཞུགས་སྤྱོད་པ། བདག་ནི་དགྲ་བཅོམ་པ་ཡིན་ནོ་ཞེས་ཁས་འཆེ་བ། གནོད་པ་མང་པོས་ཉེན་པ། རང་གི་གཅིན་དང་ཕྱི་སས་ལུས་གོས་པ། ཐུབ་པ་བཞིན་དུ་ཆ་ལུགས་བཟང་པོར་འཆོས་པ། དགེ་སྦྱོང་མ་ཡིན་པར་དགེ་
སྦྱོང་ལྟར་འཆོས་པ། དམ་པའི་ཆོས་ལྟར་བཅོས་མའི་ཡི་གེ་འཆང་བ་དག་འབྱུང་བར་འགྱུར་ཏེ། དེ་དག་གིས་ངས་བཅས་པའི་འདུལ་བ་དང་། ཆོ་ག་དང་། སྤྱོད་ཡུལ་དང་ལྡན་པའི་ཚུལ་དང་། རུང་བ་མ་ཡིན་པ་ལ་ཆགས་པ་ལས་རྣམ་པར་གྲོལ་
བ། ཐར་པའི་དེ་ཁོ་ན་ཉིད་ཀྱི་ཡི་གེ་བཤིག་ནས་འདུལ་བ་དང་། མདོ་སྡེ་སོ་སོ་ནས་ཅི་དགའ་མགུར་འཆོས་ཤིང་སྨྲ་བར་བྱེད་དེ། འདི་ལྟར་བདག་ཅག་གི་འདུལ་བ་ལས་བཅོམ་ལྡན་འདས་ཀྱིས་ཤའི་བཅུད་ཀྱི་སྦྱིན་པ་ནི་རུང་བ་ཡིན་ནོ་ཞེས་གསུངས་
སོ་ཞེས་ཟེར་ཞིང་། ཤཱཀྱའི་བུའི་དགེ་སྦྱོང་རྣམས་བདག་ཉིད་ཀྱིས་རང་བཟོར་བྱེད་ཅིང་འགལ་བར་སྨྲ་བ་དག་འབྱུང་བར་འགྱུར་རོ། །རིགས་ཀྱི་བུ་གཞན་ཡང་རུང་བ་མ་ཡིན་པའི་འབྲས་རྗེན་པ་དང་། ཤ་དང་ཉ་ཤ་ལེན་པ་དང་། སྣམས་སུ་སྦྱོར་བ་

49-1-52a

དང་། འབྲུ་མར་གྱི་སྣོད་དང་། གདུགས་བྱེད་པ་དང་། ལྷམ་བྱེད་པ་དང་། རྒྱལ་པོ་ལ་སྟེན་པ་དང་། མོ་ཡིག་འཆང་བ་དང་། སྨན་པའི་དཔྱད་ལ་བརྩོན་པ་དང་། བྲན་དང་བྲན་མོ་དང་། གསེར་དང་། དངུལ་དང་། བྱི་རུ་དང་། དུང་
དང་། མན་ཤེལ་དང་། མུ་ཏིག་གི་དོ་ཤལ་དང་། ཤིང་ཐོག་རྣམས་ལེན་པ་དང་། རིག་པ་དང་། རི་མོ་མཁན་དང་། གཟུགས་མཁན་དང་། བསྐྱེད་ཤིང་འཛུགས་པ་དང་། གསང་སྔགས་དང་། སྨན་དང་བྱིས་པའི་རྩེད་མོ་དང་། གར་ཐབས་ཀྱི་ཡན་
ལག་དང་། མིག་འཕྲུལ་དང་། རེངས་པར་བྱ་བའི་ཕྱིར་སྦྱོར་བ་དང་། གླུ་གར་དང་། མེ་ཏོག་ཕྲེང་དང་། སོ་རྩི་དང་། སྨན་མར་ཆེན་པོ་བསྐོལ་བ་དང་། སྤོས་དང་བྱུག་པ་འཆང་བ་དང་། འགྲོས་འཆོས་པ་རྣམས་སློབ་པ་དང་། སྒེག་པའི་སྦྱོར་བ་ལ་བརྩོན་
པ་དག་འབྱུང་བར་འགྱུར་ཏེ་དེ་དག་སྤངས་པ་ལ་ནི་དགེ་སློང་ཞེས་ང་ཟེར་རོ། །གསོལ་པ། བཅོམ་ལྡན་འདས་འོ་ན་ཇི་ལྟར་བགྱི་ལགས། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གཞན་གྱིས་སྩལ་པས་འཚོ་བ་རྣམས་
ཀྱིས་ཡུལ་གང་མ་བརྟགས་པའི་ཟས་མོད་པ་དེར་བསོད་སྙོམས་ཤ་དང་འདྲེས་པ་ཇི་ལྟར་དག་པར་བགྱི་ལགས། བཀའ་སྩལ་པ། རིགས་ཀྱི་བུ་ཅི་ནས་འདུལ་བ་དང་མི་འགལ་བར་ཆུས་བཀྲུས་ཏེ་བཟའ་བར་བྱའོ་ཞེས་ངས་བསྟན་ཏོ། །ཡུལ་དེ་ལྟ་
བུ་ན་ཟས་དང་། སྐོམ་ཤའི་ཟས་ཀྱིས་ཤས་ཆེར་འདྲེས་པར་སྣང་བ་དེ་ལྟ་བུ་ནི་སྤང་བར་བྱའོ། །སྣོད་གཅིག་ལ་གཅིག་རེག་སྟེ་ཁ་ཟས་དངོས་མ་འདྲེས་པ་དེ་ལ་ནི་ཉེས་པ་མེད་དོ། །ཤ་འམ་ཉ་ཤ་འམ། རི་དགས་ཀྱི་ཤ་འམ། རྨིག་པ་སྐམ་པོའམ། 
ཤའི་བག་གཞན་གྱིས་འབགས་པ་རྣམས་ཀྱང་ལྟུང་བྱེད་དུ་འགྱུར་རོ་ཞེས་ང་ཟེར་རོ། །སྔར་ནི་དོན་གྱི་དམིགས་བྱུང་བའི་སྐབས་སུ་བསྟན་ཏོ། །ད་འདིར་ནི་ཤ་ཟ་བ་ལས་གནོད་པར་འགྱུར་བར་ངས་བསྟན་ཏོ། །འདི་ནི་ང་ཡོངས་སུ་མྱ་ངན་ལས་འདའ་
བའི་ཚེ་མང་དུ་བཤད་པ་ཡིན་ཏེ་འདི་ནི་འདྲི་བའི་དབང་ཞེས་བྱའོ། །དེ་ལ་དོན་གྱི་དམིགས་བྱུང་བའི་དབང་ཞེས་བྱ་བ་ནི་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་དག་ང་ལ་འདི་སྐད་ཅེས་འདྲི་བར་བྱེད་དེ། དེ་བཞིན་

49-1-52b

གཤེགས་པས་ཐོག་མར་མགོ་གཅིག་ཁོ་ནར་བཀའ་སྩལ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་དོན་དང་ཚིག་འདི་རྣམས་ཅིའི་སླད་དུ་བཀའ་མ་
སྩལ། བཅོམ་ལྡན་འདས་དེ་བཞིན་གཤེགས་པས་ཆོས་ཀྱི་སྒོ་དེ་ལྟར་བཀའ་སྩལ་པ་ནི་ལེགས་པར་གསུངས་པ་མ་ལགས་སོ་ཞེས་ཟེར་ན་ཉེས་པར་འགྱུར་རོ་ཞེས་ང་ཟེར་རོ། །སྲུང་བ་ཞེས་བྱ་བ་ནི་ཇི་སྐད་བཤད། འདུལ་བ་ཞེས་བྱ་བ་ནི་ཇི་སྐད་
བཤད། སོ་སོར་ཐར་པ་ཞེས་བྱ་བ་ནི་ཇི་སྐད་བཤད་ཅེ་ན། ཉེས་པ་གཞན་ཡང་དུ་མ་ཡོད་དེ་དེ་དག་ཉོན་ཅིག །དེ་ལ་སོ་སོར་ཐར་པ་ཇི་སྐད་བཤད་ཅེ་ན། སོ་སོར་ཐར་པ་ཞེས་བྱ་བ་ནི་ཆོག་ཤེས་པ་དང་། ཡོ་བྱད་བསྙུངས་པ་དང་། ལེན་པ་མེད་པའོ། །
གཅིག་ཏུ་ན་སོ་སོར་ཐར་པ་ཞེས་བྱ་བ་ནི་གཉི་གའི་དོན་ལས་གསོ་བར་བྱེད་པའི་ཕྱིར་རོ། །ལོག་པའི་ཚིག་ལས་གྲོལ་བར་བྱེད་པས་ན་ཐར་པའོ། །སྲུང་བ་ཞེས་བྱ་བ་ནི་རུང་བ་མ་ཡིན་པ་ཐམས་ཅད་ཀྱིས་འཚོ་བས་འགྲོ་བ་བཞི་པོ་རྣམས་སུ་ལྟུང་
བར་བྱེད་པ་དང་། སེམས་ཅན་དམྱལ་བ་མནར་མེད་པ་ལ་སོགས་པ་འཇིགས་པའི་གནས་ཐམས་ཅད་དུ་བཙོ་བར་འགྱུར་བ་དེ་ལས་སྲུང་བའི་ཕྱིར་རོ། །འདུལ་བ་ཞེས་བྱ་བ་ནི་ཐོབ་པར་བྱེད་པ་དང་། འདུལ་བར་བྱེད་པ་དང་། ཆོ་ག་སྟོན་པའི་
ཕྱིར་དང་། རྫས་ངན་པ་ལེན་པ་ལ་ངེས་པར་འབྱུང་བ་མེད་པའི་ཕྱིར་རྫས་ངན་པ་ལེན་པ་ཡང་མེད། རྫས་ངན་པ་སྦྱིན་པ་ཡང་མེད་པ་དེ་ནི་འདུལ་བ་ཞེས་བྱའོ། །འོ་ན་འདུལ་བའི་བསླབ་པའི་གཞི་དེ་ཅིའི་ཕྱིར་ཅིག་ཅར་མ་བཅས་ཤེ་ན། དེའི་ཚེ་
ཁ་ཅིག་ཕམ་པ་བཞིའི་ཉེས་པ་བྱུང་བ་དག་ཀྱང་ཡོད། དགེ་འདུན་གྱི་ལྷག་མ་བཅུ་གསུམ་གྱི་ཉེས་པ་བྱུང་བ་དག་ཀྱང་ཡོད། སྤང་བའི་ལྟུང་བ་སུམ་བཅུའི་ཉེས་པ་བྱུང་བ་དག་ཀྱང་ཡོད། ལྟུང་བའི་ཉི་ཚེ་བ་དགུ་བཅུ་རྩ་གཅིག་གི་ཉེས་པ་བྱུང་བ་དག་ཀྱང་
ཡོད། སོ་སོར་བཤགས་པར་བྱ་བ་བཞིའི་ཉེས་པ་བྱུང་བ་དག་ཀྱང་ཡོད། བསླབ་པ་མང་པོའི་ཆོས་ཀྱི་ཉེས་པ་བྱུང་བ་དག་ཀྱང་ཡོད། རྩོད་པ་ཞི་བར་བྱ་བ་བདུན་གྱི་ཉེས་པ་བྱུང་བ་དག་ཀྱང་ཡོད། རྟག་ཏུ་བསླབ་པ་ཐམས་ཅད་ལས་འགལ་བར་

49-1-53a

བྱེད་པ་དག་ཀྱང་ཡོད། མཚམས་མེད་པ་བྱེད་པ་དག་ཀྱང་ཡོད། མདོ་སྡེ་སྤོང་བ་དག་ཀྱང་ཡོད། འདོད་ཆེན་པོའི་མཐར་ཐུག་པའི་རྒྱུའི་མཚན་ཉིད་རྫོགས་པ་དག་ཀྱང་ཡོད་དེ། འདི་ན་དགེ་སློང་སྡིག་པའི་ལས་བྱེད་པ་ཆོས་
ཐམས་ཅད་ལས་ཐལ་བ་དེ་དག་གཞན་དག་གིས་བསྐུལ་ན་ཡང་བདག་ཉིད་མཁས་པ་ཡིན་པར་མངོན་པའི་ང་རྒྱལ་བྱེད་ཅིང་འཆགས་པར་མི་བྱེད་དེ་གསོར་རུང་བ་ཡང་གསུངས་ཏེ་གསོར་མི་རུང་བར་བྱེད་པ་དག་ཀྱང་ཡོད། ཁ་ཅིག་ནི་རུ་སྦལ་གྱི་ལུས་བཞིན་དུ་སྦེད་པ་
ཡང་ཡོད་དེ། དེ་ལྟར་བདག་གི་ཉེས་པ་ཡུན་རིང་དུ་བཅབས་པའི་ཉེས་པ་འབྱུང་ཞིང་སྡིག་པ་བསགས་པར་འགྱུར་བས་ན་དེའི་ཕྱིར་དེ་བཞིན་གཤེགས་པ་ཐམས་ཅད་མཁྱེན་པ་ཡིན་པས་སྡིག་ཅན་རྣམས་ལ་གནས་རེ་རེ་ནས་འདྲི་བར་མཛད་དེ། ཐོག་མ་ཁོ་
ནར་གཅིག་བཅས་པ་ན་བསླབ་པའི་གཞི་ཐམས་ཅད་ཅིག་ཆར་འཆའ་བར་མི་མཛད་དོ། །གསོལ་པ། དེ་བཞིན་གཤེགས་པས་མཁྱེན་བཞིན་དུ་དེ་དག་མནར་མེད་པ་ཤིན་ཏུ་འཇིགས་པའི་སར་གཏང་བར་མཛད་དམ་ཅི་ལགས། དཔེར་གསོལ་ན་འདྲོན་
པོ་དག་ཅིག་ཤུལ་དུ་ཞུགས་ཏེ་ཤུལ་དྲང་པོ་མ་འཚལ་བ་ལས་དེར་ཤུལ་གཅིག་ནི་ལོགས་ཤིག་ཏུ་མཆི་བ་ལགས་ལ། དེ་དག་གིས་ཀྱང་ཤུལ་བོར་ཏེ་ལོག་པར་ཞུགས་ཤིང་མ་རུང་བར་གྱུར་ཀྱང་བདག་ཅག་ནི་ཤུལ་ལོག་པར་ཞུགས་སོ་སྙམ་དུ་མ་ཚོར་ནས་འདི་
ནི་ཤུལ་བཟང་པོ་ལགས་སོ་སྙམ་དུ་འཛིན་ཅིང་དོང་ལ། ཕས་རྒྱུ་བའི་འདྲོན་པོ་ཡང་མ་མཐོང་བ་དེ་བཞིན་དུ་ཆོས་ལ་རྨོངས་པའི་སེམས་ཅན་དམ་པའི་ཆོས་ཀྱི་དེ་ཁོ་ན་ཉིད་མ་མཐོང་བ་རྣམས་ལ་བཅོམ་ལྡན་འདས་ཀྱིས་ཐོག་མ་ཁོ་ནར་ཤུལ་བསྟན་
འཚལ་བ་ལས་སྔར་ནོངས་པ་རྔམས་ཆེ་ཆུང་མ་བསྟན་པས་དགེ་སློང་རྣམས་ཉེས་པ་རྣམས་ཀྱི་ནང་དུ་ལྟུང་བར་གྱུར་ན། འདི་ལྟར་བཅོམ་ལྡན་འདས་བདེན་པའི་འགྲོན་པོ་བདེན་པའི་ལམ་གྱི་ཁྱད་པར་ཡང་དག་པར་གཟིགས་པ། ཆོས་ཀྱི་ལམ་གྱི་ཡོན་
ཏན་གྱི་ཁྱད་པར་གྱི་ཕན་ཡོན་ཡང་དག་པར་གཟིགས་པ། ལྷའི་ཡང་ལྷ་བཅོམ་ལྡན་འདས་ཀྱིས་དེའི་ཆེད་དུ་བསླབ་པའི་གཞི་བཅའ་བ་བསྟན་ཏུ་གསོལ། བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་ཁྱོད་དེ་བཞིན་གཤེགས་པ་ལ་དེ་སྐད་

49-1-53b

མ་ཟེར་ཅིག །དེ་བཞིན་གཤེགས་པ་ནི་ཡོན་ཏན་གྱི་ཁྱད་པར་གྱི་ཆོས་བཅུ་ཡང་དག་པར་གཟིགས་པ་ཡིན་ལ། སེམས་ཅན་ཐམས་ཅད་ལ་ཡང་སྒྲ་གཅན་ཟིན་བཞིན་དུ་གཟིགས་ན། ཇི་ལྟར་དགེ་སློང་རྣམས་མནར་མེད་པར་འགྲོ་བར་མཛད། 
དེ་བཞིན་གཤེགས་པ་ནི་གལ་ཏེ་སེམས་ཅན་གཅིག་གི་རྒྱུ་དེ་འདྲ་བ་ཞིག་གཟིགས་ན་ཡང་དེས་ངེས་པར་བསྒྲལ་བའི་ཕྱིར་བསྐལ་པའམ་བསྐལ་པ་ལས་ལྷག་པར་ཡང་སེམས་ཅན་དམྱལ་བར་བཞུགས་སྤྱོད་ན་ཐུགས་བརྩེ་བ་དང་ལྡན་པ་ཇི་ལྟར་ཉིད་ཀྱི་སྲས་
རྣམས་ལ་སླུ་བར་མཛད། འོད་སྲུང་ཆེན་པོ་དང་རུས་གཅིག་པ་དཔེར་ན་གྲོང་ཁྱེར་རམ་རི་ཁྲོད་ཀྱི་གྲོང་ཞིག་ན་ཐ་ག་པ་ཞིག་ཡོད་ན་དེ་ནི་དེར་རས་བཏག་པའི་ཡོ་བྱད་ཐགས་ཆ་གང་ཁ་རྒལ་བ་འདོར་བར་བྱེད་པ་དང་། དཔེར་ན་འཁོར་ལོས་སྒྱུར་བའི་རྒྱལ་པོ་
ནི་ཐོག་མ་ཁོ་ནར་དགེ་བ་བཅུའི་ལས་ཀྱི་ལམ་རྣམས་ཅིག་ཅར་སྦྱོང་བར་མི་བྱེད་ཀྱི་སེམས་ཅན་གང་དང་གང་ཆོས་མ་ཡིན་པ་ལ་སྟེན་པ་དེ་དང་དེ་དག་འཁོར་ལོ་རིན་པོ་ཆེས་བཏུལ་ནས་དམ་པའི་ཆོས་ལ་འགོད་པ་དེ་བཞིན་དུ་སངས་རྒྱས་བཅོམ་ལྡན་
འདས་ཀྱང་ཐོག་མ་ཁོ་ནར་སོ་སོར་ཐར་པའི་བསླབ་པའི་གཞི་ཅིག་ཆར་འཆའ་བར་མི་མཛད་ཀྱི། དགེ་སློང་གང་དང་གང་གིས་ཉེས་པ་ཅི་དང་ཅི་བྱས་པའི་དོན་གྱི་དམིགས་བྱུང་བ་དེ་དང་དེ་གླེང་གཞིར་མཛད་ནས་བསླབ་པའི་གཞི་འཆའ་བར་མཛད་ལ་
སེམས་ཅན་ཆོས་འདོད་པ་གང་ཡིན་པ་རྣམས་ཀྱིས་དེ་དང་དེ་མཐོང་ན་ཡིད་ཆེས་པར་འགྱུར་ཏེ་དེ་དག་དཔང་དུ་འཇོག་གོ། །དེ་ལྟར་ན་ཤིན་ཏུ་བརྟག་དཀའ་བའི་ཆོས་ཡང་དག་པར་གཟིགས་ནས་ཐག་པ་དང་འཁོར་ལོས་སྒྱུར་བའི་རྒྱལ་པོའི་ཆོས་ཉིད་ཇི་
ལྟ་བ་བཞིན་དུ་ཆོས་ཀྱི་འཁོར་ལོ་སྐོར་བའི་སངས་རྒྱས་རྣམས་ཀྱི་ཆོས་ཉིད་ཀྱང་དེ་དང་འདྲ་སྟེ། དེ་ལྟར་ན་སངས་རྒྱས་བཅོམ་ལྡན་འདས་རྣམས་བསམ་གྱིས་མི་ཁྱབ་བོ། །ཆོས་བསྟན་པ་ཡང་བསམ་གྱིས་མི་ཁྱབ་བོ། །དེ་བཞིན་དུ་ཉན་པ་པོ་
རྣམས་དང་། ཡིད་ཆེས་པ་རྣམས་ཀྱང་བསམ་གྱིས་མི་ཁྱབ་སྟེ། འདི་ནི་དོན་གྱི་དམིགས་བྱུང་བའི་དབང་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དོན་གྱི་དམིགས་བྱུང་བའི་ཕྱིར་དང་། ང་ཡོངས་སུ་མྱ་ངན་ལས་འདའ་

49-1-54a

བའི་ཕྱིར་ཆོས་ཀྱི་རྣམ་གྲངས་འདི་བཞིའི་ཆོས་སྟོན་པར་བྱེད་དེ། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ནི་དོན་གྱི་དམིགས་བྱུང་བ་ཞེས་བྱ་བ་ཡིན་པར་རིག་པར་བྱའོ། །བདག་གི་ལྷག་པའི་བསམ་པ་ཞེས་བྱ་བ་ནི་དེང་
ངའི་ལྷག་པའི་བསམ་པ་བསྟན་པ་བཤད་པས་ན་བདག་གི་ལྷག་པའི་བསམ་པ་ཞེས་བྱ་བ་ཡང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ཡིན་པར་རིག་པར་བྱའོ། །གཞན་གྱི་ལྷག་པའི་བསམ་པ་ཞེས་བྱ་བ་ཡང་ངས་དགེ་སློང་རྣམས་ཀྱི་བསམ་
པ་རྟོགས་ནས་ང་ནི་རྟག་གོ་ཞེས་བསྟན་པས་ན་གཞན་གྱི་ལྷག་པའི་བསམ་པ་ཡང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ཡིན་པར་རིག་པར་བྱའོ། །འདྲི་བའི་དབང་ཞེས་བྱ་བ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་
ཆ་ཕྲ་བའི་ཡེ་ཤེས་དང་ལྡན་པ་འོད་སྲུང་ཆེན་པོ་དང་རུས་གཅིག་པ་ཁྱོད་ཀྱི་དབང་དུ་བྱས་ནས། ཉན་ཐོས་དང་རང་སངས་རྒྱས་ཐམས་ཅད་ཀྱིས་སྔོན་མ་ཐོས་པའི་ཚིག་ཡི་གེ་འབྲུ་གཅིག་པའི་ཐིག་ལེའི་གཏམ་དགོངས་པའི་ཚིག་གསང་བ་སྣ་ཚོགས་
བསྟན་པས་ན། དེའི་ཕྱིར་འདྲི་བའི་དབང་ཡང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ཡིན་པར་རིག་པར་བྱའོ། །དེ་ལ་ལ་ལ་ཞིག་འདི་ལྟར་ན་ནི་སླུ་བར་འགྱུར་ལ། འདི་ལྟར་ན་ནི་སླུ་བར་མི་འགྱུར་རོ་སྙམ་དུ་རྟོག་སྟེ། དཔེར་ན་མི་
ལ་ལ་ཞིག་ནམ་མཁའ་ཞེས་ཀྱང་ཟེར། མཁའ་ཞེས་ཀྱང་ཟེར། ཅི་ཡང་མེད་པ་ཞེས་ཀྱང་ཟེར། ཐོགས་པ་མེད་པ་ཞེས་ཀྱང་ཟེར་ཏེ། དེ་དེ་སྐད་ཟེར་ན་གཞན་དག་ལ་སླུ་བ་མ་ཡིན་ནོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོ་འདི་ལས་
རིགས་ཀྱི་བུའམ་རིགས་ཀྱི་བུ་མོ་བཅོམ་ལྡན་འདས་ཀྱིས་གསུངས་པའི་རྟག་པ་འདི་ལ་མོས་ནས་ཆོས་ཀྱི་སྣ་གྲངས་བཞི་པོ་རྣམས་རྗོད་པར་བྱེད་ན་གཞན་དག་ལ་སླུ་བ་མ་ཡིན་ནོ། །ལྕགས་ཀྱི་གར་བུ་མེ་འབར་བ། །རྡུང་བའི་ཚེ་ན་ཁད་ཀྱིས་ནི། །
གྲངས་པར་འགྱུར་ཡང་མེ་ཡི་དྲོད། །གང་དུ་སོང་བ་མི་རིག་ལྟར། །དེ་བཞིན་ཡང་དག་རྣམ་གྲོལ་བ། །འདོད་པའི་འདམ་དང་ཆུ་བོ་རྒལ། །མི་གཡོ་བདེ་བ་ཐོབ་རྣམས་ཀྱང་། །གང་དུ་སོང་བ་གདགས་སུ་མེད། །ཡང་བཀའ་སྩལ་པ། 

49-1-54b

རིགས་ཀྱི་བུ་དེ་ལྟར་ཁྱོད་དེ་བཞིན་གཤེགས་པ་རྣམས་མེད་པར་འགྱུར་བའི་འདུ་ཤེས་སུ་ལྟ་བས་སྙིང་མི་དགར་མ་བྱེད་ཅིག །ལྕགས་དང་མདོ་ལྕགས་ཤེས་བྱ་བ་ནི་དོན་ཐ་དད་པ་མ་ཡིན་ཏེ། ལྕགས་མེར་འབར་བ་ལས་གྲངས་པར་གྱུར་པ་བཞིན་དུ་དེ་བཞིན་
གཤེགས་པ་རྣམས་མེད་པར་འགྱུར་བའི་གནས་མེད་དོ། །ལྕགས་མེར་འབར་བ་ལས་གྲངས་པ་བཞིན་དུ་ཉོན་མོངས་པའི་རྣམ་པ་ཞི་བར་འགྱུར་མོད་ཀྱི། གང་གི་ཚེ་ལྕགས་མེར་འབར་བ་གྲངས་པར་འགྱུར་བ་ན་ཚ་ཚ་འཕྲོ་བ་ཐམས་ཅད་དང་བཅས་ཏེ་མེད་པར་
འགྱུར་ན་ནི་དེའི་ཚེ་དེ་བཞིན་གཤེགས་པ་ཡང་མི་རྟག་པར་འགྱུར་ན། ལྕགས་དེ་འོད་དང་བཅས་པར་མེད་པར་འགྱུར་བ་ནི་མི་སྲིད་དོ། །དེ་བཞིན་དུ་དེ་བཞིན་གཤེགས་པ་ཡང་མྱ་ངན་ལས་འདས་པ་ཆེན་པོ་འདི་དང་བཅས་ཏེ་མི་རྟག་པར་འགྱུར་བ་ནི་མི་སྲིད་དེ། 
ཇི་ལྟར་ལྕགས་ཀྱི་མེ་གྲངས་པར་འགྱུར་བ་དེ་བཞིན་དུ་དེ་བཞིན་གཤེགས་པ་ཡང་བསྐལ་པ་མང་པོ་གྲངས་མེད་པ་བྱེ་བ་སྙེད་དུ་བསགས་པའི་ཉོན་མོངས་པ་རྣམས་ཟད་ནས་རྟག་པ་དང་བརྟན་པ་དང་ཐེར་ཟུག་པར་འགྱུར་ཏེ། དེ་ལྟར་ན་ཡང་དག་པར་རྣམ་པར་
གྲོལ་བའི་དེ་བཞིན་གཤེགས་པ་ནི་རྟག་པ་དང་བརྟན་པ་དང་ཐེར་ཟུག་པ་ཡིན་ནོ། །འདོད་པའི་འདམ་ནི་ཉོན་མོངས་པ་རྣམས་ཤེས་བྱ་བའི་དོན་ཏེ། ཉོན་མོངས་པའི་འདམ་དེ་ལས་བསྐལ་པ་གྲངས་མེད་པས་རྒལ་བས་ན། དེའི་ཕྱིར་དེ་བཞིན་
གཤེགས་པ་ཡོངས་སུ་མྱ་ངན་ལས་འདས་པ་ལ་དེ་བཞིན་གཤེགས་པའི་གནས་གདགས་པར་མི་ནུས་ཏེ། དེ་བས་ན། ཡང་དག་ཤེས་དང་རྣམ་གྲོལ་བ། །འདོད་པའི་འདམ་དང་ཆུ་བོ་རྒལ། །མི་གཡོ་བདེ་བ་ཐོབ་རྣམས་ཀྱང་། །གང་དུ་སོང་བ་
གདགས་སུ་མེད། །གསོལ་པ། བཅོམ་ལྡན་འདས་ཅི་ལགས། ཇི་ལྟར་ལྕགས་གྲངས་པར་གྱུར་ཀྱང་སླད་ཀྱིས་ཡང་ཞུགས་ཀྱིས་ཚ་བར་འགྱུར་བ་བཞིན་དུ་གལ་ཏེ་དེ་བཞིན་གཤེགས་པ་ཡང་དེ་དང་འདྲ་བར་གྱུར་ན་ནི་མི་རྟག་པར་འགྱུར་ལགས་སོ། །
བཀའ་སྩལ་པ། དེ་བཞིན་གཤེགས་པ་ནི་རྟག་སྟེ། བདག་ཉིད་མེ་ལྟ་བུར་གྱུར་ནས་ལྕགས་དང་འདྲ་བའི་སེམས་ཅན་མང་པོ་རྣམས་ཡེ་ཤེས་ཀྱི་མེས་བརྡ་སྤྲད་ནས་ཡང་དག་པ་མ་ཡིན་པའི་ཉོན་མོངས་པ་རྣམས་ཟད་པར་མཛད་དོ། །གསོལ་པ། 

49-1-55a

བཅོམ་ལྡན་འདས་ལེགས་སོ་ལེགས་སོ། །ལེགས་ལགས་སོ། །དེ་བཞིན་གཤེགས་པའི་རྟག་པ་ཉིད་མ་ལུས་པར་བཤད་དུ་གསོལ། བཀའ་སྩལ་པ། རིགས་ཀྱི་བུ་གཞན་ཡང་དཔེར་ན་འཁོར་ལོས་སྒྱུར་བའི་རྒྱལ་པོ་རང་གི་
བཙུན་མོའི་འཁོར་དུ་སོང་བ་ལས་ཐང་ཅིག་སྐྱེད་མོས་ཚལ་གཞན་ཞིག་ཏུ་བྱུང་སྟེ། དེ་དེར་སོང་ནས། རྩེ་བར་བྱེད་པ་ན་གང་གི་ཚེ་རྒྱལ་པོ་དེ་བཙུན་མོའི་འཁོར་ནས་མི་སྣང་བར་གྱུར་པ་དེའི་ཚེ་ཤིའོ་སྙམ་པའི་འདུ་ཤེས་བསྐྱེད་པར་མི་བྱའོ། །རིགས་
ཀྱི་བུ་དེ་བཞིན་གཤེགས་པ་ནི་ཆོས་ཉིད་ལས་ཉམས་པར་མི་འགྱུར་ཏེ། རྒྱལ་པོ་དང་འདྲ་བར་འཛམ་བུའི་གླིང་དུ་དེ་བཞིན་གཤེགས་པ་མི་རྟག་པར་གྱུར་ཏོ་ཞེས་གྲོངས་པའི་འདུ་ཤེས་བསྐྱེད་པར་མི་བྱའོ། །ཇི་ལྟར་རྒྱལ་པོ་བཙུན་མོའི་འཁོར་ནས་
བསྐྱེད་མོས་ཚལ་དུ་སོང་སྟེ་རྩེ་བ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ཉོན་མོངས་པའི་རྣམ་པ་ཉིད་ཀྱི་བཙུན་མོའི་འཁོར་ལྟ་བུ་ལས་ངེས་པར་འབྱུང་སྟེ། ཉོན་མོངས་པ་མེད་པར་བཅོམ་ལྡན་
འདས་གཟུངས་སྣ་ཚོགས་དང་། བྱང་ཆུབ་ཀྱི་ཡན་ལག་གི་མེ་ཏོག་སྣ་ཚོགས་དང་ལྡན་པའི་བསྐྱེད་མོས་ཚལ་དུ་གཤེགས་ནས་དེ་བཞིན་གཤེགས་པ་ཉོན་མོངས་པ་དང་བྲལ་བ་ཉིད་ཀྱི་སྐུའི་ཐབས་སྟོན་པ་སྣ་ཚོགས་ཀྱིས་རོལ་པར་མཛད་དོ། །
གསོལ་པ་དེ་བཞིན་གཤེགས་པ་བསྐལ་པ་གྲངས་མེད་པ་བྱེ་བ་སྙེད་ཀྱིས་ཉོན་མོངས་པའི་རྒྱ་མཚོ་ངེས་པར་རྒལ་ཅེས་བགྱི་བ་འདི་ལ་གཏན་ཚིགས་བཀའ་སྩལ་འཚལ་ལོ། །ད་ལྟར་མངོན་སུམ་དུ་དེ་བཞིན་གཤེགས་པ་སྒྲ་གཅན་ཟིན་གྱི་མ་དང་ལྷན་
ཅིག་ཏུ་འདོད་པ་རྣམས་སྟེན་པ་དང་། སྒྲ་གཅན་ཟིན་གྱི་ཡབ་ཏུ་གྱུར་པར་ཡང་བསྟན་ཏེ། དེ་བས་ན་དེ་བཞིན་གཤེགས་པ་ནི་བསྐལ་པ་དུ་མ་བྱེ་བ་སྙེད་ཀྱིས་འདོད་པའི་ཆུ་བོ་ལས་ངེས་པར་རྒལ་བ་མ་ལགས་སོ། །བཀའ་སྩལ་པ། རིགས་ཀྱི་
བུ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟ་མངོན་སུམ་དུ་སྒྲ་གཅན་ཟིན་གྱི་མ་དང་ལྷན་ཅིག་ཏུ་འདོད་པ་རྣམས་བསྟེན་པ་དང་སྒྲ་གཅན་ཟིན་གྱི་ཡབ་ཏུ་གྱུར་པར་ཡང་བསྟན་ཏེ། དེ་བས་ན་དེ་བཞིན་

49-1-55b

གཤེགས་པ་ནི་བསྐལ་པ་དུ་མ་བྱེ་བ་སྙེད་ཀྱིས་འདོད་པའི་ཆུ་བོ་ལས་ངེས་པར་རྒལ་བ་མ་ཡིན་ནོ་ཞེས་དེ་སྐད་མ་ཟེར་ཅིག །ཡོངས་སུ་མྱ་ངན་ལས་འདས་པ་ཆེན་པོ་ནི་རྟག་པ་ཆེན་པོ་ཞེས་བྱ་སྟེ། སེམས་གུད་དུ་མ་གཡེང་བར་ཉོན་ལ་ཐོས་ནས་ཀྱང་། 
གཞན་དག་ལ་སྟོན་ཅིག །དེས་སྐྲག་པར་ཡང་མ་བྱེད་ཅིང་། ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་རིའི་རྒྱལ་པོ་རི་རབ་དེ་ལྟར་མཐོ་ཞིང་དེ་ལྟར་ཐག་གྲུ་ཆེ་བ་ཡུངས་འབྲུའི་ཁོང་དུ་
འཇུག་པར་བྱེད་ལ་རི་རབ་ལ་གནས་པའི་སེམས་ཅན་རྣམས་ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་གིས་ནི་
བྱང་ཆུབ་སེམས་དཔའ་སེམས་དཔའ་ཆེན་པོ་འདིས་རིའི་རྒྱལ་པོ་རི་རབ་ཡུངས་འབྲུའི་ཁོང་དུ་བཅུག་སྟེ་སྦས་སོ་སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ་། །དེ་ནས་ཡང་དེ་རང་གི་གནས་སུ་འཇོག་པར་བྱེད་དེ། མདོ་ཆེན་པོ་འདི་ལ་
གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཡུལ་ནི་དེ་ལྟ་བུ་ཡིན་ནོ། །རིགས་ཀྱི་བུ་དེ་བས་ཀྱང་ལྷག་པར་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་ཡུངས་འབྲུའི་ཁོང་དུ་འཇུག་པར་བྱེད་ལ་སེམས་ཅན་གཅིག་ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །
སེམས་ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ་། །དེ་ནས་ཡང་རང་གི་གནས་སུ་འཇོག་པར་བྱེད་དོ། །རིགས་ཀྱི་བུ་གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་
པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རང་གི་བ་སྤུའི་ཁུང་བུར་འཇོག་པར་བྱེད་ལ། སེམས་ཅན་གཅིག་ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་

49-1-56a

དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ་། །རིགས་ཀྱི་བུ་གཞན་ཡང་ཡོངས་
སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་འཇིག་རྟེན་གྱི་ཁམས་འདི་ན་འདུག་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་རྣམས་ཁབ་ཀྱི་རྩེ་མོས་རྒྱ་ཤུག་གི་ལོ་མ་བཞིན་དུ་བླངས་ཏེ། 
འཇིག་རྟེན་གྱི་ཁམས་གཞན་དུ་འདོར་བར་བྱེད་ལ་སེམས་ཅན་གཅིག་ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་
གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ་། །དེ་ནས་ཡང་དེ་རང་གི་གནས་སུ་འཇོག་པར་བྱེད་དོ། །རིགས་ཀྱི་བུ་གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་
དཔའ་སེམས་དཔའ་ཆེན་པོས་ནི་ཕྱོགས་བཅུའི་འཇིག་རྟེན་གྱི་ཁམས་རྣམས་ལག་པ་གཡས་པས་བླངས་ཏེ། རྫ་མཁན་གྱི་འཁོར་ལོ་བཞིན་དུ་འཇིག་རྟེན་གྱི་ཁམས་རྡུལ་ཕྲ་མོའི་རྡུལ་སྙེད་ཀྱི་ཕ་རོལ་གྱི་ཡང་ཆེས་ཕ་རོལ་དུ་འཕེན་པར་བྱེད་ལ། 
སེམས་ཅན་གཅིག་ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་
པར་ཤེས་ཤིང་ཡང་དག་པར་མཐོང་ངོ་། །དེ་ནས་ཡང་དེ་རང་གི་གནས་སུ་འཇོག་པར་བྱེད་དོ། །རིགས་ཀྱི་བུ་གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་ཕྱོགས་
བཅུའི་འཇིག་རྟེན་གྱི་ཁམས་རྣམས་རང་གི་ལུས་ལ་འཇུག་པར་བྱེད་ལ་སེམས་ཅན་གཅིག་ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །

49-1-56b

སེམས་ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ་།། དེ་ནས་ཡང་རང་གི་གནས་སུ་འཇོག་པར་བྱེད་དོ། །རིགས་ཀྱི་བུ་གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་
པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་ཕྱོགས་བཅུའི་འཇིག་རྟེན་གྱི་ཁམས་རྣམས་རྡུལ་ཕྲ་རབ་ཀྱི་ཁོང་དུ་འཇུག་པར་བྱེད་ལ། སེམས་ཅན་གཅིག་ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། 
གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ་། །དེ་ནས་ཡང་དེ་རང་གི་གནས་སུ་འཇོག་པར་བྱེད་དོ། །
ཡོངས་སུ་མྱ་ངན་ལས་འདས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་ལ་སོགས་པའི་སྒྱུ་འཕྲུལ་ཆེན་པོའི་སྟོབས་རྣམ་པ་སྣ་ཚོགས་སྟོན་པས་ན་མྱ་ངན་ལས་འདས་པ་ཆེན་པོ་ཞེས་བྱའོ། །ཡོངས་སུ་མྱ་
ངན་ལས་འདས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ཀྱིས་ཀྱང་འདི་འདྲ་བ་ཞིག་གོ། །དེ་འདྲ་བ་ཞིག་གོ། །འདི་ལྟར་བྱས་སོ། །འདི་ལྟ་བུ་ཞིག་བྱས་སོ་སྙམ་དུ་ཤེས་པར་མི་ནུས་ན། 
རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པས་འདོད་པ་རྣམས་སྤྱད་དོ། །སྒྲ་གཅན་ཟིན་གྱི་ཕར་གྱུར་ཏོ་སྙམ་དུ་ཤེས་རེ་སྐན། རིགས་ཀྱི་བུ་གཞན་ཡང་དེང་ངས་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་ནས་སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་གང་ན་ཉི་མ་དང་། ཟླ་བ་ཐེར་འབུམ་ཡོད་པ་དང་། འཛམ་བུའི་གླིང་ཐེར་འབུམ་ཡོད་པའི་སྟོང་ཁམས་དག་ཏུ་ཆོ་འཕྲུལ་ཆེན་པོ་བསྟན་པར་བྱའོ། །དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནི་དཔའ་བར་འགྲོ་བའི་
ཏིང་ངེ་འཛིན་གྱི་ལུགས་བཞིན་དུ་རྒྱས་པར་སྦྱར་བར་བྱའོ། །ང་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་འཛམ་བུའི་གླིང་ལ་ལར་ནི་ཡོངས་སུ་མྱ་ངན་ལས་འདས་པ་ཆེན་པོ་བྱེད་པ་ལྟ་བུར་སྟོན་ལ། ཡོངས་སུ་མྱ་ངན་ལས་

49-1-57a

འདས་པ་ཆེན་པོར་གཏན་དུ་ཡོངས་སུ་མྱ་ངན་ལས་འདའ་བར་ཡང་མི་བྱེད་དོ། །འཛམ་བུའི་གླིང་ལ་ལར་ནི་ངས་ཕ་མ་གཉིས་ཀྱི་ཟླ་མཚན་གྱི་དུས་སུ་མངལ་དུ་སྐྱེ་བར་སྟོན་ཏེ། དེ་གཉིས་ཀྱིས་ཀྱང་བདག་ཅག་གཉིས་ཀྱི་བུར་འགྱུར་རོ་སྙམ་
དུ་ཡང་དག་པར་ཤེས་སོ། །ང་ནི་བསྐལ་པ་མང་པོ་བྱེ་བ་ཕྲག་གྲངས་མེད་པ་ནས་ལན་འགའ་ཡང་འཁྲིག་པ་ལས་མ་སྐྱེས་ཏེ་འཁྲིག་པ་ལས་སྐྱེས་པའི་ལུས་ལས་རྒལ་བས་ན་ཤའི་ལུས་མ་ཡིན་གྱི་ཆོས་ཀྱི་སྐུ་ཡིན་ནོ། །འཁྲིག་པའི་མངལ་དུ་འཇུག་པ་
འདི་ནི་འཇིག་རྟེན་དང་འཐུན་པར་བྱ་བའི་ཐབས་ཙམ་དུ་ཟད་དོ། །རིགས་ཀྱི་བུ་འཛམ་བུའི་གླིང་ལ་ལར་ནི་ང་བུ་བཙའ་བའི་པང་དུ་བུར་སྐྱེ་བར་ཡང་སྟོན་ཅིང་སྐྱེད་མོས་ཚལ་གྱི་གནས་སུ་བཙའ་བའི་བུ་ལྟ་བུར་གྱུར་ཏེ། སྐྱེན་པར་ལངས་ནས་བྱང་ཕྱོགས་
སུ་ཁ་བལྟས་ཏེ་གོམ་པ་བདུན་བོར་ནས་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་གྱི་བླ་ན་མེད་པར་འགྱུར་བར་བྱའོ་ཞེས་ཟེར་ཏེ། སེམས་ཅན་རྣམས་ཀྱིས་ནི་བྱིས་པ་བཙས་མ་ཐག་ཏུ་གོམ་པ་བདུན་འདོར་བ་སྔན་ཅད་བདག་གིས་མ་མཐོང་
སྟེ། ཀྱེ་མ་བདག་གི་བུ་ནི་ལྷའི་བུ་ཞིག་གོ་སྙམ་དུ་ཡང་དག་པར་ཤེས་སོ། །སེམས་ཅན་མང་པོ་གཞན་དག་ཀྱང་ངོ་མཚར་དུ་འཛིན་ཏེ། འོན་ཀྱང་ང་ནི་བསྐལ་པ་བྱེ་བ་ཕྲག་གྲངས་མེད་པ་ནས་བྱིས་པའི་དངོས་པོ་ལས་ལོག་པས་ནམས་ཀྱང་བྱིས་པར་
མ་གྱུར་ཏེ། ང་ནི་ཆོས་ཀྱི་སྐུ་ཡིན་གྱི་རུས་པ་དང་རྒྱུས་པ་དང་ཤ་དང་ཁྲག་གི་ལུས་མ་ཡིན་ལ། བྱིས་པར་འགྱུར་བ་ཡང་སྟོན་པ་འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །བྱང་ནས་ལངས་ཏེ་ལྷོའི་ཕྱོགས་ཆ་ལོགས་སུ་གོམ་པ་བདུན་བོར་
ནས་འཇིག་རྟེན་ཐམས་ཅད་དུ་ཡོན་གནས་སུ་འགྱུར་བར་བྱའོ་ཞེས་ཟེར་རོ། །ནུབ་ཀྱི་ཕྱོགས་ཆ་ལོགས་སུ་གོམ་པ་བདུན་བོར་ནས་སྐྱེ་བ་དང་། རྒ་བ་དང་། ན་བ་དང་། འཆི་བ་རྣམས་སྤངས་ཏེ་ལུས་ཀྱི་ཐ་མར་གཏུག་པར་བྱའོ་ཞེས་ཟེར་རོ། །ཤར་
ཕྱོགས་སུ་ཁ་བལྟས་ཏེ་གོམ་པ་བདུན་བོར་ནས་སེམས་ཅན་ཐམས་ཅད་ཀྱི་ཐོག་མར་འགྲོ་བར་བྱའོ་ཞེས་ཟེར་རོ། །ཕྱོགས་མཚམས་རྣམས་སུ་གོམ་པ་བདུན་བདུན་བོར་ནས་ཉོན་མོངས་པ་རྣམ་པ་སྣ་ཚོགས་ཀྱི་རང་བཞིན་གྱི་བདུད་བཅོམ་སྟེ། 

49-1-57b

དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བར་བྱའོ་ཞེས་ཟེར་རོ། །སྟེང་གི་ཕྱོགས་ཆ་ལོགས་སུ་གོམ་པ་བདུན་བོར་ནས་མྱུར་དུ་ནམ་མཁའ་བཞིན་དུ་རུང་བ་མ་ཡིན་པའི་ཆོས་ཐམས་ཅད་ཀྱིས་ལུས་མི་གོས་པར་བྱའོ་ཞེས་ཟེར་རོ། །
འོག་གི་ཕྱོགས་ཆ་ལོགས་སུ་གོམ་པ་བདུན་བོར་ནས་སེམས་ཅན་དམྱལ་བ་པ་ཐམས་ཅད་ཀྱི་སེམས་ཅན་དམྱལ་བའི་མེ་གསད་པའི་ཕྱིར་སྤྲིན་ཆེན་པོ་ལྟར་ཆོས་ཀྱི་ཆར་དབབ་པར་བྱ་སྟེ། དེ་དག་བདེ་བ་དང་ལྡན་པར་བྱའོ། །ཚུལ་ཁྲིམས་འཆལ་པ་
རྣམས་ལ་ནི་སེར་བ་ལྟ་བུར་འགྱུར་བར་བྱའོ་ཞེས་ཟེར་རོ། །འཛམ་བུའི་གླིང་ལ་ལར་ནི་ང་གཙུག་པུད་འཆའ་བར་སྟོན་ཏེ། སེམས་ཅན་རྣམས་ཀྱིས་བྱིས་པའི་གཙུག་པུད་བཅས་སོ་སྙམ་དུ་ཡང་དག་པར་ཤེས་མོད་ཀྱི། ལྷ་དང་བཅས་པའི་འཇིག་
རྟེན་ན་ངའི་མགོ་བོ་ནས་འཛིན་ཅིང་སྐྲ་གཅོད་ནུས་པའི་མི་སུ་ཡང་མེད་དེ། སྔོན་བསྐལ་པ་གྲངས་མེད་པ་ནས་ཀྱང་ངས་གཙུག་པུད་བཅའ་བའི་མཐར་གཏུགས་ཟིན་པས་ན་སྤུ་གྲིས་ངའི་སྐྲ་གཅོད་པར་འགྱུར་བ་ནི་མི་སྲིད་དོ། །འདི་ནི་འཇིག་རྟེན་དང་
འཐུན་པར་བྱ་བ་ཙམ་དུ་ཟད་དེ། གཙུག་པུད་བཅའ་བ་ནི་བྱིས་པ་འབའ་ཤིག་ལ་བྱ་བ་ཡིན་ནོ། །འཛམ་བུའི་གླིང་ལ་ལར་ནི་ང་དབང་ཕྱུག་ཆེན་པོའི་ལྷ་ཁང་དུ་འགྲོ་བར་ཡང་སྟོན་ཏེ། དེར་དབང་ཕྱུག་ཆེན་པོ་དང་། ཚངས་པ་དང་། འཇིག་རྟེན་
སྐྱོང་བ་རྣམས་ཀྱིས་ང་མཐོང་ན་ངའི་ཞབས་ལ་ཕྱག་འཚལ་ཏེ་ཐལ་མོ་སྦྱར་ཞིང་འདུག་གོ། །ང་ནི་སྔོན་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་ལྷ་དང་མི་དང་ལྷ་མ་ཡིན་རྣམས་ཀྱི་ལྷའི་ཡང་ལྷ་ཡིན་པས་ན་ནམས་ཀྱང་དབང་ཕྱུག་ཆེན་པོའི་
ལྷ་ཁང་དུ་མི་འགྲོ་སྟེ། དེར་འགྲོ་བ་ལྟ་བུར་བསྟན་པ་འདི་ནི་འཇིག་རྟེན་དང་འཐུན་པའི་བྱ་བ་ཙམ་དུ་ཟད་དོ། །འཛམ་བུའི་གླིང་ལ་ལར་ནི་ངས་རྣ་བ་དབུག་པ་བསྟན་མོད་ཀྱི་ངའི་རྣ་བ་འབིགས་ནུས་པའི་མི་མེད་དོ། །འཛམ་བུའི་གླིང་ལ་ལར་ནི་ངེས་རྣ་ཆ་
གདུབ་ཀོར་སེང་གེ་ཅན་ཐོགས་པར་བསྟན་ཏེ། དེས་སེམས་ཅན་རྣམས་ཀྱིས་བྱིས་པ་འདི་ནི་རྣ་ཆ་གདུབ་ཀོར་སེང་གེ་ཅན་ཐོགས་པའོ་སྙམ་དུ་ཡང་དག་པར་ཤེས་མོད་ཀྱི་ང་ནི་སྔོན་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་བྱིས་པའི་དངོས་པོ་

49-1-58a

ལས་ལོག་པས་ན་ང་ལ་རྣ་ཆ་གདུབ་ཀོར་སེང་གེ་ཅན་བཏགས་པ་མེད་དེ། རྣ་ཆ་གདུབ་ཀོར་སེང་གེ་ཅན་ཐོགས་པར་བསྟན་པ་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །འཛམ་བུའི་གླིང་ལ་ལར་ནི་ངས་ཡི་
གེ་སློབ་པའི་སར་འགྲོ་བ་བསྟན་མོད་ཀྱི། འཇིག་རྟེན་གསུམ་ན་ངའི་མཁན་པོར་རུང་བ་མ་མཐོང་སྟེ། ང་ཉིད་སེམས་ཅན་ཐམས་ཅད་ཀྱི་མཁན་པོ་ཡིན་ནོ། །དེ་བས་ན་ངའི་མིང་ཐམས་ཅད་མཁྱེན་པ་ཞེས་བྱའོ། །ང་ནི་བསྐལ་པ་བྱེ་བ་ཕྲག་གྲངས་མེད་
པ་ནས་ཀྱང་ཡི་གེ་སློབ་པའི་ས་ན་གནས་པ་ལས་འདས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྙེས་ན། འོན་ཀྱང་སེམས་ཅན་རྣམས་ཀྱིས་ཁྱེའུ་འདི་ཡི་གེ་སློབ་པའི་སར་སོང་ངོ་སྙམ་དུ་ཡང་དག་པར་ཤེས་ཏེ་འདི་ནི་འཇིག་རྟེན་
དང་འཐུན་པར་བྱ་བ་ཙམ་དུ་ཟད་པར་ཁོང་དུ་ཆུད་པར་གྱིས་ཤིག །འཛམ་བུའི་གླིང་ལ་ལར་ནི་ངས་གླང་པོ་ཆེ་དང་། རྟ་དང་། ཤིང་རྟ་དང་། དཔུང་བུ་ཆུང་དང་། རིན་པོ་ཆེ་སྣ་ཚོགས་དང་། གཏེར་དང་། རྒྱལ་སྲིད་ཀྱི་དབང་ཕྱུག་རྣམས་ཀྱང་
བསྟན། རྒྱལ་ཚབ་བྱེད་པ་ཡང་བསྟན་ཏེ། ངས་ནི་སྔོན་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་འདོད་པའི་ལོངས་སྤྱོད་རྣམས་སྤངས་མོད་ཀྱི། སེམས་ཅན་རྣམས་ཀྱིས་རྒྱལ་ཚབ་ནི་འདོད་པ་རྣམས་ལ་ལོངས་སྤྱོད་དོ་སྙམ་དུ་ཡང་དག་
པར་ཤེས་སོ། །འཛམ་བུའི་གླིང་ལ་ལར་ནི་ངས་འཁོར་ལོས་སྒྱུར་བའི་རྒྱལ་པོར་གྱུར་པ་བསྟན་ཏེ་ངས་ནི་བསྐལ་པ་བྱེ་བ་ཕྲག་མང་པོ་གྲངས་མེད་པ་ནས་དེ་སྤངས་ནས་ཆོས་ཀྱི་འཁོར་ལོ་བསྐོར་ཏེ་ངས་དེ་བུའི་ཤ་བཞིན་དུ་བོར་ནས་རྒྱལ་སྲིད་ཀྱི་ལོངས་
སྤྱོད་ཡོངས་སུ་འཛིན་པ་སྤངས་ན་འོན་ཀྱང་སེམས་ཅན་རྣམས་ཀྱིས་འཁོར་ལོས་བསྒྱུར་བའི་རྒྱལ་པོ་སྙམ་དུ་ཡང་དག་པར་ཤེས་ཏེ། འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །འཛམ་བུའི་གླིང་ལ་ལར་ནི་ངས་རྒན་པོ་དང་། ནད་པ་དང་། 
ཤི་བ་མཐོང་ནས་སྐྱོ་བར་གྱུར་ཏེ། གར་ཐབས་ལྟ་བུའི་བདེ་བ་ཐམས་ཅད་སྤངས་ནས་རབ་ཏུ་འབྱུང་བ་བསྟན་ཏེ། སེམས་ཅན་རྣམས་ཀྱིས་ཀྱེ་མ་གཞོན་ནུ་ནི་རབ་ཏུ་བྱུང་ངོ་སྙམ་དུ་ཡང་དག་པར་ཤེས་སོ། །ངས་ནི་བསྐལ་པ་བྱེ་བ་ཕྲག་གྲངས་མེད་པ་ནས་

49-1-58b

རབ་ཏུ་བྱུང་བའི་བྱ་བ་མཐར་གཏུགས་ཟིན་མོད་ཀྱི་སྐྱོ་བར་གྱུར་ནས་རབ་ཏུ་བྱུང་བ་ལྟ་བུར་སྟོན་པ་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །ངས་བསྙེན་པར་རྫོགས་པ་ལྟ་བུར་བསྟན་པ་དེ་ཡང་འཇིག་རྟེན་ངེས་པར་བསྒྲལ་བའི་ཕྱིར་རོ། །ངས་རྒྱུན་
དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཉིད་ལ་སོགས་པ་དང་། མཐར་གྱིས་གནས་པའི་སྙོམས་པར་འཇུག་པ་རྣམས་ཀྱང་བསྟན་ཏེ། སེམས་ཅན་རྣམས་ཀྱིས་ཀྱེ་མ་མྱུར་བ་ཁོ་ནར་བླ་ན་མེད་པའི་དགྲ་
བཅོམ་པར་གྱུར་ཏོ་སྙམ་དུ་ཡང་དག་པར་ཤེས་སོ། །ང་ནི་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་དགྲ་བཅོམ་པའི་བྱ་བ་མཐར་གཏུགས་ཟིན་མོད་ཀྱི་བྱང་ཆུབ་ཀྱི་ཤིང་དྲུང་དུ་རྩྭ་བཏིང་བ་ལ་འདུག་པ་དང་། བདུད་འདུལ་བར་བསྟན་པ་འདི་ནི་འཇིག་
རྟེན་ངེས་པར་བསྒྲལ་བའི་ཕྱིར་ཏེ། བདུད་ཕམ་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་དུ་སེམས་ཅན་རྣམས་ཀྱིས་ཡང་དག་པར་ཤེས་སོ། །ང་ནི་བསྐལ་པ་བྱེ་བ་ཕྲག་གྲངས་མེད་པ་ནས་ཉོན་མོངས་པའི་རྣམ་པ་དང་། 
ལྷ་དང་རང་བཞིན་གྱི་བདུད་ཕམ་པར་བྱས་ནས་བདུད་རྩིའི་མཆོག་རྟོགས་སོ། །ངས་ནི་བཤང་བ་དང་། གཅི་བ་དང་། དབུགས་རྔུབ་པ་དང་། དབུགས་འབྱུང་བའི་བྱ་བ་སྟོན་མོད་ཀྱི་ངའི་ལུས་ལ་རྒྱུ་དང་འཐུན་པ་དང་རྣམ་པར་སྨིན་པ་མེད་དོ། །སེམས་ཅན་
རྣམས་ཀྱིས་ནི་མི་དང་འདྲའོ་སྙམ་དུ་ཡང་དག་པར་ཤེས་ཏེ་འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །སེམས་ཅན་རྣམས་ཀྱིས་ང་ཁ་ཟས་ཟའོ་སྙམ་དུ་ཡང་དག་པར་ཤེས་མོད་ཀྱི། ངའི་ལུས་ལ་བཀྲེས་པས་ཉམ་ཆུང་བ་མེད་དེ་འདི་ནི་འཇིག་
རྟེན་དང་འཐུན་པར་བྱ་བ་ཙམ་དུ་ཟད་དོ། །ངས་ནི་བསྐལ་པ་བྱེ་བ་ཕྲག་གྲངས་མེད་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒྲུབས་ཏེ་སྲེད་པ་རྣམ་པར་སྤངས་ཀྱང་ཉལ་བ་ལྟ་བུར་སྟོན་ཏེ། འོན་ཀྱང་ངའི་ལུས་ལ་གཉིད་དང་། སྐྱིགས་བུ་དང་། གླལ་བ་དང་། 
རུ་ཤིང་ན་བ་དང་། ཀླད་པ་ན་བ་རྣམས་མེད་དོ། །ཉལ་བར་བྱེད་པ་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །འགྲེང་བ་དང་། འཆག་པ་དང་། མིག་མི་འཛུམས་པ་དང་། རྐང་པ་སྨྱང་བ་དང་། ལུས་ཀྱི་སྤྱོད་ལམ་བྱེད་པར་སྣང་མོད་ཀྱི། ངའི་

49-1-59a

ལུས་ལ་དེ་ལྟ་བུའི་གནོད་པ་རྣམས་མེད་དོ། །རྐང་པ་འཁྲུ་བ་དང་། སྣུམ་གྱིས་བྱུག་པ་དང་། ཆུ་སྤྱད་པ་དང་། སོ་ཤིང་ཟ་བ་དང་། མིག་སྨན་གྱིས་སྐུད་པར་སྣང་མོད་ཀྱི་ངའི་ལུས་ལ་དེ་ལྟ་བུའི་གནོད་པ་རྣམས་མེད་དོ། །
རྐང་པ་པད་མའི་འདབ་མའི་མདོག་འདྲ་བ་དང་། ཁ་ནས་ཨུད་པ་ལའི་དྲི་འབྱུང་བ་དང་། མིག་དཔེ་མེད་པར་བཟང་བ་དེ་དག་ཀྱང་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །སེམས་ཅན་རྣམས་ཀྱིས་ནི་ཐམས་ཅད་མིའི་ཚུལ་དང་འདྲའོ་སྙམ་དུ་
ཡང་དག་པར་ཤེས་སོ། །ཕྱག་དར་ཁྲོད་ཀྱི་གོས་ས་ལས་བླངས་ཏེ་འཁྲུ་བ་ལྟ་བུར་སྣང་མོད་ཀྱི་ང་ལ་དེ་དགོས་པ་མེད་དོ། །སེམས་ཅན་རྣམས་ཀྱིས་ནི་མིའི་དངོས་པོར་ཡང་དག་པར་ཤེས་ཏེ། སྒྲ་གཅན་ཟིན་གྱི་ཕར་བསྟན་པ་དང་། ཟས་གཙང་མ་
དང་། སྒྱུ་འཕྲུལ་ཕ་མར་བསྟན་པ་ཡང་འཇིག་རྟེན་གྱི་དོན་ཡིན་ནོ། །འཇིག་རྟེན་གྱི་བདེ་བ་མྱོང་ནས་ངེས་པར་བྱུང་སྟེ་ནགས་ཚལ་དུ་རབ་ཏུ་བྱུང་བ་དང་། རྒྱལ་པོའི་བུ་གཽ་ཏ་མཱི་ཞེས་བྱ་བ་ནི་འདོད་པ་དང་། འདོད་པ་མ་ཡིན་པ་དང་། བདེ་བ་དང་། 
བདེ་བ་མ་ཡིན་པ་བྱེ་བྲག་ཕྱེད་པར་གྱུར་ནས་མྱ་ངན་ལས་འདས་པའི་བདེ་བ་ཚོལ་ལོ་ཞེས་བྱ་བ་འདི་ཡང་བྱིས་པ་སེམས་ཅན་རྣམས་ངེས་པར་བསྒྲལ་བའི་ཕྱིར་རོ། །དེ་བཞིན་གཤེགས་པ་ནི་འཁྲིག་པ་ལས་བྱུང་བ་མ་ཡིན་ཏེ་སྒྲ་གཅན་ཟིན་གྱི་ཕར་
གྱུར་པར་བསྟན་པ་དང་། རང་གི་ཕ་མ་བསྟན་པ་ཡང་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །ལྷ་དང་མི་དང་ལྷ་མ་ཡིན་རྣམས་ཀྱིས་ནི་མིའི་དེ་བཞིན་གཤེགས་པའོ་སྙམ་དུ་ཡང་དག་པར་ཤེས་སོ། །རིགས་ཀྱི་བུ་འཛམ་བུའི་གླིང་ལ་ལར་
ནི་ང་ཡང་དང་ཡང་དུ་ཡོངས་སུ་མྱ་ངན་ལས་འདའ་བ་ལྟ་བུར་སྟོན་ཏེ་འོན་ཀྱང་གཏན་དུ་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་མི་བྱེད་དོ། །རེས་འགའ་ནི་སེམས་ཅན་རྣམས་ཀྱིས་དེ་བཞིན་གཤེགས་པ་གྲོངས་སོ་སྙམ་དུ་ཡང་དག་པར་ཤེས་མོད་ཀྱི་
དེ་བཞིན་གཤེགས་པ་ནི་དུས་ཐམས་ཅད་དུ་རྟག་པ་དང་། བརྟན་པ་དང་། ཐེར་ཟུག་པ་ཡིན་ཏེ། ཡོངས་སུ་མྱ་ངན་ལས་འདའ་བར་སྟོན་པ་ནི་སངས་རྒྱས་རྣམས་ཀྱི་ཆོས་ཉིད་དོ། །འཛམ་བུའི་གླིང་ལ་ལར་ནི་སྐྱེ་བར་སྟོན་ཏེ་སེམས་ཅན་

49-1-59b

རྣམས་ཀྱིས་སྐྱེས་སོ་སྙམ་དུ་ཡང་དག་པར་ཤེས་སོ། །ང་ནི་བསྐལ་པ་བྱེ་བ་ཕྲག་གྲངས་མེད་པ་ནས་བྱ་བ་བྱས་ཟིན་མོད་ཀྱི་དེར་ཡང་གོ་འཕང་ཐམས་ཅད་ཀྱི་དོན་ཐོབ་པའི་མཐར་ཐུག་པར་བསྟན་ཏེ་འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །
འཛམ་བུའི་གླིང་ལ་ལར་ནི་ངས་ཚུལ་ཁྲིམས་འཆལ་པ་ཕམ་པ་བྱུང་བ་ལྟ་བུར་བསྟན་ཏེ། སེམས་ཅན་རྣམས་ཀྱིས་ཀྱེ་མ་ཕམ་པ་བྱུང་བའོ་སྙམ་དུ་ཡང་དག་པར་ཤེས་མོད་ཀྱི་ང་ནི་སྔན་ཆད་གཡེལ་བར་གྱུར་པ་མེད་དོ། །འཛམ་བུའི་གླིང་ལ་ལར་ནི་
ངས་བདག་ཉིད་དེ་བཞིན་གཤེགས་པ་ལ་ངན་སེམས་ཀྱིས་ཁྲག་བྱུང་བ་དང་། དགྲ་བཅོམ་པ་གསོད་པ་དང་། ཕ་མ་གསོད་པ་དང་། བདག་ཉིད་དགེ་འདུན་གྱི་དབྱེན་བྱེད་པར་བསྟན་ཏེ་སེམས་ཅན་རྣམས་ཀྱིས་ཀྱེ་མ་སེམས་ཅན་འདི་མཚམས་མེད་པ་
ལྔའི་ལས་བྱེད་པ་ཡིན་ནོ་སྙམ་དུ་ཡང་དག་པར་ཤེས་མོད་ཀྱི། ང་ཡང་དེ་ལྟ་བུའི་ལས་བྱེད་པ་མ་ཡིན་ལ་ལྷ་དང་བཅས་པའི་འཇིག་རྟེན་ན་ཡང་སུས་ཀྱང་དགེ་འདུན་འབྱེད་མི་ནུས་སོ། །འཛམ་བུའི་གླིང་ལ་ལར་ནི་ངས་དམ་པའི་ཆོས་སྤོང་བ་དང་། བདག་
ཉིད་འདོད་ཆེན་པོར་སྟོན་ཏེ། སེམས་ཅན་རྣམས་ཀྱིས་ཀྱེ་མ་སེམས་ཅན་འདི་ནི་དམ་པའི་ཆོས་སྤོང་བ་དང་འདོད་ཆེན་པའོ་སྙམ་དུ་ཡང་དག་པར་ཤེས་ལ། འདོད་ཆེན་པ་ལྟ་བུར་བསྟན་པ་ནི་མ་འོངས་པའི་སེམས་ཅན་རྣམས་ཀྱི་ཕྱིར་ཏེ། འཇིག་རྟེན་པ་ནི་
རྟག་ཏུ་འདོད་ཆེན་པ་ཡིན་གྱི། སངས་རྒྱས་ནི་འདོད་ཆེན་པ་མ་ཡིན་ནོ། །འཛམ་བུའི་གླིང་ལ་ལར་ནི་ངས་དམ་པའི་ཆོས་འཛིན་པར་བསྟན་ཏེ་སེམས་ཅན་རྣམས་ཀྱིས་ཀྱེ་མ་དམ་པའི་ཆོས་ཀྱི་ཕྱོགས་འཛིན་པའོ་སྙམ་དུ་ཡང་དག་པར་ཤེས་སོ། །
འདི་ནི་སངས་རྒྱས་རྣམས་ཀྱི་རང་བཞིན་ཏེ་འདི་ནི་ཆོས་ཉིད་ཡིན་པས་ངོ་མཚར་ཆེ་བ་མེད་དོ། །འཛམ་བུའི་གླིང་ལ་ལར་ནི་ང་བདུད་བགེགས་བྱེད་པ་ལྟ་བུར་སྟོན་ཏེ། སེམས་ཅན་རྣམས་ཀྱིས་ཀྱེ་མ་བདུད་སྡིག་ཅན་སྙམ་དུ་ཡང་དག་པར་ཤེས་ལ། 
པད་མ་ཆུས་མི་གོས་པ་བཞིན་དུ་ང་ལ་བདུད་ཀྱི་ཉེས་པས་མི་གོས་སོ། །འཛམ་བུའི་གླིང་ལ་ལར་ནི་བུད་མེད་ཀྱི་གཟུགས་ཀྱིས་འཚང་རྒྱ་བར་སྟོན་ཏེ། སེམས་ཅན་ཡིད་གཉིས་ཟ་བ་རྣམས་ཀྱིས་བུད་མེད་འཚང་རྒྱ་བར་བྱེད་དོ་སྙམ་དུ་ཡང་

49-1-60a

དག་པར་ཤེས་ལ། དེ་བཞིན་གཤེགས་པ་ནི་རྟག་ཏུ་སྐྱེས་པ་ཁོ་ན་ཡིན་བཞིན་དུ་སེམས་ཅན་རྣམས་གདུལ་བའི་ཕྱིར་གཉི་གར་ཡང་སྟོན་ཏོ། །དེ་བཞིན་དུ་གཟུགས་དུ་མའི་ཐབས་ཀྱི་ཕྱོགས་ལ་འཇུག་པ་བསྟན་ཏེ་དེ་དག་ཐམས་
ཅད་ཀྱང་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །འཛམ་བུའི་གླིང་ལ་ལར་ནི་ངས་འགྲོ་བ་བཞི་པོ་རྣམས་སུ་སྐྱེ་བར་བསྟན་ཏེ་དེའི་ལས་བྱེད་པ་ཡང་མ་ཡིན་ནོ། །དུད་འགྲོའི་སྐྱེས་གནས་སུ་འཇུག་པ་ཡང་འཇིག་རྟེན་དང་འཐུན་པར་བྱ་བ་
ཙམ་དུ་ཟད་དོ། །འཛམ་བུའི་གླིང་ལ་ལར་ནི་ངས་ཚངས་པའི་གཟུགས་བསྟན་ཏེ་ཚངས་པ་ལ་དད་པའི་སེམས་ཅན་རྣམས་ལ་བགེགས་བྱ་བ་བསྟན་ནས་དམ་པའི་ཆོས་ལ་དགོད་པར་བྱེད་ལ། དེའི་ལས་བྱེད་པ་ཡང་མ་ཡིན་ཏེ་སེམས་ཅན་
རྣམས་ཀྱིས་ཚངས་པའི་བདག་པོའོ་སྙམ་དུ་ཡང་དག་པར་ཤེས་སོ། །དེ་བཞིན་དུ་ལྷ་ཐམས་ཅད་ཀྱི་གནས་སུ་དེའི་གཟུགས་ཀྱི་བགེགས་བྱས་ནས་སེམས་ཅན་ཐམས་ཅད་དམ་པའི་ཆོས་ལ་འགོད་པར་བྱེད་དེ་སེམས་ཅན་རྣམས་ཀྱིས་ལྷ་ཐམས་
ཅད་ཀྱི་གནས་ཀྱི་བདག་པོའོ་སྙམ་དུ་ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་ངས་སྨད་འཚོང་མ་རྣམས་ངེས་པར་བསྒྲལ་བའི་ཕྱིར་སྨད་འཚོང་མའི་ཁྱིམ་དུ་འགྲོ་བ་བསྟན་ལ། ང་ལ་འདོད་པའི་ཉེས་པ་ཡང་མི་སྐྱེ་སྟེ། ཆུའི་ནང་གི་
པད་མ་བཞིན་དུ་ང་ལ་འདོད་པ་རྣམས་ཀྱི་ཉེས་པས་མི་གོས་སོ། །ང་ནི་འདོད་པ་ལ་ཆགས་པའི་སེམས་ཅན་རྣམས་འདོད་པའི་ཆུ་བོ་ལས་ངེས་པར་བསྒྲལ་བའི་ཕྱིར་བཞི་མདོ་དང་སུམ་མདོ་ཐམས་ཅད་དུ་ཡང་སྣང་མོད་ཀྱི་དེའི་ལས་བྱེད་པ་ཡང་མ་ཡིན་
ཏེ། སེམས་ཅན་རྣམས་ཀྱིས་ནི་འདི་ནི་ཡུལ་རྒྱུ་བ་ཡིན་ནོ་སྙམ་དུ་ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་དམངས་མོ་རྣམས་དམ་པའི་ཆོས་ལ་གཟུད་པའི་ཕྱིར་ང་རོལ་མོའི་གནས་སུ་འགྲོ་བར་བྱེད་མོད་ཀྱི། ང་ནི་ལས་དེ་བྱེད་པ་ཡང་མ་ཡིན་
ནོ། །འཛམ་བུའི་གླིང་ལ་ལར་ནི་བྱིས་པ་རྣམས་ངེས་པར་བསྒྲལ་བའི་ཕྱིར་ཡི་གེ་སློབ་པའི་སར་སོང་སྟེ། གྲྭ་དཔོན་བྱེད་ཅིང་བྱིས་པ་རྣམས་སློབ་པར་བྱེད་དོ། །འཛམ་བུའི་གླིང་ལ་ལར་ནི་སེམས་ཅན་དེ་དག་བསྒྲལ་བའི་ཕྱིར་ང་ཆང་འཐུང་བར་བྱེད། 

49-1-60b

རྒྱན་པོས་རྩེ་བར་བྱེད། གཡེངས་པ་ལ་དགའ་བར་བྱེད་དེ། ལས་ཆེན་པོ་དེ་དག་བྱེད་མོད་ཀྱི། ང་ནི་ལས་ཆེན་པོ་དེ་བྱེད་པ་ཡང་མ་ཡིན་ལ་སེམས་ཅན་རྣམས་ཀྱིས་ནི་འདི་ནི་ལས་དེ་བྱེད་པ་ཡིན་ནོ་སྙམ་དུ་ཡང་དག་པར་ཤེས་སོ། །འཛམ་བུའི་
གླིང་ལ་ལར་ནི་བྱ་རྒོད་དང་ཁྲ་རྣམས་ངེས་པར་བསྒྲལ་བའི་ཕྱིར་ང་དུར་ཁྲོད་དུ་འགྲོ་བར་བྱེད་མོད་ཀྱི། དེར་ང་ལྟ་བའི་འདུ་ཤེས་མི་འཇུག་གོ། །འཛམ་བུའི་གླིང་ལ་ལར་ནི་དམ་པའི་ཆོས་གནས་པར་བྱ་བའི་ཕྱིར་ང་ཁྱིམ་བདག་ཏུ་ཡང་སྟོན་ཏོ། །དམ་པའི་ཆོས་
སྐྱོང་བ་དང་། འཇིག་རྟེན་སྐྱོང་བ་བསྲུང་བའི་ཕྱིར་བློན་པོ་རྣམས་ཀྱི་ནང་དུ་བློན་པོར་བཀུར་རོ། །གཞོན་ནུ་རྣམས་ལ་དམ་པའི་ཆོས་ཡང་དག་པར་བསྟན་པའི་ཕྱིར་གཞོན་ནུ་རྣམས་ཀྱི་ནང་དུ་གཞོན་ནུར་བཀུར་རོ། །དམ་པའི་ཆོས་ཀྱི་རྒྱལ་པོའི་ཆོས་
ལུགས་ཡང་དག་པར་བསྟན་པའི་ཕྱིར་རྒྱལ་པོ་རྣམས་ཀྱི་ནང་དུ་རྒྱལ་པོར་བཀུར་རོ། །འཛམ་བུའི་གླིང་ལ་ལར་ནི་ནད་ཀྱི་བར་གྱི་བསྐལ་པའི་ནང་དུ་སེམས་ཅན་རྣམས་ལ་སྨན་བྱིན་ནས་དེ་དག་དམ་ཆོས་ལ་གཟུད་པར་བྱེད་དེ། སེམས་ཅན་རྣམས་
ཀྱིས་ནད་ཀྱི་བར་གྱི་བསྐལ་པའོ་སྙམ་དུ་ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་མུ་གེའི་བར་གྱི་བསྐལ་པའི་ནང་དུ་བཀྲེས་ཤིང་ཉམ་ཆུང་བའི་སེམས་ཅན་རྣམས་བདུད་རྩིའི་ཟས་ཀྱིས་ཚིམ་པར་བྱས་ནས་དམ་པའི་ཆོས་ལ་འཛུད་པར་
བྱེད་དེ། སེམས་ཅན་རྣམས་ཀྱིས་མུ་གེའི་བར་གྱི་བསྐལ་པའོ་སྙམ་དུ་ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་མཚོན་གྱི་བར་གྱི་བསྐལ་པ་བསྟན་ཏེ། དེ་དག་ཚོགས་ཤིང་གཅིག་ལ་གཅིག་གསོད་པའི་དུས་ལ་བབ་པ་ན་དེ་དག་དམ་པའི་
ཆོས་ལ་འཛུད་པར་བྱེད་དེ། སེམས་ཅན་རྣམས་ཀྱིས་མཚོན་གྱི་བར་གྱི་བསྐལ་པའོ་སྙམ་དུ་ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་སེམས་ཅན་རྟག་པའི་འདུ་ཤེས་ཅན་རྣམས་ལ་མི་རྟག་པའི་འདུ་ཤེས་བསྟན་པའི་ཕྱིར་སྲེག་པའི་བསྐལ་
པ་སྟོན་ཏེ། སེམས་ཅན་རྣམས་ཀྱིས་སྲེག་པའི་བསྐལ་པའོ་སྙམ་དུ་ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་སེམས་ཅན་རྣམས་ལ་སྒྲ་སྐད་བསྟན་ཏེ། དེ་དག་སྒྲ་སྐད་ཀྱིས་དྲངས་ནས་ངེས་པར་སྒྲོལ་བར་བྱེད་

49-1-61a

འཛམ་བུའི་གླིང་ལ་ལར་ནི་སེམས་ཅན་རྣམས་ངེས་པར་བསྒྲལ་བའི་ཕྱིར་བདག་ཉིད་ཁམས་བཞི་པོ་རྣམས་སུ་སྒྱུར་བར་བྱེད་ཅིང་སེམས་ཅན་རྣམས་ཀྱི་ནད་བསལ་བའི་ཕྱིར་བདག་ཉིད་སྨན་དང་ཤིང་ཐམས་ཅད་དུ་སྒྱུར་བར་
བྱེད་དོ། །འཛམ་བུའི་གླིང་ལ་ལར་ནི་ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་འབྱུང་བར་ཡང་སྟོན་ཏེ། ཐམས་ཅད་དུ་མཁན་པོ་བྱེད་ཅིང་མཆོད་པར་འགྱུར་རོ། །དེ་བཞིན་གཤེགས་པ་ནི་སྔོན་བསྐལ་པ་བྱེ་བ་ཕྲག་གྲངས་མེད་པ་ནས་རབ་ཏུ་འབྱུང་བའི་དེ་
ཁོ་ན་ཉིད་ཀྱི་དོན་མཐར་ཐུག་ཟིན་བཞིན་དུ་ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་འབྱུང་བ་སྟོན་ཏེ། དེ་དག་ངེས་པར་བསྒྲལ་བའི་ཕྱིར་རོ། །དེ་བཞིན་གཤེགས་པ་ནི་རྟག་ཏུ་རང་བཞིན་གྱི་སྐུར་གནས་མོད་ཀྱི། སེམས་ཅན་ཐམས་ཅད་ངེས་པར་བསྒྲལ་
བའི་ཕྱིར་བཟོའི་གནས་ཐམས་ཅད་དུ་ཡང་སློབ་དཔོན་བྱེད་དེ། རིག་སྔགས་དང་གསང་སྔགས་དང་སྤྲུལ་པ་ཐམས་ཅད་ཀྱང་སྟོན་ལ། ཡ་མཚན་ཅན་ཐམས་ཅད་ཀྱིས་རྒྱགས་པ་དང་། ང་རྒྱལ་བཅོམ་ནས་དེ་དག་ལ་ཤིང་བལ་ལྟ་བུར་སྙིང་པོ་མེད་པ་
ཡང་དག་པར་སྟོན་ཅིང་དེ་དག་དམ་པའི་ཆོས་ལ་འཛུད་པར་བྱེད་པ་འདི་ནི་འཇིག་རྟེན་དང་འཐུན་པར་བྱ་བ་ཡིན་ཏེ། དེར་སེམས་ཅན་ལྟ་བའི་འདུ་ཤེས་ཅན་རྣམས་ཀྱིས་སེམས་ཅན་འདི་ནི་འཇིག་རྟེན་པའོ་སྙམ་དུ་ཡང་དག་པར་ཤེས་མོད་ཀྱི་དེ་བཞིན་
གཤེགས་པ་ནི་འཇིག་རྟེན་མ་ཡིན་གྱི། འཇིག་རྟེན་ལས་འདས་པའི་ཆོས་གཟིགས་པ་མ་ཡིན་ནོ། །འཛམ་བུའི་གླིང་ལ་ལར་ནི་འཇིག་རྟེན་དང་འཐུན་པར་བྱ་བས་ངེས་པར་བསྒྲལ་བར་བྱ་བའི་ཕྱིར་བྲན་དང་བྲན་མོར་ཡང་སྟོན་ཏེ། སེམས་ཅན་རྣམས་ཀྱིས་
བྲན་དང་བྲན་མོའོ་སྙམ་དུ་ཡང་དག་པར་ཤེས་པ་དེ་ནི་རིགས་དམའ་བར་སྟོན་པ་ཡིན་ནོ། །འཛམ་བུའི་གླིང་ལ་ལར་ནི་ངས་འཇིག་རྟེན་གྱི་བྱ་བ་ཐམས་ཅད་བསྟན་ཏེ་སེམས་ཅན་རྣམས་ཀྱིས་སེམས་ཅན་འདི་ནི་འཇིག་རྟེན་ལྷུར་བྱེད་པ་ཡིན་ནོ་སྙམ་དུ་ཡང་
དག་པར་ཤེས་སོ། །དེ་ལྟར་སྟོན་དུ་ཟིན་ཀྱང་དེ་བཞིན་གཤེགས་པ་ནི་ལས་དེ་བྱེད་པ་མ་ཡིན་ཏེ་འཇིག་རྟེན་ཐམས་ཅད་དང་འཐུན་པར་བྱ་བ་ནི་འཇིག་རྟེན་བསྒྲལ་བའི་ཕྱིར་རོ། །དེ་བཞིན་དུ་བྱང་གི་སྒྲ་མི་སྙན་དང་། ཤར་གྱི་ལུས་འཕགས་དང་། ནུབ་ཀྱི་

49-1-61b

བན་ལང་སྤྱོད་རྣམས་དང་། སྲིད་པ་ཉི་ཤུ་རྩ་ལྔ་དག་ཏུ་ཡང་འཇིག་རྟེན་པ་དང་འཐུན་པར་བྱ་བའི་སྒོ་ནས་དེ་དང་དེ་དག་དེ་བཞིན་དུ་སྦྱར་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བརྗོད་པ་ཡང་དཔའ་བར་འགྲོ་བའི་ཏིང་ངེ་འཛིན་གྱི་ལུགས་བཞིན་
དུ་སྦྱར་བར་བྱའོ། །དེ་བཞིན་གཤེགས་པས་བྱ་བ་ཆེན་པོ་ཐམས་ཅད་བསྟན་པའི་ཕྱིར་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་སྟེ། འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བྱ་བ་ཆེན་པོ་ཐམས་ཅད་དང་ཆོ་འཕྲུལ་ཆེན་
པོ་དང་། མི་འཇིགས་པ་ལ་འགོད་པར་བྱེད་པས་ན་རྟག་པ་ཆེན་པོ་ཞེས་བྱ་སྟེ། ཇི་ལྟར་བྱེད་ཅེས་འདྲི་བར་མི་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྒྲ་གཅན་ཟིན་གྱི་ཕར་གྱུར་པར་བསྟན་པའི་ཐབས་
ལ་འཇུག་པ་ལྟ་བུར་འཇིག་རྟེན་དང་འཐུན་པར་མཛད་དོ་སྙམ་དུ་ཁོང་དུ་ཆུད་པར་བྱ་སྟེ། བསྐལ་པ་བྱེ་བ་ཕྲག་དུ་མ་ནས་འདོད་པའི་ཆུ་བོ་ལས་རྒལ་ཟིན་པས་ན་དེའི་ཕྱིར་དེ་བཞིན་གཤེགས་པ་ནི་རྟག་པ་དང་། བརྟན་པ་དང་། ཐེར་ཟུག་པ་ཡིན་ནོ། །གསོལ་
པ། འདིར་ཇི་ལྟར་མར་མེ་གུམ་པ་གང་དུ་འཆི་བའི་གནས་གདགས་སུ་མ་མཆིས་པར་བཀའ་སྩལ་པ་དེ་བཞིན་དུ་དེ་བཞིན་གཤེགས་པའི་མྱ་ངན་ལས་འདས་པའི་གནས་ཀྱང་དེ་དང་འདྲ་བར་གསུངས་ན། ཇི་ལྟར་དེ་བཞིན་གཤེགས་པ་རྟག་པ་དང་། 
བརྟན་པ་དང་ཐེར་ཟུག་པ་ལགས། བཀའ་སྩལ་པ། རིགས་ཀྱི་བུ་མྱ་ངན་ལས་འདས་པ་ནི་མར་མེའི་གནས་དང་འདྲ་བར་མ་བཤད་དེ། རིགས་ཀྱི་བུ་འདི་ལྟར་སྐྱེས་པའམ་བུད་མེད་གང་ཡང་རུང་བ་ཞིག་གིས་སྣོད་ཆེན་པོའམ་ཆུང་ངུ་ཡང་རུང་སྟེ། 
མར་རམ་ཏིལ་མར་གྱིས་བཀང་ནས་མར་མེ་སྦར་ན་མར་མེའི་མེ་ལྕེ་དེ་ཏིལ་མར་ཇི་སྲིད་ཡོད་པ་དེ་སྲིད་དུ་འབར་ལ། ཏིལ་མར་ཟད་ནས་མར་མེ་ཟད་པར་འགྱུར་རོ། །དེ་ལ་ཉོན་མོངས་པ་ཟད་པ་ནི་མར་མེ་ཟད་པ་དང་འདྲ་བར་བསྟན། དེ་བཞིན་གཤེགས་པ་
ནི་སྣོད་བཞིན་དུ་རྟག་པ་ཡིན་ཉོན་མོངས་པ་ཟད་པ་ནི་མར་མེ་དང་ཏིལ་མར་འདྲ་ན། ཅི་སྣོད་ཀྱང་མར་མེ་དང་མགོ་མཉམ་དུ་མེད་པར་འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། སྣོད་ནི་མ་མཆིས་པར་མི་འགྱུར་ལགས་ན། ཅི་

49-1-62a

ལགས་དེ་བཞིན་གཤེགས་པ་ཡང་སྣོད་དང་འདྲ་བར་བས་པར་འགྱུར་རམ། གལ་ཏེ་དེ་བཞིན་གཤེགས་པ་ཡང་ཏིལ་མར་གྱི་སྣོད་དང་འདྲ་ན་ནི་དེ་བཞིན་གཤེགས་པ་ཡང་ཟད་པར་འགྱུར་བར་བཀའ་སྩལ་པར་མི་འགྱུར་ལགས་སམ། བཀའ་སྩལ་པ། དེ་བཞིན་
གཤེགས་པ་ནི་སྣོད་དང་འདྲ་བ་མ་ཡིན་ཏེ། མཆོག་ཏུ་རྟག་པ་གང་ཡིན་པ་དེ་ནི་དེ་བཞིན་གཤེགས་པ་སྟེ། དེ་བས་ན་མྱ་ངན་ལས་འདས་པ་རྟག་ཏུ་མཆོག་ཏུ་བདེ་བ་ཡིན་ནོ། །རིགས་ཀྱི་བུ་གཞན་ཡང་མར་མེའི་གནས་དང་འདྲ་བ་ནི་དགྲ་བཅོམ་པ་ཡིན་ཏེ། 
དེ་བས་ན་མྱ་ངན་ལས་འདས་པའི་གནས་དགྲ་བཅོམ་པ་ཉིད་ཐོབ་པ་ནི་འབྲས་བུའི་མཆོག་ཅེས་བྱའོ། །དགྲ་བཅོམ་པ་ཐམས་ཅད་ནི་ཟང་ཟིང་ལ་ཞེན་པ་དང་བྲལ་ཏེ། ཟང་ཟིང་མེད་པ་དང་། མར་མེའི་གནས་བཞིན་དུ་མཐར་ཐུག་པ་དང་། ཟང་ཟིང་མེད་པ་
ལ་དགའ་བ་ཡིན་ནོ། །ཕྱིར་མི་འོང་བ་ཡང་ཟང་ཟིང་མེད་པའི་དོན་ཡིན་པར་ངས་དགོངས་པའི་ཚིག་གིས་བསྟན་ཏེ་མྱ་ངན་ལས་འདས་པའི་གནས་ནི་མ་ཡིན་ནོ། །གསོལ་པ། ཕྱིར་མི་འོང་བ་ཞེས་བཀའ་སྩལ་པ་དེའི་དོན་ཅི་ལགས། བཀའ་སྩལ་པ། 
ཡང་སྲིད་པ་མི་ལེན་པ་གང་ཡིན་པ་དེ་ནི་ཕྱིར་མི་འོང་བ་ཞེས་བྱའོ། །གསོལ་པ། བཅོམ་ལྡན་འདས་ཕྱིར་མི་འོང་བ་ཞེས་བགྱི་བ་ལགས་ན་ཕྱིར་མི་འོང་བ་གང་ལགས་པ་དེ་ལ་ཡང་སྲིད་པ་ལེན་པ་མཆིས་པར་འགྱུར་ན། ཅིའི་སླད་དུ་ཕྱིར་མི་འོང་བ་
ཡང་སླར་འདི་རང་བཞིན་གྱིས་མི་གཙང་བའི་སྲིན་བུ་འཚལ་བའི་ལུས་ཅན་དུ་སྐྱེ་བར་མི་འགྱུར་ལགས། བཀའ་སྩལ་པ། ལུས་དེ་ནི་མི་ལེན་མོད་ཀྱི་དུག་སྨན་བཞིན་དུ་ལུས་ལེན་ཏོ། །དེ་བས་ན་ཕྱིར་མི་འོང་བ་ཞེས་བྱའོ། །ཕྱིར་མི་འོང་བ་ཞེས་
བྱ་བ་ནི་ལུས་ཞེས་བྱ་བའི་ཐ་ཚིག་གོ། ཕྱིར་འོང་བ་ཞེས་བྱ་བ་ནི་ཕན་ཚུན་འགྲོ་ཞེས་བྱ་བའི་ཐ་ཚིག་གོ། །གསོལ་པ། བཅོམ་ལྡན་འདས་ཅི་ལགས། བཅོམ་ལྡན་འདས་ཀྱིས་བསྟན་པ་ལ་གསང་བ་མཆིས་སམ། དགོངས་པའི་ཚིག་དགོངས་པའི་
ཚིག་ཅེས་གསང་བར་མི་མཛད་དུ་གསོལ། བཅོམ་ལྡན་འདས་ཅི་ལགས། སངས་རྒྱས་ཀྱི་གསུང་མིག་འཕྲུལ་མཁན་གྱི་འཁྲུལ་འཁོར་དང་། སྒྱུ་མ་མཁན་གྱིས་བགྱིས་པའི་འཁྲུལ་འཁོར་གྱི་སྒྱུ་མའི་བུད་མེད་དང་འདྲ་ལགས་སམ། བཀའ་སྩལ་པ། 

49-1-62b

ངའི་བསྟན་པ་ལ་ནི་གསང་བ་མེད་དེ། སངས་རྒྱས་ཀྱི་གསུང་ནི་སྟོན་གྱི་ཟླ་བ་རྒྱས་པ་བཞིན་དུ་སྐྱོན་མེད་པ་དང་། མཚན་མས་མ་བཏབ་པ་དང་། རྨོངས་པ་མེད་པ་དང་། གསང་བ་དང་གསང་ཆེན་དང་བྲལ་བ་དང་། གསལ་བ་ཡིན་ནོ།། །།
བམ་པོ་དྲུག་པ། རིགས་ཀྱི་བུ་དཔེར་ན་ཁྱིམ་བདག་བྲན་གཟའ་ཅན་ནོར་བྱེ་བ་བདོག་པ་ཞིག་ལ་བུ་གཅིག་པ་སྡུག་ཅིང་ཕངས་ལ་གཅེས་ཤིང་ཡིད་དུ་འོང་བ་ཞིག་ཡོད་དེ། དེས་བུ་དེ་བུའི་སློབ་དཔོན་ལས་ཕྱིར་བཀུག་ནས་བུ་ལ་བྱམས་པའི་ཕྱིར་བདག་
ཉིད་ཀྱིས་བསྒྲིམས་ཏེ་ཡི་གེ་ཕྱེད་པ་སློབ་པར་བྱེད་ན། དེས་བསྒྲིམས་ཏེ་ཡི་གེ་ཕྱེད་པ་བསླབས་སུ་ཟིན་ཀྱང་ཅི་བརྡ་སྤྲོད་པའི་དོན་གྱིས་བྱེ་བྲག་སྟོན་པར་ནུས་སམ། བསྟན་པར་ནུས་སུ་ཟིན་ཀྱང་ཅི་དེས་ཡི་གེ་ཕྱེད་པ་བསླབས་པས་བརྡ་སྤྲོད་པའི་དོན་
ཤེས་པར་འགྱུར་རམ། ཅི་ཁྱིམ་བདག་བྲན་གཟའ་ཅན་རང་གི་བུ་ལ་གསང་བར་བྱེད་དམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། བུའི་ཤེས་པའི་རྩལ་དང་། ཡིད་རྣོ་རྟུལ་དེ་འདྲ་བ་དང་། ཤེས་པའི་རྩལ་དང་མི་ལྡན་པའི་རྒྱུས་ན་
དེ་ལ་གསང་བ་དང་འདྲ་བར་གདའ་བར་གྱུར་ལགས་སོ། །དེ་ལ་ཡིད་མི་བདེ་བ་དང་། གཡོ་བ་དང་། སེར་སྣ་གང་ལགས་པ་དེ་ནི་གསང་བ་ལགས་པར་རིག་པར་བགྱིའོ། །དད་པ་དང་དགའ་བས་བུ་གཅིག་པའི་འདུ་ཤེས་དང་ལྡན་པ་གང་ལགས་པ་དེ་ནི་
གསང་བ་ཞེས་མི་བགྱི་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་ལེགས་སོ། །སྡང་བ་དང་། གཡོ་དང་སེར་སྣ་དང་ལྡན་པ་གང་ཡིན་པ་དེ་ནི་གསང་བ་ཡིན་ཏེ། དེའི་སྟོབས་དང་བྱམས་པས་ཀྱང་ཁྱིམ་
བདག་བྲན་གཟའ་ཅན་དེ་སྟོན་པར་མི་བྱེད་པ་དེ་བཞིན་དུ་ཁྱིམ་བདག་བྲན་གཟའ་ཅན་ལྟར་ང་སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམས་པ་དང་ལྡན་མོད་ཀྱི། བྱིས་པ་དེ་དག་གིས་མི་བཟོད་པའི་ཕྱིར་ང་དགོངས་པའི་ཚིག་མི་སྟོན་
ཏེ། ངས་ཡི་གེ་ཕྱེད་པ་དང་འདྲ་བར་ནི་གསུང་རབ་ཡན་ལག་དགུ་སྟོན་ཏོ། །བརྡ་སྤྲོད་དང་འདྲ་བར་ནི་སྟོབས་བཅུ་དང་། འཕགས་པའི་བདེན་པ་བཞི་དང་། འཕགས་པའི་ལམ་ཡན་ལག་བརྒྱད་པ་དང་། ཐེག་པ་ཆེན་པོ་ཤིན་ཏུ་རྒྱས་

49-1-63a

པའི་བརྡ་སྤྲོད་པ་བསྟན་ཏོ། །རིགས་ཀྱི་བུ་གཞན་ཡང་གང་གི་ཚེ་ཡི་གེ་ཕྱེད་པ་བསླབས་ནས་སྒྲ་རིག་པའི་འོས་སུ་གྱུར་པ་དེའི་ཚེ་ཁྱིམ་བདག་བྲན་གཟའ་ཅན་གྱིས་གལ་ཏེ་བརྡ་སྤྲོད་པའི་དོན་སློབ་པར་མི་བྱེད་ན་ནི་དེ་ལྟ་ན་སེར་སྣ་བྱེད་པའི་ཕྱིར་
གསང་བ་ཞེས་བྱའོ། །གལ་ཏེ་བརྡ་སྤྲོད་པའི་དོན་བསྟན་ན་ནི་བྱིས་པས་བརྡ་སྤྲོད་པ་རྫོགས་པར་ལོབས་པར་འགྱུར་བ་དེ་བཞིན་དུ་ང་ཡང་ཉན་ཐོས་རྣམས་ལ་ཇི་སྲིད་དུ་ཐེག་པ་ཆེན་པོའི་སྣོད་དུ་མ་གྱུར་པ་དེ་སྲིད་དུ་གསུང་རབ་ཡན་ལག་དགུ་སྟོན་ཏེ། 
གལ་ཏེ་ངས་སེམས་ཅན་སྣོད་དུ་གྱུར་པ་རྣམས་ལ་ཐེག་པ་ཆེན་པོ་བསླབ་པ་གསང་བར་བྱས་ན་ནི་དེ་ལྟར་ན་ང་ལ་བརྡ་སྤྲོད་པ་དང་འདྲ་བར་གསང་བར་བྱས་སོ་ཞེས་སྨྲ་བའི་རིགས་སོ། །ད་ནི་ངས་བརྡ་སྤྲོད་པ་དང་འདྲ་བར་དེ་བཞིན་གཤེགས་པ་རྟག་པ་དང་། བརྟན་པར་
བསྟན་ཏེ། ཁྱིམ་བདག་བྲན་གཟའ་ཅན་དང་འདྲ་བར་རང་གི་སྲས་ཚར་ཕྱིན་པར་མཛད་དོ། །དེ་ལྟར་ན་རིག་པ་ཐམས་ཅད་ཚར་ཕྱིན་པར་བྱེད་པ་བཞིན་དུ་ཚར་ཕྱིན་པར་བྱེད་དོ། །རིགས་ཀྱི་བུ་གཞན་ཡང་དཔེར་ན་དབྱར་གྱི་སྤྲིན་ཆེན་པོ་རྣམས་འབྲུག་དི་རི་རི་སྒྲོགས་
ཤིང་ཆར་ཆེན་པོ་འབེབས་སུ་ཟིན་ཀྱང་སེམས་ཅན་ཁ་ཅིག་གི་ས་བོན་མ་སྐྱེས་ན་ཅི་དེ་ལ་སྤྲིན་ཆེན་པོ་རྣམས་ཀྱིས་ཉེས་སམ། ཅི་སྤྲིན་ཆེན་པོ་རྣམས་ཆར་མི་འབེབས་སམ། དེ་བཞིན་དུ་དེང་ངས་ཡོངས་སུ་མྱ་ངན་ལས་འདས་པ་ཆེན་པོ་གསང་ཆེན་མ་
ལུས་པར་བསྟན་ཀྱང་སེམས་ཅན་སྣོད་དུ་མ་གྱུར་པ་གང་ཡིན་པ་དེ་དག་གིས་མི་ཐོས་སོ། །ཡང་བཀའ་སྩལ་པ། གང་དག་ལ་ནི་ཡོངས་བསྩགས་མེད། །གང་དག་གི་ནི་ཟས་མི་རྟོགས། །མཁའ་ལ་བྱ་རྣམས་རྗེས་འདྲ་བར། །དེ་དག་རྗེས་གཅད་དཀའ་བ་
ཡིན། །བསྟན་པ་འདིའི་དོན་ཇི་ལྟ་བུ་ཞེ་ན། སུ་དག་ལ་ནི་ཡོངས་བསགས་མེད། །སུ་དག་གི་ནི་ཟོས་མི་རྟོགས། །གང་དག་གི་ནི་རྗེས་གཅད་དཀའ། །སུ་སོང་གང་དུ་སོང་བ་ན། །དེ་དག་རྗེས་གཅད་དཀའ་བ་ཡིན། །དེ་ལ་རིན་པོ་ཆེ་ལ་
སོགས་པ་ནི་བསགས་པའོ། །ཡོངས་ཤེས་བྱ་བ་ནི་ཕྲད་ཀྱི་བྱེ་བྲག་གི་ཐ་ཚིག་གོ། །ཡོངས་ཤེས་བྱ་བ་ནི་བསྡུས་པའི་དོན་ཏེ་འདིར་རྫས་བཟང་པོ་བསྒྲུབས་པའི་ཐ་ཚིག་གོ། །བསགས་པ་ཞེས་བྱ་བ་དང་། ནོར་ཞེས་བྱ་བ་ནི་དོན་གཅིག་གོ། །གང་

49-1-63b

ནོར་ཡོངས་སུ་བསགས་པར་བྱེད་པ་དེ་ནི་དེ་དག་གི་ཡོངས་སུ་བསགས་པ་ཞེས་བྱའོ། །དེ་ལ་ཡོངས་སུ་བསགས་པ་ཞེས་བྱ་བ་ནི་རྣམ་པ་གཉིས་ཏེ། འདུས་བྱས་ཡོངས་སུ་བསགས་པ་དང་། འདུས་མ་བྱས་ཡོངས་སུ་བསགས་པའོ། །དེ་ལ་ཉན་ཐོས་ནི་
འདུས་བྱས་ཡོངས་སུ་བསགས་པའི་རྣམ་པའོ། །དེ་བཞིན་གཤེགས་པ་ནི་འདུས་མ་བྱས་པའི་ཡོངས་སུ་བསགས་པའི་རྣམ་པའོ། །དགེ་འདུན་ནི་རྣམ་པ་གཉིས་ཏེ། འདུས་བྱས་ཀྱི་དགེ་འདུན་དང་། འདུས་མ་བྱས་ཀྱི་དགེ་འདུན་ནོ། །དེ་ལ་འདུས་བྱས་ཀྱི་དགེ་
འདུན་ཞེས་བྱ་བ་ནི་ཉན་ཐོས་ཀྱི་དགེ་འདུན་ཡིན་ཏེ། ཉན་ཐོས་ཀྱི་དགེ་འདུན་ལ་ནི་ཡོངས་སུ་བསགས་པ་ཡང་མེད་ན། བྲན་དང་བྲན་མོ་ལ་སོགས་པ་རྫས་ངན་པ་རྣམས་དང་མཛོད་དང་བང་བ་ཡོངས་སུ་འཛིན་པ་ལྟ་ག་ལ་ཡོད་དེ། འོས་མ་ཡིན་པས་ན་དེ་
ནི་ལན་ཚྭ་དང་། ཏིལ་ཙམ་ཡང་ཡོངས་སུ་བསགས་པར་མི་བྱེད་དོ། །གང་དག་བཅོམ་ལྡན་འདས་ཀྱིས་བདག་ཅག་ལ་བྲན་དང་བྲན་མོ་ལ་སོགས་པ་འཆང་དུ་གནང་ངོ་ཞེས་ཟེར་བ་དེ་དག་གི་ལྕེ་ནི་ལྐུག་པར་འགྱུར་སྲིད་དོ། །ཉན་ཐོས་དེ་དག་ནི་ཡོངས་སུ་
བསགས་པ་མེད་པའི་རྣམ་པ་ཡིན་ཏེ། དེ་དག་ནི་ཟས་ཡོངས་སུ་ཤེས་པའོ། །གང་དག་ཟས་ལ་ཞེན་པ་མེད་པ་དེ་དག་ནི་ཟས་ཡོངས་སུ་ཤེས་པ་ཡིན་ནོ། །དེ་དག་ནི་འགྲོ་བའི་ལམ་དུ་རྗེས་གཅད་པར་དཀའོ། །དེ་དག་ནི་མྱུར་བ་ཁོ་ནར་སངས་རྒྱས་
ཉིད་དུ་ཉེ་བར་གནས་སོ། །དེ་དག་གི་འགྲོ་བ་ནི་རྗེས་གཅད་དཀའོ་ཞེས་དེ་བཞིན་གཤེགས་པ་གསུང་ངོ་། །ཡང་བཀའ་སྩལ་པ། གལ་ཏེ་འདུས་བྱས་ཀྱི་དགེ་འདུན་ལ་ཡང་ཡོངས་སུ་བསགས་པ་མེད་ན། འདུས་མ་བྱས་པའི་དགེ་འདུན་ལྟ་ག་ལ་ཡོད། 
འདུས་མ་བྱས་པའི་དགེ་འདུན་ནི་དེ་བཞིན་གཤེགས་པ་སྟེ། དེ་བཞིན་གཤེགས་པ་ལ་གསང་བའི་ཆོས་བསྟན་པ་ག་ལ་ཡོད། གསང་བ་གང་ཡིན་པ་དེ་ནི་ཡོངས་སུ་བསགས་པའོ། །རྗེས་གཅད་དུ་མེད་པ་ནི་མི་གཡོ་བའི་བདེ་བ་སྟེ་མྱ་ངན་ལས་འདས་པའི་
དོན་ཏོ། །དེ་ལ་ནི་ནམ་མཁའ་ཡང་མེད། ལོ་དང་ཉི་མ་དང་ཟླ་བ་རྣམས་ཀྱིས་ཀྱང་བྱར་མེད། འཇུག་རིངས་དང་། སྐར་མའི་ཚོགས་རྣམས་དང་། རི་རྣམས་དང་། དུས་དང་། སྤྲིན་རྣམས་ཀྱང་མེད་དེ། སྐྱེ་བའི་རྒྱུན་ཆད་པ་འཆི་བ་དང་། ན་བ་དང་། རྒ་བ་

49-1-64a

དང་། སྲིད་པ་ཉི་ཤུ་རྩ་ལྔ་སྤངས་པ་སྡུག་བསྔལ་གྱི་རྣམ་པ་དང་ཉོན་མོངས་པ་དང་བྲལ་བ་སྟེ། དེ་བཞིན་གཤེགས་པ་རྟག་པ་དང་བརྟན་པ་དང་། བདེ་བ་དང་། མི་གཡོ་བ་དང་། གནས་མེད་པ་ནི་ཡོངས་སུ་མྱ་ངན་ལས་འདས་པ་སྟེ། 
དེར་འགྲོ་བའི་ཕྱིར་དེང་དེ་བཞིན་གཤེགས་པ་གྲོང་ཁྱེར་ཆེན་པོར་གཤེགས་སོ། །ཆེན་པོ་ཞེས་བྱ་བ་དང་། ཆེ་བ་ཞེས་བྱ་བ་ནི་དོན་གཅིག་གོ། །ཆེན་པོ་ཞེས་བྱ་བ་ནི་ལྷག་མ་དང་བཅས་པའི་ཚིག་བླ་དགས་ཏེ། འདི་ན་མི་ལ་ལ་ཚེ་དཔག་ཏུ་མེད་པར་གྱུར་ན་མི་དེ་སྐྱེས་བུ་ཆེན་པོ་ཞེས་བྱ་བའི་གྲངས་
སུ་གཏོགས་ཏེ། གལ་ཏེ་ཆོས་དང་ལྡན་ན་མི་དེ་སྐྱེས་བུ་ཐམས་ཅད་ཀྱི་མཆོག་ཡིན་ནོ། །ཡང་འདིར་སྐྱེས་བུ་ཆེན་པོའི་རྣམ་པར་རྟོགས་པ་བརྒྱད་ཀྱིས་སྐྱེས་བུ་གཅིག་པུར་འགྱུར་ཏེ། སྐྱེས་བུ་ཆེན་པོ་དུ་མ་ཡོད་པའི་ནང་ན་གང་ལ་སྐྱེས་བུ་ཆེན་པོའི་རྣམ་པར་
རྟོག་པ་བརྒྱད་ཡོད་པ་དེ་ནི་སྐྱེས་བུ་ཆེན་པོ་ཐམས་ཅད་ཀྱི་ནང་ན་ཡང་སྐྱེས་བུ་ཆེན་པོའོ་ཞེས་ངས་བཤད་པས་ན་དེའི་ཕྱིར་ཆེ་བ་ཞེས་བྱའོ། །ལྷག་མ་དང་བཅས་པའི་མྱ་ངན་ལས་འདས་པ་ཞེས་བྱ་བ་ལ་གང་ལ་རྨ་མེད་པ་དེ་ནི་མྱ་ངན་ལས་འདས་པ་ཞེས་བྱའོ། །
དེ་ཅིའི་ཕྱིར་ཞེ་ན། རིགས་ཀྱི་བུ་དཔེར་ན། འདི་ན་མི་ལ་ལ་ཞིག་གདུག་པའི་ཟུག་རྔུས་ཕོག་སྟེ། བབ་རྡོའི་གནོད་པས་ཐེབས་ནས་བབ་རྡོའི་གནོད་པས་ཐེབས་པའི་མི་དེ་ཟུག་རྔུ་འབྱིན་པའི་སྨན་པ་ཆེན་པོ་ཞིག་གིས་གསོས་ཏེ། གདུག་པའི་ཟུག་རྔུ་བསལ་ནས་
བདེ་བར་བྱས་ཏེ་དེ་གནོད་པ་མེད་པར་སྔ་མཁོ་བཞིན་དུ་བྱས་ནས་སྨན་པ་དེས་མི་དེ་བོར་ཏེ་ཡུལ་གཞན་ནམ། གྲོང་གཞན་ནམ། ཁྱིམ་གཞན་གང་ན་རྨས་པ་ཡོད་པ་དང་། གང་ན་རྨའི་ལས་བྱར་ཡོད་པ་དེ་ན་གནས་པ་དེ་བཞིན་དུ་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་སྨན་པ་ཆེན་པོ་ཟུག་རྔུ་འབྱིན་པས་ཀྱང་འཛམ་བུའི་གླིང་པའི་སེམས་ཅན་བསྐལ་པ་བྱེ་བ་ཕྲག་གྲངས་མེད་པ་ཚུན་ཆད་ནས་འདོད་ཆགས་དང་ཞེ་སྡང་དང་། གཏི་མུག་ལ་སོགས་པ་ཉོན་མོངས་པའི་དུག་གིས་
ཕོག་པའི་སེམས་ཅན་ཤིན་ཏུ་རྨས་པ་ཐམས་ཅད་ཀྱི་ཟུག་རྔུ་རྣམས་ཐེག་པ་ཆེན་པོའི་མདོའི་སྡེ་ཚན་སྣ་ཚོགས་ཀྱི་དགེ་བའི་རྩ་བའི་སྨན་རྣམས་ཀྱིས་གསོ་བར་མཛད་དོ། །གསོས་ནས་ཀྱང་དེ་རྣམས་མྱ་ངན་ལས་བཟླས་ཏེ་གང་ན་སེམས་ཅན་རྨས་པ་རྣམས་

49-1-64b

ཡོད་པ་དེར་བཅོམ་ལྡན་འདས་ཡང་དག་པར་སྣང་བར་འགྱུར་རོ། །དེ་བས་ན་མྱ་ངན་ལས་འདས་པ་ཆེན་པོ་ནི་ཡང་དག་པའི་དོན་ལ་རྟོན་པ་ཡིན་ནོ། །ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་བ་ནི་སྲིད་པ་ཐམས་ཅད་ན་ཐར་པའི་གྲོང་ཁྱེར་གྱི་ཚིག་བླ་དགས་
ཡིན་ཏེ། གང་ན་འདུལ་བར་བྱ་བ་རྣམས་ཡོད་པ་དེར་རྫོགས་པར་སངས་རྒྱས་པར་སྣང་བ་འདི་ནི་ཚིག་གྲགས་པའོ། །གསལ་བའོ། །ཡང་དག་པའི་དོན་ནི་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །གསོལ་པ། བཅོམ་ལྡན་འདས་ཅི་ལགས། 
སྨན་པས་རྨས་པ་ཐམས་ཅད་སོས་པར་བགྱིས་ནས་ཡུལ་དང་། གྲོང་ཁྱེར་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་གཞན་གང་ན་རྨས་པ་རྣམས་མཆིས་པ་དེར་སྣང་བར་འགྱུར་རོ་ཞེས་བགྱི་ལགས་སམ། བཀའ་སྩལ་པ། རིགས་ཀྱི་བུ་སྲོག་
ཆགས་རྨས་པ་ཐམས་ཅད་ཀྱི་ནད་གསོ་བར་བྱེད་ཅེས་དེ་སྐད་མ་ཟེར་ཅིག །གསོར་མི་རུང་བའི་སེམས་ཅན་གཞན་རྣམས་ནི་གསོ་བར་མི་བྱེད་དོ། །དེ་ཅིའི་ཕྱིར་ཞེ་ན། དེ་དག་གི་ནད་ནི་གསོར་མི་རུང་བ་ཡིན་ཏེ། དེ་དག་དེ་བཞིན་དུ་དེ་བཞིན་གཤེགས་པ་ནི་
གསོར་མི་རུང་བའི་ནད་འདོད་ཆེན་པ་མ་གཏོགས་པ་ནད་ཐམས་ཅད་གསོ་བར་མཛད་དེ། གང་མྱ་ངན་ལས་འདས་པ་དེ་དག་གསོས་པ་ཡིན་ནོ། །གསོལ་པ། ཐར་པ་ཇི་ལྟ་བུ་ལགས། གཟུགས་ཅན་ལགས་སམ། གཟུགས་མ་མཆིས་པ་ལགས། 
བཀའ་སྩལ་པ། ཁ་ཅིག་ནི་གཟུགས་ཅན་ནོ། །ཁ་ཅིག་ནི་གཟུགས་ཅན་མ་ཡིན་པ་སྟེ། གཟུགས་ཅན་མ་ཡིན་པ་ནི་ཉན་ཐོས་དང་རང་སངས་རྒྱས་རྣམས་ཀྱིའོ། །སངས་རྒྱས་བཅོམ་ལྡན་འདས་རྣམས་ཀྱི་ནི་གཟུགས་ཅན་ཡིན་ནོ། །ཐར་པ་དེ་ནི་
གཟུགས་དང་གཟུགས་མེད་པ་ཡིན་ལ་གཟུགས་ཡིན་ནོ་ཞེས་བྱར་ཡང་མི་རུང་ངོ་། །གསོལ་པ། ཅིའི་སླད་དུ་ལགས། བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་དཔེར་ན་འདུ་ཤེས་མེད་འདུ་ཤེས་མེད་མིན་གྱི་ལྷ་རྣམས་ཀྱི་ལུས་ནི་གཟུགས་
དང་གཟུགས་མེད་པ་ཡིན་ལ་གཟུགས་ཡིན་ནོ་ཞེས་བྱར་ཡང་མི་རུང་བ་བཞིན་ནོ། །གསོལ་པ། འདུ་ཤེས་མེད་འདུ་ཤེས་མེད་མིན་གྱི་ལྷ་རྣམས་གཟུགས་དང་གཟུགས་མ་མཆིས་པ་ལགས་ལ་གཟུགས་ཀྱང་མ་ལགས་ན། དེ་དག་ཇི་ལྟར་མཆིས་པ་དང་། 

49-1-65a

ཇི་ལྟར་རྒྱུ་བ་བསྟན་དུ་གསོལ། བཀའ་སྩལ་པ། འདི་ནི་སངས་རྒྱས་ཀྱི་ཡུལ་ཡིན་ཏེ། ཉན་ཐོས་དང་རང་སངས་རྒྱས་ཀྱི་ཡུལ་མ་ཡིན་གྱིས་ཞོག་ཤིག །དེ་བཞིན་དུ་ཐར་པ་ཡང་གཟུགས་དང་གཟུགས་མེད་པ་ཡིན་ལ་གཟུགས་
ཀྱང་མ་ཡིན་པས་ན་སངས་རྒྱས་ཀྱི་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱི་ཡུལ་མ་ཡིན་ནོ། །གསོལ་པ། བཅོམ་ལྡན་འདས་དེ་བཞིན་གཤེགས་པས་ཡོངས་སུ་མྱ་ངན་ལས་འདས་པ་ཆེན་པོའི་ཚུལ་གྱིས་ཐར་པ་བསྟན་དུ་གསོལ། བཀའ་
སྩལ་པ། རིགས་ཀྱི་བུ་ལེགས་སོ་ལེགས་སོ། །ཐར་པ་ཞེས་བྱ་བ་ནི་འཆིང་བ་ཐམས་ཅད་དང་བྲལ་བའོ། །ཡང་བཀའ་སྩལ་པ། ཐར་པ་ཞེས་བྱ་བ་གང་ཡིན་པ་དེ་ནི་མ་སྐྱེས་པའི་ཕྱིར་དེ་ནི་འཆིང་བ་ཐམས་ཅད་དང་ཤིན་ཏུ་བྲལ་བ་སྟེ། ཇི་ལྟར་ཕ་མ་
ཕྲད་པའི་ཡོན་ཏན་ལས་བུ་སྐྱེ་བ་དེ་བཞིན་དུ་སྐྱེས་པ་མ་ཡིན་ཏེ་ཐར་པ་ནི་རང་གི་ཡུལ་དུ་གནས་པའོ། །མ་སྐྱེས་པ་ཞེས་བྱ་བ་ནི་འདི་ལྟར་མར་གྱི་སྙིང་ཁུ་རང་བཞིན་གྱིས་རང་གི་ངོ་བོ་ཉིད་དུ་འདུག་པ་དེ་བཞིན་དུ་དེ་བཞིན་གཤེགས་པ་ནི་ཡབ་ཡུམ་འཁྲིག་
པ་ལས་བྱུང་བ་ཡང་མ་ཡིན་ལ། དེ་བཞིན་གཤེགས་པས་ནི་གདུལ་བར་བྱ་བའི་དབང་གིས་ཡབ་ཡུམ་གཉིས་ཀྱང་བསྟན་ཏོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པས་ཏེ་མ་བྱུང་བ་བྱུང་བའི་ཕྱིར་རོ། །དཔེར་ན་སྲན་སྡེའུ་འམ། སྲན་གྲེའུ་
དཔྱིད་ཟླ་ར་བའི་ངོ་འམ། དབྱར་གྱི་དུས་སམ། སྟོན་ཟླ་ཐ་ཆུངས་ཀྱི་ངོ་ལ་ས་བོན་བཏབ་ན་དེ་དག་ལས་མྱུ་གུ་འབྱུང་བར་འགྱུར་བ་དེ་བཞིན་དུ་ཐར་པ་ནི་དེ་ལྟ་མ་ཡིན་ནོ། །མ་བྱུང་བ་གང་ཡིན་པ་དེ་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་
གཤེགས་པ་སྟེ་མ་བྱུང་བའོ། །དེ་བཞིན་གཤེགས་པ་ནི་མ་བྱུང་བ་ཁོ་ན་སྟེ་དེ་བཞིན་གཤེགས་པ་ནི་མྱུ་གུ་ཡོད་པ་དང་། མེད་པར་འགྱུར་བ་བཞིན་དུ་ཡོངས་སུ་བརྟག་པར་མི་བྱའོ། །དེ་བཞིན་གཤེགས་པ་ནི་རང་བཞིན་གྱིས་མ་བྱུང་བ་སྟེ། དེ་བས་
ན་མ་བྱུང་བའོ། །མ་བྱུང་བ་ཞེས་བྱ་བ་ནི་མ་བྱས་པའོ། །མ་བྱས་པ་ཞེས་བྱ་བ་ནི་ཇི་ལྟར་གྲོང་ཁྱེར་དང་། གྲྭའི་ཡང་ཏོག་དང་སྒོ་ཁང་བྱེད་པ་དེ་བཞིན་དུ་ཐར་པ་ནི་དེ་ལྟ་མ་ཡིན་ཏེ། མ་བྱས་པ་གང་ཡིན་པ་དེ་ནི་ཐར་པའོ། །དེ་ནི་དེ་བཞིན་གཤེགས་པ་

49-1-65b

འོ་འདུས་མ་བྱས་ཞེས་བྱ་བ་ནི་ཇི་ལྟར་རྫ་མཁན་གྱིས་སྣོད་བྱས་ནས་དེའི་འོག་ཏུ་ཞིག་པར་འགྱུར་བ་བཞིན་དུ་ཐར་པ་ནི་དེ་ལྟ་མ་ཡིན་ནོ། །ཐར་པ་ནི་སྐྱེ་བ་ཡང་མེད། འགག་པ་ཡང་མེད་དོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པ་སྟེ། སྐྱེ་བ་ཡང་
མེད་འཆི་བ་ཡང་མེད་དོ། །གང་མ་སྐྱེས་པ་དང་། མ་ཞི་བ་དང་། རྒ་བ་མེད་པ་དང་། འཆི་བ་མེད་པ་དང་། འདུས་མ་བྱས་པ་དེ་ནི་དེ་བཞིན་གཤེགས་པ་སྟེ། དེ་བས་ན་དེ་བཞིན་གཤེགས་པ་ནི་ཡོངས་སུ་མྱ་ངན་ལས་འདས་པ་ཆེན་པོར་འགྲོ་བའོ། །
རྒ་བ་མེད་པ་དང་། འཆི་བ་མེད་པ་ཞེས་བྱ་བ་ནི་མགོ་དཀར་བ་དང་། རྒ་བ་དང་། ན་བ་དང་། འཆི་བའི་ཆོས་དང་འདུས་བྱས་ཀྱི་རང་བཞིན་གྱི་རྟོག་པ་དེ་ལྟ་བུ་ནི་ཐར་པ་མ་ཡིན་གྱི་གང་ལ་གོང་དུ་སྨོས་པ་རྣམས་མེད་པ་ནི་ཐར་པ་ཡིན་ཏེ། དེ་བས་ན་རྒ་བ་
མེད་པ་ཞེས་བྱའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པ་སྟེ་དེ་བཞིན་གཤེགས་པ་ལ་ནི་མགོ་དཀར་བ་དང་། རྒ་བ་དང་། འདུས་བྱས་རྣམ་པར་འགྱུར་བ་མེད་དོ། །དེ་བས་ན་དེ་བཞིན་གཤེགས་པ་ནི་རྒ་བ་མེད་པའི་སྐུ་ཡིན་ན་འཆི་བར་ལྟ་ག་ལ་
འགྱུར། ནད་མེད་པ་ནད་མེད་པ་ཞེས་བྱ་བ་ནི་གློ་བུར་གྱི་ནད་བཞི་བརྒྱ་རྩ་བཞིས་གནོད་པར་གྱུར་པ་དང་། ཉེས་དམིགས་དུ་མ་དང་ལྡན་པའི་ལུས་གང་ལ་མེད་པ་དེ་ལྟ་བུའི་རང་བཞིན་ཏེ། དེ་བས་ན་ཐར་པ་ནི་ནད་མེད་པའོ། །ཐར་པ་གང་ཡིན་པ་དེ་ནི་དེ་བཞིན་
གཤེགས་པ་སྟེ། དེ་བཞིན་གཤེགས་པ་ལ་ཡང་ནད་ཀྱི་བག་ཡོང་མེད་ན་ཆོས་ཀྱི་སྐུ་ལ་ནད་ག་ལ་ཡོད། དེ་བས་ན་དེ་བཞིན་གཤེགས་པ་ནི་ནད་མེད་པའོ། །འཆི་བ་མེད་པ་འཆི་བ་མེད་པ་ཞེས་བྱ་བ་ནི་གང་ལ་མིའི་ལུས་བཞིན་དུ་འཆི་བ་མེད་པའོ། །དེ་ནི་
ཐར་པ་ཡིན་ཏེ། དེ་ལ་ནི་དུས་འདི་ཙམ་གྱིས་ན་ཟད་པའི་མཐར་འགྱུར་བའམ། འཆི་བའི་མཐར་འགྱུར་རོ། །ཞེས་བྱ་བའི་མིང་ཡང་མེད་དེ་འཆི་བ་དང་བྲལ་བ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །དེ་ལྟ་བུའི་ཡོན་ཏན་དང་
ལྡན་པ་ལ་འཆི་བར་འགྱུར་བ་ཞེས་བྱ་བ་དེ་ནི་མི་སྲིད་དེ། སྐུ་རྡོ་རྗེ་ལྟར་མཁྲེགས་པ་མི་རྟག་པར་ག་ལ་ཞིག་འགྱུར་ཏེ། དེ་བས་ན་འཆི་བ་མེད་པ་ནི་དེ་བཞིན་གཤེགས་པའོ། །ཉོན་མོངས་པ་ཅན་ཉོན་མོངས་པ་ཅན་ཞེས་བྱ་བ་ལ་ཐར་པ་ནི་ནུར་ནུར་པོ་མི་གཙང་

49-1-66a

བས་མ་རུང་བར་གྱུར་པ་མ་ཡིན་ཏེ། ཐར་པ་ནི་ཇི་ལྟར་མེ་ཏོག་ཀུ་མུ་ད་དཀར་པོ་བཞིན་དུ་གསལ་བའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །འདོད་པའི་ཉེས་པ་སྣ་ཚོགས་བསྟན་པ་ནི་ཐབས་ཡིན་པར་བལྟ་བར་བྱའོ། །དེ་བས་
ན་དེ་བཞིན་གཤེགས་པ་ནི་ཉོན་མོངས་པ་ཅན་མ་ཡིན་པའོ། །ཟག་པ་མེད་པ་ཟག་པ་མེད་པ་ཞེས་བྱ་བ་ནི་རྨ་མེད་པའི་དོན་ཏེ་དེ་ནི་ཐར་པ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པ་སྟེ། དེ་བས་ན་ཟག་པ་མེད་པ་ཞེས་བྱའོ། །གནོད་པ་མེད་པ་
གནོད་པ་མེད་པ་ཞེས་བྱ་བ་ནི་ཇི་ལྟར་བཀྲེས་པས་གཡོས་བྱེད་པ་མ་མཐོང་ན་གནོད་པར་འགྱུར་བ་དེ་བཞིན་དུ་ཐར་པ་ནི་དེ་ལྟ་མ་ཡིན་ཏེ། གནོད་པ་མེད་པ་གང་ཡིན་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཞི་བ་ཞི་བ་ཞེས་
བྱ་བ་ནི་འཇིག་རྟེན་པ་རྣམས་ཀྱི་ནི་ལྷའི་གཟུགས་ལ་ཞི་བ་ཞི་བ་ཞེས་བྱ་བས་ན་དེ་ནི་བརྫུན་ཏེ་ཐར་པ་མ་ཡིན་ནོ། །རང་བཞིན་གྱིས་ཞི་བ་གང་ཡིན་པ་དེ་ནི་ཐར་པ་སྟེ། གང་གི་ཕྱིར་སེམས་ཅན་ཐམས་ཅད་ཀྱི་ཞི་བའི་མཆོག་ཡིན་པས་ན་དེའི་ཕྱིར་ཞི་བ་
ཞེས་བྱའོ། །ཞི་བ་གང་ཡིན་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །བདེ་བ་བདེ་བ་ཞེས་བྱ་བ་ནི་ཇི་ལྟར་ཆོམ་རྐུན་གྱིས་འཇིགས་ནས་ལམ་བདེ་བར་འགྲོ་བ་བཞིན་དུ་ཐར་པ་ནི་དེ་ལྟ་མ་ཡིན་ཏེ། རང་བཞིན་གྱིས་
བདེ་བ་དེ་ལ་ནི་འཇིགས་པའི་མིང་ཡང་མེད་དེ། དེ་བས་ན་བཅོས་མ་མ་ཡིན་པའི་བདེ་བ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སེམས་ཅན་ཐམས་ཅད་ལ་བདེ་བ་བྱེད་པ་ནི་དེ་བཞིན་གཤེགས་པའོ། །གཉེན་པོ་མེད་པ་
གཉེན་པོ་མེད་པ་ཞེས་བྱ་བ་ལ་གཉེན་པོ་མེད་པ་ཞེས་བྱ་བ་ནི་ཇི་ལྟར་རྒྱལ་པོ་ཤིར་དོགས་ཤིང་འཇིགས་པ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཐར་པ་ནི་ཡེ་རང་བཞིན་གྱིས་གཉེན་པོ་མེད་པའོ། །གཉེན་པོ་མེད་པ་ཞེས་བྱ་བ་ནི་འཁོར་ལོས་སྒྱུར་བའི་
རྒྱལ་པོ་ལྟ་བུ་སྟེ། དེ་ལ་གཞན་སླར་འཇིགས་པར་བྱེད་ནུས་པ་སུ་ཡང་མེད་དེ་ཡོད་མི་སྲིད་དོ། །དེ་བཞིན་དུ་ཐར་པ་ལ་ཡང་ཐར་པའི་ཆོས་གཞན་ཟླར་གྱུར་པ་མེད་དེ་ཡོད་མི་སྲིད་དོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །དེ་བཞིན་གཤེགས་

49-1-66b

པ་ཆོས་ཀྱི་འཁོར་ལོ་བསྐོར་བ་ལ་ནི་སྒྲ་གཞན་མེད་དེ། དེ་བས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་གཉེན་པོ་མེད་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །མྱ་ངན་མེད་པ་མྱ་ངན་མེད་པ་ཞེས་བྱ་བ་
ནི་གང་ལ་མྱ་ངན་མེད་པ་སྟེ། ཇི་ལྟར་རྒྱལ་པོ་དཀྲུགས་མ་བྱེད་པའི་རྒྱལ་པོ་གཞན་གྱིས་རྒྱལ་སྲིད་ཕྲོགས་ཏེ་ཡུལ་འཁོར་བཅོམ་ཞིང་བཤིག་པ་ན་ཤིན་ཏུ་མྱ་ངན་གྱིས་ཐེབས་པ་བཞིན་དུ་མྱ་ངན་ལས་འདས་པ་ནི་དེ་ལྟ་མ་ཡིན་ཏེ། ཇི་ལྟར་རྒྱལ་པོ་གཞན་
གྱིས་མ་ཚུགས་ཏེ་དགྲ་དང་བྲལ་བར་གྱུར་ནས་མྱ་ངན་མེད་པ་བཞིན་དུ་ཐར་པ་ཐོབ་པ་རྣམས་ཀྱང་མྱ་ངན་མེད་པའོ། །ཐར་པ་གང་ཡིན་པ་དེ་ནི་མྱ་ངན་ལས་འདས་པའོ། །མྱ་ངན་ལས་འདས་པ་གང་ཡིན་པ་དེ་ནི་དེ་བཞིན་གཤེགས་པའོ། །མྱ་ངན་དང་བྲལ་བ་མྱ་
ངན་དང་བྲལ་བ་ཞེས་བྱ་བ་ནི་ཇི་ལྟར་བུད་མེད་རང་གི་བུ་དམག་ཏུ་སོང་ནས་ཤིའོ་ཞེས་ཐོས་པ་ལས་ཕྱིར་འོངས་པ་མཐོང་ནས་མྱ་ངན་དང་བྲལ་བར་འགྱུར་བ་བཞིན་དུ་མྱ་ངན་ལས་འདས་པ་ནི་དེ་ལྟ་མ་ཡིན་ཏེ། ཐར་པ་ནི་རྟག་ཏུ་མྱ་ངན་དང་བྲལ་བའོ། །ཐར་པ་
གང་ཡིན་པ་དེ་ནི་དེ་བཞིན་གཤེགས་པའོ། །རྡུལ་མེད་པ་རྡུལ་མེད་པ་ཞེས་བྱ་བ་ལ་རྡུལ་ཞེས་བྱ་བ་ནི་ས་རྡུལ་དང་ཉལ་ཉིལ་ཡིན་ཏེ། ཇི་ལྟར་དཔྱིད་ཀྱི་དུས་ན་ཕྱི་དྲོ་རླུང་ལངས་པས་ས་རྡུལ་བསླང་བ་བཞིན་དུ་ཐར་པ་ནི་དེ་ལྟ་མ་ཡིན་ནོ། །རྡུལ་མེད་པ་ཞེས་
བྱ་བ་ནི་ཇི་ལྟར་རྒྱལ་པོའི་གཙུག་གི་ནོར་བུ་དག་པ་དེ་བཞིན་དུ་རང་བཞིན་གྱི་རྡུལ་མེད་པ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །རྡུལ་དང་བྲལ་བ་རྡུལ་དང་བྲལ་བ་ཞེས་བྱ་བ་ནི་ཇི་ལྟར་གསེར་ཡོངས་སུ་དག་པ་སྟེ། གསེག་མ་
དང་རྡོ་མེད་པར་གྱུར་པ་དབྱིག་ཏུ་རེད་པ་རང་བཞིན་དུ་གྱུར་པ་དེ་བཞིན་དུ་སྐྱོན་བྱང་བའི་རང་བཞིན་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སོབ་སོབ་པོ་མ་ཡིན་པ་སོབ་སོབ་པོ་མ་ཡིན་པ་ཞེས་བྱ་བ་ནི་ཁམ་པའི་ཞོའི་བུམ་པ་གས་པ་བཞིན་
དུ་ཐར་པ་ནི་དེ་ལྟ་མ་ཡིན་ཏེ། ལྕགས་དང་རྡོ་རྗེའི་བུམ་པ་བཞིན་དུ་སོབ་སོབ་པོ་མ་ཡིན་པ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སོབ་སོབ་པོ་མ་ཡིན་པའི་ཆོས་ཅན་སོབ་སོབ་པོ་མ་ཡིན་པའི་ཆོས་ཅན་ཞེས་བྱ་བ་ནི་ཇི་ལྟར་ཨེ་རན་དའི་

49-1-67a

འབྲས་བུ་བརྔས་ནས་སོ་གའི་དུས་སུ་ཁང་ཏོག་ཏུ་བཏིང་ན། ཀུན་ནས་ཙེག་ཙེག་ཟེར་ཞིང་ཀུན་ནས་འགས་པ་དེ་བཞིན་དུ་ཐར་པ་ནི་དེ་ལྟ་མ་ཡིན་ནོ། །སོབ་སོབ་པོ་མ་ཡིན་པའི་ཆོས་ཅན་ཞེས་བྱ་བ་ནི་ཇི་ལྟར་ལྕགས་དང་རྡོ་རྗེའི་བུམ་
པ་ཤིང་སྟག་པ་སྟོང་གི་མདས་འཕངས་ཀྱང་ཕིགས་པར་མི་ནུས་པ་དེ་བཞིན་དུ་སོབ་སོབ་པོ་མ་ཡིན་པའི་ཆོས་ཅན་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཅི་བྱར་ཡང་མེད་པ་ཅི་བྱར་ཡང་མེད་པ་ཞེས་བྱ་བ་ནི་ཇི་ལྟར་མི་དབུལ་པོ་
ཞིག་ལ་བུ་ལོན་ཆགས་པ་ལས་ཕྱུག་པོའི་ལག་ཏུ་འོངས་ནས་ཉོན་མོངས་སུ་ཟིན་ཀྱང་ཅི་ཡང་འཇལ་དུ་མེད་ནས་བཏང་བ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཅི་བྱར་ཡང་མེད་པ་ཞེས་བྱ་བ་ནི་ཇི་ལྟར་མི་ནོར་བྱེད་པ་བདོག་པ་སུའི་བུ་ལོན་ཡང་མ་ཆགས་
པ་དེ་བཞིན་དུ་ཆོས་བྱེ་བ་ཕྲག་མང་པོ་བདོག་པའི་མཆོག་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཅི་བྱར་ཡང་མེད་པའི་ཆོས་ཅན་ཅི་བྱར་ཡང་མེད་པའི་ཆོས་ཅན་ཞེས་བྱ་བ་ནི་ཇི་ལྟར་མི་དབུལ་པོས་རང་གི་ཁྱིམ་ན་གང་ན་ཡང་
ནོར་མེད་དེ། བདག་གིས་སྐྱིན་པོ་བླང་ངོ་སྙམ་ནས་དེས་སེམས་ཁོངས་སུ་ཆུད་པ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཅི་བྱར་ཡང་མེད་པའི་ཆོས་ཅན་ཞེས་བྱ་བ་ནི་ཇི་ལྟར་ཁྱིམ་བདག་ནོར་བྱེ་བ་བདོག་པ་ཉི་མ་དང་ཟླ་བ་ལ་ཡང་རག་མ་ལུས་ཏེ། དེ་ལྟར་འབྱོར་
པ་དང་ལྡན་པའི་ཁྱིམ་བདག་གིས་ནི་ཉི་མ་ལྷན་ནེར་འདུག་གོ་ཞེ་འམ། ཟླ་བ་ཤར་ཏོ་ཞེས་བྱ་བའི་སྒྲ་ཡང་མི་ཐོས་སོ། །དེ་ལྟར་མཆོག་ཏུ་སྐྱིད་པའི་ཁྱིམ་བདག་འཁོར་ལོས་སྒྱུར་བའི་རིགས་སུ་སྐྱེས་པ་དེ་ནི་ཕྱི་སྲིད་དུ་བྱ་བའི་ཕྱིར་གཞན་ལས་སྐྱིན་མ་ལེན་ཅེ་འམ། 
ཡང་ན་གཞན་གྱིས་འདི་ནི་ཕ་རོལ་ལས་སྐྱིན་མོ་ལེན་ཅིང་ཟའོ་ཞེས་བརྗོད་པ་མེད་དེ་དེ་ནི་མི་སྲིད་དོ། །དེ་བཞིན་དུ་ཐར་པ་ཡང་ཐར་པའི་གནས་ལེན་ཏོ་ཞེས་བྱ་བ་དེ་ནི་མི་སྲིད་དོ། །དེ་བས་ན་ཅི་བྱར་ཡང་མེད་པའི་ཆོས་ཅན་ནི་ཐར་པའོ། །ཐར་པ་གང་ཡིན་པ་དེ་ནི་དེ་
བཞིན་གཤེགས་པའོ། །གནོད་པ་མེད་པ་གནོད་པ་མེད་པ་ཞེས་བྱ་བ་ནི་ཇི་ལྟར་སོ་གའི་དུས་སུ་ཧ་ཅང་ཚ་ཆེས་པ་བསྟེན་པ་དང་། དབྱར་གྱི་དུས་སུ་ཧ་ཅང་མངར་ཆེས་པ་བསྟེན་པ་དང་། དགུན་གྱི་དུས་སུ་ཧ་ཅང་བསིལ་ཆེས་པ་བསྟེན་པས་བདག་ཉིད་གནོད་པ་

49-1-67b

རྣམས་ཀྱིས་ཉེས་པ་དེ་ལས་གནོད་པ་རྣམས་འབྱུང་བར་འགྱུར་བ་བཞིན་དུ་ཐར་པ་ནི་དེ་ལྟར་ནད་མང་པོས་གནོད་པར་འགྱུར་བ་མ་ཡིན་ནོ། །གཞན་ཡང་གནོད་པ་ཞེས་བྱ་བ་ནི་ཇི་ལྟར་ཤ་དང་ཉ་ཤ་ཟོས་པའི་འོག་ཏུ་འོ་མ་འཐུང་བ་ནི་འཆི་བར་འགྱུར་བ་བཞིན་དུ་
ཐར་པ་ནི་གནོད་པའི་ཆོས་ཅན་མ་ཡིན་ནོ། །གནོད་པ་མེད་པ་ཞེས་བྱ་བ་ནི་ཇི་ལྟར་ཁ་ཟས་འཐུན་པར་ཟ་བས་རོ་ཞིམ་པ་ཡང་མྱོང་ལ་བདུད་རྩི་ཡང་ཟོས་པར་འགྱུར་བ་དེ་བཞིན་དུ་ཐར་པ་ནི་རང་བཞིན་གྱིས་བདུད་རྩི་ལྟ་བུ་ཡིན་ཏེ། ཐར་པ་གང་ཡིན་པ་དེ་ནི་
དེ་བཞིན་གཤེགས་པའོ། །གནོད་པ་མེད་པའི་ཆོས་ཅན་གནོད་པ་མེད་པའི་ཆོས་ཅན་ཞེས་བྱ་བ་ནི་ཇི་ལྟར་ང་རྒྱལ་གྱིས་ཁེངས་པའི་མི་ང་རྒྱལ་གྱིས་དྲེགས་ཤིང་མྱོས་ནས་ང་མི་འཆིའོ་སྙམ་སྟེ། སྦྲུལ་ལམ་སྟག་ལ་འཛིན་དུ་རྩོལ་བ་ལས། དེས་ཟིན་
ནས་དུས་མ་ཡིན་པའི་འཆི་བས་འཆི་བར་འགྱུར་བ་དེ་བཞིན་དུ་ང་རྒྱལ་གྱིས་ཁེངས་པ་ནི་ཐར་པར་མི་འགྱུར་རོ། །གནོད་པ་མེད་པའི་ཆོས་ཅན་ཞེས་བྱ་བ་ནི་ཇི་ལྟར་འཁོར་ལོས་སྒྱུར་བའི་རྒྱལ་པོའི་ཁར་བ་རིན་པོ་ཆེའི་གཟི་བརྗིད་ཀྱིས་སྲོག་ཆགས་གདུག་
པ་སྦུར་བུ་དང་། སྦྲུལ་དང་། ཀ་ན་བྷ་དང་། སྡོམ་ལ་སོགས་པའི་རིགས་དགུ་བཅུ་རྩ་དྲུག་པོ་རྣམས་ཀྱིས་ཐག་རིང་པོ་ནས་དེའི་དྲི་ཚོར་བ་ཙམ་གྱིས་ཁར་བ་རིན་པོ་ཆེའི་རང་བཞིན་གྱི་དྲིས་སྐྲག་ནས་དུག་མེད་པར་འགྱུར་བ་དེ་བཞིན་དུ་ཐར་པ་ནི་རང་བཞིན་གྱིས་
སྲིད་པའི་ཉེས་པ་ཉི་ཤུ་རྩ་ལྔ་དང་བྲལ་བ་ཡིན་ཏེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཉེན་མེད་པ་ཉེན་མེད་པ་ཞེས་བྱ་བ་ལ་ཐར་པ་ནི་ཨེ་ལ་སྔོན་པོ་དང་ལྗང་གུའི་ཁ་དོག་ལྟ་བུ་མ་ཡིན་ནོ། །ཉེན་མེད་པ་ཞེས་བྱ་བ་ནི་ཇི་ལྟར་ནམ་མཁའ་ལ་ཉེན་
མེད་པ་བཞིན་དུ་ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཉེན་མེད་པའི་ཆོས་ཅན་ཉེན་མེད་པའི་ཆོས་ཅན་ཞེས་བྱ་བ་ནི་ཇི་ལྟར་རྟེན་ལ་མར་མེ་ཉེན་དུ་གྱུར་པ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཉེན་མེད་པའི་ཆོས་ཅན་ཞེས་
བྱ་བ་ནི་ཇི་ལྟར་ཟླ་བའི་འོད་སེམས་ཅན་ཐམས་ཅད་ལ་ཉེན་མེད་པ་བཞིན་དུ་ཐར་པ་ཡང་དེ་དང་འདྲ་སྟེ། སེམས་ཅན་ཐམས་ཅད་ལ་ཉེན་མེད་པའི་ཚུལ་ཅན་ཡིན་ནོ། །དེ་བས་ན་ཉེན་མེད་པ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །

49-1-68a

ཅི་ཡང་མེད་པ་ཅི་ཡང་མེད་པ་ཞེས་བྱ་བ་ནི་ཇི་ལྟར་མི་མཛའ་བོ་དང་དགྲ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཅི་ཡང་མེད་པ་ཞེས་བྱ་བ་ནི་ཇི་ལྟར་འཁོར་ལོས་སྒྱུར་བའི་རྒྱལ་པོ་ལ་དགྲ་ཡོད་ཅེས་བྱ་བ་ནི་མི་སྲིད་དེ་ཐར་པ་ཡང་དེ་དང་འདྲའོ། །
ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཅི་ཡང་མེད་པ་ཞེས་བྱ་བ་ནི་ཇི་ལྟར་རས་དཀར་པོ་དགོས་པ་འགའི་ཕྱིར་བསྒྱུར་ན་སྔོན་པོ་དང་དམར་པོར་འགྱུར་བ་བཞིན་དུ་ཐར་པ་ནི་དེ་ལྟ་མ་ཡིན་ནོ། །ཅི་ཡང་མེད་པ་ཞེས་བྱ་བ་ནི་ཇི་ལྟར་ཀླུ་ཤིང་གི་མེ་ཏོག་དྲི་ང་བར་འགྱུར་བ་འམ་སྔོན་
པོར་འགྱུར་མི་སྲིད་པ་བཞིན་དུ་ཐར་པ་ཡང་དེ་དང་འདྲ་སྟེ། ཅུང་ཟད་ཅིག་ཡོད་དོ་ཞེས་བྱ་བ་མི་སྲིད་དེ་མེ་ཏོག་དེའི་དྲི་གཅིག་པུ་ཁོ་ནར་ཟད་པ་བཞིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ངོ་མཚར་ངོ་མཚར་ཞེས་བྱ་བ་ནི་ཇི་ལྟར་ཆུའི་
ནང་ན་པད་མ་ཡོད་པ་ངོ་མཚར་མི་ཆེ་བ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ངོ་མཚར་ཞེས་བྱ་བ་ནི་ཇི་ལྟར་མེའི་ནང་དུ་མེ་ཏོག་པད་མ་རྒྱས་པ་མཐོང་ན་དགའ་བ་སྐྱེད་པ་དེ་བཞིན་དུ་ཐར་པ་ཡོད་ན་དགའ་བ་སྐྱེ་བར་འགྱུར་རོ། །ཐར་པ་གང་ཡིན་པ་དེ་ནི་དེ་བཞིན་
གཤེགས་པའོ། །རྨད་དུ་བྱུང་བ་རྨད་དུ་བྱུང་བ་ཞེས་བྱ་བ་ནི་ཇི་ལྟར་བྱིས་པའི་སོ་རྣམས་ཕྱིས་སྐྱེ་བ་དེ་བཞིན་དུ་ཐར་པ་ནི་དུས་ལ་བབ་པ་དང་། དུས་ལ་མ་བབ་པ་ལས་འགྱུར་བ་མེད་དོ། །ཡ་མཚན་ཞེས་བྱ་བ་ནི་ཇི་ལྟར་འདོད་ཆེན་པ་རྣམས་ཀྱིས་འདོད་ཆེན་
པར་ལྟུང་བ་སངས་རྒྱས་སུ་འགྱུར་ཞེས་བྱ་བ་ནི་མི་སྲིད་དོ། །གང་གི་ཚེ་དམ་པའི་ཆོས་ལ་དད་པ་དང་ལྡན་པ་འམ་དགེ་བསྙེན་དུ་གྱུར་པ་དེའི་ཚེ་ཐར་པ་ཟད་པར་འགྱུར་རོ་ཞེས་བྱ་བ་ནི་མི་སྲིད་དེ། ཁམས་དེ་ནི་རང་བཞིན་གྱིས་རྨད་དུ་བྱུང་བའོ། །དེ་བས་ན་ཐར་
པ་ནི་རྨད་དུ་བྱུང་བ་ཞེས་བྱའོ། །འདོད་ཆེན་པའི་ལྟར་དེ་བཞིན་གཤེགས་པ་ནི་ཟད་པ་མེད་དོ། །དགེ་བའི་རྩ་བའི་སེམས་ལ་དམིགས་པ་ལ་ནི་ཆོས་རྣམས་སྐྱེ་བ་མེད་དེ། སྐྱེ་བ་མེད་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་
པའོ། །དཔག་ཏུ་མེད་པ་དཔག་ཏུ་མེད་པ་ཞེས་བྱ་བ་ནི་ཇི་ལྟར་འབྲུའི་ཕུང་པོ་འམ་འབྲས་སཱ་ལུའི་ཕུང་པོ་གཞལ་དུ་ཡོད་པ་བཞིན་དུ་ཐར་པ་ནི་དེ་ལྟ་མ་ཡིན་ནོ། །དཔག་ཏུ་མེད་པ་ཞེས་བྱ་བ་ནི་ཇི་ལྟར་རྒྱ་མཚོའི་ཆུ་དཔག་ཏུ་མེད་པ་དེ་བཞིན་དུ་ཐར་པ་ཡང་

49-1-68b

དེ་དང་འདྲ་བར་དཔག་ཏུ་མེད་དོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཚད་མེད་པའི་ཆོས་ཅན་ཚད་མེད་པའི་ཆོས་ཅན་ཞེས་བྱ་བ་ནི་ཇི་ལྟར་སེམས་ཅན་གཅིག་གི་ལས་ཀྱི་རྣམ་པར་སྨིན་པ་ཚད་ཡོད་པའི་ཆོས་ཅན་ཡིན་པ་བཞིན་དུ་ཐར་པ་
ནི་དེ་ལྟ་མ་ཡིན་ཏེ། ཚད་མེད་པའི་ཆོས་ཅན་ཞེས་བྱ་བ་ནི་ཇི་ལྟར་སེམས་ཅན་རྣམས་ཀྱི་འཁོར་བའི་མཐའ་ལས་ངེས་པར་འབྱུང་བ་ཚད་མེད་པ་བཞིན་དུ་ཐར་པ་ཡང་དེ་དང་འདྲའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །མཆོག་དང་ཕུལ་
དང་གཙོ་བོ་མཆོག་དང་ཕུལ་དང་གཙོ་བོ་ཞེས་བྱ་བ་ནི་གང་ལ་མཆོག་དང་ཕུལ་དང་གཙོ་བོར་གྱུར་པའི་ཐར་པ་གཞན་མེད་པ་སྟེ། ཇི་ལྟར་རྒྱ་མཚོ་ཆེན་པོ་ལ་དེ་དང་འདྲ་བའི་ཆུ་ཆེན་པོ་གཞན་མེད་པ་བཞིན་དུ་ཐར་པ་ཡང་དེ་དང་འདྲ་སྟེ། ཐར་པ་རང་ཉིད་
མཆོག་དང་ཕུལ་དང་གཙོ་བོ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །རབ་རབ་ཅེས་བྱ་བ་ནི་ཇི་ལྟར་ནམ་མཁའི་གོང་ན་ནམ་མཁའ་གཞན་ནམ་ནམ་མཁའ་ལས་ལྷག་པའི་ཆོས་གཞན་མེད་པ་དེ་བཞིན་དུ་ཐར་པའི་གོང་ན་ཐར་
པའི་ཆོས་གཞན་མེད་དེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཀུན་ཏུ་རབ་ཀུན་ཏུ་རབ་ཅེས་བྱ་བ་ནི་ཇི་ལྟར་རི་དགས་ཐམས་ཅད་ལས་འདས་པ་ནི་སེང་གེའི་ས་ཡིན་པ་དེ་བཞིན་དུ་ཐར་པ་ནི་ཆོས་ཐམས་ཅད་ལས་འདས་ཏེ་གཅིག་ཏུ་འོད་གསལ་
བའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །བླ་མ་བླ་མ་ཞེས་བྱ་བ་ནི་ཇི་ལྟར་ཕྱོགས་ཐམས་ཅད་ཀྱི་ནང་ན་བྱང་ཕྱོགས་མཆོག་ཅེས་བྱ་བ་དེ་བཞིན་དུ་ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །བླ་ན་མེད་པ་
བླ་ན་མེད་པ་ཞེས་བྱ་བ་ནི་ཇི་ལྟར་ཡུལ་ཐམས་ཅད་ཀྱི་ནང་ན་ནི་བྱང་ཕྱོགས་པ་ལ་ཡུལ་བླ་ན་མེད་པ་ཞེས་བྱ་བ་བཞིན་དུ་ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ངེས་པ་ངེས་པ་ཞེས་བྱ་བ་ནི་ཇི་ལྟར་ལྷ་རྣམས་དང་མི་
རྣམས་ཀྱི་འཆི་བ་ནི་ངེས་ལ་སྲོག་གི་མ་ངེས་པ་སྟེ། ཐར་པ་ནི་ལྷ་དང་མི་རྣམས་འཆི་བར་ངེས་པ་བཞིན་དུ་ངེས་པ་དང་གནས་པའི་ཆོས་ཅན་ཡིན་ཏེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །མི་བརྟན་པ་མ་ཡིན་པ་མི་བརྟན་པ་མ་ཡིན་པ་

49-1-69a

ཞེས་བྱ་བ་ནི་ཇི་ལྟར་འདམ་བུ་དང་། ཨེ་རན་ད་བ་དང་། ལྦུ་བ་རྣམས་མི་བརྟན་པ་བཞིན་དུ་ཐར་པ་ནི་དེ་ལྟ་མ་ཡིན་ནོ། །མི་བརྟན་པ་ཞེས་བྱ་བ་ནི་མར་གྱི་སྙིང་ཁུ་ལྟ་བུའོ། །ཐར་པ་ནི་མི་བརྟན་པ་མ་ཡིན་པའོ། །ཐར་པ་གང་ཡིན་པ་
དེ་ནི་དེ་བཞིན་གཤེགས་པའོ། །འཇིག་པའི་ཆོས་ཅན་མ་ཡིན་པ་འཇིག་པའི་ཆོས་ཅན་མ་ཡིན་པ་ཞེས་བྱ་བ་ནི་ཇི་ལྟར་བརྩིག་ངོས་ལ་སྦྲང་བུ་འཁོད་པ་རྣམས་ཁ་ཅིག་ནི་འབྱར། ཁ་ཅིག་ནི་འཁོད། ཁ་ཅིག་ནི་འགྲོ། ཁ་ཅིག་ནི་རྩེ་བ་བཞིན་དུ་ཐར་པ་
ནི་དེ་ལྟ་མ་ཡིན་ནོ། །འཇིག་པའི་ཆོས་ཅན་མ་ཡིན་པ་ཞེས་བྱ་བ་ནི་ཇི་ལྟར་རི་མོ་མཁན་གྱིས་རི་མོ་བྲིས་པའི་བརྩིག་ངོས་ལ་དེ་དག་འཁོད་པར་མི་ནུས་ཤིང་འབྱར་བར་མི་འགྱུར་བ་དེ་བཞིན་དུ་ཐར་པ་ནི་ཉེས་པ་ཐམས་ཅད་ཀྱིས་མི་གོས་པ་སྟེ། ཐར་པ་
གང་ཡིན་པ་དེ་ནི་དེ་བཞིན་གཤེགས་པའོ། །མཐའ་ཡས་པ་མཐའ་ཡས་པ་ཞེས་བྱ་བ་ལ་ཐར་པ་ནི་གྲོང་ཕྲག་ལྟ་བུ་མ་ཡིན་ཏེ། མཐའ་ཡས་པ་ནི་ཇི་ལྟར་ནམ་མཁའ་ལ་མཐའ་མེད་པ་དེ་བཞིན་དུ་བདེ་བའི་རྣམ་པ་མཐའ་ཡས་པ་ནི་ཐར་པའོ། །
ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །བསྟན་དུ་མེད་པ་བསྟན་དུ་མེད་པ་ཞེས་བྱ་བ་ནི་ཇི་ལྟར་ནམ་མཁའ་ལ་བྱའི་རྗེས་མི་སྣང་བ་དེ་བཞིན་དུ་ཐར་པ་ནི་བརྟག་པར་དཀའ་བ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །
ཟབ་མོ་ཟབ་མོ་ཞེས་བྱ་བ་ནི་ཤིན་ཏུ་ཤ་ཐང་བས་འཇུག་པའི་ཆོས་ཅན་ཡིན་ཏེ། ཇི་ལྟར་ཕ་མ་དཀའ་བ་བྱེད་པའི་ཡོན་ཏན་རྣམས་ཤིན་ཏུ་ཤ་ཐང་བས་འཇུག་པའི་སྒོ་ནས་ཤིན་ཏུ་ཟབ་པ་དེ་བཞིན་དུ་ཐར་པ་ནི་ཟབ་པ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པ་
འོ། །ཤིན་ཏུ་བལྟ་དཀའ་བ་ཤིན་ཏུ་བལྟ་དཀའ་བ་ཞེས་བྱ་བ་ནི་ཇི་ལྟར་མིས་རང་གི་མགོ་བོའི་སྟེང་ཤིན་ཏུ་བལྟ་དཀའ་བ་དེ་བཞིན་དུ་ཐར་པ་ནི་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་ཤིན་ཏུ་བལྟ་བར་དཀའ་སྟེ། ཐར་པ་གང་ཡིན་པ་དེ་ནི་
དེ་བཞིན་གཤེགས་པའོ། །གནས་མེད་པ་གནས་མེད་པ་ཞེས་བྱ་བ་ནི་ཁྱིམ་དང་ནམ་མཁའི་ཚིག་བླ་དགས་ཏེ། ཐར་པ་ནི་དེ་ལྟ་མ་ཡིན་ནོ། །གནས་མེད་པ་ཞེས་པ་ནི་གོ་སྐབས་མེད་པའི་ཚིག་བླ་དགས་ཏེ། གང་ལ་སྲིད་པའི་གནོད་པ་ཉི་ཤུ་རྩ་ལྔ་

49-1-69b

མེད་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཉོན་མོངས་པ་མེད་པ་ཉོན་མོངས་པ་མེད་པ་ཞེས་བྱ་བ་ནི་ཇི་ལྟར་མིའི་ཆང་པར་སྐྱུ་རུ་ར་གཟུང་དུ་ཡོད་པ་བཞིན་དུ་ཐར་པ་ནི་དེ་དང་འདྲ་བར་ཅི་ཡང་གཟུང་དུ་མེད་དོ། །ཉོན་མོངས་པ་
མེད་པ་ཞེས་བྱ་བ་ནི་ཇི་ལྟར་སྒྱུ་མ་མཁན་གྱིས་སྤྲུལ་པའི་སྒྱུ་མ་ལ་ཅི་ཡང་གཟུང་དུ་མེད་པ་བཞིན་དུ་ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སྐྱོན་མེད་པའི་ལུས་སྐྱོན་མེད་པའི་ལུས་ཞེས་བྱ་བ་ནི་ཇི་ལྟར་མིའི་ལུས་ལ་སྨེ་
བ་དང་། ཤུ་བ་དང་། མཛེ་དང་། ལྤགས་པའི་ནད་དང་། སྐྱོན་རྣམས་མེད་པར་གྱུར་པ་བཞིན་དུ་ཐར་པ་ནི་དེ་ལྟ་མ་ཡིན་ནོ། །སྐྱོན་མེད་པའི་ལུས་ཞེས་བྱ་བ་ནི་ཇི་ལྟ་བའི་འོ་མ་རང་བཞིན་གྱིས་མདོག་གཅིག་པ་བཞིན་དུ་ཐར་པ་ཡང་མཚན་ཉིད་གཅིག་པ་སྟེ། 
ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །དག་པ་དག་པ་ཞེས་བྱ་བ་ནི་ཇི་ལྟར་རྙོག་པའི་དྲི་མ་དང་འདྲེས་པའི་ཆུའི་ནང་དུ་ཀ་ཏ་ཀའི་འབྲས་བུ་བདར་ན་ཆུའི་རང་བཞིན་དག་པར་འགྱུར་བ་བཞིན་དུ་ཐར་པ་ནི་དེ་ལྟ་མ་ཡིན་ནོ། །དག་པ་ཞེས་བྱ་བ་ནི་ཇི་ལྟར་
ནམ་མཁའ་ལ་ཆར་པའི་ཆུ་རོ་གཅིག་ཅིང་རྣམ་པར་དག་པ་བཞིན་དུ་ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །གྲོལ་བ་གྲོལ་བ་ཞེས་བྱ་བ་ལ་ཐར་པ་ནི་ཟླ་བ་ཚེས་བཅྭ་ལྔ་དྲི་མ་མེད་པ་དང་འདྲ་སྟེ་ཟླ་བ་སྤྲིན་གྱིས་གཡོགས་པ་ལྟ་
བུ་མ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཞི་བ་ཞི་བ་ཞེས་བྱ་བ་ནི་ཇི་ལྟར་སེམས་ཅན་རིམས་ནད་ཀྱིས་ཐེབས་པ་ལས་རིམས་ནད་དང་བྲལ་བར་འགྱུར་བ་དེ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཞི་བ་ཞེས་བྱ་བ་ལ་ཐར་པ་ནི་སེམས་ཅན་
ནད་མེད་ཅིང་གནོད་པ་མེད་པ་བཞིན་ཏེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །མཉམ་པ་ཉིད་མཉམ་པ་ཉིད་ཅེས་བྱ་བ་ནི་ཇི་ལྟར་ལུག་ཐུག་རེ་གཉིས་ཕན་ཚུན་འཐབ་པ་ན་སྟོབས་མཉམ་པ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཇི་ལྟར་མ་དང་བུ་
འཐུན་པར་སྨྲ་བ་དེ་བཞིན་དུ་ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཉེ་བར་ཞི་བ་ཉེ་བར་ཞི་བ་ཞེས་བྱ་བ་ལ་གནས་ཀྱི་མཆོག་དེ་ཐོབ་པ་ནི་གནས་གཞན་འདོད་མི་སྲིད་དོ། །ཆོག་མི་ཤེས་པ་ཞེས་བྱ་བ་ནི་ཇི་ལྟར་ཉམ་ཆུང་

49-1-70a

བའི་ཚེ་ཁ་ཟས་ཀྱི་མཆོག་ཟོས་པའི་འོག་ཏུ་དར་བ་བཏུང་བའི་སེམས་སྐྱེ་བར་འགྱུར་བ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཆད་པ་ཆད་པ་ཞེས་བྱ་བ་ལ་སྲེད་པའི་ཞགས་པ་ལྟ་བུའི་
ནང་གི་འདོད་པ་ཆད་པ་གང་ཡིན་པ་དེ་ནི་ཆད་པའི་སྒོ་ནས་ཐར་པ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཕ་རོལ་ཕ་རོལ་ཞེས་བྱ་བ་ནི་ཇི་ལྟར་ཆུ་ཀླུང་ལ་ཚུ་རོལ་དང་ཕ་རོལ་གྱི་འགྲམ་གཉིས་ཡོད་པ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཐར་
པ་ནི་ཕ་རོལ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཆུ་ཀླུང་ཞེས་བྱ་བ་ལ་ཆུ་ཀླུང་ཉིད་དཔེར་རུང་བར་ཟད་ཀྱི་འཇིག་རྟེན་ན་ཆུ་ཀླུང་གཞན་དཔེར་རུང་བ་མེད་དོ། །ཆུ་ཀླུང་ཞེས་བྱ་བ་ནི་རྒྱ་མཚོ་ལ་བྱ་སྟེ། ཆུ་ཀླུང་ཐམས་ཅད་ཀྱི་ནང་ན་རྒྱ་
མཚོ་འབའ་ཤིག་ཆུ་ཀླུང་ཡིན་པས་ན་རྒྱ་མཚོ་ནི་ཆུ་ཀླུང་ཞེས་བྱ་བའི་གྲངས་སུ་གཏོགས་སོ། །ཆུ་ཀླུང་ཞེས་བྱ་བ་ནི་སྒྲ་ཆེན་པོ་སྒྲོགས་པའི་ཕྱིར་ཏེ། ཐར་པ་ནི་ཆུ་ཀླུང་རྒྱ་མཚོའི་ཕ་རོལ་དང་འདྲའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །བཟང་
པོ་བཟང་པོ་ཞེས་བྱ་བ་ནི་གང་ལ་ཀོ་ཤ་ཏ་ཀའི་འབྲས་བུ་ལྟ་བུའི་རོ་ཚ་བ་མེད་པ་སྟེ། ཐར་པ་ནི་ཀོ་ཤ་ཏ་ཀའི་འབྲས་བུ་ལྟ་བུ་མ་ཡིན་གྱི་ཐར་པ་ནི་རྒུན་འབྲུམ་ལྟ་བུ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཇི་ལྟར་སྨན་པ་རྩི་དང་སྨན་ཐམས་
ཅད་ཀྱིས་སེམས་གནས་པར་བྱས་ནས་ནད་དོ་ཅོག་སེལ་བ་དེ་བཞིན་དུ་ཐར་པ་ཡང་ཉེས་པ་ཐམས་ཅད་དང་བྲལ་བའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །འདུན་པ་དྲག་པོ་འདུན་པ་དྲག་པོ་ཞེས་བྱ་བ་ནི་ཇི་ལྟར་གྲོང་ཆུང་ངུར་སྐྱེ་བོ་ཕལ་པོ་ཆེ་
འཇུག་པའི་སྐབས་མེད་པ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སྲིད་པ་དགའ་བ་ཟད་པ་ཞེས་བྱ་བ་ནི་སྒྱུ་མ་སྤྲུལ་པ་དང་བྲལ་བ་ལྟ་བུ་སྟེ། གང་ལ་སྐྱེས་པ་དང་བུད་མེད་འཁྲིག་པའི་ཆོས་ཅན་རྣམས་ཀྱི་ཕན་
ཚུན་དུ་གཏམ་ཟེར་བ་ཡོད་པ་བཞིན་དུ་ཐར་པ་ནི་དེ་ལྟ་མ་ཡིན་ཏེ། རང་བཞིན་གྱིས་ངོ་བོ་ཉིད་ཀྱི་ཆོས་ཅན་འདོད་ཆགས་དང་། ཞེ་སྡང་དང་གཏི་མུག་དང་བྲལ་བ་གང་ཡིན་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སྐོམ་པ་འདུལ་བ་

49-1-70b

སྐོམ་པ་འདུལ་བ་ཞེས་བྱ་བ་ནི་གང་ལ་སྲེད་པའི་བག་ཙམ་ཡང་མེད་པའོ། །ཡི་དགས་ཀྱི་སྲེད་པ་མེད་པ་ནི་ཆོས་ཀྱི་སྲེད་པའོ། །ཆོས་ཀྱི་སྲེད་པ་ཞེས་བྱ་བ་ནི་སེམས་ཅན་ཐམས་ཅད་ལ་སྙིང་བརྩེ་བའོ། །ཐར་པ་ནི་ཡི་དགས་ཀྱི་སྲེད་པ་ལྟ་བུ་མ་ཡིན་ཏེ། བདག་དང་
བདག་གིར་འཛིན་པ་དང་བྲལ་བ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །འགོག་པ་འགོག་པ་ཞེས་བྱ་བ་ནི་ཐར་པ་སྟེ་སྲིད་པ་ལ་ཞེན་པ་མེད་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །གནས་གནས་ཞེས་བྱ་བ་ནི་ཐར་
པ་སྟེ་སྲེད་པ་ཐམས་ཅད་ལས་ངེས་པར་སྒྲོལ་ཞིང་སྐྱོབ་པ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སྐྱབས་སྐྱབས་ཞེས་བྱ་བ་ནི་ཇི་ལྟར་དེ་བཞིན་གཤེགས་པ་ལ་སྐྱབས་སུ་སོང་ནས་སྐྱབས་གཞན་མི་ཚོལ་བ་ལྟ་བུའོ། །ཇི་ལྟར་རྒྱལ་པོ་ལ་སྐྱབས་
སུ་འགྲོ་བ་མི་བརྟན་པ་བཞིན་དུ་ཐར་པ་ནི་དེ་ལྟ་མ་ཡིན་ཏེ་བདེ་བ་བརྟན་པ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །དཔུང་གཉེན་དཔུང་གཉེན་ཞེས་བྱ་བ་ནི་ནགས་ཁུང་དགོན་པ་མཆོག་ཏུ་འཇིགས་པ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཇི་
ལྟར་རི་དགས་ཀྱི་རྒྱལ་པོའི་དཔུང་གཉེན་རི་དགས་གཞན་རྣམས་ལ་མེད་པ་བཞིན་ནོ། །རི་དགས་ཀྱི་རྒྱལ་པོ་ནི་འཆི་བས་འཇིགས་པ་ཐམས་ཅད་ཀྱིས་འཇིགས་པ་མེད་པ་དེ་བཞིན་དུ་ཐར་པ་ནི་དཔུང་གཉེན་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །
བདེ་བ་བདེ་བ་ཞེས་བྱ་བ་ནི་རིན་པོ་ཆེའི་གླིང་དང་འདྲ་སྟེ། དེ་བཞིན་དུ་ཐར་པ་ནི་ཆོས་ཀྱི་འབྱུང་ཁུང་ངོ་། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཉམ་ང་བ་མེད་པ་ཉམ་ང་བ་མེད་པ་ཞེས་བྱ་བ་ནི་ཇི་ལྟར་སྟག་གིས་འཇིགས་ཤིང་སྐྲག་ནས་ཁྲོན་པར་སོང་བའི་
འོག་ཏུ་ཁྲོན་པའི་ནང་ནས་བདག་འབྱིན་ནུས་པ་སུ་ཡོད་ཅེས་ཟེར་བ་དེ་བཞིན་དུ་ཐར་པ་ནི་ཁྲོན་པ་ལྟ་བུ་མ་ཡིན་ནོ། །ཉམ་ང་བ་མེད་པ་ཞེས་བྱ་བ་ནི་ཇི་ལྟར་གྲུ་ཆག་པ་ལས་གྲུ་གཞན་ཞིག་རྙེད་དེ་རྒྱ་མཚོ་ཆེན་པོ་ལས་ངེས་པར་རྒལ་ནས་ཉམ་ང་བ་མེད་ཅིང་བདེ་བར་གྱུར་
པ་དེ་བཞིན་དུ་ཐར་པ་ནི་ཉམ་ང་བ་མེད་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །གནས་བཅོམ་པ་ཞེས་བྱ་བ་ནི་གོ་སྐབས་ཟད་པ་སྟེ། ཇི་ལྟར་འོ་མ་ལས་ཞོ་འབྱུང་། ཞོ་ལས་མར་སར་འབྱུང་། མར་སར་ལས་ཞུན་མར་འབྱུང་། ཞུན་

49-1-71a

མར་ལས་མར་གྱི་སྙིང་ཁུ་འབྱུང་བ་བཞིན་དུ་ཐར་པ་ནི་གནས་ཐམས་ཅད་ཡོངས་སུ་ཆད་པ་སྟེ། མར་གྱི་སྙིང་ཁུ་ལྟར་རང་བཞིན་དུ་གནས་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ང་རྒྱལ་འདུལ་བ་ང་རྒྱལ་
འདུལ་བ་ཞེས་བྱ་བ་ནི་ཇི་ལྟར་སའི་མངའ་བདག་རྒྱལ་པོ་ང་ནི་རྒྱལ་པོ་ཐམས་ཅད་ཀྱི་མཆོག་ཡིན་ནོ་སྙམ་པའི་ང་རྒྱལ་འདུལ་བ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཐར་པ་ནི་ང་རྒྱལ་མེད་ཅིང་ང་རྒྱལ་དུ་འཛིན་པ་མེད་པའོ། །ཐར་པ་གང་ཡིན་པ་དེ་ནི་དེ་བཞིན་
གཤེགས་པའོ། །རྒྱགས་པ་འདུལ་བ་རྒྱགས་པ་འདུལ་བ་ཞེས་བྱ་བ་ནི་གང་ལ་འཁྲིག་པའི་འདུན་པའི་མིང་ཡང་མེད་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །མ་རིག་པ་འདུལ་བ་མ་རིག་པ་འདུལ་བ་ཞེས་བྱ་བ་ནི་ཇི་ལྟར་འོ་མ་
ལས་གཅིག་ནས་གཅིག་ཏུ་བརྒྱུད་དེ་དྲི་མའི་ཉེས་པ་གང་དང་གང་ཟད་པར་གྱུར་པ་དེ་དང་དེ་ལས་མར་གྱི་སྙིང་ཁུ་འབའ་ཤིག་འབྱུང་བར་འགྱུར་བ་དེ་བཞིན་དུ་མ་རིག་པ་ལས་རིག་པ་འབའ་ཤིག་འབྱུང་བར་འགྱུར་ཏེ། མ་རིག་པ་གང་ཡིན་པ་དེ་ནི་ཐར་པའོ། །ཐར་
པ་གང་ཡིན་པ་དེ་ནི་དེ་བཞིན་གཤེགས་པའོ། །བདེན་པ་བདེན་པ་ཞེས་བྱ་བ་ནི་གང་ལ་ཟླའི་ཆོས་གཞན་མེད་པ་སྟེ། གླང་པོ་ཆེའི་དགོན་པ་ན་གླང་པོ་ཆེ་གཅིག་པུ་རྒྱུ་ཞིང་གཅིག་པུ་གནས་པ་བཞིན་དུ་ཐར་པ་ཡང་དེ་དང་འདྲའོ། །ཐར་པ་གང་ཡིན་པ་དེ་ནི་དེ་བཞིན་
གཤེགས་པའོ། །རྣམ་པར་སྤོང་བ་རྣམ་པར་སྤོང་བ་ཞེས་བྱ་བ་ནི་བདག་མེད་པ་གཟུང་བར་བསྟན་ཏེ། དེ་ནི་དེ་བཞིན་གཤེགས་པའི་སྙིང་པོ་ལ་འཇུག་པའོ། །ཇི་ལྟར་ཨེ་རན་ད་དང་འདམ་བུའི་སྡོང་བུ་ནི་འབྲས་བུ་མ་གཏོགས་པར་ཐོག་ཐག་ཏུ་སྙིང་པོ་
མེད་པ་དེ་བཞིན་དུ་ལྷ་དང་མི་དང་ལྷ་མ་ཡིན་གྱི་ལུས་ཐམས་ཅད་ནི་དེ་བཞིན་གཤེགས་པའི་སྙིང་པོ་མ་གཏོགས་པ་ཐམས་ཅད་ཨེ་རན་ད་དང་འདམ་བུ་བཞིན་དུ་སྙིང་པོ་མེད་དོ། །སྲིད་པ་སྙིང་པོ་མེད་པ་ཐམས་ཅད་རྣམ་པར་སྤངས་པ་ནི་ཐར་པའོ། །ཐར་པ་
ནི་རང་ལ་བརྡ་སྤྲོད་པ་ཡིན་ཏེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སྤོང་བ་སྤོང་བ་ཞེས་བྱ་བ་ནི་ཁ་ཟས་མ་ཞུ་བས་ཁ་ཟས་མ་ཚོས་པ་སྤོང་བ་བཞིན་དུ་སྲིད་པ་ཐམས་ཅད་བཅད་པ་དང་སྤངས་པ་སྟེ། དེ་ལྟར་ན་ཐར་པ་ནི་མཁས་པའོ། །ཐར་པ་གང་

49-1-71b

ཡིན་པ་དེ་ནི་དེ་བཞིན་གཤེགས་པའོ། །རང་སངས་རྒྱས་ཀྱི་ཆོས་རང་སངས་རྒྱས་ཀྱི་ཆོས་ཤེས་བྱ་བ་ནི་ཇི་ལྟར་ཀླུ་ཤིང་གི་མེ་ཏོག་པ་མགལ་གྱི་མེ་ཏོག་མ་ཡིན་པ་བཞིན་དུ་ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཁམས་
ཁམས་ཤེས་བྱ་བ་ལ་ཁམས་དེ་ནི་སེམས་ཅན་ཐམས་ཅད་ཀྱི་ཁམས་སོ། །སྲོག་དེ་ནི་སེམས་ཅན་ཐམས་ཅད་ཀྱི་སྲོག་གོ། །ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སྐྱེ་མཆེད་སྐྱེ་མཆེད་ཅེས་བྱ་བ་ནི་གང་ལ་འབྱུང་བའི་སྒོ་
ཡོད་པ་སྟེ། བདག་མེད་པ་བསྒོམས་ནས་བདག་གི་ལམ་ལ་འཇུག་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །དགེ་བ་དགེ་བ་ཞེས་བྱ་བ་ནི་ཇི་ལྟར་རྗེས་སུ་བསྟན་པར་བྱ་བ་རྣམས་ལ་བླ་མའི་ཚིག་གཅིག་ཏུ་མེད་པ་ལྟ་བུའོ། །དགེ་བ་ཞེས་
བྱ་བ་ནི་ལེགས་པ་ཡིན་ཏེ། དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །འཇིག་རྟེན་ལས་འདས་པ་འཇིག་རྟེན་ལས་འདས་པ་ཞེས་བྱ་བ་ནི་ཆོས་ཐམས་ཅད་ཀྱི་ནང་ན་གནས་ཀྱི་དམ་པ་སྟེ། དེ་ནི་ཐར་པའོ། །ཇི་ལྟར་བཅུད་ཐམས་ཅད་ཀྱི་
ནང་ན་མཆོག་ནི་བའི་འོ་མ་ཡིན་པ་བཞིན་དུ་འཇིག་རྟེན་ལས་འདས་པ་དེ་ནི་ཐར་པ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །མི་གཡོ་བ་མི་གཡོ་བ་ཞེས་བྱ་བ་ནི་ཇི་ལྟར་སྒོ་གཏན་གྱི་རྟེན་མ་ཕྱོགས་བཞིའི་རླུང་གིས་བསྐྱོད་མི་ནུས་པ་བཞིན་དུ་ཐར་པ་
ཡང་དེ་དང་འདྲ་བར་བརྟན་ཞིང་མི་གཡོ་བ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །རྒྱ་མཚོའི་རླབས་ནི་མི་བརྟན་པའི་རང་བཞིན་ཅན་ཡིན་ཏེ་ཐར་པ་ནི་དེ་ལྟ་མ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །གནས་གནས་ཤེས་
བྱ་བ་ནི་རྒྱལ་པོའི་ཕོ་བྲང་ཁང་བཟང་འཕན་སྐྱོན་མེད་པ་དེ་ཡང་བཅོས་མ་ཡིན་ནོ། །ཐར་པ་དེ་ནི་དེ་ལྟ་མ་ཡིན་ཏེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ངེས་པ་ངེས་པ་ཞེས་བྱ་བ་ནི་ཇི་ལྟར་འཛམ་བུ་ཆུ་བོའི་གསེར་སྐྱོན་མེད་ཅིང་ཐམས་ཅད་དུ་ལས་སུ་རུང་
བ་བཞིན་དུ་ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཐར་པ་ནི་བྱིས་པའི་སྤྱོད་པ་ལྟ་བུ་མ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཤིན་ཏུ་སྦྱངས་པ་ཤིན་ཏུ་སྦྱངས་པ་ཞེས་བྱ་བ་ནི་ཇི་ལྟར་རྒྱལ་སྲིད་ཀྱི་དབང་

49-1-72a

ཕྱུག་ཐོབ་ནས་མཐུ་ཆེ་ཞིང་བག་ཡངས་སུ་འདུག་པ་བཞིན་དུ་ཕུང་པོ་ཡོངས་སུ་སྤངས་པ་ནི་ཐར་པ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །མཐར་ཐུག་པ་མཐར་ཐུག་པ་ཞེས་བྱ་བ་ནི་ཉོན་མོངས་པ་མི་གཙང་བ་ཟད་
པ་སྟེ། ཐར་པ་ནི་རྒྱལ་པོའི་བརྩོན་ར་ནས་ཕྱིན་པའི་མི་དང་འདྲའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པ་སྟེ། བཅོས་མ་མ་ཡིན་པའི་བདེ་བའོ། །འདོད་ཆགས་དང་ཞེ་སྡང་དང་གཏི་མུག་སྤོང་བ་འདོད་ཆགས་དང་ཞེ་སྡང་དང་གཏི་མུག་སྤོང་བ་ཞེས་
བྱ་བ་ནི་གསུམ་གྱི་བཏང་བ་སྟེ། ཇི་ལྟར་མི་སྦྲུལ་གདུག་པས་ཟིན་པ་བདག་ཉིད་སོས་པར་བྱ་བའི་ཕྱིར་བད་ཀན་སྐྱུག་པར་བྱེད་པ་བཞིན་དུ་ཉོན་མོངས་པའི་བད་ཀན་ཟད་པ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཉོན་མོངས་པ་སྤོང་བ་
ཉོན་མོངས་པ་སྤོང་བ་ཞེས་བྱ་བ་ལ་སྦྲུལ་གདུག་པ་འདྲ་བའི་ཉོན་མོངས་པ་ཟད་པ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཕུང་པོ་སྤོང་བ་ཕུང་པོ་སྤོང་བ་ཞེས་བྱ་བ་ལ་སྡུག་བསྔལ་ཐམས་ཅད་བོར་ཏེ་ཤས་ཆེར་བདེ་བ་ནི་ཐར་པའོ། །ཐར་
པ་གང་ཡིན་པ་དེ་ནི་དེ་བཞིན་གཤེགས་པའོ། །འདོད་ཆགས་དང་ཞེ་སྡང་དང་གཏི་མུག་ཟད་པ་འདོད་ཆགས་དང་ཞེ་སྡང་དང་གཏི་མུག་ཟད་པ་ཞེས་བྱ་བ་ལ་གསུམ་ཟད་པར་བྱས་ཏེ་རྩ་ནས་བཏོན་པ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །
ཕུང་པོ་ཐམས་ཅད་སྤངས་པ་ཕུང་པོ་ཐམས་ཅད་སྤངས་པ་ཞེས་བྱ་བ་ནི་ཉེས་པ་ཐམས་ཅད་སྤངས་པ་སྟེ། ལེགས་པར་མཐོང་བའི་ཕྱིར་རོ། །དེ་ནི་ཐར་པ་ཡིན་ཏེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །འདུས་བྱས་ཐམས་ཅད་སྤངས་པའི་
དོན་འདུས་བྱས་ཐམས་ཅད་སྤངས་པའི་དོན་ཞེས་བྱ་བ་ནི་ཐར་པ་སྟེ། དགེ་བ་ཐམས་ཅད་སྒྲུབ་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ལམ་ཆད་པ་ལམ་ཆད་པ་ཞེས་བྱ་བ་ནི་བདག་མེད་པ་བསྒོམས་ནས་རྒྱུན་མི་འཆད་པའི་ཚུལ་གྱིས་བདག་
མེད་པ་འཛིན་པ་དང་། བདག་བསྒོམས་ནས་རྒྱུན་མི་འཆད་པའི་ཚུལ་གྱིས་བདག་འཛིན་པ་དང་། གཉིས་ཀའི་ཕྱོགས་བསྒོམས་ནས་སངས་རྒྱས་ཀྱི་ཁམས་གང་ཡིན་པ་དེ་ནི་ཡོད་དོ་ཞེས་དེ་འཛིན་པ་གང་ཡིན་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་

49-1-72b

གཤེགས་པའོ། །སྟོང་པ་ཉིད་སྟོང་པ་ཉིད་ཅེས་བྱ་བ་ནི་གང་གི་ཚེ་བཙལ་ཀྱང་ཅི་ཡང་མ་རྙེད་པ་སྟེ། ཅི་ཡང་མེད་པ་ཞེས་བྱ་བ་ནི་ཅིར་བུ་པ་རྣམས་ལ་ཡང་ཡོད་མོད་ཀྱི། ཐར་པ་ནི་དེ་ལྟ་མ་ཡིན་ནོ། །སྟོང་པ་ཉིད་ཅེས་བྱ་བ་ནི་ཇི་ལྟར་སྦྲང་རྩི་དང་། ཞུན་མར་
དང་། འབྲུ་མར་དང་། ཆུ་དང་། ཞོའི་བུམ་པ་རྣམས་ལ་ཞོ་ཡོད་ཀྱང་རུང་མེད་ཀྱང་རུང་། ཞོའི་བུམ་པ་ཞེས་བྱ་བ་དང་། དེ་བཞིན་དུ་སྦྲང་རྩི་དང་། ཆུ་ཡོད་ཀྱང་རུང་མེད་ཀྱང་རུང་སྦྲང་རྩི་དང་། ཆུའི་བུམ་པ་ཞེས་བྱ་ན། ཅི་དེ་ལ་བུམ་པ་སྟོང་པ་ཞེས་བྱའམ། 
དེ་དག་མེད་པ་ལ་བུམ་པ་རང་ཉིད་སྟོང་ངམ། གཟུགས་ཀྱང་ཡོད་ཁ་དོག་ཀྱང་ཡོད་ན་ཇི་ལྟར་སྟོང་པ་ཞེས་བྱ། ཐར་པ་ནི་དེ་ལྟ་བུར་སྟོང་པ་མ་ཡིན་ཏེ། ཐར་པ་ལ་ནི་གཟུགས་དང་ཁ་དོག་ཕུན་སུམ་ཚོགས་པ་ཡང་ཡོད་ན་ཇི་ལྟར་ཞོའི་བུམ་པ་སྟོང་པ་མ་ཡིན་དུ་ཟིན་ཀྱང་
ཞོ་མེད་པའི་ཕྱིར་སྟོང་པ་ཞེས་བྱ་བ་བཞིན་དུ་ཐར་པ་ཡང་སྟོང་པ་མ་ཡིན་བཞིན་དུ་སྟོང་པ་ཞེས་བྱ་བ་སྟེ། གཟུགས་ཡོད་བཞིན་དུ་ཇི་ལྟར་སྟོང་པ་ཞེས་བྱ་ཞེ་ན། སྟོང་པ་ཞེས་བྱ་བ་ནི་ཉོན་མོངས་པའི་རྣམ་པ་དང་། སྲིད་པའི་ཐ་སྙད་ཉི་ཤུ་རྩ་ལྔ་དང་། སྡུག་བསྔལ་དང་
འཇིག་རྟེན་གྱི་ཆོས་ལུགས་དང་། ཆོ་ག་དང་། སྤྱོད་ཡུལ་འབྱུང་བ་རྣམས་མེད་པའི་ཕྱིར་ཞོའི་བུམ་པ་ཞོ་མེད་པ་བཞིན་དུ་ཐར་པ་ལ་སྟོང་པ་ཞེས་བྱ་བ་སྟེ། དེ་ལ་ནི་བུམ་པའི་གཟུགས་མི་གཡོ་བ་བཞིན་དུ་ཤས་ཆེར་བདེ་བ་དང་། དགའ་བ་དང་། རྟག་པ་དང་། བརྟན་
པ་དང་། ཐེར་ཟུག་དང་། འཇིག་རྟེན་ལས་འདས་པའི་ཆོས་དང་། ཆོ་ག་དང་སྤྱོད་ཡུལ་རྣམས་ཡོད་དོ། །ཐར་པ་ནི་བུམ་པའི་གཟུགས་བཞིན་དུ་རྟག་པ་དང་། བརྟན་པ་དང་། ཐེར་ཟུག་པ་མ་ཡིན་གྱི། བུམ་པ་ནི་ཆག་པར་འགྱུར་ཏེ་རྒྱུའི་སྒོ་ནས་བཞག་པ་ཙམ་དུ་
ཟད་དོ། །ཐར་པ་ནི་བྱས་པ་མ་ཡིན་པའི་ཕྱིར་ཆག་པར་མི་འགྱུར་ལ། ཐར་པ་གང་ཡིན་པ་དེ་ནི་བཅོས་མ་མ་ཡིན་པའི་ཁམས་ཡིན་ཏེ་དེ་ནི་དེ་བཞིན་གཤེགས་པའོ། །སྲེད་པ་ཟད་པ་སྲེད་པ་ཟད་པ་ཞེས་བྱ་བ་ནི་སངས་རྒྱས་སུ་གྱུར་པའི་མོད་ལ་བདག་དབང་པོར་གྱུར་ཅིག་ཅེའམ། 
དབང་ཕྱུག་ཆེན་པོའམ། མི་འབྱེད་ཀྱི་བདག་པོ་ཚངས་པར་གྱུར་ཅིག་ཅེས་བྱ་བའི་སྲེད་པ་དང་འདོད་པ་གཞན་དེ་ན་མེད་དེ། ཡོད་ཅེས་བྱ་བའམ། སྐྱེ་བར་འགྱུར་ཞེས་བྱ་བ་མི་སྲིད་དོ། །སྲེད་པ་ཟད་པ་གང་ཡིན་པ་དེ་ནི་སངས་རྒྱས་སོ། །དེ་ནི་ཐར་པའོ། །ཐར་པ་གང་

49-1-73a

ཡིན་པ་དེ་ནི་དེ་བཞིན་གཤེགས་པའོ། །འདོད་ཆགས་དང་བྲལ་བ་འགོག་པ་འདོད་ཆགས་དང་བྲལ་བ་འགོག་པ་ཞེས་བྱ་བ་ལ་སྲེད་པ་ཐམས་ཅད་ལ་ཞེན་པ་དང་། འདོད་པ་མ་ལུས་པ། ལུས་པ་མེད་པ། ལྷག་པ་མེད་པ། ཐམས་
ཅད་ལས་འདོད་ཆགས་དང་བྲལ་བ་རྣམས་གཏན་ཏུ་རབ་ཏུ་ཞི་བར་གྱུར་པ་ནི་ཐར་པ་ཡིན་ཏེ་འཆིང་བ་ཐམས་ཅད་འགོག་པའོ། །དེ་ལྟར་འགོག་པ་གང་ཡིན་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །མྱ་ངན་ལས་འདས་པ་མྱ་ངན་ལས་
འདས་པ་ཞེས་བྱ་བ་ནི་ཇི་ལྟར་རི་དགས་ཀྱི་ཁྱུ་རྔོན་པའི་ལག་ནས་ཤོར་བ་འཆི་བས་འཇིགས་ཤིང་སྐྲག་ནས་ཐབས་ཅི་ཡོད་པས་རྒྱུག་ཅིང་དྲང་སྲོང་གི་གནས་སུ་ཕྱིན་ནས་བདེ་བར་འགྱུར་ཞིང་དབུགས་ཕྱིན་པར་འགྱུར་བ་དེ་བཞིན་དུ་ཇི་ལྟར་དབུགས་ཕྱིན་ཅིང་
བདེ་བར་འགྱུར་བ་དེ་ལྟ་བུར་སེམས་ཅན་མང་པོ་མྱ་ངན་ལས་འདས་པ་ཟད་མི་ཤེས་པ་སྲིད་པ་མངོན་པར་འདུ་བྱེད་པ་དང་། ཉོན་མོངས་པའི་རྣམ་པའི་སྒྲ་ཐམས་ཅད་ཀྱི་ལག་ནས། གལ་ཏེ་ཤོར་ནས་འཆི་བས་འཇིགས་ཤིང་སྐྲག་སྟེ། ཐབས་ཅི་ཡོད་
པས་རྒྱུག་ཅིང་ཆོས་ཀྱི་དྲང་སྲོང་གི་གནས་དེ་བཞིན་གཤེགས་པ་ཐུབ་པའི་བཞུགས་ཡུལ་ཟླ་མེད་པའི་སྐྱབས་སུ་དོང་ནས་དབུགས་ཕྱིན་པར་གྱུར་ཏེ། དེ་དག་གང་གི་ཚེ་དབུགས་ཕྱིན་ཅིང་བདེ་བར་གྱུར་པ་དེ་ནི་མྱ་ངན་ལས་འདས་པ་ཟད་མི་ཤེས་པའི་མྱ་ངན་ལས་འདས་
པའོ།། །། བམ་པོ་བདུན་པ། དེ་ནས་བཅོམ་ལྡན་འདས་ལ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །གལ་ཏེ་དེ་ལགས་ན་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་མཁྱེན་པ་རྣམས་མ་
མཆིས་པའི་སླད་དུ་ལུས་ཡོངས་སུ་གཏོང་བའི་སྒོ་ནས་མྱ་ངན་ལས་འདས་པ་མཆོག་ཏུ་བདེ་བ་འཐོབ་པར་མི་འགྱུར་ཏེ། གསུམ་ལ་སྐྱབས་སུ་མཆིས་པ་རྣམས་མྱ་ངན་ལས་འདའ་བར་མི་འགྱུར་ལགས་སོ། །བཀའ་སྩལ་པ། ཇི་ལྟར་མི་བརྒྱལ་བ་ལས་སངས་
པའི་དྲུང་དུ་མི་དག་དོང་སྟེ། ཁྱོད་སངས་ཤིང་བདེ་བར་གྱུར་ཏམ་ཞེས་དྲིས་ན། དེ་སངས་ནས་བདག་སངས་ཏེ་བདེ་བར་གྱུར་ཏོ་ཞེས་ཟེར་ཏེ། དེ་བརྒྱལ་བ་ལས་སངས་པ་བཞིན་དུ་སྲིད་པ་ཉི་ཤུ་རྩ་ལྔ་པོ་ཐམས་ཅད་ལས་གྲོལ་ན་སངས་རྒྱས་ཀྱི་ཡོངས་སུ་མྱ་ངན་ལས་

49-1-73b

འདས་པ་ཐོབ་པ་ཡིན་ནོ། །མཆོག་ཏུ་བདེ་བ་ཞེས་བྱ་བ་དེ་ནི་དེར་ཟད་མི་ཤེས་པའི་འདུ་ཤེས་ཀྱིས་མཆོག་ཏུ་བདེ་བའི་རྣམ་པ་མང་བ་གང་ཡིན་པ་སྟེ། དེ་ནི་ཡོངས་སུ་མྱ་ངན་ལས་འདས་པ་ཡིན་ནོ། །དེ་ནི་ཐར་པ་ཡིན་ནོ། །མཆོག་ཏུ་བརྟན་པ་དང་། མི་གཡོ་བ་
དང་། བདེ་བ་དང་། རྟག་པ་མྱོང་བ་གང་ཡིན་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །དེ་ནས་བཅོམ་ལྡན་འདས་ལ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །མ་སྐྱེས་པ་དང་། མ་འགགས་པ་གང་
ལགས་པ་དེ་ཐར་པ་ལགས། དེ་དེ་བཞིན་གཤེགས་པ་ལགས་ཤེས་བགྱི་འམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ལྟ་ལོས་ཀྱང་སྟེ་དེ་ནི་ཐར་པ་ཡིན་ནོ། །དེ་ནི་དེ་བཞིན་གཤེགས་པ་ཡིན་ནོ། །གསོལ་པ། འོ་ན་ནམ་
མཁའི་ཁམས་ཀྱང་མ་སྐྱེས་པ་མ་བྱུང་བ་ལགས་ན། ཐར་པ་ཡང་དེ་དང་འདྲ། དེ་བཞིན་གཤེགས་པ་ཡང་དེ་དང་འདྲ་ཞེས་བགྱི་འམ། བཀའ་སྩལ་པ། དེ་ལྟ་མ་ཡིན་ཏེ། ཐར་པ་ནི་ནམ་མཁའི་ཁམས་དང་འདྲ་བ་མ་ཡིན་ནོ། །གསོལ་པ། འོ་ན་ཅི་
ལྟ་བུ་ལགས། བཀའ་སྩལ་པ། རིགས་ཀྱི་བུ་དཔེར་ན་བྱ་ཤང་ཤང་ཏེའུ་འམ། ཀ་ལ་པིང་ཀ་གང་གི་ཚེ་སྐད་འབྱིན་པ་དེའི་ཚེ། ཁྭ་ལྟར་སྐད་འབྱིན་ཅེས་བྱ་འམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། བྱ་གཞན་རྣམས་ཀྱི་སྐད་ནི་དེ་
དག་གི་སྐད་ཀྱི་དཔེར་ཡང་མི་རུང་ལགས་སོ། །ཁྭའི་སྐད་ནི་ཤང་ཤང་ཏེའུ་དང་ཀ་ལ་པིང་ཀའི་སྐད་ཀྱི་བརྒྱའི་ཆར་ཡང་མི་སྤྱོད། སྟོང་གི་ཆར་ཡང་མི་སྤྱོད། གྲངས་དང་། ཆ་དང་། དཔེ་དང་། རྒྱུར་ཡང་མི་བཟོད་ལགས་སོ། །བྱ་དེ་དག་ནི་དཔེ་མ་
མཆིས་པ་ལགས་སོ། །བཅོམ་ལྡན་འདས་དེ་བཞིན་གཤེགས་པའི་གསུང་ནི་རྒྱུའི་སྒོ་ནས་དཔེ་མ་མཆིས་པ་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་དེ་ལྟར་ཟབ་པར་བྱ་བའི་རིགས་ཏེ་ལེགས་སོ། །དེ་བས་
ན་ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཐར་པའི་རྒྱུ་དང་དཔེ་གཞན་ནི་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་ན་མེད་དེ། དཔེ་མེད་བཞིན་དུ་གདུལ་བར་བྱ་བའི་དབང་གིས་ཡོན་ཏན་འདི་འདྲའོ། །དེ་འདྲའོ་ཞེས་དཔེས་བསྟན་ཏོ། །

49-1-74a

ཐར་པའི་དཔེ་ནི་དེ་བཞིན་གཤེགས་པ་ཡིན་ཏེ། དེ་ཅིའི་ཕྱིར་ཞེ་ན། དེ་བཞིན་གཤེགས་པ་གང་ཡིན་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པ་སྟེ། འདི་ལ་གཉིས་སུ་བྱར་མེད་ཅིང་ཐ་དད་པར་བྱར་མེད་དོ། །རིགས་ཀྱི་བུ་དཔེར་ན་
དཔེ་མེད་བཞིན་དུ་རྒྱུའི་དོན་གྱིས་དཔེར་ལེན་པ་ཡང་ཡོད་དེ། ཀྱེ་མ་བཞིན་བཟངས་ཁྱེད་ཟླ་བ་ཉ་བཞིན་ཞེས་བྱ་བ་དང་། གླང་པོ་ཆེ་བཟང་ཁྱད་གངས་ཀྱི་རི་བཞིན་ཞེས་བྱ་མོད་ཀྱི། ཅི་ཟླ་བ་བཞིན་དང་འདྲ་འམ། བཞིན་ཡང་ཟླ་བ་དང་འདྲ་འམ། ཅི་གླང་པོ་ཆེ་རི་དང་
འདྲ་འམ། རི་ཡང་གླང་པོ་ཆེ་དང་འདྲ་འམ། རིགས་ཀྱི་བུ་དེ་བཞིན་དུ་ཐར་པ་ཡང་དཔེ་མེད་བཞིན་དུ་སེམས་ཅན་ངེས་པར་བསྒྲལ་བའི་ཕྱིར་འདིར་རྒྱུའི་དབང་གིས་དཔེས་བསྟན་པར་རིག་པར་བྱའོ། །ཆོས་ཀྱི་དེ་ཁོ་ན་ཉིད་ཀྱང་རྒྱུའི་དབང་གིས་ཆོས་ཀྱི་དེ་ཁོ་ན་ཉིད་དུ་
རིག་པར་བྱའོ། །གསོལ་པ། ཅིའི་སླད་དུ་དེ་བཞིན་གཤེགས་པ་རྣམ་པ་གཉིས་སུ་སྟོན་ལགས། བཀའ་སྩལ་པ། རིགས་ཀྱི་བུ་གཞན་ཡང་དཔེར་ན་མི་ལ་ལ་ཞིག་རལ་གྲི་ཐོགས་ནས་ངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་གསད་དོ་སྙམ་སྟེ་གསོད་པར་བྱེད་ལ། དེ་བཞིན་གཤེགས་པ་ནི་ལོག་པ་ཅུང་ཟད་ཀྱང་མི་མཛད་དེ། ཞུམ་པ་མེད་ཅིང་དགྱེས་བཞིན་དུ་བཞུགས་ན། ཅི་མི་དེ་མཚམས་མེད་པ་བྱེད་པ་ཞེས་བྱ་འམ་འོན་ཏེ་མི་བྱ། གསོལ་པ། དངོས་པོའི་སྒོ་ནས་མཚམས་མེད་པ་
བགྱིས་པ་ཞེས་མི་བགྱི་ལགས་སོ། །དེ་ཅིའི་སླད་དུ་ཞེ་ན། བསགས་པའི་ཁམས་མ་བཤིག་པས་ན་དངོས་པོའི་སྒོ་ནས་མཚམས་མེད་པ་བགྱིད་པ་མ་ལགས་སོ། །དེ་བཞིན་གཤེགས་པའི་སྐུ་ལ་ནི་བསགས་པའི་ཁམས་ཀྱི་བག་ཀྱང་མ་མཆིས་ཏེ། ཆོས་ཀྱི་ཁམས་
ལགས་ན་ཇི་ལྟར་བགྲོངས་སུ་རུང་། དེ་བས་ན་སེམས་བསྐྱེད་པ་དང་བཙལ་བ་ཙམ་ལས་མཚམས་མེད་པ་བགྱིད་པ་ཞེས་བགྱི་སྟེ། འདིར་རྒྱུའི་དབང་གིས་ཆོས་ཀྱི་དེ་ཁོ་ན་ཉིད་རིག་པར་བགྱི་བ་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །
ངས་ཀྱང་ཚིག་དེ་སྐད་དུ་སྨྲ་བར་བསམས་སོ། །རིགས་ཀྱི་བུ་གཞན་ཡང་འདི་ན་མི་སྡིག་ཅན་ལ་ལ་ཞིག་བདག་གི་མ་གསད་དོ་སྙམ་ནས་དགོན་པ་ཞིག་ན་ཁྲེ་རྒོད་དང་སྲན་ཆུང་གི་གཡུལ་དུ་བྱ་ར་བྱས་ནས་མ་དེར་འོངས་པ་དང་། ཁྱོད་ཀྱིས་ངའི་ཐུགས་པ་ལེགས་པར་

49-1-74b

ཁྱེར་ཏེ་མ་འོངས་སོ་ཞེས་ཟེར་ཏེ། དགྲ་སྟ་བདར་ནས་གསད་པར་བྱས་པ་དང་། དགྲ་སྟ་བདར་བའི་བར་དེའི་སྐབས་སུ་དེའི་མ་སྐྲག་ནས་སོག་མའི་ཕུང་པོའི་ནང་དུ་ཞུགས་སོ། །དེ་ནས་དེ་དགྲ་སྟ་ཐོགས་ཏེ་སོག་མའི་ཕུང་པོ་ལ་བསྣུན་ནས་ད་ནི་བདག་གི་མ་ཤིའོ་སྙམ་སྟེ། 
མི་གཞན་གྱིས་འཇིགས་ནས་སོག་མ་ལེགས་པར་མ་བརྟགས་སོ། །དེ་ནས་མ་དེ་དེའི་ནང་ནས་བྱུང་སྟེ་སོང་ངོ་། །དེ་ནས་དེ་བདག་གི་མ་ཤི་ཟིན་ནོ་སྙམ་སྟེ་སེམས་དགའ་བར་གྱུར་ན། མཚམས་མེད་པ་བྱེད་པ་ཞེས་བྱ་འམ། འོན་ཏེ་མི་བྱ། གསོལ་པ། མ་སོད་
པ་ཞེས་མི་བགྱི་ལགས་སོ། །ཡང་གསོལ་པ་ཅི་ལགས། མཚམས་མ་མཆིས་པའི་ལས་ཀྱི་རྒྱུའི་དངོས་པོ་ཞུ་བར་འཚལ་ལམ། བཀའ་སྩལ་པ། ཕ་མའི་ཕུང་པོ་བཤིག་པས་མཚམས་མེད་པ་བྱེད་པ་ཞེས་བྱ་བས་དེའི་ཕྱིར་དེ་མཚམས་མེད་པ་བྱེད་པ་
ནི་མ་ཡིན་གྱི། མ་གསོད་པའི་སེམས་བསྐྱེད་པ་བརྩལ་བས་ན་མཚམས་མེད་པ་བྱེད་པ་དང་འདྲ་བ་ཡིན་ནོ། །ཕུང་པོ་དང་ཁམས་དང་སྐྱེ་མཆེད་ཀྱི་དངོས་པོ་མ་བཤིག་གི་བར་དུ་མཚམས་མེད་པ་བྱེད་པ་རྫོགས་པ་ཞེས་མི་བྱ་སྟེ། འདིར་རྒྱུའི་དབང་གིས་ཆོས་དེ་
ཁོ་ན་ཉིད་རིག་པར་བྱའོ། །གསོལ་པ། བཅོམ་ལྡན་འདས་ལེགས་ལགས་སོ། །ལེགས་ལགས་སོ། །དེ་ལྟར་རྒྱུའི་དབང་གིས་རིག་པར་ཡང་བགྱི། རིག་པར་ཡང་མི་བགྱི་ལགས་སོ། །བཀའ་སྩལ་པ། རིགས་ཀྱི་བུ་དེ་བཞིན་དུ་ངས་རྒྱུའི་དབང་གིས་ཐར་པ་
བརྗོད་པ་ཡིན་ནོ། །རྒྱུའི་སྒོ་ནས་མྱ་ངན་ལས་འདས་པ་ཡོན་ཏན་དཔག་ཏུ་མེད་པ་དང་ལྡན་པ་དཔེ་མེད་པ་ཁོ་ན་ཡིན་ནོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོར་འགྲོ་བ་ཡང་ཡོན་ཏན་དཔག་ཏུ་མེད་པ་དང་ལྡན་པ་ཡིན་ནོ། །དེ་བཞིན་གཤེགས་
པ་ཡོངས་སུ་མྱ་ངན་ལས་འདའ་བར་མཛད་དེ། དེ་བས་ན་ཡོངས་སུ་མྱ་ངན་ལས་འདས་པ་ཆེན་པོའི་དོན་ནི་དེ་ཡིན་ནོ། །གསོལ་པ། དེ་བཞིན་གཤེགས་པ་ནི་ཟད་པར་འགྱུར་བ་མ་ལགས་སོ། །དེ་བཞིན་གཤེགས་པ་ནི་སྐུ་ཚེ་ཟད་མི་ཤེས་པ་ལགས་པར་
བལྟ་བར་བགྱིའོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །དམ་པའི་ཆོས་སྲུང་བས་ནི་དེ་སྐད་བྱ་བའི་རིགས་སོ། །བདག་གི་ཐེ་ཚོམ་ངེས་པར་བྱེད་འདོད་པས་ནི་དེ་ལྟར་བྱ་བའི་རིགས་སོ། །དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་

49-1-75a

པོ་ནི་སྣ་གྲངས་འདི་བཞིས་ཆོས་སྟོན་པར་བྱེད་དོ། །བྱང་ཆུབ་སེམས་དཔའ་སྣ་གྲངས་བཞིས་ཆོས་སྟོན་པའི་ལེའུ་སྟེ་བཞི་པའོ།། །། ཡོངས་སུ་མྱ་ངན་ལས་འདས་པ་ཆེན་པོའི་མདོ་འདི་ལ་དམ་པའི་ཆོས་ཀྱི་ཚུལ་ཐོབ་པ་
དང་དམ་པའི་ཆོས་འབྱིན་པ་དང་། རྟེན་དུ་གྱུར་པའི་གང་ཟག་བཞི་ཡོད་དེ། སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བའི་ཕྱིར་འཇིག་རྟེན་དུ་བྱུང་ངོ་། །བཞི་གང་ཞེ་ན། ཀུན་ནས་ཉོན་མོངས་པའི་རང་བཞིན་ཅན་གྱི་མི་གང་ཟག་དེ་ལྟ་བུ་སྐྱེ་བོ་
མང་པོ་ལ་བདེ་བ་དང་། སྐྱེ་བོ་མང་པོ་ལ་ཕན་པའི་ཕྱིར་འཇིག་རྟེན་དུ་འབྱུང་སྟེ། འདི་ནི་གང་ཟག་དང་པོའོ། །རྒྱུན་ཏུ་ཞུགས་པའི་འབྲས་བུ་དང་། ལན་གཅིག་ཕྱིར་འོང་བའི་འབྲས་བུ་དང་ལྡན་པའི་གང་ཟག་དེ་ལྟ་བུ་ནི་གཉིས་པའོ། །ཕྱིར་མི་འོང་བ་ནི་གསུམ་
པའོ། །དགྲ་བཅོམ་པ་ནི་བཞི་པ་སྟེ། གང་ཟག་བཞི་པོ་འདི་རྣམས་ནི་རྟེན་དུ་གྱུར་པ་ཡིན་ནོ། །དེ་ལ་སོ་སོའི་སྐྱེ་བོ་ཞེས་བྱ་བ་ནི་གང་བདག་ཉིད་ཚུལ་ཁྲིམས་དང་། ཆོ་ག་དང་། ཡོན་ཏན་དང་ལྡན་པར་གྱུར་ནས་ཆོས་འབྱིན་པར་བྱེད་པ་དང་། དེ་བཞིན་
གཤེགས་པའི་རྩ་བ་དང་ལྡན་པ་གང་ཡིན་པ་དེ་དག་ཐོག་མ་ཁོ་ནར་རྒྱས་པར་བྱེད་ཅིང་དོན་ཡང་རྟོགས་པར་བྱེད་ལ། ཆོས་འདི་ནི་འདོད་ཆེན་ཆུང་བའི་ཡིན་གྱི། ཆོས་འདི་ནི་འདོད་ཆེན་ཆེ་བའི་མ་ཡིན་ནོ་ཞེས་དོན་བརྡ་སྤྲོད་པར་བྱེད་པ་དང་། སྐྱེས་བུ་ཆེན་
པོའི་རྣམ་པར་རྟོག་པ་བརྒྱད་སྟོན་པར་བྱེད་པ་དང་། ཉེས་པ་བྱུང་ན་དེ་ལས་བསླང་བའི་ཕྱིར་གཞན་དག་ལ་འཆགས་པར་བྱེད་པ་དང་། བྱང་ཆུབ་སེམས་དཔའི་སྤྱད་པ་སྤྱོད་པ་ན་དགོངས་པའི་ཚིག་ལ་མཁས་ཤིང་དམ་པའི་ཆོས་འབྱིན་པར་བྱེད་པ་
འདི་ནི་གང་ཟག་དང་པོ་སྟེ། སོ་སོའི་སྐྱེ་བོའི་གྲངས་སུ་གཏོགས་མོད་ཀྱི། འདི་ནི་སོ་སོའི་སྐྱེ་བོ་ཐོས་པ་དང་མི་ལྡན་པ་མ་ཡིན་ཏེ། བརྒྱད་པའི་སོ་སོའི་སྐྱེ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་རྣམས་ཀྱིས་སངས་
རྒྱས་སུ་འགྱུར་བར་གསང་སྟེ་ལུང་བསྟན་པས་ལུང་བསྟན་པ་ཡིན་ནོ། །དེ་ལ་རྒྱུན་ཏུ་ཞུགས་པ་དང་། ལན་གཅིག་ཕྱིར་འོང་བ་ཞེས་བྱ་བ་ནི་གང་ཐོབ་ནས་དམ་པའི་ཆོས་འདྲི་བ་དང་། འཆང་བ་དང་འབྲལ་བར་འགྱུར་བ་མི་སྲིད་པ་དང་། གཞན་དག་ལ་

49-1-75b

ཡང་སངས་རྒྱས་ཀྱིས་གསུངས་པ་མ་ཡིན་པ་རང་གཟོའི་ཚིག་དང་། ཡི་གེ་སྣ་ཚོགས་དང་། བྲན་དང་བྲན་མོ་ཡོངས་སུ་འཛིན་པ་སྟོན་མི་སྲིད་པ་སྟེ། རྒྱུན་ཏུ་ཞུགས་པ་དང་། ལན་གཅིག་ཕྱིར་འོང་བའི་གྲངས་སུ་ནི་གཏོགས་མོད་ཀྱི། རྒྱུན་ཏུ་ཞུགས་
པ་དང་། ལན་གཅིག་ཕྱིར་འོང་བ་ནི་མ་ཡིན་ནོ། །དེ་ལྟར་ས་དང་པོ་དང་། གཉིས་པ་དང་། གསུམ་པ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་མངོན་སུམ་དུ་ལུང་བསྟན་པས་སངས་རྒྱས་ཀྱི་གནས་སུ་སངས་རྒྱས་སུ་འགྱུར་བར་ལུང་བསྟན་ཏོ། །
ཕྱིར་མི་འོང་བ་ཞེས་བྱ་བ་ནི་ཆོས་དེ་ཐོབ་ནས་འབྲལ་མི་སྲིད་པ་དང་། གཞན་དག་ལ་ཡང་སངས་རྒྱས་ཀྱིས་གསུངས་པ་མ་ཡིན་པར་རུང་བ་མ་ཡིན་པའི་མདོ་རང་གཟོ་སྣ་ཚོགས་ཀྱི་ཚིག་དང་། ཡི་གེ་དང་། བྲན་དང་བྲན་མོ་ལ་སོགས་པ་ཡོངས་
སུ་འཛིན་པ་སྟོན་མི་སྲིད་པ་དང་། གློ་བུར་གྱི་ཉེ་བའི་ཉོན་མོངས་པ་རྣམས་ཀྱིས་དེ་ལ་གནོད་པར་འགྱུར་མི་སྲིད་པ་དང་། ནང་གི་ཉོན་མོངས་པ་རྣམས་ཀྱིས་དེ་ལ་གནོད་པར་འགྱུར་མི་སྲིད་པ་དང་། དེ་བཞིན་གཤེགས་པའི་ཁམས་བཅབས་ཏེ། 
ཆོས་སྟོན་མི་སྲིད་པ་དང་། ཁམས་བཞིའི་སྦྲུལ་གདུག་པ་ལ་རྟེན་པའི་གློ་བུར་གྱི་ནད་རྣམས་ཀྱིས་དེ་ལ་གནོད་པར་བྱེད་པར་འགྱུར་མི་སྲིད་པ་དང་། བདག་ཏུ་སྨྲ་བ་ཡང་མ་ཡིན། བདག་མེད་པར་སྨྲ་བ་ཚར་གཅོད་པ་ཡང་ཡིན་ལ་འཇིག་རྟེན་པའི་བདག་རྣམ་པར་སྤངས་
པ་དང་། འཇིག་རྟེན་པའི་བྱ་བ་རྣམས་ཀྱིས་ཀྱང་འཇིག་རྟེན་ན་འཐུན་པར་བྱེད་པ་དང་། ཐེག་པ་ཆེན་པོ་མ་ཡིན་པའི་ཐེག་པ་གཞན་འབར་བར་བྱེད་མི་སྲིད་པ་དང་། སྲིན་བུའི་རིགས་བརྒྱད་བཅུ་དང་ཉེས་དམིགས་ཆེན་པོའི་ལུས་འཛིན་པ་མ་ཡིན་པ་དང་། 
འདོད་པའི་བསམ་པ་རྣམ་པར་སྤངས་པ་དེའི་ལུས་ལ་རྨི་ལམ་དུ་བྱུང་ཡང་ཁུ་ཆུ་འབྱུང་མི་སྲིད་པ་དང་། འཆི་བའི་འཇིགས་པ་རྣམས་འོངས་པ་མཐོང་ན་འཇིགས་མི་སྲིད་པའོ། །གང་ཟག་དེ་ལྟ་བུ་ནི་ཕྱིར་མི་འོང་བ་ཞེས་བྱ་སྟེ་གང་ཟག་གསུམ་པའོ། །
དེ་ཡང་ངེས་པར་ཕྱིར་མི་འོང་བས་ན་ཕྱིར་མི་འོང་བ་ཞེས་བྱ་སྟེ་གང་ཟག་དེ་ལ་ནི་ཕྱིར་མི་འོང་བ་ཐོབ་པ་ཞེས་ཀྱང་མི་བྱའོ། །སྔར་བསྟན་པའི་ཡོན་ཏན་རྣམས་ཀྱང་ཡོད་ལ་འདིར་སྐྱེས་ན་ཡང་སྔར་བསྟན་པའི་ཉེས་པ་རྣམས་ཀྱིས་མི་གོས་སོ། །བྱང་ཆུབ་

49-1-76a

སེམས་དཔའ་སེམས་དཔའ་ཆེན་པོ་དེ་ནི་འོང་བ་དང་འགྲོ་བའི་ཚུལ་གྱིས་རྒྱུ་བར་བྱེད་ཀྱང་ཕྱིར་མི་འོང་བའི་གྲངས་སུ་གཏོགས་ཏེ། སེམས་བསྐྱེད་མ་ཐག་པའི་ལུང་བསྟན་པས་སངས་རྒྱས་སུ་ལུང་བསྟན་པ་དང་སེམས་བསྐྱེད་མ་ཐག་
ཏུ་རིང་པོ་མི་ཐོགས་པར་སངས་རྒྱས་སུ་འགྱུར་བ་ཡིན་ཏེ་གང་ཟག་དེ་ལྟ་བུ་ནི་གང་ཟག་གསུམ་པའོ། །དགྲ་བཅོམ་པ་ཟག་པ་ཟད་པ་ནི་གང་ཟག་བཞི་པ་སྟེ། དགྲ་བཅོམ་པ་ཞེས་བྱ་བ་ནི་ཉོན་མོངས་པ་མེད་པ། ཁུར་བོར་བ། རང་གི་དོན་གྱི་བྱ་བ་བྱས་པ། 
དོན་གྲག་པ། ས་བཅུ་ཐོབ་པ་ཞེས་བྱ་བའི་དོན་ཏོ། །དོན་གཞན་ཡང་རྒྱས་པར་བྱེད་དེ་མི་སྐྱེ་བའི་ཆོས་ལ་བཟོད་པའི་ལུང་བསྟན་པས་ལུང་བསྟན་པ་དང་། བདག་ཉིད་ཀྱིས་ཇི་ལྟར་ནུས་པའི་གཟུགས་དང་། ཇི་ལྟར་འདོད་པའི་གཟུགས་མངོན་པར་སྤྲུལ་
པར་བྱེད་པ་དང་། གང་གི་ལུས་ཀྱིས་སངས་རྒྱས་སུ་འགྱུར་བར་འདོད་པ་དེའི་ལུས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བར་བྱེད་དེ། ཡོན་ཏན་འདི་རྣམས་དང་ལྡན་པ་ནི་དགྲ་བཅོམ་པ་ཞེས་བྱ་སྟེ། 
ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ལ་གང་ཟག་བཞི་པོ་འདི་རྣམས་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བའི་ཕྱིར་འཇིག་རྟེན་དུ་འབྱུང་ངོ་། །དེ་དག་ནི་དེ་བཞིན་གཤེགས་པ་བཞིན་དུ་ལྷ་དང་མི་རྣམས་ཀྱི་སྟོན་པ་ཡིན་ཏེ་
བཞི་ཆར་ཡང་སྐྱེས་བུ་ཚད་མ་ཡིན་ནོ། །འཇིག་རྟེན་དུ་གྱུར་པ་ཡིན་ནོ། །གསོལ་པ། གང་ཟག་བཞི་པོ་དེ་དག་ནི་བདག་གི་ཚད་མ་ཡང་མ་ལགས། དེ་དག་ནི་རྟེན་དུ་གྱུར་པ་ཡང་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་ཁྱིམ་བདག་
གདངས་ཅན་ལས་བརྩམས་ཏེ་བདུད་ཚར་གཅད་པར་བཀའ་སྩལ་པའི་ཚེ། གལ་ཏེ་ལྷ་འམ་བདུད་དམ་ཚངས་པ་ཡང་རུང་སྟེ་ང་དང་འདྲ་བར་ལུས་མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུས་བརྒྱན་པ་དང་། འོད་འདོམ་གང་དང་
ལྡན་པ་དང་། བཞིན་མཛོད་སྤུས་བརྒྱན་པའི་སངས་རྒྱས་ཀྱི་སྐུའི་ཚུལ་གྱིས་འོངས་སུ་ཟིན་ཀྱང་དེ་ཁྱེད་ཀྱིས་ཚར་ཆོད་ཅིག་ཅེས་ངས་གནང་སྟེ། སྡིག་ཅན་ཁྱོད་འདི་ལྟར་དགྲ་བཅོམ་པའི་གཟུགས་ཀྱིས་དགྲ་བཅོམ་པ་བཞིན་དུ་བདག་ཉིད་མ་འདུག་

49-1-76b

ཤིག །སྡིག་ཅན་ཁྱོད་ནམ་མཁའ་ལ་ཉལ་བར་བྱེད་ཅིང་གློ་གཡོན་ཕྱོགས་ནས་མེ་འབར་བར་བྱེད་པ་དང་། གཡས་ཕྱོགས་ནས་ཆུ་འབེབས་པ་དང་། མེ་བཞིན་དུ་འབར་ཞིང་གཟི་བྱིན་དང་ལྡན་ལ་དུད་པར་འཐུལ་དུ་ཟིན་ཀྱང་ང་
ཁྱོད་ཀྱི་ཚིག་མི་ཉན་ཏོ། །ཡིད་ཆེས་པར་མི་བྱེད་དོ། །གསུང་རབ་ཡན་ལག་དགུ་ལྟ་བུ་སྟོན་དུ་ཟིན་ཀྱང་ང་དད་པར་མི་བྱེད་དོ་ཞེས་གྱིས་ཤིག །རིགས་ཀྱི་བུ་ཁྱེད་དེ་ལྟར་དོགས་ན་ང་ཡང་ཚར་ཆོད་ཅིག །རིགས་ཀྱི་བུ་དཔེར་ན་མཚན་མོ་མུན་པའི་ནང་དུ་
ཁྱི་རྐུན་འོངས་པ་ཚོར་ན་ཁྱིམ་བདག་མོ་འམ་བྲན་མོས་དེ་ལ་འདི་སྐད་དུ་ཁྱི་རྐུན་ཁྱོད་ངས་མ་བསད་པར་སྐྱེན་པར་ཕྱིར་སོང་ཤིག་ཅེས་བྱས་ནས། ཁྱི་རྐུན་དེས་དེ་སྐད་ཐོས་པ་དང་། ཕྱིར་བརྒྱུགས་ཏེ་སོང་ལ་ཕྱིན་ཅད་ཀྱང་ཁྱིམ་དེར་མི་འོང་བ་དེ་བཞིན་དུ་ཁྱེད་
ཀྱིས་བདུད་སྡིག་ཅན་ཁྱི་རྐུན་བཞིན་དུ་ཚར་ཆོད་ལ། སྡིག་ཅན་དེ་ལྟར་མ་བྱེད་པར་ངས་བཅིང་བ་རྣམ་པ་ལྔས་མ་བཅིངས་པར་སྐྱེན་པར་ཕྱིར་སོང་ཤིག་ཅེས་དེ་ལ་དེ་སྐད་གྱིས་ཤིག་དང་། དེས་དེ་སྐད་ཐོས་མ་ཐག་ཏུ་ཁྱི་རྐུན་བཞིན་དུ་ཕྱིར་ལྡོག་པར་འགྱུར་ཏེ། 
དེ་ལྟར་བདུད་ཚར་གཅོད་པར་བྱེད་པ་གང་ཡིན་པ་དེ་དག་ནི་དམ་པ་ཡིན་ཏེ། མྱ་ངན་འདས་པའི་དྲུང་ཁོ་ན་ན་འདུག་གོ་ཞེས་བཅོམ་ལྡན་འདས་ཀྱིས་ཁྱིམ་བདག་གདངས་ཅན་ལས་གླེངས་ཏེ་བདུད་ཚར་གཅོད་པ་ན་བཀའ་སྩལ་ལགས་ན། བཅོམ་ལྡན་འདས་
ཅིའི་སླད་དུ་གང་ཟག་བཞི་པོ་རྣམས་རྟེན་དུ་གྱུར་པར་བཞུགས་པར་མཛད་ལགས། བདག་ནི་དེ་རྣམས་ལ་མི་ཉན་ཅིང་གློ་བ་མི་ཆེས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ནི་དེ་བཞིན་ཏེ། ངས་ཇི་སྐད་སྨྲས་པ་དེ་ནི་དེ་ཁོ་ན་
བཞིན་ནོ། །དེ་ལྟ་མོད་ཀྱི་ངས་བདུད་ཚར་གཅད་པར་སྨྲས་པ་ནི་བྱིས་པ་ཉན་ཐོས་ཀྱི་ཐེག་པ་པ་ཤའི་མིག་དང་ལྡན་པ་རྣམས་ཀྱི་དོན་དུ་སྨྲས་པ་ཡིན་གྱི་ཐེག་པ་ཆེན་པོ་པ་རྣམས་ཀྱི་དོན་དུ་བདུད་ཚར་གཅད་པར་སྨྲས་པ་མ་ཡིན་ནོ། །ཉན་ཐོས་ཀྱི་ཐེག་པ་
པ་རྣམས་ལ་ཡང་ལྷའི་མིག་དང་ལྡན་པ་དག་ཡོད་མོད་ཀྱི་དེ་དག་ནི་ཤའི་མིག་ཅེས་བྱ་བའི་གྲངས་སུ་གཏོགས་སོ། །ཐེག་པ་ཆེན་པོ་པ་རྣམས་ལ་ཡང་ཤའི་མིག་དང་ལྡན་པ་དག་ཡོད་མོད་ཀྱི། དེ་དག་ནི་སངས་རྒྱས་ཀྱི་སྤྱན་ཞེས་བྱ་བའི་གྲངས་སུ་གཏོགས་

49-1-77a

སོ། །དེ་ཅིའི་ཕྱིར་ཞེ་ན། ཐེག་པ་ཆེན་པོ་སངས་རྒྱས་ཀྱི་ཐེག་པའི་མདོའི་དེ་ཁོ་ན་ཉིད་འཛིན་པའི་ཕྱིར་རོ། །རིགས་ཀྱི་བུ་གཞན་ཡང་དཔེར་ན་མི་དཔའ་བོ་ཡུལ་ཕྱོགས་སུ་གྲགས་པ་སྙིང་སྟོབས་ཅན་རྟུལ་ཕོད་པ་འགའ་ཞིག་ཡོད་ལ། དེ་
ལ་མི་སྡར་མ་འགའ་ཞིག་རྟེན་ཏེ་སྡར་མ་དེ་དཔའ་བོ་དེ་ལ་དཔའ་སློབ་པ་ན་དེ་ལ་བསྒོ་བ། ཀྱེ་མི་ཁྱོད་དཔའ་བོར་འགྱུར་བར་འདོད་ན་རལ་གྲིའི་སོ་གཏམས་པའི་སྟེང་དུ་འགྲོ་བར་གྱིས་ཤིག །གང་དང་གང་གི་ཚེ་འཐབ་པ་དེ་དང་དེའི་ཚེ་སུས་ཀྱང་མི་འཇིགས་པར་གྱིས་ཤིག །
ལྷ་ཡང་རུང་གཏུམ་པོ་ཡང་རུང་སྟེ། རྩྭ་ཙམ་དུ་ལྟོས་ཤིག །སྙིང་སྟོབས་དང་། རྟུལ་ཕོད་པ་ལ་བརྩོན་པར་གྱིས་ཤིག །རུ་པ་ངན་པ་ཁ་ཅིག་དཔའ་བོའི་ཆ་ལུགས་སུ་བསྒྱུར་ནས་དཔའ་བོའི་མཚོན་ཆ་ཐོགས་ཏེ་ཨུར་མོའི་རལ་གྲི་ཤུབས་ནས་ཕྱུང་ནས། 
ཕྱེ་མར་རློག་པ་ལྟར་བྱེད་ཅིང་འོང་ལ་རལ་གྲི་གཅིག་ལ་གཅིག་བརྡབས་པ་ལས་མེ་སྟག་འཕྲོ་བར་བྱེད། ཁུས་འདེབས་ཤིང་ཁྲོམ་གྱི་ནང་དུ་འོང་བ་དེ་ལྟ་བུ་དག་མཐོང་ན་མ་འབྲོས་ཤིག་དང་། རུ་པ་ངན་པ་གང་ཡིན་པ་དེ་དག་གིས་དེ་དག་མཐོང་ནས་འདི་
དག་ནི་དཔའ་བོ་ཡིན་ནོ་སྙམ་དུ་རིག་ནས་ཁྱི་རྐུན་བཞིན་དུ་འབྱེར་བར་འགྱུར་ལ། རུ་པ་བཟང་པོ་གང་ཡིན་པ་དེ་དག་ནི་ཁྲེལ་གྱིས་དོགས་ཏེ་ཐེན་པར་བྱེད་དོ། །རུ་པ་ངན་པ་དེ་དག་ནི་དེ་དག་གིས་སྐྲག་ནས་འབྱེར་བར་འགྱུར་བ་དེ་བཞིན་དུ་དེ་བཞིན་གཤེགས་པ་ཡང་
ཉན་ཐོས་ཀྱི་ཐེག་པ་པ་རྣམས་དཔའ་བོ་སློབ་པར་མཛད་དེ་ཁྱེད་བདུད་སྡིག་ཅན་རུ་པ་སྡར་མ་ལྟ་བུས་མ་འཇིགས་པར་དཔའ་སློབ་པ་བཞིན་དུ་རྟུལ་ཕོད་པར་གྱིས་ཤིག་དང་། བདུད་ཡིད་མི་བདེ་བར་འགྱུར་རོ་ཞེས་སྟོན་ཏོ། །རིགས་ཀྱི་བུ་གཞན་ཡང་རིགས་ཆེན་
པོ་དཔའ་བོ་འམ། དཔའ་བོའི་བུ་ལ་ལ་ཞིག་སུ་ལ་ཡང་དཔའ་མ་བསླབས་ཏེ་དེ་སློབ་དཔོན་སུ་ཡང་མེད་བཞིན་དུ་དེ་རང་བཞིན་གྱིས་དཔའ་ལ་རིགས་ཀྱི་བུ་ཆོས་ལུགས་སུ་གྱུར་པ་རང་གི་དཔའ་རིགས་ཀྱི་རྐྱེན་དུ་འཚམ་པར་དཔའ་བ་དེ་བཞིན་དུ། ཐེག་
པ་ཆེན་པོ་པ་སྐྱེས་པ་འམ། བུད་མེད་དམ། ཁྱེའུ་འམ། བུ་མོ་ཡང་རུང་སྟེ། དེ་དག་གིས་དགོངས་ཏེ་གསུངས་པའི་མདོའི་ཚིག་སྣ་ཚོགས་ཐོས་ན་དེ་མི་སྐྲག་མི་དངང་བ་དེ་དག་ནི་སྔོན་སངས་རྒྱས་དུ་མ་ལ་བསྙེན་བཀུར་བྱེད་བྱེད་པ་ཡིན་ཏེ་དེས་ན་དེ་དག་

49-1-77b

གིས་ཐེག་པ་ཆེན་པོ་འདི་ཁོང་དུ་ཆུད་ནས་མངོན་པར་དད་པར་འགྱུར་ཏེ། བདུད་དམ། བདུད་བྱེ་བ་ཡང་རུང་དེ་དག་མཐོང་ན་ཐེག་པ་ཆེན་པོ་པ་རྣམས་སྐྲག་པར་མི་འགྱུར་ཏེ་ཅུང་ཟད་ཀྱང་ཡ་མཚན་དུ་མི་འཛིན་ཏོ། །དཔེར་ན་སྦྲུལ་འཛིན་པའི་མི་ལ་ལ་ཞིག་གིས་
སྨན་གནོད་སེལ་དང་སྔགས་ཀྱི་མཐུས་སྦྲུལ་གདུག་པ་རྣམས་ཀྱི་དུག་མེད་པར་བྱེད་ལ་དེ་དག་གིས་མི་འཇིགས་པ་དེ་བཞིན་དུ་བདུད་བྱེ་བ་རྣམས་ཀྱང་ཐེག་པ་ཆེན་པོའི་མདོའི་ཚིག་གི་སྔགས་ཀྱི་གཟི་བྱིན་དང་མཐུས་རྒྱགས་པ་མེད་པར་འགྱུར་རོ། །རིགས་ཀྱི་
བུ་གཞན་ཡང་ཀླུའི་སྦྲུལ་གདུག་པ་རྣམས་ཀྱི་ནི་གླང་པོ་ཆེ་དང་། སྟག་དང་། གཟིག་དང་། ཁྱི་རྣམས་ཀྱང་བལྟས་པ་ཙམ་གྱིས་སྐྲག་པར་བྱེད་དེ། ཁ་ཅིག་ནི་འཆི་བར་ཡང་འགྱུར། ཁ་ཅིག་ནི་ཤིར་དོགས་ནས་སྒྲ་ཐོས་པ་ཙམ་གྱིས་ཀྱང་འབྱེར་བར་འགྱུར་རོ། །
མི་ཁ་ཅིག་ནི་ཀླུའི་སྦྲུལ་གདུག་པ་དང་། ནམ་མཁའ་ལྡིང་དང་། གླང་པོ་ཆེ་དང་། སེང་གེ་དང་། སྟག་རྣམས་ལ་ཞོན་ཏེ་རྒྱུ་བར་བྱེད་པ་ཡང་ཡོད་དོ། །མི་ཁ་ཅིག་ནི་ཀླུ་དང་། ནམ་མཁའ་ལྡིང་དང་། སེང་གེ་དང་། སྲིན་པོ་དེ་དག་མཐོང་ན་རྒྱགས་པ་མེད་
པར་འགྱུར་ཏེ། མི་སྡར་མ་དེ་དང་འདྲ་བར་ཉན་ཐོས་དང་རང་སངས་རྒྱས་རྣམས་ནི་བདུད་མཐོང་ན་སྐྲག་པར་འགྱུར་ལ་བདུད་ནི་དེ་དག་གིས་འཇིགས་པ་མེད་དེ་བདུད་ཀྱི་ལས་ཀྱང་བྱེད་དོ། །ཐེག་པ་ཆེན་པོ་པ་རྣམས་ནི་བདུད་ལ་ཞོན་ཏེ་དེ་དག་གི་གཟི་བྱིན་ཆེན་པོ་དང་། 
སྟོབས་ཆེན་པོ་དང་། སྙིང་སྟོབས་བཏུལ་ནས་ཆོས་སྟོན་པར་བྱེད་དེ། ཀླུ་ལ་སོགས་པ་དང་འདྲ་བའི་བདུད་སྟོབས་པོ་ཆེ་དེ་དག་སྐྲག་ནས་མོད་ལ་དམ་པའི་ཆོས་ལ་དགའ་བར་འགྱུར་ཏེ། འདི་སྐད་དུ་ད་ཕྱིན་ཆད་དམ་པའི་ཆོས་ཀྱི་བར་ཆད་མི་བགྱིད་དོ་ཞེས་ཀྱང་
ཟེར་རོ། །ཉན་ཐོས་ཀྱི་ཐེག་པ་པ་རྣམས་ནི་ཉོན་མོངས་པའི་རྣམ་པས་སྐྲག་གོ། ཐེག་པ་ཆེན་པོ་པ་རྣམས་ནི་ཉོན་མོངས་པ་རྣམས་ཆུང་བར་འཛིན་ཏེ། དེ་ལྟར་ན་ཐེག་པ་ཆེན་པོ་པ་རྣམས་ནི་རྟུལ་ཕོད་པ་ཡིན་ནོ། །དེ་བས་ན་ངས་བཤད་པའི་རྒྱུ་ནི་དེ་ཡིན་ཏེ། 
ཉན་ཐོས་ཀྱི་ཐེག་པ་པ་རྣམས་ཀྱི་དོན་དུ་ངས་བདུད་ཚར་གཅད་པར་བསྟན་པ་ཡིན་ནོ། །དེ་ལྟར་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ནི་མཆོག་ཏུ་བཟོད་པར་དཀའོ། །ཀྱེ་མ་མདོ་སྡེ་ཆེན་པོ་འདི་དང་དེ་བཞིན་གཤེགས་པ་རྟག་ཅེས་བྱ་བ་

49-1-78a

ཐོས་ན་ཡིད་ཆེས་པར་བྱེད་པ་གང་ཡིན་པ་དེ་དག་ནི་མཆོག་ཏུ་དཀའ་བ་བྱེད་པ་ཡིན་ཏེ། འཇིག་རྟེན་ན་ཨུ་དུམ་བ་རའི་མེ་ཏོག་བཞིན་དུ་ཤིན་ཏུ་དཀོན་ནོ། །ང་འདས་པའི་འོག་ཏུ་མདོ་སྡེ་ཆེན་པོ་འདི་ཤིན་ཏུ་རྙེད་དཀའ་བར་འགྱུར་ཏེ། མ་འོངས་པའི་
དུས་ན་སེམས་ཅན་གང་དག་མདོ་སྡེ་ཆེན་པོ་འདི་ཐོས་པར་བྱ་བའི་ཕྱིར་སྒྲུབ་པར་བྱེད་པ་དེ་དག་ནི་སེམས་ཅན་མང་པོས་སྤོང་བར་འགྱུར་རོ། །གསོལ་པ། ཡུན་ཇི་སྲིད་ཅིག་ན་སེམས་ཅན་རྣམས་ཀྱིས་སྤང་བར་འགྱུར་ལགས། སེམས་ཅན་ཇི་ལྟ་བུ་དག་ནི་དམ་པའི་ཆོས་
འབྱིན་པར་འགྱུར་ལགས། བཀའ་སྩལ་པ། རིགས་ཀྱི་བུ་ང་འདས་པའི་འོག་ཏུ་ལོ་བཞི་སྟོང་གི་བར་དུ་འཛམ་བུའི་གླིང་དུ་སྤྱོད་པར་འགྱུར་ཏེ། དེའི་རྗེས་ལ་སའི་འོག་ཏུ་ནུབ་པར་འགྱུར་རོ། །རིགས་ཀྱི་བུ་དཔེར་ན་ཡུལ་གང་ན་བུ་རམ་ཤིང་དང་། འབྲས་སཱ་ལུ་དང་། 
འབྲུ་དང་། སྦྲང་རྩི་དང་། ཁ་ར་དང་། བའི་འོ་མ་དང་། མར་གྱི་སྙིང་ཁུ་རྣམས་མོད་པ་དེ་ཉིད་ན་སེམས་ཅན་རྣམ་པར་སྨིན་པས་དམན་ཞིང་བསོད་ནམས་མ་བྱས་པ་གཞན་དག་ཀྱང་ཡོད་དེ། དེ་དག་འདི་སྐད་དུ་བདག་ཅག་གི་ལུས་ཀྱི་ཁམས་འདི་ནི་ཁ་ཟས་བཟང་
པོ་ཟོས་ན་ནད་དུ་འགྱུར་རོ་ཞེས་ཟེར་ནས་ཅི་ཚེ་དང་ཁྲེ་དང་ཁྲེ་རྒོད་རྣམས་ཟ་བར་བྱེད་དོ། །ཡུལ་དེ་ཉིད་ན་གཞན་ཁ་ཅིག་ནི་ཅི་ཚེ་དང་ཁྲེ་དང་ཁྲེ་རྒོད་རྣམས་ཀྱི་མིང་ཡང་ཐོས་པར་མི་འདོད་དེ། བུ་རམ་ཤིང་དང་། འབྲས་སཱ་ལུ་དང་། འབྲུ་རྣམས་འབའ་ཤིག་ཟ་
བར་བྱེད་པ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཡང་སེམས་ཅན་གཞན་ཁ་ཅིག་ཐོས་པར་ཡང་མི་འདོད་དེ། བསོད་ནམས་མ་བྱས་པ་རྣམས་ཅི་ཚེ་དང་ཁྲེ་དང་ཁྲེ་རྒོད་ཟ་ཞིང་བུ་རམ་ཤིང་དང་། འབྲས་སཱ་ལུ་ལ་སྡང་བ་བཞིན་དུ་
ཉན་ཐོས་ཀྱི་ཐེག་པ་པ་རྣམས་ཐེག་པ་ཆེན་པོ་ལ་སྡང་བར་འགྱུར་རོ། །དེ་ན་ཉན་པ་བསོད་ནམས་བྱེད་བྱེད་པ་གཞན་ཁ་ཅིག་ནི་འབྲས་སཱ་ལུ་ཟ་བ་བཞིན་དུ་ཐེག་པ་ཆེན་པོ་བར་འགྱུར་རོ། །རིགས་ཀྱི་བུ་དཔེར་ན་རི་ཁྲོད་གཅོང་རོང་ཡུལ་ངན་པ་ན་གནས་པའི་
རྒྱལ་པོ་རྣམས་བུ་རམ་ཤིང་དང་འབྲས་སཱ་ལུ་རྣམས་ལྡན་པར་ཡོད་དུ་ཟིན་ཀྱང་འབྲུ་འདི་རྣམས་ནི་དཀོན་པ་ཡིན་ཏེ། ཟད་ན་མི་རུང་ངོ་སྙམ་ནས་བདག་ཅག་མི་ཟ་བར་ཅི་ཚེ་དང་ཁྲེ་དང་ཁྲེ་རྒོད་ཟ་ཞིང་བུ་རམ་ཤིང་དང་འབྲས་སཱ་ལུ་དང་འབྲུ་རྣམས་ནི་ཤིང་རྟ་རྣམས་བཀང་

49-1-78b

ནས་རྒྱལ་པོ་ཆེན་པོ་ལ་འབུལ་བར་བྱེད་དེ། དེ་ན་སེམས་ཅན་གཞན་དག་རང་གི་ཡུལ་ན་འབྲས་སཱ་ལུ་ལ་སོགས་པ་སྔོན་མ་མཐོང་དུ་ཟིན་ཀྱང་རྒྱལ་པོའི་ལོངས་སྤྱོད་ཀྱི་མཐུས་ཟ་བར་བྱེད་དོ། །རིགས་ཀྱི་བུ་དེ་བཞིན་དུ་གང་ན་གང་ཟག་ཆོས་ཀྱི་སྡེ་དཔོན་བྱེད་པ་བཞི་པོ་
དེ་དག་གནས་པ་དེ་ཉིད་དུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གཅིག་ཀྱང་འཇིག་རྟེན་དུ་བྱུང་ངམ་ཡང་ན་གང་ན་གནས་ཀྱང་རུང་སྟེ། དེར་དེའི་དོན་དུ་དེ་དག་གིས་ཐེག་པ་ཆེན་པོའི་མདོ་སྡེའི་མཚན་དག་གླ་རྔན་གྱིས་འདྲི་ཞིང་འདྲིར་འཇུག་
སྟེ་བསྒྲུབས་ནས་གླེགས་བམ་ཕྱི་ཚས་སུ་བཅུག་སྟེ། རྙེད་པ་དང་བཀུར་སྟིའི་ཕྱིར་རམ། ཆོས་སྤྱོད་པའི་ཕྱིར་རམ། རྟེན་བཅའ་བའི་ཕྱིར་བཀུར་བར་བྱེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་བསྙེན་བཀུར་བྱེད་ཅིང་སྐྱེ་བོ་མང་པོ་ཐེག་
པ་ཆེན་པོའི་བཅུད་ཀྱིས་ལོངས་སྤྱོད་པར་འགྱུར་ཏེ། རྒྱལ་པོའི་མཐུས་འབྲས་སཱ་ལུ་ཟ་བ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་གཟི་བརྗིད་ཀྱི་མཐུས་སེམས་ཅན་རྣམས་ཀྱིས་སྔོན་མ་ཐོས་པའི་ཚིག་གི་ཡི་གེ་འབྲུ་གཅིག་པའི་ཐིག་
ལེ་ཐོས་པར་འགྱུར་རོ། །ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ས་ཕྱོགས་གང་ན་སྤྱོད་པའི་ས་ཕྱོགས་ནི་རྡོ་རྗེའི་རང་བཞིན་དུ་འགྱུར་རོ། །སེམས་ཅན་དེ་དག་ཀྱང་རྡོ་རྗེའི་རང་བཞིན་དུ་འགྱུར་རོ་ཞེས་ང་ཟེར་རོ། །སེམས་ཅན་ཕལ་པ་
བསོད་ནམས་ཆུང་ངུ་རྣམས་ཐེག་པ་ཆེན་པོ་ཐོས་ན་ཐེག་པ་ཆེན་པོའི་མདོའི་སྡེ་ཚན་གྱི་དོན་འཛིན་པར་མི་བྱེད་དེ། ཐོས་ན་དོན་འཛིན་པར་མི་བྱེད་པའི་སེམས་ཅན་གང་ཡིན་པ་དེ་དག་ནི་ཁྲེ་རྒོད་ཟ་བ་བཞིན་དུ་མྱ་ངན་དུ་བྱ་བ་ཡིན་ནོ། །གསོལ་པ། དེ་བཞིན་
གཤེགས་པ་འདས་ནས་ལོ་བཞི་སྟོང་གི་བར་དུ་འཛམ་བུའི་གླིང་དུ་གནས་པའི་རྗེས་ལ་སའི་འོག་ཏུ་ནུབ་པར་གྱུར་ནས་ཡུན་ཇི་སྲིད་ཅིག་ན་སླར་ཡང་འབྱུང་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་གི་ཚེ་
ངའི་དམ་པའི་ཆོས་ཀྱི་འཇུག་ལོ་བརྒྱད་བཅུ་ལུས་པར་གྱུར་ཏེ། དམ་པའི་ཆོས་ནུབ་ཏུ་ཆ་བ་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་འཛམ་བུའི་གླིང་དུ་འབྱུང་བར་འགྱུར་ཏེ། ལོ་བཞི་བཅུའི་བར་དུ་དམ་པའི་ཆོས་ཀྱི་ཆར་ཕབ་ནས་

49-1-79a

ནུབ་པར་འགྱུར་རོ། །གསོལ་པ། དམ་པའི་ཆོས་ནུབ་པའི་དུས་དང་། ཚུལ་ཁྲིམས་ཅན་ཟད་པའི་དུས་དང་། དམ་པའི་ཆོས་མ་ཡིན་པ་རྣམ་པར་འཕེལ་བའི་དུས་དང་། སྒྲུབ་པ་མ་མཆིས་པའི་དུས་ན་མྱ་ངན་ལས་འདས་
པ་ཆེན་པོའི་མདོ་ཆེན་པོ་འདི་འབྱུང་བའི་ཚེ་འདི་ཉན་པ་ནི་ཅི་འདྲ་བ་དག་ཅིག་འབྱུང་བར་འགྱུར་ལགས། འཆང་བ་ནི་ཅི་འདྲ་བ་དག་ཅིག་ལགས། ཀློག་པ་ནི་ཅི་འདྲ་བ་དག་ཅིག་ལགས། སུ་དག་ནི་སྲུང་བར་འགྱུར། འཛིན་པར་འགྱུར། མཆོད་པ་
བགྱིས་ནས་སྟོན་པར་འགྱུར་ལགས། འདྲིར་འཇུག་པ་ནི་ཅི་འདྲ་བ་དག་ཅིག་ལགས་པ་དེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སེམས་ཅན་ཐམས་ཅད་ལ་སྨན་པའི་སླད་དུ་བཀའ་སྩལ་
དུ་གསོལ། བྱང་ཆུབ་སེམས་དཔའ་ཡང་དག་པར་སློབ་པར་འཚལ་བ་དག་མཆིས་ཏེ། དེ་དག་གིས་ཐོས་ན་ཅི་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཡོངས་སུ་ཉམས་པར་མི་འགྱུར་བར་སྒྲུབ་པར་འགྱུར་ལགས་སོ། །བཅོམ་
ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་དོན་འདི་འདྲི་བ་ནི་ལེགས་སོ། །རིགས་ཀྱི་བུ་གང་དག་གིས་སངས་རྒྱས་ཆུ་ཀླུང་གསེར་ལྡན་གྱི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་
ནི་ཕྱི་མའི་དུས་ན་བྱང་ཆུབ་ཀྱི་སེམས་ཉམས་སུ་ལེན་པར་འགྱུར་ཏེ། ཉམས་སུ་མི་ལེན་པར་མི་འགྱུར་རོ། །མདོ་སྡེ་སྤོང་བར་ཡང་མི་འགྱུར་རོ། །གང་དག་གིས་སངས་རྒྱས་གང་གཱའི་ཀླུང་གི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི་ཕྱི་
མའི་དུས་ན་མཚུངས་པ་མེད་པ་སྤོང་བའི་སེམས་སྐྱེད་པར་མི་བྱེད་དེ། མོས་པར་བྱེད་ཅིང་དེར་ཚིག་གིས་སྐྱེ་བོ་ཐམས་ཅད་ལ་རྒྱས་པར་གོ་བར་བྱེད་པར་འགྱུར་རོ། །གང་དག་གིས་སངས་རྒྱས་གང་གཱའི་ཀླུང་གཉིས་ཀྱི་བྱེ་མ་སྙེད་ལ་བྱང་ཆུབ་ཏུ་
སེམས་བསྐྱེད་པ་དེ་དག་ནི་ཕྱི་མའི་དུས་ན་ཡང་བྱང་ཆུབ་ཏུ་སེམས་སྐྱེད་པར་འགྱུར་ཏེ་སྤོང་བར་མི་འགྱུར་རོ། །གང་དག་གིས་སངས་རྒྱས་གང་གཱའི་ཀླུང་གསུམ་གྱི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ཕྱི་མའི་དུས་ན་མཚུངས་པ་མེད་པ་

49-1-79b

སྤོང་བར་མི་བྱེད་དེ། ལུང་ནོད་པར་བྱེད། ཉན་པར་བྱེད། འདྲི་བར་བྱེད་ལ་དོན་ནི་རྟོགས་པར་མི་འགྱུར་རོ། །གང་དག་གིས་སངས་རྒྱས་གང་གཱའི་ཀླུང་བཞིའི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི་ཕྱི་མའི་དུས་ན་ཡང་བྱང་ཆུབ་ཏུ་སེམས་
བསྐྱེད་པར་འགྱུར་ཏེ་མཚུངས་པ་མེད་པ་སྤོང་བར་མི་བྱེད་ཅིང་ལུང་ནོད་པར་བྱེད། ཉན་པར་བྱེད། འདྲི་བར་བྱེད་ལ་དོན་ནི་བཅུ་དྲུག་ཆ་གཅིག་རྟོགས་པར་འགྱུར་ཏེ། དོན་རྫོགས་པར་རྟོགས་པར་མི་འགྱུར་རོ། །གང་དག་གིས་སངས་རྒྱས་གང་
གཱའི་ཀླུང་ལྔའི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི་ཕྱི་མའི་ཚེ་མཚུངས་པ་མེད་པ་སྤོང་བར་མི་འགྱུར་ཏེ། ལུང་ནོད་པར་བྱེད། ལྟ་བར་བྱེད། འདྲི་བར་བྱེད་དེ། བྲིས་ནས་ཀྱང་བདག་ཉིད་འཆང་བར་བྱེད་ལ་དོན་ནི་བརྒྱད་ཆ་
གཅིག་རྟོགས་པར་འགྱུར་ཏེ། དོན་རྫོགས་པར་རྟོགས་པར་མི་འགྱུར་རོ། །གང་དག་གིས་སངས་རྒྱས་གང་གཱའི་ཀླུང་དྲུག་གི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི་ཕྱི་མའི་དུས་ན་མཚུངས་པ་མེད་པ་སྤོང་བར་མི་བྱེད་དེ། ལུང་ནོད་
པར་བྱེད། འདྲི་བར་བྱེད། བྲིས་ནས་ཀྱང་འཛིན་པར་བྱེད་ལ་དོན་ནི་བཞི་ཆ་གཅིག་རྟོགས་པར་འགྱུར་ཏེ། དོན་རྫོགས་པར་རྟོགས་པར་མི་འགྱུར་རོ། །གང་དག་གིས་སངས་རྒྱས་གང་གཱའི་ཀླུང་བདུན་གྱི་བྱེ་མ་སྙེད་ལ་བྱང་ཆུབ་ཏུ་སེམས་
བསྐྱེད་པ་དེ་དག་ནི་ཕྱི་མའི་དུས་ན་མཚུངས་པ་མེད་པ་སྤོང་བར་མི་བྱེད་དེ། ལུང་ནོད་པར་བྱེད། འདྲི་བར་བྱེད། བྲིས་ནས་ཀྱང་འཛིན་པར་བྱེད་ལ་དོན་ནི་ཕྱེད་རྟོགས་པར་འགྱུར་ཏེ། དོན་རྫོགས་པར་རྟོགས་པར་མི་འགྱུར་རོ། །གང་དག་གིས་སངས་
རྒྱས་གང་གཱའི་ཀླུང་བརྒྱད་ཀྱི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི་ཕྱི་མའི་དུས་ན་མཚུངས་པ་མེད་པ་སྤོང་བར་མི་བྱེད་དེ། ལུང་ནོད་པར་བྱེད། ཉན་པར་བྱེད། འདྲི་བར་བྱེད། བྲིས་ནས་འཛིན་པར་བྱེད། འཆང་བར་བྱེད། ཀློག་
པར་བྱེད། སྟོན་པར་བྱེད། སྦ་བར་བྱེད། སྲུང་བར་བྱེད། འཆད་པར་བྱེད། འཇིག་རྟེན་ཐམས་ཅད་ལ་སྙིང་བརྩེ་བའི་ཕྱིར་གླེགས་བམ་རྣམས་ལ་མཆོད་པ་དང་བཀུར་སྟི་བྱེད། གཞན་དག་ཀྱང་བྱེད་དུ་འཇུག་ཅིང་བླ་མ་ལ་གུས་པ་ལྟ་བུར་

49-1-80a

ལྟ་བར་བྱེད་ལ་དོན་ཀྱང་རྫོགས་པར་རྟོགས་པར་འགྱུར་ཏེ། བཅོམ་ལྡན་འདས་ནི་རྟག་པ་དང་། བརྟན་པ་དང་། ཐེར་ཟུག་པ་དང་། མི་གཡོ་བ་དང་། ཤིན་ཏུ་བདེ་བའོ་ཞེས་བྱ་བ་དང་། སེམས་ཅན་ཐམས་ཅད་ལ་དེ་བཞིན་
གཤེགས་པའི་སྙིང་པོ་ཡོད་དོ་ཞེས་སྟོན་པར་བྱེད་དོ། །དེ་ལྟར་ན་སྔོན་སངས་རྒྱས་དུ་མ་ལ་བསྙེན་བཀུར་བྱེད་བྱེད་པའི་སེམས་ཅན་རྣམས་ནི་དམ་པའི་ཆོས་འབྱིན་པར་འགྱུར་ཞིང་དམ་པའི་ཆོས་ཀྱི་ཕྱོགས་འཛིན་པར་འགྱུར་རོ། །གང་དག་གིས་ད་ལྟར་བྱང་ཆུབ་ཏུ་
སེམས་བསྐྱེད་པ་དེ་དག་ནི་ཕྱི་མའི་དུས་ན་དམ་པའི་ཆོས་འབྱིན་པར་འགྱུར་ཞིང་དམ་པའི་ཆོས་ཀྱི་ཕྱོགས་འཛིན་པར་འགྱུར་ཏེ། དེའི་ཚེ་སེམས་ཅན་དེ་ལྟ་བུ་དག་འབྱུང་བར་འགྱུར་གྱིས། རིགས་ཀྱི་བུ་ཁྱོད་མ་འོངས་པའི་དུས་ན་སེམས་ཅན་དམ་པའི་ཆོས་འབྱིན་པ་
རྣམས་ལ་དེ་ལྟར་མ་ལྟ་ཤིག །གང་དག་གིས་ད་ལྟར་བྱང་ཆུབ་ཏུ་སེམས་བསྐྱེད་པ་དེ་དག་ནི་མ་འོངས་པའི་དུས་ན་ཡང་བྱང་ཆུབ་ཏུ་སེམས་བསྐྱེད་ནས་དམ་པའི་ཆོས་འབྱིན་པར་བྱེད་པར་ཤེས་པར་གྱིས་ཤིག །རིགས་ཀྱི་བུ་གང་དག་ང་ཡོངས་སུ་མྱ་ངན་ལས་
འདས་པ་ཆེན་པོས་ཡོངས་སུ་མྱ་ངན་ལས་འདའ་བ་ལ་ཡིད་མི་དགའ་བར་མི་བྱེད་ཅིང་རབ་ཏུ་དགའ་བར་བྱེད་དེ། སངས་རྒྱས་བདག་ཅག་གི་རྙེད་པ་དང་བཀུར་སྟི་ལ་བགེགས་བྱེད་པ་དེ་ང་ནི་གྲོངས་པར་འགྱུར་གྱི་བདག་ཅག་དགའོ་སྙམ་སྟེ། དེ་ལྟར་སངས་རྒྱས་གྲོངས་
པར་འགྱུར་རོ་སྙམ་ནས་རབ་ཏུ་དགའ་སྟེ། ཡིད་མི་དགའ་བར་མི་བྱེད་པ་དེ་དག་ནི་དེའི་ཚེ་གཡེལ་བར་འགྱུར་ཏེ། ཆོས་གོས་ཀྱི་མཚན་མ་ཅན་མདོ་སྡེ་སྤོང་བར་འགྱུར་བར་རིག་པར་གྱིས་ཤིག །སེམས་ཅན་གང་དག་ཡོན་ཏན་དཔག་ཏུ་མེད་པ་དང་ལྡན་པ་དེ་དག་ནི་ཐེག་
པ་ཆེན་པོ་ཐོས་ན་མངོན་པར་དད་པར་འགྱུར་ཏེ། དམ་པའི་ཆོས་འདོད་པའི་རིགས་ཀྱི་བུ་དེ་དག་གི་ནི་སྡིག་པའི་ལས་གྲངས་མེད་པ་བྱས་པ་རྣམས་ཀླད་པ་ན་བ་དང་། རིམས་ཀྱིས་གདུང་བ་དང་། ཟུག་རྔུ་དང་། སྐུར་པ་ཙམ་གྱིས་འབྱང་བར་འགྱུར་རོ། །གཞན་
ཡང་ཕྱི་མའི་དུས་ན་གཞན་གྱིས་བརྙས་པར་འགྱུར་བ་དང་། མདོག་ངན་པར་འགྱུར་བ་དང་། མལ་ཆ་དང་། སྟན་དང་། ཁ་ཟས་ངན་པར་འགྱུར་བ་དང་། རྙེད་པ་མེད་པར་འགྱུར་བ་དང་། དབུལ་པོའི་རིགས་སུ་སྐྱེ་བ་དང་། ཕལ་པའི་རིགས་སུ་སྐྱེ་བ་དང་། 

49-1-80b

ལོག་པར་ལྟ་བའི་རིགས་སུ་སྐྱེ་བ་དང་། རྒྱལ་པོ་འཁྲུག་པ་དང་། ཡུལ་འཁྲུག་པ་དང་། སྡུག་པའི་དངོས་པོ་འཁྲུག་པ་དང་། དགེ་བའི་བཤེས་གཉེན་མི་མཐོང་བ་དང་། གོས་དང་ཟས་དང་། མལ་ཆ་དང་། སྟན་དང་། ནད་གསོས་དང་། སྨན་ཟོང་མེད་པ་དང་། 
རྙེད་པ་ཆུང་བ་དང་། བཀྲེས་པ་དང་། སྐོམ་པས་ཉམ་ཆུང་བའི་གནོད་པ་དང་ལྡན་པ་དང་། སྐྱེ་བོ་ཕལ་པས་དགའ་བར་བྱ་བ་དང་། རྒྱལ་པོ་དང་། བློན་པོ་དང་། ཕོ་བྲང་འཁོར་གྱི་མི་རྣམས་ཀྱི་ཆོས་ཀྱི་གཏམ་མི་འཛིན་པ་དང་། ཆོས་སྨྲ་བའི་ཕྱོགས་མི་བྱེད་པ་
དང་། བློན་པོ་དང་། སྡེ་དཔོན་གང་དག་ཕྱོགས་དང་མགོན་བྱེད་དུ་རེ་བ་དེ་དག་ཀྱང་སུ་ཤི་གཏོལ་མེད་པར་འགྱུར་བ་དང་། དམ་པའི་ཆོས་ཀྱི་ཕྱོགས་མི་བྱེད་པ་དང་། བཟང་ན་ཡང་མི་མཛེས་པ་དང་། ལྟ་ན་སྡུག་ན་ཡང་ལྟ་ན་མི་སྡུག་པར་འགྱུར་ཏེ། དེ་ལྟར་ན་ངའི་
ཉན་ཐོས་གང་དག་འཇིག་རྟེན་ན་མདོ་སྡེ་ཆེན་པོ་སྟོན་པ་རྣམས་ནི་དཀའ་བ་བྱེད་པ་ཡིན་ནོ། །རིགས་ཀྱི་བུ་དཔེར་ན་ལྷོ་བུར་ཤིན་ཏུ་སྟུག་པོ་ཡང་ཉི་མ་མ་ཤར་གྱི་བར་དུ་ནི་གནས་ལ་ཉི་མ་ཤར་མ་ཐག་ཏུ་ནི་མ་ལུས་པར་སངས་པར་འགྱུར་བ་དེ་བཞིན་དུ། རིགས་ཀྱི་
བུ་སེམས་ཅན་དེ་དག་གི་སྡིག་པ་གྲངས་མེད་པ་ཡང་གང་གི་ཚེ་ཡོངས་སུ་མྱ་ངན་ལས་འདས་པ་ཆེན་པོའི་ཉི་མ་མ་ཤར་གྱི་བར་དུ་ནི་གནས་ལ། གང་གི་ཚེ་ཡོངས་སུ་མྱ་ངན་ལས་འདས་པ་ཆེན་པོའི་ཉི་མ་ཤར་བ་དེའི་ཚེ་ནི་སྡིག་པ་དེ་དག་མ་ལུས་པར་འབྱང་བར་འགྱུར་
རོ། །རིགས་ཀྱི་བུ་གཞན་ཡང་དཔེར་ན་ལ་ལ་ཞིག་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འདོད་ལ་ད་དུང་གཞོན་ནུའི་ཚུལ་ཁྲིམས་ཀྱང་མ་བླངས་པར་མི་ལ་ལ་ཞིག་གིས་དེ་བཞིན་གཤེགས་པ་ལ་སོགས་པ་དགེ་སློང་གི་དགེ་འདུན་མཆོད་སྟོན་གསོལ་པ་དེའི་ཚེ། 
ཁྱིམ་པ་དེ་ཡང་ཆོས་གོས་བགོས་ནས་དེ་བཞིན་གཤེགས་པའི་ཉན་ཐོས་རྣམས་དང་ཐབས་གཅིག་ཏུ་གྲོང་གི་ནང་དུ་སོང་སྟེ་བཀོད་ན་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱི་གྲངས་སུ་གཏོགས་པ་དེ་བཞིན་དུ། རིགས་ཀྱི་བུ་བྱང་ཆུབ་སེམས་དཔའ་
སེམས་དཔའ་ཆེན་པོ་མདོ་སྡེ་འདི་ལ་སློབ་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་ཐོབ་པ་རྣམས་ཀྱི་གྲངས་སུ་གཏོགས་སོ། །འདི་ལས་ཕྱི་རོལ་དུ་གྱུར་པ་རྫས་ཀྱིས་བྲིད་པའི་ཕྱིར་རམ། གཏམ་ཟླར་བྱས་པའི་ཕྱིར་རམ། རྙེད་པ་དང་། 

49-1-81a

བཀུར་སྟི་དང་། ཚིགས་སུ་བཅད་པ་འདོད་པའི་ཕྱིར་ཐོས་པ་ཙམ་དུ་ཟད་དེ། མདོ་སྡེ་སྤོང་བར་མི་བྱེད་ན་ང་རྒྱལ་གྱི་དབང་གིས་སྤོང་བ་མ་གཏོགས་པར་སེམས་ཅན་གཞན་དེ་དག་ནི་སངས་རྒྱས་དགྲ་བཅོམ་པ་རྣམས་ཀྱི་ཡང་དག་པར་
རྫོགས་པའི་བྱང་ཆུབ་གང་ཡིན་པ་དེ་རིམ་གྱིས་ཐོབ་པར་འགྱུར་རོ། །རིགས་ཀྱི་བུ་དེ་བས་ན་སྔར་བསྟན་པའི་གང་ཟག་བཞི་པོ་རྣམས་རྟེན་དུ་གྱུར་པ་ཡིན་ཏེ། དེ་དག་ནི་སངས་རྒྱས་ཀྱིས་གསུངས་པ་མ་ཡིན་པའི་མདོ་སྡེ་ལ་སངས་རྒྱས་ཀྱིས་གསུངས་སོ་ཞེས་
སྟོན་མི་སྲིད་དེ་སྐབས་མེད་དོ། །དེ་བས་ན་རྟེན་དུ་གྱུར་པ་ཡིན་ནོ། །གང་ཟག་བཞི་པོ་འདི་རྣམས་ཀྱི་ནང་ནས་གཅིག་ཙམ་ཞིག་འདུག་ན་ཡང་དེ་ལ་མཆོད་པ་གྱིས་ཤིག །བསྲུང་བར་གྱིས་ཤིག །གསོལ་པ། དེ་ལ་མཆོད་པ་ཇི་ལྟར་འཚལ། བཀའ་
སྩལ་པ། གང་ཟག་དེ་ནི་བདག་གི་སྲོག་ཡོངས་སུ་བཏང་ནས་དམ་པའི་ཆོས་འབྱིན་པ་ཡིན་གྱིས། དེ་ལས་དམ་པའི་ཆོས་བསྲུང་བ་བསླབ་པར་གྱིས་ཤིག །བསླབས་ནས་ཀྱང་སློབ་དཔོན་དེ་ལ་མཆོད་པ་གྱིས་ཤིག །ཉན་ཐོས་ཀྱི་ཐེག་པ་ལས་ཀྱང་ངས་བསྟན་ཏེ། 
རྒན་ནམ་ཡང་ན་གཞོན་ཡང་རུང་། །གང་ལས་ཆོས་ནི་རྟོགས་འགྱུར་བ། །བྲམ་ཟེ་སྲེག་སྦྱིན་མེ་བཞིན་དུ། །དེ་ལ་བཀུར་སྟིས་ཕྱག་ཀྱང་བྱ། །རྒན་ནམ་ཡང་ན་གཞོན་ཡང་རུང་། །གང་ལས་ཆོས་ནི་རྟོགས་འགྱུར་བ། །དབང་ཆེན་ལྷ་ལ་བྱ་བ་བཞིན། །
དེ་ལ་བཀུར་སྟིས་ཕྱག་ཀྱང་བྱ་ཞེས་བསྟན་པ་ཡིན་ནོ། །གསོལ་པ། སློབ་དཔོན་ལ་མཆོད་པ་བགྱི་བ་ནི་རིགས་ལགས་ན། དགེ་སློང་རྒན་པོ་ཚུལ་ཁྲིམས་དང་ལྡན་པས་གསར་བུ་ལ་ཕྱག་བགྱི་བ་ནི་མི་རིགས་ཏེ་འདི་ནི་དཔྱད་འཚལ་ལགསོ། །ཅི་ལགས་གལ་
ཏེ་དགེ་སློང་རྒན་པོ་གསར་བུ་ལ་སློབ་ན་ཡང་དེས་གསར་བུ་ལ་ཕྱག་བགྱི་འཚལ་ལམ། གལ་ཏེ་ཕྱག་བགྱི་འཚལ་བར་གྱུར་ན་ནི་དེ་ལྟ་ན་རྒན་པོ་དེ་ཚུལ་ཁྲིམས་དང་ལྡན་པའི་དགེ་སློང་མ་ལགས་པར་འགྱུར་ལགས་སོ། །གཞན་ཡང་གླེང་འཚལ་བ་མཆིས་ཏེ། 
གལ་ཏེ་དགེ་སློང་རྒན་པོ་ནི་ཚུལ་ཁྲིམས་འཆལ་པ་ལགས། གསར་བུ་ནི་ཚུལ་ཁྲིམས་དང་ལྡན་པ་ལགས་ལ། དེ་ལས་ཆོས་ཀྱི་དེ་ཁོ་ན་ཉིད་རྟོགས་པར་འགྱུར་ན། ཅི་ལགས་གསར་བུས་གློ་བར་ཆུད་བཞིན་དུ་རྒན་པོ་ཚུལ་ཁྲིམས་འཆལ་པ་ཕྱག་བགྱི་

49-1-81b

འཚལ་ལམ། གཞན་ཡང་གླེང་འཚལ་བ་མཆིས་ཏེ། ཅི་ལགས་ཁྱིམ་ན་གནས་པ་ལས་ཆོས་རྟོགས་པར་འགྱུར་ན་ཡང་ཁྱིམ་ན་གནས་པ་ལ་ཕྱག་བགྱི་འཚལ་ལམ། ཧ་ཅང་ཞེ་ས་ཆེར་བགྱི་བར་མི་རིགས་ལགསོ། །ཁྱིམ་ན་གནས་པ་རྣམས་ནི་རབ་ཏུ་
བྱུང་བའི་མཆོད་པའི་འོས་དང་ཡོན་གནས་མ་ལགས་སོ། །བསྟན་པ་འདི་ལ་ནི་གཞོན་ནུས་རྒན་པོ་རྣམས་ལ་མཆོད་པ་བགྱི་བའི་རིགས་ལགས་སོ། །རྒན་པོ་མཆོད་པའི་འོས་ཤེས་བགྱི་བ་ནི་བསྙེན་པར་རྫོགས་པ་འདུལ་བ་དང་། ཆོ་ག་དང་། སྤྱོད་
ཡུལ་ལ་གནས་པ་ལགས་ལ། བཅོམ་ལྡན་འདས་ཀྱིས་ཀྱང་ཚུལ་ཁྲིམས་འཆལ་པ་རྣམས་ནི་ཞིང་གི་ནང་ན་ཞིང་གི་ངོ་དང་འདྲའོ་ཞེས་གསུངས་ན་ད་ནི། རྒན་ནམ་ཡང་ན་གཞོན་ཡང་རུང་། །གང་ལས་ཆོས་ནི་རྟོགས་འགྱུར་བ། །དབང་
ཆེན་ལྷ་ལ་བྱ་བ་བཞིན། །དེ་ལ་བཀུར་སྟིས་ཕྱག་ཀྱང་བྱ་ཞེས་ཀྱང་གསུང་ངམ། ཚིག་གི་དོན་འདི་གཉིས་ནི་དཔྱད་འཚལ་ལགས་སོ། །དེ་མ་ལགས་ན་དེ་ལྟར་བགྱིས་དང་ཆད་པའི་གནས་སུ་འགྱུར་ལགས་སོ། །བཅོམ་ལྡན་འདས་དགེ་
སློང་ཚུལ་ཁྲིམས་དང་ལྡན་པ་རྣམས་སླུ་བར་མཛད་ལགས་སམ། འདི་ལ་ནོངས་པ་མང་དུ་མཆིས་ལགས་ན། བཅོམ་ལྡན་འདས་ཀྱིས་མདོ་མང་པོ་དག་ལས་ཚུལ་ཁྲིམས་འཆལ་པ་རྣམས་ཆད་པས་གཅད་པར་བཀའ་སྩལ་ན། ཅི་ལགས་
དེ་བཞིན་གཤེགས་པས་འདིར་དགོངས་ཏེ་གསུངས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྒན་ནམ་ཡང་ན་གཞོན་ཡང་རུང་། །གང་ལས་ཆོས་ནི་རྟོགས་འགྱུར་བ། །དབང་ཆེན་ལྷ་ལ་བྱ་བ་བཞིན། །དེ་ལ་བཀུར་
སྟིས་ཕྱག་ཀྱང་བྱ་ཞེས་བྱ་བ་ནི་མ་འོངས་པའི་དུས་ཀྱི་བྱང་ཆུབ་སེམས་དཔའ་རྣམས་ཀྱི་ཕྱིར་ངས་བསྟན་པ་ཡིན་གྱི། ཉན་ཐོས་ཀྱི་ཐེག་པ་པ་རྣམས་ཀྱི་ཕྱིར་དེ་སྐད་བསྟན་པ་ནི་མ་ཡིན་ནོ། །རིགས་ཀྱི་བུ་ངས་སྔར་བསྟན་པ་དམ་པའི་ཆོས་ནུབ་པའི་དུས་དང་། 
ཚུལ་ཁྲིམས་དང་ལྡན་པ་འགྲིབ་པའི་དུས་དང་། ཚུལ་ཁྲིམས་འཆལ་པའི་ཕྱོགས་རྣམ་པར་འཕེལ་བའི་དུས་དང་། ངེས་པར་གྲོལ་བ་དང་། ཆགས་པ་མེད་པ་ཟད་པའི་དུས་དང་། བྲན་དང་བྲན་མོ་ལ་སོགས་པ་རྫས་ངན་པ་དུ་མ་ཡོངས་སུ་འཛིན་

49-1-82a

པར་བྱེད་པའི་དུས་ན་སྐྱེས་བུ་བཞིའི་ནང་ནས་གཅིག་ཙམ་ཡང་བྲན་དང་བྲན་མོ་ལ་སོགས་པ་རྫས་ངན་པ་དུ་མ་ཡོངས་སུ་འཛིན་པའི་དགེ་འདུན་གྱི་ནང་དུ་ཁྱིམ་ནས་ཁྱིམ་མེད་པར་རབ་ཏུ་བྱུང་ནས། དེ་རྣམས་ཀྱི་རུང་བ་དང་། རུང་བ་
མ་ཡིན་པ་དང་། འདུལ་བ་དང་། འདུལ་བ་མ་ཡིན་པའི་བྱེ་བྲག་ཀྱང་ཤེས། དེ་དག་གི་གཡེལ་བ་དང་། བདག་ཉིད་ཀྱི་ཉེས་པ་མང་པོའི་གཞི་ཡང་ཤེས་ཏེ། སྤྱོད་པ་འདི་ནི་བཅོམ་ལྡན་འདས་ཀྱི་སྤྱོད་པ་མ་ཡིན་ནོ་སྙམ་དུ་ཡང་ཤེས་ནས་ཡུལ་
དང་དུས་ལ་བལྟས་ཏེ་གསར་བུ་རྣམས་ལས་གསུང་རབ་ཡན་ལག་དགུ་སློབ་པར་བྱེད་ཅིང་། དེ་དག་ཕམ་པ་བྱུང་བ་ཡིན་པར་ཤེས་སུ་ཟིན་ཀྱང་དམ་པའི་ཆོས་དབྱུང་བར་བྱའོ་སྙམ་སྟེ་ཁ་རོག་པར་འདུག་ནས་དེ་འབའ་ཤིག་སེམས་ཤིང་དམ་པའི་ཆོས་
བསྲུང་བ་ཁོ་ནའི་ཕྱིར་འཇིག་རྟེན་དུ་འབྱུང་ངོ་། །རིགས་ཀྱི་བུ་དཔེར་ན་འགའ་ཞིག་གི་རྒྱལ་པོ་ཞིག་ཤི་ནས་དེའི་བུ་རྣམས་ཀྱི་ནང་ན་རྒྱལ་པོ་ནུས་པ་མེད་དེ། རྒྱལ་པོ་དེ་ཉིད་ཀྱི་ཁམས་ཀྱི་གདོལ་པ་འབྲུག་སྒྲ་ལྟ་བུའི་སིལ་སྙན་དང་ལྡན་པ་ཞིག་གིས་གདོལ་
པ་དག་དེང་དེ་མཐུས་རྒྱལ་སྲིད་ཕྲོགས་ནས་རྒྱལ་པོ་བྱེད་ལ། གདོལ་པ་དེ་ཡང་རང་བཞིན་གྱིས་ནོར་དང་ལྡན་པ་ཞིག་སྟེ། དེ་ནས་གདོལ་པ་དེ་རྒྱལ་པོ་བྱེད་པ་ན་བྲམ་ཟེ་དང་ཁྱིམ་བདག་དེ་ན་གནས་པ་རྣམས་གདོལ་པས་བཀོལ་ན་མི་རུང་ངོ་སྙམ་ནས་ཡུལ་
བོར་ཏེ། གང་ན་རྒྱལ་པོའི་རིགས་རྒྱལ་པོ་བྱེད་པའི་ཡུལ་དེར་འགྲོ་བར་བྱེད་ལ། བྲམ་ཟེ་དང་ཁྱིམ་བདག་གཞན་ཁ་ཅིག་ནི་བདག་གི་ཡུལ་འདོར་མ་ཕོད་ནས་ཇི་ལྟར་ཤིང་གང་དུ་སྐྱེས་པ་དེ་ཉིད་དུ་སྐམ་པར་འགྱུར་བ་བཞིན་དུ་དེ་དག་ཀྱང་ཤིང་དང་འདྲ་བར་
ཡུལ་དེ་ཉིད་ན་འཁོད་དོ། །དེ་ནས་གདོལ་པ་དེས་མི་མང་པོ་བྱེར་རོ་སྙམ་ནས་གདོལ་པ་རྣམས་ལམ་ཐམས་ཅད་བསྲུང་དུ་བཅུག་སྟེ། མི་ལྷག་མ་རྣམས་བསྲུང་བའི་ཕྱིར་ཡང་བྲམ་ཟེ་གཙང་སྦྲ་ཅན་རིག་བྱེད་ཀྱི་མཐར་ཕྱིན་པ་གང་ངའི་རྒྱལ་སྲིད་ཀྱི་ཕྱེད་
ལོངས་སྤྱད་པར་འདོད་པ་དེས་ནི་ངའི་མདུན་ན་འདོན་གྱིས་ཤིག་ཅེས་བསྒྲགས་ཏེ། དེ་ལྟར་གྲོང་ཁྱེར་དུ་ཞག་བདུན་གྱི་བར་དུ་རྔ་བོ་ཆེ་བརྡུངས་ཀྱང་བྲམ་ཟེ་གཙང་སྦྲ་ཅན་གདོལ་པའི་བླ་མཁྱེན་བྱེད་པ་སུ་ཡོད་ཅེས་ཟེར་ནས་སུ་ཡང་མ་བཏུབ་བོ། །

49-1-82b

དེ་ནས་གདོལ་པ་དེས་བསྒོ་བ། གལ་ཏེ་སུའང་དེ་ལྟར་བྱེད་དུ་མི་བཏུབ་ན་བྲམ་ཟེ་ཐམས་ཅད་གདོལ་པའི་ཁྱིམ་དུ་གདོལ་པ་རྣམས་དང་ལྷན་ཅིག་ཏུ་ཟན་ཟོ་ཤིག །ཉོལ་ཅིག །གལ་ཏེ་མི་བཏུབ་ན་དེ་ཡང་ངས་ནན་གྱིས་བྱེད་དུ་གཞུག་གོ། །དེ་སྟེ་ལ་ལ་ཞིག་
བཏུབ་ན་ནི་ངས་རྒྱལ་སྲིད་ཀྱི་ཕྱེད་ཀྱང་སྦྱིན་ནོ། །སུམ་བཅུ་རྩ་གསུམ་པའི་ལྷ་རྣམས་ཀྱི་བདུད་རྩི་འཐུངས་ན་ལྷར་འགྱུར་བ་ཐོབ་པར་འགྱུར་བ་འཇིག་རྟེན་ན་དཀོན་པ་གང་ཡིན་པ་དེ་ང་དང་ལྷན་ཅིག་ཏུ་འཐུངས་ལ་ལྷར་འགྱུར་བར་བྱའོ་ཞེས་བསྒོའོ། །དེ་ནས་དེར་བྲམ་ཟེའི་
གཞོན་ནུ་གཙང་སྦྲ་ཅན་ཐོར་ཚུགས་དང་ལྡན་པ། རིགས་བྱེད་ཀྱི་མཐར་ཕྱིན་པ། གཞོན་ནུ་ཚངས་པར་སྤྱོད་པ་ཞིག་གིས་བསྒོ་བ་དེ་ཐོས་ནས་རང་གི་ཐོར་ཚུགས་བཤིག་སྟེ། གདོལ་པ་དེའི་ཐད་དུ་སོང་ནས་དེ་ལ་ཕྱག་འཚལ་ཏེ་སྨྲས་པ། རྒྱལ་པོའི་
ཞལ་སྔ་ནས་བཀའ་ཅི་སྩལ་པ་དེ་བཞིན་དུ་བགྱིའོ་ཞེས་བྱས་ཏེ། དེ་ནས་རྒྱལ་པོ་དེས་དེ་མདུན་ན་འདོན་དུ་དབང་བསྐུར་ཏོ། །དེ་ནས་བྲམ་ཟེ་རྣམས་ན་རེ་གདོལ་པའི་མདུན་ན་འདོན་པར་ཁས་བླངས་པ་ངན་པ་འདི་ངན་པ་འདི་ཞེས་འཛེར་ཏོ། །དེ་ནས་དེ་བཞིན་དུ་
རྒྱལ་པོས་དེ་ལ་རྒྱལ་སྲིད་ཀྱི་ཕྱེད་བྱིན་ནས་དེ་དང་ལྷན་ཅིག་ཏུ་རྒྱལ་པོ་བྱེད་དོ། །དེ་ནས་སྐབས་ཤིག་ཏུ་བྲམ་ཟེ་དེས་གདོལ་པའི་རྒྱལ་པོ་དེ་ལ་སྨྲས་པ། རྒྱལ་པོ་ཆེན་པོ་བདག་གི་བྲམ་ཟེའི་ཚུལ་བོར་ནས་ཁྱོད་ཀྱི་མདུན་ན་འདོན་བགྱི་བར་ཁས་བླངས་
ཏེ་ཁྱོད་ལ་རིག་པ་རེ་རེ་ནས་བསླབ་སྙམ་ན་ཁྱོད་ད་དུང་བདག་ལ་ཐུགས་མི་བསྟན་ཏོ། །དེ་ནས་རྒྱལ་པོ་དེས་དེ་ལ་སྨྲས་པ། ཁྱོད་ལ་ང་ཅི་སྟེ་ཡིད་མི་སྟོན། འདི་ལྟ་བུའི་ཡོན་ཏན་དང་ལྡན་པ་ཁྱོད་ལ་ཡིད་རྟོན་གྱིས། ད་ནི་རྒྱལ་པོ་ཤི་བ་དེའི་བདུད་རྩིའི་
བུམ་པ་འདི་ཕྱེད་ཕྱེད་མཉམ་དུ་བཏུང་ངོ་ཞེས་བྱས་སོ། །དེ་ནས་ཐོག་མ་ཁོ་ནར་བློན་པོ་དེས་འཐུངས་པའི་འོག་ཏུ་བདུད་རྩི་དེའི་ནང་དུ་ཐབས་ཀྱིས་བཏུང་བ་གཞན་བླུགས་ནས་རྒྱལ་པོ་དེས་འཐུངས་པ་དང་། བརྒྱལ་ཏེ་ཤི་བ་བཞིན་དུ་འདུག་གོ། །
དེ་ནས་བྲམ་ཟེ་དེས་རྒྱལ་པོ་སྔ་མའི་བུ་རྒྱ་པོ་ནུས་པ་རྒྱལ་པོར་བཅུག་ནས་སྨྲས་པ། རྒྱལ་སྲིད་འདི་ལོང་ལ་ཆུད་མ་ཟོས་པར་གྱིས་ཤིག །གདོལ་པ་ནི་རྒྱལ་སྲིད་འདི་ལ་རྒྱལ་པོའི་འོས་མ་ཡིན་ཏེ། ཁྱོད་ཉིད་རྒྱལ་པོར་འོས་པ་ཡིན་ནོ། །གདོལ་

49-1-83a

པས་རྒྱལ་པོ་བྱ་བ་ནི་མི་སྲིད་དོ་ཞེས་བྱས་སོ། །དེ་ནས་གདོལ་པ་དེ་བརྒྱལ་བ་ལས་སངས་པར་འགྱུར་བའི་སྨན་བྱིན་ཏེ་སོས་པར་བྱས་ནས་དེ་སྤྱུགས་ཏེ་འགལ་བ་བྱེད་པའི་ཆད་པས་བཅད་དོ། །དེ་ལྟར་བྲམ་ཟེ་དེས་རྒྱལ་སྲིད་
སླར་བཙུགས་ཏེ་གདོལ་པ་དེ་སྤྱུགས་ན་དེ་བྲམ་ཟེ་ལས་ཉམས་པར་ཡང་མ་གྱུར་ལ། བྲམ་ཟེ་དང་ཁྱིམ་བདག་རྣམས་ཀྱང་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ནོ་ཞེས་ཟེར་ཞིང་དེ་ལ་ལེགས་སོ་ལེགས་སོ་ཞེས་བྱས་
ཏེ། མཆོད་པར་བྱེད་པ་དེ་བཞིན་དུ་བྱང་ཆུབ་སེམས་དཔའ་ཡང་ང་འདས་པའི་འོག་ཏུ་དམ་པའི་ཆོས་དབྱུང་བའི་དོན་དུ་ཐབས་ཅི་ཡང་བྱེད་དེ། རྫས་ངན་པ་འདུན་ཅིང་སྤྱོད་པ་ངན་པ་དང་ལྡན་པའི་དགེ་འདུན་གྱི་ནང་དུ་ཚུལ་ཁྲིམས་འཆལ་པ་དག་དང་ཚུལ་འཐུན་
པར་ཡང་སྟོན་ཏེ། ཚུལ་ཁྲིམས་འཆལ་པ་དེ་རྣམས་ཀྱི་ཆོས་གོས་དང་། གླེགས་བམ་དང་། ཡོ་བྱད་དེ་རྣམས་དེ་དག་ལས་ཕྲོགས་ནས་དགེ་སློང་ཚུལ་ཁྲིམས་དང་ལྡན་པ་རྣམས་ལ་སྦྱིན་པར་གང་གིས་ནུས་པ་དང་། སྒྲུབ་པ་དང་། 
བཙོ་བ་དང་། འབྲུ་བསྡུ་བ་ཡང་བསྟེན་ཏེ་རུང་བ་མ་ཡིན་པ་བརྒྱད་ཀྱི་དངོས་པོ་ལེན་པར་བྱེད་པ་རྣམས་མེད་པར་བྱེད་པར་གང་གིས་ནུས་པ་དང་། བྲམ་ཟེས་གདོལ་པའི་རྒྱལ་པོ་ལ་བྱས་པ་བཞིན་དུ་དེ་དག་དང་ལྷན་ཅིག་ཏུ་སྐབས་དབྱེ་བ་དང་། གསོ་
སྦྱོང་དང་ཐལ་མོ་སྦྱར་བས་གདུད་པའི་ལས་བྱེད་ཅིང་འགལ་བ་བྱེད་པ་ཚར་གཅོད་པར་གང་གིས་ནུས་པ་དང་། གཡེལ་བ་རྣམས་ཀྱང་དག་པའི་དགེ་འདུན་དུ་བསྒྱུར་ཞིང་སྐྱེ་བོ་མང་པོ་ལ་ཕན་པའི་ཕྱིར་ཐེག་པ་ཆེན་པོའི་མདོའི་སྡེ་ཚན་སྟོན་པར་གང་
གིས་ནུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཡིན་པ་དེའི་ཆེད་དུ་ཚིགས་སུ་བཅད་པ་དེ་དག་གསུངས་པ་ཡིན་ཏེ། དེ་ལྟར་བྱེད་པ་ལ་ནི་དམ་པའི་ཆོས་འབྱིན་པའི་ཕྱིར་བྲམ་ཟེ་དང་ཁྱིམ་བདག་རྣམས་མགུ་བར་འགྱུར་ཏེ། 
བྲམ་ཟེ་ཡིན་བཞིན་དུ་འདིས་རྒྱལ་སྲིད་དང་། དམ་པའི་བཙུགས་སོ་སྙམ་ནས་དེ་ལ་མཆོད་པ་བྱེད་དོ། །གང་དེ་ལྟར་སྟོན་པ་དེ་ནི་བྱང་ཆུབ་སེམས་དཔའ་ཁོ་ན་ཡིན་ཏེ། ཐབས་དང་སྦྱར་ཞིང་བྱེད་པས་ན་དེ་ལ་ཉེས་པ་བསྐྱེད་པར་མི་བྱའོ། །དེ་ལ་ཉེས་

49-1-83b

པ་བསྐྱེད་ན་ཕྱིར་ཉེས་པ་ཐོབ་པར་འགྱུར་ཏེ། བཤེགས་པར་འོས་པའི་ཉེས་པ་ལྟ་བུར་འགྱུར་ལ་ང་རྒྱལ་གྱི་དབང་གིས་འཆགས་པར་ཡང་མི་བྱེད་དོ། །བྱང་ཆུབ་སེམས་དཔའ་སློབ་དཔོན་དེ་ནི་མཆོག་ཏུ་གཡེལ་བ་ལྟ་བུར་སྟོན་ཀྱང་ཉེས་པར་མི་འགྱུར་ཏེ། 
དགོངས་པའི་ཚིག་འདི་ནི་བྱང་ཆུབ་སེམས་དཔའི་ཆེད་དུ་བསྟན་ཏེ། །རྒན་ནམ་ཡང་ན་གཞོན་ཡང་རུང་། །གང་ལས་ཆོས་ནི་རྟོགས་འགྱུར་བ། །བྲམ་ཟེ་སྲེག་སྦྱིན་མེ་བཞིན་དུ། །དེ་ལ་བཀུར་སྟིས་ཕྱག་ཀྱང་བྱ། །
རྫོགས་སངས་རྒྱས་ཀྱིས་བསྟན་པ་ཡི། །ཆོས་ནི་གང་ལས་རྟོགས་འགྱུར་བ། །དབང་ཆེན་ལྷ་ལ་བྱ་བ་བཞིན། །དེ་ལ་བཀུར་སྟིས་ཕྱག་ཀྱང་བྱ། །ཞེས་བྱ་བ་ནི་ཉན་ཐོས་རྣམས་ཀྱི་ཆེད་དུ་བསྟན་པ་མ་ཡིན་གྱི། བྱང་ཆུབ་སེམས་དཔའ་རྣམས་
ཀྱི་ཆེད་དུ་བསྟན་པ་ཡིན་ནོ། །གསོལ་པ། བཅོམ་ལྡན་འདས་ཅི་ལགས། བྱང་ཆུབ་སེམས་དཔའ་གཡེལ་བ་དེ་ལྟ་བུ་དག་བསྙེན་པར་རྫོགས་པར་རུང་ངམ། འོན་ཏེ་མི་རུང་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་སྐད་
མ་ཟེར་ཅིག །དེ་ཉིད་དེ་དག་གི་བསྙེན་པར་རྫོགས་པ་ཡིན་ཏེ། དེ་དག་གི་ཉེས་པ་གང་དང་གང་བཤགས་པ་དེ་དག་ནི་བཤགས་བཟོད་པ་ཡིན་ནོ། །རིགས་ཀྱི་བུ་དཔེར་ན་རྫིང་རྙིང་པ་རལ་པའི་ཆུ་ནི་ཐམས་ཅད་ཟགས་པར་འགྱུར་རོ། །དེ་ཅིའི་ཕྱིར་ཞེ་ན། 
སྐྱེ་བོ་ཆོས་བཞིན་དུ་བྱེད་པ་རྣམས་ནི་འགྲིབས། སྐྱེ་བོ་ཆོས་བཞིན་དུ་མི་བྱེད་པ་རྣམས་ནི་འཕེལ་བའི་ཕྱིར་རོ། །གལ་ཏེ་རྫིང་དེ་ལ་ལ་ཞིག་གིས་ཕྱིར་བཅོས་ན་ནི་དེས་དེའི་ནང་ནས་ཆུ་འཛག་པར་མི་འགྱུར་བ་དེ་བཞིན་དུ་བྱང་ཆུབ་སེམས་དཔའ་ཡང་
དགེ་སློང་ཚུལ་ཁྲིམས་དང་ལྡན་པ་རྣམས་མེད་པའི་ཕྱིར་དང་། དགེ་འདུན་གྱི་སྒྲུབ་པ་ཉམས་པའི་ཕྱིར་དང་། ཐེག་པ་ལ་གཡེལ་བ་ཡོངས་སུ་འཕེལ་བའི་ཕྱིར་གཡེལ་བ་རྣམས་དང་ལྷན་ཅིག་ཏུ་བསྙེན་པར་རྫོགས་པ་དང་། སྐབས་འབྱེད་པ་དང་། 
གསོ་སྦྱོང་དང་། ཐལ་མོ་སྦྱར་བས་གདུད་པའི་ལས་བྱེད་པས་རྫིང་ཟག་པ་བཞིན་དུ་ཚུལ་ཁྲིམས་དང་ཆོ་ག་ཟགས་པར་འགྱུར་མོད་ཀྱི་རིགས་ཀྱི་བུ་བྱང་ཆུབ་སེམས་དཔའ་དམ་པའི་ཆོས་འབྱིན་པར་འདོད་པ་དང་། ཚུལ་ཁྲིམས་དང་ལྡན་པའི་མི་ནི་

49-1-84a

རྫིང་བཅོས་པ་བཞིན་དུ་དེ་ཉིད་བསྙེན་པར་རྫོགས་པ་ཡིན་ཏེ། དྲི་མ་མེད་པ་དང་བཤགས་པས་བདག་ཉིད་དག་པར་བྱས་ནས་མདོ་སྡེ་དང་འདུལ་བ་དེ་ཁོ་ན་ཉིད་ཀྱིས་རྫིང་བཅོས་པ་བཞིན་དུ་འཆོས་པར་བྱེད་དོ།། །།
བམ་པོ་བརྒྱད་པ། གསོལ་པ། བཅོམ་ལྡན་འདས་ཀྱིས་ཨ་མྲའི་འབྲས་བུ་རྣམ་པ་བཞི་ལྟ་བུའི་མདོ་ལས་གསུངས་པའི་ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པ་དེ་ཇི་ལྟར་རྟོགས་པར་བགྱི་ལགས། བཀའ་སྩལ་པ། རིགས་
ཀྱི་བུ་ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པ་ནི་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ལས་རྟོགས་པར་བྱའོ། །གསོལ་པ། ཇི་ལྟར་རྟོགས་པར་བགྱི་ལགས། བཀའ་སྩལ་པ། ཁྱིམ་བདག་ཞིང་པ་ལ་ལ་ཞིག་
གིས་འབྲས་སཱ་ལུ་དང་། འབྲུ་དང་། ཁྲེ་རྒོད་ཀྱི་ཞིང་ལ་ཐོག་མ་ཁོ་ནར་ཞིང་གི་དོ་དང་སྙེ་ལོང་རྣམས་བསལ་ཏེ་དག་པར་བྱས་པ་དེ་ལ་དེ་ཕྱིན་ཆད་ནས་ནམ་འབྲས་བུར་མ་གྱུར་གྱི་བར་དུ་ཤའི་མིག་གིས་ཞིང་གི་གྲངས་སུ་རྩི་བར་བྱེད་ལ་འབྲས་བུར་གྱུར་
པའི་ཚེ་ནི་ཕུབ་མ་དང་། ཁོང་སྟོང་དང་། འབྲས་བུ་དང་། སྙིང་པོའི་བྱེ་བྲག་དང་། འདི་ནི་འབྲུ་ཡིན་ནོ། །འདི་ནི་འབྲུ་མ་ཡིན་ནོ་སྙམ་དུ་ཡང་དག་པར་ཤེས་པ་དེ་བཞིན་དུ་གཞི་ཆེན་པོ་བརྒྱད་ནི་དགེ་འདུན་གྱི་སྐྱོན་ཡིན་ཏེ། དེ་རྣམས་ཞིང་གི་དོ་དང་
སྙེ་ལོང་བཞིན་དུ་བསལ་ནས་དེའི་འོག་ཏུ་ཤའི་མིག་གིས་དགེ་འདུན་གྱི་ནང་དུ་ཚུལ་ཁྲིམས་དང་ལྡན་པའི་དགེ་སློང་གི་གྲངས་སུ་རྩི་བར་བྱེད་དོ། །སུ་ཡང་རུང་སྟེ་ནམ་སྐྱོན་ཅན་དུ་མ་གྱུར་པ་དང་། ཡོན་ཏན་གྱི་འབྲས་བུ་གསལ་བར་མ་གྱུར་གྱི་བར་དུ་
འདི་ནི་འབྲས་བུའོ། །འདི་ནི་འབྲུ་ངན་པའོ་ཞེས་བྱ་བ་དེ་ལྟ་བུར་ཤའི་མིག་གིས་རྟོགས་པར་མི་ནུས་ཏེ། དེའི་དུས་ཀྱི་བར་སྐབས་སུ་ནི་ཞིང་བཞིན་དུ་དགེ་འདུན་གྱི་གྲངས་སུ་མགོ་མཉམ་དུ་རྩི་བར་འགྱུར་རོ། །དེ་ཅིའི་ཕྱིར་ཞེ་ན། ཞིང་གི་སྐྱོན་ནི་ཞིང་གི་
དོ་ཡིན་ལ། དགེ་འདུན་གྱི་སྐྱོན་ནི་གཞི་ཆེན་པོ་བརྒྱད་ཡིན་པའི་ཕྱིར་རོ། །ཉེས་པའི་མཆོག་སྦྲུལ་གདུག་པ་ལྟ་བུ་དང་བྲལ་བའི་དགེ་འདུན་ནི་ཞིང་ཞེས་བྱ་སྟེ། དགེ་སློང་སུ་ཡང་རུང་ཞིང་རྣམ་པར་དག་པ་ལྟ་བུར་གྱུར་པ་དེ་ནི་ལྷ་བཞིན་དུ་མཆོད་པར་

49-1-84b

བྱ་བ་དང་ཡོན་གནས་སུ་བྱ་བ་ཡིན་ནོ། །འབྲས་བུར་གྱུར་པ་དེའི་སྔ་རོལ་ཏུ་ནི་ཤའི་མིག་གིས་སྐྱོན་དང་ཡོན་ཏན་རྟོགས་པར་མི་ནུས་སོ། །རིགས་ཀྱི་བུ་གཞན་ཡང་དཔེར་ན་གྲོང་གིས་ཁོར་གཅིག་གི་ནང་ན་ཤིང་ཀ་ར་ཀ་མང་པོ་ཡང་ཡོད། དེའི་ནང་ན་
ཤིང་ཏེན་ཏུ་ཀ་གཅིག་ཀྱང་ཡོད་ལ་ཏེན་ཏུ་ཀའི་ཤིང་དེ་ལ་ཡང་འབྲས་བུ་ཡོད། ཀ་ར་ཀའི་ཤིང་དེ་དག་ལ་ཡང་འབྲས་བུ་ཡོད་པ་ལས། དེ་ནས་བུ་མོ་གཞོན་ནུ་དབུལ་མོ་ཤིང་ཏོག་ཐུ་བ་ཞིག་གིས་ཏེན་ཏུ་ཀའི་འབྲས་བུ་བཏུས་ནས་ཀ་ར་ཀའི་འབྲས་བུ་
ཡང་དེའི་བཅུ་འགྱུར་ཙམ་དུ་བཏུས་ཏེ། ཏེན་ཏུ་ཀའི་འབྲས་བུ་ཡིན་ནོ་སྙམ་ནས་དེ་རྣམས་ཀྱིས་སྐོན་པ་བཀང་སྟེ་གྲོང་དེ་ཉིད་དུ་འཚོང་བར་བྱེད་ལ། དེ་ནས་བྱིས་པ་རྣམས་ཀྱིས་འབྲས་བུ་རྣམ་པ་གཉི་ག་ཏེན་ཏུ་ཀའི་འབྲས་བུ་ཡིན་ནོ་སྙམ་ནས་ཉོས་ཏེ་ཟོས་
པ་དང་ཤིའོ། །དེ་ན་བྱེ་བྲག་ཕྱེད་པའི་མི་ཏེན་ཏུ་ཀའི་འབྲས་བུ་ཟ་འདོད་པ་གང་ཡིན་པ་དེ་དག་གིས་ནི་བུ་མོ་གཞོན་ནུ་དེ་ལ་ལེགས་པར་དྲིས་ཏེ། ཆེ་ཞེ་འདི་དག་ཕྱོགས་གང་ལོགས་ནས་བླངས་ཤེས་བྱས་པ་དང་། དེས་དེ་དག་ལ་ས་ཕྱོགས་བསྟན་ཏེ། 
དེ་དག་ལ་ས་ཕྱོགས་བསྟན་པ་དང་། དེ་ན་ཀ་ར་ཀའི་ཤིང་ནི་མང་ལ་ཏེན་ཏུ་ཀའི་ཤིང་ནི་གཅིག་པུ་ལས་མེད་པར་ཤེས་ཏེ། འདི་དག་ནི་དེ་ནས་བླངས་སོ་སྙམ་དུ་རིག་ལ། ཏེན་ཏུ་ཀའི་འབྲས་བུ་དེ་དག་བཙལ་ཏེ་མ་རྙེད་ནས་ཀ་ར་ཀའི་འབྲས་བུས་འཇིགས་
ཤིང་སྐྲག་སྟེ། འཇིགས་པ་དེ་ཉིད་ཀྱིས་འཕྱ་བར་བྱེད་ཅིང་མ་ཉོས་པར་ཕྱིར་དོང་བ་དེ་བཞིན་དུ་རིགས་ཀྱི་བུ་དགེ་འདུན་གང་དག་གཞི་ཆེན་པོ་བརྒྱད་ཤེས་བཞིན་དུ་སྤྱོད་པར་བྱེད་པ་དེར་སྤྱོད་པར་བྱེད་པ་དེས་གལ་ཏེ་ཚུལ་ཁྲིམས་དང་ལྡན་པའི་དགེ་
སློང་དག་འཁོད་ན། དེ་དག་ཇི་ལྟར་ཀ་ར་ཀའི་ཚལ་ན་ཏེན་ཏུ་ཀའི་ཤིང་འདུག་པ་བཞིན་དུ་དེ་དག་མཐོང་ན་དེ་ཚུལ་ཁྲིམས་དང་ལྡན་པ་ཡིན་དུ་ཟིན་ཀྱང་དགེ་བསྙེན་ཤེས་རབ་ཅན་གྱིས་དེ་དག་ལ་ཕྱག་མི་བྱ་ཞིང་མཆོད་པའི་གནས་སུ་མི་བྱའོ། །གལ་ཏེ་
དེ་དག་ལ་ཕྱག་བྱ་བར་འདོད་ན་ཅི་ཁྱོད་གཞི་ཆེན་པོ་བརྒྱད་ལེན་པར་བྱེད་དམ། འོན་ཏེ་ལེན་པར་མི་བྱེད་ཅེས་དྲིས་ནས་གདོད་ཕྱག་བྱ་སྟེ། ལེན་པར་བྱེད་པ་གང་ཡིན་པ་དེ་དག་དང་ལྷན་ཅིག་ཏུ་སྐབས་དབྱེ་བ་དང་གསོ་སྦྱོང་གི་ལས་རྣམས་བྱེད་དམ་མི་བྱེད་

49-1-85a

ཅེས་དྲི་བར་བྱའོ། །གལ་ཏེ་འདི་སྐད་ཅེས་ཟེར་ཏེ། དགེ་འདུན་གྱི་གཞི་ཆེན་པོ་བརྒྱད་ནི་ལེན་པར་བྱེད་དེ། བཅོམ་ལྡན་འདས་སེམས་ཅན་ཐམས་ཅད་ལ་ཐུགས་བརྩེ་བས་ཀྱང་རྒྱལ་བུ་རྒྱལ་བྱེད་ཀྱི་ཚལ་དུ་གསེར་དངུལ་
དག་བཞེས་སོ་ཟེར་ལ་དེའི་ནང་ན་ཁ་ཅིག་ལེན་པར་མི་བྱེད་དེ། བདག་ཅག་ནི་ལེན་པར་བྱེད་པ་དག་དང་ལྷན་ཅིག་ཏུ་སྐབས་འབྱེད་པ་དང་། གསོ་སྦྱོང་དང་། ཐལ་མོ་སྦྱར་བས་གདུད་པའི་ལས་ཀྱང་མི་བྱེད། ཐུག་པ་ཡང་མི་འཐུང་། དེ་དག་ལས་རྙེད་པ་
དང་། བཀུར་སྟི་ཡང་མི་ལེན་ནོ་ཞེས་ཟེར་བ་དང་། ལྷའི་ཡང་ལྷ་སངས་རྒྱས་བཅོམ་ལྡན་འདས་དེས་ཀྱང་བཞེས་ན་དགེ་འདུན་གྱིས་བཞེས་པ་ལ་མི་བཟོད་པ་ཅི་ཡོད་ཅེས་དེ་སྐད་ཟེར་དུ་ཟིན་ཀྱང་དེ་དག་དང་ལྷན་ཅིག་ཏུ་ཁྱེད་སྐབས་འབྱེད་པ་དང་། གསོ་
སྦྱོང་དང་། ཐལ་མོ་སྦྱར་བས་གདུད་པའི་ལས་མ་བྱས་གྲང་ཞེས་སྨྲ་བར་བྱེད་དེ། གལ་ཏེ་ཚིག་ཉན་ཏུ་མི་བཏུབ་པ་དེ་དག་ནི་ཡང་དག་པའི་མདོ་སྡེ་ཤེས་པ་ཡིན་ནོ། །ལེན་པར་བྱེད་པ་བྱིས་པ་དང་འདྲ་བ་དེ་དག་ནི་སེམས་ཅན་དམྱལ་བ་པ་ཡིན་པར་རིག་
པར་བྱ་སྟེ། སེམས་ཅན་དེ་དག་ནི་བྱིས་པ་འཆི་བ་དང་འདྲའོ། །རིགས་ཀྱི་བུ་གཞན་ཡང་དཔེར་ན་གྲོང་ཁྱེར་ཆེན་པོ་ཞིག་གི་སྤོས་ཀྱི་ཚོང་འདུས་དག་ན་སྤོས་མ་དུ་ར་ཀ་དང་། གཞན་ཡང་སྤོས་ཀྱི་སྣ་གྲངས་དང་། སྨན་རྣམས་ཚོང་བ་དག་འཚོང་བར་བྱེད་
ལ། དེ་ན་ཉོ་བའི་སེམས་ཅན་རྣམས་ཀྱིས་གངས་ཀྱི་རི་ལས་བྱུང་བའི་སྨན་ཅི་འདྲ་བ་མི་ཤེས་ནས་དེ་དག་གིས་དྲིས་ཏེ། གལ་ཏེ་གངས་ཀྱི་རི་ལས་བྱུང་བའི་སྤོས་མ་དུ་ར་ཀ་ལྟ་ཅུང་ཟད་ཅི་ཡོད་ན་བྱིན་ཅིག་ཅེས་བྱས་པ་དང་། དེ་གངས་ཀྱི་རི་ལས་བྱུང་བའི་སྤོས་
ལྟར་བཅོས་པ་ལ་གངས་ཀྱི་རི་ལས་བྱུང་བའི་སྤོས་ཡིན་ནོ་ཞེས་བྱས་ཏེ་བྱིན་ནས། དེ་དག་གིས་འདི་ནི་གངས་ཀྱི་རི་ལས་བྱུང་བ་ཡིན་ནོ་སྙམ་དུ་ཡང་དག་པར་ཡིད་ཆེས་ཏེ་བཅོས་མའི་སྤོས་རྣམས་ལེན་པར་བྱེད་པ་དེ་བཞིན་དུ། ཚུལ་ཁྲིམས་འཆལ་པ་འམ། 
ཚུལ་ཁྲིམས་དང་ལྡན་པ་ཡང་རུང་སྟེ། དེ་དག་ལ་འདི་དག་ནི་ཉན་ཐོས་ཀྱི་དགེ་འདུན་ཡང་དག་པ་ཡིན་ནོ། །འདི་དག་ནི་དགེ་འདུན་ཡང་དག་པ་ཡིན་ནོ། །འདི་དག་ནི་དགེ་འདུན་འཐུན་པ་ཡིན་ནོ་སྙམ་དུ་བསམས་ཏེ། ཤའི་མིག་དང་ལྡན་པའི་དགེ་

49-1-85b

བསྙེན་དེས་དེ་དག་ལ་ཕྱག་ཀྱང་བྱའོ། །སྦྱིན་པ་ཡང་སྦྱིན་པར་བྱའོ། །ཤའི་མིག་དང་ལྡན་པའི་དགེ་བསྙེན་གྱིས་སྤོས་ཀྱི་ཚོང་འདུས་སུ་གངས་ཀྱི་རི་ལས་བྱུང་བའི་སྨན་བཞིན་དུ་བཅོས་མ་མ་ཡིན་པ་རྟོགས་པར་དཀའོ། །དེ་བཞིན་དུ་ལྷའི་མིག་མེད་པ་བྱེ་བྲག་མི་
ཕྱེད་པས་གངས་ཀྱི་རི་ལས་བྱུང་བའི་སྨན་བཞིན་དུ་འདི་ནི་ཚུལ་ཁྲིམས་དང་ལྡན་པའོ། །འདི་ནི་ཚུལ་ཁྲིམས་འཆལ་པའོ། །དགེ་འདུན་འདི་དག་གཞི་ཆེན་པོ་བརྒྱད་ཀྱི་ཉེས་པ་དང་བྲལ་བ་ཡིན་ནོ་སྙམ་དུ་རྟོགས་པར་མི་ནུས་སོ། །ཚུལ་ཁྲིམས་དང་ལྡན་
པ་དང་ཚུལ་ཁྲིམས་འཆལ་པ་ནི་ལྷའི་མིག་དང་ལྡན་པ་རྣམས་ཀྱི་ཡུལ་ཡིན་གྱི། ཤའི་མིག་དང་ལྡན་པ་རྣམས་ཀྱི་ཡུལ་མ་ཡིན་ནོ། །གལ་ཏེ་མ་དག་པ་མཐོང་ན་ནི་ཇི་སྲིད་དུ་བཤགས་སུ་རུང་བའི་ཉེས་པ་བྱུང་བ་མ་བཤགས་ཀྱི་བར་དུ་དེ་དག་ལ་ཕྱག་
ཀྱང་མི་བྱའོ། །སྦྱིན་པ་ཡང་སྦྱིན་པར་མི་བྱའོ། །གཞི་ཆེན་པོ་བརྒྱད་ལེན་པའི་དགེ་འདུན་དག་ལ་ཇི་སྲིད་དུ་བདག་ཉིད་ཀྱི་ཉེས་པ་བཤགས་སུ་རུང་བ་བཤགས་པས་གངས་ཀྱི་རི་ལས་བྱུང་བའི་སྨན་བཞིན་དུ་དག་པར་མ་གྱུར་གྱི་བར་དུ་གོས་ཚོན་ཅན་
བགོས་པ་ཙམ་ལ་ཡིད་བརྟེན་ཏེ་ཕྱག་མི་བྱའོ། །དེ་དག་ལ་སྦྱིན་པ་ཡང་སྦྱིན་པར་མི་བྱའོ། །གསོལ་པ། བཅོམ་ལྡན་འདས་ལེགས་སོ་ལེགས་སོ། །ལེགས་ལགས་སོ། །བཅོམ་ལྡན་འདས་ཀྱི་བཀའ་འདི་ནི་ལེགས་པར་གསུངས་པ་ལགས་ཏེ། 
རྡོ་རྗེ་རིན་པོ་ཆེ་བཞིན་དུ་སྤྱི་བོས་མནོད་པར་འཚལ་ལོ། །འདི་ལ་བཅོམ་ལྡན་འདས་ཀྱིས་གསུངས་པ། དགེ་སློང་དག་བཞི་པོ་འདི་དག་ནི་རྟེན་བཞིན་ཡིན་ཏེ། བཞི་གང་ཞེ་ན། དགེ་སློང་དག་ཁྱོད་ཀྱི་རྟེན་ནི་ཆོས་ཉིད་ཡིན་གྱི་གང་ཟག་མ་ཡིན་ནོ། །
དགེ་སློང་དག་ཁྱེད་ཀྱི་རྟེན་ནི་ངེས་པའི་དོན་ཡིན་གྱི་དྲང་བའི་དོན་མ་ཡིན་ནོ། །དགེ་སློང་དག་ཁྱེད་ཀྱི་རྟེན་ནི་ཡེ་ཤེས་ཡིན་གྱི་རྣམ་པར་ཤེས་པ་མ་ཡིན་ནོ། །དགེ་སློང་དག་ཁྱེད་ཀྱི་རྟེན་ནི་དོན་ཡིན་གྱི་ཡི་གེ་མ་ཡིན་ནོ། །བདག་ཅག་ལ་ནི་རྟེན་བཞི་པོ་འདི་
དག་ཚད་མ་ཡིན་གྱི་གང་ཟག་བཞི་པོ་རྣམས་ཚད་མ་མ་ཡིན་ནོ་ཞེས་བགྱི་བ་ལེགས་པར་གསུངས་སོ། །བཀའ་སྩལ་པ། ཆོས་ཉིད་ཅེས་བྱ་བ་ནི་དེ་བཞིན་གཤེགས་པའི་ཡོངས་སུ་མྱ་ངན་ལས་འདས་པའོ། །དེ་བཞིན་གཤེགས་པ་རྟག་པ་དང་། བརྟན་པ་

49-1-86a

དང་། ཐེར་ཟུག་པའོ་ཞེས་བྱ་བ་འདི་ནི་སངས་རྒྱས་ཐམས་ཅད་ཀྱི་ཆོས་ཉིད་དོ། །དེ་བཞིན་གཤེགས་པ་མི་རྟག་པར་མཐོང་བ་གང་ཡིན་པ་དེ་དག་ནི་ཆོས་ཉིད་མི་ཤེས་པ་ཡིན་ནོ་ཞེས་ང་ཟེར་རོ། །དེ་དག་ནི་གང་ཟག་ཡིན་ནོ་ཞེས་ང་ཟེར་
རོ། །དེ་དག་ནི་ཚད་མ་མ་ཡིན་ནོ་ཞེས་ང་ཟེར་རོ། །དེ་མ་ཡིན་པའི་གང་ཟག་བཞི་པོ་རྣམས་ནི་ཚད་མ་ཡིན་ནོ། །གང་ཟག་བཞི་པོ་དགོངས་པའི་ཚིག་ལ་མཁས་པ་དང་། དེ་བཞིན་གཤེགས་པའི་གསང་བའི་དེ་ཁོ་ན་ཉིད་ཤེས་པ་དང་། རྟག་པ་
ཡིན་པར་ཤེས་པ་གང་ཡིན་པ་དེ་དག་ནི་དེ་བཞིན་གཤེགས་པ་མི་རྟག་གོ་ཞེས་སེམས་སྐྱེད་ཀྱང་མི་སྲིད་དེ། གང་ཟག་བཞི་པོ་དེ་དག་ནི་རང་ཉིད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིན་ནོ། །སེམས་ཅན་གཞན་
གང་དག་དེ་བཞིན་གཤེགས་པ་རྟག་གོ་ཞེས་བྱ་བའི་དགོངས་པའི་ཚིག་ཐམས་ཅད་ལ་མཁས་པའི་གང་ཟག་དེ་དག་ཀྱང་ཚད་མ་དང་རྟེན་དུ་གྱུར་པ་ཡིན་ནོ་ཞེས་ང་ཟེར་ན་བཞི་པོ་དེ་དག་ལྟ་རྟེན་ཅི་སྟེ་མ་ཡིན། དགེ་སློང་དག་ཁྱེད་ཀྱི་རྟེན་ནི་ཆོས་ཉིད་ཡིན་ཏེ། ཉན་
ཐོས་རྣམས་ཀྱི་མངོན་པར་ཤེས་པ་ཞེས་བྱ་བའི་དོན་དང་། ཆོས་ཉིད་མ་བརྗེད་པར་གྱིས་ཤིག་ཅེས་བྱ་བའི་དོན་ཏོ། །ཆོས་ཉིད་ཅེས་བྱ་བ་ནི་དེ་བཞིན་གཤེགས་པ་རྟག་གོ་ཞེས་བྱ་བ་ལ་བརྩོན་པར་བྱ་བ་ཡིན་གྱི་གང་ཟག་ལ་བརྩོན་པ་མ་ཡིན་ཏེ། གལ་ཏེ་གང་
ཟག་ཚུལ་ཁྲིམས་འཆལ་པ་ཟང་ཟིང་ལ་བརྐམ་པ་རྣམས་དེ་བཞིན་གཤེགས་པ་མི་རྟག་གོ་ཞེས་ཟེར་ན་གང་ཟག་དེ་དག་ནི་ཚད་མ་མ་ཡིན་ནོ་ཞེས་བྱ་བའི་དོན་ཏོ། །དགེ་སློང་དག་ཁྱེད་ཀྱི་རྟེན་ནི་ངེས་པའི་དོན་ཡིན་གྱི་དྲང་བའི་དོན་མ་ཡིན་ནོ་ཞེས་བྱ་བ་ལ། ངེས་
པའི་དོན་ཞེས་བྱ་བ་ནི་ཐེག་པ་ཆེན་པོ་རྣམས་ཡིན་ཏེ། དགོངས་པའི་ཚིག་དེ་བཞིན་གཤེགས་པའི་གསང་བ་ཐོས་ན་ཐེ་ཚོམ་གྱི་ཉེས་པ་མེད་པའི་ཕྱིར་ངེས་པ་ཞེས་བྱ་སྟེ། ཡེ་ཤེས་ཀྱི་རྒྱ་མཚོ་ཆེན་པོ་ལས་རྒལ་ཅིང་དེ་ལས་བྱུང་ཞེས་བྱ་བའི་དོན་ཏོ། །ངེས་
པའི་ཡེ་ཤེས་ཐེག་པ་ཆེན་པོ་ཞེས་བྱ་བ་ནི་ཐོགས་པ་མེད་པའི་ཡེ་ཤེས་ལ་བྱའོ། །ཐོགས་པའི་ཡེ་ཤེས་ནི་ཉན་ཐོས་ཀྱི་ཐེག་པའོ། །ངེས་པའི་ཡེ་ཤེས་ནི་ཡེ་ཤེས་ཆེན་པོ་དང་ཐེག་པ་ཆེན་པོ་ཞེས་བྱ་སྟེ། བྱང་ཆུབ་སེམས་དཔའ་གང་དག་དེ་བཞིན་གཤེགས་པ་རྟག་

49-1-86b

པར་ཡང་དག་པར་ཁོང་དུ་ཆུད་པ་དེ་དག་ངེས་པར་བྱེད་པས་ན། དེའི་ཕྱིར་བྱང་ཆུབ་སེམས་དཔའ་རྣམས་ཀྱི་ཚིག་ནི་ཚད་མ་ཡིན་གྱི་དྲང་བའི་དོན་ནི་དེ་ལྟ་མ་ཡིན་ནོ། །དེ་བཞིན་གཤེགས་པ་ནི་ཤའི་སྐུ་ཡིན་ཏེ། བུད་ཤིང་ཟད་པའི་མེ་བཞིན་དུ་ཡོངས་སུ་
མྱ་ངན་ལས་འདས་སོ་ཞེས་བྱ་བ་འདི་ནི་ཉན་ཐོས་ཀྱི་ཐེག་པ་ཡིན་ཏེ་ཚད་མ་མ་ཡིན་ནོ། །མདོ་སྡེ་དེ་དག་ནི་གདུལ་བར་བྱ་བའི་དབང་གིས་གསུངས་པ་ཡིན་ཏེ། ཉན་ཐོས་ཀྱི་ཐེག་པ་ནི་ཡི་གེའི་ཕྱེད་སྦྱར་བ་དང་འདྲ་ཞིང་བྱེ་བྲག་ཏུ་འབྱེད་པ་ཡིན་ཏེ། སློབ་དཔོན་
བྱེད་པ་མ་ཡིན་ནོ། །ཉན་ཐོས་ཀྱི་ཐེག་པ་པ་རྣམས་ནི་དྲང་བའི་དོན་རྣམས་ཀྱི་གྲངས་སུ་གཏོགས་སོ། །ཡེ་ཤེས་ལས་གསུངས་པའི་དེ་བཞིན་གཤེགས་པའི་ཆེ་བ་ཉིད་ཁོང་དུ་མ་ཆུད་པའི་ཤེས་པ་གང་ཡིན་པ་དེ་ནི་ཉན་ཐོས་ཀྱི་ཐེག་པ་ཡིན་ཏེ། 
དེ་བས་ན་དྲང་བའི་དོན་ནི་ཚད་མ་མ་ཡིན་ནོ། །གང་ཟག་བཞི་པོ་དེ་དག་ཚད་མ་མ་ཡིན་ཏེ། ངེས་པའི་དོན་ཡིན་གྱི་དྲང་བའི་དོན་མ་ཡིན་ནོ། །དེ་བས་ན་དེ་དག་ནི་རྟེན་དུ་གྱུར་པ་དང་ངེས་པའི་དོན་ཡིན་ནོ། །དགེ་སློང་དག་ཁྱེད་ཀྱི་རྟེན་ནི་ཡེ་ཤེས་ཡིན་
ནོ་ཞེས་བྱ་བ་ནི་དེ་བཞིན་གཤེགས་པའི་ཚིག་བླ་དགས་སོ། །ཆོས་ཀྱི་སྐུ་གང་ཡིན་པ་དེ་ནི་ཚད་མ་མ་ཡིན་ནོ། །ཐབས་ཀྱི་སྐུ་གང་ཡིན་པ་དེ་ནི་ཚད་མ་མ་ཡིན་ནོ། །ཐབས་ཀྱི་སྐུ་ལ་བལྟས་ན་དེ་བཞིན་གཤེགས་པའི་སྐུ་ལ་ཕུང་པོ་དང་། 
ཁམས་དང་། སྐྱེ་མཆེད་རྣམས་ཇི་ལྟར་ཡོད། གལ་ཏེ་མེད་ན་ཡང་སྐུ་གདུང་གི་ཕུང་པོ་ག་ལས་འོངས། དེ་བས་ན་སྐུ་གདུང་གི་ཕྱིར་འཇིག་རྟེན་ན་མཆོད་རྟེན་འབྱུང་བ་ཡོད་ཀྱི་ཆོས་ཀྱི་སྐུ་ནི་འབྱུང་བ་མེད་དོ། །དེ་བཞིན་གཤེགས་པ་ཤའི་
སྐུའོ་ཞེས་བྱ་བ་ནི་རྣམ་པར་ཤེས་པ་བརྟག་པ་ལས་བསྟན་ཏེ། རྣམ་པར་ཤེས་པ་ནི་ཚད་མ་མ་ཡིན་ནོ། །དེ་བས་ན་རྣམ་པར་ཤེས་པ་ཚད་མ་མ་ཡིན་ཞེས་བྱའོ། །སེམས་ཅན་གང་དག་དེ་ལྟར་རྟོག་པ་དེ་དག་ཀྱང་ཚད་མ་མ་ཡིན་ནོ། །དེ་ལྟ་བུའི་
མདོ་སྡེ་རྣམས་ཀྱང་ཚད་མ་མ་ཡིན་ནོ། །དགེ་སློང་དག་ཁྱེད་ཀྱི་རྟེན་ནི་དོན་ཡིན་ནོ་ཞེས་བྱ་བ་ལ་དོན་ཞེས་བྱ་བ་ནི་གསལ་བའི་དོན་ཏོ། །གསལ་བའི་དོན་ཞེས་བྱ་བ་ནི་སྣང་བའི་དོན་ཏོ། །སྣང་བའི་དོན་ཞེས་བྱ་བ་ནི་ཞན་པ་མ་ཡིན་པའི་དོན་ཏོ། །ཞན་པ་

49-1-87a

མ་ཡིན་པའི་དོན་ཞེས་བྱ་བ་ནི་དེ་བཞིན་གཤེགས་པ་རྟག་ཅེས་བྱ་བའི་དོན་ཏོ། །དེ་བཞིན་གཤེགས་པ་རྟག་པའི་དོན་ཞེས་བྱ་བ་ནི་ཆོས་རྟག་པའི་དོན་ཏོ། །ཆོས་རྟག་པའི་དོན་ཞེས་བྱ་བ་ནི་དགེ་འདུན་རྟག་པའི་དོན་ཏེ་དོན་ནི་
དེ་ཡིན་ནོ། །རྟེན་ནི་དེ་ཡིན་ནོ། །ཡི་གེ་མ་ཡིན་ནོ་ཞེས་བྱ་བ་ནི་ཆོག་མི་ཤེས་པ་དང་། ཡོ་བྱད་མ་བསྙུངས་པ་དང་། འདོད་ཆེན་དང་། ཚུལ་འཆོས་པ་དང་། ཁ་གསག་མེད་པར་འགྱུར་བའི་རང་བཟོའི་ཡི་གེ་དང་། ཚིག་སྣ་ཚོགས་སངས་རྒྱས་
ཀྱིས་གསུངས་པ་མ་ཡིན་པའི་མདོ་སྡེའི་རྣམས་ཡིན་ཏེ། བཅོམ་ལྡན་འདས་ཀྱིས་བདག་ཅག་ལ་ཐུགས་བརྩེ་ནས་མུ་གེ་བྱུང་བའི་ཚེ་ཉིད་ཀྱི་སྲས་རྣམས་ཉོན་མོངས་པར་མི་འགྱུར་བར་མཛད་པའི་ཕྱིར་བྲན་དང་བྲན་མོ་ལ་སོགས་པ་དང་། གཡོས་
སུ་བྱས་པ་རྣམ་པ་དུ་མ་གནང་བའི་བསླབ་པའི་གཞི་གསུངས་ཏེ། བྲན་དང་བྲན་མོ་ལ་སོགས་པ་དང་། གསེར་དང་། དངུལ་དང་། བ་ལང་དང་། མ་ཧེ་དང་། འབྲུ་རྣམས་བསྡུ་བ་དང་། ཉོ་ཚོང་དང་། ཞིང་རྨོ་བ་ལ་སོགས་པ་ངས་གནང་ངོ་ཞེས་
གསུངས་སོ་ཞེས་བྱ་བ་ལ་སོགས་པ་དེ་དག་ནི་ཡི་གེ་ཞེས་བྱ་སྟེ། དེ་ལྟ་བུའི་མདོ་སྡེ་དང་འདུལ་བ་ནི་ཚད་མ་མ་ཡིན་ནོ། །དེ་བས་ན་ཡི་གེ་འདོན་པའི་གང་ཟག་དེ་དག་ཀྱང་ཚད་མ་མ་ཡིན་ཏེ། དེའི་ཕྱིར་དགེ་སློང་དག་ཁྱོད་ཀྱི་རྟེན་ནི་དོན་ཡིན་ནོ་ཞེས་གསུངས་སོ། །
དོན་མེད་པ་ཞེས་བྱ་བའི་གཞི་གསུམ་ལ་འཇིག་པ་དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིག་པ་ལ་སོགས་པའི་མི་རྟག་པ་ཉིད་ཡོད་པར་ལྟ་བ་སྟེ། འདི་ནི་དོན་མེད་པ་ཞེས་བྱའོ། །འདི་ནི་ཡི་གེ་ཞེས་བྱའོ། །དེ་བས་ན་དགེ་
སློང་དག་ཁྱེད་ཀྱི་རྟེན་ནི་དོན་ཡིན་གྱི་ཡི་གེ་མ་ཡིན་ནོ་ཞེས་གསུངས་སོ། །དོན་གྱི་ཕྱོགས་ནི་ཐེག་པ་ཆེན་པོ་པ་རྣམས་ཡིན་ཏེ། དེ་བས་ན་ཐེག་པ་ཆེན་པོ་པ་རྣམས་ཚད་མ་ཡིན་གྱི་འདི་ལས་ཕྱི་རོལ་པ་ཡི་གེ་ལ་རྟེན་པ་རྣམས་ནི་དེ་ལྟ་མ་ཡིན་ཏེ། དེ་བས་
ན་དེ་དག་ནི་རྟེན་མ་ཡིན་མོད་ཀྱི། ཤའི་མིག་དང་ལྡན་པ་རྣམས་ཀྱི་ཕྱིར་བཞག་པ་ཡིན་ནོ། །གསོལ་པ། སྔར་བཀའ་སྩལ་པའི་གང་ཟག་བཞི་པོ་རྣམས་རྟེན་དུ་གྱུར་པ་ཞེས་བགྱི་ལགས་སམ། བཀའ་སྩལ་པ། རིགས་ཀྱི་བུ་དེ་ནི་དེ་བཞིན་ཏེ། བཞི་

49-1-87b

པོ་རྣམས་རྟེན་ཡིན་པར་རིག་པར་བྱའོ། །དེ་མ་ཡིན་པ་བཞི་པོ་རྣམས་ནི་བདུད་ཡིན་ནོ་ཞེས་ང་ཟེར་རོ། །གསོལ་པ། ཅིའི་སླད་དུ་དེ་ལྟ་ལགས། བཀའ་སྩལ་པ། དེ་དག་ནི་བདུད་ཀྱིས་སྨྲས་པའི་མདོ་སྡེ་འཛིན་པའི་ཕྱིར་རོ། །གསོལ་པ་དེ་ཇི་ལྟ་བུ་
ལགས། བཀའ་སྩལ་པ། ཇི་ལྟར་བདུད་བཞི་དེ་བཞིན་གཤེགས་པ་ལ་བདོ་ཞིང་འདི་ནི་བདུད་ཀྱིས་སྨྲས་པ་ཡིན་གྱི། སངས་རྒྱས་ཀྱིས་གསུངས་པ་མ་ཡིན་ནོ། །སེམས་ཅན་འདི་དག་ནི་བདུད་དང་འཐུན་པར་བྱེད་པ་ཡིན་གྱི། སངས་རྒྱས་དང་འཐུན་པར་
བྱེད་པ་མ་ཡིན་ནོ་ཞེས་ཟེར་བ་ལྟ་བུའོ། །གསོལ་པ། བཅོམ་ལྡན་འདས་བདག་ནི་བདུད་ཀྱིས་སྨྲས་པ་དང་སངས་རྒྱས་ཀྱིས་གསུངས་པ་ཁོང་དུ་ཆུད་པར་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བདུད་སྡིག་ཅན་
གྱིས་ནི་ང་འདས་པའི་འོག་ཏུ་ལོ་བདུན་བརྒྱ་ལོན་པ་ན་ངའི་བསྟན་པ་ཕྱེ་ཞིང་བཤིག་པར་འགྱུར་ཏེ། དམ་པའི་ཆོས་ནུབ་པའི་ཚེ་བདུད་སྡིག་ཅན་ཟག་པ་ཅན་གྱིས་ཟག་པ་མེད་པ་ལྟ་བུར་བསྒྱུར་ཏེ། བྱ་བའི་རྟགས་ཀྱི་ཚུལ་སྦེད་པ་བཞིན་དུ་དགེ་སློང་གི་
གཟུགས་དང་། དགེ་སློང་མའི་གཟུགས་དང་། དགེ་བསྙེན་གྱི་གཟུགས་དང་། དགེ་བསྙེན་མའི་གཟུགས་དང་། རྒྱུན་ཏུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དང་། རང་སངས་རྒྱས་ཀྱི་གཟུགས་དང་། 
སངས་རྒྱས་ཀྱི་གཟུགས་ཀྱིས་བཤིག་པར་འགྱུར་ཏེ། དེ་འདི་སྐད་ཅེས་ཟེར་ཞིང་སངས་རྒྱས་ནི་དགའ་ལྡན་གྱི་གནས་ནས་ཤི་འཕོས་ཏེ། རྒྱལ་པོ་ཟས་གཙང་དང་བཙུན་མོ་སྒྱུ་འཕྲུལ་ཕྲད་པ་ན་ཟླ་མཚན་གྱི་བྱེ་བྲག་གིས་འཁྲིག་པའི་ཆོས་ལས་
སྐྱེས་སོ་ཞེས་ཟེར་ལ། དེ་བཞིན་གཤེགས་པ་ནི་འཁྲིག་པ་ལས་སྐྱེ་མི་སྲིད་དོ། །དེ་ལ་མིང་ཙམ་དུ་སྐྱེས་པ་ལས་སྔོན་དཀའ་ཐུབ་སྤྱད་པའི་ཡོན་ཏན་གྱིས་ལྷ་དང་། མི་དང་། ལྷ་མ་ཡིན་དང་བཅས་པའི་འཇིག་རྟེན་གྱིས་མཆོད་ཅིང་བརྗོད་པར་འགྱུར་ཏེ། 
བདག་ནི་ཆུང་མ་དང་འདོད་པ་རྣམ་པ་སྣ་ཚོགས་ཀྱི་སྦྱིན་པ་བྱིན་པས་ན་སངས་རྒྱས་སུ་གྱུར་ཏོ་ཞེས་ཟེར་བ་དེ་ལྟ་བུ་ནི་བདུད་ཀྱིས་སྨྲས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་

49-1-88a

རྒྱས་ཀྱིས་ནི་གདུལ་བར་བྱ་བའི་དབང་གིས་སྐྱེས་པ་ལྟ་བུར་བདག་ཉིད་ཀྱིས་བསྟན་མོད་ཀྱི། འཁྲིག་པ་ལས་སྐྱེས་པ་མ་ཡིན་ནོ། །དེ་བཞིན་གཤེགས་པས་ཡབ་ཡུམ་གཉིས་ཡོད་པ་ལྟ་བུར་བསྟན་པ་འདི་ནི་འཇིག་རྟེན་དང་འཐུན་པར་མཛད་པ་ཡིན་ནོ་ཞེས་
ཟེར་བ་དེ་ལྟ་བུ་ནི་དེ་བཞིན་གཤེགས་པས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་
བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་འཇིག་རྟེན་དུ་བྱུང་ནས་ཕྱོགས་དང་ཕྱོགས་མཚམས་རྣམས་སུ་གོམ་པ་བདུན་
བདུན་གཤེགས་པར་བསྟན་ཏོ་ཞེས་བྱ་བ་འདི་ནི་ཡིད་ཆེས་པར་བྱ་བར་མི་རུང་སྟེ། དེ་ལྟ་བུའི་མདོ་སྡེ་དང་འདུལ་བ་ནི་བདུད་ཀྱིས་སྨྲས་པ་ཡིན་པར་རིག་པར་བྱའོ། །དེ་བཞིན་གཤེགས་པ་བྱུང་ནས་ཕྱོགས་དང་ཕྱོགས་མཚམས་རྣམས་སུ་གོམ་
པ་བདུན་བདུན་གཤེགས་པར་བསྟན་པ་ནི་དེ་བཞིན་གཤེགས་པའི་ཐབས་ཀྱི་སྐུ་འཛིན་པ་ཡིན་ནོ་ཞེས་ཟེར་བ་དེ་ལྟ་བུ་ནི་སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་། 
འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་
པར་རིག་པར་བྱའོ། །དེ་བཞིན་གཤེགས་པ་ལྷ་ཁང་དུ་གཤེགས་ཏེ་བྱོན་ནས་ལྷ་རྣམས་ཀྱི་ཞབས་ལ་ཕྱག་བཞེས་ཏེ། ལྷ་རྣམས་ནི་དེ་བཞིན་གཤེགས་པའི་ཞབས་ལ་མགོ་བོས་ཕྱག་མི་འཚལ་ལོ། །ལྷ་རྣམས་ལ་མཆོད་པ་མཛད་པའི་
འོག་ཏུ་དེ་བཞིན་གཤེགས་པར་གྱུར་ནས་མངོན་པར་སངས་རྒྱས་ཏེ། ལྷ་རྣམས་ནི་སྔ། འདི་ནི་འཕྱི་བས་ན་དེའི་ཕྱིར་མངོན་པར་རྫོགས་པར་སངས་རྒྱས་པ་ཞེས་བྱའོ་ཞེས་ཟེར་བ་ལ་སོགས་པ་ནི་བདུད་ཀྱིས་སྨྲས་པ་ཡིན་པར་རིག་པར་བྱའོ། །

49-1-88b

དེ་བཞིན་གཤེགས་པ་ལྷ་ཁང་དུ་གཤེགས་ཏེ་བྱོན་པ་མཐོང་ནས་དབང་ཕྱུག་དང་། དབང་ཕྱུག་ཆེན་པོ་དང་། ཚངས་པ་དང་། བརྒྱ་བྱིན་ལ་སོགས་པ་ལྷ་ཐམས་ཅད་ཀྱིས་ཐལ་མོ་ལེགས་པར་སྦྱར་ཏེ་ཞབས་ལ་སྤྱི་བོས་གཏུགས་སོ་
ཞེས་ཟེར་བ་ལྟ་བུ་ནི་དེ་བཞིན་གཤེགས་པས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་
པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་རྒྱལ་ཚབ་ཏུ་གྱུར་ཏེ་ཉེ་མདབ་ཀྱི་རྒྱལ་པོའི་བུ་མོ་དག་དང་ལྷན་ཅིག་
ཏུ་འདོད་པ་ཤིན་ཏུ་བསྟེན་ཏོ་ཞེས་ཟེར་བ་ལ་སོགས་པ་ནི་བདུད་ཀྱིས་སྨྲས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །དེ་བཞིན་གཤེགས་པས་ནི་ལྷའི་བུ་མོ་རམ་བྷ་ལྟ་བུའི་བུད་མེད་དག་ཀྱང་མཆིལ་མ་བཞིན་དུ་བོར་ནས་ཁྱིམ་ནས་ཁྱིམ་མེད་
པར་རབ་ཏུ་བྱུང་ངོ་ཞེས་ཟེར་བ་དེ་ལྟ་བུའི་མདོ་སྡེ་དང་འདུལ་བ་ནི་སངས་རྒྱས་ཀྱིས་གསུངས་པ་ཡིན་པར་རིག་པར་བལྟ་བར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་
ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་
འཇིག་རྟེན་ཐམས་ཅད་ལ་ཐུགས་བརྩེ་བའི་ཕྱིར་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་དབྱིག་དང་། གསེར་དང་། བྲན་དང་། བྲན་མོ་དང་། བ་ལང་དང་། མ་ཧེ་དང་། ར་དང་། ལུག་དང་། བྱ་གག་དང་། ཕག་དང་། 
ཁྱི་དང་། བྱི་ལ་དང་། ཟངས་དང་། ལྕགས་ཟངས་དང་། ནོར་བུ་དང་། མུ་ཏིག་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། འཚོག་ཆས་རྣམ་པ་སྣ་ཚོགས་དང་། ཞིང་ས་དང་། ཚོང་འདུས་དང་། སྲང་

49-1-89a

དང་། ཉོ་ཚོང་བྱེད་པ་དང་། ཁྱེའུ་དང་། བུ་མོ་དང་། མཛོད་དང་། བང་བ་རྣམས་བཞེས་སོ་ཞེས་ཟེར་བ་དེ་ལྟ་བུ་ནི་བདུད་ཀྱིས་སྨྲས་པའི་མདོ་སྡེ་དང་། འདུལ་བ་ཡིན་པར་རིག་པར་བྱའོ། །རྒྱལ་བུ་རྒྱལ་བྱེད་ཀྱི་ཚལ་ན་འདམ་བུ་དང་། 
ཨེ་རན་དའི་ཚལ་དང་། ཤིང་པི་ཙུ་མརྡའི་དྲུང་ན་བཞུགས་པའི་ཚེ་བྲམ་ཟེ་ལུག་དཔལ་དང་། ཀོ་ས་ལའི་རྒྱལ་པོ་གསལ་རྒྱལ་ལས་བརྩམས་ཏེ་བཀའ་སྩལ་པ། དབྱིག་དང་། གསེར་དང་། བྲན་དང་། བྲན་མོ་དང་། བ་ལང་དང་། མ་ཧེ་དང་། 
ར་དང་། ལུག་དང་། བྱ་གག་དང་། ཕག་དང་། ཁྱི་དང་། བྱི་ལ་དང་། སྦྲུལ་དང་། ནེའུ་ལེ་དང་། ཟངས་དང་། ལྕགས་ཟངས་དང་། ནོར་བུ་དང་། མུ་ཏིག་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། 
ནོར་དང་། འཚོག་ཆས་རྣམ་པ་སྣ་ཚོགས་འཆང་བ་དང་། ཞིང་ས་དང་། ཚོང་འདུས་དང་། སྲང་དང་། ཉོ་ཚོང་བྱེད་པ་དང་། ཁྱེའུ་དང་། བུ་མོ་དང་། མཛོད་དང་། བང་བ་འཆང་བ་དང་། རང་ལག་དར་ཏེ་གཡོས་བྱེད་པ་དང་། འཚེད་པ་དང་། 
འཚེད་དུ་འཇུག་པ་དང་། ལྟས་དང་། ཡན་ལག་གི་རིག་པ་དང་། མོ་ཡིག་དང་། ཁ་ཏོན་འདོན་པ་དང་། བྱ་ལྟས་ཤེས་པ་དང་། སྒྲ་གཅན་དང་། ཉི་མ་དང་། ཟླ་བ་དང་། པ་བ་སངས་དང་། གཟའ་ལྷག་རྒྱུ་བ་དང་། མེ་ཏོག་གི་ཤིང་རྟ་
དང་། ལག་སྲུབས་ལྟ་བ་དང་། རྨི་ལྟས་དང་། སྐྱེས་པ་དང་། བུད་མེད་དང་། མ་ནིང་གི་མཚན་མ་ལྟ་བུ་དང་། སྒྱུ་རྩལ་དྲུག་ཅུ་རྩ་བཞི་དང་། རིག་པའི་གནས་བཅྭ་བརྒྱད་དང་། མཁན་བཟོ་བ་དང་། བཟོའི་ལས་ཐམས་ཅད་སྟོན་པ་དང་། 
སྒྲུང་གཏམ་བྱེད་པ་དང་། སྤོས་ཀྱི་ཕྱེ་མས་འདེབས་པ་དང་། མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་པ་འཆང་བ་དང་། མགོ་བོ་ལ་འོ་བྱེད་པ་དང་། ཚུལ་འཆོས་པ་དང་། ཁ་གསག་བྱེད་པ་དང་། ཆོག་མི་ཤེས་པ་
དང་། འདོད་ཆེན་ཅན་དང་། འདུ་འཛི་ལ་དགའ་བ་དང་། སྨྲ་འདོད་པ་དང་། ནོར་དང་། འབྲུ་དང་། ཤ་དང་། ཉ་ཤ་དང་། དུག་སྦྱོར་བ་དང་། སྤོས་ཀྱི་ཏིལ་མར་དང་། སྨན་གྱི་སྡུ་གུ་དང་། གདུགས་དང་། ལྷམ་དང་། ཏ་ལའི་ལོ་མའི་

49-1-89b

བསིལ་ཡབ་དང་། ཆབ་སྣོད་དང་། བུ་དོན་དང་། བེང་དཔུང་འཆང་བ་དང་། ཤིང་ཏོག་སྡུད་པ་དང་། སོ་རྩི་དང་། སྨན་མར་དང་། བཙོ་བའི་ཕྱེ་མ་བཟང་པོ་དང་། ཀ་ཀོ་ལ་དང་། འབྲས་བུ་ཚ་བ་སྟེན་པ་དང་། རྒྱལ་པོ་ལ་སྟེན་པ་དང་། གཞན་
སྟེན་པ་དང་། དྲོད་མི་ཐུབ་པ་དང་། མི་སྨྲ་བ་དང་། བུད་མེད་ལྟར་རྟོག་པའི་ཤས་ཆེ་བ་དང་། མང་དུ་སྨྲ་བ་དང་། ངུ་བ་དང་། བཟང་ངན་དཔྱོད་པ་དང་། སུན་འབྱིན་པ་དང་། འགྲོས་འཆོས་པ་དང་། གོས་དཀར་པོ་དང་། ཨར་མོ་ནིག་དང་། 
ཁང་བཟངས་དང་། གཙང་ཁང་ཕྱུར་པོའི་ལས་ལ་སོགས་པ་བྱེད་པ་དང་། རུང་བ་མ་ཡིན་པ་དང་། རྫས་ངན་པ་ཡོངས་སུ་འཛིན་པ་དང་། སྦྱིན་པ་པོའི་བསྔགས་པ་བརྗོད་པ་དང་། ཆང་སྟེན་པ་དང་། སྨད་འཚོང་མའི་ཁྱིམ་དུ་འགྲོ་བ་དང་། དེ་ལྟ་
བུ་བྱེད་པ་དམ་པ་མ་ཡིན་པ་ཚུལ་ངན་པ་དང་ལྡན་པ་དེ་དག་ལ་ནི་གོས་དཀར་པོ་དག་བྱིན་ལ་འཇིག་རྟེན་པའི་ལས་རྣམས་བྱེད་དུ་གཞུག་པར་ངས་གནང་ངོ་། །ཡང་ན་འབྲས་སཱ་ལུའི་ཞིང་གི་དོ་བསལ་བ་བཞིན་དུ་ཡུལ་ཕྱོགས་ནས་བསྐྲད་པར་ངས་
གནང་ངོ་ཞེས་ཟེར་བ་དེ་ལྟ་བུའི་མདོ་སྡེ་དང་འདུལ་བ་ནི་སངས་རྒྱས་ཀྱིས་གསུངས་པ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་
པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་ནི་ཚངས་པ་དང་། འབྱུང་པོ་དང་། སྐེམ་བྱེད་དང་། གཞོན་
ནུ་དང་། འཇིག་རྟེན་གྱི་མེས་པོ་དང་། ཀ་ཏ་ཡ་ན་ལ་སོགས་པའི་ལྷའི་གནས་ཐམས་ཅད་དུ་དེ་དག་གི་རྒྱགས་པ་གཞོམ་པའི་ཕྱིར་མི་གཤེགས་ཏེ་གཤེགས་མི་སྲིད་དོ། །ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་མི་འབྱུང་ངོ་། །སེམས་
ཅན་ཐམས་ཅད་ཀྱི་ཀུན་ཏུ་རྟོག་པའི་སྟོན་པ་མ་ཡིན་ནོ། །གསང་སྔགས་དང་རིག་སྔགས་ཐམས་ཅད་མི་འཆང་ངོ་། །ཁོལ་པོ་དང་། བྲན་དང་། བྲན་མོ་དང་། འདུམ་པ་དང་། འཐབ་པ་སྦྱོར་བ་མི་མཛད་དོ། །སྐྱེས་པ་དང་། བུད་མེད་

49-1-90a

དང་། སྨན་དང་། རྒྱལ་པོ་དང་། བློན་པོ་གཅེས་པར་མི་མཛད་དོ། །གལ་ཏེ་དེ་བཞིན་གཤེགས་པ་དེ་ལྟ་བུར་གྱུར་ན་དེ་བཞིན་གཤེགས་པ་ཡང་མ་ཡིན་ཏེ་ལོག་པར་ལྟ་བ་ཞེས་བརྗོད་པར་བྱའོ། །དེ་བཞིན་གཤེགས་
པ་ནི་སྟེའུ་དང་ཙན་དན་དུ་མཚུངས་ཏེ་སུ་ལ་ཡང་ཚར་གཅོད་པར་མི་མཛད། ཕན་འདོགས་པ་ཡང་མི་མཛད་དོ། །དེ་བས་ན་དེ་བཞིན་གཤེགས་པ་ནི་དབུ་མའི་ལམ་གཟིགས་པ་ཞེས་བྱའོ་ཞེས་ཟེར་བ་དེ་ལྟ་བུ་ནི་མགོ་རྨོངས་པར་བྱེད་པའི་མདོ་
སྡེ་བདུད་ཀྱིས་སྨྲས་པ་ཡིན་པར་རིག་པར་བྱའོ། །དེ་བཞིན་གཤེགས་པ་ནི་ལྷའི་གནས་ཐམས་ཅད་དུ་གཤེགས་སོ། །ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་འབྱུང་ངོ་། །སེམས་ཅན་ཐམས་ཅད་ཀྱི་ཀུན་ཏུ་རྟོག་པ་སྟོན་ཏོ། །གསང་
སྔགས་དང་། རིག་སྔགས་དང་། སྨན་ནོ་ཅོག་ལྟ་བུར་གྱུར་པ་དེ་དག་སྦྱོར་བར་མཛད་དོ། །འདུན་མའི་ནང་དང་། རོལ་མོའི་གནས་སུ་གཤེགས་སོ། །བྲན་དང་། བྲན་མོ་དང་། སེམས་ཅན་ཐམས་ཅད་སྡུད་པར་མཛད་དོ། །གཞོན་ནུ་
དང་། གཞོན་ནུ་མ་དང་། བཙུན་མོའི་འཁོར་དང་། ཕོ་བྲང་འཁོར་གྱི་མི་དང་། ཡུལ་མི་དང་། ཁྱིམ་བདག་དང་། བྲ་ཟེ་དང་། ཡི་དགས་དང་། མགོན་མེད་པ་དང་། སྐྱེས་པ་དང་། བུད་མེད་རྣམས་ཀྱི་ལུས་རྣམ་པ་སྣ་ཚོགས་ཀྱང་སྟོན་ལ། 
འཇིག་རྟེན་ཐམས་ཅད་སྡུག་བསྔལ་ལས་བསྒྲལ་བའི་ཕྱིར་དེ་དང་དེར་གཤེགས་པ་ན་པད་མ་ཆུས་མི་ཆགས་པ་བཞིན་དུ་ལྟ་བ་རྣམས་ཀྱིས་གོས་པར་མི་འགྱུར་བར་ཁོང་དུ་ཆུད་པ་སྟེ། འདི་ནི་འཇིག་རྟེན་ཐམས་ཅད་དང་འཐུན་པར་མཛད་པ་ཡིན་
ནོ་ཞེས་ཟེར་བ་དེ་ལྟ་བུ་ནི་སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱ་
འོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །འདི་ལྟར་ངེད་ཀྱི་འདུལ་བ་ལས་ནི་སྡིག་པ་དང་། ཉེས་བྱས་དང་། ཉེས་པ་ཡང་བ་དང་། ལྕི་བ་

49-1-90b

དང་། ཉེས་པ་སྦོམ་པོ་དག་རང་བཞིན་གྱིས་སྤང་བར་བྱ་བ་ཡིན་པའི་ཕྱིར་སྤང་བར་བཅོམ་ལྡན་འདས་ཀྱིས་གསུངས་ཏེ། དེ་ལྟ་བུ་ནི་ངེད་ཀྱི་འདུལ་བ་དང་འཐུན་པ་ཡིན་གྱི་ཁྱེད་ཀྱི་འདུལ་བ་དང་འཐུན་པ་མ་ཡིན་ན། ཅིའི་ཕྱིར་བདག་ཅག་ཉིད་ཀྱི་འདུལ་བ་
ལས་འགལ་བར་བྱས་ཏེ་ཁྱེད་ཀྱི་འདུལ་བ་བླང་བར་བྱ། ཁྱེད་ཀྱི་འདུལ་བ་ནི་རང་བཟོ་བྱས་པ་ཡིན་ལ། ངེད་ཀྱི་འདུལ་བ་ནི་བཅོམ་ལྡན་འདས་ཀྱིས་གསུངས་པ་ཡིན་ནོ། །བཅོམ་ལྡན་འདས་ཀྱིས་ནི་གསུང་རབ་ཡན་ལག་དགུ་ལས་ཕྱག་རྒྱ་དགུ་
མཛད་ཅེས་གྲག་སྟེ། བཅོམ་ལྡན་འདས་ཀྱིས་ཕྱག་རྒྱ་དགུ་པོ་དེ་རྣམས་ཀྱིས་ཕྱག་རྒྱས་བཏབ་པོ། །བདག་ཅག་གིས་ནི་ཤིན་ཏུ་རྒྱས་པ་ཞེས་བྱ་བའི་སྒྲ་ཚིག་དང་། ཡི་གེ་དང་། ཐིག་ལེ་གཅིག་ཀྱང་སྔོན་མ་ཐོས་སོ། །བཅོམ་ལྡན་འདས་
ཀྱིས་མདོ་སྡེ་དུ་ཞིག་གསུངས། མདོ་སྡེ་བཅུ་ཞིག་གསུངས་སམ། བདག་ཅག་གི་གསུང་རབ་ལ་ཤིན་ཏུ་རྒྱས་པ་ཞེས་བྱ་བའི་སྒྲ་ཡང་མེད་དོ། །འདི་དག་ནི་མ་ལུས་པར་ལྷས་བྱིན་གྱིས་བྱས་པ་ཡིན་ཏེ་དོན་ཐམས་ཅད་མ་རུངས་པར་བྱས་ནས་རྩོད་པར་བྱེད་
དེ། ཤིན་ཏུ་རྒྱས་པ་ནི་རང་གིས་རང་བཟོར་བྱས་པས་མི་བཙན་གྱི་ངེད་ཀྱི་འདུལ་བ་ནི་དམ་པ་ཡིན་ནོ། །ངེད་ཀྱི་ནི་འདི་ལྟ་བུ་ཡིན་ནོ། །ངེད་ཀྱི་ནི་འདི་ལྟ་བུ་ཡིན་ནོ་ཞེས་བསྟན་པ་མ་རུང་བར་བྱ་བའི་ཕྱིར་སྦྱར་བ་ཤིན་ཏུ་རྒྱས་པ་སྤོང་བར་བྱེད་པ་འདི་ནི་བདུད་
ཀྱིས་སྨྲས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །མ་འོངས་པའི་དུས་ན་ཡང་ངེད་ཀྱི་འདུལ་བ་ནི་འདི་ལྟ་བུ་ཡིན་ནོ། །ངེད་ཀྱི་འདུལ་བ་ལས་ནི་བཅོམ་ལྡན་འདས་ཀྱིས་འདི་སྐད་ཅེས་གསུངས་སོ་ཞེས་ལོག་པའི་འདུལ་བ་དང་མདོ་སྡེ་སྨྲ་བའི་དགེ་
སློང་དག་འབྱུང་བར་འགྱུར་རོ། །ངས་ནི་ཐེག་པ་ཆེན་པོ་གསུང་རབ་ཡན་ལག་དགུ་ལས་རྒྱུད་ཕྱི་མ་ཐེག་པ་ཆེན་པོ་ཤིན་ཏུ་རྒྱས་པར་བསྟན་ཏོ། །ངའི་དྲུང་ན་ལྷན་ཅིག་ཏུ་སྒྲུབ་པ་གང་ཡིན་པ་དེ་དག་ནི་ལོག་པའི་འདུལ་བ་དང་། ལྟ་བ་སྨྲ་བ་མ་ཡིན་ནོ། །
ངའི་བསྟན་པ་ནི་རུང་བ་མ་ཡིན་པ་ཐམས་ཅད་སྤངས་པ། རྣམ་པར་དག་པ། དྲི་མ་མེད་པ། ཟླ་བ་ཉ་བ་དང་འདྲ་བ་ཡིན་ཏེ། མདོ་སྡེ་རེ་རེ་དང་། འདུལ་བ་རེ་རེ་དང་། བསླབ་པའི་གཞི་རེ་རེའི་དོན་གང་གཱའི་ཀླུང་གི་བྱེ་མ་སྙེད་དུ་བསྟན་ལ་དེ་དག་ཀྱང་སྒྲའི་རྣམ་

49-1-91a

གྲངས་རྣམ་པ་སྣ་ཚོགས་ཀྱིས་བསྟན་ཏོ། །ངེད་ཀྱི་འདུལ་བ་ལ་བསླབ་པའི་གཞི་གང་དང་གང་མེད་པ་དེ་དང་དེ་དག་ནི་བཅོམ་ལྡན་འདས་ཀྱིས་མ་གསུངས་སོ་ཞེས་དེ་སྐད་ཟེར་བ་གང་ཡིན་པ་དེ་དང་དེ་དག་ལ་ནི་ཉེས་པ་འབྱུང་བར་
འགྱུར་རོ། །གང་དག་བདག་ཅག་གིས་གཟུང་བས་མི་ལང་སྟེ། ཆོག་ཤེས་པ་དང་། ཡོ་བྱད་བསྙུངས་པ་ལྷུར་ལེན་པ་དང་། སངས་རྒྱས་ཀྱིས་གསུངས་པ་ཡིན་པར་འོས་པ་གང་དང་གང་ཡིན་པ་དེ་དང་དེ་དག་ནི་སེམས་ཅན་ཐམས་ཅད་ལ་ཕན་པ་
དང་ཐུགས་བརྩེ་བའི་ཕྱིར་ཐེག་པ་ཆེན་པོའི་ཚུལ་དུ་གསུངས་པས་ན་བདག་ཅག་གིས་ཀྱང་ཤིན་ཏུ་རྒྱས་པ་ཞེས་བྱ་བ་བཤད་པར་བྱའོ་ཞེས་དེ་ལྟར་དམ་འཆའ་བར་བྱེད་པ་གང་ཡིན་པ་དེ་དག་གི་སྟོན་པ་ནི་ང་ཡིན་གྱི་དེ་མ་ཡིན་པ་རྣམས་ཀྱི་སྟོན་པ་ནི་
ང་མ་ཡིན་ནོ། །དེ་དག་ནི་ངའི་ཕྱིར་རབ་ཏུ་བྱུང་བ་མ་ཡིན་ཏེ། དེ་དག་ཐམས་ཅད་ནི་མུ་སྟེགས་པའི་བུ་ཡིན་ནོ་ཞེས་ཟེར་བ་དེ་ལྟ་བུ་སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ་ཞེས་དེ་སྐད་སྨྲོས་ཤིག །བདུད་
ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་
སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་ནི་ཡོན་ཏན་དཔག་ཏུ་མེད་པ་དང་ལྡན་པ་མ་ཡིན་ནོ། །མི་རྟག་གོ། །ཡོངས་སུ་མྱ་ངན་ལས་འདས་པའོ། །སྟོང་པར་གྱུར་པའོ། །བདག་མེད་པ་སྟོན་པའོ། །འཇིག་རྟེན་དང་འཐུན་
པར་བྱེད་པ་མ་ཡིན་ནོ་ཞེས་ཟེར་བ་དེ་ལྟ་བུའི་མདོ་སྡེ་ནི་བདུད་ཀྱིས་སྨྲས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །སངས་རྒྱས་བཅོམ་ལྡན་འདས་ནི་བསམ་གྱིས་མི་ཁྱབ་ཅིང་ཡོན་ཏན་བསམ་གྱིས་མི་ཁྱབ། དཔག་ཏུ་མེད། གྲངས་
མེད་པ་དང་ལྡན་པ་ཡིན་ནོ། །རྟག་པའོ། །བརྟན་པའོ། །ཐེར་ཟུག་པའོ་ཞེས་ང་ཟེར་རོ་ཞེས་དེ་སྐད་སྨྲ་བ་ལ་ནི་ཏ་ལའི་མགོ་བཅད་པ་བཞིན་དུ་ཕམ་པར་གྱུར་པ་ཞེས་བརྗོད་པར་མི་བྱའོ། །ཕམ་པའི་ཆོས་བཞི་ཞེས་བྱ་བ་ནི་བཅོམ་ལྡན་འདས་

49-1-91b

ཀྱིས་གསུངས་པ་རྣམ་པ་བཞི་ཅར་ལྟ་ཅི་སྨོས་ཏེ། ཕམ་པ་བཞིའི་ནང་ནས་ཕམ་པ་གང་ཡང་རུང་བ་ཞིག་བྱུང་ན་ཡང་རྡོ་ཆག་པའི་འཕྲོ་བཞིན་དུ་འགྱུར་རོ་ཞེས་རྒྱུད་ཕྱི་མའི་ཡང་ཕྱི་མ་གཞུང་རྫོགས་པ་ལས་མིའི་ཆོས་ལས་བླ་མར་གྱུར་པའི་
སྐབས་ནས་གསུངས་པ་ཡིན་ནོ། །དེ་ཅིའི་སླད་དུ་ཞེ་ན། བདག་ནི་འབྲས་བུ་ཐོབ་པ་ཡིན་ནོ་ཞེས་འཆབ་པའི་དོན་ཏོ། །རྒྱུད་ཕྱི་མའི་ཡང་ཕྱི་མ་ལས་མིའི་ཆོས་སུ་དབབ་པ་ངས་གསུངས་པ་ནི་འདི་ན་དགེ་སློང་འདོད་པ་ཉུང་བ་ཆོག་ཤེས་པ་ལ་ལ་
ཞིག་གནས་པ་དེ་རྒྱལ་པོ་འམ། རྒྱལ་པོའི་བློན་པོ་ཆེན་པོ་དག་གིས་མཐོང་ན་འབྲས་བུ་ཐོབ་པ་ཡིན་པར་སེམས་ཏེ། ཚིགས་སུ་བཅད་པའི་ཚུལ་སྦྱར་བའི་ཐབས་སྣ་ཚོགས་ཀྱིས་སྟོད་པར་བྱེད་ཅིང་བཙུན་པ་འདི་ནི་ལུས་དང་བྲལ་ཏེ་ཤི་བའི་
འོག་ཏུ་སངས་རྒྱས་སུ་འགྱུར་རོ་ཞེས་ཟེར་བ་དགེ་སློང་དེས་དེ་དག་ལས་མངོན་སུམ་དུ་ཐོས་ནས་འདི་སྐད་ཅེས་ཟེར་ཏེ། འབྲས་བུ་མ་ཐོབ་པའི་གང་ཟག་ལ་འབྲས་བུ་ཐོབ་པ་བཞིན་དུ་བསྟོད་པར་མ་བྱེད་ཅིག །ཆེ་འདོད་པ་ནི་སངས་རྒྱས་ཀྱིས་སྨད་
དོ། །ཅང་མི་སྨྲ་བ་ནི་སངས་རྒྱས་ཀྱིས་བསྔགས་སོ། །བདག་ནི་ཇི་སྲིད་འཚོའི་བར་དུ་ཡང་ཆོས་འདི་ལྟ་བུ་ལ་དགའ་བ་མ་ཡིན་གྱིས་འདི་ལྟར་བདག་ཆེ་འདོད་པ་ལ་གཞག་པར་མ་བྱེད་ཅིག །བདག་ནི་འབྲས་བུ་ཐོབ་པ་མ་ཡིན་པར་བདག་
ཉིད་ཀྱིས་ཤེས་སོ་ཞེས་ཟེར་བ་དང་། རྒྱལ་པོ་ཤེས་རབ་ཅན་གྱིས་བཙུན་པ་འདི་ནི་འབྲས་བུ་ཐོབ་པ་སྟེ། སངས་རྒྱས་ཡིན་ནོ་སྙམ་ནས་འཇིག་རྟེན་ཐམས་ཅད་དུ་མཁས་པ་རྣམས་ཀྱི་ནང་དུ་སྒྲོགས་པར་བྱེད་ཅིང་བཙུན་མོའི་འཁོར་དང་སྲས་རྣམས་ལ་
ཡང་སྙན་དངགས་བཞིན་དུ་མདོ་རྣམས་སློབ་ཏུ་འཇུག་སྟེ། དེ་ལྟར་བྱས་ན་ཡང་བསྟོད་པར་བྱེད་པའི་རྒྱལ་པོ་དང་བློན་པོ་རྣམས་ལ་བསོད་ནམས་མང་དུ་འཕེལ་བར་འགྱུར་རོ། །དགེ་སློང་དེ་ནི་ཚངས་པར་སྤྱོད་པ་ཚུལ་ཁྲིམས་དང་ལྡན་པ་ཙམ་དུ་ཟད་དེ་དགེ་
སློང་དེ་ཡང་ཕམ་པ་བྱུང་བ་མ་ཡིན་ནོ་ཞེས་ང་ཟེར་རོ། །མིའི་ཆོས་ལས་བླ་མར་གྱུར་པ་བྱེད་པ་ཡང་མ་ཡིན་ཏེ་ཚུལ་ཁྲིམས་དང་ལྡན་པ་འདོད་པ་ཉུང་བ་ཞེས་ང་ཟེར་རོ། །དེ་ལྟར་བསྟོད་དུ་ཟིན་ཀྱང་རང་གི་དད་པའི་སེམས་དང་བས་ན་སངས་རྒྱས་ཀྱི་གསུང་རབ་

49-1-92a

དང་འཐུན་པར་བྱེད་པའི་དགེ་སློང་ལ་ནི་ཉེས་པ་ཆུང་ཟད་ཀྱང་མེད་དོ་ཞེས་ང་ཟེར་རོ། །གཞན་ཡང་འདི་ན་དགེ་སློང་ལ་ལ་དེ་བཞིན་གཤེགས་པའི་སྙིང་པོའི་མདོ་སྡེ་ཆེན་པོ་སྟོན་པར་བྱེད་དོ། །སེམས་ཅན་ཐམས་ཅད་ལ་ནི་སངས་
རྒྱས་ཀྱི་ཁམས་ཡོད་ལ་ཁམས་དེ་རང་རང་གི་ལུས་ལ་ཚང་སྟེ། སེམས་ཅན་རྣམས་ཀྱིས་ཉོན་མོངས་པའི་རྣམ་པ་ཟད་པར་བྱས་ནས་སངས་རྒྱས་སུ་འགྱུར་ཏེ་འདོད་ཆེན་པ་ནི་མ་གཏོགས་སོ། །དེ་ལ་རྒྱལ་པོ་འམ་རྒྱལ་པོའི་བློན་པོ་འགའ་ཞིག་འདི་སྐད་
ཅེས་ཟེར་ཏེ། དགེ་སློང་ཁྱོད་སངས་རྒྱས་སུ་འགྱུར་རམ་མི་འགྱུར། སངས་རྒྱས་ཀྱི་ཁམས་ཁྱོད་ལ་ཡོད་དམ་མེད་ཅེས་ཟེར་བ་ལ། དགེ་སློང་དེ་ན་རེ་ཚེ་དང་ལྡན་པ་བདག་སངས་རྒྱས་སུ་འགྱུར་རམ་མི་འགྱུར་བ་ལྟ་སུས་ཤེས་མོད་ཀྱི་འོན་ཀྱང་བདག་གི་ལུས་
ལ་སངས་རྒྱས་ཀྱི་ཁམས་ནི་ཡོད་དོ་ཞེས་ཟེར་རོ། །དེ་ནས་དེས་དགེ་སློང་དེ་ལ་སྨྲས་པ། དགེ་སློང་ཁྱོད་འདོད་ཆེན་པ་ཁོ་ན་མ་ཡིན་ན་བདག་ནི་སངས་རྒྱས་སུ་འགྱུར་རོ་སྙམ་དུ་སོམས་ཤིག །དེ་ནས་དགེ་སློང་དེས་དེ་ལ་སྨྲས་པ། ཚེ་དང་ལྡན་པ་ཆོས་དེ་
ནི་བདག་གི་ལུས་ལ་གོར་མ་ཆག་པར་ཡོད་དོ་ཞེས་གལ་ཏེ་དེ་སྐད་ཟེར་ན། དགེ་སློང་དེ་ལ་མིའི་ཆོས་ལས་བླ་མར་གྱུར་པའི་ཉེས་པ་ཡོད་ཅེས་བྱ་འམ་མེད་ཅེས་བྱ་ཞེ་ན། ཁམས་ཡོད་དོ་ཟིན་ཀྱང་སྦྱིན་པ་དང་། ཚུལ་ཁྲིམས་དང་། ཤེས་པ་དང་། 
ཆོས་དང་ལྡན་པ་རྣམས་ལ་ཡོད་པར་ཟད་དོ་ཞེས་བརྗོད་པར་བྱའོ། །གཞན་ཡང་དགེ་སློང་རབ་ཏུ་བྱུང་ནས་སེམས་པར་བྱེད་དེ། ཀྱེ་མ་བདག་སངས་རྒྱས་སུ་འགྱུར་རམ་མི་འགྱུར་སྙམ་པ་འམ། བདག་གིས་ནི་སངས་རྒྱས་ཉིད་ཐོབ་པར་འགྱུར་བར་
མངོན་ནོ་སྙམ་དུ་སེམས་ན་འབྲས་བུ་མ་ཐོབ་ཏུ་ཟིན་ཀྱང་བསོད་ནམས་མང་པོ་འཕེལ་བར་འགྱུར་རོ། །གལ་ཏེ་དེ་ལྟ་མ་ཡིན་ན་དགེ་སློང་ཐམས་ཅད་ཀྱང་མིའི་ཆོས་ལས་བླ་མར་འགྱུར་རོ། །དེ་ཅིའི་ཕྱིར་ཞེ་ན། ངས་བསྐལ་པ་བྱེ་བ་ཕྲག་བརྒྱད་བཅུའི་
བར་དུ་རུང་བ་མ་ཡིན་པའི་དངོས་པོ་ཡོངས་སུ་འཛིན་པ་སྤངས་ཏེ། ཆོག་ཤེས་པ་དང་། ཡོ་བྱད་བསྙུངས་པའི་མཆོག་ལ་གནས་ནས་དེ་བཞིན་གཤེགས་པའི་སྙིང་པོ་ཡོད་པར་བསྒོམས་ཏེ་མངོན་པར་རྫོགས་པར་སངས་རྒྱས་ནས་ཆོས་ཀྱི་ཕུང་པོ་འབུམ་

49-1-92b

སྟོན་པའི་སངས་རྒྱས་བཅོམ་ལྡན་འདས་སྙིང་རྗེ་ཆེན་པོ་དང་ལྡན་པར་གྱུར་པའི་ཕྱིར་རོ་ཞེས་ཟེར་བ་དེ་ལྟ་བུ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་
བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་
པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །ཕམ་པ་བཞི་ཡང་མེད། དགེ་འདུན་གྱི་ལྷག་མ་བཅུ་གསུམ་ཡང་མེད། མ་ངེས་པ་གཉིས་ཀྱང་མེད། སྤང་བའི་ལྟུང་བྱེད་སུམ་བཅུ་ཡང་མེད། ལྟུང་བྱེད་འབའ་ཤིག་པ་དགུ་བཅུ་
རྩ་གཅིག་ཀྱང་མེད། སོ་སོར་བཤགས་པར་བྱ་བ་བཞི་ཡང་མེད། བསླབ་པར་བྱ་བ་མང་པོ་ཡང་མེད། རྩོད་པ་ཞི་བར་བྱ་བའི་ཆོས་བདུན་ཡང་མེད། ཉེས་བྱས་རྣམས་ཀྱང་མེད། ཉེས་པ་སྦོམ་པོ་རྣམས་ཀྱང་མེད། མཚམས་མེད་པ་དང་། 
འདོད་ཆེན་པ་ཡང་མེད་དེ། སྔར་སྨོས་པའི་བསླབ་པའི་གཞི་དེ་རྣམས་མེད་བཞིན་དུ་གལ་ཏེ་འགལ་བར་བྱས་པས་དགེ་སློང་དག་སེམས་ཅན་དམྱལ་བར་འགྲོ་བར་འགྱུར་ན། དེ་དག་ནི་མུ་སྟེགས་ཅན་ཡིན་ནོ། །གང་དག་ལ་དེ་རྣམས་མེད་ན་དེ་
ལྟ་ན་ནི་མཐོ་རིས་སུ་འགྲོ་བར་འགྱུར་རོ། །བཅོམ་ལྡན་འདས་ཀྱིས་ནི་བསྡིགས་པའི་ཕྱིར་འདུལ་བ་ལས་བསླབ་པའི་གཞི་རྣམས་བཀའ་སྩལ་ཏོ། །མི་ཚངས་པར་སྤྱོད་པ་བསྟེན་པར་འདོད་པ་གང་ཡིན་པ་དེ་ནི་གོས་ཚོན་ཅན་དང་། ཆོས་གོས་སྤངས་ཏེ་
གོས་དཀར་པོ་བགོས་ནས་དེ་ལྟ་བུ་བྱས་པའི་འོག་ཏུ་དེ་བདག་ཉིད་ཀྱིས་བསམས་པ། བདག་གིས་ནི་རང་གི་ཡོན་ཏན་ཆུང་བའི་ཕྱིར་མནོག་ཆུང་བའི་འདོད་པ་བསྟེན་གྱིས་མེད་དོ། །འོན་ཀྱང་བཅོམ་ལྡན་འདས་བཞུགས་པའི་ཚེ་ཡང་དགེ་སློང་དག་གིས་
འདོད་པ་རྣམས་བསྟེན་ནས་མཐོ་རིས་དང་ཐར་པ་ཐོབ་པར་གྱུར་ན། ཅི་བདག་ཆོས་ཉིད་ལ་ཞུགས་པ་ཡིན་ནམ། འདི་ནི་གནའ་ནས་ལུགས་ཀྱིས་ཡོད་པ་ཁོ་ནའོ་སྙམ་དུ་དེ་ལྟར་སྒོམ་པའི་དགེ་སློང་ནི་ཕམ་པ་བྱུང་དུ་ཟིན་ཀྱང་ཐར་པ་ཐོབ་པར་འགྱུར་རོ། །

49-1-93a

བསླབ་པའི་གཞི་ལྔ་ལས་འགལ་བར་བྱས་པ་དང་། རུང་བ་མ་ཡིན་པ་ཐམས་ཅད་ཡོངས་སུ་བཟུང་ཡང་དེ་དང་འདྲའོ། །དེ་བཞིན་གཤེགས་པས་ཉེས་བྱས་ཀྱི་ཉེས་པ་བྱུང་བས་ཀྱང་སུམ་བཅུ་རྩ་གསུམ་པའི་ལྷ་རྣམས་ཀྱི་ལོ་
གྲངས་པས་ཀྱང་ལྷག་པར་ལོ་བརྒྱད་ཁྲིའི་བར་དུ་སེམས་ཅན་དམྱལ་བར་འཚེད་པར་འགྱུར་རོ་ཞེས་གསུངས་མོད་ཀྱི། དེ་ཡང་བསྡིགས་པར་ཟད་དེ་ཕམ་པ་ལས་ན་གཅིག་གི་དམའ་བ་ཉེས་པ་སྦོམ་པོའི་སྐྱོན་གང་ཡིན་པ་དེ་ཡང་མི་བཟད་པ་མ་ཡིན་ཏེ་འདུལ་
བ་འཛིན་པ་མང་པོ་རྣམས་ཀྱིས་བརྫུན་དུ་སྨྲས་མོད་ཀྱི། དེ་ནི་མི་བཙན་ནོ་ཞེས་དེ་བཞིན་གཤེགས་པས་གསུངས་སོ་ཞེས་ཟེར་བ་དེ་ལྟ་བུའི་མདོ་སྡེ་དང་འདུལ་བ་ནི་བདུད་ཀྱིས་སྨྲས་པ་ཡིན་པར་རིག་པར་བྱའོ། །བསླབ་པའི་གཞི་ཐམས་ཅད་ཀྱི་ནང་ན་ནི་
ཉེས་བྱས་ཆུང་བ་ཡིན་ལ་དེ་ལྟར་ཆུང་བའི་ཉེས་བྱས་བྱུང་དུ་ཟིན་ཀྱང་བདག་ལ་མ་བྱུང་ངོ་ཞེས་སྙོན་པར་བྱེད་དེ། ཉེས་པ་བྱུང་བ་རུ་སྦལ་བཞིན་དུ་སྦེད་པར་བྱེད་པ་དེ་ལྟ་བུའི་གང་ཟག་ལ་བསྟེན་པར་མི་བྱའོ། །བརྫུན་དུ་སྨྲ་བའི་ཆོས་གཅིག་འགལ་བར་
བྱས་པའི་སྐྱེ་བོ་འཇིག་རྟེན་ཕ་རོལ་སྤངས་པས་ནི་མི་བྱ་བ་ཅི་ཡང་མེད་དེ། མི་བྱ་བའི་བག་ཅི་ཡང་མི་སྟེན་པ་མེད་ཅེས་བྱ་བའི་དོན་ཏོ། །སངས་རྒྱས་ཀྱི་བསྟན་པ་ནི་དེ་ལྟར་ཆ་ཕྲ་བ་ཡིན་ན་ཉེས་པ་སྦོམ་པོ་མི་སྡོམ་པར་ལྟ་ག་ལ་མཛད། གལ་ཏེ་དེ་ཙམ་
ཡང་སྡོམ་པར་མི་བྱེད་པ་ནི་མཆོག་ཏུ་མ་བསྡམས་པ་ཡིན་ནོ། །ཇི་ཞིག་བཟུང་སྟེ་ཚུལ་ཁྲིམས་སྲུང་ཞེ་ན། སངས་རྒྱས་ཀྱི་ཁམས་ཡོད་ལ་གསུང་རབ་ཡན་ལག་དགུའི་ཚུལ་གྱིས་སངས་རྒྱས་སུ་འགྱུར་བའི་རྟོག་པ་གཅིག་པུས་སེམས་ཅན་ཐམས་
ཅད་ལ་སངས་རྒྱས་ཀྱི་ཁམས་ཡོད་དོ་ཞེས་བྱ་བ་དང་། ཤིན་ཏུ་རྒྱས་པ་ལས་བདག་མེད་པའི་མཆོག་ཡོད་དོ་ཞེས་སྨྲ་བ་ནི་གསུང་རབ་ཡན་ལག་དགུའི་ཚུལ་གྱིས་མདོ་སྡེ་སྤོང་བ་མ་ཡིན་ནོ། །གཞན་དུ་ན་ནི་དེ་ལྟར་འགྱུར་རོ། །གསོལ་པ། སེམས་
ཅན་ཐམས་ཅད་ལ་སངས་རྒྱས་ཀྱི་ཁམས་མཆིས་པར་གསུང་རབ་ཡན་ལག་དགུ་ལས་ངེས་པར་བསྟན་ན་གང་ཟག་ཏུ་ལྟ་བར་ཇི་ལྟར་མི་གྱུར་ལགས། བདག་གིས་ཐོས་པ་བཞིན་དུ་ཇི་ལྟར་གཟུང་བར་བགྱི། དེ་ལྟར་ན་ནི་མིའི་ཆོས་ལས་བླ་མར་ཡང་

49-1-93b

འགྱུར་ལགས་སོ། །བཀའ་སྩལ་པ། ཇི་ལྟར་རྒྱ་མཚོའི་ནང་ན་རིན་པོ་ཆེ་ཡོན་ཏན་བརྒྱད་དང་ལྡན་པ་སྣ་ཚོགས་མེད་དོ་ཞེས་སྨྲ་བ་དེ་བཞིན་དུ་གསུང་རབ་ཡན་ལག་དགུ་ཤིན་ཏུ་རྒྱས་པའི་ཡེ་ཤེས་ཀྱི་རྒྱ་མཚོ་ཆེན་པོ་ལ་སངས་རྒྱས་ཀྱི་ཁམས་མེད་དོ་ཞེས་
ཟེར་བ་ཡང་དེ་དང་འདྲ་སྟེ། སངས་རྒྱས་ཀྱི་གསུང་འདི་ནི་དེ་དག་གི་ཡུལ་མ་ཡིན་ལ་སངས་རྒྱས་ཀྱི་གསུང་ནི་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ་ཞེས་བྱ་བའི་གཏན་ཚིགས་དང་། རྟགས་རྣམས་ཀྱི་སྒོ་ནས་ཉན་ཐོས་དང་། 
རང་སངས་རྒྱས་ཐམས་ཅད་ཀྱི་ཡུལ་ཡང་མ་ཡིན་པར་མངོན་ནོ། །ཐེག་པ་ཆེན་པོ་ལས་ནི་བདག་དང་སྲོག་བཤིག་པ་ཡང་མེད་དེ། དེ་བས་ན་སངས་རྒྱས་ནི་དབུ་མའི་ལམ་ཞེས་བྱའོ། །གང་དག་བདག་གི་ལུས་ལ་སངས་རྒྱས་ཀྱི་ཁམས་ཡོད་དེ། བདག་གིས་
སངས་རྒྱས་ཐོབ་པར་འགྱུར་མོད་ཀྱི་ཉོན་མོངས་པ་ཟད་པར་བྱ་དགོས་སོ་ཞེས་དེ་སྐད་ཟེར་བ་དེ་དག་ནི་ངའི་ཉན་ཐོས་ཡིན་ནོ། །གཅིག་ཤོས་ནི་མིའི་ཆོས་ལས་བླ་མར་གྱུར་པའི་ཉེས་པ་བྱུང་བ་ཡིན་ནོ་ཞེས་ང་ཟེར་རོ། །ངས་དེ་སྐད་ཅེས་བསྟན་པའི་ཕྱིར་
འདི་སྐད་ཅེས་ཟེར་ཏེ། བཅོམ་ལྡན་འདས་ཀྱིས་དམ་པའི་ཆོས་ཐོབ་པར་འགྱུར་བའི་སངས་རྒྱས་ཀྱི་ས་ནས་གཟིགས་པས་ན་བདག་ཀྱང་སངས་རྒྱས་བཅོམ་ལྡན་འདས་སུ་འགྱུར་རོ་ཞེས་ཟེར་བ་གང་ཡིན་པ་དེ་མིའི་ཆོས་ལས་བླ་མའི་ཉེས་པར་འགྱུར་
རམ་ཞེ་ན་མིའི་ཆོས་ལས་བླ་མར་གྱུར་པའི་ཉེས་པར་མི་འགྱུར་ཏེ། དེ་ནི་རིམ་གྱིས་སངས་རྒྱས་སུ་འགྱུར་རོ་ཞེས་ང་ཟེར་རོ། །དེ་ལྟར་ན་སངས་རྒྱས་ཀྱི་གསུང་ནི་ཆ་ཕྲ་ཞིང་ཟབ་པ་ཡིན་ནོ། །གསོལ་པ། འདི་ན་རྒྱལ་པོ་ལ་ལ་ཞིག་འདི་སྐད་ཅེས་
མཆི་སྟེ། ཇི་ལྟར་ན་དགེ་སློང་མིའི་ཆོས་ལས་བླ་མར་གྱུར་པའི་ཉེས་པ་བྱུང་བ་ཞེས་བགྱི་ཞེས་མཆི་བ་ལ་ལན་གདབ་འཚལ་ལགས་སོ། །བཀའ་སྩལ་པ། འདི་ན་དགེ་སློང་རྙེད་པ་དང་བཀུར་སྟིའི་ཕྱིར་རམ། ཟང་ཟིང་གི་ཕྱིར་ཚུལ་འཆོས་པ་དང་། 
ཁ་གསག་བྱེད་པ་ཡོད་དེ། ཇི་ལྟར་བྱས་ན་བདག་བསོད་སྙོམས་པ་ཡིན་པར་གཞན་དག་གིས་ཤེས་པར་འགྱུར་ཞིག་གུ་དེ་ལྟར་བྱས་དང་རྙེད་པ་ཐོབ་པར་འགྱུར་རོ་སྙམ་སྟེ། བསྔགས་པ་འདོད་པ་རྨོངས་པའི་རང་བཞིན་ཅན་དུ་གྱུར་པས་བདག་

49-1-94a

གིས་འབྲས་བུ་མ་ཐོབ་པར་བདག་གིས་འབྲས་བུ་ཐོབ་པར་གཞན་གྱིས་ཤེས་པར་བྱའོ། །བདག་རྒྱུན་ཏུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཡིན་པར་གཞན་དག་གིས་ཤེས་པར་
བྱའོ། །དགེ་བསྙེན་མདུན་ན་འཁོད་པ་རྣམས་ཀྱང་སྐྱེ་བོ་ཐམས་ཅད་ཀྱིས་བདག་དེ་ལྟ་བུ་ཡིན་པར་ཤེས་པར་འགྱུར་བའི་ཚིག་སྨྲར་གཞུག་གོ་སྙམ་ནས་ཆོས་ཐོབ་པར་བྱ་བའི་ཕྱིར་མ་ཡིན་པར་ཡིད་ལ་བྱེད་པ་དེ་ལྟ་བུ་རྙེད་པ་དང་། བཀུར་སྟི་དང་། བླ་མའི་
མཆོད་པ་དང་། ཕྱག་བྱ་བ་དང་། ཟང་ཟིང་གི་ཕྱིར་དགྲ་བཅོམ་པ་འདྲ་བར་ཕན་ཚུན་ལྟ་བའི་ཐབས་དང་། མིག་འཛུམས་པ་དང་། འགྲོས་རྣམས་འཆོས་པར་བྱེད་ཅིང་། ཆོས་གོས་དང་། སྣམ་སྦྱར་དང་། ལྷུང་བཟེད་རྣམས་འཆང་ལ། མལ་
ཆ་དང་། སྟན་སར་པའི་སྟེང་ན་འདུག་པ་དང་སྐྱེ་བོ་དག་གིས་བདག་དགེ་སློང་བཟང་པོ་དགེ་སློང་དཀའ་ཐུབ་ཅན་ཡིན་ནོ་ཞེས་བརྗོད་པར་འགྱུར་བར་བྱའོ། །འོན་ཀྱང་བདག་འཁོར་དང་སློབ་མ་དག་དང་ལྡན་པར་འགྱུར་རོ། །དེ་ནས་སྡེ་ཚན་བཅས་དང་། བཟའ་བ་དང་། 
བཅའ་བ་དང་། བལྡག་པ་དང་། བཏུང་བའི་ཡོ་བྱད་རྣམས་རྙེད་པར་འགྱུར་རོ། །བུད་མེད་རྣམས་ཀྱིས་ཀྱང་བཀུར་བར་འགྱུར་རོ་སྙམ་པའི་སེམས་ཀྱི་རྟོག་པས་ནང་མི་དང་གཡོག་འཁོར་རྣམས་ལ་ཤེས་པར་བྱེད་དེ། དེ་ལྟ་བུར་འཆབ་པའི་དགེ་སློང་
ངམ། དགེ་སློང་མ་ནི་མིའི་ཆོས་ལས་བླ་མར་གྱུར་པའི་ཉེས་པ་བྱུང་བ་ཡིན་ནོ་ཞེས་ང་ཟེར་རོ། །གཞན་ཡང་འདི་ན་དགེ་སློང་ལ་ལ་དམ་པའི་ཆོས་དབྱུང་བར་བྱའོ་སྙམ་པའི་སེམས་ཀྱིས་མལ་ཆ་དང་སྟན་སར་པ་ལ་འདུག་ཅིང་། སྐྱེ་བོ་ཐམས་ཅད་ཀྱིས་
ཀྱེ་མ་དགེ་སློང་འདི་ནི་དགེ་བ་བཟང་པོ་ཞིག་གོ་སྙམ་དུ་བདག་དགྲ་བཅོམ་པ་མ་ཡིན་པར་དགྲ་བཅོམ་པ་དང་འདྲ་བར་ཤེས་པར་བྱའོ། །བདག་དེ་ལྟ་བུ་ཡིན་པར་ཤེས་པ་དང་། དགེ་སློང་མང་པོ་དག་བདག་གི་འཁོར་དུ་འགྱུར་བ་འདི་ལས་ཕྱི་རོལ་པ་དག་ཀྱང་
དགེ་བསྙེན་དུ་འགྱུར་རོ། །ཚུལ་ཁྲིམས་འཆལ་པ་རྣམས་ཀྱང་ཞུམ་པར་འགྱུར་རོ། །དེ་ནས་བདག་གིས་དམ་པའི་ཆོས་ཀྱང་དབྱུང་བར་བྱའོ། །དེ་བཞིན་གཤེགས་པའི་ཆེ་བ་ཉིད་ཀྱང་བསྟན་པར་བྱའོ། །ཤིན་ཏུ་རྒྱས་པའི་མདོ་སྡེ་རྣམས་ཀྱང་བསྒྲག་པར་

49-1-94b

བྱའོ། །སེམས་ཅན་ཐམས་ཅད་ཀྱང་ངེས་པར་བསྒྲལ་བར་བྱའོ། །འདུལ་བ་དང་འདུལ་བ་མ་ཡིན་པའི་བྱེ་བྲག་ཀྱང་ཕྱེད་པར་བྱའོ། །བདག་ལ་སངས་རྒྱས་སུ་འགྱུར་བའི་ས་བོན་དེ་བཞིན་གཤེགས་པའི་སྙིང་པོ་ཞེས་བྱ་བ་ཡོད་དེ། བདག་གིས་
སངས་རྒྱས་ཐོབ་པར་འགྱུར་རོ། །བདག་གིས་ཉོན་མོངས་པའི་རྣམ་པ་རྣམས་རྣམ་པར་གཞོམ་པར་བྱའོ། །དགེ་བསྙེན་ཁྱེད་རྣམས་ལ་ཡང་སངས་རྒྱས་ཀྱི་ཁམས་ཡོད་དེ། བདག་ཅག་ཀུན་ཀྱང་སངས་རྒྱས་སུ་འགྱུར་ཞིང་དེ་བཞིན་གཤེགས་པའི་ས་
ཐོབ་པར་འགྱུར་རོ། །ཉོན་མོངས་པའི་རྣམ་པ་རྣམས་ཟད་པར་བྱའོ་སྙམ་དུ་སེམས་པ་དེ་ལྟ་བུ་ནི་དམ་པའི་ཆོས་ཀྱི་རྟོག་པའི་སྒོ་ནས་བྱང་ཆུབ་སེམས་དཔའ་ཡིན་ཏེ་མིའི་ཆོས་ལས་བླ་མར་གྱུར་པའི་ཉེས་པ་བྱུང་བ་མ་ཡིན་ནོ་ཞེས་ང་ཟེར་རོ། །ཉེས་
བྱས་ཀྱི་ཉེས་པ་བྱུང་བས་ཀྱང་སུམ་བཅུ་རྩ་གསུམ་པའི་ལྷ་རྣམས་ཀྱི་ལོ་གྲངས་པས་ཀྱང་ལྷག་པར་ལོ་བརྒྱད་ཁྲིའི་བར་དུ་སེམས་ཅན་དམྱལ་བར་འཚེད་པར་འགྱུར་ན་ཉེས་པ་སྦོམ་པོ་ལྟ་ཅི་སྨོས་ཏེ། ཐེག་པ་ཆེན་པོ་འདི་ལ་ནི་ཉེས་པ་སྦོམ་པོའི་ཉེས་
པ་བྱུང་བ་དང་བསྟེན་པར་མི་བྱའོ། །ཉེས་པ་སྦོམ་པོ་ཞེས་བྱ་བ་ནི་བཅོམ་ལྡན་འདས་ཀྱི་མཆོད་རྟེན་བསྲུང་བའི་ཕྱིར་གཞན་ཡོངས་སུ་གཟུང་བ་ལ་མེ་ཏོག་གི་ཕྲེང་བ་བཏགས་པ་དེ་རྙིངས་ནས་སྲད་བུ་དགོས་པའི་ཕྱིར་ལེན་པར་བྱེད་དེ། དགེ་སློང་
རྣམས་ལ་འཛེམ་ནས་དགེ་སློང་རྣམས་ལ་མ་དྲིས་པར་དགེ་སློང་གིས་བླངས་ན་ཉེས་པ་སྦོམ་པོའི་ཉེས་པ་ཅན་དུ་འགྱུར་རོ། །གལ་ཏེ་འདི་ལྟ་ཞིག་གིས་ཅིར་ཡང་མི་འགྱུར་རོ་སྙམ་དུ་འཛིན་ཏེ་ལེན་པར་བྱེད་ན་ཡང་དེ་ལྟ་བུ་དག་དང་བསྟེན་པར་མི་བྱའོ། །
རྐུ་བའི་སེམས་ཀྱིས་མཆོད་རྟེན་བཤིག་ན་ཡང་ཉེས་པ་སྦོམ་པོའི་ཉེས་པ་ཅན་དུ་འགྱུར་ཏེ། དེ་ལྟ་བུ་དག་དང་བསྟེན་པར་མི་བྱའོ། །འདི་ན་ཁྱིམ་བདག་གམ་བློན་པོ་ལ་ལ་ཞིག་གིས་གལ་ཏེ་ཆོས་ཀྱི་བསམ་པས་སྐུ་གདུང་ལ་བཀུར་སྟི་བྱའམ། ཕག་
གུ་དགོས་པའི་ཕྱིར་མཆོད་རྟེན་རྙིང་པ་བཤིག་སྟེ། བླངས་ནས་ཁྱིམ་བདག་གམ་བློན་པོ་དེས་མཆོད་རྟེན་དེ་ལས་གསེར་དངུལ་ཞིག་བྱུང་ན། དེ་དགེ་སློང་འགའ་ཞིག་གི་ལག་ཏུ་གཏད་པ་ལས་དགེ་སློང་དེས་དེ་བླངས་ཏེ། བདག་གི་ནོར་དུ་བྱས་ལ་རྩོད་

49-1-95a

པར་བྱེད་ན་དགེ་སློང་དེ་ལ་ལེགས་པ་མ་ཡིན་ནོ། །དགེ་བསྙེན་དེ་དག་ནི་ཆོས་ལ་གནས་པ་ཡིན་ནོ། །དགེ་སློང་དེ་ནི་ཡིད་བརྟན་དུ་མི་རུང་སྟེ་བསྟེན་པར་མི་བྱའོ། །མ་ནིང་ཡིན་པར་ཤེས་པར་བྱའོ། །མཚན་གཉིས་པ་ཡིན་པར་ཤེས་
པར་བྱའོ། །མཚན་གཉིས་པ་ཞེས་བྱ་བ་ནི་གང་ལ་མཚན་གཉིས་ཡོད་པ་སྟེ། གང་གི་ཚེ་སྐྱེས་པའི་འདོད་ཆགས་སྐྱེས་པ་དེའི་ཚེ་ནི་བུད་མེད་དང་འདོད་པ་སྤྱོད་པར་བྱེད་ལ། གང་གི་ཚེ་བུད་མེད་ཀྱི་འདོད་ཆགས་སྐྱེས་པ་དེའི་ཚེ་ནི་སྐྱེས་པ་དང་འདོད་པ་
སྤྱོད་པར་བྱེད་དོ། །དེ་བས་ན་མཚན་གཉིས་པ་ཞེས་བྱ་སྟེ་དེ་དང་ཡང་བསྟེན་པར་མི་བྱའོ། །དེ་ལྟར་དེ་ལྟ་བུ་དག་དང་བསྟེན་པར་མི་བྱ་ན་བསླབ་པའི་གཞི་ལྔའི་ཉེས་པ་བྱེད་པ་དེ་དག་ལྟ་ལ་བསྟེན་དུ་ག་ལ་རུང་།། །། བམ་པོ་དགུ་པ། 
དགེ་སློང་རྣམས་ཀྱིས་ནི་ཐོག་མར་དགེ་སྦྱོང་གི་ཆོས་ཀྱིས་གྲོག་སྦུར་རྣམས་ལ་ཡང་སྙིང་རྗེ་བྱའོ། །དགེ་སྦྱོང་གི་ཆོས་ཀྱིས་ཆང་གི་དྲི་བྲོ་བའི་བཏུང་བ་ཡང་སྤང་བར་བྱའོ། །དགེ་སྦྱོང་གི་ཆོས་ཀྱིས་རྨི་ལམ་དུ་ཡང་བརྫུན་དུ་སྨྲ་བའི་སེམས་བསྐྱེད་
པར་མི་བྱའོ། །དགེ་སྦྱོང་གི་ཆོས་ཀྱིས་རྨི་ལམ་དུ་ཡང་བུད་མེད་དང་ཕྲད་པའི་སེམས་བསྐྱེད་པར་མི་བྱའོ། །གསོལ་པ། ཅི་ལགས། རྨི་ལམ་དུ་བུད་མེད་དང་ཕྲད་པར་གྱུར་ན་མི་ཚངས་པར་སྤྱོད་པའི་ནོངས་པར་འགྱུར་ལགས་སམ། བཀའ་སྩལ་
པ། མི་འགྱུར་ཏེ། གལ་ཏེ་བློ་གྲོས་དང་དྲན་པ་དང་ལྡན་པ་འདོད་པ་དྲི་ང་བ་དག་ལ་མི་ཚངས་པར་སྤྱོད་པའི་སེམས་མི་སྐྱེད་ན་དེ་ནི་ཉོན་མོངས་པ་དང་བུད་མེད་ཀྱི་གཏམ་སྨད་པས་རྟོག་པ་ཡང་དག་པར་ཆད་པའི་ཕྱིར་སེམས་སྐྱེད་མི་སྲིད་དོ། །རྨི་
ལམ་དུ་ཕྲད་པར་གྱུར་ན་ཡང་ནང་པར་སད་ན་མུ་གེ་འབྱུང་བའི་ཚེ་དགེ་སློང་གིས་རང་གི་བུའི་ཤའི་ཟས་ཟོས་པ་བཞིན་དུ་འགྱོད་པར་འགྱུར་ན་དེ་ལ་གཙང་ངོ་སྙམ་པའི་བློ་ལྟ་ག་ལ་འབྱུང་། གལ་ཏེ་སེམས་སྐྱེས་ན་ཡང་ཕྱིར་གཞིལ་བར་བྱའོ་ཞེས་ཟེར་བ་
དེ་ལྟ་བུའི་ཆོས་ཀྱི་སྒོ་ནི་སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་

49-1-95b

རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དཔའ་བོའི་འདུག་སྟངས་དང་། མི་སྨྲ་བར་འདུག་པ་དང་། གཡང་སར་འཆོང་བ་དང་། དུག་ཟ་བ་དང་། སྨྱུང་བར་འདུག་
པ་དང་། བདག་ཉིད་འཆིང་བར་བྱེད་པ་དང་། བདག་ཉིད་གསོད་པར་བྱེད་པ་དང་། ཞེ་ནོམ་བྱེད་དུ་འཇུག་པ་དང་། རིག་སྔགས་དང་གསང་སྔགས་ཟློས་པ་དང་། སྐྲུན་པའི་ལས་བྱེད་པར་བཅོམ་ལྡན་འདས་ཀྱིས་གནང་ངོ་། །གདོལ་པའི་བུ་དང་། 
མ་ནིང་དང་། མཚན་གཉིས་པ་དང་། ཡན་ལག་ཉམས་པ་ཐམས་ཅད་རབ་ཏུ་འབྱུང་བར་བཅོམ་ལྡན་འདས་ཀྱིས་གནང་ངོ་། །དེ་བཞིན་གཤེགས་པས་ནི་བའི་བཅུད་རྣམ་ལྔ་དང་། སྦྲང་རྩི་དང་། འབྲུ་མར་ལ་སོགས་པ་དང་། ཟབ་དར་དང་། དུང་དང་། 
ལྷམ་དང་། འབྲུ་ལ་སོགས་པ་སྤངས་ཏེ། ཤིང་ངོ་ཅོག་ལ་སྲོག་དང་འདུ་ཤེས་ཡོད་པར་གཟིགས་ནས་ཡོངས་སུ་མྱ་ངན་ལས་འདས་སོ་ཞེས་ཟེར་བ་དེ་ལྟ་བུ་ནི་བདུད་ཀྱིས་སྨྲས་པའི་མདོ་སྡེ་དང་འདུལ་བ་ཡིན་པར་རིག་པར་བྱ་སྟེ། དཔའ་བོའི་འདུག་
སྟངས་ཀྱིས་གནས་པ་དང་། འཆག་པ་ལ་སོགས་པ་ཆོས་ཀྱི་བྱ་བ་རྣམས་ནི་མ་གཏོགས་སོ། །དུག་ཟ་བ་དང་། མེར་མཆོང་བ་དང་། སྨྱུང་བར་འདུག་པ་དང་། གཡང་སར་མཆོང་བ་དང་། བདག་ཉིད་འཆིང་བར་བྱེད་པ་དང་། བདག་ཉིད་གསོད་
པར་བྱེད་པ་དང་། ཞེ་ནོམ་བྱེད་དུ་འཇུག་པ་དང་། རིག་སྔགས་དང་། གསང་སྔགས་ཟློས་པ་དང་། སྐྲུན་པའི་ལས་བྱེད་པ་རྣམས་ནི་ངས་མ་གནང་ངོ་། །བའི་བཅུད་རྣམ་ལྔ་དང་། སྦྲང་རྩི་དང་། འབྲུ་མར་ལ་སོགས་པ་དང་། ཟབ་དར་དང་། དུང་
དང་། ལྷམ་དང་། འབྲུ་ལ་སོགས་པ་ལ་ཤའི་འདུ་ཤེས་མེད་པ་དང་། ཤིང་ཐམས་ཅད་ལ་སྲོག་མེད་པའི་འདུ་ཤེས་དང་། སེམས་པ་མེད་པའི་འདུ་ཤེས་མེད་པར་ངས་གནང་ངོ་། །གཞན་དུ་ལྟ་བ་གང་ཡིན་པ་དེ་དག་ནི་མུ་སྟེགས་ཅན་གྱི་ཉན་
ཐོས་ཡིན་ནོ། །ངའི་བཀའ་བཞིན་དུ་བྱེད་པ་གང་ཡིན་པ་དེ་དག་ནི་ངའི་ཉན་ཐོས་ཡིན་ནོ་ཞེས་ང་ཟེར་རོ། །ཁམས་བཞི་ལ་ནི་སྲོག་དང་འདུ་ཤེས་ཡོད་ཅེས་ང་མི་ཟེར་རོ་ཞེས་ཟེར་བ་དེ་ལྟ་བུའི་མདོ་སྡེ་དང་འདུལ་བ་ནི་སངས་རྒྱས་ཀྱིས་གསུངས་པའི་མདོ་

49-1-96a

སྡེ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་
མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །རིགས་ཀྱི་བུ་འདི་ནི་ངས་བདུད་ཀྱིས་སྨྲས་པ་དང་། སངས་རྒྱས་ཀྱིས་གསུངས་པའི་བྱེ་བྲག་རྒྱས་པར་བསྟན་པ་ཡིན་
ནོ། །གསོལ་པ། བཅོམ་ལྡན་འདས་བདག་ནི་དེང་གདོད་སངས་རྒྱས་ཀྱི་བཀའ་ལ་ཞུགས་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་ལེགས་ཏེ་མཁས་པས་ནི་དེ་ལྟར་བྱ་དགོས་སོ། །ཡང་བཀའ་
སྩལ་པ། རིགས་ཀྱི་བུ་འདི་ནི་སྡུག་བསྔལ་ལོ་ཞེས་བྱ་བ་ནི་འཕགས་པ་རྣམས་ཀྱི་བདེན་པ་ཞེས་མི་བྱ་སྟེ། སྡུག་བསྔལ་དེ་ཡང་གང་ཞེ་ན། སྡུག་བསྔལ་ཞེས་བྱ་བ་ནི་བ་ལང་དང་། བོང་བུ་ལ་སོགས་པ་དང་སེམས་ཅན་དམྱལ་བ་པ་རྣམས་ལ་
ཡང་ཡོད་དེ། གལ་ཏེ་སྡུག་བསྔལ་དེ་བདེན་པ་ཡིན་དུ་ཟིན་ན་དེ་རྣམས་ཀྱི་ཡང་བདེན་པ་ཡིན་པར་འགྱུར་རོ། །སྡུག་བསྔལ་ཞེས་བྱ་བ་འདི་ནི་ཀྱེ་མ་སྡུག་བསྔལ་ཤེས་པ་ཞེས་བྱ་བ་ལ་དེ་བཞིན་གཤེགས་པ་རྟག་པའོ། །ཆོས་ཀྱི་སྐུ་ཡིན་ཏེ་ཤའི་
སྐུ་མ་ཡིན་ནོ་ཞེས་དེ་བཞིན་གཤེགས་པའི་ཆེ་བ་ཉིད་ཤེས་པ་ནི་སྡུག་བསྔལ་ཤེས་པའོ། །དེ་མ་ཐོབ་ཀྱི་བར་དུ་སེམས་ཅན་རྣམས་ཀྱིས་ཆོས་མ་ཡིན་པ་ལ་ཆོས་ཡིན་ནོ་སྙམ་དུ་ཡོངས་སུ་བརྟགས་ནས་འཁོར་བའི་འཁོར་ལོ་ཤིན་ཏུ་སྡུག་བསྔལ་བའི་
གནས་སུ་ཡུན་རིང་པོར་སྡུག་བསྔལ་ཉམས་སུ་མྱོང་ནས་ངན་འགྲོར་འགྲོ་བར་འགྱུར་རོ། །གང་གི་ཚེ་དེ་བཞིན་གཤེགས་པ་རྟག་པར་ཤེས་པ་དེའི་ཚེ་ནི་ཡི་གེ་འབྲུ་གཉིས་པོ་ཇི་ལྟ་བུར་ཐོས་ཀྱང་རུང་སྟེ་བདེ་འགྲོར་འགྲོ་བར་འགྱུར་རོ། །དེ་ནས་ཐར་པ་
ཡང་ཐོབ་པར་འགྱུར་རོ། །དེས་ན་འདི་ན་རྫུ་འཕྲུལ་གྱི་བདེ་བ་ཡིན་ནོ་སྙམ་དུ་རང་གིས་རྟོགས་པར་འགྱུར་ཏེ། དེ་བཞིན་གཤེགས་པ་རྟག་ཅེས་བྱ་བ་ཐོས་པ་ཙམ་གྱི་རྒྱུ་དེས་ན་བདག་འདིར་འོངས་སོ། །དེ་བཞིན་གཤེགས་པ་རྟག་པར་མ་

49-1-96b

ཤེས་ཀྱི་བར་དུ་ནི་ཡུན་དེ་སྲིད་ཀྱི་བར་བདག་སྡུག་བསྔལ་རྣམས་ཀྱི་ནང་དུ་འཁོར་ཏོ། །ད་ནི་སྡུག་བསྔལ་ཤེས་སོ་ཞེས་བྱ་བ་འདི་ནི་བདེན་པ་ཡིན་ནོ། །གཞན་དག་གི་སྡུག་བསྔལ་བསྒོམ་པ་ནི་དོན་མེད་པའོ། །འདི་ནི་སྡུག་བསྔལ་ཀུན་འབྱུང་
བའོ་ཞེས་བྱ་བ་ནི་ཆོས་ཀྱི་དེ་ཁོ་ན་ཉིད་ལ་དེ་ཁོ་ན་ཉིད་མ་ཤེས་ནས། ཆོས་ལ་དགོངས་པའི་ཕྱིར་བྲན་དང་བྲན་མོ་ལ་སོགས་པ་རྫས་ངན་པ་དུ་མ་ལེན་པར་བྱེད་ཅིང་ཆོས་མ་ཡིན་པ་ལ་ཆོས་ཡིན་ནོ་སྙམ་དུ་འཛིན་ཏེ། དམ་པའི་ཆོས་ནུབ་པར་བྱེད་
ཅིང་དམ་པའི་ཆོས་མི་སྣང་བར་བྱེད་པར་འགྱུར་ཏེ། དམ་པའི་ཆོས་གནས་པར་བྱ་བའི་ཐབས་མི་ཤེས་པས་འདི་ལྟར་འཛིན་ཏེ། དམ་པའི་ཆོས་འཇིག་པར་འགྱུར་
ཞེས་བྱ་བ་མེད་དོ་སྙམ་ནས་དེའི་འབྲས་བུས་འཁོར་བའི་སྡུག་བསྔལ་རྣམས་ཀྱི་ནང་དུ་ཡོངས་སུ་འཁྱམ་མོ། །དེ་ནས་མཐོ་རིས་དང་ཐར་པ་ཐོབ་པར་འགྱུར་ཏེ། མཐོ་རིས་དང་ཐར་པ་ཐོབ་པའི་སྡུག་བསྔལ་ཀུན་འབྱུང་བའི་དེ་ཁོ་ན་ཉིད་
བདག་གིས་མ་ཤེས་པས་དམ་པའི་ཆོས་འཇིག་པའི་རྒྱུར་གྱུར་ཏེ་ཉེས་པས་སྨྲས་པའི་ཚིག་གིས་ཡུན་འདི་སྲིད་ཀྱི་བར་དུ་ཉོན་མོངས་པར་གྱུར་ཏོ་སྙམ་དུ་ཤེས་པ་འདི་ནི་སྡུག་བསྔལ་ཀུན་འབྱུང་བ་ཤེས་པ་ཞེས་བརྗོད་པར་བྱའོ། །གཞན་དག་
གི་ནི་དེ་ལྟ་མ་ཡིན་ནོ། །འདི་ནི་སྡུག་བསྔལ་འགོག་པ་ཞེས་བྱ་བ་ལ་སྟོང་པ་ཉིད་སྒོམ་པ་ནི་གཏན་དུ་སྟོང་པ་ཉིད་སྒོམ་པ་ཐམས་ཅད་ཟད་པ་དེ་བཞིན་གཤེགས་པའི་སྙིང་པོ་མེད་པར་བྱེད་པ་དེ་ལྟ་བུ་མ་ཡིན་ཏེ། སྡུག་བསྔལ་འགོག་པ་སྒོམ་
པ་ནི་ཡ་མཚན་ཅན་ཐམས་ཅད་ལ་ཡང་དོན་དང་འགལ་བའི་སྟོང་པ་ཉིད་ཡོད་དེ་དེ་རྣམས་ཀྱི་ཡང་སྡུག་བསྔལ་འགོག་པ་ཞེས་བྱ་བར་འགྱུར་རོ། །སེམས་ཅན་ཐམས་ཅད་ལ་ནི་དེ་བཞིན་གཤེགས་པའི་སྙིང་པོ་ཡོད་དེ། དེ་ནི་གསལ་བར་མི་
མངོན་ནོ། །གང་གི་ཚེ་ཉོན་མོངས་པ་ཟད་པ་དེའི་ཚེ་དེ་བཞིན་གཤེགས་པའི་སྙིང་པོ་ལ་འཇུག་པ་ཁྱེད་ཀྱིས་མཐོང་བར་འགྱུར་རོ། །གང་གི་ཚེ་སེམས་གཅིག་བསྐྱེད་པའི་ལས་ཀྱི་འབྲས་བུས་བདག་གིས་ཆོས་ཀྱི་དབང་ཕྱུག་རྟག་པ་དང་བདེ་བ་

49-1-97a

འཐོབ་བོ་སྙམ་དུ་ཁྱོད་ཀྱིས་ཤེས་པར་གྱུར་པ་དེ་ནི་སྡུག་བསྔལ་འགོག་པ་བསྒོམ་པར་བྱ་བ་ལ་སྒོམ་པ་ཡིན་ནོ། །དེ་བཞིན་གཤེགས་པའི་སྙིང་པོ་བདག་མེད་པར་བསྒོམས་ཤིང་གཏན་དུ་སྟོང་པ་ཉིད་བསྒོམས་
པས་ནི་སྡུག་བསྔལ་རྣམས་མི་འགག་པར་ཕྱེ་མ་ལེབ་མར་མེའི་ནང་དུ་སོང་བ་བཞིན་དུ་འགྱུར་རོ། །དེ་ལྟ་མ་ཡིན་པར་དེ་བཞིན་གཤེགས་པའི་སྙིང་པོ་ཡོད་པར་བསྒོམས་པའི་སེམས་ཅན་རྣམས་ནི་ཉོན་མོངས་པ་རྣམས་ཡོད་བཞིན་དུ་
ཉོན་མོངས་པའི་རྣམ་པ་འགོག་པར་བྱེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྙིང་པོའི་རྐྱེན་གྱི་ཕྱིར་ཏེ། དེ་ཤེས་པ་ནི་ཡང་དག་པར་རྫོགས་པའི་སངས་རྒྱས་ཀྱི་བཀའ་ལས་སྡུག་བསྔལ་འགོག་པའི་ཚིག་བདེན་པ་ཞེས་བྱའོ། །
གཞན་ནི་བསྒོམ་པ་མ་ཡིན་པ་ལ་བསྒོམ་པའོ། །འདི་ནི་སྡུག་བསྔལ་འགོག་པར་འགྱུར་བའི་ལམ་ཞེས་བྱ་བ་ནི་དེ་བཞིན་གཤེགས་པ་དང་། ཆོས་དང་། དགེ་འདུན་དང་། ཐར་པ་རྣམས་ཏེ། འདི་ལྟར་དེ་རྣམས་ལ་ཕྱིན་ཅི་ལོག་བཞིས་ཕྱིན་
ཅི་ལོག་ཏུ་གྱུར་པའི་དངོས་པོ་ནི་ཐར་པའོ། །ཐར་པ་ལ་ཡང་ཅི་ཡང་མེད་དོ་སྙམ་པ་དེ་ནི་འདི་ལྟར་སྒྱུ་མར་འདུག་སྟེ་འཁོར་བའི་སྡུག་བསྔལ་གྱི་ནང་དུ་ཡོངས་སུ་འཁྱམ་པ་ཡིན་ལ། བསྒོམ་ཉེས་པའི་དེའི་འབྲས་བུས་ན་ཡུན་རིང་པོར་སྡུག་བསྔལ་
ཉམས་སུ་མྱོང་བར་འགྱུར་རོ། །ད་ནི་བདག་གིས་དེ་བཞིན་གཤེགས་པ་དང་། ཆོས་དང་དགེ་འདུན་དང་། ཐར་པ་རྣམས་རྟག་པ་དང་། བརྟན་པ་དང་། ཐེར་ཟུག་པ་དང་། འཇིག་པར་མི་འགྱུར་བར་སེམས་གཅིག་བསྐྱེད་པའི་འབྲས་བུས་དབང་
ཕྱུག་རྟག་པའི་འབྲས་བུ་ཐོབ་བོ། །ཕྱིན་ཅི་ལོག་བཞི་པོ་སྡུག་བསྔལ་བ་དང་། བདག་མེད་པ་དང་། མི་གཙང་བ་རྣམས་ཆོས་མ་ཡིན་པ་ལ་ཆོས་ཡིན་ནོ་སྙམ་དུ་འཛིན་པས་ལྟ་བ་ངན་པའི་འབྲས་བུ་མྱོང་བ་འདི་ནི་སྡུག་བསྔལ་འགོག་པར་འགྱུར་
བའི་ལམ་ཞེས་བྱའོ། །གཞི་གསུམ་རྟག་པར་བསྒོམ་པ་བསྒྲུབ་པའི་ཕྱིར་མི་རྟག་པ་སྒོམ་པ་གང་ཡིན་པ་དེ་དག་ནི་མི་བདེན་པའི་བསྒོམ་པ་སྒོམ་པ་ཡིན་ནོ། །དེ་ལྟར་རྟག་པར་སྒོམ་པ་གང་ཡིན་པ་དེ་དག་ནི་ངའི་ཉན་ཐོས་ཡིན་ཏེ། འཕགས་

49-1-97b

པའི་བདེན་པ་བཞི་ཤེས་པའོ་ཞེས་ང་ཟེར་རོ། །འདི་རྣམས་ནི་འཕགས་པའི་བདེན་པ་བཞི་ཡིན་པར་རིག་པར་བྱའོ། །གསོལ་པ། བཅོམ་ལྡན་འདས་འཕགས་པའི་བདེན་པ་བཞིའི་ལམ་འདིའི་ཚུལ་གྱིས་བསྒོམ་པར་བགྱི་བ་བདག་གིས་
ད་གཟོད་རྟོགས་ལགས་སོ། །བཀའ་སྩལ་པ། སྡུག་བསྔལ་ལ་བདེ་བར་འདུ་ཤེས་པ་ནི་ཕྱིན་ཅི་ལོག་ཡིན་ནོ། །བདེ་བ་ལ་སྡུག་བསྔལ་བར་འདུ་ཤེས་པ་ནི་ཕྱིན་ཅི་ལོག་ཡིན་ནོ། །དེ་ལ་དེ་བཞིན་གཤེགས་པ་མི་རྟག་ཅེས་བྱ་བ་དེ་ནི་སྡིག་པ་དང་། 
སྡུག་བསྔལ་བ་ཡིན་ནོ། །དེ་བཞིན་གཤེགས་པ་བུད་ཤིང་ཟད་པའི་མེ་བཞིན་དུ་ཡོངས་སུ་མྱ་ངན་ལས་འདས་སོ་ཞེས་བྱ་བ་དེ་ནི་སྡིག་པ་དང་། སྡུག་བསྔལ་བ་ཡིན་ནོ། །སྡུག་བསྔལ་བ་མ་ཡིན་ནོ་ཞེས་བདག་ཉིད་སྒོམ་པར་བྱེད་པ་དང་དེ་བཞིན་
གཤེགས་པ་མི་རྟག་གོ་ཞེས་བྱ་བ་འདི་ནི་ཕྱིན་ཅི་ལོག་ཡིན་ནོ། །བདེ་བ་ལ་སྡུག་བསྔལ་བར་འདུ་ཤེས་པ་ནི་ཕྱིན་ཅི་ལོག་ཡིན་ཏེ། དེ་བཞིན་གཤེགས་པ་རྟག་གོ་ཞེས་བསྒོམས་ན་གང་ཟག་ཏུ་ལྟ་བར་འགྱུར་དུ་འོང་ངོ་སྙམ་ནས་སྒོམ་པ་འདི་ནི་སྡུག་བསྔལ་
བའོ་སྙམ་པ་ནི་བདེ་བར་འདུ་ཤེས་པ་རྣམས་ཀྱི་ཕྱིན་ཅི་ལོག་ཡིན་ཏེ་འདི་ནི་ཕྱིན་ཅི་ལོག་དང་པོའོ། །མི་རྟག་པ་ལ་རྟག་པར་འདུ་ཤེས་པ་ནི་ཕྱིན་ཅི་ལོག་ཡིན་ནོ། །རྟག་པ་ལ་མི་རྟག་པར་འདུ་ཤེས་པ་ནི་ཕྱིན་ཅི་ལོག་ཡིན་ནོ། །དེ་ལ་གཏན་དུ་སྟོང་པ་ཉིད་
བསྒོམས་ན་མི་ཚེ་ཐུང་བར་འགྱུར་རོ་སྙམ་ནས་དེའི་ཕྱིར་མི་རྟག་པ་ཉིད་ལ་སྟོང་པ་ཉིད་མ་ཡིན་པར་བསྒོམས་ན། བསྒོམས་པ་དེའི་འབྲས་བུས་ཚེ་རིང་བར་འགྱུར་རོ་སྙམ་པ་དེ་ཡང་ཕྱིན་ཅི་ལོག་ཡིན་ཏེ་འདི་ནི་ཕྱིན་ཅི་ལོག་གཉིས་པའོ། །བདག་མེད་པ་
ལ་བདག་ཏུ་འདུ་ཤེས་པ་ནི་ཕྱིན་ཅི་ལོག་ཡིན་ནོ། །བདག་ཡོད་པ་ལ་བདག་མེད་པར་འདུ་ཤེས་པ་ནི་ཕྱིན་ཅི་ལོག་ཡིན་ནོ། །དེ་ལ་འཇིག་རྟེན་པ་རྣམས་ལ་བདག་ཡོད་ཅེས་ཏེ་འཇིག་རྟེན་པ་བཞིན་དུ་སངས་རྒྱས་ཀྱི་གསུང་ལ་ཡང་བདག་ཡོད་པ་
མ་ཡིན་ཏེ། དེ་བཞིན་གཤེགས་པའི་སྙིང་པོའི་མིང་ཡང་མེད་དོ་ཞེས་བདག་མེད་པ་སྒོམ་པ་འདི་ནི་ཕྱིན་ཅི་ལོག་གསུམ་པའོ། །མི་གཙང་བ་ལ་གཙང་བར་འདུ་ཤེས་པ་ནི་ཕྱིན་ཅི་ལོག་ཡིན་ནོ། །གཙང་བ་ལ་མི་གཙང་བར་འདུ་ཤེས་པ་ནི་ཕྱིན་ཅི་ལོག་

49-1-98a

ཡིན་ནོ། །དེ་ལ་དེ་བཞིན་གཤེགས་པ་རྟག་སྟེ། ཤའི་སྐུ་མ་ཡིན་པ་ལ་ཤའི་སྐུ་ཡིན་ཏེ། ཤ་དང་ཁྲག་དང་རྒྱུས་པས་སྦྲེལ་བ་ཡིན་ནོ། །མི་གཙང་བའོ། །ཆོས་དང་དགེ་འདུན་གཉིས་ཀྱང་ཐར་པ་ཐོབ་ནས་མི་སྣང་བར་འགྱུར་
རོ་སྙམ་པ་ནི་གཙང་བ་ལ་མི་གཙང་བར་ཕྱིན་ཅི་ལོག་པ་ཡིན་ནོ། །བདག་གི་ལུས་ཐམས་ཅད་ནི་མི་གཙང་བ་ཡིན་ཏེ། གཙང་ཞེས་བྱ་བ་ཅི་ཡང་མེད་ན་བདག་གི་ལུས་ནི་གཙང་ངོ་སྙམ་དུ་བསྒོམ་པ་ནི་མི་གཙང་བ་ལ་གཙང་ངོ་སྙམ་དུ་འཛིན་པ་ཡིན་
ནོ། །བདག་ཀྱང་གང་ན་ཅི་ཡང་མེད་པ་དེར་འགྲོའོ་སྙམ་པ་ནི་གཙང་བ་ལ་མི་གཙང་ངོ་སྙམ་དུ་སྒོམ་པ་རྨོངས་པར་བྱེད་པའི་ཆོས་ཡིན་ཏེ་འདི་ནི་ཕྱིན་ཅི་ལོག་བཞི་པ་ཡིན་པར་རིག་པར་བྱའོ། །གསོལ་པ། བཅོམ་ལྡན་འདས་བདག་ནི་ད་གཟོད་ཡང་
དག་པའི་ལྟ་བ་ཅན་དུ་གྱུར་ཏེ། འདི་སྲིད་ཀྱི་བར་དུ་ལོག་པར་ལྟ་བར་གྱུར་ལགས་སོ། །བཅོམ་ལྡན་འདས་ཅི་ལགས། སྲིད་པ་ཉི་ཤུ་རྩ་ལྔ་ལ་བདག་མཆིས་ཤེས་བགྱི་འམ་མ་མཆིས་ཞེས་བགྱི། བཀའ་སྩལ་པ། བདག་ཅེས་བྱ་བ་ནི་དེ་བཞིན་
གཤེགས་པའི་སྙིང་པོའི་དོན་ཏོ། །སངས་རྒྱས་ཀྱི་ཁམས་ནི་སེམས་ཅན་ཐམས་ཅད་ལ་ཡོད་མོད་ཀྱི། དེ་ཡང་ཉོན་མོངས་པའི་རྣམ་པ་རྣམས་ཀྱིས་བསྒྲིབས་ཏེ་བདག་ཉིད་ལ་ཡོད་བཞིན་དུ་སེམས་ཅན་རྣམས་ཀྱིས་མཐོང་བར་མི་ནུས་སོ། །
འདི་ལྟ་སྟེ། དཔེར་ན་གྲོང་ཁྱེར་ཆེན་པོ་ཞིག་ན་དབུལ་པོའི་ཁྱིམ་ཞིག་ན་གསེར་གྱི་གཏེར་ཟད་མི་ཤེས་པ་ཞིག་ཡོད་ལ། དེ་ལ་བུད་མེད་དབུལ་མོ་ཞིག་འདུག་པ་དེས་ཀྱང་བདག་གི་ཁྱིམ་གྱི་སའི་འོག་ན་གཏེར་ཡོད་པར་མི་ཤེས་ཏེ། དེར་ཐབས་དང་
ལྡན་པའི་མི་ཞིག་གིས་བུད་མེད་དེ་ལ་སྨྲས་པ། སྲུ་ཚུར་ཤོག་བདག་གིས་ཁྱོད་ལ་གླ་སྦྱིན་གྱིས་བདག་གི་ཞིང་ལས་བྱེད་དུ་སོང་ཤིག་ཅེས་བྱས་པ་དང་། དེས་དེ་ལ་སྨྲས་པ། ཇོ་བོ་བདག་མི་མཆིའོ། །གལ་ཏེ་ཁྱོད་ཀྱིས་བདག་གི་བུ་ལ་གཏེར་བསྟན་
ན་ནི་གཟོད་བདག་མཆི་བར་འཚལ་ལོ་ཞེས་འཐད་པས་གྲུབ་པའི་ཚིག་སྨྲས་པ་དང་། དེས་དེ་ལ་སྨྲས་པ། སྲུ་བདག་གི་བུ་ཁྱོད་ལས་སྐྱེས་མ་ཐག་ཏུ་བདག་གིས་རིན་པོ་ཆེ་དང་གསེར་གྱི་གཏེར་ཟད་མི་ཤེས་པ་སྦྱིན་པར་བྱའོ། །དེ་ནས་དེས་དེ་ལ་

49-1-98b

སྨྲས་པ། ཁྱོད་ཀྱིས་ག་ལ་བྱིན་ཏེ་བདག་ལ་མཐོ་འཚམས་པར་ཟད་དོ། །དེ་ནས་དེས་དེ་ལ་སྨྲས་པ། ཁྱོད་ཉིད་ཀྱི་ཁྱིམ་ན་གཏེར་ཡོད་མོད་ཀྱི་ཁྱོད་བདག་ཀྱང་མི་ཤེས་ན་གཞན་གྱིས་ལྟ་ཤེས་པར་ག་ལ་ནུས། དེ་ནས་དེ་བདག་གིས་ཐོབ་པར་འཚལ་ལོ་
ཞེས་དེ་དེ་ལ་གསོལ་བ་འདེབས་སོ། །དེ་ནས་དེས་ཁྱིམ་དེའི་ནང་ནས་གཏེར་དེ་བརྐོས་ནས་དེ་ཉིད་ལ་བྱིན་ནོ། །དེ་ནས་དེས་དེ་མཐོང་ནས་ངོ་མཚར་དུ་གྱུར་ཏེ། དེ་ལ་སྐྱབས་སུ་སོང་བ་དེ་བཞིན་དུ་རིགས་ཀྱི་བུ་དེ་བཞིན་གཤེགས་པའི་སྙིང་པོ་ནི་སེམས་
ཅན་ཐམས་ཅད་ལ་ཡོད་ལ་མཐོང་བར་མི་ནུས་པ་ཙམ་དུ་ཟད་དེ། བུད་མེད་དབུལ་མོ་དེ་ཉིད་ལ་གཏེར་ཡོད་པ་དང་འདྲའོ། །རིགས་ཀྱི་བུ་ངས་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ་ཞེས་ཡང་དག་པར་བསྟན་པར་བྱ་སྟེ། 
ཇི་ལྟར་དབུལ་མོ་དེས་གཏེར་ཆེན་པོ་ཡོད་པར་བསྟན་ཀྱང་མི་ཤེས་པ་དེ་བཞིན་དུ་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་པ་ཡང་ཉོན་མོངས་པའི་རྣམ་པས་བསྒྲིབས་པས་སེམས་ཅན་རྣམས་ཀྱིས་མི་ཤེས་ཤིང་མ་མཐོང་ནས་
དེ་དག་ལ་དེ་བཞིན་གཤེགས་པས་བསྟན་ཏེ། དེ་དག་མགུ་ནས་དེ་བཞིན་གཤེགས་པ་ལ་སྐྱབས་སུ་འགྲོའོ། །གསོལ་པ། བཅོམ་ལྡན་འདས་སངས་རྒྱས་ཀྱི་ཁམས་མཆིས་པར་ད་བདག་གིས་རྟོགས་ཏེ། གདམས་ངག་སྟོན་པར་མཛད་པའི་དེ་བཞིན་
གཤེགས་པ་ཉིད་ནི་ཐབས་དང་ལྡན་པའི་མི་དེ་དང་འདྲ་བར་བལྟ་བར་བགྱིའོ། །སེམས་ཅན་ཐམས་ཅད་ནི་བུད་མེད་དབུལ་མོ་དང་འདྲ་བར་བལྟ་བར་བགྱིའོ། །བཀའ་སྩལ་པ། རིགས་ཀྱི་བུ་གཞན་ཡང་དཔེར་ན་བུད་མེད་ཅིག་ཡོད་ལ་དེའི་བུ་ཤིན་ཏུ་
ཆུང་བ་ནད་པ་ཞིག་ཡོད་དེ། དེའི་སྐབས་སུ་བུད་མེད་དེས་སྨན་པ་བཀུག་ནས་སྨན་པ་དེས་བྱིས་པ་དེ་ཁ་ར་དང་སྦྱར་བའི་སྨན་མར་བླུད་ནས་མ་ལ་བསྒོ་བ། ཆེ་ཞེས་ཁྱོད་ཀྱིས་སྨན་མར་མ་ཞུ་བའི་བར་དུ་བྱིས་པ་ལ་ནུ་མ་མ་བླུད་ཅིག་ཅེས་བྱས་ནས་བུད་མེད་
དེས་དེ་ནུར་མི་གཞུག་པར་བྱ་བའི་ཕྱིར་བདག་གི་ནུ་མ་གཉིས་ནིམ་པའི་ལོ་མ་བཏགས་པའི་འདིའ་གུས་བསྐུས་ནས་རང་གི་བུ་ལ་ཡང་འདི་སྐད་ཅེས་བསྒོ་སྟེ། བུ་ཅིག་ངའི་ནུ་མ་དུག་གིས་བསྐུས་ཀྱིས་བུ་ཅིག་ཁྱོད་མ་ནུ་ཤིག་ཅེས་བྱས་སོ། །དེ་ནས་

49-1-99a

ཁྱེའུ་དེ་སྐོམ་སྟེ་ནུ་མ་ནུའོ་སྙམ་དུ་བསམས་ན་ཡང་ནུ་མ་ནིམ་པའི་ལོ་མའི་དྲི་བྲོ་ནས་ངུས་ཏེ་ཆོ་གའི་མཐར་མ་ཕྱིན་གྱི་བར་དུ་རང་སྡོད་དོ། །དེ་ནས་ཆོ་ག་ཟིན་ནས་བུད་མེད་དེས་རང་གི་ནུ་མ་གཉིས་ཆུས་བཀྲུས་ནས་བུ་དེ་ལ་
སྨྲས་པ། ཀྱེ་བུ་ཅིག་ད་ནི་ནུ་མ་ནུས་ཤིག་ཅེས་བྱས་ན་ཁྱེའུ་དེས་དུག་ཡོད་སྙམ་སྟེ་ནུར་མ་བཏུབ་ནས་ངུ་ཞིང་འདུག་སྟེ་བལྟ་ཡང་མི་ལྟའོ། །དེ་ནས་ཡང་སྨྲས་པ། སྔར་ནི་ཁྱོད་ཀྱི་སྨན་མར་དེ་མ་ཞུ་བ་ལ་ཐོགས་ཏེ་ནུ་མ་ནུར་མི་གཞུག་པའི་ཕྱིར་ངས་ནུ་མ་
གཉིས་ནིམ་པའི་ལོ་མའི་འདིའ་གུས་བསྐུས་ཏེ། ཁྱོད་ལ་གནོད་པར་འགྱུར་ཞིང་ཤིར་དོགས་ནས་ནུར་མ་བཅུག་པ་ཡིན་གྱིས་ད་ནི་ནུས་ཤིག་ཅེས་བྱས་ནས་ནུར་བཅུག་སྟེ། དེས་ཀྱང་དལ་ནས་མ་ནུས་སོ། །རིགས་ཀྱི་བུ་དེ་བཞིན་དུ་ངས་ཀྱང་སྔར་
ནི་གདུལ་བར་བྱ་བའི་དབང་གིས་བྱིས་པའི་སྨན་མར་ཞུ་བར་བྱ་བ་བཞིན་དུ། དགེ་སློང་རྣམས་ཀྱི་འཇིག་རྟེན་པའི་ལྟ་བ་གཞོམ་པར་བྱ་བའི་ཕྱིར་དང་། འཇིག་རྟེན་ལས་འདས་པའི་ཆེ་བ་ཉིད་ཡང་དག་པར་བསྟན་པའི་ཕྱིར་དང་། འཇིག་རྟེན་པའི་
བདག་གི་དེ་ཁོ་ན་ཉིད་བརྫུན་པར་ཡང་དག་པར་བསྟན་པའི་ཕྱིར་དང་། བདག་མེད་པར་བསྒོམས་པས་ལུས་རྣམ་པར་དག་པར་བྱ་བའི་ཕྱིར་དགེ་སློང་དག་ཆོས་ཐམས་ཅད་བདག་མེད་པར་སྒོམས་ཤིག །དེ་ལྟར་བསྒོམས་དང་ངར་འཛིན་པ་སྤོང་
བར་འགྱུར་རོ། །ངར་འཛིན་པ་ཡོངས་སུ་སྤངས་ན་མྱ་ངན་ལས་འདས་པ་ཐོབ་པར་འགྱུར་རོ་ཞེས་བྱས་ཏེ། ཇི་ལྟར་བྱིས་པའི་མས་རང་གི་ནུ་མ་ནིམ་པའི་ལོ་མའི་མདའ་གུས་བསྐུས་པ་དེ་བཞིན་དུ་ངས་ཀྱང་ཆོས་ཐམས་ཅད་བདག་མེད་
པར་སྟོང་པ་ཉིད་དུ་སྒོམས་ཤིག་ཅེས་བྱས་སོ། །ཇི་ལྟར་བྱིས་པའི་མ་དེས་ཕྱིས་རང་གི་ནུ་མ་བཀྲུས་ཏེ་བུ་ལ་སྨྲས་པ། སྔར་ནི་ཁྱོད་ཀྱི་སྨན་མར་མ་ཞུ་བར་བྱ་བའི་ཕྱིར་ནུ་མ་ནུར་མ་བཅུག་གིས་ད་ནི་ནུས་ཤིག་ཅེས་ཟེར་བ་དེ་བཞིན་དུ་
ངས་ཀྱང་འཇིག་རྟེན་པའི་ཆོས་ལས་བསྒྱུར་བའི་ཕྱིར་དེ་སྐད་ཅེས་བསྟན་ཏེ། བདག་མེད་དོ་ཞེས་བྱས་ནས་ད་ནི་ང་དེ་བཞིན་གཤེགས་པའི་སྙིང་པོ་ཡོད་ཅེས་སྟོན་ཀྱིས་དགེ་སློང་དག་བྱིས་པ་བཞིན་དུ་མ་སྐྲག་པར་ཇི་ལྟར་བྱིས་པ་དེས་

49-1-99b

བརྟགས་ནས་ཕྱིར་ཡང་མའི་ནུ་མ་ནུ་བར་བྱེད་པ་དེ་བཞིན་དུ་དགེ་སློང་དག་ཁྱེད་ཀྱིས་ཀྱང་བདག་ཅག་ལ་དེ་བཞིན་གཤེགས་པའི་སྙིང་པོ་ཡོད་དོ་སྙམ་དུ་བརྟགས་ནས་སྒོམ་པ་ལ་བརྩོན་པར་གྱིས་ཤིག་དང་ད་བསྟན་ཏོ། །
གསོལ་པ། འདི་ནི་བྱིས་པ་བཙས་མ་ཐག་ཏུ་ཤེས་པ་ཆུང་ལ་ཤེས་པ་མ་མཆིས་པ་ནི་གསལ་བར་འགྱུར་བ་མི་རིགས་ལགས་སོ། །གལ་ཏེ་བདག་མཆིས་ན་ནི་ཤེས་པ་དང་བློ་གྲོས་དང་ཡང་ལྡན་པའི་རིགས་ལགས་སོ། །གལ་ཏེ་
ཤེས་པ་ཞན་པ་ལགས་ན་ནི་གསལ་བར་འགྱུར་བའི་ཡང་མི་རིགས་པས་ན་བདག་ནི་བདག་མ་མཆིས་ཤེས་མཆིས་ལགས་སོ། །དེ་ཅིའི་སླད་དུ་ཞེ་ན། བདག་རྟག་པ་ལགས་ན་སྐྱེས་སླན་ཆད་འགུམ་པའི་མི་རིགས་ལགས་སོ། །གལ་ཏེ་དེ་
བཞིན་གཤེགས་པའི་ཁམས་རྟག་པ་ལགས་ན་ཐ་དད་པའི་བྱེ་བྲག་ཀྱང་དེ་ལ་སྣང་སྟེ། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། གདོལ་པ་དང་། དུད་འགྲོའི་སྐྱེ་གནས་སུ་གྱུར་པའི་ལས་ཀྱི་བྱེ་བྲག་
རྣམས་ལས་སྐྱེ་བའི་བྱེ་བྲག་ཐ་དད་པ་དག་ཀྱང་སྣང་ལགས་སོ། །གལ་ཏེ་བདག་མཆིས་ན་བྱེ་བྲག་མ་མཆིས་པའི་བདག་ནི་མཉམ་པ་ཉིད་ལགས་ཏེ་དེ་ལྟ་ན་དེ་ལ་ཁམས་མ་མཆིས་ལགས་སོ། །གལ་ཏེ་ཁམས་མཆིས་ན་གསོད་པ་དང་། 
ཕ་རོལ་གྱི་ནོར་རྐུ་བ་དང་། འཁྲིག་པ་ལ་སོགས་པ་མི་དགེ་བ་བཅུའི་ལས་ཀྱི་ལམ་རྣམས་ལ་ཅིའི་སླད་དུ་འཇུག་ལགས། ཆང་འཐུངས་པས་ཅིའི་སླད་དུ་ར་རོ་བར་འགྱུར་ལགས། གལ་ཏེ་སེམས་ཅན་གྱི་ཁམས་རྟག་པ་ལགས་ན་དེ་ལྟ་ན་
འོན་པ་རྣམས་ཀྱང་རྣ་བས་ཐོས་པར་འགྱུར་བའི་རིགས། ལོང་བ་རྣམས་ཀྱང་མཐོང་བར་འགྱུར་བའི་རིགས། ལྐུག་པ་རྣམས་ཀྱང་སྨྲ་མཁས་པར་འགྱུར་བའི་རིགས་ལགས་སོ། །གལ་ཏེ་བདག་སེམས་ཅན་གྱི་ཁམས་དེ་རྟག་པ་ལགས་ན། 
བད་ཀན་དང་། ནུར་ནུར་པོ་དང་། སྔོན་པོ་དང་། སེར་པོའི་ཚོགས་རྣམས་བདག་གང་གི་ནང་ན་གནས་ལགས། བདག་ད་ཡང་དེ་རྣམས་ཀྱི་གོ་སྐབས་གང་ན་གནས་ལགས། འོན་ཏེ་རླན་དང་འདྲ་བར་ཐམས་ཅད་དུ་གནས་ལགས་སམ། 

49-1-100a

གལ་ཏེ་དེ་ལྟ་ན་ནི་མི་གཡུལ་དུ་མཆིས་པའི་རྣ་བ་དང་སྣ་ཆད་ན་བདག་དེའི་ཡང་ཉིང་ལག་ཉམས་པར་འགྱུར་བའམ། ལག་རྡུམ་དུ་འགྱུར་བའི་རིགས་ལགས་སོ། །བཀའ་སྩལ་པ། རིགས་ཀྱི་བུ་དཔེར་ན་རྒྱལ་
པོ་ལ་ལ་ཞིག་གི་གྱད་གྱི་འཕྲལ་བའི་སྨིན་མཚམས་སུ་རིན་པོ་ཆེ་རྡོ་རྗེ་བཏགས་པ་ལས་གྱད་དེ་གྱད་གཞན་ཞིག་དང་སྟོབས་འགྱེད་དེ། དེ་གཉིས་ལུགས་བཞིན་དུ་འགྱེད་པ་ལས་གྱད་གཅིག་ཤོས་ཀྱི་མགོ་བོས་བརྡུངས་ཏེ་གྱད་དེའི་འཕྲལ་བ་
སྣད་པར་བྱས་ནས་སྨིན་མཚམས་ཀྱི་རྒྱན་རིལ་གྱིས་ནང་དུ་ནུབ་པར་བྱས་ན། གྱད་དེས་མ་ཚོར་ཏེ་བདག་གིས་རྡོ་རྗེ་གར་གཞག་ཞིག་གུ་སྙམ་སྟེ། དེས་སྨན་པ་བཀུག་ནས་རྨ་ཁ་འཆོས་སུ་བཅུག་གོ། །སྨན་པ་དེ་ཡང་ཐབས་མཁས་ཤིང་ཡིད་
རྣོ་བ་ཞིག་སྟེ། རྨ་འདི་ནི་ནོར་བུ་དེ་ལས་གྱུར་ཏོ་སྙམ་དུ་ཤེས་ནས་རྡོ་རྗེ་དེ་འཕྲལ་བའི་ནང་དུ་ནུབ་ཅིང་འདུག་གོ་སྙམ་སྟེ། དེས་གྱད་དེ་ལ་ཀྱེ་མི་ཁྱོད་ཀྱི་ནོར་བུ་དེ་གར་སོང་ཞེས་དྲིས་པ་དང་། དེས་སྨན་པ་དེ་ལ་སྨྲས་པ། ཀྱེ་མ་སྨན་པ་ངའི་སྨིན་མཚམས་
ཀྱི་རྒྱན་རྡོ་རྗེ་དེ་སྟོར་གོར་མ་ཆག་གོ། །ཀྱི་ཧུད་བདག་གིས་བག་ཚེའི་ནང་དུ་བཅུག་གམ་གར་བཅུག་པ་མི་ཤེས་ཏེ་སྒྲོམ་བུའི་ནང་དུ་བཙལ་ན་ཡང་མ་རྙེད་དོ། །ཀྱི་ཧུད་ཕུང་གིས་མེད་དོ། །ཆུའི་ཆུ་བུར་བཞིན་དུ་མེད་པར་གྱུར་ན་ཅི་སྒྱུ་མ་ལྟ་
བུར་གྱུར་ཏམ་ཞེས་ཟེར་རོ། །དེ་ནས་དེ་ལ་སྨན་པས་སྨྲས་པ། ཀྱེ་མི་ཁྱོད་དེ་ལྟར་མྱ་ངན་མ་བྱེད་ཅིག །ཁྱོད་ཀྱི་རྡོ་རྗེ་དེ་ནི་རྨའི་ནང་དུ་ནུབ་ནས་ཤ་དང་ཁྲག་དང་རྣག་གི་ནང་ན་འབར་ཞིང་འདུག་སྟེ། ཁྱོད་སྟོབས་འགྱེད་པ་ལ་ཡིད་བྲལ་ནས་
མ་ཚོར་བར་ཟད་དོ་ཞེས་སྨན་པ་དེས་དེ་སྐད་བྱས་ཀྱང་ཡིད་མི་ཆེས་ཏེ། འོ་ན་རྣག་ཁྲག་དང་བཅས་ཏེ་ཅིའི་ཕྱིར་མ་བྱུང་། ཡང་ན་ཆུ་བ་ལ་ཐོགས་ཏེ་འདུག་གམ་ཁྱོད་དེ་སྐད་དུ་མ་སྨྲ་ཤིག་ཅེས་སྨན་པ་དེ་ལ་དེ་སྐད་ཅེས་སྨྲས་སོ། །
དེ་ནས་སྨན་པ་དེས་རྡོ་རྗེ་དེ་ཕྱུང་ནས་དེ་ལ་བསྟན་ཏེ། དེས་མཐོང་ནས་ངོ་མཚར་དུ་གྱུར་པ་དེ་བཞིན་དུ་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་མོད་ཀྱི། སེམས་ཅན་རྣམས་ཀྱིས་ནི་དེ་མི་ཤེས་ཏེ་མི་

49-1-100b

དགེ་བའི་གྲོགས་པོ་ལ་བསྟེན་པའི་ཉེས་པ་དང་། འདོད་ཆགས་དང་། ཞེ་སྡང་དང་། གཏི་མུག་གིས་ནོན་པས་སེམས་ཅན་རྣམས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་དང་། ལྷ་མ་ཡིན་དང་། གདོལ་པ་དང་། བྲམ་ཟེ་དང་། རྒྱལ་
རིགས་དང་། རྗེའུ་རིགས་དང་། དམངས་རིགས་རྣམས་སུ་སྐྱེ་བར་འགྱུར་རོ། །བདག་གི་ཉེས་པའི་སྟོབས་དང་། འདོད་ཆགས་དང་། ཞེ་སྡང་དང་། གཏི་མུག་གིས་མི་ཤེས་པས་སེམས་ཅན་རྣམས་གླེན་པ་དང་། འོན་པ་དང་། ལོང་བ་དང་། 
ལག་རྡུམ་དང་། གཞོགས་སྐམས་དང་། དྲི་མ་སྣ་ཚོགས་ཀྱིས་གོས་པ་དང་། མིག་སེར་བ་དང་། སྲན་སྡེའུའི་མདོག་ལྟར་འདུག་པ་དང་། མེ་ཏོག་ཀུ་རན་ཏ་ཀའི་མདོག་ལྟར་འདུག་པ་དང་། མིག་དམར་སེར་དུ་འདུག་པ་དང་། སྲིད་པ་ཉི་ཤུ་རྩ་ལྔ་
དག་ཏུ་རྣམ་པ་སྣ་ཚོགས་སུ་འགྱུར་རོ། །ཇི་ལྟར་གྱད་དེ་རང་གི་ལུས་ལ་རྡོ་རྗེ་འདུག་ཀྱང་འདུ་ཤེས་ཉམས་པས་སྟོར་བའི་འདུ་ཤེས་སུ་རྟོག་པ་དེ་བཞིན་དུ་སེམས་ཅན་འཇིག་རྟེན་པ་རྣམས་བདག་གི་དེ་ཁོ་ན་ཉིད་མ་རྟོགས་པ་དང་། མི་དགེ་
བའི་གྲོགས་པོའི་དབང་དུ་གྱུར་པ་དང་། དགོངས་པའི་ཚིག་མི་ཤེས་པས་བདག་ཡོད་བཞིན་དུ་བདག་མེད་པར་སྒོམ་པར་བྱེད་དོ། །བདག་མེད་པ་མི་སྒོམ་པ་རྣམས་ནི་འཇིག་རྟེན་པའི་བདག་སྒོམ་པར་བྱེད་དོ། །ཇི་ལྟར་འཇིག་རྟེན་པའི་
བདག་ཡོད་དོ་ཞེས་བདག་གི་དེ་ཁོ་ན་ཉིད་མ་རྟོགས་པ་བཞིན་དུ་འཇིག་རྟེན་ལས་འདས་པའི་ཡང་དེ་དང་འདྲ་སྟེ། མི་དགེ་བའི་གྲོགས་པོ་ལ་བསྟེན་པ་དགོངས་པའི་ཚིག་གི་མཐའ་མི་ཤེས་པས་བདག་མེད་དོ་བདག་མེད་དོ་ཞེས་སྒོམ་བཞིན་དུ་བདག་
མེད་པའི་དེ་ཁོ་ན་ཉིད་མི་ཤེས་ཏེ། བདག་ག་ལ་ཡོད། ག་ན་གནས། ཅི་རྫ་མའི་ནང་ན་རྫ་མ་འདུག་པ་ལྟ་བུ་ཞིག་གམ། འོན་ཏེ་རླན་ལྟ་བུར་ཁྱབ་པར་འདུག་གམ། གྱད་རྨོངས་པའི་སྨིན་མཚམས་ཀྱི་རྒྱན་ལྟ་བུར་འདུག་གམ་སྙམ་པ་ལ་སྨན་
པ་བཞིན་དུ་དེ་བཞིན་གཤེགས་པས་དེ་དག་ལ་འདི་སྐད་དུ་བདག་ནི་ཐམས་ཅད་དུ་གནས་པ་མ་ཡིན་ལ། རིན་པོ་ཆེ་རྡོ་རྗེ་ལྟར་འོད་གསལ་ཞིང་ཉོན་མོངས་པའི་རྣམ་པས་བསྒྲིབས་པ་ཡིན་ནོ་ཞེས་བཀའ་སྩལ་ཏེ། དེ་སྐད་ཅེས་བཀའ་སྩལ་པ་ལ་

49-1-101a

སེམས་ཅན་རྣམས་ཡིད་ཆེས་པར་འགྱུར་ལ་ཉོན་མོངས་པ་ཟད་པར་བྱ་དགོས་པ་ཙམ་དུ་ཟད་དོ། །དེ་ནས་རྡོ་རྗེ་བཞིན་དུ་དེ་བཞིན་གཤེགས་པའི་སྙིང་པོ་མཐོང་བར་འགྱུར་རོ། །རིགས་ཀྱི་བུ་དེ་ལྟར་ན་དེ་བཞིན་གཤེགས་
པའི་སྙིང་པོ་ནི་དཔག་ཏུ་མེད་དོ། །གཞན་ཡང་རིགས་ཀྱི་བུ་དཔེར་ན་གངས་ཀྱི་རི་ལ་བཅུད་ཀྱི་ཁམས་བུང་བའི་བཅུད་ཅེས་བྱ་བ་ཞིག་ཡོད་དེ། དེ་ཤིང་གེལ་པའི་ནགས་སྟུག་པོས་གཟིངས་ཤིང་འདུག་ཀྱང་དེ་དྲི་བསུང་གིས་མངོན་ཏེ། སྔོན་འཁོར་
ལོས་སྒྱུར་བའི་རྒྱལ་པོ་ཞིག་གིས་དེའི་དོན་དུ་ངོས་སོ་སོ་ནས་ཝ་བཙུགས་ནས་བཅུད་ཀྱི་ཁམས་དེ་ལས། ཝ་ལ་ལའི་ཁ་ནས་ནི་ཁུ་བ་སྐྱུར་བ་འབྱུང་། ལ་ལའི་ཁ་ནས་ནི་ལན་ཚྭའི་རོ་འབྱུང་། ལ་ལའི་ཁ་ནས་ནི་མངར་བ་འབྱུང་། ལ་ལའི་ཁ་
ནས་ནི་ཚ་བ་འབྱུང་། ལ་ལའི་ཁ་ནས་ནི་ཁ་བ་འབྱུང་། ལ་ལའི་ཁ་ནས་ནི་བསྐ་བ་འབྱུང་སྟེ། བཅུད་ཀྱི་ཁམས་དེ་ལྟ་བུ་དེ་ནགས་ཀྱི་ནང་ན་ནམ་མཁའ་ལ་ལྡིང་ངོ་། །བཅུད་རོ་གཅིག་པུ་དེ་འདྲ་བ་དེ་ལས་རོ་ཐ་དད་པ་སྣ་ཚོགས་འབྱུང་ལ་རོ་དེ་དག་
ཀྱང་ཕན་ཚུན་འདྲེ་བར་མི་འགྱུར་ཏེ། བཅུད་ཀྱི་ཁམས་དེ་ཡང་ཟླ་བའི་དཀྱིལ་འཁོར་བཞིན་དུ་ཡོངས་སུ་ཁྱབ་པར་འདུག་གོ། །དེ་དེ་ལྟར་འདུག་ཀྱང་སེམས་ཅན་གཞན་དག་གིས་ནི་ཤིང་གེལ་པའི་ནགས་དེའི་ནང་དུ་ཞུགས་ཏེ། གཞོར་དག་གིས་
བརྐོས་ཀྱང་སེམས་ཅན་སྐལ་བ་ཆུང་ངུ་རྣམས་ཀྱིས་ཐོབ་པར་མི་འགྱུར་ལ། འཁོར་ལོས་སྒྱུར་བའི་རྒྱལ་པོས་ནི་བསོད་ནམས་ཀྱི་མཐུས་ཐོབ་པར་འགྱུར་བ་དེ་བཞིན་དུ་རིགས་ཀྱི་བུ་དེ་བཞིན་གཤེགས་པའི་སྙིང་པོ་ནི་བཅུད་ཀྱི་ཁམས་དང་འདྲ་
བ་ལ་ཉོན་མོངས་པའི་རྣམ་པས་བསྒྲིབས་ཤིང་འདུག་སྟེ། སངས་རྒྱས་སུ་འགྱུར་བའི་རྒྱུར་རོ་གཅིག་ཏུ་ཟིན་ཀྱང་དེ་ལས་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པས་རོ་མང་པོར་འགྱུར་ཏེ། སྐྱེས་པ་དང་། བུད་མེད་དང་། མ་ནིང་རྣམས་
འབྱུང་བར་འགྱུར་རོ། །དེ་བཞིན་གཤེགས་པའི་ཁམས་དེ་ནི་སྐྱེས་བུའི་རང་བཞིན་ཡིན་ཏེ་དེ་བས་ན་སྲོག་བཅད་པས་སྲོག་ཆགས་གསད་པར་མི་འགྱུར་རོ། །གལ་ཏེ་སྲོག་ཆགས་བསད་པར་གྱུར་ན་ནི་འཚོ་བ་པོ་གཏན་མེད་པར་བྱས་པར་འགྱུར་

49-1-101b

ལ། འཚོ་བ་པོ་གཏན་མེད་པར་འགྱུར་བ་ནི་མི་སྲིད་དོ། །དེ་ལ་འཚོ་བ་པོ་ཞེས་བྱ་བ་ནི་དེ་བཞིན་གཤེགས་པའི་སྙིང་པོ་ཡིན་ལ་ཁམས་དེ་ནི་གཞིག་པའམ། གསད་པའམ། གཏན་མེད་པར་བྱ་མི་ནུས་ལ་སངས་རྒྱས་ཉིད་མ་ཐོབ་ཀྱི་བར་དུ་ཤིན་ཏུ་
རྣམ་པར་དག་པར་མཐོང་བར་ཡང་མི་ནུས་སོ། །དེ་བས་ན་སྲོག་ཆགས་བསོད་པའི་མི་མེད་དོ། །གསོལ་པ། མ་མཆིས་ཤེས་བགྱིར་མི་རུང་སྟེ། གལ་ཏེ་མ་མཆིས་སུ་ལགས་ན་སྲོག་ཆགས་བཀུམ་པས་སྡིག་པར་མི་འགྱུར་བའི་རིགས་ལགས་
སོ། །བཀའ་སྩལ་པ། ཡོད་དོ་ཞེས་བརྗོད་པར་བྱ་སྟེ་ཇི་ལྟ་ཞེ་ན། ཕྱི་རོལ་གྱི་བསགས་པའི་ཁམས་ཤིང་གེལ་པ་དང་འདྲ་བ་དེ་བསད་པ་ལ་སྲོག་གཅོད་པ་ཞེས་བྱ་སྟེ། དེ་བས་ན་སྲོག་བཅད་པས་དེ་སྡིག་པའི་ཚོགས་ཀྱིས་ངན་
འགྲོར་འགྲོ་བར་འགྱུར་ལ། ལས་ངན་པའི་རྣམ་པར་སྨིན་པས་བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། གདོལ་པ་དང་། བྱ་དང་། རི་དགས་དང་། མཚན་མ་ཐ་དད་པ་གསུམ་གྱི་མིང་དང་། གློ་ཐ་
དད་པ་དང་། སྲིད་པ་ཉི་ཤུ་རྩ་ལྔ་དག་ཏུ་སེམས་ཅན་རྣམས་ཉིང་མཚམས་སྦྱོར་བར་འགྱུར་རོ། །འཇིག་རྟེན་པ་རྣམས་ཀྱི་བདག་ནི་ལྡུམ་བུ་ཤ་མ་ཀའི་འབྲས་བུ་ཙམ་དང་། འབྲས་ཀྱི་འབྲུ་ཙམ་དང་། མཐེ་བོ་ཙམ་ཞེས་བྱ་བ་ལ་སོགས་པར་
རྟོག་པ་སྟེ། མི་བདེན་པའི་རྟོག་པ་ཡིན་ནོ། །འཇིག་རྟེན་ལས་འདས་པའི་རྟོག་པ་ནི་སངས་རྒྱས་ཀྱི་ཁམས་ཡོད་པར་རྟོག་པ་གང་ཡིན་པ་སྟེ་དོན་དམ་པའི་བདེན་པའི་རྟོག་པ་ཡིན་ནོ། །རིགས་ཀྱི་བུ་གཞན་ཡང་དཔེར་ན་གཏེར་གྱི་འབྱུང་ཁུང་
གི་དཔྱད་ཤེས་པའི་མིས་གཞོར་རམ། བརྐོ་བའི་དཔྱད་གཞན་དག་གིས་གཏེར་བརྐོས་ན་རྡོ་དང་གསེག་མ་ཐམས་ཅད་ནི་ཕྱེ་མར་རློག་པར་ནུས་ལ། རྡོ་རྗེ་ནི་ནམས་ཀྱང་ཆུང་ཟད་ཀྱང་ཆོད་པར་མི་ནུས་ཏེ། མཚོན་ཆ་ཐམས་ཅད་ཀྱིས་ཀྱང་རྡོ་
རྗེ་རིན་པོ་ཆེ་མི་ཆོད་པ་དེ་བཞིན་དུ་རིགས་ཀྱི་བུ་དེ་བཞིན་གཤེགས་པའི་སྙིང་པོ་སྐྱེ་བ་པོའི་བདག་ནི་ལྷ་དང་བདུད་བྱེ་བ་སྙེད་ཀྱིས་ཀྱང་མཚོན་ཆ་ཐམས་ཅད་ཀྱིས་གཅད་པར་མི་ནུས་ལ་བསགས་པའི་ཁམས་ནི་རྡོ་དང་གསེག་མ་བཞིན་དུ་ཕྱེ་མར་

49-1-102a

རློག་ནུས་སོ། །དེ་བཞིན་གཤེགས་པའི་སྙིང་པོ་འཚོ་བ་པོ་ནི་རྡོ་རྗེ་རིན་པོ་ཆེ་དང་འདྲ་སྟེ། དེ་བས་ན་མི་རྣམས་ཀྱི་སྲོག་བཅད་པས་འཚོ་བ་འཇིག་པར་འགྱུར་ཏེ། དེའི་ཕྱིར་བསགས་པའི་ཁམས་གཤིག་པས་
སྲོག་ཆགས་བསད་པར་འགྱུར་རོ། །རིགས་ཀྱི་བུ་དེ་ལྟར་ན་སངས་རྒྱས་ཀྱི་བསྟན་པ་ཤིན་ཏུ་རྒྱས་པ་ནི་མཆོག་ཏུ་ཆ་ཕྲ་བ་སྟེ་བདུད་རྩིའི་མཆོག་ཀྱང་ཡིན་ནོ། །དུག་གི་མཆོག་ཀྱང་ཡིན་ནོ། །གསོལ་པ། བཅོམ་ལྡན་འདས་ཅི་ལས་
དགོངས་ཏེ། ཤིན་ཏུ་རྒྱས་པ་ནི་བདུད་རྩིའི་མཆོག་ཀྱང་ལགས། དུག་གི་མཆོག་ཀྱང་ལགས་ཤེས་བཀའ་སྩལ་ལགས། བཀའ་སྩལ་པ། རིགས་ཀྱི་བུ་ཁྱོད་དགོངས་པའི་ཚིག་འདི་ཤེས་པར་འདོད་དམ། གསོལ་པ། བཅོམ་ལྡན་
འདས་དགོངས་པའི་ཚིག་གསུང་གི་མཆོག་ཤེས་པར་འཚལ་ལགས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཁ་ཅིག་བདུད་རྩི་འཐུངས་པས་འཆི་མི་འགྱུར། །ཁ་ཅིག་གིས་ནི་འཐུངས་ན་འཆི་བར་འགྱུར། །ཁ་ཅིག་
དུག་འཐུངས་པས་ཀྱང་འཆི་མི་འགྱུར། །ཁ་ཅིག་གིས་ནི་འཐུངས་ན་འཆི་བར་འགྱུར། །ཐེག་པ་ཆེན་པོ་འདི་ལ་ནི། །ཆགས་མེད་ཡེ་ཤེས་བདུད་རྩི་ཡིན། །མཚུངས་པ་མེད་པའི་ཡེ་ཤེས་མཆོག །དེ་ཉིད་དུག་ཡིན་ཞེས་ཀྱང་བསྟན། །ཞུ་བའི་འོག་
ཏུ་ཟ་བ་ལ། །མར་གྱི་སྙིང་ཁུ་སྦྲང་རྩི་དང་། །ཁ་ར་རྣམས་ནི་བདུད་རྩི་བཞིན། །མ་ཞུ་ཟ་ལ་དུག་ཏུ་འགྱུར། །དེ་བཞིན་རབ་རྒྱས་བདུད་རྩིའི་མཆོག །དགོངས་པའི་ཚིག་ལ་མི་མཁས་ཤིང་། །བྱིས་པའི་བློ་དང་ལྡན་རྣམས་ལ། །མི་
བཟད་པའི་དུག་ཏུ་འགྱུར། །རང་རྒྱལ་ཉན་ཐོས་རྣམས་ཀྱང་ནི། །རྟག་ཏུ་དེ་དང་འདྲ་བ་ཡིན། །ཐེག་ཆེན་སྨན་མཆོག་དེ་དག་ལ། །བ་ཡི་འོ་མ་འཐུངས་པ་བཞིན། །བྱང་ཆུབ་སེམས་དཔའ་འཇིགས་མེད་པ། །མི་མཆོག་བརྟན་པོ་དེ་དག་
ནི། །ཐེག་པ་ཆེན་པོས་ངེས་པར་འབྱུང་། །འོད་སྲུང་དེ་ལྟར་ཤེས་ནས་ནི། །བདུད་རྩི་རྟག་པ་ཁམས་ཀྱི་དབྱིངས། །དེ་ལ་དེང་འདིར་སྐྱབས་མཆོག་སོང་། །བདུད་རྩི་མཆོག་གི་ཁམས་དེ་ནི། །ང་ཡི་ཁམས་ཡིན་སེམས་ཅན་ཁམས། །

49-1-102b

རྟག་ཏུ་ང་ལ་སྐྱབས་སོང་ན། །སྐྱབས་གསུམ་བདག་ཉིད་ཁམས་སུ་འགྱུར། །ང་ཡི་སྐུ་ལ་ཁམས་ཡོད་ཀྱིས། །བདག་ཉིད་འདི་ལ་ཁྱོད་ཞུགས་ཤིག །སངས་རྒྱས་ཆོས་དང་དགེ་འདུན་རྣམས། །ང་ཡི་ཁམས་ཀྱི་རང་བཞིན་ཏེ། །གསུམ་པོ་
རིན་ཆེན་མཆོག་ཡིན་ཞེས། །བཅོམ་ལྡན་འདས་ཀྱིས་ཚིགས་བཅད་གསུངས། །གསོལ་པ། འཇིགས་མེད་ཇི་ལྟར་སྐྱབས་མཆི་བ། །བདག་གིས་གློ་བར་མ་ཆུད་ལགས། །དཀོན་མཆོག་གསུམ་ཡང་མ་འཚལ་ཏེ། །བདག་
མེད་ལ་ནི་ཇི་ལྟར་མཆི། །སངས་རྒྱས་སྐྱབས་སུ་མཆིས་ན་ཡང་། །ཇི་ལྟར་དབུགས་ནི་ཕྱིན་པར་འགྱུར། །ཅི་ཡི་སླད་དུ་མི་རྣམས་ནི། །ཆོས་ལ་སྐྱབས་སུ་མཆི་བར་བགྱིད། །ཇི་ཞིག་གིས་ན་རང་དགར་འགྱུར། །ཅི་ཞིག་གིས་ནི་མི་
འགྱུར་ལགས། །དགེ་འདུན་ལ་ནི་སྐྱབས་མཆིས་ན། །སྐྱབས་གསུམ་མཆོག་ཏུ་ཇི་ལྟར་འགྱུར། །མ་འོངས་པ་ན་སངས་རྒྱས་ཉིད། །ཡང་དག་བདེན་པར་ཇི་ལྟར་འཐོབ། །ཕྱི་མའི་དོན་དུ་སྐྱབས་ཀྱི་གཞི། །གསུམ་པོ་དག་ཀྱང་ཇི་ལྟ་
བུ། །ཐེམ་སྐས་ལྟ་བུར་བདག་གིས་མཐོང་། །ཡེ་ཤེས་གུད་ན་གཞན་མ་མཆིས། །བུ་སྐྱེས་པ་ནི་མ་མཆིས་པར། །བུ་ཞེས་ཀྱང་ནི་ཇི་སྐད་བགྱི། །བུ་ཆགས་ན་ནི་སྐྱེ་འགྱུར་ཏེ། །བསམ་དང་ལས་ཀྱི་དོན་ཀྱང་མཆིས། །ཐུབ་
པ་ཁྱོད་ནི་ཅི་གསུང་བ། །བློ་མེད་རྣམས་ཀྱིས་མི་རྟོགས་ཏེ། །འཁོར་བའི་བཙོན་རར་ཐམས་ཅད་ཀྱང་། །འཁོར་ལོ་གཅིག་ཏུ་འཁྱམ་པར་འགྱུར། །དེ་ཕྱིར་དེ་དག་མིང་ཙམ་གྱིས། །དགེ་བསྙེན་དུ་ཡང་མི་འགྱུར་ལགས། །ཐུབ་པ་
བདག་ལ་ཕྱེ་སྟེ་གསུངས། །ཐེ་ཙོམ་མྱུར་དུ་གཅད་པར་གསོལ། །ཡེ་ཤེས་ཆེ་ལྡན་དེ་བཞིན་གཤེགས། །དགོངས་པ་ཅི་འདྲ་བསྟན་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །བྱང་ཆུབ་སེམས་དཔའ་སེམས་དཔའ་ཆེ། །འོད་སྲུང་ཆེན་པོ་དམ་པ་མཆོག །དགོངས་
པ་དེ་ཡང་བསྟན་པར་བྱ། །ཁྱོད་ཀྱི་ཐེ་ཙོམ་གཅད་པར་བྱ། །སངས་རྒྱས་ལ་ནི་སྐྱབས་སོང་བས། །དགེ་བསྙེན་ཉིད་ནི་ཐོབ་པར་འགྱུར། །ལྷ་རྣམས་དེ་དག་ཐམས་ཅད་ནི། །དེ་ཚེ་དེ་ཡི་སྐྱབས་མ་ཡིན། །ཆོས་ལ་སྐྱབས་སུ་སོང་

49-1-103a

ན་ཡང་། །འདིར་ནི་འཚེ་བ་སྤོང་བར་འགྱུར། །དགེ་འདུན་ལ་ཡང་སྐྱབས་སོང་ན། །དེ་བཞིན་དགེ་བསྙེན་དག་ཏུ་འགྱུར། །དེས་ན་འདི་ལས་ཕྱི་རོལ་རྣམས། །དེ་ཡི་ཡོན་གནས་མ་ཡིན་ལ། །དེ་ལྟར་འཇིགས་པ་མེད་
པ་རྣམས། །སྐྱབས་ཀྱི་གཞི་གསུམ་ཐོབ་པར་འགྱུར། །གསོལ་པ། དེ་ཕྱིར་དངོས་གསུམ་འཇིག་པ་ལ། །བདག་ནི་སྐྱབས་སུ་མཆི་བར་བགྱི། །འདི་ནི་དམ་པ་རྣམས་ཀྱི་ལམ། །འདི་ཉིད་སངས་རྒྱས་ཆོས་ཉིད་ལགས། །ཐུབ་པ་ཆེན་པོ་
རྟག་ཏུ་ཡང་། །གཞི་གསུམ་པོ་ནི་མཉམ་པ་ཉིད། །བདག་ཀྱང་ཁྱོད་དང་འདྲ་བར་ནི། །གནས་འདིར་བླ་ན་མེད་པ་ལགས། །ལམ་འདི་བདེ་བར་གཤེགས་པས་བསྔགས་པ་སྟེ། །དེར་མཆིས་པ་ནི་ཡང་དག་བཞུགས་པ་ལགས། །ཀུན་ཏུ་སྤྱན་
ཡང་དེ་ཡིས་ངེས་པར་འབྱུང་། །ལམ་འདི་བདེ་བར་གཤེགས་པས་བསྔགས་པ་སྟེ། །དེ་ཕྱིར་བདག་ཀྱང་སངས་རྒྱས་རྣམས་ཀྱི་ལམ། །ལམ་མཆོག་རྒྱ་ཆེན་འདིར་ནི་མཆིས་པར་བགྱི། །གལ་ཏེ་བདུད་ནི་བདུད་རྩི་དེང་སྩོལ་ཀྱང་། །
སྲིད་པ་དག་ན་བདག་ནི་སྐྱབས་མི་མཆི། །དེ་ནས་བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་པ། ཁྱོད་བྱིས་པ་ཉན་ཐོས་ཀྱི་ཐེག་པ་པ་བཞིན་དུ་མ་འཛིན་ཅིག །གཅིག་པུ་ལ་སྐྱབས་སུ་སོང་ཤིག །ཡེ་ཤེས་འདི་ལ་ནི་སྐྱབས་གསུམ་
མེད་དེ་ཆོས་དང་དགེ་འདུན་འདུ་བ་ཡང་མེད་དོ། །སངས་རྒྱས་ཉིད་ཆོས་ཀྱང་ཡིན་དགེ་འདུན་ཡང་ཡིན་ཏེ་དེ་བཞིན་གཤེགས་པ་ཉིད་གཞི་གསུམ་པ་ཡིན་ནོ། །ཉན་ཐོས་ཀྱི་ཐེག་པ་ལས་ནི་བྱིས་པ་རྣམས་ཀྱི་འཇིག་རྟེན་པའི་ལྟ་བ་གསལ་བའི་ཕྱིར་གཞི་
གསུམ་པ་གཞག་གོ། །གལ་ཏེ་ཁྱོད་འཇིག་རྟེན་པ་དང་འཐུན་པར་བྱེད་ན་དེའི་ཚུལ་གྱིས་སྐྱབས་ཀྱི་གཞི་གསུམ་དུ་འགྲོ་བར་གྱིས་ལ་བདག་སངས་རྒྱས་ལ་སྐྱབས་སུ་སོང་ནས་སྐུ་གཅིག་པར་གྱུར་ཅིག །དེ་ནས་སངས་རྒྱས་ཉིད་དུ་གྱུར་ནས་དེ་བཞིན་
གཤེགས་པའི་རླབས་བྱེད་པར་གྱུར་ཅིག །དེ་བཞིན་གཤེགས་པ་དང་མཉམ་པར་གྱུར་ནས་སངས་རྒྱས་རྣམས་ལ་ཐལ་མོ་བཏུད་པར་མི་བྱའོ། །བདག་སེམས་ཅན་ཐམས་ཅད་ཀྱི་སྐྱབས་ཆེན་པོ་ལྟ་བུར་གྱུར་ཅིག །བདག་གིས་ཆོས་ཀྱི་སྐུ་ཡང་མི་བཏང་

49-1-103b

བར་སངས་རྒྱས་ཀྱི་ཁམས་དང་མཆོད་རྟེན་ལ་ཕྱག་བྱའོ། །ཕྱག་བྱེད་མི་འདོད་པའི་སེམས་ཅན་ཐམས་ཅད་ཀྱི་མཆོད་རྟེན་ལྟ་བུར་བདག་གྱུར་ཅིག །བདག་གི་ལུས་སེམས་ཅན་ཐམས་ཅད་ཀྱིས་ཕྱག་བྱ་བའི་གནས་སུ་གྱུར་ཅིག །བདག་ཆོས་ལ་
སྐྱབས་སུ་སོང་ནས་ཆོས་ཀྱི་སྐུར་གྱུར་ཅིག །དེ་ཁོ་ན་ཉིད་མ་ཡིན་པའི་ཆོས་སྒོམ་པའི་སེམས་ཅན་ཐམས་ཅད་བདག་གིས་མདའ་གཅིག་ནས་གཅིག་ཏུ་བརྒྱུད་པ་བཞིན་དུ་བྱེད་པར་གྱུར་ཅིག །བདག་དགེ་འདུན་ལ་སྐྱབས་སུ་སོང་ནས་སྦྲང་བུ་དང་འདྲ་
བའི་དགེ་འདུན་རྣམས་ཀྱི་སྐྱབས་ལྟ་བུར་གྱུར་ཅིག །བདག་སྐྱབས་སུ་འགྲོ་བ་ལ་འཇུག་པའི་ཚུལ་གྱིས་སེམས་ཅན་རྣམས་ཀྱི་སངས་རྒྱས་དང་། ཆོས་དང་། དགེ་འདུན་ལྟ་བུར་གྱུར་ཅིག །བདག་དམུས་ལོང་དང་འདྲ་བའི་དགེ་འདུན་རྣམས་ཀྱི་མིག་
ལྟ་བུར་གྱུར་ཅིག །བདག་ལ་ཉན་ཐོས་དང་རང་སངས་རྒྱས་སྦྲང་བུ་དང་འདྲ་བ་ཐམས་ཅད་སྐྱབས་སུ་འོང་བར་ཤོག་ཤིག་ཅེས་གྱིས་ཤིག །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་བྱིས་པ་རྣམས་ལ་སྡིག་པའི་
ཕུང་པོ་ཟད་མི་ཤེས་པ་ལྟ་བུ་ཡང་ཡིན་ནོ། །མཁས་པ་རྣམས་ནི་དེ་དག་ཉིད་སངས་རྒྱས་ལྟ་བུ་ཡང་ཡིན་ནོ། །དཔེར་ན་དཔའ་བོ་ཡང་དག་པ་ནི་གཡུལ་དུ་འཐབ་པ་ན་འདི་སྙམ་དུ་སེམས་ཏེ། བདག་གིས་དཔའ་བོ་ཐམས་ཅད་ཕམ་པར་བྱས་ནས་ཐམས་
ཅད་བདག་ལ་སྐྱབས་སུ་འོང་བར་བྱའོ་སྙམ་དུ་སེམས་པ་དང་། དཔེར་ན་རྒྱལ་པོའི་བུ་ནི་རྒྱལ་པོ་བརྗེ་བའི་སྐབས་སུ་རྒྱལ་པོའི་བུ་ཐམས་ཅད་ལས་འདས་པར་བྱས་ཏེ་བདག་གིས་རྒྱལ་པོ་བྱའོ། །བདག་རྒྱལ་པོའི་བུ་ཐམས་ཅད་ཀྱི་མངའ་བདག་ཏུ་འགྱུར་བར་བྱའོ། །
བདག་ལ་དེ་དག་སྐྱབས་སུ་འོང་བར་བྱའོ། །བདག་གིས་དམན་པའི་སེམས་བསྐྱེད་པར་མི་བྱའོ་སྙམ་དུ་སེམས་པ་ལྟ་བུ་སྟེ། དཔའ་བོ་རྣམས་དང་། རྒྱལ་པོ་དང་། བློན་པོ་ཡང་རུང་སྟེ། ཤིན་ཏུ་མཆོག་ཏུ་གྱུར་པས་ཁྱད་པར་དུ་འཕགས་པ་དེ་ལྟ་བུའི་
རང་བཞིན་ཅན་རྣམས་ནི་རང་གི་ཡོན་ཏན་དང་འཚམ་པའི་བྱ་བ་སྒྲུབ་པར་བྱེད་དོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་གཞི་གསུམ་ལས་འདའ་བར་འགྱུར་བའི་སེམས་དང་ལྡན་པ་ཡིན་ནོ། །དེ་བས་ན་རྒྱལ་

49-1-104a

པོའི་བུ་དང་དཔའ་བོ་བཞིན་དུ་མི་འཇིགས་པར་སྙིང་སྟོབས་སྐྱེད་ཅིག་དང་ངས་གཞི་གསུམ་ཐ་དད་པ་མེད་པ་དང་། གསུམ་གྱི་ནང་ན་དེ་བཞིན་གཤེགས་པ་དམ་པ་ཡིན་པར་ངས་བསྟན་ཏོ། །ལུས་ཐམས་ཅད་ཀྱི་
ནང་ན་མགོ་བོ་གཙོ་བོ་ཡིན་པ་དེ་བཞིན་དུ་སངས་རྒྱས་ཉིད་གཙོ་བོ་ཡིན་ལ་ཇི་ལྟར་ལུས་ལས་མགོ་བོ་གུད་ན་འདུག་པ་ཡང་མ་ཡིན། ལག་པ་གུད་ན་འདུག་པའང་མ་ཡིན། རྐང་པ་གུད་ན་འདུག་པའང་མ་ཡིན་པ་དེ་བཞིན་དུ་སངས་རྒྱས་གུད་ན་འདུག་པའང་
མ་ཡིན། ཆོས་གུད་ན་འདུག་པའང་མ་ཡིན། དགེ་འདུན་གུད་ན་འདུག་པའང་མ་ཡིན་ནོ། །འོན་ཀྱང་ཐ་དད་དུ་དབྱེ་བ་ནི་བྱིས་པ་རྣམས་ངེས་པར་བསྒྲལ་བའི་ཕྱིར་ཐེམ་སྐས་དང་འདྲ་བར་བསྟན་པ་ཡིན་ནོ། །ཆོས་ཀྱི་དེ་ཁོ་ན་ཉིད་དུ་ནི་གསུམ་
པོ་ལ་ཐ་དད་དུ་དབྱེ་བར་མ་ལྟ་ཤིག །བྱིས་པ་བཞིན་དུ་རྨོངས་པར་བྱེད་པའི་ཚིག་རྣམས་མ་འཛིན་ཅིག་ཨུར་མོའི་རལ་གྲི་བཞིན་དུ་སེམས་རྣོ་བར་གྱིས་ཤིག །ཡེ་ཤེས་ཆེན་པོ་དང་ལྡན་པར་གྱིས་ཤིག །དེ་ནས་བཅོམ་ལྡན་འདས་ལ་བྱང་ཆུབ་སེམས་
དཔའ་སེམས་དཔའ་ཆེན་པོ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །དཔའ་བོ་ཆེན་པོ་བཅོམ་ལྡན་འདས་གློ་བར་ཆུད་བཞིན་དུ་བྱང་ཆུབ་སེམས་དཔའི་སྤྱོད་པ་དྲི་མ་མེད་པ་བཤད་པར་གསོལ་བའི་སླད་དུ་བདག་གིས་ཞུས་
ལགས་སོ། །བཅོམ་ལྡན་འདས་ཀྱེ་མ་བྱང་ཆུབ་སེམས་དཔའི་སྤྱོད་པ་ཐེག་པ་ཆེན་པོ་བླ་ན་མེད་པ་ཤིན་ཏུ་རྒྱས་པ་ཨུར་མོའི་རལ་གྲི་ལྟ་བུ་ལེགས་པར་བཀའ་སྩལ་ཏོ། །ཀྱེ་མ་ལེགས་པར་བཞག་གོ། །བྱང་ཆུབ་སེམས་དཔའི་སྤྱོད་པ་བཤད་པ་ཐོས་
ནས་བདག་གིས་ཀྱང་སེམས་ཅན་ཐམས་ཅད་ལ་བསྟན་པར་འཚལ་ལོ། །སེམས་ཅན་སུ་ཡང་རུང་སྟེ་དེ་བཞིན་གཤེགས་པའི་སྙིང་པོ་རྟོགས་པར་བགྱི་བའི་སླད་དུ་མདོ་འདི་ལ་མངོན་པར་དད་པ་རྣམས་ནི་རང་ཉིད་སྐྱབས་གསུམ་ལགས་ཏེ། དེས་ནི་
བདག་ཉིད་ལ་སྐྱབས་སུ་མཆི་བར་བགྱིའི། གཞི་གསུམ་ལ་ནི་མི་དགོས་ལགས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པའི་སྙིང་པོ་སངས་རྒྱས་ཀྱི་ཁམས་མཆིས་པའི་སླད་དུའོ། །རྣམ་པར་བརྟགས་ནས་བདག་གི་ལུས་ལ་སངས་རྒྱས་ཀྱི་

49-1-104b

ཁམས་མཆིས་སོ་ཞེས་བརྗོད་པར་བགྱིའོ། །དེ་ལྟར་འཚལ་ནས་དེས་སྐྱབས་གསུམ་དུ་ཡང་མཆི་བར་མི་བགྱི་སྟེ། དེ་ཉིད་ཆོས་དང་དགེ་འདུན་གྱི་སྐྱབས་སུ་གྱུར་པ་དང་། ཉན་ཐོས་དང་རང་སངས་རྒྱས་རྣམས་ཀྱིས་རྟག་ཏུ་ཕྱག་བགྱི་བའི་གནས་
ལགས་སོ། །དེ་བས་ན་ཐེག་པ་ཆེན་པོ་བསྒྲུབ་པ་བརྩམ་པར་བགྱིའོ། །དེ་ལྟར་ན་སངས་རྒྱས་ཀྱི་ཁམས་དང་། མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུ་ནི་བསམ་གྱིས་མི་ཁྱབ་ལགས་སོ། །བཅོམ་ལྡན་འདས་ཀྱིས་བཀའ་
སྩལ་པ། རིགས་ཀྱི་བུ་ལེགས་སོ་ལེགས་སོ། །ཤེས་རབ་རྣོན་པོས་ནི་དེ་ལྟར་བྱ་དགོས་སོ། །རིགས་ཀྱི་བུ་གཞན་ཡང་དེ་བཞིན་གཤེགས་པའི་སྙིང་པོ་ལ་འཇུག་པ་ངས་བཤད་པར་བྱའོ། །གལ་ཏེ་བདག་བརྟན་པ་དང་ཐེར་ཟུག་པ་ཡིན་ན་ནི་སྡུག་
བསྔལ་གྱི་མཐའ་ཡོད་པར་མི་འགྱུར་ལ། གལ་ཏེ་བདག་མེད་ན་ཡང་ཚངས་པར་སྤྱོད་པ་ཐམས་ཅད་དོན་མེད་པར་འགྱུར་རོ། །ཆོས་ཐམས་ཅད་བདག་མེད་པ་ཡིན་ན་ནི་དེ་ལྟར་ན་ཆད་པར་ལྟ་བར་འགྱུར་ལ། བདག་བརྟན་པ་ཡིན་ན་ནི་རྟག་པར་ལྟ་
བར་འགྱུར་རོ། །ཆོས་ཐམས་ཅད་མི་རྟག་པ་ཡིན་ན་ནི་དེ་ལྟ་ན་ཆད་པར་ལྟ་བར་འགྱུར་ལ། ཆོས་ཐམས་ཅད་རྟག་པ་ཡིན་ན་ནི་རྟག་པར་ལྟ་བར་འགྱུར་རོ། །ཆོས་ཐམས་ཅད་སྡུག་བསྔལ་བ་ཉིད་ཡིན་ན་ནི་ཆད་པར་ལྟ་བར་འགྱུར་ལ། ཆོས་ཐམས་ཅད་
བདེ་བ་ཡིན་ན་ནི་རྟག་པར་ལྟ་བར་འགྱུར་རོ། །ཐམས་ཅད་རྟག་པར་སྒོམ་ན་ནི་ཆད་པར་འཛིན་པར་འགྱུར་ལ། ཐམས་ཅད་ཆད་པར་སྒོམ་ན་ནི་མྱུར་དུ་རྟག་པར་འཛིན་པར་འགྱུར་རོ། །དཔེར་ན་སྲིན་བུ་པད་པ་རྣམས་མིའི་མགོ་བོ་ལ་མྱུར་དུ་ཟ་ཞིང་
མྱུར་དུ་གནས་གཅིག་ཤོས་འདོར་བ་དེ་བཞིན་དུ་རྟག་པར་སྒོམ་ན་ནི་ཐམས་ཅད་འཛིན་པས་སྲིན་བུ་པད་པ་བཞིན་དུ་འགྱུར་རོ། །དེ་བས་ན་མི་དགེ་བའི་ཆོས་གཞན་དག་ལ་ནི་སྡུག་བསྔལ་བར་བསྒོམ་པར་བྱའོ། །དགེ་བའི་ཆོས་གཞན་དག་ལ་ནི་བདེ་བར་
བསྒོམ་པར་བྱའོ། །ཉོན་མོངས་པའི་རྣམ་པ་ལ་སོགས་པའི་ཆོས་གཞན་དག་ལ་ནི་བདག་མེད་པར་བསྒོམ་པར་བྱའོ། །མྱ་ངན་ལས་འདས་པ་ལ་ནི་གཞི་དང་གནས་མེད་པའི་ཕྱིར་དེ་བཞིན་གཤེགས་པའི་སྙིང་པོ་ལ་སོགས་པ་ཆོས་གཞན་དག་ལ་ནི་

49-1-105a

བདག་ཡོད་པར་བསྒོམ་པར་བྱའོ། །ལོངས་སྤྱོད་ལ་སོགས་པ་ཆོས་གཞན་དག་ལ་ནི་མི་རྟག་པར་བསྒོམ་པར་བྱའོ། །དེ་བཞིན་གཤེགས་པའི་ཆོས་ལ་སོགས་པ་ཆོས་གཞན་དག་ལ་ནི་རྟག་པར་བསྒོམ་པར་བྱའོ། །གཞི་
གསུམ་དང་ཐར་པའི་དེ་ཁོ་ན་ཉིད་ནི་སྲིན་བུ་པད་པ་ཟ་བ་ལྟ་བུ་མ་ཡིན་ནོ། །སངས་རྒྱས་ཀྱི་གསུང་ནི་དབུ་མའི་ལམ་འདི་ཡིན་ནོ་ཞེས་ཤེས་པར་གྱིས་ཤིག །སངས་རྒྱས་བཅོམ་ལྡན་འདས་ཀྱིས་ནི་ཆད་པ་དང་རྟག་པ་གཉི་གའི་མཐའ་སྤངས་པ་དབུ་མའི་
ལམ་དུ་གསུངས་སོ། །བླུན་པོ་རྣམས་ནི་སངས་རྒྱས་ཀྱི་གསུང་ལ་རྨོངས་ཏེ། ཕོ་བའི་དྲོད་ཆུང་བ་རྣམས་མར་ཆེར་ཟ་བ་བཞིན་དུ་མྱུར་དུ་མཐའ་གཉིས་སུ་ལྟ་བར་འགྱུར་ལ། ཡོད་ཅེས་བྱ་བ་ཡང་མ་གྲུབ། མེད་ཅེས་བྱ་བ་ཡང་མི་འཐད་དོ། །
དཔེར་ན་སྨན་པ་རྣམས་ནི་མཁྲིས་པ་ལ་སོགས་པའི་ཁམས་རྣམས་འཁྲུགས་ཏེ་ཕན་ཚུན་མི་མཐུན་དུ་ཟིན་ཀྱང་མཁྲིས་པའི་ནད་ལ་ནི་མཁྲིས་པ་ཞི་བར་བྱེད། རླུང་ཤས་ཆེ་བ་ལ་ནི་རླུང་སེལ་བར་བྱེད། བད་ཀན་ཅན་ལ་ནི་བད་ཀན་མེད་པར་བྱེད། ཆ་
འདུས་པ་ལ་ནི་ཆ་འདུས་པའི་གཉེན་པོ་བྱེད་དེ། ཕན་ཚུན་མི་མཐུན་པར་འགྱུར་བ་ཡང་མི་བྱེད་ལ་བདེ་བ་ཡང་སྐྱེད་པར་བྱེད་པ་དེ་བཞིན་དུ་སྨན་པ་ལྟར་ཉོན་མོངས་པའི་རྣམ་པའི་ནད་མཐའ་ཡས་པ་རྣམས་མཐར་ཀྱིས་བསལ་ཏེ། ཡང་དག་པའི་
ཁམས་ཀྱང་གསོ་བར་གྱིས་ཤིག །ཡང་དག་པའི་ཁམས་ཤེས་བྱ་བ་ནི་དེ་བཞིན་གཤེགས་པའི་སྙིང་པོ་སྟེ། སངས་རྒྱས་ཀྱི་ཁམས་ཤེས་བྱ་བ་ཡིན་གྱིས་ཁམས་ཐམས་ཅད་སྤངས་ཏེ་རྟག་པ་དང་བརྟན་པ་ལ་ནན་ཏན་གྱིས་ཤིག །ཤེས་རབ་
ཅན་རྣམས་ཀྱིས་ནི་ཡོད་པ་ལ་ཡང་ཆགས་པར་མི་བྱའོ། །མེད་ཅེས་བྱ་བ་ཡང་རྫུན་དུ་སྨྲ་བ་ལས་བྱུང་བ་ཡིན་ནོ། །ཡོད་ཅེས་བྱ་བ་ཡང་ཁ་རོག་སྟེ་ཁས་བླང་བར་མི་བྱའོ། །རྩོད་པར་ཡང་མི་བྱ་སྟེ། འདི་དག་རང་བཞིན་གྱིས་ཆོས་ཉིད་དུ་ཤེས་
པར་བྱའོ། །བླུན་པོ་དགོངས་པའི་ཚིག་མི་ཤེས་པ་རྣམས་ཀྱིས་ནི་ངའི་ལུས་ལ་བདེ་བའི་ས་བོན་དེ་ལྟ་བུ་ཡོད་བཞིན་དུ་སྡུག་བསྔལ་བར་བསྟན་པའི་ཕྱིར་རྟག་ཏུ་རྩོད་པར་བྱེད་དེ་ཐམས་ཅད་བཟུང་བས་བྱིས་པ་རྣམས་ངའི་ལུས་མི་བརྟན་ནོ་སྙམ་དུ་

49-1-105b

སེམས་ཤིང་རྟོག་པར་བྱེད་དོ། །མི་རྟག་པ་བསྟན་ན་ནི་བྱིས་པ་རྣམས་རྫ་མཁན་གྱི་སྣོད་བཞིན་དུ་མི་རྟག་གོ་སྙམ་དུ་འཛིན་ཏོ། །ཤེས་རབ་ཅན་རྣམས་ཀྱིས་ནི་ངའི་ལུས་ལ་ཆོས་ཀྱི་སྐུའི་ས་བོན་དེ་ལྟ་བུ་ཡོད་དོ་སྙམ་དུ་ཤེས་པས་ཐམས་ཅད་འཛིན་པར་མི་
བྱེད་དོ། །བདག་མེད་པ་བསྟན་ན་ནི་བྱིས་པ་རྣམས་བསྟན་པ་བདག་མེད་དོ་སྙམ་དུ་འཛིན་ཏོ། །ཤེས་རབ་ཅན་རྣམས་ཀྱིས་ནི་ཐ་སྙད་དུ་ཡོད་དོ་སྙམ་དུ་ཤེས་ཏེ་ཐེ་ཚོམ་མེད་དོ། །དེ་བཞིན་གཤེགས་པའི་སྙིང་པོ་ནི་སྟོང་པ་ཡིན་ནོ་ཞེས་བསྟན་ན་ནི་བྱིས་པ་རྣམས་ཆད་པ་
འཇིགས་སུ་རུང་བའི་ཡོན་པོ་སྒོམ་པར་བྱེད་དོ། །ཤེས་རབ་ཅན་རྣམས་ཀྱིས་ནི་རྟག་པ་དང་། བརྟན་པ་དང་། ཐེར་ཟུག་པ་དེ་སྒྱུ་མ་ཙམ་དུ་ཡོད་པར་ཤེས་སོ། །ཐར་པ་བསྟན་ན་ནི་བྱིས་པ་རྣམས་སངས་རྒྱས་རྣམས་ཀྱིས་ཐར་པ་རྙེད་ནས་མེད་པར་འགྱུར་རོ་
སྙམ་དུ་འཛིན་ཏོ། །ཤེས་རབ་ཅན་རྣམས་ཀྱིས་ནི་སངས་རྒྱས་བྱོན་པ་དང་གཤེགས་པ་ཡོད་པར་ཤེས་ཏེ་མིའི་སེང་གེ་བྱོན་ཏོ་ཞེས་ཟེར་རོ། །བྱིས་པ་རྣམས་ནི་མ་རིག་པའི་རྐྱེན་ཀྱིས་འདུ་བྱེད་རྣམས་ཤེས་བྱ་བ་ལ་གཉིས་སུ་འཛིན་ཏོ། །ཤེས་རབ་ཅན་
རྣམས་ཀྱིས་ནི་མ་རིག་པ་དང་རིག་པ་ཐ་དད་པ་གཉིས་སུ་མེད་པར་ཤེས་སོ། །བྱིས་པ་རྣམས་ནི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་ལ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི་འདུ་བྱེད་རྣམས་དང་། འདུ་བྱེད་པ་མེད་པ་
ཐ་དད་པ་མེད་པ་གཉིས་སུ་མེད་པར་ཤེས་སོ། །དེ་བཞིན་དུ་བྱིས་པ་རྣམས་དགེ་བ་དང་མི་དགེ་བ་ཐམས་ཅད་ལ་ཐ་དད་པ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི་གཉིས་སུ་མེད་པར་ཤེས་སོ་ཞེས་གསུངས་སོ། །བྱིས་པ་རྣམས་ནི་ཁ་ན་
མ་ཐོ་བ་དང་ཁ་ན་མ་ཐོ་བ་མེད་པ་ལ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི་དེ་བཞིན་དུ་གཉིས་སུ་མེད་པར་ཤེས་སོ་ཞེས་གསུངས་ཏེ་དེ་ནི་ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པ་རྣམས་ནི་ལམ་དང་ལམ་མ་ཡིན་པ་ཞེས་
བྱ་བ་ལ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི་གཉིས་སུ་མེད་པར་ཤེས་སོ་ཞེས་གསུངས་ཏེ་དེ་ནི་ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པ་རྣམས་ནི་ཆོས་ཐམས་ཅད་ནག་པོ་དང་དཀར་པོའོ་ཞེས་བྱ་བ་ལ་གཉིས་སུ་འཛིན་ཏོ། །

49-1-106a

ཤེས་རབ་ཅན་རྣམས་ཀྱིས་ནི་གཉིས་སུ་མེད་པར་ཤེས་སོ་ཞེས་གསུངས་ཏེ་དེ་ནི་ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པ་རྣམས་ནི་ཆོས་ཐམས་ཅད་སྡུག་བསྔལ་བ་དང་བདེ་བ་ཐ་དད་པ་གཉིས་སུ་སྒོམ་པར་བྱེད་
དོ། །ཤེས་རབ་ཅན་རྣམས་ནི་གཉིས་སུ་མེད་པར་སྒོམ་མོ་ཞེས་གསུངས་ཏེ་དེ་ནི་ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པའི་བློ་ཅན་རྣམས་ནི་དེ་བཞིན་གཤེགས་པའི་སྙིང་པོ་ལ་འདུས་བྱས་ཐམས་ཅད་མི་རྟག་པའོ་ཞེས་སྒོམ་པར་བྱེད་དོ། །
ཤེས་རབ་ཅན་རྣམས་ཀྱིས་ནི་གཉིས་སུ་མེད་པར་ཤེས་སོ་ཞེས་གསུངས་ཏེ་དེ་ནི་ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པ་རྣམས་ནི་སངས་རྒྱས་ཀྱིས་བདག་མེད་པར་གསུངས་པ་ལ་ཆོས་ཐམས་ཅད་བདག་མེད་པར་འཛིན་ཏོ། །ཤེས་
རབ་ཅན་རྣམས་ཀྱིས་ནི་བདག་ཡོད་པ་དང་བདག་མེད་པ་གཉིས་སུ་མེད་པར་ཤེས་ཏེ་དེ་ནི་ཤེས་རབ་ཅན་རྣམས་ཀྱི་རང་བཞིན་ཡིན་ནོ། །དེ་བཞིན་གཤེགས་པའི་སྙིང་པོ་དཔག་ཏུ་མེད་པ་སངས་རྒྱས་ཀྱིས་བསྔགས་པ་ནི་བསོད་ནམས་ཐམས་ཅད་
བསྡུས་པའི་མདོ་ལས་ངས་བསྟན་ཏེ་བདག་ཡོད་པ་དང་བདག་མེད་པ་གཉིས་སུ་མེད་པར་བཟུང་བར་བྱའོ། །རིགས་ཀྱི་བུ་བསོད་ནམས་ཐམས་ཅད་བསྡུས་པའི་མདོ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ཆེན་པོ་ལས་གཉིས་སུ་མེད་པ་ལ་
འཇུག་པའི་སྣང་བ་དེ་ཉིད་ལས་བདག་ཡོད་པ་དང་བདག་མེད་པ་གཉིས་སུ་མེད་པར་ངས་བསྟན་པ་དེ་རྗེས་སུ་དྲན་པར་གྱིས་ཤིག །   །། བམ་པོ་བཅུ་པ། དཔེར་ན་འོ་མ་ལས་ཞོ་བྱུང་། ཞོ་ལས་མར་བྱུང་། མར་ལས་ཞུན་མར་བྱུང་། 
ཞུན་མར་ལས་མར་གྱི་སྙིང་ཁུ་འབྱུང་ན། དེ་ལ་ཅི་ཞོ་དེ་འོ་མའི་དངོས་པོ་དང་མགོ་མཉམ་དུ་བྱུང་ངམ། འོན་ཏེ་ཞོ་རང་ཉིད་བྱུང་ངམ། དེ་བཞིན་དུ་ཅི་མར་དེ་ཞོའི་དངོས་པོ་དང་། མགོ་མཉམ་དུ་བྱུང་ངམ། འོན་ཏེ་མར་རང་ཉིད་བྱུང་ངམ། དེ་བཞིན་དུ་ཅི་
ཞུན་མར་དེ་མར་གྱི་དངོས་པོ་དང་མགོ་མཉམ་དུ་བྱུང་ངམ། འོན་ཏེ་ཞུན་མར་རང་ཉིད་བྱུང་ངམ། དེ་བཞིན་དུ་ཅི་མར་གྱི་སྙིང་ཁུ་དེ་ཞུན་མར་གྱི་དངོས་པོ་དང་མགོ་མཉམ་དུ་བྱུང་ངམ། འོན་ཏེ་མར་གྱི་སྙིང་ཁུ་རང་ཉིད་བྱུང་ངམ། འོན་ཏེ་སྣུམ་དེ་གཞན་

49-1-106b

ཞིག་ནས་བྱུང་ངམ་གལ་ཏེ་གཞན་ཞིག་ལས་བྱུང་ནས་དེ་ལྟ་ན་གང་ལས་བྱུང་། དེ་སྟེ་འོ་མ་མེད་པར་ཞོ་བྱུང་ན་ནི་འོ་མ་མི་དགོས་པར་འགྱུར་རོ། །གལ་ཏེ་དེ་ལྟ་ན་ནི་རང་བཞིན་ཅན་དུ་འགྱུར་ལ་ཞོའི་རྒྱུ་དང་རྟགས་གཉིས་ཀྱང་སྣང་ངོ་། །དེ་བས་ན་གཅིག་
ནས་གཅིག་ཏུ་བརྒྱུད་དེ་བྱུང་བ་ཡང་ཡིན་ལ། དངོས་པོ་དེ་དག་དང་མགོ་མཉམ་དུ་གཅིག་ནས་གཅིག་ཏུ་བརྒྱུད་དེ་བྱུང་ཞེས་ཀྱང་མི་བྱའོ། །གལ་ཏེ་དངོས་པོ་དེ་དག་དང་མགོ་མཉམ་དུ་མ་བྱུང་ན་ཡང་དེ་ལྟ་ན་ཡེ་མེད་དམ། བ་ལས་བྱུང་བའི་ཞུན་
མར་ཡང་གཞན་ལས་བྱུང་བ་མ་ཡིན་ལ་རང་བཞིན་ཅན་དེ་ཡང་ཐམས་ཅད་ལ་ཡོད་མོད་ཀྱི། འོན་ཀྱང་ཉེས་པས་བསྒྲིབས་པ་དང་ཕན་ཚུན་དུ་འདྲེས་པའི་ཚུལ་དུ་འདུག་པའི་ཕྱིར་མི་མངོན་ཏེ། བའི་ཟས་ཀྱི་ཉེས་པས་འོ་མ་ཁྲག་གི་དྲི་ང་བ་བྲོ་
ལ་བས་རྩྭ་མངར་བ་ཟོས་ན་ནི་འོ་མ་ཡང་མངར་བ་འབྱུང་ངོ་། །རྩྭ་རོ་ཚ་བ་ཟོས་ན་ནི་འོ་མ་རོ་ཚ་བ་འབྱུང་ངོ་། །གངས་ཀྱི་རི་ལ་རྩའི་རིགས་སྣུམ་ཅན་ཞེས་བྱ་བ་ཞིག་ཡོད་དེ་བས་དེ་ཟོས་ན་ནི་འོ་མ་མར་གྱི་སྙིང་ཁུའི་རང་བཞིན་ཁོ་ནར་འབྱུང་སྟེ། 
དཀར་བ་ཡང་མ་ཡིན། སྔོ་བ་ཡང་མ་ཡིན། དམར་བ་ཡང་མ་ཡིན། སྔོ་སྐྱ་ཡང་མ་ཡིན་པ་མར་གྱི་སྙིང་ཁུའི་རང་བཞིན་ཁོ་ནར་འབྱུང་སྟེ། དེ་ལྟར་རྩྭའི་བྱེ་བྲག་གིས་འོ་མ་མདོག་ངན་པ་དང་། མདོག་བཟང་པོར་འགྱུར་བ་དེ་བཞིན་དུ་མ་
རིག་པ་དང་རིག་པ་གཉིས་སུ་མེད་མོད་ཀྱི་སེམས་ཅན་རྣམས་ཀྱི་ལས་ཀྱི་ཉེས་པས་རིག་པ་གང་ཡིན་པ་དེ་ཉིད་མ་རིག་པ་ལྟ་བུར་གྱུར་ཏེ་དགེ་བ་དང་མི་དགེ་བའི་ཆོས་ཐམས་ཅད་ཀྱང་གཉིས་སུ་མེད་པ་ཁོ་ནའོ། །དེ་བས་ན་སྔར་བསྟན་པ་ཁོ་ན་
བཞིན་དུ་དེ་བཞིན་གཤེགས་པའི་སྙིང་པོ་ནི་མར་གྱི་སྙིང་ཁུ་ལྟ་བུའི་རང་བཞིན་ཅན་ཡིན་མོད་ཀྱི་ཉོན་མོངས་པའི་རྣམ་པའི་ཉེས་པ་གཞན་དུ་སྣང་བར་གྱུར་ཏོ། །དཔེར་ན་རྒྱ་མཚོའི་ཆུ་ནི་ལན་ཚྭའི་དོན་གཅིག་པུ་བྱེད་པར་ཟད་མོད་ཀྱི། ལན་ཚྭའི་དོན་གཅིག་པུ་བྱེད་པའོ་
ཞེས་བརྗོད་པར་མི་བྱ་སྟེ་རྒྱ་མཚོའི་ནང་ན་འོ་མའི་རྒྱ་མཚོ་ཞེས་བྱ་བ་ཡང་ཡོད་དོ། །གངས་ཀྱི་རི་ལ་ཡང་སྨན་ཡོད་པའི་ཕྱིར་ཡོན་ཏན་ལས་སྨོས་ཏེ་གངས་ཀྱི་རི་ལ་ནི་དུག་ཀྱང་ཡོད་མོད་ཀྱི། འོན་ཀྱང་སྨན་གཙོ་བོར་སྨོས་པ་དེ་བཞིན་དུ་ལུས་འདི་ཡང་དེ་དང་

49-1-106c

འདྲ་སྟེ། སྦྲུལ་གདུག་པ་ལྟ་བུའི་ཁམས་བཞིའི་དུག་དང་ལྡན་མོད་ཀྱི། སྨན་གྱི་རྒྱལ་པོ་དེ་བཞིན་གཤེགས་པའི་སྙིང་པོ་དེ་ཡོད་པས་ན་དེ་བཞིན་གཤེགས་པའི་སྙིང་པོ་ཐོག་མ་ནས་བཅོས་མ་མ་ཡིན་པའི་ཁམས་ཡིན་ལ། 
ཉོན་མོངས་པ་རྣམས་ནི་གློ་བུར་དུ་བྱུང་བ་ཡིན་ཏེ། སངས་རྒྱས་སུ་འགྱུར་བར་འདོད་པ་སུ་ཡང་རུང་བ་རྣམས་ཀྱིས་ནི་ཉོན་མོངས་པའི་རྣམ་པ་རྣམས་གཞོམ་པར་བྱའོ། །དཔེར་ན་ནམ་མཁའ་ལས་འབྲུག་སྒྲ་གྲག་ན་ཤ་མོ་མྱུར་བར་རབ་ཏུ་སྐྱེ་བར་འགྱུར་ལ་
སོས་ཀ་ན་ནི་ཤ་མོའི་མིང་ཡང་མེད་དོ། །འབྲུག་སྒྲས་འཐོན་པར་འགྱུར་བ་དེ་བཞིན་དུ་དེ་བཞིན་གཤེགས་པའི་སྙིང་པོ་དེ་ཡང་ཉོན་མོངས་པའི་རྣམ་པས་བསྒྲིབས་པས་བདག་མེད་པ་བཞིན་དུ་སྣང་ལ། མདོ་ཆེན་པོ་འདི་ཐོས་པ་གང་ཡིན་པ་དེ་དག་ཡོངས་
སུ་མྱ་ངན་ལས་འདས་པ་ཆེན་པོ་འདི་ཐོས་མ་ཐག་ཏུ་ཤ་མོ་བཞིན་དུ་དེ་བཞིན་གཤེགས་པའི་སྙིང་པོའི་ཤེས་པ་སྐྱེ་བར་འགྱུར་རོ། །མདོ་སྡེ་ཐམས་ཅད་དང་ཏིང་ངེ་འཛིན་ཐམས་ཅད་ནི་སོས་ཀའི་དུས་དང་འདྲ་སྟེ། མདོ་སྡེ་ཐམས་ཅད་དང་ཏིང་ངེ་འཛིན་
ཐམས་ཅད་ཐོས་པས་ནི་དེ་བཞིན་གཤེགས་པའི་སྙིང་པོ་ཡོད་པར་ཡང་དག་པར་མི་ཤེས་སོ། །དབྱར་གྱི་ནམ་ལ་ཤ་མོ་སྐྱེ་བ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ལས་དགོངས་པའི་ཚིག་གསང་བ་ཐམས་ཅད་འབྱུང་སྟེ། མདོ་
སྡེ་འདི་ཐོས་མ་ཐག་ཏུ་དབྱར་གྱི་ནམ་ལ་ཤ་མོ་སྐྱེ་བ་བཞིན་དུ་སེམས་ཅན་ཐམས་ཅད་ཀྱིས་དེ་བཞིན་གཤེགས་པའི་སྙིང་པོ་ཡོད་པར་ཡང་དག་པར་ཤེས་པར་འགྱུར་རོ། །དེ་ལ་དོན་ཆེན་པོ་རྒྱས་པར་བྱེད་པས་ན་ཡོངས་སུ་མྱ་ངན་ལས་འདས་པ་ཆེན་པོ་
ཞེས་བྱ་སྟེ། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ལ་སློབ་པ་གང་ཡིན་པ་དེ་དག་ནི་ང་ལ་དྲིན་དུ་གཟོ་བ་ཡིན་ནོ། །གསོལ་པ། བཅོམ་ལྡན་འདས་ཀྱེ་མ་དེ་བཞིན་གཤེགས་པའི་སྙིང་པོ་ནི་ཉན་ཐོས་དང་རང་སངས་རྒྱས་
ཐམས་ཅད་ཀྱིས་མཐོང་བར་ཤིན་ཏུ་དཀའ་བ་དང་། རྗེས་སུ་ཤེས་པར་ཤིན་ཏུ་དཀའ་བ་དང་། བཟོད་པར་ཤིན་ཏུ་དཀའ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ནི་དེ་བཞིན་ནོ། །རིགས་ཀྱི་བུ་དེ་ནི་དེ་བཞིན་ཏེ། ང་

49-1-106d

ཡང་དེ་ཁོ་ན་སྐད་ཟེར་རོ། །གསོལ་པ། ཇི་ལྟར་མཐོང་བར་དཀའ་བ་ལགས། བཀའ་སྩལ་པ། རིགས་ཀྱི་བུ་དཔེར་ན་ལོང་བ་བརྒྱ་ཞིག་ཡོད་ལ། ལོང་བ་དེ་དག་མིག་མཐོང་བར་འདོད་པའི་ཕྱིར་སྨན་པ་ཆེན་པོ་མིག་མཁན་ཞིག་གཉེར་ནས་སྨན་པ་དེས་དེ་དག་གི་
མིག་དཔྱད་བྱས་ཏེ། དེ་དག་གི་མིག་པྲིས་ཡོག་པ་བསལ་ནས་རང་གི་སོར་མོ་གཅིག་བསྟན་ཏེ་དེ་རེ་རེ་ལ་འདི་སྐད་དུ། ཀྱེ་མི་ཁྱོད་ཀྱིས་ངའི་སོར་མོ་ལྟོས་ཤིག་དང་། ཁྱོད་ཀྱི་དཔྱད་ལེགས་སམ་མ་ལེགས་མངོན་ནོ་ཞེས་ཟེར་རོ། །དེ་ནས་དཔྱད་བྱས་སུ་
ཟིན་ཀྱང་དེའི་སོར་མོ་ཐབས་ཇི་ལྟར་བསྟན་ཀྱང་མི་དེ་དག་གིས་མ་མཐོང་ངོ་། །དེ་ནས་ལན་གཉིས་ལན་གསུམ་གྱི་བར་དུ་བསྟན་པ་དང་དེའུ་མ་མཐོང་སྟེ་མཐོང་བ་དེ་བཞིན་དུ། རིགས་ཀྱི་བུ་ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་
པོ་ཡོངས་སུ་སྦྱང་བའི་དཔྱད་ཐམས་ཅད་བྱས་པ་རྣམས་ཀྱང་དེ་དང་འདྲ་སྟེ། དེ་ལྟར་ཡོངས་སུ་སྦྱང་བ་བྱས་ཀྱང་མི་དེ་དག་དང་འདྲ་བར་བདག་ཉིད་ལ་དེ་བཞིན་གཤེགས་པའི་སྙིང་པོ་ཡོད་པར་ལན་གཉིས་ལན་གསུམ་གྱི་བར་དུ་ངས་བསྟན་པ་དང་
དེའུ་མ་མཐོང་སྟེ་མཐོང་ནས་འདི་སྐད་ཅེས་ཟེར་ཏེ། བདག་ཅག་ཀྱང་ཡུན་འདི་སྲིད་ཀྱི་བར་དུ་བདག་མེད་པའི་འཁོར་ལོ་གཅིག་པུས་ཡོངས་སུ་བསྐོར་ན་ཉན་ཐོས་དང་རང་སངས་རྒྱས་རྣམས་ཀྱིས་ལྟ་མཐོང་རེ་སྐན་ཞེས་ཟེར་ཏེ། རིགས་ཀྱི་བུ་
དེ་ལྟར་ན་ངའི་ཁམས་ཀྱི་བསྟན་བཅོས་ལ་འཇུག་པ་ནི་མཐོང་བར་དཀའ་བ་ཡིན་ནོ། །རིགས་ཀྱི་བུ་གཞན་ཡང་དཔེར་ན་མི་ལ་ལ་ཞིག་གིས་ནམ་མཁའ་ལ་ངང་པ་སྦྲེངས་ཤིང་ལྡིང་བ་དེས་དེ་ལྟར་མཐོང་ནས་ཐེ་ཙོམ་སྐྱེས་ཏེ། ཅི་འདི་ནམ་མཁའ་
ཡིན་ནམ། འོན་ཏེ་ངང་པ་ལྡིང་བ་ཡིན་ཞིག་གུ་སྙམ་ནས་དེས་ལེགས་པར་བརྟགས་ན་ངང་པ་ལྡིང་བ་ཡིན་པར་འོལ་ཕྱིར་མཐོང་བ་དེ་བཞིན་དུ་ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་བདག་ཅག་
གིས་རང་རང་ལ་དེ་བཞིན་གཤེགས་པའི་སྙིང་པོ་ཡོད་པར་འོལ་ཕྱིར་མཐོང་ངོ་སྙམ་དུ་སེམས་ན་ཉན་ཐོས་དང་རང་སངས་རྒྱས་ཐམས་ཅད་ཀྱིས་ལྟ་མཐོང་རེ་སྐན། དཔེར་ན་མི་ལ་ལ་ལམ་དུ་ཞུགས་པ་ལས་མཁྲིས་པ་འཁྲུགས་ཏེ་ཕྱོགས་བསླད་ནས་

49-1-107a

ལེགས་པར་བརྟགས་ན་ལམ་དང་གཟུགས་འོལ་ཕྱིར་མཐོང་བ་དེ་བཞིན་དུ་ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་ལེགས་པར་བརྟགས་ན་རང་གི་ལུས་ལ་དེ་བཞིན་གཤེགས་པའི་
སྙིང་པོ་བྱས་པ་མ་ཡིན་པའི་ཁམས་ཡོད་པར་འོལ་ཕྱིར་མཐོང་བར་ཟད་དོ། །དཔེར་ན་འདྲོན་པོ་ལ་ལ་ཞིག་སྐོམ་གྱིས་གདུངས་ནས་དབྱེ་དགོན་པ་ན་ཆུ་མི་རྙེད་དེ། ཆུ་འདོད་ཅིང་འདུག་པ་ལས་ཤིང་ཀ་ན་བྱ་གར་འཁོད་པ་དག་མཐོང་ནས་ཅི་འདི་ཁང་
བཟངས་ཤིག་ཡིན་ནམ། འོན་ཏེ་ནམ་མཁའ་ཡིན་སྙམ་པ་ལས་ལེགས་པར་བརྟགས་ན་བྱ་གར་ཡིན་པར་འོལ་ཕྱིར་མཐོང་བ་དེ་བཞིན་དུ། རིགས་ཀྱི་བུ་ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་རང་
གི་ལུས་ལ་དེ་བཞིན་གཤེགས་པའི་སྙིང་པོ་ཡོད་བཞིན་དུ་ཡོད་པར་འོལ་ཕྱིར་མཐོང་བར་ཟད་དོ། །རིགས་ཀྱི་བུ་དཔེར་ན་རྒྱ་མཚོའི་གྲུར་ཞུགས་པའི་མིས་དཔག་ཚད་མང་པོ་ཞིག་གི་ཕ་རོལ་ནས་གྲོང་ཁྱེར་གྱི་ནང་ན་ཁང་བཟངས་དཀར་པོ་ཞིག་
མཐོང་ནས་འདི་སྙམ་དུ་རྟོག་སྟེ། ཅི་འདི་ནམ་མཁའ་ཡིན་ནམ། ཁང་བཟངས་ཡིན་ཞི་གུ་སྙམ་པ་ལས་ལེགས་པར་བརྟགས་ན་འོལ་ཕྱིར་མཐོང་བ་དེ་བཞིན་དུ་ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་
རང་གི་ལུས་ལ་སངས་རྒྱས་ཀྱི་ཁམས་ཡོད་བཞིན་དུ་ཡོད་པར་འོལ་ཕྱིར་མཐོང་བར་ཟད་དོ། །རིགས་ཀྱི་བུ་དཔེར་ན་རྒྱལ་པོའི་བུ་གཞོན་ནུ་སྐྱིད་དེ་བར་འདུག་པ་ཞིག་མཚན་ཡལ་ནངས་སུ་རོལ་མོ་ལ་ལྟད་མོ་ལྟ་ལྟ་བ་ལས་ལངས་ཏེ་ཉི་མའི་
འོད་ཀྱིས་མིག་འཁྲུགས་པར་གྱུར་པས་ལེགས་པར་བརྟགས་ན་རང་གི་སྐ་རགས་འོལ་ཕྱིར་ཙམ་མཐོང་བ་དེ་བཞིན་དུ། ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་རང་གི་ལུས་ལ་སངས་རྒྱས་ཀྱི་ཁམས་
ཡོད་པར་འོལ་ཕྱིར་མཐོང་བར་ཟད་དོ། །དཔེར་ན་རྒྱལ་པོའི་ཞམ་རིང་ལ་ལ་ཞིག་མཚན་མོ་མུན་ནག་སྤྲིན་སྟུག་པོས་འཁྲིགས་པའི་ནང་ན། རྒྱལ་པོའི་ཕོ་བྲང་ནས་བྱུང་སྟེ་རང་གི་ཁྱིམ་དུ་འགྲོ་བ་ན། གློག་འགྱུ་བའི་སྐབས་སུ་གླང་ཁྱུ་བ་མདུན་

49-1-107b

ལོགས་ནས་འོང་བ་མཐོང་ནས་འདི་སྙམ་དུ་རྟོག་སྟེ། ཅི་སྤྲིན་ནམ། འོན་ཏེ་ཁྱིམ་མམ། སྒོ་ཁང་ངམ། ཡང་ཐོག་གཅིག་གམ་སྙམ་པ་ལས་ལེགས་པར་བརྟགས་ན་འོལ་ཕྱིར་མཐོང་བ་དེ་བཞིན་དུ་ས་བཅུ་ཐོབ་པའི་བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་ཀྱིས་ཀྱང་རང་གི་ལུས་ལ་སངས་རྒྱས་ཀྱི་ཁམས་ཡོད་བཞིན་དུ་བདག་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་དོ་སྙམ་དུ་འོལ་ཕྱིར་མཐོང་བར་ཟད་དོ། །དཔེར་ན་དགེ་སློང་ཚུལ་ཁྲིམས་སྲུང་བ་ལ་གུས་པ་
ལ་ལ་ཞིག་གིས་ཆུ་སྲོག་ཆགས་མེད་པ་ལ་རང་གི་བློས་སྲོག་ཆགས་ཡོད་པར་མཐོང་ནས་འདི་སྙམ་དུ་རྟོག་སྟེ། ཅི་སྲོག་ཆགས་ཡིན་ནམ། འོན་ཏེ་རྡུལ་ཡིན་ནམ། ཡང་ན་གློ་བུར་དུ་འོངས་པའི་རྡུལ་ལམ། སྲོག་ཆགས་ཞིག་གམ་
སྙམ་པ་ལས་ལེགས་པར་བརྟགས་ན་འོལ་ཕྱིར་མཐོང་བ་དེ་བཞིན་དུ། ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་རང་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་བཞིན་དུ་ཡོད་པར་འོལ་ཕྱིར་
མཐོང་བར་ཟད་དོ། །དཔེར་ན་མི་ལ་ལ་སྔ་དྲོ་ལྷོ་བུར་འཁྲིགས་པ་ན་ཕན་ཚུན་དུ་འགྲོ་བ་ལས་བྱིས་པ་དག་མཐོང་ནས་འདི་སྙམ་དུ་རྟོག་སྟེ། ཅི་བ་ལང་ངམ། མ་ཧེ་འམ། འོན་ཏེ་བྱ་རྒོད་དམ་སྙམ་པ་ལས། དེའི་འོག་ཏུ་བྱིས་པ་ཡིན་པར་
འོལ་ཕྱིར་མཐོང་བ་དེ་བཞིན་དུ། ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་རང་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་བཞིན་དུ་ཡོད་པར་འོལ་ཕྱིར་མཐོང་བར་ཟད་དོ། །དཔེར་ན་བྱང་ཆུབ་སེམས་
དཔའི་གཟུགས་རས་ཆེན་པོ་ལ་བྲིས་པ་མཚན་མོ་མུན་པའི་ནང་དུ་བཀྲམ་པ་ལ་མི་མིག་ཡོད་པ་དག་གིས་བརྟགས་ན། ཅི་སངས་རྒྱས་ཀྱི་སྐུ་གཟུགས་ཤིག་ཡིན་ནམ། འོན་ཏེ་རས་དམར་པོ་ཞིག་གམ། འོན་ཏེ་དབང་ཕྱུག་ཆེན་
པོ་དང་། ཚངས་པའི་གཟུགས་ཤིག་གམ་སྙམ་པ་ལས། དེའི་འོག་ཏུ་བྱང་ཆུབ་སེམས་དཔའི་གཟུགས་ཡིན་པར་འོལ་ཕྱིར་མཐོང་བ་དེ་བཞིན་དུ་རིགས་ཀྱི་བུ་ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་

49-1-108a

རྣམས་ཀྱིས་ཀྱང་རང་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་བཞིན་དུ་ཡོད་པར་འོལ་ཕྱིར་མཐོང་བར་ཟད་དོ། །རིགས་ཀྱི་བུ་དེ་ལྟར་ན་དེ་བཞིན་གཤེགས་པའི་སྙིང་པོ་ནི་མཐོང་བར་ཤིན་ཏུ་དཀའ་སྟེ། དེ་བཞིན་གཤེགས་
པའི་ཡུལ་ཡིན་གྱི་ཉན་ཐོས་དང་། རང་སངས་རྒྱས་ཀྱི་ཡུལ་མ་ཡིན་ནོ། །རིགས་ཀྱི་བུ་དེ་ལྟར་ན་ངའི་བསྟན་པ་ནི་མཁས་པས་རིག་པར་བྱ་བ་ཡིན་ཏེ། འཇིག་རྟེན་ཐམས་ཅད་དང་མི་མཐུན་ནོ། །གསོལ་པ། གལ་ཏེ་དེ་ལྟ་ལགས་ན་ཤའི་
མིག་དང་ལྡན་པ་རྣམས་ཀྱིས་ཆ་ཕྲ་བ་ཇི་ལྟར་བལྟ་བར་བགྱི་བ་ལགས། བཀའ་སྩལ་པ། འདུ་ཤེས་མེད་འདུ་ཤེས་མེད་མིན་གྱི་ལྷ་རྣམས་ཀྱང་ཇི་ལྟར་བལྟ་བར་བྱ། འདི་ནི་སངས་རྒྱས་ཉིད་ཀྱི་ཡུལ་ཡིན་གྱི། ཉན་ཐོས་དང་། རང་སངས་
རྒྱས་ཐམས་ཅད་ཀྱི་ཡུལ་མ་ཡིན་ཏེ། དེ་དག་གིས་ནི་མདོ་འདི་རྗེས་སུ་འཐུན་པ་ལས་ཡིད་ཆེས་པར་བྱའོ། །དེ་ལྟར་བྱས་དང་དེ་དག་ཀྱང་ཡང་དག་པའི་ལྟ་བ་ཅན་དུ་འགྱུར་རོ། །རིགས་ཀྱི་བུ་དེ་ལྟར་ན་ཉན་ཐོས་དང་། རང་སངས་རྒྱས་ཐམས་
ཅད་ཀྱིས་ཀྱང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའི་ཚུལ་གྱིས་བདག་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་པར་ཡིད་ཆེས་པར་བྱ་སྟེ། མདོ་སྡེ་དང་རྗེས་སུ་འཐུན་པར་བརྩོན་པར་བྱའོ། །དེ་བཞིན་གཤེགས་པའི་
སྙིང་པོ་ནི་དེ་བཞིན་གཤེགས་པའི་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱི་ཡུལ་མ་ཡིན་ནོ། །གསོལ་པ་བཅོམ་ལྡན་འདས་འཇིག་རྟེན་པ་རྣམས་ལ་ཡང་སེམས་ཅན་གྱི་ཁམས་གང་ཟག་གཞག་པ་མཆིས་ལགས་སོ། །བཀའ་སྩལ་པ། 
རིགས་ཀྱི་བུ་དཔེར་ན་མི་གཉིས་ཞིག་མཛའ་སྟེ། གཅིག་ནི་རྒྱལ་པོའི་བུ། གཅིག་ནི་དབུལ་པོ་ཞིག་ཡིན་ལ། དེ་གཉིས་ཕན་ཚུན་བྱམས་པས་གཅིག་གི་ཁྱིམ་དུ་གཅིག་འགྲོ་ཞིང་རྩེ་བར་བྱེད་ལ། དེ་ནས་མི་དབུལ་པོ་དེས་རྒྱལ་པོའི་བུ་དེའི་རལ་གྲི་དེས་
པ་མདོག་བཟང་པོ་དེ་མཐོང་བ་ལས་རྒྱལ་པོའི་བུ་དེས་རལ་གྲི་དེ་ཁྱེར་ནས་ཡུལ་གཞན་དུ་སོང་ངོ་། །དེ་ནས་མི་དབུལ་པོ་དེ་མཚན་མོ་མགོན་མེད་པའི་རྟེན་ཁང་ཞིག་ཏུ་ཉལ་བ་ལས་བརྡོལ་ཏེ། རལ་གྲི་རལ་གྲི་ཞེས་ཟེར་ནས་དེའི་ཚིག་གྲོང་སྲུངས་

49-1-108b

རྣམས་ཀྱིས་ཐོས་ནས་རྒྱལ་པོ་ལ་གསོལ་ཏེ། རྒྱལ་པོ་དེས་མི་དེ་བཀུག་ནས་ཀྭའི་རལ་གྲི་ཅི་འདྲ་བ་ཞིག་ག་ལས་འོངས་ཞེས་སྨྲས་པ་དང་། དེས་སྐབས་དེའི་གཏམ་རྒྱལ་པོ་དེ་ལ་གསོལ་ནས། ལྷ་གལ་ཏེ་བདག་གིས་བརྐུས་པར་གྱུར་ན་བདག་གི་རྐང་
ལག་འདི་དག་བཅད་དུ་གསོལ་བདག་གིས་ནི་མཛའ་བོ་དང་ལྷན་ཅིག་རྩེ་བའི་ཚེ་མཐོང་བར་བས་ཏེ། རེག་ཀྱང་མ་རེག་ལགས་སོ་ཞེས་བྱས་སོ། །དེ་ནས་རྒྱལ་པོ་དེས་དེ་ལ་སྨྲས་པ། རལ་གྲི་དེའི་དབྱིབས་དང་མདོག་ཅི་འདྲ་བ་ཞིག་ཅེས་བྱས་ནས་
དེས་རྒྱལ་པོ་ལ་གསོལ་པ། ལྷ་རལ་གྲི་དེ་ནི་ར་རུ་འདྲ་བ་ཞིག་ལགས་སོ་ཞེས་བྱས་སོ། །དེ་ནས་རྒྱལ་པོ་དེས་མི་དེ་བཏང་སྟེ་མི་ཁྱོད་མ་འཇིགས་ཤིག་མ་འཇིགས་ཤིག །སྐྱེན་པར་གར་བདེ་བར་སོང་ཤིག །ཁྱོད་ཀྱིས་སྔོན་རལ་གྲི་དེ་རྒྱལ་པོའི་ཕོ་བྲང་
འདིར་མཐོང་ཡང་མ་མཐོང་སྟེ། རྒྱལ་པོའི་བུས་རང་གི་ཡུལ་དུ་ཚོང་འདུས་ནས་རྙེད་པ་ལྟ་ཞིག་སྟེ། དེ་ནི་རྒྱལ་པོས་ཀྱང་རྙེད་པར་དཀའོ་ཞེས་བྱས་སོ། །དེ་ནས་རྒྱལ་པོ་དེས་མདུན་ན་འདོན་དང་། བློན་པོ་རྣམས་ལ་རལ་གྲི་དེ་མཐོང་ངམ་ཞེས་བྱས་ནས་
ཤིའོ། །གཞན་ཡང་ཆེའོ་ཅོག་གིས་རལ་གྲི་བཙལ་ཀྱང་མ་རྙེད་དོ། །དེ་ནས་རྒྱལ་པོའི་བུ་གཞན་ཞིག་རྒྱལ་སར་བཅུག་ནས་དེས་རལ་གྲི་དེ་རྙེད་དོ། །གཞན་དག་ནི་མ་རྙེད་བཞིན་དུ་རྒྱལ་པོ་བྱེད་དེ། དེ་ལྟར་གཅིག་ནས་གཅིག་ཏུ་བརྒྱུད་པའི་རྒྱལ་པོ་དེ་དག་
གིས་ནི་རལ་གྲི་དེ་མ་མཐོང་སྟེ། རལ་གྲི་དེ་འདི་ལྟ་བུ་འདི་འདྲ་བ་ཞིག་གོ། །ལུག་རུ་འདྲ་བ་ཞིག་གོ། །ར་རུ་འདྲ་བ་ཞིག་གོ་སྙམ་དུ་རྟོག་པར་བྱེད་དོ། །ཁ་ཅིག་ནི་ཅི་དགའ་མགུར་རྟོག་པར་བྱེད་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་
ཡང་མཐའི་རྒྱལ་པོའི་བུ་དེ་འདྲ་བར་འཇིག་རྟེན་དུ་འབྱུང་སྟེ། བདག་གི་དེ་ཁོ་ན་ཉིད་བསྟན་ནས་འཆི་བར་བྱེད་དོ། །དེ་ནས་བློ་ཆུང་བ་གང་ཡིན་པ་དེ་དག་ནི་སེམས་ཅན་ཐམས་ཅད་ལ་བདག་འདི་ལྟ་བུ་འདྲ་བ་ཞིག་ཡོད་དོ་སྙམ་སྟེ། ལོག་པར་མཐོང་
ནས་ཤེས་རབ་མེད་པ་རྣམས་ལ་རྨི་ལམ་དུ་རྨིས་པ་བཞིན་དུ་སྟོན་པར་བྱེད་དོ། །འཇིག་རྟེན་པ་དེ་དག་གིས་ཀྱང་དེ་སྐད་དུ་ཐོས་ནས་རང་གི་ལུས་ལ་བདག་གི་ཁམས་ཡོད་དོ་སྙམ་དུ་རྟོག་པར་བྱེད་ལ། དེ་དག་གིས་བདག་དེའི་རང་བཞིན་ནི་མི་ཤེས་

49-1-109a

སོ། །དེ་ལྟར་བྱང་ཆུབ་སེམས་དཔའི་ཚིག་ཐོས་ནས་ལོག་པར་བཟུང་སྟེ། རལ་གྲི་ར་རུ་འདྲ་བར་རྟོག་པ་དེ་བཞིན་དུ་རྣམ་པ་མང་པོར་རྟོག་པར་བྱེད་དེ། འཇིག་རྟེན་པ་རྣམས་སྐྱེས་བུ་མཐེ་བོ་ཙམ་ཞེས་བྱ་བ་དང་། ལྡུམ་བུ་ཤ་མ་
ཀའི་འབྲས་བུ་ཙམ་དང་། འབྲས་ཀྱི་འབྲུ་ཙམ་ཞིག་སྙིང་ལ་གནས་ཏེ་འབར་རོ་ཞེས་ལོག་པར་རྟོག་པར་བྱེད་དེ། དེ་དག་གི་ལྟ་བ་དེ་ནི་ལོག་པར་ལྟ་བ་གཅིག་ནས་གཅིག་ཏུ་བརྒྱུད་དེ་འོངས་པ་ཡིན་ཏེ། དོན་དུ་འགྱུར་བ་དང་བདེ་བར་འགྱུར་བ་མ་ཡིན་
ནོ། །དེ་བས་ན་ངས་བདག་མེད་པར་བསྟན་ཏོ། །འོན་ཀྱང་ད་དུང་འཇིག་རྟེན་པ་རྣམས་བདག་ཡོད་དོ་སྙམ་དུ་ལོག་པར་རྟོག་པར་བྱེད་དོ། །རིགས་ཀྱི་བུ་དེ་བས་ན་ད་ཡང་ངའི་བསྟན་པ་ལས་རལ་གྲི་ཡང་དག་པ་དང་འདྲ་བར་བདག་ནི་འདི་ལྟ་བུ་ཞིག་
གོ་ཞེས་དེ་བཞིན་གཤེགས་པའི་སྙིང་པོ་ངས་བཤད་པར་བྱའོ། །ལེགས་པར་སྨྲས་པ་ཆོས་དང་འཚམ་པ་གང་ཡིན་པ་དེ་ནི་འཇིག་རྟེན་པ་རྣམས་ཀྱི་ཡིན་ན་ཡང་འཇིག་རྟེན་ལས་འདས་པ་ཡིན་པར་རིག་པར་བྱའོ། །འཇིག་རྟེན་པའི་ནང་ན་རྣམ་པ་
ཐམས་ཅད་དུ་ཆོས་ཀྱི་མཆོག་ནི་བྱང་ཆུབ་སེམས་དཔའ་སྤྲུལ་པ་ཡིན་པར་རིག་པར་བྱ་སྟེ། བསྟན་བཅོས་སམ། རིག་སྔགས་སམ། གསང་སྔགས་ཅི་ཡང་རུང་བ་དེ་དག་ཐམས་ཅད་ནི་རྫོགས་པའི་སངས་རྒྱས་ཀྱིས་གསུངས་པ་ཡིན་པར་ཤེས་
པར་གྱིས་ཤིག །གསོལ་པ། བཅོམ་ལྡན་འདས་ཀྱིས་ཡི་གེའི་ཕྱི་མོ་ཇི་ལྟར་བཀའ་སྩལ་ལགས། བཅོམ་ལྡན་འདས་ཀྱིས་བཀའ་སྩལ་པ། ཡི་གེའི་ཕྱི་མོ་ཐམས་ཅད་ནི་ཐོག་མར་ཡི་གེ་ཕྱེད་སྤྲུལ་ཏེ། ཕྱི་མོ་རྣམས་ལ་རིག་སྔགས་
དང་། གསང་སྔགས་དང་། ཆོས་ཀྱི་དེ་ཁོ་ན་ཉིད་དང་། ཕུང་པོ་ཐམས་ཅད་ཀྱི་གཟུངས་སུ་འགྱུར་རོ། །དེ་ཡང་དམ་པའི་ཆོས་ཀྱི་ཚུལ་ཡི་གེའི་ཕྱི་མོ་བསླབས་ན་ཆོས་དང་ཆོས་མ་ཡིན་པའི་བྱེ་བྲག་ཕྱེད་པར་འགྱུར་བའི་ཕྱིར་ངས་སྤྲུལ་པ་
ཡིན་གྱི། ཆོས་མ་ཡིན་པའི་ཕྱིར་ནི་མ་ཡིན་ནོ། །གསོལ་པ། ཡི་གེ་ཞེས་བགྱི་བའི་དོན་གང་ལགས། བཀའ་སྩལ་པ། སྒྲ་བཅུ་བཞི་ལ་ནི་ཡི་གེ་ཞེས་བྱ་སྟེ། གང་གི་ཕྱིར་ཡི་གེ་ཐམས་ཅད་ངེས་པ་ཡིན་པའི་ཕྱིར་ཏེ་མི་ཟད་པའི་དོན་ཏོ། །

49-1-109b

ཡི་གེའི་སྒྲ་བཅུ་བཞི་ཞེས་བྱ་བ་གང་གི་མི་ཕྱེད་པའི་དོན་གང་ཡིན་ཞེ་ན། མི་ཟག་པའི་དོན་ཏོ། །ཡི་གེ་ཞེས་བྱ་བ་ནི་དེ་བཞིན་གཤེགས་པའི་དོན་ཏོ། །དེ་བཞིན་གཤེགས་པ་ནི་རྡོ་རྗེའི་སྐུ་མི་ཕྱེད་པ་ཡིན་ཏེ། དེ་བཞིན་གཤེགས་པ་
ལ་སྒོ་དགུ་ནས་འཇིག་ཅེས་བྱ་བ་ཡང་མེད་ལ་སྒོ་དགུ་པོ་ཉིད་ཀྱང་མེད་དོ། །དེ་བས་ན་མི་ཟག་པའི་དོན་ནི་དེ་བཞིན་གཤེགས་པ་སྟེ། ངེས་པ་ཡིན་པའི་ཕྱིར་ཡི་གེ་ཞེས་བྱ་སྟེ་བྱས་པ་མ་ཡིན་པའི་དོན་ཏོ། །ཨ་ཞེས་བྱ་བ་ནི་བཀྲ་ཤིས་ཀྱི་དོན་ཏེ་གཞི་
གསུམ་ཞེས་བྱ་བའི་ཐ་ཚིག་གོ། །ཡང་ཨ་ཞེས་བྱ་བ་ནི་འཕགས་པ་རྣམས་ཀྱི་ཡེ་ཤེས་ཀྱི་ཚིག་བླ་དགས་སོ། །འཕགས་པ་གང་དག་ཡིན་ཞེ་ན། འཇིག་རྟེན་ན་ཕྱུག་པ་དང་། ཆགས་པ་མེད་པ་དང་། རུང་བ་ཐམས་ཅད་ཀྱིས་ཆོག་པར་
འཛིན་པ་གང་ཡིན་པ་རྣམས་དང་། སེམས་ཅན་ཐམས་ཅད་སྲིད་པའི་རྒྱ་མཚོ་ཐམས་ཅད་ལས་ངེས་པར་སྒྲོལ་བ་གང་ཡིན་པ་དེ་དག་ལ་ནི་འཕགས་པ་ཞེས་བྱའོ། །ཨ་ཞེས་བྱ་བ་ནི་ཆོས་ལུགས་སུ་སྟོན་པ་སྟེ། ཆོ་ག་དང་། སྤྱོད་ཡུལ་དང་
འདུལ་བ་དང་། འཇིག་རྟེན་དང་འཐུན་པར་འཇུག་པ་ཞེས་བྱ་བས་ན་དོན་ཐ་དད་པ་མ་ཡིན་ནོ། །ཡང་ཨ་ཞེས་བྱ་བས་དོན་ཅི་ཞིག་རྒྱས་པར་བྱེད་ཅེ་ན། འཕགས་པ་རྣམས་ལ་བརྟེན་ནས་སེམས་ཅན་ཐམས་ཅད་ཀྱིས་ཆོ་ག་དང་། སྤྱོད་
ཡུལ་དང་། ཕ་མ་དང་། སློབ་དཔོན་དང་། འདུལ་བ་དང་གཅེས་པ་ཡིན་པར་ཤེས་ཤིང་འདི་ནི་ཆོས་ཉིད་ཡིན་ནོ་སྙམ་དུ་ཤེས་པར་འགྱུར་བའོ། །འཕགས་པ་གང་ཡིན་པ་དེ་དག་ནི་རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་
ཞུགས་པ་རྣམས་ཏེ། དགེ་སློང་ཚུལ་ཁྲིམས་དང་ལྡན་པ་རྣམས་དང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་འཕགས་པ་ཞེས་བྱའོ། །ཡང་ཨ་ཞེས་བྱ་བ་ནི་ཁྲིམས་སུ་སྟོན་པ་སྟེ། ཁྲིམས་ཞེས་བྱ་བ་ནི་ཀྱེ་མི་ཁྱོད་ཚུར་
ཤོག །ཁྱོད་ཀྱིས་ཚུལ་མ་ཡིན་པ་བྱས་ཀྱིས་ཕྱིན་ཅད་དེ་ལྟར་མ་བྱེད་ཅིག་ཅེས་བྱ་བ་དེ་ལྟ་བུ་ཚུལ་མ་ཡིན་པ་རྣམས་དེའི་ཚེ་དྲན་པར་བྱེད་པའི་དོན་ཏོ། །ཨི་ཞེས་བྱ་བ་ནི་འདི་ཞེས་བྱ་བའི་དོན་ཏེ། བསྟན་པ་འདི་ནི་ཚངས་པར་སྤྱོད་པ་

49-1-110a

ཟླ་བ་ཉ་བ་བཞིན་དུ་དྲི་མ་མེད་ཅིང་རྣམ་པར་དག་པའོ། །བསྟན་པ་འདི་ནི་བཅོམ་ལྡན་འདས་ཀྱིའོ། །འདི་ནི་བྱོས་ཤིག །འདི་ནི་དོན་མེད་པའོ། །འདི་ནི་བདུད་ཀྱིས་སྨྲས་པའོ། །འདི་ནི་སངས་རྒྱས་ཀྱིས་གསུངས་པའོ་
སྙམ་དུ་ཉམས་སུ་མྱོང་བར་བྱ་བའི་དོན་ཏོ། །ཨི་ཞེས་བྱ་བ་ནི་དབང་ཕྱུག་སྟེ། ངའི་བསྟན་པ་ནི་དབང་ཕྱུག་དང་། དབང་ཕྱུག་ཆེན་པོ་དང་། ཚངས་པ་དང་། ཤིན་ཏུ་དཀོན་པའོ། །དབང་ཕྱུག་ནི་ཆོས་སྐྱོང་བ་སྟེ་ཆོས་སྐྱོང་བས་ན་རྒྱལ་པོའོ། །དེའི་ཕྱིར་
དེ་ལ་འཇིག་རྟེན་སྐྱོང་བ་ཞེས་བྱའོ། །ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ནི་སེམས་ཅན་གཞན་དག་གི་དོན་གྱི་ཕྱིར་དབང་ཕྱུག་རྣམས་ཀྱིས་ཞུས་སོ། །དབང་ཕྱུག་རྣམས་ཀྱིས་ཡོངས་སུ་བཟུང་ངོ་། །དབང་ཕྱུག་རྣམས་ཀྱིས་
བཤད་དོ། །དབང་ཕྱུག་རྣམས་ཀྱིས་དམ་པའི་ཆོས་མཆོག་ཏུ་འབར་བར་བྱེད་དོ། །དབང་ཕྱུག་རྣམས་ཀྱི་ཕྱིར་ངས་བསྟན་ཏེ། ངས་ཅི་བསྟན་ཅེ་ན། ཡོངས་སུ་མྱ་ངན་ལས་འདས་པ་ཆེན་པོའི་མདོ་བསྟན་ཏོ། །དེ་བས་ན་དབང་ཕྱུག་དང་ལྡན་པ་རྣམས་
ཀྱི་ཤིན་ཏུ་རྒྱས་པ་ཡིན་ཏེ། འདི་ལ་ཕྲག་དོག་བྱེད་པ་རྣམས་ནི་ཞིང་ལ་ཞིང་གི་ངོ་བསལ་བ་བཞིན་དུ་ཚར་གཅད་པར་བྱའོ། །དེ་ལ་སོགས་པའི་དོན་དུ་མ་རྒྱས་པར་བྱེད་པས་ན། དེའི་ཕྱིར་ངས་ཨི་ཞེས་བྱ་བ་བསྟན་ཏོ། །ཨུ་ཞེས་བྱ་བ་ནི་རྒྱུད་ཕྱི་མ་
སྟེ། མདོ་སྡེ་འདིས་མདོ་སྡེ་ཐམས་ཅད་ཀྱི་དོན་གྱི་ཕྱི་མའི་ཡང་ཕྱི་མ་བསྟན་ཏོ། །ངས་ཉན་ཐོས་དང་རང་སངས་རྒྱས་ཐམས་ཅད་ཀྱིས་སྔོན་མ་ཐོས་པའི་ཡི་གེ་གཅིག་པའམ་ཐིག་ལེ་གཅིག་བསྟན་ཏོ། །མདོ་སྡེ་ཆེན་པོ་འདི་ནི་མཆོག་དམ་པ་
ཡིན་ཏེ། དཔེར་ན་བྱང་གི་སྒྲ་མི་སྙན་གྱི་སེམས་ཅན་རྣམས་བསོད་ནམས་དང་ལྡན་པ་དེ་བཞིན་དུ་མདོ་སྡེ་ཆེན་པོ་འདི་ཉན་པ་གང་ཡིན་པ་དེ་དག་ནི་འཇིག་རྟེན་ལས་འདས་པ་སྟེ། དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་རིག་
པར་བྱའོ། །དེ་བས་ན་ཆེ་བ་ཞེས་བྱ་སྟེ་རྒྱུད་ཕྱི་མ་ཞེས་བྱ་བའི་དོན་ཏོ། །དེ་བས་ན་ཨུ་ཞེས་བྱ་བ་ནི་བའི་ནུ་སོར་ལྟ་བུའི་དོན་ཏེ། དཔེར་ན་བའི་འོ་མ་ཞིམ་པ་བཞིན་དུ་མདོ་འདིའི་རོ་ཡང་དེ་དང་འདྲའོ། །མདོ་སྡེ་འདི་ལས་དེ་བཞིན་གཤེགས་པའི་སྙིང་

49-1-110b

པོ་བསྟན་པ་སྤོང་བར་བྱེད་པ་གང་ཡིན་པ་དེ་དག་ནི་བ་ལང་དང་འདྲ་སྟེ། དཔེར་ན་དྲིན་དུ་མི་གཟོ་བ་བདག་གིས་བདག་གསད་པར་སེམས་པ་དེ་དག་མཆོག་ཏུ་མྱ་ངན་དུ་བྱ་བ་དེ་བཞིན་དུ། དེ་བཞིན་གཤེགས་པའི་སྙིང་པོ་སྤངས་ནས་བདག་མེད་པ་
སྟོན་པའི་སེམས་ཅན་གང་ཡིན་པ་དེ་དག་ནི་མཆོག་ཏུ་མྱ་ངན་དུ་བྱ་བ་ཡིན་པར་རིག་པར་བྱའོ། །དེ་བས་ན་ཨུ་ཞེས་བྱའོ། །ཨེ་ཞེས་བྱ་བ་ནི་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ཞེས་བྱ་བ་འདི་ནི་སངས་རྒྱས་རྣམས་ཀྱི་ཆོས་ཉིད་དེ། 
དེ་བས་ན་ཨེ་ཞེས་བྱའོ། །ཨཻ་ཞེས་བྱ་བ་ནི་དེ་བཞིན་གཤེགས་པའི་དོན་ཏེ། ཨཻ་ཞེས་བྱ་བ་ནི་འོང་བ་དང་འགྲོ་བའི་དོན་ཡིན་པས་ན་ཇི་ལྟར་སོང་བ་དེ་བཞིན་དུ་འོངས་པས་ན་དེའི་ཕྱིར་ཨཻ་ཞེས་བྱའོ། །ཨོ་ཞེས་བྱ་བ་ནི་ཉོན་མོངས་པ་རྣམས་ཀྱི་དོན་
ཏེ། སྨན་དུ་འགྱུར་བས་མི་ལས་དེ་བཞིན་གཤེགས་པར་འགྱུར་རོ། །དེ་བས་ན་ཨོ་ཞེས་བྱའོ། །ཨཽ་ཞེས་བྱ་བ་ནི་ཐེག་པ་ཆེན་པོའི་དོན་ཏེ། སྒྲ་བཅུ་བཞི་པོ་ཐམས་ཅད་ཀྱི་མཇུག་ནི་ཨཽ་ཡིན་པས་ན་ཐེག་པ་ཆེན་པོ་ནི་རྒྱུད་ཐམས་ཅད་ཀྱི་རྒྱུད་
ཕྱི་མའི་ཡང་ཕྱི་མ་ཞེས་བྱ་སྟེ་དེ་བས་ན་ཨཽ་ཞེས་བྱའོ། །ཨྃ་ཞེས་བྱ་བ་ནི་ངའི་བསྟན་པ་ལ་རུང་བ་མ་ཡིན་པ་ཐམས་ཅད་བཟློག་པ་དང་། གསེར་དང་དངུལ་སྤངས་པ་སྟེ་དེ་བས་ན་བཟློག་པའི་དོན་དུ་ཨྃ་ཞེས་བྱའོ། །ཨཿཞེས་བྱ་བ་ནི་ཐེག་པ་
མཆོག་གི་དོན་ཏེ་དེ་བས་ན་ཨཿཞེས་བྱའོ། །དེ་བཞིན་དུ་སངས་རྒྱས་ཀྱིས་གསུངས་པའི་མདོ་སྡེ་ཐམས་ཅད་དང་རྒྱུད་ཐམས་ཅད་ཀྱི་མཐའ་ནི་ཐེག་པ་ཆེན་པོ་ཡིན་ནོ། །ཀ་ཞེས་བྱ་བ་ནི་སྙིང་རྗེས་སེམས་ཅན་ཐམས་ཅད་ལ་སྒྲ་གཅན་ཟིན་བཞིན་
དུ་བལྟ་བའི་དོན་ཏེ། བདག་གིས་སེམས་ཅན་ཐམས་ཅད་ཀྱི་དོན་བྱའོ་སྙམ་དུ་དེ་ལྟར་བསམ་པར་བྱ་བ་ཡིན་པས་ན་དེའི་ཕྱིར་ཀ་ཞེས་བྱའོ། །ཁ་ཞེས་བྱ་བ་ནི་དེ་བཞིན་གཤེགས་པའི་གསང་བའི་དོན་ཏེ། མི་བགྲུངས་པ་རྣམས་ཀྱིས་ཤེས་པར་མི་
ནུས་པས་ན་དེའི་ཕྱིར་ཁ་ཞེས་བྱའོ། །ག་ཞེས་བྱ་བ་ནི་སྙིང་པོའི་དོན་ཏེ། སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་པས་ན་དེའི་ཕྱིར་ག་ཞེས་བྱའོ། །གྷ་ཞེས་བྱ་བ་ནི་དེ་བཞིན་གཤེགས་པ་རྟག་ཅེས་བྱ་བའི་དོན་ཏེ། དེ་བས་

49-1-111a

ན་དེ་བཞིན་གཤེགས་པ་ནི་རྟག་པ་ཡིན་ནོ། །ང་ཞེས་བྱ་བ་ནི་འདུ་བྱེད་མི་རྟག་ཅེས་བྱ་བའི་དོན་ཏེ་དེ་བས་ན་ང་ཞེས་བྱའོ། །ཙ་ཞེས་བྱ་བ་ནི་སྤྱོད་པའི་དོན་ཏེ། སེམས་ཅན་ཐམས་ཅད་ཡོངས་སུ་སྨིན་པར་བྱ་བས་ན་དེའི་
ཕྱིར་ཙ་ཞེས་བྱའོ། །ཚ་ཞེས་བྱ་བ་ནི་དེ་བཞིན་གཤེགས་པ་དཀར་པོའི་ཆོས་རྣམས་ཀྱིས་གདུགས་གཅིག་པ་ལམ་མེར་བཞུགས་པ་ཡིན་ཏེ་དེ་བས་ན་ཚ་ཞེས་བྱའོ། །ཛ་ཞེས་བྱ་བ་ནི་ཛ་དང་འདྲ་བར་ཐར་པ་དེ་ཞིགས་པ་མ་ཡིན་ཏེ་དེ་བས་ན་ཛ་ཞེས་བྱའོ། །ཛྷ་ཞེས་བྱ་བ་ནི་
ཉོན་མོངས་པ་རྣམས་སྐྱེན་པར་སྤྲུག་པར་བྱ་བའི་དོན་ཏེ་དེ་བས་ན་ཛྷ་ཞེས་བྱའོ། །ཉ་ཞེས་བྱ་བ་ནི་དེ་ཁོ་ན་ཉིད་ཀྱི་ཆོས་ཤེས་པའི་ཚིག་བླ་དགས་ཏེ་དེ་བས་ན་ཉ་ཞེས་བྱའོ། །ཊ་ཞེས་བྱ་བ་ནི་ཊ་བཞིན་དུ་འཛམ་བུའི་གླིང་ཁ་ཅིག་ཏུ་དེ་བཞིན་གཤེགས་
པའི་མཚུངས་པ་མེད་པའི་སྐུ་སྟོན་པར་མཛད་དེ་དེ་བས་ན་ཊ་ཞེས་བྱའོ། །ཋ་ཞེས་བྱ་བ་ནི་ཆོས་ཀྱི་སྐུའི་དོན་ཏེ། ཋ་བཞིན་དུ་ཡོངས་སུ་རྫོགས་པས་ན་དེའི་ཕྱིར་ཋ་ཞེས་བྱའོ། །ཌ་ཞེས་བྱ་བ་ནི་དགེ་འདུན་གཞོན་ནུ་ཞེས་བྱ་བའི་དོན་ཏེ། ནུབ་པར་མི་འགྱུར་
བའི་ཕྱིར་ཌ་ཞེས་བྱའོ། །ཌྷ་ཞེས་བྱ་བ་ནི་ངོ་ཚ་མི་ཤེས་པའི་དོན་ཏེ། བླ་མ་རྣམས་ལ་དྲིན་དུ་མི་གཟོ་བས་ན་དེའི་ཕྱིར་ཌྷ་ཞེས་བྱའོ། །ཎ་ཞེས་བྱ་བ་ནི་འདི་ལས་ཕྱི་རོལ་པ་རྣམས་འཕགས་པ་མ་ཡིན་པའི་དོན་ཏེ་དེ་བས་ན་ཎ་ཞེས་བྱའོ། །ཏ་ཞེས་
བྱ་བ་ནི་སྲིད་པ་ཐམས་ཅད་དུ་ལྟུང་བ་ལས་བཟློག་པའི་དོན་ཏེ་དེ་བས་ན་ཏ་ཞེས་བྱའོ། །ཐ་ཞེས་བྱ་བ་ནི་མི་ཤེས་པའི་དོན་ཏེ། དར་གྱི་སྲིན་བུ་བཞིན་དུ་དཀྲིས་པས་ན་དེའི་ཕྱིར་ཐ་ཞེས་བྱའོ། །ད་ཞེས་བྱ་བ་ནི་ཐེག་པ་ཆེན་པོ་ལ་བརྩོན་པར་བྱ་བ་
ལ་དགའ་བར་གྱིས་ཤིག་པའི་དོན་ཏེ་དེ་བས་ན་ད་ཞེས་བྱའོ། །དྷ་ཞེས་བྱ་བ་ནི་གཞི་གསུམ་རི་རབ་བཞིན་དུ་བརྟན་ཞིང་ནུབ་པར་མི་འགྱུར་བའི་དོན་ཏེ་དེ་བས་ན་དྷ་ཞེས་བྱའོ། །ན་ཞེས་བྱ་བ་ནི་གཞི་གསུམ་གྲོང་ཁྱེར་གྱི་སྒོ་གཏན་གྱི་རྟེན་མ་བཞིན་
དུ་ཤིན་ཏུ་བརྟན་པས་ན་དེའི་ཕྱིར་ན་ཞེས་བྱའོ། །པ་ཞེས་བྱ་བ་ནི་ཕྱིན་ཅི་ལོག་གི་དོན་ཏེ། གཞི་གསུམ་ནུབ་པར་མི་འགྱུར་བ་ལ་བདག་ཉིད་ཡོངས་སུ་རྨོངས་པར་འགྱུར་བས་ན་པ་ཞེས་བྱའོ། །ཕ་ཞེས་བྱ་བ་ནི་འཇིག་རྟེན་ཐམས་ཅད་འཇིག་

49-1-111b

པའི་དོན་ཏེ། འཇིག་རྟེན་འཇིག་པ་ན་གཞི་གསུམ་འཇིག་པར་འགྱུར་རོ་ཞེས་ཟེར་བ་ནི་བདག་ཉིད་ཀྱི་འབྲས་བུ་འཇིག་པར་བྱེད་པ་སྟེ། སྒྲུབ་པ་ལས་ཉམས་པས་ན་དེའི་ཕྱིར་ཕ་ཞེས་བྱའོ། །བ་ཞེས་བྱ་བ་ནི་དེ་བཞིན་གཤེགས་པ་རྣམས་ཀྱི་སྟོབས་
རྣམས་ཀྱི་ཚིག་བླ་དགས་ཏེ། སྟོབས་བཅུ་དང་ལྡན་པས་ན་དེའི་ཕྱིར་བ་ཞེས་བྱའོ། །བྷ་ཞེས་བྱ་བ་ནི་བྱང་ཆུབ་སེམས་དཔའ་རྣམས་ནི་དམ་པའི་ཆོས་ཀྱི་ཁུར་ཁྱེར་བ་ཡིན་ནོ་ཞེས་བྱ་བའི་དོན་ཏེ་དེ་བས་ན་བྷ་ཞེས་བྱའོ། །མ་ཞེས་བྱ་བ་ནི་ངེས་པར་
རང་གི་ཁུར་ཁྱེར་བར་བྱེད་པ་འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་ལུགས་ཡིན་ཏེ་དེ་བས་ན་མ་ཞེས་བྱའོ། །ཡ་ཞེས་བྱ་བ་ནི་དོན་བཞི་པོ་རྣམས་བྱང་ཆུབ་སེམས་དཔས་བྱ་དགོས་པས་ན་དེའི་ཕྱིར་ཡ་ཞེས་བྱའོ། །ར་ཞེས་བྱ་བ་ནི་
འདོད་ཆགས་དང་། ཞེ་སྡང་དང་། གཏི་མུག་གི་འཇིགས་པ་བསལ་བས་དེ་ཁོ་ན་ཉིད་ཀྱི་དོན་ལ་ཆོས་ལ་འཇུག་པས་ན་དེའི་ཕྱིར་ར་ཞེས་བྱའོ། །ལ་ཞེས་བྱ་བ་ནི་ཉན་ཐོས་ཀྱི་ཐེག་པ་ལས་གྱེན་དུ་བསྐྱོད་ནས་ཐེག་པ་ཆེན་པོ་མི་གཡོ་བ་ཉིད་
བརྩམ་པར་བྱ་བ་ཡིན་པས་ན་དེའི་ཕྱིར་ལ་ཞེས་བྱའོ། །ཝ་ཞེས་བྱ་བ་ནི་འཇིག་རྟེན་ཐམས་ཅད་ཀྱི་རིག་སྔགས་དང་། གསང་སྔགས་དང་། སྨན་རྣམས་བྱང་ཆུབ་སེམས་དཔའ་མཆོག་རྣམས་ཀྱིས་བསྟན་པས་ན་དེའི་ཕྱིར་ཝ་ཞེས་བྱའོ། །
ཤ་ཞེས་བྱ་བ་ནི་ཟུག་རྔུ་གསུམ་དང་བྲལ་བའི་དོན་ཏེ་དེ་བས་ན་ཤ་ཞེས་བྱའོ། །ཥ་ཞེས་བྱ་བ་ནི་ཡོངས་སུ་རྫོགས་པའི་དོན་ཏེ་མདོ་སྡེ་ཆེན་པོ་འདི་ཐོས་ན་ཤིན་ཏུ་རྒྱས་པ་ཐམས་ཅད་ཐོས་པར་འགྱུར་བས་ན་དེའི་ཕྱིར་ཥ་ཞེས་བྱའོ། །ས་ཞེས་བྱ་བ་
ནི་དམ་པའི་ཆོས་དབྱུང་བའི་སེམས་ཀྱི་དོན་ཏེ་དེ་བས་ན་ས་ཞེས་བྱའོ། །ཧ་ཞེས་བྱ་བ་ནི་ཀྱེ་མ་བདག་གིས་འཁོར་བ་མཐར་གཏུགས་སོ། །ཀྱེ་མ་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ་སྙམ་དུ་དགའ་བ་དང་ཡོངས་སུ་གདུང་བའི་
དོན་ཏེ་དེ་བས་ན་ཧ་ཞེས་བྱའོ། །ཀྵ་ཞེས་བྱ་བ་ནི་བདུད་ཀྱི་དོན་ཏེ། བདུད་བྱེ་བ་སྙེད་ཀྱིས་ཀྱང་དགེ་འདུན་དབྱེ་བར་མི་ནུས་མོད་ཀྱི། དེ་བཞིན་གཤེགས་པ་ནི་འཇིག་རྟེན་དང་འཐུན་པར་མཛད་པ་སྟོན་ཏོ། །ཡང་ཀྵ་ཞེས་བྱ་བ་ནི་འཇིག་རྟེན་

49-1-112a

ཐམས་ཅད་འཐུན་པར་བྱ་བའི་ཕྱིར་མ་ལ་སོགས་པ་བསྟན་པའི་དོན་ཏེ་དེ་བས་ན་ཀྵ་ཞེས་བྱའོ། །རྀ་རཱྀ་ལྀ་ལཱྀ་ཞེས་བྱ་བའི་ཡི་གེ་བཞི་པོ་འདི་རྣམས་ཀྱིས་ནི་སངས་རྒྱས་དང་། ཆོས་དང་དགེ་འདུན་དང་། གཉེན་པོ་སྟོན་པའི་དོན་བཞི་རྒྱས་
པར་བྱེད་དོ། །འཇིག་རྟེན་དང་འཐུན་པར་བྱ་བ་དེ་ནི་གཉེན་པོ་ཡིན་ཏེ། དཔེར་ན་ལྷ་སྦྱིན་གྱིས་དགེ་འདུན་ཕྱེ་བ་ལྟ་བུའོ། །དགེ་འདུན་ཕྱེ་བ་སྟོན་པ་ན་བསླབ་པའི་གཞི་བཅའ་བའི་ཕྱིར་ཚུལ་གཞན་དག་ཀྱང་སྤྲུལ་ཏེ་ཐབས་སྟོན་པ་དེ་མཐོང་ན་ཤེས་རབ་ཅན་སྐྲག་པར་
མི་བྱ་བར་འདི་ནི་འཇིག་རྟེན་དང་འཐུན་པར་བྱ་བ་ཡིན་ནོ་སྙམ་དུ་ཡིད་ཆེས་པར་བྱ་སྟེ། དེ་བས་ན་རྀ་རཱྀ་ལྀ་ལཱྀ་ཞེས་བྱའོ། །མཆུ་གཉིས་ལས་བྱུང་བ་དང་། ལྕེ་དྲུང་ནས་བྱུང་བ་དང་། ཁ་སྣ་གཉིས་ནས་འབྱུང་བ་དང་། རིང་པོ་དང་། རྒྱུན་རིང་དུ་དྲང་བ་རྣམས་
ནི་དོན་དང་ལྷན་ཅིག་ཏུ་སྦྱར་བ་ཡིན་ནོ། །ཡི་གེ་རྣམས་ལྷན་ཅིག་ཏུ་སྦྱར་བས་ནི་བྱེད་པ་ལ་འཇུག་པར་འགྱུར་རོ། །ལྕེ་དང་སོ་ལ་སོགས་པ་རྣམས་ནི་ལུས་ཀྱི་ཁམས་ཡིན་ཏེ། ཁམས་དེ་ཡང་རང་བཞིན་གྱིས་ཡོངས་སུ་དག་པའོ། །ཕུང་པོ་དང་། ཁམས་དང་། 
སྐྱེ་མཆེད་རྣམ་པ་སྣ་ཚོགས་དེ་དག་ལྟ་བུ་ཡང་མགོ་མཉམ་དུ་ཆོས་ཀྱི་དེ་ཁོ་ན་ཉིད་དུ་ཉེ་བར་ཞི་བར་ཁོངས་སུ་འདུའོ། །དེ་བཞིན་གཤེགས་པའི་སྙིང་པོས་ཁྱབ་པའི་ཁམས་དེའི་གཟི་བརྗིད་ཀྱིས་ལྷན་ཅིག་ཏུ་སྦྱར་བས་བྱེད་པ་ལ་འཇུག་པར་འགྱུར་ཏེ་དེ་བས་ན་ཡི་
གེ་ཕྱེད་པ་ཞེས་བྱའོ། །རྒྱུད་ཐམས་ཅད་དང་། གསང་སྔགས་ཐམས་ཅད་དང་། ཆོས་ཐམས་ཅད་ནི་ཡི་གེ་ཕྱི་མོ་སྦྱར་བའི་ཐ་སྙད་ཡིན་ཏེ། དེ་བས་ན་དེ་བཞིན་གཤེགས་པ་དང་ཐར་པ་དེ་ཁོ་ན་ཉིད་དུ་མཐོང་ངོ་། །ཡི་གེ་བརྗོད་པ་དང་རྟོག་པའི་འདུ་ཤེས་དང་
ཡི་གེ་དང་འབྲུའི་འདུ་ཤེས་དེ་ཉིད་སྤངས་པ་ནི་དེ་བཞིན་གཤེགས་པ་དང་ཐར་པ་སྟེ། དེ་བས་ན་ཐར་པ་ནི་ཐམས་ཅད་དུ་གྲོལ་བ་དང་རབ་ཏུ་གྲོལ་བ་ཡིན་ནོ། །དེ་བཞིན་གཤེགས་པ་དེ་ཉིད་ཡི་གེ་ཕྱེད་པའི་ཆོས་ཀྱི་དོན་ཁོ་ནའི་ཕྱིར་བྱུང་བ་ཡིན་ནོ་སྙམ་དུ་ཡང་
དག་པར་གཤེགས་པ་གང་ཡིན་པ་དེ་དག་ནི་ཡི་གེ་ཤེས་པ་ཞེས་བྱའོ། །གཞན་དག་ནི་ཡི་གེ་ཕྱེད་པ་ཤེས་པ་ཞེས་བྱའོ། །ཡི་གེ་མེད་པ་གང་དག་ཡིན་ཞེ་ན། ཆོས་མ་ཡིན་པ་སྟེན་པ་གང་ཡིན་པ་རྣམས་སོ། །ཆོས་ལ་སྟེན་པ་ཡིན་དུ་ཟིན་ཀྱང་དེ་

49-1-112b

བཞིན་གཤེགས་པ་རྟག་པ་དང་། གཞི་གསུམ་པོ་དང་། ཐར་པ་ཐེར་ཟུག་པ་དང་། མདོ་སྡེ་དང་། མདོ་སྡེ་མ་ཡིན་པ་དང་། འདུལ་བ་དང་། འདུལ་བ་མ་ཡིན་པ་དང་། བདུད་ཀྱིས་སྨྲས་པ་དང་། སངས་རྒྱས་ཀྱིས་གསུངས་པའི་བྱེ་བྲག་མི་ཕྱེད་པ་གང་
ཡིན་པ་དེ་དག་ཐམས་ཅད་ནི་ཁོང་ན་ཡི་གེ་མེད་པ་ཞེས་ང་ཟེར་རོ། །རིགས་ཀྱི་བུ་དེ་བས་ན་ཁྱོད་ཀྱིས་ཚུལ་འདི་དག་ལ་ཡི་གེ་ཕྱེད་པ་རྣམས་སློབས་ཤིག་དང་། དེ་ལྟར་བྱས་ན་ཡི་གེ་ཤེས་པ་ཞེས་བྱ་བའི་གྲངས་སུ་གཏོགས་པར་འགྱུར་རོ། །གསོལ་པ། 
བཅོམ་ལྡན་འདས་བདག་གིས་གྲངས་སུ་ཆུད་པར་བགྱི་སྟེ། དེ་ལྟར་འཚལ་བས་ན་ཡི་གེ་ཕྱེད་པ་རྣམས་བསླབ་པར་བགྱི་འཚལ་ལགས་སོ། །བཅོམ་ལྡན་འདས་བདག་གིས་ད་གཟོད་སློབ་དཔོན་གྱི་མཆོག་ཁྱོད་ལྟ་བུ་རྙེད་ལགས་སོ། །བཅོམ་ལྡན་
འདས་བདག་ནི་ད་གཟོད་ཡིག་རྩིས་ཀྱི་གནས་སུ་ཞུགས་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །དམ་པའི་ཆོས་འདོད་པས་ནི་དེ་ལྟར་འདོད་པར་བྱ་དགོས་སོ། །རིགས་ཀྱི་བུ་དེ་ལ་ཟལ་མོ་ཞེས་བྱ་བ་ནི་རྣམ་པ་གཉིས་ཏེ། 
སྡུག་བསྔལ་དང་། མི་རྟག་པ་དང་། བདག་མེད་པ་རྣམས་ཀྱི་ཟལ་མོ་རྣམས་དང་། བཞད་དང་འགྲོགས་པའི་ཟལ་མོ་རྣམས་ཏེ་དེ་ནི་བྱའི་དོན་ཏོ། །གསོལ་པ། སྡུག་བསྔལ་དང་། མི་རྟག་པ་དང་། བདག་མེད་པ་ལ་ཇི་ལྟར་ཟལ་མོ་ཞེས་བགྱི་
ལགས། བཀའ་སྩལ་པ། ཆོས་ཁ་ཅིག་ནི་མི་རྟག་ལ་ཆོས་ཁ་ཅིག་ནི་རྟག་པའི་ཕྱིར་དང་། ཆོས་ཁ་ཅིག་ནི་སྡུག་བསྔལ་ལ་ཆོས་ཁ་ཅིག་ནི་བདེ་བའི་ཕྱིར་དང་། ཆོས་ཁ་ཅིག་ནི་བདག་མེད་ལ་ཆོས་ཁ་ཅིག་ནི་བདག་ཡོད་པའི་ཕྱིར་ཏེ། དཔེར་ན་བུ་
རམ་ཤིང་དང་། འབྲས་སཱ་ལུ་དང་། འབྲུ་དང་། ཁྲེ་དང་། ཁྲེ་རྒོད་དང་། སྲན་མ་དང་། སྲན་སྡེའུ་དང་། སྲན་དྲེའུ་ལ་སོགས་པ་འབྲུའི་སྣ་གྲངས་རྣམས་མེ་ཏོག་གི་དུས་ནས་འབྲས་བུའི་དུས་ཀྱི་བར་དུ་མི་རྟག་པའི་ཁོངས་སུ་འདུས་སོ། །ཕུབ་
མ་མེད་པར་གྱུར་ནས་ནི་སེམས་ཅན་ཐམས་ཅད་ལ་ཕན་འདོགས་པར་འགྱུར་ལ་འབྲུའི་གྲངས་ཀྱི་ཁོངས་སུ་འདུས་ཏེ་དེས་ན་རྟག་པ་ཞེས་བྱའོ། །དེ་ཅིའི་ཕྱིར་ཞེ་ན། རང་བཞིན་དུ་གྱུར་པའི་ཕྱིར་རོ། །གསོལ་པ། བཅོམ་ལྡན་འདས་ཅི་ལགས། 

49-1-113a

དེ་དག་སླད་ཀྱིས་མ་མཆིས་པར་མི་འགྱུར་ལགས་སམ། དེ་དག་སླད་ཀྱིས་མ་མཆིས་པར་མི་འགྱུར་བ་དེ་བཞིན་དུ་དེ་བཞིན་གཤེགས་པ་རྟག་པ་ཞེས་བགྱི་ལགས་སམ། བཀའ་སྩལ་པ། དེ་བཞིན་གཤེགས་པ་རི་རབ་བཞིན་
ཞེས་དཔེར་བླང་མོད་ཀྱི། རིའི་རྒྱལ་པོ་རི་རབ་ཀྱང་འཇིག་པའི་བསྐལ་པས་འཇིག་པར་འགྱུར་བ་དེ་བཞིན་དུ་དེ་བཞིན་གཤེགས་པ་ལ་ཁྱོད་དེ་ལྟར་མ་འཛིན་ཅིག །མྱ་ངན་ལས་འདས་པ་མ་གཏོགས་པར་འཇིག་རྟེན་ཐམས་ཅད་ན་འཇིག་པར་མི་འགྱུར་བ་
ཅུང་ཟད་ཀྱང་མེད་ཀྱིས་འཇིག་རྟེན་དང་འཐུན་པའི་ཚུལ་གྱིས་ཀུན་རྫོབ་ཀྱི་ཐ་སྙད་ཀྱི་རྗེས་སུ་འཇུག་པར་གྱིས་ཤིག །གསོལ་པ། བཅོམ་ལྡན་འདས་ལེགས་སོ། ལེགས་སོ། །བཀའ་སྩལ་པ། རིགས་ཀྱི་བུ་དེ་བཞིན་དུ་མདོ་སྡེ་ཐམས་ཅད་
དང་། ཏིང་ངེ་འཛིན་ཐམས་ཅད་ཀྱི་བསྒོམ་པ་བསྒོམས་པའི་འབྲས་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཆེན་པོ་འདི་སེམས་ཅན་རྣམས་ཀྱིས་ནམ་མ་ཐོས་ཀྱི་བར་དུ་ནི་མི་རྟག་པའི་ཁོངས་སུ་འདུས་སོ། །མདོ་སྡེ་རིན་པོ་ཆེ་འདི་ཐོས་
ནས་ནི་རིགས་ཀྱི་བུ་འམ། རིགས་ཀྱི་བུ་མོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ་སེམས་ཅན་ཐམས་ཅད་ལ་ཕན་འདོགས་པར་ཡང་འགྱུར་ཏེ། ཅིའི་ཕྱིར་ཞེ་ན། བདག་ལ་དེ་བཞིན་
གཤེགས་པའི་སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་དེ་དག་འཇུག་པར་འགྱུར་རོ། །རིགས་ཀྱི་བུ་གཞན་ཡང་དཔེར་ན་ཤིང་ཨ་མྲ་འམ་ཤིང་ཏ་ལ་ཡང་རུང་སྟེ། མེ་ཏོག་གི་དུས་ནས་འབྲས་བུའི་དུས་ཀྱི་བར་
དུ་ནི་མི་རྟག་པའི་ཆོས་ཀྱི་ཁོངས་སུ་འདུས་སོ། །འབྲས་བུ་སྨིན་པར་གྱུར་ནས་ནི་སེམས་ཅན་ཐམས་ཅད་ལ་ཕན་འདོགས་པར་འགྱུར་ཏེ། རྟག་པའི་ཆོས་ཀྱི་ཁོངས་སུ་འདུས་པར་འགྱུར་རོ། །རིགས་ཀྱི་བུ་དེ་བཞིན་དུ་མདོ་སྡེ་ཐམས་ཅད་དང་། 
ཏིང་ངེ་འཛིན་ཐམས་ཅད་ཀྱི་བསྒོམ་པ་བསྒོམས་པའི་འབྲས་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཆེན་པོ་འདི་སེམས་ཅན་རྣམས་ཀྱིས་ནམ་མ་ཐོས་ཀྱི་བར་དུ་ནི་མི་རྟག་པའི་ཁོངས་སུ་འདུས་སོ། །མདོ་སྡེ་རིན་པོ་ཆེ་འདི་ཐོས་ནས་ནི་

49-1-113b

རིགས་ཀྱི་བུའམ། རིགས་ཀྱི་བུ་མོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ་སེམས་ཅན་ཐམས་ཅད་ལ་ཡང་ཕན་འདོགས་པར་འགྱུར་ཏེ། དེ་ཅིའི་ཕྱིར་ཞེ་ན། བདག་ལ་དེ་བཞིན་གཤེགས་
པའི་སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་དེ་དག་འཇུག་པར་འགྱུར་རོ། །རིགས་ཀྱི་བུ་གཞན་ཡང་དཔེར་ན་གསེར་ཁུང་ངམ་ཟངས་ཁུང་ཡང་རུང་སྟེ། བརྐོ་བའི་དུས་ཀྱི་བར་དུ་ནི་མི་རྟག་པའི་ཁོངས་སུ་
འདུས་སོ། །གསེག་མ་དང་། རྡོ་དང་། སྐྱོན་རྣམས་མེད་པར་གྱུར་ནས་ནི་སེམས་ཅན་ཐམས་ཅད་ལ་ཕན་འདོགས་པར་འགྱུར་ཏེ། རྟག་པའི་རྫས་རིན་པོ་ཆེའི་ཁོངས་སུ་འདུས་སོ། །རིགས་ཀྱི་བུ་དེ་བཞིན་དུ་མདོ་སྡེ་ཐམས་ཅད་དང་། ཏིང་
ངེ་འཛིན་ཐམས་ཅད་ཀྱི་བསྒོམ་པ་བསྒོམས་པའི་འབྲས་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་སེམས་ཅན་རྣམས་ཀྱིས་ནམ་མ་ཐོས་ཀྱི་བར་དུ་ནི་མི་རྟག་པའི་ཁོངས་སུ་འདུས་སོ། །མདོ་སྡེ་རིན་པོ་ཆེ་འདི་ཐོས་ནས་
ནི་རིགས་ཀྱི་བུའམ། རིགས་ཀྱི་བུ་མོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ་སེམས་ཅན་ཐམས་ཅད་ལ་ཡང་ཕན་འདོགས་པར་འགྱུར་ཏེ། ཅིའི་ཕྱིར་ཞེ་ན། བདག་ལ་དེ་བཞིན་གཤེགས་པའི་
སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་དེ་དག་འཇུག་པར་འགྱུར་རོ། །རིགས་ཀྱི་བུ་གཞན་ཡང་དཔེར་ན་བུ་རམ་ཤིང་ངམ་ཏིལ་ཡང་རུང་སྟེ། ཁུ་བ་དང་མར་དུ་གྱུར་པའི་དུས་ཀྱི་བར་དུ་ནི་མི་རྟག་པའི་ཁོངས་སུ་
འདུས་སོ། །བུ་རམ་ཤིང་གི་ཚིགས་མ་དང་། ཏིལ་གྱི་ཚིགས་མ་མེད་པར་གྱུར་ནས་ནི་སེམས་ཅན་ཐམས་ཅད་ལ་ཡང་ཕན་འདོགས་པར་འགྱུར་ལ་རྫས་རྟག་པའི་ཁོངས་སུ་ཡང་འདུས་པར་འགྱུར་རོ། །རིགས་ཀྱི་བུ་དེ་བཞིན་དུ་མདོ་སྡེ་
ཐམས་ཅད་དང་། ཏིང་ངེ་འཛིན་ཐམས་ཅད་ཀྱི་བསྒོམ་པ་བསྒོམས་པའི་འབྲས་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་སེམས་ཅན་རྣམས་ཀྱིས་མ་ཐོས་ཀྱི་བར་དུ་ནི་མི་རྟག་པའི་ཁོངས་སུ་འདུས་སོ། །མདོ་སྡེ་རིན་

49-1-114a

པོ་ཆེ་འདི་ཐོས་ནས་ནི་རིགས་ཀྱི་བུའམ། རིགས་ཀྱི་བུ་མོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ་སེམས་ཅན་ཐམས་ཅད་ལ་ཡང་ཕན་འདོགས་པར་འགྱུར་ཏེ། ཅིའི་
ཕྱིར་ཞེ་ན། བདག་ལ་དེ་བཞིན་གཤེགས་པའི་སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་དེ་དག་འཇུག་པར་འགྱུར་རོ། །རིགས་ཀྱི་བུ་གཞན་ཡང་དཔེར་ན་ཆུ་ཀླུང་ཐམས་ཅད་ནི་རྒྱ་མཚོའི་ཁོངས་སུ་འདུས་སོ། །
རིགས་ཀྱི་བུ་དེ་བཞིན་དུ་མདོ་སྡེ་ཐམས་ཅད་དང་། ཏིང་ངེ་འཛིན་ཐམས་ཅད་དང་། ཐེག་པ་ཆེན་པོ་ནི་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདིའི་ཁོངས་སུ་འདུས་སོ། །ཅིའི་ཕྱིར་ཞེ་ན། འདི་ལས་དེ་བཞིན་གཤེགས་པའི་སྙིང་
པོ་ཤིན་ཏུ་ཡོངས་སུ་མཐར་ཐུག་པ་གསལ་བར་བསྟན་པའི་ཕྱིར་ཏེ། མཆོག་ཏུ་མཐར་ཕྱིན་པ་གང་ཡིན་པ་དེ་ནི་རྒྱུ་ཞེས་བྱའོ། །དེ་བས་ན་ཆོས་ཁ་ཅིག་ནི་མི་རྟག་ལ་ཆོས་ཁ་ཅིག་ནི་རྟག་ཅེས་བྱའོ། །གསོལ་པ། སངས་རྒྱས་ལ་ཡང་མྱ་
ངན་གྱི་ཟུག་རྔུ་མཛད་པ་མངའོ་ཞེས་སྨོས་ཏེ། རྫོགས་པའི་སངས་རྒྱས་ཀྱི་ནི་མིའི་མྱ་ངན་ལྟ་བུ་ཡང་མ་ལགས། ལྷའི་མྱ་ངན་ལྟ་བུ་ཡང་མ་ལགས། བདུད་ཀྱི་མྱ་ངན་ལྟ་བུ་ཡང་མ་ལགས། སངས་རྒྱས་ནི་དུད་འགྲོར་སྐྱེས་པ་ལྟ་བུ་ཡང་
མྱ་ངན་མི་མཛད་ལགས་ན་ཇི་ལྟ་བུ་ཞིག་ལགས། བཀའ་སྩལ་པ། འདུ་ཤེས་མེད་པ་པ་རྣམས་ཀྱི་འདུ་ཤེས་ཀྱང་ཇི་ལྟ་བུ་ཞིག །འདུ་ཤེས་མེད་ན་ནི་གསོན་པ་ཡང་མི་རིགས་ཏེ། འདུ་ཤེས་མེད་པ་པ་རྣམས་ནི་གསོན་པོ་ཡིན་ནོ། །
ཕུང་པོ་དང་། ཁམས་དང་། སྐྱེ་མཆེད་རྣམས་མེད་པ་དེ་དག་ལ་འདུ་ཤེས་ག་ལ་ཞིག་ཡོད་དེ། དཔེར་ན་ཤིང་རྣམས་ལ་ལྷ་རྣམས་གནས་མོད་ཀྱི། ལྷ་དེ་དག་ཤིང་གི་ཡལ་ག་རྣམས་སམ་རྩ་བ་རྣམས་གང་ན་གནས་པ་མི་མངོན་པ་དེ་
བཞིན་དུ་བསྟན་པ་ཡང་ཟབ་བོ། །དེ་བཞིན་གཤེགས་པ་ཡང་ཟབ་བོ། །སྒྲ་གཅན་ཟིན་ལ་བྱ་བ་བཞིན་དུ་བྱམས་པས་རྟག་ཏུ་མྱ་ངན་བྱེད་པ་ནི་འདུ་ཤེས་མེད་འདུ་ཤེས་མེད་མིན་གྱི་ལྷ་རྣམས་མྱ་ངན་བྱེད་པ་དང་འདྲའོ། །དེ་དག་ནི་སངས་

49-1-114b

རྒྱས་རྣམས་ཀྱི་སྤྱོད་ཡུལ་ཡིན་ཏེ་སངས་རྒྱས་རྣམས་ཀྱི་དེ་ལྟ་བུ་ཡིན་ནོ། །སངས་རྒྱས་རྣམས་ཀྱི་ཆོས་ཉིད་ཅི་འདྲ་བ་དང་། སྐུ་ཅི་འདྲ་བ་དང་། རང་བྱུང་རྣམས་ཀྱི་གསུང་ཅི་འདྲ་བ་དང་། ཐུགས་ཅི་འདྲ་བ་ནི་སངས་རྒྱས་རྣམས་ཀྱིས་མཁྱེན་
པར་ཟད་དེ་ཡིད་ཀྱི་རང་བཞིན་ལ་མྱ་ངན་ག་ལ་ཡོད། མྱ་ངན་མེད་ན་ཡང་བསྟན་པ་ཤིན་ཏུ་རྒྱས་པ་ཡོད་པ་དང་འགལ་ལོ། །མྱ་ངན་མེད་དོ་ཞེས་བྱས་ན་ནི་སྒྲ་གཅན་ཟིན་དང་འདྲ་བར་གཟིགས་ཤེས་བྱ་བ་བརྫུན་པར་འགྱུར་རོ། །ཆོས་ཐམས་
ཅད་བརྫུན་པའོ་ཞེས་བྱ་བ་ནི་བསམ་གྱིས་མི་ཁྱབ་པར་བསྟན་ཏོ། །དེ་བཞིན་དུ་སངས་རྒྱས་བཅོམ་ལྡན་འདས་ཀྱང་བསམ་གྱིས་མི་ཁྱབ་བོ། །ཆོས་ཀྱང་བསམ་གྱིས་མི་ཁྱབ་བོ། །བསྟན་པ་ཡང་བསམ་གྱིས་མི་ཁྱབ་སྟེ། དེ་ལྟར་ན་
སངས་རྒྱས་རྣམས་ཡང་དག་པའི་ཆོས་ཉིད་ནི་དེ་ཡིན་ནོ། །ཇི་སྲིད་དུ་ནམ་མཁའ་ཡིན་པ་དེ་སྲིད་དུ་ཁྱིམ་གནས་པ་ཡང་མེད། ཀ་བ་ཡང་མེད། རྡུལ་ཡང་མེད་དེ། ནམ་མཁའི་ངོ་བོ་ཉིད་ཁོ་ནར་འདུག་པ་དེ་མཐོང་ནས་བྱིས་པའི་རང་
བཞིན་ཅན་རྣམས་ཀྱིས་ནམ་མཁའ་ཇི་ལྟར་འདུག་པ་དེ་བཞིན་དུ་སེམས་ཡོངས་སུ་བསྒྱུར་བར་བྱའོ། །དེ་ལྟར་བསམ་གྱིས་མི་ཁྱབ་པ་ལ་མྱ་ངན་ག་ལ་ཡོད། མྱ་ངན་མེད་པར་ཡང་སྒྲ་གཅན་ཟིན་བཞིན་དུ་གཟིགས་ཤེས་བྱ་བ་དོན་མེད་པར་
འགྱུར་ཏེ། དེ་བཞིན་གཤེགས་པའི་མྱ་ངན་ནི་ནམ་མཁའ་དང་འདྲའོ། །སྒྱུ་མ་ལ་སེམས་གཞན་མེད་པ་བཞིན་དུ་དེ་བཞིན་གཤེགས་པ་ལ་མྱ་ངན་མངའ་ཞེས་བྱ་བ་དེ་ཡང་སྒྱུ་མའི་ཚུལ་ཙམ་དུ་ཟད་ན་ཡོངས་སུ་མྱ་ངན་ལས་འདས་པ་ལྟ་ལ་མྱ་
ངན་ག་ལ་ཡོད། མི་རྟག་པ་ལ་ནི་མྱ་ངན་ཡོད་དེ། དེ་དག་གི་སེམས་ལས་གྱུར་པ་ཡིན་ནོ། །དེ་བས་ན་དེ་བཞིན་གཤེགས་པ་ནི་རྟག་གོ། །མི་རྟག་པ་ལ་ནི་མྱ་ངན་ཡོད་ན་དེ་བཞིན་གཤེགས་པ་ནི་མི་རྟག་པ་མ་ཡིན་པས་ན་མྱ་ངན་ཡོད་ཅེས་
བྱ་བ་དང་། མེད་ཅེས་བྱ་བར་རྟོགས་པར་མི་ནུས་ཏེ། །དེ་བཞིན་གཤེགས་པ་ནི་མྱ་ངན་དང་བྲལ་བ་ཡིན་ནོ། །དམའ་བས་ནི་དམའ་བ་ཤེས་ཀྱི་དམའ་བས་ནི་འབྲིང་མི་ཤེས་སོ། །འབྲིང་གི་ནི་འབྲིང་ཤེས་ཀྱི་འབྲིང་གི་ནི་རབ་མི་ཤེས་སོ། །རབ་

49-1-115a

ཀྱིས་ནི་དམའ་བ་དང་། འབྲིང་དང་། རབ་རྣམས་ཤེས་སོ། །ཉན་ཐོས་དང་རང་སངས་རྒྱས་རྣམས་ཀྱིས་ནི་རང་གི་སའི་བདག་ཤེས་པར་ཟད་དོ། །
སངས་རྒྱས་རྣམས་ཀྱིས་ནི་ཐམས་ཅད་ཐུགས་སུ་ཆུད་དེ། དེ་བས་ན་ཡང་དག་པར་རྫོགས་པའི་སངས་རྒྱས་རྣམས་ནི་ཡེ་ཤེས་སྒྲིབ་པ་མི་མངའ་བ་ཞེས་བྱའོ། །དེ་ལྟར་ན་ལྷའི་ཡུལ་དང་སའི་སྟེང་དག་ཏུ་སྒྱུ་མ་རྣམ་པ་སྣ་
ཚོགས་སྟོན་ཏོ། །དེ་ལྟར་སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་དང་འཐུན་པར་སྟོན་ཏོ་སྙམ་དུ་ཤེས་ནས་ཤའི་མིག་དང་ལྡན་པའི་བྱིས་པ་རྣམས་ཀྱིས་ཀྱང་ཐོགས་པ་མེད་པའི་ཡེ་ཤེས་ཐོབ་པར་བྱ་བའི་ཕྱིར་མཁས་པའི་
ཤེས་པ་ལ་གནས་པར་བྱའོ། །དེ་ལྟར་ན་མྱ་ངན་དང་མྱ་ངན་མེད་པ་ཞེས་བྱ་བ་ནི་རྫོགས་པའི་སངས་རྒྱས་ཀྱིས་བརྟགས་པ་ཡིན་གྱི་བྱིས་པ་རྣམས་ཀྱི་ཡུལ་མ་ཡིན་ནོ། །དེ་བས་ན་ཆོས་ཁ་ཅིག་ནི་བདག་ཡོད་ལ་ཆོས་ཁ་ཅིག་ནི་བདག་མེད་
དེ། འདི་ནི་ཟལ་མོ་ལྟ་བུར་བསྟན་པ་ཡིན་ནོ། །རིགས་ཀྱི་བུ་གཞན་ཡང་སངས་རྒྱས་ཀྱི་སྤྱོད་ཡུལ་བྱ་གཞད་གཟས་ལ་འགྲོ་བ་ལྟ་བུ་བསྟན་པར་བྱ་སྟེ། དཔེར་ན་བྱ་བཞད་རྣམས་དང་ཟལ་མོ་རྣམས་ནི་དབྱར་ཆུ་ཀླུང་རྣམས་ཀྱི་ཆུ་ཤིན་ཏུ་
བྲུག་པའི་ཚེ་རང་གི་སྒོང་ངའི་ཚིས་བྱ་བའི་ཕྱིར་ཐང་ག་ལས་གཞི་བརྟན་པོར་གནས་འཆའ་བར་བྱེད་ལ། སྤྱོད་ཡུལ་གང་ཡིན་པ་དེར་འདོང་བར་བྱེད་དེ་དེ་ནི་དེ་དག་གི་ཆོས་ཉིད་དོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཀྱང་སྐྱེས་ནས་སེམས་ཅན་བྱེ་བ་ཕྲག་མང་པོ་དམ་པའི་ཆོས་ལ་བཀོད་དེ། གཞད་དང་ཟལ་མོ་བཞིན་དུ་གདུལ་བར་བྱ་བ་ཇི་སྙེད་ཡོད་པ་དེ་དག་གི་དོན་རྣམས་བྱས་ཟིན་ནས་གདུལ་བར་བྱ་བ་གཞན་དག་ག་ལ་ཡོད་
པ་དེར་སྣང་བར་གྱུར་ཏོ། །དེ་ལྟར་ན་ཆོས་ཁ་ཅིག་ནི་སྡུག་བསྔལ་ལ་ཆོས་ཁ་ཅིག་ནི་བདེ་ཞེས་བྱ་སྟེ། འདུ་བྱེད་གང་ཡིན་པ་དེ་དག་ནི་སྡུག་བསྔལ་བ་དང་འཇིག་པ་ཡིན་ནོ། །མྱ་ངན་ལས་འདས་པ་གང་ཡིན་པ་དེ་ནི་མཆོག་ཏུ་བདེ་བ་ཡིན་ཏེ། 

49-1-115b

འདུ་བྱེད་སྤངས་པའི་ཕྱིར་བདེ་བ་དང་ལྡན་ནོ། །གསོལ་པ། དེ་ཇི་ལྟ་བུ་ལགས། བཀའ་སྩལ་པ། ཇི་ལྟ་བ་བཞིན་ནོ། །གསོལ་པ་མྱ་ངན་ལས་འདས་པ་ཐོབ་པའི་སེམས་ཅན་རྣམས་ཇི་ལྟར་དེ་བདེ་བ་ལགས། བཀའ་སྩལ་པ། རིགས་
ཀྱི་བུ་ངས་བསྟན་པ་ལ་རྒ་བ་དང་འཆི་བ་ནི་འདུ་བྱེད་རྣམས་ལས་བྱུང་བའོ། །བག་ཡོད་པ་ནི་འཆི་བ་མེད་པའི་གནས་སོ། །བག་མེད་པ་ནི་འཆི་བའི་གནས་སོ། །བག་ཡོད་པ་དང་ལྡན་པ་རྣམས་ནི་འཆི་བར་མི་འགྱུར་རོ། །བག་མེད་པ་དང་ལྡན་པ་
རྣམས་ནི་རྟག་ཏུ་ཤི་བ་དང་འདྲའོ། །བག་མེད་པ་དང་ལྡན་པ་གང་ཡིན་པ་དེ་ནི་འདུ་བྱེད་ཡིན་ཏེ་དེ་ནི་མཆོག་ཏུ་སྡུག་བསྔལ་བའོ། །མྱ་ངན་ལས་འདས་པ་ནི་འཆི་བ་མེད་པའོ། །བག་མེད་པ་དང་ལྡན་པ་རྣམས་ནི་འདུ་བྱེད་དུ་གྱུར་པ་ཡིན་ཏེ་དེ་
དག་ནི་མཆོག་ཏུ་སྡུག་བསྔལ་བའོ། །མྱ་ངན་ལས་འདས་པ་གང་ཡིན་པ་དེ་དག་ནི་འཆི་བ་མེད་པ་ཡིན་ནོ་ཞེས་ང་ཟེར་རོ། །བག་ཡོད་པ་དང་ལྡན་པ་གང་ཡིན་པ་དེ་དག་ནི་འདུ་བྱེད་དུ་གྱུར་པ་མ་ཡིན་ཏེ། དེ་དག་ནི་འདུ་བྱེད་རྣམས་ལ་སྤྱོད་
ཀྱང་རྒ་བ་མེད་པ་དང་། འཆི་བ་མེད་པ་དང་། གཞིག་ཏུ་མེད་པ་ཞེས་ང་ཟེར་རོ། །དེ་ལ་བག་མེད་པ་དང་ལྡན་པ་རྣམས་ནི་གང་ཡིན། བག་ཡོད་པ་དང་ལྡན་པ་རྣམས་ནི་གང་ཡིན་ཞེ་ན། འཇིག་རྟེན་པ་རྣམས་ནི་བག་མེད་པ་དང་ལྡན་པ་ཡིན་ཏེ་
ཤི་བ་དང་འདྲའོ། །འཇིག་རྟེན་ལས་འདས་པ་རྣམས་ནི་རྒ་བ་མེད་པ་དང་འཆི་བ་མེད་པའོ། །བག་ཡོད་པ་དང་ལྡན་པ་རྣམས་ནི་མྱ་ངན་ལས་འདས་པ་མཆོག་ཏུ་བདེ་བ་ཐོབ་པའོ། །དེ་བས་ན་ཆོས་ཁ་ཅིག་ནི་སྡུག་བསྔལ་ལ་ཆོས་ཁ་ཅིག་ནི་
བདེ་བ་ཡིན་ནོ་ཞེས་ངས་བསྟན་ཏོ། །ཆོས་ཁ་ཅིག་ནི་བདག་མེད་ལ་ཆོས་ཁ་ཅིག་ནི་བདག་ཡོད་པ་ནི་དཔེར་ན་ས་ལ་འདུག་པའི་མི་ལྷའི་མིག་མེད་པས་ནམ་མཁའ་ལ་བྱ་འཕུར་བའི་རྗེས་མི་མཐོང་བ་དེ་བཞིན་དུ། ཉོན་མོངས་པ་ལ་གནས་པ་རྣམས་
ཀྱིས་བདག་ཉིད་ལ་སྙིང་པོའི་མཆོག་ཡོད་པ་བདག་གིས་མི་མཐོང་སྟེ། དེ་བས་ན་ངས་དགོངས་པའི་ཚིག་གིས་བདག་མེད་དོ་ཞེས་བསྟན་ཏོ། །ལྷའི་མིག་མེད་པའི་མི་རྣམས་ཀྱིས་ནི་བདག་ལ་བདག་ཡོད་དུ་ཟིན་ཀྱང་མི་མཐོང་སྟེ་ཉོན་མོངས་པ་

49-1-116a

ཡིན་ནོ་ཞེས་ང་ཟེར་རོ། །ཉོན་མོངས་པའི་རྣམ་པའི་འདུ་བྱེད་རྣམས་གང་ཡིན་པའི་ཆོས་དེ་དག་ནི་མི་རྟག་པ་ཞེས་བྱའོ། །དེ་བས་ན་ཆོས་ཁ་ཅིག་ནི་མི་རྟག་པའོ་ཞེས་ངས་བསྟན་ཏོ། །རྒྱུ་དེས་ན། ཤེས་རབ་
ལྡན་པ་རི་ཀར་འདུག་པ་ཡིས། །བྱིས་པ་ས་ལ་འདུག་པ་ལེགས་པར་མཐོང་། །ཤེས་རབ་ཁང་བཟངས་སྟེང་ན་འདུག་པ་ཡིས། །མྱ་ངན་མེད་ཀྱང་སྐྱེ་དགུ་མྱ་ངན་མཐོང་། །ཞེས་བྱ་བ་ལྟ་བུ་སྟེ། དེ་ལྟར་ཉོན་མོངས་པའི་རྣམ་པ་བཅད་ནས་
ཤེས་རབ་ཅན་རི་ཀ་ན་གནས་པས་ཉོན་མོངས་པའི་རྣམ་པ་དང་འབྲེལ་བའི་བྱིས་པ་མཐོང་བ་བཞིན་ནོ། །གསོལ་པ། ཤེས་རབ་ཁང་ཏོག་མཆིས་པ་གང་དག་ལགས། །མྱ་ངན་མ་མཆིས་གང་ལགས་འཇིག་རྟེན་ན། །མྱ་ངན་མ་མཆིས་
མྱ་ངན་འདས་པ་ལ། །མྱ་ངན་དག་ནི་ཇི་ལྟར་མཆིས་པར་འགྱུར། །གལ་ཏེ་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ན་བྱིས་པ་རྣམས་ཀྱིས་ཇི་ལྟར་མཐོང་ལགས། ཤེས་རབ་ཀྱི་ཁང་བཟངས་ཀྱི་སྟེང་དུ་ཡང་ཇི་ལྟར་
བཞུགས་ལགས། མི་རི་ཀ་ན་མཆིས་པས་ནི་མཐོང་དུ་རུང་སྟེ། འདི་ནི་མཆིས་ན་གདོད་རུང་བ་ལགས་ན་ཡོངས་སུ་མྱ་ངན་ལས་འདས་པས་ཇི་ལྟར་མཐོང་ལགས། བཀའ་སྩལ་པ། ཤེས་རབ་ཀྱི་ཁང་བཟངས་ནི་མྱ་ངན་ལས་
འདས་པའོ། །མྱ་ངན་མེད་པ་ནི་དེ་བཞིན་གཤེགས་པའོ། །མྱ་ངན་གྱི་ཤས་ཆེ་བ་ནི་སྐྱེ་དགུ་རྣམས་ཡིན་ཏེ། དེ་དག་ནི་མྱ་ངན་ཅན་ཡིན་ལ་དེ་བཞིན་གཤེགས་པ་ནི་མྱ་ངན་མེད་པའོ། །རི་ཞེས་བྱ་བ་ནི་ཐར་པ་ཡིན་ཏེ་
རི་རབ་བཞིན་དུ་བརྟན་པའི་ཕྱིར་རོ། །ས་ཞེས་བྱ་བ་ནི་འདུ་བྱེད་རྣམས་སོ། །བྱིས་པ་ཐམས་ཅད་ནི་ས་ལ་འཁོད་པའོ། །ཤེས་རབ་ཅན་ཞེས་བྱ་བ་ནི་རྫོགས་པའི་སངས་རྒྱས་ཀྱི་དོན་ཏེ། དེ་བཞིན་གཤེགས་པ་ནི་མྱ་ངན་མེད་ཅིང་བརྟན་པའི་
ཕྱིར་རོ། །སངས་རྒྱས་ནི་མྱ་ངན་ཅན་གྱི་ནང་ན་མྱ་ངན་མེད་པ་སྟེ། སེམས་ཅན་རྣམས་ཀྱི་མྱ་ངན་གྱི་ཟུག་རྔུ་སེལ་བ་སྟེ། །གསོལ་པ། གལ་ཏེ་དེ་བཞིན་གཤེགས་པ་མྱ་ངན་ལས་མ་འདས་ན་ནི་ད་དུང་མྱ་ངན་མངའ་སྟེ། རྫོགས་པར་

49-1-116b

སངས་མ་རྒྱས་པ་ཞེས་བགྱིའོ། །བཀའ་སྩལ་པ། རྒྱུ་ཡོད་དེ་གང་ན་གདུལ་བར་བྱ་བ་རྣམས་ཡོད་པ་དེར་ནི་རྫོགས་པའི་སངས་རྒྱས་སྣང་སྟེ་དེར་སྐྱེ་བ་ལྟ་བུར་སྟོན་ཏོ། །དེ་བས་ན་དེ་བཞིན་གཤེགས་པ་ནི་རྟག་པ་ཡིན་ཏེ་སངས་རྒྱས་བྱ་
བཞད་དང་ཟལ་མོ་ལྟ་བུ་ཞེས་བྱའོ།། །། བམ་པོ་བཅུ་གཅིག་པ། རིགས་ཀྱི་བུ་དཔེར་ན་ཟླ་བ་ནི་ཉིན་པར་སྣང་བ་ན་ཁ་ཅིག་ཏུ་ལྟུང་བ་ལྟ་བུར་སྣང་སྟེ། དེ་ནས་སེམས་ཅན་རྣམས་ཀྱིས་ཟླ་བ་ལྷུང་ངོ་སྙམ་དུ་འཛིན་ཏོ། །
ཟླ་བ་ནི་མེད་པར་མི་འགྱུར་ཏེ། གླིང་གཞན་དུ་འཆར་བར་འགྱུར་ལ་དེར་ཡང་ཟླ་བ་སྐྱེས་པ་མེད་དོ། །སེམས་ཅན་རྣམས་ཀྱིས་ནི་ཟླ་བ་ཤར་ཏོ་སྙམ་དུ་འཛིན་ཏེ། ཟླ་བ་ནི་ལྟུང་བ་ལྟ་བུར་སྣང་ཡང་འཇིག་པར་མི་འགྱུར་ལ་འཆར་བ་ལྟ་བུར་སྣང་
ཡང་སྐྱེ་བ་མེད་དེ། རིའི་རྒྱལ་པོ་རི་རབ་ཀྱིས་བསྒྲིབས་པས་མི་སྣང་བར་ཟད་ལ། ཟླ་བ་ནི་རང་བཞིན་གྱིས་སྐྱེས་ཟིན་པ་ཡིན་ཏེ་སྣང་བྱེད་རྣམས་ཀྱི་ཆོས་ཉིད་ནི་དེ་ཡིན་ནོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འཛམ་བུའི་གླིང་ལ་ལར་ནི་ཕ་མ་ཕྲད་པ་ལས་སྐྱེས་པར་ཡང་སྣང་སྟེ་སེམས་ཅན་རྣམས་ཀྱིས་སྐྱེས་སོ་སྙམ་དུ་འཛིན་ལ། དེ་བཞིན་གཤེགས་པ་ལ་ནི་སྐྱེས་པ་མེད་དོ། །
འཛམ་བུའི་གླིང་ལ་ལར་ནི་ཡོངས་སུ་མྱ་ངན་ལས་འདའ་བ་ལྟ་བུར་སྣང་ལ་དེ་བཞིན་གཤེགས་པ་ལ་ནི་འཆི་བ་མེད་དོ། །སེམས་ཅན་རྣམས་ཀྱིས་ནི་ཤིའོ་སྙམ་དུ་འཛིན་ཏེ། དེ་བཞིན་གཤེགས་པ་ནི་ལྷུང་སྐྱེ་བ་ལྟ་བུར་སྣང་ཡང་སྐྱེ་བ་ཡང་མེད། 
འཆི་བ་ཡང་མེད་དོ། །གདུལ་བར་བྱ་བའི་དབང་གིས་ནི་ཟླ་བ་བཞིན་དུ་ཡང་རྒྱུ་བར་མཛད་དོ། །ཟླ་བ་ནི་གླིང་ཁ་ཅིག་ཏུ་ཟླ་བ་ཉ་བ་ཡོངས་སུ་རྒྱས་པ་ལྟ་བུར་སྣང་སྟེ་སེམས་ཅན་རྣམས་ཟླ་བ་ཉའི་སྙམ་དུ་འཛིན་ཏོ། །ཟླ་བ་ནི་གླིང་ཁ་ཅིག་ཏུ་
ཡི་གེ་ཏ་འདྲ་བར་ཟླ་བ་ཚེས་པར་ཡང་སྣང་སྟེ་འཛམ་བུའི་གླིང་པ་རྣམས་ཀྱིས་དེང་ཟླ་བ་ཚེས་གཅིག་ཡིན་ནོ་སྙམ་དུ་འཛིན་ཏོ། །དེ་ནས་ཟླ་བ་ཕྱེད་པར་འཛིན་ཏོ། །དེ་ནས་ཚེས་བཅྭ་ལྔ་ཡིན་ནོ་སྙམ་སྟེ་ཟླ་བ་ཉ་བར་འཛིན་ཏོ། །ཁ་ཅིག་གིས་ནི་ཟླ་

49-1-117a

བ་ཕྱེད་ཡིན་པར་འཛིན་ཏེ། ཟླ་བ་ནི་ཕྱེད་དུ་འགྱུར་ཞིང་འཆར་བ་ཡང་མེད། ལྟུང་བ་ཡང་མེད་དེ། ཟླ་བ་ནི་རི་རབ་ཀྱི་རྐྱེན་གྱིས་དེ་ལྟར་སྣང་ངོ་། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཀྱང་འཛམ་བུའི་གླིང་ལ་ལར་ནི་ཡོངས་སུ་མྱ་ངན་ལས་འདའ་བ་ལྟ་བུར་སྣང་སྟེ། སེམས་ཅན་རྣམས་ཀྱིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སོ་སྙམ་དུ་འཛིན་ཏོ། །འཛམ་བུའི་གླིང་ལ་ལར་ནི་ཟླ་བ་ཚེས་
པ་བཞིན་དུ་སྐྱེ་བ་ལྟ་བུར་སྣང་སྟེ། སེམས་ཅན་རྣམས་ཀྱིས་ཁྱེའུ་འདི་སྐྱེས་སོ་སྙམ་དུ་འཛིན་ཏོ། །ཟླ་བ་ཚེས་གཉིས་དང་འདྲ་བར་ནི་ལྷའི་ཐད་དུ་འགྲོ་བར་འཛིན་ཏོ། །ཟླ་བ་ཚེས་གསུམ་དང་འདྲ་བར་ནི་ཡི་གེ་སློབ་པའི་སར་འགྲོ་བར་འཛིན་ཏོ། །ཟླ་བ་
ཚེས་བརྒྱད་ལྟ་བུར་ནི་རབ་ཏུ་འབྱུང་བར་སྟོན་ཏོ། །ཟླ་བ་ཉ་བ་ལྟ་བུར་ནི་འོད་ཀྱིས་མུན་པ་བསལ་བ་བཞིན་དུ་བདུད་བྱེ་བ་སྙེད་བརླག་ནས་ལམ་མེར་བཞུགས་སོ། །ཟླ་བ་ནུབ་པ་ལྟ་བུར་ནི་ཡོངས་སུ་མྱ་ངན་ལས་འདའ་བར་སྟོན་ཏེ། ཟླ་བ་གཟའ་རྣམས་
ཀྱིས་བསྐོར་བ་བཞིན་དུ་མཚན་སུམ་བཅུ་རྩ་གཉིས་དང་དཔེ་བྱད་བཟང་པོ་བརྒྱད་བཅུས་བརྒྱན་ཏོ། །དེར་ཁ་ཅིག་གིས་ནི་ལྷུང་བར་འཛིན། ཁ་ཅིག་གིས་ནི་སྐྱེ་བར་འཛིན་ལ་སྐྱེས་པ་ཡང་མེད་འགགས་པ་ཡང་མེད་དེ། དེ་བཞིན་གཤེགས་
པ་ནི་ཟླ་བ་ཉ་བ་བཞིན་དུ་དུས་ཐམས་ཅད་དུ་རྟག་པ་ཡིན་ནོ། །དེ་བས་ན་དེ་བཞིན་གཤེགས་པ་རྟག་པ་དང་བརྟན་པ་ཞེས་བྱའོ། །དཔེར་ན་ཟླ་བ་ནི་ཐམས་ཅད་དུ་སྣང་སྟེ། ཆུ་དང་དགོན་པ་དང་ཁྱིམ་དང་གྲོང་ཁྱེར་དང་། ཆུ་ར་ཆུས་གང་བ་རྣམས་དང་ཁྲོན་
པ་དང་། གཞན་ཡང་དཔག་ཚད་སྟོང་སྲིད་དུ་ཡང་རུང་སེམས་ཅན་རྣམས་གང་དུ་འགྲོ་བ་དེ་དག་ཐམས་ཅད་དུ་སྣང་སྟེ། དེར་བྱིས་པ་རྣམས་ཀྱིས་ཡིད་ལ་ཟླ་བ་འདི་ནི་བདག་ཁོ་ནའི་ཕྱི་བཞིན་འབའ་ཤིག་ཏུ་འོང་ངོ་སྙམ་དུ་འཛིན་ཏོ། །གང་གི་ཚེ་
ཁྱིམ་གྱི་ནང་དུ་མཐོང་བ་དེའི་ཚེ་ནི་ད་ནི་འདི་ན་སྣང་ན་ཟླ་བ་འདི་དེ་ཉིད་ཡིན་ནམ། འོན་ཏེ་གཞན་ཞིག་ཡིན་ཞིག་གུ་སྙམ་དུ་རྟོག་གོ། །དེ་ལ་བྱིས་པ་ཁ་ཅིག་གིས་ནི་ཟླ་བ་ཆུ་ར་ཙམ་དུ་འཛིན་ཏོ། །བར་མ་རྣམས་ཀྱིས་ནི་ཤིང་རྟའི་འཕང་ལོའི་ཚད་

49-1-117b

ཙམ་དུ་འཛིན་ཏོ། །རབ་རྣམས་ཀྱིས་ནི་ཟླ་བ་དཔག་ཚད་ལྔ་བཅུ་པ་ཙམ་ལ་ཟླུམ་པོ་ཡིན་པར་ཤེས་སོ། །དུད་འགྲོ་རྣམས་ཀྱིས་ནི་ཟླ་བ་སྲིན་བུ་མེ་ཁྱེར་ཙམ་དུ་མཐོང་སྟེ། སྐྱེ་གནས་ཐམས་ཅད་དང་ལྡན་པའི་དུད་འགྲོ་རྣམས་ཀྱིས་ཟླ་བ་ལ་རང་
རང་གི་རྣམ་པར་ཤེས་པས་བརྟགས་ནས་སོ་སོར་མཐོང་ངོ་། །དེ་བཞིན་དུ་དེ་བཞིན་གཤེགས་པ་ཡང་འཇིག་རྟེན་དུ་བྱུང་ན་ཐམས་ཅད་དུ་སྣང་སྟེ། སེམས་ཅན་ཁ་ཅིག་གིས་དེ་བཞིན་གཤེགས་པ་ཟླ་བ་དང་འདྲ་བར་འཛིན་ཏེ། བདག་ལ་
ཐུགས་བརྩེ་བའི་ཕྱིར་བདག་གི་ཁྱིམ་གྱི་ཕུགས་ན་བཞུགས་སོ་སྙམ་མོ། །དུད་འགྲོ་རྣམས་ཀྱིས་ནི་རང་རང་གི་སྐྱེ་གནས་ཀྱི་ལུས་ལྟ་བུར་མཐོང་ངོ་། །སེམས་ཅན་ལྐུག་པ་རྣམས་ཀྱིས་ནི་དེ་བཞིན་གཤེགས་པ་ལྐུག་པར་མཐོང་ངོ་། །
འོན་པ་དང་ལག་རྡུམ་རྣམས་ཀྱིས་ཀྱང་བདག་ཉིད་དང་འདྲ་བར་མཐོང་ངོ་། །སྐད་དང་། འདུ་ཤེས་དང་། ཡི་གེ་ཐ་དད་པ་རྣམས་ཀྱིས་ཀྱང་བདག་ཅག་དང་འདྲའོ་སྙམ་དུ་འཛིན་ཏེ་བདག་གི་སྐད་དུ་སྨྲའོ། །བདག་གི་འདུ་ཤེས་དང་འཐུན་ནོ། །བདག་
གི་ཁ་ཟས་ཟའོ་སྙམ་དུ་འཛིན་ཏོ། །ལུས་ཆེ་བ་རྣམས་ཀྱང་དེ་བཞིན་གཤེགས་པ་ནི་བདག་ཅག་དང་འདྲའོ་སྙམ་དུ་འཛིན་ཏོ། །ཁ་ཅིག་གིས་ནི་ཉན་ཐོས་དང་རང་སངས་རྒྱས་ཡིན་ནོ་སྙམ་དུ་འཛིན་ཏོ། །ཁ་ཅིག་གིས་ནི་ཡ་མཚན་ཅན་ཐམས་
ཅད་ཀྱི་ནང་དུ་རབ་ཏུ་བྱུང་བར་མཐོང་ངོ་། །ཁ་ཅིག་གིས་ནི་དེ་བཞིན་གཤེགས་པ་བདག་ཅག་གི་ཕྱིར་འཇིག་རྟེན་དུ་བྱུང་ངོ་སྙམ་དུ་འཛིན་ཏོ། །དཔེར་ན་ཟླ་བ་རང་བཞིན་དུ་གནས་པས་སོ་སོའི་རང་བཞིན་དུ་ཐམས་ཅད་མགུ་བར་བྱེད་པ་དེ་
བཞིན་དུ། དེ་བཞིན་གཤེགས་པ་ཡང་ཆོས་ཀྱི་སྐུ་ཡིན་བཞིན་དུ་ཐབས་ཀྱི་སྐུ་དུག་སྨན་གྱི་སྡོང་པོ་དང་འདྲ་བར་འཛིན་ཅིང་སེམས་ཅན་རྣམས་མགུ་བར་མཛད་དེ། འཇིག་རྟེན་ཐམས་ཅད་དང་འཐུན་པར་མཛད་པ་དག་གིས་སྐྱེས་
པའི་རབས་སྟོང་ཕྲག་མང་པོ་སྟོན་པར་མཛད་དོ། །དེ་བས་ན་དེ་བཞིན་གཤེགས་པ་ནི་ཐམས་ཅད་དུ་སྐྱེ་བ་སྟོན་པའི་ཕྱིར་སྐྱེས་པའི་རབས་ཀྱི་ཟླ་བ་ཞེས་བྱའོ། །དེ་བས་ན་དེ་བཞིན་གཤེགས་པ་རྟག་པ་དང་བརྟན་པ་ཡིན་ནོ། །

49-1-118a

རིགས་ཀྱི་བུ་གཞན་ཡང་དཔེར་ན་ཟླ་བ་དང་ལྷ་མ་ཡིན་གྱི་དབང་པོ་སྒྲ་གཅན་ཕྲད་པའི་ཚེ་འཇིག་རྟེན་པ་རྣམས་ཀྱི་ཟླ་བ་གཟས་ཟིན་ཏོ་སྙམ་དུ་འཛིན་ཏེ། སྒྲ་གཅན་ནི་ཟླ་བ་ལ་འཛིན་པར་ཡང་མི་བྱེད་ལ། དེས་ནི་དེ་ལ་ཟ་བར་ཡང་མི་ནུས་ཏེ་
སྒྲ་གཅན་གྱི་ལག་པས་ཟླ་བ་བསྒྲིབས་ནས་འོད་མི་སྣང་བར་བྱེད་པར་ཟད་དེ། ཟླ་བ་ལ་རྨ་ཡང་མེད། ཉོན་མོངས་པ་ཡང་མེད་དོ། །ཇི་ཙམ་དུ་སྒྲ་གཅན་གྱི་ལག་པས་ཟླ་བ་བཀབ་པ་དེ་ཙམ་དུ་ཟླ་བའི་འོད་མི་སྣང་བར་འགྱུར་ལ། སྒྲ་གཅན་གྱིས་ཟླ་བ་
བཏང་བའི་ཚེ་ནི་ཁ་ནས་བྱུང་བ་ལྟ་བུར་སྣང་སྟེ། མི་རྣམས་ཀྱིས་ཟླ་བ་ནི་སྡུག་བསྔལ་ཞིང་འདུག་གོ་སྙམ་དུ་འཛིན་ཏོ། །ཟླ་བ་ནི་རང་བཞིན་ཁོ་ནར་འདུག་བཞིན་དུ་བདག་ཉིད་སྒྲ་གཅན་དང་ལྷན་ཅིག་འདུག་པར་སྟོན་ཏེ། འདི་ནི་འཇིག་རྟེན་གྱི་ཆོས་ཉིད་
དོ། །སྒྲ་གཅན་བྱེ་བ་སྙེད་ཀྱིས་ཀྱང་ཟླ་བ་གསད་པའམ་གཞིག་པར་མི་ནུས་ཏེ་ཟླ་བ་རང་ཉིད་དེ་ལྟར་སྟོན་ཏོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉིད་ཟླ་བ་ལྟ་བུར་སྟོན་པར་མཛད་དེ། མ་འོངས་
པའི་དུས་ཀྱི་དོན་དུ་ངན་སེམས་ཀྱིས་ཁྲག་ཕྱུང་བའི་མཚམས་མེད་པའི་ལས་བསྟན་པའི་ཕྱིར་དེ་ལ་སོགས་པའི་འདོད་ཆེན་པའི་མཐའ་དང་དགེ་འདུན་གྱི་དབྱེན་གྱི་ཆོས་ཐ་དད་པ་ཡང་སྟོན་པར་མཛད་དོ། །དེ་བཞིན་གཤེགས་པའི་སྐུ་ལ་ནི་
བདུད་བྱེ་བ་ཕྲག་འབུམ་གྱིས་ཀྱང་ཁྲག་དབྱུང་བར་མི་ནུས་ལ། དེ་བཞིན་གཤེགས་པའི་སྐུ་ལ་ནི་ཁྲག་དང་། རུས་པ་དང་། རྒྱུས་པ་ཡང་མེད་དེ། སྡུག་བསྔལ་བའི་བག་ཀྱང་མེད་དོ། །སེམས་ཅན་རྣམས་ཀྱིས་ནི་གཞི་གསུམ་མ་རུང་ངོ་། །
དེ་བཞིན་གཤེགས་པ་ལ་རྨ་བྱུང་ངོ་སྙམ་དུ་འཛིན་ཏོ། །དེ་བཞིན་གཤེགས་པ་ནི་རང་བཞིན་ཁོ་ནར་བཞུགས་མོད་ཀྱི། དེ་ལྟར་འཇིག་རྟེན་དང་འཐུན་པར་སྟོན་ཏོ། །འདི་ལྟ་སྟེ་མི་ལ་ལས་མི་ཞིག་ལ་འབྲེང་པའམ་དབྱུག་པས་བསྣུན་ཏེ་
ཁྲག་ཕྱུང་བའམ། གསད་པའི་སེམས་ཀྱིས་དེ་བསད་ནས། དེའི་འོག་ཏུ་དེ་བཞིན་གཤེགས་པས་ལས་དེ་བཙན་པར་མཛད་པར་དགོངས་ཏེ་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ན། མི་དེའི་སེམས་ཐུགས་སུ་

49-1-118b

ཆུད་ནས་མཚམས་མེད་པའི་ལས་ཡང་དག་པར་སྟོན་པར་མཛད་དོ། །དེ་ལྟར་ན་དེ་བཞིན་གཤེགས་པ་ནི་མ་འོངས་པའི་དོན་གྱི་ཕྱིར་ལས་ཀྱི་རྣམ་པར་དབྱེ་བ་སྟོན་པར་མཛད་དོ། །དཔེར་ན་སྨན་པ་ལ་ལ་ཞིག་གིས་རང་གི་བུ་ལ་རྩ་བའི་
མིང་གི་རྣམ་གྲངས་སློབ་པར་བྱེད་དེ། འདི་ནི་རྩ་བ་ལྔའོ། །འདི་ནི་ཁ་བའོ་ཞེས་རྩ་བའི་རྣམ་པར་དབྱེ་བ་དག་གི་སྒོ་ནས་ངོ་སྟོན་པར་བྱེད་དེ། ཁྱེའུ་དེས་ཀྱང་དེ་ལྟར་བསླབས་ནས་རྩ་བའི་རྣམ་པར་དབྱེ་བ་ཤེས་པར་གྱུར་ལ། དེ་ནས་སྨན་པ་དེ་ཤི་
ནས་ཁྱེའུ་དེ་ན་རེ་ཀྱི་ཧུད་ཕ་ཅིག་ཀྱི་ཧུད་ཕ་ཅིག་ཁྱོད་ཀྱིས་བདག་རྩ་བའི་རྣམ་པར་དབྱེ་བ་བསླབས་ཏེ་རྩ་བ་འདི་ནི་འདི་འདྲའོ། །ལོ་མ་ནི་འདི་འདྲའོ་ཞེས་དེ་སྐད་ཟེར་བ་དེ་བཞིན་དུ་དེ་བཞིན་གཤེགས་པས་ཀྱང་བསླབ་པའི་གཞི་ཐམས་ཅད་ཀྱི་སྤྲུལ་པ་
སྤྲུལ་པར་མཛད་དེ། གསོར་རུང་བ་དང་། གསོར་མི་རུང་བ་དང་། མཚམས་མེད་པ་དང་། མདོ་སྡེ་སྤོང་བ་དང་། འདོད་ཆེན་པའི་མཐའ་རྣམས་སྟོན་པར་མཛད་དེ། མ་འོངས་པའི་དུས་ན་འདི་ལྟ་བུར་འགྱུར་རོ་ཞེས་བྱ་བའི་
དོན་ཏོ། །དེ་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་དགེ་སློང་རྣམས་ཀྱིས་སྨན་པའི་བུ་བཞིན་དུ་དེ་བཞིན་གཤེགས་པས་མདོ་སྡེ་ལས་འདི་སྐད་ཅེས་བཀའ་སྩལ་ཏེ། ལས་འདི་ནི་འདི་ཡིན་ནོ་སྙམ་དུ་ཤེས་སོ། །
དཔེར་ན་ཟླ་བ་ལ་གཟའ་འཇུག་པ་ན་མི་རྣམས་ཀྱིས་ནི་ཟླ་བ་དྲུག་ཅིང་ཟླ་བ་ལ་གཟའ་འཇུག་པར་ཤེས་སོ། །སྟེང་གི་ལྷ་རྣམས་ཀྱིས་ནི་ཉིན་གཅིག་བཞིན་དུ་ཟླ་བ་ལ་གཟའ་འཇུག་པ་ཤེས་ཏེ། ཅིའི་ཕྱིར་ཞེ་ན། དེ་དག་གི་ལོ་ཚིགས་རིང་ལ་
མི་རྣམས་ཀྱི་ལོ་ཚིགས་ཐུང་བའི་ཕྱིར་རོ། །རིགས་ཀྱི་བུ་དེ་བཞིན་དུ་ལྷ་རྣམས་དང་མི་རྣམས་ཀྱིས་ནི་དེ་བཞིན་གཤེགས་པ་སྐུ་ཚེ་ཐུང་ངོ་སྙམ་དུ་འཛིན་ཏོ། །ཇི་ལྟར་ལྷ་གོང་མ་གོང་མ་རྣམས་ཀྱིས་སྐད་ཅིག་སྐད་ཅིག་ལ་ཟླ་བ་ལ་གཟའ་
འཇུག་པར་འཛིན་པ་དེ་བཞིན་དུ། ལྷ་གོང་མ་གོང་མ་རྣམས་ཀྱིས་སྐད་ཅིག་སྐད་ཅིག་ལ་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བ་བྱེ་བ་སྙེད་ཀྱང་སྟོན་པར་མཛད་དོ། །ཉོན་མོངས་པ་དང་། ཕུང་པོ་དང་ལྷ་དང་། འཆི་

49-1-119a

བདག་གི་བདུད་བྱེ་བ་སྙེད་ཀྱང་སྟོན་པ་དང་། སྐྱེས་པའི་རབས་སྟོང་སྙེད་ཀྱང་སྟོན་པ་དང་། འཇིག་རྟེན་དང་འཐུན་པར་བྱ་བ་མང་པོ་དག་སྟོན་པར་ཤེས་སོ། །དེ་ལྟར་ན་དེ་བཞིན་གཤེགས་པ་ནི་དཔག་ཏུ་མེད་
པ་ཡིན་ཏེ། དེ་བས་ན་རྟག་པ་དང་བརྟན་པ་ཡིན་ནོ། །དཔེར་ན་ཟླ་བ་ནི་སེམས་ཅན་ཐམས་ཅད་ཀྱི་ཡིད་དུ་འོང་ཞིང་བལྟ་ན་སྡུག་པ་ཡིན་པས་ན་དེའི་ཕྱིར་མིང་ཟླ་བ་ཞེས་བྱའོ། །འདོད་པའི་དབང་དུ་གྱུར་པ་འདོད་ཆགས་དང་། ཞེ་སྡང་
དང་། གཏི་མུག་སྤྱོད་པ་རྣམས་ཀྱི་ཡིད་དུ་འོང་བ་ནི་མ་ཡིན་ནོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་རང་བཞིན་གྱིས་སེམས་ཅན་ཆོས་འདོད་པ་རྣམས་ཀྱི་ཡིད་དུ་འོང་བ་དང་
མཆོག་ཏུ་བལྟ་ན་སྡུག་པ་ཡིན་ནོ། །སྡང་བའི་སེམས་དང་ལྡན་པ་གཞན་དག་གི་ཡིད་དུ་འོང་བ་ནི་མ་ཡིན་ཏེ། དེ་བས་ན་དེ་བཞིན་གཤེགས་པ་ཟླ་བ་དང་འདྲ་བ་ཡིན་ནོ། །དཔེར་ན་ཉི་མ་དུས་ཚིགས་གསུམ་དུ་འགྱུར་ཞིང་འཕོ་སྟེ། དགུན་དང་། དབྱར་དང་སོ་ཀའི་དུས་གསུམ་དུ་རྒྱུ་བར་བྱེད་
ལ་དགུན་ནི་ཉི་མ་མྱུར་བ་ཁོ་ནར་འགྲོའོ། །དབྱར་ནི་ཉི་མ་འབྲིང་ཙམ་དུ་འགྲོའོ། །སོས་ཀའི་ནི་ཉི་མ་རིང་དུ་ཐོགས་ཤིང་འགྲོ་སྟེ་འོད་ཤིན་ཏུ་ཚའོ། །དེ་བཞིན་གཤེགས་པ་ཡང་འཇིག་རྟེན་གསུམ་དུ་སྐྱེ་བ་རྣམ་པ་གསུམ་སྟོན་པར་
མཛད་དེ། སེམས་ཅན་ཚེ་ཐུང་ངུ་རྣམས་ཀྱི་ནང་དུ་ནི་མཆོག་ཏུ་སྐུ་ཚེ་ཐུང་བར་སྟོན་ཏེ། སེམས་ཅན་རྣམས་ཀྱིས་སངས་རྒྱས་སྐུ་ཚེ་ཐུང་ངོ་སྙམ་དུ་འཛིན་ཏོ། །ཉན་ཐོས་ཀྱི་ཐེག་པ་པ་རྣམས་ལ་ནི་དགུན་གྱི་ཉི་མ་བཞིན་དུ་སྐུ་ཚེ་
ཐུང་བར་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་དབྱར་གྱི་ཉི་མ་བཞིན་དུ་སྐུ་ཚེ་འབྲིང་དུ་སྟོན་ཏོ། །སངས་རྒྱས་རྣམས་ལ་ནི་སོ་ཀའི་ཉི་མ་བཞིན་དུ་བསྐལ་པའམ་བསྐལ་པ་ལས་ལྷག་པར་བཞུགས་
པར་སྣང་ངོ་། །རིགས་ཀྱི་བུ་ཐེག་པ་ཆེན་པོ་འདི་ལས་དགོངས་པའི་ཚིག་དེ་བཞིན་གཤེགས་པའི་གསང་བའི་དམ་པའི་ཆོས་ཀྱི་ཆར་ངས་ཡང་དག་པར་བསྟན་པར་བྱ་སྟེ། མ་འོངས་པའི་དུས་ན་དམ་པའི་ཆོས་ཐེག་པ་ཆེན་པོའི་

49-1-119b

མདོའི་སྡེ་ཚན་གྱི་ཕན་པའི་གདམས་ངག་སྟོན་པ་གང་ཡིན་པ་དེ་དག་ནི་དབྱར་གྱི་ནམ་གྱི་སྤྲིན་དང་འདྲ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་རིག་པར་བྱའོ། །ཉན་ཐོས་དང་རང་སངས་རྒྱས་རྣམས་ནི་དགོངས་
པའི་ཚིག་ཐོས་ན་དགུན་གྱི་གྲང་ནད་ཀྱིས་ཐེབས་པ་དང་འདྲ་སྟེ། དེའི་ཕྱིར་ངས་སྐུ་ཚེ་ཐུང་བ་དང་ངེས་པར་མྱོང་བར་འགྱུར་བ་ཡང་དག་པར་བསྟན་ཏོ། །སངས་རྒྱས་ཀྱི་ཚེ་བསྟན་པ་སངས་རྒྱས་ཀྱི་གནས་རྒྱ་ཆེན་པོ་ལས་ནི་སོ་ཀའི་ཉི་མ་
བཞིན་དུ་ངས་རྟག་པ་དང་བརྟན་པར་བསྟན་ཏོ། །ང་ནི་ཉི་མ་བཞིན་དུ་གང་དུ་ཡང་ལྟུང་བ་མེད་དེ། ཉི་ཟླའི་ཆོས་ཉིད་ཀྱང་སྤྱོད་དོ། །དེ་ལྟར་ན་དེ་བཞིན་གཤེགས་པ་ནི་འཇིག་རྟེན་གསུམ་དུ་ཡང་དག་པར་སྣང་སྟེ། འདི་ནི་སངས་
རྒྱས་རྣམས་ཀྱི་ཆོས་ཉིད་དོ། །རིགས་ཀྱི་བུ་གཞན་ཡང་པ་བ་སངས་དང་། ཕུར་བུ་དང་། མིག་དམར་དང་། མཇུག་རིངས་དང་། གཟའ་ལྷག་ལ་སོགས་པ་ཉི་མ་དང་ཟླ་བ་གཉིས་དང་ལྷན་ཅིག་འགྲོ་བ་ན་སེམས་ཅན་
རྣམས་ཀྱིས་བལྟ་བར་མི་ནུས་ལ་དེ་དག་ཀྱང་ལྡོག་པར་ཡང་མི་འགྱུར། ལྟུང་བར་ཡང་མི་འགྱུར་ཏེ། དེ་དག་གི་འོད་ཆེས་ཆ་ཕྲ་ལ་ཉི་མ་དང་ཟླ་བའི་འོད་ཤིན་ཏུ་ཆེ་བས་ཟིལ་གྱིས་ནོན་པའི་ཕྱིར་རོ། །དེ་བཞིན་དུ་དེ་བཞིན་གཤེགས་
པ་ནི་རྟག་ཏུ་ཉན་ཐོས་དང་རང་སངས་རྒྱས་ཀྱི་གཟའི་ཚོགས་རྣམས་དང་ལྷན་ཅིག་ཏུ་སྐྱེ་བ་ལྟ་བུར་ཡང་སྟོན་ལ་ཡོངས་སུ་མྱ་ངན་ལས་འདའ་བར་ཡང་སྟོན་མོད་ཀྱི། ཉན་ཐོས་དང་རང་སངས་རྒྱས་དེ་དག་མི་རྟག་པ་ཡང་མ་ཡིན་
མི་བརྟན་པ་ཡང་མ་ཡིན་ཏེ། དེ་དག་ནི་རྟག་པ་དང་བརྟན་པ་ཡིན་བཞིན་དུ་ཉིན་པར་གྱི་གཟའ་དང་འདྲ་བར་སེམས་ཅན་གྱིས་མཐོང་བར་མི་ནུས་སོ། །ཉི་མ་དང་འདྲ་བ་འདི་ནི་རང་སངས་རྒྱས་རྣམས་ཀྱི་ཆོས་ཉིད་ཡིན་ནོ། །དཔེར་ན་ཉི་མ་དང་ཟླ་
བ་སྤྲིན་གྱིས་གཡོགས་པའི་ཚེ་མི་སྣང་སྟེ། སེམས་ཅན་རྣམས་ཀྱིས་མི་སྣང་ངོ་སྙམ་དུ་འཛིན་མོད་ཀྱི། དེ་གཉིས་མེད་པར་ཡང་མི་འགྱུར་རོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་འཇིག་རྟེན་ན་མི་བཞུགས་པའི་ཚེ་ཉི་ཟླ་སྤྲིན་

49-1-120a

གྱིས་གཡོགས་པ་བཞིན་དུ་གཞི་གསུམ་འཇིག་པ་ལྟ་བུར་སྣང་མོད་ཀྱི། གཞི་གསུམ་མེད་པར་ཡང་མི་འགྱུར་ལ་རྟག་པ་དང་། བརྟན་པ་དང་། ཐེར་ཟུག་པར་འདུག་བཞིན་དུ་ཉེས་པ་རྣམས་ཀྱིས་ཀྱང་
གོས་པར་མི་འགྱུར་བ་འདི་ནི་སངས་རྒྱས་རྣམས་ཀྱི་ཆོས་ཉིད་དོ། །རིགས་ཀྱི་བུ་དཔེར་ན་ཟླ་བ་ཡར་ཀྱི་ངོ་ཡང་མ་ཡིན། མར་གྱི་ངོ་ཡང་མ་ཡིན་པ་གནམ་སྟོང་གི་ཉིན་པར་ཉི་མ་དང་ཟླ་བ་མེད་པའི་སྐབས་སུ་གཟའ་མཇུག་རིངས་གཟི་བརྗིད་དྲག་
པོ་དང་ལྡན་པ་ཞེས་བྱ་བ་ཤར་ནས་འཇིག་རྟེན་ཐམས་ཅད་ཀྱིས་མ་ཚོར་བར་སྐད་ཅིག་གཅིག་ཁོ་ན་ལ་མི་སྣང་བར་འགྱུར་རོ། །རིགས་ཀྱི་བུ་དེ་བཞིན་དུ་རང་སངས་རྒྱས་རྣམས་ཀྱང་སངས་རྒྱས་རྣམས་མི་བཞུགས་པའི་ཚེ་གནམ་སྟོང་གི་ཉིན་
པར་གཟའ་མཇུག་རིངས་འཆར་བ་བཞིན་དུ་བྱུང་ནས་སེམས་ཅན་བྱེ་བ་ཕྲག་མང་པོ་དམ་པའི་ཆོས་ལ་བཀོད་ནས་མི་སྣང་བར་འགྱུར་ལ། མཇུག་རིངས་ཀྱང་རྟག་ཏུ་ཡོད་དེ་སེམས་ཅན་རྣམས་ཀྱིས་ནི་མཐོང་བར་མི་ནུས་སོ། །དེ་བཞིན་དུ་རང་སངས་
རྒྱས་རྣམས་ཀྱང་རྟག་ཏུ་ཡོད་བཞིན་དུ་དེ་དག་སེམས་ཅན་རྣམས་ཀྱིས་མཐོང་བར་མི་ནུས་ཏེ། བདག་ཉིད་ཡང་དག་པར་སྟོན་ཅིང་མི་མངོན་པར་བྱེད་པ་འདི་ནི་དེ་དག་གི་ཆོས་ཉིད་དོ། །རིགས་ཀྱི་བུ་དཔེར་ན་ཉི་མ་ཤར་ན་ལྷོ་བུར་མེད་པར་འགྱུར་
བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་བྱུང་ན་ཐོས་པ་ཙམ་གྱིས་ཀྱང་ཕམ་པ་རྣམས་དང་། མཚམས་མེད་པའི་ལས་རྣམས་ཀྱི་སྡིག་པའི་ཕུང་པོ་མྱུར་དུ་མེད་པར་འགྱུར་རོ། །དེ་ལྟར་ན་ཡོངས་སུ་མྱ་ངན་
ལས་འདས་པ་ཆེན་པོའི་མདོ་ཆེན་པོ་བསམ་གྱིས་མི་ཁྱབ་པའི་ཡུལ་འདི་ནི་དེ་བཞིན་གཤེགས་པའི་སྙིང་པོ་སྟོན་པ་ཡིན་པའི་ཕྱིར་དཔག་ཏུ་མེད་དོ། །དེ་བས་ན་རིགས་ཀྱི་བུ་འམ། རིགས་ཀྱི་བུ་མོ་རྣམས་ཀྱིས་དེ་བཞིན་གཤེགས་པ་རྟག་གོ །
དམ་པའི་ཆོས་ནུབ་པར་མི་འགྱུར་རོ། །དགེ་འདུན་མེད་པར་མི་འགྱུར་རོ་སྙམ་དུ་མདོའི་ཤེས་པ་ལ་དེ་ལྟར་བརྩོན་པར་བྱའོ། །དེ་ལྟར་བྱས་དང་དེ་དག་ཀྱང་ང་དང་འདྲ་བར་སངས་རྒྱས་ཀྱི་གནས་སུ་གསོན་པར་འགྱུར་རོ། །གསོལ་པ། 

49-1-120b

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཇི་ལྟ་བུ་ལགས། བཀའ་སྩལ་པ། སེམས་བསྐྱེད་པ་ཡང་རུང་། སེམས་མ་བསྐྱེད་པ་ཡང་རུང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སུ་
འགྱུར་རོ། །གསོལ་པ་དེ་ཅི་ལྟ་བུ་ལགས། བཀའ་སྩལ་པ། རིགས་ཀྱི་བུ་དཔེར་ན་དགུན་མར་འཁྱགས་པ་ཉི་ཚན་གྱིས་ཀྱང་བཞུ་མི་ནུས་པ་དེ་བཞིན་དུ་མདོ་སྡེ་དང་། ཏིང་ངེ་འཛིན་ཐམས་ཅད་བསྒོམ་པར་བྱ་བ་བསྒོམས་པའི་
འབྲས་བུའི་སྒོ་ནས་ནི་སེམས་བསྐྱེད་པ་རྣམས་ཀྱིས་ཀྱང་བྱང་ཆུབ་ཐོབ་པར་མི་འགྱུར་རོ། །སེམས་མ་བསྐྱེད་པས་ཀྱང་བྱང་ཆུབ་ཐོབ་པར་མི་འགྱུར་རོ། །དེ་ཅིའི་ཕྱིར་ཞེ་ན། དགུན་གྱི་ཉི་མ་བཞིན་དུ་བརྩོན་འགྲུས་ཞན་པའི་ཕྱིར་རོ། །
མདོ་སྡེ་བསྒོམ་པར་བྱ་བ་བསྒོམས་པའི་འབྲས་བུའི་མཆོག་ནི་དཔེར་ན་སོ་ཀའི་ཉི་མ་ཚ་བའི་ཚེ་ཉི་མ་ཤར་བར་མཚན་མོ་ཡང་མར་ཤིན་ཏུ་འཁྱགས་པ་ཡང་ཞུ་བར་བྱེད་ལ་རྒྱ་མཚོ་ཆེན་པོ་ཡང་དྲོ་བར་བྱེད་དོ། །དེ་བཞིན་དུ་རིགས་
ཀྱི་བུ་འམ། རིགས་ཀྱི་བུ་མོ་གང་དག་གིས་ཡོངས་སུ་མྱ་ངན་ལས་འདས་པ་ཆེན་པོའི་མདོ་འདི་ཐོས་མ་ཐག་ཏུ་འགྲན་ཏོར་བྱས་ཀྱང་རུང་། གཞན་གྱིས་བྱེད་དུ་བཅུག་ཀྱང་རུང་། གཞན་གྱིས་དྲིང་འཇོག་ཀྱང་རུང་། རྙེད་པ་དང་། 
བཀུར་སྟི་དང་། ཚིགས་སུ་བཅད་པའི་དོན་དུ་བྱས་ཀྱང་རུང་སྟེ། བདག་ལ་བྱང་ཆུབ་མི་དགོས་སོ་སྙམ་པ་འམ། སེམས་བསྐྱེད་པར་ཡང་མི་འདོད་དུ་ཟིན་ཀྱང་གང་ཟག་དེ་འདྲ་བའི་ལུས་ཀྱི་བ་སྤུའི་ཁུང་བུ་ཐམས་ཅད་དུ་བྱང་ཆུབ་ཀྱི་
རྒྱུས་སོ་ཀའི་ཉི་མ་བཞིན་དུ་འཇུག་པར་འགྱུར་རོ། །དེ་བས་ན་རིགས་ཀྱི་བུ་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ནོ་ཞེས་ང་ཟེར་རོ། །དེ་ལྟར་ན་བྱང་ཆུབ་ཟད་མི་ཤེས་པའི་མདོ་ཆེན་པོ་འདི་ནི་བསོད་ནམས་ཀྱི་
ཕུང་པོ་ཆེན་པོ་ཡིན་ཏེ། དེ་བས་ན་ཆེ་བ་ཞེས་བྱའོ། །སྔ་བ་དང་ཡངས་པ་དང་སོ་ཀའི་ཉི་མ་བཞིན་དུ་གཟི་བརྗིད་དང་ལྡན་པ་ཡིན་ཏེ། དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །དེ་ཅིའི་ཕྱིར་ཞེ་ན། འདི་

49-1-121a

ལས་དེ་བཞིན་གཤེགས་པའི་སྙིང་པོ་རྟག་པར་བསྟན་པའི་ཕྱིར་རོ། །རིགས་ཀྱི་བུ་གཞན་ཡང་སྐར་མ་དང་སྲིན་བུ་མེ་ཁྱེར་གྱི་འོད་ནི་ཉི་ཟླའི་འོད་ལས་འདས་ཏེ་ཐལ་ལེར་སྣང་བར་མི་འགྱུར་རོ། །ཉི་ཟླའི་འོད་ནི་འོད་
ཐམས་ཅད་ལས་འདས་ཏེ་ལམ་མེར་འདུག་གོ། །དེ་བཞིན་དུ་གཞན་གྱི་འོད་རྣམས་ནི་མདོ་སྡེ་ཐམས་ཅད་དང་ཏིང་ངེ་འཛིན་ཐམས་ཅད་བསྒོམ་པར་བྱ་བ་བསྒོམས་པའི་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་འོད་ལས་འདས་
ཏེ་ཐལ་ལེར་མི་འདུག་གོ། །ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་འོད་ནི་འོད་ཐམས་ཅད་ལས་འདས་ཏེ་ཐལ་ལེར་སྣང་ལ། སེམས་ཅན་ཐམས་ཅད་ཀྱི་སྤུ་དྲུང་དུ་ཞུགས་ནས་བྱང་ཆུབ་ཀྱི་སེམས་མི་དགོས་སོ་
སྙམ་སྟེ་མ་བསྐྱེད་དུ་ཟིན་ཀྱང་བྱང་ཆུབ་ཀྱི་རྒྱུ་ངེས་པར་ཐོབ་པར་འགྱུར་ཏེ། དེ་བས་ན་མིང་ཡང་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །གསོལ་པ། བྱང་ཆུབ་ཀྱི་སེམས་མི་དགོས་པར་འཛིན་ཀྱང་སེམས་ཅན་ཐམས་
ཅད་ཀྱི་ལུས་ཀྱི་བ་སྤུའི་ཁུང་བུ་ཐམས་ཅད་དུ་ཞུགས་ནས་བྱང་ཆུབ་ཀྱི་རྒྱུ་མངོན་པར་འགྲུབ་པར་འགྱུར་ཞེས་བགྱི་བ་འདི་ལ་གཏན་ཚིགས་བཀའ་བསྩལ་འཚལ་ལགས་སོ། །བཅོམ་ལྡན་འདས་བསྟན་པ་འདི་ལ་ཕམ་པ་བགྱིད་པ་དང་། 
མཚམས་མ་མཆིས་པ་བགྱིད་པ་དང་། མདོ་སྡེ་སྤོང་བ་དང་། འདོད་ཆེན་པ་དག་ཀྱང་གདའ་ལགས་ན། གལ་ཏེ་སེམས་མ་བསྐྱེད་དེ་མི་དགོས་པར་འཛིན་ཀྱང་བྱང་ཆུབ་པའི་བྱང་ཆུབ་ཀྱི་རྒྱུར་འགྱུར་དུ་ལགས་ན་སངས་རྒྱས་ཀྱིས་གསུངས་
པ་ལ་བྱེ་བྲག་ཅི་མཆིས་ཏེ། ཡང་ན་བཞི་པོ་དེ་དག་མ་མཆིས་ཤེས་བཤད་འཚལ་ལགས་སོ། །ཡང་ན་དེས་སྡིག་པ་འབྱང་བར་འགྱུར་ཞེས་བཤད་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འདོད་ཆེན་
པ་མ་གཏོགས་པར་ཡོངས་སུ་མྱ་ངན་ལས་འདས་པའི་མདོ་ཆེན་པོ་འདི་རྣ་ལམ་དུ་གྲག་པར་ཐོས་པ་ཙམ་གྱིས་ཀྱང་ཐམས་ཅད་ལ་བྱང་ཆུབ་ཀྱི་རྒྱུ་ཡོད་པར་འགྱུར་ཏེ། སངས་རྒྱས་གྲངས་མེད་པ་ལ་བཀུར་སྟི་བྱས་པ་རྣམས་ཀྱིས་

49-1-121b

ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཐོས་པར་ནུས་ལ། དགེ་བའི་རྩ་བ་ངན་ངོན་མ་ཡིན་པས་བྱང་ཆུབ་ཀྱི་རྒྱུ་ཐོབ་པར་འགྱུར་རོ། །དེ་བས་ན་དེ་བཞིན་གཤེས་པའི་སྙིང་པོ་ཡང་དག་པར་སྟོན་པའི་ཕྱིར་མདོ་ཆེན་
པོ་མཐུ་ཆེ་བ་ཡིན་ནོ། །གསོལ་པ། སེམས་མ་བསྐྱེད་དེ་མི་དགོས་པར་འཛིན་པས་ཇི་ལྟར་བྱང་ཆུབ་པའི་བྱང་ཆུབ་ཀྱི་རྒྱུར་འགྱུར་ལགས། བཀའ་སྩལ་པ། བྱང་ཆུབ་ཏུ་སེམས་བསྐྱེད་ནས་མི་དགོས་པར་འཛིན་ཅིང་མདོ་སྡེ་ཁྱད་
དུ་གསོད་པ་གང་ཡིན་པ་དེ་དག་ལ་ནི་རྨི་ལམ་དུ་སྲིན་པོ་ཆེན་པོ་འཇིགས་པའི་གཟུགས་ཅན་གྱིས་བསྡིགས་ཏེ། འདི་སྐད་དུ་ངས་མ་བསད་པར་སྐྱེན་པར་བྱང་ཆུབ་ཏུ་སེམས་སྐྱེད་ཅིག་ཅེས་ཀྱང་ཟེར་རོ། །དེ་ནས་དེ་དག་རྨི་ལམ་དུ་
འཇིགས་ཤིང་སྐྲག་སྟེ་སད་ནས་ནང་པར་བྱང་ཆུབ་ཏུ་སེམས་སྐྱེད་པར་བྱེད་དེ། དེ་དག་ཤི་ནས་སེམས་ཅན་དམྱལ་བ་རྣམས་སུ་འཚེད་པའམ། ཡི་དགས་ཀྱི་འཇིག་རྟེན་ནས་མཐོ་རིས་སུ་སྐྱེས་ཀྱང་རུང་སྟེ། རྗེས་སུ་དྲན་ནས་དེའི་
འོག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོར་འགྱུར་རོ། །དེ་ལྟར་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ནི་མཐུ་ཆེ་སྟེ་མི་དགོས་པར་འཛིན་ཅིང་སེམས་མ་བསྐྱེད་ཀྱང་བྱང་ཆུབ་ཀྱི་རྒྱུ་སྐྱེད་པར་བྱེད་དོ། །
རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ཏེ། ཐེག་པ་ཆེན་པོ་འདི་ལ་རྒྱུ་མེད་པ་མ་ཡིན་ནོ། །དེ་བས་ན་ངའི་བསྟན་པ་ནི་སངས་རྒྱས་ཀྱིས་གསུངས་པ་ཞེས་བྱའོ། །རིགས་ཀྱི་བུ་གཞན་ཡང་ནམ་མཁའ་ལས་སྤྲིན་ཆེན་པོ་ཆར་འབེབས་
པ་ན་ས་ཆེན་པོ་ཆུས་གང་བར་འགྱུར་ལ། གྲམ་པའི་ས་ཕྱོགས་སུ་ནི་ཆར་ཆེན་པོ་བབ་ཏུ་ཟིན་ཀྱང་ཆུ་ཅུང་ཟད་ཀྱང་གནས་པར་མི་འགྱུར་ཏེ་གར་གཞོལ་བར་འབབ་ལ། བབ་ནས་ཀྱང་དེར་གནས་པར་འགྱུར་ཏེ། སེམས་ཅན་ཐམས་
ཅད་ལ་ཡང་ཕན་འདོགས་པར་འགྱུར་བ་དེ་བཞིན་དུ་མདོ་སྡེ་ཆེན་པོ་འདི་ལས་དམ་པའི་ཆོས་ཀྱི་ཆར་འབབ་མོད་ཀྱི། འདོད་ཆེན་པ་ལ་ནི་བྱང་ཆུབ་ཀྱི་རྒྱུ་སྐྱེ་བར་མི་འགྱུར་ཏེ་སྐྱེ་མི་སྲིད་དོ། །གཞན་དག་ལ་ནི་ས་གཞོལ་བའི་ཆུ་བཞིན་དུ་

49-1-122a

སྐྱེད་པར་བྱེད་དོ། །རིགས་ཀྱི་བུ་གཞན་ཡང་དཔེར་ན་སྲན་སྡེའུ་འམ། སྲན་གྲེའུ་འམ། སྲན་མའམ། སྤའི་ས་བོན་ཚིག་པ་རྣམས་ལ་སྤྲིན་ཆེན་པོའི་ཆར་སྟོང་དུ་བབ་ཀྱང་མྱུ་གུ་སྐྱེ་བར་མི་ནུས་ཏེ། 
དེ་དག་ལས་མྱུ་གུ་འབྱུང་མི་སྲིད་དོ། །དེ་བཞིན་དུ་འདོད་ཆེན་པ་རྣམས་ཀྱིས་ཡོངས་སུ་མྱ་ངན་ལས་འདས་པ་ཆེན་པོ་འདི་ཐོས་སུ་ཟིན་ཀྱང་བྱང་ཆུབ་ཀྱི་རྒྱུ་ཐོབ་མི་སྲིད་དེ་དེ་དག་ནི་དགེ་བའི་རྩ་བ་ཟད་པ་ཡིན་པའི་ཕྱིར་ས་བོན་ཚིག་པ་དང་
འདྲའོ། །རིགས་ཀྱི་བུ་དཔེར་ན་ཀ་ཏ་ཀའི་འབྲས་བུ་ཆུ་རྙོག་པ་ཅན་གྱི་ནང་དུ་བཅུག་ན་རྙོག་པ་བསལ་ཏེ་ཆུ་དང་བར་བྱེད་པ་དེ་བཞིན་དུ་ཡོངས་སུ་མྱ་ངན་ལས་འདས་པའི་མདོ་ཆེན་པོ་འདི་ཡང་ཀ་ཏ་ཀའི་འབྲས་བུ་བཞིན་དུ་སེམས་ཅན་རྣམས་ཀྱི་ཕམ་
པ་རྣམས་དང་། མཚམས་མེད་པའི་ལས་རྣམས་ཀྱི་ལས་ཀྱི་འདམ་རྫབ་དང་རྙོག་པ་བསལ་ནས་བྱང་ཆུབ་ཀྱི་རྒྱུ་ལ་འགོད་པར་བྱེད་དེ། འདོད་ཆེན་པ་ནི་མ་གཏོགས་སོ། །ཀ་ཏ་ཀའི་འབྲས་བུས་ཀྱང་རྙོག་པ་དང་བར་བྱེད་པར་ཟད་ཀྱི། ལོ་
སྟོང་གི་བར་དུ་བདར་དུ་ཟིན་ཀྱང་འདམ་རྫབ་དེ་ལས་ཆུ་དབྱུང་བ་ནི་མི་ནུས་སོ། །དེ་བཞིན་དུ་འདོད་ཆེན་པ་ཡང་དགེ་བའི་རྩ་བ་ཟད་ཅིང་གཞི་མེད་པར་འགྱུར་བ་ཡིན་པས་དེ་ནི་ཡོངས་སུ་མྱ་ངན་ལས་འདས་པ་ཆེན་པོ་འདི་ལོ་བྱེ་བར་ཐོས་སུ་ཟིན་ཀྱང་བྱང་
ཆུབ་ཀྱི་རྒྱུ་སྐྱེད་པར་ཡོང་ཡེ་མི་ནུས་ཏེ། དེ་ལ་དགེ་བ་མེད་པའི་ཕྱིར་རོ། །རིགས་ཀྱི་བུ་དཔེར་ན་དུག་སྨན་གྱི་སྡོང་པོ་སྨན་གྱི་རྒྱལ་པོ་ཆེན་པོ་ནི་དར་བ་འམ་བུ་རམ་འམ། ཞུན་མར་རམ། འོ་མ་འམ། ཆུ་དང་སྦྱར་རམ། ཕྱེའམ་འདའ་གུའམ། ཐུག་
པར་བྱས་སམ། ཁ་བསྐུས་སམ། དུད་པས་བདུགས་སམ། མིག་བསྐུས་སམ། དྲི་ཚོར་རམ། མཐོང་ངམ། རེག་པར་གྱུར་ཀྱང་རུང་སྟེ། སེམས་ཅན་ཐམས་ཅད་ཀྱི་ནད་སེལ་བར་བྱེད་ལ། ཤིང་ལྗོན་པ་དེ་འདི་སྙམ་དུ་བདག་གི་ལོ་མ་ཁྱེར་
ན་རུང་ངོ་། །རྩ་བ་ཁྱེར་ན་མི་རུང་ངོ་སྙམ་པ་འམ། བདག་གི་རྩ་བ་ཁྱེར་ན་རུང་ངོ་། །ལོ་མ་ཁྱེར་ན་མི་རུང་ངོ་སྙམ་པ་འམ། སྡོང་བུ་ཁྱེར་ན་རུང་ངོ་། །ཤུན་ཕྲགས་ཁྱེར་ན་མི་རུང་ངོ་སྙམ་པ་འམ། ཤུན་ཕྲགས་ཁྱེར་ན་རུང་ངོ་། །སྡོང་བུ་ཁྱེར་

49-1-122b

ན་མི་རུང་ངོ་སྙམ་དུ་མི་སེམས་ཏེ། དེ་དེ་ལྟར་སེམས་མི་སྐྱེད་མོད་ཀྱི། འོན་ཀྱང་དེ་ནི་སྨན་ཁོ་ན་ཡིན་ཏེ་ནད་ཐམས་ཅད་སེལ་བར་བྱེད་དོ། །རིགས་ཀྱི་བུ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཡང་སེམས་ཅན་ཐམས་
ཅད་ཀྱི་སྡིག་པའི་ལས་ཀྱི་ནད་རྣམས་སེལ་བར་བྱེད་དེ། ཕམ་པར་བྱེད་པ་རྣམས་ཀྱང་རུང་། མཚམས་མེད་པ་བྱེད་པ་རྣམས་ཀྱང་རུང་། འདི་ལས་ཕྱི་རོལ་པ་རྣམས་ཀྱང་རུང་སྟེ། བྱང་ཆུབ་དགོས་པར་མི་འཛིན་ཅིང་སེམས་མ་བསྐྱེད་ཀྱང་བྱང་
ཆུབ་ཀྱི་རྒྱུ་སྐྱེད་པར་བྱེད་དོ། །དེ་ཅིའི་ཕྱིར་ཞེ་ན། སྡིག་པ་ཐམས་ཅད་ཀྱི་དུག་སྨན་གྱི་སྡོང་པོའི་སྨན་ནི་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ཡིན་པའི་ཕྱིར་རོ། །ལུས་བསྒོམས་པ་རྣམས་ཀྱང་རུང་། ལུས་མ་བསྒོམས་པ་རྣམས་
ཀྱང་རུང་སྟེ། མདོ་སྡེ་འདིའི་མིང་ཙམ་ཐོས་ན་ཡང་མདོ་སྡེ་འདི་ནི་ཡོད་དོ་སྙམ་དུ་ཤེས་ན་སྡིག་པའི་ནད་ཐམས་ཅད་འབྱང་བར་འགྱུར་རོ། །གསོར་མི་རུང་བའི་ནད་ཨ་ན་རྒ་ལ་ཞེས་བྱ་བ་དེ་ནི་ཇི་ལྟར་བྱས་ཀྱང་གསོར་མི་རུང་ངོ་། །དེ་ཅིའི་ཕྱིར་ཞེ་ན། 
དེ་ནི་འཆི་བར་འགྱུར་བའི་ནད་ཡིན་པའི་ཕྱིར་ཏེ། དུས་མ་ཡིན་པར་འཆི་བའི་ནད་མ་ཡིན་ནོ། །དེ་བཞིན་དུ་འདོད་ཆེན་པ་ཡང་མདོ་སྡེ་འདིས་བྱང་ཆུབ་ཏུ་གཞོག་པར་མི་ནུས་ཏེ། དེ་ནི་རྒྱུ་མེད་པ་དང་ཤི་བ་ཡིན་པའི་ཕྱིར་རོ། །དཔེར་ན་ལག་མཐིལ་
རྨ་མེད་པ་ལ་དུག་གིས་མི་ཚུགས་ལ་རྨ་ཡོད་པ་ལ་ནི་དུག་གིས་ཚུགས་པར་འགྱུར་བ་དེ་བཞིན་དུ། འདིར་ཡང་འདོད་ཆེན་པ་ལ་བྱང་ཆུབ་ཀྱི་རྒྱུ་མི་སྐྱེའོ། །དེ་ལ་རྨ་ཞེས་བྱ་བ་ནི་བྱང་ཆུབ་ཀྱི་རྒྱུའོ། །དུག་ཅེས་བྱ་བ་ནི་མཆོག་ཏུ་བདེ་བའོ། །ལག་
མཐིལ་རྨ་མེད་པ་ལྟ་བུ་ནི་འདོད་ཆེན་པ་སྡིག་ཅན་ཡིན་ནོ། །དཔེར་ན་རྡོ་རྗེ་རིན་པོ་ཆེ་གཟི་བྱིན་ཆེན་པོ་ནི་ཅིས་ཀྱང་གཅག་མི་ནུས་ལ་སྣ་གྲངས་གཞན་ཐམས་ཅད་ནི་དེས་ཆོམས་པར་འགྱུར་མོད་ཀྱི་ལུག་རུ་ནི་མི་ཆོད་དོ། །དེ་བཞིན་དུ་ཡོངས་སུ་མྱ་
ངན་ལས་འདས་པའི་མདོ་ཆེན་པོ་འདིས་ཀྱང་ཤིན་ཏུ་སྡིག་པའི་ལས་བྱེད་པ་འདོད་ཆེན་པ་ནི་བྱང་ཆུབ་ཏུ་གཞག་པར་མི་ནུས་ཏེ། རྒྱུ་མེད་པའི་ཕྱིར་རྡོ་རྗེས་ལུག་རུ་ལ་མི་ཚུགས་པ་བཞིན་ནོ། །དཔེར་ན་ཤིང་ས་ལ་ཀི་དང་། དོང་ཀའི་ཤིང་དང་། 

49-1-123a

ཀ་ན་ག་ཕྲ་བྷ་དང་། ཤིང་བལ་གྱི་ཤིང་དང་། བལ་མི་ཀི་དང་། ཀར་ན་བལ་ལྱ་དང་། སྐན་ད་སྟ་བ་དང་། ཀེ་ཏ་ཀི་དང་། པད་ཏྲ་ཀ་དང་། བི་ར་ན་དང་། རོ་ཙ་ན་རྣམས་ནི་བཅད་དེ་དུམ་བུར་གཏུབས་ནས་ཁྱེར་ཏེ་ཁྱིམ་
དུ་བཞག་ཀྱང་གལ་ཏེ་ཆུའི་རླན་དང་ཕྲད་ཕན་ཅད་མྱུར་དུ་སྐྱེ་བར་འགྱུར་ཏེ། ལོ་མ་ཁ་འབུ་བ་དང་། སྙེ་མ་དང་ལྡན་ཞིང་ཡལ་ག་དང་སྡོང་བུ་དང་ལྡན་ཏེ་ཤིང་ལྗོན་པ་ཞེས་བྱ་བའི་གྲངས་སུ་གཏོགས་པར་འགྱུར་རོ། །དེ་བཞིན་དུ་བསྟན་པ་འདི་ལ་ཡང་
ཕམ་པ་བྱེད་པ་རྣམས་དང་། མཚམས་མེད་པ་བྱེད་པ་རྣམས་ཤིང་ཏ་ལའི་མགོ་བཅད་པ་བཞིན་དུ་གྱུར་པ་ལས། འདོ་སྡེ་འདི་ཐོས་མ་ཐག་ཏུ་སེམས་བསྐྱེད་པ་དགོས་པར་མི་འཛིན་གྱིས་ཀྱང་མི་མཆོག་དེ་དག་ནི་ཤིང་ས་ལི་ཀ་དང་། དོང་ཀའི་
ཤིང་ལ་སོགས་པ་བཞིན་དུ་བྱང་ཆུབ་ཏུ་འཁྲུང་བར་འགྱུར་རོ། །དཔེར་ན་སེང་ལྡེང་དང་ཏིན་དུ་ཀའི་ཤིང་ལྗོན་པ་རྣམས་ནི་བཅད་ཕན་ཅད་ས་བོན་ཚིག་པ་བཞིན་དུ་སྐྱེ་བར་མི་འགྱུར་བ་དེ་བཞིན་དུ་འདོད་ཆེན་པའི་སེམས་ཅན་རྣམས་ཀྱིས་ཀྱང་མདོ་
སྡེ་འདི་ལན་མང་དུ་ཐོས་ཀྱང་ས་བོན་ཚིག་པ་བཞིན་དུ་བྱང་ཆུབ་ཏུ་འཁྲུང་བར་མི་འགྱུར་རོ། །དཔེར་ན་སྤྲིན་ཆེན་པོ་ལས་ཆར་བབ་ཏུ་ཟིན་ཀྱང་ས་ཕྱོགས་བྱིལ་པོར་འདུག་པ་ལ་ཆུ་མི་ཆགས་པ་བཞིན་ཏུ་མདོ་སྡེ་ཆེན་པོའི་སྤྲིན་འདི་ལས་ཆོས་
ཀྱི་ཆར་འབབ་མོད་ཀྱི་འདོད་ཆེན་པ་ལ་བྱང་ཆུབ་ཀྱི་རྒྱུ་མི་འཆགས་ཏེ། དེ་ནི་རྡོ་རྗེ་བཞིན་དུ་བྱིལ་པོར་འདུག་པའི་ཕྱིར་རོ། །འདོད་ཆེན་པ་རྣམས་ཀྱིས་ནི་དགེ་བ་བྱས་པ་ནི་མི་མཐོང་གི། སྨད་པ་དང་། བཤུང་བའི་སྡིག་པ་གང་ཡིན་པ་ནི་མཐོང་
ངོ་། །ལེགས་པར་བྱས་པ་ནི་བྱང་ཆུབ་ཀྱི་དོན་ཏོ། །མི་འོང་བ་ནི་མི་ཕྲད་པའི་དོན་ཏོ། །དགོངས་པ་ནི་དགེ་བའི་དོན་ཏོ། །དགོངས་པ་ལས་ཁྱད་པར་དུ་འཕགས་པའི་དགེ་བ་སུ་ལ་མི་འོང་ཞེ་ན། ལས་བཟང་པོ་ནི་འདོད་ཆེན་པ་ལ་མི་འོང་ངོ་། །
དགེ་བའི་སེམས་སུ་ལ་མི་འོང་ཞེ་ན། འདོད་ཆེན་པ་ཞེས་གྲགས་པ་ནི་དགེ་བ་མེད་པའི་སེམས་ཅན་ང་རྒྱལ་གྱི་དབང་དུ་གྱུར་པ་ཡིན་ཏེ། འདོད་ཆེན་པ་དེ་ལ་མི་འོང་ངོ་། །གཞིའི་ཡན་ལག་ཅི་ཞེ་ན། མདོ་སྡེ་སྤོང་བའོ། །དེ་བས་ན་མདོ་སྡེ་སྤོང་བ་

49-1-123b

ནི་འཇིགས་སུ་རུང་བ་ཡིན་ཏེ། དེས་འཇིགས་པར་གྱིས་ཤིག །དེ་ཡི་ཕྱིར་ན་མཁས་པ་བརྟན་པོ་རྣམས། །ལམ་པོ་ཆེ་ན་འདུ་བྱེད་ཡོད་པས་འཇིགས། །བྱས་པ་རྣམས་ནི་ལམ་ཆེན་འཇིགས་པ་མེད། །ང་རྒྱལ་དབང་གིས་མི་བཟད་
འགྲོ་བར་འགྱུར། །དེས་ན་བློ་ངན་རྣམས་ཀྱིས་དེ་མི་ཐོབ། །སྤྲེའུ་རྣམས་ཟླ་བ་སྙབ་པར་བྱེད་པ་བཞིན། །མི་ཡི་དབང་པོ་ལམ་ཆེན་ཞུགས་པ་ལྟར། །མཁས་པ་བརྟན་པོ་རྣམས་ཀྱིས་ཐོབ་པར་འགྱུར། །གང་གིས་བྱས་པ་མི་
མཐོང་ཞེ་ན། འདོད་ཆེན་པ་སྡིག་ཅན་གྱིས་བྱས་པ་མི་མཐོང་སྟེ། དེས་འཁོར་བའི་མཐའི་བར་གྱི་བྱས་པ་མི་མཐོང་ངོ་། །ངས་དེའི་དོན་མདོར་བསྡུས་ཏེ་བསྟན་གྱི། མཆོག་ཏུ་འཇིགས་སུ་རུང་བས་འཇིགས་པར་གྱིས་ཤིག །གང་གི་ཚེ་
སེམས་ཅན་ཐམས་ཅད་སེམས་རྩེ་གཅིག་ཏུ་འཐུན་པར་གྱུར་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་སྲིད་ན། དེའི་ཚེ་འདོད་ཆེན་པ་སྡིག་ཅན་བྱང་ཆུབ་མཆོག་ཏུ་མངོན་པར་རྫོགས་པར་
འཚང་རྒྱ་ཡང་སྲིད་པ་ཞིག་ན། དེ་ནི་བྱས་པ་མི་མཐོང་བ་ཡིན་ཏེ། དཔའ་བོ་ཁྱོད་ཀྱིས་དེ་ལྟར་ཤེས་པར་གྱིས་ཤིག །སུའི་བྱས་པ་ཆུད་མི་ཟ་ཞེ་ན། དེ་བཞིན་གཤེགས་པའི་བྱས་པ་ཆུད་མི་ཟའོ། །གང་གི་ཚེ་འཁོར་བ་ན་གནས་པའི་སེམས་
ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེའི་ཚེ་དེ་བཞིན་གཤེགས་པའི་བྱས་པ་ཆུད་ཟ་བར་འགྱུར་ཏེ། དེའི་ཚེ་གཏན་དུ་ཡོངས་སུ་མྱ་ངན་ལས་འདས་པ་ཡོངས་སུ་མྱ་ངན་ལས་འདས་
ནས་མར་མེ་དང་ཤིང་ཟད་པའི་མེ་བཞིན་དུ་སངས་རྒྱས་མི་རྟག་པར་འགྱུར་རོ། །དེ་བཞིན་དུ་འདོད་ཆེན་པའི་སྡིག་པའི་ལས་ཀྱང་སྨད་པ་དང་བཤུང་བ་ཡིན་ནོ། །བྱང་ཆུབ་ཀྱི་རྒྱུའི་བསོད་ནམས་གང་ཡིན་པ་དེ་གལ་ཏེ་བྱང་ཆུབ་སེམས་དཔའ་སྤོང་
བར་བྱེད་ན་དེ་ཡང་ཐེག་པ་ཆེན་པོ་ལ་སྨོད་པ་དང་བཤུང་བ་ཞེས་བྱའོ། །དེ་སྟེ་མི་སྤོང་ན་ནི་དེ་ལྟ་ན་རྫོགས་པའི་སངས་རྒྱས་ཞེས་བྱ་བའི་མིང་ཐོགས་པར་འགྱུར་ཏེ། དེ་ནི་སངས་རྒྱས་རྣམས་ཀྱི་ཆོས་ཉིད་ཡིན་ནོ། །འོ་མ་དང་ནི་སྡིག་པའི་ལས། །

49-1-124a

མོད་ལ་ལྡང་བར་མི་འགྱུར་ཏེ། །མེ་ནི་ཐལ་བས་གཡོགས་པ་ལ། །བྱིས་པ་སོང་ན་ཚིག་པ་བཞིན། །འདོད་ཆེན་པ་ལོང་བ་གཅིག་པུ་དགྲ་བཅོམ་པ་ཡིན་པར་འདོད་པ་ནི་ལམ་མི་ཟད་པ་ཆེན་པོར་འགྲོ་འདོད་
དོ། །བྱམས་པ་དང་ལྡན་པའི་དགྲ་བཅོམ་པ་ཡིན་པར་འདོད་ལ་ཤིན་ཏུ་རྒྱས་པ་སུན་དབྱུང་བར་འདོད་དེ། དགྲ་བཅོམ་པ་ཡིན་པར་འདོད་ཅིང་ཉན་ཐོས་ཀྱི་ཐེག་པ་སུན་ཕྱུང་ནས་ང་ནི་བྱང་ཆུབ་སེམས་དཔའ་སྟེ། ཤིན་ཏུ་རྒྱས་པ་སྟོན་པ་ཡིན་ནོ། །
སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོའི་ཡོན་ཏན་རྣམས་ཡོད་དོ། །སངས་རྒྱས་ཡོད་དོ་ཞེས་ཟེར་ཞིང་སངས་རྒྱས་སུ་ལུང་སྟོན་པར་བྱེད་དེ། ང་དང་ཁྱེད་ཀྱིས་ཉོན་མོངས་པའི་རྣམ་པ་ཆུའི་བུམ་པ་བཞིན་དུ་གཞོམ་པར་བྱའོ། །
ཐེ་ཚོམ་མེད་པར་བྱང་ཆུབ་བསྒོམ་པར་བྱ་སྟེ། མདོ་སྡེའི་མན་ངག་ནི་དེ་ལྟ་བུ་ཡིན་ནོ་ཞེས་ཟེར་རོ། །དཔེར་ན་རྒྱལ་པོའི་ཕོ་ཉ་གཙང་ཞིང་སྙིང་ཉེ་ལ་སྨྲ་མཁས་ཤིང་གཟི་བྱིན་ཆེ་བ། དགྲའི་ནང་དུ་རང་གི་སྲོག་དང་བསྡོས་ཏེ་རྒྱལ་པོ་ལ་ཚིག་རྫོགས་
པར་སྨྲ་བ་དེ་བཞིན་དུ་ཤེས་རབ་ཅན་ཤིན་ཏུ་རྒྱས་པ་གཅེས་པར་འཛིན་པ་ནི་བྱིས་པ་རྣམས་ཀྱི་ནང་དུ་རང་གི་སྲོག་དང་བསྡོས་ནས་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་པས་སངས་རྒྱས་སུ་ལུང་སྟོན་པར་བྱེད་དོ། །དགོན་པ་པ་
མདོ་སྡེ་སྤོང་བ། བྱིས་པ་བླུན་པོ་དགྲ་བཅོམ་པ་ཡིན་པར་འདོད་པ་གང་ཡིན་པ་དེ་ལ་དགྲ་བཅོམ་པ་དང་འདྲ་བར་ལྟ་ཞིང་སེམས་ཅན་ཆེན་པོ་དང་འདྲ་བར་ལྟ་སྟེ། འདོད་ཆེན་པ་དགེ་སློང་སྡིག་ཅན་དེ་དགོན་པ་ན་གནས་ཤིང་བདག་ཉིད་དགྲ་བཅོམ་པ་
དང་འདྲ་བར་རྩི་བར་བྱེད་དེ། དགོན་པ་ན་གནས་པའི་དགེ་སློང་རྣམས་གཞན་གྱིས་བོས་པ་མི་བཟོད་ལ་རྐྱེན་བཞི་ལས་ཤིན་ཏུ་རྒྱས་པ་ནི་བདུད་ཀྱིས་སྨས་པ་ཡིན་ནོ། །བཅོམ་ལྡན་འདས་ནི་མི་རྟག་གོ། །ཆོས་དང་དགེ་འདུན་ཡང་མེད་པར་འགྱུར་རོ། །
དམ་པའི་ཆོས་མེད་པར་འགྱུར་བའི་ལྟས་དེ་ལྟ་བུ་དག་ཀྱང་སྣང་ངོ་ཞེས་བྱ་བ་འདི་ཐེག་པ་ཆེན་པོ་ལས་ལེགས་པར་བཤད་དོ་ཞེས་ཟེར་ཏེ། དེ་སྐད་དུ་དམ་པའི་ཆོས་མ་ཡིན་པར་སྨྲ་བ་ནི་འོ་མ་བཞིན་དུ་མོད་ལ་ལྡང་བར་མི་འགྱུར་ཏེ། མེ་ཐལ་བས་

49-1-124b

བཀབ་པ་ལ་བབ་པ་བཞིན་དུ་བྱིས་པ་འདོད་ཆེན་པ་རྣམས་ཕྱིས་ཚིག་པར་འགྱུར་རོ། །དེ་ལྟར་ན་སངས་རྒྱས་ཀྱི་བསྟན་པ་ཐེག་པ་ཆེན་པོ་ཆ་ཕྲ་བ་ཡིན་ཏེ། མདོ་སྡེ་འདི་ནི་ཀ་ཏ་ཀའི་འབྲས་བུ་དང་འདྲའོ། །རིགས་ཀྱི་བུ་དཔེར་ན་མེ་ཏོག་པད་མ་ཁ་
ཟུམ་པ་ཉི་མའི་འོད་ཀྱིས་ཕོག་ན་ཁ་འབྱེ་བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཐོས་མ་ཐག་ཏུ་བྱང་ཆུབ་ཀྱི་སེམས་མིང་ཙམ་བསྐྱེད་པ་ཡང་མི་དགོས་པར་འཛིན་པའི་སེམས་ཅན་ཐམས་ཅད་ཀྱང་དབང་མེད་པར་
བྱང་ཆུབ་ཀྱི་རྒྱུ་སྤུ་དྲུང་ཐམས་ཅད་དུ་འཇུག་པར་འགྱུར་རོ། །འདོད་ཆེན་པ་རྣམས་ལ་ཡང་དེ་བཞིན་གཤེགས་པའི་སྙིང་པོ་ཡོད་མོད་ཀྱི་འོན་ཀྱང་གཡོགས་མ་བཞིན་དུ་སྟུག་པོར་འདུག་གོ། །དཔེར་ན་དར་གྱི་སྲིན་བུ་རང་ཉིད་ཀྱིས་ཀུན་ནས་དཀྲིས་ཏེ། 
སྒོ་མ་གཏོད་པར་ཕྱིར་འབྱུང་མི་ནུས་པ་དེ་བཞིན་དུ་དེ་བཞིན་གཤེགས་པའི་སྙིང་པོ་ཡང་དེའི་ལས་ཀྱི་ཉེས་པས་འདོད་ཆེན་པའི་ཁོང་ནས་དབྱུང་བར་མི་ནུས་སོ། །དེ་བས་ན་འཁོར་བའི་མཐའ་ལས་བྱང་ཆུབ་ཀྱི་རྒྱུ་མི་འཐོབ་བོ། །རིགས་ཀྱི་བུ་དཔེར་
ན་པད་མ་དང་། ཨུད་པ་ལ་དང་། ཀུ་མུ་ད་དང་། པད་མ་དཀར་པོ་རྣམས་འདམ་གྱི་ནང་ནས་སྐྱེས་ཀྱང་འདམ་གྱིས་མི་གོས་པ་དེ་བཞིན་དུ་མདོ་སྡེ་ཆེན་པོ་འདི་ལ་ཡང་ཐེག་པ་ཆེན་པོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་
མོངས་པ་མེད་པའི་གྲངས་སུ་གཏོགས་སོ། །ཅིའི་ཕྱིར་མི་གོས་ཤེ་ན། དེ་བཞིན་གཤེགས་པའི་སྙིང་པོའི་བྱིན་གྱི་བརླབས་ཀྱིས་མི་ཤེས་སོ། །དཔེར་ན་སེར་བུ་བསིལ་བ་ལངས་པའི་ཚེ་དབང་མེད་པར་སེམས་ཅན་ཐམས་ཅད་ཀྱི་སྤུ་དྲུང་ཐམས་
ཅད་དུ་ཞུགས་ནས་ཚ་བ་ཐམས་ཅད་ཞི་བར་བྱེད་པ་དེ་བཞིན་དུ་མདོ་ཆེན་པོ་འདི་ཡང་སེམས་ཅན་ཐམས་ཅད་ཀྱི་སྤུ་དྲུང་ཐམས་ཅད་དུ་ཞུགས་ནས་དབང་མེད་པར་བྱང་ཆུབ་ཀྱི་རྒྱུ་ལ་འཇོག་པར་བྱེད་དེ། འདོད་ཆེན་པ་སེམས་བསྐྱེད་པ་དགོས་
པར་མི་འཛིན་པ་ནི་མ་གཏོགས་སོ། །རིགས་ཀྱི་བུ་དཔེར་ན་སྨན་པ་ཚེའི་རིག་བྱེད་ཡན་ལག་བརྒྱད་ལ་མཁས་པ་ནི་ནད་པ་ཐམས་ཅད་གསོ་བར་བྱེད་མོད་ཀྱི། གསོར་མི་རུང་བ་ནི་གསོ་བར་མི་ནུས་པ་དེ་བཞིན་དུ་མདོ་སྡེ་དང་ཏིང་ངེ་འཛིན་

49-1-125a

ཐམས་ཅད་ཀྱང་འདོད་ཆགས་དང་། ཞེ་སྡང་དང་། གཏི་མུག་གི་ནད་ཀྱིས་ཐེབས་པ་ཐམས་ཅད་གསོ་བར་བྱེད་ལ། ཉོན་མོངས་པའི་ཟུག་རྔུ་ཐམས་ཅད་ཀྱང་སེལ་བར་བྱེད་མོད་ཀྱི། ཕམ་པ་བྱེད་པ་རྣམས་དང་། 
མཚམས་མེད་པ་བྱེད་པ་རྣམས་ནི་གསོ་བར་མི་ནུས་སོ། །དཔེར་ན་སྨན་པ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་ནི་སེམས་ཅན་ཐམས་ཅད་ཀྱི་ནད་གསོ་བར་བྱེད་མོད་ཀྱི། དེས་ཀྱང་འཆི་བའི་དུས་ལ་བབ་པའི་ནད་གསོ་མི་
ནུས་པ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཡང་སེམས་ཅན་ཐམས་ཅད་ཀྱི་ཉོན་མོངས་པའི་ནད་ཐམས་ཅད་བསལ་ནས་སེམས་ཅན་རྣམས་བྱང་ཆུབ་ཀྱི་རྒྱུ་ལ་འགོད་པར་བྱེད་མོད་ཀྱི། འཆི་བའི་དུས་ལ་
བབ་པ་ལྟ་བུའི་འདོད་ཆེན་པོ་ནི་མ་གཏོགས་སོ། །དཔེར་ན་དམུས་ལོང་གིས་ཉི་ཟླའི་འོད་ཀྱང་མི་ཤེས་ན་གསལ་བར་ལྟ་ག་ལ་མཐོང་སྟེ། སྨན་པ་ཆེན་པོས་ཀྱང་མིག་རྟུལ་བ་རྣམས་ཀྱིས་མིག་བཅོས་ནས་མཐོང་བར་ཟད་དེ། དམུས་ལོང་ནི་
མ་གཏོགས་སོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཡང་ལོང་བ་ལྟ་བུའི་ཉན་ཐོས་དང་རང་སངས་རྒྱས་ཐམས་ཅད་ཀྱི་མིག་བཅོས་ནས་མྱུར་བ་ཁོ་ནས་ཐེག་པ་ཆེན་པོའི་མིག་མཐོང་བར་བྱེད་ལ། ཕམ་
པར་བྱེད་པ་རྣམས་དང་མཚམས་མེད་པ་བྱེད་པ་སེམས་བསྐྱེད་མི་དགོས་པར་འཛིན་པ་རྣམས་ཀྱང་བྱང་ཆུབ་ལ་འགོད་པར་བྱེད་མོད་ཀྱི། ཤིན་ཏུ་དམུས་ལོང་དུ་འདུག་པ་འདོད་ཆེན་པ་ནི་མ་གཏོགས་སོ། །རིགས་ཀྱི་བུ་དཔེར་ན་སྨན་པ་ཆེན་པོ་
ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་ནི་སྨན་སྣར་བླུགས་པ་དང་། ཁོང་དུ་བཏུང་བ་དང་། ལུས་ལ་བསྐུ་བ་དང་། དུད་པས་བདུག་པའི་ལས་རྣམས་ཀྱིས་སེམས་ཅན་ཐམས་ཅད་ཀྱི་ནད་སེལ་བར་བྱེད་དོ། །མགོན་མེད་པ་
རྣམས་དང་བདག་ཅག་ལ་སྨན་མི་དགོས་སོ་སྙམ་སྟེ། སེམས་མི་བསྐྱེད་པ་རྣམས་ཀྱང་ཁྱིམ་དག་གི་ནང་ངམ། རྩྭ་དག་གི་ཁྲོད་དུ་བཞག་སྟེ། སྔགས་དང་། སྨན་དང་། སྨན་གནོད་སེལ་གྱི་མཐུས་དུག་རྣམས་དང་། ནད་རྣམས་

49-1-125b

སེལ་བར་བྱེད་ལ། བུད་མེད་སྦྲུམ་མ་བུ་བཙའ་བར་འདོད་ན་བཙར་མི་བཏུབ་པ་རྣམས་ཀྱང་སྨན་གནོད་སེལ་གྱི་མཐུས་བདེ་བར་བཙའ་བར་བྱེད་ལ། བྱིས་པ་ཡང་ནད་མེད་པར་བྱེད་པ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་
ཆེན་པོ་འདི་གླེགས་བམ་དུ་བྱས་པ་སེམས་ཅན་ཐམས་ཅད་ཀྱི་ཁྱིམ་ན་འཆང་བ་དེ་དག་ཀྱང་ཐེག་པ་ཆེན་པོའི་མཐུས་བདེ་བར་བྱེད་ལ་མདོ་ཆེན་པོ་འདིས་བྱང་ཆུབ་སེམས་དཔའ་སེམས་དཔའ་ཆེན་པོར་ཡང་འགྱུར་རོ། །ཕམ་པ་བྱེད་པ་
རྣམས་དང་། མཚམས་མེད་པ་བྱེད་པ་སེམས་བསྐྱེད་མི་དགོས་པར་འཛིན་པ་རྣམས་ཀྱང་བྱང་ཆུབ་ལ་འགོད་པར་བྱེད་དེ། འདོད་ཆེན་པ་ཤི་བ་དང་འདྲ་བ་ནི་མ་གཏོགས་སོ། །གསོལ་པ། ཕམ་པ་བགྱིད་པ་རྣམས་དང་། མཚམས་མ་མཆིས་
པ་མི་བཟད་པ་ཏ་ལའི་མགོ་བཅད་པ་དང་འདྲ་བ་དེ་དག་བདག་ཅག་གིས་བྱང་ཆུབ་ཏུ་སེམས་བསྐྱེད་མི་དགོས་སོ་སྙམ་དུ་འཛིན་ན་སེམས་མ་བསྐྱེད་པར་དེ་དག་ལ་བྱང་ཆུབ་ཀྱི་རྒྱུ་ཇི་ལྟར་སྐྱེ་བར་འགྱུར་ལགས། བཀའ་སྩལ་པ། རིགས་ཀྱི་བུ་དེ་དག་ནི་རྨི་
ལམ་དུ་ཡང་རུང་། ཤི་བའི་འོག་ཏུ་ཡང་རུང་སྟེ། སེམས་ཅན་དམྱལ་བ་རྣམས་སུ་འཚེད་པ་ན་འདི་སྙམ་དུ་སེམས་ཏེ། བདག་ཅག་གིས་ནི་མ་ལེགས་པ་བྱས་སོ། །གལ་ཏེ་འདི་ནས་ཐར་བར་འགྱུར་བ་ཞིག་ཡོད་ན་ནི་ཤིན་ཏུ་འཇིགས་པ་འདི་མཐོང་
བས་བདག་ཅག་གང་དང་གང་དུ་སྐྱེས་པ་དེ་དང་དེར་བྱང་ཆུབ་ཏུ་སེམས་བསྐྱེད་པར་བྱའོ་སྙམ་དུ་སེམས་ཏེ། དམ་པའི་ཆོས་དབྱུང་བར་སེམས་པ་ནི་འབྲས་བུ་ཆེ་བ་ཡིན་ནོ། །དཔེར་ན་བྱིས་པ་ལ་ལ་ཤེད་བྱེ་ནས་བདག་ཉིད་ཤེས་པར་བྱེད་ཅིང་འདི་ལྟར་
བདག་མའི་མངལ་ན་འདུག་པའི་ཚེ་སྨན་པ་འདིས་སྔགས་དང་སྨན་གནོད་སེལ་གྱི་མཐུས་བདག་གི་མ་བདེ་བར་བྱས་པས་ན་སྲོག་འདི་ནི་ཁྱོད་ཀྱི་དྲིན་ནོ། །ཀྱེ་མ་བདག་གི་མ་གང་གིས་བདག་ཟླ་བ་བཅུ་གཉིས་ཀྱི་བར་དུ་མའི་མངལ་ན་འཆང་ཞིང་ཤིན་ཏུ་
ཉོན་མོངས་པར་གྱུར་ནས་དེའི་འོག་ཏུ་དེས་བདག་ཤིན་ཏུ་ཚེགས་ཆེན་པོས་བཙས་པ་དང་། བདག་མངལ་གྱི་དྲི་མ་ལྗན་ལྗིན་དང་། ཁྲག་གིས་ཡོགས་པ་བཀྲུས་པ་དང་། བདག་གི་མཆུ་ཁ་ཆུ་ནལ་ནལ་པོར་གཤེར་བར་འདུག་པ་ལ་འོ་བྱས་པ་དང་། 

49-1-126a

ཐབས་ཅི་ཡོད་པས་གསོས་པ་ནི་མཆོག་ཏུ་དཀའ་བ་བྱེད་བྱེད་པ་ཡིན་ཏེ། ད་ནི་ཁྱོད་ཀྱི་བཀའ་དྲིན་ལ་བདག་སྐྱེས་པས་བླ་མའི་མཆོད་པ་བྱ་དགོས་ཏེ་དེ་དང་འཚམ་པར་བྱའོ་ཞེས་ཟེར་བ་དེ་བཞིན་དུ་ཕམ་པ་བྱེད་བྱེད་པ་རྣམས་
དང་། མཚམས་མེད་པ་བྱེད་བྱེད་པ་རྣམས་འཆི་བའི་ཚེ་དྲན་པ་མ་བརྗེད་པའི་འབྲས་བུས་ལྷའི་འཇིག་རྟེན་དུ་སྐྱེ་བར་འགྱུར་ཏེ། དེ་ནས་ཕམ་པ་བྱེད་བྱེད་པ་དང་། མཚམས་མེད་པ་བྱེད་བྱེད་པ་ཡང་དྲན་པ་མ་བརྗེད་པའི་འབྲས་བུ་སེམས་ཅན་དམྱལ་བ་
འམ། མིའི་འཇིག་རྟེན་དུ་བྱང་ཆུབ་ཀྱི་རྒྱུར་འགྱུར་ཏེ། འདོད་ཆེན་པ་ནི་མ་གཏོགས་སོ། །དཔེར་ན་སྨན་པའམ། སྨན་པའི་བུ་རྒྱུད་ཕྱི་མ་ཤེས་པས་སྦྲུལ་གདུག་པ་དང་། མི་གདུག་པ་དང་། ཀླུ་བྱ་གག་ཅེས་བྱ་བ་ལ་སོགས་པ་སྨན་གནོད་
སེལ་དང་། རིག་སྔགས་ཀྱི་མཐུས་རང་གི་ལམ་ལ་དབང་བྱ་བ་བཞིན་དུ་བཏུལ་ནས་དུག་མེད་པར་བྱེད་དེ། ཀླུ་ཤིན་ཏུ་དྲག་པོ་ནི་མ་གཏོགས་སོ། །དེ་བཞིན་དུ་མདོ་སྡེ་ཆེན་པོ་སྨན་གནོད་སེལ་དང་འདྲ་བ་འདིས་ཀྱང་ཕམ་པ་བྱེད་པ་རྣམས་དང་། 
མཚམས་མེད་པའི་ལས་བྱེད་པའི་སྡིག་ཅན་གྱི་ཀླུ་མཆོག་ཏུ་དྲག་པ་སེམས་བསྐྱེད་མི་དགོས་པར་འཛིན་པ་རྣམས་བཏུལ་ནས་བྱང་ཆུབ་ཀྱི་གནས་ཆེན་པོར་འགོད་པར་བྱེད་དེ། དེ་བས་ན་སེམས་ཅན་ཐམས་ཅད་ཀྱི་བདེ་བ་བསྐྱེད་པའི་ཕྱིར་ཡོངས་སུ་
མྱ་ངན་ལས་འདས་པ་ཆེན་པོའི་མིང་སྨན་གནོད་སེལ་ཆེན་པོ་ཡོན་ཏན་གྱི་ཚུལ་ཅན་ཞེས་བྱ་སྟེ། འདོད་ཆེན་པའི་ཀླུ་དྲག་པོ་མི་བཟད་པ་ནི་མ་གཏོགས་སོ། །དཔེར་ན་སྨན་པས་དུག་སྨན་ཟུག་རྔུ་འབྱིན་པའི་སྨན་གྱི་རྒྱལ་པོ་བསྒྲུབས་ཏེ། དེས་རྔ་
བོ་ཆེ་ལ་བསྐུས་ནས་ཕོ་བྲང་འཁོར་དུ་རྔ་དེ་བརྡུངས་ན་སྒྲ་དེའི་མཐུས་སྐྱེ་བོ་ཇི་སྙེད་ཀྱིས་སྒྲ་ཐོས་པ་དེ་དག་གི་ཟུག་རྔུ་ཐམས་ཅད་འབྱུང་བར་འགྱུར་ཏེ། དེ་ཉིད་ན་འཆི་བའི་དུས་ལ་ཉེ་བ་རྣམས་ཀྱིས་ནི་འབྱུང་བར་མི་འགྱུར་རོ། །དེ་ཅིའི་ཕྱིར་ཞེ་ན། 
དེ་དག་གི་ལས་ཀྱི་རྣམ་པར་སྨིན་པ་མི་བཟད་པ་ཡོད་པའི་ཕྱིར་རོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་སྒྲ་གང་དུ་ཐོས་ཀྱང་རུང་སྟེ། འདུ་བྱེད་ཀྱི་ཕོ་བྲང་འཁོར་ན་གནས་པའི་སེམས་ཅན་ཐམས་ཅད་ཀྱི་འདོད་

49-1-126b

ཆགས་དང་། ཞེ་སྡང་དང་། གཏི་མུག་གི་ཟུག་རྔུ་རྣམས་འབྱིན་པར་བྱེད་ལ་འདུ་བྱེད་པ་མེད་པར་ཡང་བྱེད་དོ། །ཕོ་བྲང་འཁོར་ན་གནས་པ་དེ་དག་གི་ཡིད་ལ་འདི་སྙམ་དུ་ཟུག་རྔུ་འབྱུང་བར་མི་འགྱུར་རོ་སྙམ་དུ་སེམས་མོད་ཀྱི་དེ་དག་གི་ཡིད་ལ་
ཟུག་རྔུ་རྣམས་འབྱུང་བར་འགྱུར་རོ་སྙམ་དུ་ཇི་ག་སེམས་སམ། དེ་བཞིན་དུ་གཅིག་ཤོས་རྣམས་ལ་ཡང་འདོད་ཆགས་དང་། ཞེ་སྡང་དང་། གཏི་མུག་གི་ཟུག་རྔུ་རྣམས་འབྱུང་བར་འགྱུར་རོ་སྙམ་པའི་སེམས་མེད་དེ། དེ་དག་གི་སེམས་ནི་འདོད་
པ་རྣམས་ལ་གནས་སོ། །དེ་བཞིན་དུ་ཕམ་པ་བྱེད་པ་རྣམས་དང་། མཚམས་མེད་པའི་ལས་བྱེད་པ་སེམས་བསྐྱེད་མི་དགོས་པར་འཛིན་པ་རྣམས་ཀྱི་ཡང་བྱང་ཆུབ་ཀྱི་རྒྱུ་སྐྱེད་པར་བྱེད་དེ། འདོད་ཆེན་པ་འཆི་བའི་དུས་ལ་བབ་པ་དང་འདྲ་བ་ནི་མ་
གཏོགས་སོ། །རིགས་ཀྱི་བུ་དཔེར་ན་མཚན་མོ་མུན་པའི་ནང་ན་འཛམ་བུའི་གླིང་པའི་སེམས་ཅན་རྣམས་ཞིང་བླས་ལ་སོགས་པའི་ལས་བྱ་བ་ལ་འཇུག་པ་མེད་དེ། ཉི་མ་འཆར་བ་སྡོད་ཅིང་འཁོད་དོ། །དེ་ནས་ཉི་མ་ཤར་བ་དང་ཞིང་བླས་ལ་
སོགས་པ་བྱེད་པ་འཇུག་གོ། །དེ་བཞིན་དུ་ཐེག་པ་ཆེན་པོ་པ་རྣམས་ཀྱིས་ཀྱང་མདོ་སྡེ་དང་། ཏིང་ངེ་འཛིན་ཐམས་ཅད་ཐོས་ཤིང་བསྒོམས་ནས་ཞིང་བླས་བྱེད་འདོད་པའི་སེམས་ཅན་མཚན་མོ་སྡོད་པ་བཞིན་དུ་ཡོངས་སུ་མྱ་ངན་ལས་འདས་པ་ཆེན་
པོའི་མདོ་ཆེན་པོའི་ཉི་མ་འཆར་བ་སྡོད་དོ། །དེ་ནས་མདོ་ཆེན་པོ་འདི་ལས་དགོངས་པའི་ཚིག་ཐོས་ནས་དམ་པའི་ཆོས་ཀྱི་གནས་སུ་ལས་རྩོམ་པར་བྱེད་དོ། །དེ་ནས་ཞིང་བླས་ཇི་ལྟར་བྱས་པ་ལ་ཆར་ཆེན་པོ་བབ་པས་ལོ་ཐོག་སྐྱེ་བར་འགྱུར་
ལ་ལོ་ཡང་ལེགས་པར་འགྱུར་རོ། །དེ་བཞིན་དུ་དམ་པའི་ཆོས་ཀྱི་ཞིང་བླས་བྱས་པ་ལ་དེ་བཞིན་གཤེགས་པའི་སྙིང་པོའི་མདོ་ཆེན་པོའི་སྤྲིན་ཆེན་པོ་ལས་ཐོས་པའི་ཆོས་ཀྱི་ཆར་བབ་ན་རིམས་ནད་རྣམ་པ་བརྒྱད་ལས་རྣམ་པར་གྲོལ་བ་དང་། 
བདེ་བ་དང་། ལོ་ལེགས་པ་དང་། ཡིད་དུ་འོང་བར་བྱེད་པའི་ལུང་བསྟན་པ་ཆེན་པོའི་ལོ་ཐོག་སྐྱེ་བར་འགྱུར་ཏེ། དམ་པའི་ཆོས་པདྨ་དཀར་པོའི་མདོ་ཆེན་པོ་ལས་ཉན་ཐོས་ཆེན་པོ་བརྒྱད་བཅུ་དཔྱིད་ཟླ་ར་བ་ལ་འབྲུ་རྣམས་མཐར་ཐུག་པ་

49-1-127a

བཞིན་དུ་ལུང་བསྟན་པ་ཆེན་པོའི་ལོ་ཐོག་སྐྱེ་བའི་མཐར་ཐུག་པ་དང་འདྲ་བར་འགྱུར་ཏེ། འདོད་ཆེན་པ་ནི་མ་གཏོགས་སོ།། །། བམ་པོ་བཅུ་གཉིས་པ། རིགས་ཀྱི་བུ་དཔེར་ན་སྨན་པ་ཆེན་པོས་འབྱུང་པོས་
ཟིན་པ་འམ། སྦྲུལ་གྱིས་ཟིན་པའི་དོན་དུ་སྨན་གྱི་རི་ལུ་འམ། སྨན་གནོད་སེལ་རྒྱང་གྲགས་མང་པོ་ཞིག་ཏུ་བསྐུར་ཏེ། འདི་སྐད་དུ་སྨན་འདི་མྱུར་དུ་ཁྱེར་ལ་ཁྱེར་ནས་ཀྱང་དེའི་དཔྱད་གྱིས་ཤིག་དང་། དེ་ལྟར་བྱས་ན་དེའི་ལྷ་དང་། ཀླུ་དང་། 
གནོད་སྦྱིན་དང་། སྲིན་པོའི་གདོན་རྣམས་མེད་པར་འགྱུར་རོ། །དེ་སྟེ་མ་ཁྱེར་ན་བདག་ཉིད་འགྲོ་བར་བྱའི་དེར་བར་མ་དོར་ཆུད་ཟོས་ན་མི་རུང་ངོ་ཞེས་ཀྱང་ཟེར་ལ། དེ་ནས་སྨན་པའམ། སྨན་པའི་ཕྲིན་པ་དེ་ཐག་རིང་པོ་ཞིག་ནས་མཐོང་ནས་སྔགས་
དེའི་གཟི་བྱིན་དང་། མཐུས་གནོད་པ་ཐམས་ཅད་ཞི་བར་འགྱུར་ཏེ། དེ་ཡང་བདེ་བར་འགྱུར་བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་མཐུ་ཆེ་བ་འདི་ཡི་གེར་བྲིས་པ་ཞིག་ག་ཞིག་གི་གནས་ཞིག་ན་ཡོད་དོ། །ཞེས་དགེ་
སློང་ངམ། དགེ་སློང་མ་འམ། འདི་ལས་ཕྱི་རོལ་པ་གཞན་གྱིས་ཤེས་སམ། གཞན་ལས་ཐོས་ན་དེ་དག་གི་བྱང་ཆུབ་ཀྱི་རྒྱུར་འགྱུར་ལ། ཕམ་པ་བྱེད་པ་དང་། མཚམས་མེད་པའི་ལས་བྱེད་པའི་འབྱུང་པོ་དང་། ཤ་ཟའི་གདོན་གྱིས་ཟིན་
པ་ཇི་སྙེད་ཀྱིས་ཐོས་ཀྱང་རུང་སྟེ། དེ་དག་ཐམས་ཅད་ཀྱང་སྨན་པ་ཆེན་པོ་མཐོང་བ་བཞིན་དུ་གནོད་པ་དང་བྲལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྟག་པའི་མདོ་སྡེ་ཆེན་
པོའི་མཐུའི་རྒྱུས་དེ་ལྟར་འགྱུར་ཏེ། དེ་ལྟ་ན་གང་དག་གིས་མདོ་སྡེ་ཆེན་པོ་གླེགས་བམ་ལ་བྲིས་པ་བཀླགས་སམ། ཐོས་སམ་བྲིས་ཀྱང་རུང་། དེ་དག་ལྟ་བྱང་ཆུབ་སེམས་དཔའ་སེམས་དཔའ་ཆེན་པོར་ཅི་སྟེ་མི་འགྱུར། འདོད་ཆེན་པ་
ནི་མ་གཏོགས་སོ། །དཔེར་ན་འོན་པས་སྒྲ་མི་ཐོས་པ་དེ་བཞིན་དུ་འདོད་ཆེན་པས་ཀྱང་མདོ་སྡེ་འདི་ཐོས་པར་མི་ནུས་ཏེ། དེ་ལ་རྒྱུ་མེད་པའི་ཕྱིར་རོ། །རིགས་ཀྱི་བུ་གཞན་ཡང་དཔེར་ན་སྨན་པ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་

49-1-127b

ཞིག་གིས་རྒྱལ་པོ་ཆེན་པོ་མཐོང་ནས་རྒྱལ་པོ་ཆེན་པོ་ཁྱོད་ལ་གྲོངས་ལ་ཐུག་པ་ཙམ་གྱི་སྙུན་གྱིས་ཐེབས་པར་འགྱུར་རོ་ཞེས་ལུང་བསྟན་པ་དང་། རྒྱལ་པོ་དེས་དེ་ལ་བཀའ་སྩལ་པ། ཁྱོད་ཀྱིས་མ་མཐོང་བར་ནད་ཚབས་པོ་ཆེ་འབྱུང་བར་
ཇི་ལྟར་ཤེས། དེ་ནས་སྨན་པ་དེས་རྒྱལ་པོ་ལ་གསོལ་པ། གལ་ཏེ་ཐུགས་མི་ཆེས་ན་སྨན་གསོལ་ཅིག་དང་མངོན་ནོ་ཞེས་བྱས་ན། འོན་ཀྱང་རྒྱལ་པོ་དེ་སྨན་འཐུང་དུ་ཡང་མ་བཏུབ་བོ། །དེ་ནས་སྨན་པ་ཆེན་པོ་དེས་རིག་པའི་སྟོབས་ཀྱིས་
གཞང་ཀར་གཞང་འབྲུམ་འཐོན་པར་བྱས་སོ། །དེ་ནས་རྒྱལ་པོ་དེས་གཞང་འབྲུམ་དེ་དག་མཐོང་ནས་སྐྲག་ཅིང་མི་དགའ་སྟེ་སྐྱི་བུང་ཞེས་བྱས་ནས་སྨན་པའི་ཚིག་བདེན་ནོ་སྙམ་དུ་སེམས་ཏེ། གཞང་འབྲུམ་འཐོན་པར་ཤེས་ནས་ཀྱེ་མ་སྨན་པ་
རིག་པའི་སྟོབས་ངོ་མཚར་ཏོ་སྙམ་སྟེ། སྨན་པ་དེ་ལ་ཕ་མ་ལ་གུས་པར་བྱ་བ་བཞིན་དུ་བཀུར་སྟི་བྱེད་པ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཆེན་པོ་འདི་ནི་སེམས་བསྐྱེད་མི་དགོས་པར་འཛིན་པའི་སེམས་ཅན་ཐམས་
ཅད་ལ་ཡང་སྨན་པ་ཆེན་པོས་རྒྱལ་པོ་ལ་བྱ་བ་བཞིན་དུ་བདེ་བླག་ཏུ་བྱང་ཆུབ་ཀྱི་རྒྱུ་ལ་འཇོག་པར་བྱེད་དེ། དེ་དག་ལ་རྨི་ལམ་དུ་འམ་འཆི་བའི་ཚེ་ཡང་རུང་སྟེ། སེམས་ཅན་དེ་དག་གིས་མི་ཤེས་བཞིན་དུ་བྱང་ཆུབ་ཀྱི་རྒྱུ་འཇུག་པར་འགྱུར་རོ། །
འདོད་ཆེན་པ་ནི་མ་གཏོགས་ཏེ། སྨན་པ་ཆེན་པོས་ཀྱང་འདི་ནི་གསོར་མི་རུང་ངོ་སྙམ་ནས་ལས་མི་བཟད་པ་དང་ལྡན་པའི་འཆི་བར་འགྱུར་བའི་ནད་གསོ་བར་མི་བྱེད་དོ། །འཆི་བར་འགྱུར་བ་དང་འདྲ་བ་ནི་འདོད་ཆེན་པ་ཡིན་ནོ། །རིགས་
ཀྱི་བུ་དཔེར་ན་སྨན་པ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་ཞིག་གིས་རང་གི་བུ་ཐོག་མར་རྒྱུད་ཀྱི་ཡན་ལག་ཐང་དང་། ཆུ་དང་། རི་ལས་སྐྱེས་པའི་སྨན་རྣམས་སློབ་པར་བྱེད་ཀྱིས་ཐོག་མ་ཡན་ལག་སློབ་པ་ཙམ་
ན་རྒྱུད་ཕྱི་མ་སློབ་པར་མི་བྱེད་དེ། གང་གི་ཚེ་ཚེའི་རིག་བྱེད་ཡན་ལག་བརྒྱད་བསླབས་ཟིན་པ་དེའི་ཚེ་ནི་རྒྱུད་ཕྱི་མ་ལས་སྔགས་དང་སྨན་གྲུབ་པའི་ལས་སློབ་པར་བྱེད་པ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་

49-1-128a

རྫོགས་པའི་སངས་རྒྱས་ཀྱང་ཉིད་ཀྱི་སྲས་དགེ་སློང་དག་ལ་ཐོག་མའི་ཡན་ལག་ཉོན་མོངས་པའི་རྣམ་པ་སྦྱང་བ་དང་། ལུས་སྙིང་པོ་མེད་པར་བསྒོམ་པ་དང་། ཐང་དང་ཆུ་དང་། རི་ལས་སྐྱེས་པ་ལྟ་བུ་
རྣམ་པ་གསུམ་བསྒོམ་པ་སློབ་པར་མཛད་དོ། །དེ་ལ་ཐང་ཞེས་བྱ་བ་ནི་ལུས་ཀྱི་སྡུག་བསྔལ་རྣམ་པ་དུ་མ་རྣམས་སོ། །ཆུ་ཞེས་བྱ་བ་ནི་ལུས་འདི་ཆུའི་ཆུ་བུར་ལྟ་བུར་མི་རྟག་པའོ། །རི་ཞེས་བྱ་བ་ནི་ཉོན་མོངས་པའི་རྣམ་པ་རྣམས་ལ་
བདག་མེད་པ་སྟེ། དེ་བས་ན་དེ་བཞིན་གཤེགས་པ་ནི་ལུས་འདི་ནི་བདག་མེད་པའོ་ཞེས་སློབ་པར་མཛད་དོ། །གལ་ཏེ་དགེ་སློང་རྣམས་ཀྱི་གསུང་རབ་ཡན་ལག་དགུའི་དོན་མ་མཐོང་ན་ནི་ཐེག་པ་ཆེན་པོའི་མཆོག་འདི་སློབ་པར་མི་མཛད་
དོ། །ད་ནི་སྨན་པ་ཆེན་པོ་བཞིན་དུ་དེ་བཞིན་གཤེགས་པའི་གསུང་རབ་ཡན་ལག་དགུ་ལ་དོན་གྱི་བྱ་བ་བྱས་ཟིན་པའི་དགེ་སློང་རྣམས་ལ་དེ་བཞིན་གཤེགས་པའི་སྙིང་པོའི་རྒྱུད་ཕྱི་མ་ལས་དེ་བཞིན་གཤེགས་པའི་སྙིང་པོ་རྟག་གོ་ཞེས་སྟོན་
པར་མཛད་དེ། དེ་ལྟར་དེ་བཞིན་གཤེགས་པས་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་བསྟན་པ་ཐོས་ན་སེམས་བསྐྱེད་མི་དགོས་པར་འཛིན་པའི་སེམས་ཅན་རྣམས་ལ་ཡང་བྱང་ཆུབ་ཀྱི་རྒྱུར་འགྱུར་ཏེ། འདོད་ཆེན་པ་ནི་མ་
གཏོགས་སོ། །རིགས་ཀྱི་བུ་དེ་ལྟར་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ནི་དེ་ལྟར་བསམ་གྱིས་མི་ཁྱབ་སྟེ། སྨན་པ་ཆེན་པོ་བཞིན་དུ་སྨན་པ་རྣམས་ཀྱི་མཆོག་ཡིན་ཏེ། མདོ་སྡེ་འདི་ནི་མདོ་སྡེའི་རྒྱལ་པོའི་མཆོག་ཡིན་
ནོ། །རིགས་ཀྱི་བུ་གཞན་ཡང་གྲུ་ནི་སེམས་ཅན་བསྒྲལ་བའི་ཕྱིར་ཕ་རོལ་གྱི་འགྲམ་ནས་ཚུ་རོལ་གྱི་འགྲམ་དུ་འོང་ཞིང་། ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་འགྲོ་བ་དེ་བཞིན་དུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་
ཆེན་པོས་ཡོངས་སུ་མྱ་ངན་ལས་འདས་ནས་གྲུ་ཕ་རོལ་ཏུ་འགྲོ་བ་བཞིན་དུ་སེམས་ཅན་རྣམས་སྒྲོལ་དུ་གཤེགས་ཏེ། གང་དང་གང་དུ་གདུལ་བར་བྱ་བ་རྣམས་ཡོད་པ་དེ་དང་དེར་རྫོགས་པའི་སངས་རྒྱས་སྟོན་པར་མཛད་དོ། །དེ་བས་ན་ཇི་

49-1-128b

ལྟར་གྲུ་གང་དང་གང་དུ་སེམས་ཅན་སྒྲོལ་བར་འདོད་པ་དེ་དང་དེར་འགྲོ་བ་དེ་བཞིན་དུ་དེ་བཞིན་གཤེགས་པ་ཡང་དེ་དང་འདྲ་སྟེ། དེ་བས་ན་མཉན་པ་ཆེན་པོ་ཞེས་བྱའོ། །དེ་ནས་དེ་བཞིན་གཤེགས་པ་རྟག་པ་དང་བརྟན་པ་ཡིན་ནོ། །གྲུ་ཡོད་ན་
མཉན་པས་སྒྲོལ་བར་བྱེད་ལ། དེ་བཞིན་གཤེགས་པ་རྟག་པར་ཡོད་པ་དང་ད་དུང་དུ་སེམས་ཅན་སྒྲོལ་ཞིང་སྐྱེ་བར་འགྱུར་རོ། །རིགས་ཀྱི་བུ་གཞན་ཡང་དཔེར་ན་རྒྱ་མཚོ་ཆེན་པོའི་ནང་དུ་གྲུ་བོ་ཆེ་འགྲོ་བ་རླུང་དང་ཕྲད་ན་དྲང་པོར་འགྲོ་ཞིང་སྐད་ཅིག་ཙམ་
གྱིས་དཔག་ཚད་དུ་མར་འགྲོ་ལ། གལ་ཏེ་རླུང་དང་མ་ཕྲད་ན་ནི་ལོ་དུ་མར་ཡང་མལ་གཅིག་ན་འདུག་པ་འམ། ཡང་ན་བུབ་པར་འགྱུར་བ་དེ་བཞིན་དུ་མི་ཤེས་པའི་རྒྱ་མཚོ་ཆེན་པོར་ལྷུང་བའི་སེམས་ཅན་རྣམས་ཀྱང་ཡོངས་སུ་མྱ་ངན་ལས་འདས་པ་
ཆེན་པོའི་མདོ་ཆེན་པོའི་རླུང་གི་རྒྱལ་པོ་དང་ཕྲད་ན་ནི་གྲུ་བཞིན་དུ་མྱུར་བ་ཁོ་ནར་བྱང་ཆུབ་ཀྱི་ཕ་རོལ་ཏུ་ཕྱིན་པར་འགྱུར་རོ། །གང་དག་མདོའི་རླུང་གི་རྒྱལ་པོ་འདི་དང་མ་ཕྲད་པ་དེ་དག་ནི་གྲུ་རྒྱ་མཚོ་ཆེན་པོར་བུབ་པ་བཞིན་དུ་འཁོར་བའི་འཁོར་
ལོར་བརླག་པར་འགྱུར་རོ། །རིགས་ཀྱི་བུ་གཞན་ཡང་དཔེར་ན་རྒྱ་མཚོ་ཆེན་པོ་འཇིགས་པའི་གནས་སུ་རླུང་དང་མ་ཕྲད་ན་དེ་ནི་ཤི་བ་ཉིད་འདི་ཡིན་ནོ་སྙམ་སྟེ། དཀོས་ཐག་པར་གྱུར་པའི་སེམས་ཅན་རྣམས་མི་ཤེས་བཞིན་དུ་རླུང་གི་རྒྱལ་པོས་
ཡུད་ཙམ་གྱིས་ཁྱེར་ནས་དེ་དག་འདི་སྙམ་དུ་སེམས་ཏེ། ཀྱེ་མ་བདག་ཅག་ཐར་བར་གྱུར་པ་འདི་ནི་ངོ་མཚར་ཆེའོ་སྙམ་པ་དེ་བཞིན་དུ། མདོ་ཆེན་པོ་འདིའི་མདོའི་རླུང་གི་རྒྱལ་པོ་འདི་ཡང་མི་ཤེས་པའི་རྒྱ་མཚོ་ཆེན་པོ་ན་འཁོད་པའི་སེམས་
ཅན་བྱང་ཆུབ་ཏུ་སེམས་བསྐྱེད་མི་དགོས་པར་འཛིན་པ་རྣམས་མི་ཤེས་བཞིན་དུ་བྱང་ཆུབ་ཀྱི་རྒྱུ་ལ་འགོད་པར་བྱེད་དོ། །རིགས་ཀྱི་བུ་གཞན་ཡང་དཔེར་ན་སྦྲུལ་གྱིས་ལྤགས་པ་རྙིང་པ་བོར་ན་ཇི་ག་ཤི་བ་འམ། མེད་པར་སོང་བ་ཡིན་ནམ། 
གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཡང་ལྤགས་པ་རྙིང་པ་འདོར་བཞིན་དུ་ཐབས་ཀྱི་སྐུ་དུག་སྨན་གྱི་སྡོང་པོ་རྙིང་པ་སྤོང་བར་མཛད་པ་ལ། ཇི་ག་དེ་

49-1-129a

སྤོང་བར་མཛད་པ་ལ། ཇི་ག་དེ་བཞིན་གཤེགས་པ་མི་རྟག་པར་འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། སྦྲུལ་ལྤགས་པ་རྗེས་པ་བཞིན་དུ་འཛམ་བུའི་གླིང་ཁ་ཅིག་ཏུ་ཐབས་ཀྱི་
སྐུ་གཞན་བོར་ནས་ཐབས་ཀྱི་སྐུ་གཞན་སྟོན་པར་མཛད་ལགས་སོ། །བཀའ་སྩལ་པ། རིགས་ཀྱི་བུ་དེ་བས་ན་དེ་བཞིན་གཤེགས་པ་རྟག་པ་ཡིན་ནོ། །རིགས་ཀྱི་བུ་གཞན་ཡང་དཔེར་ན་གསེར་མགར་གྱིས་གསེར་གྱི་འབྱུང་གནས་ནས་
གསེར་བཞུ་སྟེ། སྐྱོན་དང་བྲལ་བར་གྱུར་ནས་རྒྱན་བཟང་པོ་ཇི་དང་ཇི་ལྟ་བུའི་གཟུགས་སུ་འདོད་པའི་གསེར་མགར་བྱེད་དུ་བཅུག་ན་དེ་དང་དེ་ལྟ་བུར་བྱེད་པ་དེ་བཞིན་དུ་དེ་བཞིན་གཤེགས་པས་ཀྱང་སྲིད་པ་ཉི་ཤུ་རྩ་ལྔ་དག་ཏུ་གདུལ་བར་
བྱ་བ་རྣམས་ཅི་དང་ཅི་ལྟ་བུར་འདོད་པ་དེ་དང་དེ་ལྟ་བུའི་ཐབས་ཀྱིས་གཟུགས་མངོན་པར་སྤྲུལ་ནས་སེམས་ཅན་རྣམས་སྒྲོལ་བར་མཛད་དོ། །དེ་བས་ན་དེ་བཞིན་གཤེགས་པའི་སྐུ་ནི་མཐའ་ཡས་ཏེ་རྟག་པ་ཡིན་ནོ། །རིགས་ཀྱི་བུ་གཞན་ཡང་
དཔེར་ན་ཨ་མྲའི་ཤིང་ངམ། འཛམ་བུའི་ཤིང་ཡང་རུང་། དུས་ཚིག་རྣམ་པ་གསུམ་གྱི་དབང་གིས་འགྱུར་ཏེ། རེས་འགའ་ནི་སྦལ་མིག་བྱེ་བ་དང་ལོ་མ་ཁ་འབུ་བར་འགྱུར་རོ། །རེས་འགའ་ནི་ལོ་མ་རྒྱས་ཤིང་གྲིབ་མ་བསིལ་བར་འགྱུར་
རོ། །རེས་འགའ་ནི་ཤིང་སྐམ་པོ་བཞིན་དུ་ལོ་མ་ལྷགས་པར་འགྱུར་ན། ཇི་ག་ཤིང་དེ་དག་ཤི་ཞེས་བྱའམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། རིགས་ཀྱི་བུ་དེ་བཞིན་དུ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉིད་གདུལ་བར་བྱ་བའི་དབང་གིས་འཇིག་རྟེན་གསུམ་དུ་ཐབས་ཀྱི་སྐུ་རྣམ་པ་གསུམ་དུ་སྟོན་པར་མཛད་དེ། སྐྱེ་བ་ལྟ་བུ་དང་། འཚོ་ཞིང་བཞུགས་པ་ལྟ་བུ་དང་། ཡོངས་སུ་
མྱ་ངན་ལས་འདས་པ་ལྟ་བུར་སྟོན་ན། ཇི་ག་དེ་བཞིན་གཤེགས་པ་མི་རྟག་པ་ཡིན་ནམ། གསོལ་པ་བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། རིགས་ཀྱི་བུ་དེ་བས་ན་དེ་བཞིན་གཤེགས་པ་ནི་རྟག་པ་ཡིན་

49-1-129b

ནོ། །རིགས་ཀྱི་བུ་དེ་ལྟར་ན་དེ་བཞིན་གཤེགས་པའི་སྐུ་དང་། དེ་བཞིན་གཤེགས་པའི་དགོངས་པའི་ཚིག་ཀྱང་ཤེས་པར་དཀའོ། །དཔེར་ན་རྒྱལ་པོ་ལ་ལ་ཞིག་གིས་རང་གི་བློན་པོ་ལ་སེནྡ་པ་འོན་ཅིག་ཅེས་དེ་སྐད་བསྒོ་ན། དེ་ལ་སེན་ད་པ་
ཞེས་བྱ་བ་ནི་ལན་ཚྭ་དང་། སྐོམ་སྣོད་དང་། རལ་གྲི་དང་། རྟ་རྣམས་ལ་བྱ་སྟེ། འདི་བཞིའི་མིང་སེན་ད་པ་ཞེས་བྱ་ན། འདི་ལྟར་མིང་གཅིག་ལ་དོན་མང་པོ་ཡོད་པས། གང་གི་ཚེ་རྒྱལ་པོ་བཤོས་གསོལ་བ་ན་སེན་ད་པ་
ཞེས་ཟེར་ན་ནི་དེའི་ཚེ་བློན་པོས་སེན་ད་པ་ལན་ཚྭ་ཡིན་པར་རིག་ནས་ལན་ཚྭ་འབུལ་བར་བྱེད་དོ། །གང་གི་ཚེ་རྒྱལ་པོ་གཤོས་གསོལ་ཟིན་ནས་སེན་ད་པ་ཞེས་ཟེར་ན་ནི་དེའི་ཚེ་བློན་པོས་སྐོམ་སྣོད་ཡིན་པར་རིག་ནས་སྐོམ་སྣོད་འབུལ་བར་
བྱེད་དོ། །གང་གི་ཚེ་རྒྱལ་པོ་སྐྱེད་མོས་ཚལ་དུ་འགྲོ་བའི་ཚེ་སེན་ད་པ་ཞེས་ཟེར་ན་ནི་དེའི་ཚེ་བློན་པོས་རྟ་ཡིན་པར་རིག་ནས་རྟ་འབུལ་བར་བྱེད་དོ། །གང་གི་ཚེ་རྒྱལ་པོ་འཐབ་པའི་ཚེ་སེན་ད་པ་ཞེས་ཟེར་ན་ནི་དེའི་ཚེ་བློན་པོས་རལ་གྲི་ཡིན་
པར་རིག་ནས་རལ་གྲི་འབུལ་བར་བྱེད་དེ། དེ་ལྟར་རྒྱལ་པོའི་དགོངས་པའི་ཚིག་རྣམ་པ་བཞི་བློན་པོ་རྣམས་ཀྱིས་ཁོང་དུ་ཆུད་པར་འགྱུར་རོ། །རིགས་ཀྱི་བུ་དེ་བཞིན་དུ་ཐེག་པ་ཆེན་པོ་འདི་ལ་ཡང་མི་རྟག་པ་རྣམ་པ་བཞི་ཞེས་བྱ་བ་ཡོད་པར་ཐེག་
པ་ཆེན་པོ་པ་བློན་པོ་དང་འདྲ་བས་དེ་བཞིན་དུ་རིག་པར་བྱ་སྟེ། གང་གི་ཚེ་དེ་བཞིན་གཤེགས་པ་འཇིག་རྟེན་དུ་བྱུང་ནས་སངས་རྒྱས་ཡོངས་སུ་མྱ་ངན་ལས་འདའོ་ཞེས་སྟོན་ན་ནི་དེའི་ཚེ་ཐེག་པ་ཆེན་པོ་པས་མི་རྟག་པ་སྟོན་ཏོ་སྙམ་དུ་ཤེས་པར་བྱ་
སྟེ། མི་རྟག་པའི་འདུ་ཤེས་བསྒོམ་པར་བྱའོ། །གང་གི་ཚེ་དེ་བཞིན་གཤེགས་པ་དམ་པའི་ཆོས་ནུབ་པ་དང་ཞིག་པར་འགྱུར་རོ་ཞེས་སྟོན་ན་ནི་དེའི་ཚེ་སྡུག་བསྔལ་སྟོན་ཏོ་སྙམ་དུ་ཤེས་པར་བྱ་སྟེ། སྡུག་བསྔལ་བསྒོམ་པར་བྱའོ། །གང་གི་ཚེ་
དེ་བཞིན་གཤེགས་པ་དགེ་སློང་རྣམས་དང་། དགེ་སློང་མ་རྣམས་ལ། ངའི་ལུས་ནད་ཆེན་པོ་མཐའ་ཡས་པས་གཟིར་ཏོ། །དགེ་འདུན་འཇིག་པར་འགྱུར་རོ་ཞེས་སྟོན་ན་ནི་དེའི་ཚེ་བདག་མེད་པ་སྟོན་ཏོ་སྙམ་དུ་ཤེས་པར་བྱ་སྟེ། 

49-1-130a

བདག་མེད་པ་བསྒོམ་པ་བསྒོམ་པར་བྱའོ། །གང་གི་ཚེ་དེ་བཞིན་གཤེགས་པ་ཐར་པ་ནི་མཚན་མ་མེད་པ་དང་། སྟོང་པ་དང་། ཅི་ཡང་མེད་པའོ་ཞེས་སྟོན་ན་ནི་དེའི་ཚེ་ཐར་པ་ནི་སྲིད་པ་ཉི་ཤུ་རྩ་ལྔ་དང་བྲལ་
བ་ཡིན་ནོ་ཞེས་སྟོན་པར་ཤེས་པར་བྱ་སྟེ། དེ་བས་ན་སྟོང་པ་ཞེས་བྱའོ། །གང་གི་ཕྱིར་དེ་ལ་སྡུག་བསྔལ་མེད་པས་ན་དེའི་ཕྱིར་སྡུག་བསྔལ་ཅི་ཡང་མེད་པ་དང་། མཆོག་ཏུ་བདེ་བ་དང་། མཚན་མ་མེད་པ་ཡིན་ནོ། །གང་གི་ཕྱིར་དེ་ལ་
མི་རྟག་པ་དང་། མི་བརྟན་པ་དང་། ཐེར་ཟུག་མ་ཡིན་པ་དང་། ཞི་བའི་རང་བཞིན་མ་ཡིན་པ་མེད་པས་ན་དེའི་ཕྱིར་ཐར་པ་ནི་རྟག་པ་དང་། བརྟན་པ་དང་། ཐེར་ཟུག་དང་། ཞི་བ་སྟེ་དེ་ཉིད་དེ་བཞིན་གཤེགས་པ་ཡིན་ནོ། །
གང་གི་ཚེ་དེ་བཞིན་གཤེགས་པ་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ་ཞེས་སྟོན་ན་ནི་དེའི་ཚེ་ཡང་དག་པར་རྟག་པ་བསྒོམ་པ་བསྒོམ་པར་བྱའོ། །དགེ་སློང་གང་དག་དེ་ལྟར་སྒོམ་པ་དེ་དག་ནི་ངའི་ཉན་ཐོས་ཡིན་ནོ་
ཞེས་ང་ཟེར་རོ། །རྒྱལ་པོའི་བློན་པོ་བཞིན་དུ་དགོངས་པའི་ཚིག་ལ་མཁས་པ་ཡིན་ནོ་ཞེས་ང་ཟེར་རོ། །དེ་ལྟར་རྒྱལ་པོའི་ལུགས་ལ་ཡང་དགོངས་པའི་ཚིག་ཡོད་ན་ངའི་བསྟན་པ་ལ་དགོངས་པའི་ཚིག་ག་ལ་ཞིག་མེད་དེ། མཁས་པ་མང་
པོ་དག་གིས་དེ་ལྟར་རིག་པར་བྱའོ། །ངའི་བསྟན་པ་ནི་འཇིག་རྟེན་ཐམས་ཅད་དང་མི་མཐུན་ནོ། །རིགས་ཀྱི་བུ་གཞན་ཡང་དཔེར་ན་ཤིང་པ་ལ་ཤ་དང་། མྱ་ངན་འཚང་དང་། དོང་ཀའི་ཤིང་རྣམས་ནི་ཆར་པ་དཀོན་པའི་ཚེ་མེ་ཏོག་
ཀྱང་ངན་པར་འགྱུར། འབྲས་བུ་ཡང་ངན་པར་འགྱུར་རོ། །ཆུ་དང་ཐང་ལས་སྐྱེས་པའི་མེ་ཏོག་གཞན་རྣམས་ཀྱང་ཁྲུན་ཐུང་བ་དང་། མདོག་ངན་པ་དང་། གཟི་བྱིན་ཆུང་བ་དང་། དྲི་ཆུང་བར་འགྱུར་ཏེ། དེ་ལྟར་
ན་མ་འོངས་པའི་དུས་ན་མེ་ཏོག་དང་སྨན་རྣམས་གཟི་བྱིན་དང་དྲི་ལ་སོགས་པ་ཉམས་པར་འགྱུར་རོ། །རིགས་ཀྱི་བུ་དེ་བཞིན་དུ་ང་འདས་པའི་འོག་ཏུ་མ་འོངས་པའི་དུས་ན་དུས་ངན་པ་འབྱུང་བའི་ཚེ་དམ་པའི་ཆོས་འཇིག་པ་ན་

49-1-130b

སེམས་ཅན་རྣམས་བསོད་ནམས་ཆུང་བའི་ཕྱིར་ཆར་པ་དཀོན་པའི་ཚེ་མེ་ཏོག་གཟི་བྱིན་མེད་པར་འགྱུར་བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའི་དགོངས་པའི་ཚིག་གི་ཚིགས་སུ་བཅད་པའི་དོན་འཇིག་རྟེན་དུ་
བརྡ་སྤྲོད་པའི་ཚིགས་སུ་བཅད་པ་དང་། ཚིག་དང་། ཚིག་སིལ་བུའི་ཕྱེད་ཙམ་སྤྲོད་པར་འགྱུར་རོ། །དགེ་སློང་སྡིག་ཅན་རྣམས་ཀྱིས་ཀྱང་རང་ལ་མཐུ་མེད་པས་དགོངས་པའི་ཚིག་གསང་བའི་ཚིགས་སུ་བཅད་པ་བདུད་རྩིའི་ཚིག་
རྣམས་བོར་ནས་གཞན་འདོན་པར་བྱེད་དེ། རྐུན་པོ་དག་གིས་ཕུབ་མ་ཁུར་དུ་ཁྱེར་ལ་ཆེ་བ་ལ་འོས་པའི་རིན་པོ་ཆེ་འདོར་བ་བཞིན་དུ་དགེ་སློང་གཡེལ་བ་རྣམས་ཀྱང་མདོ་འདིའི་ཚིགས་སུ་བཅད་པ་དགོངས་པའི་ཚིག་རྣམས་འདོར་བར་བྱེད་དོ། །
ཀྱེ་མ་མ་འོངས་པའི་དུས་མཆོག་ཏུ་འཇིགས་ཤིང་མཆོག་ཏུ་སྐྲག་ཏུ་རུང་བ་འབྱུང་བར་འགྱུར་རོ། །ཀྱེ་མ་མ་འོངས་པའི་སེམས་ཅན་རྣམས་ཤིན་ཏུ་དཔལ་ཡོན་ཆུང་བ་དག་འབྱུང་བར་འགྱུར་ཏེ། དེ་དག་ནི་མདོ་སྡེ་ཆེན་པོ་འདི་ཉན་པར་མི་འགྱུར་
རོ། །གང་དག་ཉན་པར་བྱེད་པ་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ཏེ། དེ་ཁོ་ན་ཉིད་ཀྱི་དོན་འཛིན་པར་འགྱུར་གྱི་ཡི་གེ་ལྷུར་མི་འཛིན་ཏོ། །མདོ་སྡེའི་དོན་ཇི་སྙེད་པ་དེ་ཁོ་ན་སྙེད་གཞན་དག་ལ་སྟོན་པར་བྱེད་
ཀྱིས་དོན་མེད་པ་སྟོན་པར་མི་བྱེད་དོ། །རིགས་ཀྱི་བུ་དཔེར་ན་ཕྱུགས་རྫི་མོ་ཞིག་གིས་ཁེ་ཕྱིན་པར་བྱ་བའི་ཕྱིར་འོ་མའི་གཞི་ལས་ཆུ་བུ་རམ་དང་སྦྱར་བས་བསླད་ནས་ཕྱུགས་ཀྱི་གནས་ནས་འོ་མའི་བུམ་པ་ཁྱེར་ཏེ་སོང་ནས་དེས་ཕྱུགས་རྫི་མོ་
ཟླ་ལ་བཙོངས་ལ། དེ་ནས་ཕྱུགས་རྫི་མོ་ཟླ་དེས་ཀྱང་འོ་མ་དེ་ཆུ་གཉིས་འགྱུར་གྱིས་བསླད་ནས་བར་ལོང་མ་ལ་བཙོངས། བར་ལོང་མ་དེས་ཀྱང་འོ་མ་དེ་ཆུ་གཉིས་འགྱུར་གྱིས་བསླད་ནས་བར་ལོང་མའི་ཟླ་ལ་བཙོངས། བར་ལོང་
མའི་ཟླ་དེས་ཀྱང་ཆུ་གཉིས་འགྱུར་གྱིས་བསླད་ནས་གྲོང་ཁྱེར་རམ། ཚོང་འདུས་སུ་ཉོ་བའི་མི་ཞིག་གིས་བུའི་གཙུག་ཕུད་འཇོག་པའི་དུས་སྟོན་གྱི་འོ་ཐུག་བྱ་བའི་ཕྱིར་འདི་ནི་དཀོན་པ་ཡིན་ནོ་སྙམ་སྟེ་འོ་མ་དེ་ཉོས་ནས་འོ་མ་ཆུས་

49-1-131a

བསླད་པ་དེས་འོ་ཐུག་བཙོས་ནས་ཟས་ཀྱི་རོ་མཆོག་དེ་རོ་ཆུང་བར་གྱུར་ཏོ། །འོན་ཀྱང་རོ་བྲོ་བ་ཐམས་ཅད་ཀྱི་ནང་ན་བའི་བཅུད་རྣམས་གཙོ་བོ་ཡིན་ལ། དེའི་ནང་ན་ཡང་འོ་མ་དམ་པ་ཡིན་པས་ན་ཟས་ཀྱི་
མཆོག་དེ་རོ་ཚ་བས་ཆེས་སྟོང་འགྱུར་གྱིས་ཞིམ་མོ། །རིགས་ཀྱི་བུ་དེ་བཞིན་དུ་ང་འདས་པའི་འོག་ཏུ་ལོ་བརྒྱ་ཕྲག་དུ་མ་ལོན་པ་ན་གང་གི་ཚེ་དམ་པའི་ཆོས་གནས་པའི་ལྷག་མ་ལོ་བརྒྱད་བཅུ་ལུས་པ་དེའི་ཚེ་ཡོངས་སུ་མྱ་ངན་ལས་འདས་
པ་ཆེན་པོའི་མདོ་ཆེན་པོ་འདི་འཛམ་བུའི་གླིང་དུ་སྤྱོད་པར་འགྱུར་ཏེ། དེའི་ཚེ་དེ་ལྟར་མདོ་སྡེ་སྤྱོད་པ་དེ་ལས་དགེ་སློང་སྡིག་ཅན་མཆོག་ཏུ་གཡེལ་བ་དམ་པའི་ཆོས་ཀྱི་མེ་ཏོག་གི་དྲི་མེད་པར་བྱེད་པ་རྣམས་ཀྱིས་གླེགས་བམ་འཆོས་པར་
བྱེད་དེ། མདོ་སྡེ་འདི་ཀློག་པ་ན་དོན་དང་ཚིག་རྟོགས་པར་དཀའ་བ་དགོངས་པའི་ཚིག་གསང་བ་རྣམས་ལས་ན་དང་། མ་དང་། ཀུ་ལ་སོགས་པ་དགག་པའི་ཡི་གེ་རྣམས་བོར་ཞིང་གཞན་འདོན་པར་བྱེད་དོ། །དགེ་སློང་རང་གི་
རྙེད་པ་སྒྲུབ་པར་རུང་བ་མ་ཡིན་པའི་རྫས་འཆང་བ་དེ་དག་ནི་བདུད་ཀྱི་ཕྱོགས་ཡིན་ཏེ། ཕྱུགས་རྫི་མོས་བུ་རམ་གྱི་ཆུས་འོ་མ་བསླད་པ་བཞིན་དུ་མདོ་སྡེ་འདི་མ་རུང་བར་བྱེད་དོ། །གཞན་ཡང་ཀློག་མི་ཤེས་པ་དང་། ཆོས་སྨྲ་བ་
ངན་པ་དང་། ཡི་གེ་ངན་པའི་ཉེས་པ་དང་། ཆོས་ལ་མི་གནས་པ་དང་། བླ་མ་ལ་སྲི་ཞུ་མི་བྱེད་པ་དང་། མི་ངན་པས་ཁྱད་དུ་བསད་པ་དང་། ཚས་ཉེས་པ་དང་། ཡུན་རིངས་པ་དང་། ལག་བརྒྱུད་པའི་ཉེས་པས་ཚིག་
དོན་ཕྱེད་ཕྱེད་ཙམ་དུ་གྱུར་པ་སྤྱོད་ཅིང་མདོ་སྡེའི་ལྷག་མ་ཆུང་ཤས་ཙམ་ཞིག་ལྡུས་པར་ཟད་དོ། །བར་ལོང་མ་ལས་ཉིང་དོར་ཉོས་པའི་འོ་མས་ཟས་ཀྱི་མཆོག་བཙོས་པ་རོ་མེད་པར་གྱུར་ཀྱང་ཟས་ཀྱི་མཆོག་དེ་ནི་རོ་བྲོ་བ་ཐམས་ཅད་
ཀྱི་དམ་པ་ཡིན་པ་དེ་བཞིན་དུ་མདོ་སྡེ་ཆེན་པོ་འདི་ཡང་དེ་ལྟར་ལྷག་མ་ཅུང་ཟད་ཅིག་ལུས་པར་ཟད་མོད་ཀྱི། ཉན་ཐོས་ཀྱི་ཐེག་པའི་མདོ་སྡེ་ཐམས་ཅད་པས་སྟོང་འགྱུར་གྱིས་གཙོ་བོར་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། མདོ་

49-1-131b

སྡེ་དང་ཏིང་ངེ་འཛིན་ཐམས་ཅད་ནི་ཡོངས་སུ་མྱ་ངན་ལས་འདས་པའི་མཐུ་ཡིན་པས་ན་དེའི་ཕྱིར་ཡོངས་སུ་མྱ་ངན་ལས་འདས་པ་ཆེན་པོ་མཆོག་ཅེས་བྱ་སྟེ་མིང་ཆེ་བ་ཡིན་ནོ། །རིགས་ཀྱི་བུ་གཞན་ཡང་རིགས་ཀྱི་བུ་འམ། རིགས་ཀྱི་བུ་མོས་སྐྱེས་པའི་རང་
བཞིན་དུ་འགྱུར་བར་བསྒོམ་པར་བྱའོ། །ཅིའི་ཕྱིར་ཞེ་ན། བུད་མེད་ཀྱི་རང་བཞིན་ནི་ཆོས་མ་ཡིན་པ་ཐམས་ཅད་ཀྱི་རྒྱུའི་སྒོ་ནས་འབྱུང་ཁུང་ཡིན་ཏེ། དཔེར་བྱ་ན་སྦྲང་བུའི་གཅིན་གྱིས་ནི་ནམས་ཀྱང་ས་ཆེན་པོ་རླན་པར་ཡང་མི་འགྱུར། ངོམས་པར་
ཡང་མི་འགྱུར་བ་དེ་བཞིན་དུ་བུད་མེད་ཀྱང་ནམས་ཀྱང་འདོད་པས་ངོམས་པར་མི་འགྱུར་ཏེ། བུད་མེད་ནི་གལ་ཏེ་ས་ཆེན་པོ་རྒྱ་ཤུག་གི་རུས་པ་ཙམ་འམ། ཡུངས་འབྲུ་ཙམ་གྱི་རི་ལུར་བྱས་པ་དེ་ལ་རི་ལུ་ཇི་སྙེད་ཡོད་པ་དེ་སྙེད་ཀྱི་སྐྱེས་པ་དང་ལྷན་
ཅིག་ཏུ་འདོད་པས་ཞེན་པར་བསྟེན་དུ་ཟིན་ཀྱང་སྦྲང་བུའི་གཅིན་གྱིས་ས་རླན་ཞིང་ངོམས་པར་མི་འགྱུར་བ་བཞིན་དུ་བུད་མེད་རྣམས་འདོད་པས་ངོམས་པར་མི་འགྱུར་རོ། །རིགས་ཀྱི་བུ་གཞན་ཡང་བུད་མེད་ཇི་ལྟར་མི་བཟང་བ་ཉོན་ཅིག །བུད་
མེད་ནི་གལ་ཏེ་སྐྱེས་པ་གང་གཱའི་ཀླུང་གི་བྱེ་མ་སྙེད་དམ། གཏམས་པ་སྙེད་དམ། དཀྲིགས་པ་སྙེད་དང་ལྷན་ཅིག་ཏུ་འདོད་པ་བསྟེན་དུ་ཟིན་ཀྱང་སྦྲང་བུའི་གཅིན་གྱིས་ས་རླན་ཞིང་ངོམས་པར་མི་འགྱུར་བ་བཞིན་དུ་བུད་མེད་རྣམས་ཀྱང་འདོད་པས་
ངོམས་པར་མི་འགྱུར་རོ། །རིགས་ཀྱི་བུ་གཞན་ཡང་དཔེར་ན་རྒྱ་མཚོ་ཆེན་པོ་ནི་སྤྲིན་ཆེན་པོའི་ཆར་འབབ་པའི་ཆུ་དང་། ཆུ་ཀླུང་རྣམས་ཀྱི་ཆུ་དེར་འབབ་ཀྱང་ངོམས་པ་མེད་པ་བཞིན་དུ་བུད་མེད་རྣམས་ཀྱང་འདོད་པས་ངོམས་པ་མེད་དོ། །རིགས་
ཀྱི་བུ་གཞན་ཡང་དཔེར་ན་མེ་ཏོག་གི་ཤིང་མྱ་ངན་འཚང་དང་དོང་ཀའི་ཤིང་དང་། པ་ཊ་ལ་སོགས་པ་མེ་ཏོག་རྒྱས་པ་ན་བུང་བ་རྣམས་མེ་ཏོག་གི་ཁུ་བས་ངོམས་པར་མི་འགྱུར་ཏེ། བུང་བ་རྣམས་ཀྱིས་མཁས་པ་དང་། ཆ་ཕྲ་བ་དང་། 
ཟབ་མོར་མེ་ཏོག་གི་ཁུ་བ་འཐུང་བར་བྱེད་པ་དེ་བཞིན་དུ་བུད་མེད་རྣམས་ཀྱིས་ཀྱང་སྐྱེས་པ་རྣམས་ཀྱི་ནོར་དང་། འདོད་པ་དང་། ཁུ་བ་རྣམས་འཐུང་བར་བྱེད་དེ། བུང་བ་བཞིན་དུ་ངོམས་པར་མི་འགྱུར་རོ། །རིགས་ཀྱི་བུ་དེ་བས་ན་ཡོངས་སུ་

49-1-132a

མྱ་ངན་ལས་འདས་པ་ཆེན་པོ་འདི་ཐོས་ནས་བུད་མེད་ཀྱི་རང་བཞིན་ལ་མ་ཆགས་པའི་སེམས་བསྐྱེད་པར་བྱ་སྟེ། སྐྱེས་པའི་རང་བཞིན་དུ་འགྱུར་བར་སེམས་བསྐྱེད་པར་བྱའོ། །ཅིའི་ཕྱིར་ཞེ་ན། 
མདོ་འདི་ནི་སྐྱེས་པའི་རང་བཞིན་དེ་བཞིན་གཤེགས་པའི་སྙིང་པོ་ཡང་དག་པར་སྟོན་པའི་ཕྱིར་རོ། །སྐྱེས་པའི་རང་བཞིན་ནི་མི་ཞེས་བྱའོ། །དེ་བཞིན་གཤེགས་པའི་རང་བཞིན་ནི་མ་སྐྱེས་པའོ། །འཇིག་རྟེན་ན་སྐྱེས་པ་
ཡོད་པ་གང་ཡིན་པ་དེ་དག་ཀྱང་བདག་ཉིད་ལ་དེ་བཞིན་གཤེགས་པའི་སྙིང་པོ་ཡོད་པར་མི་ཤེས་པའི་ཕྱིར་སྐྱེས་པའི་རང་བཞིན་མ་ཡིན་ནོ། །དེ་བཞིན་གཤེགས་པའི་སྙིང་པོ་མི་ཤེས་པ་གང་ཡིན་པ་དེ་དག་ནི་བུད་མེད་ཡིན་ནོ་
ཞེས་ང་ཟེར་རོ། །དེ་བཞིན་གཤེགས་པའི་སྙིང་པོ་བདག་ལ་ཡོད་དོ་སྙམ་དུ་ཡང་དག་པར་ཤེས་པ་གང་ཡིན་པ་དེ་དག་ནི་སྐྱེས་པའི་མཆོག་ཏུ་གཏོགས་ཏེ། བུད་མེད་ཡིན་དུ་ཟིན་ཀྱང་སྐྱེས་པའི་མཆོག་ཏུ་གཏོགས་སོ། །དེ་ལྟར་ན་ཡོངས་
སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ནི་དེ་བཞིན་གཤེགས་པའི་སྙིང་པོ་སྟོན་པའི་ཕྱིར་དཔག་ཏུ་མེད་པ་ཡིན་ནོ། །རིགས་ཀྱི་བུ་འམ་རིགས་ཀྱི་བུ་མོ་མདོ་སྡེའི་གནས་འདི་མྱུར་དུ་རྟོགས་པར་འདོད་པས་ནི་དེ་བཞིན་གཤེགས་
པའི་སྙིང་པོ་ལ་བརྩོན་པར་བྱའོ། །གསོལ་པ། བཅོམ་ལྡན་འདས་དེ་ནི་ལགས་སོ། །བཅོམ་ལྡན་འདས་དེ་ནི་དེ་ལགས་ཏེ། བདག་ཀྱང་དེང་དུ་དེ་བཞིན་གཤེགས་པའི་སྙིང་པོ་བསྒོམ་པའི་སླད་དུ་སྐྱེས་པའི་རང་བཞིན་ལ་བཞུགས་
ལགས་སོ། །མངོན་པར་ཕྱེ་ལགས་སོ། །བརྡ་མཇལ་བར་བགྱིས་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །འཇིག་རྟེན་དང་འཐུན་པར་བྱེད་པས་ནི་དེ་ལྟར་བལྟ་བར་བྱའོ། །གསོལ་པ། 
བཅོམ་ལྡན་འདས་འཇིག་རྟེན་དང་འཐུན་པ་མ་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །དེ་ལྟར་བུང་བ་ཤིང་གི་མེ་ཏོག་ཟ་བ་བཞིན་དུ་ཟབ་མོའི་ཆོས་ཀྱི་ཟས་བཟའ་བར་བྱའོ། །རིགས་ཀྱི་བུ་

49-1-132b

གཞན་ཡང་དཔེར་ན་སྦྲང་བུའི་གཅིན་ཉུང་ཤས་ཀྱིས་ས་ཆེན་པོ་ངོམས་པར་མི་འགྱུར་བ་དེ་བཞིན་དུ་སྦྲང་བུའི་གཅིན་དང་འདྲ་བར་མ་འོངས་པའི་དུས་ན་མདོ་སྡེ་ཆེན་པོ་འདི་འཇིག་རྟེན་དུ་ཆུང་ཤས་ཙམ་ཞིག་སྤྱོད་པར་འགྱུར་ཏེ། དམ་པའི་ཆོས་
འཇིག་པའི་ཐ་མར་སྦྲང་བུའི་གཅིན་ས་ཆེན་པོ་ལ་སོང་བ་བཞིན་དུ་ཟད་པར་འགྱུར་རོ། །འདི་ནི་དམ་པའི་ཆོས་ནུབ་པའི་ལྟས་བདུན་པ་སྟེ། ལྟས་གཞན་ཡང་ཡོད་པར་མཁས་པས་ཤེས་པར་བྱའོ། །རིགས་ཀྱི་བུ་གཞན་ཡང་དཔེར་
ན་དབྱར་ཟད་པའི་མཇུག་དགུན་གྱི་ཟླ་བ་དང་པོ་ནི་སྟོན་ཞེས་བྱ་སྟེ། སྟོན་གྱི་དུས་ལ་བབ་པ་ན་མ་སྨིན་པ་སྨིན་པར་བྱ་བའི་ཕྱིར་སྤྲིན་རྣམས་ཀྱིས་ཆར་ཕབ་ནས་མྱུར་བ་མྱུར་བར་འགྱེས་པ་དེ་བཞིན་དུ། མདོ་ཆེན་པོ་འདི་ཡང་སྟོན་གྱི་སྤྲིན་
གྱིས་ཆར་བབ་ནས་མྱུར་དུ་འགྱེས་པ་དེ་བཞིན་དུ་ལྷོ་ཕྱོགས་སུ་སོང་ནས་ཡོངས་སུ་མྱ་ངན་ལས་འདས་པ་ཆེན་པོའི་དགོངས་པའི་ཚིག་ཐམས་ཅད་ཀྱི་ཆོས་ཀྱི་ཆར་འབེབས་སོ། །དེ་ནས་ལྷོ་ཕྱོགས་ཀྱི་བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་ཀྱིས་དམ་པའི་ཆོས་འཇིག་པར་ཤེས་ནས་དགུན་གྱི་དུས་དང་ཉེ་བར་གྱུར་པའི་སྤྲིན་བཞིན་དུ་ཁ་ཆེ་ཡུལ་དུ་སོང་ནས་ས་ལ་ནུབ་པར་གྱུར་ཏེ། ཐེག་པ་ཆེན་པོའི་མདོ་སྡེ་ཤིན་ཏུ་རྒྱས་པ་བདུད་རྩིའི་མཆོག་གི་དམ་
པའི་ཆོས་ཐམས་ཅད་ནུབ་པར་འགྱུར་རོ། །ད་ལྟར་ནི་དེ་བཞིན་གཤེགས་པས་མཁྱེན་པའི་མདོ་སྡེ་འདི་ལག་ཏུ་འོངས་མོད་ཀྱི་དམ་པའི་ཆོས་ནུབ་པར་འགྱུར་རོ་སྙམ་དུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་མཆོག་རྣམས་
ཀྱིས་ཤེས་པར་བྱའོ། །གསོལ་པ། དེ་བཞིན་གཤེགས་པ་དང་། རང་སངས་རྒྱས་དང་། ཉན་ཐོས་དང་། བྱང་ཆུབ་སེམས་དཔའི་ཁམས་ཐ་དད་པ་མ་མཆིས་པ་སེམས་ཅན་ཐམས་ཅད་ཀྱིས་བདེ་བླག་ཏུ་རྟོགས་པར་
བགྱི་བའི་སླད་དུ་བཅོམ་ལྡན་འདས་ཀྱིས་གསལ་ཞིང་ཟུར་ཕྱིན་པར་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེར་ན་ཁྱིམ་བདག་གམ་ཁྱིམ་བདག་གི་བུ་ཞིག་ལ་བ་ལང་གི་ལྷས་མང་པོ་

49-1-133a

ཡོད་དེ། བ་ལང་སྤུ་ག་ཐ་དད་པ་དག་བདོག་ལ་དེའི་ནང་ན་བ་སྔོན་མོ་དག་ཀྱང་ཡོད་དེ། བ་དེ་དག་བ་རྫི་གཅིག་འཚོར་བཅུག་གོ། །དེ་ནས་ཁྱིམ་བདག་དེས་ལན་ཅིག་ན་རང་གི་ལྷ་མཆོད་པའི་ཕྱིར་བ་ལང་
གི་ལྷས་རྣམས་གཅིག་ཏུ་བསྡུས་ནས་འོ་མ་འཇོར་བཅུག་གོ། །དེ་ནས་འོ་མ་དེ་དག་དུང་གི་མདོག་བཞིན་དུ་དཀར་པོར་འདུག་པ་མཐོང་ནས་ངོ་མཚར་དུ་བཟུང་སྟེ་བསམས་པ། བ་འདི་དག་སྤུ་ཁ་ཐ་དད་པར་འདུག་ན། བ་སྔོན་མོ་འདི་
རྣམས་ཀྱི་འོ་མ་ཡང་སྔོན་པོར་མི་འདུག་ལ། བ་དཀར་མོ་རྣམས་ཀྱི་ཡང་དེ་དང་འདྲ་སྟེ་དུང་གི་མདོག་ལྟར་འདུག་གོ་སྙམ་མོ། །དེ་ནས་ཕྱིས་དེས་རྟོགས་ཏེ་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པའི་རྒྱུ་ལས་གྱུར་པ་ཡིན་པར་
བལྟ་བར་བྱའོ་སྙམ་མོ། །རིགས་ཀྱི་བུ་དེ་བཞིན་དུ་ཉན་ཐོས་དང་། རང་སངས་རྒྱས་དང་། དེ་བཞིན་གཤེགས་པ་ཐམས་ཅད་ཀྱི་རང་བཞིན་ཡང་འོ་མ་དང་འདྲའོ། །ཅིའི་ཕྱིར་ཞེ་ན། དེ་དག་ནི་ཟག་པ་ཟད་པའི་ཕྱིར་རོ། །སེམས་
ཅན་ཐམས་ཅད་ཀྱིས་ནི་ཉན་ཐོས་དང་། རང་སངས་རྒྱས་དང་། དེ་བཞིན་གཤེགས་པ་ཐམས་ཅད་ཀྱི་རང་བཞིན་ཐ་དད་པ་དང་། དབྱིབས་ཐ་དད་པར་འཛིན་མོད་ཀྱི། དེ་དག་གིས་ཀྱང་ཁྱིམ་བདག་བཞིན་དུ་མཐར་གྱིས་ཤེས་པར་
འགྱུར་རོ། །རིགས་ཀྱི་བུ་དཔེར་ན་གསེར་ཁུང་ངམ། ཟངས་ཀྱི་ཁུང་ནས་རྡོ་དང་གསེག་མ་མེད་པའི་གསེར་གྱི་རང་བཞིན་རིན་ཐང་མེད་པར་འབྱུང་བ་དེ་བཞིན་དུ། ཉན་ཐོས་དང་། རང་སངས་རྒྱས་དང་། དེ་བཞིན་གཤེགས་པ་
ཐམས་ཅད་ཀྱང་གསེར་དང་འདྲ་བར་རིན་ཐང་དང་རང་བཞིན་གཅིག་གོ། །ཅིའི་ཕྱིར་ཞེ་ན། རྡོ་དང་གསེག་མ་ལྟ་བུའི་ཉོན་མོངས་པ་དང་བྲལ་བའི་ཕྱིར་ཏེ། དེ་བས་ན་སངས་རྒྱས་ཀྱི་ཡེ་ཤེས་འདི་ལ་ནི་དབྱེར་མེད་དོ། །
སེམས་ཅན་ཐམས་ཅད་ལ་སངས་རྒྱས་ཀྱི་ཁམས་ཡོད་པ་ཡང་དེ་དང་འདྲ་སྟེ། ཁྱིམ་བདག་གིས་འོ་མ་ཇི་ལྟ་བ་བཞིན་དུ་དེ་དག་གིས་ཀྱང་དེ་བཞིན་གཤེགས་པའི་སྙིང་པོའི་མདོ་སྡེ་ཐོས་ནས་ཉོན་མོངས་པའི་རྣམ་པ་ཟད་པར་བྱས་

49-1-133b

ཏེ་སངས་རྒྱས་ཀྱི་ཁམས་རྟོགས་པར་འགྱུར་རོ། །གསོལ་པ། བཅོམ་ལྡན་འདས་ཅི་ལགས། སེམས་ཅན་ཐམས་ཅད་དང་དེ་བཞིན་གཤེགས་པ་རྣམས་ཐ་དད་པ་མ་མཆིས་ལགས། གལ་ཏེ་དེ་བཞིན་གཤེགས་པ་
བསྟན་པ་དེ་ལྟར་སྟོན་པར་གྱུར་ན་འདི་ལ་སྐྱོན་ཆེན་པོ་མཆིས་ཏེ། ད་དེའི་གཏན་ཚིགས་བཀའ་སྩལ་དུ་འཚལ་ལགས་སོ། །སེམས་ཅན་ཐམས་ཅད་དང་རང་སངས་རྒྱས་རྣམས་ལྟ་ཞོག་ལགས་ཀྱི། དེ་ལྟར་ན་ཤཱ་རིའི་བུ་དང་
མཽད་གལ་གྱི་བུ་གཉིས་ཅིའི་སླད་དུ་ཉན་ཐོས་ཀྱི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་བགྱིད་ལགས། རང་སངས་རྒྱས་རྣམས་ཀྱང་ཅིའི་སླད་དུ་རང་སངས་རྒྱས་རྣམས་ཀྱི་ཡོངས་སུ་མྱ་ངན་ལས་འདའ་
བས་ཡོངས་སུ་མྱ་ངན་ལས་འདའ་བར་བགྱིད་ལགས། བྱང་ཆུབ་སེམས་དཔའ་རྣམས་ཀྱང་ཅིའི་སླད་དུ་བྱང་ཆུབ་སེམས་དཔའི་ཡོངས་སུ་མྱ་ངན་ལས་འདས་པ་ཆེན་པོས་ཡོངས་སུ་
མྱ་ངན་ལས་འདའ་བར་བགྱིད་ལགས། བཀའ་སྩལ་པ། སངས་རྒྱས་རྣམས་ཀྱི་ཡོངས་སུ་མྱ་ངན་ལས་འདས་པ་ཆེན་པོ་ནི་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་མ་ཡིན་ཏེ། ཡོངས་
སུ་མྱ་ངན་ལས་འདས་པ་ཆེན་པོ་འདི་ལ་ནི་སངས་རྒྱས་རྣམས་མ་གཏོགས་པར་གཞན་དག་གི་གནས་མེད་དོ། །གསོལ་པ། ཇི་ལྟ་བུ་ལགས། བཀའ་སྩལ་པ། དེ་བཞིན་གཤེགས་པ་ནི་བསྐལ་པ་བྱེ་བ་ཕྲག་གྲངས་
མེད་པ་མང་པོ་ཞིག་ན་དེ་བཞིན་གཤེགས་པ་འབྱུང་བ་སྟོན་པར་མཛད་ན། དེ་བཞིན་གཤེགས་པ་དང་། ཉན་ཐོས་དང་། རང་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཁྱད་པར་ཅི་ཡོད་ཅེ་ན། རིགས་ཀྱི་བུ་དེ་བཞིན་
གཤེགས་པའི་མྱ་ངན་ལས་འདས་པ་གསང་བ་ལ་དགྲ་བཅོམ་པ་རྣམས་ཀྱི་གནས་མེད་དོ་ཞེས་ངས་བསྟན་ཏེ་དེ་ནི་གནས་མེད་པ་ཡིན་ནོ། །དེ་བས་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའི་ཚུལ་གྱིས་ཡོངས་

49-1-134a

སུ་མྱ་ངན་ལས་འདས་པ་ཆེན་པོ་ལ་གནས་མེད་དོ། །དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །གསོལ་པ། ཐ་དད་པ་ཁོ་ནར་གདའ་ལགས་སོ། །བཀའ་སྩལ་པ། ཇི་ལྟར་སྣང་
གསོལ་པ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱང་ཡོངས་སུ་མྱ་ངན་ལས་འདས་པ་ཆེན་པོས་ཡོངས་སུ་མྱ་ངན་འདས་པར་འགྱུར་ཏེ། ཆུ་ཀླུང་རྣམས་རྒྱ་མཚོར་འབབ་པ་བཞིན་
དུ་དེ་དག་གི་གནས་ཀྱང་དེ་ལགས་སོ། །དེ་བས་ན་དེ་དག་ཀྱང་རྟག་པ་ཞེས་བགྱིའོ། །བཀའ་སྩལ་པ། དེ་དག་ནི་ངའི་མཆོག་ཏུ་རྟག་པ་ཡིན་ནོ། །གསོལ་པ། བཅོམ་ལྡན་འདས་ཁམས་ཐ་དད་པ་མ་མཆིས་པ་དང་ཐ་དད་
པ་ཇི་ལྟ་བུ་ལགས། བཀའ་སྩལ་པ། ཐ་དད་དོ། །གསོལ་པ། ཇི་ལྟ་བུ་ལགས། བཀའ་སྩལ་པ། དཔེར་ན་བའི་འོ་མ་ནི་མཆོག་ཏུ་མངར་བ་ཡིན་ཏེ་ཁམས་དེ་དང་འདྲའོ། །ཉན་ཐོས་རྣམས་དང་། རང་
སངས་རྒྱས་རྣམས་ཀྱི་ཁམས་ནི་ཞོ་དང་འདྲའོ། །བྱང་ཆུབ་སེམས་དཔའ་རྣམས་ཀྱི་ཁམས་ནི་མར་དང་འདྲའོ། །སངས་རྒྱས་རྣམས་ཀྱི་ཁམས་ནི་མར་གྱི་སྙིང་ཁུ་དང་འདྲ་སྟེ། དེ་ལྟར་ཡོངས་སུ་མྱ་ངན་ལས་འདས་པ་
ཆེན་པོ་ལས་གདམས་ངག་སྟོན་པའི་དེ་བཞིན་གཤེགས་པས་རྣམ་པ་བཞིར་བསྟན་ཏོ། །གསོལ་པ། སེམས་ཅན་ཐམས་ཅད་ཀྱི་ཁམས་ཇི་ལྟ་བུ་ལགས། བཀའ་སྩལ་པ། བ་བེའུ་འབྲངས་མ་ཐག་པའི་འོ་མ་ཁྲག་
དང་འདྲེས་པ་བཞིན་དུ་ཉོན་མོངས་པའི་ཁྲག་དང་འདྲེས་པའི་ཁམས་དེས་དེ་བཞིན་གཤེགས་པའི་ཁམས་མར་གྱི་སྙིང་ཁུ་དང་འདྲ་བ་ཁྱབ་པར་འདུག་གོ། །གསོལ་པ། བཅོམ་ལྡན་འདས་ཀྱིས་ཀུ་ཤིའི་གྲོང་ཁྱེར་འདི་ན་
གནས་པའི་གདོལ་པ་འཇིག་རྟེན་གྱི་ཁམས་འདིར་སངས་རྒྱས་སྟོང་དང་ལྷན་ཅིག་ཏུ་དེ་དག་གི་ནང་དུ་དེ་བཞིན་གཤེགས་པ་གཅིག་ཏུ་གྱུར་ཏེ་དེ་བཞིན་གཤེགས་པ་རབ་ཏུ་དགའ་བ་ཞེས་བྱ་བར་འགྱུར་ཏེ། སེམས་བསྐྱེད་

49-1-134b

པ་གཅིག་ཁོ་ནས་དུས་འདི་སྲིད་ཅིག་ན་མྱུར་དུ་སངས་རྒྱས་སུ་འགྱུར་རོ་ཞེས་སངས་རྒྱས་སུ་ལུང་བསྟན་པས་ལུང་བསྟན་ལགས་ན། ཅིའི་སླད་དུ་ཤཱ་རིའི་བུ་དང་། མཽད་གལ་གྱི་བུ་གཉིས་ཆེས་མྱུར་དུ་སངས་རྒྱས་སུ་འགྱུར་
བས་སངས་རྒྱས་སུ་ལུང་བསྟན་པས་ལུང་མ་བསྟན་ལགས། བཀའ་སྩལ་པ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་ཁ་ཅིག་དམ་པའི་ཆོས་དབྱུང་བའི་ཕྱིར་ཡུན་རིང་པོར་སྨོན་ལམ་འདེབས་
པ་ཡང་ཡོད་ཁ་ཅིག་ནི་མྱུར་བར་སྨོན་ལམ་འདེབས་པ་ཡང་ཡོད་དེ། ང་ནི་དེའི་སྨོན་ལམ་གྱི་དབང་གིས་ན་ཆེས་མྱུར་བར་སངས་རྒྱས་ཀྱི་གནས་མཆོག་ཏུ་ལུང་སྟོན་པར་བྱེད་དོ། །རིགས་ཀྱི་བུ་གཞན་ཡང་མཉན་པ་ཆེན་
པོ་ལ་ལ་ཞིག་གདོལ་པའི་གྲོང་ཁྱེར་དུ་སོང་སྟེ་རིན་པོ་ཆེ་རིན་ཐང་མེད་པ་འཚོང་བ་ལས་གདོལ་པ་བྱེ་བྲག་མི་ཕྱེད་པ་དེ་དག་གིས་རིན་པོ་ཆེ་དེ་མཐོང་ན་འཕྱས་འདོགས་ཤིང་འཐིང་སླད་བྱེད་དེ། མཉན་པས་རིན་ཆེ་བ་ཡིན་ནོ་ཞེས་
བྱས་ཀྱང་དེ་དག་གི་བརྡ་མི་ཕྲད་ནས་འདི་ནི་ཤེལ་ཡིན་ནོ་ཞེས་དེ་སྐད་ཟེར་རོ། །རིགས་ཀྱི་བུ་དེ་བཞིན་དུ་ངས་ཀྱང་ཉན་ཐོས་རྣམས་གལ་ཏེ་སངས་རྒྱས་ཀྱི་གནས་སུ་མྱུར་དུ་སངས་རྒྱས་སུ་ལུང་བསྟན་པས་ལུང་བསྟན་དུ་ཟིན་
ཀྱང་ནོར་བུ་དཀོན་པ་འཚོང་བའི་མཉན་པ་བཞིན་དུ་འགྱུར་རོ། །གདོལ་པ་རྣམས་ལྟ་བུ་ནི་མ་འོངས་པའི་དུས་ན་དགེ་སྦྱོང་བླུན་པོ། གཡེལ་བ། དགེ་བའི་རྩ་བ་སྤངས་པ། འཚོ་བས་ཕོངས་པ། བཀྲེས་ཤིང་སྐོམ་
པས་གཟིར་བ། མུ་གེས་མནར་བ། རང་གི་ལུས་ཙམ་གསོ་བར་བྱེད་པ། འཚོ་བ་དོན་དུ་གཉེར་བ། མི་བརྟན་པ་རྣམས་འབྱུང་བར་འགྱུར་བ་དེ་དག་ཡིན་ཏེ། དེ་དག་གིས་ངའི་ཉན་ཐོས་ལུང་བསྟན་པ་ཐོས་
ན་འཕྱས་འདོགས་ཤིང་གཤེ་བར་འགྱུར་ལ་བརྡ་མི་ཕྲད་ནས་ཚུལ་ཁྲིམས་འཆལ་པ་ཡིན་ནོ་ཞེས་བླ་བར་བྱེད་དོ། །ངའི་ཉན་ཐོས་དེ་དག་ནི་དགེ་སྦྱོང་མ་ཡིན་ཏེ་གདོལ་པ་རྣམས་དང་མཉན་པ་ཇི་ལྟ་བ་བཞིན་ནོ། །རིགས་

49-1-135a

ཀྱི་བུ་དེ་བས་ན་ང་ནི་སེམས་ཅན་མྱུར་བའི་སྨོན་ལམ་ཅན་རྣམས་ནི་སངས་རྒྱས་སུ་ལུང་སྟོན་པར་བྱེད་དོ། །དམ་པའི་ཆོས་དབྱུང་བའི་སྦྱོར་བ་ཅན་དེ་དག་ནི་ཇི་ལྟར་འདོད་པ་བཞིན་དུ་ཡུན་རིང་པོ་ཞིག་གིས་སངས་
རྒྱས་ཀྱི་གནས་སུ་ལུང་སྟོན་པར་བྱེད་དོ། །གསོལ་པ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཡོག་འཁོར་མི་ཕྱེད་པ་དང་ལྡན་པར་འགྱུར་ལགས། བཀའ་སྩལ་པ། བྱང་ཆུབ་སེམས་དཔའ་མི་མཆོག་
རྣམས་ནི་དམ་པའི་ཆོས་དབྱུང་བར་བྱའོ་སྙམ་དུ་དེའི་སྦྱོར་བ་བརྟན་པོར་བྱས་ན་གཡོག་འཁོར་མི་ཕྱེད་པ་དང་ལྡན་པར་འགྱུར་རོ། །གསོལ་པ། སེམས་ཅན་མ་རུངས་པ་འཇིགས་སུ་རུང་བ། ལྕེ་དང་རྐན་དང་། ལྐོག་མ་ཚིག་པ་
རྣམས་ཅི་ལས་འགྱུར་ལགས། བཀའ་སྩལ་པ། གཞི་གསུམ་མི་ཤེས་པ་གང་ཡིན་པ་དེ་དག་ནི་སེམས་ཅན་མ་རུངས་པ་འཇིགས་སུ་རུང་བ། ལྕེ་དང་། རྐན་དང་། ལྐོག་མ་ཚིག་པར་འགྱུར་རོ། །དཔེར་ན་མི་དང་དུད་འགྲོའི་ལྕེ་ཚིག་
པ་རྣམས་ཀྱིས་རོ་དྲུག་སྟེ། མངར་བ་དང་། སྐྱུར་བ་དང་། ལན་ཚྭའི་རོ་དང་། ཚ་བ་དང་། ཁ་བ་དང་། སྐ་བ་རྣམས་ཟ་བ་ན་རོའི་བྱེ་བྲག་མི་ཕྱེད་པ་དེ་བཞིན་དུ་སེམས་ཅན་མི་ཤེས་པ། ལྕེ་དང་། རྐན་དང་། ལྐོག་མ་ཚིག་པ་
མ་རུངས་པ་འཇིགས་སུ་རུང་བ། གཞི་གསུམ་རྟག་པར་མི་ཤེས་པ་གང་ཡིན་པ་དེ་དག་ནི། ལྕེ་དང་། རྐན་དང་། ལྐོག་མ་ཚིག་པ་ཞེས་བྱའོ། །རིགས་ཀྱི་བུ་གཞན་ཡང་དེ་བཞིན་གཤེགས་པ་རྟག་པར་མི་ཤེས་པ་གང་ཡིན་
པ་དེ་དག་ནི་དམུས་ལོང་གི་མཆོག་ཡིན་ནོ་ཞེས་ང་ཟེར་རོ། །དེ་བཞིན་གཤེགས་པ་རྟག་པར་ཤེས་པ་གང་ཡིན་པ་དེ་དག་ནི་ཤའི་མིག་དང་ལྡན་པ་ཡིན་དུ་ཟིན་ཀྱང་ལྷའི་མིག་དང་ལྡན་པ་ཡིན་ནོ་ཞེས་ང་ཟེར་རོ། །རིགས་ཀྱི་བུ་
གཞན་ཡང་མདོ་སྡེ་འདི་ཐོས་ནས་དེ་བཞིན་གཤེགས་པ་རྟག་པར་ཤེས་ཤིང་ཁོང་དུ་ཆུད་པ་གང་ཡིན་པ་དེ་དག་ནི་ལྷའི་མིག་དང་ལྡན་པ་ཡིན་ནོ་ཞེས་ང་ཟེར་རོ། །ལྷའི་མིག་དང་ལྡན་དུ་ཟིན་ཀྱང་དེ་བཞིན་གཤེགས་པ་རྟག་པར་

49-1-135b

མི་ཤེས་པ་གང་ཡིན་པ་དེ་དག་ནི་ཤའི་མིག་དང་ལྡན་པ་ཡིན་ནོ་ཞེས་ང་ཟེར་རོ། །དེ་དག་ནི་ད་དུང་བསྐལ་པ་བྱེ་བ་མང་པོར་ཡང་བདག་གི་མགོ་མཇུག་ཅི་འདྲ་བ་ཡང་མཐོང་བ་འམ་བསྟན་པར་མི་ནུས་ཏེ། དེ་བས་ན་དེ་དག་ནི་དེ་བཞིན་
གཤེགས་པ་རྟག་པར་བསྒོམ་པ་དང་བྲལ་བའི་ཕྱིར་ཤའི་མིག་དང་ལྡན་པ་ཞེས་ང་ཟེར་རོ། །རིགས་ཀྱི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་འཇིག་རྟེན་ཐམས་ཅད་ཀྱི་
ཕ་མ་ལྟ་བུ་ཡིན་ནོ། །ཅིའི་ཕྱིར་ཞེ་ན། སེམས་ཅན་རྐང་གཉིས་དང་། རྐང་མངས་ཐམས་ཅད་ལ་རང་རང་གི་ཡུལ་བཞིན་དུ་ཆོས་སྟོན་ཅིང་ཚིག་གཅིག་གིས་སེམས་ཅན་ཐམས་ཅད་ཀྱིས་རང་རང་གི་ཡུལ་བཞིན་དུ་ཤེས་པར་
འགྱུར་ཏེ། ཀྱེ་མ་བདག་ཅག་གི་རང་བཞིན་དང་འདུ་ཤེས་རྣམས་རྟོགས་པར་བྱ་བའི་ཕྱིར་ཆོས་སྟོན་ཏོ་སྙམ་དུ་འཛིན་ཏོ། །རིགས་ཀྱི་བུ་གཞན་ཡང་དཔེར་ན་ཁྱིམ་བདག་གམ་ཚོང་དཔོན་ཡང་རུང་སྟེ། རང་གི་བུ་ཟླ་བ་བཅུ་དྲུག་
ལོན་པ་དང་ལྷན་ཅིག་ཏུ་ལྐུག་པ་བཞིན་དུ་སྨྲ་བར་བྱེད་དེ། དེའི་དབང་གིས་བུ་དེ་མིའི་སྐད་སློབ་པར་བྱེད་ན་ཅི་དེའི་ཕ་ལྐུག་པ་ཞེས་བྱ་འམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། བུ་དེའི་དབང་གིས་བགྱིད་པར་བལྟ་
ལགས་སོ། །བཀའ་སྩལ་པ། རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཡང་ལྐུག་པ་བཞིན་དུ་གསུང་སྟེ། སེམས་ཅན་ཐམས་ཅད་དམ་པའི་ཆོས་ལ་དགོད་པའི་ཕྱིར་དེ་ལྟ་བུའི་སྐུ་སྟོན་པར་མཛད་ན་ཅི་དེ་བཞིན་གཤེགས་
པ་ལྐུག་པ་ཞེས་བྱའམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་བཞིན་གཤེགས་པ་ནི་རྟག་ཏུ་སེང་གེའི་སྒྲ་སྒྲོགས་པ་ལགས་ན་ལྐུག་པ་ལྟར་གསུང་བ་དེ་ནི་འཇིག་རྟེན་དང་འཐུན་པར་མཛད་པར་བལྟ་བར་
བགྱི་ལགས་སོ། །དེ་ནས་དེའི་ཚེ་བཅོམ་ལྡན་འདས་ཉིད་ཀྱི་ཞལ་ནས་འོད་ཟེར་སྣ་ཚོགས་བཀྱེ་སྟེ། འོད་ཟེར་དེ་དག་གིས་མགར་བའི་བུ་ཙུན་ད་ལ་ཕོག་ནས་ཀྱེ་མ་དེ་བཞིན་གཤེགས་པ་ལ་ཕྱིན་ཅད་དབུལ་དུ་མེད་པའི་སྦྱིན་པ་ནི་

49-1-136a

དཀོན་པ་ཡིན་ནོ་སྙམ་ནས་ཤིན་ཏུ་རིངས་པར་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་ཚིམ་པར་འགྱུར་བའི་ཞལ་ཟས་ཁྱེར་ཏེ་རང་གི་འཁོར་རྣམས་དང་ལྷན་ཅིག་ཏུ་རིངས་པར་འཛམ་བུ་
ཆུ་ཀླུང་གི་གསེར་དྲི་མ་མེད་པའི་སྣོད་དཀྱིལ་དུ་ནོར་བུའི་འབུར་མཐོན་པོ་འོད་ཅན་གྱིས་སྤྲས་པ་རྣམས་དང་། ཁ་ཅིག་ནི་དངུལ་གྱི་སྣོད་རིན་པོ་ཆེ་སྣ་ཚོགས་ཀྱིས་སྤྲས་པ་རྣམས་ཞལ་ཟས་སྐྱུ་རུམ་སྣ་ཚོགས་དང་སྦྱར་བས་
བཀང་བ་དང་། མཆོད་པའི་ཡོ་བྱད་མང་པོ་དག་ཁྱེར་ནས་གྲོང་ཁྱེར་གྱི་བར་ནས་བྱུང་སྟེ་བཅོམ་ལྡན་འདས་ག་ལ་བ་དེར་ཆས་སོ། །དེ་ནས་ལྷའི་བུ་མཐུ་ཆེན་པོ་དང་ལྡན་པ་རྣམས་ཀྱིས་མགར་བའི་བུ་ཙུན་ད་བསྐོར་ནས་འདི་སྐད་
ཅེས་སྨྲས་སོ། །ཙུན་ད་རེ་ཤིག་ཞལ་ཟས་མ་དབུལ་བར་དེ་བཞིན་གཤེགས་པ་ཐང་ཅིག་ཞོག་ཅིག་ཅེས་བྱས་སོ། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་འོད་ཟེར་དག་བཀྱེ་སྟེ། འོད་ཟེར་དེ་དག་གིས་ལྷའི་བུ་
རྣམས་ལ་ཕོག་ནས་ཙུན་ད་བཏང་ངོ་། །དེ་ནས་ལྷ་ལ་སོགས་པ་དེར་འདུས་པ་གང་ཡིན་པ་དེ་དག་ཐམས་ཅད་ཀྱིས་བཅོམ་ལྡན་འདས་ལ་མཆོད་པ་ཆེན་པོ་བྱས་ཏེ། ཙུན་ད་དང་ལྷན་ཅིག་ཏུ་བཅོམ་ལྡན་འདས་ཀྱི་ཐད་དུ་དོང་ནས་
འདི་སྐད་ཅེས་གསོལ་ཏོ། །དགེ་སློང་རྣམས་ཀྱིས་གདུགས་ཚོད་ལ་བབ་ན་གནང་བར་མཛད་དུ་གསོལ། དེ་ནས་དགེ་སློང་རྣམས་ཀྱིས་གདུགས་ཚོད་ལ་བབ་པར་ཤེས་ནས་སྤྱོད་ལམ་བཟང་པོར་བྱས་ཏེ་ལྷུང་བཟེད་ལག་ཏུ་
བླངས་ནས་སྡོད་དོ། །དེ་ནས་མགར་བའི་བུ་ཙུན་དས་སེང་གེའི་ཁྲི་སྣ་ཚོགས་ཚིག་ཏུ་བཟླས་སུ་ཡང་མི་ནུས་པ་འཇིག་རྟེན་གྱི་ཁམས་བདེ་བ་ཅན་གྱི་རྐྱེན་དུ་རུང་བ་ལྟ་བུ་དག་ཀྱང་བཤམས། ཞལ་ཟས་ཀྱང་སྟ་གོན་བྱས་ནས་བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་བསྐལ་པའམ། བསྐལ་པ་ལས་ལྷག་པར་ཡང་ཡུན་རིང་དུ་བཞུགས་སུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཙུན་ད་གལ་ཏེ་ང་ཡུན་རིང་

49-1-136b

དུ་འདུག་པར་འདོད་ན་སྦྱིན་པའི་ཕ་རོལ་ཏུ་ཕྱིན་པ་ཐ་མའི་དུས་ལ་བབ་ཀྱིས་མྱུར་དུ་ཕུལ་ཅིག །དེ་ནས་ལྷ་དང་མི་ཐམས་ཅད་དང་། བྱང་ཆུབ་སེམས་དཔའ་རྣམས་ཀྱིས་འདི་སྐད་ཅེས་སྨྲས་སོ། །ཀྱེ་མ་ཙུན་ད་སྐྱིད་དེ་བ་འདིས་
ཕུལ་བའི་ཞལ་ཟས་དེ་བཞིན་གཤེགས་པས་གསོལ་བར་ཆད་པ་ལྟ། བདག་ཅག་ནི་དཔལ་ཡོན་མེད་དེ་བདག་ཅག་གིས་ཞལ་ཟས་སྟ་གོན་བྱས་པ་ནི་དོན་མེད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཉིད་ཀྱི་བ་སྤུའི་ཁུང་བུ་
ཐམས་ཅད་ནས་བ་སྤུ་རེ་རེའི་ཁུང་བུ་ནས་ཀྱང་སངས་རྒྱས་རེ་རེ་མངོན་དུ་སྤྲུལ་ནས་དེར་འཁོར་རེ་རེའི་ནང་དུ་ཡང་དེ་བཞིན་གཤེགས་པ་རེ་རེའི་དགེ་སློང་གི་དགེ་འདུན་དང་བཅས་པ་ཐམས་ཅད་བཤོས་གསོལ་བ་ལྟ་བུར་བསྟན་ཏོ། །དེ་
བཞིན་གཤེགས་པ་ཉིད་ནི་ཙུན་དས་ཕུལ་བའི་ཞལ་ཟས་གསོལ་ལོ། །ཙུན་དས་འབྲས་སཱ་ལུ་ཡུལ་མ་ག་དྷའི་ན་ལི་ཏ་བརྒྱད་ལས་ཞལ་ཟས་སྦྱར་བ་ཡང་དེ་བཞིན་གཤེགས་པའི་མཐུས་དགེ་སློང་གི་དགེ་འདུན་ཐམས་ཅད་ཞལ་
ཟས་ཀྱིས་ཁྱེད་པར་མཛད་དོ། །དེ་ནས་ཙུན་ད་ཡང་དགའ་བར་གྱུར་ཏེ། བདག་གི་སྦྱིན་པ་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པས་གསོལ་ནས་ཡོངས་སུ་མྱ་ངན་ལས་འདས་པར་མཛད་དོ་སྙམ་མོ། །འཁོར་
དེ་དག་ཐམས་ཅད་འདི་སྙམ་དུ་སེམས་ཏེ། བདག་ཅག་གིས་ཕུལ་བའི་ཞལ་ཟས་དེ་བཞིན་གཤེགས་པས་བཞེས་ཀྱི་ཙུན་དའི་མ་བཞེས་སོ། །བདག་ཅག་གིས་ཕུལ་བའི་ཞལ་ཟས་གསོལ་ནས་དེ་བཞིན་གཤེགས་པ་ཡོངས་སུ་
མྱ་ངན་ལས་འདའ་བར་མཛད་དོ་སྙམ་སྟེ་མཆོག་ཏུ་དགའ་བར་གྱུར་ཏོ། །འཁོར་ཆེན་པོ་དེ་ན་དེ་བཞིན་གཤེགས་པ་རྣམས་བཤོས་གསོལ་ཞིང་བཞུགས་པའི་བར་མཚམས་སྙུང་བུའི་རྩེ་མོའི་ཁྱོན་ཙམ་གྱིས་མཆོད་པར་སྣང་ངོ་། 
ཁ་ཅིག་ནི་ཁབ་ཀྱི་རྩེ་མོའི་ཁྱོན་ཙམ་གྱི་ས་ཕྱོགས་དག་ན་བཞུགས་ཤིང་ཞལ་ཟས་དང་མཆོད་པ་རྣམས་འདྲ་བར་མངར་བར་སྣང་ངོ་། །དེ་ནས་དེའི་ཚེ་ལྷ་དང་མི་དང་ལྷ་མ་ཡིན་དེ་དག་ངུ་ཞིང་ཆོ་ངེ་འདོན་པར་བྱེད་དེ། བདག་ཅག་གིས་སོ་སོ་

49-1-137a

ནས་ཕུལ་བའི་ཞལ་ཟས་གསོལ་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ། །ཕྱིན་ཅད་བདག་ཅག་གིས་སུ་ལ་ཞལ་ཟས་དབུལ་བར་བྱ། བདག་ཅག་ནི་མགོན་དང་བྲལ་ཏེ་མགོན་མེད་
པར་འགྱུར་རོ་ཞེས་མཛེར་ཏོ། །དེ་ནས་བཅོམ་ལྡན་འདས་ཀྱིས་འཁོར་དེ་དག་ཐམས་ཅད་ལ་ཚིགས་སུ་བཅད་པ་འདི་དག་གསུངས་སོ།། །། བམ་པོ་བཅུ་གསུམ་པ་སྟེ་ཐ་མ། སངས་རྒྱས་ཆོས་ཉིད་འདི་
ཡིན་གྱིས། །གདུང་ཞིང་ངུ་བར་མ་བྱེད་ཅིག །ང་ནི་མྱ་ངན་འདའ་བ་ན། །བསྐལ་པ་བྱེ་བ་ཟད་པར་འགྱུར། །ང་ཡི་རྟག་བདེ་དམ་པ་ཡི། །མྱ་ངན་འདའ་བ་ང་ལས་ཉོན། །ང་ནི་ཁ་ཟས་མི་ཟ་སྟེ། །བྲུ་བ་ཚ་བ་ཡོང་གིས་མེད། །
སེམས་ཅན་ཀུན་ལ་ཕན་བདེ་བའི། །རྗེས་སུ་ཡི་རང་ངས་བཤད་ཀྱིས། །ཐོས་ནས་ཡང་དག་རྫོགས་སངས་རྒྱས། །རྟག་པ་དེ་ཉིད་ཤེས་པར་གྱིས། །གང་ཚེ་འུག་པ་བྱ་རོག་རྣམས། །ཤིང་གཅིག་ལ་ནི་གནས་ནས་ཀྱང་། །
སྤུན་དང་བུ་དང་འདྲ་བར་ནི། །ཕན་ཚུན་རྟག་ཏུ་ཚིམ་པར་བྱེད། །དེའི་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །
གང་ཚེ་སྦྲུལ་དང་ནེའུ་ལེ་དག །ཤིང་གཅིག་དྲུང་དུ་གནས་ནས་ཀྱང་། །སྤུན་དང་བུ་དང་འདྲ་བར་ནི། །ཕན་ཚུན་རྟག་ཏུ་ཚིམ་པར་བྱེད། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །
སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །གང་ཚེ་སབ་ཏ་པར་ན་ཡི། །མེ་ཏོག་བར་ཤིའི་དྲིར་འགྱུར་ཞིང་། །ཀ་ར་ཀ་ཡི་ཤིང་རྣམས་ལས། །ཏེན་དུ་ཀ་ཡི་འབྲས་བུ་འབྱུང་། །དེ་ཚེ་སྒྲ་
གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །གང་ཚེ་སྡིག་ཅན་འདོད་ཆེན་པ། །བྱང་ཆུབ་མངོན་པར་

49-1-137b

རྫོགས་འཚང་རྒྱ། །མཆོག་ཏུ་བདེ་བ་ཐོབ་ནས་ཀྱང་། །ཉེས་པ་ཐམས་ཅད་རྣམ་སྤངས་པ། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་
འདའ་བས་གྲོངས། །གང་ཚེ་སེམས་ཅན་ཐམས་ཅད་ནི། །བསམ་པ་འཐུན་པར་གནས་གྱུར་ཏེ། །བྱང་ཆུབ་མཆོག་ཏུ་རྫོགས་སངས་རྒྱས། །ཉེས་པ་ཐམས་ཅད་རྣམ་སྤངས་པ། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་
པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །གང་ཚེ་སྦྲང་བུའི་གཅིན་ཙམ་གྱིས། །རྒྱ་མཚོ་བཞི་ཡི་མཐས་ཀླས་པ། །ནགས་ཚལ་རི་རྣམས་བཅས་པ་ཡི། །ས་གཞི་
ངོམས་པར་གྱུར་པ་ན། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །དེ་བས་ན་ཆོས་དང་ལྡན་པ་ཆོས་ལ་གུས་
པ་ཁྱེད་མྱ་ངན་མ་བྱེད་ཅིག །མ་ངུ་ཞིག །དེ་བཞིན་གཤེགས་པ་ནི་རང་ལ་དབང་ཡོད་ཀྱིས་མི་རྟག་པའི་འདུ་ཤེས་མ་བྱེད་པར་རྟག་པ་དང་། ཐེར་ཟུག་པ་དང་། མཆོག་ཏུ་བརྟན་པ་ཡིན་པར་ཡང་དག་པར་ལྟོས་ཤིག །གཞི་གསུམ་
རྟག་པའི་གསང་སྔགས་ཀྱི་སྦ་བ་དང་། བསྲུང་བ་འདིས་བསྲུང་བར་གྱིས་ཤིག །གཞི་གསུམ་རྟག་པའི་གསང་སྔགས་ཀྱིས་ནི་གནམ་ལྕགས་ཀྱིས་ཚིག་པའི་ཤིང་རྣམས་ཀྱང་སྐྱེ་བར་འགྱུར་ཏེ། ཡལ་ག་ཕྲེའུ་དང་། སྦལ་མིག་བྱེ་བ་
དང་། ལོ་མ་ཁ་འབུས་པ་དང་ལྡན་པར་འགྱུར་རོ། །འཁོར་བཞི་པོ་ལས་གཞི་གསུམ་རྟག་པར་རྗེས་སུ་ཡི་རང་བའི་གཏམ་འདི་ཕན་ཚུན་ཐོས་ན་བྱང་ཆུབ་ཀྱི་སེམས་བསྐྱེད་མི་དགོས་པར་འཛིན་ཀྱང་གཞི་གསུམ་མཆོག་ཏུ་རྟག་
པའི་རྒྱུས་ན་བྱང་ཆུབ་ཀྱི་རྒྱུ་སྐྱེ་བར་འགྱུར་ཏེ། འདི་ནི་སངས་རྒྱས་ཀྱི་རྗེས་སུ་ཡི་རང་བ་ཞེས་བྱའོ། །གཞི་གསུམ་རྟག་པ་ལས་བྱུང་བའི་རྗེས་སུ་ཡིད་རང་བ་འདི་དགེ་སློང་ངམ་དགེ་སློང་མ་གང་དག་སེམས་ཅན་རྣམས་ལ་སྟོན་པར་

49-1-138a

བྱེད་པ་དེ་དག་ནི་ཡུལ་འཁོར་གྱི་བསོད་སྙོམས་ཟ་བར་འོས་པ་ཡིན་ནོ། །གཅིག་ཤོས་དག་ནི་འོས་པ་མ་ཡིན་ནོ། །ཇི་ལྟར་རྗེས་སུ་ཡི་རང་བ་འདིས་གཏོལ་བ་དེ་འཇིག་རྟེན་ཐམས་ཅད་དུ་
བདེ་བར་གྱུར་པའི་ཆོས་ཀྱི་བདེན་པ་དེས་ནི་དམ་པའི་ཆོས་འདོད་པ་རྣམས་ལ་བགེགས་མེད་པ་དང་། གནོད་པ་མེད་པར་གྱུར་ཅིག །དེ་ནས་ལྷ་དང་། ལྷ་མ་ཡིན་དང་། མི་དང་བཅས་པའི་འཇིག་རྟེན་གྱིས་དེ་བཞིན་གཤེགས་པ་
རྟག་པར་ཁོང་དུ་ཆུད་ནས་རབ་ཏུ་དགའ་བའི་སེམས་དང་། དགེ་བའི་སེམས་དང་། སྒྲིབ་པ་དང་བྲལ་བའི་སེམས་དང་། གཞོལ་བ་མེད་པའི་སེམས་དང་། པད་མ་ཁ་བྱེ་བ་ལྟ་བུའི་བཞིན་དང་ལྡན་པར་གྱུར་ནས་ལྷའི་མཆོད་པ་ཆེན་པོའི་ལས་
བྱས་ཏེ། མེ་ཏོག་དང་། ཕྱེ་མ་དང་། བདུག་པ་དང་། སྤོས་ཀྱིས་བསྒོ་བ་ལ་སོགས་པ་གཏོར་ཏོ། །སིལ་སྙན་ལ་སོགས་པ་ཡང་བཀྲོལ་ཏེ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་
སྲུང་ཆེན་པོ་དང་རུས་གཅིག་པ་ལ་བཀའ་སྩལ་པ། རིགས་ཀྱི་བུ་ཁྱོད་ཀྱིས་དེང་འདིར་ངོ་མཚར་རྨད་དུ་བྱུང་བ་ཅི་མཐོང་། གསོལ་པ། བཅོམ་ལྡན་འདས་བདག་གིས་སྔོན་ལན་འགའ་ཡང་མ་མཐོང་བའི་ངོ་མཚར་རྨད་དུ་བྱུང་
བ་མཐོང་སྟེ། འཁོར་རེ་རེས་ཕུལ་བའི་ཞལ་ཟས་དེ་བཞིན་གཤེགས་པ་རེ་རེ་དགེ་སློང་གི་དགེ་འདུན་དང་བཅས་པས་གསོལ་བ་མཐོང་བ་ལགས་སོ། །འཁོར་འདི་ན་སྙུང་བུའི་རྩེ་མོ་ཙམ་གྱིས་ཁྱོན་དག་ལ་ཡང་ཇི་ལྟར་བཤམས་
པའི་གདན་དག་ལ་དེ་བཞིན་གཤེགས་པ་སྐུ་ཆེན་པོ་དུ་མ་བདེ་བར་བཞུགས་ཏེ་རྗེས་སུ་ཡི་རང་བ་བཅུ་གསུམ་གྱི་ཚིགས་སུ་བཅད་པ་དག་སྟོན་ཅིང་བཞུགས་པ་མཐོང་ལགས་སོ། །སེམས་ཅན་ཐམས་ཅད་ཀྱིས་ནི་སྒྱུ་འཕྲུལ་
འདི་མ་འཚལ་ཏེ། བཅོམ་ལྡན་འདས་ནི་བདག་གིས་ཕུལ་བའི་ཞལ་ཟས་གསོལ་ཞིང་བཞུགས་སོ་སྙམ་དུ་འཛིན་ལགས་སོ། །མི་མཆོག་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་

49-1-138b

ལ་སོགས་པས་ནི་ཙུན་དས་དེ་ལྟར་འབྲས་སཱ་ལུ་ཡུལ་མ་ག་དྷའི་ན་ལི་ཀ་བརྒྱད་ལས་ཞལ་ཟས་སྦྱར་བ་ཡང་རྡུལ་ཙམ་ཡང་དགེ་སློང་གི་དགེ་འདུན་གྱིས་མི་གསོལ་བ་དང་། དེ་བཞིན་གཤེགས་པ་ཞལ་ཟས་མི་གསོལ་
བའི་ཡ་མཚན་རྨད་དུ་བྱུང་བ་འདི་ཡང་དག་པར་འཚལ་ཏེ། འདི་ནི་ཐབས་ཙམ་དུ་མཛད་པར་བས་སོ་སྙམ་དུ་སེམས་ལགས་སོ། །ཉན་ཐོས་ཀྱི་ཚོགས་རྣམས་ཀྱིས་ནི་ཀྱེ་མ་དེ་བཞིན་གཤེགས་པ་ནི་
དཔག་ཏུ་མེད་པ་དང་རྟག་པ་ལགས་སོ་སྙམ་དུ་མ་འཚལ་ལགས་སོ། །དེ་ནས་བཅོམ་ལྡན་འདས་ཀྱིས་མགར་བའི་བུ་ཙུན་ད་ལ་བཀའ་སྩལ་པ། ཙུན་ད་ཁྱོད་ཀྱིས་ངོ་མཚར་རྨད་དུ་བྱུང་བ་ཅི་མཐོང་། 
གསོལ་པ། བཅོམ་ལྡན་འདས་སྔར་ནི་དེ་བཞིན་གཤེགས་པ་ཡ་མཚན་གྱི་མཆོག་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུ་མངའ་བ་དུ་མ་མཐོང་བ་ལས་ད་ནི་རང་རང་གིས་
བསྒྱུར་ནས་འདི་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་པོ་དག་ཏུ་སྣང་ལགས་སོ། །དེ་བཞིན་གཤེགས་པ་ནི་དུག་སྨན་གྱི་སྡོང་པོ་ལྟ་བུའི་སྐུ་གཅིག་པུར་གྱུར་ཏེ། བྱང་ཆུབ་སེམས་
དཔའ་རྣམས་ཀྱིས་བསྐོར་བར་གདའ་ལགས་སོ། །བཀའ་སྩལ་པ། སངས་རྒྱས་སྔ་མ་གང་ཡིན་པ་དེ་དག་ནི་སེམས་ཅན་ཐམས་ཅད་ལ་ཕན་པ་དང་། བདེ་བ་དང་། ཡིད་དགའ་བར་བྱ་བ་དང་
བསོད་ནམས་མི་ཟད་པར་བྱ་བའི་ཕྱིར་སྤྲུལ་པ་ཡིན་ཏེ། སྒྱུ་འཕྲུལ་འདི་ནི་བྱང་ཆུབ་སེམས་དཔའ་རྣམས་མ་གཏོགས་པར་སེམས་ཅན་རྣམས་ཀྱིས་མི་ཤེས་སོ། །དེ་ལྟར་ན་བྱང་ཆུབ་སེམས་དཔའི་སྤྱོད་པ་ནི་
དཔག་ཏུ་མེད་དོ། །དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དཔག་ཏུ་མེད་དོ། །བྱང་ཆུབ་སེམས་དཔའ་མི་མཆོག་རྣམས་ལ་ནི་སངས་རྒྱས་ཀྱི་རྣམ་པར་འཕྲུལ་པའི་མཐུ་ཡོད་དོ། །

49-1-139a

མགར་བའི་བུ་ཙུན་ད་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་ཐོབ་པ་ཡིན་ཏེ། བྱང་ཆུབ་སེམས་དཔའ་རྣམས་ཀྱི་མཆོག་གི་མཐར་ཐུག་པ་ནི་དེ་ལྟ་བུ་ཡིན་ནོ། །
འོད་སྲུང་ཆེན་པོ་དང་རུས་གཅིག་པས་གསོལ་པ། བཅོམ་ལྡན་འདས་དེ་ནི་དེ་ལགས་ཏེ། བྱང་ཆུབ་སེམས་དཔའ་རྣམས་ཀྱི་ནང་ན་མི་མཆོག་ཙུན་ད་ལ་བདག་རྗེས་སུ་ཡི་རང་ལགས་སོ། །བཅོམ་ལྡན་འདས་
ད་ནི་མདོ་སྡེ་རྣམས་བཤད་པའི་སླད་དུ་གནང་བ་མཛད་པའི་རིགས་སོ། །བཅོམ་ལྡན་འདས་ཅི་ལགས་མདོ་སྡེ་ཐམས་ཅད་ལྷག་མ་མཆིས་པའི་དོན་ལགས་སམ། འོན་ཏེ་ལྷག་མ་མ་མཆིས་པའི་དོན་ལགས། བཀའ་
སྩལ་པ། ལྷག་མ་ཡོད་པའི་དོན་ཀྱང་ཡིན། ལྷག་མ་མེད་པའི་དོན་ཀྱང་ཡིན་ནོ། །གསོལ་པ། སྦྱིན་པ་ཀུན་ཏུ་བསྔགས་པ་ཡིན། །སྦྱིན་པ་གང་དུའང་སྨད་པ་མེད། །ཅེས་བགྱི་བ་འདིར་ལྷག་
མ་མཆིས་པའི་དོན་དུ་ཇི་ལྟར་བཤད་ལགས། ཚིགས་སུ་བཅད་པའི་དོན་ནི་གང་ལགས། ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པའི་བྱེ་བྲག་ནི་ཅི་མཆིས། བཀའ་སྩལ་པ། གཅིག་མ་
གཏོགས་པར་སྦྱིན་པ་ནི་ཐམས་ཅད་དུ་བསྔགས་སོ། །གསོལ་པ། མ་གཏོགས་པ་གང་ལགས། བཀའ་སྩལ་པ། མདོ་སྡེ་འདི་ལས་ཚུལ་ཁྲིམས་འཆལ་པར་བརྩི་བ་གང་ཡིན་པའོ། །གསོལ་པ། བཅོམ་ལྡན་
འདས་བཅོམ་ལྡན་འདས་ལ་དེང་བདག་འདི་ཁོ་ན་ཞུ་ལགས་ན་མྱུར་དུ་བཀའ་སྩལ་དུ་གསོལ། བཀའ་སྩལ་པ་འདོད་ཆེན་པོ་མ་གཏོགས་པར་སྦྱིན་པ་ནི་ཐམས་ཅད་དུ་བསྔགས་པ་ཡིན་ནོ། །གསོལ་པ། འདོད་ཆེན་པ་ཇི་ལྟ་བུ་
ལགས། བཀའ་སྩལ་པ། དགེ་སློང་ངམ་དགེ་སློང་མ་འམ། དགེ་བསྙེན་ནམ། དགེ་བསྙེན་མ་ཡང་རུང་སྟེ། ཚིག་ངན་པས་མདོ་སྡེ་སྤངས་ནས་ཕྱིས་བཟོད་པ་གསོལ་བར་ཡང་མི་བྱེད་པ་དེ་ལྟ་བུ་གང་ཡིན་པ་དེ་ནི་འདོད་

49-1-139b

ཆེན་པའི་ལམ་དུ་ཞུགས་པ་ཡིན་ནོ། །ཕམ་པ་བཞི་བྱུང་བ་རྣམས་དང་། མཚམས་མེད་པ་ལྔ་བྱེད་པ་གང་ཡིན་པ་དེ་དག་ནི་བདག་ཅག་འཇིགས་པའི་གནས་སུ་ཞུགས་སོ་སྙམ་དུ་ཤེས་ཀྱང་འཇིགས་པར་མི་ལྟ་ལ་དམ་
པའི་ཆོས་ཀྱི་ཕྱོགས་ཀྱང་མི་འཛིན། དམ་པའི་ཆོས་དབྱུང་ངོ་སྙམ་དུ་འབད་པར་ཡང་མི་བྱེད་ལ། དེ་ཉིད་ཀྱི་བསྔགས་པ་མ་ཡིན་པར་ཡང་རྗོད་པར་བྱེད་པ་དེ་དག་ཀྱང་འདོད་ཆེན་པའི་ལམ་དུ་ཞུགས་པ་ཡིན་ནོ། །སངས་
རྒྱས་མེད་དོ། །ཆོས་མེད་དོ། །དགེ་འདུན་མེད་དོ་ཞེས་ཟེར་བ་གང་ཡིན་པ་དེ་དག་ཀྱང་འདོད་ཆེན་པའི་ལམ་དུ་ཞུགས་པ་ཡིན་ནོ་ཞེས་ང་ཟེར་ཏོ། །འདོད་ཆེན་པ་དེ་དག་མ་གཏོགས་པར་སྦྱིན་པ་ཐམས་ཅད་དུ་བསྔགས་སོ། །
གསོལ་པ། དེ་ལ་ཚུལ་ཁྲིམས་འཆལ་པ་ཞེས་བགྱི་བ་གང་དག་ལགས། བཀའ་སྩལ་པ། ཕམ་པ་བྱེད་བྱེད་པ་རྣམས་དང་། མཚམས་མེད་པ་ལྔ་བྱེད་བྱེད་པ་རྣམས་དང་། མདོ་སྡེ་སྤོང་བར་བྱེད་པ་དེ་ཉིད་དོ། །གསོལ་
པ། བཅོམ་ལྡན་འདས་ཅི་ལགས། དེ་དག་རྟག་ཏུ་ཚུལ་ཁྲིམས་འཆལ་པ་ཁོ་ན་ལགས་སམ། བཀའ་སྩལ་པ། འདི་ལ་རྒྱུ་ཡོད་དེ། དེས་ན་ཡེ་རྟག་པ་ཡང་ཡོད། ཡེ་མི་རྟག་པ་ཡང་ཡོད་དེ། གང་
དག་གོས་ཚོན་ཅན་གྱི་རྟགས་ཅན་རྣམས་དང་། ལྷན་ཅིག་ཏུ་མི་གནས་ཤིང་། ཀྱེ་མ་བདག་ཅག་གི་ཕམ་པ་བྱུང་བ་ཡིན་ཏེ། བདག་ཅག་གི་ཉེས་པ་བྱས་སོ་སྙམ་ནས་འཇིགས་པར་ལྟ་ལ། དེ་དག་དམ་པའི་
ཆོས་དབྱུང་བར་བྱའོ་སྙམ་ནས་ཉམས་སུ་ལེན་པར་བྱེད་ཅིང་དམ་པའི་ཆོས་ཀྱི་ཕྱོགས་འཛིན་པ་རྣམས་ཀྱི་བསྔགས་པ་བརྗོད་པར་བྱའོ། །ཆོས་མ་ཡིན་པའི་ཕྱོགས་རྣམས་ནི་ཚར་བཅད་པར་བྱའོ། །མཚུངས་པ་
མེད་པའི་མདོ་སྡེ་རྣམས་ནི་གདོན་པར་བྱའོ་སྙམ་དུ་བརྩོན་པར་བྱེད་པ་གང་ཡིན་པ་དེ་དག་ཚུལ་ཁྲིམས་འཆལ་པ་ཡིན་ནོ་ཞེས་ང་མི་ཟེར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་དཔེར་ན་ཉི་མ་ཤར་ན་ལྷོ་བུར་གྱི་རྡུལ་སངས་པར་

49-1-140a

འགྱུར་བ་དེ་བཞིན་དུ་མདོ་སྡེ་ཆེན་པོའི་ཉི་མ་འདི་ཤར་བ་ན་དེ་ལྟར་སྒོམ་བྱེད་པའི་སེམས་ཅན་རྣམས་ཀྱི་སྡིག་པའི་ཕུང་པོ་གྲངས་མེད་པ་བྱས་པ་རྣམས་ཟད་པར་འགྱུར་ཏེ། དེ་ལྟར་ན་དམ་པའི་ཆོས་འབྱིན་
པ་ནི་འབྲས་བུ་ཆེ་བ་ཡིན་ནོ། །མཚམས་མེད་པ་བྱེད་བྱེད་པ་རྣམས་དང་། མདོ་སྡེ་སྤོང་བ་གང་ཡིན་པ་དེ་དག་གལ་ཏེ་ཀྱེ་མ་བདག་ཅག་གིས་མདོ་སྡེ་སྤང་བ་བྱས་པ་འདི་ནི་བདག་ཅག་བརླག་པར་འགྱུར་བ་ཡིན་ཏེ་ཉེས་པ་བྱས་
སོ་སྙམ་དུ་འགྱོད་ཅིང་གདུང་བར་གྱུར་ནས། བདག་ཅག་གི་སྐྱབས་ནི་མདོ་སྡེ་ཉིད་ཡིན་ཏེ། འཁྲ་ས་གཞན་མ་མཐོང་ངོ་སྙམ་དུ་སེམས་བསྐྱེད་པར་བྱེད་ན། དེ་དག་ནི་ཟླ་བ་ཕྱེད་དམ། ཟླ་བ་གཅིག་གམ། དུས་ཇི་སྲིད་
ཀྱི་བར་དུ་མདོ་སྡེ་ལ་སྐྱབས་སུ་མ་སོང་བའི་བར་དུ་ནི་དེ་དག་ལ་བྱིན་པ་འབྲས་བུ་ཆུང་བར་འགྱུར་རོ། །གང་གི་ཚེ་མདོ་སྡེ་ལ་སྐྱབས་སུ་སོང་བ་དེའི་ཚེ་ནི་དེ་དག་ཀྱང་ཡོན་གནས་སུ་འགྱུར་རོ། །གལ་ཏེ་མཚམས་མེད་པ་བྱེད་
བྱེད་པ་ཡང་འགྱོད་དེ། ཀྱེ་མ་བདག་གིས་མི་རིགས་པ་བྱས་ཀྱིས་བདག་གིས་དམ་པའི་ཆོས་དབྱུང་བར་བྱའོ་སྙམ་དུ་སེམས་ན་དེ་ཡང་མཚམས་མེད་པ་བྱེད་བྱེད་པ་མ་ཡིན་པར་རིག་པར་བྱ་སྟེ་དེ་ལ་ནི་ཆུང་ངུ་ཞིག་བྱིན་ན་ཡང་འབྲས་
བུ་ཡོད་དོ། །མཆོག་ཏུ་ཚུལ་ཁྲིམས་འཆལ་པ་གཅིག་ཤོས་དེ་དག་ལ་བྱིན་པ་ནི་འབྲས་བུ་ཆུང་ཟད་ཀྱང་མེད་དོ། །རིགས་ཀྱི་བུ་གཞན་ཡང་ཕམ་པ་བྱེད་བྱེད་པས་ཇི་ལྟར་བྱ་བ་ཉོན་ཅིག །ཕམ་པ་བྱེད་བྱེད་པས་ནི་ཆོས་ཀྱི་དེ་ཁོ་
ན་ཉིད་དེ་བཞིན་གཤེགས་པའི་སྙིང་པོ་ཁོང་དུ་ཆུད་པར་བྱས་ནས་དམ་པའི་ཆོས་དབྱུང་བར་བྱའོ་སྙམ་དུ་བསམས་ན་དེ་ལ་བྱིན་པ་ཡང་ཆེས་ཁྱད་པར་ཅན་དུ་འགྱུར་རོ། །རིགས་ཀྱི་བུ་དཔེར་ན་བུད་མེད་སྦྲུམ་མ་ཞིག་ཡུལ་འཁྲུགས་ནས་ཡུལ་
གཞན་དུ་སོང་སྟེ་ལྷ་གང་ཞིག་གི་ནང་དུ་བུ་ཁྱིའུ་ཞིག་བཙས་ཏེ། དེ་བདེ་བར་གྱུར་ནས་ཁྱེའུ་དེ་ཁྱེར་ཏེ་བདག་གི་ཡུལ་ཞི་བར་གྱུར་པའི་འོག་ཏུ་དེ་ལོགས་སུ་ཆས་པ་ལས་ཆུ་ཀླུང་ཆེན་པོ་ཞིག་དང་ཕྲད་ནས་ཆུ་དེ་རྒལ་བ་ན་བུ་དང་བཅས་ཏེ་ཆུའི་ནང་དུ་

49-1-140b

ཉམ་ཐག་པར་གྱུར་ནས། བདག་ནི་ཤི་ཡང་སླའི་ཁྱེའུ་འདི་ཐར་བར་བྱའོ་སྙམ་ནས་དེ་དེའི་དོན་དུ་འབད་པ་ལས་བུ་དང་ལྷན་ཅིག་ཏུ་ཤི་ན་སྔོན་མཆོག་ཏུ་འཇིགས་པའི་ལས་བྱས་སུ་ཟིན་ཀྱང་བུ་ལ་བྱམས་ཤིང་ཐར་པར་བྱའོ་སྙམ་པའི་
འབྲས་བུས་མཐོ་རིས་སུ་སྐྱེས་པ་དེ་བཞིན་དུ་ཕམ་པ་བྱེད་བྱེད་པ་དང་། མཚམས་མེད་པ་བྱེད་བྱེད་པ་ལས་དམ་པའི་ཆོས་འབྱིན་པར་བྱེད་པ་དེ་དག་ནི་སྔོན་སྡིག་པའི་ལས་བྱས་སུ་ཟིན་ཀྱང་དམ་པའི་ཆོས་འབྱིན་པའི་འབྲས་བུས་
བུད་མེད་དེ་དང་འདྲ་བར་སེམས་ཅན་ཐམས་ཅད་ཀྱི་ཡོན་གནས་སུ་གྱུར་ཏེ། དམ་པའི་ཆོས་འབྱིན་པའི་འབྲས་བུ་ནི་དེ་ལྟར་ཆེའོ། །གསོལ་པ། བཅོམ་ལྡན་འདས་འདོད་ཆེན་པར་ལྟུང་བར་གྱུར་པ་ལས་སླད་ཀྱིས་གཞི་གསུམ་ལ་
འཆགས་པར་བགྱིད་ཅིང་བཟོད་པ་གསོལ་བར་བགྱིད་ན། ཅི་ལགས་དེ་ལ་སྩལ་པ་ཡང་འབྲས་བུ་ཆེ་བར་འགྱུར་ལགས་སམ། བཀའ་སྩལ་པ། རིགས་ཀྱི་བུ་དེ་སྐད་མ་ཟེར་ཅིག་དཔེར་ན་མི་ལ་ལ་ཞིག་གིས་ཤིང་ཏོག་ཨ་མྲ་ཟོས་ནས་རུས་པ་
ས་ལ་བོར་བའི་འོག་ཏུ་དེས་འདི་སྙམ་དུ་བསམས་ཏེ་ནང་གི་ཚིག་གུ་ཞིམ་ཡང་དག་སྙམ་ནས་དེས་དེའི་ཕྱི་རོལ་གྱི་རུས་པ་བོར་ཏེ་ཚིག་གུ་ཟོས་པ་དང་། དེས་དེའི་རོ་མི་ཞིམ་པར་ཚོར་ནས་ཡང་བོར་རོ། །དེ་ནས་དེས་ཀྱི་ཧུད་བདག་གིས་ས་
བོན་ངན་པ་མ་རུང་བར་བྱས་སོ་སྙམ་དུ་བསམས་ནས་ས་བོན་དེ་ཕྱིར་རུས་པའི་ནང་དུ་བཅུག་ནས་ས་བརྐོས་པའི་འོག་ཏུ་བཅུག་སྟེ། འོ་མ་དང་མར་ཁུས་བླུགས་ལ་ཆར་ཆེན་པོ་བབ་ཏུ་ཟིན་ཀྱང་ས་བོན་ངན་པ་མ་རུངས་བར་བྱས་པ་སྐྱེ་བར་མི་
འགྱུར་ཏེ་སྐྱེ་མི་སྲིད་དོ། །དེ་ནས་ས་བོན་འདི་ནི་མ་རུང་བར་བྱས་པ་ཡིན་ཏེ་སྐྱེ་བར་མི་འགྱུར་རོ་སྙམ་ནས་ངལ་བར་གྱུར་ཏེ་ཅང་མི་ཟེར་བར་འདུག་པ་དེ་བཞིན་དུ་འདོད་ཆེན་པ་ལ་ཡང་ས་བོན་མེད་དེ་འདོད་ཆེན་པ་འཆགས་ཤིང་བཟོད་པ་
གསོལ་བའི་སེམས་སྐྱེད་པ་ནི་མི་སྲིད་དོ། །དེ་བས་ན་འདོད་ཆེན་པ་དེ་ལྟ་བུ་ལ་ནི་ཐམས་ཅད་དུ་སྦྱིན་པ་འབྲས་བུ་ཆེ་བ་མ་ཡིན་ནོ། །དགྲ་བཅོམ་པ་རྣམས་ལ་ཕུལ་བའི་འབྲས་བུ་ཡང་ཐ་དད་དོ། །རང་སངས་རྒྱས་རྣམས་ལ་ཕུལ་

49-1-141a

བའི་འབྲས་བུ་ཡང་ཐ་དད་དོ། །དེ་བས་ན་ཐམས་ཅད་དུ་སྦྱིན་པའི་འབྲས་བུ་ཆེ་བ་མ་ཡིན་ནོ། །གསོལ་པ། ཅིའི་སླད་དུ་བཅོམ་ལྡན་འདས་ཀྱིས་ཚིགས་སུ་བཅད་པ་འདིའི་དོན་རྣམ་པ་གཉིས་སུ་བཀའ་སྩལ་ལགས། 
རྒྱུ་ལས་འགྱུར་ཏེ་སྔོན་རྒྱལ་པོའི་ཁབ་ཀྱི་དགེ་བསྙེན་དད་པ་མེད་པ་གཅེར་བུ་པ་ལ་དགའ་བ་ཞིག་ཡོད་པ་དེས་ང་ལ་སྦྱིན་པ་བྱས་པ་ཅིར་འགྱུར་བ་དྲིས་པ་དེའི་ཚེ་དེ་དྲང་བའི་ཕྱིར་སྦྱིན་པ་ཀུན་ཏུ་བསྔགས་པ་ཡིན་ཞེས་བྱ་བའི་ཚིགས་སུ་བཅད་པ་དེ་དེ་ལ་བསྟན་
ཏོ། །དེ་ནི་བྱང་ཆུབ་སེམས་དཔའ་རྣམས་ཀྱི་དོན་དུ་ཚིགས་སུ་བཅད་པའི་དོན་དགོངས་པའི་ཚིག་ཏུ་བསྟན་ཏེ་དུས་ཐམས་ཅད་དུ་ཚིགས་སུ་བཅད་པའི་དོན་འདྲ་བར་བསྟན་པ་མ་ཡིན་ནོ། །ཐམས་ཅད་ཅེས་བྱ་བ་ནི་སྐབས་དང་སྦྱར་ཏེ་
ཚིག་གི་ལྷག་མ་ཡོད་པར་རིག་པར་བྱའོ། །བྱང་ཆུབ་སེམས་དཔའ་མི་མཆོག་གིས་ནི་ཚུལ་ཁྲིམས་འཆལ་བ་རྣམས་ཞིང་གི་ངོ་བཞིན་དུ་ཚར་བཅད་པར་བྱའོ། །རིགས་ཀྱི་བུ་གཞན་ཡང་ངས་སྔོན་ཚིགས་སུ་བཅད་པ་འདི་བསྟན་
ཏེ། འདི་ལྟ་སྟེ། ཆུ་ཀླུང་ཆུ་ཀུན་གྱ་གྱུར་འབབ། །ནགས་ཚལ་ཀུན་ནི་ཤིང་ཉིད་ཡིན། །བུད་མེད་ཀུན་ལ་གཡོ་སྒྱུ་ཡོད། །དབང་ཕྱུག་ཐམས་ཅད་བདེ་བ་ཡིན། །བུད་མེད་རྣམས་ཀྱི་སེམས་ནི་གཡོ་སྒྱུ་ཅན་དང་འཇིགས་སུ་
རུང་བ་ཡིན་ནོ། །དེ་བས་ན་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་སླར་ཚིགས་སུ་བཅད་དེ་གསོལ་པ། ཆུ་ཀུན་གྱ་གྱུར་འབབ་མ་ལགས། །
ནགས་ཚལ་ཀུན་ཀྱང་ཤིང་མ་ལགས། །བུད་མེད་ཀུན་ལའང་གཡོ་མ་མཆིས། །དབང་ཕྱུག་ཀུན་ཀྱང་བདེ་མ་ལགས། །དེ་བས་ན་བཅོམ་ལྡན་འདས་ཀྱིས་ཆོས་ཀྱི་སྒོ་དེ་སྐད་དུ་བཀའ་སྩལ་པ་དེ་ནི་ལེགས་པར་བཀའ་སྩལ་པ་མ་
ལགས་ཏེ། འདི་ལ་རྒྱུ་ཅི་མཆིས་པ་བཀའ་སྩལ་འཚལ་ལགས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གླིང་ཐ་དད་པ་ནུབ་ཀྱི་བ་ལང་སྤྱོད་ཅེས་བགྱི་བ་མཆིས་ཏེ་དེ་ན་ཆུ་ཀླུང་གི་མིང་དྲང་པོར་འབབ་ཅེས་

49-1-141b

བགྱི་བ་ཤིང་མཁན་གྱི་ཐིག་སྐུད་བཞིན་དུ་ནུབ་ཕྱོགས་ཀྱི་རྒྱ་མཚོ་ནས་ཤར་ཕྱོགས་ཀྱི་རྒྱ་མཚོར་དྲང་པོར་འབབ་པ་ཞིག་མཆིས་ལ། ཐམས་ཅད་ཅེས་བགྱི་བ་ནི་ཤིན་ཏུ་རྒྱས་པའི་ལུང་ལས་ལྷག་མ་ཡོད་པའི་དོན་ལགས་པར་བཅོམ་ལྡན་འདས་
ཀྱིས་བཀའ་སྩལ་ན་ཆུ་ཀླུང་དྲང་པོར་འབབ་ཅེས་བགྱི་བ་དེ་ཤིན་ཏུ་རྒྱས་པའི་ལུང་གི་མདོ་གང་ལས་བཤད་པ་བཅོམ་ལྡན་འདས་བདེན་པ་བསྲུང་བས་བཀའ་སྩལ་དུ་གསོལ། དཔེར་ན་ནོར་གྱི་འབྱུང་ཁུང་གི་རྒྱུས་མཁན་འབྱུང་ཁུང་ལ་མི་མཁས་
པ་ཞིག་གིས་དེ་ཁོ་ན་ན་གསེར་མཆིས་བཞིན་དུ་འདི་ནི་གསེར་མ་མཆིས་སོ་ཞེས་མཆི་བས་ནི་གནས་ཀྱིས་ཕྱོགས་ཆའི་བྱེ་བྲག་ཙམ་ཉི་ཚེ་ཤེས་པར་བགྱི་འཚལ་ལགས་སོ། །ནགས་ཚལ་ཀུན་ནི་ཤིང་ཉིད་ཡིན་ཞེས་བགྱི་བ་ནི་ལྷག་མ་ཡོད་
པའི་དོན་ལགས་ལ་ནགས་ཚལ་ནི་རྣམ་པ་མང་དུ་མཆིས་ཏེ་འདི་ལྟ་སྟེ། གསེར་དང་བཻ་དཱུརྱའི་ནགས་ཚལ་ཡང་མཆིས་ལགས་སོ། །དེ་བཞིན་དུ་བུད་མེད་ཀུན་ལ་གཡོ་སྒྱུ་ཡོད་ཅེས་བགྱི་བ་དེ་ཡང་ལྷག་མ་ཡོད་པའི་དོན་ལགས་ཏེ། བུད་
མེད་ལ་ཡང་ཚུལ་ཁྲིམས་དང་ལྡན་པ་དང་། འདོད་ཆགས་དང་བྲལ་བ་དང་། སེར་སྣ་མ་མཆིས་པ་དུ་མ་མཆིས་ལགས་སོ། །དབང་ཕྱུག་ཐམས་ཅད་བདེ་བ་ཡིན་ཞེས་བགྱི་བ་དེ་ཡང་ལྷག་མ་ཡོད་པའི་དོན་ལགས་ཏེ། དབང་ཕྱུག་
ཅེས་བགྱི་བ་ནི་འཁོར་ལོས་སྒྱུར་བའི་རྒྱལ་པོ་དང་། སངས་རྒྱས་རྣམས་དབང་ཕྱུག་གི་མཆོག་ལགས་མོད་ཀྱི། དེ་དག་ཀྱང་འཆི་འཕོའི་དབང་དུ་འགྱུར་ཞིང་ཟད་པའི་ཆོས་ཅན་ལགས་ལ། ཚངས་པའི་དབང་ཕྱུག་འདི་དག་
ཀྱང་ལྟུང་བའི་ཆོས་ཅན་ལགས་ཏེ། དེ་བས་ན་དེ་དག་ནི་དབང་ཕྱུག་མ་ལགས་ཤེས་བདག་མཆིས་ལགས་སོ། །རྟག་པ་དང་བརྟན་པའི་དབང་ཕྱུག་གང་ལགས་པ་དེ་ནི་མྱ་ངན་ལས་འདས་པ་མཆོག་ཏུ་བདེ་བའི་དབང་ཕྱུག་ལགས་སོ། །
བཀའ་སྩལ་པ་འཇམ་དཔལ་དཔེར་ན་སྨན་པ་ཞིག་གིས་ཁྱིམ་བདག་གི་བུ་ཞིག་གི་ནད་གསོ་བར་བྱེད་དེ་སྨན་མར་བསྐོལ་ནས་དེ་འཐུང་དུ་བཅུག་པ་ན་ནད་པ་དེ་མར་མང་དུ་འཐུང་བར་སྩོལ་ལོ། །དེ་ནས་སྨན་པ་དེས་དེ་ལ་སྨྲས་པ། ཉམ་

49-1-142a

སྟོབས་དང་ལྡན་པས་ནི་མར་མང་དུ་བཏུང་བར་བརྩལ་ཀྱང་དེས་འཇུ་བར་ནུས་ཀྱི་ཁྱོད་ནི་ཉམ་སྟོབས་མེད་པས་མར་ཧ་ཅང་མང་དུ་མ་འཐུང་ཤིག །མར་ནི་ནད་སེལ་བ་ཡང་ཡིན་མོད་ཀྱི་མང་དུ་འཐུངས་ན། 
དེ་ཉིད་ཀྱིས་ཁྱོད་ཡེ་འདྲོག་ཏུ་འཆི་བར་འགྱུར་རོ་ཞེས་བྱས་ན། ཅི་སྨན་པ་ཕན་པར་འདོད་ཅིང་སྙིང་བརྩེ་བ་དེས་ཡང་དག་པའི་དོན་དེ་མ་རུང་བར་བྱས་པ་ཡིན་ནམ། དེ་བཞིན་དུ་སངས་རྒྱས་བཅོམ་ལྡན་འདས་ཀྱིས་ཀྱང་རྒྱལ་
པོ་དང་། བློན་པོ་དང་བཙུན་མོ་རྣམས་ཀྱི་ང་རྒྱལ་བསལ་བ་དང་། ཀོ་ས་ལའི་རྒྱལ་པོ་གསལ་རྒྱལ་གྱི་བཙུན་མོ་རྣམས་གཞན་དང་གཡེམ་པ་ལ་འཇིགས་པ་དང་། སྐྱོ་བ་སྐྱེད་པའི་ཕྱིར་སྨན་པ་བཞིན་དུ་དེ་བཞིན་
གཤེགས་པས་རྒྱལ་པོ་གསལ་རྒྱལ་ལས་བརྩམས་ནས། ཆུ་ཀླུང་ཆུ་ནི་གྱ་གྱུར་འབབ་ཅེས་ཚིགས་སུ་བཅད་པ་འདི་བཀའ་སྩལ་ཏེ། ཆུ་ཀླུང་གྱ་གྱུར་འབབ་ཅེས་བྱ་བ་ལ་དེ་བཞིན་གཤེགས་པ་འཁྲུལ་པ་མེད་དོ། །
གང་ཚེ་འཁྲུལ་པ་ཞིག་ཏུ་གྱུར་ན་གནམ་ས་ལོག་པར་འགྱུར་རོ། །དེ་བས་ན་ཐམས་ཅད་སྨོས་ཏེ་གསུངས་པ་ནི་ལྷག་མ་ཡོད་པ་ཡང་ལྷག་མ་མེད་པ་དང་འདྲ་བར་གསུངས་སོ། །འཇམ་དཔལ་བྱང་
ཆུབ་སེམས་དཔའི་ཁྱུ་མཆོག་དམ་པ་ཁྱོད་ཀྱིས་སེམས་ཅན་ཐམས་ཅད་ལ་ཕན་པའི་ཕྱིར་ཤེས་རབ་རྒྱས་པར་བྱ་བ་འདི་ལེགས་སོ་ལེགས་སོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་ཡང་ཚིགས་
སུ་བཅད་དེ་གསོལ་པ། བདག་གིས་བྱས་དང་མ་བྱས་རྣམས། །བརྟག་པར་བྱ་ཡི་གཞན་དག་གི། །བྱས་དང་མ་བྱས་རྣམས་དང་ནི། །གཞན་གྱི་མི་མཐུན་བརྟག་མི་བྱ་ཞེས་བཅོམ་ལྡན་འདས་དེ་བཞིན་གཤེགས་པས་
ཆོས་ཀྱི་སྒོ་དེ་སྐད་དུ་བཀའ་སྩལ་པ་ནི་ལེགས་པར་བཀའ་སྩལ་པ་མ་ལགས་ཏེ། འདི་ལ་ཅིའི་སླད་དུ། དེ་སྐད་ཅེས་བཀའ་སྩལ་པའི་རྒྱུ་བཀའ་སྩལ་འཚལ་ལགས་སོ། །བཅོམ་ལྡན་འདས་ཀྱིས་གསུང་རབ་ཡན་ལག་

49-1-142b

དགུ་ལས་འདི་ན་གཅེར་བུ་པ་སེམས་ཅན་དམྱལ་བ་ཐམས་ཅད་དང་། ཡ་མཚན་ཅན་དགུ་བཅུ་རྩ་དྲུག་པོ་རྣམས་ལ་ནི་ལམ་ངན་པར་ཞུགས་པ་ཡིན་ནོ། །སངས་རྒྱས་ཀྱི་སྲས་ཐམས་ཅད་ནི་མྱ་ངན་ལས་འདས་པ་ལ་ཞུགས་
པ་ཡིན་ནོ། །དྲང་པོ་དང་ཚུལ་ཁྲིམས་དང་ཆོ་ག་དང་ལྡན་པ་དང་། དབང་པོ་ཐུལ་བ་གང་ཡིན་པ་དེ་དག་ཐམས་ཅད་ནི་མཐོ་རིས་སུ་འགྲོ་བ་དང་། ཆོས་ཀྱི་སྤྱོད་ཡུལ་ཅན་ཡིན་ནོ་ཞེས་བདག་བསྟོད་པ་དང་། གཞན་སྨོད་པ་དང་། 
གཞན་གཤུང་བ་བཀའ་སྩལ་ཏེ། བཅོམ་ལྡན་འདས་ཀྱིས་དེ་ལྟར་གཞན་དང་མི་མཐུན་པ་རྣམས་ཀྱང་བཀའ་སྩལ་ལ། གཞན་དག་དང་མི་མཐུན་པ་ཞེས་བགྱི་བ་ཡང་མ་ལགས་པ་ཅི་ལྟ་བུ་ལགས། དེ་ནས་བཅོམ་ལྡན་
འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ངས་གཞན་གྱི་མི་མཐུན་བརྟག་མི་བྱ། །ཞེས་བསྟན་པ་དེ་གང་ལས་ནི་བརྩམས་ཅིའི་ཕྱིར་ནི་བསྟན་ཅེ་ན། མ་སྐྱེས་དགྲ་ལས་
བརྩམས་ནས་བསྟན་པ་ཡིན་ཏེ་སངས་རྒྱས་བཅོམ་ལྡན་འདས་ནི་རྒྱུ་མེད་པར་དོན་འགལ་བ་སྟོན་པར་མི་མཛད་ཀྱི་རྒྱུ་དང་བཅས་པར་སྟོན་པར་མཛད་དེ། སྔོན་མ་སྐྱེས་དགྲས་ཕ་བསད་ནས་ངའི་ཐད་དུ་འོངས་ནས་འདི་ལྟར་
བརྙས་ཐབས་སུ་དྲི་བ་དྲིས་ཏེ་ཅི་ལགས། བཅོམ་ལྡན་འདས་ཐམས་ཅད་མཁྱེན་པ་ལགས་སམ་འོན་ཏེ་ཐམས་ཅད་མཁྱེན་པ་མ་ལགས། གལ་ཏེ་ཐམས་ཅད་མཁྱེན་པ་ལགས་ན་ཅིའི་སླད་དུ་ལྷ་སྦྱིན་རབ་ཏུ་ཕྱུང་ལགས། 
དེ་ཚེ་རབ་སྟོང་ཕྲག་མང་པོར་ཕྱི་བཞིན་འབྲང་ཞིང་གནོད་པ་བགྱིད་པར་གཟིགས་ན་ད་ལྟར་ཡང་རྒོལ་དུ་འོང་བར་ཐམས་ཅད་མཁྱེན་པ་ཁྱོད་ཀྱིས་ཇི་ལྟར་གཟིགས་ཤེས་ཟེར་ནས་ངས་དེ་ལ་འདི་སྐད་དུ། གཞན་དང་མི་མཐུན་
བརྟག་མི་བྱ། །ཞེས་བྱ་བའི་ཚིགས་སུ་བཅད་པ་བསྟན་ཏོ། །ད་ནི་རྒྱལ་པོ་ཆེན་པོ་ཁྱོད་བདག་གིས་ཕ་བསད་དེ་མཚམས་མེད་པའི་ལས་ཀྱི་རབ་དུག་ཆེན་པོ་བྱས་པ་དེ་སྦྱང་བར་གྱིས་ཤིག །རྒྱལ་པོ་གཞན་གྱི་ཉེས་པ་

49-1-143a

ལ་མ་རྟོག་པར་དེ་ལྟ་བུ་ཁོང་དུ་ཆུད་པར་གྱིས་ཤིག་ཅེས་བྱས་སོ། །གཞན་ཡང་མི་མཐུན་པ་བརྟག་པར་ཡང་བྱ་སྟེ། ཚུལ་ཁྲིམས་དང་ཆོ་ག་ལ་བརྟན་པ་གང་ཡིན་པ་དེ་དག་གི་སྐྱོན་བརྟག་པ་ལྷུར་བླང་བར་
བྱ་སྟེ་དེ་ནི་སངས་རྒྱས་ཀྱི་བསྟན་པ་ཡིན་ནོ། །གཞན་གྱི་མི་མཐུན་པ་ལ་རྟོག་པ་རྣམས་ཀྱིས་ནི་བདག་དང་གཞན་དག་གི་བྱས་པ་དང་མ་བྱས་པ་ནི་བདག་དང་གཞན་དག་གི་ཡིན་པར་ཤེས་པར་བྱའོ། །དེ་ལྟ་བུའི་ཚུལ་གྱིས་གཞན་གྱིས་
བྱས་པ་རྟག་ཏུ་ཡང་དག་པར་མཐོང་བ་གང་ཡིན་པ་དེ་དག་ནི་ངའི་ཉན་ཐོས་ཡིན་ནོ་ཞེས་ང་ཟེར་རོ། །དེ་ནས་ཡང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །ཆད་པ་དག་གིས་ཐམས་ཅད་
སྐྲག །ཀུན་ལ་སྲོག་ནི་ཕངས་པ་ཡིན། །བདག་གི་ཉམས་ལས་དཔག་བྱ་ཞིང་། །བདེག་པར་མི་བྱ་གསད་མི་བྱ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །ཆད་པས་ཐམས་
ཅད་སྐྲག་མི་འགྱུར། །སྲོག་ཀྱང་ཀུན་ལ་ཕངས་མ་ལགས། །བདག་གི་ཉམས་ལས་དཔག་བགྱི་ཞིང་། །ཐབས་ཀྱིས་བགྱི་བ་རྟོགས་པར་བགྱི། །དེ་བས་ན་བཅོམ་ལྡན་འདས་ཀྱིས་ཆོས་ཀྱི་སྒོ་དེ་སྐད་དུ་བཀའ་སྩལ་པ་ནི་ལེགས་
པར་བཀའ་སྩལ་པ་མ་ལགས་ཏེ། དགྲ་བཅོམ་དང་ནི་འཁོར་ལོས་སྒྱུར། །གླང་ཆེན་བུད་མེད་རིན་ཆེན་དང་། །ཁྱིམ་བདག་རིན་ཆེན་རྟ་རྣམས་ནི། །གནོད་པ་ཅིས་ཀྱང་མི་ཚུགས་སོ། །འདི་རྣམས་ལ་ནི་ལྷ་དང་། མི་དང་། ལྷ་
མ་ཡིན་དུ་བཅས་པའི་འཇིག་རྟེན་ན་སུས་ཀྱང་གནོད་པ་བགྱིད་པའི་རྔོ་མི་ཐོག་སྟེ། དགྲ་དྲག་ཤུལ་གྱི་སྟོབས་ཅན་རྣམས་ཀྱིས་ཀྱང་དེ་དག་ལ་གནོད་པས་ཚུགས་མི་སྲིད་ལགས་སོ། །དེ་དག་ནི་ལྷ་དང་བདུད་དང་། ཚངས་པ་རྣམས་
ཀྱིས་ཀྱང་མི་འཇིགས་ལགས་སོ། །དེ་བས་ན་སེམས་ཅན་དེ་དག་ནི་ཅིས་ཀྱང་མི་ཚུགས་པ་ཞེས་བགྱི་ལགས་སོ། །གཡུལ་ངོར་གཅིག་ཏུ་དཔའ་བ་དང་། གཅིག་ཏུ་ཁྱིམ་ཐབ་ལ་མི་འཁྲུལ་བའི་ཆུང་མ་དང་། སེང་གེ་དང་། སིན་དུ་

49-1-143b

པའི་རྟ་ཅང་ཤེས་དང་། དགེ་སློང་ཚུལ་ཁྲིམས་དང་ལྡན་པ་འདི་རྣམས་ནི་གནོད་པས་ཚུགས་པ་ལགས་ཀྱིས་ཀྱང་ཅིས་ཀྱང་མི་འཇིགས་ལགས་སོ། །དེ་ལ་ཆད་པ་དག་གིས་ཐམས་ཅད་སྐྲག་ཅེས་བགྱི་བ་ནི་འདིར་ལྷག་མ་ཡོད་པའི་དོན་ལགས་
པས་ན་མདོར་བསྡུས་པ་ལགས་སོ། །བདག་གི་ཉམས་ལས་དཔག་བྱ་ཞིང་ཞེས་བགྱི་བ་དེ་ཡང་ལྷག་མ་ཡོད་པའི་དོན་ལགས་ཏེ་དགྲ་བཅོམ་པ་རྣམས་ནི་བདག་དང་མི་མཉམ་མོ་ཞེས་དེ་ལྟར་འཇིག་རྟེན་དུ་གྲགས་ལགས་སོ། །གལ་ཏེ་དགྲ་
བཅོམ་པ་རྣམས་ཀྱི་བདག་ཏུ་འདུ་ཤེས་པ་དང་། དགྲ་བཅོམ་པ་རྣམས་ཀྱི་སྲོག་ཏུ་འདུ་ཤེས་པ་གསུངས་པ་ལགས་སོ་ཞེས་དེ་ལྟ་བུའི་བློ་ཆུང་ངུ་རྣམས་ཀྱིས་ནི་དགྲ་བཅོམ་པ་གནས་ངན་པར་བཞག་པ་ལགས་ཏེ། དེ་ལྟར་བགྱིས་པས་སྲོག་ཏུ་འདུ་
ཤེས་པའི་ལྟ་བ་ངན་པས་རྨོངས་པའི་འབྲས་བུས་མྱུར་དུ་མནར་མེད་པར་སྐྱེ་བར་འགྱུར་ལགས་སོ། །གཅིག་ཏུ་ན་གལ་ཏེ་དགྲ་བཅོམ་པ་རྣམས་གསད་པའི་སེམས་བསྐྱེད་དུ་ལགས་ཀྱང་སེམས་ཅན་ད་དག་གིས་སོད་པར་འགྱུར་མི་སྲིད་དེ་སེམས་
ཅན་མང་པོ་ལོག་ཀྱང་དེ་དག་གསོད་པའི་རྔོ་མི་ཐོགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྲོག་ཆགས་རྣམས་ལ་སྙིང་བརྩེ་བའི་ཕྱིར་བདག་དང་འདྲ་བར་བལྟའོ། །དགྲ་བཅོམ་པ་ནི་འཚེ་བ་མེད་པའི་སྒོ་ནས་དཔག་ཏུ་མེད་པ་
དང་། མཚུངས་པ་མེད་པར་བལྟ་བར་བྱ་སྟེ་དེ་དག་ལ་གསད་པའི་སེམས་བསྐྱེད་པར་མི་བྱའོ། །དེ་ལྟར་ན་སངས་རྒྱས་ནི་རྒྱུ་མེད་པར་དོན་དང་འགལ་བ་མི་སྟོན་ཏེ། ཚིགས་སུ་བཅད་པ་འདི་ནི་རྒྱལ་པོའི་ཁབ་ཀྱི་རི་དགས་ཀྱི་རྔོན་པ་ལས་བརྩམས་
ནས་བསྟན་ཏེ། དེས་རི་དགས་བསད་ནས་ཤ་དང་ལྡན་པའི་ཟས་ཀྱི་སྦྱིན་པ་ལ་ང་སྤྱན་དྲངས་ནས་ངས་ཀྱང་དེས་སྤྱན་དྲངས་པ་ལ་གནང་ནས་སྒྲ་གཅན་ཟིན་དང་འདྲ་བར་ལྟ་བའི་ཚུལ་གྱིས་ཚིགས་སུ་བཅད་པས་འདི་སྐད་ཅེས་བྱས་སོ། །ཆད་པ་དག་
གིས་ཐམས་ཅད་སྐྲག །ཀུན་ལ་སྲོག་ནི་ཕངས་པ་ཡིན། །བདག་གི་ཉམས་ལས་དཔག་བྱ་ཞིང་། །བརྡེག་པར་མི་བྱ་གསད་མི་བྱ། །མིག་རྒྱང་རིང་དུ་ལྟོས་ལ་རིང་དུ་འཚོ་བར་གྱིས་ཤིག །འཚེ་བ་མེད་པའི་རྟགས་ཀྱི་དོན་ཁོང་དུ་ཆུད་པར་གྱིས་

49-1-144a

ཤིག །བྱང་ཆུབ་སེམས་དཔའ་རྣམས་ཀྱི་ནང་ན་མིའི་ཁྱུ་མཆོག་འཇམ་དཔལ་ལེགས་སོ་ལེགས་སོ། །སེམས་ཅན་ཐམས་ཅད་ལ་ཕན་པའི་ཕྱིར་དགོངས་པའི་ཚིག་འདི་དྲིས་པ་དེ་ནི་ལེགས་སོ། །དེ་ནས་བཅོམ་
ལྡན་འདས་ལ་འཇམ་དཔལ་གཞོན་ནུར་གྱུར་པས་ཚིགས་སུ་བཅད་དེ་འདི་སྐད་ཅེས་གསོལ་ཏོ། །མ་ལ་མཆོད་པའི་ཚུལ་གྱིས་ནི། །ཕ་མ་གཉིས་ལ་མཆོད་བགྱིས་ན། །བླ་མ་ལ་ཡང་གུས་གྱུར་ལ། །མནར་མེད་འཇིགས་པར་ཇི་ལྟར་མཆི། །
དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་འདི་སྐད་ཅེས་བཀའ་སྩལ་ཏོ། །འདིར་ནི་སྲེད་པ་མ་ཞེས་བྱ། །གཏི་མུག་ལ་ནི་ཕ་ཞེས་བྱ། །ཆོས་འདི་གཉིས་ལ་གང་མཆོད་པ། །དེ་ནི་མནར་མེད་འཇིགས་པར་འགྲོ། །དེ་ནས་བཅོམ་ལྡན་
འདས་ཀྱིས་ཡང་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་པ་འདི་སྐད་ཅེས་བཀའ་སྩལ་ཏོ། །གཞན་གྱི་དབང་གྱུར་ཐམས་ཅད་སྡུག །རང་དབང་ཅན་ནི་ཐམས་ཅད་བདེ། །ང་རྒྱལ་དབང་གྱུར་ཀུན་མི་ཟད། །དགའ་བ་ཐམས་ཅད་
བཟང་བ་ཡིན། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཆོས་ཀྱི་སྒོ་དེ་སྐད་དུ་བཀའ་སྩལ་པ་ནི་ལེགས་པར་བཀའ་སྩལ་པ་མ་ལགས་ཏེ་འདི་ན་ཁྱིམ་བདག་ལ་ལ་
ཞིག་གིས་བདག་གི་བུ་བྱིས་པའི་སློབ་དཔོན་ལ་གཏད་ན་ཅི་ལགས་ཁྱེའུ་དེ་གཞན་གྱི་དབང་དུ་གྱུར་པ་ཞེས་མི་བགྱི་ལགས་སམ། དེ་ལ་གཞན་གྱི་དབང་དུ་གྱུར་པ་མ་ལགས་སོ་ཞེས་བགྱིས་ན་ཡང་དོན་དང་འགལ་བར་འགྱུར་ལ་དེ་ལ་རང་དབང་ཅན་
ལགས་སོ་ཞེས་བགྱིས་ན་ཡང་དོན་དང་འགལ་བར་འགྱུར་ཏེ་ཆོས་འདི་ནི་ཤིན་ཏུ་རྟགས་དཀའ་བ་ལགས་སོ། །འདི་ན་རྒྱལ་པོའི་བུ་ལ་ལ་བཅོས་སུ་མི་རུང་བར་གྱུར་ཏེ་དེ་ཅི་ཡང་སློབ་མི་འཚལ་ནས་རང་དགའ་དང་རང་ཉམ་དུ་འཁྱམ་པ་དེ་ལ་རང་
དབང་ཅན་ཞེས་བགྱིས་ན་ནི་དོན་དང་ཚབས་ཆེར་འགལ་བར་འགྱུར་ལ་གཞན་གྱི་དབང་དུ་གྱུར་ཏོ་ཞེས་བགྱིས་ན་ནི་དོན་དང་འགལ་བར་མི་འགྱུར་ཏེ་ཆོས་འདི་ནི་ཤིན་ཏུ་བརྟག་དཀའ་བ་ལགས་སོ། །གཞན་ཡང་དབང་དུ་གྱུར་ཅེས་བགྱི་བའི་ཚིག་བླ་

49-1-144b

དགས་ནི་དེ་རང་དབང་དུ་གྱུར་ན་སྡིག་པ་བགྱིད་པ་དང་འགུམ་པར་འགྱུར་བས་ན་བཀའ་སྩལ་པ་འདི་ནི་ལྷག་མ་ཡོད་པའི་དོན་ལགས་ཏེ། དེ་བས་ན་གཞན་གྱི་དབང་དུ་གྱུར་པ་ཐམས་ཅད་སྡུག་པ་ཡང་མ་ལགས་ལ་རང་དབང་ཅན་ཐམས་ཅད་བདེ་
བ་ཡང་མ་ལགས་སོ། །ང་རྒྱལ་དབང་གྱུར་ཀུན་མི་ཟད། །ཅེས་བགྱི་བ་དེ་ཡང་ལྷག་མ་ཡོད་པའི་དོན་ལགས་ཀྱི་ང་རྒྱལ་གྱི་དབང་དུ་གྱུར་པ་ཀུན་མི་ཟད་པ་ཡང་མ་ལགས་ཏེ། འདི་ན་ལ་ལ་ཞིག་ང་རྒྱལ་གྱི་དབང་གིས་རབ་ཏུ་བྱུང་ན་ཅི་ལགས་རབ་ཏུ་
བྱུང་བ་དེ་ལ་ང་རྒྱལ་གྱི་དབང་དུ་གྱུར་པ་ཀུན་མི་ཟད་ཅེས་བགྱི་ལགས་སམ། དེ་ནི་ང་རྒྱལ་མ་མཆིས་པ་དང་། བསོད་ནམས་དང་ལྡན་པ་དང་། ཚུལ་ཁྲིམས་དང་ཆོ་ག་དང་ལྡན་པ་དང་། དབང་པོ་བསྲུངས་པ་ལགས་ཏེ། དེ་བས་ན་
ང་རྒྱལ་གྱི་དབང་དུ་གྱུར་པ་ཀུན་མི་ཟད་པ་ཡང་མ་ལགས་སོ། །དགའ་བ་ཐམས་ཅད་བཟང་བ་ཡིན་ཞེས་བགྱི་བ་དེ་ཡང་ལྷག་མ་ཡོད་པའི་དོན་ལགས་ཀྱི་དགའ་བ་ཐམས་ཅད་ཀྱང་བཟང་བ་མ་ལགས་ཏེ། བསྟན་པ་འདི་ལ་ཕམ་པ་
བྱུང་བ་རྣམས་གོས་ཚོན་ཅན་གྱི་རྟགས་ཅན་རྣམས་དང་ལྷན་ཅིག་འཁོད་པ་བདག་ཉིད་ཀྱིས་རུང་བར་མཐོང་ཡང་སེམས་ཅན་དམྱལ་བ་རྣམས་སུ་སྐྱེ་བར་འགྱུར་ཏེ། དེ་ལྟ་བུ་དག་ལ་བཟང་ཞེས་བགྱིས་ན་དོན་དང་འགལ་བར་འགྱུར་
ལགས་སོ། །ཕམ་པ་བྱེད་བྱེད་པ་དེ་དག་གོས་དཀར་པོ་གྱོན་དུ་འཇུག་པ་དེ་དག་ནི་བཟང་པོའི་མཆོག་དོན་རྒྱ་ཆེན་པོ་བགྱིས་པ་ལགས་སོ། །ཕམ་པ་བགྱིས་པ་རྣམས་ནི་མི་བཟང་བ་ཞེས་བགྱི་སྟེ་དེ་དག་ཕུང་བར་བགྱིད་པ་དེ་
དག་ནི་མི་བཟང་བ་ཞེས་བགྱིའོ། །དེ་བས་ན་དགའ་བ་ཐམས་ཅད་བཟང་བ་མ་ལགས་ན་ལྷའི་ཡང་ལྷ་སངས་རྒྱས་དེ་བཞིན་གཤེགས་པས་ཅི་ལས་དགོངས་ཏེ་དེ་སྐད་ཅེས་བཀའ་སྩལ་ལགས། དེ་ནས་བཅོམ་ལྡན་འདས་ཀྱིས་
འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །སངས་རྒྱས་ནི་རྒྱུ་མེད་པའི་དོན་དང་འགལ་བར་མི་གསུང་གི་རྒྱུ་དང་བཅས་རྐྱེན་དང་བཅས་པར་གསུང་སྟེ་རྒྱལ་པོའི་ཁབ་ན་ཁྱིམ་བདག་ཀོ་ཏ་ཀའི་

49-1-145a

བུ་མོ་རབ་བཟང་ཕའི་ཁྱིམ་དུ་སོང་ནས་རབ་ཏུ་འབྱུང་བའི་སེམས་སྐྱེས་ཏེ་དེ་བཞིན་གཤེགས་པའི་ཐད་དུ་སོང་ནས་བུད་མེད་དུ་གྱུར་པ་ནི་གཞན་གྱི་དབང་དུ་གྱུར་པ་ཡིན་ལ། སྐྱེས་པར་གྱུར་པ་ནི་རང་དབང་ཅན་ཡིན་ནོ་
སྙམ་དུ་བསམས་ནས་དེ་བཞིན་གཤེགས་པ་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་སོང་སྟེ། དེའི་རྟོག་པ་ཐུགས་སུ་ཆུད་ནས་བཅོམ་ལྡན་འདས་ཀྱིས་གཞན་གྱི་དབང་གྱུར་ཐམས་ཅད་སྡུག །ཅེས་ཚིགས་སུ་བཅད་པ་དེ་སྐད་
གསུངས་སོ། །བྱང་ཆུབ་སེམས་དཔའ་རྣམས་ཀྱི་ནང་ན་མིའི་ཁྱུ་མཆོག་འཇམ་དཔལ་ལེགས་སོ་ལེགས་སོ། །སེམས་ཅན་ཐམས་ཅད་ལ་ཕན་པའི་ཕྱིར་དགོངས་པའི་ཚིག་འདི་ང་ལ་ཞུས་པ་ལེགས་སོ། །དེ་ནས་བཅོམ་ལྡན་འདས་
ཀྱིས་ཡང་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་དེ་བཀའ་སྩལ་པ། ཐམས་ཅད་ཟས་ལ་རྟེན་པ་ཡིན། །སེར་སྣ་མེད་པ་ཐམས་ཅད་གཡོ། །ཟས་ཀྱི་ཉེས་པས་ནད་དུ་འགྱུར། །ཚངས་པར་སྤྱོད་དང་འགྲོགས་ན་བདེ། །
འཇམ་དཔལ་གྱིས་གསོལ་པ། བཅོམ་ལྡན་འདས་ཅི་ལགས་ཙུན་དའི་སྦྱིན་པ་ཆེར་གསོལ་ནས་ཞལ་ཟས་ཀྱི་ཉེས་པས་བསྙེངས་ལགས་སམ། དེ་ནས་བཅོམ་ལྡན་འདས་ཀྱིས་འཇམ་དཔལ་ལ་འདི་སྐད་ཅེས་བཀའ་སྩལ་ཏོ། །སེམས་
ཅན་ཐམས་ཅད་ཀྱང་ཟས་ལ་རྟེན་པ་མ་ཡིན་ནོ། །སེར་སྣ་མེད་པ་ཐམས་ཅད་ཀྱང་གཡོ་བ་མ་ཡིན་ནོ། །ཐམས་ཅད་ལ་ཡང་ཟས་ཀྱི་ཉེས་པས་ནད་དུ་འགྱུར་བ་མ་ཡིན་ནོ། །ཆོས་སྤྱོད་པ་རྣམས་དང་འགྲོགས་སོ་ཅོག་ཀྱང་བདེ་བ་མ་ཡིན་ནོ། །འཇམ་
དཔལ་གང་གི་ཚེ་ཁྱོད་ནད་ཀྱིས་ཐེབས་པ་དེའི་ཚེ་ང་ཡང་ནད་ཀྱིས་ཐེབས་སོ། །དགྲ་བཅོམ་དང་ནི་རང་སངས་རྒྱས། །བྱང་ཆུབ་སེམས་དཔའ་དེ་བཞིན་གཤེགས། །དེ་དག་རྟག་ཏུ་ཟས་མེད་དེ། །དེ་ནི་སངས་རྒྱས་ཆོས་ཉིད་དོ། །དགྲ་བཅོམ་པ་རྣམས་
དང་། རང་སངས་རྒྱས་རྣམས་དང་། བྱང་ཆུབ་སེམས་དཔའ་རྣམས་དང་། དེ་བཞིན་གཤེགས་པ་རྣམས་ནི་ཞལ་ཟས་ཀྱང་མི་གསོལ་ལ་སྦྱིན་པ་འབུམ་ཕྲག་མང་པོ་ཡང་བཞེས་པར་མཛད་དོ། །སྦྱིན་པ་བླང་བར་བྱ་བའི་གདམས་ངག་ཀྱང་སྟོན་

49-1-145b

པར་མཛད་དོ། །སེམས་ཅན་རྣམས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ཀྱི་རྒྱ་མཚོ་ལས་ངེས་པར་བསྒྲལ་བའི་ཕྱིར་སྦྱིན་པའི་ཕ་རོལ་དུ་ཕྱིན་པ་བསྔགས་པར་ཡང་མཛད་ལ་གསོལ་བར་ཡང་མི་མཛད་དོ། །དེ་བཞིན་གཤེགས་པ་
ལོ་དྲུག་གི་བར་དུ་དཀའ་བ་སྤྱད་པས་ཉམ་ཆུང་བར་གྱུར་ཏོ། །ཞེས་སངས་རྒྱས་ལ་སེམས་ཅན་ཐམས་ཅད་དང་འདྲ་བར་བལྟ་བར་མི་བྱའོ། །འདོད་པའི་ཆུ་བོ་ལས་རྒལ་བ་དེ་དག་ནི་བརྟན་པོ་ཡིན་ཏེ་དཔའ་བོ་དེ་དག་ནི་མིའི་ཡུལ་ལ་སྤྱོད་པ་མ་ཡིན་ནོ། །
དེ་བཞིན་དུ་ངའི་ཉན་ཐོས་རྣམས་ཀྱི་སྟོབས་དང་སྤྱོད་ཡུལ་ཡང་བསམ་གྱིས་མི་ཁྱབ་པོ། །སེམས་ཅན་ཐམས་ཅད་ཟས་ལ་རྟེན། །ཅེས་བྱ་བ་ཡང་ལྷག་མ་ཡོད་པའི་དོན་ཡིན་པར་ཤེས་པར་བྱའོ། །སེར་སྣ་མེད་པ་ཐམས་ཅད་གཡོ་བ་ཡིན་
ཞེས་བྱ་བ་དེ་ཡང་ལྷག་མ་ཡོད་པའི་དོན་ཡིན་ཏེ་བདག་ལ་སེར་སྣ་བྱེད་པ་མི་གཡོ་བའི་བདེ་བར་འགྲོ་བ་དམ་པ་འགའ་ཡང་ཡོད་དོ། །ཐམས་ཅད་ཟས་ཀྱི་ཉེས་པས་ནད་དུ་འགྱུར་ཞེས་བྱ་བ་དེ་ཡང་ལྷག་མ་ཡོད་པའི་དོན་ཡིན་ཏེ་ཚེར་མས་ཟུག་པ་ལ་སོགས་
པའི་ནད་གློ་བུར་དག་ཀྱང་ཡོད་དོ། །ཆོས་སྤྱོད་པ་རྣམས་དང་འགྲོགས་པ་ཐམས་ཅད་བདེ་ཞེས་བྱ་བ་དེ་ཡང་ལྷག་མ་ཡོད་པའི་དོན་ཡིན་ཏེ་འཇིག་རྟེན་པ་རྣམས་ལ་ཡང་ཆོས་འཛིན་པ་རྣམས་དང་འཚམ་པའི་ཆོས་རྣམ་པ་མང་པོ་དག་ཡོད་དེ་དེ་དག་ལ་ཡང་བྱ་བ་སྣ་
ཚོགས་ཡོད་མོད་ཀྱི་སྨྱུང་བ་རྣམ་པ་སྣ་ཚོགས་ཅན་ལུས་ཉོན་མོངས་པ་དེ་དག་དང་གལ་ཏེ་ལ་ལ་ཞིག་འགྲོགས་པར་གྱུར་ན་ཅི་བདེ་བ་ལ་སྟེན་པར་འགྱུར་རམ། དེ་ལྟ་ན་ནི་དོན་དང་འགལ་བར་འགྱུར་རོ། །དེ་བས་ན་སངས་རྒྱས་ནི་རྒྱུ་མེད་པར་དོན་དང་
འགལ་བ་སྟོན་པར་མི་མཛད་དེ་གདུལ་བར་བྱ་བའི་དབང་གིས་རྒྱུ་དང་བཅས་རྐྱེན་དང་བཅས་པར་སྟོན་པར་ཤེས་པར་གྱིས་ཤིག །འཇིག་རྟེན་ལས་འདས་པའི་ཆོས་ནི་མཆོག་ཏུ་བདེ་བ་ཡིན་ནོ། །ཚིགས་སུ་བཅད་པ་འདི་ནི་གྲོང་ཁྱེར་གྱེན་དུ་རྒྱལ་
ཞེས་བྱ་བའི་བྲམ་ཟེ་ལུག་དཔལ་ཞེས་བྱ་བ་ལས་བརྩམས་ནས་བསྟན་པ་ཡིན་ཏེ། བྲམ་ཟེ་ལུག་དཔལ་ཞག་བཞི་པའི་སྨྱུང་བ་བྱེད་ཅིང་ངའི་ཐད་དུ་འོངས་ནས་ངས་དེའི་ཞག་བཞི་པའི་སྨྱུང་བའི་ལྟ་བ་བསལ་བའི་ཕྱིར་སེམས་ཅན་ཐམས་ཅད་ཟས་ལ་རྟེན་

49-1-146a

ཅེས་བྱ་བའི་ཚིགས་སུ་བཅད་པ་འདི་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐམས་ཅད་མ་ལུས་པ་
ཇི་ལྟ་བུ་ལགས། ཐམས་ཅད་ཅེས་བགྱི་བ་ཡང་ཇི་ལྟ་བུ་ལགས། བཀའ་སྩལ་པ། མ་ལུས་པའི་དོན་ནི་དགེ་བའི་ཕྱོགས་ཐམས་ཅད་རྟག་པའོ་བདེ་བའོ་ཞེས་བྱ་བ་ལྟ་བུའོ། །དེ་ལྟར་ན་ཁ་ཅིག་ནི་ལྷག་མ་ཡོད་པའོ། །ཁ་ཅིག་ནི་ལྷག་མ་
མེད་པ་ཡིན་པར་ཆོས་འདོད་པའི་རིགས་ཀྱི་བུས་རིགས་པར་བྱའོ། །གསོལ་པ། ཀྱེ་མ་དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྒྲ་གཅན་ཟིན་བཞིན་དུ་གཟིགས་པ་ལགས་ཏེ་བདག་ཤིན་དུ་རངས་ལགས་སོ། །བཀའ་སྩལ་པ། རིགས་
ཀྱི་བུ་ལེགས་སོ་ལེགས་སོ། །དེ་ལྟར་ཆ་ཕྲ་བར་རྟག་དགོས་སོ། །གསོལ་པ། བཅོམ་ལྡན་འདས་ད་ནི་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་བསོད་ནམས་ཇི་ལྟར་སྐྱེ་བ་བཀའ་སྩལ་དུ་གསོལ། བཀའ་སྩལ་པ། སངས་རྒྱས་ཀྱི་ཡུལ་
འདི་ནི་བསམ་གྱིས་མི་ཁྱབ་པའི་ཕྱིར་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་མདོ་སྡེ་འདིའི་མིང་ཡང་ཚིག་ཙམ་དུ་ཡང་ཉན་པ་རྣམས་ལ་བརྗོད་པར་མི་ནུས་སོ། །དེ་ནས་བཅོམ་ལྡན་འདས་ལ་ལྷ་དང་མི་དང་ལྷ་མ་ཡིན་རྣམས་ཀྱིས་ཚིག་འཐུན་པར་
ཚིགས་སུ་བཅད་དེ་གསོལ་པ། སངས་རྒྱས་བསམ་ཡས་བསམ་ཡས་ཆོས་གསུང་བ། །ཆོས་དང་དགེ་འདུན་རྟག་ཏུ་ཁྱོད་ལ་རྟེན། །དེ་ཕྱིར་དགེ་སློང་འོད་སྲུང་ཀུན་དགའ་བོ། །མ་མཆིས་བར་དུ་མགོན་པོ་བཞུགས་པར་གསོལ། །བི་ཏེ་ཧ་ཡི་རྒྱལ་པོ་མ་
སྐྱེས་དགྲ། །ཁྱོད་ཀྱི་མཛའ་མཆོག་ཐུགས་འདྲ་ཆེ་བ་ཡང་། །ད་དུང་མ་མཆིས་མཐར་ཐུག་ཁྱོད་མ་གཤེགས། །ཀུན་མཁྱེན་ཁྱོད་ཀྱིས་བདག་ཅག་ཐེ་ཚོམ་ཆོད། །དེ་ནས་བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །ངའི་སྲས་
མཆོག་ཐུ་བོ་འོད་སྲུང་དང་། །བློ་ལྡན་ཀུན་དགའ་ཁྱོད་ཀྱི་ཐེ་ཙོམ་གཅོད། །ཁྱོད་ཀྱིས་ངའི་ཞལ་ལྟོས་རྟག་པ་དང་། །མི་རྟག་ཤེས་བྱོས་མྱ་ངན་མ་བྱེད་ཅིག །དེ་ནས་འཁོར་དེ་དག་ཐམས་ཅད་ཀྱིས་བཅོམ་ལྡན་འདས་ལ་མཆོད་པ་ཆེན་པོ་བྱས་ཏེ་བླ་ན་མེད་

49-1-146b

པ་ཡང་དག་པར་རྫོགས་པ་བྱང་ཆུབ་ཏུ་སྨོན་ལམ་བཏབ་ནས་དེར་སེམས་ཅན་གང་གཱའི་ཀླུང་གཏམས་ཕྲག་དཀྲིགས་སྙེད་ཀྱི་བྱེ་མའི་གྲངས་སྙེད་ཀྱིས་སེམས་བསྐྱེད་ནས་བྱང་ཆུབ་སེམས་དཔའི་ས་དང་པོའི་གནས་ཐོབ་བོ། །དེ་ནས་བཅོམ་ལྡན་འདས་ཀྱིས་
འཇམ་དཔལ་གཞོན་ནུར་གྱུར་པ་དང་། བྲམ་ཟེ་ཆེ་ཞིང་མཐོ་བ་འོད་སྲུང་ཆེན་པོ་དང་རུས་གཅིག་པ་ལ་བཀའ་སྩལ་ཏེ། མགར་བའི་བུ་ཙུན་ད་བྱང་ཆུབ་ཏུ་དབང་བསྐུར་ནས་བྱང་ཆུབ་སེམས་དཔའ་དེ་གསུམ་ལ་བཀའ་སྩལ་པ། རིགས་ཀྱི་བུ་དག་བག་
ཡོད་པར་གྱིས་ཤིག །བག་ཡོད་པར་གྱིས་ཤིག །ང་རྐེད་པའི་ནད་དྲག་པོས་བཏབ་སྟེ། གཞོན་ནུ་དག་ང་རེ་ཤིག་ཐབས་ཀྱི་ནང་བྲང་དུ་ཉལ་བར་འདོད་ཀྱིས་ཉལ་དུ་ཆུག་ཤིག་འཇམ་དཔལ་ཁྱོད་ཀྱིས་འཁོར་ཐམས་ཅད་ལ་ཆོས་སྟོན་ཅིག་སེང་གེའི་སྒྲ་
སྒྲོགས་ཤིག །གནས་བརྟན་འོད་སྲུང་ཆེན་པོ་དང་། ཀུན་དགའ་བོ་གཉིས་མ་འོངས་པའི་བར་དུ་ངས་ཁྱོད་ལ་བསྟན་པ་འདི་གཏད་ཀྱིས་ནམ་འོངས་པ་ན་དེ་གཉིས་ལ་གཏོད་ཅིག་ཅེས་དེ་སྐད་བཀའ་སྩལ་ནས། བཅོམ་ལྡན་འདས་གདུལ་བར་བྱ་བའི་དབང་གིས་
ནད་པའི་ཚུལ་དུ་བཞུགས་པར་བསྟན་ཏེ་གཟིམས་ཁང་ལོགས་སུ་ཟུར་གྱིས་གཟིམས་སོ། །ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་དམ་པའི་ཆོས་གསུང་རབ་ཐམས་ཅད་ཀྱི་སྙིང་པོར་གྱུར་པ་རྒྱུད་ཕྱི་མ་ལྟ་བུ་རྟོགས་པར་དཀའ་བའི་ཆོས་ཀྱི་འབྱུང་གནས་
གཅིག་ཏུ་དེ་བཞིན་གཤེགས་པའི་སྙིང་པོ་སྟོན་པའི་མདོ་ལ། ལེའུ་ཉི་ཁྲི་ལྔ་སྟོང་ཡོད་པ་ལས་ལྷ་དང་། མི་དང་། ལྷ་མ་ཡིན་དང་། མི་འམ་ཅི་དང་། རིག་སྔགས་འཆང་དང་། སྲིན་པོ་ལ་སོགས་པ་འདུས་པས་ཞུས་པ་ཞེས་བྱ་བའི་ལེའུ་རྫོགས་སྷོ།།　 །།
ཤོུ་ལོ་ཀ་སུམ་སྟོང་དགུ་བརྒྱ་མཆིས། རྒྱ་གར་གྱི་མཁན་པོ་ཛི་ན་མི་ཏྲ་དང་། ཛྙཱ་ན་གརྦྷ་དང་། ཞུ་ཆེན་གྱི་ལོ་ཙྪ་བ་བན་དེ་དཱེ་བ་ཙན་དྲས་བསྒྱུར་ཏེ་གཏན་ལ་ཕབ་པ།། །། ༄༅། །རྒྱ་གར་སྐད་དུ།  ཨཱརྱ་མ་ཧཱ་པ་རི་ནིར་བཱ་ཎ་སཱུ་ཏྲ། 
བོད་སྐད་དུ། འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཀུ་ཤའི་གྲོང་ཁྱེར་ཆེན་པོ་གྱད་ཀྱི་

49-1-147a

ཉེ་འཁོར་ཤིང་ས་ལ་ཟུང་གི་ཚལ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དེ་ཕྱི་མའི་དུས་དང་ཉེ་བར་གྱུར་པ་ན་དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། 
ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་ལོ་བརྒྱ་ཕྲག་དང་པོ་ལ་ནི་བསྟན་པ་ལ་ཆོས་ལ་བླ་མར་བྱེད་པར་འགྱུར་རོ། །ངའི་ཉན་ཐོས་རྣམས་ཀྱང་ཆོས་ཀྱི་ཀུན་དགའ་ར་བ་ལ་དགའ་བ་དང་ལྡན་པར་འགྱུར་ཞིང་ཤེས་པ་ལ་མཁས་པ་དང་ཤེས་རབ་དམ་
པ་དང་ལྡན་པའི་རང་བཞིན་ཅན་དུ་འགྱུར་རོ། །ཀུན་དགའ་བོ་ཡང་དེའི་ཚེ་ན་རྒྱལ་པོ་མྱ་ངན་མེད་ཅེས་བྱ་བ་འཛམ་བུའི་གླིང་གི་དབང་ཕྱུག་ལ་དབང་བྱེད་པར་གྱུར་ཏེ། དེ་ང་ཡོངས་སུ་མྱ་ངན་ལས་འདས་པའི་སྐུ་གདུང་གི་རིང་བསྲེལ་གྱི་མཆོད་རྟེན་རྒྱ་ཆེར་
བྱེད་པར་འགྱུར་རོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་ལོ་བརྒྱ་ཕྲག་གཉིས་པ་ལ་ནི་བསྟན་པ་ལ་རྣམ་པར་གྲོལ་བའི་སྙིང་པོ་ཅན་དུ་འགྱུར་རོ། །ཉན་ཐོས་རྣམས་ཀྱང་ང་ལ་སྟོན་པར་རྟོག་ཅིང་སྟོན་པར་མཁས་པར་བྱེད་པར་འགྱུར་རོ། །
ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་ལོ་བརྒྱ་ཕྲག་གསུམ་པ་ལ་ནི་བསྟན་པ་ལ་བསྒྲུབ་པ་སྙིང་པོར་བྱེད་པར་འགྱུར་རོ། །ངའི་ཉན་ཐོས་རྣམས་ཀྱང་གཉིས་ཀའི་ཆ་ལས་རྣམ་པར་གྲོལ་བར་འགྱུར་བའི་ལུས་ཀྱིས་མངོན་སུམ་དུ་བྱེད་ཅིང་
མཐོང་བར་ཐོབ་པ་དང་ཤེས་རབ་ཀྱིས་རྣམ་པར་གྲོལ་བར་འགྱུར་རོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་ལོ་བརྒྱ་ཕྲག་བཞི་པ་ལ་ནི་བསྟན་པ་ལ་རྣམ་པར་དབེན་པའི་སྙིང་པོར་བྱེད་པར་འགྱུར་རོ། །ངའི་ཉན་ཐོས་རྣམས་ཀྱང་ནང་དུ་ཡང་དག་
འཇོག་ལ་དགའ་བར་འགྱུར་རོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་ལོ་བརྒྱ་ཕྲག་ལྔ་པ་ལ་ནི་བསྟན་པ་ལ་ཆོས་བླ་མར་བྱེད་པར་འགྱུར་རོ། །ངའི་ཉན་ཐོས་རྣམས་ཀྱང་ཆོས་ཀྱི་ཀུན་དགའ་ར་བ་ལ་མངོན་པར་དགའ་བར་འགྱུར་རོ། །ཀུན་དགའ་
བོ་ང་ཡོངས་སུ་མྱ་ངན་ལས་འདས་ནས་ལོ་བརྒྱ་ཕྲག་དྲུག་པ་ལ་ནི་བསྟན་པ་ལ་ཀློག་པ་དང་འདོན་པ་ལ་མངོན་པར་དགའ་བར་འགྱུར་རོ། །ངའི་ཉན་ཐོས་རྣམས་ཀྱང་བརྩོན་འགྲུས་རྩོམ་པར་འགྱུར་རོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་

49-1-147b

ནས་ལོ་བརྒྱ་ཕྲག་བདུན་པ་ལ་ནི་བསྟན་པ་ལ་མཆོད་པ་སྙིང་པོར་བྱེད་པར་འགྱུར་རོ། །ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་བསྟན་པ་ལ་
བསྙེན་བཀུར་བྱེད་ཅིང་བླ་མར་བྱེད་པར་འགྱུར་བ་དང་། རྗེད་པར་འགྱུར་བ་དང་། མཆོད་པར་འགྱུར་རོ། །ངའི་ཉན་ཐོས་རྣམས་ཀྱང་རྙེད་པ་དང་བཀུར་སྟི་དང་ཚིགས་སུ་བཅད་པ་ལྷུར་ལེན་པར་འགྱུར་རོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་ལོ་བརྒྱ་ཕྲག་བརྒྱད་
པ་ལ་ནི་བསྟན་པ་ལ་ཞལ་ཏ་བྱེད་པར་འགྱུར་རོ། །ངའི་ཉན་ཐོས་རྣམས་ཀྱང་ཕན་ཚུན་གནོད་པ་བྱེད་པར་འགྱུར་ཞིང་ཡི་གེ་ལ་སེམས་པར་ལྟ་བ་ལ་མཁས་པ་དང་། མཁན་པོ་དང་སློབ་དཔོན་ལ་མ་གུས་པ་དང་། ཤེས་བཞིན་མེད་པར་གནས་པར་འགྱུར་
བ་དང་། སྒྱུ་དང་ལྡན་ཞིང་རང་ཉིད་སྐྱེས་བུ་ངན་པའི་ཚིག་ཏུ་སྨྲ་བ་དང་། དགེ་འདུན་དང་མཆོད་རྟེན་གྱི་ནོར་ཁྱིམ་ན་གནས་པ་དང་། རྒྱལ་པོའི་ཕོ་བྲང་དུ་བསྡུ་བ་བྱས་ནས་རྣམ་པར་འཇིག་པར་བྱེད་པར་འབྱུང་བར་འགྱུར་རོ། །ཀུན་དགའ་བོ་ང་ཡོངས་སུ་མྱ་ངན་ལས་
འདས་ནས་ལོ་བརྒྱ་ཕྲག་དགུ་པ་ལ་ནི་བསྟན་པ་ལས་སྙིང་པོར་བྱེད་པར་འགྱུར་རོ། །ངའི་ཉན་ཐོས་རྣམས་ཀྱང་ཁྱིམ་གྱི་བྱ་བའི་ལས་བྱེད་པ་ལ་བརྩོན་པར་འགྱུར་རོ། །ཞིང་གི་ལས་ཀྱི་མཐའ་ལ་དགའ་བ་དང་། ཉོ་ཚོང་ལ་མངོན་པར་དགའ་བ་དང་། འདོད་པ་ལ་རབ་
ཏུ་འཇུག་ཅིང་ཕོ་ཉར་གཏོང་བས་འཚོ་བ་བསྒྲུབ་པར་འགྱུར་བ་དང་། ལེ་ལོ་ཅན་དུ་འགྱུར་བ་དང་། དེ་བཞིན་གཤེགས་པས་ལེགས་པར་བཅས་པའི་བསླབ་པ་རྣམས་བསྲུང་བར་མི་འགྱུར་རོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་ལོ་སྟོང་གི་ནི་བསྟན་
པ་ལ་གཏམ་གྱི་སྙིང་པོར་བྱེད་པར་འགྱུར་རོ། །ངའི་ཉན་ཐོས་རྣམས་ཀྱང་གཏམ་སྣ་ཚོགས་ལ་མངོན་པར་དགའ་བ་དང་ལྡན་པར་འགྱུར་ཞིང་གང་གི་འཇིག་རྟེན་ལས་འདས་པའི་སངས་རྒྱས་ཀྱི་གསུང་འདི་ལྟ་སྟེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། 
ལུང་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པའི་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་སྡེ་དང་། ཆོས་རྣམ་

49-1-148a

པར་གཏན་ལ་དབབ་པར་བསྟན་པའི་སྡེ་རྣམས་སྤངས་ནས་སྦྱོར་བ་གཞན་དང་ལྡན་པར་གནས་པར་འགྱུར་ཏེ། འདི་ལྟ་སྟེ། རྒྱལ་པོའི་གཏམ་དང་། རྐུན་པོའི་གཏམ་དང་། ཐབ་མོའི་གཏམ་དང་། ཟས་ཀྱི་གཏམ་དང་། བཏུང་བའི་གཏམ་དང་། གྲོགས་
ཀྱི་གཏམ་དང་། བདག་གི་གཏམ་དང་། ཁྱད་པར་གྱི་གཏམ་དང་། གཞོན་ནུའི་གཏམ་དང་། གྲོང་ཁྱེར་གྱི་གཏམ་དང་། རྒྱ་མཚོའི་གཏམ་སྟེ། དེ་ལྟ་བུ་ལ་སོགས་པའི་གཏམ་རྣམས་ལ་ངེས་པར་དགའ་བར་འགྱུར་རོ། །དགེ་སྦྱོང་དང་བྲམ་ཟེ་རྣམས་ཀྱང་ངའི་
དམ་པའི་ཆོས་སྤོང་བར་བྱེད་པར་འགྱུར་རོ། །ཆོས་འདུལ་བ་འདི་ལ་བཏང་སྙོམས་སུ་བྱེད་པར་འགྱུར་རོ། །གང་དགེ་སློང་རྣམས་དང་། དགེ་སློང་མ་རྣམས་དང་། དགེ་བསྙེན་དང་། དགེ་བསྙེན་མ་རྣམས་ཏེ། དེ་དག་ཀྱང་ལུས་མ་བསྒོམས་པ་དང་། 
ཚུལ་ཁྲིམས་མ་བསྒོམས་པ་དང་། ཤེས་རབ་མ་བསྒོམས་པ་དང་། འཐབ་པར་བྱེད་པ་དང་། མཚང་འདྲུ་ཞིང་རྩོད་པར་སྨྲ་བ་ལ་བརྩོན་པར་བྱེད་པར་འགྱུར་རོ། །ལྷུང་བཟེད་བཟང་པོ་དང་ཆོས་གོས་བཟང་པོར་འགྱུར་ཞིང་ལོ་བརྒྱར་བསྲུང་བར་བྱ་བའི་ཕྱིར་ཚུལ་
ཁྲིམས་ཀྱང་མྱུར་དུ་འདོར་བར་འགྱུར་རོ། །འདི་ལྟ་སྟེ་སྡིག་པ་ལ་ངེས་པར་སེམས་ཤིང་འདྲེས་པས་སྡིག་པ་དང་ཡིད་མི་བདེ་བ་ལ་སོགས་པས་དེ་བཞིན་དུ་ལོ་བརྒྱར་བསགས་པའི་དགེ་བའི་རྩ་བ་རྣམས་ཀྱང་མྱུར་དུ་འཇིག་པར་བྱེད་པར་འགྱུར་རོ། །ཀུན་
དགའ་བོ་ང་ཡོངས་སུ་མྱ་ངན་ལས་འདས་ནས་ལོ་སྟོང་ཆིག་བརྒྱ་ན་དགེ་སློང་ཚུལ་ཁྲིམས་འཆལ་པ་རྣམས་འབྱུང་བར་འགྱུར་བ་ནི་འཁོར་དང་གཡོག་མང་བར་འགྱུར་རོ། །ཚུལ་ཁྲིམས་དང་ལྡན་པ་རྣམས་ནི་འཁོར་ཉུང་ཞིང་གཡོག་ཉུང་བར་འགྱུར་རོ། །
དེ་ནས་ཚེ་དང་ལྡན་པ་ཀུན་དགའ་བོ་སྡུག་བསྔལ་བ་དང་ཡིད་མི་བདེ་བར་གྱུར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་འདུལ་བ་འདི་ལ་སྙིང་པོར་གྱུར་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་
དགའ་བོ་དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དང་། ཞི་གནས་དང་། 

49-1-148b

ལྷག་མཐོང་དང་། རྣམ་པར་ཐར་པའི་སྒོ་གསུམ་སྟེ། ཀུན་དགའ་བོ་འདི་དག་ནི་ཆོས་འདུལ་བ་འདི་ལ་སྙིང་པོ་ཡིན་ནོ། །ཀུན་དགའ་བོ་དགེ་སློང་ཚུལ་ཁྲིམས་འཆལ་པ་རྣམས་ཀྱིས་དགེ་སློང་ཚུལ་ཁྲིམས་དང་ལྡན་པ་རྣམས་ལ་གཤེ་ཞིང་མཚང་འདྲུ་བར་
འགྱུར་ཏེ། དེ་དག་ཐམས་ཅད་ནི་ལུས་དང་བྲལ་ཞིང་ཤི་བའི་འོག་ཏུ་ངན་འགྲོ་ངན་སོང་དུ་རྣམ་པར་ལྷུང་ནས་སྡུག་བསྔལ་བར་འགྱུར་རོ། །དེའི་ཚེ་གང་ཞིག་ཁྲོ་བ་མེད་པར་གྱུར་པ་དེ་དག་ཐམས་ཅད་ནི་བདེ་འགྲོ་རྣམས་སུ་སྐྱེ་བར་འགྱུར་རོ། །བཅོམ་
ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང་། དགེ་སློང་དེ་དག་དང་། ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟར་བཅས་པའི་འཇིག་རྟེན་ཡིད་
རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་རྫོགས་སྟོ།། །། རྒྱ་གར་གྱི་མཁན་པོ་ཀ་མ་ལ་གུཔྟ་དང་། ཞུ་ཆེན་གྱི་ལོ་ཙྪ་བ་དགེ་
སློང་རིན་ཆེན་བཟང་པོས་བསྒྱུར།། །། ༄༅༅། །རྒྱ་གར་སྐད་དུ།  ཨཱརྱ་ཨཱཏ་ཛྙཱ་ན་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ། འཕགས་པ་འདའ་ཁ་ཡེ་ཤེས་ཞེས་བྱ་བ་ཐེག་པ་ཆེན་པོའི་མདོ། སངས་
རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་འོག་མིན་ལྷའི་རྒྱལ་པོའི་ཁང་བཟང་ན་བཞུགས་ཏེ་འཁོར་ཐམས་ཅད་ལ་ཆོས་སྟོན་པ་དང་། བྱང་ཆུབ་སེམས་དཔའ་སེམས་
དཔའ་ཆེན་པོ་ནམ་མཁའི་སྙིང་པོས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ནམ་འཆི་ཁ་མའི་སེམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ནམ་མཁའི་སྙིང་
པོ་བྱང་ཆུབ་སེམས་དཔའ་ནམ་འཆི་བའི་དུས་ཀྱི་ཚེ་འདའ་ཁ་ཡེ་ཤེས་བསྒོམ་པར་བྱའོ། །དེ་ལ་འདའ་ཁ་ཡེ་ཤེས་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པས་ན་དངོས་པོ་མེད་པའི་འདུ་ཤེས་རབ་ཏུ་བསྒོམ་པར་བྱའོ། །ཆོས་ཐམས་ཅད་བྱང་ཆུབ་ཀྱི་སེམས་

49-1-149a

སུ་འདུས་པས་ན་སྙིང་རྗེ་ཆེན་པོའི་འདུ་ཤེས་རབ་ཏུ་བསྒོམ་པར་བྱའོ། །ཆོས་ཐམས་ཅད་རང་བཞིན་གྱིས་འོད་གསལ་བས་ན་མི་དམིགས་པའི་འདུ་ཤེས་རབ་ཏུ་བསྒོམ་པར་བྱའོ། །དངོས་པོ་ཐམས་ཅད་མི་རྟག་པས་ན་ཅི་ལ་ཡང་མི་ཆགས་པའི་འདུ་ཤེས་རབ་
ཏུ་བསྒོམ་པར་བྱའོ། །སེམས་རྟོགས་ན་ཡེ་ཤེས་ཡིན་པས་ན་སངས་རྒྱས་གཞན་དུ་མི་བཙལ་བའི་འདུ་ཤེས་རབ་ཏུ་བསྒོམ་པར་བྱའོ། །བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཆོས་རྣམས་རང་བཞིན་རྣམ་དག་པས། །དངོས་པོ་མེད་པའི་འདུ་ཤེས་
བསྒོམ། །བྱང་ཆུབ་སེམས་དང་རབ་ལྡན་པས། །སྙིང་རྗེ་ཆེན་པོའི་འདུ་ཤེས་བསྒོམ། །ཆོས་རྣམས་རང་བཞིན་འོད་གསལ་བས། །དམིགས་པ་མེད་པའི་འདུ་ཤེས་བསྒོམ། །དངོས་པོ་ཐམས་ཅད་མི་རྟག་པས། །ཆགས་པ་མེད་པའི་འདུ་ཤེས་བསྒོམ། །སེམས་
ནི་ཡེ་ཤེས་འབྱུང་བའི་རྒྱུ། །སངས་རྒྱས་གཞན་དུ་མ་ཚོལ་ཅིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་ནམ་མཁའི་སྙིང་པོ་ལ་སོགས་པའི་འཁོར་འདུས་པ་ཐམས་ཅད་རབ་ཏུ་དགའ་མགུ་ཡི་རངས་ནས། བཅོམ་ལྡན་འདས་ཀྱིས་གསུངས་
པ་ལ་མངོན་པར་བསྟོད་དོ།། །།འཕགས་པ་འདའ་ཁ་ཡེ་ཤེས་ཞེས་བྱ་བ་ཐེག་པ་ཆེན་པོའི་མདོ་རྫོགས་སྷོ།། །། ༄༅། ། སངས་རྒྱས་ཀྱི་མཛོད་ཀྱི་ཆོས་ཀྱི་ཡི་གེ ། བམ་པོ་གཅིག་པ། མིང་གཅིག་ནི་ཆོས་སོ་ཅོག་ལས་གདམས་བསྩལ་པའོ། །སངས་
རྒྱས་ཀྱིས་སངས་རྒྱས་ཀྱི་མཛོད་བཤད་པའི་ཡི་གེའི་ལེའུ་དང་པོ་སྟེ། ཆོས་སུ་ཅོག་གི་བདེན་པའི་མཚན་མའི་ལེའུ་འོ།། །། འདི་བཞིན་བདག་གིས་ཐོས་པ་དུས་གཅིག་ན། སངས་རྒྱས་མཁར་རྒྱལ་པོའི་ཁབ་ཀྱི་རི་ཁུ་མཐའི་རི་ལ། དགེ་སློང་
ཆེན་པོ་རྣམས་དང་ལྷན་ཅིག་ཏུ་བཞུགས་ཏེ། ཀུན་ཀྱང་ཕལ་གྱིས་ཤེས་རིག་པ་དང་། མུ་མེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་སྟེ། དཔག་ཏུ་མེད་གྲངས་མེད་དོ། །དེའི་ཚེ་ཤཱ་རིའི་བུ་ཏིང་ངེ་འཛིན་ནས་བྱུང་སྟེ། སངས་རྒྱས་ཀྱི་ཐད་དུ་སོང་ནས་ཕྲག་
པ་གཡས་པ་ཕྱུང་སྟེ། མགོ་དང་གདོང་གིས་ཕྱག་འཚལ་ནས་སངས་རྒྱས་ལ་གསོལ་པ། བཅོམ་ལྡན་འདས་ཡང་དག་པར་གཤེགས་པས་བཤད་པ། ཆོས་སུ་ཅོག་ཀུན་སྐྱེ་བ་ཡང་མེད། འགོག་པ་ཡང་མེད། མཚན་མ་ཡང་མེད། བྱ་བ་ཡང་མེད། མི་རྣམས་ཡིད་ཆེས་

49-1-149b

ཤིང་ཤེས་པར་བགྱིས་པ་ཡོད་པ་དཀོན་ནོ། །སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། ཁྱོད་ཀྱིས་བསོད་ནམས་ཇི་ཞིག་མཐོང་ན། ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བ་མེད། འགོག་པ་མེད། མཚན་མ་མེད། བྱ་བ་མེད་ན། མི་ཀུན་ཡིད་
ཆེས་ཤིང་ཤེས་པར་བྱས་པ་དཀོན་ནོ་ཞེས་བསྟོད། ཤཱ་རིའི་བུས་སངས་རྒྱས་ལ་གསོལ་པ། བཅོམ་ལྡན་འདས་བདེན་པ་མ་མཆིས་ན་ཁོར་མོར་སེམས་འདི་སྙམ་བགྱིད་དོ། །བཅོམ་ལྡན་འདས་ཀྱིས་མིང་དང་མཚན་མ་མེད་པའི་ཆོས་ལ་ནི་མིང་དང་མཚན་མས་བཤད། 
ངག་དང་ཚིག་མེད་པའི་ཆོས་ལ་ནི་ངག་དང་ཚིག་གིས་བཤད་པ་དེའི་དོན་བསམས་ན་ཡོད་པ་དཀོན་པའི་སེམས་སྐྱེས་སོ། །སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། དེ་ཡིན་ནོ། །དེ་ཡིན་ནོ། །དོན་ཡོད་པ་དཀོན་ཏེ་རབ་ཏུ་ཡོད་པ་དཀོན་པས་ན་སངས་རྒྱས་རྣམས་ཀྱི་བླ་ན་མེད་
པ་གཡུང་དྲུང་རྫོགས་པའི་བྱང་ཆུབ་ཅེས་བྱའོ། །ཤཱ་རིའི་བུ་དཔེར་ན་རི་མོ་མཁན་མཁས་པས་ནམ་མཁའ་ལ་བྲིས་ཏེ། ཁ་དོག་དང་གཟུགས་རྣམ་པ་ཅི་ཡང་སྣང་བར་བྱས་ན་ཁྱོད་ཀྱི་ཡིད་ལ་ཇི་སྙམ་དུ་སེམས། རི་མོ་མཁན་དེ་ཡོད་པ་དཀོན་ནམ་མི་དཀོན། བཅོམ་ལྡན་འདས་
དཀོན་ལགས་སོ། །ཤཱ་རིའི་བུ་ཡང་དག་པར་གཤེགས་པས་འཐོབ་པའི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཀྱིས་ཆོས་སོ་ཅོག་ལ་སྐྱེ་བ་ཡང་མེད། འགོག་པ་ཡང་མེད། མཚན་མ་ཡང་མེད་བྱ་བ་ཡང་མེད་པར་བཤད་ན། མི་ཀུན་ཡིད་ཆེས་ཤིང་ཤེས་པར་
བྱས་པ་ནི་ཆེས་ཀྱིས་ཡོད་པ་དཀོན་ནོ། །ཅིའི་ཕྱིར་བྱས་ན་མིང་དང་མཚན་མ་མེད་པའི་ཆོས་ལ་བསམ་པ་ཡང་མེད། ཐོབ་པ་ཡང་མེད། སྤྱད་པ་ཡང་མེད་དེ། བསམ་གྱིས་མི་ཁྱབ་ཅིང་སེམས་ཀྱིས་གནས་ཤིང་རྟེན་པ་ཡང་མ་ཡིན། འདྲན་ཏོར་དུ་བརྗོད་པ་ཡང་མེད། འདྲན་ཏོར་དུ་བརྗོད་
ཅིང་། རྟེན་གནས་སུ་རུང་བ་ཡང་མ་ཡིན། ཚོར་བ་ཡང་མེད། བརྟགས་པ་ཡང་མེད། ཇིས་བསྡུ་བ་ཡང་མེད། སེམས་ལ་ཡང་མི་འདུག །ཐོབ་པས་ཐོབ་པ་ཡང་མེད། ཚུ་ལོག་ཀྱང་མེད། ཕ་ལོག་ཀྱང་མེད། རྣམ་པར་རྟོག་པ་ཡང་མེད། གཡོ་བ་ཡང་མེད། རང་བཞིན་ཡང་
མེད། ཕྱི་མོ་ནས་རང་སྟོང་པས་བསམ་དུ་ཡང་མི་རུང་འབྱུང་དུ་ཡང་མི་རུང་སྟེ། འཇིག་རྟེན་ཐམས་ཅད་ཀྱིས་ཡིད་ཆེས་པར་མི་ནུས་པ་དེ་ལྟ་བུའི་མིང་མཚན་མ་མེད་པའི་ཆོས་མིང་དང་མཚན་མས་བཤད་དེ། དེ་ལྟ་བུའི་ནི་ཆོས་སོ་ཅོག་ཀུན་སྐྱེ་བ་ཡང་མེད། འགོག་པ་ཡང་

49-1-150a

མེད། མཚན་མ་ཡང་མེད། བྱ་བ་ཡང་མེད་པས་མི་ཀུན་ཡིད་ཆེས་ཤིང་ཤེས་པར་བྱ་བ་ནི་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ་མི་ལ་ལ་ཞིག་གིས་རི་རབ་རིའི་རྒྱལ་པོ་བལྡད་དེ། མིད་ལ་ཞུ་ཞིང་ཟད་པར་བྱ་ནུས་ལ་ནམ་མཁའ་ལ་འཕུར་ཏེ་སོང་ན། གནོད་
པ་མེད་པ་དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས་དཀོན་ལགས་སོ། །ཤཱ་རིའི་བུ་སངས་རྒྱས་རྣམས་ཀྱིས་བཤད་པ་ལ། ཆོས་སོ་ཅོག་ཀུན་ལ་སྐྱེ་བའང་མེད། འགོག་པ་འང་མེད། མཚན་མ་ཡང་མེད། བྱ་བ་ཡང་མེད་ན། མི་
ཀུན་ཡིད་ཆེས་ཤིང་ཤེས་པར་བྱས་པ་ནི་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ་དཔེར་མིའི་མཁར་ཆུ་ཞེང་མཐོན་དམན་དཔག་ཚད་རེ་རེ་ཡོད་ལ་སྒོ་བཞིར་མེ་ལྕེ་བྱུང་བ་ལ་མི་ཞིག་ཁུར་བུ་རྩྭ་སྐམ་པོ་ཁྱེར་ཏེ་དེའི་ནང་ནས་ཕར་རྒལ་བ། རླུང་དྲག་པོས་བུས་པའི་མེ་ལྕེས་དེའི་ལུས་
བསྲེགས་ན་མི་དེས་མེས་རྩྭ་འང་མ་ཚིག །ལུས་ཀྱང་ཚིག་པར་བྱ་བ་མ་ནུས་ཏེ། དེའི་ནང་ནས་བྱུང་སྟེ་སྔོན་གྱི་དང་མི་མཚུངས་པ་མེད་པ་དེ་ཁྱོད་ཀྱི་ཡིད་ལ་ཇི་སྙམ་ཡོད། དཀོན་ནམ་མི་དཀོན། བཅོམ་ལྡན་འདས་དཀོན་ལགས་སོ། །ཤཱ་རིའི་བུ་ཡང་དག་པར་གཤེགས་པས་
བཤད་པ། ཆོས་སོ་ཅོག་ཀུན་ལ་སྐྱེ་བ་མེད། འགོག་པ་མེད། མཚན་མ་མེད། བྱ་བ་མེད་ན་མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ་དཔེར་མི་ལ་ལ་ཞིག་གིས་རྡོ་ལ་གཟིངས་སུ་བྱས་ཏེ། མཚོའི་ཚུ་ལོག་གི་འགྲམ་ནས་ཕ་ལོག་གི་
འགྲམ་དུ་ཕྱིན་པར་རྒལ་ན་དེ་ཁྱོད་ཀྱི་ཡིད་ལ་ཇི་སྙམ་ཡོད། དཀོན་ནམ་མི་དཀོན། བཅོམ་ལྡན་འདས་དཀོན་ལགས་སོ། །ཤཱ་རིའི་བུ་ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བ་མེད། འགོག་པ་མེད། མཚན་མ་མེད། བྱ་བ་མེད་ན། མི་
ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ་མི་ལ་ལ་ཞིག་གིས་གནམ་ངོས་བཞིའི་འོག་རི་རབ་རིའི་རྒྱལ་པོ་དང་། རི་དང་། ཆུ་བོ་དང་། རྩྭ་དང་། ཤིང་ཀུན་ཁུར་དུ་ཁྱེར་ལ། སྦྲང་བུའི་རྐང་པས་སྐས་བྱས་ཏེ། ཚངས་ལྷའི་ཁམས་
སུ་ཐུག་པར་མཛེགས་ན་དེ་ཁྱོད་ཀྱི་ཡིད་ལ་དཀོན་ནམ་མི་དཀོན། བཅོམ་ལྡན་འདས་དཀོན་ལགས་སོ། །ཤཱ་རིའི་བུ་ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བ་ཡང་མེད། འགོག་པ་ཡང་མེད། མཚན་མ་ཡང་མེད། བྱ་བ་ཡང་མེད་ན། 

49-1-150b

མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་དཀོན་ནོ། །ཤཱ་རིའི་བུ་ཡང་དཔེར་པད་མའི་ཁ་ཆུ་ཆར་གྱི་ཉག་མས་རི་རབ་རིའི་རྒྱལ་པོ་སྤངས་ཏེ་ནམ་མཁའ་ལ་འདུག་ན། དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས་དཀོན་ལགས་སོ། །
ཤཱ་རིའི་བུ་ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བ་ཡང་མེད། འགོག་པ་ཡང་མེད། མཚན་མ་ཡང་མེད། བྱ་བ་ཡང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་དཀོན་ནོ། །ཤཱ་རིའི་བུ་དཔེར་ན་བསྐལ་པ་ཟད་པའི་མེ་ཆེན་པོས་
བསྲེགས་པའི་ཚེ། མི་ཞིག་གིས་མཆིལ་མ་ཐབས་གཅིག་བཏབས་པས་མེ་དེ་ཤི་བར་ནུས། ཡང་ཐབས་གཅིག་བུས་པས་སླར་འཇིག་རྟེན་གྱི་ཁམས་དང་ལྷ་རྣམས་ཀྱི་ཕོ་བྲང་དུ་གྱུར་པར་ནུས་པ་དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས་དཀོན་
ལགས་སོ། །ཤཱ་རིའི་བུ་ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བ་ཡང་མེད། འགོག་པ་ཡང་མེད། མཚན་མ་ཡང་མེད། བྱ་བ་ཡང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ནི་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ་ཆུ་བོ་གང་གཱ་ཆེ་ཞིང་
ཡངས་པ་ནི་དཔག་ཅིང་ཚད་གཟུང་དུ་མེད་དོ། །བཅོམ་ལྡན་འདས་འདི་ལགས་སོ། །ཤཱ་རིའི་བུ་གནམ་ངོས་བཞིའི་འོག་ན་ཆར་པ་ཆེན་པོ་ཁྱབ་པར་བབ་སྟེ། ཆར་པའི་ཐིགས་པ་ནི་ཆུ་བོ་གང་གཱ་ཙམ་ན། མི་ལ་ལ་ཞིག་གིས་ལག་པས་ཆར་པའི་ཐིག་པ་བཟེད་དེ་ལྷུང་ཞིང་ཟག་པ་མེད་ན་དེ་
ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས་དཀོན་ལགས་སོ། །ཤཱ་རིའི་བུ་ཡང་དག་པར་གཤེགས་པས་བཤད་པ་ཆོས་སོ་ཅོག་ཀུན་ལ་སྐྱེ་བ་ཡང་མེད། འགོག་པ་ཡང་མེད། མཚན་མ་ཡང་མེད། བྱ་བ་ཡང་མེད་ན། མི་ཀུན་ཡིད་ཆེས་ཤིང་ཤེས་པར་
བྱས་ན་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ་རི་རབ་རིའི་རྒྱལ་པོ་མཐོ་ཞིང་ཆེ་འམ་མི་ཆེ། བཅོམ་ལྡན་འདས་མཐོ་ཞིང་ཆེའོ། །ཤཱ་རིའི་བུ་གནམ་ངོས་བཞིའི་ནང་ན་ཁྱབ་པར་རྡོ་ཆེན་པོའི་ཆར་བབ་སྟེ། ཀུན་རི་རབ་རིའི་རྒྱལ་པོ་ཙམ་ན། མི་ལ་ལ་ཞིག་གིས་ལག་པས་རྡོ་དེ་
དག་བཟེད་ཅིང་བསྡུས་ཏེ། སྐེ་ཚེའི་འབྲས་བུ་ཙམ་ཡང་ལྷུང་ཞིང་ཟག་པ་མེད་པ་དེ་ཁྱོད་ཀྱི་ཡིད་ལ་ཇི་སྙམ། དཀོན་ནམ་མི་དཀོན། བཅོམ་ལྡན་འདས་དཀོན་ལགས་སོ། ཤཱ་རིའི་བུ་ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བ་ཡང་མེད། འགོག་

49-1-151a

པ་ཡང་མེད། མཚན་མ་ཡང་མེད། བྱ་བ་ཡང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ་དཔེར་ན་མི་ལ་ལ་ཞག་གིས་སེམས་ཅན་ཐམས་ཅད་ལག་པ་གཡོན་པར་བཞག་ལ། ལག་པ་གཡས་པས་སྟོང་
གསུམ་གྱི་འཇིག་རྟེན་གྱི་ཁམས་དང་། རི་རབ་དང་། ཆུ་བོ་དང་། རྩི་ཤིང་བཏེག་སྟེ། སེམས་ཅན་དེ་རྣམས་ཐམས་ཅད་སེམས་འཐུན་པར་དགའ་སྐྱིད་ཅིང་ཡིད་ལ་ཐ་དད་པ་མེད་པར་བྱ་ནུས་ན་དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས་དཀོན་
ལགས་སོ། །ཤཱ་རིའི་བུ་ཡང་དག་པར་གཤེགས་པས་བཤད་པ་ཆོས་སོ་ཅོག་ཀུན་ལ་སྐྱེ་བ་ཡང་མེད། འགོག་པ་ཡང་མེད། མཚན་མ་ཡང་མེད། བྱ་བ་ཡང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ་ཡང་དག་པར་གཤེགས་
པས་བཤད་པ་ཆོས་ཀུན་ལ་ངོ་བོ་ཉིད་མེད་དེ། སྟོང་པ་ཅི་ཡང་མེད་པས་འཇིག་རྟེན་ཐམས་ཅད་ཀྱིས་ཡིད་ཆེས་ཤིང་ཤེས་པར་དཀའོ། །ཅིའི་ཕྱིར་ཞེ་ན། ཤཱ་རིའི་བུ་ཆོས་དེ་ལ་འདུ་ཤེས་མེད་དེ་འདུ་ཤེས་སོ་ཅོག་དང་བྲལ་ལོ། །བསམ་པ་མེད་དེ་བསམ་པའོ་ཅོག་དང་བྲལ་ལོ། །བླང་
བ་འང་མེད་དེ་དོར་བའང་མེད། འདྲན་ཏོར་ཡང་མེད། མྱ་ངན་ཚ་བའང་མེད། ཚུ་ལོག་གི་འགྲམ་ཡང་མེད། ཕ་ལོག་གི་འགྲམ་ཡང་མེད། སྐབས་ཀྱང་མེད། གཏི་མུག་མེད། རིག་པའང་མེད་དེ། ཚད་མེད་པའི་ཡེ་ཤེས་ཀྱིས་ན་གདོད་ཤེས་པར་རུང་སྟེ། བསམ་པས་ཤེས་པར་
ནུས་པ་མ་ཡིན་ནོ། །སྤྱད་པ་ཡང་མེད། འདུ་ཤེས་ཀྱང་མེད། བསམ་པ་ཀུན་ལས་འདས། སེམས་མེད་ན་སེམས་ཀུན་ལས་འདས། ཕྱོགས་པ་འང་མེད། ལོག་པ་འང་མེད། བཅིང་བའང་མེད། བཀྲོལ་བ་ཡང་མེད། བདེན་པ་ཡང་མེད། མི་བདེན་པའི་ཆོས་ཀྱང་མེད།  གཏི་མུག་གི་ཆོས་
ཀྱང་མེད། གཏི་མུག་གི་དྲ་བ་ཡང་མེ་མིང་ཡང་མེད། ཚིག་མེད། བཤད་པ་མེད། མ་བཤད་པ་མེད། ཟད་པ་འང་མེད། མ་ཟད་པ་འང་མེད། སྤྱད་པ་འང་མེད། ལམ་ཡང་མེད། ལམ་གྱི་འབྲས་བུ་ཡང་མེད། བྲལ་བ་མེད་ན་བྲལ་བ་རྣམས་ལས་འདས་ཏེ། བསམ་པ་འང་མེད། གོ་འདུན་
འདྲེས་པ་འང་མེད། བླང་བ་འང་མེད། དོར་བ་འང་མེད། ཐོབ་པ་འང་མེད། ཐོབ་པར་ཡང་མི་རུང་། བདེན་པ་རྣམས་ཀྱང་བསལ། འདོད་ཆགས་དང་། ཞེ་སྡང་དང་། གཏི་མུག་ཀྱང་བསལ་ཏེ། བདེན་པ་འང་མེད། བརྫུན་པ་འང་མེད། རྟག་པ་འང་མེད། མི་རྟག་པ་འང་མ་ཡིན་

49-1-151b

སྣང་བ་འང་མ་ཡིན། མི་སྣང་བ་ཡང་མ་ཡིན། མུན་པའང་མ་ཡིན། སྣང་བ་འང་མ་ཡིན། སེམས་ལ་མི་འདུག །ངོ་བོ་ཉིད་ཕྱི་མོ་ནས་སྟོང་པས། བདུད་ཕེབས་ཐུལ་བར་ནུས། མྱ་ངན་འཁྲུག་པ་ཕེབས་ཐུལ། ལྔ་ཕུང་ཕེབས་ཐུལ། འདུ་མཆེད་བཅུ་གཉིས་ཕེབས་ཐུལ། ཁམས་
བཅྭ་བརྒྱད་ཕེབས་ཐུལ། ལྔ་ཕུང་ཡོད་ཅེས་འཆད་པ་ཕེབས་ཐུལ། འདུ་མཆེད་བཅུ་གཉིས་ཡོད་ཅེས་འཆད་པ་ཕེབས་ཐུལ། ཁམས་བཅྭ་བརྒྱད་ཅེས་འཆད་པ་ཕེབས་ཐུལ། སེམས་ཅན་ཡོད་ཅེས་འཆད་པ་དང་། གང་ཟག་ཡོད་ཅེས་འཆད་པ་ཕེབས་ཐུལ། ཚེ་ཡོད་
ཅེས་འཆད་པ་དང་། སྲོག་ཡོད་ཅེས་འཆད་པ་དང་། ཡོད་པ་ཡོད་ཅེས་འཆད་པ་དང་། ཡོད་པ་མེད་ཅེས་འཆད་པ་ཕེབས་ཐུལ་ལོ། །ཡོན་པོ་ཆད་པ་ཐམས་ཅད་ཕེབས་ཐུལ་ལོ། །ཤཱ་རིའི་བུ་ངའི་འཕྲུལ་གྱི་ཆོས་འདིས་འདོད་ཆགས་ཐམས་ཅད་དང་། ཆོས་ཡོད་ཅེས་འཆད་
པ་དང་། ཆོས་སོ་ཅོག་གི་ཡང་དག་པའི་བདེན་པའི་མཚན་མ་ལ་ཡིད་མི་ཆེས་མ་དད་པ་དང་། སངས་རྒྱས་ཀྱི་ཆོས་ལ་ཟློག་པ་ཀུན་ཕེབས་ཐུལ་བར་ནུས་སོ། །ཅིའི་ཕྱིར་ཞེས་བྱས་ན། ཤཱ་རིའི་བུ་སེམས་ཅན་ལ་ལ་ཞིག་བདག་ཏུ་ལྟ་བར་འཆད། གང་ཟག་ཏུ་འཆད། སེམས་ཅན་
ཡོད་པར་འཆད། མེད་པར་འཆད། རྟག་པ་སྙམ་དུ་འཆད། ཡོད་པ་སྙམ་དུ་འཆད། མེད་པ་སྙམ་དུ་འཆད་ཅིང་ཆོས་རྣམས་འཆད་པ་དང་། བརྙན་མའི་མིང་དུ་འཆད་པ་དང་། འཆད་པ་ཀུན་ལ་སངས་རྒྱས་ལ་ཟློག་ཅིང་གསལ་བ་སྟེ། སངས་རྒྱས་དང་རྩོད་པའོ། །
ཤཱ་རིའི་བུ་ཆོས་ལ་ཅུང་ཟད་ཅིག་ཐོབ་པར་འཛིན་པ་ཡན་ཆད་སངས་རྒྱས་དང་རྩོད་པའོ། །སངས་རྒྱས་དང་རྩོད་པ་ནི་ཀུན་ཡོན་པོའི་ལམ་དུ་འཇུག་པ་སྟེ། ངའི་སློབ་མ་མ་ཡིན་ནོ། །ངའི་སློབ་མ་མ་ཡིན་ན་མྱ་ངན་ལས་འདས་པ་དང་རྩོད་པ། སངས་རྒྱས་དང་རྩོད་པ། 
ཆོས་དང་རྩོད་པ། དགེ་འདུན་དང་རྩོད་པ་སྟེ། ཤཱ་རིའི་བུ་དེ་ལྟར་མཐོང་བའི་མི་ནི་ངས་ཁྱིམ་ནས་བྱུང་ཞིང་། ཚུལ་ཁྲིམས་གནོད་དུ་མ་གནང་ངོ་། །ཤཱ་རིའི་བུ་དེ་ལྟར་མཐོང་བའི་མི་ནི་ངས་ཆུ་རྔུབ་ཅིག་དང་། ཡོན་ལེན་དུ་འང་མ་གནང་ངོ་། །ཤཱ་རིའི་བུ་མི་ལ་ལ་ཞིག་
དེ་ལྟ་བུར་མི་དགེ་བའི་འདོད་ཆགས་ཀྱི་དོན་བསལ་བཏང་བ་ནི་ངའི་ཆོས་ཀྱི་ནང་དུ་ཁྱིམ་ནས་འབྱུང་ཞིང་ཆོས་ལ་མ་ཚོལ་ཏེ། མྱ་ངན་ལས་འདས་པར་ཡང་མི་སེམས། མྱ་ངན་ལས་འདས་པའི་སེམས་ཀྱང་མི་བྱེད། མྱ་ངན་ལས་འདས་པ་ལ་འང་མ་ཆགས་ཏེ། མཐའ་

49-1-152a

ཡུན་དུ་སྟོང་པའི་ཆོས་ཀྱིས་དངངས། མ་སྐྲག་པ་དེ་ལྟ་བུའི་མི་ཡང་ཆོས་ཀུན་འཆད་པའི་ཕྱིར་བརྩོན་འགྲུས་པ་ལ་སྤྱོད་ན། མི་དགེ་བ་ལ་འདོད་ཆགས་པ་དེ་ལྟ་བུའི་ལྟ་སྨོས་ཀྱང་ཅི་དགོས། བདག་ཏུ་ལྟ་བ་ལ་ཆགས་པ་དང་། སེམས་ཅན་ལ་ཆགས་
པ་དང་། གང་ཟག་ལ་ཆགས་པ་དང་། ཆོས་ལ་ཆགས་པ་དེ་ལྟ་བུའི་མིས་འདོད་ཆགས་རྣམས་བཅད་པའི་ཕྱིར་མཚན་མ་མེད་པའི་ཏིང་ངེ་འཛིན་འགྲུབ་པར་སྤྱད་སྦྱངས་ཏེ། མཚན་མ་མེད་པའི་ཏིང་ངེ་འཛིན་ལ་ཡང་མཚན་མ་མི་ལེན་ཏེ། མི་དེས་ཆོས་སོ་ཅོག་ཐམས་
ཅད་ཀྱི་མཚན་ཉིད་གཅིག་ཡིན་པར་ཁོང་དུ་ཆུད་དེ། དེ་ནི་མཚན་ཉིད་མེད་པའོ། །ཤཱ་རིའི་བུ་དེ་ལྟ་བུ་ནི་མིང་འཕྲུལ་གྱི་ཆོས་ཀྱི་མཉེན་དུལ་བའི་ཆོས་ཀྱི་བཟོད་པ་ཞེས་བྱའོ། །མཉེན་དུལ་བའི་ཆོས་ཀྱི་བཟོད་པ་དེ་ལྟ་བུ་ཐོབ་ན། གདོད་མིང་ངའི་སློབ་མ་ཡིན་ཏེ། 
ཡོན་ཕུལ་བའང་ཞུ་བར་བྱ་ནུས་ལ་ལུང་སྟོན་པར་མ་མནོས་སོ། །ཅིའི་ཕྱིར་ཞེ་ན་བྱས་ན། ཤཱ་རིའི་བུ་ངའི་ཡང་དག་པའི་བདེན་པའི་མཚན་མའི་ཆོས་འདི་ལ་འཇུག་ཏུ་འང་མི་རུང་། བླང་དུ་འང་མི་རུང་། དོར་དུ་འང་མི་རུང་། ཆགས་སུ་འང་མི་རུང་། བཤད་དུ་འང་མི་རུང་། 
སྨྲ་བའི་ཚིག་གི་ལམ་ཆད། དགའ་བ་འང་མེད། གཞའ་བ་འང་མེད། འདོད་ཅིང་དགའ་བའི་སེམས་ཀྱང་ཆད་དེ། རྐྱེན་རྣམས་ཚོགས་པ་མེད། རྐྱེན་རྣམས་དང་བྲལ་བས་ཀྱང་ལམ་མེད། ལམ་ཆད། ལམ་མེད་པ་ལ་ཐུག་པར་སྨྲ་བའི་ཚིག་རྣམས་དང་། བརྗོད་ཅིང་འགྲོ་
བ་དང་། སྒྲ་སྐད་ཀུན་ཆད། དེ་གཟུགས་ཀྱང་མེད། ཁ་དོག་ཀྱང་མེད། བླང་བ་འང་མེད། ཆགས་པ་འང་མེད། སྤྱད་པ་འང་མེད། བདེན་པ་འང་མེད། བརྫུན་པ་འང་མེད། མུན་པ་འང་མེད། སྣང་བ་འང་མེད། ཞིག་པ་འང་མེད། རྩོད་པ་འང་མེད། འདུས་པ་འང་མེད། གྱེས་
པ་འང་མེད། གཡོ་བ་འང་མེད། སེམས་པའང་མེད། རྣམ་པར་རྟོག་པ་འང་མེད། ཐོབ་པར་མི་རུང་ངོ་། །དྲི་མ་འང་མེད། གཙང་བ་འང་མེད། མིང་ཡང་མེད། མཚན་མའང་མེད། སེམས་ཀྱིས་བགྲང་བའི་ཆོས་ཀྱང་མ་ཡིན། སེམས་ཀྱིས་ཤེས་པའང་མ་ཡིན་ཏེ། ངའི་
ཆོས་འདིའི་ནང་ན་སྐྱེས་པའང་མེད། བུད་མེད་ཀྱང་མེད། ལྷ་འང་མེད། ཀླུ་འང་མེད། གནོད་སྦྱིན་ཡང་མེད། དྲི་ཟ་ཡང་མེད། གྲུལ་བུམ་ཡང་མེད། ཤ་ཟ་ཡང་མེད། ཆད་པ་འང་མེད། རྟག་པའང་མེད། བདག་ཏུ་ལྟ་བའང་མེད། སེམས་ཅན་ཡང་མེད། གང་ཟག་

49-1-152b

ཀྱང་མེད། འོངས་པ་འང་མེད། སོང་བའང་མེད། ཞུགས་པའང་མེད། ཚུལ་ཁྲིམས་ཀྱང་མེད། ཉམས་པ་འང་མེད། གཙང་བ་འང་མེད། དྲི་མ་འང་མེད། ཏིང་ངེ་འཛིན་ཀྱང་མེད། ཐུབ་པ་འང་མེད། ཐུབ་པའི་རྩ་བའང་མེད། བསམ་གཏན་ཡང་མེད། བསམ་གཏན་
གྱི་རྩ་བ་ཡང་མེད། ཤེས་པ་འང་མེད། མཐོང་བའང་མེད། འདོད་པ་འང་མེད། རྩོད་པ་འང་མེད། ལམ་ཡང་མེད། ལམ་གྱི་འབྲས་བུ་ཡང་མེད། ཤེས་རབ་ཀྱང་མེད། ཤེས་རབ་ཀྱི་རྩ་བའང་མེད། སྣང་བ་མེད་པའང་མེད། གྲོལ་ཐར་པ་མེད་པ་འང་མེད།  འབྲས་བུ་
ཐོབ་པ་འང་མེད། སྟོབས་ཀྱང་མེད། སྟོབས་ཐོབ་པ་འང་མེད། འཇིགས་པ་འང་མེད། འཇིགས་པ་མེད་པའང་མེད། སེམས་ཀྱང་མེད། སེམས་ཀྱི་རྩ་བའང་མེད། འདུག་པ་འང་མེད། འགྲོ་བ་འང་མེད། ཆོ་ག་འང་མེད། ཚུ་ལོག་ཀྱང་མེད། ཕ་ལོག་ཀྱང་མེད། དྲན་ཞིང་འདུ་
ཤེས་ཀྱིས་རྣམ་པར་བརྟགས་པ་འང་མེད། བྱང་ཆུབ་ཀྱང་མེད། བྱང་ཆུབ་ཀྱི་ཤས་ཀྱང་མེད། ཤེས་རབ་མེད། ཤེས་རབ་མེད་པ་འང་མེད། ས་འང་མེད། ཆུ་འང་མེད། རླུང་ཡང་མེད། སྡིག་ཀྱང་མེད། དཔལ་ཡོན་ཡང་མེད། ཆོས་ཀྱང་མེད། ཆོས་མེད་པའང་མེད། 
སྡུག་བསྔལ་ཡང་མེད། སྐྱིད་པའང་མེད་དེ། འདྲན་ཏོར་བརྗོད་པ་ཐམས་ཅད་ཀྱི་རྩ་བའི་ཕྱི་མོ་ཀུན་བྱུང་སྟེ། ཐམས་ཅད་ཡོངས་སུ་བྲལ་བས་གྲངས་ཏེ་དུད་པའང་མེད་དོ། །ཤཱ་རིའི་བུ་གཅེས་པའི་ཚིག་བསྐྱོད་དོ། །ངའི་ཆོས་ཀྱིས་སེམས་སོ་ཅོག་ཐམས་ཅད་དང་། མཐོང་ངོ་ཅོག་
ཐམས་ཅད་དང་། བདུད་ཐམས་ཅད་དང་། ལེ་ལོ་ཡང་སྐྱེ་བ་ཀུན་བཤིག་སྟེ། དྲན་ཞིང་སེམས་པ་ཐམས་ཅད་ཀུན་གྱི་སེམས་སོ། །སྨྲ་བའི་ཚིག་ཐམས་ཅད་གསལ་ཏོ། །ངའི་ཆོས་དེའི་ནང་ན་རྟག་པ་མེད། རྟག་པ་མེད་པའང་མེད། སྡུག་བསྔལ་མེད། སྐྱིད་པའང་མེད། དྲི་མ་འང་མེད། གཙང་
བ་འང་མེད། ཆད་པའང་མེད། རྟག་པའང་མེད། བདག་ཏུ་ལྟ་བའང་མེད། སེམས་ཅན་ཡང་མེད། གང་ཟག་ཀྱང་མེད། ཚེ་འང་མེད། སྲོག་ཀྱང་མེད། སྐྱེ་བའང་མེད། འགོག་པ་འང་མེད། དེ་ཅིའི་ཕྱིར་ཞེ་ན། ཤཱ་རིའི་བུ་ཡང་དག་པར་གཤེགས་པས། ཆོས་ལ་ང་མེད། ང་ཞི་བ་ཡོད་པས་ན། མིང་
མྱ་ངན་ལས་འདས་ཞེས་བྱ་ན། མྱ་ངན་ལས་འདས་པ་ཐོབ་པ་འང་མ་མཐོང་། ཤཱ་རིའི་བུ་སངས་རྒྱས་ཀྱང་མྱ་ངན་ལས་འདས་པར་མི་སེམས་སོ། །མྱ་ངན་ལས་འདས་པའི་སེམས་ཀྱང་མི་བྱེད། མྱ་ངན་ལས་འདས་པ་ལ་འདོད་ཆགས་ཀྱང་མེད་དོ། །དེ་ལྟ་བས་ན་དེ་ནི་རབ་ཏུ་ངོ་མཚར་

49-1-153a

བར་མངོན་ཏེ་ཡོད་དཀོན་ནོ། །དེ་ནི་ཡང་དག་པར་གཤེགས་པས་བཤད་པ་ཆོས་སོ་ཅོག་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ན་ཕྱེད་ཀྱིས་ཡོད་དཀོན་ནོ། །ལེའུ་གཉིས་ཏེ་སངས་རྒྱས་
བསམ་པའི་ལེའུ་འོ།། །། དེའི་ཚེ་ཤཱ་རིའི་བུས་སངས་རྒྱས་ལ་གསོལ་པ། བཅོམ་ལྡན་འདས་ཆོས་འདིའི་ནང་ན་ཇི་ལྟ་བུ་ལ་ངན་པའི་བཤེས་གཉེན་ཞེས་བགྱི། ཇི་ལྟ་བུ་ལ་དགེ་བའི་བཤེས་གཉེན་ཞེས་བགྱི། སངས་རྒྱས་ཀྱིས་ཤཱ་རིའི་བུ་
ལ་བཀའ་སྩལ་པ། དགེ་སློང་ལ་ལ་ཞིག་དགེ་སློང་གཞན་ལ་སྟོན་པ། དགེ་སློང་ཁྱོད་སངས་རྒྱས་ལ་སོམས་ཤིག །ཆོས་ལ་སོམས་ཤིག །དགེ་འདུན་ལ་སོམས་ཤིག །ཚུལ་ཁྲིམས་ལ་སོམས་ཤིག །གཏོང་བ་ལ་སོམས་ཤིག །ལྷ་ལ་སོམས་ཤིག །དགེ་སློང་ཁྱེད་ཀྱིས་
ལུས་ལ་རྟོགས་ཏེ། ལུས་གཟུགས་དེ་མི་གཙང་བར་སོམས་ཤིག །བྱ་བ་ཡོད་དོ་ཅོག་གི་ཆོས་ཐམས་ཅད་ཀུན་ནི་རྟག་པ་མེད་པར་རྟོགས་ཤིག །ཆོས་སོ་ཅོག་ནི་སྟོང་པ་མེད་པར་རྟོགས་ཤིག །དགེ་སློང་ཁྱོད་ཀྱིས་རྐྱེན་ཏོ་ཅོག་གི་མཚན་མ་བླངས་ཏེ། སེམས་ཀྱི་རྐྱེན་གྱི་ནང་དུ་
བཏགས་པ་བཞིན་དུ། སྟོང་པའི་མཚན་མ་གཅིག་ཏུ་སོམས་ཤིག །དགེ་བའི་སེམས་ལ་དད་པར་བྱོས་ཤིག །མི་དགེ་བའི་ཆོས་ཀྱི་མཚན་མ་ལོང་ལ། མི་དགེ་བའི་ཆོས་ཀྱི་མཚན་མ་བླངས་ཟིན་ནས་གཅད་པར་བྱ་བའི་ཕྱིར་བརྟགས་ཤིང་བསམ་པ་སྤྱད་པ་སྦྱངས་ཏེ། 
འདོད་ཆགས་གཅད་པའི་ཕྱིར་མི་གཙང་བའི་མཚན་མ་ལ་བརྟག་གོ། །ཞེ་སྡང་གཅད་པའི་ཕྱིར་བྱམས་པའི་སེམས་ཀྱི་མཚན་མ་ལ་བརྟག་གོ། །གཏི་མུག་གཅད་པའི་ཕྱིར་རྒྱུ་རྐྱེན་གྱི་ཆོས་ལ་བརྟགས་ཏེ། རྟག་པར་ཚུལ་ཁྲིམས་གཙང་མ་བསམས་ལ་ཟབ་ཏུ་སྟོང་པའི་མཚན་མ་
བླངས་ཏེ། བརྩོན་འགྲུས་རྟག་པར་སྤྱད་ལ། བསམ་གཏན་བཞི་ཐོབ་ནས་སེམས་གཅིག་ཏུ་ལམ་བཙལ་ཏེ། མི་དགེ་བའི་ཆོས་ནི་སྤངས་ནས་ནང་གི་བདེ་སྐྱིད་ཡོད་པར་བརྟག་གོ། །སེམས་གཅིག་ཏུ་ལམ་སྤྱད་དེ། དགེ་མི་དགེའི་བྱེ་བྲག་ཕྱེད་པར་རྟོགས་པར་བརྟག་གོ། 
མཚན་མར་རྟོགས་ཏེ་བླངས་ཟིན་ནས་སེམས་གཅིག་ཏུ་བསམས་ཏེ། མྱ་ངན་ལས་འདས་པའི་བདེ་བ་སྟོང་པ་ཞི་བ་བརྟགས་ཏེ་མྱ་ངན་ལས་འདས་པའི་མཐའ་ཡུན་དུ་གཙང་དག་པ་འབའ་ཤིག་བླང་བ་དེ་ལྟ་བུ་སྟོན་པ་ནི་མིང་ཡོན་པོར་སྟོན་པ་སྟེ། དེ་ལྟ་བུའི་དྲང་པོར་སྟོན་

49-1-153b

པ་ཡོན་པོར་སྟོན་པ་ཡིན་ནོ། །ཤཱ་རིའི་བུ་དེ་ལྟ་བུར་སྟོན་པ་ནི་མིང་ངན་པའི་བཤེས་གཉེན་ཏེ། མི་དེ་ལྟ་བུའི་མིང་ལ་འཕྱ་སྐུར་པ་ཞེས་བྱ་སྟེ་མུར་འདུག་ལ་སྟོང་པའོ། །མི་གཞན་ལ་ཡོན་པོར་ལམ་གྱི་ཆོས་འཆད་པ་ཞེས་ཀྱང་བྱའོ། །ཤཱ་རིའི་བུ་དེ་ལྟ་
བུའི་མིང་ངན་པ་ནི་ངས་ཆུ་རྔུབ་གཅིག་དང་ཡོན་ལེན་དུ་འང་མི་གནང་ངོ་། །ངས་སྟོན་པ་ནི་བཤད་ཀྱི་སློབ་མ་ནི་མ་བཤད་དོ། །ཤཱ་རིའི་བུ་ངའི་ཆོས་ལ་དེ་ལྟ་བུར་ལེ་ལོ་ཡང་སྐྱེ་བ་སྟོན་པ་མང་དུ་ཡོད་དོ། །ཤཱ་རིའི་བུ་བསྟན་པ་མནོད་པ་ནི་ཚུལ་ཁྲིམས་མནོས་
ཏེ། ལོ་ལྔའི་བར་དུ་ཀུན་གཏོང་མི་ཕོད་ན་དེ་ལྟ་བུར་བསྟན་པ་ནི་དེ་ལ་སེམས་འགྲུས་པར་སྤྱད་དེ། རང་ལ་ཅི་ཡང་མེད་པ་ཐོབ་པ་ཡོད་དོ། །དགེ་སློང་སོང་སྟེ་མི་གསོལ་མི་འདྲི་བ་ངས་བཤད་པ་ལ་མི་དེ་ལོ་ལྔ་ལོན་མོད་ཀྱི། འོན་ཀྱང་མིང་ཡོན་པོ་མཐོང་བ་སྟེ་
མུར་འདུག་གི་ཆོས་དང་འདྲེས་ཤིང་བདུད་ཀྱིས་བསྟན་པ་བཞིན་དུ་སྤྱོད་པའོ། །ཤཱ་རིའི་བུ་དགེ་སློང་ལ་ལ་ཞིག་དེ་སྐད་དུ་བསྟན་པ་མནོས་ཟིན་ནས་སྟོང་པ་ཆོས་ཅི་ཡང་ཐོབ་པ་མེད་ཅེས་ཐོས་ནས། མོད་བཞིན་རང་གིས་ཚོར་ཤེས་ཏེ། བདག་གིས་སྔར་མནོས་པ་ནི་ཀུན་
ཡོན་པོ་མཐོང་བ་ཡིན་ཏེ། སྟོང་པ་ཅི་ཡང་ཐོབ་པ་མེད་པའི་ཆོས་ལ་ཐེ་ཙོམ་ཡང་མེད། འགྱོད་པ་ཡང་མེད་དེ་ཟབ་ཏུ་ཞུགས་ཤིང་ཐོས་པ་མེད་པས་བདག་ཏུ་ལྟ་བ་དང་། གང་ཟག་ཏུ་ལྟ་བ་ཐམས་ཅད་ལ་མི་རྟེན་ཏོ། །ཤཱ་རིའི་བུ་ངས་བཤད་པ་ལ་དེ་ལྟ་བུའི་མི་མིང་གཙང་
དག་པའི་ཚངས་པ་སྤྱད་པ་ཞེས་བྱའོ། །ཤཱ་རིའི་བུ་དགེ་སློང་ལ་ལ་ཞིག་གིས་དེ་ལྟ་བུའི་ཐོབ་པ་མེད་པའི་བཟོད་པ་འབྱོར་གྲུབ་ན་འཕྲལ་དུ་ལྷག་མ་མེད་པའི་མྱ་ངན་ལས་འདས་པ་མཐོང་མོད་ཀྱི། ངས་ལུང་བསྟན་དེ་མི་དེ་སངས་རྒྱས་བྱམས་པའི་དུས་ཀྱི་ཚོགས་པ་དང་པོ་ལ་
འཇུག་གོ། །དེའི་ཚེ་སངས་རྒྱས་བྱམས་པའང་ཤིན་ཏུ་དགའ་ནས་ལན་གསུམ་བོས་ཏེ་མི་དེ་སངས་རྒྱས་ཤཱཀྱ་ཐུབ་པའི་ཆོས་ལ་ཅི་འང་ཐོབ་པ་མེད་པའི་བཟོད་པའི་འབྱོར་གྲུབ་པས་ནུས་སོ་ཞེས་བོས་སོ། །ཤཱ་རིའི་བུ་ཁྱིམ་ན་འདུག་པའང་རུང་། ཁྱིམ་ནས་བྱུང་བ་ཡང་རུང་སྟེ། དེ་
ལྟ་བུ་བཟོད་པ་འབྱོར་གྲུབ་ནས། ངས་མི་དེ་མྱ་ངན་ལས་འདས་པ་ཐོབ་པ་ཡང་དག་པར་ལུང་སྟོན་ཏོ། །ཤཱ་རིའི་བུ་མི་ལ་ལ་ཞིག་དེ་སྐད་དུ་བསྟན་པ་མནོས་ཟིན་ནས་སྟོང་པ་ཅི་ཡང་ཐོབ་པ་མེད་པའི་ཆོས་ཐོས་ན་རྨོད་བཞིན་དངངས་སྐྲག་ན་མི་དེ་སྙིང་རྗེར་རུང་སྟེ་ར་མདའ་མེད་དོ། །གཉེན་

49-1-154a

པོ་མེད་དེ་སེམས་ཅན་དམྱལ་བར་ཕྱོགས་སོ། །ཅིའི་ཕྱིར་ཞེ་ན། ཤཱ་རིའི་བུ་སངས་རྒྱས་ཀྱི་བསྟན་པ་ལ་དངངས་སྐྲག་ཅིང་དོགས་པ་སྟེ། མི་དེས་ངན་པའི་ལམ་ཆོག་ཚང་བའི་ཕྱིར་རོ། །ཇི་ལྟ་ཞེ་ན། ངས་རྟག་པར་བཤད་པ་ཡིན་ནོ་པ་ཡོད་ཅེས་འཆད་པ་ནི་ལམ་
ངན་པའི་ཤས་ཡིན་ནོ། །ཇི་ལྟ་ཞེ་ན། ཤཱ་རིའི་བུ་སངས་རྒྱས་ཀྱིས་ཐོབ་པའི་ཆོས་ལ་ཡིན་མ་ཡིན་དང་ཐ་དད་པ་མེད་དོ། །ཐ་དད་དུ་ཟིན་ན་ཐོབ་པ་ཡོད་པ་ཡིན་ནོ། །ཤཱ་རིའི་བུ་མི་ལ་ལ་ཉིས་ན་ལོག་པ་ལྔའི་ཤས་ལྕི་བ་འབྱོར་ཀྱང་རུང་གི་བདག་ཏུ་ལྟ་བ་དང་། སེམས་
ཅན་དུ་ལྟ་བ་དང་། གང་ཟག་དུ་ལྟ་བ་དང་། ཚེར་ལྟ་བ་དང་། སྲོག་ཏུ་ལྟ་བ་དང་། ཕུང་པོ་དང་། སྐྱེ་མཆེད་དང་། ཁམས་སུ་ལྟ་བ་འབྱོར་གྲུབ་ཏུ་མི་རུང་ངོ་། །ཚུལ་ཁྲིམས་འཛིན་པ་ལ་འདོད་ཆགས། ཚུལ་ཁྲིམས་འཛིན་པ་ལ་ཆགས་པར་མཐོང་བའོ། །ཏིང་ངེ་འཛིན་ལ་འདོད་ཆགས་ན་
ཏིང་ངེ་འཛིན་མཐོང་བ་ལ་ཆགས་པའོ། །སངས་རྒྱས་ཀྱི་འདུ་ཤེས་ལ་རྟེན་ན་ཆོས་ཀྱི་འདུ་ཤེས་ཐོབ་པའོ། །དགེ་འདུན་གྱི་དོན་གཅོད་ན། ལུས་མཐོང་བ་འབྱོར་བ་གྲུབ་བོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཆོས་ལ་ལུས་མཐོང་བ་འབྱོར་གྲུབ་ན། དགེ་འདུན་གྱི་གྲངས་སུ་མི་
གཏོགས་སོ། །ཤཱ་རིའི་བུ་སངས་རྒྱས་ཀྱི་སློབ་མ་རྣམས་ནི། སེམས་ལ་རྣམ་པར་བརྟག་པ་མེད་དོ། །ཤཱ་རིའི་བུ་སངས་རྒྱས་ཀྱི་སློབ་མ་རྣམས་ལ་མི་དགེ་བ་མེད་དོ། །ཚུལ་ཁྲིམས་ཞིག་པ་མེད་དོ། །ཞིག་པར་མཐོང་བ་མེད་དོ། །ཆོ་ག་ཞིག་པ་མེད་དོ། །ཤཱ་རིའི་བུ་གང་ལ་
སོགས་པ་ངན་པ་མི་དགེ་བ་ཞེས་བྱ། སངས་རྒྱས་དང་དགེ་འདུན་གྱི་ནང་ན། དགེ་འདུན་གྱི་གྲངས་སུ་མ་ཆུད་པའི་མིང་ངན་པ་མི་དགེ་བའོ། །སེམས་ཀྱིས་སེམས་བགྲང་བའི་ཆོས་ནི་རྐྱེན་རྣམས་དང་འདུས་པ་སྟེ། ཡང་དག་པ་བདེན་པའི་དོན་མེད་དེ། རྣམ་པར་རྟོག་པ་
འབའ་ཤིག་བྱེད་དོ། །རྣམ་པར་རྟོག་པ་སྤྱད་པས་ན། ཐོབ་པ་ཡོད་དུ་འཛིན་ཏེ་གང་ཟག་ཐོབ་པ་ནས། ཚིག་གིས་བཤད་པ་ཡོད་པ་ཀུན་ལ་ཐུག་གི་བར་དུ། སེམས་ཀྱིས་སེམས་འཐུད་དེ། དགེ་མི་དགེའི་ཆོས་ལ་ཐུག་པ་ནི། འཕྲུལ་གྱི་ཆོས་ཀྱི་ནང་ན་མིང་ངན་
པ་མི་དགེ་ཆོས་ཤེས་བྱའོ། །ཅིའི་ཕྱིར་ཞེ་ན། ཤཱ་རིའི་བུ་སྐྱིད་པ་ཡོད་པའི་གནས་ཀྱི་ནང་ན་གདོན་མི་ཟ་བར་ཉོན་མོངས་པ་ཡོད་དོ། །ཡང་དག་པར་གཤེགས་པའི་ཆོས་ལ་དེ་ལྟ་བུའི་སྐྱིད་སྡུག་མེད་དོ། །ཤཱ་རིའི་བུ་ཡང་དག་པར་གཤེགས་པས་ཐོབ་པ་དེའི་

49-1-154b

ནང་ན་འདོད་པ་མེད། འདོད་པ་མེད་པ་འང་མེད། སྐྱིད་པ་འང་མེད། ཉོན་མོངས་པའང་མེད། སེམས་པའང་མེད། འདུ་ཤེས་ཀྱང་མེད། སྤྱོད་པ་འང་མེད། སྟོང་པའི་འདུ་ཤེས་ཀྱི་ཐུག་གི་བར་དུ་འང་མེད་དོ། །ཅིའི་ཕྱིར་ཞེས་བྱས་ན། ཤཱ་རིའི་བུ་སྟོང་པའི་འདུ་
ཤེས་ཡོད་དུ་ཟིན་ན་བདག་ཏུ་ལྟ་བའི་འདུ་ཤེས་ཡིན། སེམས་ཅན་དུ་ལྟ་བའི་འདུ་ཤེས་ཡིན། རྟག་པའི་འདུ་ཤེས་ཡིན། ཆད་པའི་འདུ་ཤེས་ཡིན་ནོ། །ཅིའི་ཕྱིར་ཞེ་ན། ཤཱ་རིའི་བུ་འདུ་ཤེས་ཡོད་པའི་ཕྱིར་འབྲངས་ན་མཚན་མའོ་ཅོག་སྐྱེས་ཏེ་ཀུན་
ཡོན་པོར་ལྷུང་བ་ཡིན་ནོ། །ཤཱ་རིའི་བུ་སྟོང་པའི་མིང་ནི་སེམས་མེད་པ་སྟེ། དེའི་མིང་སྟོང་པ་ཞེས་བྱའོ། །སྟོང་པའི་སེམས་ཀྱང་སྟོང་པ་སྟེ། དེའི་མིང་སྟོང་པ་ཞེས་བྱའོ། །ཤཱ་རིའི་བུ་སྟོང་པའི་ནང་ན་ལེགས་པའང་མེད། ཉེས་པའང་མེད། སྟོང་པའི་འདུ་ཤེས་ལ་
ཐུག་གི་བར་དུ་འང་མེད་དོ། །དེ་ལྟ་བས་ན་མིང་སྟོང་པའོ། །ཤཱ་རིའི་བུ་བྱ་བ་ཡོད་པའི་ཆོས་ཀུན་ནི་རིག་པར་རུང་། ཤེས་པར་རུང་ངོ་། །སྟོང་པ་ནི་རིག་པར་རུང་བ་མ་ཡིན་ནོ། །ཤེས་པར་རུང་བ་ཡང་མ་ཡིན། བསམ་པ་རུང་བ་མ་ཡིན་ཏེ། དེ་ལྟ་བས་ན་མིང་སྟོང་
པའོ། །ཤཱ་རིའི་བུ་སྟོང་པའི་འདུ་ཤེས་ནི་བསམ་པས་ཐོབ་པ་མ་ཡིན་ནོ། །ཅིའི་ཕྱིར་ཞེ་ན། སྟོང་པ་འདུ་ཤེས་མེད་པའི་ཕྱིར་རོ། །དེ་ལྟ་བས་ན་མིང་སྟོང་པའོ། །ཤཱ་རིའི་བུ་ཅིའི་ཕྱིར་ཞེ་ན། སྟོང་པའི་ལས་སྤྱོད་པ་བཤད། འདུ་ཤེས་ཐམས་ཅད་མི་སེམས། 
སྟོང་པའི་འདུ་ཤེས་ལ་ཐུག་གི་བར་དུ་འང་མི་སེམས་པ་དེའི་མིང་སྟོང་པ་སྤྱོད་པ་ཞེས་བྱའོ། །ཤཱ་རིའི་བུ་འདུ་ཤེས་ཀྱི་མིང་སེམས་ལ་བསམ་པ་ཡོད་དོ་ཅོག་གི་མིང་འདུ་ཤེས་ཤེས་བྱའོ། །ཅི་ཡང་བསམ་པ་མེད་པ་ནི་འདུ་ཤེས་མེད་པ་སྟེ། འདུ་ཤེས་དང་བྲལ་བས་
ན་མིང་འདུ་ཤེས་མེད་པ་ཞེས་བྱའོ། །འདུ་ཤེས་ལེན་པ་ལ་འབྲང་བ་ནི་ཀུན་ཡོན་པོ་མཐོང་བ་ཡིན་ནོ། །ཅིའི་ཕྱིར་ཞེ་ན། ཤཱ་རིའི་བུ་འཕྲུལ་གྱི་ཆོས་ལ་སྟོང་པ་ཞི་བ་ཐོབ་ཏུ་འཛིན་ན། ཀུན་ཡོན་པོ་མཐོང་བར་ལྟུང་བ་ན་ཚིག་གིས་བཤད་པ་དང་། འཆད་པ་
ལྟ་སྨོས་ཀྱང་ཅི་དགོས། དེ་ལྟ་བུའི་སྟོང་པའི་ཆོས་ཅི་སྤྱད་ན་བཤད་དུ་རུང་། ཤཱ་རིའི་བུ་སངས་རྒྱས་ཀྱིས་ཅིའི་ཕྱིར་སྐད་དང་ཚིག་གིས་བཤད་པ་ཀུན་མིང་ཡོན་པོ་ཞེས་བྱའོ། །ཆོས་སོ་ཅོག་ལ་ཁོང་དུ་ཆུད་པར་མི་ནུས་པ་དེ་ནི་ཀུན་ཚིག་བཤད་པས་བསྒྲིབས་

49-1-155a

པའི་ལན་ཏེ། དེ་ལྟ་བས་ན་ཡང་དག་པར་གཤེགས་པས་སྨྲ་བའི་ཚིག་ཀུན་ཡོན་པོ་ཡིན་པར་མཁྱེན་ཏེ། སྨྲ་བའི་ཚིག་ཅུང་ཟད་ཡན་ཆད་ཀྱང་བདེན་པར་མི་རུང་ངོ་། །ཤཱ་རིའི་བུ་སངས་རྒྱས་རྣམས་ཀྱི་བླ་ན་མེད་པའི་གཡུང་དྲུང་རྫོགས་པའི་བྱང་ཆུབ་ལ་
འདུ་ཤེས་ཀྱང་མེད། སེམས་ཀྱང་མེད་དོ། །ཅིའི་ཕྱིར་ཞེ་ན། ཡང་དག་པར་གཤེགས་པས་ཆོས་ལ་ངོ་བོ་ཉིད་ཐོབ་པའང་མེད། སེམས་ཐོབ་པའང་མེད་དོ། །ཤཱ་རིའི་བུ་ཡང་དག་པར་གཤེགས་པས། ཅིའི་ཕྱིར་བསམ་པའི་གནས་ཡོད་པར་བཤད། ཤཱ་རིའི་བུ་
ཆོས་ཀྱི་ཡི་གེ་ལས་བཤད་པ། མི་ལ་ལ་ཞིག་གཞི་བསམ་པའི་གནས་ཐོབ་ན། མི་དེས་ཆོས་སོ་ཅོག་གི་ངོ་བོ་ཉིད་ཐོབ་པར་ནུས་ཏེ། རང་གི་ལུས་ཐོབ་པར་ནུས། བདག་ཏུ་ལྟ་བ་ཐོབ། གང་ཟག་ཐོབ་སྟེ། དེ་ནི་བདེན་པ་ཡོང་མེད་དོ། །ཆོས་ཀྱི་མཚན་མ་ཐ་དད། 
སྟོང་པ་ཐ་དད། སྟོང་པ་བསྟན་པའི་ཕྱིར་བསམ་པའི་གནས་བཤད་དོ། །གཞི་བསམ་པའི་གནས་ཀྱི་ངོ་བོ་ཉིད་ལ་ངོ་བོ་ཉིད་མེད། གནས་མེད། བསམ་པའང་མེད། བཤད་པའང་མེད། འདོད་ཆགས་ཀྱང་མེད་དོ། །སེམས་ཀྱི་ངོ་བོ་ཉིད་ཀྱང་མེད་ན་སེམས་ཀྱི་གནས་མེད་པ་
ལྟ་སྨོས་ཀྱང་ཅི་དགོས། དེ་བས་ན་ཡང་དག་པར་གཤེགས་པས་མིང་སེམས་ཀྱི་གནས་ཤེས་བཤད་དོ། །ཤཱ་རིའི་བུ་ཆོས་སོ་ཅོག་ལ་ཡང་དག་པར་ངོ་བོ་ཉིད་དེ་སྐྲ་སྤུའི་ཉག་མ་བཅུ་ཚལ་གྱི་བརྒྱ་ཆ་གཅིག་ཙམ་ཞིག་ཡོད་དུ་ཟིན་ན་དེས་སངས་རྒྱས་ཀྱི་ཚིག་རྣམས་འཇིག་
རྟེན་དུ་མི་འགྱུར་ཏེ། མཐར་ཆོས་སོ་ཅོག་གི་ངོ་བོ་ཉིད་སྟོང་པར་ཡང་མི་བཤད་དོ། །ཤཱ་རིའི་བུ་སངས་རྒྱས་ཀྱི་ཆོས་སོ་ཅོག་ནི་བདེན་པར་སྟོང་པ་སྟེ། ངོ་བོ་ཉིད་མེད་ཅིང་མཚན་མ་གཅིག་པུ་སྟེ། དེ་ནི་མཚན་མ་མེད་པར་ཡང་དག་པར་གཤེགས་པ་ཀུན་གྱིས་གཟིགས་
སོ། །ཡང་དག་པར་གཤེགས་པ་དེའི་ཕྱིར་བསམ་པའི་གནས་ཡོད་ཅེས་བཤད་དོ། །ཤཱ་རིའི་བུ་བསམ་པའི་གནས་ནི་མིང་གནས་མེད། གནས་མེད་པའང་མེད་ཅེས་བྱའོ། །བསམ་པ་མེད། བསམ་པའི་ལས་ཀྱང་མེད། འདུ་ཤེས་མེད། རྣམ་པར་བརྟག་པའང་མེད། ཡིད་
མེད། ཡིད་ཀྱི་ལས་ཀྱང་མེད། བསམ་པ་མེད། བསམ་པའི་ལས་ཀྱང་མེད། ཆོས་མེད། ཆོས་ཀྱི་མཚན་མའང་མེད། དེ་ཀུན་འདུས་གྱེས་མེད་པས་ན་འཛངས་ཤིང་འཕྲུལ་བའི་མིང་རྣམ་པར་བརྟགས་པ་མེད་ཅེས་བྱ་སྟེ། དེའི་མིང་བསམ་པའི་གནས་ཤེས་བྱའོ། །

49-1-155b

ཡང་དག་པར་གཤེགས་པས་དེའི་ཕྱིར་བསམ་པའི་གནས་ཡོད་ཅེས་བཤད་དོ། །ཅི་ཡང་མེད་པའི་ཕྱིར་བསམ་པའི་གནས་ཤེས་བྱའོ། །སངས་རྒྱས་བསམ་པའི་ཕྱིར་མིང་བསམ་པའི་གནས་ཤེས་བྱའོ། །ཤཱ་རིའི་བུ་ཇི་ལྟར་ན་མིང་སངས་རྒྱས་བསམ་པ་ཞེས་བྱ། 
ཅི་ཡང་མེད་པར་མཐོང་བ་ནི་མིང་སངས་རྒྱས་བསམ་པ་ཞེས་བྱའོ། །ཤཱ་རིའི་བུ་སངས་རྒྱས་ཀུན་ནི་དཔག་ཏུ་མེད། བསམ་གྱིས་མི་ཁྱབ། བརྗོད་ཀྱིས་མི་ལང་ངོ་། །གཞུང་དེ་ལྟ་བས་ན་ཅི་ཡང་མེད་པར་མཐོང་བ་ནི་མིང་སངས་རྒྱས་བསམ་པ་ཞེས་བྱ་སྟེ། བདེན་པར་མིང་རྣམ་
པར་བརྟག་པ་མེད་དོ། །སངས་རྒྱས་ཆོས་སོ་ཅོག་ལ་རྣམ་པར་བརྟགས་པ་མེད་པས་ན། སེམས་ལ་རྣམ་པར་བརྟགས་པ་མེད་ན་གདོད་སངས་རྒྱས་བསམ་པ་ཡིན་ཞེས་བྱའོ། །ཡང་གཅིག་དུ་ན་ཆོས་སོ་ཅོག་གི་བདེན་པའི་མཚན་མ་མཐོང་ན་མིང་སངས་རྒྱས་མཐོང་
ཞེས་བྱའོ། །གང་ལ་སོགས་པའི་མིང་ཆོས་སོ་ཅོག་གི་བདེན་པའི་མཚན་མ་ཞེས་བྱས་ན་དེ་ནི་ཆོས་སོ་ཅོག་མཐའ་ཡུན་དུ་སྟོང་ཞིང་ཅི་ཡང་མེད་པའོ། །དེ་ལྟ་བས་ན་མཐའ་ཡུན་དུ་སྟོང་ཞིང་ཅི་ཡང་མེད་པའི་ཆོས་ནི་སངས་རྒྱས་བསམ་པའོ། །ཡང་གཅིག་ཏུ་ན་དེ་ལྟ་བུའི་
ཆོས་ཀྱི་ནང་ན་སེམས་ཅུང་ཟད་ཡན་ཆད་ཀྱང་ཐོབ་པར་མི་རུང་སྟེ། དེའི་མིང་སངས་རྒྱས་བསམ་པ་ཞེས་བྱའོ། །ཤཱ་རིའི་བུ་དེའི་མིང་སངས་རྒྱས་བསམ་པའི་ཆོས་ཏེ། སྨྲ་བའི་ཚིག་གི་ལམ་ཆད་ལ་སེམས་སོ་ཅོག་ལས་འདས་ཤིང་བྱུང་སྟེ། སེམས་ཐོབ་པར་མི་རུང་བ་
དེའི་མིང་སངས་རྒྱས་བསམ་པའོ། །ཤཱ་རིའི་བུ་སེམས་སོ་ཅོག་ཐམས་ཅད་ནི་ཀུན་མཚན་མ་སྟོང་པ་ཞི་བ་སྟེ། ཆོས་དེ་བཞིན་དུ་མ་གལ་ན་དེ་ནི་མིང་སངས་རྒྱས་བསམ་པ་སྤྱོད་པ་སྦྱོང་བ་ཞེས་བྱའོ། །ཁ་དོག་སྤྱད་དེ་སངས་རྒྱས་བསམ་དུའང་མི་རུང་ངོ་། །ཅིའི་ཕྱིར་ཞེ་ན། 
ཁ་དོག་བསམས་གཟུགས་བླངས་བྲོ་ལ་ཆགས་ན་རྣམ་པར་ཤེས་པ་ཞེས་བྱའོ། །གཟུགས་མེད། ཁ་དོག་མེད། རྐྱེན་མེད། རང་བཞིན་མེད་ན་མིང་སངས་རྒྱས་བསམ་པའོ། །དེ་ལྟ་བས་ན་རྣམ་པར་བརྟགས་པ་མེད། བླང་བ་མེད། དོར་བ་མེད་ན། སངས་རྒྱས་བསམ་པ་ཡང་དག་
པ་ཡིན་པར་མངོན་ནོ། །ལེའུ་གསུམ་སྟེ་ཆོས་བསམ་པའི་ལེའུའོ།། །། དེའི་ཚེ་ཤཱ་རིའི་བུས་སངས་རྒྱས་ལ་གསོལ་པ། བཅོམ་ལྡན་འདས་ཇི་ལྟར་ན་མི་གཞན་ལ་ཆོས་འདི་བཤད་ན་ངན་པའི་བཤེས་གཉེན་ཞེས་བགྱི། བཅོམ་ལྡན་འདས་ཇི་ལྟ་

49-1-156a

བུར་ན་མི་བཞན་ལ་ཆོས་འདི་བཤད་ན་དགེ་བའི་བཤེས་གཉེན་ཞེས་བགྱི། ཤཱ་རིའི་བུ་མི་ལ་ལ་ཞིག་གིས་དགེ་སློང་གཞན་ལ་བསྟན་པ་ཁྱོད་ཤེས་པར་གྱིས་ཤིག །སངས་རྒྱས་བསམ་པ་ནི་སྟོང་པའོ། །རྐྱེན་གྱི་གནས་བསམ་པ་དེ་ནི་བསམ་
པའི་མི་རིགས་སོ། །ཁྱོད་ཀྱིས་སྟོང་པ་བསམས་ན་བསམ་པ་ཡང་སྟོང་པ་སྟེ། རང་བཞིན་མེད་པའི་སྟོང་པ་དེས་ཁ་དོག་གི་འདུ་ཤེས་ཆོད་པར་ནུས། འདུ་ཤེས་ལེན་པ་ཆོད་པར་ནུས་སོ། །མི་དེས་དེའི་ཚེ་འདུ་ཤེས་མེད་པའང་མ་ཐོབ་ན་སེམས་ལྟ་སྨོས་ཀྱང་ཅི་
དགོས། མི་དེས་དེའི་ཚེ་ཅི་ཡང་ཡོད་མེད་ལ་སྟོང་པར་ཞི་སྟེ། རང་བཞིན་མེད་ན་འདུ་ཤེས་རྣམས་མི་འདུའོ། །ཆོས་སོ་ཅོག་ཞི་བར་བྱས་ན་དེའི་བསམ་པའི་སྤྱོད་པ་སྦྱོང་བ་ཞེས་བྱའོ། །སངས་རྒྱས་པའི་མིང་ནི་དགེ་མི་དགེ་དང་། ཚོར་བ་དང་བརྟག་པ་ཐམས་
ཅད་ཞི་བ་ཞེས་བྱའོ། །ཚོར་བའང་མེད་བརྟག་པའང་མེད་ལ་སྟོང་ཞིང་འདུ་ཤེས་མེད་ན་མིང་སངས་རྒྱས་བསམ་པ་ཞེས་བྱའོ། །ཅིའི་ཕྱིར་ཞེ་ན། ཚོར་བ་དང་བརྟག་པ་སྤྱད་དེ། སངས་རྒྱས་རྣམས་བསམ་པའི་མི་རིགས་སོ། །ཚོར་བའང་མེད། བདག་པོའང་མེད་ན་
མི་གཙང་དག་པས་སངས་རྒྱས་བསམ་པ་ཞེས་བྱའོ། །སེམས་དེའི་ནང་ན་ཕྲ་ཤས་བསམ་པའི་སེམས་ཀྱི་ལས་ཀྱང་མེད་ལ། ལུས་དང་། ཁའི་ལས་མེད་པ་ལྟ་སྨོས་ཀྱང་ཅི་དགོས། ཡང་སངས་རྒྱས་བསམ་པ་ཞེས་བྱ་བ་ནི་འདུ་ཤེས་ཐམས་ཅད་དང་བྲལ་ཏེ། 
འདུ་ཤེས་ཐམས་ཅད་སེམས་ལ་མི་འདུག་ཅིང་རྣམ་པར་བརྟག་པ་མེད། མིང་མཁན་མེད། བསྒྲིབས་ཤིང་ཐོགས་པ་མེད། འདོད་པ་མེད། ཐོབ་པ་མེད། ཚོར་བ་དང་། བརྟག་པ་མི་གཡོ། ཅིའི་ཕྱིར་ཞེ་ན། ཤཱ་རིའི་བུ་བསམ་པ་བཞིན་དུ་འདུ་ཤེས་གཡོས་
པ་ཐམས་ཅད་ནི་ཀུན་ཡོན་པོ་མཐོང་བ་ཡིན་ནོ། །ཤཱ་རིའི་བུ་ཅིའང་མེད་པ་དེ་བཞིན་དུ་ཚོར་བའང་མེད། བརྟག་པའང་མེད། སྐྱེ་བའང་མེད། འགོག་པའང་མེད་པ་དེ་ལྟ་བུ་ཁོང་དུ་ཆུད་པ་ནི་མིང་སངས་རྒྱས་བསམ་པ་ཞེས་བྱ་སྟེ། དེ་ལྟ་བུའི་སེམས་ཀྱི་ནང་ན་འདོད་པ་
འང་མེད། ཆགས་པའང་མེད། ལོག་པའང་མེད། མ་ལོག་པའང་མེད། མིང་མེད། མཚན་མའང་མེད་དོ། །ཤཱ་རིའི་བུ་འདུ་ཤེས་ཀྱང་མེད། སྨྲ་བ་ཡང་མེད་ན་གདོད་མིང་སངས་རྒྱས་བསམ་པའོ། །དེའི་ནང་ན་སེམས་ཕྲ་ཤས་ཆུང་ངུ་འང་མེད་ན། སྦོམ་པོ་དང་། ཁ་དང་

49-1-156b

ལུས་དང་། ཡིད་ཀྱི་ལས་ལྟ་སྨོས་ཀྱང་ཅི་དགོས་ཏེ། ལུས་ལུས་དང་། ཁ་དང་། ཡིད་ཀྱི་གནས་ཀྱང་མེད་པའོ། །བླངས་པ་ཡང་མེད། བསྡུས་པ་ཡང་མེད། འཐབ་པ་ཡང་མེད། རྩོད་པ་ཡང་མེད། བསམ་པ་ཡང་མེད། རྣམ་པར་བརྟག་པའང་མེད། སྟོང་པ་མི་གཡོ་
ཞིང་རང་བཞིན་མེད་ལ། ཚོར་བ་དང་། བརྟག་པ་ཀུན་ཞི་བ་དེའི་མིང་སངས་རྒྱས་བསམ་པའོ། །ཤཱ་རིའི་བུ་མི་ལ་ལ་ཞིག་གིས་དེ་ལྟ་བུའི་སེམས་འབྱོར་གྲུབ་ན། གླིང་བཞིའི་ས་བསྒྱུར་བར་བྱ་ན་ཡང་ཡིད་བཞིན་དུ་བསྒྱུར་ནུས་སོ། །བརྒྱ་སྟོང་འབུམ་གྱི་བདུད་
ཀྱང་ཕེབས་པར་ནུས། ནམ་རིག་པས་བསྒྲིབས་པ་ལྟ་སྨོས་ཀྱང་ཅི་དགོས་ཏེ། མི་བདེན་པས་བསླུས་པའི་རྐྱེན་ལས་ལངས་པ་སྟེ། མི་འགྱུར་བའི་མཚན་མ་མེད་པ་ཆོས་དེ་ལྟ་བུ་ཡིན་ཏེ། འདུ་ཤེས་མེད། འདྲན་ཏོར་མེད། སྐྱེ་བ་མེད། འགོག་པ་མེད་དེ། བཤད་དུ་འང་
མི་རུང་། རྣམ་པར་བརྟག་ཏུའང་མེད། མུན་པའང་མེད། སྣང་བའང་མེད། བདུད་དང་བདུད་ཕལ་ཀུན་གྱིས་ཀྱང་ཚོད་གཟུང་མི་ནུས་ན། འཇིག་རྟེན་གྱི་ཐ་མལ་པས་ཚིག་གིས་བཤད་པ་འབའ་ཞིག་གིས་སྤྱད་དེ་བསྟན་བསླབས་པ་ཡོད་པས་ཚིག་དེ་སྐད་དུ་བྱས་
སུ་ཟད་དོ། །ཁྱོད་སངས་རྒྱས་བསམ་པའི་ཚེ་འདུ་ཤེས་ཅུང་ཟད་མ་བླངས་ཤིག །འདྲན་ཏོར་མ་སྐྱེས་ཅིག །རྣམ་པར་བརྟག་པ་མ་བྱེད་ཅིག །ཅིའི་ཕྱིར་ཞེ་ན། ཆོས་དེ་ཀུན་སྟོང་པ་སྟེ། ཉིད་ཀྱི་མཚན་མའང་མེད། གཅིག་གི་མཚན་མ་བསམ་པ་འང་མི་
རུང་སྟེ། མཚན་མ་མེད་པའོ། །དེའི་མིང་ཡང་དག་པར་དབེན་པར་སངས་རྒྱས་བསམ་པ་སྟེ། དེ་ནི་སྐྱེ་བའང་མེད། འགོག་པའང་མེད། མཚན་མ་མེད་པའོ། །ཅིའི་ཕྱིར་ཞེ་ན། ཡང་དག་པར་གཤེགས་པའི་མིང་ཁ་དོག་ཅེས་མི་བྱའོ། །མིང་གཟུགས་
ཤེས་མི་བྱའོ། །མིང་སེམས་ཤེས་མི་བྱའོ། །མིང་རྣམ་པར་རྟོག་པ་ཅེས་མི་བྱའོ། །ལོག་པའང་མ་ཡིན། མ་ལོག་པའང་མ་ཡིན། མ་བླངས། མ་བོར། ཐུབ་པའང་མ་ཡིན། ཤེས་རབ་ཀྱང་མ་ཡིན། རིག་པ་ཡང་མ་ཡིན། མ་རིག་པ་ཡང་མ་ཡིན། ཡང་
དག་པར་གཤེགས་པ་བཤད་དུ་མི་རུང་། བསམ་གྱིས་ཀྱང་མི་ཁྱབ་སྟེ། འདུ་ཤེས་མེད་དོ། །ཁྱོད་ད་མཚན་མ་ལེགས་པ་ལ་མ་སྲེག་ཅིག །འདྲན་ཏོར་བརྗོད་པ་ལ་མ་སྲེག་ཅིག །སངས་རྒྱས་ནི་ཆོས་སོ་ཅོག་ལ་ཆགས་པ་མེད། ཆོས་ཡོད་ཅིང་ཆགས་སུ་རུང་

49-1-157a

བ་དང་། དཔག་ཏུ་རུང་བ་ཡང་མ་མཐོང་ངོ་། །དེ་ལྟ་བུའི་མིས་སངས་རྒྱས་ལ་ཡང་ཐོབ་པར་རུང་ན་སེམས་ལྟ་སྨོས་ཀྱང་ཅི་དགོས། ཤཱ་རིའི་བུ་སྟོན་པ་མིང་དགེ་བའི་བཤེས་གཉེན་ཞེས་བྱའོ། །མཆོག་གི་གཞུང་གི་ནང་ན་ནི་འདི་ནི་དགེ་བའི་བཤེས་གཉེན་
ཡིན། འདི་ནི་ངན་པའི་བཤེས་གཉེན་ཡིན་ཞེས་གཅིག་ཏུ་ཆད་པ་མེད་དོ། །ཡང་ཤཱ་རིའི་བུ་དགེ་སློང་ལ་ལ་ཞིག་དགེ་སློང་གཞན་ལ་སྟོན་པ་དགེ་སློང་ཁྱོད་ཀྱིས་རྣམ་པར་ཕྱེ་ལ་ཆོས་རྣམས་ལ་ཞིབ་ཏུ་རྟོགས་ཏེ། ཆོས་ཀྱི་མཚན་མ་ཡང་མ་སེམས་ཤིག་ཅེས་བསྟན་ཏོ། །
དགེ་སློང་དེས་དེ་ལྟ་བུར་སྤྱད་སྦྱངས་པས་སེམས་ལ་ཐོགས་ཤིང་ཆག་པ་མེད་པས་ཆོས་སོ་ཅོག་གི་མཚན་མ་ཡང་གཅིག་པར་ཁོང་དུ་ཆུད་དེ་དེ་ནི་མཚན་མ་མེད་པའོ། །མི་དེ་ལ་ཆོས་ཀྱི་འདུ་ཤེས་མི་སྐྱེ་ན། བདག་ཏུ་ལྟ་བ་དང་། གང་ཟག་ཏུ་ལྟ་བའི་འདུ་ཤེས་མི་སྐྱེ་
བ་ལྟ་སྨོས་ཀྱང་ཅི་དགོས། ཤཱ་རིའི་བུ་ཁྱོད་ཀྱི་ཡིད་ལ་ཇི་སྙམ། ཆོས་ཀྱི་འདུ་ཤེས་སེམས་དེས་ཆོས་སོ་ཅོག་གི་ཞི་བར་ནུས་སམ། བཅོམ་ལྡན་འདས་མི་ནུས་སོ། །ཤཱ་རིའི་བུ་དཔེར་སྡོང་པོ་རྩ་བ་མེད་པས་ཡལ་ག་དང་། འདབ་མ་དང་། མེ་ཏོག་དང་། འབྲས་བུ་
སྨིན་པར་ནུས་པ་ཡོད་དམ་མེད། བཅོམ་ལྡན་འདས་མ་མཆིས་སོ། །འདི་ལྟ་སྟེ། ཤཱ་རིའི་བུ་མི་ལ་ལ་ཞིག་གིས་ཆོས་སོ་ཅོག་གི་རྩ་བའི་ཕྱི་མོ་མ་ཐོབ་པར་མི་དེས་ཆོས་སོ་ཅོག་གི་འདུ་ཤེས་སྐྱེ་བར་ནུས་སམ་མི་ནུས། བཅོམ་ལྡན་འདས་མི་ནུས་ལགས་སོ། །ཤཱ་
རིའི་བུ་མི་ལ་ལ་ཞིག་གིས་ཆོས་ཀྱི་འདུ་ཤེས་མི་བསམ་པ་ན། མི་དེས་ཆོས་སོ་ཅོག་ཞི་བར་ནུས་སམ། བཅོམ་ལྡན་འདས་མི་ནུས་ལགས་སོ། །མི་དེས་ཆོས་སོ་ཅོག་ཐོབ། ཆོས་ཀྱི་མཚན་མ་མ་ཐོབ། ཞི་བ་མ་ཐོབ། རྣམ་པར་ཡང་མི་རྟོག་སྟེ། སྐྱེ་བའང་མེད། 
འགོག་པའང་མེད་ན། མི་དེས་དེའི་ཚེ་མི་སྐྱེ་མི་འགོག་པས་མིང་མྱ་ངན་ལས་འདས་པ་ཐོབ་པ་ཞེས་མི་བྱའོ། །མིང་སྔོན་མྱ་ངན་ལས་འདས་པ་ཐོབ་པ་ཞེས་ཀྱང་མི་བྱའོ། །ཤཱ་རིའི་བུ་དེ་ལྟ་བུར་སྟོན་པ་ནི་མིང་དགེ་བའི་བཤེས་གཉེན་ཞེས་བྱའོ། །མཆོག་གི་གཞུང་
གི་ནང་ན་ནི་དགེ་བའི་བཤེས་གཉེན་ཡང་མེད། ངན་པའི་བཤེས་གཉེན་ཡང་མེད་དོ། །ཤཱ་རིའི་བུ་མི་ལ་ལ་ཞིག་གིས་དེ་ལྟ་བུའི་མཚན་མ་འབྱོར་གྲུབ་ན། འཇིག་རྟེན་ཡོད་དཀོན་ཏེ། ཕྱིན་ཅི་མ་ལོག་པ་ཐོབ་པས་ཡང་དག་པའི་བདེན་པ་མཐོང་སྟེ་དེ་

49-1-157b

ནི་དྲང་པོ་མཐོང་བ་ཞེས་བྱའོ། །ཡང་ཤཱ་རིའི་བུ་དྲང་པོ་མཐོང་བ་ནི་མིང་དྲང་པོ་བྱེད་དྲང་པོ་སྤྱོད། དྲང་པོའི་ལམ་དྲང་པོ་ཤེས་ཤེས་བྱ་སྟེ། ཕྱིན་ཅི་ལོག་མེད་ལ་བདེན་པ་བཞིན་དུ་མཐོང་བས་ན། ཡང་དག་པར་གཤེགས་པས་དྲང་པོ་མཐོང་བ་ཞེས་བཤད་དོ། །ཤཱ་
རིའི་བུ་སེམས་ཅན་ལ་ལ་ཞིག་ཕྱིན་ཅི་ལོག་མེད་པ་བདེན་པ་བཞིན་དུ་རྟོགས་པ་ནི་དྲང་པོ་མཐོང་བ་ཡོད་དོ། །ལ་ལ་ཞིག་བདག་ཏུ་ལྟ་བའི་འདུ་ཤེས་དང་། གང་ཟག་གི་འདུ་ཤེས་དང་། སེམས་ཅན་གྱི་འདུ་ཤེས་སྐྱེས་ན། དེ་ལྟ་བུའི་མི་ཀུན་ཡོན་པོའི་ལམ་དུ་
སྤྱོད་པར་མངོན་ནོ། །ཤཱ་རིའི་བུ་སངས་རྒྱས་དང་སློབ་མས་ནི་བདག་ཏུ་ལྟ་བ་ཡོད་པར་མ་བཤད། གང་ཟག་ཡོད་པར་མ་བཤད། སེམས་ཅན་མ་བཤད། ཚེ་སྲོག་ཡོད་པར་མ་བཤད། རྟག་ཆད་མ་བཤད། དེ་ལྟ་བས་ན། སངས་རྒྱས་དང་། སློབ་མ་ནི་
དྲང་པོ་མཐོང་བ་ཞེས་བྱའོ། །ཅིའི་ཕྱིར་ཞེ་ན། དྲང་པོར་རྟགས་ཏེ། ཕྱིན་ཅི་མ་ལོག་པའི་ཕྱིར་རོ། །ཤཱ་རིའི་བུ་ཐ་མལ་པ་ཐམས་ཅད་ཀྱིས་ནི་འདིའི་ནང་དུ་འཇུག་ནུས་པ་མེད་དོ། །ཅིའི་ཕྱིར་ཞེ་ན། ཐ་མལ་པ་ཐམས་ཅད་ལ་དྲང་པོ་མཐོང་བ་ཡང་མེད་དོ། །
ཡིད་བཞིན་འབྲང་བའི་དྲང་པོ་མཐོང་བ་འབའ་ཤིག་ཡོད་དོ། །མཉེན་དེས་པའི་བཟོད་པ་ཐོབ་ན་བདེན་པ་བཞིན་དུ་མ་ནུས་སོ། །ཤཱ་རིའི་བུ་དེའི་མིང་དྲང་པོ་མཐོང་བ་དང་། ཡོན་པོ་མཐོང་བ་ཐ་དད་ཅེས་བྱ་སྟེ། བདེན་པ་བཞིན་དུ་མཐོང་བས་ན། མིང་དྲང་པོ་མཐོང་
བ་ཞེས་བྱའོ། །འཇིག་རྟེན་གྱི་སྐྱིད་པ་ནོར་ཁེ་སྐྱེ་ཞིང་འཕེལ་བའི་ཞར་ལས་མཐོང་བ་ནི་འཇིག་རྟེན་གྱི་དྲང་པོ་མཐོང་བ་ཡིན་ཏེ། དེ་ཀུན་བརྙས་བསླུས་པ་ཡིན་གྱིས་སྐྱེ་ཤི་ལས་མི་ཐར་རོ། །ཤཱ་རིའི་བུ་སངས་རྒྱས་ཀྱིས་བཤད་པ་ལ་འཇིག་རྟེན་གྱིས་དྲང་པོ་མཐོང་བ་ནི་ལེ་ལོ་བླ་
དྲོད་དང་ཐ་མ་ཞན་པའི་ཆོས་ཡིན་ཞེས་བཤད་དོ། །འཛངས་ཤིང་འཕྲུལ་པ་ནི་དེ་ལྟ་བུའི་སེམས་མི་བྱེད་དེ། དེ་དྲང་པོ་མཐོང་བ་ཡིན་ནོ། །དེ་ནི་ཡོན་པོ་མཐོང་བ་ཡིན་ནོ། །ཅི་ལྟ་ཞེ་ན། མཐོང་ངོ་ཅོག་ཐམས་ཅད་ནི་ཀུན་སྒྱུ་མ་མི་བདེན་པའི་རྐྱེན་ལས་ལངས་སོ། །ཤཱ་རིའི་
བུ་འདི་སྙམ་དུ་བསམས་ཏེ། འདི་ནི་དྲང་པོ་མཐོང་བ་སྙམ་དུ་བྱེད་ན་མི་དེ་ནི་ཡོན་པོ་མཐོང་བ་ཡིན་ནོ། །ཤཱ་རིའི་བུ་འཕྲུལ་གྱི་ཆོས་ཀྱི་ནང་ན་མཐོང་ངོ་ཅོག་གི་རྩ་བའི་ཕྱི་མོ་བྱུང་སྟེ་བཅད། སྨྲ་བའི་ཚིག་གོ་ཅོག་གི་ལམ་བཅད་དེ། དཔེར་ན་ནམ་མཁའི་ནང་གི་ལག་པ་དང་

49-1-158a

མཚུངས་ཏེ། ཅི་ཡང་རེག་ཅིང་ཐོགས་པ་མེད་དོ། །དགེ་སྦྱོང་རྣམས་ཀྱི་ཆོས་ནི་ཀུན་དེ་བཞིན་པའི་རིགས་སོ། །ལེའུ་བཞི་སྟེ་དགེ་འདུན་བསམ་པའི་ལེའུའོ།། །། ཤཱ་རིའི་བུས་སངས་རྒྱས་ལ་གསོལ་པ། བཅོམ་ལྡན་
འདས་གང་ལ་སོགས་པ་འཕྲུལ་གྱི་དགེ་འདུན་ཞེས་བགྱི། ཤཱ་རིའི་བུ་མི་ལ་ལ་ཞིག་གིས་ཆོས་སོ་ཅོག་ཐམས་ཅད་ཀུན་སྐྱེ་བའང་མེད། འགོག་པའང་མེད། མཚན་མ་འང་མེད་པར་ཡིད་ཆེས་ཤིང་ཤེས་ལ་ཁོང་དུ་ཆུད་པར་ནུས་པ་དེ་དེ་ལྟ་བུའི་བཟོད་པ་འབྱོར་གྲུབ་པས་ང་ཡང་
མི་ཐོབ་ན། རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་ཐོབ་པ་ལྟ་སྨོས་ཀྱང་ཅི་དགོས། དགྲ་བཅོམ་པ་ལྟ་སྨོས་ཀྱང་ཅི་དགོས། ཆོས་མི་ཐོབ་པ་ལྟ་སྨོས་ཀྱང་ཅི་དགོས། ཕྱི་མོ་མི་ཐོབ་པ་ལྟ་སྨོས་ཀྱང་ཅི་དགོས། ལམ་མི་ཐོབ་པ་ལྟ་སྨོས་ཀྱང་ཅི་དགོས། 
དེ་ལྟ་བུ་ལ་སོགས་པའི་དོན་མི་ཐོབ་པ་ལྟ་སྨོས་ཀྱང་ཅི་དགོས་ཏེ། དེ་ནི་མིང་འཕྲུལ་གྱི་དགེ་འདུན་ཏེ་དེས་ཀྱང་མི་འཐོབ་བོ། །ཡང་ཤཱ་རིའི་བུ་སེམས་ཅན་ལ་སྐྱེ་བ་མེད་པ་དང་། འགོག་པ་མེད་པ་དང་། མཚན་མ་མེད་པའི་ཆོས་ཡིད་ཆེས་ཤིང་ཤེས་པ་ཉུང་ངོ་། །ལ་ལ་ཞིག་གིས་སྐྱེ་བ་
འང་མེད། འགོག་པ་འང་མེད། མཚན་མའང་མེད་པའི་ཆོས་ཡིད་ཆེས་པར་ནུས་ན། སེམས་ལ་ཕྱིན་ཅི་ལོག་མེད་དེ། གཅིག་གིས་གཅིག་ཤེས་རིག་ལ་ཆོས་སྤྱད་དེ། འབྱོར་འདུན་པས་ཕྱིས་ཡོད་པ་མི་མྱོང་ངོ་། །འཇིག་རྟེན་ཐམས་ཅད་སྒྱུ་མ་མི་བདེན་པའི་རྐྱེན་འབའ་
ཤིག་ལས་བྱུང་བར་རིག་པས། མི་དེ་ཕྱིན་ཆད་ད་ལྟར་གྱི་ལུས་ལ་མི་འདུག་གོ། །རྒྱུ་རྐྱེན་དེ་ལྟ་བས་ན། མིང་འཕྲུལ་གྱི་དགེ་འདུན་ཞེས་བྱར་རུང་ངོ་། །མི་དེས་སྨྲ་བའི་ཚིག་དེ་ལ་ཐོབ་པ་ཡང་མེད། མིང་མཚན་མ་རྣམས་ལས་འདུས་པ་དྲན་གྱི། མཚན་མ་དང་འདྲན་ཏོར་གྱི་
དོན་ཀྱང་མེད་དོ། །དེའི་མིང་དགེ་འདུན་དཀོན་མཆོག་ཅེས་བྱ་སྟེ། ཡོན་ལེན་པའི་རིགས་ཏེ། ཕྱིན་ཅི་ལོག་མེད་པའི་ཡང་དག་པའི་བདེན་པ་གཞུང་ཐོབ་བོ། །མི་དེས་དེ་ལྟ་བུའི་ཐབས་སྤྱད་པས་དགེ་འདུན་བསམས་ན། དོན་དེ་ཡང་སྟོང་པའོ། །ཤཱ་རིའི་བུ་དེ་ལྟ་བུར་སྟོན་པ་ནི་མིང་
དགེ་བའི་བཤེས་གཉེན་ནོ། །ཤཱ་རིའི་བུ་སྨྲ་བའི་ཚིག་ཐམས་ཅད་ཀྱི་ལམ་ཆོད་ན་མིང་འཕྲུལ་གྱི་དགེ་འདུན་ཞེས་བྱའོ། །ཅིའི་ཕྱིར་ཞེ་ན། འཕྲུལ་གྱི་ཆོས་ཀྱི་ནང་ན་སྨྲ་བའི་ཚིག་རྒྱུས་ཡང་དགེ་བའི་བདེན་པའི་གཞུང་བཤད་ན་དེ་ལྟ་བུའི་སྨྲ་བའི་ཚིག་ཀྱང་ཐོབ་པར་མི་རུང་ངོ་། །

49-1-158b

དེ་ལྟ་བས་ན་སྨྲ་བའི་ཚིག་རྣམས་ཆོད་པ་ནི་འཕྲུལ་གྱི་དགེ་འདུན་ཞེས་བྱ་བར་མངོན་ནོ། །ཤཱ་རིའི་བུ་མི་ཞིག་ན་རེ། ཆོས་འདིའི་ནང་ན་ཚིག་གིས་བཤད་པ་མེད། ངེས་པ་མེད་ན་ཇི་ལྟར་མིང་དགེ་འདུན་ཞེས་བྱ་ཞེས་ཟེར་བ་ཞིག་ཡོད་ན། ཤཱ་རིའི་བུ་ངའི་འདིའི་ནང་ན་ལན་
འདི་སྐད་ཅེས་བླན་པ་ཡོད་དེ། དགེ་འདུན་གྱི་མིང་བདེན་པ་བཞིན་དུ་དོན་སྟོན་པ་ཞེས་བྱས་ན། དོན་དེ་ངེས་པར་ཐོབ་པའང་མི་རུང་ངོ་། །སློབ་པའི་གྲྭ་ལྷན་ཅིག་ལ་བཟོད་པ་ཡང་གཅིག །རོ་ཡང་གཅིག་པ་དེའི་དོན་ཀྱང་འཇིག་རྟེན་གྱི་ཐ་མལ་པའི་ཚིག་བཤད་པས་སྤྱད་ཀྱི། 
མཆོག་གི་གཞུང་མ་ཡིན་ནོ། །མཆོག་གི་གཞུང་གི་ནང་ན་ངེས་པར་བདེན་པ་མེད་དེ། མིང་དགེ་འདུན་ང་ཆོས་རྟག་སྟེ། མི་འཇིགས་ཤེས་བྱའོ། །འཕྲུལ་གྱི་མིས་ཆོས་འདི་ཡོད་ཅེས་བཤད་དུ་ཟིན་ན་དེ་ནི་དགོས་པའོ། །ཅིའི་ཕྱིར་ཞེ་ན་ཞེས་བྱས་ན། མི་དེ་ལྟ་བུའི་རྣམ་པར་བརྟག་
པར་བྱ་སྟེ། སྐྱེས་པ་ཡིན། བུད་མེད་ཡིན། ལྷ་ཡིན། ཀླུ་ཡིན། གནོད་སྦྱིན་ཡིན། དྲི་ཟ་ཡིན། གྲུལ་བུམ་ཡིན། ཆོས་ཡིན། ཆོས་མ་ཡིན་ཞེས་དེ་ལྟ་བུར་རྣམ་པར་རྟག་པ་བྱས་ནས་དོན་རྣམ་པ་མང་པོ་ཐོབ་སྟེ། དོན་རྣམ་པ་མང་པོ་ཐོབ་པས་ན་ཚིག་འདི་སྐད་བྱས་སོ། །འདུག་
པ་ཡིན། ཉལ་བ་ཡིན། སོང་བ་ཡིན། སྡོད་པ་ཡིན་ཞེས་ཟེར་རོ། །འཕྲུལ་གྱི་མིས་ནི་ཆོས་སོ་ཅོག་གི་བདེན་པའི་མཚན་མ་ཐོབ་པས་ན་རྣམ་པར་མི་རྟོག་སྟེ། སྐྱེས་པ་ཡིན། བུད་མེད་ཡིན། ལྷ་ཡིན། ཀླུ་ཡིན་པ་དང་། ཆོས་ཡིན་པ་དང་། ཆོས་མ་ཡིན་པ་ལ་ཐུག་
གི་བར་དུ་རྣམ་པར་ཡང་མི་རྟོག་གོ། །རྣམ་པར་མི་རྟོག་པས་ན་ཆོས་སོ་ཅོག་མ་ཐོབ་བོ། །ཆོས་སོ་ཅོག་མ་ཐོབ་པས་འདི་སྐད་དུ་འདུག་པ་ཡིན། ཉལ་བ་ཡིན། འགྲོ་བ་ཡིན། སྡོད་པ་ཡིན་ཞེས་བཤད་པར་བྱ་ནུས་སམ་མི་ནུས། བཅོམ་ལྡན་འདས་མི་ནུས་ལགས་སོ། །
ཤཱ་རིའི་བུ་མི་ལ་ལ་ཞིག་ན་རེ་སྐྱེས་པ་ཡིན། བུད་མེད་ཡིན། ལྷ་ཡིན། ཀླུ་ཡིན་པ་དང་། ཆོས་ཡིན་པ་དང་། ཆོས་མ་ཡིན་པ་ལ་ཐུག་པ་ཡིན་ཞེས་ཟེར་ན། མི་དེས་བཤད་དོ་ཅོག་སྒྱུ་མ་བདེན་པ་ཡིན་ནམ། བཅོམ་ལྡན་འདས་སྒྱུ་མ་མི་བདེན་པ་ལགས་སོ། །ཤཱ་རིའི་བུ་སྒྱུ་མ་
མི་བདེན་པ་དེའི་ནང་དུ་མ་གཏོགས་པ་ནི་མིང་འཕྲུལ་གྱི་དགེ་འདུན་ཞེས་བྱའོ། །ཕྱིན་ཅི་མ་ལོག་པས་ནི་མིང་འཕྲུལ་གྱི་དགེ་འདུན་ཞེས་བྱའོ། །ཤཱ་རིའི་བུ་མི་དགེ་བ་ཡོད་དོ་ཅོག་དང་། ཤེས་པར་རུང་བ་ཡོད་དོ་ཅོག་དང་། དེ་ལྟ་བུའི་མིང་དགེ་བའི་ཆོས་ཐམས་ཅད་ནི་མིང་མཚན་མ་

49-1-159a

སྤྱད་པས་ཕྱི་མོ་བྱས་སོ། །འཛངས་ཤིང་འཕྲུལ་པའི་ཆོས་འདིའི་ནང་ན་མིང་དང་མཚན་མ་རྣམས་ཆད་དོ། །མིང་དང་མཚན་མ་ཡང་མི་སེམས་ཏེ། མིང་དང་མཚན་མ་ཐོབ་ན་ཇི་ལྟ་བུར་འཕྲུལ་གྱི་དགེ་འདུན་ཡིན་ཞེས་ཟེར་ན། མིང་དང་མཚན་མ་ཀུན་ཆོད་ན་མིང་
འཕྲུལ་གྱི་དགེ་འདུན་ཞེས་བྱའོ། །ཆོས་ཀྱི་གནས་ཡོད་ཟིན་ན། གཞིག་ཏུ་འང་རུང་། གཅད་དུའང་རུང་ངོ་། །འཕྲུལ་གྱི་ཆོས་ཀྱི་ནང་མིང་མེད། མཚན་མ་མེད་སྨྲ་བའི་ཚིག་མེད་དེ། སྨྲ་བའི་ཚིག་ཀུན་ཆད་དེ་འདུས་ཤིང་གྱེས་པ་མེད་དོ། །ལ་ལ་ཞིག་ན་རེ་དགེ་འདུན་མེད་ཅེས་ཟེར་ན། འཕྲུལ་གྱི་
དགེ་འདུན་གཤིག་པ་སྟེ། དེ་ཡང་མི་རུང་ངོ་། །དེ་ནི་མིང་དང་མཚན་མ་སྒྱུ་མ་མི་བདེན་པའི་འདུ་ཤེས་ཀྱི་ལན་ཏེ། ཡོན་པོ་མཐོང་བ་རྣམས་མང་པོ་ལ་ཆགས་སོ། །ཡོན་པོ་མཐོང་བ་དེའི་ལན་གྱིས་ཡང་ཕྱི་མའི་ལུས་མནོས་ཏེ། མཐོང་བ་རྣམས་ལ་འདོད་ཆགས་
པས་ལྔ་ཕུང་སྐྱེས་སོ། །ཤཱ་རིའི་བུ་ལྔ་ཕུང་གི་ཀུན་སྒྱུ་མ་མི་བདེན་པ་ལ་ཆགས་པ་ཡིན་ཏེ། དེའི་མིང་ངན་པའི་ལམ་མོ། །དེའི་མིང་ཡོན་པོའི་ལམ་མོ། །འཛངས་འཕྲུལ་པའི་དགེ་འདུན་ལ་ནི་དེ་ལྟ་བུའི་དོན་མེད་དོ། །སྒྱུ་མ་མི་བདེན་པའི་རྐྱེན་འབའ་ཤིག་ལས་ཁམས་
གསུམ་བྱུང་བར་ཤེས་སོ། །དེ་ལྟ་བུའི་དོན་ཤེས་པས་ན་མིང་འཕྲུལ་གྱི་དགེ་འདུན་ཞེས་བྱའོ། །ཤཱ་རིའི་བུ་ཡོང་མཐོང་བ་ཡོད་དོ། །ཆོ་ག་ནི་འཕྲུལ་གྱི་དགེ་འདུན་གྱི་ནང་ན་ཀུན་ཐོབ་པར་མི་རུང་ངོ་། །བདག་ཏུ་ལྟ་བ་དང་། སེམས་ཅན་དུ་ལྟ་བ་དང་། སྲོག་ཏུ་ལྟ་བ་དང་། 
གང་ཟག་ཏུ་ལྟ་བ་དང་། སྐྱེས་པར་མཐོང་བ་དང་། བུད་མེད་དུ་མཐོང་བ་དང་། ལྷར་མཐོང་བ་དང་། སེམས་ཅན་དམྱལ་བར་མཐོང་བ་དང་། བྱོལ་སོང་དུ་མཐོང་བ་དང་། ཡི་དགས་སུ་མཐོང་བ་དང་། ཕུང་པོ་དང་། འདུ་ཤེས་དང་། ཁམས་སུ་མཐོང་བ་དང་། དུང་གི་སྒྲར་མཐོང་། 
རྔའི་སྒྲར་མཐོང་། སའི་སྒྲར་མཐོང་། ཆུ་དང་། མེ་དང་། རླུང་གི་སྒྲར་མཐོང་། ཚུལ་ཁྲིམས་འཛིན་པའི་སྒྲར་མཐོང་། ཚུལ་ཁྲིམས་ཞིག་པའི་སྒྲར་མཐོང་། དྲང་པོའི་ལམ་གྱི་སྒྲར་མཐོང་། ཡོན་པོའི་ལམ་གྱི་སྒྲར་མཐོང་། དྲི་མའི་སྒྲར་མཐོང་། གཙང་མའི་སྒྲར་མཐོང་། 
བསམ་གཏན་ཐུབ་པ་དང་། ཏིང་ངེ་འཛིན་དང་། འཕྲུལ་བརྒྱད་ཀྱི་ལམ་གྱི་སྒྲ་དང་། རྒྱུན་ཏུ་ཞུགས་པའི་འབྲས་བུ་དང་། ལན་གཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པའི་འབྲས་བུའི་སྒྲར་མཐོང་བ་དང་། གྲོལ་ཐར་གྱི་

49-1-159b

སྒྲར་མཐོང་བ་དང་། འབྲས་བུ་ཐོབ་པའི་སྒྲར་མཐོང་བ་དང་། སངས་རྒྱས་ཀྱི་སྒྲར་མཐོང་བ་དང་། ཆོས་ཀྱི་སྒྲར་མཐོང་བ་དང་། དགེ་འདུན་གྱི་སྒྲར་མཐོང་བ་དང་། འགོག་པའི་སྒྲར་མཐོང་བ་དང་། མྱ་ངན་ལས་འདས་པའི་སྒྲར་མཐོང་བའོ། །ཤཱ་རིའི་བུ་དེའི་མིང་མི་བདེན་པའི་སྒྲ་སྐད་
ལ་སོགས་པ་མཐོང་ཞེས་བྱའོ། །འཛངས་འཕྲུལ་པའི་དགེ་འདུན་གྱིས་ནི་གཞུང་ལ་དེ་ལྟ་བུའི་མཐོང་བ་མ་ཐོབ་པ་སྟེ། སྒྲ་སྐད་ཀྱི་རྣམ་པ་ཐམས་ཅད་མཚན་ཉིད་གཅིག་པར་ཁོང་དུ་ཆུད་དེ་མཚན་ཉིད་གལ་བ་མེད་རྩོད་པ་མེད་པའོ། །ཕྱིན་ཅི་མ་ལོག་པའི་ཆོས་ཀྱི་
བཟོད་པ་འབྱོར་གྲུབ་པས་ན་མིང་འཕྲུལ་གྱི་དགེ་འདུན་ཞེས་བྱའོ། །ཤཱ་རིའི་བུ་ཕྱིན་ཅི་མ་ལོག་པའི་ཆོས་ཀྱི་བཟོད་པ་དེ་ནི་མཚན་མ་མེད་པ་ཡིན་ནོ། །མཚན་མ་མེད་པས་ན་བླང་བའང་མེད། དོར་བའང་མེད། ལོག་པའང་མེད། མ་ལོག་པའང་མེད། སྐྱེ་བའང་མེད། 
འགོག་པའང་མེད་དེའི་ནང་རང་བཞིན་པ་ལ་ཕྱོགས་པས་སྤྱད་པའང་མེད། ཞིག་པའང་མེད། ལྡང་བའང་མེད། ཐོབ་པའང་མེད། ཕན་ཚུན་ཞེས་རྣམ་པར་ཡང་མི་རྟོག་པས་ན་སེམས་རྟག་པར་གཏང་བྲལ་ལོ། །ཅིའི་ཕྱིར་ཞེ་ན། དེ་ལྟ་བུའི་བཟོད་པའི་ནང་ན་ཕ་
ལོག་གི་འགྲམ་ཡང་མེད། ཚུ་ལོག་གི་འགྲམ་ཡང་མེད། རྣམ་པར་རྟོག་པའང་མེད། རྣམ་པར་རྟོག་པ་མེད་པའང་མེད་དོ། །མཚན་མ་མེད་པ་ཁོང་དུ་ཆུད་དེ་འབྱོར་གྲུབ་པས། མིང་འཕྲུལ་གྱི་དགེ་འདུན་ཞེས་བྱའོ། །འདུས་ཚོགས་པ་བཤིག་པས་ན་མིང་འཕྲུལ་གྱི་དགེ་
འདུན་ཞེས་བྱའོ། །ཤཱ་རིའི་བུ་ངའི་ཆོས་ཀྱི་ཡི་གེ་གཞན་ལ་བཤད་པ་མི་ལ་ལས་ཆོས་མཐོང་དུ་ཟིན་ན་དེ་ནི་བདག་ཏུ་ལྟ་བ་ཡིན་ནོ། །ཡང་དག་པར་གཤེགས་པ་ཆོས་མ་ཡིན། ཆོས་མ་ཡིན་པའང་མ་ཡིན། ཅིའི་ཕྱིར་ཞེ་ན། ལྷ་སྦྱིན་བླུན་པོ་དང་། མུར་འདུག་ཀུན་གྱིས་
ཁ་དོག་གི་ལུས་སྤྱད་དེ། སངས་རྒྱས་མཐོང་ཞེས་ཟེར་རོ། །ཤཱ་རིའི་བུ་ཡང་དག་པར་གཤེགས་པ་ནི་ཁ་དོག་གི་ལུས་སྤྱད་པས་མཐོང་བ་མི་རིགས་སོ། །སྒྲ་སྐད་སྤྱད་པས་ཀྱང་མཐོང་བ་མི་རིགས་སོ། །ཤཱ་རིའི་བུ་ལ་ལ་ཞིག་ཁ་དོག་གི་ལུས་སྤྱད་པས་སངས་རྒྱས་མཐོང་ན་
དེ་ནི་སངས་རྒྱས་དང་རྒྱང་རིང་ངོ་། །ཅིའི་ཕྱིར་ཞེ་ན་ཞེས་བྱས་ན། སངས་རྒྱས་ཀྱི་མིང་ཁ་དོག་མཐོང་བ་ཞེས་མི་བྱ་བས་ན། དེའི་མིང་སངས་རྒྱས་མཐོང་བ་ཞེས་བྱའོ། །ཤཱ་རིའི་བུ་མི་ལ་ལ་ཞིག་གིས་ཆོས་སོ་ཅོག་ལ་མཚན་མ་མེད། མིང་མེད། རེག་པ་མེད། དྲན་པ་མེད། སེམས་

49-1-160a

མེད། སྐྱེ་བའང་མེད། འགོག་པ་འང་མེད། འདྲན་ཏོར་མེད། ཆོས་སོ་ཅོག་ལ་ནི་མི་སེམས། མྱ་ངན་ལས་འདས་པ་མི་སེམས། མྱ་ངན་ལས་འདའ་བའི་སེམས་ཀྱང་མི་བྱ། མྱ་ངན་ལས་འདས་པ་ལ་མི་ཆགས་ཏེ། ཆོས་སོ་ཅོག་ཀུན་མཚན་ཉིད་
གཅིག་ཡིན་པར་ཡིད་ཆེས་ཤིང་མཐོང་བར་ནུས་ན་དེ་ནི་མཚན་ཉིད་མེད་པའོ། །ཤཱ་རིའི་བུ་དེའི་མིང་ཡང་དག་པར་སངས་རྒྱས་མཐོང་བའོ། །ཆོས་སོ་ཅོག་ལ་ཚོལ་བའང་མེད། འདྲན་ཏོར་ཡང་མེད། སྐྱེ་བ་མེད་ལ་དོན་དེ་ལ་ཡང་མི་སེམས་རྣམ་པར་མི་རྟོག་
ན། དེའི་མིང་སངས་རྒྱས་མཐོང་བའོ། །མི་ལ་ལ་ཞིག་ཆོས་འདི་ལ་དྲན་པའི་འདུ་ཤེས་ཀྱིས་རྣམ་པར་བརྟག་པ་མེད། བླང་བ་མེད། དོར་བ་མེད། གལ་བ་མེད། འདུ་ཤེས་མེད། འདུ་ཤེས་ཀྱིས་ལས་མེད། ཚིག་གིས་བཤད། བཤད་པ་ཡང་མི་ཆགས། 
ཆོས་ཀྱི་མིང་བརྙན་མ་ཡིན་ལ་ཀུན་ཅི་ཡང་མེད་པར་རིག་སྟེ། སྨྲ་བའི་ཚིག་གི་ལམ་ཆད་ཅིང་ཐ་དད་པ་མེད། འདྲན་ཏོར་བརྗོད་པ་མེད། རིག་པ་མེད། དེའི་མིང་སྐྱེ་བའང་མེད། འདུ་ཤེས་སྤྱོད་པ་མེད་པ་ཞེས་བྱ་སྟེ། འཇིག་རྟེན་གྱི་ནང་ན་མིང་འཕྲུལ་གྱི་དགེ་འདུན་
ཞེས་བྱའོ། །ཤཱ་རིའི་བུ་ཆོས་གང་མཐོང་ན་མིང་སངས་རྒྱས་མཐོང་ཞེས་བྱ། དེ་ནི་འདུ་ཤེས་མེད། རྣམ་པར་རྟོག་པ་ཡང་མེད། འདྲན་ཏོར་བརྗོད་པ་མེད་དེ། ཆོས་སོ་ཅོག་མི་ལེན་པའོ། །སྟོང་པའི་སྒོ་མོ་དང་། སྟོང་པ་ཞི་བའི་སྒོ་མོ་དང་བྲལ་བའི་སྒོ་སྤྱོད་
པ་ནི་མཐོང་བ་མི་སེམས། མཐོང་བ་མི་ཐོབ་དེའི་དོན་ཀྱང་མི་ཐོབ་སྟེ། དེ་ནི་མིང་མཁན་མ་ཡིན་ནོ། །དེའི་གནས་ཀྱང་མི་ཐོབ་ཏེ། དེ་ནི་མྱ་ངན་ལས་འདས་པའོ། །དེ་ཅིའི་ཕྱིར་ཞེ་ན། ཤཱ་རིའི་བུ་ང་ཡང་མྱ་ངན་ལས་འདས་པ་མི་སེམས་ན། དེ་ལྟ་བུར་ཁྱོད་ལ་སོགས་
པ་མྱ་ངན་ལས་འདས་པ་སེམས་ཤིག་དང་། མྱ་ངན་ལས་འདའ་བ་ཐོབ་པ་བཤད། ཤཱ་རིའི་བུ་མི་ལ་ལ་ཞིག་མྱ་ངན་ལས་འདས་པ་ཐོབ་སྙམ་བྱེད་ན། མི་དེ་ནི་ཡང་དག་པར་གཤེགས་པའི་ཕྱིར་འབྲངས་ཏེ། ཁྱིམ་ནས་མ་བྱུང་གི། མཁན་པོ་དྲུག་གི་ཕྱིར་
འབྲངས་ཏེ་ཁྱིམ་ནས་བྱུང་བའོ། །ཤཱ་རིའི་བུ་ཤེས་པར་བྱོས་ཤིག །དེ་ནི་ཆོས་ཀྱི་དགྲ་ཡིན་ཏེ་ངའི་ཆོས་ཀྱི་ནང་དུ་ཞུགས་སོ། །དེ་ལྟ་བུའི་མིས་ངའི་ཆོས་མ་བསྒོམས་པར་མངོན་ནོ། །དེ་ལྟ་བུའི་མི་དགྲ་ཆེན་པོ་ཡིན་པར་མངོན་ཏེ་མཁར་དང་ཡུལ་ཆེན་པོའི་

49-1-160b

ནང་ན་དགྲ་ཆེན་པོ་ཡོད་པ་དང་མཚུངས་སོ། །ཇི་ལྟ་ཞེས་བྱས་ན། དེ་ལྟ་བུའི་གཏི་མུག་གི་མིས་མྱ་ངན་ལས་འདས་པ་ཐོབ་པར་འཛིན་ན་བདག་ཏུ་ལྟ་བ་དང་། གང་ཟག་ཐོབ་པར་འཛིན་པ་ལྟ་སྨོས་ཀྱང་ཅི་དགོས། ཤཱ་རིའི་བུ་དེ་ལྟ་བུའི་མི་གཏི་མུག་གི་མི་ནི་ངའི་
ལག་པས་བཀག་སྟེ། ངའི་སློབ་མ་མ་ཡིན་ནོ། །དགེ་འདུན་གྱི་གྲངས་སུ་མི་ཆུད་དོ། །ང་ཡང་དེའི་མཁན་པོ་མ་ཡིན་ནོ། །ཤཱ་རིའི་བུ་ལ་ལ་ཞིག་ཆོས་སོ་ཅོག་སྐྱེ་བའང་མེད། འགོག་པ་འང་མེད། སེམས་པའང་མེད། འདུ་ཤེས་མེད་པར་རིག་པ་སྟེ། དེ་ལྟ་
བུའི་ཆོས་ཀྱི་བཟོད་པ་ཐོབ་པས་ནི་མྱ་ངན་ལས་འདས་པ་མི་ཐོབ་ན། བདག་ཏུ་ལྟ་བ་དང་། གང་ཟག་མི་ཐོབ་པ་ལྟ་སྨོས་ཀྱང་ཅི་དགོས། ཤཱ་རིའི་བུ་སངས་རྒྱས་ཀྱིས་བཤད་པ་ལ་དེ་ལྟ་བུའི་མིང་ནི་ཆོས་མཐོང་བ་ཞེས་བྱ་སྟེ། དོན་དེ་མཐོང་བར་ནུས་པས་མིང་སངས་རྒྱས་
མཐོང་བ་ཞེས་བྱའོ། །ཤཱ་རིའི་བུ་ཇི་ལྟ་བུའི་མིང་སངས་རྒྱས་ཤེས་བྱ། ཆོས་སོ་ཅོག་ཐམས་ཅད་ཀྱི་མི་གཡོ་ཞིང་ཐ་དད་པ་མི་ཞིག་ན། དེའི་མིང་ཡང་དག་པར་གཤེགས་པ་ཞེས་བྱའོ། །མི་ལ་ལ་ཞིག་དེ་ལྟ་བུའི་ཆོས་ལ་ཐེ་ཙོམ་དང་འགྱོད་པ་མེད་ན། དེའི་མིང་འཕྲུལ་གྱི་
དགེ་འདུན་ཞེས་བྱའོ། །ཤཱ་རིའི་བུ་ཚེ་རབ་སྔ་མ་འདས་པ་ན་མི་གཏི་མུག་པ་ཅིག་ཡོད་པས། སྤྲེའུ་ངོ་མ་ཤེས་ཏེ། ཚལ་ཆེན་པོ་ཞིག་གི་ནང་ནུ་ཞུགས་ཏེ། སྤྲེའུ་ཁྱུ་ཅིག་འདུས་ཏེ་གནས་གཅིག་ན་འདུག་པ་མཐོང་ནས། མི་དེས་སུམ་ཅུ་རྩ་གསུམ་གྱི་ལྷ་ཡོད་པར་ཐོས་
མྱོང་བས། ཐལ་བྱུང་དུ་སུམ་ཅུ་རྩ་གསུམ་གྱི་ལྷ་རྣམས་ཡིན་ནོ་ཞེས་ཟེར་ཏེ། མོད་བཞིན་ཚལ་ནས་བྱུང་ནས། སླར་སྔོན་གྱི་གྲོང་ཁྱིམ་ཕལ་མང་པོའི་ནང་དུ་ཚིག་འདི་སྐད་བྱས་སོ། །ཁྱེད་ལ་སོགས་པས་སུམ་ཅུ་རྩ་གསུམ་གྱི་ལྷ་མཐོང་མྱོང་ངམ་མ་མྱོང་། །མི་ཕལ་
གྱིས་ལན་བླན་པ་མཐོང་མ་མྱོང་ངོ་། །མོད་བཞིན་ཚིག་སྨྲས་པ། ངས་མཐོང་ཟིན་ན་ཁྱོད་མཐོང་བར་འདོད་དམ་མི་འདོད། ཀུན་གྱིས་ཀྱང་མཐོང་བར་འདོད་དོ་ཞེས་བྱས་ནས། མོད་བཞིན་ཕལ་མང་པོ་ཁྲིད་དེ་ཚལ་དེའི་ནང་དུ་ཕྱིན་ནས་སྤྲེའུ་བསྟན་ཏེ། ཁྱེད་ལ་སོགས་པས་སུམ་
ཅུ་རྩ་གསུམ་གྱི་ལྷ་ཡིན་གྱི་ལྷ་འདི་རྣམས་ལ་ལྟོས་ཤིག་བྱས་ན། མི་ཕལ་ཀུན་ན་རེ་སུམ་ཅུ་རྩ་གསུམ་གྱི་ལྷ་མ་ཡིན་གྱི། འདི་ནི་སྤྲེའུ་ཡིན་ཏེ་ཚལ་གྱི་ནང་དུ་འདུག་པ་ལ་སྲེད་དོ། །ཁྱེད་གཏི་མུག་ཕྱིན་ཅི་ལོག་པས་སྤྲེའུ་མི་ཤེས་པའི་སྟེང་དུ་སུམ་ཅུ་རྩ་

49-1-161a

གསུམ་གྱི་ལྷ་རྣམས་ཀྱང་མ་ཤེས་སོ། །ཤཱ་རིའི་བུ་མི་དེས་ཕལ་མོའི་སྟོང་རྡབ་དུ་ཚལ་དེའི་ནང་དུ་ཕྱིན་ཏོ། །འདི་ལྟ་སྟེ། ཤཱ་རིའི་བུ་ད་དུང་མ་འོངས་པའི་དུས་ན། དགེ་སློང་ཞིག་ཡོད་པ་གོས་སྐྱ་བོ་ཅན་གྱི་ཁྱིམ་དུ་ཕྱིན་ཏེ། ཚིག་འདི་སྐད་
བྱས་སོ། །ཁྱོད་སངས་རྒྱས་དང་འཕྲུལ་གྱི་དགེ་འདུན་མཐོང་ཞིང་སངས་རྒྱས་ཀྱི་ཆོས་ཉན་པར་འདོད་དམ། མི་འདོད་ཅེས་བྱས་ན། གོས་སྐྱ་བོ་ཅན་དེའི་ནང་ན་སངས་རྒྱས་ཀྱི་ཆོས་ལ་ཡིད་ཆེས་པ་ཡོད་པ་རྣམས་ཀུན་ན་རེ་མཐོང་བར་འདོད་ཀྱིས། སངས་རྒྱས་ཀྱི་
ཆོས་མཉན་ཅིང་མནོས་ཅེས་ཟེར་ཏོ། །ཤཱ་རིའི་བུ་དེའི་ནང་ན་གོས་སྐྱ་བོ་ཅན་སྨྲ་བའི་ཚིག་ལ་ཆགས་ཤིང་སྲེད་པ་ཡོད་དོ། །མཆོད་རྟེན་དང་གཙུག་ལག་ཁང་གི་ནང་དུ་ཕྱིན་ན་དགེ་སློང་དག་ཅིག་ཡོད་པ་ཚིག་གིས་བཤད་ཅིང་ཡི་གེ་རྣམས་ལ་མཁས་པར་ཤེས་
ཏེ། སྨྲ་བའི་ཚིག་རྟེན་ཅིང་ཡི་གེ་རི་མོ་ལ་སྲེད་པ་ཡང་ཡོད་ནས། དགེ་སློང་དེ་གཞན་ཡང་དེ་བཞིན་དུ་འཆད་དེ། ཡང་དེ་དག་པའི་ལམ་ཡིན་སྙམ་སྟེ། དགེ་འདུན་གྱི་གྲངས་སུ་ཞུགས་སོ། །མི་ཕྱུགས་རྫི་དང་མཚུངས་ཏེ་ཆོས་གྱི་ཡི་གེ་ཀློག་པ་ལ་སྲེད་དུ་ཟད་ཀྱི་
ཡང་དག་པའི་དབྱིངས་སུ་མི་འཇུག་སྟེ། མི་ཡིད་དགའ་ཞིང་མིང་སྙན་པར་རིན་ཆེར་འཛིན་དུ་ཟད་དོ། །འཇིག་རྟེན་གྱི་དོན་ལ་བཟོ་མཁས་ཀྱི་ཆོས་འཆད་པ་མི་གཙང་ངོ་། །བཟོའི་ཚིག་ལ་མཁས་པས་འཇིག་རྟེན་གྱི་ལམ་སྤྱད་དུ་ཟད་ཀྱི། ལེགས་པའི་བརྗིད་མེད་དོ། །
མྱ་ངན་ལས་འདས་པའི་རྒྱུ་བཤིག་པ་ལས་རྒྱུ་བཏང་སྟེ། ཁ་རོག་ནས་བསམ་གཏན་ཐུབ་པ་ལ་མ་དད་དེ། ཉིན་མཚན་དུ་རྟག་པར་བཤད་ཅིང་བརྗོད་པ་དང་། འཐབ་རྩོད་པ་དང་། ཐུལ་བ་དང་། སྟན་སྟུག་པོར་ཉལ་སྲེད་དེ། བསམ་གཏན་ཐུབ་པ་བཞིན་པའི་སེམས་ཀྱང་སྐད་ཅིག་
མེད་ན། དགེ་སྦྱོང་གི་འབྲས་བུར་གྲུབ་པར་ཐོབ་པ་མི་ནུས་པ་ལྟ་སྨོས་ཀྱང་ཅི་དགོས། མི་དེ་གཉིད་ཀྱིས་ལོག་ན་ཡང་རྟག་པར་ཐ་མལ་པའི་སེམས་དང་འཐུན་ཏེ། སྲོད་དང་ཐོ་རངས་ལ་མི་འགལ་བའི་བཟོད་པ་མི་སྤྱོད་ཀྱི་མ་རབས་ཀྱི་ཆོས་ལ་སྲེད་ན། མི་དེ་ལྟ་བུས་
ཀྱང་ཡོན་གོས་དང་ཁ་ཟས་མང་ཐོབ་བོ། །ཅིའི་ཕྱིར་ཞེ་ན། མི་དེས་ཁོར་མོར་བདུད་ངན་པ་བསླུས་པས་ཚིག་ཉེ་བར་མི་ཟབ་པ་ལ་སྲེད་དེ། མཆོག་གི་དམ་པའི་གཞུང་ལ་འགྲུབ་པར་སློབ་མི་ནུས་སོ། །མཆོག་གི་ཟབ་མོའི་ཆོས་ཡི་གེ་ཁ་ཏོན་ལ་གཟུངས་སུ་འཛིན་མི་

49-1-161b

ནུས་ཏེ། ཐོས་ན་དངངས་སྐྲག་ནས་བཅུད་དཀར་པོ་བཏང་ལ་པང་རྣ་ལེན་ཏོ། །ཕལ་ཐ་མལ་པ་གཞན་གྱི་གསོ་བའི་ཁེ་རྙེད་པ་མཐོང་ན་འདོད་ཆགས་ཀྱི་སེམས་སྐྱེས་ཏེ། སེམས་ལ་འདི་སྙམ་བྱེད་དོ། །བདག་སོགས་པའང་དེ་ལྟ་བུའི་ཚིག་བརྗོད་པ་བསླབ་པར་རིགས་ཞེས་
ཟེར་རོ། །ཤཱ་རིའི་བུ་དེ་ལྟ་བུའི་མིས་བླ་ན་མེད་པའི་ཆོས་ཀྱི་དཀོན་མཆོག་བཏང་སྟེ། ཡོན་པོ་མཐོང་བར་ལྷུང་ཞིང་འདུག་པ་ནི་དགེ་སྦྱོང་གི་དགྲ་ཡིན་ནོ། །གོས་སྐྱ་བོ་ཅན་ཁ་དོག་ཡོད་པ་དེའི་གན་དུ་དོང་སྟེ། དེ་ལྟ་བུའི་མི་ངན་པས་དེ་དག་ལ་ཆོས་བཤད་དེ་གསོ་བའི་ཁེའི་
ཕྱིར། སངས་རྒྱས་དང་ཆོས་དང་དགེ་འདུན་ལ་སྙན་པར་བསྟོད་དེ། སྲོག་གསོ་བའི་ནོར་དང་གཡོག་བྲན་བཙལ་བ་འབའ་ཞིག་གི་ཕྱིར་རོ། །གོས་དང་ཟས་ལ་འདོད་ཅིང་ལྕི་བས་བདག་ཇི་ལ་སྲིད་པ་བཞིན་དུ་བསྟོད་དེ་སྦྱིན་པ་བྱས་པས་ནི་གནམ་གྱི་སྟེང་དུ་སྐྱེ་བ་ཐོབ་བོ་ཞེས་
ཟེར། སངས་རྒྱས་ཀྱི་ཆོས་ཀྱི་ནང་ན་ནི་སྦྱིན་པ་སྨད་རིམས་ཀྱི་ཆོས་ནི་བསྟོད། ཕལ་ནི་ནང་གི་མཆོག་གོ་ཞེས་བྱ་སྟེ། ཚིག་དེ་སྐད་དུ་སྦྱིན་པ་ཆེན་པོའི་རྒྱུ་རྐྱེན་གྱིས་གནམ་གྱི་སྟེང་དུ་སྐྱེ་བ་ཐོབ་བོ་ཞེས་བྱ་སྟེ་ཚིག་འབྲུ་མ་རིག ། གཞུང་ཕྱོགས་པ་མི་ཤེས་ཐོག་མ་ཉེ་ཞིང་མི་ཟབ་པའི་
ཆོས་ཐ་མལ་ཞུགས་པ་འབའ་ཤིག་ཤེས་པས་བདག་ཏུ་ལྟ་བ་དང་། གང་ཟག་ཏུ་འདོད་ཆགས་ཏེ། མཆོག་གི་གཞུང་བཏང་ངོ་། །ཤཱ་རིའི་བུ་དེ་ལྟ་བུའི་ཆོས་བཤད་པས་བར་བར་ནི་མི་ལ་ལ་ཡིད་ཆེས་པ་སྐྱེས་ཏེ། ཁྱིམ་ནས་བྱུང་ནས་མི་ངན་པ་རྣམས་དང་འདུས་ཚོགས་ཏེ། མཆོག་གི་
ཟབ་མོའི་གཞུང་ནི་འགྲུས་པར་ཚོལ་མི་ནུས་སོ། །ཐོབ་པར་ཡོད་པ་དང་། བདག་ཏུ་ལྟ་བ་དང་། གང་ཟག་དང་ཚེ་དང་སྲོག་ཡོད་པར་བཤད་དོ། །དྲན་པ་དང་འདུ་ཤེས་ཀྱིས་ཅི་ཡང་མེད་པའི་ཆོས་ལ་རྣམ་པར་བརྟགས་ཏེ། རྨད་དུ་བྱུང་བའི་སྡེ་དང་། མདོའི་སྡེ་རང་གིས་འགྲོས་བཤད་དེ་
བར་བར་ནི་རྟག་པ་དང་ཆད་པ་བཤད། བར་བར་ནི་བྱ་བ་མེད་པ་བཤད། ཤཱ་རིའི་བུ་ངའི་ཆོས་དེའི་ཚེ་མུར་འདུག་གི་ཆོས་མང་སྟེ། སེམས་ཅན་རྣམས་དྲང་པོ་མཐོང་བའི་སེམས་ཞིག་པར་བྱས་སོ། །དེ་ལྟ་སྟེ། ཤཱ་རིའི་བུ་ང་ཆོས་གཙང་དག་པའི་ཆོས་དེ་ལྟ་བུའི་རྒྱུ་རྐྱེན་གྱིས་
ཁད་ཀྱིས་ཞི་ཞིང་ཟད་དོ། །ཤཱ་རིའི་བུ་ང་ཡུན་རིང་དུ་སྐྱེ་ཤིའི་ནང་དུ་འདུག་ཅིང་སྡུག་བསྔལ་རྣམས་ཀྱིས་ཉོན་མོངས་ནས་བྱང་ཆུབ་གྲུབ་ན་གང་ཟག་མནོས་པ་དེའི་ཚེ་དངོས་ཤིང་ཞིགས་སོ། །ཤཱ་རིའི་བུ་དགེ་སློང་ལ་ལ་ཞིག་ཐོབ་པ་ཡོད་པ་མཐོང་བ་དང་བདག་ཏུ་ལྟ་བ་མཐོང་བ་དང་། 

49-1-162a

གང་ཟག་མཐོང་བ་པ་དེ། གཏོང་མ་ནུས་ན་ཡང་དག་པར་གཤེགས་པས་སྤྱོད་པ་བཞིན་དུ་བཤད་པ་མི་ཤེས་སོ། །ཡང་དག་པར་བདག་ཏུ་ལྟ་བ་དང་། གང་ཟག་དང་ཆོས་ཡོད་ཅེས་ཟེར་ན། དེ་ལྟ་བུའི་མི་ནི་ཆུ་རྔུབས་གཅིག་ལེན་དུའང་མི་གནང་ངོ་། །
གལ་ཏེ་མི་དེས་སྟོང་པའི་ཆོས་ཐོས་ལ་ཡིད་ཆེས་ཤིང་སེམས་གཙང་དག་སྟེ། མི་དངང་མི་དོགས་ན་མོད་བཞིན་སླར་མི་ཕལ་བཀྲིས་དྲངས་ཏེ། བདེན་པའི་མཚན་མའི་གཞུང་དུ་འཇུག་པ་རིགས་སོ། །ཡང་ཁྱིམ་ནས་བྱུང་སྟེ། ཚུལ་ཁྲིམས་ཆོ་ག་ཚང་བར་མནོས་པའོ། །
ཅིའི་ཕྱིར་ཞེ་ན། ཤཱ་རིའི་བུ་མི་ལ་ལ་ཞིག་དེ་ལྟ་བུའི་མཐོང་བ་མ་བཏང་ན། དེའི་མིང་མུར་འདུག་ཅེས་བྱའོ། །ཤཱ་རིའི་བུ་ངས་འཇིག་རྟེན་གྱི་ཐ་མལ་པའི་རྒྱུ་རྐྱེན་སྤྱད་ནས་སྒྱུ་མར་ང་ཡོད་པར་བཤད་པ་ནི་མཆོག་གི་གཞུང་མ་ཡིན་ནོ། །ཡང་མི་ལ་ལ་ཞིག་ན་རེ། ངས་
ཀྱང་འཇིག་རྟེན་གྱི་ཐ་མལ་པའི་རྒྱུ་རྐྱེན་སྤྱད་དེ་ང་ཡོད་པར་བཤད་དོ་ཞེས་ཟེར་ན། མི་དེས་སྐྱེ་བ་མེད་པ་དང་། འགོག་པ་མེད་པ་དང་། མཚན་མ་མེད་པའི་ཆོས་ཁོང་དུ་ཆུད་མ་ནུས་ཏེ། ཡང་བཤད་དོ་ཅོག་དང་འགལ་ན་ངའི་སློབ་མ་མ་ཡིན་ནོ། །ཤཱ་རིའི་བུ་མི་ལ་ལ་ཞིག་ན་རེ། 
ཡང་དག་པར་གཤེགས་པས་ཅིའི་ཕྱིར་འཇིག་རྟེན་གྱི་རྒྱུ་རྐྱེན་བཞིན་དུ་ང་མེད་པའི་ཆོས་ལ་ཟག་པ་མེད་པར་བཤད། ཡང་དག་པར་གཤེགས་པས་ནི་འཇིག་རྟེན་གྱི་ཕྱིར་མི་བདེན་པའི་ཚིག་གིས་བཤད་པའི་མི་རིགས་ཀྱི་སྟེང་དུ་ཆོས་ཀྱི་ཡི་གེ་གཞན་གྱི་ནང་ན་ཡང་གང་ཟག་
ཡོད་ཅེས་བཤད་པ་མང་སྟེ། སངས་རྒྱས་ཀྱིས་བཤད་པ་ནི་བརྫུན་པ་མི་རིགས་སོ་ཞེས་ཟེར་བ་ཞིག་ཡོད་ན། ཤཱ་རིའི་བུ་དེ་ལ་ལན་གླན་པ་སངས་རྒྱས་ཀྱི་ཆོས་སོ་ཅོག་སྟོང་པ་སྟེ། བདག་པོ་ཡང་མེད། རང་བཞིན་ཡང་མེད་དོ། །ཐ་མལ་པ་ནི་སྒྱུ་མ་མི་བདེན་པ་སྟེ། མཆོག་གི་
གཞུང་མ་ཡིན་ནོ། །ཡང་དག་པར་གཤེགས་པས་མཆོག་གི་གཞུང་དེ་བཤད་བདག་ཏུ་ལྟ་བ་དང་། གང་ཟག་ཡོད་པར་མ་བཤད་དོ། །འཕྲུལ་གྱི་མིས་ཚིག་བཤད་པ་ལ་འདོད་ཅིང་ཆགས་པ་མེད་དོ། །ཤེས་རབ་མེད་པའི་མི་ནི་སངས་རྒྱས་དང་མཚུངས་པ་མེད་དེ་འདས་པ་ཡང་
མེད་དོ། །ཤཱ་རིའི་བུ་ཡང་དག་པར་གཤེགས་པའི་ཤེས་རབ་ནི་བསམ་གྱིས་མི་ཁྱབ་བོ། །ཤེས་རབ་དེ་སྤྱད་པས་ན་སེམས་ཀྱིས་སེམས་རིག་སྟེ། ཉིས་ན་མི་ལ་ལ་ཞིག་སངས་རྒྱས་དང་མཉམ་ཞེས་ཟེར་བ་བླའི་སངས་རྒྱས་ཀླུ་ཆེན་པོ་ཆོས་ཆེན་པོའི་རྒྱལ་པོ་ལ། སངས་རྒྱས་

49-1-162b

ཀྱིས་གང་ཟག་ཡོད་པར་བཤད་དོ་ཞེས་བཟློག་པ་མི་རིགས་སོ། །འཇིག་རྟེན་ཐམས་ཅད་ནི་རྟག་པར་ང་དང་བརྩོད་དོ། །ང་ནི་རྟག་པར་འཇིག་རྟེན་དང་མི་རྩོད་དོ། །ཤཱ་རིའི་བུ་ང་ཡོད་པར་བཤད་པ་ནི་ཤིན་དུ་སྙིང་རྗེས་རུང་ངོ་། །འདིའི་ནང་ན་ཆོས་ཀྱང་མེད། ང་ཡང་མེད་ན་
སེམས་ཅན་གྱིས་ཡང་དག་པར་གཤེགས་པས། སྤྲོས་པ་བཞིན་དུ་བཤད་པ་མི་ཤེས་པ་མང་སྟེ། ཆོས་ཀྱི་དཀོན་མཆོག་དང་ལོག་གལ་བས་ངན་པའི་ལམ་དུ་ལྷུང་བ་མང་ངོ་། །ཤཱ་རིའི་བུ་ངས་ཡོན་པོ་མཐོང་བར་ཤེས་པ་ནི་ཡོན་པོ་མཐོང་བ་ཞེས་བྱའོ། །ཡོན་པོ་
མཐོང་བར་ཤེས་པ་དེ་ནི་དྲང་པོ་མཐོང་བ་ཡིན་ནོ། །ཤཱ་རིའི་བུ་ཡོན་པོ་མཐོང་བ་མཐར་དྲང་པོ་མཐོང་བར་གྱུར་ན། མཐོང་བ་མི་ཤེས་སོ། །ཤཱ་རིའི་བུ་ཡང་དག་པར་གཤེགས་པ་སངས་རྒྱས་རྣམས་ཀྱི་བླ་ན་མེད་པའི་གཡུང་དྲུང་རྫོགས་པའི་བྱང་ཆུབ་ནི་འཇིག་རྟེན་
ཐམས་ཅད་ཀྱིས་ཡིད་ཆེས་དཀའོ། །ང་ནི་ལྷ་རྣམས་དང་འཇིག་རྟེན་ཐམས་ཅད་ལ་ངན་ན་ཡིད་ཆེས་པ་ཡིན་ཏེ། ཡིད་མ་ཆེས་པ་མ་ཡིན་ཏེ། ཤཱ་རིའི་བུ་ངས་ཆོས་བཤད་དོ་ཅོག་ནི་ཕ་ལོག་གི་འགྲམ་དུ་ཕྱིན་པའི་ཕྱི་ན་དེའི་ནང་ན་ཕ་ལོག་གི་འགྲམ་དུ་ཕྱིན་པ་ཡང་
མེད་དོ། །ངས་ཆོས་བཤད་དོ་ཅོག་ནི་སྤྱད་པ་རྣམས་ཟད་པའི་ཕྱིར་ན། དེའི་ནང་ན་སྤྱད་པ་རྣམས་ཟད་པའང་མེད་དོ། །ངས་ཆོས་བཤད་དོ་ཅོག་ནི་སྟོང་པ་ཞི་བའི་ཕྱིར་ན། དེའི་ནང་ན་སྟོང་པ་ཞི་བའང་མེད་དོ། །ངས་ཆོས་བཤད་དོ་ཅོག་ནི་མེད་པར་བསྒྲལ་བའི་ཕྱིར་ན། དེའི་ནང་
ན་མེད་པར་བསྒྲལ་བའང་མེད་དོ། །ངས་ཆོས་བཤད་དོ་ཅོག་ནི་གྲོལ་ཐར་པའི་ཕྱིར་ན། དེའི་ནང་ན་གྲོལ་ཐར་པའང་མེད་དོ། །ངས་ཆོས་བཤད་དོ་ཅོག་ནི་ཤེས་རབ་ཅན་རྣམས་ཀྱི་ཕྱིར་ན། དེའི་ནང་ན་ཤེས་རབ་ཅན་རྣམས་ཀྱང་མེད་དོ། །ངས་ཆོས་བཤད་དོ་ཅོག་ནི་དྲི་མ་དག་
པའི་ཕྱིར་ན། དེའི་ནང་ན་དྲི་མ་དག་པ་ཡང་མེད་དོ། །ཤཱ་རིའི་བུ་ཡང་དག་པར་གཤེགས་པས་ལྷའི་ཕྱིར་ཆོས་བཤད་ན་ལྷ་ཡང་མེད་དོ། །མིའི་ཕྱིར་ཆོས་བཤད་ན་མི་ཡང་མེད་དོ། །སེམས་ཅན་གྱི་ཕྱིར་ཆོས་བཤད་ན་སེམས་ཅན་ཡང་མེད་དོ། །ཤཱ་རིའི་བུ་ཡང་དག་པར་
གཤེགས་པས་རིག་པ་དང་གྲོལ་ཐར་པར་བཤད་ན། དེའི་ནང་ན་རིག་པ་དང་གྲོལ་ཐར་པ་ཡང་མེད་དོ། །ངས་སངས་རྒྱས་བསམ་པ་བཤད་དེ་སངས་རྒྱས་བསམ་དུ་མི་རུང་ངོ་། །ངས་སྟོང་པ་སྤྱོད་པ་བཤད་དེ་སྟོང་པ་བཤད་དུ་མི་རུང་ངོ་། །བསམ་དུ་ཡང་མི་རུང་ངོ་། །ཤཱ་རིའི་བུ་

49-1-163a

དེའི་མིང་ཡང་དག་པར་གཤེགས་པས་ཆོས་ཀྱི་ཡི་གེ་བཤད་དོ་ཅོག་གི་ལེའུ་དང་ཚིག་གི་ནང་ན་བཤད་པ་མེད་ཅེས་བྱ་བ་ཡིན་ན། མི་ངན་པ་རྣམས་ཀྱིས་ལེའུ་དང་ཚིག་འདི་ཐོབ་ནས་མི་གཞན་ལ་བཤད་པ་ལ་ཡང་ཁོའི་མཁན་པོ་ཡིན་ནོ། །
ཡང་དག་པར་གཤེགས་པ་དང་། འཕྲུལ་གྱི་དགེ་འདུན་གྱི་ལེགས་དོན་ཀྱང་མེད་ཅེས་ཟེར་ཏེ། རང་གིས་དགེ་འདུན་གྱི་གྲངས་སུ་བཅུག་གོ། །ཤཱ་རིའི་བུ་དཔེར་ན་སྤྲེའུ་འདུས་པའི་ཁྱུ་ནི་སུམ་ཅུ་རྩ་གསུམ་གྱི་ལྷ་དང་མི་འདྲའོ། །དེ་ལྟ་བུའི་མི་ཕལ་ངན་པ་ནི་
དེའི་འཕྲུལ་གྱི་དགེ་འདུན་དང་མི་འདྲའོ། །ཤཱ་རིའི་བུ་དེ་ལྟ་བུའི་མི་ངན་པ་རྣམས་ནི་སྒྲ་སྐད་དང་སྨྲ་བའི་ཚིག་འབའ་ཤིག་གིས་བདག་དགེ་སྦྱོང་ཡིན་ཟེར་ཏེ། དཔེར་ན་མི་གཏི་མུག་གིས་སྤྲེའུ་ཁྱུ་མཐོང་ན། སུམ་ཅུ་རྩ་གསུམ་གྱི་ལྷ་ཡིན་ཞེས་ཟེར་བ་དང་མཚུངས་
སོ། །ཤཱ་རིའི་བུ་དེའི་ནང་ན་ཁྱིམ་ནས་བྱུང་བའི་མི་ཀླན་ཀ་ཚོལ་བ་དང་། དགའ་སྲེད་པ་ཞིག་ཡོད་དེ། མཁན་པོ་མཁས་པ་དང་ཕྲད་ལ་དེ་ལ་མིང་དང་ཁ་དོག་སྟོང་པར་ཞི་སྟེ། སྨྲ་བའི་ཚིག་གི་ལམ་བཤད་སྡང་བ་ཡང་མེད། སྟོང་པ་ཡང་མེད། ཆོས་བཤད་དེ། མཚན་
མ་མེད་པ་ཁོང་དུ་ཆུད་དེ། དེ་ལྟ་བུའི་སྐྱེ་བ་མེད། འགག་པ་མེད། མཚན་མ་མེད་པའི་ཆོས་ཐོས་ན། མི་དངངས་མི་འཇིགས་ན། དེ་ལྟ་བུའི་མི་ནི་དཔག་ཏུ་མེད་པའི་སངས་རྒྱས་ལ་ཡོན་གསོལ་མྱོང་ཟིན་པར་མངོན་ཏེ་ངའི་ཆོས་ཤེས་པར་ནུས་པས། དེའི་མིང་ནི་འཕྲུལ་
གྱི་དགེ་འདུན་ཞེས་བྱའོ། །སངས་རྒྱས་ཀྱི་མཛོད་ཀྱི་ལེའུ་སྟེ་གཙང་མའི་ལེའུའོ།། །། སངས་རྒྱས་ཀྱི་མཛོད་ཀྱི་ཆོས་ཀྱི་ཡི་གེ། བམ་པོ་གཉིས་པ། སངས་རྒྱས་ཀྱི་མཛོད་ཀྱི་ཡི་གེ་ལེའུ་ལྔ་སྟེ། ཚུལ་ཁྲིམས་གཙང་མའི་ལེའུ་
འོ། །སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། ཚུལ་ཁྲིམས་ཞིག་པའི་དགེ་སློང་ལ། མྱ་ངན་འཁྲུགས་པའི་མདའ་བཅུ་ཡོད་དེ། བཟོད་པར་མནགས་པར་དཀའོ། །དགེ་སློང་གིས་མྱ་ངན་འཁྲུགས་པའི་མདའ་བཅུ་འབྱོར་གྲུབ་ན། སངས་རྒྱས་
ཀྱི་ཆོས་ཞིམ་པོའི་རོ་མི་ཐོབ་སྟེ། ཆོས་འཆད་པ་ལ་སྡང་ཞིང་ཉེ་བསྙེན་པ་ལ་མི་སྲེད་དོ། །བཅུ་གང་ལ་སོགས་པ་ཞེས་བྱས་ན། ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་གིས་དགེ་འདུན་འབྱོར་འདུམ་པ་མཐོང་ན། དགའ་བའི་སེམས་མི་སྐྱེའོ། །

49-1-163b

ཅིའི་ཕྱིར་ཞེ་ན། འདུས་ཚོགས་ཏེ་གསོ་སྦྱིན་བྱས་ན། བདག་ནི་སྐྲད་དེ་ཕྱུང་། ཡང་དག་ཆེས་དགེ་སློང་ངན་པ་དེ་བདག་ལ་ཉེས་པ་ཡོད་པར་ཤེས་པས་རྟག་པར་མྱ་ངན་འཁྲུག་པ་སྲེལ་ཏེ། ཚུལ་ཁྲིམས་འཛིན་པ་ལ་གཤེ་འཁོན་ཅིང་མི་དགའོ། །ཤཱ་
རིའི་བུ་དེའི་མིང་མྱ་ངན་འཁྲུག་པའི་དགེ་སློང་གི་ཐོག་མའི་མྱ་ངན་འཁྲུག་པའི་མདའ་ཞེས་བྱ་སྟེ། ཡང་དག་པར་ལམ་ངན་པར་ལྟུང་ངོ་། །ཡང་དག་པའི་བུ་ཚུལ་ཁྲིམས་ཞིག་པའི་དགེ་སློང་ནི་ཕལ་ཀུན་ཀྱང་སྡང་ཞིང་མི་འདོད་པས་ཉེས་བསྙེན་པར་མི་དགའ་
སྟེ། ཕྱུགས་ངན་པ་རྡུང་ཁུས་རྭ་རྣོན་པོ་མིའོ་ཅོག་གིས་བཏང་བ་བསྲིངས་པ་དང་མཚུངས་སོ། །དགེ་སློང་ངན་པ་དེ་རང་ལ་ཉེས་པ་ཡོད་པར་ཤེས་པས་རྟག་པར་དོགས་པ་དང་མྱ་ངན་འཁྲུག་པ་སྲེལ་ཏོ། །ཤཱ་རིའི་བུ་དེའི་མིང་ཚུལ་ཁྲིམས་ཞིག་པའི་དགེ་
སློང་གི་མྱ་ངན་འཁྲུག་པའི་མདའ་གཉིས་ཞེས་བྱ་སྟེ། ཡང་དག་པར་ལམ་ངན་པར་ལྟུང་ངོ་། །ཡང་ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་ཕལ་དང་ཕྲད་ན། སེམས་ངན་པ་མི་མཐུན་ཞིང་བཏང་སྤངས་པར་རང་ཤེས་ཏེ། ངོ་ཚ་ཞིང་གནོད་སྲེལ་
བས་ཕལ་གྱི་ནང་དུ་འཇུག་མི་ཕོད་དོ། །ཤཱ་རིའི་བུ་དེ་ལྟ་བུའི་མིང་ཚུལ་ཁྲིམས་ཞིག་པའི་དགེ་སློང་གི་མྱ་ངན་འཁྲུག་པའི་མདའ་གསུམ་ཞེས་བྱ་སྟེ། ཡང་དག་པར་ལམ་ངན་པར་ལྟུང་ངོ་། །ཡང་ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་མྱ་ངན་
འཁྲུག་པའི་སེམས་བདོ་བས་བསྟན་བཅོས་སུ་མི་རུང་སྟེ། མུར་འདུག་གི་ཆོས་ཀྱི་ཁྲིམས་ཀྱི་ཆོས་ཀྱང་མེད་ན། གཙང་མའི་ཚུལ་ཁྲིམས་མེད་པ་ལྟ་སྨོས་ཀྱང་ཅི་དགོས། ཚུལ་ཁྲིམས་ཞིག་པའི་རྒྱུ་རྐྱེན་ལྟ་བུ་སྤྱད་པས་མིས་མི་ཉེ་མི་བསྙེན། ཤཱ་
རིའི་བུ་དེའི་མིང་ཚུལ་ཁྲིམས་ཞིག་པའི་དགེ་སློང་གི་མྱ་ངན་འཁྲུག་པའི་མདའ་བཞི་ཞེས་བྱ་སྟེ། ཡང་དག་པར་ལམ་ངན་པར་ལྟུང་ངོ་། །ཡང་ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་གིས་གཞན་གྱི་ནོར་རྫས་སྤྱོད་དེ་རང་གི་ལུས་གསོས་ན། ངས་བཤད་པ་
ལ་མེད་དེ་ཁུར་ལྕི་བ་ཁྱེར་ཞེས་བྱའོ། །ཅིའི་ཕྱིར་ཞེ་ན། སྤྱོད་པའང་ཐོབ་པ་ནི་ཡོན་ལེན་པ་རིག་ཞེས་བྱ་ན། ཚུལ་ཁྲིམས་ཞིག་པའི་དགེ་སློང་སྤྱོད་པ་ཡང་མ་ཡིན། ཐོབ་པ་ཡང་མ་ཡིན་པས་ན། ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་བསྐལ་པ་གྲངས་

49-1-164a

བརྒྱ་སྟོང་ཁྲི་འབུམ་གྱི་བར་དུ་ལུས་ཀྱི་ཤ་བཅད་གཏུབས་ཏེ་སྦྱིན་བདག་ལ་འཇལ་ལོ། །ཕྱུགས་ཀྱི་ལུས་སུ་སྐྱེས་ན་ཡང་རྟག་ཏུ་ཁལ་ལྕི་བ་ཁྱེར་བར་འོང་ངོ་། །ཇི་ལྟ་ཞེས་བྱས་ན་སྐྲའི་ཉག་མ་གཅིག་གི་ཆུ་ཚལ་གཅིག་གི་སྟོང་གསུམ་གྱི་སྟོང་
འབུམ་གྱི་ཤས་གཅིག་ཙམ་གྱི་ཡོན་ཡང་ཚུལ་ཁྲིམས་ཞིག་པའི་དགེ་སློང་གིས་ཞུ་བར་མི་ནུས་ན་གཞན་གྱི་གོས་དང་། ཁ་ཟས་དང་། མལ་ཆ་དང་། རྩི་སྨན་ཞུ་བར་མི་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་འཕྲུལ་གྱི་
ཆོས་གོས་གྱོན་ཀྱང་གཙུག་ལག་ཁང་གི་ནང་དུ་གོམ་པ་གཅིག་ཀྱང་འགྲོ་བ་མི་རིགས་ན། ཆུ་རྔུབ་གཅིག་དང་ཁྲི་སྟན་ཡན་ཆད་ལ་འདུག་ཏུ་མི་དབང་བ་ལྟ་སྨོས་ཀྱང་ཅི་དགོས། ཅིའི་ཕྱིར་ཞེ་ན། ཤཱ་རིའི་བུ་དེ་ལྟ་བུའི་མི་ངན་པ་ནི་ལྷའི་ནང་ན་ཡང་དགྲ་ཆེན་པོ་ཡིན་
ཞེས་བྱ་སྟེ། འཇིག་རྟེན་ཐམས་ཅད་ཀུན་གྱིས་ཀྱང་བསྲིང་སྤང་བའི་རིགས་སོ། །དེ་ལྟ་བུར་སུན་བྱུང་བའི་མི་ནི་ཀུན་གྱི་དགྲ་ཡིན་ནོ། །ཡང་དག་པར་གཤེགས་པས་འཇིག་རྟེན་ཐམས་ཅད་ངའི་ཐད་དུ་འོང་བར་གནང་ན། ཚུལ་ཁྲིམས་ཞིག་པའི་མི་ནི་ཡང་དག་
པར་གཤེགས་པས་ཕྱག་གིས་བཀབ་སྟེ། ངའི་སློབ་མ་ཡིན་ན་ཉིན་གཅིག་ངའི་ཆོས་ཀྱི་ནང་ན་མི་འཇུག་པ་ལྟ་སྨོས་ཀྱང་ཅི་དགོས། ཤཱ་རིའི་བུ་དཔེར་ན་མི་ཤི་བ་དང་། སྦྲུལ་ཤི་བ་དང་། ཁྱི་ཤི་བ་ནི་ནང་ན་མནམ་སྨེ་བ་སྟེ། གཙང་གདང་བའི་ལྷ་རྣམས་རྩེན་ཅིང་
དགོད་པའི་ཚེ་མཐོང་དུ་མི་རུང་ངོ་། །མཐོང་དུ་ཟིན་ཀྱང་བསྲིང་ངོ་། །འདི་ལྟ་སྟེ། ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་ནི་རོ་དེ་གསུམ་མནམ་སྨེ་བ་དང་མཚུངས་ཏེ་མི་གཙང་བས་ཤེས་རབ་ཅན་གྱིས་བསྲིངས་སྤངས་ཏེ། ལྷན་ཅིག་ཏུ་གསོ་སྦྱིན་རང་གསང་
བ་མི་བྱེད་དོ། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་ནི་ངའི་ཆོས་ཀྱི་ནང་ན་མི་ཤེས་པ་མ་ཡིན་ཞེས་བྱ་སྟེ། ཚུལ་ཁྲིམས་འཛིན་པའི་དགེ་སློང་གིས་ཚུལ་ཁྲིམས་བཤིག་པ་འདི་ལྟ་བུ་མཐོང་ན་མོད་བཞིན་རིང་དུ་སྤངས་སོ། །ཅིའི་ཕྱིར་ཞེ་ན། ཚུལ་
ཁྲིམས་ཞིག་པའི་དགེ་སློང་གིས་ལག་གིས་རེག་པའི་རྫས་བླངས་སོ་ཅོག་ཚུལ་ཁྲིམས་འཛིན་པའི་ངན་དུག་པར་གྱུར་ཏེ། ཤཱ་རིའི་བུ་རོ་གསུམ་མནམ་སྨེ་བས་གང་བ་དེའི་ནང་ན་ངའི་ཆོ་ག་བཞིན་སྤྱོད་པ་ནི་ཕོད་ཀྱི། ཚུལ་ཁྲིམས་ཞིག་པའི་དགེ་སློང་འདི་དང་

49-1-164b

སྐད་ཅིག་ལྷན་ཅིག་འདུག་ན་ནི་མི་ཕོད་དོ། །ཅིའི་ཕྱིར་ཞེ་ན། ཤཱ་རིའི་བུ་དེ་ནི་དགེ་སྦྱོང་གི་ནང་ན་ངན་པ་ཐ་མ་སྟེ། དགེ་སྦྱོང་གི་ནང་ན་རུལ་ཞིགས་ལ་ངན་པ་ཐ་མའོ། །དགེ་སྦྱོང་གི་ནང་ན་ཕུབ་མ་ཤིན་པའོ། །དགེ་སྦྱོང་གི་ནང་ན་དྲི་མའོ། །དགེ་སྦྱོང་གི་ནང་ན་རྙོག་
པའོ། །དགེ་སྦྱོང་གི་ནང་ན་གོས་པའོ། །དགེ་སྦྱོང་གི་ནང་ན་འཁོར་བའོ། །དགེ་སྦྱོང་གི་ནང་ན་རྫིང་བའོ། །དགེ་སྦྱོང་གི་ནང་ན་འཕྲུལ་གྱི་ལམ་སྟོར་བ་སྟེ། དེ་ལྟ་བུ་ལ་སོགས་པའི་མིས་ངའི་ཆོས་ཀྱི་ནང་དུ་ཁྱིམ་ནས་བྱུང་སྟེ་ལམ་བཙལ་ན་སྡིག་ལྕི་བ་ཐོབ་བོ། །
ཤཱ་རིའི་བུ་དེ་ལྟ་བུའི་མི་ནི་ངའི་ཆོས་ཀྱི་ནང་ན་ལོག་པའི་དགྲ་ཞེས་བྱའོ། །ཆོས་ཀྱི་དགྲ་ཡིན་ཞེས་བྱའོ། །བརྙས་བསླུ་ཞིང་གཡོ་སྒྱུ་བྱེད་པའི་མི་ཡིན་ཞེས་བྱའོ། །སྲོག་གསོ་བའི་ཕྱིར་གོས་དང་། ཟས་ལ་རྐམ་ལྕི་སྟེ། དེའི་མིང་ཡང་འཇིག་རྟེན་གྱི་བྲན་གཡོག་ལ་
སྲེད་པ་ཞེས་བྱའོ། །ཤཱ་རིའི་བུ་དཔེ་ཉུང་རུམ་སྐྱེས་པ་ཡང་མ་ཡིན། བུད་མེད་ཀྱང་མ་ཡིན་པ་དང་འདྲ་སྟེ། ཚུལ་ཁྲིམས་ཞིག་པའི་དགེ་སློང་དེ་ཡང་དེ་དང་མཚུངས་པས་མིང་ཁྱིམ་ན་འདུག་པ་ཞེས་ཀྱང་མི་བྱ། མིང་ཁྱིམ་ནས་བྱུང་བ་ཞེས་མི་བྱ་སྟེ། ཚེ་ཟད་ཕྱིན་
ཆད་ཐལ་བྱུང་སེམས་ཅན་དམྱལ་བར་འགྲོའོ། །ཤཱ་རིའི་བུ་དཔེར་ན་ཕ་ཝང་དང་མཚུངས་ཏེ་བྱས་གཟུང་ཞེས་བྱས་ན་ནི་བྱི་བ་བཞིན་དུ་ཁུང་བུར་སོང་། བྱི་བས་གཟུང་ཞེས་བྱས་ན་ནི་ནམ་མཁའ་ལ་འཕུར་ཏེ་བྱར་བྱེད་དོ། །བདེན་པར་བྱ་ན་བྱ་ཆེན་པོར་སྤྱོད་པ་མེད་པ་
དེ་ནི་ལུས་རྣམས་མནམ་སྨེ་སྟེ། མུན་པ་མི་སྣང་བ་འབའ་ཤིག་ལ་སྲེད་དོ། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་ཡང་དེ་དང་མཚུངས་ཏེ། གསོ་སྦྱིན་རང་བསང་བར་ཡང་མི་འཇུག །རྒྱལ་པོས་བཀོལ་བའི་གྲལ་དུ་ཡང་མི་འདུག་སྟེ་མིང་གོས་སྐྱ་
བོ་ཅན་ཞེས་ཀྱང་མི་བྱ་མིང་ཁྱིམ་ནས་བྱུང་ཞེས་ཀྱང་མི་བྱའོ། །དཔེར་རོ་བསྲེགས་པའི་ཤིང་གི་ལྷག་མ་དང་མཚུངས་ཏེ། ཕྱིས་ཅིར་ཡང་སྤྱད་དུ་མི་རུང་ངོ་། །དེ་ལྟ་བུའི་དགེ་སློང་ཚུལ་ཁྲིམས་ཀྱི་རིམ་པ་ཡང་མེད་ཐུབ་པའི་རིམ་པ་ཡང་མེད། ཤེས་
རབ་ཀྱི་རིམ་པ་ཡང་མེད། གྲོལ་ཐར་གྱི་རིམ་པ་ཡང་མེད། གྲོལ་ཐར་ཤེས་མཐོང་བའི་རིམ་པ་ཡང་མེད་དེ། ཚུལ་ཁྲིམས་གཙང་མ་བཤིག་པ། ཆོ་ག་འཚང་བ་འབའ་ཤིག་གི་རིམ་པ་ཡོད་དོ། །ཤིན་ཏུ་ཟབ་མོ་དམ་པའི་སྒྲ་སྐད་དང་། ཚུལ་ཁྲིམས་

49-1-165a

ཀྱི་སྒྲ་དང་། ཐུབ་པའི་སྒྲ་དང་། ཤེས་རབ་ཀྱི་སྒྲ་དང་། གྲོལ་ཐར་གྱི་སྒྲ་དང་། ཤར་མཐོང་བ་ལ་གྲོལ་ཐར་པའི་སྒྲ་ནི་མི་ནུས་ཀྱི། ཚུལ་ཁྲིམས་ཞིག་པའི་ངན་པའི་སྒྲ་སྐད་འབའ་ཞིག་འབྱིན་ཏེ། ངན་པ་འཐུན་གཞན་དང་ལྷན་ཅིག་ཏུ་ངན་པའི་སྒྲ་འབྱིན་ཅིང་
གོས་དང་། ཁ་ཟས་དང་། ཉལ་བའི་ཁྲི་དང་། སྦྱིན་པ་མནོད་བླང་བ་དང་། ཤིང་དང་། མེ་ཏོག་དང་། འབྲས་བུ་ཆེད་ཆེར་བྱ་བ་འབའ་ཤིག་བརྗོད་ཅིང་མི་མངག་པ་དང་། ལུས་ཀྱི་ནང་གི་དགེ་མི་དགེ་དང་། བདེ་མི་བདེ་དང་རྩེད་མོ་རྒོད་པའི་དོན་དང་མི་དགེ་བའི་ཚིག་རྣམས་
བརྗོད་དོ། །རྟག་པར་ཉིན་མཚན་དུ་དགེ་སློང་ལུས་ཀྱི་ལས་མི་གཙང་། ཁའི་ལས་མི་གཙང་། ཡིད་ཀྱི་ལས་མི་གཙང་ན། སེམས་ཅན་དམྱལ་བར་ལྟུང་ངོ་། །ཤཱ་རིའི་བུ་སེམས་ཉམས་པའི་དགེ་སློང་དེ་མུན་པ་མི་སྣང་བ་ལ་སྨྲ་བ་ནི་ད་ཅིའི་ཕ་ཝང་དང་མཚུངས་ཏེ་
དྲང་པོའི་ཆོས་ཡི་གེ་བཤད་པ་ཐོས་ན། མྱ་ངན་འཁྲུག་པར་འགྱུར་རོ། །ཅིའི་ཕྱིར་ཞེ་ན། བདེན་བཞིན་དུ་བཤད་པའི་ཕྱིར་རོ། །འཇིག་རྟེན་གྱི་མི་ནི་བདེན་པར་བཤད་པ་ལ་མི་དགའ་སྟེ། བདག་གི་ཡིད་དང་མི་འགལ་བ་འབའ་ཞིག་ལ་སྲེད་དོ། །དེ་ལྟ་
བུའི་དགེ་སློང་ནི་ཆོས་འཆད་པ་ལ་སེམས་མི་གཙང་མི་གདང་སྟེ། སྡིག་རྗེ་ལྕི་བར་གྱུར་ཅིང་སེམས་ཅན་དམྱལ་བར་སྐྱེ་བ་ཕན་ནོ། །ཤཱ་རིའི་བུ་དེའི་མིང་ཚུལ་ཁྲིམས་ཞིག་པའི་དགེ་སློང་མྱ་ངན་འཁྲུག་པའི་མདའ་ལྔ་ཞེས་བྱ་སྟེ། ཡང་དག་པར་སེམས་ཅན་དམྱལ་
བར་ལྟུང་ངོ་། །ཡང་ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་ལ་ཁྲེལ་ཞིང་ངོ་ཚ་མེད་དེ་དབང་པོའི་རྣམས་ཀྱིས་འཁྲུག་ནས་མི་གཙང་བའི་ལུས་དང་ཁ་དང་། ཡིད་ཀྱི་ལས་དང་། མི་གཙང་བའི་ཆོ་ག་འབྱོར་གྲུབ་བོ། །གོས་གྱོན་ཏོ་ཅོག་ཀྱང་ཀུན་ཆོས་དང་མི་འཐུན་
བརྫུན་གྱི་ཚིག་ལ་དགའ་སྲེད་དེ། ཁའི་བག་བྱ་མི་ནུས་སེམས་རྟག་པར་རྒྱུད་རྒོད་པས་དྲི་མ་སྨེ་བ་ཞེན་ཏོ། །ཤཱ་རིའི་བུ་གྱོ་མོའི་སྣོད་སར་པའི་ནང་དུ་སྐྱག་རྫབ་དང་། རྣག་ཁྲག་རུལ་པ་མནམ་པ་བླུགས་པ་དང་མཚུངས་ཏེ་ཕྱིར་མི་གཙང་བ་བོར་ལ་སྤོས་ཙན་
དན་བླུགས། ཕྱིས་ཡང་སྤོས་ཙན་དན་བོར་ན། དེ་ལྟ་བུའི་གྱོ་མོའི་སྣོད་ལ་སོགས་པ་དྲི་བྲོ། །བཅོམ་ལྡན་འདས་དེ་ལྟ་བུའི་གྱོ་མོའི་སྣོད་སར་པར་སྐྱག་རྫབ་མནམ་པོ་བླུགས་ཏེ། སྲ་བར་ཆགས་ན་མནམ་པོའི་དྲི་འབའ་ཤིག་མཆིས་ཀྱི། ཙན་དན་གྱི་བསུང་མ་

49-1-165b

མཆིས་སོ། །ཤཱ་རིའི་བུ་མིས་གཙང་དག་པའི་ཡིད་ཆེས་པ་ལ་སོགས་པའི་དབང་པོ་རྣམས་སྤྱད་དེ་ཁྱིམ་ནས་བྱུང་ལ་ཆོས་ལ་མ་བསླབས་པ་ལས་ངན་པའི་བཤེས་གཉེན་དང་ཕྲད་ན་དེས་བསྟན་པ་བཞིན་དུ་འབྲང་ངོ་། །ཤཱ་རིའི་བུ་གང་ལ་སོགས་པ་ངན་པའི་བཤེས་གཉེན་
ཞེས་བྱས་ན། ངན་པའི་བཤེས་གཉེན་ནི་རྟག་པར་རྩེད་མོ་འདྲན་ཏོར་ལ་སྲེད་ཅིང་ཡང་རྒོད་ལ་ཁྲེལ་མེད། སྨྲ་བའི་ཚིག་གིས་འཁྲུག །དབང་པོ་རྣམས་མི་སྡུད། སེམས་རྩེ་གཅིག་ཏུ་མི་མཐུན་ཞིང་། གཏི་མུག་ལུག་བཞིན་པ་དེ་ལྟ་བུའི་ངན་པའི་བཤེས་གཉེན་ལ་ཉེ་བསྙེན་
ན་རྒྱུན་ཏུ་ཞུགས་པའི་འབྲས་བུ་དང་། ལན་གཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པའི་འབྲས་བུ་དང་། ལྷར་སྐྱེ་བ་ལ་ཐུག་པ་ཡན་ཆད་ཀྱང་སྟོར་ན། མྱ་ངན་ལས་འདས་པའི་ལམ་ལྟ་སྨོས་ཀྱང་ཅི་དགོས། ཆོས་བཤིག་པའི་སྡིག་གི་
ལས་སྤྱོད་སྦྱོང་འབའ་ཞིག་ལ་མཁས་ཏེ་ཆོས་འཇིག་པ་དང་འགྲོགས་ཤིང་སྡོད་དོ། །མི་དེས་ལུས་ཀྱི་ལས་མི་གཙང་བ། ཁའི་ལས་མི་གཙང་བ། ཡིད་ཀྱི་ལས་མི་གཙང་བ། ཚུལ་ཁྲིམས་འཛིན་པའི་མི་གཙང་བ་འབྱོར་གྲུབ་པས་ལུས་ཤི་ན་ལམ་ངན་པར་ཞུགས་
སོ། །ལམ་ངན་པ་ཇི་ལྟ་བ་ཞེས་བྱས་ན། ལམ་ངན་པ་ནི་མིང་སེམས་ཅན་དམྱལ་བ་དང་། ཡི་དགས་དང་། བྱོལ་སོང་དང་། ལྷ་མ་ཡིན་གྱི་ལམ་མོ། །ཡང་ལམ་ངན་པ་ཡོད་དེ། སྲིན་བུ་ཨ་ཡུ་ལིང་ག །སྲིན་བུ་བག་ལ་འབོ་ཀ །སྲིན་བུ་འབྱིན་སྩའི་ཛ་ཀ །སྲིན་བུ་ཇི་
འགོག་ཀ་དང་། མི་དེ་སྲིན་བུ་དེ་རྣམས་ཀྱི་ནང་དུ་ལན་མང་དུ་སྐྱེའོ། །ཤཱ་རིའི་བུ་མི་དེ་ངན་པའི་བཤེས་གཉེན་གྱི་ཕྱིར་འབྲང་བས་མིའི་ནང་དུ་སྐྱེས་ཟིན་ཀྱང་ཕ་མ་དང་གསོན་པོར་བྲལ་ལ་ཤི་རླག་སྟེ། ཁྱིམ་ཚེས་ཉེ་བ་ལ་གནོད་ཅིང་ཡུལ་ས་ཞིག་རལ་ཏེ། བགེགས་
བརྒྱད་ཀྱི་ནང་དུ་སྐྱེ་བར་འོང་ངོ་། །སྐྱིད་པ་བརྒྱད་ཀྱི་གནས་གཏང་ལ་འདོད་པ་མང་དུ་ཁྲོ་བླུན་ལ་རྟག་པར་རྩེད་མོ་འདྲན་ཏོར་ལ་སྲེད། ཁོང་ཡང་རྒོད་ཅིང་ངོ་ཚ་བ་ཡང་མེད། ཚིག་ཆོས་པར་སྨྲ་སེམས་བསྡུ་མི་ནུས་ཏེ། གཏི་མུག་ལུག་བཞིན་འདོད་ཆགས་ཞེ་
སྡང་གཏི་མུག་གིས་འོན་ལྐུགས་ལོང་ཞར་རྐང་ལག་འཇས་འགྲུམས་ནས་ངན་པའི་བཤེས་གཉེན་དེས་སངས་རྒྱས་མེད་པའི་གནས་སུ་སྐྱེའོ། །སངས་རྒྱས་ཀྱི་དུས་དང་ཕྲད་དུ་ཟིན་ན་འང་བདག་རང་མཐོང་བར་མི་དགའ། ཆོས་ཐོས་པར་མི་དགའ། 

49-1-166a

སངས་རྒྱས་དང་དགེ་འདུན་དང་ལྷན་ཅིག་ཏུ་མི་འདུག་སྟེ། དེ་ལྟ་བུའི་ངན་པའི་ཡོངས་ནས་མི་ངན་པ་དང་བསྡོངས་ཏེ་མི་ཐ་མ་ངན་པ་ལ་སྲེད་པ་སྐྱེས་ནས། དྲང་པོར་མཐོང་བ་ལ་ཡོན་པོར་མཐོང་བའི་འདུ་ཤེས་སྐྱེས། ཡོན་པོར་མཐོང་བ་ལ་དྲང་པོ་མཐོང་བའི་འདུ་ཤེས་སྐྱེས་ཏེ། དེའི་འདོད་
པ་ཐ་མ་ཞེས་བྱའོ། །ཤཱ་རིའི་བུ་ཤེས་རབ་ཐ་མའི་མཐར་འགོག་པ་དང་། ལམ་དང་མྱ་ངན་ལས་འདས་པ་སྐྱོ་བྲལ་བའི་སེམས་སྐྱོ་བར་མི་ནུས་སོ། །ཤཱ་རིའི་བུ་ངན་པའི་བཤེས་གཉེན་དང་ཕྲད་དེ། དེ་ལྟ་བུའི་རྒུད་པའི་མྱ་ངན་གྱི་ནད་རྣམས་ཐོབ་པ་དེ་ལྟ་བུའི་ལྟས་མཚན་
ཡོད་པའི་མི་དེས་ཆོས་ཀྱི་ཡི་གེ་ཟབ་མོ་འདི་ཐོས་ན། དངངས་དོགས་ཤིང་འཇིགས་སྐྲག་པ་ནི་ཁུང་ཟབ་མོར་ལྷུང་བ་དང་མཚུངས་པས། སྡིག་ཆེན་པོའི་དོང་ཀུང་ཟབ་མོའི་ནང་དུ་ལྟུང་ངོ་། །ཅིའི་ཕྱིར་ཞེ་ན། ཤཱ་རིའི་བུ་ཆོས་ཀྱི་ཡི་གེ་ལ་བཤད་པ་ཡིན་ཏེ། ཚུལ་
ཁྲིམས་ཞིག་པའི་དགེ་སློང་སྡིག་ལྕི་བ་ཆེན་པོ་ཡོད་དོ། །ཅིའི་རྒྱུ་རྐྱེན་གྱིས་ནི་མིང་ཚུལ་ཁྲིམས་ཞིག་པ་ཞེས་བྱ། ཚུལ་ཁྲིམས་མནོས་སོ་ཅོག་ཞིག་ཅིང་ཚིག་གིས་བསྟན་པ་བཀའ་ལ་བྱེད་དོ་ཅོག་ལ་བརྟག་བསྟན་པ་མེད་དེ་གཞལ་ཞིང་ལྡོག་པ་དང་། ཁོར་མོར་
འདོད་ཆགས་སྤྱོད་ལ་སྤྱོད་པ་གོ་འདུན་མང་སྟེ། འདོད་ཆགས་ཞེ་སྡང་གཏི་མུག་སྤྱོད་ཅིང་ཚིག་གཞན་གོ་འདུན་ལ་སྲེད་པས་ན། མིང་ཚུལ་ཁྲིམས་ཞིག་པ་ཞེས་བྱའོ། །ཡང་གཅིག་ཏུ་ན་འཚོ་ནམ་གྱི་འདོད་པ་མང་པོ་ལ་སྲེད། ལྕེ་རྐྱང་གྱི་ཁ་ཏོན་ལ་སྲེད། ཟེར་རོ་
ཅོག་འགལ་གོ་རིམས་མེད། མི་གཙང་བར་འཆད་དེ་བདག་ཏུ་ལྟ་བ་དང་། གང་ཟག་དང་ཚེ་སྲོག་ལ་འདོད་ཆགས་པས་ན། མིང་དགེ་སློང་ངན་པ་ཞེས་བྱའོ། །ཚིག་དང་དཔག་པ་མི་ཤེས་དགེ་སྦྱོང་གི་ཆོས་མི་ཤེས། བྲམ་ཟེའི་ཆོས་མི་ཤེས། སྨན་གྱི་དཔྱད་བྱེད་
པ་དང་། ཚོང་སྤོགས་བྱེད་ཅིང་ཁེ་ཚོལ་བ་ལ་སྲེད། ཡུལ་གྱི་ཕོ་ཉ་བྱེད་པ་དང་། གཞན་ལ་གོས་ཞིང་ཞེན་པར་བྱ་བ་ལ་སྲེད། གོས་སྐྱ་བོ་ཅན་གྱི་འཚོ་ནམ་བྱ་བའི་མངག་གཞུག་དང་། ཤིང་རྣམས་ཀྱི་འདབ་མ་དང་། མེ་ཏོག་དང་། རྡོ་གུ་འཕྲུལ་པ་ལ་སྲེད། གོས་སྐྱ་བོ་ཅན་
ལ་མུར་འདུག་གི་ཆོས་བཤད་པ་ལ་སྲེད་དེ། སེམས་ལ་རྟག་པར་འཇིག་རྟེན་ལས་བྱུང་བའི་ཆོས་བཏང་སྤངས་ཏེ། ལོ་ཉི་ཤུ་མ་ལོན་པར་ཚུལ་ཁྲིམས་རྫོགས་པར་མནོས་ནས། ཚུལ་ཁྲིམས་མནོས་པའི་ནང་ན་ཞན་པ་མ་ལྡན་པ་ཡོད་དེ་ལུས་ཉམས་ཞིང་མ་ཚང་མི་རིགས་

49-1-166b

མི་ཆོས་ཏེ། ཁྲེ་འབྲས་རྗེན་པ་དང་། དོང་ཙེ་དང་། དར་དང་། གསེར་མངུལ་ལེན། བསྟན་བཅོས་པ་བཞིན་དུ་མི་བྱེད། མཁན་པོའི་ཚིག་ལ་སླར་སྡོ་ལ་ཟློག་བདག་གི་ལུས་ཀྱང་མི་ཤེས་གཞན་ཡང་མི་ཤེས། ཆེ་ཆུང་ཐ་དད་པའི་རིམ་པར་བྱེད་མི་ནུས། བརྫུན་ཚིག་ལ་དགའ་
སྲེད། ཚུལ་ཁྲིམས་ལེན་པ་ལ་འདོད་ཆགས་སྤྱོད་པའི་དོན་ཀུན་གྱིས་འཁྲུགས་ཏེ། སེམས་གཅིག་ཏུ་མ་འཐུན། གདོང་ལ་ཁྲོ་བའི་གཟུགས་ཡོད་ཅིང་འཇུངས་ཤིང་བརྐམ་པ་ཡིད་མི་ཆེས་གཞུང་བས་བསམ་པ་མི་ཤེས། བརྐམ་འདོད་མང་དུ་སྲེལ་གཉིད་ཆེ་ཞིང་རྩེད་མོ་འདྲན་
ཏོར་སྲེད། དོགས་འགྱོད་གཤེ་འཁོན་ཏེ། སྡིག་ངན་པ་སྦས་བཅབས་ནས་རང་དུས་ཆེ་བ་ལ་སྲེད། ཕྲག་དོག་དང་གཅམ་རྒྱུ་ཆེ། ཁྲེལ་དྲིན་མེད་རང་ཉམས་ཆེ་དྲེགས་པའི་ལེ་ལོ་དང་། ངའི་ལེ་ལོ་དང་། ལེ་ལོ་ཆེན་པོ་དང་། ཡོན་པོའི་ལེ་ལོ་བྱེད། བརྙས་སླུ་བ་ལ་སྲེད། 
བདག་གི་ལུས་ལ་ལེགས་ཞེས་བསྟོད། ཐབས་མང་དུ་བྱས་ཏེ་གསོ་བའི་ཁེའི་སྒོ་མོ་ཕྱེ། གོས་སྐྱ་བོ་ཅན་བརྙས་སྨས་ཏེ། སྒྱུ་མའི་མི་གཉེན་པ་བྱས་ན་བསྙེན་པ་ཞར་གྱིས་ནོར་འཐོབ་སྟེ། མི་ཕལ་ལ་ངོམ་ཞིང་ཚུལ་ཁྲིམས་ཀྱི་རིམ་པ་དང་། ཐུབ་པ་དང་། ཤེས་རབ་དང་
གྲོལ་བའི་རིམ་པ་དང་། ཤེས་མཐོང་བ་ལས་གྲོལ་ཐར་པ་རིམ་པ་ཉམས་ཞིག་པ་སྟེ། སངས་རྒྱས་དང་ཆོས་དང་དགེ་འདུན་ལ་སེམས་ངེས་པར་ཡིད་མི་སེམས་སོ། །ལས་ཀྱི་ལན་ལ་ཡིད་མི་ཆེས་ཏེ། འཕྲལ་ཁེ་རིན་ཆེར་འཛིན་ལ་དུས་ཕྱི་མ་མེད་ཅེས་ཟེར་ཞིང་དོགས་
འགྱོད་པ་རྣམ་པ་མང་ལ་སེམས་ཀྱི་རང་བཞིན་སྲབ་ཞན་པས་རྟག་པར་དངངས་སྐྲག་པ་ལ་སྲེད་དོ། །ཤཱ་རིའི་བུ་དེའི་མིང་དགེ་སློང་ངན་པ་ཞེས་བྱ་སྟེ། དེ་ལྟ་བུའི་མི་གཏི་མུག་ནི་ངའི་ཆོས་ཀྱི་ནང་ན་སྐྱག་རྫབ་མནམ་སྨེ་ཞིང་མི་གཙང་བ་ཡིན་ནོ། །མི་དེས་ལུས་དང་ཁ་དང་
ཡིད་ཀྱི་ངན་པའི་ལས་འབྱོར་འགྲུབ་སྟེ། མི་གཙང་མི་གདང་བས་ན། ཚེ་ཟད་ཀྱི་འོག་ཏུ་ལམ་ངན་པར་ལྟུང་སྟེ། དམྱལ་བ་ཆེན་པོར་སོང་ངོ་། །དེ་ལྟ་བུའི་དགེ་སློང་ནི་ཡང་དག་པར་གཤེགས་པ་སངས་རྒྱས་རྣམས་དང་། སློབ་མ་རྣམས་ཀྱིས་རྟག་པར་བསྲིངས་སྤངས་
སོ། །གཞན་ཆོས་ལམ་ལ་སྲེད་པ་དང་། ཞི་བ་འདས་པར་ཚོར་བ་ཡང་ཀུན་གྱིས་མི་བསྙེན་ཏོ། །ཤཱ་རིའི་བུ་དཔེར་སྤོས་ཙན་དན་སྣོད་གཙང་མའི་ནང་དུ་མི་གཙང་བ་ལྷན་ཅིག་གཞག་པ་དང་མཚུངས་ཏེ་ཕྱིས་ཅིར་ཡང་སྤྱད་དུ་མི་རུང་བའོ། །དེ་སྟེ་ཤཱ་རིའི་བུ་ཁྱིམ་ན་འདུག་པ་དང་། 

49-1-167a

ཁྱིམ་ནས་བྱུང་བ་ལ་ལ་ཞིག་གིས་མི་དེ་ལ་ཉེ་བསྙེན་ཏེ་ཅི་བྱེད་པ་བསླབས་སྦྱངས་ན། ཚུལ་ཁྲིམས་ཞིག་པའི་ལེའུ་དང་ཡང་རིང་པོ་མི་ཐོགས་པར་ངན་པ་འཐུད་དེ། ཁ་དོག་གི་མདངས་ཉམས་ཤིང་གྲམ་ལ་ཆོས་བཞིག་སྟོར་ཏེ། ཚེ་ཟད་ཀྱི་འོག་ཏུ་སེམས་ཅན་དམྱལ་
བའི་ནང་དུ་སྐྱེའོ། །ཤཱ་རིའི་བུ་དེ་ལྟ་བུའི་མི་ངན་པ་ནི་ཡང་དག་པར་གཤེགས་པས་སངས་རྒྱས་སོ་ཅོག་དང་། སློབ་མ་རྣམས་གཞན་ཆོས་ལ་མ་འཚལ་བ་དང་། ཞི་བར་ཐར་པའི་སྲེད་པ་ཀུན་གྱིས་བསྲིངས་སྤངས་པའོ། །ཤཱ་རིའི་བུ་དཔེར་སྤོས་ཙན་དན་གྱི་སྣོད་མི་གཙང་བའི་
ནང་དུ་བླུགས་པ་དང་མཚུངས་ཏེ་ཕྱིས་ཅིར་ཡང་སྤྱད་དུ་མི་རུང་ངོ་། །དེ་ལྟ་སྟེ། ཤཱ་རིའི་བུ་ཁྱིམ་ན་འདུག་ཀྱང་རུང་། ཁྱིམ་ནས་བྱུང་ཡང་རུང་སྟེ། ལུས་ལ་བསྐུས་མོད་ཀྱི་འོན་ཀྱང་མི་གཙང་བ་དང་འདྲེས་སོ། །ཤཱ་རིའི་བུ་དགེ་སློང་ངན་པ་ཡང་དེ་དང་མཚུངས་ཏེ། དགེ་འདུན་
ཕལ་གྱི་ནང་ན་འདུག་ཅིང་འཕྲུལ་གྱི་ཆོས་གོས་གྱོན་མོད་ཀྱི། འོན་ཀྱང་དགེ་སློང་ངན་པའི་གཟུགས་མངོན་ནོ། །ཚངས་པར་སྤྱོད་པའི་དགེ་སློང་དེས་མི་གཙང་བ་འདི་མཐོང་ན་བསྲིངས་ཏེ་མི་བསྙེན་ཏོ། །གཞན་གྱིས་བསྲིངས་སྤངས་པ་མཐོང་ནས་སེམས་ལ་གཤེ་འཁོན་ཏེ། དེའི་
རྒྱུ་རྐྱེན་གྱིས་ཤི་ན་དམྱལ་བར་སོང་ངོ་། །ཤཱ་རིའི་བུ་དེ་ལྟ་བུའི་མི་ཚུལ་ཁྲིམས་ཞིག་པའི་དགེ་སློང་མྱ་ངན་འཁྲུག་པའི་མདའ་དྲུག་ཅེས་བྱ་སྟེ། ཡང་དག་པར་སེམས་ཅན་དམྱལ་བར་ལྟུང་ངོ་། །ཚུལ་ཁྲིམས་གཙང་མའི་ལེའུ་འོག་མའོ།། །།
ཡང་ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་གིས་དེ་ལྟ་བུ་ལ་སོགས་པའི་ཆོས་ཡིག་སངས་རྒྱས་ཀྱིས་བཤད་དོ་ཅོག་ཐོས་ན། སེམས་མི་གཙང་མི་གདང་སྟེ། མི་དགའ་ཞིང་ཡིད་མི་ཆེས་མ་དད་དེ། བདག་ལ་ཉེས་ཡོད་པར་ཤེས་པས་ཆོས་ཀྱི་ཡི་གེ་འདི་ལ་ཡིད་མི་ཆེས་ནས་བདག་ལ་
སོགས་པའི་ཕྱིར་བཤད་ཀྱི། མི་གཞན་གྱི་ཕྱིར་མ་ཡིན་ནོ། །ཅིའི་ཕྱིར་ཞེ་ན། བདག་ལ་སོགས་པ་སྔོན་ཆད་དོན་དེ་ལ་འདུག་པའི་ཕྱིར་རོ། །ཤཱ་རིའི་བུ་དེ་ལྟ་བུའི་དམ་པའི་མཆོག་བསྐྲུན་དུ་མེད་པའི་ཆོས་ལ་ཚུལ་ཁྲིམས་ཞིག་པའི་དགེ་སློང་གཤེ་འཁོན་ཏེ། ཆོས་འཆད་པ་
ལ་ཡང་དག་པར་ཡིད་མི་ཆེས་པ་མང་ན། དེ་ལྟ་བུའི་སངས་རྒྱས་ཀྱིས་བཤད་དོ་ཅོག་ཐོས་ནས། ལོག་འགལ་ཞིང་མི་ནོད་ཅིང་ཚིག་མ་ཡིན་ནོ། །འདི་ནི་སངས་རྒྱས་ཀྱིས་བཤད་དེ་མི་གཞན་བསྟན་པའི་ཚིག་མ་ཡིན་ཞེས་ཟེར་རོ། །ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་དགེ་སློང་

49-1-167b

གི་ལམ་སྤྱོད་པ་ལ་མི་སྲིད། ལམ་སྤྱོད་པའི་དགེ་སློང་ནི་སངས་རྒྱས་ཀྱི་ཚིག་དང་མི་འགལ་ལོ། །དེ་ཀུན་ནི་ཚུལ་ཁྲིམས་ཞིག་པ་བླུན་གླེན་ཞིང་ཆོས་ངན་པ་བྱེད་པ་སེམས་ཡིད་མི་ཆེས་ཏེ། སངས་རྒྱས་ཀྱི་ཚིག་དང་ལོག་འགལ་བ་དེ་ལྟ་བུའི་དགེ་སློང་ཉེས་ཡོད་པར་བདག་རང་
ཤེས་པས་གཤེ་འཁོན་དང་། དྲེགས་ཤིང་ལེ་ལོ་དང་གཏུམ་ཞིང་དུས་ཆེ་བ་དང་། ངན་པ་ཡོན་པོ་དང་། ལེ་ལོ་སེམས་སྐྱེས་ཏེ། སངས་རྒྱས་དང་ཆོས་དང་། དགེ་འདུན་ལ་འཕྱ་ཞིང་སྐུར་ཏོ། །ཤཱ་རིའི་བུ་དེ་ན་དགེ་སློང་དེས་ཆོས་ཀྱི་ཡི་གེ་དེ་ཀུན་ཐོས་ན། ལོག་འགལ་བ་ཡིད་མི་
ཆེས་ནས་སེམས་ཀྱིས་བླ་ན་མེད་པའི་བྱང་ཆུབ་ཁོང་དུ་མ་ཆུད་པས་མི་གཞན་ལ་སངས་རྒྱས་བཤད་པ་མ་ཡིན་ཞེས་སྟོན་ཏོ། །ཤཱ་རིའི་བུ་སངས་རྒྱས་ཀྱིས་བཤད་པ་ལ་མི་དེ་ལྟ་བུའི་ཆོས་ལ་སྐུར་པ་ཞེས་བྱའོ། །དགེ་སྦྱོང་མ་ཡིན་ཤཱཀྱའི་རིགས་ཀྱི་བུ་མ་ཡིན་ཏེ། མེད་པར་
འགོད་ཏོར་བྱུང་བའི་རིགས་སོ། །དེ་ལྟ་བུ་ལ་སོགས་པའི་དགེ་སློང་ནི་བརྒྱ་སྟོང་ཁྲི་འབུམ་གྱི་སངས་རྒྱས་རྣམས་ཀྱིས་ལན་གསུམ་དུ་བསྒྱུར་ཏེ། མངོན་པར་བསྟན་དུ་ཟིན་ཀྱང་གོ་བར་བྱ་བ་དང་། ལམ་གྱི་འབྲས་བུ་ཐོབ་པར་མི་ནུས་སོ། །ཅིའི་ཕྱིར་ཞེ་ན། ཤཱ་རིའི་བུ་མི་མྱ་ངན་
པ་ནི་ཆོས་འདི་ལ་རང་གི་ལམ་བསྒྲིབས་པ་ཞེས་བྱ་སྟེ། སྐྱེ་བའི་སྐལ་བའང་མེད། ཡིད་ཆེས་པའི་སེམས་ཀྱང་མེད་ལ་གོས་དང་ཟས་འབའ་ཞིག་ལ་སྲེད་ཅིང་འཇིག་རྟེན་གྱི་ཁེ་ལ་བརྐམ་དད་པས་ངས་མི་འདི་ཡང་དག་པར་གཤེགས་པས་སེམས་ཅན་དམྱལ་བར་ལྟུང་ཞེས་
བཤད་དོ། །ཤཱ་རིའི་བུ་ད་ངས་མངོན་ཞིང་བྱེ་བྲག་ཕྱེད་སྒོའོ། །མི་ལ་ལ་ཞིག་འདི་ལྟ་བུའི་ཆོས་ཀྱི་དཀོན་མཆོག་ལ་དོག་ཅིང་འགལ་ན་ལེགས་པར་སྐྱེ་བའི་གནས་ལ་གཞར་སྐལ་བ་ཡོད་མེད་དེ། ངན་པའི་གནས་འབའ་ཞིག་ཏུ་སྐྱེ་ལ་རྟག་པར་ལོང་སྟེ་མིག་མེད་དོ། །ཤཱ་རིའི་
བུ་དགེ་དག་དྲེགས་ཤིང་ལེ་ལོ་བདོའོ། །དར་ཏེ་ངེས་པར་འཆད་མི་ནུས་པས་ངའི་དྲང་པོའི་ཆོས་བཤིག་གོ། །མི་ཕལ་གཞན་འཚེ་བ་མི་ནུས་ཏེ། གསོ་བ་ཁེའི་ཕྱིར་ངའི་ཆོས་བཤིག་གོ། །ཤཱ་རིའི་བུ་འདི་ལྟ་བུའི་ཆོས་ཀྱི་དཀོན་མཆོག་ནི་དེའི་ཚེ་མེད་པར་བཤིག་གོ། །ཅིའི་ཕྱིར་ཞེ་ན། 
དེ་ལྟ་བུའི་ཆོས་ཀྱི་དཀོན་མཆོག་ནི་སངས་རྒྱས་ཐམས་ཅད་ཀུན་གྱིས་རི་མོ་གུས་པ་སྟེ། རང་སངས་རྒྱས་དང་དགྲ་བཅོམ་པ་ལ་སོགས་པ་ཀུན་གྱིས་རི་མོ་གུས་པར་བྱ་བ་ནི་ཚུལ་ཁྲིམས་ཞིག་པའི་དགེ་སློང་ལེ་ལོ་ཡར་སྐྱེ་བས་ཆོས་ངེས་པར་མ་བཤད་དེ། །དགེ་སློང་གཞན་ལ་

49-1-168a

སོགས་པས་དེའི་ཚེ། ཀུན་གྱིས་ངའི་ཆོས་ལ་བརྙས་ཤིང་ལེ་ལོ་བྱས་ནས། ཀུན་གྱིས་བསྲིངས་སྤངས་ཏེ་འཇུང་བརྐམ་ཆེར་སྲེད་ཅིང་། འཚོ་ནམ་གྱི་ལས་ལ་གཅིག་ཏུ་སེམས་ཤིང་ནོར་ཁེ་རིན་ཆེར་འཛིན། ཕྲག་དོག་གིས་གཅིངས་པས་རྟག་པར་འཐབ་
བརྩོད་ལ་སྲེད་ཅིང་རེས་ཀྱི་ཤ་ཁོན་སྐྱེས་ལ་གཅིག་ལ་གཅིག་གུས་པའི་བག་མི་བྱེད་དོ། །སེམས་ཀྱི་རང་བཞིན་ཡང་རྒོད་པ་སྤྲེའུ་དང་ཚུངས་ཏེ། ཆོ་ག་བསྒྱུར་བཅོས་ནས་ནང་པའི་ལས་རྣམས་སྤྱོད་དེ། དགེ་སློང་གི་ཆོས་ལས་ནི་ཕྱིར་ནུར། ཤཱ་རིའི་བུ་འདི་ལྟ་
བུའི་མི་ངན་པས་དེ་ལྟ་བུའི་ཉེས་པ་སྦས་བཅབས་ཏེ་འདོད་པ་མང་བཙལ་བ་མང་བས་ནོར་སྤྱོད་དེ། དེ་རང་གསོས་པས་བདུད་ངན་པས་དེའི་སེམས་རིག་སྟེ། ཐབས་སྤྱད་པས་ཐ་དད་པར་བྱས་ཏེ་སོ་སོར་གྱེས་བཤིག་ནས་རོ་གཅིག་པའི་དགེ་འདུན་དཀོན་མཆོག་ལ་སྡེ་
ལྔར་བགོས་ཏེ། སྡེ་ལྔར་ཡོད་པས་འཐབ་རྩོད་པ་སྐྱེས་ཤིང་གཅིག་ལ་གཅིག་ཡིན་མ་ཡིན་པ་དང་ཉེས་པ་འཁྲུལ་བ་སྨོས་བརྗོད་དོ། །ཤཱ་རིའི་བུ་ད་ལྟར་གྱི་དགེ་སློང་གཅིག་གིས་གཅིག་བསྟན་བསླབས་ཏེ། གཅིག་ལ་གཅིག་གི་རི་མོ་གུས་ཤིང་སེམས་གཅིག་ཏུ་འཐུན་
པར་སྤྱོད་དེ། སངས་རྒྱས་ཀྱིས་བཤད་པ་བཞིན་དུ་མི་འགལ་ལོ། །དེ་ཙམ་གྱི་ཚེའི་དགེ་སློང་ནི་གཅིག་ལ་གཅིག་མི་སྟོན་མི་སློབ། གཅིག་ལ་གཅིག་རི་མོ་མི་གུས། ངན་པ་བྱེད་པ་མཐོང་ན་དེས་འཇིགས་ཏེ་བཏང་ནས་ཆོས་སུ་སྤྱད་དེ། གཅིག་ལ་གཅིག་བསྟན་བསླབ་
པར་མི་ནུས་སོ། །ལ་ལ་མང་པོ་ཐོས་པ་དང་ཤེས་རབ་ཟབ་མོ་ཡོད་མོད་ཀྱི་འོན་ཀྱང་དྲེགས་ཤིང་ལེ་ལོ་སྲེད་དོ། །མི་གཞན་ལ་བརྙས་སྨད་ནས་སོ་སོའི་སྤྱོད་ཅིང་རང་གིས་བརྗོད་པ་གཙུགས་ཏེ་གཅིག་གིས་གཅིག་མཐོང་བར་མི་དགའ་ན། བསྟན་པ་མནོད་མི་ནུས་པ་ལྟ་སྨོས་ཀྱང་
ཅི་དགོས། ཤཱ་རིའི་བུ་ཡང་དག་པར་གཤེགས་པ་འཇིག་རྟེན་ན་བཞུགས་པའི་ཚེ་ན་དཀོན་མཆོག་གསུམ་རོ་གཅིག་ན། ང་མེད་པར་འདས་པའི་ཕྱི་ན་བགོས་ཏེ་སྡེ་ལྔར་བྱས་སོ། །ཤཱ་རིའི་བུ་བདུད་ངན་པ་ད་རུང་ལུས་སྦས་ཏེ། ལྷ་སྦྱིན་ལ་བསྒྲོགས་བསྟངས་ནས། ངའི་ཆོས་དང་
དགེ་འདུན་བཤིག་གོ། །ཡང་དག་པར་གཤེགས་པ་ཡེ་ཤེས་ཆེན་པོ་ད་ལྟར་འཇིག་རྟེན་ན་བཞུགས་བཞིན་པས་ན། བདུད་ངན་པ་ཆེན་པོས་འབྱོར་བར་མི་ནུས་སོ། །མ་འོངས་པའི་དུས་ན་བདུད་ངན་པས་ལུས་བསྒྱུར་ལ་དགེ་སྦྱོང་གི་གཟུགས་སུ་བྱས་ཏེ། དགེ་འདུན་གྱི་ནང་དུ་ཞུགས་

49-1-168b

ནས་ཡོན་པོ་རྣམ་པ་མང་པོ་བཤད་དེ། སེམས་ཅན་མང་དུ་ཡོན་པོ་མཐོང་བར་འཇུག་པར་བྱས་ནས། དེ་ལ་ཡོན་པོའི་ཆོས་བཤད་དེ་འབྱི་ལེའུ་ང་ག་པ་ལ་དོན་གྱིས་འདྲན་ཏོ་ཞེས་ཟེར་ཏེ། ཤས་ལྔའི་དོན་བསམས་བཞིན་དུ་ཞི་བའི་དོན་ཡོད་པ་ཐམས་ཅད་ཀྱི་དོན་
ང་ཡོད་པའི་དོན་ཐོབ་པར་ཡོད་དོ་ཅོག་གི་དོན་ཏོ། །དེའི་ཚེ་བདུད་ངན་པས་འདི་ལྟ་བུ་ལ་སོགས་པ་ཡོན་པོ་འདོད་ཆགས་པའི་དོན་བཤད་དེ། དེ་ལྟ་བུའི་དོན་ནི་སངས་རྒྱས་རྣམས་དང་སངས་རྒྱས་ཀྱི་སློབ་མས་བཤད་པ་མ་ཡིན་ནོ། །དེའི་ཚེ་མི་ངན་པ་རྣམས་བདུད་ཀྱིས་
བསླད་པས་སོ་སོར་ཇི་མཐོང་བ་ལ་ཆགས་ཏེ། བདག་གི་ཡིན། ཕའི་བུ་མ་ཡིན་ཞེས་ཟེར་རོ། །ཤཱ་རིའི་བུ་ཡང་དག་པར་གཤེགས་པས་སྔ་ནས་ད་དུང་མ་འོངས་པའི་དུས་ཀྱི་ནང་ན་དེ་ལྟ་བུ་ལ་སོགས་པ། ཆོས་འཇིག་པའི་དོན་ཡོད་པ་མཐོང་བས་ན་ཆེད་ཀར་ཆོས་ཟབ་
མོ་འདི་བཤད་དེ། བདུད་ངན་པར་ཆགས་པར་བྱས་པའི་དོན་རྣམས་ཀུན་བཅད་དོ། །ཤཱ་རིའི་བུ་དེ་ཙམ་གྱི་ཚེ་ན་ཡང་འཛམ་བུའི་གླིང་གི་ནང་ན་ལེ་ལོ་ཡར་སྐྱེ་བའི་མི་དེ་མང་སྟེ། དགེ་བ་ལེགས་པ་ཆུང་ཞིག་བྱས་པས་ཀྱང་ཐལ་བྱུང་ཆོས་ལམ་ཐོབ་བོ་ཞེས་ཟེར་ཏེ། ཚེ་ཟད་
པའི་འོག་ཏུ་ལམ་ངན་པར་ལྟུང་ངོ་། །དེ་ཅིའི་ཕྱིར་ཞེ་ན། མི་དེ་ཉིད་མཚན་དུ་བདག་གིས་ཀྱང་ལམ་ཐོབ་ཅེས་ཟེར། མི་གཞན་གྱིས་ཀྱང་ལམ་ཐོབ་བོ་ཞེས་ཟེར་བ་བརྗོད་ཅིང་བཤད་དེ། འཕྲུལ་གྱི་མིས་ཡོན་ཕུལ་བ་ཐུགས་ཐུབ་པར་ལེན་ཏེ། དེ་ལྟ་བུའི་མི་ནི་ལྷ་དང་
མི་དང་འཇིག་རྟེན་ཐམས་ཅད་ཀྱི་དགྲ་ངན་པ་ཆེན་པོ་ཞེས་བྱའོ། །དེ་ལྟ་བུའི་མི་གཏི་མུག་གིས་མཆོག་གི་བདེན་པའི་གཞུང་བཤད་པ་ཐོས་ན། དངངས་དོགས་ཤིང་འཇིགས་སྐྲག་པ་ནི་ཁུང་ཟབ་མོར་ལྟུང་བ་དང་མཚུངས་སོ། །ཤཱ་རིའི་བུ་དགེ་སློང་གཞན་དོན་འདི་ལྟ་བུ་
ལ་སྲེད་པ་ཡོད་དེ། ལྷན་ཅིག་ཏུ་འདུས་ཚོགས་ནས་སངས་རྒྱས་རྣམས་ཀྱི་བླ་ན་མེད་པའི་བྱང་ཆུབ་དྲལ་བཤིག་གོ། །དེའི་ཚེ་ལེ་ལོ་ཡར་སྐྱེ་བའི་མི་ཡོན་པོ་ཆགས་པ་མང་སྟེ། བདུད་ངན་པས་ཀྱང་ཁྱིམ་ན་འདུག་པ་དང་། ཁྱིམ་ནས་བྱུང་བའི་སེམས་བསླད་བཀྲུགས་ཏེ། ཆོས་
མ་ཡིན་པ་ལ་ཆགས་པར་བྱས་སོ། །དྲང་པོའི་ཆོས་འཆད་པ་ལ་ནི་ར་མདའ་གཏོང་བ་ཉུང་བས་ཐལ་བྱུང་གྱེས་ཞིག་སྟེ་སླར་ཚུགས་པར་མི་རུང་ངོ་། །ཤཱ་རིའི་བུ་དེའི་ཚེ་འཇིག་རྟེན་ན་དགེ་སློང་གཞོན་ནུ་མང་དུ་ཡོད་དེ་དབང་པོ་རྣོ་བ་ཡོད་དོ། །ཇི་ལྟ་ཞེས་བྱས་ན་ཁྱིམ་ནས་བྱུང་བ་

49-1-169a

གཞན་ནི་ངན་འཁྲུག་པའི་ལྷག་མ་ཡོད་པས་སླར་མིའི་ནང་དུ་སྐྱེས་ནས། གདོད་ཡང་སླར་ཁྱིམ་ནས་བྱུང་སྟེ། དགེ་སློང་དེ་དག་རྟོག་ཅིང་འདྲི་བ་ལ་དགའ་ཞིང་མོས་པས་སངས་རྒྱས་ཀྱི་ཆོས་མཆོག་གི་གཞུང་བའི་གཞུང་རྗེས་གཅོད་
ཅིང་ཚོལ་ལོ། །ཤཱ་རིའི་བུ་ལེ་ལོ་ཡར་སྐྱེ་བ་རྣམས་ནི་བདུད་ཀྱིས་བསླད་བཀྲུགས་པས་སྲོག་གསོ་བ་འབའ་ཞིག་ཚོལ་ཏེ། བདེན་པར་མི་ཐ་མལ་པ་ཡིན་ན། བདག་ན་རེ་དགྲ་བཅོམ་པའོ་ཞེས་ཟེར་ཏེ། དགེ་སློང་གཞོན་ནུ་རྣམས་ལ་སོགས་པ་ལ་ཟེར་བ། 
ལུས་དང་ཁ་དང་ཡིད་དགེ་ན་དེ་ནི་སངས་རྒྱས་ཀྱི་ཆོས་ཀྱི་མཆོག་གི་བདེན་པའི་གཞུང་ཡིན་ནོ། །ཚུལ་ཁྲིམས་གཙང་མ་ལེགས་པར་བསྲུངས་ལ་ཆོས་ཀྱི་ཡི་གེ་ཁ་དོན་དང་ཀླགས་ཏེ་མང་པོ་ཐོས་པ་འགྲུས་པར་སྤྱད་ན་དེའི་མིང་མི་འགལ་བར་བཟོད་པའི་རྒྱུ་ཞེས་བྱ་སྟེ། དེ་ནི་སེམས་གཙང་
ཞིང་སངས་རྒྱས་ལ་ཡིད་ཆེས་པའོ། །གཅིག་ཏུ་ན་མཆོག་གི་བདེན་པའི་གཞུང་ཡོད་ཀྱིས་སེམས་ཀྱི་ནང་དུ་བརྟགས་པ་བཞིན། གཅིག་ཏུ་ན་མྱ་ངན་ལས་འདས་པ་བསམས་ན་སྡུག་བསྔལ་རྣམ་གསུམ་འགགས་ཏེ། ལྔ་ཕུང་དང་ཞུགས་པ་བཅུ་གཉིས། ཁམས་བཅྭ་བརྒྱད་
སྐྱོ་བྲལ་བར་ནུས་སོ། །ཁྱེད་ལ་སོགས་པ་གནས་དབེན་པ་ན་ཕུང་པོ་དང་ཁམས་དང་ཞུགས་པའི་ཆོས་འདི་ལ་རྟོགས་ཤིག་དང་། ཀུན་རྟོགས་པ་མེད་པའོ། །བདག་གི་ལུས་ལ་བརྟགས་ན་མི་གཙང་བ་རྣམ་པ་མང་སྟེ། ཁྱེད་ལ་སོགས་པས་དེ་ལྟ་བུར་བརྟག་ན། རྒྱུན་དུ་
ཞུགས་པའི་འབྲས་བུ་ཐོབ་བོ། །ཡང་གཅིག་ཏུ་ན་ལྔ་ཕུང་ལ་སོགས་པའི་ཆོས་འདི་ལ་རྟག་པ་མེད། སྡུག་བསྔལ་སྟོང་པ་སྟེ། ཡང་དག་པའི་ང་མེད་སྲ་མཁྲང་པ་མེད་པར་ཟབ་ཏུ་རྟོགས་ན་གདོད་ལན་ཅིག་ཕྱིར་འོང་བ་ཐོབ་བོ། །བསྒྱུར་ཏེ་ཡང་ཟབ་ཏུ་རྟོགས་ན། ཕྱིར་མི་འོང་
བ་དང་དགྲ་བཅོམ་པ་ཐོབ་སྟེ། དེ་ནི་མཆོག་གི་བདེན་པ་གཞུང་ཡིན་ཞེས་ཟེར་རོ། །དེའི་ནང་ན་དགེ་སློང་གཞོན་ནུས་སླར་དྲིས་ན། སངས་རྒྱས་ཀྱི་ཆོས་ཀྱི་ན་དགྲ་བཅོམ་པའི་འབྲས་བུ་ཐལ་འབྱུང་དུ་མཆོག་གི་གཞུང་ཞེས་བྱ་འམ། ངེད་ལ་སོགས་པའང་དེའི་དོན་ཤེས་ཏེ། 
དགྲ་བཅོམ་པ་ནི་མཆོག་གི་གཞུང་མ་ཡིན་ནོ། །ད་ལྟར་གྱི་ལྔ་ཕུང་འདི་དྲན་ཞིང་བསམས་པས་སྐྱེས་སམ། མི་དྲན་པ་བསམས་པས་སྐྱེས། ལན་བླན་པ་ལྔ་ཕུང་གིས་དྲན་པ་བསམས་པས་སྐྱེས་སོ། །མི་དྲན་མ་བསམས་པའི་མི་སྐྱེའོ། །ཡང་དྲིས་པ་དྲན་པ་བསམས་པ་དང་ལྔ་

49-1-169b

ཕུང་ཐ་དད་དམ་ཐ་མི་དད། ལན་སྨྲས་པ། ལྔ་ཕུང་དང་མཚུངས་ཏེ། དྲན་པ་བསམས་པ་ཡང་དེ་བཞིན་ན། །ཡང་དྲིས་པ་ལྔ་ཕུང་དང་མཚུངས་ཏེ། དྲན་པ་བསམས་པ་ཡང་དེ་བཞིན་དུ་ཟིན་ན་ལྔ་ཕུང་སེམས་པ་སུ་ཡིན། ལན་སྨྲས་པ། ལྔ་ཕུང་སེམས་པ་མེད་དུ་ཟིན་ན། 
མྱ་ངན་ལས་འདས་པ་ཡང་མེད་དོ། །བདེན་པར་ན་ལྔ་ཕུང་སེམས་དཔའ་མེད་དོ། །དེ་ལྟ་བས་ན་དྲང་པོའི་འཕགས་པའི་ལམ་བརྒྱད་སྤྱད་དེ། མྱ་ངན་ལས་འདས་པར་ཆུད་པ་ཡོད་དོ་ཞེས་ཟེར་རོ། །ཤཱ་རིའི་བུ་མ་འོངས་པའི་དུས་ན། དགེ་སློང་འདི་ལྟ་བུའི་བཟོད་པ་འབྱོར་གྲུབ་པ་མང་
ངོ་། །ཤཱ་རིའི་བུ་དེའི་ཚེ་ཚོགས་པའི་ནང་ན་ལྷ་ཕལ་མང་དུ་ཡོད་དེ། །སངས་རྒྱས་ཀྱི་ཆོས་མཆོག་གི་བདེན་པའི་གཞུང་ཐོས་པར་དགའ་ན། ལེ་ལོ་ཡར་སྐྱེ་བ་དེས་བཤད་པ་ཐོས་པ་དང་། སེམས་ལ་དོགས་ཤིང་འགྱོད་པ་སྐྱེས་ཏེ། ཁུང་ཟབ་མོར་ལྟུང་བ་དང་མཚུངས་ནས་ཀུན་འདི་སྐད་
ཟེར་རོ། །ཀའི་སངས་རྒྱས་ཤཱཀྱ་ཐུབ་པའི་ཆོས་ནི་ད་མྱུར་དུ་མེད་ལ་ཐུག་གོ་ཞེས་ཟེར་རོ། །ཤཱ་རིའི་བུ་དེའི་ནང་ན་དགེ་བ་འབྱོར་གྲུབ་པའི་དགེ་སློང་ཡོད་པས། དགེ་སློང་འདི་ལ་འདི་སྐད་བྱས་སོ། །མི་གཏི་མུག་སྟོང་པར་རྒས་པ་ལེ་ལོ་ཡར་སྐྱེ་བ་ལྔའི་མཚན་མ་དང་། ལྔ་
ཕུང་གི་མཚན་མ་དང་། ཞུགས་པ་བཅུ་གཉིས་དང་། ཁམས་བཅྭ་བརྒྱད་ཀྱི་མཚན་མ་ཡོད་དུ་ཟིན་ན་ཚིག་དེ་ཉན་ཏོ་ཞེས་ཟེར་ཏེ། མི་དགའ་ནས་རང་སྟན་ལ་འདུག་པ་ལངས་ཏེ་སོང་ངོ་། །ཤཱ་རིའི་བུ་དེའི་ཚེ་ན་ལྷ་རྣམས་སེམས་ཤིན་དུ་དགའ་ཞིང་གཞའ་སྟེ། ཕྱོགས་
བཞིར་སྐད་ཕྱུང་སྨྲས་པ། སངས་རྒྱས་ཤཱཀྱ་ཐུབ་པའི་སློབ་མ་མཁས་པ་ད་དུང་ཡོད་དོ་ཞེས་ཟེར་ཏོ། །དེའི་ཚེ་མི་གཞན་ལ་སོགས་པ་ཡང་དགེ་བའི་རྩ་བ་མི་ཉུང་བས། མི་གཙང་བ་དེ་བཤད་པ་ཐོས་པར་མི་དགའ་སྟེ། དེ་ནི་བདག་ཏུ་ལྟ་བ་དང་གང་ཟག་ཏུ་ལྟ་བའོ། །
ལྷ་རྣམས་ཀྱིས་འདི་ཐོས་པ་དང་། ཀུན་ཤིན་དུ་དགའ་སྟེ། དབང་པོ་རྣོ་བ་དེ་སྙན་པར་བསྟོད་བསྔགས་ཏེ་འདྲི་ཞིང་ལན་ལྡོན་པ་ལ་དགའ་སྲེད་པས། ཀུན་གྱིས་སྐྱེ་བ་མེད་པའི་ཆོས་ཀྱི་བཟོད་པ་ཐོབ་པ་ཡང་དག་ཆེས་ཟེར་ཏོ། །དེ་ལྟ་བུ་ལ་སོགས་པ་མི་གནས་གཅིག་ཏུ་འདུག་
སྟེ། ལྷན་ཅིག་ཏུ་སྡོས་ཏེ་འགྲོགས་ལ་མི་ཕལ་ཉུང་ལ་དཔུང་བསྡོམས་ཀྱང་ཞན་ཏོ། །ཤཱ་རིའི་བུ་དེའི་ཚེ་ངའི་བུ་ཡང་དག་པ་རྣམས་ཀྱང་རིགས་ཀྱི་རྒྱུད་ལ་ཚིག་ནོར་བ་མེད་ན། ཡོན་མི་ཐོབ་པ་དང་མཆོད་རྟེན་དང་གཙུག་ལག་ཁང་དུ་མི་གནས་པ་ལྟ་སྨོས་

49-1-170a

ཀྱང་ཅི་དགོས། ཤཱ་རིའི་བུ་ཁྱོད་རེ་ཤིག་ལྟོས་ཤིག །དེ་ནས་ཡང་དག་པར་གཤེགས་པས་ཐལ་བྱུང་བརྙས་བཤུང་བ་བྱས་ཏེ། ང་མེད་པར་འདས་པའི་ཕྱི་ན་ངའི་བུ་རྣམས་ལ་སོགས་པ་ཅི་ཡང་ཐོབ་པ་མེད་པའི་བཟོད་པ་ཞི་བ་ལ་མཁས་པས་ཀྱང་དེའི་
ཚེ་ང་ལ་བརྙས་སྨད་དོ། །དེ་ལྟ་བས་ན་བསྐལ་པ་གྲངས་མེད་པའི་བར་དུ་དགྲ་རྣམས་ཕུལ་ནས་ལྷའི་རྒྱལ་པོ་དང་མིའི་རྒྱལ་པོ་རྣམས་ཐམས་ཅད་བསྟན་ཏེ་སེམས་གཙང་དག་པར་བྱས་སོ། །དེ་ནས་གདོད་ངའི་བུ་རྣམས་ཀྱིས་ཕའི་གྲལ་བདེ་བར་ཐོབ་པར་བྱས་སོ། །ཤཱ་རིའི་བུ་ཡང་དག་
པར་གཤེགས་པས་འཇིག་རྟེན་གྱི་མི་དང་ལྷ་ཐམས་ཅད་དབང་དུ་བྱས་ཏེ། ཡང་དག་པར་གཤེགས་པས་ཆོས་བཞིན་དུ་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཐོབ་སྟེ། བླ་ན་མེད་པའི་ཆོས་ཀྱི་འཁོར་ལོ་བསྐོར་ཏོ། །དགེ་སྦྱོང་དང་བྲམ་ཟེ་དང་ལྷ་དང་། བདུད་དང་ཚངས་པས་
བསྐོར་མི་ནུས་སོ། །ཤཱ་རིའི་བུ་དེ་ལྟར་མངོན་པར་བསྟན་པ་ཡང་དག་པར་གཤེགས་པ་འདས་པའི་ཕྱི་ན་ངའི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་འདི་ངའི་སློབ་མ་རྣམས་ལ་སོགས་པས་རྒྱ་ཆེར་བཀྲམ་ཞིང་ཁྱབ་པར་བྱས་ན། མི་ངན་གཞན་རྣམས་ཀྱིས་མངོན་
པའི་དབང་བྱ་ནི་ནུས། འཇིགས་པ་མེད་པའི་སྦྱིན་པ་ཡང་མི་ནུས་སོ། །ཤཱ་རིའི་བུ་དཔེར་ན་སྦྲང་རྩི་བུམ་པ་ལམ་གྱི་བཞི་མདོར་བཞག་སྟེ། ཚིག་འདི་སྐད་བྱས་པ་དང་མཚུངས་སོ། །མི་ལ་ལ་ཞིག་གིས་སྤུ་ཉག་མ་གཅིག་གི་ཐོག་མ་ཙམ་ཞིག་ཟ་ཕོད་ན། རྟག་པར་མི་དགའ་
མི་འཆིའོ། །དེ་ནས་ལྷ་དང་འཇིག་རྟེན་གྱི་མི་རྣམས་སོ་སོར་རལ་གྱི་མཚོན་ཆ་ཐོགས་ཏེ་བུམ་པའི་དྲུང་ན་དེའི་ཚེ་སྲུང་བ་རྣམས་སོ་སོ་ནས་ཚིག་འདི་སྐད་མཛེར་ཏོ། །མི་ལ་ལ་སྤུ་ཉག་མ་གཅིག་ཟ་བ་ཡོད་ན་བདག་ཅག་གིས་གསད་དོ་ཞེས་འཛེར་ཏོ། །ཤཱ་རིའི་བུ་དེའི་ནང་ན་མི་གཅིག་
མཁྱུད་བུར་འདི་སྙམ་དུ་སེམས་སོ། །བུམ་པ་འདིའི་ནང་གི་སྦྲང་རྩི་ལ་སྤུ་ཉག་མ་གཅིག་གི་ཐོག་མ་ཙམ་ཞིག་ཟོས་ན། མི་རྒ་མི་ཤི་ན་བདག་ད་ཅིའི་ཕྱིར་ནས་ཤི་བས་འཇིགས་ཤིང་མི་ཟ། ཐོབ་ཏུ་ཟིན་ཏེ་མི་ཟོས་ན་མོད་བཞིན་སྲུངས་མ་རྣམས་ཀྱིས་འཇིག་པ་མེད་པ་ལ་བརྟགས་
ཏེ། རྒ་བ་དང་ན་བ་འཆི་མེད་པར་ཡང་ཐོབ་པར་རུང་ན། དེ་བཞིན་དུ་སེམས་བཏུལ་ཏེ་ཚེ་སྲོག་མི་ཕངས་པར་ཐལ་བྱུང་བུམ་པའི་ནང་དུ་སོང་ན། སྲུངས་མ་རྣམས་སོ་སོར་རལ་གྲི་དང་མཚོན་ཆ་ཁྱེར་ཏེ་བརྟོད་ནས་གསད་པར་བྱས་སོ། །ཤཱ་རིའི་བུ་མི་དེས་རལ་གྲི་མཚོན་ཆས་མ་

49-1-170b

ཕོག་པར་རྟུལ་ནུས་ཏེ་ཐིགས་པ་གཅིག་ཟོས་སུ་ཟིན་ན། རྒུད་པའི་ནད་ལས་ཐར་ཏེ། རྒ་ཤི་ཡང་མེད་དོ། །དེ་ལྟ་སྟེ་ཤཱ་རིའི་བུ་མི་ངན་པ་མང་དུ་ཡོད་པས། བདུད་དང་བདུད་ཕལ་རྣམས་ཀྱིས་ངའི་ཆོས་མེད་པར་བྱ་བར་བྱས་སོ། །ཡང་དག་པར་གཤེགས་པ་འདས་པའི་
ཕྱི་ནས་མི་ལ་ལ་ཞིག་སྟོང་པ་ཉིད་ཆོས་བཞིན་དུ་ནུས་ཏེ། ཁོང་དུ་ཆུད་ལ་ཐེ་ཙོམ་མེད་ན། གདོད་ཆོས་སོ་ཅོག་ལ་སེམས་ཀྱིས་ཅི་ཡང་ཐོགས་པ་མེད་དོ། །བླ་མའི་བཟོད་པ་འབྱོར་གྲུབ་བོ། །དེའི་ཚེ་མི་ངན་པས་བརྙས་ཏེ་ཆོས་ལམ་དེ་དྲལ་བཤིག་པར་བྱས་མོད་ཀྱི། མི་དེས་ལུས་
དང་སྲོག་མི་ཕངས་པར་ནས་ན། བརྩོན་འགྲུས་རྟག་ཏུ་སྤྱོད་ན་ཆོས་སོ་ཅོག་ཀུན་ཆུད་ལ་སྐྱེ་བ་ཡང་མེད་བྱ་བའང་མེད་དེ། སྐྱེ་རྒ་ན་འཆི་ལས་གྲོལ་ཐར་པ་ཐོབ་བོ། །ཤཱ་རིའི་བུ་སྦྲང་རྩི་བུམ་པ་ནི་སངས་རྒྱས་ཀྱི་ཆོས་ཀྱི་གཞུང་ཡིན་ནོ། །ལྷ་དང་འཇིག་རྟེན་གྱི་མི་རྣམས་ཀྱིས་
བུམ་པ་བསྲུངས་པ་ནི་མི་ངན་བདུད་ཀྱི་དོན་ལ་སྲེད་པ་ཡིན་ཏེ་བདག་བསོད་ནམས་ཆེན་པོ་ཡང་སྟོར། མི་གཞན་ཡང་དག་པའི་མཚན་མ་སྤྱད་པའང་བཀབ་སྟེ། བསོད་ནམས་ཆེན་པོ་སྟོར་བར་བྱས་སོ། །ཤཱ་རིའི་བུ་ལེ་ལོ་ཡར་སྐྱེ་བ་ནི་ཀུན་བདུད་ཀྱི་གྲོགས་པོ་ཡིན་ཏེ། བདུད་ཀྱི་དོན་
གྲུབ་པར་སྟོན་ཅིང་ཀུན་སྐྱེ་བ་མེད་པའི་ཆོས་ལ་འཕྱ་ཞིང་གཤེའོ། །ཡང་ཤཱ་རིའི་བུ་མི་གཙང་བ་འཆད་པ་ནི་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་དུ་ལྟ་བ་དང་། ལྔ་ཕུང་དང་། ཞུགས་པ་བཅུ་གཉིས་དང་། ཁམས་བཅྭ་བརྒྱད་དུ་ལྟ་བ་སྟེ། མཐོང་བར་ཐོབ་ཅེས་
ཟེར་ཞིང་སེམས་ལ་ལམ་ཐོབ་པར་འཛིན། མྱ་ངན་ལས་འདས་པ་ཐོབ་པར་འཛིན་ཏེ། ཀུན་གྱིས་ཀྱང་འདི་ལྟ་བུ་དྲང་པོའི་ཆོས་ལ་འཕྱ་ཞིང་སྐྲོད་དོ། །ཅིའི་ཕྱིར་ཞེ་ན། མི་དེ་དག་ཁ་སྟོང་པ་ལ་འདོད་ཆགས་པའི་ཕྱིར་བདུད་རྣམས་ཀྱང་མ་ཡིན་ལ། བདུད་ཀྱིས་ཀྱང་བསླད་དཀྲུགས་པས་ངའི་
དྲང་པོའི་ཆོས་ནི་བདུད་ཀྱི་དོན་དུ་བྱས་སོ། །ཤཱ་རིའི་བུ་ཁྱིམ་ན་འདུག་པ་ཡང་རུང་། ཁྱིམ་ནས་བྱུང་བ་ཡང་རུང་སྟེ། བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད་དེ་མཐའ་ཡུན་དུ་སྟོང་པའི་ཆོས་ཐོས་ལ་དངངས་དོགས་ཤིང་སྐྲག་ན། དེ་ལྟ་བུའི་མི་ནི་བདུད་ཀྱིས་བསྟན་
བསླབས་པར་མངོན་ཏེ། རི་མོའི་དགེ་སློང་ཡིན། ཆོས་རྐུ་བའི་ཆོ་ག་ངན་པ་ཡིན་ནོ། །ཤཱ་རིའི་བུ་དེ་ལྟ་བུའི་མི་ནི་བདག་ཏུ་ལྟ་བ་དང་། སེམས་ཅན་དུ་ལྟ་བ་དང་། ཡོད་པར་མཐོང་བ་དང་། མེད་པར་མཐོང་བ་དང་། རྟག་པར་མཐོང་བ་དང་། ཆད་པར་མཐོང་བ་ཡིན། ཀུན་བདུད་ཀྱི་

49-1-171a

མི་སྡེ་སངས་རྒྱས་ཀྱི་སློབ་མ་མ་ཡིན་ནོ། །ཇི་ལྟ་ཞེ་ན། ངའི་ཆོས་ཀྱི་ཡི་གེའི་ནང་ནས་བཤད་པ་འཇིག་རྟེན་ཐམས་ཅད་ཀུན་ནི་སྟོང་པ་སྟེ། ངའི་མེད་པའི་གནས་ཀྱང་མེད། ཟག་པ་མེད། སེམས་ཅན་མེད། རྟག་པ་མེད། མི་འགྱུར་བ་མེད། མི་འཇིགས་པའི་
ཆོས་མེད་ན། དེ་ལྟ་བུའི་མི་ངན་པས་ཀྱང་ཀུན་གྱིས་ཆོས་ཀྱི་ཡི་གེ་དང་། ཁ་ཏོན་དུ་བཀླགས་ཏེ་མི་གཞན་ལ་བཤད་ན། སེམས་ཅན་ནི་བདག་ཏུ་ལྟ་བ་དང་། གང་ཟག་ཏུ་ལྟ་བ་ལ་ཆགས་པ་དེ་ལྟ་བུའི་མི་གཏི་མུག་ནི་སྡུག་བསྔལ་གྱི་རྒྱུ་བྱེད་པ་ཞེས་བྱའོ། །མིང་
མགོ་གཉིས་བསྒྱུར་བ་ལ་བཟློག་པ་ཞེས་བྱའོ། །མིང་འཐབ་འཁྲུག་ཅིང་དགེ་འདུན་འཇིག་པ་ཞེས་བྱའོ། །མིང་ལམ་གྱི་ཆོས་བསྒོམ་པ་སྔགས་པ་ཞེས་བྱའོ། །མིང་དགེ་སྦྱོང་ནང་གི་རྟོག་པ་ཞེས་བྱའོ། །མིང་སྡིག་པ་ངན་པ་སྨེ་བཙོག་པ་ཞེས་བྱའོ། །མིང་ཚིག་གི་
བཤད་པ་འབའ་ཞིག་ཡོད་ཅེས་བྱའོ། །མིང་སྒྱུ་མའི་དགེ་སྦྱོང་ཞེས་བྱའོ། །མིང་དགེ་སྦྱོང་གི་ནང་གི་དབུལ་པོ་ཞེས་བྱའོ། །མིང་ཁུར་ལྕི་བ་ཁྱེར་ཞེས་བྱའོ། །མིང་སངས་རྒྱས་རྣམས་ལ་བརྙས་བསླུས་པ་ཞེས་བྱའོ། །མིང་ལོག་པའི་སྡིག་མཐོང་བ་ཞེས་བྱའོ། །
ཤཱ་རིའི་བུ་དེ་ལྟ་བུའི་མི་མིང་ལོག་པའི་དགྲ་ངན་པ་ཆེན་པོ་ཞེས་བྱའོ། །མིང་ངན་པའི་བཤེས་གཉེན་ཞེས་བྱའོ། །མིང་ཚུལ་ཁྲིམས་ཞིག་པ་ཞེས་བྱའོ། །མིང་ཡོན་པོ་འཐོབ་པ་ཞེས་བྱའོ། །མིང་མུར་འདུག་ཅེས་བྱའོ། །མིང་བདེན་པ་སྤྱད་པ་མེད་པ་ཞེས་བྱའོ། །མིང་གྲོགས་ངན་
པ་ཞེས་བྱའོ། །མིང་གསོད་པའི་འདྲེ་ཞེས་བྱའོ། །མིང་མཛེ་རྨ་ཞེས་བྱའོ། །མིང་མནམ་སྨེ་ཞེས་བྱའོ། །མིང་ཚ་བས་སྲེག་ཞེས་བྱའོ། །མིང་གཅམ་སྒྱུ་ཞེས་བྱའོ། །མིང་མུན་གནག་ལྟུང་ཞིང་འདུག་ཅེས་བྱའོ། །མིང་ཚལ་ནགས་སྟུག་པོར་ཞུགས་ཞེས་
བྱའོ། །མིང་སྐྱེ་ཤི་བཞིན་དུ་འབབ་ཅེས་བྱའོ། །མིང་ངན་པ་རིས་ཀྱིས་འབྱུང་ཞེས་བྱའོ། །མིང་སེམས་ཅན་དམྱལ་བ་ཞེས་བྱའོ། །མིང་བྱོལ་སོང་ཞེས་བྱའོ། །མིང་ཡི་དགས་ཤེས་བྱའོ། །མིང་ལྷ་མ་ཡིན་ཞེས་བྱའོ། །མིང་ལམ་དུ་མི་འཇུག་པ་ཞེས་བྱའོ། །མིང་
མི་ལ་བརྙས་བསླུས་ཞེས་བྱའོ། །མིང་རང་གི་ལུས་ལ་སྟོང་པ་ཞེས་བྱའོ། །མིང་མོ་དང་མཚན་མ་སྤྱོད་པ་ཞེས་བྱའོ། །མིང་སྒྲ་ཆེན་པོ་འབོད་འགྲོགས་ཤེས་བྱའོ། །མིང་ཁེའི་ཞར་ལ་ཁེ་ཚོལ་བ་ཞེས་བྱའོ། །མིང་གཞན་ལ་འགོ་ཞིང་ཞེན་པ་ཞེས་བྱའོ། །མིང་རྟག་པར་

49-1-171b

འདྲན་ཏོར་བྱེད་པ་ཞེས་བྱའོ། །མིང་སེམས་འཁྲུག་འཁྲུགས་པ་ཞེས་བྱའོ། །མིང་གནོད་དོ་ཅོག་ལ་བརྐམ་པ་ཞེས་བྱའོ། །མིང་གཏི་མུག་སྣོད་པ་ཞེས་བྱའོ། །མིང་ནོར་བརྙས་པ་ལ་སྲེད་པ་ཞེས་བྱའོ། །མིང་རྒུད་པའི་མྱ་ངན་གྱི་གནས་ཤེས་བྱའོ། །མིང་གྲོལ་ཐར་མེད་
པ་ཞེས་བྱའོ། །མིང་མྱ་ངན་འཁྲུགས་པས་བཅིངས་པ་ཞེས་བྱའོ། །མིང་དགེ་སྦྱོང་གི་ལུས་མ་ཡིན་ཏེ་རི་མོའི་དགེ་སྦྱོང་ཞེས་བྱའོ། །དགེ་སྦྱོང་དགྲ། དགེ་སྦྱོང་མནམ་སྨེ་བ། དགེ་སྦྱོང་སྦང་རྣ་ཞེས་བྱའོ། །མིང་དགང་བར་དཀའ་ཞེས་བྱའོ། །མིང་གསོ་དཀའ་བ་ཞེས་བྱའོ། །
མིང་ཆོ་ག་ཞིག་པ་ཞེས་བྱའོ། །མིང་ཁྲེལ་བསལ་མེད་པ་ཞེས་བྱའོ། །མིང་མགོ་གཏུབས་བཅད་པ་ཞེས་བྱའོ། །མིང་ལུས་གཟུགས་ཞིག་པ་ཞེས་བྱའོ། །མིང་ཆོས་གོས་མགུལ་བཏགས་པ་ཞེས་བྱའོ། །མིང་རང་མུན་ནག་ཏུ་ཞུགས་པ་ཞེས་བྱའོ། །མིང་འདོད་ཆགས་
མང་པོ་ཞེས་བྱའོ། །མིང་ཞེ་སྡང་མང་པོ་ཞེས་བྱའོ། །མིང་གཏི་མུག་ཆེན་པོ་ཞེས་བྱའོ། །མིང་བཀབ་པ་ལྔས་བསྒྲིབས་གཡོགས་པ་ཞེས་བྱའོ། །མིང་ནུབ་པ་ཞེས་བྱའོ། །མིང་སྒྱུ་མ་ཞེས་བྱའོ། །མིང་སྟོང་པ་ཞེས་བྱའོ། །མིང་མུགས་པ་ཞེས་བྱའོ། །ཤཱ་རིའི་བུ་དེ་
ལྟ་བུའི་མིང་སྟོང་པ་ཞེས་བྱ་བ་སངས་རྒྱས་ཆོས་སོ་ཅོག་གིས་དགེ་བར་བསྟོད་པའི་མིའི་མཚན་ལས་ལོག་སྟོར་བས་ན་མིང་སྟོར་བ་ཞེས་བྱའོ། །དགེ་སྦྱོང་ངོ་ཅོག་གི་ལེགས་པའི་དོན་དང་། དགེ་སྦྱོང་གི་ཆོས་ཀྱི་དོན་ལ་ལོག་སྟོར་བས་ན་མིང་སྟོར་བ་ཞེས་བྱའོ། །ཇི་ལྟ་བུར་ན་སྒྱུ་
མ་ཞེས་བྱ་འཕགས་པ་ཆོས་ཀྱི་ཕྱི་ལོགས་ན་འདུག་པས་ན། མིང་སྒྱུ་མ་ཞེས་བྱའོ། །སྟོང་པ་དང་མཚན་མ་མེད་པ་དང་སྨོན་པ་མེད་པའི་ཆོས་བསྲིངས་སྤངས་པས་ན་མིང་སྒྱུ་མ་ཞེས་བྱའོ། །ཤཱ་རིའི་བུ་དེ་ལྟ་བུའི་མི་ངན་པ་ནི་བདུད་དགའ་བར་བྱ་ནུས་ཏེ། སྒྱུ་མ་མི་བདེན་པའི་
ཆོས་ལ་སྲན་ཐུབ་པར་འདོད་ཆགས་ནུས་པས་ན་ཐ་མལ་པ་དང་མཚུངས་ཏེ། སྡིག་ངན་པའི་མིའི་མཚན་ནོ་ཅོག་ཚང་སྟེ་ལྡན་པར་ཡོད་པས་ཆོས་ཀྱི་བཟོད་པ་ཐོབ་པ་མི་འདྲའོ། །དགེ་སྦྱོང་གི་ཆོས་ཀྱི་དོན་དང་། དགེ་སྦྱོང་གི་ལེགས་པའི་དོན་དང་བརྒྱ་སྟོང་ཁྲི་དེའི་ཆ་གཅིག་
ཀྱང་མེད་དོ། །ཤཱ་རིའི་བུ་དེ་ལྟ་བས་ན་མིང་སྟོང་པ་ཞེས་བྱའོ། །སྒྱུ་མ་ཞེས་བྱའོ། །འཇིག་རྟེན་གྱི་ཁེ་སྲེད་པ་འབའ་ཞིག་ལ་འདོད་ཆགས་ཏེ། དགེ་སྦྱོང་མ་ཡིན་པར་ནི་བདག་རང་དགེ་སྦྱོང་ཞེས་ཟེར། ཡོན་མི་བླང་བའི་རིགས་པ་ནི་ཡོན་བླངས་ཏ། མི་རྟག་པའི་དགྲས་དགྲའི་

49-1-172a

མཚན་མའི་རྒྱལ་མཚན་གཙུགས་ཤེས་བྱའོ། །ཡང་མིང་རང་དབང་གིས་མི་གསོད་ཅིང་གནོད་པའི་དགྲ་ཞེས་བྱའོ། །མི་དེས་ཟས་ཁམ་གཅིག་ཟོས་པ་ཀུན་གཙང་གདང་བ་མེད་དོ། །ལམ་ལ་ཕྱོགས་པ་དང་ལམ་གྱི་འབྲས་བུ་ཐོབ་པ་འབའ་ཤིག་ཡོན་ཕུལ་
བ་ཞུ་བར་ནུས་ན་མི་དེ་ལ་དེ་ལྟ་བུ་མེད་པས་ན་མིང་ཟོས་པ་མི་གཙང་བ་ཞེས་བྱའོ། །ཤཱ་རིའི་བུ་དེ་ལྟ་བས་ན་མིང་སྟོང་པ་ཞེས་བྱའོ། །སྒྱུ་མ་ཞེས་བྱའོ། །ཤཱ་རིའི་བུ་ཁྱོད་ཀྱི་ཡིད་ལ་ཇི་སྙམ། མི་ལ་ལ་ཞིག་གིས་སྲོག་གཅོད་རྐུ་འཕྲོག་ཡོན་པོར་གཡེམ་བརྫུན་ཟེར་ལྕེ་གཉིས་
བྱེད་ཁ་ངན་ཁྱལ་པ་ཟེར་འདོད་ཅིང་། ཕྲག་དོག་ཞེ་སྡང་ཡོན་པོ་ལ་ལྟ་ན། མི་དེ་རྟག་པར་སྲོག་གཅོད་དམ། རྟག་པར་ཚེ་སྲོག་མི་འཕྲོག །བཅོམ་ལྡན་འདས་མི་འཕྲོག་གོ། །ཁྱིམ་ན་འདུག་ན་སྲོག་གཅོད་དེ། རྟག་པར་སྲོག་མི་འཕྲོག་པས་སྲོག་གཅོད་པའི་དུས་ནི་
ཉུང་། སྲོག་མི་གཅོད་པའི་དུས་ནི་མང་ངོ་། །ཤཱ་རིའི་བུ་ཁྱོད་ཀྱི་ཡིད་ལ་ཇི་སྙམ། མི་ལ་ལ་ཞིག་རྐུ་འཕྲོག་ན་འཕྲོག་པའི་དུས་མང་ངམ། བཅོམ་ལྡན་འདས་མི་རྐུ་བའི་དུས་མང་ངོ་། །ཤཱ་རིའི་བུ་ཁྱོད་ཀྱི་ཡིད་ལ་ཇི་སྙམ། ཁྱི་ལ་ལ་ཞིག་ཡོན་པོར་གཡེམ་ན་ཡོན་པོར་གཡེམ་
པའི་དུས་མང་ངམ། ཡོན་པོར་མི་གཡེམ་པའི་དུས་མང་ངོ་། །བརྫུན་ཟེར་བ་དང་། ཁ་ངན་དང་། ལྕེ་གཉིས་དང་། ཚིག་ཁྱལ་པར་ཟེར་བ་དང་། འདོད་ཅིང་ཕྲག་དོག་དང་། ཞེ་སྡང་གི་དུས་མང་ངམ། བཅོམ་ལྡན་འདས་ཞེ་སྡང་བའི་དུས་མང་ངོ་། །ཤཱ་རིའི་བུ་མི་དགེ་བ་ལམ་འདི་བཅུའི་
ནང་ན་གང་སྡིག་ལྕི། བཅོམ་ལྡན་འདས་མི་དགེ་བ་བཅུའི་ནང་ན་ཡོན་པོ་མཐོང་བ་ནི་སྡིག་ལྕིའོ། །ཅིའི་ཕྱིར་ཞེས་བགྱིས་ན། བཅོམ་ལྡན་འདས་ཡོན་པོ་མཐོང་བ་ནི་རྟག་པར་སེམས་ལ་དྲི་མ་ཆགས་ཏེ། སེམས་མི་གཙང་མི་གདང་ངོ་། །ཤཱ་རིའི་བུས་ངས་ད་ཁྱོད་ལ་བསྒོའོ། །མི་
ལ་ལ་ཞིག་གིས་ཉི་མ་གཅིག་ལ་སེམས་ཅན་བརྒྱ་སྟོང་ཁྲི་འབུམ་བསད། ཉི་མ་གཅིག་ལ་གསེར་དངུལ་དང་། ནོར་རིན་པོ་ཆེ་རྣམ་པ་བརྒྱ་སྟོང་ཁྲི་རྐུས། ཡོན་པོར་གཡེམ་པ་ནི་ཉིན་མཚན་དུ་མི་གཏོང་། བརྫུན་ཟེར་བ་ནི་རྟག་པར་མི་ལ་བརྙས་བསླུས་ཏེ། ཁའི་ལས་མི་གཙང་
བས་ཚིག་བདེན་པ་མེད། ལྕེ་གཉིས་རྟག་པར་འབྱོར་འདུམ་པ་འཇིག་ཅིང་འཇིག་པའི་སྟོངས་མོ་ཡང་བྱེད། ཁ་ངན་པ་ནི་ཁར་རྟག་པར་ངན་པའི་ལོག་པ་ཟེར་ཏེ། མཉེན་དེས་པ་ཚིག་གཅིག་མི་སྨྲ། ཚིག་ཁྱལ་པ་ཟེར་བ་ནི་རྩ་བའི་ཕྱི་མོ་བྱེད་དེ། མིས་དོན་དེ་ཐོས་ན་གྲངས་མེད་

49-1-172b

པའི་ཚིག་སྨྲས་ཏེ། འཆལ་འཁྲུངས་སོ། །འདོད་ཅིང་ཕྲག་དོག་ནི་ཁོང་གཞན་ནོར་ལ་ཆོས་མ་ཡིན་པའི་སེམས་སྐྱེས་སོ། །ཞེ་སྡང་ནི་རྒྱུ་རྐྱེན་མེད་པ་ལས་གློ་བུར་དུ་ཞེ་སྡང་ལངས་ཏེ། འཁོན་པ་བསྲེལ་པ་ལས་སེམས་གདང་ངོ་། །ཡོན་པོ་མཐོང་བ་ནི་ལམ་མ་
ཡིན་པས་སྦྱང་བ་ལ་སྲེད་དོ། །ཤཱ་རིའི་བུ་ཁྱོད་ཀྱི་ཡིད་ལ་ཇི་སྙམ། མི་ལ་ལ་ཞིག་གིས་དེ་ལྟ་བུའི་མི་དགེ་བའི་ཆོས་འབྱོར་གྲུབ་ན་སྡིག་མང་ངམ་མི་མང་། བཅོམ་ལྡན་འདས་ཤིན་དུ་མང་ངོ་། །ཤཱ་རིའི་བུ་ངས་ཁྱོད་ལ་བསྒོའོ། །མི་ལ་ལ་ཞིག་གིས་ལོ་བརྒྱའི་
བར་དུ་འདི་ལྟ་བུ་མི་དགེ་བ་བཅུའི་སྡིག་འབྱོར་གྲུབ་པ་བས་ནི། ཚུལ་ཁྲིམས་ཞིག་པའི་དགེ་སློང་གིས་ན་ཉིན་གཅིག་མཚན་གཅིག་གི་བར་དུ་ཁོང་གཞན་གྱི་ཡོན་བླངས་པ་སྡིག་པ་དེ་བས་ཆེའོ། །ཅིའི་ཕྱིར་ཞེ་ན། སྲོག་གཅོད་པ་དེ་ནི་མི་གཞན་གྱིས་རིག་པ་
མང་། མི་གཞན་གྱིས་ཤེས་པ་མང་། མིའོ་ཅོག་གི་མི་སྡུག་པའི་དགྲ་སྟེ། མི་ཀུན་གྱིས་གསོད་ཅིང་སྲོག་འཕྲོག་པ་ཡིན་པར་ཤེས་ཏེ། སྡིག་མི་སྨྲ། རྙོག་ཅིང་བསྒོམས་ཞེན་པ་ཡིན་ཏེ། མི་དགེ་མི་དེས་པས་མིའོ་ཅོག་གིས་སྤངས་སོ། །ཡང་ཤཱ་རིའི་བུ་སྲོག་
གཅོད་པའི་མི་གཞན་གྱིས་སྲོག་འཕྲོག་པ་མང་བས་བར་བར་སྐྱེ་བའི་སེམས་སྐྱེས་ཏེ། མི་རིགས་པ་དང་མཐར་སྡིག་གི་ལམ་ཐོབ་པར་རང་གིས་ཤེས་སོ། །མི་ཀུན་གྱིས་ཀྱང་ངན་ཅིང་ཚུལ་ཁྲིམས་མེད། སྨེ་བར་ཤེས་སོ། །མི་དེ་ལ་ལེགས་པའི་སྤུའི་ཉག་མའི་བཅུ་ཚལ་
གྱི་བརྒྱ་ཆ་གཅིག་ཙམ་ཡང་མི་རེག་ན། དཔལ་ཞིང་གི་ཡོན་མི་ཐོབ་པ་ལྟ་སྨོས་ཀྱང་ཅི་དགོས། ཡང་ཤཱ་རིའི་བུ་སྲོག་གཅོད་པ་མི་དེའི་བུ་སྨད་ནི། མི་ཀུན་གྱིས་ཤེས་རིག་སྟེ། བཀུར་སྟི་མི་བྱ། འདུག་དུའང་མི་སྟེར་ན། ཡོན་མི་སྦྱིན་པ་ལྟ་སྨོས་ཀྱང་ཅི་དགོས། སྲོག་གཅོད་པའི་
མི་ནི་ནོར་གྱིས་རང་འཚོ་ཞིང་བུ་སྨད་གསོ་སྐྱེད་དོ། །བར་བར་དགེ་སྦྱོང་དང་བྲམ་ཟེ་ལ་ཡོན་ཕུལ་ཏེ། དེའི་ལན་གྱིས་འཛངས་ཤིང་འཁྲུལ་པའི་དགེ་སྦྱོང་དང་ཕྲད་ནས། དེ་ལ་ལམ་གྱི་ཆོས་བཤད་ནས། སྲོག་གཅོད་པ་སྤངས་པར་བསྟན་ནས་སྲོག་གཅོད་པའི་ལས་དེ་
བཏང་སྟེ། སངས་རྒྱས་ཀྱི་ཆོས་ལ་ཁྱིམ་ནས་བྱུང་ནས་བསྒྲིབས་ཤིང་ཐོགས་པ་མེད། ཁྱིམ་ནས་བྱུང་ཟིན་པ་དང་། དགེ་བའི་བཤེས་གཉེན་ལ་ཉེ་བསྙེན་ཏེ། དགེ་སྦྱོང་གི་འབྲས་བུ་ཐོབ་ནས། མི་དེས་འཕྲུལ་གྱི་ཚེ་ལ་སྡིག་ཡང་བའི་ལམ་ཐོབ་སྟེ། འཕྲུལ་གྱི་ལམ་བསྒྲུབས་པས་

49-1-173a

ལམ་ངན་པ་གསུམ་ལས་ཐར་ཏོ། །ཤཱ་རིའི་བུ་ངའི་ཆོས་ཀྱི་ནང་ན་དགེ་སློང་དག་ཅིག་ཡོད་པ། དགེ་སློང་མ་ཡིན་པར་རང་དགེ་སྦྱོང་ཞེས་ཟེར། ཚངས་པར་སྤྱད་པ་མ་ཡིན་པར་ཚངས་པར་སྤྱད་པ་ཡིན་ཞེས་ཟེར་ཏེ། དགེ་བའི་རྩ་བ་རྣམས་བཅད་ལ་མྱ་ངན་
ལས་འདས་པ་འཇུག་པ་བསྒྲིབས་ཏེ་སླད་རྨོངས་པས་ལམ་སྟོར་ཏོ། །ལམ་ཞིག་པའི་རྒྱུ་རྐྱེན་གྱིས་དགེ་བའི་ཆོས་རྣམས་བཤིག་སྟེ། མུར་འདུག་གི་དོན་སྤྱོད་ཅིང་ལམ་ངན་པར་ཞུགས་པས་དགྲ་ངན་པ་རྣམས་མང་སྟེ། སྐྱེ་བ་སྟོང་པར་ནོས་ནས་དཔེར་མི་ཤི་བ་དང་མཚུངས་ཏེ། 
ལུས་ཀྱི་ཁ་དོག་ཉམས་གྲམ་ལ་དྲང་པོའི་ཆོས་སྟོར་ཏེ། ངའི་ཆོས་ཀྱི་ནང་ན་བསྒོས་པ་སྤགས་པ་ཞེས་བྱའོ། །མིང་ཆོས་ཀྱི་དགྲ་ཞེས་བྱའོ། །མིང་ལོག་པའི་མི་ཞེས་བྱའོ། །མིང་བདུད་ཀྱིས་བཀོལ་བ་ཞེས་བྱའོ། །དཔེར་ན་མི་ཕྱི་ས་ཀུན་དང་མཚུངས། མི་རོ་དང་མཚུངས། ཁྱི་རོ་དང་
མཚུངས། རི་མོའི་དགེ་སྦྱོང་དང་མཚུངས་ཏེ། གོས་དགེ་སྦྱོང་དང་མཚུངས། འཐུན་ཀྱང་དགེ་སྦྱོང་གི་དོན་མེད་དོ། །ཤཱ་རིའི་བུ་དཔེར་ཝ་སེང་གེའི་ཁྱུ་ན་འདུག་པ་དང་མཚུངས། གཅིག་ཏུ་ན་ཉུང་རུམ་འཕྲུལ་གྱི་འཁོར་ལོ་རྒྱལ་པོའི་ནང་ན་འདུག་པ་དང་མཚུངས། སྤྲེའུ་ལྷ་རྣམས་ཀྱི་ནང་ན་འདུག་པ་དང་མཚུངས། 
ཡང་གཅིག་ཏུ་ན་བོང་བུ་བལ་གླང་གི་རྒྱལ་པོ་མང་པོའི་ནང་དུ་འཇུག་པ་དང་མཚུངས། མི་ལོང་བ་ལྷའི་མིག་ཅན་གྱི་ནང་ན་འདུག་པ་དང་མཚུངས། གཅིག་ཏུ་ན་ཕ་ཝང་ནམ་མཁའ་ལྡིང་གི་ནང་ན་འདུག་པ་དང་མཚུངས། ཤཱ་རིའི་བུ་ཚུལ་ཁྲིམས་ཞིག་པ་དགེ་འདུན་གྱི་ནང་ན་འདུག་
ན་བརྒྱ་སྟོང་ཁྲི་འབུམ་གྱི་ལྷ་རྣམས་ཕལ་མང་པོས་དགེ་སློང་དེ་དགེ་འདུན་གྱི་ནང་ན་འདུག་པ་མཐོང་ན་ཀུན་ཀྱང་ཤིན་ཏུ་མྱ་ངན་འཁྲུགས་ཏེ་ཚིག་འདི་སྐད་འཛེར་ཏོ། །འདི་ལྟ་བུའི་མི་ངན་པ་གསོ་སྦྱིན་པ་ཅི་དགོས། བདུད་ཀྱི་གྲོགས་དང་། ཁམས་ཏེ་དེ་ལྟ་བུའི་བླ་ན་མེད་པ་སངས་
རྒྱས་ལམ་མཐོང་བར་འདོད་པ་དེ་གོས་སྐྱ་བོ་ཅན་ལ་བཤད་ན། ལ་ལ་སངས་རྒྱས་ཀྱི་ཆོས་ལ་ཡིད་ཆེས་ཤིང་དད་པ་ཞིག་ཡོད་ན་ཀླུ་དང་ལྷ་མ་སྲིན་ལ་སོགས་པ་རྣམས་ཀྱིས་སྐད་ཆེན་པོས་བོས་ཏེ་ཤིན་དུ་བསྟོད་དེ་དགེ་སློང་ངན་པ་དེ་ཅིའི་ཕྱིར་དེས་ལུས་གབ་སྟེ། དཔེར་
རྟ་ངན་པ་དུལ་བ་གཡུང་པོའི་ནང་ན་འདུག་པ་དང་མཚུངས་ཏེ། དེ་ལྟ་བུའི་མི་གཏི་མུག་བདག་རང་ན་རེ་ཅི་འང་མཐོང་ཞིང་ཤེས་པ་དང་། བདག་ཏུ་ལྟ་བ་ངན་པ་མེད་ཅེས་ཟེར་ཏེ། རང་གིས་དེར་སྦས་བཅབས་ནས། ལྷ་དང་མི་ལ་བརྙས་བསླུས་པ་ནི་མི་དང་ལྷ་ཐམས་ཅད་

49-1-173b

ཀྱི་ནང་གི་དགྲ་ཡིན་ན། ཕལ་གྱིས་མཐོང་བ་དང་། ཀུན་གྱིས་ཀྱང་བསྔགས་སོ། །ཤཱ་རིའི་བུ་དེ་ལྟ་བུའི་ངན་སྡིག་པའི་དགེ་སློང་ནི་དགྲ་ཡིན་པར་ལྷ་རྣམས་ཀྱིས་ཀྱང་རིག་སྟེ། གོས་སྐྱ་བོ་ཅན་དང་མཚུངས་པ་མེད་ན་ཡོན་ལེན་ཅིང་ཕས་བསུ་བསྐྱལ་དང་ཕྱག་འཚལ་
ཏེ་ཐལ་མོ་སྦྱར་ནས་རི་མོ་གུས་པར་བྱས་སོ། །མི་ངན་པ་གཏི་མུག་ཤི་བའི་རོ་དང་མཚུངས་པ་གོས་གྱོན་ཏོ་ཅོག་ནི་ཀུན་བརྐུས་ཏེ་ཐོབ་པ་ཡིན། ལྷུང་བཟེད་ཀྱི་ནང་གི་ཟས་ནི་ཀུན་བརྐུས་ཏེ་བླངས་པ་ཡིན། མིས་བྱིན་པ་མེད་དོ། །ཆུ་ཉུང་ངུ་ཡན་ཆད་ཀྱང་བརྐུས་ཏེ་ཐོབ་པ་
ཡིན་ནོ། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་གིས་གར་ཕྱིན་པའི་ཕྱོགས་ཤར་ཕྱོགས་སུ་ཕྱིན་ནས། ལྷོ་དང་ནུབ་དང་བྱང་ཕྱོགས་གར་ཕྱིན་ཀྱང་རུང་སྟེ། ཀུན་བརྐུས་ཏེ་འགྲོ་བ་ཡིན་ནོ། །ཅིའི་ཕྱིར་ཞེ་ན། མི་དེ་ལ་ཆོ་ག་དང་ཆོས་སྤྱད་པ་ཡོད་དོ་ཅོག་
ཀུན་རྐུ་བ་སྒྱུ་མ་ཡིན་ནོ། །འགྲོ་བ་དང་། འགྲེང་བ་དང་། འདུག་པ་དང་། ཉལ་བ་དང་། སོང་བ་དང་། འོངས་པ་དང་། ལྟ་བ་དང་། སྨྱང་བསྐུམ་དང་། དགྱེ་སྒུ་དང་། གོས་གྱོན་པ་དང་། ལྷུང་བཟེད་ཁྱེར་བ་དང་། བྱེད་དོ་ཅོག་ད་མདོ་ཙམ་ཞིག་བཤད་དེ། ལུས་དང་ཁ་དང་ཡིད་
ཀྱི་ལས་སྤྱད་ཅིང་བྱེད་པ་ཡོད་དོ་ཅོག་ཀུན་རྐུན་པོའི་དགྲ་ཡིན་ནོ། །ལ་ལ་ཞིག་གིས་མི་དེ་ལྟ་བུ་སྐྲ་བྲེགས་ན་དགྲའི་སྐྲ་བྲེགས་པ་ཡིན་ནོ། །གཅིག་གི་མདོ་གཙེས་པ་ཙམ་ཞིག་སྐྱེད་དོ། །ཚུལ་ཁྲིམས་ཞིག་པའི་དགེ་སློང་གིས་བྱས་པ་ཡོད་དོ་ཅོག་ནི་ཀུན་དགྲས་བྱས་
པ་ཡིན་ནོ། །ཤཱ་རིའི་བུ་དགེ་སློང་ངན་པས་ཕྱི་ས་ཆེ་ཆུང་དང་ལག་བརྙལ་པ་ཡན་ཆད་དགྲའི་ཆོས་ཡིན་ནོ། །ཅིའི་ཕྱིར་ཞེ་ན། ཤཱ་རིའི་བུ་འཛམ་བུའི་གླིང་གི་ནང་ན་རྒྱལ་པོ་ཆེན་པོ་དང་། བློན་པོ་ཆེན་པོ་དང་། མི་ཕལ་དང་། མི་མ་ཡིན་པའི་ཁམས་དང་། ཡོད་དོ་ཅོག་
ཐམས་ཅད་ལ་དགེ་སློང་ངན་པ་དེས་དགྲ་བྱས་སོ། །ཤཱ་རིའི་བུ་རྒྱལ་པོ་དང་། བློན་པོ་དགྲ་ངན་པ་ལ་ལེགས་པའི་དོན་མི་རེའོ། །བདག་དང་མཚུངས་ཤེས་མི་ཟེར་རོ། །བདག་པས་ལྷག་ཅེས་མི་ཟེར་རོ། །ཚུལ་ཁྲིམས་ཞིག་པའི་དགེ་སློང་འཕགས་པའི་ཆོས་གོས་གྱོན་པས་
མི་དེ་ལ་ལེགས་པའི་དོན་ཐོབ་ཏུ་རེ་བས་ན་ཡུལ་ས་ན་གནས་ཤིང་འདུག་ཏུ་གནང་བྱས་སོ། །དེས་ངན་པར་ཤེས་སུ་ཟིན་ན་མཆིལ་མ་ས་ལ་དོར་བ་ཡན་ཆད་ཀྱང་མི་གནོད། །དེ་ལྟ་བས་ན་ཤཱ་རིའི་བུ་དགེ་སློང་ངན་པས་ལུས་གཡོས་ཏེ་བྱས་སོ་ཅོག་ཀུན་དགྲས་བྱས་པ་

49-1-174a

ཡིན་ཏེ། མིང་དགྲ་རྟག་པ་མིང་དགྲ་ཆེན་པོའོ། །དགྲའི་རྒྱལ་མཚན་བཙུགས་པ་འཇིག་རྟེན་གྱི་མིའོ་ཅོག་ཐམས་ཅད་ལ་བཙོག་ཅིང་གནོད་པ་ཞེས་བྱའོ། །ཅིའི་ཕྱིར་ཞེ་ན། ངན་པ་མ་བྱས་པ་མེད་པའི་ཕྱིར་རོ། །དེ་ལྟ་བས་ན་ཤཱ་རིའི་བུ་དགེ་སློང་ངན་པ་དེ་འཇིག་
རྟེན་གྱི་ལྷ་དང་མི་ཐམས་ཅད་ཀུན་གྱི་དགྲ་ཆེན་པོ་ཡིན་ཞེས་ཤཱ་རིའི་བུ་མི་དང་ལྷ་དང་འཇིག་རྟེན་ཐམས་ཅད་ཀྱི་མི་དགྲ་ཆེན་པོ་ཡིན་ན། དེ་ལྟ་བུའི་མིས་ཡོན་ཆུ་རྔུབ་གཅིག་ཞུ་བར་ནུས་སམ་མི་ནུས། བཅོམ་ལྡན་འདས་མི་ནུས་ལགས་སོ། །ཤཱ་རིའི་བུ་ཁྱོད་ཀྱི་
ཡིད་ལ་ཇི་སྙམ། དེ་ལྟ་བུའི་མི་ངན་པ་ཆེན་པོ་མ་ཡིན་ནམ། བཅོམ་ལྡན་འདས་དེ་ལགས་སོ། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་གིས་ལྷ་དང་མིའི་འཇིག་རྟེན་ཐམས་ཅད་ལ་ངན་པའི་སྡིག་ཆེན་པོ་ཡོད་དེ། གཞུང་དེ་ལྟ་བས་ན་ངས་ཚིགས་སུ་བཅད་
པ་འདི་བཤད་དོ། །ཉིས་ན་རྡོ་བསྲེགས་ཟ་བ་དང་། །ཟངས་བཞུན་ཁུ་བ་འཐུང་ཡང་རུང་། །བདག་ལ་ཚུལ་ཁྲིམས་མེད་པ་རུ། །ཡིད་ཆེས་མི་ཟས་བཟའ་མི་ཕོད། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་དེ་ལ་ཁ་དོག་མེད། ལེགས་པ་མེད། སེམས་དག་
པའི་སྨོན་ལམ་ཡང་མེད་དེ། ལུས་དང་སེམས་གདུག་པས་རྨི་ལམ་ངན་པ་མཐོང་བར་དགའ་བཞིན་གནས་ལ་མི་སྲིད་པར་འགའ་ཞིག་འགྲོ་ན་ལུས་འཇིགས་ཤིང་འདར། ཚུལ་ཁྲིམས་གཙང་མ་མཐོང་ན་གོལ་བར་གབ་ལ་གྱུར་ཞིང་བྱོལ། རང་གནོང་བས་
སེམས་འདར་ཏེ་དེ་ཕྲད་དུ་མི་དགའ། ཡོན་ལེན་པའི་ཚེ་དངངས་དོགས་འཇིགས་སྐྲག་སྟེ། སེམས་རྟག་པར་རྒྱུག་འབྲོས་ཤིང་འདུ་ཤེས་ཀྱིས་བསམ་པ་རྣམ་པར་མང་། ནོར་གྱི་ཁེ་ལ་རབ་ཏུ་བརྐམ་ཞིང་ཟས་ཞིམ་པོ་ལ་དགའ་སྲེད་དོ། །དེ་ལྟ་བུའི་དགེ་སློང་ནི་ཚེ་ཟད་
པའི་འོག་ཏུ་ཡང་དག་པར་སེམས་ཅན་དམྱལ་བར་འགྲོའོ། །ཤཱ་རིའི་བུ་དེའི་མིང་ཚུལ་ཁྲིམས་ཞིག་པའི་དགེ་སློང་གི་མྱ་ངན་འཁྲུག་པའི་མདའ་བདུན་ཞེས་བྱ་སྟེ། ཡང་དག་པར་སེམས་ཅན་དམྱལ་བར་ལྟུང་ངོ་། །ཡང་ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་
ཕལ་གྱི་ནང་ན་འདུག་ཅིང་གྱེས་འཁྲུགས་པའི་ཚིག་མང་པོ་ལ་སྲེད། རང་བཞིན་ནས་ཕྲག་དོག་ལ་དགའ་བས། ཚུལ་ཁྲིམས་ཞིག་པ་དང་གྲོགས་པོ་འཛའ་བོར་བྱས་ནས། རྟག་པར་ཚུལ་ཁྲིམས་ཞིག་པའི་ངན་པའི་དོན་བརྗོད་ཅིང་བཤད་པ་ལ་སྲེད་དེ། བདག་སྐྱིད་

49-1-174b

པར་འཛིན་ཅིང་ངོ་ཚ་མི་ཤེས་ཆོས་ཡིག་ཟབ་མོ་ལས་ལོག །གལ་ཏེ་སེམས་ལ་དོགས་ཤིང་ཡིད་མི་ཤེས། བར་བར་དེ་ལྟ་བུ་ལ་སོགས་པའི་ཆོས་ཡིག་བཤད་པ་ཐོས་ན་ལོག་པར་ཡིད་ཆེས་ཤིང་། འཐབ་རྩོད་པ་ལ་ཉན་ཅིང་ནོད་པ་ལ་མི་སྲེད་དེ། ཤར་ནུབ་ཏུ་
ཕྱོགས་ཤིང་ལྟ་ལ་སེམས་གཅིག་ཏུ་མི་མཐུན་ཏེ། ཁ་ལག་པས་བཀབ་སྟེ་ཡར་ནམ་མཁའ་ལ་ལྟས་ཤིང་འདུག་པ་ལས་ལངས་ཏེ་སངས་རྒྱས་ཀྱིས་བསྟན་པའི་ཆོས་ལ་སྐུར་གཤེ་ཞིང་འཁོན་ལ་སྲེལ་ཏེ། ཆོས་འཆད་པ་ལ་རྒྱ་བ་དེ་ལྟ་བུ་ལ་སོགས་པའི་བླུན་ངན་
པའི་རྒྱུ་རྐྱེན་སྤྱད་པས་ཚེ་ཟད་པའི་འོག་ཏུ་ཤིན་ཏུ་ཟབ་པའི་སེམས་ཅན་དམྱལ་བར་ལྟུང་ངོ་། །ཤཱ་རིའི་བུ་དེའི་མིང་ཚུལ་ཁྲིམས་ཞིག་པའི་དགེ་སློང་མྱ་ངན་འཁྲུག་པའི་མདའ་བརྒྱད་ཞེས་བྱ་སྟེ། ཡང་དག་པར་སེམས་ཅན་དམྱལ་བར་ལྟུང་ངོ་། །ཡར་ཤཱ་རིའི་བུ་
ཚུལ་ཁྲིམས་ཞིག་པའི་དགེ་སློང་ནི་མཁན་པོ་དང་བླ་མ་ཨ་ཙརྱར་བཀུར་བསྟོད་པ་ལ་དགའ་སྟེ། དེའི་ལེགས་པའི་དོན་ལ་བསྟན་པར་བསྟོད་དེ། མིང་གི་ཁེ་བཙལ་ན་ཚུལ་ཁྲིམས་འཛིན་པ་ཞེས་ཟེར་ཅིང་དེའི་རྒྱུས་རང་གསོས་ཏེ། ནོར་ལ་ཆགས་པ་སྤྲོས་པ་བཞིན་བཟོ་ལ་
མཁས་ཏེ་ཁྲེལ་སླ་བ་མེད་པ་ནི་དཔེར་བྱ་རོག་དང་མཚུངས་སོ། །དགེ་འདུན་གྱི་རྒྱུ་རྐྱེན་གྱིས་གོས་མང་དུ་བཙལ་ཏེ། ཁ་ཟས་རང་ཉམ་དུ་ཟོས་པས་ལུས་ཀྱི་སྟོབས་བདོ་སྟེ། ཁྲེལ་དྲིན་མི་ཤེས་ཤིང་ཚིག་གོ། །གོ་རིམས་ཀྱང་མེད་དོ། །རྐང་ལག་སྦོམ་རྩུབ་ལ་མདངས་ཀྱི་ཁ་དོག་ཉམས་
གྱུར་ཏེ། བུད་མེད་ལ་ལྟ་བར་སྲེད། སྐྱེས་པ་ལ་མི་བསྙེན་ཏེ། དེ་ལྟ་བུའི་མི་ངན་པ་ནི་ཕལ་ཀུན་གྱིས་ཀྱང་བརྙས་སྨད་དོ། །ལྷ་དང་ཀླུ་དང་ལྷ་མ་ཡིན་གྱིས་ཀྱང་མི་བསྟོད་དོ། །སངས་རྒྱས་རྣམས་ཀྱིས་ཀྱང་སྙན་པར་ཡང་མི་བཤད་དོ། །སེམས་ཀྱི་བཞིན་རིངས་བརྟགས་ལ་རྟག་
པར་ཞེ་སྡང་ལ་སྲེད་དོ། །དགེ་འདུན་གྱིས་དོན་གཅོད་ན་དཔུང་གི་མཐུ་སྙེམས་སོ། །ཤཱ་རིའི་བུ་དེ་ལྟ་བུའི་ཚུལ་ཁྲིམས་ཞིག་པའི་དགེ་སློང་ནི་དགེ་འདུན་གྱི་ནང་མཆོད་ཀྱི་མཐུ་པ་ཚོལ་བ་མང་སྟེ། མ་དྲིས་པར་ལན་གློན་ཞིང་རྟག་པར་གཞན་གྱི་ཉེས་པ་ཚོལ་ལོ། །ཚུལ་ཁྲིམས་གཙང་
མ་པ་མཐོང་ན་སྙེམས་ཤིང་སླུ་བ་ཡིན་ཞེས་ཟེར། འགྲུས་པར་ལམ་ཚོལ་བ་མཐོང་ན་དེའི་ཆོས་མི་འདྲ་བར་ཐ་དད་པ་གཞན་ལ་དགའ་ཞིང་དད། རྩོད་པ་མཐོང་ན་དགའ་བས་བསྟངས་སོ། །ཤཱ་རིའི་བུ་དེའི་མིང་ནི་ཚུལ་ཁྲིམས་ཞིག་པའི་དགེ་སློང་གི་མྱ་ངན་འཁྲུགས་པའི་མདའ་

49-1-175a

དགུ་ཞེས་བྱ་སྟེ་ཡང་དག་པར་སེམས་ཅན་དམྱལ་བར་ལྟུང་ངོ་། །ཡང་ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་གཞན་གྱི་དོན་ལ་སྲེད་མོས་ཏེ། དེའི་གཞུང་ཅི་དགར་བཟུང་ནས་འཐབ་རྩོད་པ་ཡོད་ན་དགའ་སྐྱིད་པར་འཛིན་ཏོ། །གོས་ཟས་ཀྱིས་ལུས་
བརྒྱན་ལ་གཞན་གྱི་ཆོ་ག་སློབ་ཅིང་མལ་ཆ་བཟང་པོ་བཙལ་ཏེ། ཁེས་གསོ་ཞིང་ལུས་བདེ་བར་བྱས་མི་གཞན་གྱིས་བསྟོད་པ་ལ་སྲེད། སྦྱིན་བདག་ལ་འཁྲེན་ཅིང་འདུག་པའི་གནས་ལ་ཕངས་པར་འཛིན་ཏེ། དགེ་སློང་མཁན་པོ་འོངས་ན་བདག་གི་ཉེས་པ་མཐོང་
གིས་དོགས་ཏེ། ཚུལ་ཁྲིམས་འཛིན་པ་ལ་སྡང་། ཚུལ་ཁྲིམས་ཞིག་པ་ལ་ནི་ཉེ་བསྙེན། སྦྱིན་པ་བྱེད་པ་ལ་རྟག་པར་བསྟོད། ཚུལ་ཁྲིམས་འཛིན་པ་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ལ་ནི་མི་བསྟོད། སྟོང་པ་ཞི་བ་ལའང་མི་བསྟོད། 
འབའ་ཤིག་གནས་པ་ནི་བསྲིངས་སྤངས་ཏེ་རྟག་པར་ཚུལ་ཁྲིམས་འཛིན་པ་ལ་ཉེས་པར་བརྗོད་པ་ལ་དཔྱ་བར་སྲེད། སྦྱངས་པའི་ཡོན་ཏན་འཛིན་པ་ལ་ཡང་སྙན་པར་མི་བསྟོད། བར་བར་ངའི་དོན་ལ་དཔྱས་ཏེ་བཤད། བར་བར་ཁ་ངན་པས་མི་རིགས་པར་བསྐྱེད། བར་
བར་དྲན་པའི་འདུ་ཤེས་ཀྱི་བརྫུན་པ་བཤད། རིགས་བཟང་པོ་རྟེན་སྙེམ་སྟེ་ཕ་ཚན་གྱི་གཉེན་ལ་བརྟུད་པར་དྲིས། རྒྱུ་རྐྱེན་ཆུང་ངུ་སྤྱད་དེ་དབུལ་པོ་ལ་ཆོས་བཤད་ན་རྟག་པར་སེམས་མི་དྲང་བས་དངངས་ཤིང་དོགས་པ་སྲེལ་ཏེ་ཕལ་ཀུན་སྡང་ཞིང་སྐྱོ་བས་ཡུན་དུ་བརྙས་སྨད་པ་ལ་
ཕན་ནོ། །ཚུལ་ཁྲིམས་འཛིན་པ་ལ་ནི་རྟག་པར་དཔྱས་བཤད་པ་ལ་སྲེད་དོ། །གཏན་ལ་བབ་པ་བདེན་པར་འཆད་པ་ལ་ནི་ཉེ་བསྙེན་པས་མི་འདོད་དེ་ཡིད་ལ་དེ་ལྟ་བུའི་ཆོས་ཀྱི་ཡི་གེ་ཐོས་པར་མི་དགའོ། །དེ་ལྟ་བུའི་ཆོས་ཀྱི་ཡི་གེ་གཟུངས་སུ་བཟུང་སྟེ་ཀློག་ཅིང་ཁ་ཏོན་ལ་སྲེད་པ་དང་། 
ཆོས་ཀྱི་ཡི་གེ་དེ་ལྟ་བུ་བཤད་པ་ཐོས་ན་སེམས་དགའ་གཞན་པ་དེ་ལྟ་བུ་ཡང་མཐོང་དུ་མི་དགའོ། །གཅིག་ཏུ་ནི་ཚུལ་ཁྲིམས་འཛིན་པའི་ཆོས་ལ་བསྟོད་པ་ཐོས་སུ་མི་དགའ་སྟེ། དེ་ལྟ་བུ་ལ་སོགས་པའི་ཆོས་ཀྱི་ཡི་གེ་བཤད་ན་ཉན་ཅིང་ནོད་དུ་འོང་མི་འོང་ཉན་ཅིང་ནོད་དུ་ཟིན་ན་འང་
རིང་པོར་མ་ལོན་པར་སླར་སོང་སྟེ། གོས་སྐྱ་བོ་ཅན་དང་བཤེས་གཉེན་དུ་བྱས་པ་མང་ལ་རྟག་པར་ཁྲིམས་འཛིན་པའི་དགེ་སློང་ལ་བརྗོད་ཅིང་བཤད་པ་ལ་སྲེད་དེ་རང་ཉམ་བྱེད་པས་བརྙས་པ་དང་། ཁ་མདའ་སྤྱོད་དོ། །ཤཱ་རིའི་བུ་དེའི་མིང་ཚུལ་ཁྲིམས་ཞིག་པའི་དགེ་

49-1-175b

སློང་གི་མྱ་ངན་འཁྲུག་པའི་མདའ་བཅུ་ཞེས་བྱ་སྟེ། ཡང་དག་པར་ལམ་ངན་པར་ལྟུང་ངོ་། །ཤཱ་རིའི་བུ་ང་མེད་པར་འདས་པའི་ཕྱི་ན་དེ་ལྟ་བུ་ལ་སོགས་པའི་མིས་འཛམ་བུའི་གླིང་གང་སྟེ། ཁེ་ཚོལ་བ་འབའ་ཤིང་སྤྱོད་ཅིང་རང་འཚོ་གསོ་བྱེད་དོ། ། 
སངས་རྒྱས་ཀྱི་མཛོད་བཤད་པ་ཆོས་ཀྱི་ཡི་གེ། བམ་པོ་གསུམ་པ། སངས་རྒྱས་ཀྱིས་སངས་རྒྱས་ཀྱི་མཛོད་བཤད་པའི་ཆོས་ཀྱི་ཡི་གེ་ལེའུ་དྲུག་སྟེ། གཙང་མའི་ཆོས་ཀྱི་ལེའུའོ།། །། སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། གནས་སངས་རྒྱས་
བསོད་སྐྱབས་ཀྱིས་སྔ་ནས་ང་ལ་ལུང་བསྟན་པ་སངས་རྒྱས་ཤཱཀྱ་ཐུབ་པ་ཡོན་མང་དུ་བླངས་ན་ཆོས་མྱུར་དུ་མེད་པར་འགྱུར་རོ་ཞེས་གསུངས་སོ། །ཤཱ་རིའི་བུ་ངའི་ཆོས་ལ་བདེན་པར་ཡོན་འབུལ་བ་མང་བས་ཕྱིས་མྱུར་དུ་མེད་པར་འགྱུར་རོ། །ཤཱ་རིའི་བུ་དཔེར་མི་དབུལ་
པོས་ནོར་བུ་རིན་པོ་ཆེའི་མཛོད་རྙེད་པ་དང་མཚུངས་ཏེ་སེམས་ཤིན་དུ་དགའོ། །འདི་ལྟ་སྟེ། ཤཱ་རིའི་བུ་མ་འོངས་པའི་དུས་ན་གོས་སྐྱ་བོ་ཅན་ལ་ཉེ་བསྙེན་ཅིང་ཡོན་ལེན་པའི་དགེ་སློང་མང་དུ་ཡོད་དེ། ཁད་ཀྱིས་གཅིག་གིས་གཅིག་བསྟན་པ་བསླབས་ཏེ། གྲོགས་
སུ་བྱས་ནས་སེམས་དགའ་ཞིང་དད་སྐྱིད་པར་འཛིན། དཔེར་མི་དབུལ་པོས་ནོར་བུ་རིན་པོ་ཆེའི་མཛོད་རྙེད་པ་དང་མཚུངས་ཏེ། དེ་ལྟ་བུའི་མི་གཏི་མུག་ནི་འཇིག་རྟེན་གྱི་ཁེ་རིན་ཆེ་ཞིང་འཇིག་རྟེན་གྱི་བྲན་འཁོར་བ་ལ་སྲེད་དོ། །དགེ་སློང་གིས་ཡོན་མང་དུ་
སྤྱད་པ་མཐོང་ན་སེམས་ལ་ཐལ་བྱུང་དུ་དགྲ་བཅོམ་པ་ཐོབ་ཅེས་ཟེར་རོ། །ཉུང་ངུའི་བཤེས་གཉེན་མཐོང་ན་མོད་བཞིན་མིང་ངན་པ་ཞེས་བྱའོ་ཞེས་ཟེར་རོ། །དེ་ལྟ་བུའི་དགེ་སློང་ནི་གསོ་བའི་ཁེའི་ཕྱིར། བླ་ན་མེད་པའི་སངས་རྒྱས་ཀྱི་ལམ་བཏང་སྟེ། 
ཅི་ལ་སྲེད་པ་བཞིན་དུ་དེའི་དོན་གྲུབ་བོ། །ཤཱ་རིའི་བུ་དེ་བཞིན་གཤེགས་པས་གཏི་མུག་དེའི་ཕྱིར་འདི་ལྟ་བུ་ལ་སོགས་པ་ཆོས་ཀྱི་ཡི་གེ་བཤད་དོ། །ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་དགེ་སློང་གིས་ཆོས་ཀྱི་ཡི་གེ་འདི་ལྟ་བུ་བཤད་པ་ཐོས་ན་འགྱོད་པའི་སེམས་སྐྱེས་ཏེ། 
ཚུལ་ཁྲིམས་བཏང་བ་སླར་དྲན་ཏེ་དགྲ་ཆེན་པོ་མི་བྱེད། གཞན་གྱི་ཡོན་མི་ལེན་ཏོ། །ཤཱ་རིའི་བུ་དགེ་སློང་ལ་ལ་ཆོས་ཀྱི་ཡི་གེ་འདི་ལྟ་བུ་ཐོས་ནས་སེམས་མི་གཙང་མི་གདང་སྟེ། མི་དགའ་མི་སྐྱིད་པ་དེ་ལྟ་བུའི་མིང་ནི་དགེ་སློང་ངན་པ་ཞེས་བྱའོ། །ཅིའི་ཕྱིར་ཞེ་ན། ཤཱ་རིའི་བུ་

49-1-176a

ཚུལ་ཁྲིམས་གཙང་མའི་དགེ་སློང་ལ་ནི་ཆོས་ཀྱང་མེད། སྐྱིད་པ་ཡང་མེད། སྦྱིན་པ་བཤད་ཀྱང་རུང་། ཚུལ་ཁྲིམས་བཤད་ཀྱང་རུང་། བཟོད་པ་བཤད་ཀྱང་རུང་། བརྩོན་འགྲུས་བཤད་ཀྱང་རུང་། བསམ་གཏན་བཤད་ཀྱང་རུང་། 
ཤེས་རབ་བཤད་ཀྱང་རུང་སྟེ། དེ་ལྟ་བུའི་སྐྱོ་ཞིང་འཇིགས་པའི་ཆོས་ཀྱི་ཡི་གེ་བཤད་ན་ཀུན་ལ་འང་སེམས་དགའ་སྲེད་དོ། །ཤཱ་རིའི་བུ་མི་རྣམ་གསུམ་ཞིག་ཡོད་པས་ཆོས་ཀྱི་ཡི་གེ་འདི་བཤད་པ་ཐོས་ན་སེམས་ལ་མྱ་ངན་འཁྲུག་གོ། །གསུམ་གང་
ལ་སོགས་པ་ཞེས་བྱས་ན། གཅིག་ནི་ཚུལ་ཁྲིམས་ཞིག་པའི་དགེ་སློང་ངོ་། །གཉིས་ནི་ལེ་ལོ་ཡར་སྐྱེ་བའི་མིའོ། །གསུམ་ནི་ཆོས་བཤད་པ་མི་གཙང་བའོ། །ཡང་མི་རྣམ་གསུམ་ཡོད་པས་ཆོས་ཀྱི་ཡི་གེ་འདི་ཐོས་ན་སེམས་ལ་མྱ་ངན་འཁྲུག་གོ། །གསུམ་
གང་ལ་སོགས་པ་ཞེས་བྱས་ན། གཅིག་ནི་གང་ཟག་ཏུ་མཐོང་བའོ། །གཉིས་ནི་སྲོག་མཐོང་བའོ། །གསུམ་ནི་བདག་ཏུ་མཐོང་བའོ། །ཤཱ་རིའི་བུ་ངས་ད་ཁྱོད་ལ་བྱེ་བྲག་ཕྱེད་པར་བསྒོའོ། །དགེ་བའི་བཤེས་གཉེན་དེས་པ་བྱམས་ཤིང་རྗེ་བའི་སེམས་ཀྱིས་
མི་གཞན་གྱི་བསོད་ནམས་བཙལ་བདེ་བཙལ་བ་དང་མཚུངས་སོ། །ཁྱོད་ལ་སོགས་པ་ངའི་ཚིག་གཅིག་ཏུ་ཉོན་ནོས་ལ། རྟག་པར་དགེ་བའི་བསོད་ནམས་ཚོལ་ལ། སེམས་ལ་རང་ཉམ་མ་བྱེད་ཅིག །ཤཱ་རིའི་བུ་ཆོས་འཆད་པ་མི་གཙང་བ་ལ་ནི་འཁྲུག་
པ་ལྔ་ཡོད་དོ། །ལྔ་གང་ལ་སོགས་པ་ཞེས་བྱ་བ་བྱས་ན། གཅིག་ནི་རང་ན་རེ་སངས་རྒྱས་ཀྱི་ཆོས་ཟད་པར་ཤེས་ཤིང་ཟེར་རོ། །གཉིས་ནི་སངས་རྒྱས་ཀྱི་ཆོས་ཡིག་བཤད་པའི་ཚེ། ཆོས་ཡིག་གཞན་གྱི་ནང་ནས་བྱུང་འགལ་བའི་ཉེས་འཁྲུལ་པའོ། །
གསུམ་ནི་ཆོས་གཞན་ལ་སེམས་དོགས་ཤིང་ཡིད་མི་ཆེས་པའོ། །བཞི་ནི་བདག་གིས་ཅི་ཤེས་པ་སྤྱད་དེ་ཆོས་ཡིག་གཞན་ལྟར་མ་བྱས་པའོ། །ལྔ་ནི་གསོ་བའི་ཁེའི་ཕྱིར་མི་གཞན་ལ་ཆོས་བཤད་པའོ། །ཤཱ་རིའི་བུ་དེ་ལྟ་བུར་ཆོས་འཆད་པ་ནི་ངས་མི་དེ་མཐར་
སེམས་ཅན་དམྱལ་བར་ལྟུང་སྟེ། མྱ་ངན་ལས་འདས་པར་མི་ཕྱིན་ཅེས་བཤད་དོ། །ཡང་ཤཱ་རིའི་བུ་ཆོས་འཆད་པའི་དགེ་སློང་ནི་ཕལ་མང་པོའི་ནང་དུ་གནས་ཏེ། ཆོས་ལ་ཡིད་ཆེས་ཤིང་དད་པས་སྟན་མཐོན་པོ་བཏིང་ན་སངས་རྒྱས་ཀྱི་དྲང་པོའི་ཆོས་བཏང་སྟེ། མུར་འདུག་གི་ཡི་གེ་

49-1-176b

དང་ཚིག་གིས་བརྒྱན་པ་འཆད་དོ། །ངས་ཡུན་རིང་དུ་འགྲུས་ཤིང་ཉོན་མོངས་པར་ཆོས་དཀོན་མཆོག་དེ་བཙལ་ན། མི་ངན་པ་འདིས་བཏང་གཞག་ནས་མ་བཤད་དེ། ཆོས་ཡིག་ནང་དང་འགལ་བའི་ཚིག་གི་གཞུང་འབའ་ཤིག་སྤྱད་དེ། གཅིག་ལ་གཅིག་
ཡིན་མ་ཡིན་དང་། དྲང་པོའི་ཆོས་དང་འགལ་བ་འཕགས་པའི་ཆོས་ལ་སེམས་མཐོན་པོ་བདག་ཆེ་བའི་ཡིད་བཞིན་དུ་བཤད་དེ། གསོ་བའི་ཁེ་བཙལ་བའི་ཕྱིར་རོ། །ཤཱ་རིའི་བུ་དགེ་སློང་ལ་ལས་ཆོས་མུར་འདུག་གི་གཞུང་དང་འདྲེས་པར་བཤད། དགེ་
སློང་དགེ་བའི་ལམ་ཚོལ་བ་ལ་འགྲུས་པ་ཞིག་ཡོད་ན་འདུག་པ་ལས་ལངས་ཏེ་འགྲོ་བར་རིགས་སོ། །ཅིའི་ཕྱིར་ཞེ་ན། ཤཱ་རིའི་བུ་གོས་སྐྱ་བོ་ཅན་ཡིད་ཆེས་པ་ཡོད་པས་སྟན་མཐོན་པོ་བཏིང་མུར་འདུག་གི་ཚིག་དྲང་ཞིང་བཤད་པའི་མི་རིགས་སོ། །ད་ལྟ་མ་
ཡིན་དུ་ཟིན་ན་དགེ་སློང་དགེ་བ་མ་ཡིན་ནོ། །མིང་སངས་རྒྱས་བཤད་པ་བསྟན་པ་བཞིན་ནོ་ཞེས་ཀྱང་མི་བྱའོ། །ཤཱ་རིའི་བུ་ཆོས་བཤད་པའང་ཤིན་ཏུ་དཀའ་སྟེ། དེ་ལྟ་བུར་འཆད་པ་ནི་ངས་བཤད་པ་ལ་དེའི་མིང་མུར་འདུག་འཛི་གེན་གྱི་སློབ་མ་ཞེས་བྱ་སྟེ། སངས་
རྒྱས་ཀྱི་སློབ་མ་མ་ཡིན་ནོ། །དེ་ལྟར་ཆོས་འཆད་པ་ནི་ཚེ་ཟད་ཀྱི་འོག་ཏུ་འཛི་གེན་ཇིའི་ལམ་དུ་སྐྱེའོ། །གང་ལ་སོགས་པ་འཛི་གེན་ཇིའི་ལམ་ཡིན་ཞེས་བྱས་ན། ཡོན་པོ་མཐོང་བ་འཛི་གེན་ཇིའི་ལམ་ཡིན་ནོ། །གག་ལ་སོགས་པ་ཡོན་པོ་མཐོང་བ་ཞེས་
བྱས་ན་དེ་ནི་སེམས་ཅན་དམྱལ་བ་དང་། བྱོལ་སོང་དང་། ཡི་དགས་ཡིན་ནོ། །ཅིའི་ཕྱིར་ཞེ་ན། ཤཱ་རིའི་བུ་ལུས་ཀྱིས་ཆོས་མ་གྲུབ་པར་སྟན་མཐོན་པོ་ལ་འདུག ། རང་གི་ལུས་ཀྱིས་མི་ཤེས་པར་མི་གཞན་གྱི་ཆོས་སྟོན་པ་ནི་སེམས་ཅན་དམྱལ་བར་ལྟུང་ངོ་། །ཤཱ་རིའི་
བུ་དེ་ལྟ་བུའི་རྒྱུ་རྐྱེན་ནི་དེ་བཞིན་གཤེགས་པས་ཟད་པར་མཁྱེན་ཏེ། ངའི་སློབ་མ་རྣམས་ཀྱིས་སྒོ་མོ་རྣམ་པ་མང་པོ་དང་། རྒྱུ་རྐྱེན་རྣམ་པ་མང་པོ་དང་། མཐོང་བ་རྣམ་པ་མང་པོ་སྤྱོད་དེ། ངའི་དྲང་པོའི་ཆོས་མེད་པར་བྱས་སོ། །ཤཱ་རིའི་བུ་ལ་ལ་ཞིག་གིས་འདི་ལྟ་བུའི་ཆོས་ཀྱི་
ཡི་གེའི་མཆོག་གི་གཞུང་སྟོང་པ་ཅིའང་མེད་པའི་ཆོས་ཐོས་ན་སེམས་དགའ་གཞའ་བ་ཞིག་ཡོད་ན་དེ་ལྟ་བུའི་མི་ནི་ཡང་དག་པའི་ངའི་སློབ་མ་ཡིན་པར་མངོན་ནོ། །ཤཱ་རིའི་བུ་སྔ་མ་འདས་པའི་དུས་ན་དམུས་ལོང་ལྔ་བརྒྱ་ཞིག་ཡོད་པ་ལམ་དུ་དོང་བ་ལས་མཁར་

49-1-177a

ཆེན་པོ་ཞིག་ཏུ་ཕྱིན་ནས་ཤིན་དུ་བཀྲེས་སྐོམ་སྟེ། ལོང་བ་མི་གཅིག་ཕྱི་ལོགས་ན་རྫས་སྲུང་དུ་བཅུག །གཞན་མཁར་གྱི་ནང་དུ་ཟན་གྱི་ལྷག་མ་སློང་དུ་དོང་ནས་རིང་པོར་མ་ལོན་པར་མི་བརྫུན་མ་གཅིག་ནོར་སྲུང་བའི་གན་དུ་འོངས་ཏེ། ཚིག་སྨྲས་པ། 
ཀའི་མི་འདི་ཅི་ཕྱི་ན་འབའ་ཤིག་འདུག ། ལན་སྨྲས་པ། བདག་ལ་གྲོགས་མང་དུ་ཡོད་དེ་མཁར་དུ་ཟན་སློང་དུ་དོང་ངོ་། །མི་བརྫུན་མས་སྨྲས་པ། ཁྱོད་ཀྱིས་ཤེས་སམ་མི་ཤེས། ཕ་བི་ན་སྦྱིན་པ་ཆེན་པོ་བྱེད་དོ། །གོས་དང་ཟས་དང་རྒྱན་གྱི་ནོར་བུ་དང་མེ་ཏོག་དང་སྤོས་དང་། ནོར་
གོ་འདུན་ཡིད་བཞིན་དུ་ཐོབ་པར་རུང་ངོ་། །ཁྱོད་དགོས་ན་ཁྱོད་དེར་བཀྲི་བར་རུང་ངོ་། །ལན་སྨྲས་པ་དེ་རུང་ངོ་། །དེ་ནས་མི་བརྫུན་མས་ལོང་བ་ཁྲིད་དེ་འདུག་པའི་གནས་ལས་ཅུང་ཟད་ཅིག་འཕགས་པ་དང་། ནོར་ཟད་པར་ཕྲོགས་ནས་ལོང་བ་གཞན་ཟས་སློང་བ་ཐོབ་སྟེ། སླར་
འཁོར་བ་དང་མི་བརྫུན་མས་ལོང་བ་ཕལ་རྣམས་ལ་སྨྲས་པ། ཁྱེད་རྣམས་ཀྱིས་མང་པོ་བསོགས་ཏེ། སྦྱིན་པ་བྱེད་པ་དང་ཕྲད་དམ་མི་ཕྲད། ལན་སྨྲས་པ་མ་ཕྲད་དོ། །མི་བརྫུན་མས་ཚིག་སྨྲས་པ། ཁྱེད་རྣམས་ཀྱིས་ཇི་སྙེད་པ་འདིར་ཞོག་ལ་ངས་ཁྱེད་རྣམས་ཁྲིད་དེ་སྦྱིན་པ་
ཆེན་པོ་བྱེད་པར་འདོང་ངོ་། །དེ་ནས་ལོང་བ་རྣམས་ཀུན་གྱི་ནོར་བཞག་ནས་མི་བརྫུན་མིའི་ཕྱིར་དོང་ངོ་། །དེ་ནས་མི་བརྫུན་མས་ལོང་བ་ལྔ་བརྒྱ་རྣམས་ཟད་པར་ཁྲིད་ད་ཁུང་ཟབ་མོ་ཞིག་གི་ནང་དུ་ཕྱིན་ནས་ཚིག་སྨྲས་པ། ས་འདི་ཐང་བཟང་སྟེ། སྦྱིན་པ་ཆེན་པོ་འདུས་
པ་ཡོད་ཀྱིས། ཁྱེད་རྣམས་སོ་སོ་གདོང་ཤར་ཕྱོགས་སུ་ལྟོས་ཏེ་དོང་ལ། ཁོང་གིས་ནོར་བྱིན་པ་ལོང་ཤིག་ཅེས་བསྒོ་ནས་མོད་བཞིན་ཅིག་ཅར་ཁུང་དུ་ལྷུང་སྟེ་དོག་གོ། །ཤཱ་རིའི་བུ་མ་འོངས་པའི་དུས་ན་དགེ་སློང་མུར་འདུག་གི་ཆོས་ཡི་གེ་ཀློག་པ་ལ་སྲེད་པ་ཆོས་འཆད་པའི་
ཚིག་བརྙན་མས་བརྒྱན་ཏེ། ཕལ་གཞན་དག་དད་པར་བྱས་ནས་བདུད་ངན་པས་དེའི་ཚེ་ཕལ་དངངས་བསླད་དེ་དགེ་བའི་ཆོས་བསྒྲིབས་གཅོད་དོ། །ལ་ལ་ཞིག་སྒྲ་སྐད་དང་སྨྲ་བའི་ཚིག་དང་། བཟོ་བཅོས་པའི་སྙན་བསྔགས་པ་ལ་འདོད་ཆོགས་ཤིག་ཡོད་དམ། ཡང་མི་ལ་ལ་
ཞིག་མུར་འདུག་གི་ཆོས་ཀྱི་ཡི་གེ་ཀློག་པ་ལ་སྲེད་པ་ཞིག་ཡོད་ན། བདུད་ཀྱིས་ཀུན་བསླད་དཀྲུགས་ཏེ་སེམས་མི་བདེ་བར་བྱས་སོ། །དགེ་སློང་ལ་ལ་ཞིག་སངས་རྒྱས་ཀྱི་ཆོས་སྤྱོད་པ་ཞིག་ཡོད་ན་ཐེ་ཙོམ་སྐྱེ་བར་བྱས་ཏེ་མི་ཕལ་གྱིས་ཡོན་མི་འབུལ་བྱས་སོ། །བར་དགེ་སློང་

49-1-177b

གཉིས་ཀྱང་རུང་། གསུམ་ཡང་རུང་སངས་རྒྱས་ཀྱི་ཆོས་ཀྱི་ཡི་གེ་བླགས་ཟིན་པ་ལས་མུར་འདུག་གི་ཆོས་ཀྱི་ཡི་གེ་ཚོལ་བར་བྱས་ཏེ། སྔོན་བདག་གིས་མཐོང་བ་ལ་དགེ་བཟང་པོ་ཞེས་ཟེར་ཏེ་བསྟོད་ནས་མི་དེ་དག་ལ་སོགས་པ་བདུད་ཀྱིས་བསླད་པ་ཤེས་རབ་ཀྱི་
མིག་བཀབ་བསྒྲིབས་ནས་གསོ་བའི་ཁེ་ལ་ཤིན་དུ་བརྐམ་སྟེ། མུར་འདུག་གི་ཆོས་ཡིག་རྣམས་ལ་ལྟ་བ་ནི་དཔེར་ལོང་བ་ཁྱུ་གཅིག་བརྫུན་མས་བསླུས་ཏེ་ཀུན་ཁུང་ཟབ་མོར་ལྟུང་ནས་ཤི་བར་བྱས་པ་དང་མཚུངས་སོ། །ཤཱ་རིའི་བུ་མི་དམུས་ལོང་རྣམས་ནི་
དགེ་སློང་ཡིན་ཏེ། སངས་རྒྱས་ཀྱི་བླ་ན་མེད་པའི་ལམ་བཏང་ལ་མུར་འདུག་གི་ཆོས་ཀྱི་ཡི་གེ་ཚོལ་བའོ། །མི་བརྫུན་མ་ནི་བདུད་ངན་པ་ཡིན་ནོ། །ཁུང་ཟབ་མོ་ནི་ཡོན་པོའི་ལམ་ཡིན་ནོ། །ཤཱ་རིའི་བུ་མི་ལོང་བ་ཁྱུ་གཅིག་དང་མཚུངས་ཏེ། ནོར་རྙེད་དོ་ཅོག་བོར་ལ་སྦྱིན་
པ་ཆེན་པོ་བྱེད་པར་འགྲོ་ཞེས་བྱས་པ་དང་ཁུང་ཟབ་མོར་ལྷུང་ངོ་། །ངའི་སློབ་མ་རྣམས་ཀྱང་དེ་དང་མཚུངས་ཏེ། གོས་སྦོམ་པོ་དང་ཟས་ངན་པ་བོར་ལ་སྦྱིན་པ་ཆེན་པོའི་ཕྱིར་འབྲངས་ཏེ། ཡོན་བཟང་པོ་ཚོལ་ཞིང་འཇིག་རྟེན་གྱི་ཁའི་ལན་བྱས་ན། ཤེས་རབ་ཆེན་པོ་
སྟོར་ཏེ་ཁུང་ཟབ་མོ་མནར་མེད་པའི་དམྱལ་བར་ལྟུང་ངོ་། །ཡང་ཤཱ་རིའི་བུ་ཆོས་འཆད་མི་གཙང་བས་ནི་དེ་བཞིན་གཤེགས་པའི་ཡིད་བཞིན་དུ་སྤྲོ་བར་ཕྱོགས་པ་མ་རིག་སྟེ། བདག་ཉིད་ཀྱང་མཁས་པར་མི་ཤེས་པར་མི་གཞན་ལ་ཆོས་བཤད་ན། མི་དེས་འཕྲལ་
གྱི་ཚེ་ལ་ཉེས་འཁྲུལ་པ་ལྔ་ཐོབ་སྟེ་མི་གཞན་གྱིས་མི་ཤེས། ལྷའི་མིག་ཐོབ་པའི་དགེ་སློང་དང་ལྷ་རྣམས་འབའ་ཤིག་ཤེས་སོ། །ལྔ་གང་ལ་སོགས་པ་ཞེས་བྱས་ན། གཅིག་ནི་ཆོས་འཆད་པའི་ཚེ་སེམས་ལ་འཇིགས་སྐྲག་པ་སྲེལ་ཏེ། མི་གཞན་གྱིས་བཀར་ཅག་གིས་
དོགས་པའོ། །གཉིས་ནི་ཁོང་ན་འཇིགས་པའི་མྱ་ངན་སྲེལ་བཞིན་དུ་ཕྱི་རོལ་དུ་གཞན་ལ་ཆོས་བཤད་པའོ། །གསུམ་ནི་ཕལ་ཐ་མལ་པ་སྟེ། ཡང་དག་པར་ཤེས་རབ་མེད་པའོ། །བཞི་ནི་བཤད་དོ་ཅོག་མི་གཙང་སྟེ། ཚིག་འབྲུ་ཤ་སྟག་ཡོད་པའོ། །ལྔ་ནི་གོ་རིམས་མེད་
དེ་སོ་སོ་ནས་མདོ་བསྡུས་པའོ། །དེ་ལྟ་བས་ན་ཕལ་གྱི་ནང་ན་འདུག་ལ་སེམས་ལ་འཇིགས་དོགས་པ་སྲེལ་ཏོ། །དེ་ལྟ་བུའི་ཕལ་ཐ་མལ་པ་ནི་ཤེས་རབ་མེད། སེམས་ལ་ངེས་པ་མེད་དེ། དྲེགས་ཤིང་ལེ་ལོ་དང་། རྒྱུ་རྐྱེན་ཆུང་ངུ་སྤྱད་དེ། མིང་གྲགས་པར་བྱ་བ་

49-1-178a

བཙལ་ཏེ། དོགས་ཤིང་འགྱོད་པ་སེམས་ལ་འདུག་པས་མི་གཞན་ལ་ཆོས་བཤད་དོ། །མི་དེས་ཉིན་མཚན་དུ་རང་གིས་འདོད་ཆགས་དང་ཞེ་སྡང་དང་གཏི་མུག་གི་དུག་མདའ་མནོས་སོ། །ཅིའི་ཕྱིར་ཞེ་ན། ཤཱ་རིའི་བུ་མི་དེས་ཆོས་ཀྱི་རྣམ་གྲངས་
ངེས་པར་མི་བདེན་པ་སྟེ། ཡང་དག་པའི་བདེན་པ་མེད་པར་རིག་གོ། །མི་དེས་མྱ་ངན་ལས་འདས་པའང་རྣམ་པར་མི་རྟོག །མྱ་ངན་ལས་འདས་པ་མི་སེམས། ངས་མྱ་ངན་ལས་འདས་པ་བསམ་ནུས་ཏེ། ཆོས་སྤྱད་པས་སྟོང་པ་ཞི་བ་ཐོབ་ཅེས་ཀྱང་མི་ཟེར། 
ཆོས་དེའི་སྟོང་པ་ཞི་བའི་གནས་ལ་ཡང་རྣམ་པར་མི་རྟོག་མི་ཐོབ་པར་ཡང་མི་རྟོག་སྟེ། ཤཱ་རིའི་བུ་དེའི་མིང་མི་འགལ་བ་བཟོད་པ་ཞེས་བྱའོ། །མི་དེས་མི་འགལ་བའི་བཟོད་པའི་མཆོག་གི་གཞུང་འདིའི་ནང་ནའང་རང་གི་མཚན་ཐོབ་པ་མེད་དོ། །ཤཱ་རིའི་བུ་གང་ལ་
སོགས་པ་བཟོད་པའི་མཚན་མ་ཞེས་བྱ། དེ་ནི་མཚན་མ་མེད་ན་མི་འགལ་བའི་བཟོད་པའི་མཚན་མའི་བཟོད་པ་ཡིན་ནོ། །ཤཱ་རིའི་བུ་ཁྱོད་ཡིད་ལ་ཇི་སྙམ། མི་ལ་ལ་ཞིག་གིས་འདི་ལྟ་བུའི་བཟོད་པ་ལའང་མཚན་མི་ཐོབ་ན་མི་དེས་བདག་ཏུ་ལྟ་བའི་མཚན་མ་
དང་། གང་ཟག་གི་མཚན་མ་དང་། སེམས་ཅན་གྱི་མཚན་མ་དང་ཚེའི་མཚན་མ་དང་། སྲོག་གི་མཚན་མ་ཐོབ་ཅེ་ན། བདེན་པ་ཡོང་མེད་དོ། །ལ་ལ་ཞིག་གིས་འདི་ལྟ་བུའི་ཤེས་རབ་འབྱོར་གྲུབ་ན་ཡོན་ལེན་པ་རིགས་ཏེ། དེའི་མིང་སངས་རྒྱས་ཀྱི་བུའོ། །དེའི་
མིང་མི་ཆགས་པའི་ཐུབ་པར་ཆུད་པའོ། །ཤཱ་རིའི་བུ་དེ་ལྟ་བུའི་མིང་སངས་རྒྱས་ཀྱི་མཆོག་གིས་གཞུང་གི་སྒོ་མོ་སྟེ། དྲན་པའི་འདུ་ཤེས་ཀྱིས་རྣམ་པར་བརྟག་པ་མེད་དེ་འདི་ཞེས་བྱ་བ་མེད། ཕ་བི་ཞེས་བྱ་བ་མེད་པ་ནི་གཏི་མུག་གིས་ཕལ་མང་པོའི་ནང་དུ་འདུག་སྟེ། 
ཡོན་པོ་མཐོང་བ་བཤད་ནས་རང་གི་དྲན་པའི་འདུ་ཤེས་ཀྱི་རྣམ་པར་རྟོག་པ་སྤྱད་དེ། འདི་ནི་སངས་རྒྱས་ཀྱི་ཆོས་ཡིན། འདི་ནི་འཕགས་པའི་ལམ་ཡིན་ཞེས་མི་ལ་བསྟན་ཏོ། །དེ་ལྟ་བུའི་གཏི་མུག་གིས་སྔ་མ་འདས་པ་དང་། མ་འོངས་པ་དང་། ད་ལྟར་གྱི་སངས་རྒྱས་
རྣམས་ལ་འཕྱ་ཞིང་སྐུར་ཏོ། །དེ་ལྟ་བུའི་མི་གཏི་མུག་ནི་མིང་ངན་པའི་བཤེས་གཉེན་ཞེས་བྱའོ། །ཤཱ་རིའི་བུ་དགྲས་སྲོག་ཕྲོགས་མོད་ཀྱི་ལུས་གཅིག་ཏུ་སྟོར་དུ་ཟད་དོ། །དེ་ལྟ་བུའི་མི་གཏི་མུག་གིས་ཆོས་བཤད་པ་མི་གཙང་བ་ནི་བསྐལ་པ་སྟོང་ཁྲི་འབུམ་གྱིས་བར་

49-1-178b

དུ་སེམས་ཅན་རྣམས་ཀྱི་རྐུན་པོའི་མྱ་ངན་ཆེན་པོ་བྱས་སོ། །མི་དེ་གཏི་མུག་གི་མུན་གྱིས་སངས་རྒྱས་ཀྱི་བྱང་ཆུབ་བཀབ་པས་སེམས་ཀྱི་ཕྱི་མོ་འདོད་ཆགས་པ་ལ་སླར་ཡང་འདོད་དངར་ནས། གཅིག་གིས་གཅིག་མཐུད་ཅིང་ཆགས་ཏེ། འདོད་ཆགས་སྤྱད་
པས་ན་ལམ་རྒྱུད་ལྔར་སོང་ཞིང་འོང་སྟེ། ངོ་ཚ་བའི་ལམ་མེད་ཅིང་སྐྱེ་ཤི་མི་ཆད་དོ། །དེ་ལྟ་བས་ན་ཤཱ་རིའི་བུ་ཆོས་འཆད་པ་མི་གཙང་བ་ནི་སྡིག་ཤིན་དུ་མང་པོ་ཐོབ་བོ། །ངན་པའི་བཤེས་གཉེན་ཡང་བྱས་སོ། །སྔ་མ་འདས་པ་དང་། མ་འོངས་པ་དང་། 
ད་ལྟར་གྱི་སངས་རྒྱས་ལ་འང་སྐུར་ཏོ། །ཤཱ་རིའི་བུ་དེའི་འཛམ་བུའི་གླིང་གི་སེམས་ཅན་ཞོག་སྟེ། མི་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཀྱི་སྲོག་ཕྲོགས་པ་བས་ཆོས་འཆད་པ་མི་གཙང་བའི་
སྡིག་དེ་མཐོའོ། །ཅིའི་ཕྱིར་ཞེ་ན། མི་དེས་སངས་རྒྱས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀུན་བཤིག་སྟེ། བདུད་ཀྱི་དོན་ལ་བསྟངས་ཤིང་སེམས་ཅན་ཚེ་རབས་བརྒྱ་སྟོང་ཁྲིའི་བར་དུ་རྐུན་པོའི་མྱ་ངན་རྣམས་ནོད་པར་ཡང་བྱ་སྟེ། བཅིང་བར་
བྱ་བ་འབའ་ཤིག་ནུས་ཀྱི་བཀྲོལ་བར་བྱ་མི་ནུས་ཏེ། དེ་ལྟ་བུའི་མི་སེམས་ཅན་རྣམས་ཀྱི་ངན་པའི་བཤེས་གཉེན་ཡིན་པར་མངོན་ནོ། །བརྫུན་གྱི་ཚིག་དེས་ཕལ་མང་པོའི་ནང་དུ་སངས་རྒྱས་ལ་སྐུར་ཅིང་བཞིགས་སོ། །རྒྱུ་རྐྱེན་དེ་ལྟ་བས་ན་སེམས་ཅན་དམྱལ་བ་
ཆེན་པོར་ལྟུང་ངོ་། །སེམས་ཅན་ཡོན་པོའི་དོན་མཐོང་བ་བསྟན་པ་མང་སྟེ། དེ་ལྟ་བས་ན་མིང་ངན་པ་ཡོན་པོ་མཐོང་བ་ཞེས་བྱའོ། །ཤཱ་རིའི་བུ་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་དུ་ལྟ་བ་ནི་ཡོན་པོར་ལྷུང་བ་མང་ངོ་། །ཞི་བ་མ་
མཐོང་བ་ཡང་ཆོད་པ་ནི་མྱུར་ཏེ་ལམ་ཐོབ་པ་མང་ངོ་། །ཅིའི་ཕྱིར་ཞེ་ན། དེས་མཐོང་སླ་བའི་ཕྱིར་རོ། །དེ་ལྟ་བས་ན་ཤེས་པར་བྱོས་ཤིག །མི་དེ་རང་གི་རལ་གྲི་རྣོན་པོ་བདར་ཏེ། ལྕེ་གཅོད་ན་ཕོད་ཀྱི་ཕལ་གྱི་ནང་དུ་མི་གཙང་བར་ཆོས་འཆད་པ་ནི་མིགས་སོ། །
ལེའུ་བདུན་ཏེ་གནའ་འདས་པའི་ལེའུའོ།། །། སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། གནའ་འདས་པའི་ཡུན་རིང་པོ་དཔག་ཏུ་མེད་མུ་མེད། བསམ་གྱིས་མི་ཁྱབ་པ་བསྐལ་པ་གྲངས་མེད་པའི་ཚེ་སངས་རྒྱས་ཤིག་ཡོད་

49-1-179a

པ་མཚན་བཟང་པོ་དེ་བཞིན་གཤེགས་པ་གསོལ་བ་ཞེས་རིགས་དྲང་ཁྱབ་མཁྱེན་སྣང་མཛད་ཞབས་བདེ་གཤེགས་འཇིག་རྟེན་སྒྲོལ། བླ་ན་མེད་པའི་དྲི་མ་གདུལ་ཐུལ་སྐྱེས་བུ་ལྷ་དང་མིའི་མཁན་པོ་སངས་རྒྱས་བཅོམ་ལྡན་འདས་ཤེས་བྱ་
སྟེ་སངས་རྒྱས་དེ་འཇིག་རྟེན་ན་ཚེ་སྲོག་ལོ་འབུམ་ཁྲི་ཕྲག་བརྒྱད་དང་དྲུག་བཅུ་ལོན་ཏེ། སློབ་མ་ཆེན་པོ་ཕལ་འབུམ་ཁྲི་ཕྲག་བརྒྱད་བརྒྱ་དྲུག་ཅུ་པ་ཡོད་དེ། སངས་རྒྱས་དེ་འདས་པའི་ཕྱི་ན་སྐུ་གདུང་ཁྱབ་པར་བཀྲམ་པ་ནི་ང་འདས་པའི་ཕྱི་ན་བ་དང་མཚུངས་ཏེ་
ཐ་དད་པ་མེད་དོ། །དྲང་པོའི་ཆོས་འཇིག་རྟེན་ན་འདུག་པ་ཡང་ལོ་ལྔ་བརྒྱ་སྟེ་ང་འདས་པའི་ཕྱི་ན་བ་དང་མཚུངས་ཏེ་ཐ་དད་པ་མེད་དོ། །སངས་རྒྱས་འདས་པའི་ཕྱི་ན་ཕལ་ཆེན་པོ་དེ་དག་གི་ནང་ནས་ཉི་མ་གཅིག་ལ་དགེ་སློང་བརྒྱ་མྱ་ངན་ལས་འདས་པར་ཞུགས་པ་
ཡོད་དོ། །ཉིས་བརྒྱ་སུམ་བརྒྱ་བཞི་བརྒྱ་ལྔ་བརྒྱ་མྱ་ངན་ལས་འདས་པར་ཞུགས་པ་ཡོད་དོ། །ཉི་མ་གཅིག་ལ་བར་བར་དགེ་སློང་འབུམ་ཁྲི་ཕྲག་བཅུ་མྱ་ངན་ལས་འདས་པར་ཞུགས་པ་ཡོད་དོ། །དེ་ལྟ་བུར་གཅིག་ནས་གཅིག་ཏུ་སངས་རྒྱས་དེ་ལ་ཤེས་པ་མང་པོ་
དང་། རིམ་པ་མང་པོ་ཡོད་པའི་རྫུ་འཕྲུལ་ཆེན་པོ་རྣམས་ཟླ་བ་གསུམ་གྱི་ངོ་ལ་ཀུན་མྱ་ངན་ལས་འདས་པར་ཞུགས་སོ། །ཤཱ་རིའི་བུ་སངས་རྒྱས་བཟང་རྒྱན་ཆེན་པོས་དྲང་པོའི་ཆོས་ཁྱབ་པར་བཀྲམ་པ་ལ། ལྷ་དང་མི་མང་པོ་ཀུན་གྱིས་ཡོན་ཕུལ་ལོ། །ཤཱ་རིའི་བུ་
སངས་རྒྱས་བཟང་རྒྱན་ཆེན་པོ་དང་། སློབ་མ་ཆེན་པོ་རྣམས་མེད་པར་འདས་པའི་ཕྱི་ན་མི་ལ་ཁད་ཀྱིས་དགེ་སྦྱོང་གི་ཆོས་ཤེས་ཤིང་བདེ་སྐྱིད་པ་ལས་ཁྱིམ་ནས་འབྱུང་ཞིང་ལམ་སློབ་པའང་མང་དུ་ཡོད་ན། སངས་རྒྱས་ཀྱིས་ཆོས་ཀྱི་ཡི་གེ་ཤིན་ཏུ་ཟབ་མོ་བསྒྲུན་དུ་མེད་པའི་
སྟོང་པའི་གཞུང་དྲངས་ཤིང་བཤད་པ་ཤེས་པར་མི་ནུས་ཏེ། བདུད་ངན་པས་བསླད་རྨོངས་པ་མང་བས། དེའི་ཚེ་ཆོས་འཆད་པ་ཡང་སེམས་གཅིག་ཏུ་མི་ཐུབ་པས་བཤད་པ་ཡང་མི་གཙང་མི་གདང་སྟེ། བདག་ཏུ་ལྟ་བ་དང་། གང་ཟག་ཏུ་ལྟ་བ་དང་ཚེ་སྲོག་ཡོད་
པར་བཤད་ཀྱི་ཆོས་སོ་ཅོག་ཀུན་སྟོང་པ་ཞི་བར་མ་བཤད་དོ། །སངས་རྒྱས་དེ་མེད་པར་འདས་པའི་ཕྱི་ན་ལོ་བརྒྱ་ལོན་ན་སློབ་མ་རྣམས་ཀྱི་སྡེ་ལྔར་བགོས་ཏེ། གཅིག་གི་མིང་ནི་ཁྱབ་དོན། གཉིས་ཀྱི་མིང་ནི་སྡུག་བསྔལ་བཀྲམ། གསུམ་གྱི་མིང་ནི་ཐམས་ཅད་སྐྱོབ་

49-1-179b

བཞིའི་མིང་ནི་ཙང་ཀི། ལྔའི་མིང་ནི་བར་འདན་ཏ་ཞེས་བྱའོ། །ཤཱ་རིའི་བུ་དགེ་སློང་ཁྱབ་དོན་དང་། དག་སློང་སྡུག་བསྔལ་བཀྲམ་དང་། དགེ་སློང་རྩྭ་དྭ་ཏ་དང་། དགེ་སློང་ཙང་ཀི་དང་། དགེ་སློང་བར་འདན་ཏ་དང་། དགེ་སློང་འདི་ལྔས་ཕལ་མང་པོའི་མཁན་པོ་
བྱས་ན། ཁྱབ་དོན་ཞེས་བྱ་བ་ནི་སངས་རྒྱས་ཀྱིས་ཡང་དག་པའི་བདེན་པའི་སྟོང་པའི་གཞུང་ཅི་ཡང་མེད་པའི་ཆོས་བཤད་དོ་ཅོག་ཤེས་སོ། །དགེ་སློང་བཞི་པོ་གཞན་ནི་ཀུན་ཡོན་པོའི་ལམ་དུ་ལྟུང་ངོ་། །བདག་ཏུ་ལྟ་བ་ཡོད་པར་འཆད་པ་མང་། གང་ཟག་
ཡོད་པར་འཆད་པ་མང་ངོ་། །ཤཱ་རིའི་བུ་དགེ་སློང་ཁྱབ་དོན་ནི་སྡེ་བཞིས་བརྙས་ཏེ། དཔུང་དང་མཐུ་མེད་པས་མི་མང་པོས་སྨད་དོ། །དགེ་སློང་ངན་པ་བཞི་ནི་ཕལ་ནི་མང་དུ་ཡོན་པོའི་ལམ་དུ་ལྟ་བར་བསླབས་ཏེ། སངས་རྒྱས་ཀྱི་ཆོས་གཅིག་ལ་གཅིག་རི་མོ་
གུས་པར་མི་བྱེད་དེ། གཅིག་ལ་གཅིག་གལ་བས་ན་སངས་རྒྱས་ཀྱི་ཆོས་མང་བར་གྱུར་ཏོ། །ཤཱ་རིའི་བུ་མི་ལ་ལ་ཞིག་དགེ་སློང་ཁྱབ་དོན་གྱིས་སྟོང་པའི་ཆོས་བཤད་དོ་ཅོག་ཤེས་སླ་ཡིད་ཆེས་པར་མནོས་ཏ། མ་འགལ་ན་ངས་དེ་ལྟ་བུའི་མི་ནི་ཚེ་དུས་སྔ་མ་ལ་
སངས་རྒྱས་ལྔ་སྟོང་ལ་ཡོན་གསོལ་མྱོང་བར་མངོན་ཏེ། མི་གྲངས་འདའ་ཡུ་ཏ་འབུམ་ཕྲག་དྲུག་ཅུ་རྩ་བརྒྱད་ཡོད་པ་དང་མྱ་ངན་ལས་འདས་པར་ཞུགས་ཟིན་པའོ། །ཅིའི་ཕྱིར་ཞེ་ན། ཤཱ་རིའི་བུ་མི་དེས་འདས་པའི་དུས་ཀྱི་སངས་རྒྱས་རྣམས་ལ་དགེ་བའི་རྩ་བ་
རྣམས་བསྐྱེད་དོ། །ཅི་ཡང་ཐོབ་པ་མེད་པའི་སྟོང་པའི་ཆོས་སྤྱད་སྦྱངས་མྱ་ངན་ལས་འདའ་བར་འཇུག་པའི་རིགས་སོ། །ཤཱ་རིའི་བུ་དགེ་སློང་ཐམས་ཅད་ཡོད་དང་། དགེ་སློང་ཙང་ཀི་དང་། དགེ་སློང་བར་འདན་ཏ་དང་། དེ་ཀུན་ཐོབ་པ་ཡོད་པར་འཛིན་ཏེ། བདག་ཏུ་
ལྟ་བ་དང་། གང་ཟག་དང་། སེམས་ཅན་དང་། ཚེ་སྲོག་ཡོད་པར་འཆད་དོ། །གྲོགས་མང་པོ་མདོ་དར་བས་མི་ངན་པ་དེ་བཞིས་ཁྱིམ་ན་འདུག་པ་དང་། ཁྱིམ་ནས་བྱུང་བ་མང་དུ་ཡོན་པོ་མཐོང་བ་ལ་ཆགས་པར་བྱས་ཏེ། མཆོག་གི་གཞུང་ཅི་ཡང་མེད་པ་མཐའ་ཡུན་
དུ་སྟོང་པའི་ཆོས་བཏང་ནས་མུར་འདུག་འཛི་གེན་གྱིས་ཆོས་བཤད་པ་ལ་དད་ཅིང་ཆགས་སོ། །ཤཱ་རིའི་བུ་མི་ངན་པ་དེ་བཞིས་ཁྱིམ་ན་འདུག་པ་དང་། ཁྱིམ་ནས་བྱུང་བའི་སློབ་མའི་ཆོས་ཟད་ལ་ཐུག་གི་བར་དུ་རྟག་པར་ཕྱི་བཞིན་དུ་ཁྲིད་དོ། །ཤཱ་རིའི་བུ་

49-1-180a

དེའི་ནང་ན་མི་ལ་ལ་ཆོས་ཀྱི་དོན་མ་ཡིན་པར་ཤེས་ཏེ། མནོས་ནས་ཆོས་སུ་བྱས་ཏེ་སེམས་ལ་འགྲུས་པར་སྤྱད་ན། འོན་ཀྱང་མི་འགལ་བའི་བཟོད་པ་མ་ཐོབ་ན་རྒྱུན་ཏུ་ཞུགས་པའི་འབྲས་བུ་མི་ཐོབ་པ་ལྟ་སྨོས་ཀྱང་ཅི་དགོས། མི་དེ་ལྟ་བུ་
འང་ཡོན་ཕུལ་བའི་དོན་ཞུ་བར་མི་བྱེད་ན། མི་འགལ་བའི་བཟོད་པ་སྐྱེ་བར་མི་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ་དེའི་ཚེ་ཁྱིམ་ན་འདུག་པ་དང་ཁྱིམ་ནས་བྱུང་བའི་སློབ་མ་ལམ་ངན་པར་ལྟུང་བ་སྟེ། དགེ་བའི་ལམ་དུ་མ་ཕྱིན་ཏོ། །མི་ངན་པ་
དེ་དག་གིས་སངས་རྒྱས་ཀྱི་ཆོས་དྲང་པོ་བགགས་ཏེ། མི་ལ་རྒུད་པའི་མྱ་ངན་གྱི་དོན་ཆེན་པོ་མི་མང་པོ་ལ་ཤིན་ཏུ་རྒུད་པའི་མྱ་ངན་ཀྱང་བྱིན་པའི་སྟེང་དུ་མི་ངན་པ་དེ་དག་ཚེ་ཟད་པའི་འོག་ཏུ་མནར་མེད་པའི་སེམས་ཅན་དམྱལ་བར་ལྟུང་སྟེ། ལོ་འབུམ་ཁྲི་ཕྲག་
བདུན་གྱི་བར་དུ་ནི་གན་རྒྱལ་དུ་ཉལ་ལོ། །འབུམ་ཁྲི་ཕྲག་དགུ་བརྒྱའི་བར་དུ་ནི་ཁ་སྤུབ་ཏུ་ཉལ་ལོ། །འབུམ་ཕྲག་དགུ་བརྒྱའི་བར་དུ་ནི་རྩིབ་ལོགས་གཡོན་པས་ཉལ་ལོ། །འབུམ་ཁྲི་ཕྲག་དགུ་བརྒྱའི་བར་དུ་ནི་རྩིབ་ལོགས་གཡས་པས་ཉལ་ལོ། །
དེ་ལྕགས་ཚ་བའི་ནང་དུ་བསྲེགས་ནས་ཚིག་ཞིག་སྟེ། དེའི་ནང་དུ་ཤི་བ་དང་། ཡང་ཐལ་བའི་སེམས་ཅན་དམྱལ་བ་དང་། ཐལ་བའི་སེམས་ཅན་དམྱལ་བ་ཆེན་པོར་སྐྱེས་སོ། །གསོད་པའི་སེམས་ཅན་དམྱལ་བ་དང་། ཐག་པ་ནག་པོའི་སེམས་ཅན་
དམྱལ་བ་དང་། ཀུན་དུ་ཡང་ཡན་ཆད་ཀྱི་ལོ་གྲངས་བཞིན་དུ་སྡུག་བསྔལ་ལོ་ཅོག་གིས་ཉོན་མོངས་ནས། ཐག་པ་ནག་པོའི་སེམས་ཅན་དམྱལ་བར་ཤི་ནས་སླར་མནར་མེད་པའི་སེམས་ཅན་དམྱལ་བའི་ནང་དུ་སྐྱེས་སོ། །ཤཱ་རིའི་བུ་རྒྱུ་རྐྱེན་དེ་ལྟ་བས་ན་
ཁྱིམ་ན་འདུག་པ་དང་། ཁྱིམ་ནས་བྱུང་བ་ལ་མི་འདི་ལ་ཉེ་བསྙེན་པ་དང་། དགེ་བའི་བཤེས་གཉེན་དང་། སྦྱིན་བདག་ཀུན་སྡེམ་དུ་ཡོང་མི་འབུམ་ཁྲི་ཕྲག་དྲུག་བརྒྱ་རྩ་བཞི་ཡོད་དེ། མཁན་པོ་འདི་བཞི་དང་ལྷན་ཅིག་ཏུ་སྐྱེ། ལྷན་ཅིག་ཏུ་འཆི་སྟེ། སེམས་ཅན་
དམྱལ་བ་ཆེན་པོ་ན་འཁོད་ཅིང་བསྲེག་པའོ་ཅོག་གིས་ཉོན་མོངས་སོ། །ཤཱ་རིའི་བུ་མི་དེ་ལ་དགེ་བའི་བཤེས་གཉེན་དང་། སྦྱིན་བདག་དང་། སློབ་མ་དང་། མཁན་པོ་བཞིན་དུ་བྱེད་དོ་ཅོག་ཀུན་གྲངས་དེའི་ནང་དུ་གཏོགས་ཏེ་ཟད་པར་སེམས་ཅན་དམྱལ་བར་

49-1-180b

སྐྱེའོ། །ཤཱ་རིའི་བུ་ཁྱོད་ལ་སོགས་པས་དེའི་མང་ཉུང་ཤེས་པར་མི་ནུས་སོ། །ཡང་དག་པར་གཤེགས་པ་ཉི་ཚེས་གདོད་མཁྱེན་པར་ནུས་སོ། །མི་ངན་པ་དེ་དག་སེམས་ཅན་དམྱལ་བར་ལྟུང་སྟེ། ལྷན་ཅིག་ཏུ་སྐྱེས་སོ། །ལྷན་ཅིག་ཏུ་འཆི་བ་སྡོམ་དུ་མི་
འབུམ་ཁྲི་ཕྲག་དྲུག་བརྒྱ་རྩ་བཞི་ཡོད་དེ། དེ་ལྟ་བུ་གཅིག་ནས་གཅིག་གི་བར་དུ་བསྐལ་པ་གཅིག་གི་བར་དུ་ཉོན་མོངས་ནས། བསྐལ་པ་ཆེན་པོ་བསྲེགས་ལ་ཐུག་གི་བར་དུ། འོན་ཀྱང་སེམས་ཅན་དམྱལ་བ་ན་འཁོད་དོ། །ཅིའི་ཕྱིར་ཞེ་ན། ཤཱ་རིའི་བུ་ཡང་
དག་པར་གཤེགས་པའི་བླ་ན་མེད་པའི་གཡུང་དྲུང་རྫོགས་པའི་བྱང་ཆུབ་བཤིག་པ་དེའི་སྡིག་ཤིན་ཏུ་ལྕི་སྟེ། ཡང་བ་མ་ཡིན་ནོ། །བསྐལ་པ་ཆེན་པོས་བསྲེགས་སུ་ཟིན་ཀྱང་མི་ངན་པ་དེ་བཞི་དང་། མི་འབུམ་ཁྲི་ཕྲག་དྲུག་བརྒྱ་རྩ་བཞི་ནི་བསྟིར་མེད་པའི་དམྱལ་བ་
ཆེན་པོ་འདི་ནས་ཡང་སྐྱེས་ཏེ། ཕྱོགས་གཞན་གྱི་སེམས་ཅན་དམྱལ་བ་ཆེན་པོ་ན་འཁོད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ་སྡིག་ལྕི་བ་ཆོ་ག་ཚང་སྟེ་དེའི་ལན་མི་ཉུང་བས་ཕྱོགས་གཞན་ལོ་གྲངས་མེད་པ་བརྒྱ་སྟོང་ཁྲི་འབུམ་འདའ་ཡུ་ཏའི་བར་དུ་སྡུག་བསྔལ་ཆེན་པོས་
ཉོན་མོངས་ཤིང་འཁོད་དོ། །འཇིག་རྟེན་གྱི་ཁམས་སུ་སླར་སྐྱེས་ཀྱང་སྡིག་གི་མི་དེ་བཞི་དང་། མི་ཕལ་འབུམ་ཁྲི་ཕྲག་དྲུག་བརྒྱ་རྩ་བཞི་པོ་དང་། མི་གཞན་སྡིག་མ་བྲལ་བ་རྣམས་ཕ་ཀིར་ཚེ་ཟད་ན། སླར་ཡང་སེམས་ཅན་དམྱལ་བ་ཆེན་པོའི་ནང་དུ་སྐྱེས་སོ། །ཤཱ་
རིའི་བུ་སྡིག་གི་མི་དེ་བཞི་དང་སེམས་ཅན་ཕལ་འབུམ་ཁྲི་ཕྲག་དྲུག་བརྒྱ་རྩ་བཞི་པོ་ཐ་མར་སེམས་ཅན་དམྱལ་བའི་ནང་དུ་སྡུག་བསྔལ་ལས་ཐར་མོད་ཀྱི། མིའི་ནང་དུ་སྐྱེ་བ་ཐོབ་ན་ཚེ་རབས་ལྔ་བརྒྱའི་བར་དུ་ཐོག་མ་བཙའ་བ་ནས་དམུས་ལོང་སྟེ། དེ་ནས་གདོད་སངས་
རྒྱས་ཀུན་སྣང་ཡང་ཡང་དག་པར་གཤེགས་པ་གསོལ་བཞེངས་རིགས་དྲང་ཁྱབ་མཁྱེན་སྣང་མཛད་ཞབས་བདེ་གཤེགས་འཇིག་རྟེན་བཀྲོལ། བླ་ན་མེད་པའི་དྲ་མ་གདུལ་སྐྱེས་བུ་དང་མིའི་མཁན་པོ་སངས་རྒྱས་བཅོམ་ལྡན་འདས་དེ་དང་ཕྲད་དོ། །ཤཱ་རིའི་བུ་སངས་
རྒྱས་ཐམས་ཅད་སྣང་གི་ཉན་ཐོས་ཀྱི་སློབ་མ་འདའ་ཡུ་ཏ་འབུམ་ཡོད་དོ། །དེའི་ཚེ་མི་འོ་ཅོག་ལུས་ཁྲུ་སུམ་བརྒྱ་དགུ་བཅུ་རྩ་དྲུག་ཡོད་དོ། །སངས་རྒྱས་ཀྱི་སྐུ་ལུས་ནི་དེ་ལས་ཕྱེད་ཀྱིས་རིང་ངོ་། །འོད་རྟག་པ་ཟླུམ་པོས་དཔག་ཚད་འབུམ་ཁྲི་ཕྲག་བཅུ་ཚུན་ཆད་སྣང་

49-1-181a

ངོ་། །ཤཱ་རིའི་བུ་མི་དེ་སངས་རྒྱས་ཐམས་ཅད་སྣང་གི་ཆོས་ཀྱི་ནང་ནས་ཁྱིམ་ནས་བྱུང་སྟེ་ལོ་འབུམ་ཁྲི་ཕྲག་བཅུའི་བར་དུ་བརྩོན་འགྲུས་སྤྱད་དེ། མགོ་མེས་ཚིག་པའི་ར་མདའ་བཞིན་དུ་བྱས་ཀྱང་མི་འགལ་བའི་བཟོད་པ་མ་ཐོབ་ན། ལམ་
གྱི་འབྲས་བུ་མ་ཐོབ་པ་ལྟ་སྨོས་ཀྱང་ཅི་དགོས། ཅིའི་ཕྱིར་ཞེ་ན། ཤཱ་རིའི་བུ་བླ་ན་མེད་པའི་གཡུང་དྲུང་རྫོགས་པའི་བྱང་ཆུབ་བཤིག་པ་གཡོས་པའི་སྡིག་གི་ལས་ཀྱི་རྒྱུ་རྐྱེན་གྱི་ཆོས་དེ་ལྟ་བུ་རིགས་སོ། །དེ་ཟད་པའི་འོག་ཏུ་སླར་ཡང་མནར་མེད་པའི་སེམས་
ཅན་དམྱལ་བ་ཆེན་པོར་སྐྱེའོ། །སྔར་མི་དགེ་བ་ལྕི་བའི་ལས་ཀྱི་རྐྱེན་གཡོས་པའི་ལན་ནི། ཤཱ་རིའི་བུ་མི་དེ་དག་ལ་སོགས་པ་དེ་བཞིན་དུ་གཅིག་ནས་གཅིག་ཏུ་དང་ལ་ཐུག་གོ། །དེའི་ཕྲག་ན་སངས་རྒྱས་འབུམ་ཕྲག་དགུ་བཅུ་རྩ་དགུ་དང་ཕྲད་ནས། 
སངས་རྒྱས་དེ་དག་ལས་ཀྱང་མི་འགལ་བའི་བཟོད་པ་མ་ཐོབ་བོ། །ཅིའི་ཕྱིར་ཞེ་ན། སངས་རྒྱས་ཀྱི་ཆོས་ཀྱི་ཡི་གེ་ཟབ་མོ་བཤད་ན་མི་དེ་དག་གིས་ཡིད་མ་ཆེས་ཏེ། བཤིག་དྲལ་ལོག་གལ་ནས། འཛངས་ཤིང་འཕྲུལ་པ་ལ་ནི་འཕྱ་ཞིང་སྐུར། ཚུལ་ཁྲིམས་
འཛིན་པའི་དགེ་སློང་ལ་ནི་ཉེས་པའི་ངན་པ་ཕྱུང་སྟེ། ཆོས་བཞིག་པའི་ལས་གཡོས་པའི་རྒྱུ་རྐྱེན་གྱི་ཆོས་ནི་དེ་ལྟ་བུའི་རིགས་སོ། །ཤཱ་རིའི་བུ་ཁྱོད་རེ་ཤིག་ལྟོས་ཤིག །འཕགས་པའི་མི་ལ་འཕྱ་ཞིང་སྐུར་ཏེ། འཕགས་པའི་ཚིག་ལ་ཡིད་མི་ཆེས་ན་དེ་ལྟ་བུར་དཔག་
ཏུ་མེད། མུ་མེད་པའི་སྡུག་བསྔལ་གྱིས་ཉོན་མོངས་ཏེ། གྲོལ་ཐར་པ་མ་ཐོབ་བོ། །ཤཱ་རིའི་བུ་སེམས་ཅན་གཞན་ཆོས་བཤིག་པའི་སྡིག་པའི་ལས་གཡོས་ཏེ་ལོག་གལ་ཞིང་ཡིད་མ་ཆེས་པ་དེ་གྲངས་མེད་དཔག་ཏུ་མེད་པ་ཡོད་ན་སངས་རྒྱས་འབུམ་ཕྲག་དགུ་བཅུ་རྩ་དགུ་
ལ་བསྐལ་པ་གྲངས་མེད་པའི་བར་དུ་མི་གཅིག་མྱ་ངན་ལས་འདས་པར་ཆུད་པ་ཡོང་མེད་དོ། །ཤཱ་རིའི་བུ་སངས་རྒྱས་རྣམས་ཀྱི་ཆོས་བཤིག་ཅིང་ཡིད་མི་ཆེས་ཤིང་ལོག་གལ་བར་ནུས། ཐ་མལ་པ་གླེན་པ་དང་ལེ་ལོ་ཡར་སྐྱེ་བའི་དགེ་སློང་ངན་པ་རྣམས་དང་འཆད་པ་མི་གཙང་
བའི་དགེ་སློང་རྣམས་སོ། །ཅིའི་ཕྱིར་ཞེ་ན། ཤཱ་རིའི་བུ་མི་དེ་རྣམ་གསུམ་ནི་སྤྱོད་པ་ཞེས་ཀྱང་མི་བྱ། མིང་ཐོབ་པ་ཞེས་ཀྱང་མི་བྱ་སྟེ། མི་དག་གིས་ཡང་དག་པར་གཤེགས་པའི་ཆོས་ལ་ཡིད་མ་ཆེས་པས་ན་འཕྱ་ཞིང་སྐུར་ཏེ་ལོག་གོ། །ཤཱ་རིའི་བུ་ཁྱོད་ན་རེ་ཇི་ལྟ་བུར་དགེ་སློང་

49-1-181b

སྡུག་བསྔལ་བཀྲམ་དེས་ཆོས་བཤད་པ་དེ་མི་གཙང་ཞེས་ཟེར་བ་ཉིད་ནི་མི་གཏི་མུག་ལྷ་སྦྱིན་ཡིན་ནོ། །ཁྱོད་ན་རེ་ཇི་ལྟར་དགེ་སློང་ཐམས་ཅད་ཡོད་ཅེས་འཆད་པ་མི་གཙང་ཞེས་ཟེར་བ་ནི་ཉིད་དགེ་སློང་ཀུ་ཀ་ལི་ཡིན་ནོ། །ཤཱ་རིའི་བུ་ཁྱོད་ན་རེ་ཇི་ལྟ་བུར་དགེ་སློང་ཙང་གི་
དེས་ཆོས་བཤད་པ་མི་གཙང་ཞེས་ཟེར་བ་ནི་ཉིད་དགེ་སློང་ཀ་པི་ལ་ཡིན་ནོ། །ཁྱོད་ན་རེ་ཇི་ལྟ་བུར་ན་དགེ་སློང་བར་ཏ་ད་དེས་བཤད་པ་མི་གཙང་ཞེས་ཟེར་བ་ནི་ཉིད་དགེ་སློང་ལུས་སྒྲེ་བ་རི་མ་ད་ཡིན་ནོ། །ཤཱ་རིའི་བུ་ཁྱོད་ན་རེ་དེའི་གཙང་དང་ཞིང་བདེན་པ་བཞིན་དུ་སངས་རྒྱས་རྣམས་
ཀྱི་བྱང་ཆུབ་བཤད་དེ་དཔག་ཏུ་མེད་པའི་སེམས་ཅན་ལ་ཕན་བསོད་དོ་ཞེས་ཟེར་བ་ནི་དེ་ཉིད་ཕུ་ལི་ཏ་འབི་ཏ་ར་འཛིན་འཛི་ཡིན་ཏེ། བཤད་དོ་ཅོག་གཙང་གདང་བས་གཞན་དེ་བཞིན་དུ་སློབ་མ་རྣམས་སངས་རྒྱས་ལྔ་སྟོང་དང་ཕྲད་དེ། མི་འདའ་ཡུ་ཏ་འབུམ་ཕྲག་དྲུག་བཅུ་རྩ་བརྒྱད་
ཡོད་པ་ཀུན་ཞི་སྟེ་ཐར་ཟིན་ཏོ། །ཤཱ་རིའི་བུ་མི་ལ་བདེན་པའི་ཚིག་གང་ཡིན་ཞེས་བྱས་ན། ནང་གི་བླ་མའི་ཆོས་ཀྱི་གཞུང་མངོན་པར་མཐོང་བར་རིག་སྟེ། གཙང་གདང་བར་བཤད་པའོ། །བཤད་པ་ནི་ནམ་འཆད་དེ། པུ་ལེའུ་འདའ་ཡིན་ནོ། །ཤཱ་རིའི་བུ་ལེའུ་འདའ་
ནི་སེམས་ཐུལ་ལ་མངོན་པར་རྟོགས་པར་བཤད་དོ་ཅོག་དགའ་བ་མེད་དེ་ཡིད་མི་ཆེས་པས་ན་བཤད་ཅིང་འགྲོལ་བར་སྐྱེའོ། །ཤཱ་རིའི་བུ་མི་ལ་བདེན་པའི་ཚིག་གང་ཡིན་ཞེ་ན། རྒྱུ་རྐྱེན་ཐམས་ཅད་ཆོས་ཀྱི་མཁན་པོས་ནམ་ཚིག་བཤད་པ་སྟེ་པུ་ལི་ཏ་ཡིན་ནོ། །ཤཱ་རིའི་བུ་
པུ་ལི་ཏ་ནི་ཚེ་ཚེ་རབས་རབས་གར་སྐྱེ་དགུར་རྟག་པར་སེམས་ཅན་གྱི་ཕྱིར་སངས་རྒྱས་ཀྱི་དོན་བྱེད་དོ། །སངས་རྒྱས་དགུ་བཅུ་ཐམས་ཅད་ཀྱི་ཆོས་ཀྱི་ནང་ན་ཡང་རྟག་པར་ཆོས་ཀྱི་མཁན་པོ་བྱེད་དོ། །ཆོས་གཙང་གདང་བར་བཤད་ནས་སངས་རྒྱས་དེ་ཀུན་ལ་ལུས་ཀྱི་ཚེ་ཟད་
ཀྱི་བར་དུ་རྟག་པར་ཚངས་པར་སྤྱོད་པ་སྤྱད་དེ། ཆོས་གཙང་བར་བཤད་དོ། །ཤཱ་རིའི་བུ་པུ་འུ་ཏ་སངས་རྒྱས་དྲུག་གི་ཆོས་ཀྱི་ནང་ན་ཡང་ཆོས་ཀྱི་མཁན་པོ་བྱེད་དོ། །ངའི་ཆོས་ཀྱི་ནང་ན་ཡང་ཆོས་ཀྱི་མཁན་པོ་ཆེན་པོ་བྱེད་དེ། དགྲ་བཅོམ་པ་གྲུབ་ནས་སེམས་གྲོལ་ཐར་པ་
ཐོབ་བོ། །མིས་བདེན་པ་བཤད་ན་ཇི་ལྟ་བུའི་མིས་ཚེ་ཚེ་རབས་རབས་སུ་སངས་རྒྱས་རྣམས་ལ་ཡོན་གསོལ་ཞིང་དགེ་བའི་རྩ་བ་རྣམས་བསྐྲུན་པ་ནམ་ཚིག་བཤད་པ་པུ་ལེའུ་ཏ་ཡིན་ནོ། །ཤཱ་རིའི་བུ་པུ་ལེའུ་ཏས་སངས་རྒྱས་འབུམ་ཕྲག་དགུ་བཅུའི་ཆོས་ལ་

49-1-182a

སེམས་འགྲུས་པར་བཙལ་བསླབས་པས་འགྲོ་བ་བཤད་པ་གཅིག་ཏུ་མི་འགྱུར་བས་ཤེས་རབ་ཟབ་མོ་ཡོད་དོ། །དེ་ལྟ་བས་ན་ཡང་དག་པར་གཤེགས་པས་ཆོས་ཀྱི་མཁན་པོ་རྣམས་ཀྱི་ནང་ན་རབ་ཅེས་བཤད་དོ། །ཤཱ་རིའི་བུ་ཉིན་གཅིག་
མཚན་གཅིག་ཏུ་པུ་ལི་ཏ་འདི་ལེགས་པའི་དོན་བཤད་དུ་ཟིན་ཀྱང་མི་ཟད་དོ། །ཉིན་གཅིག་མཚན་གཅིག་འདས་སུ་ཟིན་ཀྱང་མི་ཟད་དོ། །ཅིའི་ཕྱིར་ཞེ་ན། པུ་ལི་ཏའི་ཆོས་ཀྱི་སྦྱིན་པ་ནི་ཐ་མལ་པའི་རྒྱུ་རྐྱེན་མེད་ལ། གསོ་བའི་ཁེ་ལ་མི་ཆགས་པས་ཆོས་ཀྱི་
མཁན་པོ་སྟེ། པུ་ལེའུ་ཏ་ལ་ཐོགས་པ་མེད་པ་བཞི་ཤེས་རབ་ཐོབ་སྟེ། ཡང་དག་པར་གཤེགས་པ་མ་གཏོགས་པར་འཇིག་རྟེན་ཀུན་གྱི་ནང་ན་ཚིག་འབྲུ་དང་ཚུལ་གྱི་གཞུང་ཐོབ་པར་ནུས་པ་མེད་དོ། །ཤཱ་རིའི་བུ་ངས་ཁྱོད་ལ་བསྒོའོ། །མི་ལ་ལ་ཞིག་བླ་ན་
མེད་པའི་གཡུང་དྲུང་རྫོགས་པའི་བྱང་ཆུབ་ཐོབ་པར་འདོད་ན། མི་གཞན་ལ་ཆོས་བཤད་ན་དཔག་ཏུ་མེད་མུ་མེད་པའི་ལེགས་པའི་ཡོན་ཐོབ་ཅིང་གྲངས་མེད་པའི་སེམས་ཅན་ལའང་ཕན་བསོད་པར་ནུས་སོ། །ཤཱ་རིའི་བུ་མི་ལ་ལ་ཞིག་གིས་ཆོས་འདི་ལ་ཡིད་
མ་ཆེས་ཏེ་བཤིག་དྲལ་ལོག་གལ་ན། དཔག་ཏུ་མེད་པའི་སྡིག་ལྕི་བའི་རྒྱུ་རྐྱེན་ལྡང་ངོ་། །ཅིའི་ཕྱིར་ཞེ་ན། ཤཱ་རིའི་བུ་ངན་པ་ལ་ངན་པའི་ལམ་ཡོད། དགེ་བ་ལ་དགེ་བའི་ལམ་ཡོད་དེ། དེ་ལྟ་བས་ན་ངས་ད་ཆོས་ཀྱི་ཡི་གེ་འདི་ཁྱོད་ལ་གཏམས་བཅོལ་གྱིས་
ཕལ་སྡེ་བཞི་ལ་བྱེ་བྲག་ཕྱེད་པར་རྒྱ་ཆེར་ཤོད་ཅིག །ཤཱ་རིའི་བུ་ཆོས་ཀྱི་ཡི་གེ་འདི་ཐོས་ཏེ་སེམས་ཡིད་ཆེས་ཤིང་སེམས་དགའ་གཞའ་ན་དཔག་ཏུ་མེད་པའི་དཔལ་ཡོན་ཐོབ་བོ། །ཐོས་ཏེ་ཡིད་མི་ཆེས་ཤིང་སེམས་མི་དགའ་མ་དད་ན་དཔག་ཏུ་མེད་པའི་སྡིག་ལྕི་བ་ཐོབ་བོ། །
ཤཱ་རིའི་བུ་ཤེས་པར་བྱོས་ཤིག །མི་དེ་ཚུལ་ཁྲིམས་ཞིག་པའི་དགེ་སློང་ཞེས་བྱ་སྟེ། ལེ་ལོ་ཡར་སྐྱེ་ཞིང་ཆོས་འཆད་པའང་མི་གཙང་བའོ། །ཤཱ་རིའི་བུ་མི་ལ་ལ་ཞིག་གིས་དེ་ལྟ་བུར་བསྟན་པ་ལོག་གལ་ན། ཚེ་ཚེར་རབས་རབས་གར་སྐྱེ་དགུར་རྟག་པར་ལོང་སྟེ་མིག་
མེད་དོ། །ཤཱ་རིའི་བུ་ད་ངས་ཁྱོད་ལ་བྱེ་བྲག་ཕྱེད་པར་བསྒོའོ། །ངས་ད་ལྟར་བཤད་དོ་ཅོག་ནི་རྫ་མཁན་སོ་མ་བཏང་བའི་རིམ་གྲོ་བྱེད་པ་དང་མི་མཚུངས་ཀྱི། ངས་ཕལ་སྡེ་བཞི་ལ་མཆོག་གི་གཞུང་མཐའ་ཡུན་དུ་སྟོང་པའི་ཆོས་བྱེ་བྲག་ཕྱེད་པར་རྒྱ་ཆེར་བཤད་ན་སྲན་

49-1-182b

ཐུབ་པ་ནི་འདུག་གོ། །སྲན་མི་ཐུབ་པ་ནི་ཞིག་གོ། །ཅིའི་ཕྱིར་ཞེ་ན། ཤཱ་རིའི་བུ་སངས་རྒྱས་ཀྱི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཐོབ་པ་ནི་ཡོན་པོ་མཐོང་བ་ལ་མི་ངན་པ་ལ་ཆོས་མི་བཤད། བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་དུ་ལྟ་བ་དང་། 
ཚེ་སྲོག་ཏུ་ལྟ་བ་ལ་ཆོས་མི་བཤད་དོ། །ཅིའི་ཕྱིར་ཞེ་ན། དེ་ལྟ་བུར་གདོད་ཤེས་པར་མི་ནུས་པར་གཞན་ལ་ཆོས་བཤད་དེ། སེམས་མི་དགའ་མི་སྐྱིད་དེ་སྐྱིད་དུ་ཟིན་ན་འང་མྱུར་དུ་སྟོན་ཏོ། ཤཱ་རིའི་བུ་ངས་བཤད་པ་མི་གཙང་བ་ལ་དེ་ལྟ་བུའི་ཉེས་སྡིག་ཡོད་དེ། དྲང་པོའི་ལམ་
ཐོབ་པ་མི་ཤེས་སོ། དེ་ལྟ་བུའི་དོན་ནི་དགེ་སློང་ཐམས་ཅད་ཀྱིས་མི་ཤེས། ལྷ་རྣམས་ཀྱིས་ཀྱང་མི་ཤེས་ཏེ། ང་འབའ་ཤིག་གིས་གདོད་ཤེས་སོ། །ཡང་ཆོས་འཆད་པ་མི་གཙང་བའི་དགེ་སློང་གིས་དེ་བཞིན་གཤེགས་པས་སྤྲོས་པ་བཞིན་དུ་བཤད་པ་མ་ཤེས་
ཏེ། མི་གཞན་ལ་བཤད་པ་མ་ཤེས་ཏེ། མི་གཞན་ལ་བཤད་པ་ཆོས་ཀྱི་ཡི་གེ་གཞན་གྱི་ནང་ན་བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད། ཚེ་སྲོག་མེད་ཅེས་བཤད་པ། མི་དེས་བདག་གིས་ཚིག་བརྗོད་པ་སྤྱད་དེ། བདག་ཏུ་ལྟ་བ་ཡོད། 
གང་ཟག་ཏུ་ལྟ་བ་ཡོད། སེམས་ཅན་ཡོད། ཚེ་སྲོག་ཡོད་ཅེས་བཤད་དེ། སངས་རྒྱས་ལ་སྐུར། ཆོས་ལ་སྐུར། དགེ་འདུན་ལ་སྐུར་ཏེ། དཀོན་མཆོག་གསུམ་ལ་སྐུར་པའི་སྡིག་ནི་ལྷ་རྣམས་དང་། འཇིག་རྟེན་གྱིས་ཤེས་པར་མི་ནུས་ཏེ། སངས་རྒྱས་ཉི་ཚེས་
མཁྱེན་ཏོ། །ཤཱ་རིའི་བུ་མི་དེས་ཡང་མི་ཆོས་འཆད་པ་མི་གཙང་བ་ཞེས་བྱ་སྟེ། ངས་དེ་ཉེས་པ་ཤེས་སོ། །གཞན་རྫུ་འཕྲུལ་ཅན་དང་ལྷ་རྣམས་ཀུན་གྱིས་ཤེས་པར་མི་ནུས་ཏེ། སངས་རྒྱས་ཉི་ཚེས་མཁྱེན་ཏོ། །ཤཱ་རིའི་བུ་ད་ངས་ཁྱོད་ལ་དཔེ་ཚུལ་གྱིས་འགྲོལ་བ་
བཤད་དོ། །མི་ལ་ལ་ཞིག་གིས་སངས་རྒྱས་ཀྱི་ལམ་གྱི་གཞུང་གི་མཚན་མ་མི་ཤེས་པར་མི་གཞན་ལ་མི་གཙང་བར་ཆོས་འཆད་ན། མི་དེས་མི་དགེ་བའི་དོན་ཅི་སྲིད་འབྱོར་འགྲུབ། ཤཱ་རིའི་བུ་ཁྱོད་ཀྱི་ཡིད་ལ་ཇི་སྙམ། འཛམ་བུའི་གླིང་གི་སེམས་ཅན་མང་ངམ་
མི་མང་། བཅོམ་ལྡན་འདས་ཤིན་ཏུ་མང་ལགས་སོ། །ཤཱ་རིའི་བུ་མི་ངན་པ་ལ་ལ་ཞིག་གིས་དེ་ཟད་པར་གྱི་སྲོག་ཕྲོགས་ན་མི་དེས་སྡིག་ཐོབ་པ་མང་ངམ་ཉུང་། བཅོམ་ལྡན་འདས་ཤིན་ཏུ་མང་ལགས་སོ། །དེ་ལྟ་བུའི་མི་གཏི་མུག་གིས་སངས་རྒྱས་ཀྱི་

49-1-183a

ལམ་མི་ཤེས་པར་མི་གཞན་ལ་ཆོས་འཆད་པ་མི་གཙང་བ་ནི་སྡིག་དེ་བས་མང་ངོ་། །ཅིའི་ཕྱིར་ཞེ་ན། མི་དེས་ཆོས་འཆད་པ་མི་གཙང་བས། བླ་ན་མེད་པའི་སངས་རྒྱས་ཀྱི་ལམ་བཤིག །སྔ་མ་འདས་པ་དང་མ་འོངས་པ་དང་། ད་ལྟར་གྱི་སངས་
རྒྱས་ལ་ཡང་སྐུར་ཏོ། །ཅིའི་ཕྱིར་ཞེ་ན། ཤཱ་རིའི་བུ་མ་འོངས་པའི་སངས་རྒྱས་ཀྱིས་ཀྱང་ཆོས་སོ་ཅོག་ཐམས་ཅད་ཀུན་མཐའ་ཡུན་དུ་ཀུན་སྟོང་པ་སྟེ། བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད། ཚེ་སྲོག་མེད་ཅེས་བཤད་དོ། །ཤཱ་རིའི་བུ་མ་འོངས་
པའི་སངས་རྒྱས་རྣམས་ཀྱིས་ཀྱང་ཆོས་སོ་ཅོག་མཐའ་ཡུན་དུ་སྟོང་པ་སྟེ། བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད། ཚེ་སྲོག་མེད་དོ། །ཤཱ་རིའི་བུ་ད་ལྟར་གྱི་ཕྱོགས་བཅུའི་ཆུ་བོ་གང་གཱའི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་སངས་རྒྱས་རྣམས་
ཀྱིས་ཀྱང་ཆོས་སོ་ཅོག་མཐའ་ཡུན་དུ་སྟོང་སྟེ། བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད། ཚེ་སྲོག་མེད་ཅེས་བཤད་དོ། །ཤཱ་རིའི་བུ་དེའི་མིང་སངས་རྒྱས་སོ་ཅོག་གི་བླ་ན་མེད་པའི་ཆོས་ཤེས་བྱ་སྟེ། ཆོས་སོ་ཅོག་ལ་མཚན་ཉིད་མེད་དེ་སྟོང་པ་མེད་
པས་ཐོབ་པ་མེད་དོ། །ཕྱི་མོ་ངོ་ཉིད་སྟོང་པ་ཞི་བས་ན་སྐྱེ་བ་ཡང་མེད་དེ། འགོག་པ་ཡང་མེད། ཉིད་ཀྱི་མཚན་མ་དང་རང་བཞིན་གྱི་མཚན་མ་ཡང་མེད་དེ་ཀུན་སྟོང་པ་བས་ན་དེ་བཞིན་གཤེགས་པས་དྲན་པའི་འདུ་ཤེས་ཀྱིས་རྣམ་པར་རྟོག་པ་རྣམས་བཅད་པ་འབའ་
ཤིག་གི་ཕྱིར། སངས་རྒྱས་རྣམས་ཀྱི་བྱང་ཆུབ་ལ་རྣམ་པར་བརྟག་པ་མེད་ཅེས་བཤད་དོ། །ཤཱ་རིའི་བུ་གང་ལ་སོགས་པ་ལ་རྣམ་པར་རྟོག་ཅེས་བྱ་བ་རྣམ་པར་རྟོག་གོ་ཅོག་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་ཏུ་ལྟ་བ་དང་། ཚེ་སྲོག་ཏུ་ལྟ་བ་དང་། 
ཆད་པར་མཐོང་བ་དང་། རྟག་པར་མཐོང་བ་དང་། ཕལ་ཐ་མལ་པས་དེ་ལྟ་བུར་རྣམ་པར་རྟོག་པར་འབྱོར་གྲུབ་བོ། །མི་ལ་ལ་ཞིག་ལ་དེ་ལྟ་བུའི་རྣམ་པར་རྟོག་པ་མེད་དེ། ཆོས་སོ་ཅོག་ཀུན་སྟོང་པ་དང་། བདག་ཏུ་ལྟ་བ་མེད། གང་ཟག་མེད། སེམས་ཅན་མེད། 
ཚེ་སྲོག་མེད་ཀུན་བྱེ་བྲག་ཕྱེད་པར་ཤེས་ནུས་ན། དེ་ལྟར་སེམས་པའི་ཚེ་སེམས་དགའ་བ་ཐོབ་སྟེ། མཆོག་གི་གཞུང་སྟོང་པ་ཐོབ་ནས་མི་དངངས་མི་སྐྲག་སྟེ། མི་དེས་ལྔ་ཕུང་སྒྱུ་མ་མི་བདེན་ཞིང་ཡང་དག་པའི་བདེན་པ་མེད་པར་རིག་གོ། །ཞུགས་པ་བཅུ་གཉིས་དང་

49-1-183b

ཁམས་བཅྭ་བརྒྱད་སྒྱུ་མ་ཆགས་པ་ཀུན་གྱི་མིང་འདོད་ཆགས་པ་ཡོན་པོར་མཐོང་བ་ཞེས་བྱའོ། །ཤཱ་རིའི་བུ་བདག་ཏུ་ལྟ་བ་དང་། གང་ཟག་ཏུ་ལྟ་བས་མི་འགལ་བའི་བཟོད་པ་ཡང་མི་ཐོབ་ན། ལམ་གྱི་འབྲས་བུ་མི་ཐོབ་པ་ལྟ་སྨོས་ཀྱང་ཅི་དགོས། ཤཱ་རིའི་
བུ་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་དུ་ལྟ་བ་དང་། ཚེ་སྲོག་ཏུ་ལྟ་བ་དང་། ཆད་པར་མཐོང་བ་དང་། རྟག་པར་མཐོང་བས་མི་འགལ་བའི་བཟོད་པ་རབ་ཏུ་ཐོབ་པར་མ་ནུས་ན་ལམ་གྱི་འབྲས་བུ་ཐོབ་པར་ནུས་ཤེས་ཟེར་ན་བདེན་པ་ཡོང་
མེད་དོ། །དེ་ལྟ་བས་ན་ཤཱ་རིའི་བུ་མི་ལ་ལ་ཞིག་གིས་དེ་ལྟ་བུ་མཐོང་བ་འབྱོར་གྲུབ་པ་ནི་ངའི་ཆོས་ཀྱི་ནང་ན་ངས་གཞན་གྱི་ཡོན་ལེན་དུ་མི་གནང་སྟེ། དེ་ནི་སྤྱོད་པ་ཡང་མ་ཡིན། ཐོབ་པ་ཡང་མ་ཡིན་གྱི་ངའི་ཆོས་ལ་རང་གི་སྲོག་གསོ་བར་
ཚོར་བར་ཟད་དོ། །ཤཱ་རིའི་བུ་ངས་བཤད་པ་ལ་མུར་འདུག་སངས་རྒྱས་ཀྱི་ཆོས་སུ་འཇུག་འདོད་ན། ཟླ་བ་བཞིའི་བར་དུ་སད་པའི་རིགས་སོ། །ཅིའི་ཕྱིར་ཞེ་ན། མུར་འདུག་གི་མི་རྣམས་ལ་ནི་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། 
སེམས་ཅན་དུ་ལྟ་བ་དང་། ཚེ་སྲོག་ཏུ་ལྟ་བ་དང་། རྟག་པར་མཐོང་བ་མང་དུ་ཡོད་དོ། །ཤཱ་རིའི་བུ་ངའི་སློབ་མ་ལ་ནི་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་དུ་ལྟ་བ་དང་། ཚེ་སྲོག་ཏུ་ལྟ་བ་དང་། ཆད་པར་མཐོང་བ་དང་། རྟག་པར་མཐོང་བ་
མེད་དེ། ངའི་སློབ་མ་རྣམས་ཀྱིས་སྟོང་པ་དང་། མཚན་མ་མེད་པ་དང་། སྨོན་པ་མེད་པ་དང་། ཅི་ཡང་ཐོབ་པ་མེད་པ་འབའ་ཤིག་བཤད་དེ། སེམས་ལ་འཇུག་པའི་གནས་མེད་པར་འཆད་དོ། །ཤཱ་རིའི་བུ་ལ་ལ་ཞིག་དེ་ལྟ་བུའི་བཟོད་པ་འབྱོར་གྲུབ་པ་ཞིག་
ཡོད་ན་ངས་མི་དེ་ལྟ་བུ་ཁྱིམ་ནས་བྱུང་ཞིང་ཚུལ་ཁྲིམས་ནོད་དུ་གནང་སྟེ། ཡོན་གོས་དང་། མལ་ཆ་དང་། རྩི་སྨན་ཕུལ་བ་བླང་དུ་རུང་ངོ་། །མི་དེ་ལྟ་བུ་བཟོད་པ་མེད་པ་ནི་སྔོན་དུ་སད་པའི་རིགས་ཏེ། སྔར་ཆོས་སོ་ཅོག་ལ་ང་མེད་པ་ལ་གནས་སུ་བཅུག་གོ། །ཤཱ་
རིའི་བུ་ལ་ལ་ཞིག་དེ་ལྟ་བུའི་བཟོད་པ་ལ་སེམས་མི་དགའ་ཞིང་མཆོག་གཞུང་སྟོང་པ་བཤད་པ་ཐོས་ན་དངངས་ཤིང་དོགས་ལ་ཟུར་ཐེལ་གྱིས་གཤེའོ། །བདག་ཏུ་ལྟ་བ་འཆད་པ་ཐོས་ན་སེམས་དགའ་བར་འཛིན་ན་དེ་ལྟ་བུའི་མི་ནི་བདུད་ཀྱིས་བཀོལ་བར་མངོན་ཏེ། 

49-1-184a

མུར་འདུག་ལས་ཀྱང་འདས་སོ། །ཤཱ་རིའི་བུ་ཤེས་རབ་ཅན་ནི་དེ་ལྟ་བུ་ལ་ཞེ་སྡང་སྐྱེ་བར་མི་རིགས་ཀྱི་དེ་ལྟ་བུ་ལ་སྙིང་རྗེའི་སེམས་སྐྱེ་བར་རིགས་སོ། །ཅིའི་ཕྱིར་ཞེ་ན། ཤཱ་རིའི་བུ་མི་ལ་ལ་ཞིག་གིས་དེ་ལྟ་བུའི་ངན་པ་འབྱོར་གྲུབ་པ་ནི་ངན་
པའི་ལམ་ཐོབ་བོ། །ཆོས་བཤད་ཀྱིས་མི་ཟད་དེ་མི་དེ་ལ་བསོད་ནམས་ཀྱི་སེམས་བསྐྱེད་ཅིང་ཆོས་སོ་ཅོག་ལ་ཡང་ང་མེད་པ་དང་། ཆོས་སོ་ཅོག་སྟོང་པ་ཞི་བ་དང་། ཆོས་སོ་ཅོག་ལ་བྱ་བ་མེད་པ་དང་། ཐོབ་པ་མེད་པས་བསྟན་ཏོ། །མི་དེས་སངས་རྒྱས་ཀྱི་ཆོས་
མནོས་ལ་དོན་ཐོས་ཏེ། སེམས་དགའ་ཞིང་དད་ན་ནི་གཞན་སྟོང་པ་སྤྱད་པ་དགེ་སློང་གིས་ཅི་ཡང་ཐོབ་པ་མེད་པ་ཀུན་བསྟན་བསླབས་ཏེ་ཕན་ཞིང་དགའ་བར་སེམས་དགའ་བའི་རིགས་སོ། །ཆོས་སོ་ཅོག་ལ་ཅི་ཡང་མེད་པ་སྟོང་པ་བཤད་པ་ཐོས་ན་དངངས་སྐྲག་སྟེ། 
ཕལ་མང་པོའི་ནང་ན་མཁན་པོ་བླ་མ་ཨཱ་ཙརྱ་ལ་ཆོས་ཀྱི་ཡི་གེའི་ནང་ན་སྟོང་པའི་ལས་སྤྱོད་བཞིན་དུ་བཤད་པའི་རིགས་ཤེས་ཟེར་རོ། །ཆོས་རྣམས་ཀྱི་མཚན་མ་ཐ་དད་པ་མངོན་པར་ཤེས་ནུས་ན་ངས་མཁན་པོ་བྱའོ། །བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། 
ཕྱིན་ཅི་ལོག་ཡོན་པོར་ལྟ་བ་དང་། ཚུལ་ཁྲིམས་འཛིན་པ་ལ་འདོད་ཆགས་པའི་མཁན་པོ་ཞེས་ནི་མི་བྱའོ། །ཡང་དག་པས་དྲང་པོར་མཐོང་ལྡན་པ་དང་། ལྷན་ཅིག་ཏུ་གསོ་སྦྱོང་བྱེད་པར་གནང་ངོ་། །ཚུལ་ཁྲིམས་ཞིག་པའི་མི་ཆོ་ག་ཞིག་པ་དང་ལྷན་ཅིག་ཏུ་གསོ་སྦྱོང་བྱེད་དུ་
གནང་ངོ་། །སློབ་མ་རྒན་ཞིང་བཙུན་པས་སྟོང་པ་ཞི་བ་ཅི་ཡང་ཐོབ་པ་མེད་པ་ཆོས་བཤད་པ་ཐོས་ཏེ། སེམས་ཡིད་མི་ཆེས་མ་དད་ལ་སེམས་མུར་འདུག་ལ་འདུག་ན་སངས་རྒྱས་ཀྱིས་མུར་འདུག་དང་གསོ་སྦྱོང་བྱེད་དུ་མི་གནང་ངོ་། །མི་དེ་དེ་ལྟ་བུའི་མཐོང་བ་མ་བཏང་ན་དགེ་
འདུན་གྱི་ནང་དུ་འདུག་ཏུ་མི་གནང་བའི་རིགས་སོ། །དེ་ལྟ་བུ་འདོད་པ་མ་བླངས་ཏེ། དེ་ལྟར་བྱས་ཟིན་ཏེ་འོན་ཀྱང་ཡང་མ་བཏང་ན་མི་དེ་ལམ་ལ་གནས་པར་མི་རུང་བར་མངོན་ཏེ་ཐལ་བྱུང་དུ་ཡོང་བོར་ནས་མཁན་པོ་བླ་མ་ཨཱ་ཙརྱས་ཀྱང་ཚིག་འཐུན་པར་སླར་བཅང་བའི་
མི་རིགས་སོ། །ཤཱ་རིའི་བུ་དགེ་འདུན་ལ་དེ་བཞིན་ངས་ཡོན་གསོལ་པ་དང་མུར་འདུག་གི་ཡོན་པོའི་ལམ་ལ་ལྟ་བ་འཇིག་པ་ལ་མཁས་ཏེ། དེའི་མིང་ཚུལ་ཁྲིམས་བཤད་པ་དང་གསོ་སྦྱོང་གཙང་ཞེས་བྱའོ། །ཤཱ་རིའི་བུ་ངས་ད་ཁྱོད་ལ་བྱེ་བྲག་ཕྱེད་པར་

49-1-184b

བསྒོའོ། །མི་ལ་ལ་ཞིག་དེ་ལྟ་བུའི་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སམས་ཅན་དུ་ལྟ་བ་དང་། ཡོད་མེད་དུ་ལྟ་བ་དང་། དེ་ལྟ་བུའི་མིའི་མིང་ང་ལ་ཡོན་ཕུལ་བ་ཞེས་ཀྱང་མི་བྱ། མིང་ངའི་ཕྱི་བཞིན་ཁྱིམ་ནས་བྱུང་སྟེ་ཚུལ་ཁྲིམས་མནོས་པ་ཞེས་
ཀྱང་མི་བྱའོ། །དེའི་མིང་མཁན་པོ་དྲུག་གི་ཕྱིར་འབྲངས་ལ་ཁྱིམ་ནས་བྱུང་བ་སྟེ། མཁན་པོ་དྲུག་གིས་མཁན་པོ་བྱས་པ་ཞེས་བྱའོ། །ཤཱ་རིའི་བུ་མི་ལ་ལ་ཞིག་གིས་དེ་ལྟ་བུའི་གཙང་གདང་བའི་བདེན་པའི་ཆོས་ལ་བཟོད་པ་ཐོབ་པར་མ་ནུས་ཏེ། ཡོན་བླངས་
ན་མི་དེས་ཐོབ་བོ་ཅོག་ཡོན་པོའི་མནོས་ཤེས་བྱའོ། །ཤཱ་རིའི་བུ་མིས་ངའི་ཆོས་ཀྱི་ནང་ནས་ཁྱིམ་ནས་བྱུང་སྟེ། ཚུལ་ཁྲིམས་གཙང་བ་གཟུང་བ་བསྲུངས་མོད་ཀྱི། མཆོག་གི་གཞུང་སྟོང་པ་ཅི་ཡང་ཐོབ་པ་མེད་པའི་ཆོས་ལ་ཡིད་ཆེས་མི་ཤེས་ཏེ། དངངས་སྐྲག་
ཅིང་དོགས་འགྱོད་པ་དེ་ལྟ་བུའི་མི་ནི་ཚུལ་ཁྲིམས་འཛིན་པ་དང་། མང་དུ་ཐོས་པ་དང་། བསམ་གཏན་ཐུབ་པ་ཆེད་ཆེར་འཛིན་པར་མངོན་ནོ། །ཤཱ་རིའི་བུ་དེ་ལྟ་བུའི་མིའི་མིང་ང་ལ་བཙུན་ལྕི་བར་རི་མོ་གུས་ཤིང་ཡོན་དབུལ་བ་ཞེས་མི་བྱའོ། །ཅིའི་ཕྱིར་ཞེ་ན། 
ཤཱ་རིའི་བུ་ཐོག་མ་ཞེས་བྱ་བ་མེད་པའི་ཚེ་རབས་ཚུན་ཆད་སེམས་ཅན་བསམ་གཏན་བཞི་ནི་མ་ཐོབ་ཀྱི། བསམ་གཏན་བཞི་ཐོབ་པ་འབའ་ཤིག་གིས་དགེ་སློང་གི་བཟོད་པ་བྱ་བ་ནི་མེད་ན། དེ་ལྟ་བུ་ཇི་ལྟ་བུར་ན་མིང་ང་ལ་ཡོན་འབུལ་བ་ཞེས་བྱ། 
དེ་ལྟ་བས་ན་ཤཱ་རིའི་བུ་ངས་ཁྱོད་ལ་བྱེ་བྲག་ཕྱེད་པར་བསྒོའོ། །མ་འོངས་པའི་དུས་ཀྱི་མིས་ངའི་ཆོས་ལ་འདོད་ཆགས་རྣམ་པ་མང་པོ་དང་ཡོན་པོ་མཐོང་བ་རྣམ་པ་མང་པོས་ངའི་ཆོས་བཤིག་དྲལ་ལོ། །ཤཱ་རིའི་བུ་མི་ལ་ལ་ཚུལ་ཁྲིམས་འཛིན་པ་དང་། 
མང་པོ་ཐོས་པ་དང་། བསམ་གཏན་ཐུབ་པ་འབའ་ཤིག་ཆེད་ཆེར་འཛིན་པ་དེ་ལྟ་བུའི་མི་ནི་དགེ་སྦྱོང་གི་ཆོས་རྣམས་གཙང་མར་སྤྱོད་མི་ནུས་པར་མངོན་ཏེ། ངས་མི་དེའི་མིང་དགེ་སྦྱོང་དང་། བྲམ་ཟེ་དང་། བྲམ་ཟེ་ཞེས་མ་བཤད་དོ། །ཤཱ་རིའི་བུ་མི་ལ་ཆོས་སོ་
ཅོག་ལ་ང་མེད་པ་བདེན་པ་བཞིན་དུ་ང་མེད་པར་ཤེས། ཆོས་སོ་ཅོག་ཕྱི་མོ་ནས་ཅི་ཡང་མེད་པའི་སྟོང་པ་སྟེ། བདེན་པ་བཞིན་དུ་ཅི་ཡང་མེད་པའི་སྟོང་པར་ཤེས་ནུས་ན། དེ་ནི་ཚུལ་ཁྲིམས་འཛིན་པ་རབ་ཡིན་པར་མི་འཛིན། མང་པོ་ཐོས་པ་རབ་ཅེས་བྱ་བར་མི་

49-1-185a

འཛིན། བསམ་གཏན་ཐོབ་པ་རབ་ཅེས་མི་འཛིན་ཏོ། །ཅིའི་ཕྱིར་ཞེ་ན། ཤཱ་རིའི་བུ་ཆོས་སོ་ཅོག་ལ་བདེན་པའི་མཚན་མ་ལ་སྐྱེ་བའང་མེད་དེ། ལྡན་པའང་མེད་དེ། དེའི་ནང་ན་རབ་ཅེས་བྱ་བའི་ཆོས་མེད་དོ། །ཤཱ་རིའི་བུ་ཆོས་སོ་ཅོག་གི་
བདེན་པ་བཞིན་གྱི་ནང་ན་ཚུལ་ཁྲིམས་འཛིན་པ་མེད། ཚུལ་ཁྲིམས་བཤིག་པ་མེད་ན་འདོད་ཆགས་ལ་རབ་ཅེས་བྱ་བ་མེད་པ་ལྟ་སྨོས་ཀྱང་ཅི་དགོས། ཤཱ་རིའི་བུ་དེའི་མིང་སངས་རྒྱས་རྣམས་ཀྱི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཅེས་བྱ་སྟེ། ཆོས་
སོ་ཅོག་གི་མཚན་མ་དང་རང་གི་མཚན་མ་མེད། སྟོང་པ་བདག་ཏུ་ལྟ་བ་དང་། གང་ཟག་ཏུ་ལྟ་བ་མེད་དོ། །དེ་ལྟ་བུའི་བཟོད་པ་ཡོད་དུ་ཟིན་ན་དེའི་མིང་སྤྱོད་པ་ཞེས་བྱའོ། །དེའི་མིང་ཐོབ་པ་ཞེས་བྱ་སྟེ། མི་དེའི་མིང་ཡིད་ཆེས་པ་སྤྱད་པ་ཁྱིམ་ནས་བྱུང་བ་སྟེ། 
ཡོན་ལེན་པའི་རིགས་ཤིང་གཙང་བའི་གསོ་སྦྱོང་བྱེད་པ་སྟེ། མི་དེ་ནི་མིའི་ནང་ན་ལྷ་ཞེས་བྱའོ། །ཤཱ་རིའི་བུ་སངས་རྒྱས་རྣམས་ཀྱི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ནི་གཞུང་གཅིག་པ་འབའ་ཤིག་ཡིན་ཏེ་དེ་ནི་བྲལ་བ་ཞེས་བྱའོ། །གང་ལ་
སོགས་པ་བྲལ་བ་ཞེས་བྱས་ན། འདོད་དོ་ཅོག་དང་མཐོང་ངོ་ཅོག་སྟེ། འདོད་པ་ནི་མ་རིག་པ་ཡིན་ནོ་མཐོང་བ་ནི་དྲན་པ་དང་སེམས་པ་ཡིན་ནོ། །ཅིའི་ཕྱིར་ཞེ་ན། ཆོས་སོ་ཅོག་ཐམས་ཅད་ནི་དྲན་པ་དང་སེམས་པས་ཕྱི་མོ་བྱས་སྟེ། སེམས་ཀྱི་འདུ་ཤེས་ཡོད་དོ་ཅོག་
ནི་མཐོང་བ་ཡིན་ཞེས་བྱ་སྟེ། མཐོང་བ་ནི་ཡོན་པོ་ཡིན་ནོ། །ཤཱ་རིའི་བུ་དགེ་བའི་ཆོས་ཀྱི་ནང་ན་མཐོང་བ་ཡང་ཡོན་པོ་མཐོང་བ་ཞེས་བྱའོ། །ཅིའི་ཕྱིར་ཞེ་ན། ཤཱ་རིའི་བུ་འདོད་པ་དང་བྲལ་བའི་སྟོང་པ་ཞི་བ་ཆོས་ཀྱི་ནང་ན་ཆོས་མེད། ཆོས་མེད་ཡང་མེད། དགེ་
བ་ཡང་མེད་དེ། ངན་པ་ཡང་མེད་དེ། དོན་ཏོ་ཅོག་ཀུན་སྟོང་ལ། ཆོས་ཀྱི་ཡི་གེ་རྣམས་དང་བྲལ་ཞིང་སེམས་ཅན་ཐམས་ཅད་དང་བྲལ་བས་ན། མིང་བྲལ་བ་ཞེས་བྱའོ། །ཤཱ་རིའི་བུ་བླ་ན་མེད་པའི་ནང་ན་འདོད་པ་རྣམས་ཡོང་ཞིའོ། །གང་ལ་སོགས་པ་འདོད་པ་
རྣམས་ཤེས་བྱས་ན། ང་ནི་ཡོན་པོ་མི་དགེ་བའི་སེམས་དང་། ང་དང་ངའི་གནས་དང་། བྱེད་པའི་མཚན་མ་དང་། དོན་གྱི་མཚན་མ་སྟེ། དེའི་མིང་བླ་ན་མེད་པ་གཡུང་དྲུང་རྫོགས་པའི་ནང་ན་འདོད་པའོ་ཅོག་ཡོང་ཞི་ཞེས་བྱའོ། །ལེའུ་བརྒྱད་དེ་

49-1-185b

གཙང་མ་མཐོང་བའི་ལེའུ་འོ།། །། སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། ངས་བསམས་པ་འདས་པའི་དུས་ན་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཚོལ་བ་ན། སངས་རྒྱས་འབུམ་ཕྲག་སུམ་ཅུ་དང་ཕྲད་དེ། ཀུན་མཚན་ཤཱཀྱ་
ཐུབ་པ་ཞེས་བྱའོ། །ང་ནི་དེའི་ཚེ་ཀུན་འཁོར་ལོ་འཕྲུལ་གྱི་རྒྱལ་པོ་བྱེད་དེ། ལུས་ཀྱི་ཚེ་ཟད་ཀྱི་བར་དུ་སློབ་མ་ཀུན་ལ་ཡོན་གོས་དང་། ཁ་ཟས་དང་། མལ་ཆ་དང་། རྩི་སྨན་ཕུལ་ཏེ། བླ་ན་མེད་པའི་གཡུང་དྲུང་རྫོགས་པའི་བྱང་ཆུབ་ཚོལ་བའི་ཕྱིར་ན་སངས་རྒྱས་
དེ་རྣམས་ཀྱིས་ང་ལ་ཁྱོད་མ་འོངས་པའི་དུས་ན་སངས་རྒྱས་བྱེད་པ་ཐོབ་བོ་ཞེས་ལུང་མ་བསྟན་ཏོ། །ཅིའི་ཕྱིར་ཞེ་ན། ངས་ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་སངས་རྒྱས་བརྒྱད་སྟོང་དང་ཕྲད་དེ། ཀུན་མཚན་
འདོད་མི་འགྱུར་ཞེས་བྱའོ། །ངས་དེའི་ཚེ་ཀུན་འཁོར་ལོ་འཕྲུལ་གྱི་རྒྱལ་པོ་བྱས་ཏེ། ལུས་ཀྱི་ཚེ་ཟད་ཀྱི་བར་དུ་སློབ་མ་དང་ཀུན་ལ་ཡོན་གོས་དང་། ཟས་དང་། མལ་ཆ་དང་། རྩི་སྨན་ཕུལ་ཏེ། བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཚོལ་བའི་ཕྱིར་
ན་སངས་རྒྱས་རྣམས་ཀྱིས་ང་ལ་ཁྱོད་ཀྱིས་མ་འོངས་པའི་དུས་ན་སངས་རྒྱས་བྱེད་པ་ཐོབ་བོ་ཞེས་ལུང་མ་བསྟན་ཏོ། །ཅིའི་ཕྱིར་ཞེ་ན། ངས་ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་སངས་རྒྱས་དྲུག་ཁྲི་དང་ཕྲད་དེ། ཀུན་
མཚན་འོད་སྣང་བ་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོའི་རྒྱལ་པོ་ཞེས་བྱ་སྟེ། ལུས་ཀྱི་ཚེ་ཟད་ཀྱི་བར་དུ་སློབ་མ་དང་ཀུན་ལ་ཡོན་གོས་དང་། ཁ་ཟས་དང་། མལ་ཆ་དང་། རྩི་སྨན་ཕུལ་ཏེ། བླ་ན་མེད་པའི་གཡུང་དྲུང་རྫོགས་པའི་བྱང་ཆུབ་ཚོལ་བའི་ཕྱིར་ན་
སངས་རྒྱས་དེ་རྣམས་ཀྱིས་ཀྱང་ང་ལ་ཁྱོད་ཀྱིས་མ་འོངས་པའི་དུས་ན། སངས་རྒྱས་ཐོབ་བོ་ཞེས་ལུང་མ་བསྟན་ཏོ། །ཅིའི་ཕྱིར་ཞེ་ན། ངས་ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་སངས་རྒྱས་སུམ་འབུམ་དང་ཕྲད་དེ། 
ཀུན་མཚན་པུ་ར་ཤ་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ཏེ། རྣམ་བཞིས་ཡོན་གསོལ་ན་ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་སངས་རྒྱས་བརྒྱད་

49-1-186a

ཁྲི་བརྒྱད་སྟོང་དང་ཕྲད་དེ། ཀུན་མཚན་རིའི་རྒྱལ་པོ་ཞེས་བྱའོ། །བསྐལ་པའི་མིང་ནི་བླ་བརྒྱད་ཅེས་བྱ་སྟེ། སངས་རྒྱས་ཁྲི་བརྒྱད་སྟོང་དེ་ཀུན་གྱི་ཐད་དུ་སྐྲ་བྲེགས་ཆོས་གོས་གྱོན་ནས་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་སྤྱད་པ་སྦྱངས་ན་ཀུན་
གྱིས་ང་ལ་ལུང་མ་བསྟན་ཏོ། །ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་སངས་རྒྱས་ལྔ་བརྒྱ་དང་ཕྲད་དེ། ཀུན་མཚན་མེ་ཏོག་བླ་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ཏེ། ཀུན་ལ་ཡོད་དོ་ཅོག་
ཕུལ་ན། སངས་རྒྱས་དེ་རྣམས་དང་སློབ་མ་རྣམས་ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་སངས་རྒྱས་ལྔ་བརྒྱ་དང་ཕྲད་དེ། ཀུན་མཚན་ལེགས་པའི་བརྗིད་ཅེས་བྱའོ། །ངས་ཟད་པར་ལ་
ཡོན་ཕུལ་ནས་ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་སངས་རྒྱས་ཉིས་སྟོང་དང་ཕྲད་དེ། ཀུན་མཚན་ཅི་ན་ཞུ་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ཏེ། ཀུན་ལ་
ཡོན་ནོ་ཅོག་ཕུལ་ན་སངས་རྒྱས་དེ་ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་སངས་རྒྱས་དགུ་སྟོང་དང་ཕྲད་དེ། ཀུན་མཚན་བསོད་སྐྱབས་ཤེས་བྱའོ། །ངས་རྣམ་བཞི་སྤྱད་དེ་ཡོན་དུ་གསོལ་ན་སངས་རྒྱས་
རྣམས་དང་། སློབ་མ་རྣམས་ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་སྔ་མ་འདས་པ་བསྐལ་པ་ཁྲིའི་ཚེ་སངས་རྒྱས་བྱུང་བ་མེད་དེ། དེའི་ཐོག་མ་བསྐལ་པ་ལྔ་བརྒྱའི་ནང་ན་རང་སངས་རྒྱས་དགུ་ཁྲི་
ཡོད་དེ། ངས་ལུས་ཀྱི་ཚེ་ཟད་ཀྱི་བར་དུ་ཐམས་ཅད་ལ་ཡོན་གོས་དང་། མལ་ཆ་དང་། རྩི་སྨན་དང་ཕུལ་ཏེ། བཙུན་ཞིང་ལྕི་བར་བསྟོད་དོ། །དེའི་འོག་གི་བསྐལ་པ་ལྔ་བརྒྱ་ཡང་རྣམ་པ་བཞི་སྤྱད་དེ། རང་སངས་རྒྱས་བརྒྱད་ཁྲི་བཞི་སྟོང་ལ་ཡོན་ཕུལ་ཏེ། བཙུན་
ཞིང་ལྕི་བར་བསྟོད་དོ། །ཤཱ་རིའི་བུ་བསྐལ་པ་དེ་སྟོང་འདས་ནས་རང་སངས་རྒྱས་ཀྱང་མེད་དེ། ང་དེའི་ཚེ་འཛམ་བུའི་གླིང་དུ་ཤི་ནས་ཚངས་པའི་ཁམས་སུ་སྐྱེས་ཏེ། ཚངས་པའི་རྒྱལ་པོ་ཆེན་པོ་བྱས་སོ། །དེ་ལྟ་བུའི་གཅིག་ནས་གཅིག་ཏུ་བསྐལ་པ་ལྔ་བརྒྱའི་བར་དུ་རྟག་པར་

49-1-186b

ཚངས་པའི་ཁམས་སུ་སྐྱེས་ནས་ཚངས་པའི་རྒྱལ་པོ་བྱས་ཏེ། འཛམ་བུའི་གླིང་དུ་མ་སྐྱེས་སོ། །བསྐལ་པ་ལྔ་བརྒྱ་དེ་འདས་ནས་མར་བབས་ཏེ་འཛམ་བུའི་གླིང་དུ་སྐྱེས་ནས་འཛམ་བུའི་གླིང་དུ་བསྟན་བཅོས་བསྟན་ཏེ། ཚེ་ཟད་ནས་གནམ་ངོས་བཞིའི་ལྷའི་རྒྱལ་
པོར་སྐྱེས་སོ། །དེར་ཚེ་ཟད་ནས་སུམ་ཅུ་རྩ་གསུམ་གྱི་ལྷའི་ཁམས་སུ་སྐྱེས་ཏེ་དབང་པོ་བྱས་སོ། །དེ་ལྟ་བུ་གཅིག་ནས་གཅིག་ཏུ་བསྐལ་པ་ལྔ་བརྒྱ་ཚང་ནས་འཛམ་བུའི་གླིང་དུ་སྐྱེས་སོ། །དེར་བསྐལ་པ་བརྒྱད་ཚང་ནས་ཚངས་པའི་ཁམས་སུ་སྐྱེས་ནས་ཚངས་པའི་
རྒྱལ་པོ་ཆེན་པོ་བྱས་སོ། །ཤཱ་རིའི་བུ་ངས་བསྐལ་པ་དགུ་སྟོང་གི་བར་དུ་རེ་ཤིག་འཛམ་བུའི་གླིང་དུ་མ་སྐྱེས་ཏེ། བསྐལ་པ་དགུ་སྟོང་གི་བར་དུ་ལྷའི་ཁ་ཤ་སྟག་ཏུ་སྐྱེས་སོ། །བསྐལ་པ་ཟད་དེ་བསྲེགས་པའི་འོད་དབྱངས་ལྷའི་ཁམས་སུ་སྐྱེས་སོ། །འཇིག་རྟེན་གྱི་
ཁམས་སླར་དེད་ཟིན་ནས། སླར་ཚངས་པའི་ཁམས་སུ་སྐྱེས་ཏེ། བསྐལ་པ་དགུ་སྟོང་གི་བར་དུ་མིའི་ནང་ན་ངན་དུ་མ་སྐྱེས་ཏེ། ཤཱ་རིའི་བུ་བསྐལ་པ་དེ་དགུ་སྟོང་གི་བར་དུ་སངས་རྒྱས་དང་རང་སངས་རྒྱས་མེད་དེ། སེམས་ཅན་རྣམས་ལ་ལམ་ངན་པར་ལྟུང་ཞིང་འཁོད་པ་མང་
ངོ་། །ཤཱ་རིའི་བུ་བསྐལ་པ་ཁྲི་དེ་འདས་ཟིན་ནས་སངས་རྒྱས་ཞིག་འཇིག་རྟེན་དུ་བྱུང་བ་མཚན་ཁྱབ་སྲུང་ཡང་དག་པར་གཤེགས་པ་གསོལ་བཞེངས་རིགས་དྲང་ཁྱབ་མཁྱེན་སྣང་མཛད་ཞབས་བདེ་གཤེགས་འཇིག་རྟེན་བཀྲོལ་བླ་ན་མེད་པའི་དྲ་མ་གདུལ་ཐུལ་
སྐྱེས་བུ་ལྷ་དང་མིའི་མཁན་པོ་སངས་རྒྱས་བཅོམ་ལྡན་འདས་ཤེས་བྱ་སྟེ། ང་དེའི་ཚེ་ཚངས་པའི་ཁམས་སུ་ཚེ་ཟད་ནས་འཛམ་བུའི་གླིང་དུ་སྐྱེས་ཏེ། འཁོར་ལོ་འཕྲུལ་གྱི་རྒྱལ་པོ་བྱས་ནས་མཁན་པོ་ནི་སྤྱི་ལྷ་ཞེས་བྱ། མིའི་ཚེ་ལོ་དགུ་ཁྲི་ཐུབ་སྟེ། ངས་ལུས་ཀྱི་ཚེ་ཟད་
ཀྱི་བར་དུ་སྐྱིད་པའི་ཡོ་བྱད་དོ་ཅོག་གིས་སངས་རྒྱས་དེ་དང་། དགེ་སློང་འབུམ་ཕྲག་དགུ་བཅུ་ལ་ཡོན་དུ་གསོལ་ཏེ། ལོ་དགུ་ཁྲིའི་བར་དུ་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་བཙལ་ན། སངས་རྒྱས་ཁྱབ་སྲུང་དེས་ཀྱང་ང་ལ་ཁྱེད་མ་འོངས་པའི་དུས་ན་སངས་རྒྱས་
བྱེད་པ་ཐོབ་བོ་ཞེས་ལུང་མ་བསྟན་ཏོ། །ཅིའི་ཕྱིར་ཞེ་ན། ངས་དེའི་ཚེ་ཆོས་སོ་ཅོག་གི་བདེན་པའི་མཚན་མ་ཁོང་དུ་ཆུད་མ་ནུས་ཏེ། བདག་ཏུ་ལྟ་བར་འཛིན་པ་ལ་འདོད་ཆགས་ཏེ། ཐོབ་པ་ཡོད་པ་མཐོང་ངོ་། །ཤཱ་རིའི་བུ་བསྐལ་པ་དེའི་ཚེ་སངས་རྒྱས་བརྒྱ་བྱུང་སྟེ། 

49-1-187a

མིང་མཚན་སོ་སོ་ཐ་དད་དོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ནས། ལུས་ཀྱི་ཚེ་ཟད་ཀྱི་བར་དུ་སློབ་མ་རྣམས་དང་ཀུན་ལ་ཡོན་གསོལ་ཏེ། བླ་ན་མེད་པའི་གཡུང་དྲུང་རྫོགས་པའི་བྱང་ཆུབ་བཙལ་ནས། སངས་རྒྱས་
དེ་རྣམས་ཀྱིས་ཀྱང་ང་ལ་ཁྱོད་མ་འོངས་པའི་དུས་ན། སངས་རྒྱས་བྱེད་པ་ཐོབ་བོ་ཞེས་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་བསྐལ་པ་གྲངས་མེད་པ་བདུན་བརྒྱའི་ཚེ་སངས་རྒྱས་སྟོང་དང་ཕྲད་དེ། ཀུན་མཚན་
འཛམ་བུ་ད་ན་ཞེས་བྱ་སྟེ། ངས་ལུས་ཀྱི་ཚེ་ཟད་ཀྱི་བར་དུ་རྣམ་པ་བཞིས་ཡོན་གསོལ་ན། ཡང་ལུང་བསྟན་པ་མེད་དེ། ཡང་ངས་ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་བསྐལ་པ་བདུན་བརྒྱའི་ཚེ་ན་ཡང་སངས་རྒྱས་ཁྲི་
ཕྲག་དྲུག་བརྒྱ་ཉི་ཤུ་དང་ཕྲད་དེ། ཀུན་གྱི་མཚན་ཆོ་ག་ཐམས་ཅད་མཐོང་བ་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ནས་སྐྱིད་པའི་ཡོ་བྱད་དོ་ཅོག་གི་ལུས་ཀྱི་ཚེ་ཟད་ཀྱི་བར་དུ་སློབ་མ་དང་ཀུན་ལ་ཡོན་གསོལ་ན་ཡང་ང་ལ་ལུང་མ་བསྟན་ཏེ་
ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་ཡང་བསྐལ་པ་བདུན་བརྒྱའི་ཚེ། སངས་རྒྱ་བརྒྱད་བཅུ་རྩ་བཞི་དང་ཕྲད་དེ། ཀུན་མཁན་པོ་རྒྱལ་པོ་མཚན་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ནས་སྐྱིད་པའི་
ཡོ་བྱད་དོ་ཅོག་སྤྱད་དེ་ལུས་ཀྱི་ཚེ་ཟད་ཀྱི་བར་དུ་སློབ་མ་དང་ཀུན་ལ་ཡོན་གསོལ་ཀྱང་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ་ངས་བསམས་པ་འདས་པའི་དུས་ན་ཡང་བསྐལ་པ་གྲངས་མེད་པ་བདུན་བརྒྱའི་ཚེ་ན་སངས་རྒྱས་བཅྭ་ལྔ་
དང་ཕྲད་དེ། ཀུན་གྱི་མཚན་གཉི་སྣང་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ནས་སྐྱིད་པའི་ཡོ་བྱད་དོ་ཅོག་སྤྱད་དེ། ལུས་ཀྱི་ཚེ་ཟད་ཀྱི་བར་དུ་སློབ་མ་དང་ཀུན་ལ་ཡོན་གསོལ་ན་ཡང་ང་ལ་ལུང་མ་བསྟན་ཏོ། །ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་
བུ་ངས་བསམས་པ་འདས་པའི་དུས་ན་ཡང་བསྐལ་པ་གྲངས་མེད་པ་བདུན་བརྒྱའི་ཚེ། སངས་རྒྱས་དྲུག་བཅུ་རྩ་གཉིས་དང་ཕྲད་དེ། ཀུན་མཚན་དགེ་ཞེས་བྱའོ། །ངས་དེའི་ཚེ་འཁོར་ལོ་འཕྲུལ་གྱི་རྒྱལ་པོ་བྱས་ནས་སྐྱིད་པའི་ཡོ་བྱད་དོ་ཅོག་སྤྱད་དེ། ཚེ་ཟད་ཀྱི་བར་དུ་ཡོན་གསོལ་ན་

49-1-187b

ཡང་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །དེ་ལྟ་བུར་གཅིག་ནས་གཅིག་ཏུ་སངས་རྒྱས་འོད་མི་འགྱུར་དང་ཕྲད་པ་ལ་ཐུག་ན། གདོད་སྐྱེ་བ་མེད་པའི་བཟོད་པ་ཐོབ་ནས་ང་ལ་ལུང་བསྟན་པ། ཁྱོད་མ་འོངས་པའི་དུས་བསྐལ་པ་གྲངས་མེད་པ་འདས་པ་
ན། སངས་རྒྱས་བྱེད་པ་ཐོབ་པ་སྟེ། མཚན་ཤཱཀྱ་ཐུབ་པ་ཡང་དག་པར་གཤེགས་པ་གསོལ་བཞེངས་རིགས་དྲང་ཁྱབ་མཁྱེན་སྣང་མཛད་ཞབས་བདེ་གཤེགས་འཇིག་རྟེན་བཀྲོལ་བླ་ན་མེད་པའི་དྲ་མ་གདུལ་ཐུལ་སྐྱེས་བུ་ལྷ་དང་མིའི་མཁན་སངས་རྒྱས་བཅོམ་ལྡན་འདས་
ཤེས་བསྒོའོ། །ཤཱ་རིའི་བུ་ངས་བསམས་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་པོ་འབུམ་ཕྲག་བཅུ་གཉིས་ཡོད་དེ་ཀུན་གྱི་མིང་སྤྱི་བོ་སྐྱེས་ཤེས་བྱའོ། །ཡང་ཤཱ་རིའི་བུ་ངས་བསམས་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་པོ་འབུམ་ཕྲག་སུམ་ཅུ་
ཡོད་དེ་ཀུན་གྱི་མིང་མ་ཐ་མ་ཞེས་བྱའོ། །ཤཱ་རིའི་བུ་ངས་བསམས་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་པོ་འབུམ་ཕྲག་བཞི་བཅུ་ཡོད་དེ། ཀུན་གྱི་མིང་ཞིང་འབྱི་ཞེས་བྱའོ། །ཤཱ་རིའི་བུ་ངས་བསམས་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་པོ་
གཅིག་ཁྲི་ཞིག་ཡོད་པ་ཀུན་གྱི་མིང་མངོན་སྣང་ཞེས་བྱའོ། །ཤཱ་རིའི་བུ་ངས་བསམས་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་པོ་ཉི་ཁྲི་ཞིག་ཡོད་དེ་མིང་མཁན་སོ་སོ་ཐ་དད་དོ། །ཤཱ་རིའི་བུ་ངས་བསམས་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་
པོ་འབུམ་ཕྲག་བཅུ་དྲུག་ཡོད་པ་མིང་མཁན་ཀུན་སོ་སོ་ཐ་དད་དོ། །རྒྱལ་པོ་དག་ལ་སོགས་པ་ངས་གུད་ན་དགའ་བོ་དག་ལ་བཤད་དོ། །ཤཱ་རིའི་བུ་ཁྱོད་ཀྱི་ཡིད་ལ་ཇི་སྙམ། རྒྱལ་པོ་འདི་རྣམས་མི་གཞན་གྱི་མ་ཡིན་གྱི་ང་ཉིད་ཀྱི་ལུས་ཡིན་ནོ། །ཤཱ་རིའི་བུ་ངས་
བསམས་པ་སྔ་མ་འདས་པའི་ཚེ་དུས་ན་སངས་རྒྱས་ཞིག་ཡོད་པ་མཚན་དགེ་སྣང་ཞེས་བྱ་སྟེ། བྱང་ཆུབ་སེམས་དཔའ་བྱམས་པའི་ཚེ་འཁོར་ལོ་འཕྲུལ་གྱི་རྒྱལ་པོ་བྱས་ནས། མིང་མངོན་སྣང་ཞེས་བྱ་སྟེ། ཐོག་མ་བླ་ན་མེད་པ་བྱང་ཆུབ་ཀྱི་སེམས་བསྐྱེད་པ་དེའི་ཚེ་སེམས་ཅན་
ཚེ་ལོ་བརྒྱད་ཁྲི་བཞི་སྟོང་ཐུབ་སྟེ། སངས་རྒྱས་དགེ་སྣང་དེས་ལན་གསུམ་བསྡུས་ཏེ་ཆོས་བཤད་ན། ཐོག་མ་བསྡུས་པ་ལ་མི་འབུམ་ཕྲག་དགུ་བཅུ་རྩ་དྲུག་ཅིག་ཆར་ལམ་ཐོབ་བོ། །དེའི་འོག་ཏུ་ཕལ་པོ་ཆེ་བསྡུས་པ་ལ་མི་འབུམ་ཕྲག་དགུ་བཅུ་རྩ་བཞི་ཅིག་ཅར་ལམ་

49-1-188a

ཐོབ་བོ། །གསུམ་གྱི་ཐ་མར་ཕལ་ཆེ་བསྡུས་པ་ལ་མི་འབུམ་ཕྲག་དགུ་བཅུ་རྩ་གཉིས་ཅིག་ཅར་ལམ་ཐོབ་བོ། །དེའི་རྒྱལ་པོ་སངས་རྒྱས་ཀྱིས་ལན་གསུམ་བསྡུས་ཏེ་ཆོས་བཤད་ནས་དཔག་ཏུ་མེད་པའི་མི་བསྒྲལ་བ་མཐོང་ནས་སེམས་ལ་ཤིན་དུ་
དགའ་གཞའ་སྟེ། ལོ་ཁྲིའི་བར་དུ་ཡོ་བྱད་ཐམས་ཅད་ཀྱིས་སངས་རྒྱས་དང་སློབ་མ་ལ་ཡོན་གསོལ་ཏེ། སེམས་བསྐྱེད་ནས་བླ་ན་མེད་པ་གཡུང་དྲུང་རྫོགས་པའི་སངས་རྒྱས་བཙལ་ཏེ་མ་འོངས་པའི་དུས་ན་སེམས་ཅན་བསྒྲག་སླའོ། །ང་དམ་ཚིག་སངས་རྒྱས་གྲུབ་
པ་དང་། ཚེ་སྲོག་གི་དུས་ལྤག་པ་དང་། དགེ་སློང་གི་དགེ་འདུན་གྱི་གྲངས་དང་། འཁོར་བའི་བསྐོར་བ་ནི་དེ་ལྟ་བུ་ཡིན་ནོ། །ཤཱ་རིའི་བུ་ངས་དོན་དེ་ཤེས་པ་ནི་འདི་བས་འདས་ཏེ་དཔག་ཏུ་མེད་དོ། །ཤཱ་རིའི་བུ་སངས་རྒྱས་བྱམས་པས་སེམས་བསྐྱེད་དེ། 
བསྐལ་པ་བཞི་བཅུ་ལོན་ཟིན་ནས་ངས་གདོད་སེམས་བསྐྱེད་དེ། སངས་རྒྱས་ཐུབ་མེད་ཀྱི་ཐད་དུ་ཐོག་མ་དགེ་བའི་རྩ་བ་བསྐྱེད་ནས། ངས་ལོ་སྟོང་གི་བར་དུ་སྐྱིད་པའི་ཡོ་བྱད་ཐམས་ཅད་ཀྱིས་སངས་རྒྱས་དེ་ལ་ཡོན་གསོལ་ནས་རས་ཡུག་ལྔ་བརྒྱ་ཕུལ་ཏེ། སངས་རྒྱས་
དེ་འདས་པའི་ཕྱི་ན་རིན་པོ་ཆེ་སྣ་བདུན་གྱི་མཆོད་རྟེན་བརྩིགས་ནས་འཕང་ནི་དཔག་ཚད་གཅིག །ཆུ་ཞེང་ནི་དཔག་ཚད་ཕྱེད་དེ། ཀུན་གསེར་དངུལ་དང་། བཻ་དཱུརྱ་དང་། མ་རྒད་དང་། གཟི་དང་། སྤུག་དང་། མུ་ཏིག་དམར་པོས་བྱས་སོ། །སེམས་ལ་རྟག་ཏུ་སྨོན་ལམ་སྐྱེད་པ་
སེམས་ཅན་སྡུག་བསྔལ་ཏེ་བསྒྲལ་བའི་ར་མདའ་མེད་དེ། ཆོས་ངན་པ་དང་ཕྲད་ཅིང་ལམ་ངན་པར་ལྷུང་བ་མང་ན། ངས་དེའི་ཚེ་སངས་རྒྱས་གྲུབ་པར་ཤོག་ཤིག །ཤཱ་རིའི་བུ་ཁྱོད་ཀྱིས་རེ་ཤིག་ལྟོས་ཤིག །བླ་ན་མེད་པ་གཡུང་དྲུང་རྫོགས་པ་སྤྱད་སྦྱངས་པ་ཤིན་དུ་དཀའོ། །
ཤཱ་རིའི་བུ་བླ་ན་མེད་པའི་གཡུང་དྲུང་རྫོགས་པའི་བྱང་ཆུབ་སྤྱད་སྦྱངས་ན་ཚེ་རབས་གྲངས་མེད་པའི་བར་དུ་སྡུག་བསྔལ་རྣམས་ཀྱིས་ཉོན་མོངས་ཏེ། ངས་བཤད་དུ་ཟིན་ན་ཁྱོད་ཀྱིས་ཐོས་པ་དང་ཡི་མུག་ཅིང་སྒྱིད་ལུག་དུ་རུང་ངོ་། །ངས་སྡུག་བསྔལ་དང་མྱ་ངན་འཁྲུག་པས་ཉོན་
མོངས་སོ་ཅོག་ནི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཚོལ་བའི་ཕྱིར་རོ། །ཤཱ་རིའི་བུ་ཁྱོད་ལྟོས་ཤིག །བྱང་ཆུབ་སེམས་དཔའ་སར་སར་ཝ་དན་དང་། བྱང་ཆུབ་སེམས་དཔའ་ཆོས་ཚོལ་དང་། བྱང་ཆུབ་སེམས་དཔའ་རྟག་སྙིང་རྗེ་དང་། བྱང་ཆུབ་སེམས་

49-1-188b

དཔའ་རང་མི་ཉེན་དང་། བྱང་ཆུབ་སེམས་དཔའ་རྟག་འགྲུས་ཀྱིས་དེ་སྙེད་ཀྱི་སངས་རྒྱས་རྣམས་ལ་ཡོན་གསོལ་ཏེ། སྡུག་བསྔལ་ལོ་ཅོག་གི་ཉོན་མོངས་ན་འོན་ཀྱང་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཐོབ་དཀའ་ན། མི་གཏི་མུག་གཞན་གྱིས་སྐད་ཅིག་མྱ་ངན་ལས་
འདས་པ་བཙལ་བ་མེད་པ་ལྟ་སྨོས་ཀྱང་ཅི་དགོས། ཤཱ་རིའི་བུ་དེ་ལྟ་བུར་སྤྱད་ན་འོན་ཀྱང་ཤིན་དུ་དགའ་ན། མ་སྤྱད་པ་ལྟ་སྨོས་ཀྱང་ཅི་དགོས། དེ་ལྟ་བས་ན་ཤཱ་རིའི་བུ་ངས་བྱེ་བྲག་ཕྱེད་པར་བསྒོའོ། །འོག་མའི་ཆོས་སྤྱད་པས་བླ་མའི་ཆོས་ཐོབ་པར་མི་རུང་སྟེ་བླ་མའི་ཆོས་
སྤྱད་ན། གདོད་བླ་མའི་ཆོས་ཐོབ་བོ། །གང་ལ་སོགས་པ་འོག་མའི་ཆོས་དེ་ནི་ལུས་ཀྱི་ངན་པའི་ལས་ཁའི་ངན་པའི་ལས་ཡིད་ཀྱི་ངན་པའི་ལས་སོ། །འོག་མའི་ཆོས་ནི་མིང་སེམས་ལ་དགེ་བའི་ཆོས་འགྲུབ་པར་སྤྱོད་སྦྱོང་མི་ནུས་པ་ཞེས་བྱའོ། །འོག་མའི་ཆོས་ནི་ལེ་ལོ་
སྙོམ་ལས་བྱེད་ཅིང་ཚུལ་ཁྲིམས་མནོས་སོ་ཅོག་བཤིག་པའོ་ཞེས་བྱའོ། །ཤཱ་རིའི་བུ་དེའི་མིང་འོག་མའི་ནང་ན་ཡང་འོག་མ་ཞེས་བྱའོ། །ཡང་འོག་མའི་ནང་ན་འོག་མ་ཞེས་བྱ་བ་ནི་ངའི་ཆོས་ལ་ཁྱིམ་ནས་བྱུང་སྟེ། ཐོབ་པ་མཐོང་བ་དང་། བདག་ཏུ་ལྟ་བ་དང་། གང་
ཟག་ཏུ་ལྟ་བ་དང་། སེམས་ཅན་དུ་ལྟ་བ་ཡང་སྐྱེས་སོ། །ཅིའི་ཕྱིར་ཞེ་ན། ཤཱ་རིའི་བུ་ཡང་དག་པར་གཤེགས་པས་དེ་ལ་མངོན་པར་སྣང་བ་མཁྱེན་ཏེ། ཐོབ་པ་ཡོད་པར་འཛིན་པས་ནི་མི་འགལ་བའི་བཟོད་པ་ཡང་མེད་ན་ལམ་གྱི་འབྲས་བུ་མི་ཐོབ་པ་ལྟ་སྨོས་ཀྱང་ཅི་དགོས། ཤཱ་
རིའི་བུ་ཐོབ་པ་ཡོད་པར་འཛིན་དུ་ཟིན་ན། བརྒྱ་སྟོང་ཁྲི་འབུམ་གྱི་སངས་རྒྱས་ཀྱིས་འཁོར་ལོ་གསུམ་སྤྱད་དེ་མངོན་པར་བསྟན་དུ་ཟིན་ཀྱང་། མི་དེས་མཐོང་བ་མ་བཏང་ན་མི་གཞན་གྱི་ཁ་ཟས་ཁམ་གཅིག་ཀྱང་མི་ཞུ་ན། ལམ་གྱི་འབྲས་བུ་མི་ཐོབ་པ་ལྟ་སྨོས་ཀྱང་ཅི་དགོས། 
ཤཱ་རིའི་བུ་བདག་ཏུ་ལྟ་བ་དང་། གང་ཟག་ཏུ་ལྟ་བས་མྱ་ངན་ལས་འདས་པ་ཐོབ་པ་ནི་ཕལ་ཐ་མལ་པ་ཐམས་ཅད་ཀུན་གྱིས་ཞི་བར་འདས་པའི་རིགས་སོ། །ཅིའི་ཕྱིར་ཞེ་ན། བདག་ཏུ་ལྟ་བ་དང་། གང་ཟག་ཏུ་ལྟ་བ་ནི་ཀུན་ཡོན་པོ་མཐོང་བ་ཡིན་ནོ། །མི་ཕལ་ཐ་
མལ་པ་རྣམས་དང་། བདག་ཏུ་ལྟ་བའི་གནས་དང་། གང་ཟག་ཏུ་ལྟ་བའི་འདོད་ཆགས་མང་སྟེ། དེ་ལྟ་བས་ན་ཐ་མལ་པ་ཐམས་ཅད་ཀྱིས་མྱ་ངན་ལས་འདས་པ་ཐོབ་པའི་རིགས་སོ་ཞེས་བྱས་སོ། །ཤཱ་རིའི་བུ་མི་ལ་ལ་ཞིག་གིས་བསམས་པ་བྱས་ཏེ། བདག་ཡོད་

49-1-189a

གང་ཟག་ཡོད་ཅེས་མི་དེས་དེ་ལྟ་བུའི་མཐོང་བ་མ་བཏང་བར་མྱ་ངན་ལས་འདས་ཆུད་དུ་ཟིན་ན། ཕལ་ཐ་མལ་པ་ཐམས་ཅད་ཀྱིས་འཕགས་པའི་ལམ་ཐོབ་པའི་རིགས་སོ། །དེ་ཅིའི་ཕྱིར་ཞེ་ན། ཕལ་ཐ་མལ་པ་ཐམས་ཅད་ཀུན་ནི་བདག་
ཏུ་ལྟ་བ་དང་། གང་ཟག་ཏུ་ལྟ་བ་ཡིན་ཏེ། དེ་ལྟ་བས་ན་བདག་ཏུ་ལྟ་བ་དང་། གང་ཟག་ཏུ་ལྟ་བས་མྱ་ངན་ལས་འདས་པར་ཆུད་ན་ནི་ཕལ་ཐ་མལ་པ་ཀུན་གྱིས་འཕྲུལ་གྱི་ལམ་དུ་ཆུད་དེ། འཕགས་པའི་ནང་ན་ནི་ཇི་ཡང་ཉུང་བ་མེད་དོ། །ཤཱ་རིའི་བུ་མི་ལ་ལ་ཞིག་
གིས་སེམས་བྱ་སྟེ། བདག་ཏུ་ལྟ་བ་ཡོད་པ་ལ་མྱ་ངན་ལས་འདས་པ་ཡོད་དུ་ཟིན་ན་མི་དེས་འཕགས་པའི་ལམ་ཐོབ་ཀྱིས་གཞན་བསམ་མི་དགོས་སོ། །ཅིའི་ཕྱིར་ཞེ་ན། ཕལ་ཐ་མལ་པ་ཐམས་ཅད་ལ་བདག་ཏུ་ལྟ་བ་དང་། གང་ཟག་ཏུ་ལྟ་བ་མི་ཉུང་བས་ན། དེ་ལྟ་བུའི་མི་གཏི་
མུག་ལ་དེ་ལྟ་བུའི་ཉེས་འཁྲུལ་པ་ཡོད་དེ། ཕལ་ཐ་མལ་པ་རྣམས་ཀུན་གྱིས་འཕགས་པའི་ལམ་དུ་ཆུད་ཅེས་ཟེར་རོ། །འཕགས་པའི་འཕྲུལ་གྱི་ལམ་ལ་བཅིང་བ་མེད་དེ། མི་དེས་སྤྱད་པའི་ཚེ་སྲོག་གཅོད་པ་ལྔ་མནོས། ལོག་པ་ལྔའི་སྡིག་བསྐྱོད་པ་རིགས་སོ། །དེ་ལྟ་བས་ན་
མི་གཏི་མུག་གིས་འཕགས་པའི་ལམ་ལ་ལོག་པ་ལྔའི་སྡིག་ཡོད་དོ། །ཅིའི་ཕྱིར་ཞེ་ན། ཕལ་ཐ་མལ་པ་ཐམས་ཅད་ཀུན་ནི་བདག་ཏུ་ལྟ་བ་ཡོད། སེམས་ཅན་ཡོད་ཅེས་འཆད་དོ། །མི་ལ་ཚིག་དེ་སྐད་ཟེར་ན་ལོག་པ་ལྔའི་སྡིག་འབྱོར་གྲུབ་སྟེ། མྱ་ངན་ལས་འདས་པར་མི་ཆུད་དོ། །
བདག་ཏུ་ལྟ་བ་དང་། གང་ཟག་ཏུ་ལྟ་བར་བཅད་པས་མྱ་ངན་ལས་འདས་པར་ཆུད་ཅེས་ཟེར་ན་བརྫུན་གྱི་ཚིག་ཡིན་ཏེ། སངས་རྒྱས་ལ་ཡང་སྐུར་པ་ཡིན་ནོ། །གཅིག་ཏུ་ན་ངའི་ཆོས་ཀྱི་ནང་ན་གཙང་གདང་བར་ཁྱིམ་ནས་བྱུང་སྟེ་ཐོབ་པར་མ་ནུས་པ་ཞེས་ཀྱང་བྱའོ། ། 
སངས་རྒྱས་ཀྱི་མཛོད་བཤད་པའི་ཆོས་ཀྱི་ཡི་གེ། ། བམ་པོ་བཞི་པ། སངས་རྒྱས་ཀྱི་མཛོད་བཤད་པའི་ཆོས་ཀྱི་ཡི་གེ་གཙང་མ་མཐོང་བའི་ལེའུ་འོག་མའོ།། །། ཤཱ་རིའི་བུ་ངས་ཁྱོད་ལ་བྱེ་བྲག་ཕྱེད་པར་བསྒོའོ། །ཐོབ་པ་ཡོད་དོ་ཅོག་ལ་ནི་མྱ་
ངན་ལས་འདས་པ་མེད་དོ། །ཐོབ་པ་ཡོད་དོ་ཅོག་ལ་ནི་མྱ་ངན་ལས་འདས་པ་ཡོད་དུ་མ་ཡིན་ན་དེ་ནི་སངས་རྒྱས་རྣམས་འཇིག་རྟེན་དུ་ཡང་མི་འབྱུང་ངོ་། །ཕལ་ཐ་མལ་པ་ཐམས་ཅད་ཀྱིས་ཀྱང་མྱ་ངན་ལས་འདས་པར་ཆུད་དོ། །ཅིའི་ཕྱིར་ཞེ་ན། ཕལ་ཐ་མལ་པ་

49-1-189b

ཐམས་ཅད་ཀུན་ལ་བདག་ཏུ་ལྟ་བ་དང་། གང་ཟག་ཏུ་ལྟ་བ་ཡོད་དོ། །ཀུན་ལ་ཐོབ་པ་འཛིན་པ་མེད་དེ་དེ་ཀུན་ཡོན་པོ་མཐོང་བ་ཡིན་ནོ། །ཤཱ་རིའི་བུ་ཁྱོད་ཀྱིས་རེ་ཤིག་ངས་ཅི་སྲིད་ལོན་ན་འབྱོར་པ་ལྟོས་ཤིག །ཐོབ་པ་དང་། མཐོང་བ་ཡོད་དོ་ཅོག་ནི་
འཛངས་ཤིང་འཕྲུལ་པའི་སྤྱོད་པ་མ་ཡིན་ཏེ། སངས་རྒྱས་རྣམས་ཀྱིས་ང་ལ་ཁྱོད་མ་འོངས་པའི་དུས་ན་སངས་རྒྱས་བྱེད་པ་ཐོབ་བོ་ཞེས་ལུང་མ་བསྟན་ཏོ། །ཤཱ་རིའི་བུ་ངས་དེ་ལྟ་བུ་སྤྱད་ན་འོན་ཀྱང་ལུང་བསྟན་པ་མ་ཐོབ་ན། དེ་ལྟ་བུ་མི་གཏི་མུག་གིས་ཚུལ་ཁྲིམས་
འཛིན་པ་དང་། མང་པོ་ཐོས་པ་དང་། བསམ་གཏན་དུ་ཐུབ་པ་ལ་སོགས་པ་འབའ་ཤིག་སྤྱད་དེ། གང་ཟག་ཏུ་ལྟ་བ་དང་། སེམས་ཅན་ཏུ་ལྟ་བ་སྐྱེས་པས་མི་ཐོབ་པ་ལྟ་སྨོས་ཀྱང་ཅི་དགོས། ཤཱ་རིའི་བུ་ངས་བཤད་པ་དེ་ལྟ་བུའི་མིང་ནི་མིང་སྤྱོད་པ་ཞེས་ཀྱང་མི་བྱ། མིང་
ཐོབ་པ་ཞེས་ཀྱང་མི་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་ཉིན་མཚན་དེ་ལྟ་བུའི་ཡོན་པོ་མཐོང་བ་ལ་འདོད་ཆགས་དེ་ཞི་བར་འདས་པར་མ་ཐོབ་བོ། །དེ་ལྟ་བུའི་མི་གཏི་མུག་གིས་འདི་སྙམ་དུ་བདག་ལ་སོགས་པ་ཅིའི་ཕྱི་ནས་བདག་དང་གང་ཟག་གིས་ཆོས་མེད་པ་སྤྱོད་པ་
སྦྱངས་ཏེ། མི་དེས་བདག་ལ་སོགས་པ་སྡུག་བསྔལ་མང་པོ་ཕུང་ཆོད་ཀྱང་རུང་སྲིད་ན། འདི་སྙམ་སེམས་བྱས་སོ། །ཤཱ་རིའི་བུ་ཐོག་མ་སྐྱེས་པ་ནས་ལོང་བའི་མི་ཁྱི་ཟ་བ་ལས་བྲོས་ཏེ་བྱོལ་ནས་མེ་དོང་ཟབ་མོར་ལྷུང་བ་དང་མཚུངས་སོ། །ཤཱ་རིའི་བུ་ངས་སྨྲས་པ། མི་གཏི་
མུག་གིས་དེ་ལྟ་བུར་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། ཐོབ་པ་ཡོད་པར་མཐོང་བ་སྦྱངས་ཏེ། དེ་ལྟ་བུའི་མཐོང་བ་རྣམས་སྤྱད་དེ། གཙང་གདང་ན་འདོད་ཅིང་རེ་བ་ནི་མི་དེ་འདོད་ཅིང་ཆགས་ལ་འབྲངས་ཏེ། དེ་ལྟ་བུའི་དོན་སྤྱད་པས་མྱ་ངན་ལས་འདས་པ་ཐོབ་པར་
འདོད་ན་ངས་མིང་མཐར་ལམ་ངན་པར་ལྷུང་ཞེས་བཤད་དོ། །ཤཱ་རིའི་བུ་དཔེར་མི་ལོང་བ་མེ་དོང་ཟབ་མོ་བདེ་སྐྱིད་པའི་སེམས་སྐྱེས་པ་དང་མཚུངས་སོ། །དེ་ལྟ་བུའི་མི་གཏི་མུག་ཀྱང་བདག་དང་གང་ཟག་ཏུ་ལྟ་བ་དང་། ཐོབ་པ་ཡོད་པར་མཐོང་བ་ལ་བདེ་སྐྱིད་པའི་སེམས་སྐྱེས་ཏེ། མི་དེ་
ཉིན་མཚན་དུ་ཆགས་པ་ལ་འབྲངས་པས་བརྙས་བསླུས་ནས་སླར་དོན་དེ་ལ་ཆགས་ཏེ། ངའི་ཆོས་ཀྱི་ནང་དུ་ཡོན་བླངས་ནས་དེ་ལྟ་བུའི་མི་གཏི་མུག་ཉིན་མཚན་དུ་རྒུད་པའི་མྱ་ངན་གྱིས་ལམ་ངན་པའི་ནང་དུ་ལྟུང་ངོ་། །ཤཱ་རིའི་བུ་དཔེར་མི་སྤྱིའི་ལུགས་ཀྱི་རྒྱལ་པོ་ཆེན་པོ་དང་མཚུངས་ཏེ། 

49-1-190a

བདག་གི་ཁམས་ཀྱི་ཡུལ་གྱི་ནང་ན་བརྗིད་ཀྱི་སྟོབས་རང་དབང་སྟེ། མི་དེ་ལྟ་བུ་ཞིག་ཕྲོག་པའི་རིགས། མི་དེ་ལྟ་ཞིག་བཀོལ་བའི་རིགས་ཤེས་ཟེར་ཏེ། མི་ཕལ་གཞན་རྒྱལ་པོའི་ཡིད་དང་འགལ་ཏེ། རྒྱལ་པོ་ངེས་པ་ངན་པ་བརྗིད་ནས་མིའི་
སེམས་གྱེས་ཤིང་ཞིང་པས་མཁར་གྱི་རིམ་གྲོ་མ་ནུས་ཏེ། ལོག་པར་བགྲོས་པ་རྒྱལ་པོས་མི་དེ་དག་དགྲ་ཆེན་པོ་ཡིན་པར་རིག་ནས་ཕལ་མང་པོའི་ནང་དུ་རྔ་སྒྲ་ངན་པ་བརྡུངས་ཏེ། དེའི་ཉེས་པ་ཤིན་དུ་བཅོམ་ནས་བསྐྲད་དེ། འགོང་ཐོད་དུ་བྱུང་ངོ་། །དེའི་
སྙིང་ཉེ་བ་ཟད་ཀྱིས་བཙལ་ན་མཁར་གྱི་རིམ་གྲོ་བྱ་མ་ནུས་པས་ན་དེ་ལྟ་བུའི་སྡུག་བསྔལ་ཐོབ་བོ། །ཤཱ་རིའི་བུ་སངས་རྒྱས་ཀྱང་དེ་དང་མཚུངས་ཏེ། བསྐལ་པ་གྲངས་མེད་པའི་བར་དུ་བླ་ན་མེད་པའི་གཡུང་དྲུང་རྫོགས་པའི་བྱང་ཆུབ་སྤྱད་སྦྱངས་ཏེ། ཆོས་ཀྱི་
རྒྱལ་པོ་ཆེན་པོ་བྱས་སོ། །ཆོས་ཀྱི་ཡུལ་ས་བཟུང་གཟི་བརྗིད་ཀྱི་མཐུ་ཆེན་པོ་ཡོད། སློབ་མ་རྣམས་ཀྱི་ནང་ན་ཆོས་ཀྱི་རོ་ཤེས་པ་ཡོད་དེ་སྲོག་སྟོར་ལ་ཐུག་ཀྱང་ངས་བསྟན་པ་མ་ཉམས། ལྷ་དང་འཇིག་རྟེན་མི་རྣམས་ཀྱིས་གཞིག་ནུས་པ་མེད་དེ། བསྟན་པ་མནོས་
པའི་ནང་ན་བདག་ལ་ངན་ཅིང་བདག་ལོག་པ་ཡང་མེད། གཞན་ལ་ཡང་མི་སྟོན་ཏོ། །དཔལ་གྱི་ནང་ན་གཟི་བརྗིད་ཀྱི་མཐུ་ཆེན་པོ་ཡོད་པས་རང་དབང་གིས་ཆོས་བཙུགས་ཏེ། ཆོས་ཀྱི་མཁར་རིམ་གྲོ་བསྲུངས་ནས་དགྲ་ངན་པས་བཤིག་དྲལ་ཅིང་མི་ཆུད་པར་བྱས་སོ། །
ཡང་དག་པར་གཤེགས་པའི་གསང་བའི་ཆོས་བཤད་པ་སེམས་ཐག་པ་ནས་མནོས་ཏེ། ཁོན་མི་དགྲ་ཆེན་པོ་མཐོང་བ་རྣམས་ལ་བཤད་དོ། །ཤཱ་རིའི་བུ་ཡང་དག་པར་གཤེགས་པ་དེ་ལྟར་བཞུགས་པས་ཆོས་ཀྱི་མཁར་རིམ་གྲོ་མཁས་ལ་སློབ་མ་ཆེན་པོ་བཞི་ཤེས་
རབ་ཟབ་ཅིང་རྒྱང་རིང་བ་ད་ལྟར་ངའི་ཆོས་ཀྱི་མཁར་ཞིག་རལ་མི་དོགས་སོ། །ལ་ལ་ཞིག་ཆོས་ཀྱི་མཁར་ལ་བསྒྲིབས་ཤིང་བགེགས་བྱེད་ན་དགྲ་ཆེན་པོ་ཡིན་ཏེ། ཆོས་ཀྱི་མཁར་བཤིག་དྲལ་ལ་ངའི་ཆོས་གསང་བསྒུས་ཏེ། མུར་འདུག་ལ་འཆད་དོ། །མི་རྟག་པར་
ངའི་ཐད་དུ་འོངས་ཏེ་ང་དང་གཏམ་བྱས་ནས་དེ་ལ་ཆོས་བསྟན་ན་གཙང་ཞིང་གཅེས་པ་མ་བཤད་ན་མི་དེས་ཆོས་བསྟན་པ་བཙལ་བའི་ཕྱིར་ཁྱིམ་ནས་བྱུང་སྟེ། ཚུལ་ཁྲིམས་མནོས་པས་ན། ངས་མི་དེས་ཕྱིས་ལམ་ཐོབ་པར་རིག་པར་ཤེས་པས་ཁྱིམ་ནས་བྱུང་བར་གནང་སྟེ་ཟླ་བ་

49-1-190b

བཞིའི་བར་དུ་སད་དོ། །དེ་ཅིའི་ཕྱིར་ཞེ་ན། ཆོས་ཀྱི་མཁར་གྱི་རིམ་གྲོ་བྱ་བའི་ཕྱིར་རོ། །གཅིག་ཏུ་ན་མ་འོངས་པའི་དུས་ཀྱི་དགྲ་སླར་མི་ལྡང་བ་བྱ་བའི་ཕྱིར་རོ། །དེ་ལྟ་བུར་ཡང་དག་པར་གཤེགས་པར་ཆོས་ཀྱི་མཁར་བསྲུང་བ་མཁས་པས་ཀླག་མི་རྙེད་པར་བྱས་ཏེ། དེ་ནི་སངས་རྒྱས་
ཀྱིས་བསྟན་པ་མཆོད་ཅིང་སྔོན་གྱི་ངན་པ་ཡོན་པོ་མཐོང་བར་བྱས་སོ། །དགེ་སློང་ཕལ་མང་པོ་རྣམས་ཀུན་དགའ་གཞའ་སྟེ་ཁྱིམ་ནས་བྱུང་བར་གནང་སྟེ། ཚུལ་ཁྲིམས་ནོད་པ་ཐོབ་ཟིན་ནས་ལྷ་དང་མི་དང་འཇིག་རྟེན་གྱིས་བསྐྱོད་ཅིང་བསྒྱུར་མི་ནུས་སོ། །ཤཱ་རིའི་བུ་གང་ལ་སོགས་
པ་སད་དུ་རུང་བ་ཞེས་བྱས་ན་དེ་ནི་མུར་འདུག་གི་མིང་དང་། མུར་འདུག་གི་ཆོས་ལ་སྲེད་པའོ། །ཤཱ་རིའི་བུ་གང་ལ་སོགས་པ་མུར་འདུག་གི་ཆོས་ལ་སྲེད་པ་ཡིན། དེ་ནི་ཐོབ་པ་ཡོད་དུ་འཛིན་པ་དང་། བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་ཏུ་ལྟ་བ་
དང་། ཡོན་པོ་ལ་འདོད་ཆགས་པ་དང་། ཉིད་ཀྱི་མཚན་མ་སྟོང་པའི་ཆོས་ལ་ཐེ་ཚོམ་གྱི་སེམས་སྐྱེ་བ་དང་། ཡོན་པོ་སྒྱུ་མ་མི་བདེན་པའི་སེམས་སྒྱུ་མའི་ཆོས་རྣམ་པ་མང་པོ་མནོས་པ་སྤྱད་དེ། མཆོག་གི་གཞུང་སྟོང་པར་འཇུག་མི་ཕོད་ཅིང་ཡོན་པོའི་ལམ་རྣམས་སྤྱོད་པ་སྟེ། མི་
དེའི་མིང་མུར་འདུག་གི་ཆོས་ལ་སྲེད་པ་ཞེས་བྱའོ། །ཤཱ་རིའི་བུ་སད་དུ་མི་རུང་བ་ནི་ཁ་དོག་རྣམ་པ་མང་པོ་སྤྱོད་པ་མི་གོས་སྐྱ་བོ་ཅན་ཡང་རུང་། ཆོས་གོས་བགོས་པ་ཡང་རུང་། དེ་ལྟ་བུ་མི་བདེན་པ་ཐོབ་བོ། །ཡོད་པར་མཐོང་བ་ཀུན་གྱི་མིང་མུར་འདུག་ཅེས་བྱའོ། །ངའི་
ཆོས་ཀྱི་ནང་ནས་བྱུང་ལ་ཚུལ་ཁྲིམས་མནོས་པ་དེ་ལྟ་བུའི་མི་ནི་སད་པའི་རིགས་སོ། །ཅིའི་ཕྱིར་ཞེ་ན། ཐོབ་པ་ཡོད་པར་འཛིན་པ་ནི་ངའི་ཆོས་ཀྱི་ནང་ན་ཡོན་པོ་ལ་ལྟ་བ་ཡིན་ཏེ་དེའི་མིང་དགྲ་ཆེན་པོ་ཞེས་བྱའོ། །འཇིག་རྟེན་ཐམས་ཅད་ཀྱི་ནང་ན་ལྷ་དང་མིའི་དགྲའོ། །
དེའི་མིང་འཇིག་རྟེན་ཐམས་ཅད་ཀྱི་དགྲ་སྡང་བ་སྟེ། སངས་རྒྱས་རྣམས་ཀྱི་དགྲ་ཆེན་པོའོ། །ཤཱ་རིའི་བུ་ཡོན་པོ་ལྟ་བུའི་མི་དེ་ངས་ཀྱང་ཁྱིམ་ནས་བྱུང་ཞིང་ཚུལ་ཁྲིམས་མནོད་དུ་མ་གནང་ངོ་། །ཤཱ་རིའི་བུ་ཆོས་སོ་ཅོག་ཐམས་ཅད་ལ་བདག་ཏུ་ལྟ་བ་མེད་དོ། །
མི་ལ་ལ་ཞིག་གིས་དེ་ལ་བཟོད་པ་སྐྱེ་བ་དང་། ཆོས་སོ་ཅོག་སྟོང་པ་དང་བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད། ཚེ་སྲོག་མེད་པར་མི་ནུས་ཤིང་ཡིད་ཆེས་ཤིང་ཤེས་པར་མ་ནུས་པའི་ཆོས་ཀྱི་ནང་དུ་ཡོན་ལེན་ན་མིང་མི་གཙང་བ་ཞེས་

49-1-191a

བྱ་སྟེ། མི་དེས་སངས་རྒྱས་ལ་ཡོན་མི་འབུལ་ཆོས་ལ་ཡོན་མི་འབུལ། དགེ་འདུན་ལ་ཡོན་མི་འབུལ་བར་ནན་གྱིས་ངའི་ཆོས་སུ་ཞུགས་ཏེ་ལུས་ནི་དགེ་སྦྱོང་ཡིན་ལ་སེམས་ནི་མུར་འདུག་ཡིན་ཏེ། ཆོས་རྐུ་བའི་མི་ཞེས་བྱའོ། །ཤཱ་རིའི་བུ་
མ་འོངས་པའི་དུས་ན་དགེ་སྦྱོང་ཞིག་ཡོད་པ་ལུས་མི་འཆོས། ཚུལ་ཁྲིམས་མི་སྤྱོད། སེམས་མི་འཆོས། ཤེས་རབ་མི་སྤྱོད་དེ་ཡང་དག་པར་གཤེགས་པས་བཤད་དོ་ཅོག་དང་ཡང་དག་པར་གཤེགས་པས་སྤྱད་དོ་ཅོག་ལ་ཡང་བྲུན་ཏོ་བརྙས་སོ། །ཡང་
དག་པར་གཤེགས་པས་ནི་རྟག་པར་མཆོག་གི་གཞུང་གི་སྟོང་པ་ལ་རི་མོ་གུས་ཤིང་ཡོན་གསོལ་ཏེ་རྟག་པར་སྤྱོད་པ་ལ་སྲེད་ན། དགེ་སློང་དེ་རྣམས་ཀྱིས་ཡང་དག་པར་གཤེགས་པས་ཡང་དག་པའི་དབྱིངས་མཐའ་ཡུན་དུ་སྟོང་པའི་ཆོས་སྤྱོད་པ་ལ་ཡང་ཞིང་བྲུན་ཏོ། །
ཤཱ་རིའི་བུ་དེའི་ཚེ་དགེ་སློང་ལ་ལ་ཉོན་མོངས་པའི་ལས་སྤྱོད་པ་ཡོད་ན་ཡང་ཀུན་གྱིས་བརྙས་ཏེ་བྲུན་ཏོ། །ད་ངའི་སློབ་མ་སྟོང་པ་སྤྱོད་པ་ཡོད་ན་ངས་དགའོ་ཞེས་བསྟོད་དེ། སེམས་བདེ་བར་བབ་པ། དེའི་ཚེ་མི་དེས་སྟོང་པ་སྤྱོད་པ་ཡང་བརྙས་ཏེ། མི་སྲ་མི་མཁྲངས་
འབའ་ཤིག་གིས་དོན་ཚོལ་ལོ། །བདག་ཏུ་ལྟ་བ་ཡོད་པ་དང་། ཆོས་སོ་ཅོག་ཡོད་པ་སྤྱད་དེ། དེ་ལྟ་བུ་ལ་སོགས་པའི་དོན་གྱིས་ཕལ་གྱི་སེམས་དགའ་བར་བྱས་སོ། །ལ་ལ་ཞིག་གིས་ཆོས་སོ་ཅོག་སྟོང་པར་བཤད་ན་མི་དེ་ལ་ཡང་བརྙས་སོ། །ཅིའི་ཕྱིར་ཞེ་ན། ཤཱ་རིའི་
བུ་ཆོས་ནི་དེ་བཞིན་པའི་རིགས་ཏེ། སེམས་ཀྱི་དགེ་བའི་རྩ་བ་ཆད་དུ་བྱེད་ན་ཕྱི་མོ་གཟུགས་མངོན་པར་བྱུང་ངོ་། །ཡང་དག་པའི་བདེན་པ་དམ་པའི་ཆོས་འཇིག་རྟེན་ན་འདུག་ན་གནོད་པ་མེད་དེ། དཔེར་མི་གཏི་མུག་གིས་སྤོས་ཙན་དན་དང་ཤིང་ངན་པ་གཉིས་འདྲ་བར་འཛིན་པ་
དང་མཚུངས་སོ། །ཤཱ་རིའི་བུ་སངས་རྒྱས་བསོད་སྐྱབས་ཀྱིས་བཤད་པ། མ་འོངས་པའི་དུས་ན་སངས་རྒྱས་ཤཱཀྱ་ཐུབ་པའི་སློབ་མ་རྣམས་ཀྱིས་གསོ་བའི་ཁེའི་ཕྱིར་གོས་སྐྱ་བོ་ཅན་རྣམས་ལ་མཆོག་གི་གཞུང་སྟོང་པ་བཤད་ན། དེའི་ཚེ་ཁྱིམ་ན་འདུག་པ་དང་། ཁྱིམ་ནས་བྱུང་
བ་གཏི་མུག་མང་པོས་མ་མནོས་སོ། །ལོག་གལ་ནས་ཡིད་མི་ཆེས་ཤིང་སླར་འཕྱ་སྐུར་ནས་བསོད་ནམས་ཆེན་པོ་སྟོར་ཏོ། །རྒྱུ་རྐྱེན་འདི་ལྟ་བུ་སྤྱད་པས་ན་མཐར་ལམ་ངན་པར་ལྟུང་ངོ་། །ཤཱ་རིའི་བུ་དེའི་ཚེ་འགལ་བ་མང་པོ་ཡོད་དོ། །རྩོད་པ་འཆང་། བདག་ཏུ་ལྟ་བ་འཆང་། གང་

49-1-191b

ཟག་འཆང་། སེམས་ཅན་འཆང་། ཚེར་འཛིན་པ་འཆང་། སྲོག་ཏུ་འཛིན་པ་འཆང་ངོ་། །དགེ་བའི་ཆོས་ཉུང་ངུ་བྱེད་པས་གསོ་བའི་ཁེ་འབའ་ཤིག་ལ་སྲེད་དེ། བདེན་པར་གཏི་མུག་ཡིན་ན་རང་ན་རེ་ཤེས་རབ་ཡོད་ཅེས་ཟེར་རོ། །གཅིག་ལ་གཅིག་ལོག་གལ་དེ་རྟག་པར་
ཐབ་རྩོད་ཅིང་དོན་ཡོད་པ་ལ་གཅོད་པ་སྲེད་དེ། ཁོན་དང་ཕྲག་དོག་གི་སེམས་སྐྱེས་ནས་མི་དེས་དགེ་སྦྱོང་གི་སེམས་བཏང་སྟེ་གསོ་བའི་ཁེ་འབའ་ཤིག་ཚོལ་ལོ། །འཚོ་ནམ་གྱི་དོན་མང་པོ་ལ་སྲེད་དེ་སྦྱར་བ་གཅིག་པུ་མ་ཡིན་ནོ། །རྟག་པར་མི་གཞན་གྱི་གཡོ་མཚང་ཚོལ་བ་
ལ་སྲེད་དེ། རང་གི་ཉེས་པ་སྦས་ནས་ལེགས་པའི་དོན་བརྗོད་ཅིང་བཤད་དོ། །ད་ལྟར་གྱི་དགེ་སློང་ནི་ལེགས་པའི་དོན་སྦས་བཅབས་ཏེ་རང་གི་ཉེས་པ་ངན་པ་ཕྱུང་ངོ་། །དེ་ཙམ་གྱི་ཚེ་ཀུན་གྱིས་ཚུལ་ཁྲིམས་ལྕི་བས་བསྲུང་ཞིང་གཟུང་མི་ནུས་ཏེ་ཁོང་དུ་ཆུད་པ་མེད་དོ། །གཞུང་གི་
བསོད་ནམས་བཤིག་སྟེ་ཆོས་སོ་ཅོག་མི་འགྱུར་ཞིང་ཉིད་ཀྱི་མཚན་སྟོང་པ་ལ་ཇི་ལྟ་བུར་བྱ་ནུས་ཤེས་འཛེར་ཏོ། །རྩེད་མོ་བྱེད་པའི་མི་འདའ་རས་པ་བསྒྱུར་ཅིང་བསྟན་པ་མང་པོ་བྱས་ནས་ཅི་ཡང་ཤེས་པ་མེད་པར་མཐོང་ན་ཤིན་དུ་བགད་དོ། །ཅིའི་ཕྱིར་ཞེ་ན། རྩེད་མོའི་ཆོས་མི་ཤེས་
པས་འཐབ་སྟེ་ངོ་མཚར་སྙམ་སྟེ། ཡོད་དཀོན་པའི་སེམས་སྐྱེས་ནས་དངངས་དོགས་ཏེ་ཆེར་བགད་དོ། །དེ་ལྟ་སྟེ་ཤཱ་རིའི་བུ་དེའི་ཚེ་ཡང་དག་པའི་བདེན་པའི་དགེ་སློང་གིས་སྟོང་པ་ཞི་བའི་ཆོས་འཆད་ན་སྲོག་གསོ་བའི་ཁེ་ཚོལ་བ་ཀུན་གྱིས་ཁྲེལ་ཏེ་བགད་དོ། །ཅིའི་ཕྱིར་ཞེ་ན། 
མི་དེས་སངས་རྒྱས་ཀྱི་ཆོས་ཀྱི་གཞུང་མ་རིག་པས་སྟོང་པའི་ཆོས་བཤད་པ་ཐོས་ནས་དངངས་དོགས་ཤིང་འཇིགས་སྐྲག་གོ། །ཤཱ་རིའི་བུ་ཁྱོད་ཀྱིས་མི་འདི་ལ་ལྟོས་དང་། བདེ་སྐྱིད་པའི་གནས་ལ་རྒུད་པའི་མྱ་ངན་སྐྱེས་སོ། །རྒུད་པའི་མྱ་ངན་གྱི་གནས་ལ་ནི་བདེ་སྐྱིད་པའི་སེམས་སྐྱེས་
ཏེ། མི་དེ་ཕྱིན་ཅི་ལོག་པས་དགེ་བའི་ཆོས་ནི་ལོག་པར་སྤྱད། ངན་པའི་ཆོས་ནི་མ་ལོག་པར་སྤྱད་དོ། །ཤཱ་རིའི་བུ་མི་གཏི་མུག་ལ་སེར་སྣ་དང་། འདོད་ཆགས་དང་། ཞེ་སྡང་དང་། གཏི་མུག་མང་དུ་སྲེལ་ཏེ། ཆོ་ག་ཚང་ནས་མི་དགེ་བ་གསུམ་གྱི་རྩ་བ་སྤྱད་དོ། །ཤཱ་རིའི་བུ་ངས་ཚུལ་ཁྲིམས་
འཛིན་པའི་དགེ་སློང་ལ་ཕན་བསོད་པ་བྱ་བའི་ཕྱིར་ཚུལ་ཁྲིམས་ཉིས་བརྒྱ་ལྔ་བཅུའི་ཆོས་ཡིག་བཤད་དོ། །དེ་ལྟ་བུའི་མི་གཏི་མུག་གིས་འཇིག་རྟེན་གྱི་རྒྱུ་རྐྱེན་ཆུང་ངུ་སྤྱད་དེ། ཁྱིམ་ན་འདུག་པ་ལ་བཤད་དེ་ཡི་གེར་ཡང་བྲིས་ནས་གོས་སྐྱ་བོ་ཅན་ལ་ཡང་བསྟན་ཏོ། །ཤཱ་རིའི་བུ་དེ་ལྟ་བུའི་མི་

49-1-192a

གཏི་མུག་གིས་བཤད་པ་ཆོས་སོ་ཅོག་སྟོང་པ་དང་། རང་གི་མཚན་མ་བྱ་ག་ལ་ནུས་ཤེས་འཛེར་ཏོ། །ཅིའི་ཕྱིར་ཞེ་ན། དེ་ལྟ་བུའི་མི་གཏི་མུག་གིས་འཇུག་པ་དང་། བརྐམ་པ་དང་། མྱ་ངན་འཁྲུག་ཡང་བསལ་མི་ནུས་ན། མ་རིག་པའོ་ཅོག་ཆོ་ག་མ་ནུས་པ་ལྟ་སྨོས་
ཀྱང་ཅི་དགོས། ཤཱ་རིའི་བུ་དེའི་ཚེ་ཚུལ་ཁྲིམས་ལུགས་འཛིན་པའི་དགེ་སློང་དགེ་བ་སློབ་མི་ནུས་སོ། །ཆོས་སོ་ཅོག་སྟོང་པར་ཡང་ལེགས་པར་མི་སློབ་བོ། །མདོ་སྡེ་ཁ་ཏོན་དང་ལེགས་པར་མི་སློབ་བོ། །ཤཱ་རིའི་བུ་ཚུལ་ཁྲིམས་ལུགས་འཛིན་པའི་དགེ་སློང་གིས་ལེགས་པར་
སློབ་མི་ནུས་ཤེས་བྱ། ཡང་དག་གཤེགས་པས་ཆོས་ཡི་གེ་ནང་ན་བསླབས་བཤད་པ་གསུམ་ཡོད་དེ། དགེ་བའི་ཚུལ་ཁྲིམས་བསླབ། དགེ་བའི་སེམས་བསླབ། དགེ་བའི་ཤེས་རབ་བསླབས་ཏེ། མི་དེས་བསླབ་པ་གསུམ་ལ་དགེ་བའི་བསླབ་མ་ནུས་ཏེ། མང་པོ་ཐོས་པ་
རྒྱུ་རྐྱེན་འབའ་ཤིག་སྤྱད་ནས་མི་གཞན་ལ་ཡང་བརྙས་ཏེ། མི་དེ་ནི་དགེ་བའི་ཆོས་སྒྲིབ་ཅིང་གཅོད་པ་ཡིན་ཏེ། དེ་ལྟ་བུའི་མི་གཏི་མུག་གིས་ཆོས་བཞིན་དུ་ལན་གློན་ཞིང་འདྲི་བར་ཡང་མི་ནུས་ན། མཐའ་ཡུན་དུ་ཅི་ཡང་མེད་པ་ལ་བརྩོན་འགྲུས་སྤྱོད་མི་ནུས་པ་ལྟ་སྨོས་ཀྱང་ཅི་
དགོས། ཤཱ་རིའི་བུ་དེ་ཙམ་གྱི་ཚེ་ཚུལ་ཁྲིམས་ཞིག་པའི་དགེ་སློང་ནི་གོས་སྐྱ་བོ་ཅན་གྱི་གཡོག་བྱེད་ཅིང་། ཕོ་ཉར་མངགས་ཤིང་གདུལ་བ་དང་། སྨན་གྱི་ཆོས་ཀྱིས་བདག་རང་གསོ་བར་བྱེད་དོ། །ཤཱ་རིའི་བུ་ད་ཁྱོད་ལྟོས་ཤིག་དང་། མི་ངན་པ་དེས་ངའི་ཆོས་ལས་ཁྱིམ་ནས་བྱུང་
ནས། ཚུལ་ཁྲིམས་མནོས་ནས་ཡོན་མནོད་པ་ཐོབ་ནས་སླར་ང་ལ་དགྲར་འཛིན་ཏོ། །ཤཱ་རིའི་བུ་དེའི་ཚེ་གནམ་ངོས་བཞིའི་ལྷའི་རྒྱལ་པོ་དང་དབང་པོ་དང་། ཚངས་པའི་རྒྱལ་པོ་ཆེན་པོ་དང་། བརྒྱ་སྟོང་ཁྲི་འབུམ་གྱི་ལྷ་གཞན་ཀུན་ཀྱང་ངའི་ཆོས་ཀྱི་ནང་ན་དེ་ལྟ་བུ་ཞིག་ཉམས་པ་མཐོང་
ནས་ཀུན་ཤིན་ཏུ་མྱ་ངན་བྱེད་ཅིང་མི་དགའ་སྟེ། ངུས་ནས་མཆི་མ་བབ་བོ། །ཤཱ་རིའི་བུ་དེ་བདེན་པར་ན་ང་ལ་རྟེན་ཅིང་གོས་སྐྱ་བོ་ཅན་གྱི་མཚན་མ་སྦྱོར་ཞིང་བྱེད་པའི་མི་རིགས་སོ། །ཅིའི་ཕྱིར་ཞེ་ན། སངས་རྒྱས་ཤཱཀྱ་ཐུབ་པའི་སློབ་མ་རྣམས་དང་། ལྷ་དང་། ཀླུ་དང་། ལྷ་མ་ཡིན་གྱིས་བཀོལ་
ཞིང་བདག་པོ་ཡང་བྱ་བ་རིགས་ན། ཀླུ་དང་ལྷ་མ་ཡིན་གྱིས་ངའི་སློབ་མ་ལ་བཀོལ་ཞིང་བདག་པོ་བྱས་ན་དེ་ལྟ་བུའི་མི་གཏི་མུག་གོས་སྐྱ་བོ་ཅན་ལ་ཉེ་བསྙེན་པས་ཆོས་སོ་ཅོག་གི་གཞུང་སྟོང་པ་བཤད་སྦྱངས་ཏེ། ཁོང་དུ་ཆུད་པར་ཟེར་ན་བདེན་པ་ཡོང་མེད་དོ། །ཤཱ་རིའི་བུ་དེའི་ཚེ་ཚུལ་

49-1-192b

ཁྲིམས་ཞིག་པའི་དགེ་སློང་གིས་ཆང་ཕོར་བུ་གང་ཞིག་ཐོབ་ནའང་གོས་སྐྱ་བོ་རྣམས་ལ་སངས་རྒྱས་ཀྱིས་དྲངས་བཤད་དོ། །ཁྱོད་ཀྱི་ཡིད་ལ་ཇི་སྙམ། འདོད་ཆགས་དང་། ཞེ་སྡང་དང་། གཏི་མུག་མང་པོ་དང་ཆོས་ཡིག་ཀློག་པ་ལ་སྲེད་པ་མང་བ་དང་། ཐ་མལ་པའི་ཡི་གེའི་ཁེ་ལ་
བརྐམ་ཞིང་སྤྱོད་པ་མི་གཙང་མི་གདང་བའི་མི་དེ་ལྟ་བུའི་མིས་ཅི་ཡང་མེད་པ་ཡུན་དུ་སྟོང་པའི་ཆོས་ཡིད་ཆེས་པར་ནུས་ཤིང་། དགེ་སྦྱོང་གི་འབྲས་བུ་ཆོ་ག་ཚང་བ་ཐོབ་པར་ནུས་སམ་མི་ནུས། བཅོམ་ལྡན་འདས་མི་ནུས་ལགས་སོ། །ཤཱ་རིའི་བུ་དགེ་སློང་ལ་ལ་ཞིག་གིས་གོས་དང་
ཁ་ཟས་དང་མལ་ཆ་དང་། རྩི་སྨན་ཐོབ་པ་ལ་ཕྱོགས་ན་ཚུལ་ཁྲིམས་འཛིན་པ་གཙང་གདང་སྟེ། མང་པོ་འཛིས་བ་པ་དང་། ཅལ་ཅོལ་གྱི་ཚིག་ལ་མི་སྲེད། ཕྱི་ལོགས་ཀྱི་གཞུང་ལ་མ་ཆགས་ཏེ། ཉིན་མཚན་དུ་བརྩོན་འགྲུས་པ་ནི་མགོ་ཚིག་པའི་ར་འདའ་བྱེད་པ་བཞིན་ཏེ། 
སེམས་གཅིག་ཏུ་དྲང་པོའི་འཕྲུལ་གྱི་ལམ་བརྒྱད་འགྲུས་པར་སྤྱད་ན་མི་དེས་འོན་ཀྱང་སྟོང་པའི་ཆོས་ཅི་ཡང་ཐོབ་པ་མེད་པའི་ཁོང་དུ་ཆུད་པར་དཀའ་ན། དེ་ལྟ་བུའི་མི་གཏི་མུག་ཟབ་མོ་འདོད་པ་མེད་པ་ཡིད་ཆེས་ཤིང་ཤེས་པ་མེད་པ་ལྟ་སྨོས་ཀྱང་ཅི་དགོས། ཤཱ་རིའི་བུ་ཁྱོད་ལྟོས་ཤིག་དང་། 
མི་དེ་ཡང་དག་པར་གཤེགས་པའི་བླ་ན་མེད་པའི་གཞུང་མ་ཤེས་པས་ན། ངའི་དྲང་པོའི་ཆོས་བཤིག་སྟེ་བདག་རང་གི་ལུས་དང་མི་གཞན་གྱི་རྒུད་པའི་མྱ་ངན་ཆེན་པོ་བྱས་སོ། །དེ་ལྟ་བུའི་དགྲ་ཆེན་པོ་ནི་འཇིག་རྟེན་གྱི་དགྲ་ཆེན་པོ་ཡིན་ཏེ། ཆོས་ཀྱི་ཡི་གེ་འདིའི་ནང་ན་ཡང་ཡོང་བྲལ་
བའི་རིགས་ཤེས་བཤད་དོ། །དེ་ལྟ་བུའི་མིས་ནི་སངས་རྒྱས་ཀྱི་དྲིན་ཀྱང་མི་ཤེས་ཏེ་རང་གི་བསམས་པ་བདག་ལ་སོགས་པ་ཁྱིམ་ནས་བྱུང་སྟེ། ཆོས་འདིའི་ནང་ན་སྤྱད་པའི་མི་རིགས་པ་རྣམས་ནི་སྤྱད་པ་མི་རིགས་སོ། །དེ་ལྟ་བས་ན་ཤཱ་རིའི་བུ་ཡང་དག་པར་གཤེགས་པས་མ་འོངས་
པའི་དུས་ལ་ཇི་ལྟ་བུ་ངན་པ་གཅད་པའི་ཕྱིར་ཆོས་འདི་ལྟ་བུ་བཤད་དོ། །དགེ་སློང་ལ་ལ་ཞིག་ཚུལ་ཁྲིམས་མནོས་སོ་ཅོག་ཞིག་ཅིང་། ཆོས་བཤིག་དྲལ་ལ་དྲང་པོའི་མཐོང་བ་བཤིག་པ་ཞིག་གིས་ཆོས་ཡིག་འདི་ཐོས་ན་འཇིགས་སྐྲག་སྟེ། ཚུལ་ཁྲིམས་སླར་ཟློག་གོ། །ཅིའི་ཕྱིར་ཞེ་ན། 
ཚུལ་ཁྲིམས་ཞིག་པའི་མི་ནི་སེ་གོལ་གཅིག་གཏོགས་པ་ཙམ་གྱི་བར་དུ་འཕགས་པའི་མི་གཟུགས་དང་། ཆོས་གོས་ཅན་འདུག་པའི་ནང་ན་འདུག་པ་མི་རིགས། ལ་ལ་ཞིག་གིས་ཆོས་ཡིག་འདི་ཐོས་ཏེ་སེམས་དགའ་གཞའ་ན། མི་དེའི་མིང་སངས་རྒྱས་རྣམས་ཡོན་གསོལ། 

49-1-193a

སངས་རྒྱས་ཀྱི་ལམ་སྲུང་ཞིང་རིམ་གྲོ་བྱེད་པ་ཞེས་བྱ་བ་ཅིའི་ཕྱིར་ཞེ་ན། ཤཱ་རིའི་བུ་དེའི་མིང་སངས་རྒྱས་ལམ་ཡང་དག་པའི་དབྱིངས་ཤེས་བྱའོ། །ཕོ་དགེ་བ་མོ་དགེ་བ་ལ་ལ་ཞིག་དགེ་སྦྱོང་གི་ཆོས་ཐོས་པར་འདོད་ན། ཆོས་ཡིག་འདི་ཉོན་ཅིག་དང་། བརྒྱ་
སྟོང་ཁྲི་འབུམ་གྱི་དཔག་ཚད་འདས་པ་རིགས་སོ། །ཅིའི་ཕྱིར་ཞེ་ན། ཡང་དག་པར་གཤེགས་པ་སངས་རྒྱས་རྣམས་ཡུན་རིང་པོ་ཞིག་ལོན་ན། གདོད་འཇིག་རྟེན་དུ་འབྱུང་ངོ་། །འཇིག་རྟེན་དུ་འབྱུང་མོད་ཀྱི་བར་བར་དུ་ཟད་དོ། །ལེའུ་དགུ་སྟེ་དོགས་པ་བྱེ་བྲག་ཕྱེད་པའི་
ལེའུའོ།། །།སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། མི་རྣམ་གསུམ་ཞིག་ཡོད་པས་ཆོས་ཡིག་བཤད་པ་འདི་ཐོས་ན་སེམས་ལ་མི་དགའ་མི་དད་དོ། །གསུམ་གང་ལ་སོགས་པ་ཞེས་བྱས་ན། གཅིག་ནི་ཚུལ་ཁྲིམས་ཞིག་པའི་དགེ་སློང་ངོ་། །
གཉིས་ནི་དགེ་སློང་ཡར་སྐྱེ་བའི་མིའོ། །གསུམ་ནི་ཆོས་འཆད་པ་མི་གཙང་བ་དང་། བདག་ཏུ་ལྟ་བ་ལ་འདོད་ཆགས་ཏེ། །མི་དེས་འདི་ལྟ་བུ་བདེན་པའི་མཚན་མ་ཟབ་མོ་ཆོས་ཡིག་བཞིན་དུ་མི་འགལ་བ་ཡོང་སྤངས་ནས། དམུས་ལོང་གི་སྡེ་དང་གྲོགས་ཀྱི་ཚང་བར་གང་
རྒྱས་སོ། །དེ་ལྟ་བས་ན་ཤཱ་རིའི་བུ་ངའི་ཆོས་ཡིག་འདི་བསླབས་ཏེ་ཁྱོད་ལ་གཏམས་བཅོལ་ཏོ། །ཅིའི་ཕྱིར་ནས་ཤེས་བྱས་ན། ཆོས་ཀྱི་ཡི་གེ་འདི་ཡང་དག་པར་གཤེགས་པའི་ཕྱི་ན། གཙང་གདང་བར་ཚུལ་ཁྲིམས་འཛིན་པའི་དགེ་སློང་སེམས་ལ་
འདི་ལྟ་བུ་ཆོས་ཡི་གེ་ཟབ་མོ་ལ་དགའ་ཞིང་དད་པ་སྐྱེ་བར་ནུས་པ་ཚུལ་ཁྲིམས་གཙང་གདང་བས་རྟག་པར་བསྡུ་ཞིང་འཛིན་པར་བྱའོ། །ཚུལ་ཁྲིམས་ཞིག་པ་ནི་རྟག་པར་བསྲིངས་སྤངསོ། །ཅིའི་ཕྱིར་ཞེས་ན། གཏི་མུག་གིས་ཡང་དག་པའི་བདེན་པའི་དྲང་པོའི་
ཚིག་བཤད་པ་ཐོས་ན་སྡུག་བསྔལ་ཡིན་པར་འཛིན་ཏོ། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་གིས་བྱད་གཟུགས་ཅིར་གྲུབ་པ་ཡང་དག་པར་གཤེགས་པས་ཞིབ་ཏུ་རྒྱ་ཆེར་བཤད་ཟིན་ཏོ། །ཤཱ་རིའི་བུ་ཚུལ་ཁྲིམས་བཤིག་པའི་དགེ་སློང་ནི་ཆོས་ཀྱི་ཚུལ་ཁྲིམས་
འཛིན་པའི་ཆོ་ག་ལ་མ་དད་དོ། །གཏི་མུག་གི་མི་ནི་ཤེས་རབ་ལ་མི་དགའོ། །སེར་སྣ་ཅན་གྱི་མི་ནི་སྦྱིན་པ་བཤད་པ་ལ་ཐོས་པར་མི་དགའོ། །ལེ་ལོ་ཡར་སྐྱེ་བ་ནི་དྲེགས་ཤིང་ལེ་ལོ་མེད་པའི་ཆོས་འདི་ཐོས་སུ་མི་དགའ་སྟེ། ཐོས་སུ་ཟིན་ནའང་དངངས་སྐྲག་པ་ནི་ཁུང་ཟབ་མོར་ལྷུང་

49-1-193b

བ་དང་མཚུངས་སོ། །འཇིག་རྟེན་གྱི་ཁེ་ལ་སྲེད་པ་ནི་ཞིམ་པོའི་རོ་ལ་འདོད་ཆགས་སོ། ཟས་ལ་ཞེ་བསྐྲད་པ་ཐོས་ན། སེམས་ལ་མྱ་ངན་འཁྲུག་གོ། །མི་ལ་ལ་ཞིག་ཐ་མལ་པའི་ཡི་གེ་ཀློག་པ་ལ་སྲེད་ན། དེ་ལས་ན་ཐུབ་ཅིང་བདེན་པ་དུ་ཟིན་པའི་འདུ་ཤེས་སྐྱེའོ། །
ཚིག་ལ་འདོད་ཆགས་པ་ནི་ཅལ་ཅོལ་འཆད་པ་ལ་སྲེད་པའོ། །རང་གི་གཟོའི་ཚིག་གི་སྙན་དངགས་འཆད་པ་ལ་སྲེད་པ་ནི་སངས་རྒྱས་མཆོག་གི་གཞུང་ལ་གཙང་མའི་སེམས་མེད་པའི་སྟེང་དུ་ཆོས་འདི་ལ་ཡིད་མི་ཆེས་མི་གུས་སོ། །ཤཱ་རིའི་བུ་དཔེར་མི་མ་ནིང་དང་མཚུངས་སོ། །
སྐྱེས་པའི་སྤྱད་པ་མེད་ན། སྐྱེས་པའི་ནང་དུ་ཕྱིན་པ་དང་མ་ནིང་གི་འདུ་ཤེས་སྐྱེད་དེ། སེམས་འདི་སྙམ་དུ་བྱེད་དོ། །མི་འདི་གཞན་ལ་སོགས་པ་ཡང་བདག་དང་མི་མཚུངས་པ་མེད་སྙམ་བྱེད་དོ། །དེ་ལྟ་སྟེ་ཐ་མལ་པའི་ཡི་གེ་ལ་སྲེད་ཆགས་པ་ནི་རྟག་པར་ཚིག་རང་བཟོའི་སྙན་
དངགས་པ་ལ་སྲེད་དེ། སངས་རྒྱས་ཀྱི་མཆོག་གི་གཞུང་ལ་སེམས་ཀྱིས་རི་མོ་མི་གུས་སོ། །ཤཱ་རིའི་བུ་དེའི་ནང་ན་མི་ལ་ལ་གཙང་གདང་བའི་ཆོས་ཡིག་འཆང་བ་ཡོད་ན་མི་དེ་ལ་ཡང་རི་མོ་མི་གུས་ཏེ། གཙང་གདང་བའི་ཚུལ་ཁྲིམས་འཛིན་པའི་དགེ་སློང་ལའང་ཡང་ཞིང་
བཏུས་ཏེ། ཅིའི་ཕྱིར་ཞེ་ན། ཤཱ་རིའི་བུ་མུར་འདུག་གི་ཆོས་ཡི་གེ་ལ་ནི་ཡང་དག་པའི་ཚིག་མཐའ་བ་མེད་དོ། །ཆོས་ཀྱིས་དྲེགས་ཤིང་ལེ་ལོ་དང་མཐོང་ཞིང་རང་ཆེ་འདོད་པའི་རིགས་སོ། །ཅིའི་ཕྱིར་ཞེ་ན། དོན་དེ་ནི་སྐྱོ་བྲལ་བའི་མིའི་ཕྱིར་མ་ཡིན་ནོ། །མྱ་ངན་ལས་འདས་པ་
མིའི་ཕྱིར་མ་ཡིན་ཏེ། མི་དེས་ཡིད་ཆེས་པ་ལ་སོགས་པ་རྩ་བ་བཞི་ཉམས་པས་ན། གནས་སོ་ཅོག་ལེགས་པའི་དོན་ཡོད་པར་ཡིད་མི་ཆེས་པ་ནི་མ་ནིང་དང་མཚུངས་ཏེ། མི་གཞན་ཀུན་ལ་བདག་དང་མཚུངས་ཤེས་ཟེར་རོ། །ཤཱ་རིའི་བུ་དམུས་ལོང་གིས་ཁ་དོག་རྣམས་མི་མཐོང་
བ་དང་མཚུངས་སོ། །དེ་ནི་ནག་པོའི་ཁ་དོག་དཀར་པོའི་ཁ་དོག་སྟེ། དཀར་ནག་གི་ཁ་དོག་མཐོང་བ་མ་མཐོང་ངོ་། །བཟང་པོའི་ཁ་དོག་མ་མཐོང་ངོ་། །མི་སྡུག་པའི་ཁ་དོག་ཀྱང་མི་མཐོང་། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེབ་རྒན་རྨ་མཐིང་ཀའི་ཁ་དོག་
མི་མཐོང་། རིང་ཐུང་སྦོམ་ཕྲ་ལ་སོགས་པའི་གཟུགས་མི་མཐོང་། སྐར་མ་ཉི་ཟླ་མ་མཐོང་སྟེ། ཉི་ཟླ་དང་སྐར་མ་མཐོང་བ་དེ་ལྟ་བུའི་མི་ལོང་བས་ཐལ་བྱུང་སེམས་འདི་སྙམ་བྱས་སོ། །དཀར་གནག་གི་ཁ་དོག་མེད། དཀར་གནག་གི་ཁ་དོག་མཐོང་བ་མེད། བཟང་པོ་དང་

49-1-194a

མི་སྡུག་པའི་ཁ་དོག་བྱས་པ་མེད། སྔོན་པོ་དང་། སེར་པོ་དང་། དམར་པོ་དང་། མཐིང་ཀ་དང་། རིང་ཐུང་དང་། ཕྲ་སྦོམ་དང་། ཟབ་མི་ཟབ་དང་། ཉི་ཟླ་དང་། སྐར་མའི་ཁ་དོག་མེད། ཉི་ཟླ་སྐར་མ་མཐོང་བ་མེད་པས་ན་གཞན་ཀུན་ཀྱང་བདག་དང་
མཚུངས་སྙམ་དུ་འཛིན་ཏོ། །མི་དམུས་ལོང་གི་སེམས་ཕྱིན་ཅི་ལོག་པས་གནས་སོ་ཅོག་ཐམས་ཅད་ཀུན་ལ་མུན་གནག་ཆེ་ཟེར་རོ། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་ལེ་ལོ་ཡར་སྐྱེ་བའི་མི་མུར་འདུག་གི་བཤད་པར་ལྟུང་ངོ་། །དགེ་སློང་ཡང་དེ་དང་མཚུངས་ཏེ། 
སངས་རྒྱས་ཀྱི་ཟབ་མོ་ཆོས་ལ་ཡིད་མ་ཆེས་མ་དད་དེ། ཁོང་དུ་ཆུད་པར་མ་ནུས་སོ། །ཆོས་སོ་ཅོག་སྟོང་ཞིང་ཅིའང་མེད་པ་ཐོས་ན་ཡིད་མི་ཆེས་མ་དད་དོ། །ཁོང་དུ་ཆུད་པར་མ་ནུས་སོ། །ཤཱ་རིའི་བུ་མི་གཞན་བཞིན་དུ་ཁྱོད་ལ་སོགས་པའང་ཡོན་པོའི་དབྱིངས་སུ་ལྟུང་ཞིང་དྲང་
པོའི་ཆོས་མི་ཐོབ་ཀྱིས་དོགས་སོ། །དྲང་པོའི་ཆོས་འདི་སྤྱོད་པ་ནི་མིང་ཡང་དག་པའི་བདེན་པའི་དགེ་སྦྱོང་ཞེས་བྱའོ། །ཁྱོད་ཀྱིས་ཐོབ་བོ་ཅོག་ལ་མི་དེས་ཡིད་མི་ཆེས་པ་དཔེར་མི་དམུས་ལོང་ན་རེ་དཀར་གནག་ལ་སོགས་པའི་ཁ་དོག་མེད་ཅེས་ཟེར་བ་དང་མཚུངས་སོ། །ཤཱ་རིའི་བུ་
མི་དེས་དེ་ལྟ་བུའི་ཡོན་པོའི་དབྱིངས་སུ་བཞུགས་ཏེ་མུར་འདུག་གི་བཤད་པ་བཙལ་ནས་མང་པོའི་འཇིགས་པའི་ཚིག་ལ་སྲེད་དེ། མྱ་ངན་འཁྲུག་པའི་རང་བཞིན་ངན་པ་དང་། ཆོས་ངན་པ་སྐྱེས་ཤིང་འཕེལ་ཏོ། །མི་དེས་ཆོས་སོ་ཅོག་སྟོང་ཡང་ཆེས་པར་མི་འགྱུར་ན་
ཁོང་དུ་མི་ཆུད་པ་ལྟ་སྨོས་ཀྱང་ཅི་དགོས། ཤཱ་རིའི་བུ་ཁྱོད་ཀྱི་ཡིད་ལ་ཇི་སྙམ་ཝས་སེང་གེ་ལྟར་བྱས་ན་བསྒྲགས་ཟིན་ཏམ། ད་བསྒྲག་གམ། ཕྱིས་བསྒྲག །སེང་གེའི་འགྲོས་བྱས་ན་ད་འགྲོ་བ་དང་། ཕྱིས་འགྲོ་བ་དང་། འགྲོས་ཟིན་པ་ནུས་སམ་མི་ནུས། བཅོམ་ལྡན་འདས་མི་ནུས་
ལགས་སོ། །ཅིའི་ཕྱིར་ཞེས་བགྱིས་ན་ཝའི་ཁ་དོག་དང་། སྟོབས་དང་། སྒྲ་སེང་གེ་ཙམ་མི་ཕོད་དོ། །ཝས་ནི་ཝའི་སྒྲ་འབའ་ཤིག་བགྱི་ནུས་སོ། །སྒྲ་ཞིག་བགྱིར་བཏབ་ན་ཝའི་སྒྲ་འབའ་ཤིག་འབྱུང་སྟེ། སེང་གེའི་སྒྲ་མ་ལགས་སོ། །དེ་ཡིན་ནོ། །ཤཱ་རིའི་བུ་ཚུལ་ཁྲིམས་ཞིག་
པའི་དགེ་སློང་ལེ་ལོ་ཡར་སྐྱེ་བའི་དགེ་སློང་རང་དོན་དམ་པ་ཡིན་སྙམ་འཛིན་ཏོ། །ཆོས་འཆད་མི་གཙང་བ་ནི་འཛི་གེན་ཇིའི་བཤད་པ་མནོས་ཏེ། དོན་གཅིག་ལ་ཆགས་ཏེ་དམ་དུ་བཟུང་སྟེ་མ་བཏང་ངོ་། །འཇིག་རྟེན་གྱི་ཁེ་ལ་བརྐམ་ཞིང་རིན་ཆེ་སྟེ་ཐ་མལ་པའི་ཡི་གེ་ཀློག་པ་ལ་

49-1-194b

སྲེད་པས་ཆོས་སོ་ཅོག་གི་བདེན་པ་ཁོང་དུ་ཆུད་པར་མ་ནུས་སོ། །མཚན་མ་མེད་པའི་ཆོས་ལ་ཡིད་ཆེས་ཤིང་མནོད་ནུས་ཤེས་ན། བདེན་པ་ཡོང་མེད་དོ། །ཤཱ་རིའི་བུ་དགེ་སློང་ལ་ལ་ཞིག་ལོ་གྲངས་ཀྱིས་རྒན་ཞིང་ལེགས་པ་ཡོད་ལ་དགེ་སློང་གི་ནང་ན་ཀླུ་སྟེ། ཤེས་
རབ་ཟབ་མོ་ཡོད་པ་དེ་ལྟ་བུའི་མིས་ཅིའང་མེད་པ་ཉིད་ཀྱི་མཚན་མ་སྟོང་པའི་ཆོས་དང་། བདག་ཏུ་ལྟ་བ་མེད་པ་དང་། གང་ཟག་མེད་པའི་ཆོས་ལ་ཡིད་ཆེས་པར་ནུས་སོ། །ཇི་ལྟ་ཞེ་ན། མི་དེ་མང་པོ་འཇིགས་པའི་ཚིག་གོ་ཅོག་དང་དགེ་འདུན་ལ་མི་སྲེད་དོ། །ཆོས་ཡིག་ཀློག་པ་
དང་། གཉིད་ཀྱིས་ལོག་པ་དང་། དོན་མང་པོ་ལ་མི་སྲེད། གོས་སྐྱ་བོ་ཅན་གྱི་འཚོ་ནམ་དང་དོན་མི་བྱེད། ཕོ་ཉར་མངག་ཅིང་ཡི་གེ་ཁྱེར་ཞིང་སྐྱེལ་བ་མི་བྱེད། སྨན་གྱི་ཆོས་མི་བྱེད། སྨན་དཔྱད་མི་ཀློག །ཚོང་སྤོགས་མི་བྱེད། འཇིག་རྟེན་གྱི་ཚིག་བརྗོད་ཅིང་སྨྲ་
བ་ལ་མི་སྲེད་དོ། །འཇིག་རྟེན་ལས་འབྱུང་བ་བཤད་པ་འབའ་ཤིག་ལ་དད་ཅིང་དགའོ། །མི་ཆོས་སོ་ཅོག་སྟོང་པར་ཡིད་ཆེས་པར་ནུས་ཏེ། ཆོས་སོ་ཅོག་མེད་ཅིང་མི་ལྡན་མི་འཇུག་གོ། །མི་དེ་ལྟ་བས་ན་གདོད་ཡང་དག་པའི་བདེན་པའི་དབྱིངས་སུ་གྲུབ་པར་ནུས་ཏེ། 
བདེན་པ་བཞིན་གྱི་ཡང་དག་པའི་སེང་གེའི་སྒྲ་ནུས་ཏེ། ཝའི་སྒྲ་མ་ཡིན་ནོ། །ཤཱ་རིའི་བུ་དགེ་སློང་ལ་ལ་ཞིག་ཐ་མལ་པའི་ཡི་གེའི་གཞུང་ལ་ཆགས་པའི་ཞིག་ཡོད་ན་མི་དེས་སངས་རྒྱས་ཀྱི་ཟབ་མོ་དམ་པའི་མཆོག་བཏང་སྟེ། མུར་འདུག་གི་ཆོས་ཁ་ཏོན་དང་། གཟུགས་
སུ་འཛིན་པ་ཞེས་བྱའོ། །ཕལ་མང་པོའི་ཕྱིར་བཤད་ནའང་ཝའི་སྒྲ་འབའ་ཤིག་ཟེར་རོ། །ཤཱ་རིའི་བུ་དེ་ལྟ་བུའི་མི་ངན་པ་ནི་མིང་རུལ་པའི་དགེ་སྦྱོང་ཞེས་བྱའོ། །ཅིའི་ཕྱིར་ཞེ་ན། མུར་འདུག་གི་གཞུང་ཡིན་གྱི། སངས་རྒྱས་ཀྱི་ཆོས་མ་ཡིན་པའི་ཕྱིར་རོ། །ཤཱ་རིའི་བུ་མུར་
འདུག་གི་ཆོས་ལ་ཆགས་པའི་དགེ་སློང་ནི་བདག་རང་སངས་རྒྱས་ཀྱི་སློབ་མ་ཡིན་ཞེས་བརྗོད་པར་མི་རིགས་སོ། །ཅིའི་ཕྱིར་ཞེ་ན། དགེ་སློང་ཤཱཀྱའི་བུ་ནི་འཛི་གེན་ཇིའི་ཆོས་མི་འཆད་དེ། ཕལ་མང་པོའི་ནང་ན་སངས་རྒྱས་ཀྱི་ཆོས་འབའ་ཤིག་འཆད་དོ། །མི་ལ་ལ་ཞིག་མི་
གཙང་བའི་ཚིག་ལ་ཆགས་ན་སེང་གེའི་སྒྲ་བྱས་ཀྱང་བྱས་སོ། །ཝའི་སྒྲ་སྐད་དུ་གྲགས་ཏེ། མི་དེ་སངས་རྒྱས་ཀྱི་མཆོག་གི་གཞུང་ཤེས་པར་མི་ནུས་སོ། །ཤཱ་རིའི་བུ་ངས་ཁྱོད་ལ་བྱེ་བྲག་ཕྱེད་པར་བསྒོའོ། །མི་ལ་ལ་ཞིག་ཚུལ་ཁྲིམས་འཛིན་པ་དང་། བསམ་གཏན་ཐུབ་པ་དང་། 

49-1-195a

ཤེས་རབ་ཆོག་ཚང་སྟེ། མི་འཇུང་། མི་བརྐམ། ཞེ་སྡང་གཏི་མུག་གིས་མ་ཞེན། གཙང་སྒྱུ་མི་སྲེལ། ངན་པས་སྐྱེས་པའི་སེམས་ཡོད། ཡང་དག་པའི་བདེན་པའི་ཚིག་སྨྲ་ཞིང་རྟག་པར་འབའ་ཤིག་གནས་ལ་སྲེད། ཉལ་
ཞིང་གཉིད་ལོག་པ་ལ་མི་སྲེད། སྟོང་པ་མཚན་མ་མེད་པ་དང་། སྨོན་པ་མེད་པ་དང་། འགོག་པ་མེད་པའི་སྤྱོད་པ་ལ་སྲེད་དོ། །ཟབ་མོ་འདོད་པའི་སེམས་སྐྱེས་ཏེ། སངས་རྒྱས་ཀྱི་ཆོས་ཀྱི་མཆོག་གི་གཞུང་ཤེས་པ་བཙལ་ནས། འཇིག་རྟེན་
གྱི་ཚིག་ལ་ནི་མི་དགའ་འཇིག་རྟེན་ལས་འབྱུང་བའི་ཚིག་ལ་དད་དེ། ཚུལ་ཁྲིམས་རྣམས་རྫོགས་པར་བཟུང་ནས། དོན་ངན་པ་ཐམས་ཅད་དང་། ངན་པའི་བཤེས་གཉེན་ཀུན་བསྲིངས་སྤངས་ཏེ། དེ་ལྟ་བུའི་ཆོས་ལ་གནས་པས་སྟོང་པ་
ཅི་ཡང་མེད་པའི་ཆོས་ཤེས་པར་ནུས་སོ། །ཅིའི་ཕྱིར་ཞེ་ན། ཤཱ་རིའི་བུ་སྤྱད་པ་དེའི་མིང་ནི་མི་ཆེན་པོའི་སྤྱོད་པ་ཞེས་བྱ་སྟེ། གསོ་བའི་ཁེ་ལ་བརྐམ་ཞིང་སྲེད་པའི་ཁེ་མ་ཡིན་ཏེ། གཏི་མུག་བླུན་པོའི་ཐ་མལ་པའི་སྤྱོད་པ་མ་ཡིན་ནོ། །སུན་
བྱུང་ཞིང་ཞིགས་པའི་དགེ་སྦྱོང་གི་སྤྱོད་པ་མ་ཡིན་ནོ། །སྤང་ཕུབ་ཀྱི་དགེ་སྦྱོང་གི་སྤྱོད་པ་མ་ཡིན་ནོ། །སྒྱུ་མ་མིང་གི་དགེ་སྦྱོང་གི་སྤྱོད་པ་མ་ཡིན་ནོ། །ཤཱ་རིའི་བུ་ཆོས་སོ་ཅོག་གི་བདེན་པའི་མཚན་མའི་མཐའ་ཡུན་དུ་སྟོང་པ་ཉིད་སངས་རྒྱས་ཀྱི་ལམ་
ཡིན་ཏེ། འཇིག་རྟེན་གྱི་ནོར་ཁེ་ལ་སྲེད་པ་དང་། ཆོས་མི་གཙང་བ་ཐོབ་པར་མི་ནུས་སོ། །ཤཱ་རིའི་བུ་དེའི་མིང་ནི་ཤེས་རབ་ཆེན་པོའི་ས་ཞེས་བྱ་སྟེ། མུར་འདུག་ལ་བརྐམ་སྲེད་པའི་ཆོས་མ་ཡིན་ནོ། །བདག་ཏུ་ལྟ་བ་དང་། གང་ཟག་ཏུ་འཆད་
པའི་ས་ཡིན་ནོ། །ཤཱ་རིའི་བུ་བདེན་པར་བདག་ཏུ་ལྟ་བ་ཡིན། གང་ཟག་ཏུ་ལྟ་བ་ཡོད་དུ་ཟིན་ན་བདག་ཏུ་ལྟ་བ་དང་། གང་ཟག་ཏུ་ལྟ་བ་འཆད་པ་ལ་བདེན་པའི་མཚན་མ་ཡོད་པའི་རིགས་ཀྱིས་བདེན་པ་བཞིན་དུ་འདྲི་བ་རིགས་སོ། །
བདག་ཏུ་ལྟ་བ་ཡོད་དུ་ཟིན་ན། ཁ་དོག་ཇི་ལྟ་བུ་ཡིན། སྔོན་པོ་སེར་པོ། དམར་པོ། དཀར་པོ་འམ། ལུས་ཀྱི་ནང་དུ་འདུག་གམ། ལུས་ཀྱི་ཕྱི་རོལ་དུ་འདུག་གམ། ལུས་ཆུབ་པར་འདུག་གམ། མར་གསོ་མ་ལ་འདུག་

49-1-195b

པ་དང་མཚུངས་སམ། ཤཱ་རིའི་བུ་གསོ་མའི་ནང་ན་མར་ཡོད་པ་ནི་འབྱུང་དུ་ཡང་རུང་། བསྟན་དུ་ཡང་རུང་། བདག་ཏུ་ལྟ་བ་ནང་ལོགས་ན་འདུག་ཏུ་ཟིན་ན། བདག་ཏུ་ལྟ་བ་ཡོད་པར་འཆད་པས་བཤད་པ་རིགས། བསྟན་པ་རིགས་ཏེ། གསོ་མའི་ནང་
ནས་མར་འབྱུང་ཞིང་མར་བསྟན་པ་དང་མཚུངས་སོ། །མཆོག་གི་གཞུང་གི་ནང་ནས་ནི་བདག་ཏུ་ལྟ་བ་བཙལ་ཀྱང་རྙེད་པར་མི་ནུས་ངོ་། །དེ་ལྟ་བས་ན་ཤེས་པར་བྱོས་ཤིག །བདག་ཏུ་ལྟ་བ་དང་། གང་ཟག་ཡོད་པར་འཆད་པའི་མི་དེ་ལ་དགེ་སྦྱོང་གི་
ཁྲིམས་ཀྱང་མེད་ན། དགེ་སློང་གི་མེད་པ་ལྟ་སྨོས་ཀྱང་ཅི་དགོས། ཤཱ་རིའི་བུ་ཤེས་པར་བྱོས་ཤིག །ཡོན་པོ་ལ་འདོད་ཆགས་པ་ནི་བདག་ཏུ་ལྟ་བ་ལ་ཆགས། སེམས་ལ་ཆགས། ཚེ་སྲོག་ལ་ཆགས་ཏེ། སྤྱི་བོའི་ཆོས་སུ་ལྷུང་ངོ་། །མི་དེ་དེ་ལྟ་བུར་ཡོན་
པོ་ལ་འདོད་ཆགས་པས་ན། གསོ་བའི་ཁེ་ལ་བརྐམ་པའི་སེམས་ཀྱང་བསམ་མི་ནུས་ན་མྱ་ངན་འཁྲུག་པའི་ཞིབ་མོ་ལྟ་སྨོས་ཀྱང་ཅི་དགོས། ཤཱ་རིའི་བུ་སྟོང་པ་ཁོང་དུ་ཆུད་པ་ལ་འདོད་ཆགས་དང་། ཞེ་སྡང་དང་། གཏི་མུག་དང་། གསོ་བའི་ཁེ་བཀབ་ཅེས་ཟེར་ན་
བདེན་པ་ཡོང་མེད་དོ། །སྤྱི་བོ་ཆོས་སུ་ཡོང་མི་ལྟུང་ངོ་། །ཤཱ་རིའི་བུ་བདག་ཏུ་ལྟ་བའི་སེམས་ལ་ཆགས་པ་ནི་ཚེ་སྲོག་ཡོད་ཅེས་ཟེར་བ་སྟེ། ཚེ་སྲོག་གི་རྒྱུ་རྐྱེན་གྱིས་ན་གསོ་བའི་ཁེས་བཀྲེས་ཏེ་ལམ་བསྒྲུབས་བཅད་དོ། །ཤཱ་རིའི་བུ་བདག་ཏུ་ལྟ་བ་དང་། གང་ཟག་ཏུ་
ལྟ་བ་ནི་ངའི་ཆོས་ལ་ཁྱིམ་ནས་བྱུང་བ་སྟེ། ཆོས་བྱེད་མོད་ཀྱི་དེ་ལྟ་བུའི་མི་གཏི་མུག་གཙང་གདང་བའི་ནང་ནས་ནི་ཁྱིམ་ནས་བྱུང་བ་མ་ཡིན་ནོ། །ཅིའི་ཕྱིར་ཞེ་ན། འཛི་གེན་ཇིའི་ཁྱིམ་ནས་བྱུང་བ་ནི་ཀུན་ངའི་སེམས་ལ་ཆགས་ཏེ་ཐོབ་པ་ཡོད་པར་འཛིན་ཏོ། །ཤཱ་རིའི་བུ་
ཐོབ་པ་ཡོད་པར་འཛིན་པ་ནི་ཐོག་མ་ཞེས་བྱ་བ་མེད་པའི་ཚེ་རབས་ཚུན་ཆད་རྟག་པར་དེ་ལྟ་མཐོང་བ་ཡོད་དེ། ཁྱིམ་ནས་བྱུང་དུ་ཟིན་ཀྱང་ཡོད་དེ་ཅི་མི་འཆད་དོ། །དེའི་མིང་མུར་འདུག་གི་ཞར་ལས་ཁྱིམ་ནས་བྱུང་ཞེས་བྱའི། མིང་འཕགས་པའི་ཞར་ལས་ཁྱིམ་ནས་
བྱུང་བ་ཞེས་མི་བྱའོ། །ཅིའི་ཕྱིར་ཞེ་ན། བཀབ་པའི་མིས་ཆེན་པོ་ལ་ཡིད་ཆེས་ཤིང་དད་པར་མི་ནུས་ཏེ། གཙང་གདང་བའི་ཆོས་ཆེན་པོ་ཡང་དག་པའི་བདེན་པའི་འདུ་ཤེས་མེད་དོ། །ཤཱ་རིའི་བུ་དེ་ལྟ་བུའི་ཆོས་བཤིག་པའི་སྡིག་ལྕི་བ་རྒྱུ་རྐྱེན་གྱིས་ཁ་

49-1-196a

ན་མ་ཐོ་བའི་ལྷག་མ་མ་ཟད་པས་ཆོས་སོ་ཅོག་བདེན་པའི་མཚན་མ་ཡིད་ཆེས་ཤིང་ཤེས་པར་མི་ནུས་ཏེ། མི་དགེ་བའི་ལས་གཡོས་ནས་བར་བར་ནི་དྲང་པོའི་འཕྲུལ་གྱི་ལམ་བརྒྱད་ལ་སྐུར། བར་བར་ནི་དགེ་སློང་ལ་ནང་པའི་སེམས་བསྐྱེད་དེ། དེའི་མི་བདེན་
པའི་ཉེས་པ་བྱུང་སྟེ། བར་བར་ནི་ཚུལ་ཁྲིམས་བཤིག་མཐོང་བ་བཤིག །སྲོག་ཤིག །ཆོ་ག་བཤིག་ཅེས་ཟེར། བར་བར་ནི་གཞན་གྱི་ཉེས་པ་མ་མཐོང་བར་མི་བདེན་པའི་ཡིད་མ་ཡིན་མ་སྐྱེས། བར་བར་ཞེས་སྡང་ཕྲག་དོག་གི་སེམས་རྟོག་པ་སྤྱད་དེ་གཞན་གྱི་ནང་པ་བཤད། བར་བར་ནི་སངས་རྒྱས་ཀྱི་ཆོས་
ཡི་གེ་གཞུང་ཚུལ་ཤེས་ཟེར་མ་ནུས་པས་སངས་རྒྱས་ཀྱི་ཆོས་མ་ཡིན་ཞེས་ཟེར་རོ། །དེ་ལྟ་བུའི་མིས་ཆོས་བཤིག་པའི་ངན་པའི་ལམ་འབྱོར་གྲུབ་པས་སངས་རྒྱས་ཀྱི་མཆོག་གི་གཞུང་ལ་སེམས་ཐོགས་པ་མེད་པར་མི་ནུས་ཏེ། མི་འཇུག་མི་དགའོ། །དེ་ལྟ་བུའི་སྡིག་ལྕི་བའི་ལན་གྱི་ལྷག་མའི་རྒྱུ་རྐྱེན་གྱིས་བརྩོན་
འགྲུས་སྤྱད་མོད་ཀྱི། འོན་ཀྱང་རྐྱེན་ཏོ་ཅོག་གི་མཚན་མ་ལེན་མི་ནུས་ན་སེམས་ལ་བཏགས་པའི་ལམ་གྱི་འབྲས་བུ་ཐོབ་པར་མི་ནུས་པ་ལྟ་སྨོས་ཀྱང་ཅི་དགོས། གཅིག་ཏུ་ན་བདག་ཏུ་ལྟ་བ་དང་། གང་ཟག་ཏུ་ལྟ་བ་ལ་གནས་བརྟེན་ཏེ། དེ་ལྟ་བུའི་ལྟ་བ་ནི་སངས་རྒྱས་མན་ཆད་ཀྱིས་ཀྱང་དེའི་རྩ་བའི་ཕྱི་མོ་ཕྱིན་པར་སེམས་
མི་ནུས་ན་བུ་ཐོབ་པར་མི་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ་དེ་ལྟ་བུའི་བརྐམ་ཆགས་པའི་མི་དགེ་བ་ཡོན་པོ་མཐོང་བ་ཡོད་ན་དེ་ནི་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་ཏུ་ལྟ་བ་དང་། ཚེ་སྲོག་ཏུ་ལྟ་བའོ། །གཅིག་ཏུ་ན་མཆོག་གི་གཞུང་སྟོང་པ་ལ་དངངས་སྐྲག་ཅིང་དོགས་པ་སྟེ། མི་དེས་སྔོན་ཆད་ཀྱི་
ཚེ་ལ་ཆོས་བཤིག་པའི་སྡིག་རྐྱེན་འབྱོར་པར་མངོན་ནོ། །ཤཱ་རིའི་བུ་མི་ལ་ལ་ཞིག་དེ་ལྟ་བུར་ངན་པ་ཡོན་པོ་མི་དགེ་བའི་འདོད་ཆགས་ན། དེ་ནི་བདག་ཏུ་ལྟ་བ་ལ་ཆགས། གང་ཟག་ལ་ཆགས། ཚེ་སྲོག་ལ་ཆགས་ཏེ། མི་དེ་ལྟ་བུ་ནི་བརྒྱ་སྟོང་འབུམ་གྱི་སངས་རྒྱས་ཀྱིས་འཁོར་ལོ་གསུམ་སྤྱད་དེ། མངོན་པར་བསྟན་ཀྱང་
གོ་བར་བྱ་བ་དང་། ལམ་གྱི་འབྲས་བུ་ཐོབ་པར་བྱ་མི་ནུས་སོ། །ཤཱ་རིའི་བུ་གཉིས་ན་རལ་གྲི་རྣོན་པོས་ལྕེ་བཅད་ཀྱང་སླའོ། །གཞན་གྱི་དོན་མཐོང་བ་མི་རིགས་ཏེ། དེའི་ཉེས་པ་ཚུལ་ཁྲིམས་བཤིག་པ། མཐོང་བ་བཤིག་པ། སྲོག་བཤིག་པ། མི་བརྗོད་དོ། །ཤཱ་རིའི་བུ་མ་འོངས་པའི་དུས་ན། དགེ་སློང་དག་ཅིག་ཡོད་པས་ཚུལ་ཁྲིམས་ཉིས་བརྒྱ་
ལྔ་བཅུ་དགེ་བར་བསྲུངས་ན། མི་དེས་ལེ་ལོའི་སེམས་བསྐྱེད་དེ་འདི་སྙམ་དུ་བསམ་པ་བྱས་སོ། །བདག་ནི་ཚུལ་ཁྲིམས་འཛིན་པ་ཡིན། མི་གཞན་ནི་དེ་ལྟ་མ་ཡིན་གྱིས་གཞན་ལ་བརྙས་སོ་ཞེས་སེམས་ལ་རི་མོ་གུས་པ་མེད་དོ། །བདག་ནི་མང་པོ་ཐོས་པ་ཡིན་ཕ་བི་ནི་མང་པོ་ཐོས་པ་མ་ཡིན་སྙམ་དུ་སེམས་སོ། །ཤཱ་རིའི་བུ་དེའི་ཚེ་ན་དགེ་སློང་ཚུལ་ཁྲིམས་འཛིན་པ་ཆེད་ཆེར་

49-1-196b

སེམས་པ་མང་སྟེ། ཨ་ལན་ཞའི་ལས་སྤྱོད་པ་མང་ངོ་། །ཚུལ་ཁྲིམས་དགེ་བར་སྲུང་ནུས་ཏེ་བཤད་པ་བཞིན་དུ་འང་སྤྱོད་དེ། སེམས་འགྲུས་པར་ཆོས་ཡིག་ཀླགས་ནས་སངས་རྒྱས་ཀྱི་ཆོས་ལ་ཕྱག་འཚལ་ལོ། །དེ་ལྟ་བུའི་མི་ལ་སོགས་པ་མང་པོ་ཐོས་པ་སྐྱེས་པས། ཨ་ལན་ཞ་ལ་
ལྟོས་པས་ཞེ་སྡང་ལ་སྲེད་དེ། སེམས་རྟག་པར་དྲི་མ་རྟོག་པས་ཟབ་ཏུ་འཇུག་བརྐམ་པ་དང་། ཞེ་སྡང་གདུག་པའི་སེམས་སྲེལ་ཏོ། །ཐེག་ཆེ་ཞིང་བླུན་པས་ཅི་ཡང་ཤེས་པ་མེད་དེ། རྒྱུ་རྐྱེན་ཆུང་ངུ་སྤྱད་པས་དོན་ཆེན་པོ་གཡོས་ཏེ། དེའི་ཞེ་སྡང་གིས་སེམས་བཀབ་ནས་གཅིག་གི་ཉེས་
པ་གཅིག་བྱུང་སྟེ། དེ་ནི་ཚུལ་ཁྲིམས་བཤིག་པ་དང་། མཐོང་བ་བཤིག་པ་དང་། སྲོག་བཤིག་པ་དང་། ཆོ་ག་བཤིག་པའོ། །ཤཱ་རིའི་བུ་དེ་ལྟ་བུའི་དགེ་འདུན་གྱི་ནང་ན་དགེ་སློང་དེས་པ་ཡོད་པས་སེམས་ལ་ཡོན་པོ་མེད་དེ་བར་ན་གནས་ཤིང་འདུག་ན། དེ་ཡང་ངན་པ་དེ་དག་གི་ནང་
ན་འདུག་པས་གཅིག་ལ་གཅིག་སྐུར་བརྗོད་པས་འཐབ་རྩོད་མི་ཆད་དེ་བསམ་གཏན་ན་འདུག་པ་དང་། ཆོས་ཡིག་ཀློག་པ་ཡང་བདེན་པ་མ་ཐོས་ནས་ཁྱིམ་ན་འདུག་པ་དང་། ཁྱིམ་ནས་བྱུང་བ་ཀུན་ཀྱང་དཀྲུགས་བསྐྱོད་དོ། །དེ་ལྟ་སྟེ། ཤཱ་རིའི་བུ་དགེ་སློང་ལོ་གཅིག་ལོ་
གཉིས་ལོ་གསུམ་ལོ་དགུ་ལ་ཐུག་པ་མང་དུ་ཡོད་ན། སྟེང་ན་འདུག་པ་ཡང་ཞིང་བརྙས་ཏེ་རི་མོ་གུས་པ་མེད་དོ། །མི་དེ་ཚུལ་ཁྲིམས་མནོས་ན་དགེ་སྦྱོང་སློབ་མ་ཡང་ཆོས་བཞིན་མི་བྱེད་པ་མང་། མཁན་པོ་དང་ཨ་ཙརྱ་ལ་རི་མོ་གུས་པ་མི་བྱེད་དོ། །ཤཱ་རིའི་བུ་དེའི་ཚེ་དགེ་
སློང་གཞོན་ནུ་དང་སྔར་ཁྱིམ་ནས་བྱུང་བ་ལ་གནས་རྟེན་མེད་པ་གཅིག་གིས་གཅིག་བརྙས་ཏེ། ལོ་བཅུ་ལོན་པའི་དགེ་སློང་མ་ཕལ་བཅད་པ་རྣམས་གཞན་གྱི་སློབ་མ་ཀུན་གྱིས་རི་མོ་གུས་པ་མེད་དོ། །ཆོ་གའི་ཆོས་ཀྱང་ཆོས་བཞིན་མི་བྱེད་དོ། །ཤཱ་རིའི་བུ་དེའི་ཚེ་མི་
ངན་པ་རྣམས་ཀྱིས་འདོད་ཆགས་ཞེ་སྡང་ཆོ་ག་གཙང་བས་གཅིག་ལ་གཅིག་བརྙས་ཡང་སྟེ། རི་མོ་གུས་པ་མེད་ཅིང་གཅིག་ལ་གཅིག་ལོག་གལ་བས་ན་ངའི་ཆོས་དེངས་སོ། །ཤཱ་རིའི་བུ་དེའི་ཚེ་མི་གཏི་མུག་རྣམས་ཀྱིས་ཆོས་བཤིག་པའི་སྡིག་ལས་བསྐྱོད་པ་མང་པོ་སྡིག་
བསྐྱོད་པས་མཐར་ལམ་ངན་པར་ལྟུང་ངོ་། །ཤཱ་རིའི་བུ་ཁྱོད་ལ་ངས་བྱེ་བྲག་ཕྱེད་པར་བསྒོའོ། །རང་གི་བསོད་ནམས་བཙལ་དུ་ཟིན་ན། དགེ་སློང་དགེ་བ་ནི་དེའི་ཚེ་ཕལ་གྱི་ནང་དུ་ཞག་གཅིག་ཀྱང་འཇུག་པ་མི་རིགས་སོ། །དགྲ་བཅོམ་པ་མྱ་ངན་ཚོད་ཟིན་པ་དང་། དགེ་སློང་པ་

49-1-197a

དེར་དོན་ཡོད་པ་ནི་མ་གཏོགས་སོ། །ཅིའི་ཕྱིར་ཞེ་ན། ཤཱ་རིའི་བུ་དེ་ཙམ་གྱི་ཚེའི་མི་འདོད་ཆགས་དང་ཞེ་སྡང་དང་གཏི་མུག་གདུག་པ་བདོ་སྟེ། མི་གསོན་པས་འཇིགས་སྐྲག་ཕོངས་གཏིང་ལ་ཐུག་པས་དགེ་བ་མི་བཙལ་ཏེ། རང་སོ་སོར་རི་དང་ཚལ་སྟོང་དབེན་
པར་གནས་ཏེ། ཚེ་ཟད་ན་གཅན་ཟན་བཞིན་ཤིའོ། །ཤཱ་རིའི་བུ་ཁྱོད་ལ་ངས་བྱེ་བྲག་ཕྱེད་པར་བསྒོའོ། །ངའི་ཡང་དག་པའི་ཆོས་འདི་འཇིག་རྟེན་ན་འདུག་པ་རིང་པོ་མི་ཐོགས་སོ། །ཅིའི་ཕྱིར་ཞེ་ན། སེམས་ཅན་གྱི་ལེགས་པའི་དཔལ་གྱི་དགེ་བའི་རྩ་བ་ཟད་ཟིན་ཏེ། རྙོག་པའི་
དུས་ཉེ་བ་ན་འདུག་གོ། །བདག་གིས་བསོད་ནམས་བཙལ་དུ་ཟིན་ན་དགེ་སློང་དགེ་བས་འདི་ལྟ་བུའི་སྐྱོ་བའི་སེམས་བསྐྱེད་པའི་རིགས་སོ། །བདག་ནམ་ཞིག་ཇི་ལྟ་བུར་ཆོས་ཞིག་འཁྲུགས་པ་མཐོང་། འདི་ལྟ་བུའི་དགེ་སྦྱོང་གི་ཚེ་དུས་ངན་པའི་བགེགས་ལ་བབ་པ་མཐོང་ན་བདག་གིས་བརྩོན་
འགྲུས་པའི་སེམས་བསྐྱེད་དེ། མྱུར་དུ་ལམ་གྱི་འབྲས་བུ་ཐོབ་པར་བྱའོ། །ཤཱ་རིའི་བུ་ངའི་ཆོས་ལ་དོན་བཀའ་བ་བཞན་མེད་དེ། གོས་དང་། ཁ་ཟས་དང་། མལ་ཆ་དང་། རྩི་སྨན་མི་བསམ་མོ། །ཁྱེད་ལ་སོགས་པ་ཇི་ནས་ཀྱང་སངས་རྒྱས་ཀྱི་ལམ་གྲུབ་པར་སྤྱོད་པ། རྟེན་གྱི་ནོར་གྱི་ཁེ་དང་ཡོན་
རིན་ཆེར་མ་འཛིན་ཅིག །ཤཱ་རིའི་བུ་ད་ཁྱོད་ལེགས་པར་ཉོན་ཅིག་དང་ངས་ཁྱོད་ལ་བསྒོའོ། །དགེ་སློང་ལ་ལ་ཞིག་གི་སེམས་གཅིག་ཏུ་ལམ་སྤྱོད་ན་སྟོང་གསུམ་གྱི་གནམ་གྱི་ལྷ་ཀུན་སེམས་འཐུན་པར་སྐྱིད་པའི་ཡོ་བྱད་དོ་ཅོག་སྦྱར་ཏེ་སྤྱིས་ཡོན་གསོལ་ལོ། །ཤཱ་རིའི་བུ་མི་གཞན་གྱིས་བསམ་
གཏན་ན་འདུག་པའི་དགེ་སློང་ལ་ཡོན་ཕུལ་བས་ནི་གནམ་གྱི་ལྷས་ཡོན་ཕུལ་བ་ཙམ་མི་ཕོད་དོ། །དེ་ལྟ་བས་ན་ཤཱ་རིའི་བུ་ཁྱོད་རང་ཡོན་མི་ཐོབ་པའི་མྱ་ངན་སེམས་པར་བསྟན་བསླབས་པ་བཞིན་དུ་མ་གལ་བར་སྤྱད་དེ། མཆོག་གི་གཞུང་སྟོང་པ་སྤྱད་པ་ལ་མིའི་ཉེས་པ་མྱ་ངན་མ་འབྱུང་ཤིག །
ཅིའི་ཕྱིར་ཞེ་ན། ཤཱ་རིའི་བུ་བག་ཚ་བའི་བགེགས་ཆེན་པོ་ནི་སྟོང་པ་ཐོབ་པ་སྟེ། དགེ་སློང་ལ་ལ་ནི་ངའི་ཆོས་སྤྱོད་པའི་ཞར་ལས་ཁྱིམ་ནས་བྱུང་སྟེ། ཚུལ་ཁྲིམས་མནོས་ཤིང་ཆོས་འདི་ལ་བརྩོན་འགྲུས་སྤྱོད་ན། ལྷ་དང་ལྷ་མ་ཡིན་རྣམས་དང་། མི་རྣམས་ཀྱིས་མི་དྲན་མོད་ཀྱི་
སེམས་གཅིག་ཏུ་འགྲུས་པར་ལམ་སྤྱོད་ནུས། མཐར་ཡང་གོས་དང་། ཟས་ཅི་དགོས་པ་མི་སེམས་སོ། །ཅིའི་ཕྱིར་ཞེ་ན། ཡང་དག་པར་གཤེགས་པའི་དཔལ་གྱི་མཛོད་དཔག་ཏུ་མེད་དེ་ཟད་དཀའོ། །ཤཱ་རིའི་བུ་ཡང་དག་པར་གཤེགས་པ་འདས་པའི་ཕྱི་ན་སྤུ་དཀར་པོའི་མཚན་གྱི་

49-1-197b

ནང་ན་བརྒྱ་སྟོང་འབུམ་གྱི་ཆ་ལས། དེའི་ཆ་གཅིག་གིས་སྐུ་གདུང་དང་སློབ་མ་རྣམས་ལ་ཡོན་འབུལ་ལོ། །ཤཱ་རིའི་བུ་འཇིག་རྟེན་ཐམས་ཅད་ཀྱི་མི་ཀུན་ཁྱིམ་ནས་བྱུང་སྟེ། ཆོས་བཞིན་དུ་སྤྱད་དུ་ཟིན་ཀྱང་སྤུ་དཀར་པོ་མཚན་གྱི་བརྒྱ་སྟོང་འབུམ་གྱི་ཆ་དེ་གཅིག་ཀྱང་མི་ཟད་དོ། །
ཤཱ་རིའི་བུ་ཡང་དག་པར་གཤེགས་པ་ནི་དེ་ལྟ་བུའི་དཔལ་ཡོན་དཔག་ཏུ་མེད་དེ། དགེ་སློང་རྣམས་ཀྱིས་ཁ་ཟས་དང་རྫས་ཅི་དགོས་པ་རྣམས་ཐོབ་ན་ཕྱོགས་པས་ཀུན་ཆོ་ག་ཚང་བར་རུང་ངོ་། །ཤཱ་རིའི་བུ་དགེ་སློང་དེ་དག་གི་རྣམས་འདི་སྙམ་དུ་བསམ་པ་རིགས་སོ། །རྫས་ཅི་དགོས་པ་
དང་ཡོན་པོའི་སྲོག་རྣམས་ཀྱི་ཆོས་ངན་པ་སྤྱད་པའི་མི་རིགས་སོ། །ཤཱ་རིའི་བུ་གོས་ལྷན་པ་ཅན་གྱི་དགེ་སློང་ལུད་དང་ཕྱག་དར་གྱི་ནང་ནས་ངན་པ་རྙིང་པ་བསྡུས་ཏེ་བླངས་ན་སེམས་འདི་སྙམ་བགྱིད་པར་རིགས་སོ། །འདི་སྤྱད་དེ་ལྷག་མ་བསྒྲིབས་པ་དང་། འཕགས་པའི་ལམ་
སྤྱད་ན་བདག་གི་ད་ངན་པ་རྙིང་པ་འདི་སྤྱད་དེ། དྲུབས་ལ་ཆོས་སུ་བྱས་ཏེ། བརྩོན་འགྲུས་སུ་སྤྱད་དེ། ཕལ་ཐ་མལ་པ་ནི་ནུབ་གཅིག་ཀྱང་འདི་གྱོན་པ་མི་རིགས་སོ། །དགེ་སློང་དེས་དག་པར་བཀྲུས་ནས་རིང་དུ་གྱོན་ནས། དགེ་སློང་གོས་ལྷན་པ་ཅན་དེ་ལ་འདོད་ཆགས་པའི་སེམས་སྐྱེས་ན་མོད་
བཞིན་དོར་བའི་རིགས་ཏེ། ངས་གྱོན་དུ་མི་གནང་ན་གོས་གཞན་ལྟ་སྨོས་ཀྱང་ཅི་དགོས། ཅིའི་ཕྱིར་ཞེ་ན། ཤཱ་རིའི་བུ་དགེ་སློང་དེས་གོས་དེ་ལ་དགེ་སློང་གི་ཆོས་མ་ཡིན་པ་སྐྱེད་དེ། དགེ་སློང་དེ་ཡང་འགྲོ་བའི་མི་རིགས་པར་འཛིན་ན། རྫས་གཞན་ལྟ་སྨོས་ཀྱང་ཅི་དགོས་ཤཱ་རིའི་བུ་དེའི་
ཚེ་དགེ་སློང་དེ་ནི་ལྕགས་དམར་པོ་ཚ་བའི་ཞགས་མས་ལུས་བཅིངས་ཀྱང་སླའི། གོས་ལྷན་པ་ཅན་འདི་བགོ་བ་མི་རིགས་པར་འཛིན་ཏོ། །ཇི་ལྟ་ཞེ་ན། གོས་འདི་ལ་སེམས་སྲེད་ཅིང་ཞེན་པའི་ཕྱིར་རོ། །ཤཱ་རིའི་བུ་གོས་ལྷན་པ་ཅན་གྱི་དགེ་སློང་ནི་སེམས་འདི་སྙམ་བྱ་བའི་རིགས་སོ། །གོས་ལྷན་པ་
ཅན་འདི་བགོས་ཏེ། གྲང་བ་དང་ཚ་བ་བསྒྲིབས་པ་ལམ་སྤྱོད་པ་ལ་བཏང་ན། བདག་སླར་གོས་མ་བགོས་ན། མཐའ་རྒྱུན་ཏུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པའི་འབྲས་བུ་ཐོབ་བོ། །ཤཱ་རིའི་བུ་དེ་ལྟ་བུའི་
གོས་ལྷན་པ་ཅན་གྱི་དགེ་སློང་གཅིག་ཏུ་ལམ་ཚོལ་བ་ངས་ཀྱང་གྱོན་དུ་གནང་ངོ་། །ཤཱ་རིའི་བུ་ཟན་སློང་བའི་དགེ་སློང་ནི་ཆོས་སོ་ཅོག་ལ་རྣམ་པར་བརྟག་པ་མེད་དོ། །རྟག་པར་སེམས་བསྡུས་ཏེ། འགྱོད་ཅིང་འཁྲུག་ཏུ་མི་གཞུག་གོ། །གྲོང་ཁྱིམ་དུ་འཇུག་ན་བསམ་གཏན་གྲུབ་པ་

49-1-198a

རྣམས་སྤྱད་དེ། རང་བརྒྱན་ལ་ཟན་བསླངས་ཏེ། ཐོབ་ཟིན་པ་དང་སེམས་མི་ཞེན་མི་བསྒོ་བར་ཟན་ཅི་ཐོབ་པ་ཁྱེར་ཏེ་གྲོང་ཁྱིམ་ནས་བྱུང་ལ་ཆུ་གཙང་མའི་འགྲམ་ལམ་སྤྱད་དུ་རུང་བའི་གནས་སུ་འདུག་ལ། ཟས་ངོས་ཅིག་ཏུ་བཞག་སྟེ། རྐང་པ་བཀྲུས་ཏེ་འདུག་ནས་
ཟས་མདུན་དུ་བཞག་སྟེ། སྐྱོ་ཞིང་བྲལ་བའི་འདུ་ཤེས་དང་། མི་གཙང་བའི་འདུ་ཤེས་དང་། སྐྱག་རྫབ་ཀྱི་འདུ་ཤེས་དང་། མནམ་རུལ་བའི་འདུ་ཤེས་དང་། སྐྱུགས་པའི་འདུ་ཤེས་དང་། རྨ་བསྐུས་པའི་འདུ་ཤེས་དང་། ཐོབ་པས་སྐྱོབ་པའི་འདུ་ཤེས་དང་། བུའི་ཤ་སྙམ་
གྱི་འདུ་ཤེས་དང་། ཤིང་ཏོག་རུལ་བའི་འདུ་ཤེས་དང་། ཕྱིར་ཞིང་ལྕི་བའི་འདུ་ཤེས་སྐྱེད་པ་རིགས་སོ། །གཅིག་ཏུ་ན་ལུས་ལ་འཆི་བའི་འདུ་ཤེས་དང་། སྔོ་བའི་འདུ་ཤེས་དང་། རྣགས་པའི་འདུ་ཤེས་དང་། རུལ་ཞིགས་པའི་འདུ་ཤེས་བསྐྱེད་པའི་རིགས་སོ། །ཤཱ་རིའི་བུ་དགེ་
སློང་གིས་འདི་ལྟ་བུའི་འདུ་ཤེས་བསྐྱེད་པའི་རིགས་སོ། །འདོད་ཆགས་ཀྱི་སེམས་མེད་པ་ལ་སྤྱད་པ་དེ་ནས་གདོད་བཟས་ཏེ། ལུས་བརྟན་ཞིང་བཀྲེས་སྐོམ་པའི་ནན་བསླད་དུ་ཟད་དོ། །ལམ་སྤྱད་པར་ཐོབ་པར་བྱའོ། །སེམས་འདི་སྙམ་དུ་བྱ་བའི་རིགས་སོ། །ངས་ཟས་འདི་ཐོབ་པ་ནི་སྔོན་
ཆད་ཀྱི་སྡུག་བསྔལ་མི་སྐྱེ་ཞིང་། སེམས་དགའ་སྐྱིད་པ་ཐོབ་ལ་ནད་མེད་པ་སྤྱད་དེ། ལུས་ཉམས་ཀྱང་གཞོར་ཞིང་འགྲོ་བ་སྟབས་བདེ་བརྟན་པའི་ཕྱིར་རོ། །ང་ཟན་འདི་ཐོབ་ན་བདག་རྒྱུན་ཏུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་
དང་། དགྲ་བཅོམ་པའི་འབྲས་བུ་དང་། སྐྱེ་བ་མེད་པའི་ཆོས་ཀྱི་བཟོད་པ་ཐོབ་པའི་རིགས་སོ། །ཤཱ་རིའི་བུ་དགེ་སློང་དེ་ལྟ་བུར་ཟ་བའི་ངས་ཟས་སློང་དུ་གནང་ངོ་། །ཤཱ་རིའི་བུ་སློང་བའི་དགེ་སློང་ཟན་ཐོབ་བོ་ཅོག་གི་རོ་ལ་ཆགས་པ་ནི་སེམས་སྐྱེས་ཏེ། ཞིམ་མངར་རོ་སྙམ་དུ་དེ་
སྙམ་གྱི་སེམས་བྱེད་ཅིང་། བདག་ཟས་འདི་ཟོས་པས་མདངས་བཟང་པོ་དང་། ཉམས་སྟོབས་དར་བ་ཐོབ་སྙམ་དུ་སེམས་ཏེ། བདག་གི་ཟན་འདི་ཟོས་ལ་འཕགས་པའི་ལམ་འགྲུས་པར་སྤྱོད་དོ་ཞེས་དེ་སྙམ་གྱི་སེམས་མི་བྱེད་པ་ལྟ་བུའི་དགེ་སློང་ནི་ངས་ཆུ་རྔུབ་ཅིང་ལེན་དུ་མི་
གནང་ན། ཁ་ཟས་ལྟ་སྨོས་ཀྱང་ཅི་དགོས། ཤཱ་རིའི་བུ་ཟས་ལ་ཉེས་པ་དང་། ངན་པ་ཡང་མི་མཐོང་བར་ཐལ་བྱུང་ཟ་བས་ནི་ཉིས་ན་རང་གི་ལག་པས་བརླ་ཤ་ལ་བཅད་དེ་ཟ་ཡང་སླའོ། །ཅིའི་ཕྱིར་ཞེ་ན། ངས་སྤྱོད་པ་དང་ཐོབ་པས་གཞན་གྱི་ཡོན་ལེན་པ་གནང་གི། མི་གཞན་

49-1-198b

ལེན་དུ་མ་གནང་ངོ་། །ཤཱ་རིའི་བུ་ཇི་ལྟ་བུར་མིང་སྤྱོད་པ་ཞེས་བྱ། དགེ་སློང་ལ་ལ་ཞིག་མི་འགྱུར་བར་བརྟན་ཏེ། སེམས་གཅིག་པ་ལ་ངས་ད་ལྟར་གྱི་དུས་ལ་བདུད་ངན་པས་མངག་པ་རྣམས་བཅད་དེ། ལྷག་མ་མེད་པར་མྱ་ངན་ལས་འདས་པར་འཇུག་པའི་འཕྲུལ་གྱི་ལམ་སྤྱད་
པ་སྤྱད་པ་ནི་མགོ་མེས་ཚིག་པའི་ར་མདའ་བྱ་བ་བཞིན་ནོ། །གཅིག་ཏུ་ན་མི་དགེ་བ་ངན་པའི་ཆོས་བཅད་བསལ་བ་དེའི་མིང་སྤྱོད་པ་ཞེས་བྱའོ། །ཡང་གཅིག་ཏུ་ན་སེམས་གཅིག་ཏུ་སྟོང་པ་མཚན་མ་མེད་པ་སྨོན་པ་མེད་པར་ཡིད་ཆེས་ཤིང་ཤེས་པར་ནུས་ཏེ། རྒྱུན་དུ་ཞུགས་
པའི་འབྲས་བུ་དང་། ལན་གཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པའི་འབྲས་བུ་ཐོབ་པའི་ཕྱིར། མྱ་ངན་འཁྲུག་པའི་མི་རྣམས་ཆད་པ་དེའི་མིང་སྤྱོད་པ་ཞེས་བྱའོ། །དགེ་བའི་ཆོས་རྣམས་ཚོལ་ཞིང་རྟག་པར་གསོལ་འདྲི་དེའི་མིང་
སྤྱོད་པ་ཞེས་བྱའོ། །ཡང་གཅིག་ཏུ་ན་ཐམས་ཅད་གྲོལ་ཐར་པར་སེམས་བསྐྱོད་ནུས་པའི་མིང་སྤྱོད་པ་ཞེས་བྱའོ། །སེམས་འཁྲུག་པར་ལམ་ལ་བཏང་བའི་ཆོས་རྣམས་སྤྱད་སྦྱངས་ཏེ། ཆོས་སོ་ཅོག་གི་བཤད་པ་བཞིན་དུ་སྤྱོད་ཅིང་སྤྱད་པ་གཅིག་ཏུ་སངས་རྒྱས་ཀྱི་ལམ་ཚོལ་བ་
ཡོད་དོ། །ཤཱ་རིའི་བུ་ཡང་སངས་རྒྱས་ཀྱི་ཆོས་ཀྱི་ནང་ན་དེ་ལྟ་བུའི་མིང་སྤྱོད་པ་ཞེས་བྱའོ། །ཇི་ལྟ་བུར་ཐོབ་ཅེས་བྱ་བ་དེ་ནི་རྒྱུན་དུ་ཞུགས་པ་ཐོབ་སྟེ། ལམ་ངན་པ་གསུམ་ལས་ཐར་བའི་མིང་ཐོབ་པ་ཞེས་བྱའོ། །ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་
པ་མྱ་ངན་འཁྲུག་པ་རྣམས་ཆོད་དེ་ལམ་ཚོལ་བ་ཞི་ཟིན་ཅེས་བྱའོ་ཅོག་འབྱོར་ཟིན་ན། བསླབ་པ་གསུམ་དགེ་བར་ལོབས་པ་དེའི་མིང་སློབ་པ་སྟེ། ངས་མི་དེ་ཡོན་ལེན་དུ་གནང་ངོ་། །མི་དེ་ལྟ་བུས་ཡོན་བླངས་པ་དེའི་དགེ་བར་ཡོན་བླངས་ཞེས་བྱའོ། །ཤཱ་རིའི་བུ་གཙང་གདང་བར་ཚུལ་
ཁྲིམས་བསྲུངས་པ་དང་། ཡོན་བདག་ཕྱེ་བསྟན་པ་དང་། མདོ་སྡེའི་ཡི་གེ་ཁ་ཏོན་དང་ཀློག་པ་ཐོས་ཏེ་དེ་ནི་མདོའི་སྡེ། དབྱངས་ཀྱིས་བསྙད་པའི་སྡེ། ལུང་དུ་བསྟན་པའི་སྡེ། ཚིགས་སུ་བཅད་པའི་སྡེ། ཆེད་དུ་བརྗོད་པའི་སྡེ། གླེང་གཞིའི་སྡེ། དེ་ལྟ་བུའི་ཚིག་གི་ཆོས་ཡིན་ནོ། །སྐྱེས་
པ་རབས་ཀྱི་སྡེ། ཤིན་ཏུ་རྒྱས་པའི་སྡེ། རྨད་དུ་བྱུང་བའི་སྡེ། རྟོགས་པ་བརྗོད་པའི་སྡེའོ། །མི་དེས་ཡང་གཅིག་ཏུ་ན་ཚུལ་ཁྲིམས་གཙང་གདང་བར་གཟུང་ནུས་ཏེ། སྐྱོན་མེད་ཅིང་མི་སྨེ་མི་རྙོག །མི་ཆགས་པ་ལ་རང་དབང་བས་འཛངས་པས་བསྔགས་པ་རང་གིས་ཆོ་ག་ཚང་

49-1-199a

བར་ནུས་ཏེ། བསམ་གཏན་ཐུབ་པ་བཞིན་དུ་མི་འགལ་ལ། དུས་དུས་སུ་བསམ་གཏན་ན་འདུག་པ་སྲེད་པ་དེ་ལྟ་བུའི་དགེ་སློང་ནི་ངས་ཀྱང་ཡོན་དུ་གནང་ངོ་། །ཤཱ་རིའི་བུ་ལུས་ཀྱིས་ཆོས་རིག་ན་དོགས་ཤིང་འགྱོད་པ་མེད་པ་ངས་དེ་ལྟ་བུའི་མི་སྟན་མཐོན་པོར་
འདུག་ཅིང་ཆོས་བཤད་དུ་གནང་ངོ་། །ཐ་མལ་པ་ཕལ་ཡིན་མོད་ཀྱི་ཚུལ་ཁྲིམས་གཙང་གདང་བ་གཟུང་ལ་སེམས་མུར་འདུག་གི་ཆོས་ཀྱི་གཞུང་ལ་མ་ཆགས་ཏེ། སེམས་གཅིག་ཏུ་འགྲུས་པར་དགེ་བར་དགེ་སྦྱོང་གི་རབ་ནི་འབྲས་བུ་བཅད་དེ་གསོ་བའི་ཁེ་ལ་ཆགས། ངེས་པར་
བཤད་པ་ལ་བཟའ་མཁས་ཏེ། མང་དུ་ཐོས་པའི་དཔེ་རྒྱ་ཡངས་པ་ནི་དཔེ་རྒྱ་མཚོ་ཆེན་པོ་དང་མཚུངས། སྲོག་སྟོར་ལ་ཐུག་ཀྱང་བརྫུན་ཚིག་མི་ཟེར། འཐབ་ཅིང་རྩོད་པ་ལ་མི་སྲེད་དེ་རང་ལ་ཡང་ཕན། གཞན་ལ་ཡང་ཕན། གཙང་གདང་བའི་མཆོག་གི་གཞུང་འབའ་
ཤིག་འཆད་ཅིང་བཤད་དོ། །མཆོག་དེ་བཞིན་ལ་དེ་བཞིན་དུ་སྤྱོད་པའོ། །ཤཱ་རིའི་བུ་དེ་ལྟ་བུར་འཆད་པ་ནི་ངས་ཆོས་འཆད་དུ་གནང་ངོ་། །ཡང་དག་པར་གཤེགས་པས་ཅི་བཤད་པ་ཆོས་སོ་ཅོག་དང་མི་འགལ་མི་ལྡོག་པར་བྱ་ནུས་པ་སྟེ། དེ་ཚུལ་ཁྲིམས་དང་། བསམ་
གཏན་དང་། ཤེས་རབ་དང་། གྲོལ་ཐར་དང་། ཤེས་མཐོང་བ་ལས་ཀྱང་གྲོལ་ཐར་ཏོ། །ཤཱ་རིའི་བུ་ཁེ་ཚོལ་བའི་དགེ་སློང་ནི་སངས་རྒྱས་ཀྱི་ཕྱིར་ཁྱིམ་ནས་ཚུལ་ཁྲིམས་ཀྱི་ལེའུ་བཤིག་ན་ཆོས་བཤད་པ་ཅི་དགོས། ཅིའི་ཕྱིར་ཞེ་ན། ཤཱ་རིའི་བུ་ངའི་ཆོས་ཀྱི་ཡི་གེའི་ནང་ན་
བཤད་པ་མི་ལ་ལ་ཞིག་བདག་དགེ་བར་མ་ཞི་ལ་བདག་གི་བག་བྱ་མི་ནུས་པར་མི་གཞན་དགེ་བར་ཞི་བ་དང་བདག་གི་བྱ་ནུས་ཤེ་ན། བདེན་པ་ཡང་མེད་དོ། །དཔེར་ན་མི་ཞིག་བདག་རང་འདམ་རྫབ་དུ་ནུབ་ལ། མི་གཞན་དབྱུང་བར་བྱ་བ་དང་མཚུངས་ཏེ། བདེན་པ་ཡང་
མེད་དོ། །མི་ལ་ལ་ཞིག་བདག་གི་དགེ་བར་ཞི་བར་ནུས་ཤིང་འདམ་རྫབ་ན་ཕྱིན་ནུས་པས་མི་གཞན་དབྱུང་བར་བྱ་བ་ནི་བདེན་པ་ཡོད་དོ། །དེ་ལྟ་བས་ན་ཤཱ་རིའི་བུ་ངས་ཁྱོད་ལ་བྱེ་བྲག་ཕྱེད་པར་བསྒོའོ། །ཡང་དག་པར་གཤེགས་པ་ལ་འཕྱ་ཞིང་སྐུར་ན་དེའི་སྡིག་མི་ཡང་ངོ་། །
བདེན་པར་སྨྲ་བའི་དགེ་སློང་ནི་ཆོས་འཆད་དུ་གནང་བའི་རིགས་སོ། །བརྫུན་མི་ཟེར་བའི་ཚུལ་ཁྲིམས་འཛིན་པའི་དགེ་སློང་གིས་ནི་ཆོས་སྦྱིན་པ་ནུས་སོ། །ཤཱ་རིའི་བུ་ཁྲི་སྟན་མཐོན་པོ་ལས་ཆོས་འཆད་ཅིང་ཡང་དག་པར་ངེས་པར་ཐེ་ཙོམ་གཅོད་པ་ནི་ནང་གི་བླ་མའི་དོན་ཡིན་ནོ། །

49-1-199b

ལ་ལ་ཞིག་ཚུལ་ཁྲིམས་འཛིན་པ་མི་གཙང་ལ། མུར་འདུག་གི་གཞུང་ལ་ཆགས་པ་ནི་ངས་མ་གནང་ངོ་། །བརྫུན་ཟེར་བ་དང་འཇིག་རྟེན་གྱི་སྐྱིད་པ་རིན་ཆེར་འཛིན་པ་དང་། ཡོན་གྱི་ཁེ་ཚོལ་བ་དང་། འཐབ་རྩོད་པ་ལ་སྲེད་པ་ནི་ངས་ཀྱང་མ་གནང་ངོ་། །ངས་གཙང་གདང་བར་ཚུལ་
ཁྲིམས་འཛིན་པ་དང་། སེམས་དྲན་དཀན་པ་དང་། ཆོས་སོ་ཅོག་གི་བདེན་པའི་མཚན་མ་ཁོང་དུ་ཆུད་པ་ནི་ཁྲི་སྟན་མཐོན་པོར་ཆོས་འཆད་དུ་གནང་ངོ་། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་ཉིས་ན་ཁྲིམས་གཏང་སླའི། འཕགས་པའི་མཚན་མ་དང་ཆོས་གོས་སུ་
སྡིག་གི་དྲི་མ་སྦས་བཅབས་ལ་གསང་སྟེ། ངན་པ་མང་པོ་བྱ་ཞིང་མི་གཞན་གྱི་ཡིད་ཆེས་པའི་སྦྱིན་པ་ལ་མ་ཆགས་ཤིག །ཤཱ་རིའི་བུ་རྒྱུ་རྐྱེན་ཆུང་ངུའི་ཕྱིར་ཡུན་རིང་དུ་སེམས་ཅན་དམྱལ་བའི་ལུས་མནོས་པར་འགྱུར་རོ། །ལེའུ་བཅུ་སྟེ་ཐབས་བཅོལ་བའི་ལེའུའོ།། །།
དེའི་ཚེ་དགའ་བོས་སངས་རྒྱས་ལ་གསོལ་པ། བཅོམ་ལྡན་འདས་དེ་ཙམ་གྱི་ཚེ་དུས་ན་དགེ་སློང་རྣམས་ཀྱི་དགེ་བའི་ཆོས་ལ་ཇི་ལྟ་བུར་བརྩོན་འགྲུས་དང་། སངས་རྒྱས་ཀྱིས་དགའ་བོ་ལ་བཀའ་སྩལ་པ། རེ་ཤིག་ཞོག་ལ་མ་འདྲི་ཤིག །ཅིའི་ཕྱིར་ཞེ་ན། སངས་རྒྱས་ཀྱིས་
དཔག་ཏུ་མེད་པའི་ཡེ་ཤེས་ཀྱི་ཆོས་ཡིག་བཤད་དོ་ཅོག་དེ་ཙམ་གྱི་དགེ་སློང་གིས་ཡིད་ཆེས་པར་མི་ནུས་ན་འགྲུས་པར་སྤྱོད་མི་ནུས་པ་ལྟ་སྨོས་ཀྱང་ཅི་དགོས། དགའ་བོ་ཡང་དག་པར་གཤེགས་པའི་བྱ་བ་ཡོད་པའི་ཆོས་ཀྱི་ཤེས་རབ་ཡོད་དོ་ཅོག་རང་སངས་རྒྱས་དང་། དགྲ་བཅོམ་པ་ཐམས་
ཅད་ལ་སོགས་པ་གོ་ཞིང་ཤེས་པར་མི་ནུས་སོ། །དགའ་བོ་ཡང་དག་པར་གཤེགས་པས་མཁྱེན་ཏོ་ཅོག་གི་ཆོས་ཁྱོད་ལ་བདག་ཏུ་ཟིན་ན་ཁྱོད་བསླད་ཅིང་རྨོངས་སུ་རུང་ན་ཡིད་ཆེས་པར་མི་རུང་བ་ལྟ་སྨོས་ཀྱང་ཅི་དགོས། ཡང་དག་པར་གཤེགས་པས་དེ་ལྟར་དེ་ལྟ་བུའི་ཆོས་ཡིག་
བཤད་པ་ནི། དེའི་ཚེ་མི་གཏི་མུག་གིས་ཡིད་ཀྱང་མི་ཆེས་ན་ཡིད་ཆེས་ཤིང་གཏི་མུག་གི་ལན་བཤད་མི་ནུས་པ་ལྟ་སྨོས་ཀྱང་ཅི་དགོས། དགའ་བོ་ཆོས་ཀྱིས་དེ་བཞིན་པའི་རིགས་ཏེ། བདག་གི་ལུས་དང་བ་ཡིན་ན་གཞན་ལ་ཡང་ངན་ཅེས་ཟེར་རོ། །ད་ལྟར་གྱི་བར་དུ་ལེ་ལོའི་
དགེ་སློང་ལ་དེ་ཙམ་གྱི་ཚེ་རབས་ཀྱི་བར་དུ་བརྩོན་འགྲུས་པའི་དགེ་སློང་གིས་ཐུབ་པར་མི་ནུས་སོ། །ཚུལ་ཁྲིམས་འཛིན་ཏོ་ཅོག་དང་། ཤེས་རབ་བསྐྲུན་དུ་མི་རུང་ངོ་། །ཡང་དག་པར་གཤེགས་པས་མི་དེ་ཉེས་པ་ངན་པ་བྱས་སོ་ཅོག་བཤད་དུ་ཟིན་ན་ལུས་གྱུར་ཅིང་མནོས་སོ་ཅོག་

49-1-200a

མི་དེས་ཡིད་མི་ཆེས་ཏེ། སྡིག་ལྕི་བ་གཡོ་བར་འགྱུར་རོ། །ཁྱོད་ལ་སོགས་ཡང་འཇིགས་སྐྲག་སྟེ། དེས་ངན་པ་མནོས་སོ་ཅོག་ནི་དཔག་ཏུ་མི་ནུས་སོ། །དགའ་བོ་ཡང་དག་པར་གཤེགས་པས་ཟབ་མོའི་ཆོས་ནོད་པ་ནི་དཀའོ། །ཁྱོད་ཀྱི་ཡིད་ལ་ཇི་
སྙམ། ཁྲི་སྟན་བཟང་པོ་ལ་ཕག་གུ་སྲེད་དམ་མི་སྲེད། བཅོམ་ལྡན་འདས་མི་སྲིད་ལགས་སོ། །དགའ་བོ་ངའི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཀྱི་ཆོས་འདི་ཟབ་མོ་དམ་པ་སྟེ། ཤེས་རབ་ཅན་སྲེད་པ་ནི་མི་དེས་ཡིད་ཆེས་ཤིང་ཤེས་ལ་ཁོང་དུ་ཆུབ་པ་མ་ནུས་
པས། ཁྱིམ་ནས་བྱུང་ཟིན་པ་དང་། རང་ན་རེ་དགེ་སྦྱོང་ཞེས་ཟེར་ཏེ། བདེན་པ་བཞིན་དུ་བསྟན་བསླབས་པ་མནོད་མ་ནུས་སོ། །ཆོས་འདི་ལ་སེམས་བཅོས་མ་ནུས་སོ། །ཞིམ་མོའི་རོ་མ་ཐོབ་སྟེ་ལག་པ་བརྡབས་ནས་སོང་སྟེ། ལམ་ངན་པར་ལྷུང་ཞིང་འདུག་པ་ནི་དཔེར་ཕག་
གུས་ཁྲི་སྟན་བཟང་པོ་བཏང་བ་དང་མཚུངས་སོ། །ཅིའི་ཕྱིར་ཞེ་ན། དགའ་བོ་ངའི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཤིན་དུ་གཙང་གདང་བ་བསྟན་དཀའ་བས་ཡིད་ཆེས་ཤིང་ཤེས་པར་ནུས་པ་མ་ཡིན་ཏེ། གདུལ་བ་གདབ་དཀའ་བ་དང་། ཤེས་རབ་མེད་པ་དང་། དགང་
བར་དཀའ་བ་དང་། གསོ་བར་དཀའ་བ་དང་། ཚུལ་ཁྲིམས་ཞིག་པ་དང་། གདམས་དཀའ་བ་དང་། ཡོན་པོའི་ཆོས་ལ་ཆགས་པ་དང་། ཡོན་པོའི་སྤྱད་པ་སྤྱོད་པ་དང་། ནོར་གྱི་ཁེ་རིན་ཆེར་འཛིན་པ་དང་། གོས་དང་ཟས་རབ་པོ་སྙམ་དུ་འཛིན་པ་དང་། ཆོ་ག་ཞིག་པ་དང་། ཚུལ་
ཁྲིམས་ཞིག་པ་དང་། སྐྱེ་བོའི་ཆོས་སུ་ལྟུང་བ་དང་། ངན་པ་ཞིག་པ་དང་། ལེ་ལོ་ཅན་དང་། འདོད་རྒྱུ་ཆུང་ངུ་དང་། ཁྲེལ་མེད་པ་ངོ་ཚ་བའི་ཁ་ན་བརྗོད་པ་དང་། མཚོན་ནམ་ལས་ཀྱི་དོན་ལས་འབྲེལ་བ་དང་། དགེ་སྦྱོང་གི་ནང་ན་གོས་སྐྱ་བོ་ཅན་དང་། དགེ་སྦྱོང་གི་ནང་ན་སུན་བྱུང་བ་དང་། 
དགེ་སྦྱོང་གི་ནང་ན་ཡོན་པོའི་ལམ་སྤྱོད་པ་དང་། དགེ་སྦྱོང་མ་ཡིན་པར་རང་ན་རེ་དགེ་སྦྱོང་ཡིན་ཞེས་ཟེར་བ་དང་། བདུད་ཀྱིས་མིད་པ་དང་། མུར་འདུག་གི་གཞུང་དང་འཐུན་པ་དང་། བཤད་པ་བཞིན་མི་སྤྱོད་པ་དང་། མང་པོ་འཛིན་པ་ལ་སྲེད་པ་དང་། ཚིག་ཅལ་ཅོལ་ལ་སྲེད་པ་
དང་། བདུད་ཀྱི་དོན་ལྡན་པར་སྤྱོད་པ་དང་། བདུད་ཀྱི་རྒྱུད་དཀྲུག་པ་དང་། མྱ་ངན་འཁྲུག་པ་མདོ་རལ་བ་དང་། བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་ཏུ་ལྟ་བ་དང་། ཕྱིན་ཅི་ལོག་ཅན་གྱིས་ངའི་ཆོས་འདི་ལ་ཡིད་ཆེས་ཤིང་ཤེས་ལ་ཁོང་དུ་ཆུད་པར་ནུས་ཞེ་ན། བདེན་པ་

49-1-200b

ཡོང་མེད་དོ། །ཅིའི་ཕྱིར་ཞེ་ན། དགའ་བོ་ངའི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་གཙང་གདང་བ་སྙིང་ཚིམ་པར་རྒྱ་ཆེ་བས་མི་ངན་པ་འདི་དང་འཚབ་པར་མི་རུང་ངོ་། །དགའ་བོ་དཔེར་ན་བརྒྱ་སྟོང་འབུམ་གྱི་སྟོང་གསུམ་གྱི་སྟོང་ཆེན་པོའི་ཁམས་བར་ཡངས་ཤིང་
རིང་བ་དང་མཚུངས་སོ། །ངན་བཞིན་པའི་མི་འདིས་དགེ་སློང་གི་ཆོས་བསྲིངས་པ་ཡང་དེ་བཞིན་ནོ། །མི་འགལ་བའི་བཟོད་པ་དང་མྱ་ངན་ལས་འདས་པ་མི་ཐོབ་པ་ལྟ་སྨོས་ཀྱང་ཅི་དགོས། དགའ་བོ་དེ་ལྟ་བུའི་དོན་འདི་ནི་བཤད་ཀྱིས་མི་ཟད་དོ། །མ་འོངས་པའི་དུས་ཀྱི་
དགེ་སྦྱོང་ངན་བཞིན་པ་ཐ་མ་ཤིན་དུ་འཇུང་བརྐམ་སྲེལ་ཏོ། །ཤིན་དུ་ཞེ་སྡང་སྲེལ་ཏོ། །ཤིན་དུ་ཡིད་མི་ཆེས་པ་སྲེལ་ཏོ། །གདུག་པ་གསུམ་བདོ་བར་སེམས་ལ་སྤྱོད་པ་རྩིང་ཞེ་གནག་པས་བཅོས་གདུལ་དཀའ་སྟེ། དགའ་བོ་དཔེར་ན་ཞིང་གཤིན་པ་ལེགས་པར་
སྨིན་པ་ལ་རང་གི་མེས་བསྲེགས་པ་དང་མཚུངས། ཁ་ཟས་ཞིམ་དཀར་ལ་རང་གིས་དུག་བླུགས་པ་དང་མཚུངས། ཁང་ཁྱིམ་ཅི་ཡང་ཡོད་པ་ལ་རང་གིས་མེས་བསྲེགས་ན། དེ་ལྟ་བུར་རིགས་སམ་མི་རིགས། བཅོམ་ལྡན་འདས་མི་རིགས་ལགས་སོ། །དགའ་བོ་དེ་ལྟ་སྟེ་
མ་འོངས་པའི་དུས་ཀྱི་མི་གཏི་མུག་ངའི་ཆོས་ཀྱི་ཞར་གྱིས་ཡོན་ལེན་པ་ཐོབ་ན་ཡང་དག་པར་གཤེགས་པ་ལེགས་པའི་དོན་ལ་ཡིད་མི་ཆེས་མི་ཤེས་པའི་སྟེང་དུ་འདི་ལྟ་བུ་ལ་སོགས་པའི་ཆོས་ཀྱི་ཡི་གེ་ཡིད་ཆེས་པར་མི་ནུས་སོ། །བདེན་པ་བཞིན་དུ་བཤད་
པའི་ཉེས་པར་བཟོད་པར་མནགས་མི་ནུས་སོ། །རྨའི་ཤུ་བ་དང་ཤུས་ན་ངའི་ཚིག་ལ་བཟློག་སྟེ། དེ་ལྟ་བུའི་མི་གཏི་མུག་ནི་སངས་རྒྱས་ལ་རྟེན་ཅིང་རང་འཚོལ་ཆོས་དེ་ཟློག་གོ། །དགའ་བོ་དེ་ཙམ་གྱི་ཚེ་ན་འཛམ་བུའི་གླིང་གི་ནང་ན་དེ་ལྟ་འགལ་ཏེ། །མྱ་ངན་རྣམས་
གྱི་ནན་དུར་བྱས། །དེ་ཡི་ཚེ་དུས་ངན་པ་ལ། །དགེ་སློང་སེམས་ནི་འཁྲུག་ཅིང་གཡོ། །འཐབ་ཅིང་རྩོད་ཅིང་ཡིད་མི་ཆེས། །མྱ་ངན་འདས་པ་ཐོབ་མི་ནུས། །དགེ་སློང་དང་ནི་གོས་སྐྱ་ཅན། །འཆད་དོ་ཅོག་ལ་མི་མཚུངས་མེད། །དེ་ཚེ་ང་ཡི་ཆོས་འདི་ནི། །ཐ་མལ་ཆོས་
དང་ཐ་དད་མེད། །བཤད་ནི་ཁྱིམ་ན་འདུག་ཕྱིར་བཤད། །ཁྱོད་ཀྱིས་ང་ཡི་ཡོད་དཀོན་ཤེས། །ང་ཡི་སངས་རྒྱས་ཆོས་ལས་སུ། །ཐོག་མ་ལམ་གྱི་མཆོག་འབྲས་ཐོབ། །དེ་ནས་དགེ་སློང་ཞིག་ན་རེ། །ངས་བཤད་ལམ་དང་མི་མཐུན་ན། །མི་དེ་ང་དང་འཐུན་པ་ཡིན། །

49-1-201a

ང་ཡིན་ཡང་དག་ཆོས་མཐོང་བའོ། །ཆོས་མཐོང་དང་ནི་མ་མཐོང་བ། །གོས་སྐྱ་ཅན་གྱིར་སྤྱད་པས་ངུ་། །སོ་སོ་རང་གི་ཆོས་ནང་གི། །དེ་ཡི་འགྲོ་ཞིང་བརྗོད་པ་སྐྱེས། །ལ་ལ་ན་རེ་ཐམས་ཅད་ཡོད། །ལ་ལ་ན་རེ་ཐམས་ཅད་སྟོང་། །དྲང་པོ་ལམ་ལ་
མི་གནས་པས། །རང་བཞིན་ངན་པས་ང་ཆོས་པས། ཁྱོད་མི་དེ་ལ་མ་ཉེ་ཤིག །ང་ལ་འོངས་ཏེ་བསྙེན་པར་རུང་། །ཁྱོད་ལ་ཡང་དག་ཆོས་བཤད་ན། །རང་བཞིན་སྨྱུར་རེ་ལམ་ཐོབ་བོ། །དེ་ལྟ་བུ་ཡི་སྒྲ་སྐད་རྣམས། །ཉེ་རིང་ཀུན་དུ་ཁྱབ་པར་གྲམ། །སེམས་
འཐུན་ཞིང་ནི་གྲོགས་ལྡོག་པས། །ངས་སུ་བསྟན་པའི་ཆོས་ཀུན་བཤིག །དཔེ་རུ་རྐུན་པོ་ངན་པ་རྣམས། །ངན་པ་འཐུན་པ་གྲོགས་སུ་བྱས། །ལོག་ཅིང་འགལ་བ་ཡུལ་ས་དང་། །མཁར་ཡུལ་དང་ནི་གྲོང་ཁྱིམ་བཤིག །དེ་ཡི་ཚེ་ཡི་དགེ་སློང་རྣམས། །དབྱེ་ཞིང་
བསྟན་པ་རུང་ཐོབ་ཀྱང་། །དབང་པོ་རྟུལ་བའི་ཟམ་ཆགས་པས། །ཤེས་རབ་ཉུང་ཞིང་མི་རྟེན་པ། །ཡང་དག་གཤེགས་པ་སྤྱོད་པ་བཞིན། །ཆོས་བཤད་པ་ཡང་མི་ཤེས་ཏེ། །ཟག་པ་མེད་པ་ཡར་སྐྱེ་བཤད། །ཡང་ན་དེ་ནི་ལམ་ཐོབ་ཡིན། །མང་པོ་ཚོགས་པའི་ནང་དུ་
འདུག །དགེ་སློང་རྣམས་ནི་མང་དུ་ཡོད། །ཀུན་ན་རེ་ནི་ཤེས་རབ་ཡོད། །ཤེས་རབ་ཚོལ་བ་མི་གཅིག་མེད། །མང་པོ་ཚོགས་པ་དེ་ནང་ན། །དགེ་སློང་ལ་ལ་གཅིག་འགའ་ཞིག །ཡང་དག་བདེན་པ་ཤེས་པ་ཡོད། །ཀུན་གྱིས་སྤྱོད་དེ་ཤེས་རབ་མེད། །ལྷ་དང་ལྷ་མ་སྲིན་
གྱིས་མཐོང་། །ཆོས་ཀྱི་རྒྱལ་པོའི་ལམ་ཁྱེ་ཤིག །ཐམས་ཅད་མྱ་ངན་འཁྲུག་པ་སྲེལ། །གཅིག་ལ་གཅིག་ཕྱོགས་མཆི་མས་ངུ་། །དེ་ནང་ཤིང་ལྷ་ཡོད་པ་ཀུན། །ཤིང་གི་ཁ་ལས་ས་ལས་བབས། །ཀུན་ཀྱང་ཤཱཀྱ་སེང་གེ་ཡི། །དམ་པའི་ཆོས་ནི་མཐའ་ཀུན་མེད། །
སངས་རྒྱས་ལ་སོགས་དཀོན་མཆོག་གསུམ། །འཇིག་རྟེན་ཡུན་རིང་མ་ལོན་པར། །ཇི་ལྟ་བུར་ནི་དེ་རིང་ཀུན། །ཟད་པ་ཐམས་ཅད་གྱེས་ཤིང་ཞིག །ཡང་དག་གཤེགས་པ་ཆོས་བཤད་པ། །ང་ལ་སོགས་པ་སླར་མི་ཐོས། །བླུན་རྨོངས་མེད་པས་ཤེས་པས་སུ། །བླ་མ་ལམ་
ནི་མེད་སྙམ་སྟེ། །དེ་ཚེ་ས་ཡི་ལྷ་རྣམས་དང་། །སྒྲ་སྐད་ཆེན་པོ་ཕྱུང་ནས་སུ། །ཡང་དག་གཤེགས་ཀྱི་ཆོས་སྒྲོན་ཆེན། །དེ་ནི་མི་དེ་ཟད་ཅེས་ཟེར། །ལྷ་དང་ལྷ་མ་སྲིན་གྱི་རྣམས། །མ་མཐོང་མ་ཐོས་རྗེས་སུ་འཛེར། །ཕྱིན་ཅད་འགྱོད་པ་མ་བྱེད་ཅིག །སངས་རྒྱས་ལམ་ནི་མེད་ཟིན་པ། །

49-1-201b

སངས་རྒྱས་བསྐལ་པ་གྲངས་མེད་དུ། །བདག་ཀྱང་གསོད་ལ་གཞན་ཡང་གསོད། །སྡུག་བསྔལ་ཐམས་ཅད་བཟོད་པར་གནོས། །བུའི་མི་གཏི་མུག་གིས་དེ་ན་ལྟག་པོར་གང་ངོ་། །དགའ་བོ་རེ་ཤིག་ཞོག །དེ་ལྟ་བུའི་མི་གཏི་མུག་ངན་པ་སྐྱེ་བར་འདོད་པ་དང་། རྒ་བར་
འདོད་པ་དང་། ངན་པའི་དོན་སྤྱོད་པ་བཙལ་བ་ཅི་དགོས། དེ་ནས་དགའ་བོས་སངས་རྒྱས་ལ་གསོལ་པ། བཅོམ་ལྡན་འདས་ཆོས་ཀྱི་ཡི་གེ་འདི་མིང་ཅི་ཞེས་བགྱི། ཇི་ལྟ་བུ་གུས་པས་གཟུངས་སུ་གཟུང་། སངས་རྒྱས་ཀྱིས་དགའ་བོ་ལ་བཀའ་སྩལ་པ། ཆོས་ཀྱི་ཡི་གེ་
འདིའི་མིང་སངས་རྒྱས་མཛོད་ཅེས་བྱའོ། །མིང་བརྩོན་འགྲུས་གཡོ་བ་སྤྱོད་ཅེས་ཀྱང་བྱའོ། །མིང་ཚུལ་ཁྲིམས་ཞིག་པའི་ཁྲགས་ཐུལ་ཅེས་ཀྱང་བྱའོ། །ཆོས་སོ་ཅོག་ལ་གཏམས་སྩལ་ཅེས་ཀྱང་བྱའོ། །གུས་པར་གཟུངས་སུ་གཟུང་ཤིག །དགའ་བོ་མི་ལ་ལ་ཞིག་
གིས་ཆོས་ཀྱི་ཡི་གེ་འདི་ཁ་ཏོན་དང་། གཟུངས་སུ་གཟུང་ན་ལེགས་པའི་དོན་ཐོབ་པ་ནི་དཔག་ཏུ་མེད། མུ་མེད། ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་དགེ་སློང་གིས་ཡིད་ཆེས་ཤིང་ཁ་ཏོན་དང་། བཀླགས་ལ་མི་ལ་བསྟན་པ་ཡང་མི་ནུས་ན། དེ་ལ་སེམས་དགའ་
གཞའ་བ་མི་ནུས་པ་ལྟ་སྨོས་ཀྱང་ཅི་དགོས། ཅིའི་ཕྱིར་ཞེ་ན། དགའ་བོ་དཔེར་རྐུན་པོ་ངན་པ་རྒྱལ་པོ་དང་། རྒྱལ་པོ་ཆེན་པོའི་ཐད་དུ་རང་དབྱུང་དུ་མི་སྤོབས་པ་དང་མཚུངས་སོ། །གཞན་གྱི་རྫས་བརྐུས་ན་བདག་རྐུན་པོ་ཡིན་ཞེས་མི་ཟེར་རོ། །དེ་ལྟ་སྟེ། དགའ་བོ་ཚུལ་ཁྲིམས་
ཞིག་པའི་དགེ་སློང་གིས་དགེ་སྦྱོང་གི་ཆོས་མ་ཡིན་པར་འབྱོར་གྲུབ་ན། འོན་ཀྱང་བདག་ངན་པ་ཞེས་མི་ཟེར་ན། མི་གཞན་ལ་རང་ན་རེ་སྡིག་གིས་ཤེས་འཆད་མི་ཕོད་པ་ལྟ་སྨོས་ཀྱང་ཅི་དགོས། དགའ་བོ་འདི་ལྟ་བུའི་ཆོས་ཀྱི་ཡི་གེ་ནི་ཚུལ་ཁྲིམས་ཞིག་པའི་དགེ་སློང་རང་ཐུལ་ཁུགས་
པར་ནུས་ན། ཁྲེལ་དྲིན་ཡོད་པ་དང་། ཚུལ་ཁྲིམས་འཛིན་པའི་དགེ་སློང་གིས་རང་སྐྱེ་ཞིང་འཕེལ་བ་འཐོབ་བོ། །ཆོས་ཀྱི་ཡི་གེ་འདི་བཤད་པའི་ཚེ། ལྷ་དགུ་ཁྲི་ཀུན་གྱིས་ཆོས་སོ་ཅོག་ལ་ཆོས་ཀྱི་མིག་གཙང་མ་ཐོབ་ནས་བདུད་ངན་པ་དང་གཉེན་གཤེས་རྣམས་ཀུན་མྱ་ངན་ཆེན་པོ་
འཁྲུགས་པ་ནི་དཔེར་ཁུང་ཆེན་པོ་རྣམ་པ་བཅུ་དྲུག་ཏུ་ལྷུང་བ་དང་མཚུངས་ཏེ། སྐད་ཆེར་ངུས་ཏེ་སྨྲས་པ། དགེ་སྦྱོང་གཽ་ཏ་མཱི་ངས་ཤེས་སོ། །ངས་ཚོར་རོ། །ངས་རྟག་པར་ཉིན་མཚན་དུ་སྨོན་པ། སངས་རྒྱས་འདས་པའི་ཕྱི་ན་ཚུལ་ཁྲིམས་འཛིན་པ་བཤིག་སྟེ། ཚུལ་ཁྲིམས་

49-1-202a

བཤིག་པ་ཡང་བསྟངས། དགེ་སློང་ངན་པ་རྣམས་སངས་རྒྱས་ཀྱི་ཆོས་མི་ཤེས་ཤིང་ཁ་ཏོན་དང་། ཀློག་པ་འབའ་ཤིག་ཤེས་པར་བྱའོ། །སངས་རྒྱས་ཀྱི་ཆོས་ལ་བདེན་པའི་སེམས་བཤིག་ལ་ཚིག་གིས་འདི་སངས་རྒྱས་ཀྱི་ཆོས་མ་ཡིན་ཏེ་ཕྱོགས་བཞིའི་
གཞུང་མེད་དོ་ཞེས་བྱའོ། །གཽ་ཏ་མཱི་ད་ལྟར་ལྷ་དང་མི་དང་ཕལ་མང་པོ་ཀུན་ཚོགས་པའི་ནང་ན་ཆོས་འདི་ལ་སྲུངས་བྲན་ཏེ་ངའི་སྨོན་ལམ་བཀག་གོ། །བདུད་ཀྱི་བཤད་ཟིན་ནས་མི་དགའ་བའི་མྱ་ངན་འཁྲུག་པ་སྲེལ་ཏེ་ཕྱོད་ཅེས་མི་གནང་ངོ་། །དེ་ནས་བཅོམ་ལྡན་འདས་ཀྱིས་དོན་འདི་
མངོན་གསང་བར་བྱ་བའི་ཕྱིར་ཚིགས་སུ་བཅད་དེ་གསྲུངས་པ། ངས་སུ་ཆོས་རྣམས་བཤད་དོ་ཅོག །མཆོག་གི་གཞུང་བཞིན་མི་འགལ་ཏེ། །བྱ་བ་ཡོད་པ་མི་སྲ་བ། །དཔེ་རུ་རྨི་ལམ་མཐོང་དང་མཚུངས། །ངས་ད་ཆོས་ཡིག་འདི་བཤད་པ། མ་འོངས་དོན་ནི་སྤྱད་ཅིང་བསྐྲད། །
མཆོག་གི་གཞུང་བཞིན་མི་འགལ་ཏེ། སངས་རྒྱས་གྲུབ་པས་སྨོན་ལམ་བསྐྱེད། །ཤཱཀྱ་སེང་གེ་འཕྲུལ་ཅན་གྱིས། །སེམས་ཅན་ཐམས་ཅད་ཀུན་བསྒྲལ་བ། །གཙང་གདང་ཆོས་མེད་ཟད་དུ་བྱེད། །གཏི་མུག་ངན་པའི་དགྲ་རྣམས་ཀུན། །དེ་ནི་དེ་ཡི་མཐུ་ཐོབ་སྟེ། །བྱམས་
ཤིང་སྙིང་རྗེའི་སེམས་མེད་པས། །གཅིག་གིས་གཅིག་ལ་སྐུར་ཅིང་བཀྲུགས། །བདུད་ཀྱིས་བཀོལ་བའི་བདུད་མི་རྣམས། །དབང་པོ་རྟུལ་བས་དབྱེ་ཆོས་དཀའ། །བཅམ་སྒྱུ་མི་དྲན་ལེ་ལོའི་སེམས། །ཞེ་སྡང་སངས་རྒྱས་ཆོས་ཀྱང་བཤིག །ཚལ་ནག་སྟོང་པ་འབའ་
ཤིག་ལ། །བསམ་གཏན་ཐུབ་སྟེ་གསུམ་ལོན་ན། །རང་ན་རེ་ནི་དགྲ་བཅོམ་ཡིན། །བསམ་གཏན་ཐུབ་སྟེ་གསུམ་མེད་ན། །ལམ་ཐོབ་པ་ལྟ་སྨོས་ཅི་དགོས། །ལམ་མཐོང་ཐོབ་ཅེས་བྱ་བ་ནི། །ཤི་ན་མྱ་ངན་འདས་ཤེས་ཟེར། །མི་ཀུན་ཡིད་ཆེས་མཆོད་རྟེན་བརྩིགས། །སེམས་ཅན་དམྱལ་བར་
སོང་ཞེས་ཟེར། །དེ་ལྟའི་གཏི་མུག་སྟོང་པ་འགས། །གཅིག་ལ་གཅིག་ནི་བརྙས་ཤིང་ཁྲོ། །ངས་སུ་བསྐལ་པ་གྲངས་མེད་དུ། །ཐོབ་བོ་ཅོག་ནི་ད་ཟད་ཀྱི། །ད་ལྟར་ནམ་མཁའི་ལྷ་རྣམས་ཀྱིས། །ཤཱཀྱའི་རིགས་གྱི་སེང་གེ་མཐོང་། །དམ་པའི་ཆོས་ནི་ཉམས་ཞིང་ཞིག །སྒྲ་སྐྱོད་ཀུན་གྱིས་
མཆི་མས་ངུ་། །ངོས་བཞི་ལྷ་རྗེས་དེ་ཐོས་ན། །ཀུན་ཀྱང་མྱ་ངན་འཁྲུག་པ་སྲེལ། །དེ་ཚེ་ལྷ་དང་ལྷ་མ་སྲིན། །ཐམས་ཅད་ཀྱང་ནི་འོངས་ཏེ་བབས། །ཡང་དག་པ་ན་མཁར་གནས་སུ། །འབར་བའི་ལྷ་སྲིན་ཀུན་འོངས་ཏེ། །ཀུན་གྱིས་མཆི་མས་ཆེར་ངུས་ཏེ། །འཇིགས་སུ་

49-1-202b

རུང་བའི་སྒྲ་སྐད་ཕྱུང་། །རིན་ཆེན་བདུན་གྱི་མཁར་རྣམས་ཡོད། །བྱི་དོར་བརྒྱན་པ་ཤིན་ཏུ་བཟང་། །ཁ་དོག་སྟོར་ཏེ་ས་དང་མཚུངས། །ལྷ་རྣམས་འཁོར་བར་མ་དད་ནས། །མི་དགའ་ཆོ་ངེ་ཆེ་རུ་ངུས། །རང་གི་གནས་ནས་ཀུན་འོངས་འདུས། །སོ་སོ་མྱ་ངན་འཁྲུག་པ་སྲེལ། །
གཅིག་གིས་གཅིག་མཐོང་སྨྲ་མི་ཕོད། །ཀུན་གྱི་གནས་ཀྱི་སྟེང་ནས་འོངས། །ལྷན་ཅིག་ང་སྐྱེ་གནས་སུ་ཕྱིན། །འགྲོ་ལྡོག་ས་ལ་ཉལ་འདུག་གནས། །འདི་སྐད་ཀྱི་ནི་སྒྲ་དབྱངས་བསྐྱོད། །ལྷན་ཅིག་འཛམ་བུའི་གླིང་དུ་དོང་། །དེ་ལྟའི་འཇིགས་སྐྲག་ཆེན་པོ་མཐོང་། །
སངས་རྒྱས་བུ་རྣམས་མཐོང་ཅིང་རྩོད། །ཆོས་བཤིག་སྡེ་ནི་སོ་སོར་གྱེས། །ལྷ་སྲིན་དང་ནི་རིན་ཆེན་མཁར། །ཞག་བདུན་བར་དུ་འོད་མདངས་མེད། །སོ་སོ་ལྷན་ཅིག་འཁོད་ཅིང་ངུ་། །ཞག་བདུན་བར་དུ་མ་ལངས་སོ། །ཇི་ལྟ་བུ་ནི་བརྩོན་འགྲུས་ཆེ། །དཔའ་ཞིང་
བརྟུལ་ལ་འཇིག་རྟེན་བཙུན། །བདག་ཅག་ད་ལྟར་འདི་ན་འཁོད། །ད་ཕྱིན་ཆད་ནི་མི་མཐོང་ངོ་། །ཀུན་འགྲོགས་ཏེ་ནི་གྱི་ཧྭན་དོང་། །གཅིག་ལ་གཅིག་ཕྱོགས་ཕྱི་མས་ངུ་། །སངས་རྒྱས་འདི་རུ་བདེན་བཞིན་བཤད། །བདག་ཅག་རྣམས་ནི་དེ་ནང་ན། །འཇིག་
རྟེན་མུན་པའི་ལོང་བ་རྣམས། །གཅིག་ལ་གཅིག་ནི་བརྙས་ཁྲོ་ལྷོང་། །ངན་པའི་ལས་རྣམས་འབའ་ཤིག་བསྐྱོད། །སླར་ཡང་ལམ་ངན་པ་རུ་ལྷུང་། །ལྷ་རྣམས་ཕོ་བྲང་བཟང་པོ་ཀུན། །འཕགས་པ་དེ་ནི་སྟོངས་སུ་བྱེད། །བདག་ཅག་ལྷ་དང་ལྷ་མ་སྲིན། །བསྐལ་
པའི་ར་འདའ་ཡང་མེད་དོ། །དེ་ཡི་ཚེ་ནི་འཛམ་བུའི་གླིང་། །ཉམས་ཤིང་ཞིག་ལ་བརྗིད་མདངས་མེད། །བགྲོད་པའི་མདངས་དང་ཤིང་དྲུང་དང་། །རི་དང་ཕུག་ན་དགེ་མི་བྱེད། །འཇིག་རྟེན་ཐམས་ཅད་ཟད་པར་ན། །ཀུན་ཀྱང་ཤིན་ཏུ་དཀྲུགས་ཅིང་གཡོ། །ལྷ་དང་ལྷ་མིན་དབང་པོ་
རྣམས། །སྒྲ་སྐད་འཇིགས་ཤིང་སྐྲག་ཏུ་རུང་། །དེ་ཚེ་སུམ་བཅུ་རྩ་གསུམ་ལྷ། །ལྷག་བསྒྲེང་བཞིན་དུ་མི་དགའ་ངུ་། །སོ་སོའི་ཕོ་བྲང་ནང་ན་ཡང་། །སྐད་ཕྱུང་བསྐྱོད་དེ་ངུ་ཞིང་འབོད། །ལྷ་རྣམས་ཀྱི་ནི་ཕོ་བྲང་ན། །བདག་བདག་བརྗོད་ཅིང་བཤད་པ་དེ། །གཞའ་རུ་
འཕྲུལ་ཆེན་རྗེ་དང་བྲལ། །བདག་ཅག་ཕྱི་རུ་ཆོས་བཤད་པ། །རྩ་གསུམ་ལྷ་ཁམས་ཟླ་དྲུག་ཏུ། །རྩེའུ་དེའི་ཁ་ཟས་མི་ཟ་ཞིང་། །སིལ་གྱི་དབྱངས་ནི་མི་སྙན་ཏེ། །མི་དགའ་མི་ངན་ཤི་བ་བཞིན། །ལྷ་མ་ཡིན་པ་ཐམས་ཅད་ཀྱིས། །དེ་ལྟ་བུ་ཡི་གཏམ་ཐོས་ནས། །

49-1-203a

གཅིག་གིས་གཅིག་བྲན་ཀུན་སོགས་ཏེ། །རྩ་གསུམ་ལྷ་ལ་རྒོལ་དུ་ཆས། །དེ་ཚེ་འཛམ་གླིང་རྒྱལ་པོ་དག །ཕན་ཚུན་འཐབ་ཅིང་རྩོད་པར་འགྱུར། །ལྷ་རྣམས་དང་ནི་ལྷ་མིན་ཀྱང་། །དེ་བཞིན་ཕན་ཚུན་འཐབ་ཅིང་རྩོད། །དེའི་ཚེ་དགེ་སློང་དགེ་སློང་མ། །
ལས་སུ་ལམ་ངན་ལྷུང་བ་མང་། །དེ་ལས་ཐར་པར་ཉུང་ངུ་ཡོད། །ཚུལ་ཁྲིམས་བཤིག་པའི་སེམས་ཅན་རྣམས། །དགེ་སློང་ངན་པ་བཞིན་དུ་འབྲང་། །དེ་ཡི་རྒྱུ་རྐྱེན་སྤྱད་པས་ན། །ཀུན་ཀྱང་ལམ་ངན་པ་ལ་ཕྱོགས། །དགེ་བསྙེན་ངན་པ་རྣམས་ཀུན་ཀྱང་། །མཁན་པོ་ངན་
པའི་ཕྱིར་འབྲངས་པས། །དེ་ཡང་ལམ་ངན་པ་རུ་སོང་། །འཇིག་རྟེན་ཐམས་ཅད་འཁྲུགས་གཡོས་པས། །ལ་ལ་མཁར་དང་གྲོང་དུ་ཞུགས། །ལ་ལ་རི་དང་ཚལ་དུ་ཕྱིན། །ཤར་ནུབ་ཏུ་ནི་མྱ་ངན་སྲེལ། །དེ་ཡི་ཚེ་དང་སྲོག་ལ་གནོད། །དེ་ཡི་ཚེ་ནི་དགྲ་དག་དང་། །བག་ཚའི་ལམ་ནི་
རྣམ་མང་ཡོད། །ཁྲེ་ནས་རྣམ་ལྔ་བསྐྱེད་མི་འཁྲུང་། །འཁྲུངས་སུ་ཟིན་ཀྱང་སྲིན་གྱིས་ཟོས། །དེ་ཡི་ཚེ་ནི་འཇིག་རྟེན་རྣམས། །བཀྲེས་པས་ལྟོགས་ཏེ་ཤི་བ་མང་། །ཡི་དགས་ངན་དུ་ལྷུང་བ་རྣམས། །ཡུན་དུ་སྡུག་བསྔལ་ཉོན་ཡང་མོངས། །དེ་ཡི་ཚེ་ན་མི་རྣམས་ཀྱིས། །སངས་རྒྱས་
ཀྱི་ནི་མཆོད་རྟེན་དང་། །ཕྱོགས་བཞི་དགེ་འདུན་སྦྱིན་པའི་ནོར། །ཐུགས་ཐུབ་ཏུ་ནི་ཀུན་བགོས་ཟོས། །ད་ནི་དགེ་འདུན་དེ་བཞིན་ནོ། །དགའ་བོ་ཁྱོད་ལས་སོགས་པ་རྣམས། །ནུབས་ཏེ་བྱུང་ལ་བརྩོན་འགྲུས་སྤྱོད། །ཕྱི་མའི་ཚེ་དུས་ཟད་པ་ན། །དེ་ལྟ་བུ་ཡི་ཆོས་ངན་རྣམས། །མཐོང་
བར་བྱ་བ་མི་རིགས་སོ། །ཐ་མལ་པ་ནི་ཐམས་ཅད་ཀུན། །གཏི་མུག་བླུན་པོ་ཤེས་རབ་མེད། །ཐ་མལ་པ་ཡི་ལས་རྣམས་སྤྱོད། །སྨྱུར་ཏེ་ལམ་ངན་ངན་དུ་ལྷུང་། །ཁྱེད་རྣམས་འཁྲུག་པར་ཁ་ཏོན་ལྷོགས། །དེ་ཡི་མིག་ནི་ཤེས་རབ་རྒྱུ། །ཤེས་རབ་ཀྱི་ནི་ཡོན་གྱིས་སུ། །སྨྱུར་ཏེ་རྒྱལ་
བའི་གནས་སུ་ཕྱིན། །ངས་སུ་འཇིག་རྟེན་དྲུག་པོ་མཐོང་བསླབས་པ། །ཁྱེད་རྣམས་ཀྱང་ནི་ང་བཞིན་བསླབས། །འཇིག་རྟེན་བསྒྲིབས་དཔག་དོན་བཅད་ན། །སྨྱུར་ཏེ་རྒྱལ་བའི་གནས་སུ་ཕྱིན། །འཕགས་པའི་ལམ་བརྒྱད་འགྲུས་སྤྱད་ན། །སྨྱུར་ཏེ་མྱ་ངན་འདས་པ་ཐོབ། །ཆོས་
བཙལ་བདག་གིས་བསོད་ནམས་བཙལ། །ངས་བཤད་ཅོག་ནི་དེ་བཞིན་ནོ། །བསྐལ་པ་འདི་ནི་འདས་ཕྱི་ན། །བསྐལ་པ་དྲུག་བཅུར་སངས་རྒྱས་མེད། །སངས་རྒྱས་སྒྲ་དང་སྐད་ཀྱང་མེད། །ལམ་ཐོབ་མེད་པ་སྨོས་ཅི་དགོས། །དེ་ཚེ་དུས་ཀྱི་མི་རྣམས་ཀུན། །བཀྲེས་ལྟོགས་བྲུ་བས་ཉེན་

49-1-203b

པས་སུ། །སྲི་ཞུ་བྱམས་པ་སེམས་མེད་དེ། །མ་དང་བུ་ཡི་ཤ་ཡང་ཟ། །དེ་ཚེ་ཁྱིམ་གྱི་བྱིས་པ་རྣམས། །གཞན་གྱིས་ཟོས་དོགས་རིམ་གྲོ་རྟག །དེ་ལྟ་བུ་ཡི་དུས་ངན་ཐོས། །སུ་ཞིག་སྐྱེ་ཤི་ལས་ཀྱང་བསྐྱེད། །སྡུག་བསྔལ་ཕྱི་མོ་གཏི་མུག་ཡིན། །ལྔ་ཕུང་ཕྱི་མོ་འདོད་ཆགས་ཡིན། །
འདོད་ཆགས་ལྔ་ལ་མ་དད་ན། །འདོད་ཅིང་ཆགས་པ་རྣམས་ཀུན་ཆོད། །དཔལ་གྱི་འབྲས་བུ་ལམ་ཐོབ་སྟེ། །འདོད་ཅིང་ཆགས་པའི་སེམས་ཟབ་སྐྱེས། །འདོད་ཆགས་ཀྱི་ནི་རྒྱུ་རྐྱེན་གྱིས། །ངན་པ་གཡོས་པས་ལམ་ངན་ལྷུང་། །བགས་མེད་ཆོས་ནི་སྟོང་པ་ཞི། །འཇིག་རྟེན་སྲ་
མཁྲང་མེད་པར་འགྱུར། །དེ་ལྟ་བུ་ནི་ཤེས་རིག་ན། །ཁྱེད་ལ་སོགས་པས་སྨྱུར་སྤྱོད་རིགས། །སེམས་མེད་སེམས་ཀྱི་འདུ་ཤེས་སྐྱེས། །བདག་ཉིད་ཤིན་ཏུ་འཇིགས་ཤིག་སྐྲག །བདག་གིས་བྱམས་བསམས་མ་བྱས་པ། །དེ་ཡི་དོན་ནི་ཇི་ལྟ་བུ། །དེ་ལྟ་བུ་ཡི་ཐ་མལ་
རྣམས། །བསམས་ཤིང་མནོས་ཏེ་བཀྲོས་དཔགས་ན། །བདག་གིས་ཇི་ལྟ་བུ་རུ་བྱས། །དེ་བཞིན་རྟག་པར་མཆི་མས་ངུ་། །ཕུང་མེད་ཕུང་པོའི་འདུ་ཤེས་སྐྱེས། །ང་མེད་ང་ཡི་འདུ་ཤེས་སྐྱེས། །ཉིད་ཀྱི་མཚན་མའི་སྟོང་ཆོས་ཐོས། །དེ་ལྟ་བུས་ཀྱང་བསླབ་ཅིང་རྨོངས། །སངས་
རྒྱས་ཀྱིས་སུ་བདེན་བཤད་པ། །ཕུང་པོ་རྣམས་ཀྱི་གཞུང་མ་རིག །ཐོས་ན་མི་འགྱུར་སྙམ་དུ་འཛིན། །འཇིགས་པའི་གནས་འཇིགས་སེམས་པ་མེད། །ངས་འདས་མ་འོངས་ད་ལྟར་བཤད། །ཕུང་པོ་རྣམས་ནི་ཀུན་སྟོང་ཞིང་། །དུས་གསུམ་ཟད་པར་མཉམ་སྙོམས་ཏེ། །
དཔེ་རུ་ནམ་མཁའ་སྟོང་པ་བཞིན། །འདས་པའི་སངས་རྒྱས་ཡོད་དོ་ཅོག །དེས་ཀྱང་ཉིན་མཚན་སྟོང་པར་བཤད། །མ་འོངས་དུས་ཀྱི་སངས་རྒྱས་རྣམས། །དེས་ཀྱང་ཉིན་མཚན་སྟོང་པར་བཤད། །ང་འདྲ་འཇིག་རྟེན་མངོན་པར་འབྱུང་། །ཆོས་རྣམས་ཐམས་ཅད་ཀུན་
བཤད་ཀྱང་། །ངོ་བོ་ཉིད་དང་མཚན་ཉིད་སྟོང་། །དུས་གསུམ་ལ་ནི་མི་མཚུངས་པ། །སངས་རྒྱས་དབེན་གཞུངས་བཤད་དོ་ཅོག །མ་འོངས་མིས་ནི་མི་ཤེས་ཏེ། །ང་དང་སེམས་ཅན་ལ་ཆགས་པས། །མཐའ་རུ་ངན་པའི་ལམ་དུ་ལྷུང་། །མ་འོངས་དུས་ནི་དེ་བཞིན་ཏེ། །ངན་
ཆེན་ཤིན་དུ་འཇིགས་སྒྲག་རུང་། །ཁྱོད་ལ་སོགས་པ་བརྩོན་འགྲུས་སྤྱོད། །དེ་ལྟའི་དུས་ངན་མ་མཐོང་བྱོས། །སངས་རྒྱས་ཆོས་ཀྱི་ཡི་གེ་འདི་བཤད་ཟིན་ནས། རྒན་ཞིང་བཙུན་པ་ཤཱ་རིའི་བུ་དང་། དགེ་སློང་དང་། དགེ་སློང་མ་རྣམས་དང་། འཇིག་རྟེན་གྱི་ལྷ་དང་། 

49-1-204a

མི་མང་པོ་ཐམས་ཅད་ཀྱིས། སངས་རྒྱས་ཀྱིས་བཤད་དོ་ཅོག་ཐོས་ནས། ཀུན་ཤིན་ཏུ་དགའ་གཞའ་སྟེ། སངས་རྒྱས་ཀྱིས་བཤད་པ་ལ་ཡིད་ཆེས་པར་མནོས་སོ། །སངས་རྒྱས་ཀྱིས་བཤད་པ་སངས་རྒྱས་ཀྱི་མཛོད་རྫོགས་སྷོ།། །།ཤུ་ལོག་སྟོང་ཉིས་བརྒྱ་སྟེ་བམ་
པོ་བཞིར་བྱས་སོ།། །། ༄༅༅། །རྒྱ་གར་སྐད་དུ།  ཨཱརྱ་རད་ནཱ་ཀ་ར་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ། འཕགས་པ་དཀོན་མཆོག་འབྱུང་གནས་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། 
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་གནས་བཅས་ན་ནག་པོའི་ཀུན་དགའ་ར་བ་ན་དགེ་སློང་གི་དགེ་འདུན་ཆེན་པོ་དབང་དང་ལྡན་པར་གྱུར་པ། མངོན་པར་
ཤེས་པ་མངོན་པར་ཤེས་པའི་དགྲ་བཅོམ་པ་དྲུག་ཁྲི་ཉིས་སྟོང་དང་། འཇམ་དཔལ་གཞོན་ནུར་གྱུར་པ་ལ་སོགས་པ་བྱང་ཆུབ་སེམས་དཔའ་བརྒྱད་ཁྲི་བཞི་སྟོང་དང་ཐབས་གཅིག་ཏུ་བཞུགས་ཏེ། ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པ། ཐེག་པ་དཔག་ཏུ་
མེད་པ་ལ་ཡང་དག་པར་ཞུགས་པ། ཐེག་པ་གྲངས་མེད་པ་ལ་ཡང་དག་པར་ཞུགས་པ། ཐེག་པ་བསམ་གྱིས་མི་ཁྱབ་པ་ལ་ཡང་དག་པར་ཞུགས་པ། ཐེག་པ་མཚུངས་པ་མེད་པ་ལ་ཡང་དག་པར་ཞུགས་པ། ཐེག་པ་དཔག་ཏུ་མེད་པ་ལ་ཡང་དག་པར་ཞུགས་པ། ཐེག་པ་བརྗོད་
དུ་མེད་པ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་གྲངས་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་
ཡང་དག་པར་ཞུགས་པ། འཇིག་རྟེན་གྱི་ཁམས་བསམ་གྱིས་མི་ཁྱབ་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་མཚུངས་པ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་
དག་པར་ཞུགས་པ། འཇིག་རྟེན་གྱི་ཁམས་ཚད་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་

49-1-204b

ཞུགས་པ་ཤ་སྟག་གོ། །དེ་ནས་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་ཐམས་ཅད་ཟིལ་གྱིས་གནོན་པ་ལ་སོགས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་ཐུགས་བརྩེ་བའི་
སླད་དུ་རང་གི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་བཤད་དུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས་འཁོར་འདི་ན་བྱང་ཆུབ་སེམས་དཔའ་ཐེག་པ་ཆེན་པོ་ལ་ཡང་དག་པར་ཞུགས་པ། ཐེག་པ་དཔག་ཏུ་མ་མཆིས་པ་ལ་ཡང་དག་པར་ཞུགས་པ། 
ཐེག་པ་གྲངས་མ་མཆིས་པ་ལ་ཡང་དག་པར་ཞུགས་པ། ཐེག་པ་བསམ་གྱིས་མི་ཁྱབ་པ་ལ་ཡང་དག་པར་ཞུགས་པ། ཐེག་པ་མཚུངས་པ་མ་མཆིས་པ་ལ་ཡང་དག་པར་ཞུགས་པ། ཐེག་པ་གཞལ་དུ་མ་མཆིས་པ་ལ་ཡང་དག་པར་ཞུགས་པ། ཐེག་པ་བརྗོད་དུ་མ་
མཆིས་པ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་དཔག་ཏུ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ། ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་གྲངས་མ་མཆིས་པའི་སངས་རྒྱས་ཀྱི་
ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་བསམ་གྱིས་མི་ཁྱབ་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་
མཚུངས་པ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་གཞལ་དུ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་
ཞུགས་པ། འཇིག་རྟེན་གྱི་ཁམས་བརྗོད་དུ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ་ཤ་སྟག་མཆིས་པ་དེ་དག་བཅོམ་ལྡན་འདས་ལས་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་
དག་པ་ཐོས་ན། འཇིག་རྟེན་གྱི་ཁམས་དཔག་ཏུ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པ་ལ་ཡང་དག་པར་འཇུག་པ་དང་། འཇིག་རྟེན་གྱི་ཁམས་གྲངས་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པ་ལ་ཡང་དག་པར་

49-1-205a

འཇུག་པ་དང་། འཇིག་རྟེན་གྱི་ཁམས་བསམ་གྱིས་མི་ཁྱབ་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པ་ལ་ཡང་དག་པར་འཇུག་པ་དང་། འཇིག་རྟེན་གྱི་ཁམས་མཚུངས་པ་མ་མཆིས་པ་དང་། གཞལ་དུ་མ་མཆིས་པ་དང་། བརྗོད་
དུ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་འཇུག་པའི་སླད་དུ་བརྩོན་འགྲུས་རྒྱ་ཆེར་རྩོམ་ཞིང་དེ་དག་གོ་ཆ་སྲ་བར་འགྱུར། གོ་ཆ་སྟོབས་དང་ལྡན་པར་འགྱུར། གོ་ཆ་རྡོ་རྗེ་ལྟ་བུར་འགྱུར། གོ་ཆ་མི་ཤིགས་པར་འགྱུར། 
གོ་ཆ་མི་ལྡོག་པར་འགྱུར། གོ་ཆ་མི་ཟློགས་པར་འགྱུར། ཡི་དམ་བརྟན་པར་འགྱུར། ཡི་དམ་སྟོབས་དང་ལྡན་པར་འགྱུར། ཡི་དམ་མི་འཁྲུགས་པར་འགྱུར། ཡི་དམ་མི་ལྡོག་པར་འགྱུར། ཡི་དམ་མི་ཟློགས་པར་འགྱུར། སྟོབས་བསྐྱེད་པ་ཐོབ་པར་འགྱུར། བགྱིད་པ་ཐམས་
ཅད་སངས་རྒྱས་བཅོམ་ལྡན་འདས་ཐམས་ཅད་ཀྱིས་རབ་ཏུ་བསྟོད་པར་འགྱུར། དེ་དག་འཆི་བའི་ཕྱོགས་སུ་མུན་པ་མ་མཆིས་པར་འགྱུར། བྱང་ཆུབ་སེམས་དཔའི་སྤྱོད་པ་བླ་ན་མེད་པ་སྤྱོད་པ་ན་ཞུམ་པ་མ་མཆིས། རྒོད་པ་མ་མཆིས། སྒྱིད་ལུག་པ་མ་མཆིས། སེམས་ཅན་རྣམས་
ཀྱི་བསམ་པ་ལ་འཇུག་པ་ལ་དེ་དག་གི་བྱང་ཆུབ་ཐོགས་པ་མ་མཆིས་པར་འགྱུར། སེམས་ཅན་རྣམས་ཀྱི་བསམ་པའི་སྒྲུབ་པ་འཚལ་བས་འཐུན་པར་ཆོས་སྟོན་པར་འགྱུར། སེམས་ཅན་རྣམས་ཀྱི་གན་དུ་མཆི་བའི་དུས་འཚལ་པ་ལ་གནས་པར་འགྱུར། སེམས་ཅན་འདུལ་བའི་
ཆོ་ག་ལ་མཁས་པར་འགྱུར། སངས་རྒྱས་ཀྱི་ཐེག་པ་ལ་སེམས་ཅན་རྣམས་འཛུད་པའི་ཐབས་ལ་མཁས་པར་འགྱུར། བརྗོད་པ་ཐམས་ཅད་ལ་མ་ཆགས་པར་འགྱུར། མདོར་བསྡུས་པ་དང་རྒྱས་པ་ལ་མཁས་པས་ཉེ་བ་དང་། རིང་བར་འདུ་ཤེས་པ་མ་མཆིས་པར་འགྱུར་ལགས་སོ། །
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ལེགས་སོ་ལེགས་སོ། །ཁྱོད་ནི་ཐེག་པ་ཆེན་པོ་ལ་ཡང་དག་པར་ཞུགས་པ། ཐེག་པ་དཔག་ཏུ་མེད་པ་ལ་ཡང་དག་པར་ཞུགས་པ། 
ཐེགས་པ་གྲངས་མེད་བསམ་གྱིས་མི་ཁྱབ་མཚུངས་པ་མེད་གཞལ་དུ་མེད་བརྗོད་དུ་མེད་པ་ལ་ཡང་དག་པར་ཞུགས་པ་རྣམས་དང་། འཇིག་རྟེན་གྱི་ཁམས་དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ་རྣམས་དང་། 

49-1-205b

འཇིག་རྟེན་གྱི་ཁམས་གྲངས་མེད་བསམ་གྱིས་མི་ཁྱབ་མཚུངས་པ་མེད་གཞལ་དུ་མེད་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ་རྣམས་དང་། སྙིང་བརྩེ་བ་དོན་འདོད་པ་སྙིང་རྗེ་ཅན་འཇིག་རྟེན་ཐམས་ཅད་ལ་ཕན་པ་དང་བདེ་
བར་རབ་ཏུ་སྦྱོར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཅེས་སྤྲས་བྱེད་པ་སྟེ། འཇམ་དཔལ་གང་དེ་བཞིན་གཤེགས་པ་ལ་གསོལ་བ་འདེབས་པ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་དགེ་བའི་རྩ་བའི་སྟོབས་བསྐྱེད་པས་སྤོབས་སོ། །
འཇམ་དཔལ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །བཅོམ་ལྡན་འདས་ལེགས་སོ་ལེགས་སོ། །ཞེས་གསོལ་ཏེ། འཇམ་དཔལ་གཞོན་ནུར་གྱུར་པ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །
འཇམ་དཔལ་ཤར་གྱི་ཕྱོགས་ཆ་ན་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་འཇིག་རྟེན་གྱི་ཁམས་ཟིལ་གྱིས་མི་ནོན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་ཞེས་བྱ་བ་བཞུགས་ཏེ། འཚོ་ཞིང་གཞེས་པ་འཇིག་རྟེན་གྱི་ཁམས་དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་དང་ལྡན་པ། འཇིག་རྟེན་གྱི་ཁམས་མཚུངས་པ་མེད་པའི་སངས་རྒྱས་ཀྱི་ཞིང་
ཚད་མེད་པ་ཡོངས་སུ་དག་པའི་སྨོན་ལམ་དང་ལྡན་པ། འཇིག་རྟེན་གྱི་ཁམས་གཞལ་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་དང་ལྡན་པ། འཇིག་རྟེན་གྱི་ཁམས་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་
ལམ་དང་ལྡན་ནོ། །འཇམ་དཔལ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ཀྱི་བུ་མོ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་དེའི་འཇིག་རྟེན་གྱི་ཁམས་
དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་ཐོས་ན། དེ་ཐམས་ཅད་ཀྱང་འཇིག་རྟེན་གྱི་ཁམས་དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་རྙེད་པར་འགྱུར་རོ། །འཇིག་རྟེན་གྱི་ཁམས་གྲངས་མེད་བསམ་གྱིས་མི་ཁྱབ་མཚུངས་

49-1-206a

པ་མེད་གཞལ་དུ་མེད་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་དང་ལྡན་པར་འགྱུར་རོ། །འཇམ་དཔལ་ངས་གང་གི་ཚེ་འཇིག་རྟེན་གྱི་ཁམས་མར་མེ་ཅན་གྱི་ཚོང་འདུས་ཀྱི་དབུས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མར་མེ་མཛད་ལས་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་ཐོས་པ་དེའི་ཚེ་མི་སྐྱེ་བའི་ཆོས་ལ་བཟོད་པ་ཐོབ་བོ། །གང་གི་ཚེ་ངས་མི་སྐྱེ་བའི་ཆོས་ལ་བཟོད་པ་ཐོབ་པ་དེའི་ཚེ་དེ་བཞིན་གཤེགས་པ་མར་མེ་
མཛད་དེས་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། ལེགས་སོ་ལེགས་སོ། །སྐྱེས་བུ་དམ་པ་ཁྱོད་མ་འོངས་པའི་དུས་བསྐལ་པ་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་
འཇིག་རྟེན་གྱི་ཁམས་དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་དང་ལྡན་ཞིང་འཇིག་རྟེན་གྱི་ཁམས་གྲངས་མེད་བསམ་གྱིས་མི་ཁྱབ་མཚུངས་པ་མེད་གཞལ་དུ་མེད་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་དང་ལྡན་པར་འགྱུར་
རོ་ཞེས་འཇམ་དཔལ་དེ་བཞིན་གཤེགས་པ་མར་མེ་མཛད་དེ་ལས་ངས་རང་གི་ལུང་བསྟན་པ་ཐོས་ནས། དགེ་བའི་རྩ་བའི་ཤུགས་ཀྱིས་ཏ་ལ་བདུན་སྲིད་ཀྱི་ནམ་མཁའ་ལ་འཕགས་ཏེ། སངས་རྒྱས་ཀྱི་མཐུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་དོན་ཐམས་ཅད་གྲུབ་པ་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་པ་ལ་ཆོས་སྟོན་པ་དེ་ངས་མཐོང་ངོ་། །དེ་མཐོང་ནས་བར་སྣང་ལ་འདུག་བཞིན་དུ་དེ་བཞིན་གཤེགས་པ་དེ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཡེ་ཤེས་
གཟིགས་པ་དཔག་མེད་ཐོགས་པ་མེད། །བདེ་གཤེགས་མ་སྨད་འཇིག་རྟེན་མིག་དུ་གྱུར། །ཁྱོད་ཀྱི་ཡེ་ཤེས་ཐོགས་པ་མེད་པར་འཇུག །དེ་གཤེགས་ཁྱོད་ཀྱིས་འཇིག་རྟེན་མ་གཟིགས་མེད། །བདེ་གཤེགས་ཁྱོད་ཀྱི་འོད་ནི་ཟིལ་མི་ནོན། །སངས་རྒྱས་ཞིང་བྱེ་བསམ་
མི་ཁྱབ་པར་འགྲོ། །རི་དང་བྲག་གི་རྩེ་མོ་ཐལ་བྱུང་སྟེ། །རྒྱལ་བའི་འོད་ལ་སྒྲིབ་པར་བྱེད་པ་མེད། །འབྲས་བུ་ཇི་ལྟར་ལག་མཐིལ་གཞག་པ་བཞིན། །བདེ་བར་གཤེགས་པ་སངས་རྒྱས་མཐའ་ཡས་སྟོན། །སངས་རྒྱས་ཞིང་རྣམས་སྣ་ཚོགས་རྣམ་མང་ལ། །རྒྱལ་

49-1-206b

བའི་སྲས་རྣམས་སྒྲིབ་པ་མེད་པར་འགྱུར། །འཇིག་རྟེན་མགོན་པོ་ཕྱོགས་བཅུའི་འཇིག་རྟེན་ན། །ཕུང་མེད་བྱང་ཆུབ་རབ་ཞི་རེག་འགྱུར་ཞེས། །རྒྱལ་སྲས་བསོད་ནམས་བྱས་ལ་ལུང་སྟོན་པ། །བར་སྣང་འདི་ན་དེང་འདུག་བདག་གིས་མཐོང་། །ཕྱོགས་བཅུའི་འཇིག་རྟེན་
བྱང་ཆུབ་སེམས་དཔའ་དག །ནམ་མཁའི་ངོས་ལ་འདུག་ཅིང་སེམས་དང་བས། །ཉོན་མོངས་རྒྱལ་བ་རྒྱལ་བ་ཡབ་ལ་བསྟོད། །བར་སྣང་འདི་ན་དེང་འདུག་བདག་གིས་མཐོང་། །ཕྱོགས་བཅུའི་འཇིག་རྟེན་བྱང་ཆུབ་སེམས་དཔའ་དག །དགའ་ལྡན་གནས་ནས་དཔག་མེད་
ཤི་འཕོས་ནས། །ཕྲ་བའི་བློ་རྣམས་ཐ་མའི་མངལ་འཇུག་པ། །བར་སྣང་འདི་ན་དེང་འདུག་བདག་གིས་མཐོང་། །ཕྱོགས་བཅུའི་འཇིག་རྟེན་བྱང་ཆུབ་སེམས་དཔའ་དག །མ་ཡི་གཡས་ལོགས་རུམ་ན་གནས་གྱུར་ཏེ། །ལྷ་ཡིས་རབ་ཏུ་མཆོད་ཅིང་བྱུང་བ་དག །བར་སྣང་འདི་
ན་དེང་འདུག་བདག་གིས་མཐོང་། །ཕྱོགས་བཅུའི་འཇིག་རྟེན་བྱང་ཆུབ་སེམས་དཔའ་དག །བདུད་ཀྱི་སྡེ་དང་དཔུང་རྣམས་ཕམ་བྱས་ནས། །བྱང་ཆུབ་སེམས་དཔའ་བླ་མེད་བྱང་ཆུབ་སེམས། །བར་སྣང་འདི་ན་དེང་འདུག་བདག་གིས་མཐོང་། །འཇིག་རྟེན་མགོན་པོ་ཕྱོགས་བཅུའི་
འཇིག་རྟེན་ན། །མེ་ལ་ཆུ་བཏབ་ཞི་བར་འགྱུར་བ་བཞིན། །ཡང་བྱུང་རབ་ཞི་མྱ་ངན་ཡོངས་འདའ་བ། །བར་སྣང་འདི་ན་དེང་འདུག་བདག་གིས་མཐོང་། །སྟོབས་བཅུ་མི་དབང་ཁྱོད་ཀྱི་གཟི་བརྗིད་ཀྱིས། །འཇིག་རྟེན་ན་ནི་སྒྲིབ་པ་གང་ཡང་མེད། །རྒྱལ་བ་ཚད་མེད་ཞིང་ཡང་དེ་བཞིན་
ཏེ། །ཐོགས་པ་མེད་པར་ནམ་མཁའ་འདི་ནས་མཐོང་། །ཇི་ལྟར་མི་དག་རྨི་ལམ་འདོད་སྤྱོད་དང་། །སོས་ཀ་ཇི་ལྟར་སྨྱིག་རྒྱུ་འབྱུང་བ་དང་། །ལ་ལས་ཆུ་ནང་ཟླ་བ་མཐོང་བ་བཞིན། །ཞིང་དང་སངས་རྒྱས་དེ་དག་བདག་གིས་མཐོང་། །གང་ཚེ་བདག་གིས་སངས་རྒྱས་ཞིང་ཡོངས་
དག །དེ་ཚེ་སྒྲིབ་པ་མེད་པའི་ཡེ་ཤེས་ཐོབ། །སྒྲིབ་པ་མེད་པའི་ཡེ་ཤེས་སྐྱེས་པའི་ཚེ། །དེ་ནི་མི་དབང་བྱང་ཆུབ་བདག་ལུང་བསྟན། །འགྲོ་བ་ཐམས་ཅད་བྲག་ཆ་འདྲ་བ་སྟེ། །སྐྱེ་བོ་མཁས་པ་དག་ལ་མི་སླུས་སོ། །དེ་རིང་མགོན་པོ་ཁྱོད་ཀྱི་གསུང་ཐོས་ནས། །ཆོས་ཀྱི་མིང་
དང་ཡང་དག་ཉིད་ཀྱང་རྟོགས། །ང་ནི་སྒྲིབ་མེད་རྣམ་གྲོལ་སྤྱོད་པ་ན། །མཚུངས་མེད་བསམ་ཡས་སངས་རྒྱས་ཞིང་ཡང་དག །རྒྱལ་བ་ཚད་མེད་དེ་བཞིན་ཞིང་རྣམས་ན། །མི་དབང་གཟིགས་ཤིང་བཞུགས་པར་ངས་མཐོང་ངོ་། །འཇམ་དཔལ་དེ་ལྟ་བས་ན་བྱང་

49-1-207a

ཆུབ་སེམས་དཔའ་སེམས་དཔའ་ཆེན་པོས་སྒྲིབ་པ་མེད་པའི་རྣམ་པར་ཐར་པ་ལ་བསླབ་པར་བྱའོ། །སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རྣམ་པར་ཐར་པར་ཡང་མི་འཛིན། འདི་ན་རྣམ་པར་ཐར་
པ་མེད་པར་ཡང་མི་འཛིན། སྒྲིབ་པར་ཡང་མི་འཛིན། འདི་ན་སྒྲིབ་པ་མེད་ཅེས་ཀྱང་མི་འཛིན། བྱང་ཆུབ་སེམས་དཔའ་མེད་པར་ཡང་མི་འཛིན། བྱང་ཆུབ་སེམས་དཔའ་འདི་ན་མེད་པར་ཡང་མི་འཛིན། སྤྱོད་པ་མེད་པར་ཡང་མི་འཛིན། སྤྱོད་པ་འདི་ནའོ་ཞེས་ཀྱང་མི་འཛིན། 
སངས་རྒྱས་ཀྱི་ཞིང་མེད་པར་ཡང་མི་འཛིན། སངས་རྒྱས་ཀྱི་ཞིང་འདི་ནའོ་ཞེས་ཀྱང་མི་འཛིན། དཔག་ཏུ་མེད་པ་མེད་པར་ཡང་མི་འཛིན། དཔག་ཏུ་མེད་པ་འདི་ནའོ་ཞེས་ཀྱང་མི་འཛིན། གྲངས་མེད་པ་མེད་པར་ཡང་མི་འཛིན། གྲངས་མེད་པ་འདི་ནའོ་ཞེས་ཀྱང་མི་
འཛིན། བསམ་གྱིས་མི་ཁྱབ་པ་མེད་པར་ཡང་མི་འཛིན། བསམ་གྱིས་མི་ཁྱབ་པ་འདི་ནའོ་ཞེས་ཀྱང་མི་འཛིན། མཚུངས་པ་མེད་པ་མེད་པར་ཡང་མི་འཛིན། མཚུངས་པ་མེད་པ་འདི་ནའོ་ཞེས་ཀྱང་མི་འཛིན། གཞལ་དུ་མེད་པ་མེད་པར་ཡང་མི་འཛིན། གཞལ་དུ་མེད་
པ་འདི་ནའོ་ཞེས་ཀྱང་མི་འཛིན། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་ཞེས་ཀྱང་མི་འཛིན་ཏོ། །འཇམ་དཔལ་འདི་ལྟ་སྟེ། དཔེར་ན་མི་ཞིག་གཉིད་ཀྱིས་ལོག་པའི་རྨི་ལམ་དུ་འདོད་པའི་ཡོན་ཏན་ལྔ་ལ་ཀུན་ཏུ་སྤྱོད་པ་རྨིས་ལ་མི་དེ་ཡང་
བྱིས་པའི་རང་བཞིན་ཅན་མ་ཡིན། བླུན་པའི་རང་བཞིན་ཅན་མ་ཡིན་གྱི་མཁས་པ་རྟོགས་པ་ཤེས་རབ་དང་ལྡན་པའི་རང་བཞིན་ཅན་ཏེ། ཉལ་བ་སད་ནས་འདོད་པའི་ཡོན་ཏན་མེད་པར་ཡང་མི་འཛིན། འདོད་པའི་ཡོན་ཏན་འདི་ནའོ་ཞེས་ཀྱང་མི་འཛིན། འདོད་པའི་དགའ་
བ་མེད་པར་ཡང་མི་འཛིན། འདོད་པའི་དགའ་བ་འདི་ནའོ་ཞེས་ཀྱང་མི་འཛིན་པ་དེ་བཞིན་དུ། འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་རྣམ་པར་ཐར་པ་མེད་པར་ཡང་མི་འཛིན། རྣམ་པར་ཐར་པ་
འདི་ནའོ་ཞེས་ཀྱང་མི་འཛིན་ཏོ། །དེ་བཞིན་དུ་སྦྱར་ཏེ། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་ཞེས་ཀྱང་མི་འཛིན་པའི་བར་དུའོ། །འཇམ་དཔལ་འདི་ལྟ་སྟེ་དཔེར་ན་སྒྱུ་མ་མཁན་གྱི་སློབ་མ་མཁས་པས་སྐྱེ་བོ་ཕལ་པོ་ཆེའི་མདུན་དུ་སྒྱུ་མ་

49-1-207b

སྣ་ཚོགས་འདི་ལྟ་སྟེ། གླང་པོ་ཆེའི་ཚོགས་སམ། རྟའི་ཚོགས་སམ། ཤིང་རྟའི་ཚོགས་སམ། དཔུང་བུ་ཆུང་གི་ཚོགས་བསྟན་ལ། དེ་ལ་མི་བྱིས་པའི་རང་བཞིན་ཅན་མ་ཡིན་པ། བླུན་པའི་རང་བཞིན་ཅན་མ་ཡིན་པ་མཁས་པ་རྟོགས་པ། བྱེ་བྲག་ཕྱེད་པ། ཤེས་
རབ་དང་ལྡན་པའི་རང་བཞིན་ཅན་དེ་དག་གིས་དེ་མཐོང་ན། གླང་པོ་ཆེའི་ཚོགས་མེད་པར་ཡང་མི་འཛིན། གླང་པོ་ཆེའི་ཚོགས་འདི་ནའོ་ཞེས་ཀྱང་མི་འཛིན། རྟའི་ཚོགས་མེད་པར་ཡང་མི་འཛིན། རྟའི་ཚོགས་འདི་ནའོ་ཞེས་ཀྱང་མི་འཛིན། ཤིང་རྟའི་ཚོགས་མེད་པར་
ཡང་མི་འཛིན། ཤིང་རྟའི་ཚོགས་འདི་ནའོ་ཞེས་ཀྱང་མི་འཛིན། དཔུང་བུ་ཆུང་གི་ཚོགས་མེད་པར་ཡང་མི་འཛིན། དཔུང་བུ་ཆུང་གི་ཚོགས་འདི་ནའོ་ཞེས་ཀྱང་མི་འཛིན། སྒྱུ་མ་མེད་པར་ཡང་མི་འཛིན། སྒྱུ་མ་འདི་ནའོ་ཞེས་ཀྱང་མི་འཛིན་པ་དེ་བཞིན་དུ་འཇམ་དཔལ་
སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་རྣམ་པར་ཐར་པར་ཡང་མི་འཛིན། རྣམ་པར་ཐར་པ་འདི་ནའོ་ཞེས་ཀྱང་མི་འཛིན་ཏོ། །དེ་བཞིན་དུ་སྦྱར་ཏེ། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་ཞེས་ཀྱང་
མི་འཛིན་པའི་བར་དུའོ། །འཇམ་དཔལ་འདི་ལྟ་སྟེ། དཔེར་ན་ནམ་ཐང་ཞིང་སྤྲིན་མེད་པའི་ནམ་མཁའ་ལས་མཚོའི་ཆུ་ཤིན་དུ་དང་བའི་ནང་དུ་ཟླ་བའི་དཀྱིལ་འཁོར་གྱི་གཟུགས་བརྙན་འབྱུང་བ་དེ་ལ་མི་གང་དག་བྱིས་པའི་རང་བཞིན་ཅན་མ་ཡིན་པ། 
བླུན་པའི་རང་བཞིན་ཅན་མ་ཡིན་པ། མཁས་པ་བྱེ་བྲག་ཕྱེད་པ། རྟོགས་པ། ཤེས་རབ་དང་ལྡན་པའི་རང་བཞིན་ཅན་དེ་དག་གིས་དེ་མཐོང་ན་ཟླ་བའི་དཀྱིལ་འཁོར་མེད་པར་ཡང་མི་འཛིན། ཟླ་བའི་དཀྱིལ་འཁོར་འདི་ནའོ་ཞེས་ཀྱང་མི་འཛིན། གཟུགས་
བརྙན་མེད་པར་ཡང་མི་འཛིན། གཟུགས་བརྙན་འདི་ནའོ་ཞེས་ཀྱང་མི་འཛིན་པ་དེ་བཞིན་དུ། འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་རྣམ་པར་ཐར་པ་མེད་པར་ཡང་མི་འཛིན། རྣམ་པར་ཐར་
པ་འདི་ནའོ་ཞེས་ཀྱང་མི་འཛིན་ཏོ། །དེ་བཞིན་དུ་སྦྱར་ཏེ། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་ཞེས་ཀྱང་མི་འཛིན། ཡང་དག་པར་འགྲུབ་པ་མེད་པར་ཡང་མི་འཛིན། ཡང་དག་པར་འགྲུབ་པ་འདི་ནའོ་ཞེས་ཀྱང་མི་འཛིན་པའི་

49-1-208a

བར་དུའོ། །འཇམ་དཔལ་འདི་ལྟ་སྟེ། དཔེར་ན་སོས་ཀའི་ཟླ་བ་ཐ་མའི་ཚེ་ནམ་ཐང་ཞིང་སྤྲིན་མེད་པའི་ནམ་མཁའ་ལ་སྨྱིག་རྒྱུ་རྒྱུ་ཞིང་གཡོ་བ་དེ་ལ་མི་གང་དག་བྱིས་པའི་རང་བཞིན་ཅན་མ་ཡིན་པ། བླུན་པའི་རང་བཞིན་ཅན་མ་ཡིན་པ། 
མཁས་པ། རྟོགས་པ། བྱེ་བྲག་ཕྱེད་པ། ཤེས་རབ་ཀྱི་རང་བཞིན་ཅན་དེ་དག་གིས་དེ་མཐོང་ན། སྨྱིག་རྒྱུ་བ་མེད་པར་ཡང་མི་འཛིན། སྨྱིག་རྒྱུ་བ་འདི་ནའོ་ཞེས་ཀྱང་མི་འཛིན། གཡོ་བ་མེད་པར་ཡང་མི་འཛིན། གཡོ་བ་འདི་ནའོ་ཞེས་ཀྱང་མི་འཛིན་པ་དེ་བཞིན་དུ། འཇམ་
དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་སྤྱོད་པ་མེད་པར་ཡང་མི་འཛིན། སྤྱོད་པ་འདི་ནའོ་ཞེས་ཀྱང་མི་འཛིན། སངས་རྒྱས་ཀྱི་ཞིང་མེད་པར་ཡང་མི་འཛིན། སངས་རྒྱས་ཀྱི་ཞིང་འདི་ནའོ་ཞེས་ཀྱང་མི་འཛིན་
དཔག་ཏུ་མེད་པ་མེད་པར་ཡང་མི་འཛིན། དཔག་ཏུ་མེད་པ་འདི་ནའོ་ཞེས་ཀྱང་མི་འཛིན། གྲངས་མེད་པ་མེད་པར་ཡང་མི་འཛིན། གྲངས་མེད་པ་འདི་ནའོ་ཞེས་ཀྱང་མི་འཛིན། བསམ་གྱིས་མི་ཁྱབ་པ་མེད་པར་ཡང་མི་འཛིན། བསམ་གྱིས་མི་ཁྱབ་པ་འདི་ནའོ་
ཞེས་ཀྱང་མི་འཛིན། མཚུངས་པ་མེད་པ་མེད་པར་ཡང་མི་འཛིན། མཚུངས་པ་མེད་པ་འདི་ནའོ་ཞེས་ཀྱང་མི་འཛིན། གཞལ་དུ་མེད་པ་མེད་པར་ཡང་མི་འཛིན། གཞལ་དུ་མེད་པ་འདི་ནའོ་ཞེས་ཀྱང་མི་འཛིན། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་
པ་འདི་ནའོ་ཞེས་ཀྱང་མི་འཛིན། ཡོངས་སུ་དག་པ་མེད་པར་ཡང་མི་འཛིན། ཡོངས་སུ་དག་པ་འདི་ནའོ་ཞེས་ཀྱང་མི་འཛིན། ཡང་དག་པར་འགྲུབ་པ་མེད་པར་ཡང་མི་འཛིན། ཡང་དག་པར་འགྲུབ་པ་འདི་ནའོ་ཞེས་ཀྱང་མི་འཛིན་ཏོ། །འཇམ་དཔལ་འདི་ལྟ་སྟེ། དཔེར་
ན་སྤྲིན་མེད་ཅིང་སྤྲིན་དང་བྲལ་ཏེ་ནམ་ཐང་པའི་ནམ་མཁའི་དཀྱིལ་ནས་སྤྲིན་བྱུང་བས་ནམ་མཁའ་ཐམས་ཅད་ཡོག་པ་དེ་མཁས་པའི་རང་བཞིན་ཅན་གྱི་མིས་མཐོང་ན། སྤྲིན་གྱི་དཀྱིལ་འཁོར་མེད་པར་ཡང་མི་འཛིན། སྤྲིན་གྱི་དཀྱིལ་འཁོར་འདི་ནའོ་ཞེས་ཀྱང་མི་འཛིན། ཀུན་ཁེབས་
པ་མེད་པར་ཡང་མི་འཛིན། ཀུན་ཁེབས་པ་འདི་ནའོ་ཞེས་ཀྱང་མི་འཛིན་པ་དེ་བཞིན་དུ། འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་རྣམ་པར་ཐར་པ་མེད་པར་ཡང་མི་འཛིན། རྣམ་པར་ཐར་པ་འདི་ནའོ་ཞེས་ཀྱང་

49-1-208b

མི་འཛིན། སྒྲིབ་པ་མེད་པ་མེད་པར་ཡང་མི་འཛིན། སྒྲིབ་པ་མེད་པ་འདི་ནའོ་ཞེས་ཀྱང་མི་འཛིན། བྱང་ཆུབ་སེམས་དཔའ་མེད་པར་ཡང་མི་འཛིན། བྱང་ཆུབ་སེམས་དཔའ་འདི་ནའོ་ཞེས་ཀྱང་མི་འཛིན། སྤྱོད་པ་མེད་པར་ཡང་མི་འཛིན། སྤྱོད་པ་མེད་པ་འདི་ནའོ་ཞེས་
ཀྱང་མི་འཛིན། སངས་རྒྱས་ཀྱི་ཞིང་མེད་པར་ཡང་མི་འཛིན། སངས་རྒྱས་ཀྱི་ཞིང་འདི་ནའོ་ཞེས་ཀྱང་མི་འཛིན། དཔག་ཏུ་མེད་པ་མེད་པར་ཡང་མི་འཛིན། དཔག་ཏུ་མེད་པ་འདི་ནའོ་ཞེས་ཀྱང་མི་འཛིན། གྲངས་མེད་པ་མེད་པར་ཡང་མི་འཛིན། གྲངས་མེད་
པ་འདི་ནའོ་ཞེས་ཀྱང་མི་འཛིན། བསམ་གྱིས་མི་ཁྱབ་པ་མེད་པར་ཡང་མི་འཛིན། བསམ་གྱིས་མི་ཁྱབ་པ་འདི་ནའོ་ཞེས་ཀྱང་མི་འཛིན། མཚུངས་པ་མེད་པ་མེད་པར་ཡང་མི་འཛིན། མཚུངས་པ་མེད་པ་འདི་ནའོ་ཞེས་ཀྱང་མི་འཛིན། གཞལ་དུ་མེད་པ་མེད་པར་ཡང་
མི་འཛིན། གཞལ་དུ་མེད་པ་འདི་ནའོ་ཞེས་ཀྱང་མི་འཛིན། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་ཞེས་ཀྱང་མི་འཛིན། ཡོངས་སུ་དག་པ་མེད་པ་ཡང་མི་འཛིན། ཡོངས་སུ་དག་པ་འདི་ནའོ་ཞེས་ཀྱང་མི་འཛིན། ཡང་དག་པར་འགྲུབ་
པ་མེད་པ་ཡང་མི་འཛིན། ཡང་དག་པར་འགྲུབ་པ་འདི་ནའོ་ཞེས་ཀྱང་མི་འཛིན་ཏོ། །འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཅི་བདག་གི་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་པར་འགྱུར་
རམ་ཞེས་སེམས་ལ་མི་བྱ་སྟེ། འོན་ཀྱང་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཞིང་དཔག་ཏུ་མེད་པ་བསྒྲིམ་མི་དགོས་པར་ཡོངས་སུ་དག་པར་འགྱུར་རོ། །སྒྲིབ་པ་མེད་པའི་རྣམ་པར་ཐར་པ་ལ་
སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཅི་བདག་གི་སངས་རྒྱས་ཀྱི་ཞིང་གྲངས་མེད་པ་ཡོངས་སུ་དག་པར་འགྱུར་རམ། དེ་བཞིན་དུ་སྦྱར་ཏེ། ཅི་སངས་རྒྱས་ཀྱི་ཞིང་བརྗོད་དུ་མེད་པ་ཡོངས་སུ་དག་པར་འགྱུར་རམ་སྙམ་དུ་སེམས་ལ་མི་བྱ་སྟེ། འོན་ཀྱང་
སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཞིང་བརྗོད་དུ་མེད་པ་བསྒྲིམ་མི་དགོས་པར་ཡོངས་སུ་དག་པར་འགྱུར་རོ། །འཇམ་དཔལ་འདི་ལྟ་སྟེ། དཔེར་ན་ནམ་ལངས་པའི་དུས་ཀྱི་ཚེ། ཅི་ཉི་མ་འཆར་རམ་

49-1-209a

སྙམ་དུ་སེམས་ལ་མི་བྱ་སྟེ། འོན་ཀྱང་ནམ་ལངས་པའི་དུས་ཀྱི་ཚེ། བསྒྲིམ་མི་དགོས་པར་ཉི་མ་འཆར་བ་དེ་བཞིན་དུ། འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་བདག་གི་སངས་
རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་པར་འགྱུར་སྙམ་དུ་སེམས་ལ་མི་བྱ་སྟེ། འོན་ཀྱང་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཞིང་དཔག་ཏུ་མེད་པ་ནས་བརྗོད་དུ་མེད་པའི་བར་དུ་བསྒྲིམ་མི་དགོས་པར་
ཡོངས་སུ་དག་པར་འགྱུར་རོ། །འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱད་པས་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་གོ། །སངས་རྒྱས་ཀྱི་ཞིང་གྲངས་མེད་པ་དང་། བསམ་གྱིས་མི་ཁྱབ་པ་དང་། 
མཚུངས་པ་མེད་པ་དང་། གཞལ་དུ་མེད་པ་དང་། བརྗོད་དུ་མེད་པ་ཡོངས་སུ་དག་གོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་ཅི་ཙམ་དུ་རྒྱ་ཆེར་ཡོངས་སུ་དག་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་
དཔལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་ཇི་ཙམ་དུ་རྒྱ་ཆེར་ཡོངས་སུ་དག་པ་ནི་ཚིག་གི་གོ་བར་སླ་བ་མ་ཡིན་ནོ། །གསོལ་པ། བཅོམ་ལྡན་འདས་དཔེར་
བགྱིར་རུང་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་རུང་ངོ་། །འཇམ་དཔལ་འདི་ལྟ་སྟེ། དཔེར་ན་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་གྲོང་ཁྱེར་གཅིག་ཏུ་གྱུར་པ་ལ་འདི་ལྟ་སྟེ། ཕྱེ་
འམ་ཕྱེ་མའི་རྣམ་པ་གཞན་གྱིས་གང་བ་བཞིན་དུ་ཡུངས་ཀར་གྱིས་གང་བར་གྱུར་ཏེ། མི་ལ་ལ་ཞིག་གིས་ཡུངས་ཀར་དེ་རྡུལ་ཕྲ་རབ་ཏུ་བཏགས་ནས་ཡུངས་འབྲུ་རེ་རེ་ཡང་ཡུངས་འབྲུ་ཇི་སྙེད་པ་དེ་སྙེད་ཀྱི་རྡུལ་ཕྲ་རབ་ཀྱི་རྡུལ་དུ་བྱས་ལ། དེས་རྡུལ་ཕྲ་རབ་དེ་དག་ཕྲག་པ་ལ་

49-1-209b

ཐོགས་ནས་ཤར་ཕྱོགས་སུ་སོང་སྟེ། གོམ་པ་གཅིག་བོར་བས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདའ་ལ། གོམ་པ་འདོར་བ་འདི་འདྲ་བ་དང་ལྡན་ཞིང་། འདི་ལྟ་སྟེ། སེམས་ཀྱི་མགྱོགས་པའི་རྫུ་འཕྲུལ་ལྟ་བུའི་མགྱོགས་པ་དང་ལྡན་ཏེ། གོམ་པ་འདོར་
བ་དེ་ལྟ་བུ་དང་ལྡན་པས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་སོང་ཞིང་རྡུལ་ཕྲ་རབ་ཀྱི་རྡུལ་གཅིག་བོར་ལ་དེ་ལྟ་བུའི་ཚུལ་གྱིས་ཤར་ཕྱོགས་སུ་རྡུལ་ཕྲ་རབ་ཀྱི་རྡུལ་དེ་ཐམས་ཅད་བོར་ཏེ་དེ་བཞིན་དུ་ལྷོ་དང་། ནུབ་དང་། བྱང་དང་། ཕྱོགས་མཚམས་རྣམས་སུ་དེ་སྙེད་ཀྱི་
རྡུལ་ཕྲ་རབ་ཀྱི་རྡུལ་བོར་ཞིང་དེ་བཞིན་དུ་སྟེང་དང་། འོག་གི་ཕྱོགས་སུ་ཡང་རྡུལ་ཕྲ་རབ་ཀྱི་རྡུལ་དེ་སྙེད་བོར་ན། འཇམ་དཔལ་དེ་ཇི་སྙམ་དུ་སེམས། ཡུངས་ཀར་གྱི་རྡུལ་ཕྲ་རབ་ཀྱི་རྡུལ་གང་དུ་བོར་བ་དང་མ་བོར་བའི་འཇིག་རྟེན་གྱི་ཁམས་གང་མང་། གསོལ་པ། བཅོམ་ལྡན་འདས་
རྡུལ་ཕྲ་རབ་ཀྱི་རྡུལ་བོར་བའི་འཇིག་རྟེན་གྱི་ཁམས་དེ་ནི་ཉུང་ལགས་ཀྱི་མ་བོར་བ་དེ་ནི་ཆེས་མང་ལགས་སོ། །བཀའ་སྩལ་པ། འཇམ་དཔལ་འཇིག་རྟེན་གྱི་ཁམས་གང་དུ་རྡུལ་ཕྲ་རབ་ཀྱི་རྡུལ་བོར་བ་དང་། གང་དུ་མ་བོར་བའི་འཇིག་རྟེན་གྱི་ཁམས་དེ་དག་ཐམས་
ཅད་གྲོང་ཁྱེར་གཅིག་ཏུ་གྱུར་ལ། འདི་ལྟ་སྟེ། ཕྱེ་འམ་ཕྱེ་མའི་རྣམ་པ་གཞན་གྱིས་གང་བ་བཞིན་དུ་ཡུངས་ཀར་གྱིས་གང་བ་དེ་ལ་མི་ལ་ལ་ཞིག་གིས་ཡུངས་འབྲུ་དེ་དག་བཏགས་ཏེ། ཡུངས་འབྲུ་རེ་རེ་ཡང་ཡུངས་འབྲུ་དེ་དག་ཇི་སྙེད་པ་དེ་སྙེད་ཀྱི་རྡུལ་ཕྲ་རབ་ཀྱི་རྡུལ་དུ་བྱས་
ཏེ། དེས་རྡུལ་ཕྲ་རབ་ཀྱི་རྡུལ་དེ་དག་ཐམས་ཅད་ཕྲག་པ་ལ་ཐོགས་ནས་ཤར་ཕྱོགས་སུ་སོང་སྟེ། གོམ་པ་གཅིག་བོར་བས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདའ་ཞིང་། འདི་ལྟ་སྟེ། སེམས་ཀྱི་མགྱོགས་པའི་རྫུ་འཕྲུལ་ལྟ་བུའི་མགྱོགས་པ་དང་ལྡན་པ་དེ་
ལྟ་བུའི་གོམ་པ་འདོར་ཞིང་དེ་ལྟ་བུའི་མགྱོགས་པས། གང་གཱའི་ཀླུང་གི་བྱེ་མ་སྙེད་ཀྱི་བསྐལ་པར་སོང་སྟེ་རྡུལ་ཕྲ་རབ་ཀྱི་རྡུལ་གཅིག་བོར་ཞིང་དེ་ལྟ་བུའི་ཚུལ་གྱིས་ཤར་ཕྱོགས་སུ་རྡུལ་ཕྲ་རབ་དེ་ཐམས་ཅད་བོར་ལ། དེ་བཞིན་དུ་ལྷོ་ཕྱོགས་སུ་རྡུལ་ཕྲ་རབ་ཀྱི་རྡུལ་དེ་སྙེད་འདོར་ཞིང་། 
ནུབ་དང་། བྱང་དང་། བྱང་ཤར་དང་། ཤར་ལྷོ་དང་། ལྷོ་ནུབ་དང་། ནུབ་བྱང་གི་མཚམས་དང་། སྟེང་དང་། འོག་གི་ཕྱོགས་དང་། ཕྱོགས་མཚམས་སུ་རྡུལ་ཕྲ་རབ་དེ་སྙེད་བོར་ན། འཇམ་དཔལ་དེ་ཇི་སྙམ་དུ་སེམས། གང་དུ་རྡུལ་ཕྲ་རབ་དེ་དག་བོར་བ་དང་། གང་དུ་མ་བོར་བའི་

49-1-210a

འཇིག་རྟེན་གྱི་ཁམས་གང་མང་། གསོལ་པ། བཅོམ་ལྡན་འདས་གང་དུ་རྡུལ་ཕྲ་རབ་དེ་དག་བོར་བ་ནི་ཉུང་ལགས་ཀྱི་མ་བོར་བའི་འཇིག་རྟེན་གྱི་ཁམས་དེ་ནི་ཆེས་མང་ལགས་སོ། །བཀའ་སྩལ་པ། འཇམ་དཔལ་འཇིག་རྟེན་གྱི་ཁམས་གང་དུ་རྡུལ་ཕྲ་
རབ་བོར་བ་དང་གང་དུ་མ་བོར་བ་དེ་དག་ཐམས་ཅད་གྲོང་ཁྱེར་གཅིག་ཏུ་གྱུར་ལ། འདི་ལྟ་སྟེ། ཕྱེ་འམ་ཕྱེ་མའི་རྣམ་པ་གཞན་གྱིས་གང་བ་བཞིན་དུ་ཡུངས་ཀར་གྱི་གང་ལ། མི་ལ་ལ་ཞིག་གིས་ཡུངས་འབྲུ་དེ་དག་བཏགས་ནས། ཡུངས་འབྲུ་རེ་རེ་ཡང་ཡུངས་འབྲུ་དེ་དག་ཇི་སྙེད་
པ་དེ་སྙེད་ཀྱི་རྡུལ་ཕྲ་རབ་ཀྱི་རྡུལ་དུ་བྱས་ཏེ། དེས་རྡུལ་ཕྲ་རབ་དེ་ཐམས་ཅད་ཕྲ་རབ་དེ་ཐམས་ཅད་ཕྲག་པ་ལ་ཐོགས་ནས་ཤར་ཕྱོགས་སུ་སོང་སྟེ། གོམ་པ་གཅིག་བོར་བས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདའ་ཞིང་འདི་ལྟ་སྟེ། སེམས་ཀྱི་མགྱོགས་པའི་
རྫུ་འཕྲུལ་ལྟ་བུའི་མགྱོགས་པ་དང་ལྡན་ཏེ། གོམ་པ་དེ་ལྟ་བུར་འདོར་བ་དང་། དེ་ལྟ་བུའི་མགྱོགས་པ་དང་ལྡན་པས་གང་གཱའི་ཀླུང་གི་བྱེ་མ་སྙེད་ཀྱི་བསྐལ་པར་སོང་སྟེ་རྡུལ་ཕྲ་རབ་གཅིག་བོར་ལ། དེ་ལྟ་བུའི་ཚུལ་གྱིས་ཤར་ཕྱོགས་སུ་རྡུལ་ཕྲ་རབ་དེ་ཐམས་ཅད་བོར་ལ་དེ་བཞིན་
དུ་ལྷོ་ཕྱོགས་སུ་རྡུལ་ཕྲ་རབ་དེ་སྙེད་བོར་ཞིང་། ནུབ་དང་། བྱང་དང་། བྱང་ཤར་དང་། ཤར་ལྷོ་དང་། ལྷོ་ནུབ་དང་། ནུབ་བྱང་གི་མཚམས་དང་། སྟེང་དང་། འོག་གི་ཕྱོགས་དང་། ཕྱོགས་མཚམས་རེ་རེར་ཡང་རྡུལ་ཕྲ་རབ་དེ་སྙེད་བོར་ན་འཇམ་དཔལ་དེ་ཇི་སྙམ་དུ་སེམས། གང་རྡུལ་
ཕྲ་རབ་དེ་བོར་བ་དང་གང་དུ་མ་བོར་བའི་འཇིག་རྟེན་གྱི་ཁམས་དེ་དག་གང་མང་གསོལ་པ། བཅོམ་ལྡན་འདས་གང་དུ་རྡུལ་ཕྲ་རབ་བོར་བ་ནི་ཉུང་ལགས་ཀྱི་མ་བོར་བ་དེ་ནི་ཆེས་མང་ལགས་སོ། །བཀའ་སྩལ་པ། འཇམ་དཔལ་འཇིག་རྟེན་གྱི་ཁམས་གང་དུ་རྡུལ་ཕྲ་རབ་མ་བོར་བ་དང་གང་
དུ་བོར་བ་དེ་དག་ཐམས་ཅད་གྲོང་ཁྱེར་གཅིག་ཏུ་གྱུར་ནས་ཡུངས་ཀར་གྱིས་གང་བ་ནི་ཇི་ལྟར་སྔར་དཔེ་བསྟན་པ་དེ་བཞིན་དུ་རྒྱས་པར་བྱས་ཏེ་སྟོང་ཕྲག་སུམ་བཅུར་བསྒྱུར་བ། འཇམ་དཔལ་དེ་ཐམས་ཅད་ཀྱི་ཐ་མའི་རྡུལ་ཕྲ་རབ་ཀྱི་ཕུང་པོ་བཞག་པ་དེ་སྙེད་ཀྱི་འཇིག་རྟེན་གྱི་ཁམས་
རབ་འབྱམ་གྱི་རྒྱ་ཇི་ཙམ་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པའི་བྱང་ཆུབ་ཀྱི་ཤིང་གི་རྒྱ་ཡང་དེ་ཙམ་མོ། །བྱང་ཆུབ་ཀྱི་ཤིང་དེ་ནི་རིན་པོ་ཆེ་སྣ་བདུན་ཏེ། འབྲས་བུ་ནི་ཡིད་བཞིན་གྱི་ནོར་བུའོ། །བྱང་

49-1-210b

ཆུབ་ཀྱི་ཤིང་དེའི་ཡལ་ག་ནི་ཐ་མའི་རྡུལ་ཕྲ་རབ་ཀྱི་རྡུལ་སྙེད་ཡོད་དོ། །ཡལ་ག་གཅིག་ཅིང་ཡང་ཐ་མའི་རྡུལ་ཕྲ་རབ་ཀྱི་རྡུལ་སྙེད་ཀྱི་ཡལ་ག་ཕྲེའུ་ཡོད་དེ། ཡལ་ག་ཕྲེའུ་གཅིག་ཅིང་ཡང་ཐ་མའི་རྡུལ་ཕྲ་རབ་ཀྱི་རྡུལ་སྙེད་ཀྱི་འབྲས་བུ་ཡོད་དོ། །འབྲས་བུ་རེ་རེ་ལ་ཡང་
ཆ་ཤས་ནི་དཔག་ཏུ་མེད་དོ། །འཇམ་དཔལ་བྱང་ཆུབ་ཀྱི་ཤིང་དེ་ནི་དེ་བཞིན་གཤེགས་པ་དོན་ཐམས་ཅད་གྲུབ་པའི་ལེགས་པར་སྤྱད་པའི་འབྲས་བུར་གྲུབ་པ་སྟེ། དེ་ནི་མིག་ཡོངས་སུ་མ་སྦྱངས་པའི་སེམས་ཅན་རྣམས་ཀྱི་མིག་ལམ་དུ་སྣང་བར་མི་འགྱུར་རོ། །འཇམ་
དཔལ་འདི་ལྟ་སྟེ། དཔེར་ན་བར་སྣང་གི་གནོད་སྦྱིན་རྣམས་ཀྱི་གཞལ་མེད་ཁང་དག་མི་རྣམས་ཀྱི་མིག་ལམ་དུ་སྣང་བར་མི་འགྱུར་བ་དེ་བཞིན་དུ་བྱང་ཆུབ་ཀྱི་ཤིང་དེ་ཡང་མིག་ཡོངས་སུ་མ་སྦྱངས་པའི་སེམས་ཅན་རྣམས་ཀྱི་མིག་ལམ་དུ་སྣང་བར་མི་འགྱུར་རོ། །
འཇམ་དཔལ་བྱང་ཆུབ་ཀྱི་ཤིང་དེ་ལ་སེམས་ཅན་རྣམས་མི་ཐོགས་པར་འགྲོ་སྟེ། འཇམ་དཔལ་འདི་ལྟ་སྟེ། དཔེར་ན་བར་སྣང་གི་གནོད་སྦྱིན་དག་གི་གཞལ་མེད་ཁང་རྣམས་ལ་མི་ཐོགས་པར་འགྲོ་བ་དེ་བཞིན་དུ་འཇམ་དཔལ་བྱང་ཆུབ་ཀྱི་ཤིང་དེ་ལ་སེམས་ཅན་
རྣམས་མི་ཐོགས་པར་འགྲོ་སྟེ། བྱང་ཆུབ་ཀྱི་ཤིང་དེ་ཡང་ཡོངས་སུ་དག་པའི་ལས་དང་ལྡན་པའི་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པས་ཡོངས་སུ་གྲུབ་པའི་ཕྱིར་རོ། །འཇམ་དཔལ་ཡང་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་འཇིག་
རྟེན་གྱི་ཁམས་ནི་ཤར་ཕྱོགས་སུ་ཡང་ཐ་མའི་རྡུལ་ཕྲ་རབ་ཀྱི་རྡུལ་ཇི་སྙེད་པ་དེ་སྙེད་ཡོངས་སུ་དག་གོ། །ལྷོར་ཡང་དེ་སྙེད། ནུབ་ཏུ་ཡང་དེ་སྙེད། བྱང་དུ་ཡང་དེ་སྙེད། ཤར་ལྷོར་ཡང་དེ་སྙེད། ལྷོ་ནུབ་ཏུ་ཡང་དེ་སྙེད། ནུབ་བྱང་དུ་ཡང་དེ་སྙེད། བྱང་ཤར་དུ་ཡང་
དེ་སྙེད། སྟེང་དང་འོག་གི་ཕྱོགས་སུ་ཡང་དེ་སྙེད་ཀྱི་འཇིག་རྟེན་གྱི་ཁམས་ཡོངས་སུ་དག་སྟེ། སངས་རྒྱས་ཀྱི་ཞིང་དེ་དེ་ཙམ་དུ་རྒྱ་ཆེར་ཡོངས་སུ་དག་གོ། །སྒྲིབ་པ་མེད་པའི་རྣམ་པར་ཐར་པ་ལ་བརྟེན་ན་དེའི་བརྒྱར་བགྲངས་པ་སྙེད་དུ་རང་གི་སངས་རྒྱས་ཀྱི་ཞིང་ཡོངས་
སུ་དག་གོ། །འཇམ་དཔལ་བྱང་ཆུབ་ཀྱི་ཤིང་དེའི་འབྲས་བུ་འབྱུང་བ་དང་། སྐྱེ་བ་དང་། རྒྱས་པ་དང་། འགས་པ་རྒྱུན་མི་འཆད་ཅིང་བར་སྐབས་མེད་དེ། འཇམ་དཔལ་འདི་ལྟ་སྟེ། དཔེར་ན་བྱིས་པ་ལྔ་བརྒྱ་ཙམ་རྩེ་ན་ཁ་ཅིག་འགྲེང་། ཁ་ཅིག་འདུག་

49-1-211a

པའི་རྒྱུན་མི་ཆད་ཅིང་བར་སྐབས་མེད་པ་དེ་བཞིན་དུ་འཇམ་དཔལ་བྱང་ཆུབ་ཀྱི་ཤིང་དེའི་འབྲས་བུ་འབྱུང་བ་དང་། སྐྱེ་བ་དང་། སྨྱིན་པ་དང་། འགས་པ་ཡང་རྒྱུན་མི་འཆད་ཅིང་བར་སྐབས་མེད་དོ། །འཇམ་དཔལ་འདི་ལྟ་སྟེ། 
དཔེར་ན་ཆར་གྱི་འབྲུ་རགས་པ་འབབ་པའི་ཚེ། ཆུ་ལ་ཆུའི་ཆུ་བུར་ཁ་ཅིག་འབྱུང་། ཁ་ཅིག་འཇིག་པ་རྒྱུན་མི་འཆད་ཅིང་བར་སྐབས་མེད་པ་དེ་བཞིན་དུ་འབྲས་བུ་དེ་དག་འབྱུང་བ་དང་། སྐྱེ་བ་དང་། རྒྱས་པ་དང་། འགས་པ་ཡང་རྒྱུན་མི་འཆད་ཅིང་བར་སྐབས་
མེད་དེ། འབྲས་བུ་འགས་པ་དེའི་ཆ་ཤས་གཅིག་ལས་ཀྱང་གང་གཱའི་ཀླུང་གི་བྱེ་མ་སྙེད་ཀྱི་བྱང་ཆུབ་སེམས་དཔའ་འབྱུང་སྟེ། མཚན་སུམ་ཅུ་རྩ་གཉིས་དང་ལྡན་པ། ལུས་དཔེ་བྱད་བཟང་པོ་བརྒྱད་བཅུས་བརྒྱན་པ། སྲེད་མེད་ཀྱི་བུ་ལྟར་ལུས་མཁྲེགས་པ། སྲིད་པ་ཐ་
མ་པར་གྱུར་པའི་སེམས་ཅན་འཇིག་རྟེན་གྱི་ཁམས་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པར་ཡོངས་སུ་དག་པའི་སྨོན་ལམ་དང་ལྡན་པའི་བར་དུ་སྟེ། དེ་དག་ཐམས་ཅད་ཀྱིས་ཀྱང་དེ་ཙམ་དུ་རྒྱ་ཆེར་སངས་རྒྱས་ཀྱི་ཞིང་ཡོངས་སུ་དག་པར་སྦྱངས་ཏེ། དེ་དག་
དེ་ནས་བྱུང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་དེའི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་པའི་བྱང་ཆུབ་སེམས་དཔའ་དེ་དག་ལ་དེ་བཞིན་
གཤེགས་པ་དོན་ཐམས་ཅད་གྲུབ་པས་རང་གི་སངས་རྒྱས་ཀྱི་ཞིང་ཡོངས་སུ་དག་པ་འཆད་དེ། དུས་གསུམ་མཉམ་པ་ཉིད་ཀྱང་སྟོན་ཏོ། །དེ་དག་ཀྱང་སངས་རྒྱས་ཀྱི་ཞིང་ཡོངས་སུ་དག་པ་ཉན་ཅིང་ཀུན་འཛིན་ཏེ། ཐོས་མ་ཐག་ཏུ་མངོན་པར་ཤེས་པ་ལྔ་ཐོབ་བོ། །མངོན་པར་
ཤེས་པ་ཐོབ་མ་ཐག་ཏུ་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་ཞབས་ལ་མགོ་བོས་ཕྱག་འཚལ་ཏེ། དེ་བཞིན་གཤེགས་པ་དེ་ལ་ལན་གསུམ་བསྐོར་བ་བྱས་ནས་འདོང་ངོ་། །དེ་དག་རྫུ་འཕྲུལ་གྱི་སྟོབས་ཀྱིས་རང་རང་གི་སངས་རྒྱས་ཀྱི་ཞིང་དུ་སོང་ནས་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བྱང་ཆུབ་སེམས་དཔའི་ཏིང་ངེ་འཛིན་གསུམ་བསྒོམས་ཏེ་རབ་ཏུ་གོམས་

49-1-211b

པར་བྱས། ལམ་དུ་བྱས། རྟེན་དུ་བྱས། རུས་ཤིང་བཞིན་དུ་བྱས། རབ་ཏུ་རྟོགས་པར་བྱས་ཤིང་ལེགས་པར་བརྩམས་སོ། །ཏིང་ངེ་འཛིན་གསུམ་གང་ཞེ་ན། བྱང་ཆུབ་སེམས་དཔའི་ཏིང་ངེ་འཛིན་ཤུགས་ལྡན་ཞེས་བྱ་བ་དང་། བྱང་ཆུབ་སེམས་དཔའི་ཏིང་ངེ་
འཛིན་ཞི་གནས་ཞེས་བྱ་བ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཐམས་ཅད་ལ་དབང་བྱེད་པ་ཞེས་བྱའོ། །འཇམ་དཔལ་སྔོན་བྱུང་བ་འདས་པའི་དུས་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་
ཕ་རོལ་གྱི་ཡང་ཆེས་ཕ་རོལ་ན། མེ་ཏོག་གི་ཚོགས་ཤེས་བྱ་བའི་བསྐལ་པ་བྱུང་སྟེ། མེ་ཏོག་གི་ཚོགས་ཀྱི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། 
སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དཀོན་མཆོག་དམ་པ་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཀོན་མཆོག་དམ་པ་དེ་ལ་ཉན་ཐོས་ཐོག་མར་
འདུས་པ་ནི་ཉན་ཐོས་ཁྲག་ཁྲིག་ཕྲག་བརྒྱད་ཅུ་ཡོད་དེ། དགྲ་བཅོམ་པ་ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་དུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། 
ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་དུ་སོན་པ་ཤ་སྟག་གོ། །བྱང་ཆུབ་སེམས་དཔའ་འདུས་པ་ནི་དེའི་ཉིས་གྱུར་ཡོད་དེ། ཐམས་ཅད་ཀྱང་འཇིག་རྟེན་གྱི་ཁམས་དཔག་ཏུ་མེད་པའི་
སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་གྲངས་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་བསམ་གྱིས་མི་ཁྱབ་
པ་དང་། མཚུངས་པ་མེད་པ་དང་། གཞལ་དུ་མེད་པ་དང་། བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ཡང་དག་པར་ཞུགས་པ་ཤ་སྟག་གོ། །ཡང་ཉན་ཐོས་འདུས་པ་གཉིས་པ་ལ་ནི་ཉན་ཐོས་ཁྲག་ཁྲིག་ཡོད་དོ། །བྱང་ཆུབ་སེམས་དཔའ་

49-1-212a

འདུས་པ་ནི་དེའི་ཉིས་གྱུར་ཡོད་དོ། །ཉན་ཐོས་འདུས་པ་གསུམ་པ་ལ་ནི་ཉན་ཐོས་ཁྲག་ཁྲིག་ཕྲག་བརྒྱ་ཡོད་དེ། ཐམས་ཅད་ཀྱང་དགྲ་བཅོམ་པ། ཉོན་མོངས་པ་མེད་པ། དབང་དང་ལྡན་པར་གྱུར་པ་ནས་སེམས་ཀྱི་དབང་ཐམས་ཅད་ཀྱི་དམ་པའི་ཕ་
རོལ་དུ་སོན་པའི་བར་དུའོ། །བྱང་ཆུབ་སེམས་དཔའ་འདུས་པ་ནི་དེའི་ཉིས་གྱུར་ཡོད་དོ། །ཉིན་རེ་ཞིང་ཆོས་སྟོན་པ་ཐམས་ཅད་ལ་ཉན་ཐོས་འདུས་པ་དང་། བྱང་ཆུབ་སེམས་དཔའ་འདུས་པ་རྣམས་ཀྱིས་མཉམ་དུ་དེ་བཞིན་གཤེགས་པ་དེས་ཆོས་བསྟན་པ་ཀུན་ཤེས་སོ། །
འཇམ་དཔལ་དེ་བཞིན་གཤེགས་པ་དཀོན་མཆོག་དམ་པ་དེའི་ཉན་ཐོས་འདུས་པ་ནི་རྩིས་མཁན་ནམ་རྩིས་མཁན་གྱི་སློབ་མ་མཁས་པས་བསྐལ་པ་འམ། བསྐལ་པ་བརྒྱ་འམ། བསྐལ་པ་སྟོང་ངམ། བསྐལ་པ་སྟོང་ཕྲག་བརྒྱ་འམ། བསྐལ་པ་བྱེ་བ་འམ། བསྐལ་
པ་ཁྲག་ཁྲིག་གམ། བསྐལ་པ་གཏམས་སམ། བསྐལ་པ་བཀྲིགས་སམ། བསྐལ་པ་འགྱུར་ཡས་ཀྱི་བར་དུ་ཡང་ཉན་ཐོས་འདུས་པ་འདི་སྙེད་ཅེ་འམ། ཉན་ཐོས་འདུས་པ་བརྒྱ་ཕྲག་འདི་སྙེད་ཅེ་འམ། ཉན་ཐོས་འདུས་པ་སྟོང་ཕྲག་འདི་སྙེད་ཅེ་འམ། ཉན་ཐོས་འདུས་པ་
བྱེ་བ་ཕྲག་འདི་སྙེད་ཅེ་འམ། ཉན་ཐོས་འདུས་པ་ཁྲག་ཁྲིག་ཕྲག་འདི་སྙེད་ཅེ་འམ། ཉན་ཐོས་འདུས་པ་གཏམས་ཕྲག་འདི་སྙེད་ཅེ་འམ། ཉན་ཐོས་འདུས་པ་དཀྲིགས་ཕྲག་འདི་སྙེད་ཅེ་འམ། ཉན་ཐོས་འདུས་པ་ཁྱད་ཕྱིན་ཕྲག་འདི་སྙེད་ཅེ་འམ། ཉན་ཐོས་འདུས་པ་འགྱུར་ཡས་
ཕྲག་འདི་སྙེད་ཡོད་ཅེས་བརྩི་བར་མི་ནུས་སོ། །འཇམ་དཔལ་འདི་ལྟ་སྟེ། དཔེར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སྐར་མའི་གཟུགས་ལ་སྐར་མའི་གཟུགས་འདི་སྙེད་ཅེ་འམ། སྐར་མའི་གཟུགས་བརྒྱ་ཕྲག་འདི་སྙེད་ཅེ་འམ། སྐར་མའི་གཟུགས་སྟོང་ཕྲག་
འདི་སྙེད་ཅེ་འམ། སྐར་མའི་གཟུགས་བརྒྱ་སྟོང་ཕྲག་འདི་སྙེད་ཅེ་འམ། བྱེ་བ་ཕྲག་འདི་སྙེད་ཅེ་འམ། ཁྲག་ཁྲིག་ཕྲག་འདི་སྙེད་ཅེ་འམ། གཏམས་ཕྲག་འདི་སྙེད་ཅེ་འམ། དཀྲིགས་ཕྲག་འདི་སྙེད་ཅེ་འམ། འགྱུར་ཡས་ཕྲག་འདི་སྙེད་ཡོད་ཅེས་རྩིས་མཁན་ནམ། རྩིས་མཁན་
གྱི་སློབ་མ་མཁས་པས་ཀྱང་བགྲང་བར་མི་ནུས་ཏེ། འོན་ཀྱང་སྐར་མའི་གཟུགས་དཔག་ཏུ་མེད་པའི་གྲངས་སུ་འགྲོ་བ་དེ་བཞིན་དུ་འཇམ་དཔལ་ཉན་ཐོས་འདུས་པ་དེ་རྣམས་ཀྱི་མཐའ་ཡང་རྟོགས་པར་མི་ནུས་སོ། །འཇམ་དཔལ་དེའི་དུས་ན་རྒྱལ་པོ་བདེ་གནས་བློ་གྲོས་ཞེས་

49-1-212b

བྱ་བ་ཆོས་དང་ལྡན་པ་ཆོས་ཀྱི་རྒྱལ་པོ་ཞིག་ཡོད་པ་དེ་སངས་རྒྱས་ཀྱི་ཞིང་དེ་ཐམས་ཅད་ལ་དབང་ཞིང་བདག་པོ་བྱེད་དེ། ལས་ཀྱི་རྣམ་པར་སྨིན་པ་ལས་བྱུང་བའི་རྫུ་འཕྲུལ་ཐོབ་པ་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
དཀོན་མཆོག་དམ་པ་དེ་ཉན་ཐོས་དང་། བྱང་ཆུབ་སེམས་དཔའི་དགེ་འདུན་དུ་བཅས་པ་ལ་ལོ་བྱེ་བ་ཁྲག་ཁྲིག་ཕྲག་དྲུག་བཅུའི་བར་དུ་རོ་སྣ་བརྒྱ་པའི་ཞལ་ཟས་སྦྱར་ཏེ་རིམ་གྲོ་བྱས་སོ། །ཡུལ་ཀ་ཤི་པའི་ན་བཟའ་གསོལ་ཞིང་ཡོ་བྱད་ཐམས་ཅད་ཀྱང་སྦྱར་ཏེ། འདི་
ལྟར་ཆོས་གོས་དང་། བསོད་སྙོམས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་ཀྱིས་རྩ་བའི་རིམ་གྲོ་བྱས་སོ། །དེས་དེ་བཞིན་གཤེགས་པ་ཉན་ཐོས་ཀྱི་དགེ་འདུན་དང་བཅས་པ་དེ་ལ་རོ་སྣ་བརྒྱ་པའི་ཟས་ཀྱིས་རིམ་གྲོ་བྱས་པས་དགེ་བའི་རྩ་བ་རྒྱ་
ཆེ་ཞིང་དཔག་ཏུ་མེད་པ་མངོན་པར་འདུས་བྱས་སོ། །དགེ་བའི་རྩ་བ་རྒྱ་ཆེ་ཞིང་དཔག་ཏུ་མེད་པ་མངོན་པར་འདུས་བྱས་པས་དགེ་བའི་རྩ་བའི་ཤུགས་རྒྱ་ཆེ་ཞིང་དཔག་ཏུ་མེད་པ་བསྐྱེད་དོ། །དགེ་བའི་རྩ་བ་རྒྱ་ཆེ་ཞིང་གྲངས་མེད་པ་མངོན་པར་འདུས་བྱས་
སོ། །དགེ་བའི་རྩ་བ་རྒྱ་ཆེ་ཞིང་གྲངས་མེད་པ་མངོན་པར་འདུས་བྱས་ནས། དགེ་བའི་རྩ་བ་ཤུགས་རྒྱ་ཆེ་ཞིང་གྲངས་མེད་པ་བསྐྱེད་པར་གྱུར་ཏོ། །སྦྱིན་པའི་ཕ་རོལ་དུ་ཕྱིན་པ་དང་ལྡན་པའི་དགེ་བའི་རྩ་བ་བསམ་གྱིས་མི་ཁྱབ། མཚུངས་པ་མེད། གཞལ་
དུ་མེད། བརྗོད་དུ་མེད་པའི་ཡང་བརྗོད་དུ་མེད་པ་མངོན་པར་འདུས་བྱས་ནས། སྦྱིན་པའི་ཕ་རོལ་དུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་རྒྱ་ཆེ་ཞིང་བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་བསྐྱེད་པར་གྱུར་ཏོ། །
ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་དཔག་ཏུ་མེད་པ་རྒྱ་ཆེན་པོ་མངོན་པར་འདུས་བྱས་ཏེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་དཔག་ཏུ་མེད་པ་རྒྱ་ཆེན་པོ་མངོན་པར་འདུས་བྱས་ནས་ཚུལ་ཁྲིམས་ཀྱི་ཕ་རོལ་ཏུ་
ཕྱིན་པ་དང་ལྡན་པའི་དགེ་བའི་རྩ་བའི་ཤུགས་དཔག་ཏུ་མེད་པ་རྒྱ་ཆེན་པོ་བསྐྱེད་དོ། །དེ་བཞིན་དུ་སྦྱར་ཏེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་གྲངས་མེད། བསམ་གྱིས་མི་ཁྱབ་མཚུངས་པ་མེད། གཞལ་དུ་མེད། བརྗོད་དུ་མེད་ཅིང་

49-1-213a

རྒྱ་ཆེར་མངོན་པར་འདུས་བྱས་སོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་གྲངས་མེད་པ་ནས་བརྗོད་དུ་མེད་ཅིང་རྒྱ་ཆེ་བའི་བར་དུ་མངོན་པར་འདུས་བྱས་ནས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་
བའི་ཤུགས་རྒྱ་ཆེ་ཞིང་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་བསྐྱེད་དོ། བཟོད་པའི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་རྒྱ་ཆེ་ཞིང་གྲངས་མེད། དཔག་ཏུ་མེད་པ་མངོན་པར་འདུས་བྱས་ཏེ། ཇི་ལྟར་སྦྱིན་
པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་མངོན་པར་འདུས་བྱས་པ་དེ་བཞིན་དུ་བཟོད་པའི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་རྒྱ་ཆེ་ཞིང་གྲངས་མེད། དཔག་ཏུ་མེད་པ་མངོན་པར་འདུས་བྱས་ཏེ། ཇི་ལྟར་སྦྱིན་པའི་ཕ་རོལ་ཏུ་ཕྱིན་པ་
དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་མངོན་པར་འདུས་བྱས་པ་དེ་བཞིན་དུ་བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་ཡང་རྒྱས་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་
བའི་རྩ་བ་རྒྱ་ཆེ་ཞིང་དཔག་ཏུ་མེད་པ་མངོན་པར་འདུས་བྱས་སོ། །ཤེས་རབ་ཀྱི་ཕ་རོལ་དུ་ཕྱིན་པ་དང་ལྡན་པའི་དགེ་བའི་རྩ་བ་རྒྱ་ཆེ་ཞིང་དཔག་ཏུ་མེད་པ་མངོན་པར་འདུས་བྱས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་རྒྱ་ཆེ་ཞིང་
དཔག་ཏུ་མེད་པ་བསྐྱེད་དོ། །དེ་བཞིན་དུ་སྦྱར་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པ་རྒྱ་ཆེ་བ་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་མངོན་པར་འདུས་བྱས་ཏེ། ཤེས་རབ་ཀྱི་ཕ་རོལ་དུ་ཕྱིན་པ་དང་ལྡན་པའི་དགེ་
བའི་རྩ་བ་བརྗོད་དུ་མེད་པའི་བར་དུ་མངོན་པར་འདུས་བྱས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་བསྐྱེད་དོ། །འཇམ་དཔལ་རྒྱལ་
པོ་བདེ་གནས་བློ་གྲོས་ཀྱིས་དེ་ལྟ་བུར་ཕ་རོལ་ཏུ་ཕྱིན་པ་དྲུག་དང་ལྡན་པའི་དགེ་བའི་རྩ་བ་རྣམས་བསྐྱེད་ནས། དགའ་བ་དང་། དད་པ་དང་། མཆོག་ཏུ་དགའ་བ་མང་བས་ཏ་ལ་བདུན་སྲིད་དུ་ནམ་མཁའ་ལ་འཕགས་ནས། བཅོམ་ལྡན་འདས་དེ་བཞིན་

49-1-213b

གཤེགས་པ་དཀོན་མཆོག་དམ་པ་དེ་ལ་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སྟོབས་བཅུ་ཤེས་རབ་མཐའ་ཡས་པ། །ཆུ་བོ་བཞི་རྒལ་མིའི་སེང་གེ། །ཁྱོད་ལ་ཕུལ་བ་དཔག་མེད་འགྱུར། །སྦྱིན་པ་དེ་ཡང་
ཟིལ་མི་ནོན། །བ་ཚྭ་མེད་པའི་ཞིང་དག་ལ། །རྡོ་དང་བོང་བ་གྱོ་མོ་མེད། །ཀུན་སྦྱངས་རབ་ཏུ་རྨོས་པས་ན། །མི་མཉམ་མེད་ཕྱོགས་རྩྭ་མེད་པར། །ཇི་ལྟར་ས་བོན་བཏབ་ནས་སུ། །རྨེད་པའི་མི་དེ་བདེར་ཉལ་ཡང་། །དུས་སུ་རྩ་བ་བརྟན་པར་ཟུག །མྱུ་གུ་སྔོན་པོར་
འབྱུང་བར་བྱེད། །ཀླུ་ཡིས་ས་ལ་ཆུས་བཏབ་པས། །ལོ་མ་སྡོང་བུ་རྣམས་ཀྱང་འབྱུང་། །དུས་ཚིགས་དུས་ཀྱི་རིམས་བཞིན་དུ། །ངེས་པར་འབྲས་བུ་སྨིན་པར་འགྱུར། །དེ་བཞིན་འདོད་ཆགས་ཞེ་སྡང་བཅོམ། །གཏི་མུག་བྲལ་བ་ངེས་པའི་བློས། །མ་སྨད་ཡོན་ཏན་ཞིང་
ཁྱོད་ལ། །ཤེས་རབ་གཤོལ་གྱིས་རྨོས་པ་ནི། །ས་བོན་ཉུང་ངུ་བཏབ་ན་ཡང་། །དེ་བཞིན་སྦྱིན་བདག་མི་བརྩོན་ཡང་། །ཕ་རོལ་ཕྱིན་པ་ཡོངས་རྫོགས་ཤིང་། །ཐམས་ཅད་མཁྱེན་པའི་མྱུ་གུ་སྐྱེ། །མགོན་པོ་ཁྱོད་ལ་སྦྱིན་ཕུལ་ན། །བྱམས་པ་སྙིང་རྗེ་ཉོན་མོངས་
མེད། །རྣམ་པར་ཐར་པའི་སྒོ་གསུམ་དང་། །ཐ་མར་འབྲས་བུ་མྱ་ངན་འདའ། །སུམ་བཅུ་རྩ་གཉིས་མཚན་མངའ་བ། །ས་ལ་དོང་ཀ་མེན་རྒྱས་བཞིན། །བདག་གིས་དགེ་བའི་རྩ་བསགས་པས། །ཇི་ལྟར་བདེ་གཤེགས་དེ་བཞིན་ཤོག །ཇི་ལྟར་བསོད་ནམས་མཚན་མངའ་བ། །
ལེགས་སྤྱད་བསགས་པ་ཐུབ་པའི་ཏོག །ཇི་ལྟར་མི་མཆོག་དམ་པ་བཞིན། །བདག་ཀྱང་བདེ་གཤེགས་དེ་བཞིན་གྱུར། །ཇི་ལྟར་དཔེ་མེད་བློ་ཅན་ཁྱོད། །ཤེས་རབ་གནས་ལ་ཁྱོད་གནས་ནས། །ལྟ་བར་རབ་ཏུ་བྱིང་བ་ཡི། །སྐྱེ་བོ་མ་ལོག་འགོད་པར་མཛད། །བདག་ཀྱང་
བྱང་ཆུབ་རེག་ནས་ནི། །དེ་བཞིན་བདེ་ལ་རབ་གནས་ཏེ། །ལོག་པའི་ལམ་སོང་སྐྱེ་བོ་རྣམས། །བདེན་པ་བཞི་ཡི་ལམ་དུ་འགོད། །ཇི་ལྟར་ཁྱོད་ནི་ཕུང་པོ་མེད། །བླ་མེད་ཕུང་པོ་ཟད་པར་ཞུགས། །བྱིས་པ་ཕུང་པོས་བཅིངས་པ་རྣམས། །ཐམས་ཅད་ཕུང་པོ་འདོར་དུ་བཙུད། །
བདག་ཀྱང་ཕུང་པོ་མེད་པ་དང་། །ཕུང་མེད་བྱང་ཆུབ་མཆོག་ཐོབ་ནས། །ཕུང་པོས་བཅིངས་པའི་སྐྱེ་བོ་རྣམས། །ཕུང་པོ་འདོར་བར་རབ་ཏུ་འགོད། །ཇི་ལྟར་ཁྱོད་ཀྱིས་ཉོན་མོངས་སྤངས། །ཆུ་ཡིས་མེ་རྣམས་ཞི་བ་བཞིན། །ཉོན་མོངས་མེ་ཡིས་འབར་བ་ཡི། །སྐྱེ་བོ་སྡུག་

49-1-214a

བསྔལ་ཐར་བར་མཛད། །བདག་ཀྱང་བྱང་ཆུབ་རབ་རེག་སྟེ། །ཁྲོ་གླེན་འདོད་མེ་མ་ཞི་ཞེས། །ཉེ་བར་ཞི་བའི་ལམ་སྟོར་བའི། །སྐྱེ་བོ་རབ་ཏུ་ཞི་བར་འགོད། །སེར་སྣའི་ཞགས་པས་བཅིངས་པ་དང་། །ཕྲག་དོག་ཀུན་སྦྱོར་མུན་པས་
བསྒྲིབས། །སྲིད་པར་ཆགས་པ་མགོན་མེད་རྣམས། །ཡན་ལག་བརྒྱད་ཀྱི་ལམ་ལ་དགོད། །ཇི་ལྟར་རང་འབྱུང་ཁྱོད་ཉིད་ནི། །སྟོབས་བཅུ་ཡེ་ཤེས་རབ་གནས་ཏེ། །སྲིད་སྐོམ་སེམས་ཅན་ཁྲག་ཁྲིག་ལ། །སྟོབས་བཅུ་ཡེ་ཤེས་ངོམས་པར་མཛད། །བདག་ཀྱང་བྱང་
ཆུབ་རབ་རེག་ཅིང་། །བླ་མེད་ཡེ་ཤེས་ཐོབ་ནས་སུ། །སྲིད་སྐོམ་སེམས་ཅན་ཁྲག་ཁྲིག་ལ། །སྟོབས་བཅུ་ཡེ་ཤེས་ངོམས་པར་བགྱི། །འཇམ་དཔལ་དེ་ལྟར་རྒྱལ་པོ་བདེ་གནས་བློ་གྲོས་ཀྱིས་བཅོམ་ལྡན་འདས་དེ་བཞིན་གཤེགས་པ་དཀོན་མཆོག་དམ་པ་དེ་ལ་ལོ་བྱེ་བ་
ཁྲག་ཁྲིག་ཕྲག་དྲུག་བཅུའི་བར་དུ་ཟས་རོ་སྣ་བརྒྱ་པ་སྦྱར་ཅིང་། ཡུལ་ཀ་ཤི་པའི་ན་བཟའ་གསོལ་ཏེ་བར་སྣང་ལ་འདུག་ནས་ཚིགས་སུ་བཅད་པ་དེ་དག་གིས་མངོན་པར་བསྟོད་དེ། དགེ་བའི་རྩ་བའི་ཤུགས་ཚད་མེད། གྲངས་མེད། བསམ་གྱིས་མི་ཁྱབ། མཚུངས་
པ་མེད། གཞལ་དུ་མེད། བརྗོད་དུ་མེད་པ་བསྐྱེད་ནས། དགེ་བའི་རྩ་བའི་ཤུགས་དེས་བསྐལ་པ་བརྗོད་དུ་མེད་པར་ནམ་ཡང་སེམས་ཅན་དམྱལ་བར་མ་སྐྱེས། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ལྷ་མ་ཡིན་གྱི་རིས་སུ་ཡང་མ་སྐྱེས། མི་ཁོམ་
པ་རྣམས་སུ་མ་སྐྱེས། རིགས་དམའ་བར་མ་སྐྱེས། དབུལ་པོའི་རིགས་སུ་མ་སྐྱེས་སོ། །བསྐལ་པ་བརྗོད་དུ་མེད་པར་ནམ་ཡང་ལུས་ལ་རླུང་ལས་གྱུར་པ་འམ། མཁྲིས་པ་ལས་གྱུར་པ་འམ། བད་ཀན་ལས་གྱུར་པའི་ནད་མ་བྱུང་ངོ་། །ནམ་ཡང་དབང་པོ་མ་ཚང་བར་མ་
གྱུར། ནམ་ཡང་མིག་སེར་བ་དང་། འཇིགས་པའི་མིག་དང་། མིག་ཡོ་བ་དང་། བཞིན་ཡོ་བར་མ་གྱུར་ཏོ། །ནམ་ཡང་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལུས་མ་བརྒྱན་པར་མ་གྱུར། ནམ་ཡང་དཔེ་བྱད་བཟང་པོ་བརྒྱད་བཅུ་དང་བྲལ་བར་མ་
གྱུར། ལྷའི་ནང་བུ་ལྟར་གྱུར་ཏམ། མིའི་ནང་དུ་མིར་གྱུར་ན། ནམ་ཡང་དབང་པོ་དང་ཕྱུག་པོ་མ་བྱས་པར་མ་གྱུར། ནམ་ཡང་སྨོན་ལམ་ཕུན་སུམ་ཚོགས་པ་དང་བྲལ་བར་མ་གྱུར། ནམ་ཡང་སངས་རྒྱས་མེད་པའི་སངས་རྒྱས་ཀྱི་ཞིང་དུ་མ་སྐྱེས། ནམ་ཡང་

49-1-214b

ནད་མེད་པ་དང་། གཟུགས་དང་ལོངས་སྤྱོད་དང་། གཡོག་འཁོར་དང་། ཕྱུག་པས་དེ་སྔོན་དྲེགས་པར་མ་གྱུར། ནམ་ཡང་བུད་མེད་ཀྱི་དྲེགས་པ་དང་གོས་ཀྱི་དྲེགས་པ་མ་སྐྱེས། ནམ་ཡང་སྦྱིན་བདག་མ་བྱས་པར་མ་གྱུར། དེ་ནམ་ཡང་ཚུལ་ཁྲིམས་ཀྱི་དྲེགས་
པ་མ་སྐྱེས། ནམ་ཡང་ཚུལ་ཁྲིམས་དང་ལྡན་པ་མ་ཡིན་པར་མ་གྱུར། དེ་ནམ་ཡང་ཐོས་པས་དྲེགས་པ་མ་སྐྱེས། ནམ་ཡང་མང་དུ་ཐོས་པ་མ་ཡིན་པར་མ་གྱུར། མན་ཡང་འདོད་པའི་འདུ་ཤེས་མ་སྐྱེས། ནམ་ཡང་བཙུན་མོའི་འཁོར་གྱིས་མ་བསྐོར་བར་མ་གྱུར། 
ནམ་ཡང་ཚངས་པར་མི་སྤྱོད་པར་མ་གྱུར་ཏེ། བསམ་མ་ཐག་ཏུ་བུ་རྙེད་པར་གྱུར་ཏོ། །ནམ་ཡང་གནོད་སེམས་ཀྱི་འདུ་ཤེས་མ་སྐྱེས། ནམ་ཡང་རྣམ་པར་འཚེ་བའི་འདུ་ཤེས་མ་སྐྱེས་ཏེ། དེ་ལྟར་རྒྱལ་པོ་དེས་ཤུགས་དང་ལྡན་པའི་ཏིང་ངེ་འཛིན་འདི་བསྐྱེད་ནས། 
བྱང་ཆུབ་སེམས་དཔའི་ཡོན་ཏན་འདི་རྣམས་དང་གཞན་ཡང་རབ་ཏུ་བསྒྲུབས་སོ། །འདི་ཇི་སྙམ་དུ་སེམས། འཇམ་དཔལ་དེའི་ཚེ་དེའི་དུས་ན་རྒྱལ་པོ་བདེ་གནས་བློ་གྲོས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་
ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་དེ་ནི་དེའི་ཚེ་དེའི་དུས་ན་རྒྱལ་པོ་བདེ་གནས་བློ་གྲོས་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་
དཔས་སྦྱིན་པའི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་བཙལ་བར་བྱའོ་ཞེས་དེ་ལྟར་བསླབ་པར་བྱའོ། །འཇམ་དཔལ་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སྒྲིབ་པ་མེད་པའི་རྣམ་པར་ཐར་པ་
ལ་སྤྱོད་པ་དེས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་རྒྱ་ཆེན་པོ་མངོན་པར་འདུས་བྱས་ཏེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་རྒྱ་ཆེན་པོ་བསྐྱེད་པར་བྱའོ།། །། བམ་པོ་གཉིས་པ། 
འཇམ་དཔལ་སྔོན་བྱུང་བ་འདས་པའི་དུས་ན། བསྐལ་པ་གྲངས་མེད། དཔག་ཏུ་མེད། བསམ་གྱིས་མི་ཁྱབ། མཚུངས་པ་མེད། བརྗོད་དུ་མེད་པ་ན་རྒྱལ་པོའི་དྲང་སྲོང་ཚངས་པའི་ལྷ་ཞེས་བྱ་བ་དང་། མེས་སྦྱིན་ཞེས་བྱ་བ་གཉིས་བྱུང་སྟེ། དེ་གཉིས་ནགས་

49-1-215a

ཤིག་ན་འཁོད་དེ། དེ་དག་དགོན་པ་ནས་དགོན་པ། ནགས་ཚལ་ནས་ནགས་ཚལ་དུ། གཤོང་ནས་གཤོང་དུ། ནགས་ཐིབས་པོ་ནས་ཐིབས་པོར་འགྲོ་ཞིང་བདག་ཅག་བུད་མེད་དང་ལྷན་ཅིག་གནས་པར་གྱུར་ན་བདག་ཅག་འདོད་
ཆགས་ཀྱི་རྒྱུ་ལས་བྱུང་བའི་བསླབ་པ་ལས་འགལ་བར་འགྱུར། ཡོངས་སུ་བཟུང་བ་དང་བཅས་པ་དང་ལྷན་ཅིག་ཏུ་འགྲོགས་ན་ཡང་བདག་ཅག་གནོད་སེམས་ཀྱི་རྒྱུ་ལས་བྱུང་བའི་བསླབ་པ་ལས་འགལ་བར་འགྱུར། ཡོངས་སུ་བཟུང་བ་དང་བཅས་པ་འམ་
ཡོངས་སུ་བཟུང་བ་ལ་ཉེས་པར་མི་ལྟ་བ་དང་ལྷན་ཅིག་འགྲོགས་པར་གྱུར་ན་ཡང་། བདག་ཅག་གཏི་མུག་གི་རྒྱུ་ལས་བྱུང་བའི་བསླབ་པ་ལས་འགལ་བར་འགྱུར་རོ་ཞེས་དེ་ལྟ་བུའི་ཉེས་པ་རྣམས་མཐོང་ནས། དགོན་པ་ནས་དགོན་པར། ནགས་ཚལ་
ནས་ནགས་ཚལ། གཤོང་ནས་གཤོང་། ནགས་ཐིབས་པོ་ནས་ཐིབས་པོར་རྒྱུའོ། །འཇམ་དཔལ་དེའི་དུས་ན་རྒྱལ་པོ་སྡེ་མི་ཕམ་པ་ཞེས་བྱ་བ་ཞིག་ཡོད་དེ། དེ་རྒྱལ་པོར་དབང་བསྐུར་བའི་ཚེ་ཁྱིམ་གྱི་གནས་ནས་མངོན་པར་བྱུང་བ་རྣམས་རྩྭ་དང་། ཤིང་དང་
ཆུ་ལ་ཅི་བདེར་སྤྱོད་དུ་གནང་སྟེ། རྗེས་སུ་ཡི་རང་ངོ་ཞེས་ཚིག་དེ་སྐད་ཅེས་སྨྲས་པས། དྲང་སྲོང་དེ་གཉིས་ཀྱང་རྒྱལ་པོ་སྡེ་མི་ཕམ་པའི་ཡུལ་ཁམས་ན་གནས་སོ། །དེའི་ཚེ་རྒྱལ་པོ་སྡེ་མི་ཕམ་པ་ལ་ཆོམ་རྐུན་ནོར་འཕྲོག་པས་གནོད་པའི་ལས་བྱས་ཏེ་བྲོས་
པ་དང་། དྲང་སྲོང་དེ་དག་གིས་ཆོམ་རྐུན་བྲོས་པ་མཐོང་ངོ་། །ཆོམ་རྐུན་དེ་དག་གིས་ཀྱང་དྲང་སྲོང་ནགས་ཀྱི་ནང་ན་གནས་པ་མཐོང་ནས་ཆོམ་རྐུན་དེ་དག་གིས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །དྲང་སྲོང་ཁྱེད་ལ་བདག་ཅག་མཐོང་ངམ་ཞེས་ལ་ལ་ཞིག་
གིས་དྲིས་ན་ཁྱེད་ཀྱིས་མ་སྟོན་ཅིག །དེ་ནས་དྲང་སྲོང་ཚངས་པའི་ལྷས་དྲང་སྲོང་མེས་སྦྱིན་ལ་སྨྲ་བ། ཀྱེ་མའོ་མེས་སྦྱིན་བྱུང་བ་འདི་ནི་ཤིན་དུ་དཀའ་ན་ཇི་ལྟར་བྱ། གལ་ཏེ་འདི་མ་མཐོང་ངོ་ཞེས་སྨྲས་ན་ནི་གཞན་བསླུས་པར་འགྱུར། ཇི་སྟེ་བསྟན་ན་ནི་གནོད་པ་
བྱས་པར་ཡང་འགྱུར་ན། འདི་ཇི་ལྟར་བྱ་ཁྱོད་སྨྲོས་ཤིག །དེ་སྐད་ཅེས་སྨྲས་པ་དང་། དྲང་སྲོང་མེས་བྱིན་གྱིས་དྲང་སྲོང་ཚངས་པའི་ལྷ་ལ་འདི་སྐད་ཅེས་སྨྲས་སོ། །ཀྱེ་ཚངས་པའི་ལྷ་འདི་ལ་གནོད་པར་འགྱུར་བར་མ་འཛིན་ཅིག །དེ་ཅིའི་ཕྱིར་ཞེ་ན། ཚངས་པའི་ལྷ་གང་

49-1-215b

ལ་ལ་དག་ལུས་དང་སྲོག་ལ་ལྟ་བ་དང་བཅས་པར་གནས་པ་དེ་དག་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཟིན་ནས་འདུག་གོ། །ཚངས་པའི་ལྷ་འདི་ལྟ་སྟེ། དཔེར་ན་གོས་སྣུམ་ཅན་ལ་རྡུལ་རེག་ན་ཆགས་པར་འགྱུར་བ་དེ་བཞིན་དུ་ཚངས་པའི་
ལྷ་གང་དག་ཁ་ཅིག་ལུས་དང་སྲོག་ལ་ལྟ་བ་དང་བཅས་པར་གནས་པ་དེ་དག་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཀུན་དུ་ཟིན་ནས་འདུག་གོ། །ཚངས་པའི་ལྷ་གང་དག་ཁ་ཅིག་ལུས་དང་སྲོག་ལ་མི་ལྟ་བ་དེ་དག་ལ་ནི་ཡོངས་སུ་ཟག་པ་བྱུང་བ་
བྱུང་བ་རྣམས་ཀྱིས་སེམས་ཀུན་དུ་ཟིན་ཅིང་འདུག་པར་མི་འགྱུར་རོ། །ཚངས་པའི་ལྷ་འདི་ལྟ་སྟེ། དཔེར་ན་གོས་ཡོངས་སུ་དག་པ་ལ་རྡུལ་གྱིས་རེག་ཀྱང་སྤྲུགས་མ་ཐག་ཏུ་དེ་མེད་པར་འགྱུར་བ་དེ་བཞིན་དུ་ཚངས་པའི་ལྷ་གང་དག་ཁ་ཅིག་ལུས་དང་སྲོག་ལ་
མི་ལྟ་བ་དེ་དག་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཀུན་ཏུ་ཟིན་ཅིང་གནས་པར་མི་འགྱུར་རོ། །དེ་བས་ན་ཚངས་པའི་ལྷ་བདག་ཅག་ཀྱང་ལུས་དང་སྲོག་ལ་མི་བལྟ་བར་བྱའོ། །ཚངས་པའི་ལྷ་གལ་ཏེ་བདག་ཅག་ལུས་དང་སྲོག་ལ་མ་བལྟས་ན་
བདག་ཅག་ཡོངས་སུ་ཟག་པ་འབྱུང་བ་དེས་སེམས་ཟིན་ནས་གནས་པར་མི་འགྱུར་རོ། །ཀྱེ་ཚངས་པའི་ལྷ་ལུས་དང་སྲོག་ལ་ལྟ་བ་དང་བཅས་པའི་བརྟུལ་ཞུགས་འགྲུབ་བོ་ཞེས་སངས་རྒྱས་བཅོམ་ལྡན་འདས་རྣམས་ཀྱིས་བཀའ་མ་སྩལ་ཏོ། །དེ་ནས་དྲང་སྲོང་
ཚངས་པའི་ལྷ་ལ་དྲང་སྲོང་མེས་བྱིན་གྱིས་ལུས་དང་སྲོག་ལ་མི་ལྟ་བ་བསྟན་པས་ལུས་དང་སྲོག་ལ་མི་ལྟ་བ་རྙེད་དོ། །དེ་ནས་རྒྱལ་པོ་སྡེ་མི་ཕམ་པ་ཆོམ་རྐུན་དེ་དག་ཚོལ་ཞིང་ནགས་སྟུག་པོ་དེར་ཕྱིན་ཏེ། རྒྱལ་པོ་སྡེ་མི་ཕམ་པས་ནགས་སྟུག་པོའི་ནང་ན་དྲང་སྲོང་དེ་དག་
གནས་པ་མཐོང་ངོ་། །མཐོང་ནས་དྲང་སྲོང་དེ་དག་ག་ལ་བ་དེར་སོང་སྟེ། མི་ཁ་ཅིག་ནགས་སྟུག་པོ་དེར་ཆོམ་རྐུན་ཚོལ་དུ་བཀྱེའོ། །དེ་ནས་རྒྱལ་པོ་སྡེ་མི་ཕམ་པས་དྲང་སྲོང་དེ་དག་གི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་
ནས་རྒྱལ་པོ་སྡེ་མི་ཕམ་པས་དྲང་སྲོང་དེ་གཉིས་ལ་འདི་སྐད་ཅེས་སྨྲས་སོ། །དྲང་སྲོང་ཁྱེད་གཉིས་ཀྱིས་ཆོམ་རྐུན་ནགས་སྟུག་པོ་འདིའི་ནང་དུ་འོངས་པ་འམ་ཕྱིར་བྱུང་བ་ལྟ་མཐོང་ངམ། དེ་སྐད་ཅེས་སྨྲས་པ་དང་། དྲང་སྲོང་དེ་གཉིས་ཀྱིས་རྒྱལ་པོ་སྡེ་མི་ཕམ་པ་ལ་འདི་སྐད་ཅེས་སྨྲས་

49-1-216a

སོ། །རྒྱལ་པོ་བདག་ཅག་གིས་བདག་ཉིད་ཀྱང་མི་མཐོང་ན་ཆོམ་རྐུན་ལྟ་ག་ལ་མཐོང་། རྒྱལ་པོ་སྡེ་མི་ཕམ་པ་དང་དྲང་སྲོང་དེ་དག་གཏམ་འདི་བྱས་པ་དང་། རྒྱལ་པོའི་མི་དེ་དག་གིས་ཆོམ་རྐུན་དེ་དག་ཟིན་ཏེ། དེ་དག་གིས་དེ་དག་ཟིན་ནས་
རྒྱལ་པོ་སྡེ་མི་ཕམ་པ་ག་ལ་བ་དེར་འོངས་ཏེ་ཕྱིན་ནས་འདི་སྐད་ཅེས་སྨྲས་སོ། །ཆོམ་རྐུན་དེ་དག་བཟུང་སྟེ་མཆིས་པ་འདི་ལགས་ཞེས་བྱས་སོ། །དེ་ནས་རྒྱལ་པོ་སྡེ་མི་ཕམ་པས་དྲང་སྲོང་དེ་གཉིས་ཀྱིས་སྨྲས་པའི་དོན་ཁོང་དུ་མ་ཆུད་ནས་དྲང་སྲོང་དེ་གཉིས་ལ་སྨྲས་པ། 
ཁྱེད་ནི་བརྫུན་ཟེར་བ་ཡིན་ཏེ། དྲང་སྲོང་མ་ཡིན་ནོ་ཞེས་དེ་གཉིས་ཀྱི་རྐང་པ་དང་ལག་པ་གཅོད་དུ་བཅུག་གོ། །འོན་ཀྱང་དྲང་སྲོང་དེ་དག་གིས་གཞན་ལ་གནོད་པ་མ་བྱས་སོ། །དེ་ནས་ཡང་དྲང་སྲོང་མེས་བྱིན་རྐང་ལག་གཅད་པ་དང་། རྒྱལ་པོ་སྡེ་མི་ཕམ་པ་ལ་འདི་སྐད་སྨྲས་སོ། །
ཀྱེ་རྒྱལ་པོ་ཁྱོད་ཉིད་ལ་བདག་ཀུན་དུ་བཙལ་ན་རྒྱལ་པོ་སྡེ་མི་ཕམ་པ་ཞེས་བྱ་བའི་རྒྱལ་པོ་གང་ཡིན་ཅི་མིག་རྒྱལ་པོ་སྡེ་མི་ཕམ་པ་འམ། འོན་ཏེ་རྒྱལ་པོ་སྡེ་མི་ཕམ་པ་མིག་ལས་གཞན་ནམ། ཅི་རྒྱལ་པོ་སྡེ་མི་ཕམ་པ་དེ་རྣ་བ་འམ། སྣ་འམ། ལྕེ་འམ། ལུས་
སམ། ཡིད་དམ། འོན་ཏེ་རྒྱལ་པོ་སྡེ་མི་ཕམ་པ་དེ་རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། རྣམ་པར་ཤེས་པ་ལས་གཞན་ནམ་ཞེས་དྲང་སྲོང་དེས་བདག་མི་དམིགས་པར་བསྟན་པ་དང་། ཡང་དག་པ་ཇི་ལྟ་བ་བཞིན་རྟོག་གོ། །དེ་ནས་རྒྱལ་པོ་སྡེ་མི་
ཕམ་པས་ཡང་དག་པ་ཇི་ལྟ་བ་བཞིན་དུ་བརྟགས་ན་བདག་ཉིད་མ་དམིགས་སོ། །དོན་དམ་པར་བདག་ཉིད་མ་དམིགས་པས་འགྱོད་པ་ཆེན་པོ་དང་ལྡན་པར་འགྱུར་ཏེ། ཉེས་པ་མེད་པའི་དྲང་སྲོང་གིས་བཤད་པའི་དོན་མ་ཤེས་པས་འཕྲལ་དུ་སྡིག་པའི་ལས་བྱས་པ་དེས་
ཆོས་ཉིད་དེ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ནས་སྡུག་བསྔལ་ཞིང་ཡིད་མི་བདེ་སྟེ་འགྱོད་ནས་སའི་ཕྱོགས་དེ་ན་འགྲེ་ཞིང་ལྡོག་གོ། །དེ་ནས་དྲང་སྲོང་མེས་བྱིན་དེས་རྒྱལ་པོ་སྡེ་མི་ཕམ་པ་འགྱོད་པར་རིག་ནས་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ཇི་ལྟར་བདག་
ཉིད་མི་དམིགས་པ་དེ་བཞིན་དུ་སུའི་རྐང་ལག་བཅད་པ་དེ་ཡང་མི་དམིགས་སོ། །དེ་ནས་རྒྱལ་པོ་སྡེ་མི་ཕམ་པ་ལ་དྲང་སྲོང་མེས་བྱིན་གྱིས་སྟོང་པ་ཉིད་བསྟན་པས་ཀུན་ནས་དཀྲིས་པ་དེ་མྱུར་དུ་བསལ་ཏེ། ཆོས་རྣམས་ཀྱི་ངོ་བོ་ཉིད་ཀྱི་མཚན་ཉིད་མྱུར་དུ་རྟོགས་

49-1-216b

ནས་དེས་དེ་གཉིས་ལ་སྟོན་པར་འདུ་ཤེས་བསྐྱེད་དོ། །དྲང་སྲོང་དེ་དག་གིས་དེ་ལ་ཚུལ་ཁྲིམས་ཀྱི་གཏམ་བརྗོད་དེ། རྒྱལ་པོ་ཆེན་པོ་ཚུལ་ཁྲིམས་ཡོངས་སུ་དག་པའི་ཕྱིར་ཚུལ་ཁྲིམས་དང་ལྡན་པའི་སེམས་ལ་སྨོན་པ་འགྲུབ་སྟེ། 
རྒྱལ་པོ་ཆེན་པོ་ཚུལ་ཁྲིམས་སུ་ཡོངས་སུ་དག་པའི་མཐུ་ལ་གཟིགས། རྒྱལ་པོ་ཆེན་པོ་བདེན་པ་དང་། བདེན་པའི་ཚིག་གང་གིས་བསྐལ་པ་བརྗོད་དུ་མེད་པར་ཡང་སེམས་མ་རུང་བར་བྱས་པར་མི་དྲན་པ་ལྟ་ན་བདེན་པ་དང་བདེན་པའི་ཚིག་དེས་བདག་ཅག་གཉིས་ཀྱི་
ལག་པ་གཡས་པ་སྔ་མ་བཞིན་དུ་གྱུར་ཅིག་ཅེས་བྱས་མ་ཐག་ཏུ་བདེན་པའི་བྱིན་གྱི་བརླབས་ཀྱིས་དེ་གཉིས་ཀྱི་ལག་པ་གཡས་པ་སྔ་མ་བཞིན་དུ་གྱུར་ཏོ། །རྒྱལ་པོ་ཆེན་པོ་བདེན་པ་དང་བདེན་པའི་ཚིག་གང་གིས་བསྐལ་པ་བརྗོད་དུ་མེད་པར་ལུས་ཀྱི་ལས་མ་རུང་བར་
བྱས་པར་མི་དྲན་པ་ལྟ་ན། བདེན་པ་དང་བདེན་པའི་ཚིག་དེས་བདག་ཅག་གཉིས་ཀྱི་ལག་པ་གཡོན་པ་སྔ་མ་བཞིན་དུ་གྱུར་ཅིག་ཅེས་བྱས་མ་ཐག་ཏུ་བདེན་པའི་བྱིན་གྱིས་བརླབས་ཀྱིས་དེ་གཉིས་ཀྱི་ལག་པ་གཡོན་པ་སྔ་མ་བཞིན་དུ་གྱུར་ཏོ། །རྒྱལ་པོ་ཆེན་པོ་བདེན་པ་དང་
བདེན་པའི་ཚིག་གང་གིས་བསྐལ་པ་བརྗོད་དུ་མེད་པར་འཚོ་བ་མ་རུང་བར་བྱས་པར་མི་དྲན་པ་ལྟ་ན། བདེན་པ་དང་བདེན་པའི་ཚིག་དེས་བདག་ཅག་གཉིས་ཀྱི་རྐང་པ་སྔ་མ་བཞིན་དུ་གྱུར་ཅིག་ཅེས་བྱས་པ་དང་། འདི་ལྟར་དྲང་སྲོང་མེས་བྱིན་དེའི་བདེན་པའི་བྱིན་གྱིས་བརླབས་
ཀྱིས་དྲང་སྲོང་དེ་གཉིས་ཀྱི་རྐང་པ་དང་ལག་པ་སྔ་མ་བཞིན་དུ་གྱུར་ཏོ། །དེ་ནས་རྒྱལ་པོ་སྡེ་མི་ཕམ་པས་དེ་གཉིས་ཀྱི་བདེན་པའི་བྱིན་གྱིས་བརླབས་ཀྱི་རྫུ་འཕྲུལ་མཐོང་ནས་སྤུ་ཟིང་ཞེས་བྱེད་པར་གྱུར་ཏོ། །དེ་ནས་དྲང་སྲོང་མེས་བྱིན་གྱིས་བདེན་པའི་བྱིན་གྱིས་བརླབས་
ཐོས་པས་ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་ཡོངས་སུ་དག་པར་བྱ་བའི་ཕྱིར་བརྩོན་པར་གྱུར་ཏོ། །དེ་དེ་ན་འདུག་བཞིན་དུ་འཕགས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་གནས་པར་གྱུར་ཏོ། །དེས་དེ་ཉིད་ནས་ཕྱོགས་བཅུའི་འཇིག་རྟེན་གྱི་
ཁམས་ན་ཚད་མེད་པའི་སངས་རྒྱས་བྱེ་བ་ཁྲག་ཁྲིག་མཐོང་སྟེ། ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ། ལ་ལ་ནི་བླ་ན་མེད་པའི་ཆོས་ཀྱི་འཁོར་ལོ་སྐོར། ལ་ལ་ནི་རྫུ་འཕྲུལ་གྱི་ཆོ་འཕྲུལ་རྣམ་པ་དུ་མས་སེམས་

49-1-217a

ཅན་རྣམས་ལ་འདོམས། ལ་ལ་ནི་ཚེའི་འདུ་བྱེད་འདོར། ལ་ལ་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངསུ་ཡོངསུ་མྱ་ངན་ལས་འདས་པའི་དེ་བཞིན་གཤེགས་པ་དེ་དག་ཐམས་ཅད་ཀྱི་སྤྱན་སྔ་ན་དྲང་སྲོང་མེས་
བྱིན་རིམ་གྲོ་དང་བསྙེན་བཀུར་བྱེད་པ་མཐོང་ངོ་། །དེས་དྲང་སྲོང་མེས་བྱིན་དེ་རྫུ་འཕྲུལ་གྱི་ཆོ་འཕྲུལ་རྣམ་པ་དུ་མས་སངས་རྒྱས་བཅོམ་ལྡན་འདས་དེ་དག་གི་བསྟན་པ་སེམས་ཅན་རྣམས་ལ་སྟོན་ཅིང་བླ་ན་མེད་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རབ་ཏུ་
བརྗོད་པ་མཐོང་ངོ་། །དེ་ནས་རྒྱལ་པོ་སྡེ་མི་ཕམ་པས་དེ་བཞིན་གཤེགས་པ་དེ་རྣམས་དང་སེམས་ཅན་བྱེ་བ་ཁྲག་ཁྲིག་དུ་མ་མཐོང་སྟེ། ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང་ལྡན་པའི་དགེ་བའི་ཤུགས་རྣམས་ཀྱིས་ཏ་ལ་བདུན་སྲིད་ཙམ་དུ་ནམ་མཁའ་ལ་
འཕགས་ཏེ་བར་སྣང་ལ་འདུག་ནས། དྲང་སྲོང་མེས་བྱིན་དེ་དང་སངས་རྒྱས་བཅོམ་ལྡན་འདས་དེ་རྣམས་ལ་རྫུ་འཕྲུལ་གྱི་ཆོ་འཕྲུལ་དང་ལྡན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་རྣམས་ཀྱིས་མངོན་པར་བསྟོད་དོ། །
ཇི་ལྟར་དྲི་མེད་མེ་ལོང་དཀྱིལ་འཁོར་ལ། །ལུས་ལ་མཆིས་པའི་ཉེས་དང་ཡོན་ཏན་གདའ། །དེ་བཞིན་ཚུལ་ཁྲིམས་ཡོངས་དག་དགེ་བ་ལ། །སེམས་ལ་མཆིས་པའི་ཉེས་དང་ཡོན་ཏན་གདའ། །འདོད་བཞིན་འབྲས་བུ་འབྱུང་བའི་ཤིང་ཆེན་ལྟར། །བསམ་པ་
བཞིན་དུ་འབྲས་བུ་ཀུན་ཀྱང་སྦྱིན། །དེ་བཞིན་ཚུལ་ཁྲིམས་ཕུང་པོ་གཙང་དག་པས། །བསམས་པ་བཞིན་དུ་འབྲས་བུ་ཀུན་ཀྱང་སྦྱིན། །ཇི་ལྟར་ས་ལ་རབ་ཏུ་ལས་བྱས་ཏེ། །བསམས་པ་བཞིན་དུ་སྣོད་ཀྱི་རྣམ་པར་གྱུར། །དེ་བཞིན་ཚུལ་ཁྲིམས་ཕུང་པོ་ཡོངས་སྦྱངས་
པས། །བསམས་པ་བཞིན་དུ་ཡོན་ཏན་ཐམས་ཅད་སྦྱིན། །ཇི་ལྟར་ཡིད་བཞིན་ནོར་བུ་བྱི་དོར་བགྱིས། །བསམས་པ་བཞིན་དུ་ལོངས་སྤྱོད་སྣ་ཚོགས་སྦྱིན། །དེ་བཞིན་ཚུལ་ཁྲིམས་ཕུང་པོ་བྱི་དོར་བགྱིས། །བསམས་པ་བཞིན་དུ་ཡོན་ཏན་ཐམས་ཅད་སྦྱིན། །རྒྱལ་སྲས་
རྣམས་ཀྱིས་ཐོག་མར་སྤྱད་གསུངས་པ། །ཚུལ་ཁྲིམས་ཡོངས་དག་ཐོག་མའི་རྐང་པ་སྟེ། །རྒྱལ་བ་རྣམས་ནི་དྲི་མེད་རྐང་པ་དེས། །བྱང་ཆུབ་ཞི་བ་མཆོག་རྣམས་ཡང་དག་གྲུབ། །ཇི་ལྟར་ཤིང་རྒྱལ་ནྱ་གྲོ་གཞོན་ནུ་འདིར། །ས་གཞི་མཉམ་པར་གཙུགས་ཤིང་རབ་བསྐྱེད་ན། །

49-1-217b

ཡལ་ག་བྱུང་ཞིང་མངོན་པར་རབ་ཏུ་སྐྱེ། །མེ་ཏོག་འབྲས་བུར་ལྡན་ཞིང་ཁྱད་པར་འཛིན། །དེ་བཞིན་ཚུལ་ཁྲིམས་ཕུང་པོར་སུ་གནས་པ། །རྒྱལ་བའི་སྲས་དེ་ཡོན་ཏན་རྣམས་ཀྱིས་སྐྱེ། །ཐམས་ཅད་མཁྱེན་པའི་ཡེ་ཤེས་འདིར་རེག་ནས། །འགྲོ་བ་སྡུག་བསྔལ་རྣམས་
ལས་ཐར་བྱེད་འགྱུར། །ཚུལ་ཁྲིམས་ལྡན་པས་དཔལ་དང་གཟི་བརྗིད་རྙེད། །ཚུལ་ཁྲིམས་ལྡན་པ་གཟུགས་རབ་མཛེས་པར་འགྱུར། །ཚུལ་ཁྲིམས་དག་ལ་རྒྱལ་སྲས་རྟག་དགའ་བ། །རྙེད་པར་དཀའ་བའི་ཆོས་ཀྱང་རབ་ཏུ་སྐྱེད། །སྤྱོད་པ་ཡོངས་དག་ཚུལ་ཁྲིམས་ཀུན་སྤྱོད་
པ། །དྲི་མེད་ཁྲིམས་ལྡན་དྲང་སྲོང་མེས་བྱིན་འདི། །སངས་རྒྱས་ཡོན་ཏན་མངའ་བ་བརྒྱ་དག་གིས། །ཀུན་ཏུ་བསྟོད་པ་མཛད་པར་བདག་གིས་མཐོང་། །ཚུལ་ཁྲིམས་ཡོངས་དག་ཀུན་དུ་སྤྱོད་པ་ལ། །སངས་རྒྱས་བརྒྱས་ནི་མངོན་པར་བསྟོད་གྱུར་དང་། །ཇི་ལྟར་བདག་
གི་སློབ་དཔོན་མེས་བྱིན་ལ། །སངས་རྒྱས་བརྒྱ་ཡིས་མངོན་པར་བསྟོད་པ་ལྟར། །དེ་བཞིན་ཚུལ་ཁྲིམས་གཟི་བརྗིད་ལྡན་པ་བདག །ལེགས་པར་སྤྱད་པ་བརྒྱ་ཡིས་མངོན་པར་བསྟོད། །སྐྱེས་ནས་བདག་གི་ཁྲིམས་སྟོབས་གདུང་མེད་དེ། །རིམས་ནད་བཏབ་པ་གསོ་བ་བྱས་
པ་བཞིན། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །ཕྱོགས་བཅུའི་འཇིག་རྟེན་བཞུགས་པའི་བདེ་བར་གཤེགས། །བྱེ་བ་ཁྲག་ཁྲིག་མང་པོ་རྒྱུ་བ་དང་། །ཚུལ་ཁྲིམས་བསྔགས་པ་ཡོངས་སུ་བརྗོད་པ་མཐོང་། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །
བདེ་གཤེགས་བྱེ་བ་ཁྲག་ཁྲིག་མང་པོ་རྣམས། །བླ་མེད་བྱང་ཆུབ་རིམ་པར་སངས་རྒྱས་ཏེ། །བདུད་རྣམས་བྱེ་བ་ཁྲག་ཁྲིག་བཏུལ་བ་མཐོང་། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མང་པོ་རྣམས། །དགྲ་བཅོམ་བསྟོད་ཅིང་
མཚུངས་མེད་འཁོར་ལོ་མཆོག །འགྲོ་ལ་ཕན་ཕྱིར་རྒྱལ་བས་བསྐོར་བ་མཐོང་། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མང་པོ་དག །སྐྱེ་བོ་མུན་པས་བསྒྲིབས་ཤིང་མི་མཁས་པ། །བདེ་གཤེགས་སྡུག་བསྔལ་
བརྒྱ་ལས་འགྲེལ་བ་མཐོང་། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མང་པོ་རྣམས། །སེམས་ཅན་ཁྲག་ཁྲིག་བཏུལ་ཏེ་མཛད་པ་མཛད། །བདེ་གཤེགས་དད་པས་བསྒྲལ་ཕྱིར་བཞུགས་པ་མཐོང་། །དྲི་མེད་ཚུལ་ཁྲིམས་གནས་

49-1-218a

པས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མང་པོ་རྣམས། །འགྲོ་བའི་དོན་ཆེན་མཛད་པ་མཛད་ནས་སུ། །ཡང་འབྱུང་མེད་པར་མྱ་ངན་འདའ་བ་མཐོང་། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །བདེ་གཤེགས་བྱེ་བ་ཁྲག་
ཁྲིག་མང་པོ་རྣམས། །མྱ་ངན་འདས་ནས་རིང་བསྲེལ་རབ་རྒྱས་ཤིང་། །སྐྱེ་བོ་བདེ་བས་མངོན་དུ་ཚིམ་མཛད་མཐོང་། །དེ་རིང་སློབ་དཔོན་ཁྱོད་ཀྱི་གསུང་ཐོས་ནས། །བདག་གི་མིག་ཀྱང་བསམ་མི་ཁྱབ་པར་དག །དེ་ཕྱིར་ཕྱོགས་བཅུ་དག་གི་རྒྱལ་བ་རྣམས། །སྒྲིབ་པ་
མེད་པའི་མིག་གི་སྟོབས་ཀྱིས་མཐོང་། །བདག་གི་མཚུངས་མེད་ཚུལ་ཁྲིམས་ཡོངས་དག་པས། །དེ་ལས་བདག་གི་སྒྲིབ་མེད་མིག་འདི་སྐྱེས། །ཚུལ་ཁྲིམས་ཕུང་པོ་ཡོངས་སུ་སྦྱངས་པ་ལས། །སྒྲིབ་པ་མེད་པའི་མིག་ནི་བདག་གིས་ཐོབ། །འདི་ལྟར་ཐལ་སྦྱར་
སློབ་དཔོན་མཆོག་ཁྱོད་ལ། །གང་གི་མཐུ་ཆེ་བ་ནི་དེ་འདྲ་བ། །དེ་ལ་ཐལ་མོ་མངོན་སྦྱར་ཕྱག་འཚལ་ཅིང་། །མཚུངས་མེད་རྡུལ་བྲལ་བྱང་ཆུབ་རེག་པར་བགྱི། །དེ་ནས་རྒྱལ་པོ་སྡེ་མི་ཕམ་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་
ཤུགས་དེ་རྙེད་པས་དེ་བཞིན་གཤེགས་པ་དེ་དག་ཐམས་ཅད་ཀྱིས་རབ་ཏུ་བསྔགས་པར་གྱུར་ཏོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་རྙེད་པས་ཕྱོགས་བཅུ་མུན་པ་མེད་པར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་
ཐམས་ཅད་ཀྱང་མཐོང་སྟེ། གང་སངས་རྒྱས་བཅོམ་ལྡན་འདས་དེ་དག་གིས་ཆོས་བསྟན་པ་དེ་དག་ཐམས་ཅད་ཀྱང་ལེན་ཅིང་འཛིན་ཏོ། །དེ་ཚུན་ཆད་ནམས་ཀྱང་དྲན་པ་ཉམས་པར་མ་གྱུར་ཏེ། བསྐལ་པ་བརྗོད་དུ་མེད་པའི་བར་དུ་དུས་ཐམས་ཅད་དུའང་ཐོས་པ་འཛིན་པར་
གྱུར་ཏོ། །དེ་ལ་ཆོས་ཀྱི་སྒོ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་མངོན་དུ་གྱུར་ཏོ། །འདི་ལྟར་སྒྲིབ་པ་མེད་པའི་ཆོས་ལ་བཟོད་པ་ཁོང་དུ་ཆུད་ཅིང་སེམས་ལ་ཀུན་ནས་བཀྲིས་པ་མེད་པས་གང་དང་གང་དུ་སྐྱེས་པ་དེ་དང་དེར་སྐྱེས་མ་ཐག་ཏུ་ཕྱོགས་བཅུའི་འཇིག་རྟེན་ཚད་མེད་
པའི་འཇིག་རྟེན་གྱི་ཁམས་ན་སངས་རྒྱས་བཅོམ་ལྡན་འདས་རྣམས་མཐོང་སྟེ། སངས་རྒྱས་བཅོམ་ལྡན་འདས་དེ་དག་དང་ལྷན་ཅིག་ཏུ་སྨྲ་ཞིང་གཏམ་ཟེར་ཏེ། འདི་ལྟར་མུན་པ་མེད་པའི་ལུས་དང་ལྡན་པའི་ཕྱིར་སངས་རྒྱས་བཅོམ་ལྡན་འདས་དེ་དག་གིས་

49-1-218b

བོད་ཅིང་ཡང་དག་པར་མགུ་བར་བྱས་པ་ཡིན་ནོ། །འཇམ་དཔལ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དྲང་སྲོང་མེས་བྱིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། 
དེ་བཞིན་གཤེགས་པ་དྲི་མ་མེད་པའི་སྤྱན་དེ་དེའི་ཚེ་དེའི་དུས་ན་དྲང་སྲོང་མེས་བྱིན་ཞེས་བྱ་བར་གྱུར་ཏོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་དྲང་སྲོང་ཚངས་པའི་ལྷ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན། འཇམ་
དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་སྤྱན་མཆོག་དེ་དེའི་ཚེ་དེའི་དུས་ན་དྲང་སྲོང་ཚངས་པའི་ལྷ་ཞེས་བྱ་བར་གྱུར་ཏོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་སྡེ་མི་ཕམ་པ་ཞེས་བྱ་བ་གང་ཚུལ་
ཁྲིམས་ཡོངས་སུ་དག་པ་ཐོས་མ་ཐག་ཏུ་ཀུན་ནས་བཀྲིས་པ་བསལ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་ཚེ་དེའི་དུས་ན་རྒྱལ་པོ་
སྡེ་མི་ཕམ་པ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་མ་ཉམས་པར་བྱའོ། །ཚུལ་ཁྲིམས་ལ་སྐྱོན་མེད་པ་དང་། ཚུལ་ཁྲིམས་ཤིན་ཏུ་བསྡམས་པ་དང་། ཚུལ་ཁྲིམས་མ་འདྲེས་པ་དང་། ཚུལ་
ཁྲིམས་རྣམ་པར་དག་པ་དང་། ཚུལ་ཁྲིམས་ཡོངས་སུ་དག་པ་དང་། ཚུལ་ཁྲིམས་རྫོགས་པར་བྱ་སྟེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དེ་ལ་ཆགས་པར་མི་བྱ། ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་མཆོག་ཏུ་འཛིན་པར་མི་བྱའོ། །དེ་ལྟར་ཚུལ་ཁྲིམས་ཡོངས་སུ་
དག་པ་ལ་སྒྲིབ་པ་མེད་པའི་རྣམ་པར་ཐར་པ་མངོན་དུ་འགྱུར་རོ། །སྒྲིབ་པ་མེད་པའི་རྣམ་པར་ཐར་པ་མངོན་དུ་གྱུར་པས་ཇི་ལྟར་བདག་གིས་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་པར་འགྱུར་སྙམ་སེམས་ལ་མི་བྱ་སྟེ། འོན་ཀྱང་སྒྲིབ་པ་མེད་པའི་རྣམ་པར་
ཐར་པ་མངོན་དུ་གྱུར་ན་བསྒྲིམ་མི་དགོས་པར་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་པར་འགྱུར་ཏེ། སངས་རྒྱས་ཀྱི་ཞིང་གྲངས་མེད། བསམ་གྱིས་མི་ཁྱབ་མཚུངས་པ་མེད། གཞལ་དུ་མེད། བརྗོད་དུ་མེད་པ་ཡོངས་སུ་དག་པར་འགྱུར་རོ། །འདི་

49-1-219a

ལྟར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་ན། བཟོད་པའི་ཕ་རོལ་ཏུ་ཕྱིན་པ་ཡང་ཡོངས་སུ་དག་པར་འགྱུར་རོ། །དེ་ཅིའི་ཕྱིར་ཞེ་ན། གལ་ཏེ་ཚུལ་ཁྲིམས་ལ་མཆོག་ཏུ་འཛིན་པ་མེད་ན་དེའི་བཟོད་པའི་ཕ་རོལ་ཏུ་ཕྱིན་
པ་ཡོངས་སུ་དག་པར་འགྱུར་ཏེ། དེ་ལྟར་མཆོག་ཏུ་འཛིན་པ་གང་གིས་ཀྱང་ཚུལ་ཁྲིམས་ལ་མཆོག་ཏུ་འཛིན་པ་བྱེད་དོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད་པ་ནས་བརྗོད་དུ་མེད་པའི་བར་དུ་དེའི་ཕ་རོལ་གྱི་ཡང་ཆེས་ཕ་རོལ་ན་
མི་འཆི་བ་ཀུན་དུ་འཕགས་པ་ཞེས་བྱ་བའི་བསྐལ་པ་བྱུང་སྟེ། འཇམ་དཔལ་མི་འཆི་བ་ཀུན་དུ་འཕགས་པའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། 
འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་རྣམ་པར་སྣང་མཛད་ཅེས་བྱ་བ་འཇིག་རྟེན་དུ་བྱུང་ངོ་། །འཇམ་དཔལ་དེའི་ཚེ་དེའི་དུས་ན་དྲང་སྲོང་མི་འཁྲུགས་པའི་བློ་གྲོས་ཞེས་བྱ་
བ་ཞིག་ཡོད་དེ། འཇམ་དཔལ་ཅིའི་ཕྱིར་དྲང་སྲོང་དེ་མི་འཁྲུགས་པའི་བློ་གྲོས་ཤེས་བྱ་ཞེ་ན། འཇམ་དཔལ་སྔོན་བྱུང་བ་བསྐལ་པ་མི་འཆི་བ་ཀུན་དུ་འཕགས་པ་དེའི་ཕ་རོལ་གྱི་ཡང་ཆེས་ཕ་རོལ་ན་བསྐལ་པ་གྲངས་མེད་བརྗོད་དུ་མེད་པ་ན་དེ་བཞིན་གཤེགས་པ་རྣམ་པར་
རྒྱལ་བ་དང་ལྡན་པ་ཞེས་བྱ་བ་བྱུང་སྟེ། དེའི་ཚེའི་ཚད་དཔག་ཏུ་མེད་དེ། སངས་རྒྱས་ཀྱི་ཞིང་བརྗོད་དུ་མེད་ཅིང་ཚད་མེད་པ་ཡོངས་སུ་དག་པ་དང་ལྡན་ནོ། །ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་རྒྱལ་བ་དང་ལྡན་པ་
དེའི་སངས་རྒྱས་ཀྱི་ཞིང་ན་བློ་གྲོས་འབར་བ་ཞེས་བྱ་བ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་སངས་རྒྱས་ཁྲག་ཁྲིག་དཔག་ཏུ་མེད་པ་རྣམས་ལ་དགེ་བའི་རྩ་བ་བསྐྱེད་པ་ཞིག་ཡོད་དེ། བློ་གྲོས་འབར་བ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དེ་ལ་མི་ཕྱེད་པའི་
གཡོག་སངས་རྒྱས་ཁྲག་ཁྲིག་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པའི་བྲམ་ཟེ་ཁྲག་ཁྲིག་ཕྲག་བརྒྱད་བཅུ་ཡོད་དོ། །ཡང་འཇམ་དཔལ་བློ་གྲོས་འབར་བ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དེས་བཅོམ་ལྡན་འདས་དེ་བཞིན་གཤེགས་པ་རྣམ་པར་

49-1-219b

རྒྱལ་བ་དང་ལྡན་པ་དེ་ལ་ལོ་བྱེ་བ་ཁྲག་ཁྲིག་དགུ་བཅུར་མི་འཁྲུགས་པའི་དབྱིངས་ཞུས་ཏེ། བཅོམ་ལྡན་འདས་ཀྱིས་མི་འཁྲུགས་པའི་དབྱིངས་མི་འཁྲུགས་པའི་དབྱིངས་ཤེས་གསུངས་ན་བཅོམ་ལྡན་འདས་མི་འཁྲུགས་པའི་དབྱིངས་དེ་གང་ལགས། ཅིའི་སླད་དུ་མི་
འཁྲུགས་པའི་དབྱིངས་ཤེས་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་རྣམ་པར་རྒྱལ་བ་དང་ལྡན་པས་བློ་གྲོས་འབར་བ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དེ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་འབར་བ་མི་འཁྲུགས་པའི་དབྱིངས་
མི་འཁྲུགས་པའི་དབྱིངས་ཤེས་བྱ་བ་དེ་ནི་འདུས་མ་བྱས་པའི་དབྱིངས་ཀྱི་ཚིག་བླ་དགས་སོ། །བློ་གྲོས་འབར་བ་ཅིའི་ཕྱིར་དབྱིངས་དེ་མི་འཁྲུགས་པའི་དབྱིངས་ཤེས་བྱ་ཞེ་ན། བློ་གྲོས་འབར་བ་འདུས་མ་བྱས་པའི་དབྱིངས་ནི་སྩོགས་པ་ཡང་མེད། འབྲི་བ་ཡང་མེད། 
ལེན་པ་ཡང་མེད། འགོད་པ་ཡང་མེད། ཟད་པ་ཡང་མེད། འགོག་པ་ཡང་མེད། འགྲིབ་པ་ཡང་མེད། འཕེལ་བ་ཡང་མེད། རིགས་ཀྱང་མ་ཡིན། རིགས་མེད་པ་ཡང་མ་ཡིན། འགྱུར་བ་ཡང་མ་ཡིན། འཛིན་པ་ཡང་མ་ཡིན། འདོར་བ་ཡང་མ་ཡིན། 
གཟུང་བ་ཡང་མ་ཡིན། གཏོང་བ་ཡང་མ་ཡིན། བྲ་བ་ཡང་མི་ཡིན། ཟབ་པ་ཡང་མ་ཡིན། མུན་པ་ཡང་མ་ཡིན། སྣང་བ་ཡང་མ་ཡིན། ཉིན་པར་ཡང་མ་ཡིན། མཚམ་མོ་ཡང་མ་ཡིན། རིང་པོ་ཡང་མ་ཡིན། ཐུང་ངུ་ཡང་མ་ཡིན། ཉེ་བ་ཡང་མ་ཡིན། རིང་
བ་ཡང་མ་ཡིན། ཡངས་པ་ཡང་མ་ཡིན། དོག་པ་ཡང་མ་ཡིན། གཅིག་པུ་ཡང་མ་ཡིན། ཐུན་མོང་ཡང་མ་ཡིན། གཟུགས་ཀྱང་མ་ཡིན། སྔ་བ་ཡང་མ་ཡིན། འཕྱི་བ་ཡང་མ་ཡིན། འགྲོ་བ་ཡང་མ་ཡིན། འོང་བ་ཡང་མ་ཡིན། འཕོ་བ་ཡང་མ་ཡིན། 
མི་འཕོ་བ་ཡང་མ་ཡིན། འཆི་འཕོ་བ་ཡང་མ་ཡིན། སྐྱེ་བ་ཡང་མ་ཡིན་ཏེ། དེ་ལྟར་འདུས་མ་བྱས་པའི་དབྱིངས་དེ་ནི་མི་འཁྲུགས་པ་ཞེས་བྱའོ། །དེའི་ཕྱིར་དེའི་མིང་མི་འཁྲུགས་པའི་བློ་གྲོས་ཤེས་བྱ་བར་གྱུར་ཏོ། །དྲང་སྲོང་མི་འཁྲུགས་པའི་བློ་གྲོས་
དེས་དེ་བཞིན་གཤེགས་པ་རྣམ་པར་སྣང་མཛད་དེ་ལ་ཡང་མི་འཁྲུགས་པའི་དབྱིངས་ཀུན་དྲིས་སོ། །དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་ལོ་བྱེ་བ་ཁྲག་ཁྲིག་དྲུག་བཅུའི་བར་དུ་མི་འཁྲུགས་པའི་དབྱིངས་དེ་བསྟན་པ་

49-1-220a

བཤད་དེ། དེས་མི་འཁྲུགས་པའི་དབྱིངས་ཐོས་མ་ཐག་ཏུ་འདི་ལྟ་བུའི་དགེ་བའི་རྩ་བའི་ཤུགས་རྙེད་དེ། དེ་ལྟ་བུའི་དགེ་བའི་རྩ་བའི་ཤུགས་ཀྱིས་ནམ་མཁའ་ལ་ཏ་ལ་བདུན་སྲིད་དུ་འཕགས་ནས་དྲང་སྲོང་མི་འཁྲུགས་པའི་བློ་གྲོས་
དེ་བར་སྣང་ལ་འདུག་སྟེ། སངས་རྒྱས་བྱེ་བ་ཁྲག་ཁྲིག་དཔག་ཏུ་མེད་པ་རྣམས་བཟོད་པའི་ཕ་རོལ་དུ་ཕྱིན་པའི་བསྔགས་པ་བརྗོད་པ་མཐོང་ངོ་། །བཟོད་པའི་ཕ་རོལ་དུ་ཕྱིན་པ་ཡོངས་སུ་རྫོགས་པའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་དཔག་ཏུ་མེད་པ་ཡང་
མཐོང་ངོ་། །དེ་བཞིན་གཤེགས་པ་རེ་རེའི་འཁོར་རེ་རེ་ན་ཡང་བྱང་ཆུབ་སེམས་དཔའ་ཁྲག་ཁྲིག་དཔག་ཏུ་མེད་པ་བཟོད་པའི་ཕ་རོལ་དུ་ཕྱིན་པ་ཡོངས་སུ་རྫོགས་པ་དང་། ཡོངས་སུ་རྫོགས་པར་འགྱུར་བ་དང་། མི་འཁྲུགས་པའི་དབྱིངས་ལ་གནས་པ་དང་། 
མི་སྐྱེ་བའི་ཆོས་ལ་བཟོད་པའི་ཕ་རོལ་དུ་ཕྱིན་པ་རྫོགས་པའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་ཚད་མེད་པ་རྣམས་མཐོང་ངོ་། །དེ་བཞིན་གཤེགས་པ་རེ་རེའི་ཆོས་བསྟན་པ་རེ་རེ་ལ་ཡང་བྱང་ཆུབ་སེམས་དཔའ་ཁྲག་ཁྲིག་དཔག་ཏུ་མེད་པ་རྣམས་བཟོད་པའི་ཕ་
རོལ་དུ་ཕྱིན་པ་ཡོངས་སུ་རྫོགས་པ་དང་། ཡོངས་སུ་རྫོགས་པར་འགྱུར་བ་དང་། མི་འཁྲུགས་པའི་དབྱིངས་ལ་གནས་པ་དང་། མི་སྐྱེ་བའི་ཆོས་ལ་བཟོད་པ་དང་། ངེས་པའི་སྟོབས་བསྐྱེད་པ་ལ་ཞུགས་པ་དང་། ངེས་པའི་སྟོབས་བསྐྱེད་པའི་རྗེས་སུ་འཇུག་པ་མཐོང་
ངོ་། །མཐོང་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་དེ་ལ་བཟོད་པའི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་དག་གིས་མངོན་པར་བསྟོད་དོ། །བདེ་གཤེགས་ཆོས་ཚུལ་ཇི་བཞིན་ཐོས་ནས་སུ། །མི་མཆོག་བདག་གིས་བཟོད་
པ་ཞི་བ་རྙེད། །བགྱིད་པོ་གང་ཡང་མ་མཆིས་བགྱིད་མ་མཆིས། །ཆོས་ཉིད་དག་ལ་གནས་པར་ཐེ་ཚོམ་བྲལ། །བདག་གིས་འཇིག་རྟེན་རིག་ཁྱོད་གསུང་ཐོས་ནས། །ཆོས་འདི་ཐམས་ཅད་ནམ་མཁའི་དབྱིངས་འདྲར་འཚལ། །བདག་གིས་རིང་ནས་སྟོར་རྙེད་འཐུན་
བགྱིས་ཏེ། །གཏེར་ཆེན་ཇི་ལྟར་ཡུན་རིང་སྟོན་པ་བཞིན། །དེང་བདག་བཟོད་པའི་ཤུགས་ནི་རྒྱ་ཆེན་སྐྱེས། །ཆོས་ཀྱི་ཚུལ་ནི་ཡང་དག་ཇི་བཞིན་འཚལ། །དེ་རིང་བདག་གིས་ཐེ་ཚོམ་དོགས་ཀུན་སྤངས། །འཇིག་རྟེན་མཁྱེན་པ་ཁྲག་ཁྲིག་མཐའ་ཡས་མཐོང་། །

49-1-220b

ཇི་ལྟར་བྱ་རྣམས་སྒོ་ང་མཁྲུགས་ནས་ནི། །སྒོ་ངའི་སྟེང་ངམ་ཞབས་སུ་མཆུས་བརྟོལ་ཏེ། །རང་གི་སྒོ་ང་བཅག་ནས་བྱུང་བ་བཞིན། །བདེ་གཤེགས་ཁྱོད་གསུང་ཐོས་ནས་བདག་ཀྱང་བྱུང་། །བདག་གིས་ཇི་ལྟར་འདོད་པའི་ས་ཀུན་བོར། །འཇིག་རྟེན་མཁྱེན་པ་
ཁྲག་ཁྲིག་མཐའ་ཡས་མཐོང་། །རྒྱལ་བ་བྱེ་བ་མཐའ་ཡས་བཟོད་སྟོབས་གནས། །བདེ་གཤེགས་ཡེ་ཤེས་མངའ་བས་བདག་ལུང་བསྟན། །བདེ་གཤེགས་མཐའ་ཡས་ཕྱོགས་བཅུའི་འཇིག་རྟེན་ན། །རྒྱལ་སྲས་ལུང་བསྟན་དེ་དག་དེ་བཞིན་སྟོན། །བཟོད་
སྟོབས་རྙེད་པས་སེང་གེའི་སྒྲ་སྒྲོག་པ། །ནམ་མཁའི་བྱ་ལམ་འདིར་མཆིས་བདག་གིས་ཀྱང་། །རྒྱལ་བ་བདེ་བར་གཤེགས་པ་མཐའ་ཡས་ཀྱིས། །བཟོད་ཐོབ་སྲས་ལ་བདེ་གཤེགས་རང་འབྱུང་འགྱུར། །སྐྱེ་བོ་བདུད་ཞགས་འགྲོལ་ཞེས་ལུང་སྟོན་མཐོང་། །ནམ་
མཁའ་བྱ་ལམ་འདིར་མཆིས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མཐའ་ཡས་རྣམས། །དགྲ་ཡི་ཚོགས་བཅོམ་ཀུན་མཁྱེན་ལེགས་འཆང་སྲས། །འགྲོ་མགོན་ཟིལ་མི་ནོན་འགྱུར་ལུང་སྟོན་མཐོང་། །བདག་གིས་རྒྱལ་སྲས་སྤྱད་པ་
སྤྱོད་པ་དག །འགྲོ་ཕན་བྱང་ཆུབ་རྡུལ་མེད་བཙལ་སླད་དུ། །རྒྱལ་སྲིད་རིན་ཆེན་མགོ་མིག་གཏོང་བ་དང་། །མཐུ་རྙེད་བརྟན་པ་ཐུབ་པའི་ཁུར་ཁྱེར་མཐོང་། །རྒྱལ་སྲས་དགའ་ལྡན་གནས་ནས་ཤི་འཕོས་ཏེ། །ལྷ་ཡི་བུ་མོ་བརྒྱ་ཡིས་གླུ་བླངས་ཤིང་། །བཀྲ་
ཤིས་བཅས་པའི་དབྱངས་ཀྱིས་མངོན་བསྟོད་ནས། །རྒྱལ་རིགས་དྲང་སྲོང་བྲམ་ཟེའི་རིགས་སྐྱེ་མཐོང་། །བདག་གིས་རྒྱལ་སྲས་ཟླ་བཅུ་མངལ་གནས་པ། །ལྷ་ཡི་གནས་ན་ལྷ་ཡི་བུ་བཞིན་དུ། །སྙིང་རྗེས་ཆོས་སྟོན་ལྷ་རྣམས་རབ་ཏུ་འདུལ། །མངལ་ན་གནས་
པ་མི་ཡིས་མངོན་མཆོད་མཐོང་། །བདག་གིས་རྒྱལ་སྲས་ཡུམ་གྱི་ལྷུམས་ནས་སུ། །ལྷ་རྣམས་ཀྱིས་ཀྱང་མངོན་པར་མཆོད་ཅིང་བྱུང་། །སེམས་དགེ་བས་ན་མི་གཙང་རྡུལ་མི་ཆགས། །རིན་ཆེན་ཉེས་པས་མི་གོས་བཞིན་དུ་མཐོང་། །བདག་གིས་རྒྱལ་
སྲས་རྒྱལ་སྲིད་རིན་ཆེན་བདུན། །བརྒྱ་ཕྲག་བཅུ་པོ་བུ་ཡི་ཚོགས་རྣམས་དང་། །རྟ་དང་གླང་པོས་གང་བའི་ས་སྤངས་ཏེ། །བདུད་ཀྱི་ཞགས་བཅད་མངོན་པར་བྱུང་བ་མཐོང་། །བདག་གིས་རྒྱལ་སྲས་འགྲོ་ལ་སྨན་སླད་དུ། །ཁྲག་ཁྲིག་བདུད་རྣམས་ཟིལ་མནན་

49-1-221a

བྱང་ཆུབ་རེག །ཉོན་མོངས་རིང་བསགས་རྣམ་མང་དཔའ་བོས་སྤངས། །བདེ་གཤེགས་ཉི་མ་བཞིན་དུ་ལྷན་པ་མཐོང་། །བདག་གིས་རྒྱལ་སྲས་རང་གིས་ཉོན་མོངས་བཏུལ། །མཚུངས་མེད་དམ་པ་ཆོས་ཀྱི་འཁོར་
ལོ་བསྐོར། །ལྷ་མི་སེམས་ཅན་ཁྲག་ཁྲིག་རྣམས་བཏུལ་ཞིང་། །ཟད་མཐར་འགྲོ་བ་ལན་གསུམ་སྐོར་བ་མཐོང་། །བདག་གིས་རྒྱལ་བ་སྟོང་ཕྲག་མཐའ་ཡས་པ། །རྒྱལ་བའི་ཞིང་རྣམས་རྒྱུ་ཞིང་སེམས་ཅན་འདུལ། །འགྲོ་ལ་སྨན་སླད་འགྲོ་
བ་སྟོང་པར་མཛད། །པད་མ་ཉི་བཞིན་སེམས་ཅད་སད་མཛད་མཐོང་། །བདག་གིས་རྒྱལ་བ་སྟོང་ཕྲག་མཐའ་ཡས་པ། །སེམས་ཅན་བཏུལ་ནས་སངས་རྒྱས་མཛད་པ་མཛད། །ལྕེ་སྟེང་བྱུང་བའི་མཆིལ་མ་མིས་བོར་བཞིན། །དེ་བཞིན་གཤེགས་
ཚོགས་གནས་སུ་འདོར་བ་མཐོང་། །བདག་གིས་སངས་རྒྱས་སྟོང་ཕྲག་མཐའ་ཡས་པ། །ཞི་བར་འགྲོ་བ་མེ་ལ་ཆུས་བཏབ་བཞིན། །འགྲོ་བ་སྡུག་བསྔལ་ཁུར་སྐྱོ་མྱ་ངན་བཟླས། །སྟོབས་བཅུ་ཉོན་མོངས་ཀུན་སྤངས་འདས་པ་མཐོང་། །བདག་གིས་རྒྱལ་
བ་སྟོང་ཕྲག་མཐའ་ཡས་པ། །འགྲོ་ལ་སྨན་དོན་མཛད་ཅིང་སྐུ་གདུང་བྲལ། །མྱ་ངན་འདས་ཀྱང་སྐྱེ་བོ་མྱ་ངན་ཟློ། །མྱ་ངན་འདས་ཀྱང་བསྟན་པ་རྗོད་པ་མཐོང་། །དེ་ལྟར་འགྲོ་ལ་སྨན་སླད་སྐྱབས་སུ་མཆི། །དགེ་བ་བསགས་པ་འདི་ཡིས་སངས་རྒྱས་གྱུར། །
བདག་ཉིད་གྲོལ་ནས་སེམས་ཅན་ཁྲག་ཁྲིག་དགྲོལ། །མགོན་མེད་བདུད་ཞགས་བཅིངས་པ་ཞི་བར་བགྱི། །དེ་ནས་དྲང་སྲོང་མི་འཁྲུགས་པའི་བློ་གྲོས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རྣམ་པར་སྣང་མཛད་དེ་ལ་བཟོད་པའི་ཕ་རོལ་དུ་ཕྱིན་པ་དང་ལྡན་པའི་ཚིགས་སུ་བཅད་པ་རྣམས་ཀྱིས་མངོན་པར་བསྟོད་ནས། དགེ་བའི་རྩ་བ་དེས་བྱང་ཆུབ་སེམས་དཔའི་སྤྱད་པ་སྤྱོད་པ་ན་བསྐལ་པ་བརྗོད་དུ་མེད་པར་ནམ་ཡང་གཏི་མུག་པར་མ་གྱུར། ནམ་ཡང་
འདོད་པ་མ་སྤྱད། ནམ་ཡང་བུད་མེད་ཀྱི་དབང་དུ་མ་གྱུར། ནམ་ཡང་བདུད་ཀྱི་སྤྱོད་ཡུལ་ལ་མ་སྤྱད། ནམ་ཡང་མངལ་གྱི་གནས་སུ་མ་ཞུགས། རྟག་ཏུ་རྒྱུན་མི་འཆད་པར་བརྫུས་ཏེ་སྐྱེས། ནམ་ཡང་བདུད་ཀྱི་ལས་ཀྱིས་མ་བསྒྲིབས། ནམ་ཡང་བདུད་

49-1-221b

ཀྱི་ལས་ཀྱི་དབང་དུ་འགྲོ་བར་མ་གྱུར། ནམ་ཡང་བྱང་ཆུབ་ཀྱི་སེམས་དང་བྲལ་བར་མ་གྱུར། ནམ་ཡང་འཁོར་བས་སྐྱོ་བའི་སེམས་མ་བསྐྱེད། སེམས་ཅན་ཐམས་ཅད་ལ་ཕན་པ་དང་ལྡན་པ་མ་ཡིན་པ་ནམ་ཡང་དྲན་པ་མེད་པའི་སེམས་མ་བསྐྱེད་དོ་བསྐལ་པ་
བརྗོད་དུ་མེད་པར་ནམ་ཡང་སངས་རྒྱས་དང་བྲལ་བའི་ཡིད་ལ་བྱེད་པ་མ་བསྐྱེད། ནམ་ཡང་ཆགས་པ་དང་ལྡན་པའི་ཡིད་ལ་བྱེད་པ་མ་བསྐྱེད། བསྐལ་པ་བརྗོད་དུ་མེད་པར་ནམ་ཡང་སྐྱེ་བ་དང་ལྡན་པའི་ཡིད་ལ་བྱེད་པ་མ་བསྐྱེད། ནམ་ཡང་འབྱུང་བ་མ་
བཙལ། ནམ་ཡང་ཐམས་ཅད་མཁྱེན་པའི་སེམས་དང་བྲལ་བར་མ་གྱུར། ནམ་ཡང་དམན་པའི་སེམས་དང་ལྡན་པར་མ་གྱུར། ནམ་ཡང་ཐམས་ཅད་མཁྱེན་པ་ཡིད་ལ་བྱེད་པ་དང་བྲལ་བར་མ་གྱུར། ནམ་ཡང་དགེ་བའི་བཤེས་གཉེན་དང་བྲལ་བར་མ་
གྱུར། ནམ་ཡང་ཐམས་ཅད་མཁྱེན་པ་ཉིད་དུ་དམིགས་པར་མ་གྱུར། ནམ་ཡང་དགེ་བའི་བཤེས་གཉེན་དང་མི་ལྡན་པར་མ་གྱུར། ནམ་ཡང་དགེ་བའི་བཤེས་གཉེན་རྣམས་ལ་དངོས་པོར་མ་དམིགས། དེ་ནམ་ཡང་འདུས་བྱས་དང་འདུས་མ་བྱས་ཀྱི་ཆོས་
རྣམས་ཐ་དད་པར་མ་བསམས། དེས་ནམ་ཡང་དུས་གསུམ་མཉམ་པ་ལས་ལམ་ལོག་པར་མ་བསྟེན། དེས་ནམ་ཡང་དུས་གསུམ་དམྱིགས་པར་མ་གྱུར་ཏོ། །འཇམ་དཔལ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དྲང་སྲོང་མི་འཁྲུགས་པའི་བློ་གྲོས་ཞེས་བྱ་བར་
གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་ཚེ་དེའི་དུས་ན་དྲང་སྲོང་མི་འཁྲུགས་པའི་བློ་གྲོས་ཞེས་བྱ་བར་གྱུར་ཏེ། དེ་སྒྲིབ་པ་མེད་པའི་རྣམ་པར་
ཐར་པ་ལ་སྤྱད་པས་ཇི་ལྟར་ངས་བརྗོད་པ་བཞིན་དུ་དེ་ཙམ་དུ་རྒྱ་ཆེར་སངས་རྒྱས་ཀྱི་ཞིང་ཡོངས་སུ་དག་པར་བྱས་སོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་རྒྱ་ཆེར་ཡོངས་སུ་སྤྱོད་པར་འདོད་པས་སྒྲིབ་པ་མེད་པའི་རྣམ་
པར་ཐར་པའི་ཕྱིར་རྩོམ་པ་མི་དོར་རོ། །སྒྲིབ་པ་མེད་པའི་རྣམ་པར་ཐར་པ་ལ་མོས་པར་བྱའོ། །ཡང་འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེ་སྔོན་བྱང་ཆུབ་སེམས་དཔའི་སྤྱོད་པ་སྤྱོད་པ་ན། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་

49-1-222a

རྩ་བ་དཔག་ཏུ་མེད་པ་རྒྱ་ཆེན་པོ་མངོན་པར་འདུས་བྱས་སོ། །བརྩོན་འགྲུས་ཀྱི་ཕ་རོལ་དུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་དཔག་ཏུ་མེད་ཅིང་རྒྱ་ཆེན་པོ་བསྐྱེད་དེ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་
དགེ་བའི་རྩ་བ་གྲངས་མེད་ཅིང་བསམ་གྱིས་མི་ཁྱབ་པ་ནས་བརྗོད་དུ་མེད་པའི་བར་དུ་རྒྱ་ཆེན་པོ་མངོན་པར་འདུས་བྱས་སོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཤུགས་བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་རྒྱ་ཆེན་པོ་
བསྐྱེད་དོ། །འཇམ་དཔལ་སྔོན་བྱུང་བ་འདས་པའི་དུས་བསྐལ་པ་དཔག་ཏུ་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་ན་རིན་ཆེན་བྱུང་བ་ཞེས་བྱ་བའི་བསྐལ་པ་ལ་དེ་བཞིན་གཤེགས་པ་རིག་པ་དང་ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་བཟང་པོའི་ལྷ་ཞེས་བྱ་བ་འཇིག་རྟེན་དུ་བྱུང་སྟེ། འཇམ་དཔལ་དེ་བཞིན་གཤེགས་པ་བཟང་པོའི་ལྷ་དེའི་ཚེའི་ཚད་ནི་
བསྐལ་པ་ཁྲག་ཁྲིག་ཕྲག་བརྒྱད་བཅུར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་དེ་བཞིན་གཤེགས་པ་བཟང་པོའི་ལྷའི་གསུང་རབ་ལ་དགེ་སློང་མོས་པའི་བློ་གྲོས་ཤེས་བྱ་བ་ཞིག་བྱུང་སྟེ། ཤིན་དུ་རྟོགས་པ་དང་ལྡན་པ། ཤིན་དུ་བློ་གྲོས་དང་ལྡན་པ། ཤིན་དུ་
དྲན་པ་དང་ལྡན་པ། ཤིན་དུ་བརྩོན་འགྲུས་དང་ལྡན་པ། ཤིན་དུ་བརྩོན་འགྲུས་ཀྱི་ཕ་རོལ་དུ་ཕྱིན་པའི་སྟོབས་བསྐྱེད་པ་རྙེད་པ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། རྒྱལ་པོའི་རིགས་ལས་རབ་ཏུ་བྱུང་སྟེ། གཟུགས་བཟང་བ་མཛེས་པ། ལྟ་ན་སྡུག་པ། དེ་
བཞིན་གཤེགས་པ་བཟང་པོའི་ལྷ་དེ་མ་གཏོགས་པར་སངས་རྒྱས་ཀྱི་ཞིང་དེ་ན་མོས་པའི་བློ་གྲོས་ཇི་ཙམ་དུ་མཛེས་པ་དེ་ཙམ་གྱིས་མཛེས་པའི་སེམས་ཅན་སུ་ཡང་མེད་དེ། དེ་བལྟ་བས་ཆོག་མི་ཤེས་པ་སངས་རྒྱས་ཁྲག་ཁྲིག་དཔག་ཏུ་མེད་པ་ལ་བསྙེན་བཀུར་བྱས་པ། 
ཡོངས་སུ་སྦྱང་བ་བྱས་པ། ཚད་མེད་པའི་ཆོས་ཉིད་ལས་ངེས་པར་བྱུང་བ་བྱང་ཆུབ་སེམས་དཔའི་ཏིང་ངེ་འཛིན་བཞི་རྙེད་དེ། འདོད་པ་བཞིན་རྙེད་ཅིང་ཉོན་མོངས་པ་མེད་པར་རྙེད། ཚེགས་མེད་པར་རྙེད་ནས་འདྲིས་པར་བྱས་ཏེ། རེ་ཤིག་ནི་དེ་བླ་ན་མེད་པ་ཡང་དག་

49-1-222b

པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་སེམས་མི་འཇུག་གོ། །སྟོབས་བཅུའི་ཕ་རོལ་ཏུ་སོན་པས་འདོད་ན་སངས་རྒྱས་ཀྱི་ཞིང་ཚད་མེད་པ་རྣམས་སུ་འགྲོའོ། །དེ་ནས་དགེ་སློང་མོས་པའི་བློ་གྲོས་དེ་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་བཟང་པོའི་ལྷ་ག་ལ་བ་དེར་སོང་སྟེ་ཕྱིན་ནས་དེ་བཞིན་གཤེགས་པ་བཟང་པོའི་ལྷའི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ་ཐལ་མོ་སྦྱར་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་
ནས་ཀྱང་དགེ་སློང་མོས་པའི་བློ་གྲོས་དེས་དེ་བཞིན་གཤེགས་པ་བཟང་པོའི་ལྷ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཟིངས་ཆེན་པོ་བཅའ་བར་འཚལ་བ་དང་ཟམ་པ་ཆེན་པོ་གདགས་པར་འཚལ་བ་དང་། འཁོར་བའི་རྒྱ་མཚོ་ལས་རྒལ་བར་འཚལ་བ་
དང་། སེམས་ཅན་ཐམས་ཅད་བསྒྲལ་བར་འཚལ་བ་དང་། སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་སྦྱང་བར་འཚལ་བ་དང་། སངས་རྒྱས་ཀྱི་ཞིང་གྲངས་མ་མཆིས། བསམ་གྱིས་མི་ཁྱབ། མཚུངས་པ་མ་མཆིས། གཞལ་དུ་མ་མཆིས། བརྗོད་དུ་མ་མཆིས་
པ་ཡོངས་སུ་སྦྱང་བར་འཚལ་བ་དང་། སངས་རྒྱས་ཀྱི་ཞིང་མཐའ་ཡས་པ་ཡོངས་སུ་དག་པ་བསྒྲུབ་པར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་གང་ལ་བརྩོན་པར་བགྱི། དེ་སྐད་ཅེས་གསོལ་པ་དང་། དེ་བཞིན་གཤེགས་པ་བཟང་པོའི་ལྷས་དགེ་
སློང་མོས་པའི་བློ་གྲོས་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་དེ་དག་དང་ཡོན་ཏན་ཚད་མེད་པ་གཞན་ཡང་བསྒྲུབ་པར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་སྒྲིབ་པ་མེད་པའི་རྣམ་པར་ཐར་པ་ཁོང་དུ་ཆུད་པར་བྱ་བའི་ཕྱིར་བརྩོན་འགྲུས་
བརྩམ་མོ། །མཚན་མོར་འདུ་ཤེས་ཡིད་ལ་མི་བྱེད་པ་དང་། ཉིན་པར་འདུ་ཤེས་དང་། གྲང་བར་འདུ་ཤེས་དང་། དྲོ་བར་འདུ་ཤེས་དང་། བཀྲེས་པར་འདུ་ཤེས་དང་། ཟས་སུ་འདུ་ཤེས་དང་། སྐོམ་དུ་འདུ་ཤེས་དང་། བཏུང་བར་འདུ་ཤེས་དང་། གོས་སུ་འདུ་
ཤེས་པ་ཡིད་ལ་མི་བྱེད་པ་དང་། སྟོབས་སུ་འདུ་ཤེས་པ་ཡིད་ལ་མི་བྱེད་ཅིང་འདུ་ཤེས་ཐམས་ཅད་ཡིད་ལ་མི་བྱེད་པར་སྒྲིབ་པ་མེད་པའི་རྣམ་པར་ཐར་པ་མངོན་དུ་བྱས་ཏེ་བརྩོན་འགྲུས་བརྩམ་མོ། །སྒྲིབ་པ་མེད་པའི་རྣམ་པར་ཐར་པ་དེ་ཁོང་དུ་ཆུད་པར་བྱ་བའི་

49-1-223a

ཕྱིར་བརྩོན་འགྲུས་བརྩམས་ཏེ། དེས་བརྩོན་འགྲུས་བརྩམས་ན་སྒྲིབ་པ་མེད་པའི་རྣམ་པར་ཐར་པ་མངོན་དུ་འགྱུར་རོ། །སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་
ཀྱི་ཞིང་དཔག་ཏུ་མེད་པ་རྣམས་ཡོངས་སུ་དག་པར་འགྱུར་རོ། །དེ་བཞིན་དུ་སྦྱར་ཏེ། སངས་རྒྱས་ཀྱི་ཞིང་བརྗོད་དུ་མེད་པའི་བར་དུ་ཡོངས་སུ་དག་པར་འགྱུར་རོ། །དེ་ནས་དགེ་སློང་མོས་པའི་བློ་གྲོས་དེ་ལ་དེ་བཞིན་གཤེགས་པ་བཟང་པོའི་ལྷ་དེས་དེ་བཞིན་
དུ་བསྟན་ཅིང་གདམས་ནས་དེས་འདུ་ཤེས་ཐམས་ཅད་ཡིད་ལ་མ་བྱས་ཏེ། །སྒྲིབ་པ་མེད་པའི་རྣམ་པར་ཐར་པ་རྟོགས་པར་བྱ་བའི་ཕྱིར་བསྐལ་པ་ཁྲག་ཁྲིག་ཕྲག་བརྒྱད་ཀྱི་བར་དུ་བརྩོན་འགྲུས་བརྩམས་ནས་སྤྱོད་དོ། །དེ་ནས་བསྐལ་པ་ཁྲག་ཁྲིག་ཕྲག་
བརྒྱད་འདས་པ་དང་། དེ་སྒྲིབ་པ་མེད་པའི་རྣམ་པར་ཐར་པ་ལ་རབ་ཏུ་གནས་པར་གྱུར་ནས། བྱང་ཆུབ་སེམས་དཔའི་དབང་བཅུས་ངེས་པར་བྱུང་སྟེ། དེས་སྤྲུལ་པ་ཁྲག་ཁྲིག་ཚད་མེད་པ་མངོན་པར་སྤྲུལ་ནས་ལྷ་ལ་དད་པ་རྣམས་ལ་ལྷར་མངོན་པར་སྤྲུལ། ཀླུ་
ལ་དད་པ་རྣམས་ལ་ཀླུར། གནོད་སྦྱིན་ལ་དད་པ་རྣམས་ལ་གནོད་སྦྱིན་དུ། དྲི་ཟ་ལ་དད་པ་རྣམས་ལ་དྲི་ཟར། གྲུལ་བུམ་ལ་དད་པ་རྣམས་ལ་གྲུལ་བུམ་དུ། ལྷ་མ་ཡིན་ལ་དད་པ་རྣམས་ལ་ལྷ་མ་ཡིན་དུ། ནམ་མཁའ་ལྡིང་ལ་དད་པ་རྣམས་
ལ་ནམ་མཁའ་ལྡིང་དུ། མི་འམ་ཅི་ལ་དད་པ་རྣམས་ལ་མི་འམ་ཅིར། ལྟོ་འཕྱེ་ཆེན་པོ་ལ་དད་པ་རྣམས་ལ་ལྟོ་འཕྱེ་ཆེན་པོར་མངོན་པར་སྤྲུལ་ཏོ། །དེ་ལྟར་དགེ་སློང་མོས་པའི་བློ་གྲོས་དེས་སངས་རྒྱས་ཀྱི་ཞིང་དེ་ན་སེམས་ཅན་སྤྲུལ་པ་ཇི་ལྟ་
བུ་ལ་དད་པ་བཞིན་དུ་རྟག་ཏུ་རྒྱུན་མི་འཆད་པར་མངོན་པར་སྤྲུལ་ཏེ། དེས་དེར་སེམས་ཅན་ཚད་མེད་པ་ཡོངས་སུ་སྨིན་པར་བྱེད་པའི་སྦྱོར་བས་མྱུར་དུ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྫོགས་པར་གྱུར་ཏོ། །དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་བཟང་པོའི་ལྷ་དེས་དགེ་སློང་མོས་པའི་བློ་གྲོས་དེ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་མཁྱེན་ནས་བརྩོན་འགྲུས་ཀྱི་ཕ་རོལ་དུ་ཕྱིན་པ་དང་ལྡན་པའི་ཆོས་ཀྱི་གཏམ་

49-1-223b

གྱིས་ཡང་དག་པར་དགའ་བར་བྱས། ཡང་དག་པར་འཛིན་དུ་བཅུག །ཡང་དག་པར་རབ་ཏུ་མགུ་བར་བྱས་ནས། དེའི་བརྩོན་འགྲུས་ཀྱི་ཕ་རོལ་དུ་ཕྱིན་པ་ཤིན་དུ་བསྔགས་སོ། །དེ་བཞིན་གཤེགས་པ་བཟང་པོའི་ལྷ་དེས་བརྩོན་འགྲུས་ཀྱི་ཕ་རོལ་ཏུ་ཕྱིན་
པ་དང་ལྡན་པའི་གཏམ་གྱིས་དེ་ཡང་དག་པར་དགའ་བར་བྱས། ཡང་དག་པར་འཛིན་དུ་བཅུག །ཡང་དག་པར་གཟེང་བསྟོད། ཡང་དག་པར་རབ་ཏུ་མགུ་བར་བྱས་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་འདི་ལྟ་བུ་རྙེད་
དེ། དེ་ལྟ་བུའི་དགེ་བའི་ཤུགས་ཀྱིས་ནམ་མཁའ་ལ་ཏ་ལ་བདུན་སྲིད་དུ་འཕགས་ཏེ་འདུག་གོ། །འཇམ་དཔལ་དེ་ནས་དགེ་སློང་མོས་པའི་བློ་གྲོས་བར་སྣང་ལ་འདུག་ནས་འདི་འདྲ་བའི་ཡེ་ཤེས་རྙེད་དེ། གང་གིས་ཕྱོགས་བཅུའི་འཇིག་རྟེན་ན་འཇིག་རྟེན་
གྱི་ཁམས་དཔག་ཏུ་མེད་པ་རྣམས་སུ་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱི་སྔོན་གྱི་སྤྱོད་པ་ཤེས། སངས་རྒྱས་ཀྱི་ཞིང་ཐམས་ཅད་ན་སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས། སེམས་ཅན་དེ་དག་ཐམས་ཅད་
ཀྱི་སེམས་དང་སྤྱོད་པ་ཤེས་སོ། །དེས་ཡེ་ཤེས་དེ་རྙེད་ནས་སེམས་ཅན་ཐམས་ཅད་ཀྱི་སེམས་དང་སྤྱོད་པ་ལ་ཐེ་ཚོམ་མེད་ཅིང་སངས་རྒྱས་བཅོམ་ལྡན་འདས་དེ་དག་གི་སྔོན་གྱི་སྤྱོད་པ་ལ་འང་ཐེ་ཚོམ་མེད་དེ། དེ་བཞིན་གཤེགས་པ་བཟང་པོའི་ལྷ་དེ་ལ་བརྩོན་
འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་རྣམས་ཀྱིས་མངོན་པར་བསྟོད་དོ། །སྟོབས་བཅུ་སྟོབས་འཆང་སྟོབས་རབ་སྟོབས་འཆང་བ། །ནོར་མང་བགེད་ཅིང་སྲས་རྣམས་ནོར་ལྡན་མཛད། །བདེ་གཤེགས་ཁྱོད་ཀྱི་སྲས་རྣམས་ནོར་
མང་རྙེད། །འགྲོ་འདི་ཤིན་དུ་སྡུག་བསྔལ་ནོར་ལྡན་མཛད། །བདེ་གཤེགས་ཁྱོད་ཀྱི་ནོར་རྣམས་གཏོར་ཅིང་གོས། །རྒྱལ་བ་ཁྱོད་ཀྱི་སྲས་མཆོག་ནོར་རྙེད་ནས། །དགའ་ཞིང་འགྲོ་ལ་སྨན་པའི་སྤྱོད་མཆོག་སྤྱོད། །རྒྱལ་མཆོག་རྒྱལ་བ་དག་དང་འདྲ་བར་འགྱུར། །
ཐུབ་མཆོག་ཁྱོད་སྲས་ཡོན་ཏན་བརྒྱས་ལྡན་པ། །སྤྱོད་པའི་ངེས་པ་མཆོག་འདི་རྣམ་སྤྱོད་ལ། །སྐྱེ་བར་ནུབ་ཅིང་རྒ་ཤིས་གཙེས་པ་དང་། །འགྲོ་བ་སྡུག་བསྔལ་བརྒྱ་ལྡན་གཟིར་བ་རྣམས། །སྡུག་བསྔལ་བདག་མེད་སྟོང་པར་རྟོགས་པས་ན། །ཤི་འཕོས་འགྲོར་མཆིས་

49-1-224a

འཁོར་བའི་འགྲོར་ཆགས་པ། །མཐོང་ནས་འགྲོ་བ་སྡུག་བསྔལ་བདེར་འགོད་ཅིང་། །དེ་དག་སྙིང་རྗེ་རླབས་ཆེན་རྙེད་པར་འགྱུར། །འགྲོ་ལ་སྨན་སེམས་སྙིང་རྗེ་བསྐྱེད་ནས་སུ། །འཁོར་བའི་སྲེད་པ་བཅོམ་ཡང་སྐྱེ་བ་འཛིན། །དགེ་བ་ཚད་མེད་རྣམས་
ཀྱང་དྲན་སོགས་ཤིང་། །འགྲོ་བ་རྣམས་ལ་སྨན་བདེ་ཞི་བར་བགྱིད། །ལོག་པའི་ལམ་མཆིས་སེམས་ཅན་སྟོང་རྣམས་ནི། །སྟོབས་བཅུས་བསྟན་པའི་ལམ་མཆོག་རྣམས་སུ་སྟེ། །ཞི་བའི་གྲོང་ཁྱེར་ཞི་བདེ་དགེ་བ་ནི། །གང་ནས་སྔོན་གྱི་རང་བྱུང་གཤེགས་པར་
བགོད། །དེ་དག་སྟོང་པ་ཚད་མེད་གཏོང་བ་ནི། །མགོ་ལག་མིག་བཟང་བུ་སྡུག་དེ་བཞིན་དུ། །ཚུལ་ཁྲིམས་བཟོད་དང་བརྩོན་འགྲུས་ཏིང་ངེ་འཛིན། །ཐོས་དྲན་མཁས་ཤིང་མོས་དང་སྟོབས་ལ་གནས། །ཤིང་དབང་དྲུང་དུ་བདུད་སྡེ་བཅས་པར་བཏུལ། །དཔེ་མེད་ཡེ་
ཤེས་གོ་འཕང་མཆོག་དེར་རྙེད། །རང་འབྱུང་སེམས་ཅན་སྟོང་རྣམས་ཁྲིད་ནས་སུ། །མི་འཆི་བྱུང་ཞི་བདེ་བ་ཞི་བར་གཤེགས། །ནམ་མཁའ་འདི་ལ་དེ་རིང་བདག་མཆིས་ནས། །ཕྱོགས་བཅུའི་སྟོབས་བཅུ་མ་ནོར་དེ་བཞིན་གསུང་། །རྒྱལ་སྲས་རྒྱལ་བའི་ཡོན་
ཏན་སྤྱོད་སྤྱད་ནས། །ཤིན་དུ་ལུང་སྟོན་པ་ནི་དུ་མ་མཐོང་། །དེ་དག་རང་གི་སྤྱོད་ཐོས་དགའ་མགུ་སྟེ། །རབ་ཏུ་མཛུམ་དམུལ་ཡིད་གཉིས་ཐེ་ཚོམ་བྲལ། །ཐལ་མོ་སྦྱར་ཏེ་མངོན་པར་ལུས་བཏུད་ནས། །སྟོབས་བཅུ་ཡོན་ཏན་མངའ་བ་མཁའ་ལས་བསྟོད། །དེ་རིང་ནམ་
མཁའ་འདིར་མཆིས་བདག་གིས་མཐོང་། །འཁོར་བ་བརྒྱར་ནི་རྒྱལ་སྲས་དགེ་སྤྱད་ནས། །དགའ་ལྡན་ལྷ་ཡི་གནས་ནས་ཤི་འཕོས་ཏེ། །དྲི་བྲལ་དཔེ་མེད་གླང་ཆེན་མཆོག་གྱུར་ནས། །ལྷ་ཡི་གནས་ནས་རབ་ཏུ་འདས་ནས་སུ། །ཡུམ་བདེ་ཉལ་བའི་ལྷུམས་སུ་ཞུགས་
པ་ལ། །ལྷ་རྣམས་སྟོང་གིས་ཤིན་དུ་རབ་མཆོད་ཅིང་། །ལྷ་མི་ལྷ་མོ་རྣམས་ཀྱིས་གཙོར་བགྱིས་བསྟོད། །དེ་དག་ཡུམ་གྱི་ལྷུམས་སུ་ཞུགས་པ་ན། །ལྷ་ཡི་གནས་འདྲ་རབ་ཏུ་མཛེས་པར་གྱུར། །མངལ་གྱིས་མི་གོས་ཆུ་ལས་པད་མ་ལྟར། །ཡུམ་ལ་བདེ་ཞིང་ཡང་བར་གནས་
ནས་སུ། །ལྷ་རྣམས་བརྒྱ་ལ་རབ་ཏུ་ཆོས་བཤད་དེ། །ལྷ་མཆོག་འཁོར་རྣམས་དགེ་བའི་ལམ་དུ་བཙུད། །དེ་དག་ཆོས་ཚིག་རྒྱ་ཆེན་ཐོས་ནས་སུ། །སྐོམ་པས་ཆུ་ལ་ས་བཞིན་བདུད་རྩི་མཐུང་། །ནམ་མཁའི་ངོས་འདིར་བདག་མཆིས་མཐོང་བ་ནི། །རྒྱལ་སྲས་དྲི་མེད་

49-1-224b

བློ་གྲོས་དྲན་མཁས་པ། །ཡུམ་གྱི་ཕྱག་གིས་ཤིང་གི་ཡལ་ག་གཟུང་། །མཆན་ཁུང་ནས་ནི་བྱུང་བ་རབ་ཏུ་མཐོང་། །ལྷ་དང་མི་ཡི་དབང་པོས་རབ་མཆོད་ཅིང་། །ས་ཡི་སྟེང་ན་འཇིགས་མེད་གོམ་པ་འདོར། །དེ་ཡིས་ཐམས་ཅད་ཕྱོགས་སུ་བལྟས་ནས་སུ། །
འཛུམ་དམུལ་ཚིག་སྨྲས་ང་འདྲ་ཁམས་གསུམ་མེད། །ནམ་མཁའི་ངོས་འདིར་བདག་མཆིས་མཐོང་བ་ནི། །རྒྱལ་སྲས་མང་པོ་འགྲོ་ལ་སྨན་དགའ་བ། །གྲོང་དང་གྲོང་ཁྱེར་རིན་ཆེན་བལྟམ་པ་ཡི། །རབ་ཏུ་འབྱོར་ཅིང་ལྡན་པའི་ས་བོར་ཏེ། བལ་གླང་རྨིག་པས་
བཅིངས་པ་བཅད་པ་ལྟར། །བློ་གྲོས་མཆོག་གིས་ཁྱིམ་ཆགས་བསེལ་བཅོམ་སྟེ། །འགྲོ་ལ་སྨན་སླད་དཔའ་བོ་མངོན་པར་བྱུང་། །སྡུག་བསྔལ་ཞི་ཞིང་སྲིད་ཟད་བདུད་རྩི་ཚོལ། །ནམ་མཁའི་ངོས་འདིར་བདག་མཆིས་མཐོང་བ་ནི། །རྒྱལ་སྲས་བརྟུལ་ཞུགས་
དཀའ་ཐུབ་དྲག་སྤྱད་དེ། །སྐྱིལ་མོ་དཀྲུང་བཅས་བྱང་ཆུབ་ཤིང་དབང་དྲུང་། །གཡོ་ཅན་བདུད་བཏུལ་བྱང་ཆུབ་དམ་པ་རེག །རྒྱལ་བ་ཐམས་ཅད་དང་ནི་མཉམ་རྙེད་ནས། །ཞི་དགའ་བདེ་གནས་ཞིང་མཆོག་ལྟ་བཞིན་དུ། །སྨོན་ལམ་རྒྱ་ཆེན་བདག་གིས་འདིར་རྫོགས་ཏེ། །
འཁོར་བརྒྱར་ལེགས་སྤྱད་བརྟུལ་ཞུགས་འདི་གྲུབ་བོ། །ནམ་མཁའི་ངོས་འདིར་བདག་མཆིས་མཐོང་བ་ནི། །ཕྱོགས་བཅུའི་སྟོབས་བཅུ་ཤིན་དུ་མང་པོ་དག །འཁོར་ལོ་རྒྱ་ཆེན་རབ་ཏུ་བསྐོར་བ་ནི། །ཕ་རོལ་རྒོལ་འདུལ་འཁོར་བའི་སྡུག་བསྔལ་ཞི། །སྐལ་ཡོད་འགྲོ་
བ་རྣམས་ཀྱི་ཉོན་མོངས་བཅོམ། །མུན་པའི་རྡུལ་བསལ་འགྲོ་རྣམས་བདེ་བ་བྱིན། །འཇིག་རྟེན་གཙོ་བོ་རྣམས་ཀྱིས་དེ་ཐོས་ནས། །འཁོར་བའི་རྒྱུད་བསལ་མ་སོང་ཕྱོགས་སུ་སོང་། །དེ་རིང་ནམ་མཁའ་འདི་ལ་བདག་མཆིས་ནས། །རྒྱལ་བ་བརྒྱ་དག་ལྷ་མི་འཁོར་
འདུལ་ཞིང་། །ལྷ་མི་གནས་ནས་འགྲོ་ལ་སྙིང་བརྩེ་ཡིད། །འཇིག་རྟེན་དག་ན་རབ་ཏུ་ཞུགས་པ་མཐོང་། །རྒྱལ་བ་བརྒྱ་ཕྲག་དུ་མ་གཞན་དག་ཀྱང་། །འཁོར་བ་ཟད་སོང་ཞི་བར་རྡུལ་མེད་གནས། །ལྷ་མི་བརྒྱ་རྣམས་ཡིད་དགར་གྱུར་ནས་སུ། །རིང་བསྲེལ་
དམ་པ་དེ་ལ་མཆོད་པ་མཐོང་། །འཇིག་རྟེན་གཙོ་བོ་རྐང་གཉིས་མཆོག་ཁྱོད་ལ། །ལྷ་དང་མི་དང་ཁྱིམ་བདག་ཁྱོད་དྲུང་མཆིས། །ཞལ་ནས་ཞི་རབ་ཆོས་ཀྱི་རང་བཞིན་ཐོས། །ཁྱོད་ཀྱི་སྤྱོད་ལྡན་མྱུར་དུ་སྐྱབས་སུ་འགྲོ། །མི་དབང་ཁྱོད་ཀྱི་ཡོན་ཏན་ཡང་དག་

49-1-225a

བསྟོད། །ཁྱུ་མཆོག་ཕན་བྱེད་སྟོབས་བཅུ་ཡོན་ཏན་འཆང་། །ཞི་བར་ལྡན་ཞིང་དུལ་བ་ཞི་བ་རྙེད། །འཁོར་བའི་རྒྱུད་བྲལ་འཇིགས་མེད་ཕྱོགས་སུ་སོང་། །བདེ་གཤེགས་མི་ཡི་སེང་གེ་ཁྱོད་ཀྱི་མཐུས། །བློ་མཆོག་ཁྱོད་
ཀྱང་སྟེང་གི་མཁར་གནས་པ། །མངོན་ཤེས་ལྔ་ལས་ཉམས་པ་མེད་རྙེད་ནས། །ཕྱོགས་བཅུར་འཁོར་རྒྱུད་རབ་འབྱམ་རྣམ་མང་བ། །མཚུངས་མེད་དུ་མ་དེ་རིང་མཐོང་བ་ནི། །རྒྱལ་བའི་ཡོན་ཏན་སྣ་ཚོགས་དྲི་མེད་སྤྱོད། །ཡང་དག་ཡོན་ཏན་གྱིས་
ནི་དེ་དག་བསྟོད། །རྒྱལ་བ་ཁྱོད་ཀྱི་ཡོན་ཏན་མཐའ་མི་རྙེད། །དེ་ནས་དགེ་སློང་མོས་པའི་བློ་གྲོས་དེས་དེ་བཞིན་གཤེགས་པ་བཟང་པོའི་ལྷ་དེ་ལ་ཚུལ་དང་མཐུན་པའི་ཚིགས་སུ་བཅད་པ་དེ་དག་གིས་བསྟོད་ནས་དགེ་བའི་རྩ་བ་དེས་ཕྱིན་ཆད་བསྐལ་
པ་བརྗོད་དུ་མེད་པར་ནམ་ཡང་མངོན་པར་ཤེས་པ་ལྔ་དང་བྲལ་བར་མ་གྱུར་ཏེ། མངོན་པར་ཤེས་པ་ལྔ་དང་ལྡན་པར་གྱུར་པས་སངས་རྒྱས་ཀྱི་ཞིང་དེ་དག་ཐམས་ཅད་ན་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་
སྟོངས་པར་བྱས། ལྷ་མ་ཡིན་གྱི་རིས་ཐམས་ཅད་ཡོངས་སུ་ཆད་ཅིང་མི་ཁོམ་པ་ཐམས་ཅད་ཆད་པར་གྱུར་ཏོ། །དེ་སྨོན་ལམ་གྱི་དབང་གིས་སངས་རྒྱས་ཀྱི་ཞིང་དེར་ཡང་དང་ཡང་སྐྱེས་པ་ན་སེམས་ཅན་རྣམས་ཀྱིས་སངས་རྒྱས་ཐོག་མར་བྱུང་བ་བཞིན་
དུ་ཤིན་དུ་ངོ་མཚར་དུ་ཤེས་ཏེ། གང་དང་གང་དུ་སྐྱེས་པར་གྱུར་པ་དེ་དང་དེར་གང་དེ་བཞིན་གཤེགས་པ་བྱུང་བ་དེ་ན་ལྟས་འབྱུང་བ་དེ་དག་དེ་སྐྱེ་བའི་ལྟས་སུ་བྱུང་ངོ་། །དེ་བཞིན་གཤེགས་པ་མངོན་པར་རྫོགས་པར་འཚང་རྒྱ་བ་ན་ལྟས་གང་འབྱུང་བ་དེ་
དག་ཀྱང་མངོན་པར་ཤེས་པ་ལྔ་ཐོབ་ནས་བྱུང་ངོ་། །དེ་བཞིན་གཤེགས་པ་ཆོས་ཀྱི་འཁོར་ལོ་བསྐོར་བ་ན་ལྟས་གང་བྱུང་བ་དེ་དག་དེས་མངོན་པར་ཤེས་པ་ལྔ་བཤད་པའི་ཚེའང་ལྟས་དེ་དག་བྱུང་ངོ་། །དེ་བཞིན་གཤེགས་པ་ཚེའི་འདུ་བྱེད་འདོར་བའི་ཚེ་
ལྟས་གང་བྱུང་བ་དེ་ཚེའི་འདུ་བྱེད་འདོར་བའི་ཚེ་ཡང་ལྟས་དེ་དག་བྱུང་ངོ་། །དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་ཚེ་ལྟས་གང་བྱུང་བ་དེ་འཆི་བའི་དུས་བྱེད་པ་ན་ཡང་ལྟས་དེ་དག་བྱུང་ངོ་། །དེས་ཚེ་རབས་རེ་རེ་ལ་ཡང་སེམས་

49-1-225b

ཅན་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་ཐེག་པ་ཆེན་པོ་ལ་བཏུལ། སེམས་ཅན་བྱེ་བ་ཁྲག་ཁྲིག་བརྒྱ་སྟོང་དུ་མ་ནི་ཉན་ཐོས་ཀྱི་ཐེག་པ་ལ་བཏུལ་ཏོ། །རེ་ཤིག་ནི་བྱང་ཆུབ་སེམས་དཔའ་དེས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་སངས་མ་རྒྱས་ཏེ། སངས་རྒྱས་ཀྱི་བྱ་བ་དེ་ལྟ་བུ་དག་སེམས་ཅན་རྣམས་ལ་བསྟན་ཏོ། །འཇམ་དཔལ་དེའི་ཚེ་དེའི་དུས་ན་དགེ་སློང་མོས་པའི་བློ་གྲོས་ཤེས་བྱ་བར་གྱུར་པ་དེ་གཞན་ཡིན་པ་སྙམ་དུ་ཡིད་གཉིས་
དང་ཐེ་ཚོམ་ཟ་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་ཚེ་དེའི་དུས་ན་དགེ་སློང་མོས་པའི་བློ་གྲོས་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་སྒྲུབ་པའི་བྱང་ཆུབ་སེམས་དཔའ་སེམས་དཔའ་ཆེན་པོས་དགེ་སློང་མོས་པའི་བློ་གྲོས་བརྩོན་འགྲུས་ཀྱི་སྟོབས་གང་དང་ལྡན་པར་གྱུར་པའི་བརྩོན་འགྲུས་ཀྱི་སྟོབས་དེ་ལྟ་བུ་དང་ལྡན་པར་
བྱའོ། །བརྩོན་འགྲུས་ཀྱི་སྟོབས་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཚེགས་ཆུང་ངུས་སེམས་མཉམ་པར་གཞོག་པར་འགྱུར་རོ། །དེ་ཅིའི་ཕྱིར་ཞེ་ན། བརྩོན་འགྲུས་ཀྱི་སྟོབས་དང་ལྡན་པའི་བྱང་ཆུབ་སེམས་དཔའ་སེམས་དཔའ་
ཆེན་པོ་ནི་དབང་པོའི་དོན་ལས་སེམས་སླར་སྡུད་དེ། དབང་པོའི་དོན་ལ་ཡང་དབང་པོའི་དོན་མི་དམིགས་ཤིང་དབང་པོའི་དོན་ནི་དབང་པོའི་དོན་གྱི་ངོ་བོ་ཉིད་ཀྱིས་སྟོང་པར་མཐོང་། དབང་པོའི་དོན་དང་དབང་པོའི་མཚན་མ་ཡང་མི་དམིགས། གང་གིས་དབང་
པོའི་མཚན་མར་དམིགས་པ་དེ་ཡང་མི་དམིགས་སོ།། །། བམ་པོ་གསུམ་པ། འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་ཚད་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་
དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་བདུད་རྩི་སྙིང་པོ་ཞེས་བྱ་བའི་བསྐལ་པ་བྱུང་སྟེ། འཇམ་དཔལ་བདུད་རྩིའི་སྙིང་པོའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་

49-1-226a

སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་མཐའ་ཡས་རྣམ་པར་གནོན་པ་ཞེས་བྱ་བ་འཇིག་རྟེན་དུ་
བྱུང་ངོ་། །འཇམ་དཔལ་དེ་བཞིན་གཤེགས་པ་མཐའ་ཡས་རྣམ་པར་གནོན་པ་དེ་བྱུང་བའི་ཚེ། ཐམས་ཅད་ཀྱི་ཐམས་ཅད་དུ་འཕགས་པའི་བདེན་པ་དང་བྲལ་བའི་སྒྲ་མ་བྱུང་ངོ་། །གང་སེམས་ཅན་ཐམས་ཅད་ཀྱི་སྒྲ་དེ་ཡང་སྡུག་བསྔལ་དང་། ཀུན་འབྱུང་
བ་དང་། འགོག་པ་དང་། ལམ་འཕགས་པའི་བདེན་པ་རྣམས་སྟོན་ཏོ། །དེ་བཞིན་གཤེགས་པ་མཐའ་ཡས་རྣམ་པར་གནོན་པ་དེའི་རིམ་གྲོ་བྱེད་པ་དགེ་སློང་སྙན་པའི་སྒྲ་དབྱངས་ཤེས་བྱ་བ་ཞིག་ཡོད་དེ། དོན་ཤེས་ཆོས་ཤེས། དུས་ཤེས། ཚོད་ཤེས། 
བདག་ཤེས། འཁོར་ཤེས། གང་ཟག་རབ་དང་ཐ་མ་ཤེས་ཏེ། དེ་བཞིན་གཤེགས་པ་མཐའ་ཡས་རྣམ་པར་གནོན་པ་ལ་བསྐལ་པ་བྱེ་བ་ཕྲག་དགུ་བཅུའི་བར་དུ་ཡིད་དུ་འོང་བས་བསྙེན་བཀུར་བྱས་ཏེ། ཡིད་དུ་མི་འོང་བས་མ་ཡིན་ནོ། །དེས་བཤད་པ་
རྣམས་ཀྱང་བཟུང་སྟེ། བདག་གི་དོན་ཡང་མི་གཏོང་ངོ་། །དེས་བསྐལ་པ་བྱེ་བ་ཕྲག་དགུ་བཅུ་པོ་དེ་དག་གི་བར་དུ་འདོད་པའི་འདུ་ཤེས་མ་བསྐྱེད། གནོད་སེམས་ཀྱི་འདུ་ཤེས་མ་བསྐྱེད། རྣམ་པར་འཚེ་བའི་འདུ་ཤེས་མ་བསྐྱེད། སྲོག་དང་ལྡན་པ་དང་། གང་
ཟག་དང་ལྡན་པའི་རྟོག་པ་མ་བསྐྱེད། དངོས་པོ་དང་ལྡན་པ་ཡང་མ་ཡིན། ཆོས་དང་ལྡན་པ་ཡང་མ་ཡིན། ཆོས་མ་ཡིན་པ་དང་ལྡན་པ་ཡང་མ་ཡིན། འདོད་པའི་རྣམ་པར་རྟོག་པ་ཡང་མ་བསྐྱེད། གནོད་སེམས་ཀྱི་རྣམ་པར་རྟོག་པ་ཡང་མ་ཡིན། རྣམ་
པར་འཚེ་བའི་རྣམ་པར་རྟོག་པ་ཡང་མ་ཡིན། ཉེ་དུ་ལ་རྟོག་པ་ཡང་མ་ཡིན། ཉེ་དུ་མ་ཡིན་པ་ལ་རྟོག་པ་ཡང་མ་ཡིན། ཤེས་པ་ལ་རྟོག་པ་ཡང་མ་ཡིན། མི་ཤེས་པ་ལ་རྟོག་པ་ཡང་མ་ཡིན། ལྗོངས་ལ་རྟོག་པ་ཡང་མ་ཡིན། མི་དགའ་བར་རྟོག་པ་
ཡང་མ་སྐྱེད། སེམས་ཅན་དང་ལྡན་པའི་རྟོག་པ་ཡང་མ་བསྐྱེད། སྲོག་དང་ལྡན་པ་ཡང་མ་ཡིན། གང་ཟག་དང་ལྡན་པ་ཡང་མ་ཡིན། དངོས་པོ་དང་ལྡན་པ་ཡང་མ་ཡིན། ཆོས་དང་ལྡན་པ་ཡང་མ་ཡིན། ཆོས་མ་ཡིན་པ་དང་ལྡན་པ་ཡང་མ་ཡིན། 

49-1-226b

མཚན་མ་དང་ལྡན་པ་ཡང་མ་ཡིན། མཚན་མ་མེད་པ་དང་ལྡན་པ་ཡང་མ་ཡིན། སྨོན་ལམ་དང་ལྡན་པ་ཡང་མ་ཡིན། སྨོན་ལམ་མ་ཡིན་པ་དང་ལྡན་པ་ཡང་མ་ཡིན། འཁོར་བ་དང་ལྡན་པ་ཡང་མ་ཡིན། མྱ་ངན་ལས་འདས་པ་དང་ལྡན་པ་ཡང་མ་
ཡིན། ཡེ་ཤེས་དང་ལྡན་པ་ཡང་མ་ཡིན། ཡེ་ཤེས་མ་ཡིན་པ་དང་ལྡན་པ་ཡང་མ་ཡིན། སངས་རྒྱས་དང་ལྡན་པ་ཡང་མ་ཡིན། སངས་རྒྱས་མ་ཡིན་པ་དང་ལྡན་པ་ཡང་མ་ཡིན། རང་སངས་རྒྱས་དང་ལྡན་པ་ཡང་མ་ཡིན། རང་སངས་རྒྱས་
མ་ཡིན་པ་དང་ལྡན་པ་ཡང་མ་ཡིན། ཉན་ཐོས་དང་ལྡན་པ་ཡང་མ་ཡིན། ཉན་ཐོས་མ་ཡིན་པ་དང་ལྡན་པ་ཡང་མ་ཡིན། སོ་སོའི་སྐྱེ་བོ་དང་ལྡན་པ་ཡང་མ་ཡིན། སོ་སོའི་སྐྱེ་བོ་མ་ཡིན་པ་དང་ལྡན་པ་ཡང་མ་ཡིན། རྣམ་པར་རྟོག་པ་དང་ལྡན་པ་ཡང་
མ་ཡིན། རྣམ་པར་རྟོག་པ་མེད་པ་དང་ལྡན་པའི་རྣམ་པར་རྟོག་པ་འང་མ་བསྐྱེད་དེ། འདུ་ཤེས་ཐམས་ཅད་དང་བྲལ་བའི་ཏིང་ངེ་འཛིན་བསྒོམས། རྟོག་པ་དང་བྲལ་བའི་ཏིང་ངེ་འཛིན་བསྒོམས་ནས་དགེ་བའི་རྩ་བ་དེས་སངས་རྒྱས་བཅོམ་ལྡན་འདས་རྣམས་
ལ་ནམ་ཡང་བསྙེན་བཀུར་མ་བྱས་པར་མ་གྱུར་ཏེ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ལ་བསྙེན་བཀུར་བྱས། སངས་རྒྱས་བཅོམ་ལྡན་འདས་དེ་དག་ཐམས་ཅད་ལ་དེས་གཡོག་དང་བསྙེན་བཀུར་བྱས་པས་དངོས་པོ་མེད་པའི་ངོ་བོ་ཉིད་ཀྱི་ཏིང་ངེ་
འཛིན་ལ་བསྙེན་ཅིང་བསྒོམས་ཏེ། མང་དུ་བྱས་པས་དེ་ཕྱིན་ཆད་བསྐལ་པ་བརྗོད་དུ་མེད་པའི་བར་དུ་སངས་རྒྱས་མེད་པའི་ཞིང་དུ་ནམ་ཡང་མ་སྐྱེས། ནམ་ཡང་ཞིང་དུ་འདུ་ཤེས་དང་སངས་རྒྱས་སུ་འདུ་ཤེས་ཀྱང་མ་སྐྱེས། ནམ་ཡང་བྱང་ཆུབ་ཀྱི་སེམས་རྒྱུན་དུ་
མི་འབྱུང་བར་མ་གྱུར། རྟག་ཏུ་རྒྱུན་མི་འཆད་པར་སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་དང་གཡོག་བྱས། སངས་རྒྱས་ཀྱི་ཞིང་ཐམས་ཅད་དུ་སྤྲུལ་པས་སེམས་ཅན་རྣམས་ཡོངས་སུ་སྨིན་པར་བྱས། གང་དང་གང་དུ་སྤྲུལ་པ་སྤྲུལ་
པ་དེ་དང་དེ་ན་སེམས་ཅན་རྣམས་ཀྱིས་སངས་རྒྱས་བྱུང་བ་སྙམ་དུ་ཤེས་ཏེ། རྫུ་འཕྲུལ་གྱི་ཆོ་འཕྲུལ་རྣམ་པ་དུ་མས་སེམས་ཅན་དེ་དག་ལ་སྟོན་ཏོ། །གང་དང་གང་དུ་སྤྲུལ་པ་སྤྲུལ་པ་དེ་དང་དེར་སེམས་ཅན་ཇི་ལྟ་བུ་ལ་མོས་པ་དེ་ལྟ་བུར་སྤྲུལ་པ་སྤྲུལ་

49-1-227a

ཏེ་འདུལ་བའི་སེམས་ཅན་རྣམས་ཀྱི་རྒྱུད་དང་སྦྱར་ཏེ་རྣམ་པར་འདུལ་བའི་ཕྱིར་སངས་རྒྱས་ཀྱི་ཞིང་དུ་སྤྲུལ་པ་རྣམ་པ་དུ་མར་སྤྲུལ་ཏོ། །སྤྲུལ་པ་དེ་དག་གིས་ཀྱང་གཞན་ཡང་སྤྲུལ་ཏེ་བསྟན་ཏོ། །འཇམ་དཔལ་འདི་ལྟ་སྟེ་དཔེར་ན་སྒྱུ་མ་
མཁན་གྱིས་སྤྲུལ་པ་མངོན་པར་སྤྲུལ་ཏེ། སྒྱུ་མ་མཁན་གྱིས་སྤྲུལ་པ་དེ་དག་གིས་ཀྱང་སྤྲུལ་པ་གཞན་མངོན་པར་སྤྲུལ་པ་དེ་བཞིན་དུ། འཇམ་དཔལ་དགེ་སློང་སྙན་པའི་སྒྲ་དབྱངས་ཀྱིས་ཀྱང་སྤྲུལ་པ་མངོན་པར་སྤྲུལ་ཏེ། སྤྲུལ་པ་དེ་དག་གིས་ཀྱང་གཞན་མངོན་པར་
སྤྲུལ་ཏོ། །འཇམ་དཔལ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དགེ་སློང་སྙན་པའི་སྒྲ་དབྱངས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ། 
དེའི་ཚེ་དེའི་དུས་ན་དགེ་སློང་སྙན་པའི་སྒྲ་དབྱངས་ཤེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་དངོས་པོ་མེད་པའི་ངོ་བོ་ཉིད་ཀྱི་ཏིང་ངེ་འཛིན་ལ་བསྟེན་པར་བྱ། བསྒོམ་པར་
བྱ། མང་དུ་བྱའོ། །བྱང་ཆུབ་སེམས་དཔའི་ཏིང་ངེ་འཛིན་དངོས་པོ་མེད་པའི་ངོ་བོ་ཉིད་འདི་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་བྱང་ཆུབ་སེམས་དཔའ་ལ་འབྱུང་ངོ་། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་ཚད་མེད་གྲངས་མེད། བསམ་
གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་བསྐལ་པའི་སྙིང་པོ་ཞེས་བྱ་བའི་བསྐལ་པ་བྱུང་སྟེ། བསྐལ་པའི་སྙིང་པོའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་མཚུངས་པ་མེད་པའི་གཟི་བརྗིད་འོད་ཅེས་བྱ་བ་འཇིག་རྟེན་དུ་བྱུང་སྟེ། འཇམ་
དཔལ་དེ་བཞིན་གཤེགས་པ་མཚུངས་པ་མེད་པའི་གཟི་བརྗིད་འོད་དེའི་འོད་ཀྱིས་ཤར་ཕྱོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སྣང་བར་གྱུར། ལྷོ་ཕྱོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སྣང་བར་གྱུར། ནུབ་

49-1-227b

ཕྱོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སྣང་བར་གྱུར། བྱང་ཕྱོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སྣང་བར་གྱུར། དེ་བཞིན་དུ་ཤར་ལྷོ་དང་། ལྷོ་ནུབ་དང་། ནུབ་བྱང་དང་། བྱང་ཤར་དང་། སྟེང་དང་། འོག་དང་
ཕྱོགས་བཅུ་ཀུན་དུ་ཕྱོགས་རེ་རེར་ཡང་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་དེ་བཞིན་གཤེགས་པ་མཚུངས་པ་མེད་པའི་གཟི་བརྗིད་འོད་དེའི་འོད་ཀྱིས་སྣང་བར་གྱུར་ཏོ། །སེམས་ཅན་གང་དེའི་འོད་ཀྱིས་རེག་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་བཞིན་གཤེགས་པ་མཚུངས་པ་མེད་པའི་གཟི་བརྗིད་འོད་དེའི་འཇིག་རྟེན་གྱི་ཁམས་ན་བྱང་ཆུབ་སེམས་དཔའ་གང་གཱའི་ཀླུང་གི་བྱེ་མ་སྙེད་རྣམས་ཕྱིར་མི་ལྡོག་པའི་ཐེག་པ་ལ་ཡང་དག་པར་ཞུགས་པར་
གྱུར་ཏེ། དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་ནས། བྱང་ཆུབ་སེམས་དཔའ་དེ་དག་ཕལ་ཆེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་བརྗོད་དུ་མེད་པ་རྣམས་ཐེག་པ་གསུམ་གྱིས་རབ་ཏུ་
འགོད་དོ། །ཡང་དེའི་ཚེ་དེའི་དུས་ན་སངས་རྒྱས་ཀྱི་ཞིང་དེ་ན་དགེ་སློང་སྤྲིན་གྱི་རྒྱལ་པོ་ཞེས་བྱ་བ་ཞིག་བྱུང་སྟེ། འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་ཇི་སྙེད་ཡོད་པ་དེ་དག་ཐམས་ཅད་ཀྱི་མཆོག་བྱེད་དེ། དེས་བྱང་ཆུབ་སེམས་དཔའ་དེ་དག་ཐམས་ཅད་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ་དག་གི་དམ་པའི་ཆོས་དུས་དང་པོ་དང་། བར་མ་དང་། ཐ་མ་གསུམ་དུ་གཟུང་ངོ་ཞེས་དེ་ལྟར་སྨོན་ལམ་བཏབ་བོ། །འཇམ་དཔལ་དེ་ན་བྱང་ཆུབ་སེམས་དཔའ་དེ་དག་
ཐམས་ཅད་དུས་ཇི་ལྟ་བ་བཞིན་དུ་སོ་སོའི་འཇིག་རྟེན་གྱི་ཁམས་སུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། སེམས་ཅན་དཔག་ཏུ་མེད་ཅིང་བརྗོད་དུ་མེད་པ་རྣམས་ཀྱི་དོན་བྱས་ནས་ཕུང་པོ་ལྷག་མ་མེད་པའི་མྱ་ངན་ལས་
འདས་པའི་དབྱིངས་སུ་མྱ་ངན་ལས་འདས་སོ། །དེ་བཞིན་གཤེགས་པ་དེ་དག་ཐམས་ཅད་ཀྱི་དམ་པའི་ཆོས་དགེ་སློང་སྤྲིན་གྱི་རྒྱལ་པོ་དེས་དུས་ཐོག་མ་དང་། བར་མ་དང་། ཐ་མ་གསུམ་དུ་བཟུང་ངོ་། །དེ་དག་མྱ་ངན་ལས་འདས་པའི་འོག་ཏུ་འཇིག་རྟེན་དུ་སྙིགས་མ་ལྔ་

49-1-228a

བྱུང་སྟེ། སེམས་ཅན་སྐལ་བ་མེད་པར་གྱུར་ནས་དམ་པའི་ཆོས་ནུབ་པ་དེའི་ཚེ། བྱང་ཆུབ་སེམས་དཔའ་དེ་ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་དང་ལྡན་པར་གྱུར་ཏེ། དེ་བསྟན་བཅོས་གང་འཇིག་རྟེན་གྱི་དོན་དུ་འགྱུར་བ་ཆོས་དང་ལྡན་པ་དེ་ཁོང་དུ་
ཆུད་ནས་རབ་ཏུ་སྟོན་པ་འདི་ལྟ་སྟེ། སྙན་ཚིག་གི་རིག་བྱེད་དང་། ངེས་བརྗོད་ཀྱི་རིག་བྱེད་དང་། མཆོད་སྦྱིན་གྱི་རིག་བྱེད་དང་། སྲིད་སྲུང་གི་རིག་བྱེད་དང་། སྒྲའི་བསྟན་བཅོས་རྣམས་དང་། གཏན་ཚིགས་ཀྱི་བསྟན་བཅོས་རྣམས་དང་། གསོ་བའི་བསྟན་བཅོས་
རྣམས་དང་། ནོར་སྦྱར་དང་དུག་དང་སྔགས་དང་སྨན་གྱི་རྒྱུད་དང་། དུས་འཁོར་བ་དང་། དུས་དང་། གཟའ་དང་། རྒྱུ་སྐར་ཤེས་པ་ཡང་རབ་ཏུ་སྟོན་ཏོ། །སེམས་ཅན་རྣམས་ལ་ཕན་པ་དང་ལྡན་པའི་བཟོའི་གནས་ཐམས་ཅད་ཀྱང་སྟོན་ཏོ། །ནམ་སངས་རྒྱས་
བྱུང་བ་དེ་ན་དེའི་འཁོར་ལོས་སྒྱུར་བའི་རྒྱལ་པོར་གྱུར་ཏེ། རྒྱལ་པོའི་སྲིད་བོར་ནས་འཁོར་དང་བཅས་ཏེ། ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །རབ་ཏུ་བྱུང་ནས་དེ་བཞིན་གཤེགས་པ་དེ་དག་གིས་བསྟན་པ་ཡང་ཀུན་འཛིན། ཡོངས་སུ་མྱ་ངན་ལས་འདས་པ་དེ་དག་
གི་རིང་བསྲེལ་ལ་ཡང་མཆོད་པ་རྣམ་པ་མང་པོས་རབ་ཏུ་སྦྱོར་བར་གྱུར་ཏོ། །སྐྱེ་བོའི་ཚོགས་དཔག་ཏུ་མེད་པ་རྣམས་སངས་རྒྱས་ལ་མཆོད་པ་བྱེད་དུ་འཇུག་པར་གྱུར། དམ་པའི་ཆོས་དང་ལྡན་པ་དང་། སངས་རྒྱས་དང་ལྡན་པ་དང་། སངས་རྒྱས་མཆོད་པ་དང་ལྡན་
པ་དང་། སེམས་ཅན་ཡོངས་སུ་སྨིན་པར་བྱེད་པ་དང་ལྡན་པ་དང་། བདག་གི་དགེ་བའི་རྩ་བ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་ཞིང་སེམས་ཅན་ཐམས་ཅད་དང་ཐུན་མོང་དུ་བྱས་ནས་སངས་རྒྱས་ཀྱི་ཞིང་ཡོངས་སུ་དག་པའི་ཕྱིར་
ཡང་ཡོངས་སུ་བསྔོས་སོ། །འཇམ་དཔལ་བྱང་ཆུབ་སེམས་དཔའ་སྤྲིན་གྱི་རྒྱལ་པོ་དེས་བྱང་ཆུབ་སེམས་དཔའ་དེ་ཐམས་ཅད་བྱང་ཆུབ་མངོན་པར་སངས་རྒྱས་པ་ལ་དེ་ལྟ་བུའི་ཚུལ་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོ་བྱས། བཞུགས་པ་དང་ཡོངས་
སུ་མྱ་ངན་ལས་འདས་པ་དེ་དག་ཐམས་ཅད་དང་། དེ་བཞིན་གཤེགས་པ་ཚད་མེད་པ་གཞན་གྱི་ཡང་དམ་པའི་ཆོས་དུས་ཐོག་མ་དང་། བར་མ་དང་། ཐ་མ་གསུམ་དུ་བཟུང་སྟེ། འོན་ཀྱང་དེ་ལ་སངས་རྒྱས་བཅོམ་ལྡན་འདས་དེ་རྣམས་ཀྱིས་བླ་ན་མེད་པ་ཡང་

49-1-228b

དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ནོ། །དེ་ཅིའི་ཕྱིར་ཞེ་ན། དེ་ཤེས་རབ་ཀྱི་ཕ་རོལ་དུ་ཕྱིན་པ་ལས་ངེས་པར་འབྱུང་བ་མ་ཡིན་པའི་ཕྱིར་རོ། །དེ་བཞིན་གཤེགས་པ་མཚུངས་པ་མེད་པའི་གཟི་བརྗིད་འོད་དེ་ཡང་དེའི་ཚེ་མྱ་ངན་ལས་མ་འདས་ཏེ། དེ་ནས་
བྱང་ཆུབ་སེམས་དཔའ་སྤྲིན་གྱི་རྒྱལ་པོ་དེ་བཅོམ་ལྡན་འདས་དེ་བཞིན་གཤེགས་པ་མཚུངས་པ་མེད་པའི་གཟི་བརྗིད་འོད་ཀྱི་ཞིང་སངས་རྒྱས་ཀྱི་ཞིང་དུ་སྨོན་ལམ་གྱི་དབང་གིས་ཡང་དང་ཡང་སྐྱེས་ནས། དེའི་དགེ་བའི་རྩ་བ་ཡོངས་སུ་སྨིན་པའི་སྟོབས་
དེས་དེ་བཞིན་གཤེགས་པ་དེ་མཐོང་མ་ཐག་ཏུ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་པར་བྱས་ཏེ། དེའི་ཚེ་དེ་བཞིན་གཤེགས་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དགེ་བའི་རྩ་བ་གང་ལ་བརྟེན་པས་དགེ་སློང་
སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་ཅེ་ན། འདི་ལྟ་སྟེ། དུས་གསུམ་མཉམ་པ་ཉིད་ལ་འཇུག་པ་དང་། དུས་གསུམ་གྱི་ཆོས་ཐམས་ཅད་མཉམ་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །
འདུས་བྱས་དང་འདུས་མ་བྱས་ཀྱི་ཆོས་རྣམས་ཐ་དད་པར་མི་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་ངོ་བོ་ཉིད་དང་བྲལ་བར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་
གོ། །ཆོས་ཐམས་ཅད་མ་སྐྱེས་མ་འགགས་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་འོང་བ་ཡང་མ་ཡིན་འགྲོ་བ་ཡང་མ་ཡིན་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་
པ་ཡོངས་སུ་དག་གོ། །ཆོས་ཐམས་ཅད་གནས་པ་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་མྱ་ངན་ལས་འདས་པ་དང་མཚུངས་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་
ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་བརྗོད་དུ་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ་ཆོས་ཐམས་ཅད་ལ་བདག་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་

49-1-229a

རོལ་དུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་ལ་སེམས་ཅན་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་ལ་སྲོག་མེད་པར་མཐོང་བས་དགེ་སློང་སྤྲིན་གྱི་རྒྱལ་
པོ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་ལ་གང་ཟག་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་ནམ་མཁའ་དང་མཚུངས་པར་མཐོང་བས་དགེ་སློང་སྤྲིན་གྱི་
རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་ཆོས་ཀྱི་དབྱིངས་ལས་བྱུང་བར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །དེ་ལྟར་ཆོས་ཀྱི་དབྱིངས་ལས་ཆོས་ཐམས་ཅད་བྱུང་བར་མཐོང་བས་
དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་སྟེ། དེ་ལྟར་དེ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་པས་འདི་ལྟ་བུའི་དགེ་བའི་རྩ་བའི་ཤུགས་རྙེད་དེ། དེ་ལྟ་བུའི་དགེ་བའི་རྩ་བའི་ཤུགས་རྙེད་པས་ཏ་ལ་བདུན་སྲིད་དུ་ནམ་
མཁའ་ལ་འཕགས་ཏེ། དེ་བར་སྣང་ལ་འདུག་ནས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་པ་ན་སངས་རྒྱས་བཅོམ་ལྡན་འདས་མཐོང་བ་ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ། ལ་ལ་ནི་བླ་ན་མེད་པའི་
ཆོས་ཀྱི་འཁོར་ལོ་སྐོར། ལ་ལ་ནི་རྫུ་འཕྲུལ་གྱི་ཆོ་འཕྲུལ་རྣམ་པ་དུ་མས་སེམས་ཅན་རྣམས་འདུལ། ལ་ལ་ནི་ཚེའི་འདུ་བྱེད་འདོར། ལ་ལ་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་མཐོང་སྟེ། 
མཐོང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚུངས་པ་མེད་པའི་གཟི་བརྗིད་འོད་དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགསུ་བཅད་པས་མངོན་པར་བསྟོད་དོ། །བསྐལ་པ་བྱེ་བ་མང་པོར་འཁོར་
བ་ན། །སྦྱིན་པ་མཐའ་ཡས་པ་དག་རྒྱ་ཆེར་སྩལ། །བདེ་བར་གཤེགས་པའི་བསྟན་པ་རབ་འདྲི་ཞིང་། །སྦྱིན་གནས་མང་པོ་དག་ལ་བདག་གིས་བསྙེན། །འཇིག་རྟེན་རིག་པ་འཇིག་རྟེན་མངོན་གྲགས་པ། །སྤྱན་ལྡན་དྲི་མེད་ཅེས་བགྱི་མཁྱེན་པ་

49-1-229b

དེ། །རི་རབ་བརྩེགས་འདྲ་བསོད་ནམས་བརྒྱ་ཡི་མཚན། །བྱང་ཆུབ་འཚལ་སླད་དེ་ལ་རིམ་གྲོ་བགྱིས། །བྱེ་བ་ཁྲག་ཁྲིག་དྲུག་བཅུ་མཐའ་ཡས་པ། །དེ་ཡི་དགེ་འདུན་བདེ་གཤེགས་སྲས་ལ་ཡང་། །ལོ་བྱེ་ཁྲག་ཁྲིག་བདུན་བཅུའི་བར་དུ་ནི། །
རྒྱལ་བ་ཉན་ཐོས་བཅས་ལ་བསྙེན་བཀུར་བགྱིས། །དགའ་ཞིང་མོས་པ་མངོན་པར་བསྐྱེད་ནས་སུ། །ཟས་སྐོམ་རྣམ་མང་ཡིད་དུ་འོང་བ་དག །བདེ་བར་གཤེགས་ལ་བདག་གིས་དབུལ་བ་ཕུལ། །འོན་ཀྱང་བདེ་གཤེགས་དེས་བདག་ལུང་མ་
བསྟན། །འདས་པའི་དུས་ཚེ་སངས་རྒྱས་བྱུང་བ་ནི། །མཁྱེན་པ་འཇིག་རྟེན་མགོན་པོ་མྱ་ངན་སེལ། །མེ་རྩེ་སྤྲིན་ཅེས་བྱ་བའི་དེ་བཞིན་གཤེགས། །ཉན་ཐོས་བཅས་པ་རྒྱལ་དེ་བསྙེན་བཀུར་བགྱིས། །འདྲེན་པ་དེ་ལ་ལོ་བྱེ་དྲུག་བཅུ་བཞིར། །
བདག་གིས་འཁོར་དང་བཅས་ལ་བཀུར་སྟི་བགྱིས། །བདག་གིས་ཡེ་ཤེས་ཡངས་པ་མ་སྦྱངས་པས། །འོན་ཀྱང་བདེ་གཤེགས་དེས་བདག་ལུང་མ་བསྟན། །འདས་པའི་དུས་ན་འདྲེན་པ་བྱུང་བ་ནི། །ཡེ་ཤེས་རྒྱ་མཚོ་ཞེས་ཀྱང་ཕྱོགས་སུ་གྲགས། །
ཆོས་རྒྱལ་དེ་ཡི་འཁོར་དུ་གྱུར་པ་ནི། །བྱེ་བ་ཁྲག་ཁྲིག་དྲུག་ཅུར་ཚང་བ་ལགས། །བདག་གིས་རྒྱལ་མཆོག་ཉན་ཐོས་བཅས་དེ་ལ། །ལོ་བྱེ་དགུ་བཅུའི་བར་དུ་བསྙེན་བཀུར་བགྱིས། །བྱང་ཆུབ་དམ་པ་འཚལ་བའི་སླད་དུ་འདིར། །བདག་གིས་སྦྱིན་པ་མཐའ་ཡས་
རྒྱ་ཆེར་སྩལ། །མྱ་ངན་འདས་པར་གྱུར་ནས་ལོ་ལྔ་ནས། །བདེ་གཤེགས་ཉན་ཐོས་དག་ལ་བཀུར་སྟི་བགྱིས། །བཤོས་དང་སྐྱེམས་ཀྱི་རྣམ་པར་རབ་ཏུ་སྦྱར། །འོན་ཀྱང་བདེ་གཤེགས་དེས་བདག་ལུང་མ་བསྟན། །འདས་པའི་དུས་ན་ཁ་ལོ་སྒྱུར་བྱུང་བ། །
མཁས་པ་ཡེ་ཤེས་རི་བོ་དེ་བཞིན་གཤེགས། །དེ་ཡི་ཞིང་རྣམས་མཚུངས་མེད་བསམ་མི་ཁྱབ། །འཇིག་རྟེན་ཁམས་རྣམས་ཁྲག་ཁྲིག་ཐམས་ཅད་ནས། །སྐྱོབ་པ་བདེ་གཤེགས་དེ་ཡི་འདུས་པ་ནི། །ཡང་དག་མཐོང་བའི་ཉན་ཐོས་རྣམས་སུ་གྱུར། །
ཁྲག་ཁྲིག་བདུན་དུ་སངས་རྒྱས་ཞིང་རྣམས་ནི། །ལ་ལས་བཏགས་ནས་ཕྲ་རབ་རྡུལ་བགྱིས་ལ། །དེ་ནི་མི་གང་ལ་ལས་བྱུང་བ་ཡིས། །ཕྲ་རབ་རྡུལ་དུ་བགྱིས་པའི་རྡུལ་དེ་ཐོགས། །མི་དེས་ཤིན་དུ་རྡུལ་ཕྲན་དེ་ཐོགས་ཏེ། །ཤར་གྱི་ཕྱོགས་སུ་མགྱོགས་

49-1-230a

ལྡན་དེ་མཆིས་པ། །གང་གཱའི་ཀླུང་གི་བྱེ་སྙེད་སངས་རྒྱས་ཞིང་། །དེ་ཡི་གོམ་པ་གཅིག་གིས་དེ་དག་རྒལ། །དེ་བཞིན་མི་དེ་བསྐལ་པ་བརྒྱར་མཆིས་ནས། །མཐའ་མར་ཤིན་དུ་ཕྲ་བའི་རྡུལ་གཅིག་བོར། །དེ་བཞིན་ཤིན་དུ་ཕྲ་བའི་
རྡུལ་དེ་ཀུན། །ཤར་གྱི་ཕྱོགས་སུ་མཆིས་ནས་ཐམས་ཅད་བོར། །དེ་བཞིན་མ་ལུས་ཕྱོགས་བཅུ་ཐམས་ཅད་དུ། །ཇི་སྙེད་ཀྱི་ནི་རྡུལ་ཕྲན་ཀུན་བོར་ཏེ། །དེ་དག་ཞིང་རྣམས་གང་དུ་བོར་བ་དང་། །གང་དུ་རྡུལ་ཕྲན་མ་བོར་དེ་དག་རྣམས། །གྲོང་ཁྱེར་
གཅིག་དུ་དེ་ཀུན་བགྱིས་ནས་སུ། །དེ་ནི་ཡུངས་ཀར་དག་གིས་གང་བར་བགྱིས། །གལ་ཏེ་འཇིག་རྟེན་ཁམས་རྣམས་ཐམས་ཅད་ཀྱང་། །ཡུངས་འབྲུས་གང་བ་ལ་ལ་སུ་སྤྲོ་བས། །བཏགས་ནས་ཤིན་དུ་ཕྲ་བའི་རྡུལ་དུ་བགྱིས། །ཐམས་ཅད་ཀྱང་ནི་ཇི་
ལྟར་སྔ་མ་བཞིན། །དེ་བཞིན་ཐམས་ཅད་ཕྱོགས་ཀྱི་ཞིང་རྣམས་ཀྱང་། །སྟོང་དུ་བསྒྱུར་ཅིང་བསྒྲེ་བ་བགྱིས་པ་ཡང་། །དེ་ཡི་ཐ་མ་འཚལ་བར་ནུས་ཀྱང་གདའ། །སྐྱོབ་པ་དེ་ཡི་ཞིང་ནི་ཚད་མ་མཆིས། །བདེ་གཤེགས་དེ་ལ་དགྲ་བཅོམ་མངའ་བ་ནི། །ཉན་
ཐོས་ཁྲག་ཁྲིག་བསམ་གྱིས་མི་ཁྱབ་རྣམས། །རྒྱལ་བ་དེ་ཡང་ཉན་ཐོས་བཅས་པར་མཆོད། །དེ་བཞིན་གཤེགས་དེས་བདག་ལ་ལུང་མ་བསྟན། །འདས་པའི་དུས་ན་འདྲེན་པ་བྱུང་བ་ནི། །འཇིག་རྟེན་མཆོད་རྟེན་ཞེས་ནི་ཕྱོགས་སུ་གྲགས། །གང་ཟག་མཆོག་དེ་
བདག་གིས་མཆོད་ན་ཡང་། །དེ་བཞིན་གཤེགས་དེས་བདག་ལ་ལུང་མ་བསྟན། །མ་སྨད་པ་ཡི་བདེ་གཤེགས་སངས་རྒྱས་བརྒྱད། །རྒྱལ་བ་གྲགས་འཆང་འཇིགས་མཛད་དེས་པ་དང་། །ས་ལའི་རྒྱལ་པོ་ནོར་བཟངས་འོད་ཆེན་དང་། །ཏོག་གི་རྒྱལ་པོ་བསོད་ནམས་
བརྒྱ་ཡི་མཚན། །བདག་གིས་འདྲེན་པ་དེ་དག་ཉན་ཐོས་བཅས། །བྱང་ཆུབ་མཆོག་རབ་འཚལ་སླད་བཀུར་སྟི་བགྱིས། །འོན་ཀྱང་ཤེས་རབ་མཐར་ཕྱིན་མ་སྦྱངས་པས། །དེ་བཞིན་གཤེགས་དེས་བདག་ནི་ལུང་མ་བསྟན། །བསྐལ་པ་གཅིག་
ལ་མཐུ་ཆེན་བདེ་བར་གཤེགས། །ཐམས་ཅད་གཟིགས་པ་སྟོང་ཕྲག་དྲུག་བྱུང་སྟེ། །བདག་གིས་གང་ཟག་མཆོག་དེ་ཀུན་མཆོད་ཀྱང་། །བདེ་གཤེགས་དེ་དག་གིས་ཀྱང་ལུང་མ་བསྟན། །འདས་པའི་དུས་ན་འདྲེན་པ་བྱུང་བ་ནི། །ཟླས་བྱིན་ཞེས་ཀྱང་

49-1-230b

ཕྱོགས་བཅུར་གྲགས་པ་སྟེ། །རྒྱལ་བ་ཉན་ཐོས་བཅས་ལ་བཀུར་སྟི་བགྱིས། །དེ་བཞིན་གཤེགས་དེས་བདག་ལ་ལུང་མ་བསྟན། །འདས་པའི་དུས་ན་འདྲེན་པ་བྱུང་བ་ནི། །ཙན་དན་དམ་པ་བདེ་གཤེགས་འཕྲུལ་ཆེན་ཏེ། །མི་ཡི་དམ་པ་དེ་ལའང་
བསྙེན་བཀུར་བགྱིས། །གང་ཟག་མཆོག་དེས་བདག་ལ་ལུང་མ་བསྟན། །འདྲེན་པ་འཇིག་རྟེན་མཁྱེན་པ་སྔོན་བྱུང་བ། །གློག་སྤྲིན་ཞེས་བགྱི་ཕྱོགས་སུ་གྲགས་པ་སྟེ། །རྒྱལ་བ་དེ་ཡང་ཉན་ཐོས་བཅས་པར་མཆོད། །དེ་བཞིན་གཤེགས་དེས་
བདག་ལ་ལུང་མ་བསྟན། །སྔོན་གྱི་སངས་རྒྱས་རྐང་གཉིས་མཆོག་བྱུང་བ། །ཐེ་ཙོམ་ཀུན་གྱི་བཅིངས་པ་གཅོད་མཛད་པ། །སྤྲིན་སྦྱིན་རྣམ་འདྲེན་བདེ་བར་གཤེགས་པ་སྟེ། །དེ་ལ་རིམ་གྲོ་བགྱིས་ཀྱང་ལུང་མ་བསྟན། །སྔོན་གྱི་སངས་རྒྱས་རྣམ་འདྲེན་
སྡིག་མི་མངའ། །དགྲ་འཇོམ་ཞེས་ཀྱང་ཕྱོགས་སུ་གྲགས་པ་སྟེ། །འཇིག་རྟེན་མཁས་པ་དེ་ལ་མཆོད་བགྱིས་ཀྱང་། །དེ་བཞིན་གཤེགས་དེས་བདག་ལ་ལུང་མ་བསྟན། །སྔོན་གྱི་སངས་རྒྱས་ཁྲག་ཁྲིག་མཐའ་ཡས་པ། །འཇིག་རྟེན་མགོན་པོ་
མཚུངས་མེད་ཉན་ཐོས་བཅས། །བྱང་ཆུབ་མཆོག་འཚལ་བཀུར་སྟི་རབ་བགྱིས་ཀྱང་། །བདེ་གཤེགས་དེ་དག་གིས་ཀྱང་ལུང་མ་བསྟན། །མཚུངས་མེད་འདྲེན་པ་རྣམས་ལ་བསྙེན་བཀུར་བགྱིས། །ཤེས་རབ་དམ་པ་མཆོག་ནི་བདག་གིས་སྦྱངས། །
ཆོས་ཀྱི་ཚུལ་དང་མཚན་ཉིད་དེ་རྟོགས་ནས། །དེས་ན་དྲི་མེད་ཏོག་གིས་བདག་ལུང་བསྟན། །འདི་ལྟར་བདག་གིས་དེ་རིང་ཆོས་ཉིད་མཐོང་། །ཐེ་ཙོམ་མ་ལུས་པར་ནི་ཐམས་ཅད་བཅད། །སྒྱུ་མ་སྨིག་རྒྱུ་ཆུ་ཟླ་འདྲ་བ་རུ། །ཆོས་རྣམས་ཐམས་ཅད་སྐྱེ་
བ་བདག་གིས་མཐོང་། །ཇི་ལྟར་མི་རྣམས་རི་ཡི་བར་ན་ཡང་། །ཡིད་དུ་འོང་བའི་གླུ་དབྱངས་སྐད་འབྱིན་ཏེ། །སྐད་ཅིག་ཏུ་ནི་བྲག་ཆ་གཞན་ཡང་འབྱུང་། །དེ་ཡི་སྒྲ་ལ་བྱེད་པ་པོ་མ་མཆིས། །རི་ཡི་བར་ནི་ཇི་ལྟར་བྲག་ཆ་བཞིན། །དེ་བཞིན་
བདག་གིས་ཆོས་རྣམས་ཡང་དག་མཐོང་། །དེ་ལ་བདག་ནི་ཐེ་ཚོམ་མ་མཆིས་ཏེ། །དེས་ན་གང་ཟག་མཆོག་དེས་བདག་ལུང་བསྟན། །ནམ་མཁའ་བར་སྣང་ཇི་ལྟར་བྱ་ཡི་རྗེས། །དེ་དག་མ་མཆིས་མ་བྱུང་འབྱུང་མི་འགྱུར། །རྒྱལ་བས་བསྟན་པ་

49-1-231a

དེ་བཞིན་མཐོང་བས་ན། །དེས་ན་གང་ཟག་མཆོག་གིས་བདག་ལུང་བསྟན། །ཆོས་འདི་ཐམས་ཅད་བར་སྣང་ནམ་མཁའ་བཞིན། །དེ་རྣམས་གང་ལའང་མངོན་པར་ཆགས་མ་མཆིས། །ཕྱོགས་ནས་མཆིས་ཤིང་གང་དུའང་
མཆིས་མ་མཆིས། །དེས་ན་གང་ཟག་མཆོག་གིས་བདག་ལུང་བསྟན། །ཇི་ལྟར་རྨི་ལམ་ན་ནི་སྐོམ་པའི་མིས། །ཆུ་གྲང་དང་བ་དེ་ཡིས་འཚལ་ན་ཡང་། །སྐོམ་པ་ཆད་ཅིང་ཞི་བར་མི་འགྱུར་བ། །དེ་བཞིན་བདག་གིས་འདོད་པའི་ཡོན་ཏན་རྟོགས། །
རྔ་བརྡུངས་དེ་ལས་སྒྲ་རྣམས་རབ་འབྱུང་སྟེ། །སྐྱེ་བོ་བྱིས་པ་རྣམས་ནི་དགའ་བར་གྱུར། །དེ་ཡང་ཀོ་བ་དང་ནི་ཤིང་ལས་ཀྱང་། །སྒྲ་དེ་མི་རྙེད་དེ་བཞིན་ཆོས་ཉིད་དོ། །ཇི་ལྟར་པི་ཝང་ལེན་པ་སྦྲེངས་པ་ཡི། །རྒྱུད་ལས་སྙན་པའི་སྒྲ་ཡང་ཤིན་དུ་གཏོང་། །ཤིང་
དང་རྒྱུད་རྣམས་ལས་ཀྱང་མ་ལགས་ཏེ། །སྒྲ་དེ་མི་རྙེད་དེ་བཞིན་ཆོས་ཉིད་དོ། །གཟུགས་དང་སྒྲ་དང་རོ་དང་དྲི་རེག་ཀྱང་། །པི་ཝང་དག་གི་སྒྲ་འདྲར་མཐོང་བས་ན། །ཐེ་ཚོམ་དོགས་པ་ཐམས་ཅད་ཀུན་དུ་བཅོམ། །དེ་བས་འཇིག་རྟེན་འདྲེན་པས་བདག་ལུང་བསྟན། །
ས་དང་ཤིང་དང་མུན་ཛ་བལ་བ་ཛ། །དེ་བཞིན་འོད་མ་རྩྭ་དང་ཆུར་བརྟེན་ཏེ། །བར་སྣང་ལ་ནི་དེ་དག་ཀུན་བསྐོར་ནས། །འཇིག་རྟེན་ཀུན་རྫོབ་ཁྱིམ་དུ་གྱུར་ཅེས་བརྗོད། །དེ་བཞིན་རུས་པ་སེན་མོ་རྒྱུས་ལྤགས་དང་། །སྤུ་དང་སྐྲ་དང་ཁྲག་རྣམས་ལྤགས་པ་ཡིས། །ནམ་
མཁའ་དག་ཀྱང་ཀུན་ནས་བསྐོར་ནས་ནི། །དེ་བཞིན་ཀུན་རྫོབ་ལུས་སུ་གྱུར་ཅེས་བརྗོད། །གཟུགས་ནི་དབུ་བ་འདྲ་སྟེ་སྙིང་པོ་མེད། །ཚོར་བ་རྣམས་ནི་ཆུ་ཡི་ཆུ་བུར་འདྲ། །འདུ་ཤེས་རྣམས་ནི་སྨིག་རྒྱུ་འདྲ་བ་མཐོང་། །དེ་ལ་བྱིས་པའི་རང་བཞིན་སྐྱེ་བོས་ནོར། །སེམས་པ་
དག་ནི་ཆུ་ཤིང་སྙིང་པོ་འདྲ། །རྣམ་ཤེས་རྣམ་པ་ཀུན་དུ་སྒྱུ་མ་བཞིན། །གང་གིས་འགྲོ་བ་ལྷར་བཅས་འཁྱམ་བྱས་པ། །དེ་ལྟར་མཐོང་བས་རྒྱལ་བས་ལུང་ཡང་བསྟན། །དེ་ནས་དགེ་སློང་སྤྲིན་གྱི་རྒྱལ་པོ་དེས་དེ་བཞིན་གཤེགས་པ་མཚུངས་པ་མེད་པའི་གཟི་བརྗིད་འོད་
དེ་ལ་ཤེས་རབ་ཀྱི་ཕ་རོལ་དུ་ཕྱིན་པ་དང་ལྡན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས། དགེ་བའི་རྩ་བ་དེས་བསྐལ་པ་བརྗོད་དུ་མེད་པར་ནམ་ཡང་ཆོས་ལ་རྨོངས་པར་མ་གྱུར། ནམ་ཡང་ཚུལ་ཁྲིམས་ལ་སྙིང་པོར་འདུ་ཤེས་

49-1-231b

པར་མ་གྱུར། ཏིང་ངེ་འཛིན་ལ་སྙིང་པོར་འདུ་ཤེས་པར་མ་གྱུར་ཏེ། རྟག་ཏུ་རྒྱུན་མི་འཆད་པར་ཤེས་རབ་ཀྱི་ཕ་རོལ་དུ་ཕྱིན་པ་ལ་གཞོལ་བར་གྱུར་ཏོ། །ནམ་ཡང་ཤེས་རབ་ཀྱི་ཕ་རོལ་དུ་ཕྱིན་པ་ལ་དངོས་པོར་མ་དམིགས་ཏེ། འདི་ལྟ་སྟེ། དཔེར་ན་མི་ཞིག་
གཟིངས་ལས་རྒྱ་མཚོ་ཆེན་པོ་རྒལ་ནས་གཟིངས་བོར་ཏེ་གར་དགའ་བར་འགྲོ་བ་དེ་བཞིན་དུ་དགེ་སློང་སྤྲིན་གྱི་རྒྱལ་པོ་དེའང་ཤེས་རབ་ཀྱི་ཕ་རོལ་དུ་ཕྱིན་པ་ཤེས་པར་བྱེད་མོད་ཀྱི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མངོན་པར་ཞེན་པར་མི་བྱེད་དོ། །འདི་ལྟ་སྟེ་དཔེར་
ན་མི་ཞིག་མེ་འདོད་པ་དེ་མེས་དགོས་པ་བྱེད་མོད་ཀྱི་ཚིག་པའི་ཉེས་པའང་སྲུང་བ་དེ་བཞིན་དུ། བྱང་ཆུབ་སེམས་དཔའ་སྤྲིན་གྱི་རྒྱལ་པོ་དེའང་ཤེས་རབ་ཀྱི་ཕ་རོལ་དུ་ཕྱིན་པས་ཆོས་རྣམས་མཐོང་མོད་ཀྱི། མངོན་པར་ཞེན་པའི་ཉེས་པའང་བསྲུང་ངོ་། །ཤེས་རབ་ཀྱི་ཕ་རོལ་
དུ་ཕྱིན་པ་གཞན་ལའང་སྟོན་མོད་ཀྱི། མངོན་པར་ཞེན་པའི་ཉེས་པ་ལས་ཀྱང་ཟློག་པར་བྱེད་དོ། །ཤེས་རབ་ཀྱི་ཕ་རོལ་དུ་ཕྱིན་པས་སངས་རྒྱས་ཀྱི་ཞིང་ཚད་མེད་པར་སངས་རྒྱས་ཀྱི་བྱ་བ་བྱེད་མོད་ཀྱི། དེས་སེམས་ཅན་དེ་དག་དང་། སངས་རྒྱས་དེ་དག་ཏུ་འཛིན་པའང་མེད་དོ། །
འཇམ་དཔལ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དགེ་སློང་སྤྲིན་གྱི་རྒྱལ་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་
ན་དགེ་སློང་སྤྲིན་གྱི་རྒྱལ་པོ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་ཐབས་མཁས་པ་གང་དང་ལྡན་པས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་ཐབས་མཁས་པ་དེ་དང་ལྡན་པར་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་
ཀྱི་ཕ་རོལ་དུ་ཕྱིན་པ་ལ་སྤྱད་པར་བྱའོ། །དེ་ལྟ་བུའི་ཐབས་མཁས་པ་དང་ལྡན་པའི་བྱང་ཆུབ་སེམས་དཔའ་ནི་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་སྦྱོང་ངོ་། །སངས་རྒྱས་ཀྱི་ཞིང་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། 
བརྗོད་དུ་མེད་པ་ཡོངས་སུ་སྦྱོང་ངོ་། །དེ་ནས་ཡང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བྱང་ཆུབ་

49-1-232a

སེམས་དཔའི་ཏིང་ངེ་འཛིན་ཞི་བ་ཞེས་བྱ་བ་བསྒོམས་ཏེ། རབ་ཏུ་གོམས་པར་བྱས། ལམ་དུ་བྱས། རྟེན་དུ་བྱས། ནན་ཏན་དུ་བྱས། རབ་ཏུ་འདྲིས་པར་བྱས། ལེགས་པར་བརྩམས་ཤིང་རབ་ཏུ་རྫོགས་པར་བྱས་ཏེ། དེས་སྦྱིན་
པའི་ཕ་རོལ་དུ་ཕྱིན་པ་ཞི་བ་དང་རབ་ཏུ་ཞི་བར་རྟོགས་སོ། །ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང་། བཟོད་པའི་ཕ་རོལ་དུ་ཕྱིན་པ་དང་། བརྩོན་འགྲུས་ཀྱི་ཕ་རོལ་དུ་ཕྱིན་པ་དང་། བསམ་གཏན་གྱི་ཕ་རོལ་དུ་ཕྱིན་པ་དང་། ཤེས་རབ་ཀྱི་ཕ་རོལ་དུ་ཕྱིན་
པ་ཡང་ཞི་བ་དང་རབ་ཏུ་ཞི་བར་རྟོགས་སོ། །འདི་ལྟ་སྟེ། དཔེར་ན་འདུས་མ་བྱས་ཀྱི་ཁམས་ཞི་བ་དང་རབ་ཏུ་ཞི་བ་དེ་བཞིན་དུ་ཕ་རོལ་ཏུ་ཕྱིན་པ་དྲུག་ཀྱང་ཞི་བ་དང་རབ་ཏུ་ཞི་བར་རྟོགས་སོ། །འདི་ལྟ་སྟེ། དཔེར་ན་འདུས་མ་བྱས་ཀྱི་ཁམས་མི་སྐྱེ་མི་འགག་པ་དེ་
བཞིན་དུ་ཕ་རོལ་དུ་ཕྱིན་པ་དྲུག་ཀྱང་མི་སྐྱེ་མི་འགག་གོ། །འདི་ལྟ་སྟེ། དཔེར་ན་བདག་ཐམས་ཅད་ཀྱི་ཐམས་ཅད་དུ་མི་དམིགས་པ་དེ་བཞིན་དུ་ཕ་རོལ་དུ་ཕྱིན་པ་དྲུག་ཀྱང་ཐམས་ཅད་ཀྱི་ཐམས་ཅད་དུ་མི་དམིགས་ཏེ། ཕ་རོལ་དུ་ཕྱིན་པ་དྲུག་ཇི་ལྟ་བ་དེ་བཞིན་དུ་
ཆོས་ཐམས་ཅད་ཀྱང་མི་སྐྱེ་མི་འགག་གོ། །ཆོས་ཐམས་ཅད་ནི་ཞི་བ་སྟེ་ཞི་བ་དེ་ཡང་མི་དམིགས་སོ། གང་གི་ཞི་བ་དེ་ཡང་མི་དམིགས་སོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད། བསམ་གྱིས་མི་ཁྱབ། མཚུངས་པ་མེད། 
གཞལ་དུ་མེད། བརྗོད་དུ་མེད་པའི་ཕ་རོལ་གྱི་ཡང་ཆེས་ཕ་རོལ་ན། ཉི་མ་སྣང་བ་ཞེས་བྱ་བའི་བསྐལ་པ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་
མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཐམས་ཅད་ཟིལ་གྱིས་གནོན་པ་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་དེའི་རིམ་
གྲོ་བྱེད་པ་དགེ་སློང་ཞི་བའི་བློ་གྲོས་ཞེས་བྱ་བ་ཞིག་ཡོད་དེ། དེས་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་ལ་ལོ་བྱེ་བ་ཕྲག་བརྒྱད་བཅུར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་ཕྱིར་ཡིད་དུ་འོང་བས་རིམ་གྲོ་བྱས་ཏེ། ཡིད་

49-1-232b

དུ་མི་འོང་བས་མ་ཡིན་ནོ། །དེ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་དེའི་གན་དུ་སོང་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཞི་བ་སངས་རྒྱས་ཀྱི་ས་ལ་སློབ་པར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་
པོས་གང་ལ་བརྩོན་པར་བགྱི། དེ་སྐད་ཅེས་གསོལ་པ་དང་། དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པས་དགེ་སློང་ཞི་བའི་བློ་གྲོས་ལ་འདི་སྐད་ཅེས་བཀའ་སྩལ་ཏོ། །དགེ་སློང་ཞི་བའི་བློ་གྲོས་སངས་རྒྱས་ཀྱི་ས་ལ་སློབ་པར་འདོད་པའི་བྱང་ཆུབ་སེམས་
དཔའ་སེམས་དཔའ་ཆེན་པོས་སྦྱིན་པའི་ཕ་རོལ་དུ་ཕྱིན་པ་ལ་བརྩོན་པར་བྱའོ། །དགེ་སློང་ཇི་ལྟར་སྤྱད་པས་བདག་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་འགྱུར་ཞེས་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ངོ་བོ་ཉིད་མི་དམིགས་
པར་བྱ་བའི་སྦྱིན་པ་མི་སྦྱིན་པར་ནི་མི་བྱའོ། །སྦྱིན་གནས་ཀྱི་ངོ་བོ་ཉིད་མི་དམིགས་པར་བྱའི་སྦྱིན་གནས་མི་འཚལ་བར་ནི་མི་བྱའོ། །སྦྱིན་བདག་གི་ངོ་བོ་ཉིད་དམིགས་པར་མི་བྱའི་སྦྱིན་བདག་ཏུ་མི་འགྱུར་བར་ནི་མི་བྱའོ། །དེས་ལས་ཀྱི་རང་བཞིན་མི་དམིགས་
པར་བྱའི་ལས་བདག་གིར་བྱ་བ་དང་འགལ་བར་ནི་མི་བྱའོ། །བསླབ་པའི་ངོ་བོ་ཉིད་མི་དམིགས་པར་བྱའི་སངས་རྒྱས་ཀྱི་ཡེ་ཤེས་ལ་མི་བསླབ་པར་ནི་མི་བྱའོ། །སྦྱིན་པ་དེ་ཡང་བྱང་ཆུབ་ཏུ་བསྔོ་བར་བྱ་སྟེ། བྱང་ཆུབ་ཀྱི་ངོ་བོ་ཉིད་དམིགས་པར་མི་བྱ། བསྔོ་
བའི་ངོ་བོ་ཉིད་ཀྱང་དམིགས་པར་མི་བྱ། དགེ་བའི་རྩ་བ་རྣམས་མི་བསྔོ་བར་ཡང་མི་བྱའོ། །དགེ་སློང་འདི་ལྟ་སྟེ། དཔེར་ན་ཆུའི་ནང་ན་ཟླ་བའི་གཟུགས་བརྙན་སྣང་བ་དེ་ཟླ་བར་ཡང་ཤེས་པར་མི་བྱ། དེ་ཟླ་བ་མ་ཡིན་པར་ཡང་ཤེས་པར་མི་བྱ་བ་དེ་བཞིན་དུ་བྱ་བ་
ཐམས་ཅད་ལ་ཡང་ཤེས་པར་བྱའོ། །བྱ་བ་དེ་ལྟ་བུས་སྦྱིན་པ་བྱིན་ན་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་འགྱུར་རོ། །དེ་ནས་དགེ་སློང་ཞི་བའི་བློ་གྲོས་དེ་ལ་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པས་སྦྱིན་པ་དེ་ལྟ་བུས་སྦྱིན་པའི་ཕ་རོལ་དུ་ཕྱིན་པ་བསྟན་པས་
སྦྱིན་པ་ཡོངས་སུ་བསྔོ་བའི་ཡེ་ཤེས་དཔག་ཏུ་མེད་པ་དང་ལྡན་པར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་གང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་དེས་སྦྱིན་པ་བསྔོ་བའི་སྣང་བ་བསམ་གྱིས་མི་ཁྱབ་པ་རྙེད་པར་བྱ་བའི་

49-1-233a

ཕྱིར་གདམས་པ་དགེ་སློང་ཞི་བའི་བློ་གྲོས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་ཚེ་དེའི་དུས་
ན་དགེ་སློང་ཞི་བའི་བློ་གྲོས་ཞེས་བྱ་བར་གྱུར་ཏོ། །དེ་ཡང་དེ་ཕྱིན་ཆད་བསྐལ་པ་བརྗོད་དུ་མེད་པར་ནམ་ཡང་སྦྱིན་པའི་ཕ་རོལ་དུ་ཕྱིན་པ་བསྔོ་བ་བསམ་གྱིས་མི་ཁྱབ་པ་དང་བྲལ་བར་མ་གྱུར། བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་རྟག་ཏུ་
རྒྱུན་མི་འཆད་པར་བྱང་ཆུབ་སེམས་དཔའི་ཡོན་ཏན་གཞན་ཚད་མེད་པ་དང་མ་བྲལ་བར་གྱུར་ཏོ། །དེ་ཉིད་དེའི་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་པ་དང་། སངས་རྒྱས་ཀྱི་ཞིང་གྲངས་མེད་པ་ཡོངས་སུ་དག་པ་ནས་སངས་རྒྱས་ཀྱི་ཞིང་བརྗོད་
དུ་མེད་པ་ཡོངས་སུ་དག་པའི་རྒྱུར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སངས་རྒྱས་ཀྱི་ཞིང་དཔག་ཏུ་མེད་པ་ནས་བརྗོད་དུ་མེད་པའི་བར་དུ་ཡོངས་སུ་སྦྱོང་བར་འདོད་པས་དེ་ལྟར་སྦྱིན་པ་དང་། སྦྱིན་པའི་ཕ་རོལ་དུ་
ཕྱིན་པ་ལ་བརྩོན་པར་བྱའོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གཟི་བརྗིད་
དཔག་ཏུ་མེད་ཅེས་བྱ་བ་འཇིག་རྟེན་དུ་བྱུང་སྟེ། འཇམ་དཔལ་དེ་བཞིན་གཤེགས་པ་གཟི་བརྗིད་དཔག་མེད་ཀྱི་གསུང་རབ་ལ་དགེ་སློང་རབ་ཏུ་ཞི་བའི་བློ་གྲོས་ཞེས་བྱ་བ་སངས་རྒྱས་ཁྲག་ཁྲིག་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པ་ཞིག་བྱུང་སྟེ། དེ་ནས་དགེ་
སློང་རབ་ཏུ་ཞི་བའི་བློ་གྲོས་དེ་བཅོམ་ལྡན་འདས་དེ་བཞིན་གཤེགས་པ་གཟི་བརྗིད་དཔག་མེད་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་དགེ་སློང་

49-1-233b

རབ་ཏུ་ཞི་བའི་བློ་གྲོས་དེས་དེ་བཞིན་གཤེགས་པ་གཟི་བརྗིད་དཔག་མེད་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་བྱང་ཆུབ་ཀྱི་ཕྱིར་སྤྱོད་པས་སྦྱིན་པའི་ཕ་རོལ་ཏུ་ཕྱིན་པ་ལ་ཇི་ལྟར་སྤྱད་པར་བགྱི། བྱང་ཆུབ་སེམས་དཔའ་སྦྱིན་པའི་
ཕ་རོལ་དུ་ཕྱིན་པ་ལ་སྤྱོད་པའི་སྦྱིན་པའི་ཕ་རོལ་དུ་ཕྱིན་པ་ཇི་ལྟར་ཡོངས་སུ་དག་པར་འགྱུར། དེ་སྐད་ཅེས་གསོལ་པ་དང་། དེ་བཞིན་གཤེགས་པ་གཟི་བརྗིད་དཔག་མེད་ཀྱིས་དགེ་སློང་རབ་ཏུ་ཞི་བའི་བློ་གྲོས་ལ་འདི་སྐད་ཅེས་བཀའ་སྩལ་ཏོ། །རབ་ཏུ་ཞི་བའི་
བློ་གྲོས་བྱང་ཆུབ་ཀྱི་ཕྱིར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་དངོས་པོ་མེད་པའི་ངོ་བོ་ཉིད་དུ་ཁོང་དུ་ཆུད་པར་བྱ། སྦྱིན་པའི་ངོ་བོ་ཉིད་མེད་པར་ཁོང་དུ་ཆུད་པར་བྱ། ལེན་པའི་ངོ་བོ་ཉིད་མེད་པར་ཁོང་དུ་ཆུད་པར་བྱ། སྦྱིན་བདག་ངོ་
བོ་ཉིད་མེད་པར་ཁོང་དུ་ཆུད་པར་བྱ། སྦྱིན་གནས་ངོ་བོ་ཉིད་མེད་པར་ཁོང་དུ་ཆུད་པར་བྱ། སྦྱིན་གནས་མཆོད་པ་ངོ་བོ་ཉིད་མེད་པར་ཁོང་དུ་ཆུད་པར་བྱ། བསྔོ་བ་ངོ་བོ་ཉིད་མེད་པར་ཁོང་དུ་ཆུད་པར་བྱ། གང་བསྔོ་བ་དེ་ཡང་ངོ་བོ་ཉིད་མེད་པར་ཁོང་དུ་ཆུད་པར་བྱ། གང་དུ་
བསྔོ་བ་དང་གང་གིས་བསྔོ་བ་དེ་ཡང་ངོ་བོ་ཉིད་མེད་པར་ཁོང་དུ་ཆུད་པར་བྱའོ། །དེ་ཅིའི་ཕྱིར་ཞེ་ན། སྦྱིན་པ་ནི་སྦྱིན་པའི་ངོ་བོ་ཉིད་ཀྱིས་སྟོང་ངོ་། །ལེན་པ་ནི་ལེན་པའི་ངོ་བོ་ཉིད་ཀྱིས་སྟོང་ངོ་། །སྦྱིན་གནས་ཀྱང་སྦྱིན་གནས་ཀྱི་ངོ་བོ་ཉིད་ཀྱིས་སྟོང་ངོ་། །སྦྱིན་པའི་
འབྲས་བུ་ཡང་སྦྱིན་པའི་འབྲས་བུའི་ངོ་བོ་ཉིད་ཀྱིས་སྟོང་ངོ་། །བསྔོ་བ་ཡང་བསྔོ་བའི་ངོ་བོ་ཉིད་ཀྱིས་སྟོང་ངོ་། །བྱང་ཆུབ་ཀྱང་བྱང་ཆུབ་ཀྱི་ངོ་བོ་ཉིད་ཀྱིས་སྟོང་ངོ་། །དེ་ལྟར་སྟོང་པ་ཉིད་ལ་མོས་པ་ནི་བྱ་བ་ཚད་མེད་པའི་བསམ་པས་སྦྱིན་པའི་ཕ་རོལ་དུ་ཕྱིན་པ་ཡོངས་
སུ་དག་པར་འགྱུར་ཏེ། སྦྱིན་པའི་ཡང་ཕ་རོལ་དུ་ཕྱིན་པའི་མིང་འཐོབ་ཅིང་འབགས་པ་མེད་པར་འགྱུར་རོ། །རབ་ཏུ་ཞི་བའི་བློ་གྲོས་འདི་ལྟ་སྟེ། དཔེར་ན་སྒྱུ་མ་མཁན་གྱིས་བུད་མེད་རིན་པོ་ཆེ་མངོན་པར་སྤྲུལ་ན། དེ་ཡང་བུད་མེད་རིན་པོ་ཆེའི་གྲངས་སུ་འགྲོ་མོད་ཀྱི། 
དེ་ལ་བུད་མེད་རིན་པོ་ཆེའི་མིང་མ་དམིགས་པ་དེ་བཞིན་དུ། རབ་ཏུ་ཞི་བའི་བློ་གྲོས་སྦྱིན་པ་ལ་སྦྱིན་པའི་ངོ་བོ་ཉིད་མི་དམིགས་མོད་ཀྱི། སྦྱིན་པའི་ཕ་རོལ་དུ་ཕྱིན་པ་ཞེས་བྱ་བའི་གྲངས་སུ་ཡང་འགྲོ། ལེན་པ་ངོ་བོ་ཉིད་ཀྱིས་མི་དམིགས་མོད་ཀྱི་ལེན་པ་ཞེས་བྱ་བའི་

49-1-234a

གྲངས་སུ་ཡང་འགྲོ། སྦྱིན་བདག་ངོ་བོ་ཉིད་ཀྱང་མི་དམིགས་མོད་ཀྱི་སྦྱིན་བདག་ཅེས་བྱ་བའི་གྲངས་སུ་ཡང་འགྲོ། སྦྱིན་པའི་འབྲས་བུ་ཡང་ངོ་བོ་ཉིད་ཀྱིས་མི་དམིགས་མོད་ཀྱི། སྦྱིན་པའི་འབྲས་བུ་ཞེས་བྱ་བའི་གྲངས་སུ་ཡང་འགྲོ། བྱང་
ཆུབ་ཀྱང་ངོ་བོ་ཉིད་ཀྱིས་མི་དམིགས་མོད་ཀྱི། བྱང་ཆུབ་ཅེས་བྱ་བའི་གྲངས་སུ་ཡང་འགྲོ། བྱང་ཆུབ་སེམས་དཔའ་ངོ་བོ་ཉིད་ཀྱིས་མི་དམིགས་མོད་ཀྱི། བྱང་ཆུབ་སེམས་དཔའ་ཞེས་བྱ་བའི་གྲངས་སུ་ཡང་འགྲོའོ། །རབ་ཏུ་ཞི་བའི་བློ་གྲོས་འདི་ལྟར་བྱང་
ཆུབ་སེམས་དཔའ་ནི་བྱ་བའི་ངོ་བོ་ཉིད་མི་དམིགས་མོད་ཀྱི་བྱ་བ་ཡང་ཆུད་མི་གསོན་ཏེ། དེ་ཙམ་གྱིས་དེའི་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་འགྱུར་རོ། །དེ་ནས་དགེ་སློང་རབ་ཏུ་ཞི་བའི་བློ་གྲོས་དེ་བཞིན་གཤེགས་པ་གཟི་བརྗིད་དཔག་མེད་
ཀྱིས་དེ་ལྟ་བུའི་ཚུལ་གྱིས་སྦྱིན་པའི་ཕ་རོལ་དུ་ཕྱིན་པ་འཛིན་དུ་བཅུག་ནས་ཞི་བའི་ས་ཡོངས་སུ་འཛིན་པ་ཐོབ་སྟེ། དགེ་བའི་རྩ་བ་དེས་ནམ་ཡང་ཞི་བའི་ས་ལ་མི་སྤྱོད་དོ། །གང་མྱ་ངན་ལས་འདས་པའི་ཞི་བ་དེ་སྦྱིན་པའི་ཞི་བའོ་ཞེས་དེ་ལྟར་མཐོང་བས་ཞི་
བའི་ཆོས་རྣམས་མངོན་དུ་གྱུར་ཏོ། །འཇམ་དཔལ་དེའི་ཚེ་དེའི་དུས་ན་དགེ་སློང་རབ་ཏུ་ཞི་བའི་བློ་གྲོས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་དོགས་ཤིང་ཡིད་གཉིས་དང་ཐེ་ཚོམ་ཟ་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་
བཞིན་གཤེགས་པ་དོན་ཐམས་ཅད་གྲུབ་པ་དེ། དེའི་ཚེ་དེའི་དུས་ན་དགེ་སློང་རབ་ཏུ་ཞི་བའི་བློ་གྲོས་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་མྱ་ངན་ལས་འདས་པའི་མཉམ་པ་ཉིད་ཀྱིས་སྦྱིན་པ་མཉམ་པ་
ཉིད་དུ་གྱུར་པར་སྦྱིན་པ་སྦྱིན་པར་བྱའོ། །དེ་ལྟར་ན་དེའི་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པ་ཡིན་ནོ། །སྦྱིན་པའི་ཕ་རོལ་དུ་ཕྱིན་པ་ལ་བསླབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་གནས་པར་
འགྱུར་རོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་སྦྱིན་པ་དང་ཚུལ་ཁྲིམས་མཚུངས་སོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་

49-1-234b

དེའི་ཕ་རོལ་གྱི་ཡང་ཆེས་ཕ་རོལ་དེའི་ཚེ་དེའི་དུས་ན་རིན་པོ་ཆེ་དག་པ་ཞེས་བྱ་བའི་བསྐལ་པ་བྱུང་སྟེ། འཇམ་དཔལ་རིན་པོ་ཆེ་དག་པའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་
སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་བརྩོན་འགྲུས་དཔེ་མེད་ཅེས་བྱ་བ་བྱུང་ངོ་། །དེའི་ཚེ་དེའི་དུས་ན་བྲམ་ཟེའི་རིགས་
ཤིང་ས་ལ་ཆེན་པོ་ལྟ་བུ་ཁྱབ་འཇུག་གིས་བྱིན་ཞེས་བྱ་བ་ཞིག་བྱུང་སྟེ། སངས་རྒྱས་བྱེ་བ་ཁྲག་ཁྲིག་དཔག་ཏུ་མེད་པ་རྣམས་ལ་བསྙེན་བཀུར་བྱས་ཤིང་དགེ་བའི་རྩ་བ་བསྐྱེད་པ། རིགས་ཆེན་པོར་སྐྱེས་པ། བྲམ་ཟེའི་གསང་ཚིག་ཁ་ཏོན་དུ་འདོན་ཅིང་བཟུང་བ་
རིག་བྱེད་གསུམ་གྱི་ཕ་རོལ་དུ་སོན་པ། སྒྲ་ངེས་པར་སྦྱོར་བ་དང་། ཤེས་གསལ་དང་བཅས་པ་དང་། ཡི་གེ་རབ་ཏུ་དབྱེ་བ་དང་བཅས་པ་དང་། སྔོན་བྱུང་བའི་གཏམ་ལྔ་པོ་རྣམས་དང་། བརྡ་སྤྲོད་པ་དང་། འཇིག་རྟེན་རྒྱང་པན་པ་དང་། མཆོད་སྦྱིན་གྱི་རྒྱུད་
དང་། བུད་མེད་དང་། སྐྱེས་པའི་མཚན་ལ་མཆོག་ཏུ་མཁས་པར་གྱུར་པ། རང་གི་རིགས་ཀྱི་འདུལ་བ་ལ་རྗེས་སུ་གནང་བ། ཡོངས་སུ་གྲགས་པ། རབ་ཏུ་བྱུང་བའི་སློབ་དཔོན་དུ་གྱུར་པ་ཞིག་ཡོད་དེ། བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཁྱབ་འཇུག་
གིས་བྱིན་དེས་སངས་རྒྱས་བརྩོན་འགྲུས་དཔེ་མེད་ཅེས་བྱ་བ་འཇིག་རྟེན་དུ་འབྱུང་ངོ་ཞེས་ཐོས་ནས་དེ་འདི་སྙམ་དུ་སེམས་ཏེ། བདག་ཅག་གི་གསང་ཚིག་ལས་བྱུང་བ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་པ་ནི་འགྲོ་བ་གཉིས་སུ་འགྱུར་ཏེ། གསུམ་
དུ་འགྱུར་བ་མེད་དོ། །གལ་ཏེ་ཁྱིམ་ན་གནས་ན་ནི་འཁོར་ལོས་སྒྱུར་བ་གླིང་བཞི་ལས་ཆེས་རྣམ་པར་རྒྱལ་ཞིང་ཆོས་ཅན་ཆོས་ཀྱི་རྒྱལ་པོ་སྟེ་རིན་པོ་ཆེ་བདུན་དང་ལྡན་ནོ། །དེ་ལ་རིན་པོ་ཆེ་འདི་བདུན་འབྱུང་བ་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། 
རྟ་རིན་པོ་ཆེ་དང་། བུད་མེད་རིན་པོ་ཆེ་དང་། ནོར་བུ་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་དང་། རིན་པོ་ཆེ་དེ་བདུན་ནོ། །དེ་ལ་བུ་སྟོང་ཚང་བ་ཡོད་དེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་

49-1-235a

འཇོམས་པ་རྣམས་སོ། །དེས་གླིང་བཞི་པའི་འཇིག་རྟེན་ཆད་པ་དང་། མཚོན་གྱིས་མ་ཡིན་པར་ཆོས་ཀྱིས་ཕབ་སྟེ་རབ་ཏུ་གནས་སོ། །གལ་ཏེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་
ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་
བཅོམ་ལྡན་འདས་སུ་འགྱུར་རོ་སྙམ་ནས་དེ་འདི་སྙམ་དུ་སེམས་ཏེ་འདི་འདྲ་བའི་སྐྱེས་བུ་ཆེན་པོ་དག་འཇིག་རྟེན་ན་མཐོང་བ་རྙེད་པར་དཀའ་སྟེ། བདག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་འགྲུས་དཔེ་མེད་ག་ལ་བ་
དེར་འགྲོའོ། །བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་དཔེ་མེད་དེ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་ནམ་འོན་ཏེ་མི་ལྡན་པའི་བར་དུ་ཤེས་པར་བྱའོ། །དེ་སྟེ་ལྡན་ན་ནི་རྫོགས་པའི་སངས་རྒྱས་སུ་གདོན་མི་ཟ་བར་
རིག་པར་བྱའོ། །ཇི་སྟེ་མི་ལྡན་ན་ཡང་དེ་ལྟ་བུའི་སྐྱེས་བུ་དམ་པ་དག་མཐོང་བའང་ལེགས་སོ་སྙམ་མོ། །དེ་ནས་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཁྱབ་འཇུག་གིས་བྱིན་བྲམ་ཟེའི་བུ་སྟོང་ཕྲག་དྲུག་བཅུས་ཡོངས་སུ་བསྐོར་ཅིང་མདུན་དུ་བདར་ནས། 
དེ་བཞིན་གཤེགས་པ་བརྩོན་འགྲུས་དཔེ་མེད་དེ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་དཔེ་མེད་དེའི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འདུག་ནས། 
བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཁྱབ་འཇུག་གིས་བྱིན་དེས་དེ་བཞིན་གཤེགས་པ་བརྩོན་འགྲུས་དཔེ་མེད་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ལ་ཡང་དག་པར་ཞུགས་པ། 
ཐེག་པ་དཔག་ཏུ་མ་མཆིས་པ་ལ་ཡང་དག་པར་ཞུགས་པ། ཐེག་པ་གྲངས་མ་མཆིས། བསམ་གྱིས་མི་ཁྱབ། མཚུངས་པ་མ་མཆིས། གཞལ་དུ་མ་མཆིས། བརྗོད་དུ་མ་མཆིས་པ་ལ་ཡང་དག་པར་ཞུགས་པས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཇི་ལྟར་ཡོངས་སུ་

49-1-235b

སྦྱང་བར་བགྱི། བཅོམ་ལྡན་འདས་ཇི་ལྟར་བསླབས་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཡོངས་སུ་སྦྱོང་བར་བགྱིད། ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཡོངས་སུ་དག་ན་བྱང་ཆུབ་སེམས་དཔའ་སེམས་དཔའ་
ཆེན་པོས་ཅི་ཡོངས་སུ་སྦྱངས་པ་ལགས། དེ་སྐད་ཅེས་གསོལ་པ་དང་། དེ་བཞིན་གཤེགས་པ་བརྩོན་འགྲུས་དཔེ་མེད་དེས་ཁྱབ་འཇུག་གིས་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་དེ་ལ་འདི་སྐད་ཅེས་བཀའ་སྩལ་ཏོ། །བྲམ་ཟེ་ཚུལ་ཁྲིམས་ཀྱི་ཕ་རོལ་དུ་ཕྱིན་པ་
ལ་སློབ་པར་འདོད་པ་དང་། ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཡོངས་སུ་སྦྱོང་བར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་སྲོག་གཅོད་པ་སྤང་བར་བྱ་སྟེ། དེས་སྲོག་གཅོད་པ་མི་དམིགས་པར་བྱའོ། །དེས་མ་བྱིན་པར་ལེན་པའང་སྤང་བར་བྱ་སྟེ། 
མ་བྱིན་པར་ལེན་པ་མི་དམིགས་པར་བྱའོ། །འདོད་པ་ལ་ལོག་པར་གཡེམ་པ་ཡང་སྤང་བར་བྱ་སྟེ། འདོད་པ་ལ་ལོག་པར་གཡེམ་པ་མི་དམིགས་པར་བྱའོ། །བརྫུན་དུ་སྨྲ་བ་ཡང་སྤང་བར་བྱ་སྟེ། བརྫུན་དུ་སྨྲ་བ་མི་དམིགས་པར་བྱའོ། །ཕྲ་མའི་ཚིག་ཀྱང་སྤང་བར་བྱ་སྟེ། 
ཕྲ་མའི་ཚིག་ཀྱང་མི་དམིགས་པར་བྱའོ། །ངག་རྩུབ་པོ་ཡང་སྤང་བར་བྱ་སྟེ། ངག་རྩུབ་པོ་ཡང་མི་དམིགས་པར་བྱའོ། །ཚིག་ཀྱལ་པ་ཡང་སྤང་བར་བྱ་སྟེ། ཚིག་ཀྱལ་པ་ཡང་མི་དམིགས་པར་བྱའོ། །བརྣབ་སེམས་ཀྱང་སྤང་བར་བྱ་སྟེ། བརྣབ་སེམས་ཀྱང་མི་དམིགས་པར་བྱའོ། །
གནོད་སེམས་ཀྱང་སྤང་བར་བྱ་སྟེ། གནོད་སེམས་ཀྱང་མི་དམིགས་པར་བྱའོ། །ཡང་དག་པར་ལྟ་བ་ཅན་དུ་ཡང་བྱ་སྟེ་ཡང་དག་པར་ལྟ་བ་མི་དམིགས་པར་བྱའོ། །ཆོས་ཇི་སྙེད་པ་དེ་ཐམས་ཅད་ཀྱང་ཤེས་པར་བྱ་སྟེ། དེ་དག་མི་དམིགས་པར་བྱ་ཞིང་མངོན་པར་མི་ཞེན་
པར་བྱ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བསླབ་པར་བྱའོ། །དེ་ལྟར་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཡོངས་སུ་དག་པས་བྱང་ཆུབ་སེམས་དཔའ་རབ་ཏུ་ཞི་བའི་ས་ལ་སྣང་བ་ཐོབ་པར་འགྱུར་ཏེ། 
ཆོས་གང་ཡང་མི་འཛིན་ཅིང་ཆོས་གང་ལ་ཡང་མངོན་པར་མི་ཞེན་ཏོ། །ཆོས་གང་ལ་ཡང་དམིགས་པའི་ཕྱིར་ཉེ་བར་གནས་པ་མ་ཡིན་ནོ། །གང་དེ་ལྟར་མཐོང་བ་དེས་ནི་རྟེན་ཅིང་འབྲེལ་བར་འབྱུང་བ་མཐོང་ངོ་། །གང་གིས་རྟེན་ཅིང་འབྲེལ་བར་འབྱུང་

49-1-236a

བ་མཐོང་བ་དེས་ནི་ཆོས་གང་ཡང་མི་མཐོང་ངོ་། །གང་གིས་ཆོས་གང་ཡང་མི་མཐོང་བ་དེ་ཅི་ཡང་མི་ཤེས་སོ། །གང་ཅི་ཡང་མི་ཤེས་པ་དེ་བྱང་ཆུབ་ཀྱི་ཕྱིར་སྤྱོད་དོ། །གང་བྱང་ཆུབ་ཀྱི་ཕྱིར་སྤྱོད་པ་དེ་ཅི་ལའང་མི་སྤྱོད་དོ། །གང་ཅི་ལའང་
མི་སྤྱོད་པ་དེ་བྱང་ཆུབ་མངོན་པར་རྫོགས་པར་འཚང་རྒྱའོ། །གང་བྱང་ཆུབ་མངོན་པར་རྫོགས་པར་འཚང་རྒྱ་བ་དེ་ཅི་འང་འཚང་མི་རྒྱ་སྟེ། གང་ཅིའང་འཚང་མི་རྒྱ་བ་དེ་ནི་ཚུལ་ཁྲིམས་ཡོངས་སུ་དག་པ་ཞེས་བྱའོ། །གང་དེ་ལྟར་ངེས་པ་མེད་
པའི་ཆོས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་དེ་ནི་ཚུལ་ཁྲིམས་ཡོངས་སུ་དག་པ་ཞེས་བྱའོ། །གང་ཚུལ་ཁྲིམས་ཡོངས་སུ་དག་པ་དེས་ནི་ཆོས་ཉིད་མཐོང་ངོ་། །གང་གིས་ཆོས་ཉིད་མཐོང་བ་དེ་ནི་ཞི་བ་ཞེས་བྱའོ། །རབ་ཏུ་ཞི་བ་ཞེས་བྱའོ། །
ཉེ་བར་ཞི་བ་ཞེས་བྱའོ། །ཞི་གནས་ཀྱི་མཆོག་ཐོབ་པ་ཞེས་བྱའོ། །ཞི་གནས་དམ་པ་ཐོབ་པ་ཞེས་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་དཔེ་མེད་དེས་རབ་ཏུ་ཞི་བའི་ས་བསྟན་པ་ཁྱབ་འཇུག་གིས་བྱིན་བྲམ་ཟེའི་རིགས་
ཤིང་ས་ལ་ཆེན་པོ་ལྟ་བུས་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་དཔེ་མེད་དེ་ལ་ཞི་བ་དང་མཐུན་པའི་ཚིགས་སུ་བཅད་པ་དག་གིས་མངོན་པར་བསྟོད་དོ། །ཁྱོད་ཀྱིས་འདོད་ཆགས་དེ་བཞིན་ཞེ་སྡང་ཞི། །ཁྱོད་ནི་གཏི་མུག་བྲལ་
ཞིང་ཟག་པའང་བས། །རྣམ་པར་འདྲེན་པ་ཞི་བའི་ས་ལ་བཞུགས། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །ང་རྒྱལ་ཞི་ཞིང་དྲེགས་དང་རྣམ་པར་བྲལ། །དྲི་མེད་ཉི་མ་བཞིན་དུ་སྣང་མཛད་དེ། །རྟག་པར་རབ་ཏུ་ཞི་བའི་ཆོས་རྣམས་
སྟོན། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །གང་ན་ཉོན་མོངས་རབ་ཏུ་མི་སྐྱེ་བ། །ཞི་བའི་ས་ལ་བཅོམ་ལྡན་རབ་བསྟེན་ཅིང་། །ཞི་བའི་ས་ལ་སྲས་རྣམས་གནས་སུ་བཙུད། །སེམས་ཞི་བདེ་གཤེགས་ཁྱོད་ལ་ཕྱག་འཚལ་
ལོ། །གཟུགས་རྣམས་ཞི་བར་བཅོམ་ལྡན་རབ་ཏུ་གསུང་། །དེ་བཞིན་ཚོར་བ་འདུ་ཤེས་སེམས་པ་རྣམས། །རྣམ་པར་ཤེས་པའི་རྒྱུད་ཀྱང་ཞི་བར་གསུངས། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །འདུས་བྱས་འདི་ཞི་འདུས་མ་

49-1-236b

བྱས་པའང་ཞི། །ཁྱོད་ཀྱི་སྤྱོད་ཡུལ་ཆོ་ག་དེ་བཞིན་ཞི། །བརྩོན་འགྲུས་ཞི་ཞིང་སྤྱོད་པའང་དེ་བཞིན་ཏེ། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །སངས་རྒྱས་ཞི་བའི་ཡུལ་རྣམས་རབ་ཏུ་མཁྱེན། །དེ་ནི་སྲོག་ཆགས་ཐ་མའི་ས་མ་ལགས། །འགྲོ་
བ་དེར་ནི་ཉན་ཐོས་མཁས་མི་མཆི། །རང་རྒྱལ་དག་གིས་དེ་ནི་ཡོངས་མི་རྟོགས། །གང་ཟག་མཆོག་ཁྱོད་འགྲོ་བ་གང་མཁྱེན་པ། །དེ་ནས་ས་དང་ཆུ་དང་རླུང་མ་མཆིས། །དེར་འབྱུང་རྣམས་ཀྱི་འགྲོ་བ་མ་མཆིས་བཤད། །དེ་ན་ཉི་ཟླ་རྣམས་ཀྱང་འགྲོ་མ་
མཆིས། །དེ་མཁའ་མ་ལགས་བར་དང་ས་མ་ལགས། །ཐམས་ཅད་དངོས་པོ་མ་མཆིས་འདི་ཡང་བཤད། །སངས་རྒྱས་ཐམས་ཅད་སྤྱོད་ཡུལ་དེ་བཞིན་ཏེ། །བདེ་བར་གཤེགས་པས་རབ་ཏུ་ཞི་བ་བཤད། །ཞི་བ་ཐོབ་མཛད་ཞི་འགྲོ་བླ་ན་མེད། །
རབ་ཞི་དྲི་མ་ཐམས་ཅད་འཁྲུ་བ་སྟེ། །གང་འདྲིར་འཁྲུས་བགྱིད་མྱ་ངན་ཡོང་འདའ་ཞིང་། །རྒྱལ་བ་སྐྱོབ་པ་ཀུན་གྱི་སྤྱོད་ཡུལ་མཆི། །འགྲོ་བ་རྣམས་ཀྱི་བསམ་པ་ཀུན་མཁྱེན་ཅིང་། །དེ་དག་སྤྱོད་པ་བདེ་གཤེགས་རབ་མཁྱེན་ཏེ། །ཆོས་འདི་རྣམས་ནི་རང་
བཞིན་ཞི་བར་མཁྱེན། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །ཞི་ལ་བགྱེས་ཤིང་ཡིད་ཞི་དེ་བཞིན་གཤེགས། །ཞུགས་ལ་ཆབ་བཞིན་དུ་ནི་བསིལ་བར་གྱུར། །ཞི་བའི་ས་ལ་འགྲོ་བ་རབ་མཛུད་པ། །སེམས་ཞི་བདེ་གཤེགས་ཁྱོད་ལ་ཕྱག་
འཚལ་ལོ། །རྣམ་པར་འདྲེན་པ་ཐ་མའི་ལུས་འཛིན་ཅིང་། །ཐུབ་པ་ཁྱོད་ནི་འཁོར་བའི་བཅིངས་ཀུན་པས། །མྱ་ངན་འདས་པའི་བདེ་བ་ཁྱོད་མཁྱེན་ཏེ། །མྱ་ངན་འདས་ཁྱོད་བདེ་གཤེགས་ཁྱོད་ལ་འདུད། །ཞི་གནས་ཐུགས་སུ་ཆུད་རྟོགས་མགོན་བསྟོད་
པའི། །བསོད་ནམས་མི་ཉུང་བདག་གིས་གང་བསགས་པ། །དཔེ་མེད་ཤིན་དུ་བསྒྲུབས་པའི་ལས་དེ་ཡིས། ཞི་བ་སངས་རྒྱས་ས་དེ་ཐོབ་པར་ཤོག །མགོན་ལ་ཞི་བར་འཐུན་པའི་སྒྲ་དག་གིས། །བདེ་གཤེགས་སྟོན་པ་ཞི་བགྱེས་བསྟོད་པས་སུ། །
ཞི་བའི་ས་དེ་ཤིན་དུ་ཐོབ་པར་ཤོག །རྒལ་ནས་སྐྱེ་བོ་མི་མཁས་བསྒྲལ་བར་བགྱི། །དེ་ནས་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཁྱབ་འཇུག་གིས་བྱིན་དེས་དེ་བཞིན་གཤེགས་པ་བརྩོན་འགྲུས་དཔེ་མེད་དེ་ལ་ཞི་བ་དང་འཐུན་པར་ཚིགས་སུ་བཅད་པས་

49-1-237a

མངོན་པར་བསྟོད་ནས། དགེ་བའི་རྩ་བ་དེས་ཕྱིན་ཆད་སངས་རྒྱས་ཁྲག་ཁྲིག་དཔག་ཏུ་མེད་པ་རྣམས་མཉེས་པར་བྱས། སངས་རྒྱས་ཀྱི་ཞིང་བརྗོད་དུ་མེད་པ་རྣམས་ཡོངས་སུ་སྦྱངས། སེམས་ཅན་ཁྲག་ཁྲིག་དཔག་ཏུ་མེད་པ་དུ་མ་ཡང་དག་པར་
རྫོགས་པའི་བྱང་ཆུབ་ལ་ཡོངས་སུ་སྨིན་པར་བྱས་ཏེ། ཡོངས་སུ་དག་པའི་སངས་རྒྱས་ཀྱི་ཞིང་དུ་སྐྱེ་བ་ཡང་དག་པར་འཛིན་དུ་བཙུད་དོ། །འཇམ་དཔལ་དེའི་ཚེ་དེའི་དུས་ན་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཁྱབ་འཇུག་གིས་བྱིན་ཞེས་བྱ་བར་གྱུར་པ་དེ་གཞན་
ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཁྱབ་འཇུག་གིས་བྱིན་ཞེས་བྱ་བར་གྱུར་ཏོ། །འཇམ་དཔལ་
དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཕ་རོལ་དུ་ཕྱིན་པ་དྲུག་ཞི་བར་རབ་ཏུ་བརྟག་པར་བྱའོ། །ཞི་བའི་ལམ་ཀུན་དུ་བསྟེན་པར་བྱའོ། །རྒོད་པར་མི་འགྱུར་བར་བྱའོ། །བྱང་ཆུབ་སེམས་དཔའི་ཏིང་ངེ་འཛིན་ཞི་གནས་བསྙེན་པར་བྱའོ། །བསྟེན་
པར་བྱའོ། །བསྒོམ་པར་བྱའོ། །མང་དུ་བྱའོ། །འཇམ་དཔལ་ཞི་བར་སྤྱོད་པ་ལ་ནི་ཡོངས་སུ་མྱ་ངན་ལས་འདའ་བ་སྟེ། མ་ཞི་བར་སྤྱོད་པ་ལ་ནི་འཁོར་བའོ། །འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་
པ་ནི་ཡུན་རིང་པོར་བཟོད་པ་ལ་བསྟེན་ཅིང་བསྙེན་ཏེ་བསྒོམས་ནས་མང་དུ་བྱས་སོ།། །། བམ་པོ་བཞི་པ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་
མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དེའི་ཚེ་དེའི་དུས་ན་པདྨའི་འབྱུང་གནས་ཞེས་བྱ་བའི་བསྐལ་པ་བྱུང་སྟེ། འཇམ་དཔལ་བསྐལ་པ་པདྨའི་འབྱུང་གནས་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་བློ་གྲོས་མཐའ་ཡས་ཤེས་བྱ་བ་འཇིག་རྟེན་དུ་བྱུང་སྟེ། འཇམ་

49-1-237b

དཔལ་དེ་བཞིན་གཤེགས་པ་བློ་གྲོས་མཐའ་ཡས་དེའི་སངས་རྒྱས་ཀྱི་ཞིང་ཚད་མེད་པར་ཡོངས་སུ་དག་པ་བཤད་དུ་མི་ནུས་པ་ནི་འདི་ལྟ་སྟེ། དཔེར་ན་ད་ལྟར་བཅོམ་ལྡན་འདས་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་བཞིན་
ནོ། །བཅོམ་ལྡན་འདས་དེ་བཞིན་གཤེགས་པ་བློ་གྲོས་མཐའ་ཡས་དེའི་སངས་རྒྱས་ཀྱི་ཞིང་དུ་ཐེག་པ་ཆེན་པོ་ལ་ཡང་དག་པར་ཞུགས་པ་མ་གཏོགས་པར་སེམས་ཅན་གཞན་རྣམས་མི་སྐྱེའོ། །དེ་བཞིན་གཤེགས་པ་དེ་ཐེག་པ་ཆེན་པོ་ལ་བརྩམས་ནས་ཆོས་
སྟོན་ཏེ། སངས་རྒྱས་ཀྱི་ཞིང་རྒྱ་ཆེ་བ་དང་། སངས་རྒྱས་ཀྱི་ཞིང་ཡོངས་སུ་དག་པའང་འཆད་དོ། །འཇམ་དཔལ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་བློ་གྲོས་མཐའ་ཡས་དེའི་གསུང་རབ་ལ་དགེ་སློང་རྟག་ཏུ་རྣམ་པར་ལྟ་བ་ཞེས་བྱ་བ་ཞིག་བྱུང་སྟེ། 
བསྡུ་བའི་དངོས་པོ་བཞི་དང་ལྡན་ཞིང་བསྡུ་བའི་དངོས་པོ་བཞིས་སེམས་ཅན་རྣམས་སྡུད་དོ། །འཕགས་པའི་རིགས་བཞི་ལ་རབ་ཏུ་གནས་པར་གྱུར། སོ་སོ་ཡང་དག་པར་རིག་པ་བཞི་བསྙེད་པར་གྱུར། ཚངས་པའི་གནས་པ་བཞི་དང་ལྡན་པར་གྱུར་ཏེ། བྱམས་
པ་ཆེན་པོ་ལ་གནས་པ་དང་། སྙིང་རྗེ་ཆེན་པོ་ལ་གནས་པ་དང་། དགའ་བ་ཆེན་པོ་ལ་གནས་པ་དང་། བཏང་སྙོམས་ཆེན་པོ་ལ་གནས་པ་དང་། ཉོན་མོངས་པ་མེད་པར་གནས་པ་དང་བྲལ་བར་ཡང་མ་གྱུར་ཏོ། །འཇམ་དཔལ་བཅོམ་ལྡན་འདས་དེ་བཞིན་
གཤེགས་པ་བློ་གྲོས་མཐའ་ཡས་དེའི་སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་ཇི་སྙེད་ཡོད་པ་དེ་དག་གི་ནང་ན་བྱང་ཆུབ་སེམས་དཔའ་རྟག་ཏུ་རྣམ་པར་ལྟ་བ་ནི་མཆོག་ཅེས་བྱའོ། །བྱང་ཆུབ་སེམས་དཔའ་རྟག་ཏུ་རྣམ་པར་ལྟ་དེ་དེ་བཞིན་གཤེགས་
པ་བློ་གྲོས་མཐའ་ཡས་དེའི་བསྟན་པ་ཀུན་འཛིན་པར་གྱུར་ཏེ། དེ་བཞིན་གཤེགས་པ་བློ་གྲོས་མཐའ་ཡས་དེ་ལ་ཇི་ལྟ་བ་དེ་བཞིན་དུ་སངས་རྒྱས་བཅོམ་ལྡན་འདས་བརྗོད་དུ་མེད་པ་རྣམས་ཀྱི་བསྟན་པ་ཀུན་བཟུང་ངོ་། །དེ་འདི་ལྟར་བཟོད་པ་ལ་རབ་ཏུ་
གནས་པས་དེ་བཞིན་གཤེགས་པ་རེ་རེའི་སངས་རྒྱས་ཀྱི་ཞིང་ན་ཡང་སེམས་ཅན་དཔག་ཏུ་མེད་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་བཙུད་དེ། །དེ་བཟོད་པ་ལ་གནས་ནས་སངས་རྒྱས་ཀྱི་ཞིང་ལ་ལར་སངས་རྒྱས་སུ་སྟོན། ལ་

49-1-238a

ལར་བྱང་ཆུབ་སེམས་དཔའི་སྤྱོད་པ་སྟོན། ལ་ལར་དང་པོ་སེམས་བསྐྱེད་པ་སྟོན་ཏེ། འཇམ་དཔལ་བྱང་ཆུབ་སེམས་དཔའ་རྟག་ཏུ་རྣམ་པར་ལྟ་བ་དེ་ལྟ་བུའི་རྫུ་འཕྲུལ་དང་ལྡན་པར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་བྱང་ཆུབ་
སེམས་དཔའ་རྟག་ཏུ་རྣམ་པར་ལྟ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན། འཇམ་དཔལ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་ཚེ་དེའི་དུས་ན་བྱང་ཆུབ་སེམས་དཔའ་རྟག་ཏུ་རྣམ་པར་ལྟ་ཞེས་
བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཇི་ལྟར་ན་སངས་རྒྱས་ཀྱི་ཆོས་འདི་མྱུར་དུ་ནུབ་པར་མི་འགྱུར་ཞེས་སངས་རྒྱས་
ཀྱི་བསྟན་པ་ཡོངས་སུ་བཟུང་བ་ལ་ནན་ཏན་བྱའོ། །འཇམ་དཔལ་དེ་སངས་རྒྱས་ཀྱི་བསྟན་པ་ཡོངས་སུ་གཟུང་བའི་ཕྱིར་སློབ་མ་སངས་རྒྱས་ཀྱི་བསྟན་པ་དེ་ཡོངས་སུ་གཟུང་བ་ལ་ཞུགས་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་
བཀའ་སྩལ་ཏོ། །མི་ཡི་སེང་གེ་མི་མཆོག་འཇིག་རྟེན་མཁས། །འདས་པ་ཀུན་གྱིས་བཟོད་པ་རབ་ཏུ་བསྔགས། །འཇིག་རྟེན་ཕན་འདོད་གང་དག་མ་བྱུང་བ། །མི་མཆོག་ཀུན་ཀྱང་བཟོད་པ་བསྔགས་པར་འགྱུར། །བཟོད་པའི་སྟོབས་དང་ལྡན་པར་གྱུར་པ་ནི། །དགྲ་མེད་
བྱང་ཆུབ་ལ་ཡང་གཞོལ་བ་སྟེ། །བླ་ན་མེད་པའི་བཟོད་པ་བསྟེན་པས་ན། །འདྲེན་པ་མྱུར་དུ་བྱང་ཆུབ་ཐོབ་པར་འགྱུར། །མི་ཡི་སེང་གེ་དེ་དག་མི་འཇིགས་བཟོད། །བླ་ན་མེད་པའི་བྱང་ཆུབ་ཚོལ་བའི་ཚེ། །མགོ་དང་ལག་དང་རྐང་པ་རྣམས་ཀྱང་བྱིན། །མཁས་པ་རྣམས་ནི་སྐྱོ་བར་
འགྱུར་བ་མེད། །བཟོད་པའི་སྟོབས་ཀྱིས་དགྲ་རྣམས་ཀུན་ཀྱང་ཐུལ། །བཟོད་པའི་སྟོབས་ཀྱིས་ཉོན་མོངས་རྣམས་ལས་རྒྱལ། །བཟོད་པ་རབ་ཏུ་བསྟེན་པས་རང་འབྱུང་འགྱུར། །བཟོད་པས་མི་འཆི་གོ་འཕང་རྙེད་པར་འོང་། །བཟོད་པ་བསྟེན་པས་རབ་ཏུ་གཟུགས་
བཟང་འགྱུར། །བཟོད་པ་བསྟེན་པས་མི་ཡི་དབང་པོར་འོང་། །བཟོད་ལ་བསྟེན་པས་མཚན་བཟང་འཆང་བ་ཡི། །འཇིག་རྟེན་རང་བྱུང་དེ་བཞིན་གཤེགས་པར་འགྱུར། །བཟོད་པའི་སྟོབས་ཀྱིས་ཉེས་ལས་རྒྱལ་བར་བྱེད། །བཟོད་པའི་སྟོབས་ནི་དེ་དག་སྟོབས་ཀྱི་

49-1-238b

མཆོག །བཟོད་པ་བསྟེན་པས་དེ་དག་དགྲར་རྒོལ་མེད། །འཇིག་རྟེན་མཁྱེན་པ་འགྲོ་ལ་ཕན་འདོད་པ། །རང་བྱུང་གང་རྣམས་འདས་པར་གྱུར་པ་དག །བཟོད་ལ་གནས་ཏེ་བདུད་རྣམས་རབ་བཏུལ་ནས། །འཇིག་རྟེན་ཕན་སེམས་བྱང་ཆུབ་རབ་རྙེད་དེ། །བླ་ན་མེད་པའི་
སྟོབས་ནི་བཟོད་པའོ། །བཟོད་པའི་སྟོབས་དང་མཚུངས་པ་ཡོད་མ་ཡིན། །སྟོབས་ཅན་དེ་ནི་བཟོད་པ་བསྟེན་པས་ན། །ཆོས་རྣམས་གང་ཡང་ཅི་ལྟ་བཞིན་དུ་བཟོད། །དེ་ལ་ཕན་སེམས་སྟོབས་དང་ལྡན་ཞེས་གསུང་། །བཟོད་ལ་གནས་པས་ཐེ་ཚོམ་རྣམས་ཀྱང་གཅོད། །
བཟོད་ལ་གནས་པས་ཡེ་ཤེས་དག་པར་འགྱུར། །བཟོད་ལ་གནས་པས་ཐེ་ཚོམ་མེད་པ་སྟེ། །རྟག་ཏུ་བཟོད་པའི་སྟོབས་མཆོག་བསྙེད་པར་གྱིས། །བཟོད་པ་འདི་ནི་རྒྱལ་བས་རབ་ཏུ་བསྔགས། །བཟོད་པ་དེས་ཀྱང་བསམས་པ་ཀུན་འགྲུབ་སྟེ། །དེ་བས་མཚུངས་མེད་བཟོད་
ལ་བསྟེན་གྱིས་དང་། །རིང་པོར་མི་ཐོགས་འཇིག་རྟེན་མཁྱེན་པར་འགྱུར། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔས་བཟོད་པ་གཉིས་ལ་བསྟེན་པར་བྱ་སྟེ། གཞན་ལས་འགྱུར་བ་མེད་པར་བཟོད་པ་དང་། ཆོས་རྣམས་ལ་རྗེས་སུ་འཐུན་པར་བཟོད་པའོ། །
འཇམ་དཔལ་ཡང་བཅོམ་ལྡན་འདས་དེ་བཞིན་གཤེགས་པ་དོན་ཐམས་ཅད་གྲུབ་པ་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བརྩོན་འགྲུས་མཉམ་པ་ཉིད་རབ་ཏུ་རྟོགས་པར་གྱུར་ཏེ། བརྩོན་འགྲུས་ཇི་ལྟ་བར་ལེ་ལོ་ཡང་དེ་བཞིན་ལེ་ལོ་ཇི་ལྟ་བར་བརྩོན་
འགྲུས་ཀྱང་དེ་བཞིན་ནོ། །ཆོས་དེ་གཉི་ག་ལ་ཡང་མཚན་ཉིད་གཅིག་སྟེ། རབ་ཏུ་ཞི་བ། མྱ་ངན་ལས་འདས་པ་དང་མཉམ་པ། གཡོ་བ་དང་རློམ་སེམས་མེད་པ། སྐྱོད་པ་མེད་པ། འགྱུར་བ་མེད་པ། བྱེད་པ་མེད་པ། སེམས་པ་མེད་པ། སེམས་པ་དང་
བྲལ་བ། ཕན་ཚུན་དུ་མི་སེམས་པ་སྟེ། ཇི་ལྟར་བདག་མི་སེམས་པ་ལྟ་བུ་སྟེ། དེ་ནི་མཚན་ཉིད་མེད་པ། བཏགས་པ་མེད་པ། བརྗོད་དུ་མེད་པ། གཟུང་དུ་མེད་པ། འདུ་ཤེས་མེད་པ། འདུ་ཤེས་དང་བྲལ་བ། སེམས་པ་མེད་པ། སེམས་པ་དང་བྲལ་བ། མི་ཚོར་བ་
ཚོར་བ་མེད་པ། རྣམ་པར་མི་ཤེས་པ། རྣམ་པར་ཤེས་པ་མེད་པ། མི་གོས་པ། ཀུན་ནས་ཉོན་མོངས་པ་ཅན་མ་ཡིན་པ། མི་གནས་པ་ཤེས་པར་བྱེད་པ་མེད་པའོ། །ཆོས་དེ་དག་རྟོགས་པར་བྱ་བའི་ཕྱིར་བརྩོན་འགྲུས་བརྩམས་ཤིང་བརྟུལ་བ་བརྟན་པར་གྱུར་ཏོ། །

49-1-239a

འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན། དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཟླ་འོད་རྒྱལ་པོ་ཞེས་
བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་ཟླ་འོད་རྒྱལ་པོ་དེའི་འོད་ཀྱིས་སངས་རྒྱས་ཀྱི་ཞིང་གྲངས་མེད་པ་སྣང་བར་གྱུར་ཏོ། །འོད་དེ་ལ་སྒྲིབ་པར་བྱེད་ནུས་པའི་ཆོས་གང་ཡང་མེད་དེ་སྒྲིབ་པ་ཐམས་ཅད་ལས་ཐལ་ནས་སྣང་བར་བྱེད་དོ། །འོད་དེ་
ཡང་བདེ་བ་བསིལ་བ་རེག་ན་བདེ་བ་དགེ་བའི་རྩ་བས་བསྐྱེད་པ་སྟེ། དེ་བཞིན་གཤེགས་པ་དེའི་སྔོན་གྱི་སྨོན་ལམ་གྱིས་སེམས་ཅན་གང་འོད་དེས་རེག་པ་རྣམས་སྔོན་མ་རྙེད་པའི་བདེ་བ་རྙེད་པར་གྱུར། སྔོན་བྱས་པའི་དགེ་བའི་རྩ་བ་རྣམས་ཀྱང་རྗེས་སུ་
དྲན་པར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་དེ་བཞིན་གཤེགས་པ་དེའི་རིམ་གྲོ་བྱེད་པ་དགེ་སློང་དེས་པ་ཞེས་བྱ་བ་ཞིག་ཡོད་དེ། དེ་བཞིན་གཤེགས་པ་དེ་ལ་ལོ་བྱེ་བ་ཁྲག་ཁྲིག་སུམ་བཅུ་རྩ་དྲུག་གི་བར་དུ་ཡིད་དུ་འོང་བས་བསྙེན་བཀུར་བྱས་ཏེ། ཡིད་
དུ་མི་འོང་བས་མ་ཡིན་ནོ། །བཤད་པའང་འཛིན་ཅིང་བདག་གི་དོན་ཡང་མི་གཏོང་ངོ་། །དེས་བཅོམ་ལྡན་འདས་དེ་བཞིན་གཤེགས་པ་ཟླ་འོད་རྒྱལ་པོ་དེ་ལ་ལོ་བྱེ་བ་ཁྲག་ཁྲིག་ཕྲག་སུམ་བཅུ་རྩ་དྲུག་གི་བར་དུ་འདི་ལྟར་བརྩོན་འགྲུས་མཉམ་པ་ཉིད་བརྩམས་ཀུན་
འདྲི་སྟེ། བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ཀྱི་བུ་མོས་ཇི་ལྟར་བརྩོན་འགྲུས་ཀྱི་ཕ་རོལ་དུ་ཕྱིན་པ་རབ་ཏུ་རྟོགས་པར་བགྱི། ཇི་ཙམ་གྱིས་བརྩོན་འགྲུས་མཉམ་པ་ཉིད་ཁོང་དུ་ཆུད་པར་འགྱུར་བ་
ལགས། དེ་ལ་དེ་བཞིན་གཤེགས་པ་ཟླ་འོད་རྒྱལ་པོས་ལོ་བྱེ་བ་ཁྲག་ཁྲིག་ཕྲག་སུམ་བཅུ་རྩ་དྲུག་གི་བར་དུ་བརྩོན་འགྲུས་མཉམ་པ་ཉིད་མཚན་ཉིད་གཅིག་པ་ལ་བརྩམས་ཏེ། བསྟན་པའི་ཚིག་བྱེ་བ་ཁྲག་ཁྲིག་ཕྲག་བརྒྱ་སྟོང་གིས་ལུང་བསྟན་ཏོ། །དེ་ནས་དགེ་སློང་

49-1-239b

དེས་པ་དེས་དེ་བཞིན་གཤེགས་པ་དེ་ལས་བརྩོན་འགྲུས་མཉམ་པ་ཉིད་ཐོས་ནས་བརྩོན་འགྲུས་མཉམ་པ་ཉིད་ཀྱི་མཆོག་དང་ལྡན་པར་གྱུར། དེས་བརྩོན་འགྲུས་ཀྱི་མཉམ་པ་ཉིད་རྟོགས་ནས་བཅོམ་ལྡན་འདས་དེ་བཞིན་གཤེགས་པ་ཟླ་འོད་རྒྱལ་པོ་དེ་ལ་བརྩོན་
འགྲུས་མཉམ་པ་ཉིད་དང་འཐུན་པའི་ཚིགས་སུ་བཅད་པ་དག་གིས་མངོན་པར་བསྟོད་དོ། །ལྷ་དང་བཅས་དང་མི་དང་བདུད། །ལྷ་མིན་བཅས་རིས་འཇིག་རྟེན་ན། །འདྲེན་པ་ཁྱོད་དང་འདྲ་མ་མཆིས། །མི་འདྲ་ལྷག་པ་ག་ལ་མཆིས། །སྡིག་མ་མཆིས་པའི་འགྲོར་
གཤེགས་པ། །བདེ་གཤེགས་མཚུངས་མཉམ་ཐུགས་ལྡན་པ། །བདེ་གཤེགས་ཁྱོད་ཀྱི་སྒྲུབ་པ་ནི། །མ་སྨད་མི་གཡོ་ཟླ་མ་མཆིས། །ཁྱོད་ལ་ལེ་ལོ་བརྩོན་འགྲུས་མཚུངས། །རྣམ་པར་འདྲེན་པ་ཆོས་འདི་དག །བྲག་ཆ་དང་ནི་མཚུངས་འདྲ་ཞེས། །བཅོམ་
ལྡན་འདས་ནི་འདུད་ཅིང་སྟོན། ཆོས་རྣམས་བྱེ་བྲག་མེད་མཁྱེན་ནས། །ཁྱོད་ཀྱི་བརྩོན་འགྲུས་ཞན་མ་མཆིས། །བརྩོན་འགྲུས་སྟོབས་ནི་ཕ་རོལ་ཕྱིན། །བདེ་གཤེགས་རྐང་གཉིས་གཙོ་ཕྱག་འཚལ། །བརྩོན་འགྲུས་དག་གི་མཉམ་ཉིད་འདི། །གང་གིས་རབ་རྟོགས་སྨྲ་
བའི་རྟག །ཁྲག་ཁྲིག་བདུད་རྣམས་བཏུལ་ནས་སུ། །བྱང་ཆུབ་དམ་པ་དེ་དག་རེག །སྟོབས་བཅུ་འཇིག་རྟེན་སྣང་མཛད་ཀུན། །བརྩོན་འགྲུས་མཉམ་ལ་བརྟེན་ནས་སུ། །རྐང་གཉིས་དམ་པ་རབ་རྙེད་དེ། །གཞན་ཡང་དེ་བཞིན་རྙེད་པར་མཛད། །འཇིག་རྟེན་མགོན་པོ་
ཐམས་ཅད་ཀྱིས། །བརྩོན་འགྲུས་མཉམ་ཉིད་ཤིན་དུ་བསྔགས། །སྲིད་པ་མཐར་ཕྱིན་སྲིན་འགགས་པ། །བཅོམ་ལྡན་འདས་ཀྱང་དེ་བཞིན་བསྟོད། །གང་ཟག་གང་དག་མི་སྐྱོ་བར། །ཞི་གནས་བརྩོན་འགྲུས་བརྩམས་གྱུར་པ། །མི་མཁས་འགྲོ་བ་རྟོགས་བགྱིའི་སླད། །དེ་དག་བྱང་
ཆུབ་རྙེད་པར་འགྱུར། །ཞི་གནས་སྟོབས་ཀྱི་ཕ་རོལ་ཕྱིན། །བརྩོན་འགྲུས་མཉམ་རྙེད་འགྲོ་མཆོག་གང་། །འཇིག་རྟེན་མགོན་ཁྱོད་དེ་ཡི་ཡབ། །དེ་དག་རྣམས་ནི་ཁྱོད་ཀྱི་སྲས། །དེ་དག་རྙེད་པ་ལེགས་རྙེད་དེ། །མིར་ནི་ཡང་དག་ལེགས་པར་མཆིས། །དེ་དག་བརྩོན་འགྲུས་
མཉམ་ཉིད་འདི། །སེམས་ལ་ཡང་དག་འགྲུབ་པར་འགྱུར། །གང་རྣམས་བརྩོན་འགྲུས་མཉམ་ཉིད་ལ། །འཇིག་རྟེན་སྒྲོན་མ་སེམས་འཇུག་པ། །དེ་དག་རང་འབྱུང་བདེ་བར་གཤེགས། །སྟོབས་བཅུའི་སྟོབས་རྣམས་འབྱུང་བར་འགྱུར། །དེ་ནས་དགེ་

49-1-240a

སློང་དེས་པ་དེས་བཅོམ་ལྡན་འདས་དེ་བཞིན་གཤེགས་པ་ཟླ་འོད་རྒྱལ་པོ་དེ་ལ་བརྩོན་འགྲུས་མཉམ་པ་ཉིད་དང་འཐུན་པའི་ཚིགས་སུ་བཅད་པ་དེ་དག་གིས་མངོན་པར་བསྟོད་ནས། བརྩོན་འགྲུས་མཉམ་པ་ཉིད་རྟོགས་ཏེ། དགེ་བའི་རྩ་བ་དེས་བསྐལ་པ་བརྗོད་དུ་
མེད་པར་ནམ་ཡང་བརྩོན་འགྲུས་མཉམ་པ་ཉིད་ལ་མི་གནས་པར་མ་གྱུར་ཏེ། རྟག་ཏུ་རྒྱུན་མི་འཆད་པར་ཐབས་མཁས་པ་དང་ལྡན་པར་གྱུར་ཏོ། །དེའི་ཚེ་དེའི་དུས་ན་དགེ་སློང་དེས་པ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཡིད་གཉིས་དང་། 
སོམ་ཉི་དང་། ཐེ་ཚོམ་ཟ་ན་འཇམ་དཔལ་ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་དགེ་སློང་དེས་པ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་
དཔའ་ཆེན་པོས་བརྩོན་འགྲུས་མཉམ་པ་ཉིད་ལ་བརྩོན་པར་བྱའོ། །བརྩོན་འགྲུས་མཉམ་པ་ཉིད་ལ་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ནི་བསམ་གཏན་གྱི་ཕ་རོལ་དུ་ཕྱིན་པ་མངོན་དུ་འགྱུར་ཏེ། བསྒོམ་པ་ཡོངས་སུ་རྫོགས་པར་
འགྱུར་རོ། །དེ་ཅིའི་ཕྱིར་ཞེ་ན། བརྩོན་འགྲུས་མཉམ་པ་ཉིད་རྙེད་པར་བྱ་བའི་ཕྱིར་སེམས་རྩེ་གཅིག་པར་གྱུར་ཏེ་དེའི་ཕྱིར་དེ་ཞི་བ་མཆོག་ཏུ་འགྱུར་རོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད། བསམ་
གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་
པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཞི་གནས་ཡང་དག་འཕགས་ཞེས་བྱ་བ་འཇིག་རྟེན་དུ་བྱུང་སྟེ། འཇམ་དཔལ་དེ་བཞིན་གཤེགས་པ་ཞི་གནས་ཡང་དག་འཕགས་དེའི་སངས་
རྒྱས་ཀྱི་ཞིང་ན་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་འདོད་པ་ན་སྤྱོད་པའི་ཉོན་མོངས་པ་རྒྱུ་བ་མེད་པར་གྱུར་ཏེ། སེམས་ཅན་དེ་དག་ཐམས་ཅད་ལ་འདོད་པའི་ཀུན་ནས་བཀྲིས་པ་མི་སྐྱེའོ། །འཇམ་དཔལ་དེའི་ཚེ་དེའི་དུས་ན་བཅོམ་ལྡན་

49-1-240b

འདས་དེ་བཞིན་གཤེགས་པ་ཞི་གནས་ཡང་དག་འཕགས་དེའི་གསུང་རབ་དེ་ལ་དེ་བཞིན་གཤེགས་པ་དེའི་རིམ་གྲོ་བྱེད་པ་དགེ་སློང་བསམ་གཏན་སྤྱོད་ཡུལ་ཞེས་བྱ་བ་ཞིག་བྱུང་སྟེ། དེས་དེ་བཞིན་གཤེགས་པ་ཞི་གནས་ཡང་དག་འཕགས་ལ་བསྐལ་པ་བཅྭ་
བརྒྱད་ཀྱི་བར་དུ་ཡིད་དུ་འོང་བས་བསྙེན་བཀུར་བྱས་ཏེ། ཡིད་དུ་མི་འོང་བས་མ་ཡིན་ནོ། །དགེ་སློང་བསམ་གཏན་སྤྱོད་ཡུལ་དེ་ལ་ཆོས་ཐམས་ཅད་བསམ་གཏན་གྱི་དམིགས་པར་གྱུར་ཏོ། །དེ་ལྟར་དགེ་སློང་བསམ་གཏན་སྤྱོད་ཡུལ་དེས་བསྐལ་པ་བཅྭ་
བརྒྱད་ཀྱི་བར་དུ་ཞི་གནས་ལ་བསྒོམས་པར་གྱུར་ཏོ། །དེ་ཞི་གནས་ཀྱི་སྟོབས་དེ་དང་ལྡན་པས་རྩོམ་པ་ཐམས་ཅད་ལ་དབང་ཐོབ་པར་གྱུར་ཏོ། །དེ་ཆོས་གང་དང་གང་ལ་དམིགས་པར་བྱེད་པ་ཆོས་དེ་དང་དེ་ཞི་བར་ཀུན་བསྒོམས་ཏེ། མྱ་ངན་ལས་འདས་པ་
དང་མཚུངས་པ། མཚན་ཉིད་མེད་པ། ཆོས་ཀྱི་དབྱིངས་སུ་ངེས་པ། ནམ་མཁའ་དང་མཉམ་ཞིང་མཚུངས་པ་སྟེ། གང་དམིགས་པའི་མཚན་ཉིད་དུ་གྱུར་པ་སེམས་ཀྱང་དེའི་མཚན་ཉིད་དུ་གྱུར་པའོ། །གང་སེམས་ཀྱི་མཚན་ཉིད་དུ་གྱུར་པ་དེ་རྩེ་གཅིག་པའི་མཚན་
ཉིད་དུ་གྱུར་པའོ། །གང་རྩེ་གཅིག་པའི་མཚན་ཉིད་དུ་གྱུར་པ་དེ་བྱང་ཆུབ་ཀྱི་མཚན་ཉིད་དུ་གྱུར་པའོ། །གང་བྱང་ཆུབ་ཀྱི་མཚན་ཉིད་དུ་གྱུར་པ་དེ་བྱང་ཆུབ་ཀྱི་ཕྱོགས་ཀྱི་ཆོས་ཀྱི་མཚན་ཉིད་དུ་གྱུར་པའོ། །གང་བྱང་ཆུབ་ཀྱི་ཕྱོགས་ཀྱི་ཆོས་ཀྱི་མཚན་ཉིད་དུ་གྱུར་
པ་དེ་བྱང་ཆུབ་སེམས་དཔའི་མཚན་ཉིད་དུ་གྱུར་པའོ། །གང་བྱང་ཆུབ་སེམས་དཔའི་མཚན་ཉིད་དུ་གྱུར་པ་དེ་ཞི་བའི་མཚན་ཉིད་དུ་གྱུར་པ་སྟེ། དེ་ནི་ཆོས་ཐམས་ཅད་ཞི་བ་ལ་ནེམ་ནུར་མེད་ཅིང་ཐེ་ཚོམ་མི་ཟའོ། །དེ་དགེ་བའི་རྩ་བ་དེས་བསྐལ་པ་བརྗོད་དུ་མེད་
པར་ནམ་ཡང་འདོད་པ་ན་སྤྱོད་པའི་ཉོན་མོངས་པ་དང་ལྡན་པར་མ་གྱུར་ཏེ། སྨོན་ལམ་གྱི་སྟོབས་ཀྱིས་ནི་ལན་མང་དུ་འདོད་པའི་ཁམས་སུ་སྐྱེས་སོ། །དེ་ཅིའི་ཕྱིར་ཞེ་ན། འདོད་པའི་ཁམས་ན་སེམས་ཅན་སྣོད་དུ་འགྱུར་བ་མང་བས་དོན་གྱི་དབང་འདི་ལ་བརྟེན་
ནས་འདོད་པའི་ཁམས་སུ་སྐྱེས་ཏེ། སྙིང་རྗེ་ཆེན་པོས་ཡོངས་སུ་ནོན་ཅིང་སྙིང་བརྩེ་བའི་ཕྱིར་རོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་དགེ་སློང་བསམ་གཏན་སྤྱོད་ཡུལ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་

49-1-241a

འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་དགེ་སློང་བསམ་གཏན་སྤྱོད་ཡུལ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པའི་བྱང་ཆུབ་སེམས་དཔས་ཞི་གནས་དང་འཐུན་པའི་ལྷག་མཐོང་བསྒོམ་པར་བྱའོ། །ཞི་གནས་དང་འཐུན་པའི་ལྷག་མཐོང་བསྒོམ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་
རབ་ཏུ་ཞི་བའི་ཤེས་རབ་ཀྱི་ཕ་རོལ་དུ་ཕྱིན་པ་ཡང་དག་པར་འགྲུབ་བོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད་པ་ནས་བརྗོད་དུ་མེད་པའི་བར་དེའི་ཕ་རོལ་གྱི་ཡང་ཆེས་ཕ་རོལ་ན། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཏོག་གི་རྒྱལ་པོ་ཞེས་བྱ་
བ་འཇིག་རྟེན་དུ་བྱུང་སྟེ། འཇམ་དཔལ་བཅོམ་ལྡན་འདས་དེ་བཞིན་གཤེགས་པ་ཏོག་གི་རྒྱལ་པོ་དེའི་ཚེའི་ཚད་ནི་ལོ་བྱེ་བ་ཁྲག་ཁྲིག་ཕྲག་དགུ་བཅུར་གྱུར་ཏོ། །འཇམ་དཔལ་ཡང་དེ་བཞིན་གཤེགས་པ་ཏོག་གི་རྒྱལ་པོ་དེའི་གསུང་རབ་ལ་དགེ་སློང་ཡེ་ཤེས་
བླ་མ་ཞེས་བྱ་བ་དང་། བསམ་གཏན་བླ་མ་ཞེས་བྱ་བ་གཉིས་ཉན་ཐོས་ཀྱི་ཟུང་། མཆོག་གི་ཟུང་། བཟང་པོའི་ཟུང་ཤིག་བྱུང་སྟེ། དགེ་སློང་ཡེ་ཤེས་བླ་མ་ནི་ཤེས་རབ་ཅན་གྱི་མཆོག་ཏུ་གྱུར། དགེ་སློང་བསམ་གཏན་བླ་མ་ནི་རྫུ་འཕྲུལ་ཅན་གྱི་མཆོག་ཏུ་
གྱུར་ཏོ། །དེ་ནས་དགེ་སློང་ཡེ་ཤེས་བླ་མ་ནི་དེ་བཞིན་གཤེགས་པ་ཏོག་གི་རྒྱལ་པོ་དེའི་ཉན་ཐོས་རྣམས་ལྟ་བ་ཕུན་སུམ་ཚོགས་པ་ལ་རབ་ཏུ་འདུལ། དགེ་སློང་བསམ་གཏན་བླ་མ་ནི་མཆོག་གི་དོན་རྙེད་པར་རབ་ཏུ་འདུལ་ཏེ། ཕྱོགས་གང་ན་དགེ་སློང་ཡེ་ཤེས་བླ་མ་
དང་། དགེ་སློང་བསམ་གཏན་བླ་མ་དེ་འཁོད་པའི་ཕྱོགས་དེར་བཅོམ་ལྡན་འདས་དེ་བཞིན་གཤེགས་པ་ཏོག་གི་རྒྱལ་པོ་མཛད་པ་ཆུང་བར་གྱུར་ཏོ། །དགེ་སློང་ཡེ་ཤེས་བླ་མ་ནི་སེམས་ཅན་རྣམས་བྱང་ཆུབ་སེམས་དཔའི་ཐེག་པ་ལ་ཡང་དག་པར་འཛུད། དགེ་སློང་

49-1-241b

བསམ་གཏན་བླ་མ་ནི་སྤྱོད་པ་ལ་ཡང་དག་པར་འཛུད། དགེ་སློང་ཡེ་ཤེས་བླ་མ་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་འདོམས། དགེ་སློང་བསམ་གཏན་བླ་མ་ནི་ཐབས་མཁས་པ་ལ་འདོམས། དགེ་སློང་ཡེ་ཤེས་བླ་མ་ནི་སྦྱིན་པ་དང་། ཚུལ་ཁྲིམས་
དང་། བཟོད་པ་དང་། བརྩོན་འགྲུས་ཀྱི་ཕ་རོལ་དུ་ཕྱིན་པ་ལ་འདོམས། དགེ་སློང་བསམ་གཏན་བླ་མ་ནི་བསམ་གཏན་གྱི་ཕ་རོལ་དུ་ཕྱིན་པ་ལ་འདོམས། དགེ་སློང་ཡེ་ཤེས་བླ་མ་ནི་ལྷག་མཐོང་ལ་འདོམས། དགེ་སློང་བསམ་གཏན་བླ་མ་ནི་ཞི་གནས་ལ་
འདོམས། དགེ་སློང་ཡེ་ཤེས་བླ་མ་ནི་སེམས་ཅན་གྱི་བསམ་པ་ཤེས་པ་ལ་འདོམས། དགེ་སློང་བསམ་གཏན་བླ་མ་ནི་རབ་ཏུ་ཞི་བའི་ཡེ་ཤེས་ལ་འདོམས། དགེ་སློང་ཡེ་ཤེས་བླ་མ་ནི་སྟོབས་ཀྱི་ཡེ་ཤེས་ལ་འདོམས། དགེ་སློང་བསམ་གཏན་བླ་མ་
ནི་མི་འཇིགས་པའི་ཡེ་ཤེས་ལ་འདོམས། དགེ་སློང་ཡེ་ཤེས་བླ་མ་ནི་སོ་སོ་ཡང་དག་པར་རིག་པ་བཞི་ལ་རབ་ཏུ་འདུལ། དགེ་སློང་བསམ་གཏན་བླ་མ་ནི་སོ་སོ་ཡང་དག་པར་རིག་པ་བཞི་ལ་སྙོམས་པར་འཇུག་པའི་ཡེ་ཤེས་ལ་འདོམས། དགེ་སློང་
ཡེ་ཤེས་བླ་མ་ནི་ནན་ཏན་ལ་འདོམས། དགེ་སློང་བསམ་གཏན་བླ་མ་ནི་སེམས་བཅོས་པ་དང་བསྡུ་བའི་ཕྱིར་འདོམས། དགེ་སློང་ཡེ་ཤེས་བླ་མ་ནི་དོན་དམ་པའི་ཡེ་ཤེས་ལ་འདོམས། དགེ་སློང་བསམ་གཏན་བླ་མ་ནི་ཀུན་རྫོབ་ཤེས་པ་ལ་འདོམས། དགེ་སློང་
ཡེ་ཤེས་བླ་མ་ནི་ཐབས་ཤེས་པ་ལ་འདོམས། དགེ་སློང་བསམ་གཏན་བླ་མ་ནི་ཐབས་ཤེས་པ་ཐོབ་པར་བྱ་བའི་ཕྱིར་འདོམས། དགེ་སློང་ཡེ་ཤེས་བླ་མ་ནི་སེམས་ཅན་འདུལ་བའི་ཕྱིར་འདོམས། དགེ་སློང་བསམ་གཏན་བླ་མ་ནི་བསམ་གཏན་གྱིས་འདུལ་བར་
འདོམས། དགེ་སློང་ཡེ་ཤེས་བླ་མ་ནི་ཐམས་ཅད་མཁྱེན་པ་ལ་འདོམས། དགེ་སློང་བསམ་གཏན་བླ་མ་ནི་རྣམ་པ་ཐམས་ཅད་མཁྱེན་པ་ཉིད་ལ་འདོམས་ཏེ། དེ་ལྟར་དགེ་སློང་གཉིས་ཀྱི་ཡོན་ཏན་གྱི་ཁྱད་པར་ནི་བསྐལ་པ་བརྗོད་དུ་མེད་པར་བཤད་ཀྱང་ཡོན་
ཏན་གྱི་ཁྱད་པར་ཟད་པར་མི་ནུས་ཏེ། དགེ་སློང་དེ་གཉིས་དེ་ཙམ་དུ་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །དེ་ལྟར་དགེ་སློང་དེ་གཉིས་ཀྱིས་བཅོམ་ལྡན་འདས་དེ་བཞིན་གཤེགས་པ་ཏོག་གི་རྒྱལ་པོའི་བསྟན་པ་ཡོངས་སུ་བཟུང་བར་གྱུར་ཏོ། །དེ་

49-1-242a

བཞིན་གཤེགས་པ་དེ་ཡོངས་སུ་མྱ་ངན་ལས་འདས་ནས་བསྐལ་པ་ཁྲག་ཁྲིག་བརྒྱད་ཀྱི་བར་དུ་དེ་བཞིན་གཤེགས་པའི་བསྟན་པ་དགེ་སློང་ཉན་ཐོས་གཉིས་པོ་དེས་བཟུང་ནས་གནས་པར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་དགེ་སློང་
ཡེ་ཤེས་བླ་མ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་ཤེས་རབ་ཅན་གྱི་མཆོག་དགེ་སློང་ཡེ་
ཤེས་བླ་མ་ཞེས་བྱ་བར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་རྫུ་འཕྲུལ་ཅན་གྱི་མཆོག་དགེ་སློང་བསམ་གཏན་བླ་མ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། 
དེ་བཞིན་གཤེགས་པ་སེང་གེའི་རྩལ་གྱིས་བཞུད་པ་དེ་དེའི་ཚེ་དེའི་དུས་ན་དགེ་སློང་བསམ་གཏན་བླ་མ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་དུ་ཕྱིན་པ་དང་ཐབས་མཁས་
པ་ལ་བརྩོན་པར་བྱའོ། །ཤེས་རབ་ཀྱི་ཕ་རོལ་དུ་ཕྱིན་པ་དང་ཐབས་མཁས་པ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་ས་ཞི་བར་ངེས་པར་འབྱུང་བར་འགྱུར་རོ། །དེ་བྱང་ཆུབ་སེམས་དཔའི་ས་ཞི་བ་ལ་
བསྙེན་ཅིང་གོམས་པར་བྱས། མང་དུ་བྱས་པས་གང་ལ་དམིགས་པར་བྱེད་པ་དེ་ཐམས་ཅད་སངས་རྒྱས་ཀྱི་སྐུར་ཤེས་སོ། །འཇམ་དཔལ་འདི་ལྟ་སྟེ་དཔེར་ན་སྨན་གསེར་འོད་ཀྱིས་མིག་བསྐུས་པའི་མིས་གཟུགས་ཅི་མཐོང་བ་དེ་ཐམས་ཅད་གསེར་གྱི་ཁ་དོག་ཏུ་
མཐོང་སྟེ། ཁ་དོག་གཞན་དུ་མ་ཡིན་པ་དེ་བཞིན་དུ་འཇམ་དཔལ་བྱང་ཆུབ་སེམས་དཔའ་ཏིང་ངེ་འཛིན་ཞི་བ་ལ་བསྙེན་ཅིང་བསྒོམས་ཏེ་མང་དུ་བྱས་པས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་པ་གང་ལ་དམིགས་པར་བྱེད་པ་དང་། ཐམས་ཅད་ཀྱང་
སངས་རྒྱས་ཀྱི་སྐུར་མཐོང་ངོ་། །འཇམ་དཔལ་འདི་ལྟ་སྟེ་དཔེར་ན་ཡོངས་སུ་དག་པའི་ནོར་བུ་རིན་པོ་ཆེ་སྣོད་གང་དུ་བཞག་པའི་སྣོད་དེ་ཐམས་ཅད་དེའི་ཁ་དོག་ཏུ་གནས་པ་དེ་བཞིན་དུ། འཇམ་དཔལ་བྱང་ཆུབ་སེམས་དཔའི་ཏིང་ངེ་འཛིན་ཞི་བ་ལ་བསྙེན་ཅིང་བསྒོམས་ཏེ་

49-1-242b

མང་དུ་བྱས་པས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་པ་གང་དང་སེམས་ཕྲད་པ་དེ་ཐམས་ཅད་སངས་རྒྱས་ཀྱི་སྐུར་མཐོང་ངོ་། །འཇམ་དཔལ་འདི་ལྟ་སྟེ། དཔེར་ན་སྐྱེས་བུ་གང་དང་གང་ལ་མང་དུ་རྟོགས་པ་རྨི་ལམ་ན་ཡང་དེ་དག་ཤེས་པ་
དེ་བཞིན་དུ། འཇམ་དཔལ་བྱང་ཆུབ་སེམས་དཔའི་ཏིང་ངེ་འཛིན་ཞི་བ་ལ་བསྙེན་ཅིང་བསྒོམས་ཏེ་མང་དུ་བྱས་པས་ཆོས་གང་མངོན་དུ་གྱུར་པ་དེ་དག་སངས་རྒྱས་ཀྱི་སྐུར་མཐོང་ངོ་། །འཇམ་དཔལ་འདི་ལྟ་སྟེ། དཔེར་ན་སྐྱེས་བུ་བཟོ་ཅི་དང་ཅི་ལ་སློབ་པ་དེ་དང་
དེ་ཚར་ཕྱིན་པར་འགྱུར་བ་དེ་བཞིན་དུ། འཇམ་དཔལ་བྱང་ཆུབ་སེམས་དཔའི་ཏིང་ངེ་འཛིན་ཞི་བ་ལ་སློབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་མཐོང་བར་གནས་པར་འགྱུར་རོ། །དེ་སྦྱིན་པ་སྦྱིན་པ་ན་སྦྱིན་གནས་ཐམས་
ཅད་སངས་རྒྱས་ཀྱི་སྐུར་བྱིན་གྱིས་རླབ་སྟེ། དེའི་སྦྱིན་པ་དེ་ཡང་དེ་བཞིན་གཤེགས་པ་ལ་ཕུལ་བར་འགྱུར་རོ། །དེས་སྦྱིན་པ་དེ་ཡང་དེ་བཞིན་གཤེགས་པ་ལ་ཕུལ་བར་ཤེས་ཏེ། དེ་ལྟར་དེའི་སྦྱིན་པའི་ཕ་རོལ་དུ་ཕྱིན་པ་འབྲས་བུ་ཆེ་བར་འགྱུར་རོ། །དེ་ཐམས་
ཅད་དུ་སངས་རྒྱས་ཀྱི་གཟུགས་ལ་དད་པས་ཚུལ་ཁྲིམས་ཡོངས་སུ་དག་པར་འགྱུར་རོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད་པ་ནས་བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་པད་མ་བླ་མ་ཞེས་བྱ་བའི་
བསྐལ་པ་བྱུང་སྟེ། ཡང་འཇམ་དཔལ་པདྨའི་བླ་མའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་
ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དཔའ་སྲ་རྣམ་པར་གནོན་པ་ཞེས་བྱ་བ་འཇིག་རྟེན་དུ་བྱུང་སྟེ། ཡང་འཇམ་དཔལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་དཔའ་སྲ་རྣམ་པར་གནོན་པ་དེའི་རིམ་གྲོ་བྱེད་པ་དགེ་སློང་ལེགས་པར་བརྟགས་སྤྱོད་ཅེས་བྱ་བ་ཞིག་བྱུང་སྟེ། དེས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་ལ་རབ་ཏུ་དགའ་བ་དང་གུས་པས་བསྙེན་བཀུར་བྱས་སོ། །དེའི་ཚེ་རྒྱལ་རིགས་

49-1-243a

ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་ཅེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ། འབྲུ་དང་མཛོད་དང་བང་བ་མང་བ། སངས་རྒྱས་ཁྲག་ཁྲིག་ཕྲག་བརྒྱད་བཅུ་ལ་དགེ་བའི་རྩ་བ་བསྐྱེད་པ། དགེ་སློང་ལེགས་པར་བརྟགས་
སྤྱོད་དང་ཡུན་རིང་པོ་ནས་ལྷན་ཅིག་སྤྱད་ཅིང་ལྷན་ཅིག་བསྟེན་པ། ལྷན་ཅིག་འགྲོགས་ཤིང་གནས་པ། ལས་ལྷན་ཅིག་བསགས་པ་ཞིག་ཡོད་དོ། །དེ་ནས་དགེ་སློང་ལེགས་པར་བརྟགས་སྤྱོད་དེ་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེ་ག་
ལ་བ་དེར་སོང་སྟེ་ཕྱིན་ནས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེ་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ཤེས་པར་གྱིས་ཤིག །ད་ལྟར་དེ་བཞིན་གཤེགས་པ་དཔའ་སྲ་རྣམ་པར་གནོན་པ་ཞེས་བྱ་བ་འཇིག་རྟེན་དུ་བྱུང་ནས་དེ་ཆོས་
སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་རབ་ཏུ་སྟོན་གྱིས་རྒྱལ་རིགས་ཚུར་ཤོག །བཅོམ་ལྡན་
འདས་དཔའ་སྲ་རྣམ་པར་གནོན་པ་དེ་ག་ལ་བ་དེར་འདོང་ངོ་། །དེ་བཞིན་གཤེགས་པ་དེ་མཐོང་ན་དགེ་བའི་རྩ་བ་སོགས་ཤིང་ཆོས་ཐོས་པར་འགྱུར་རོ། །དེ་ནས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེ་དགེ་སློང་ལེགས་པར་བརྟགས་སྤྱོད་དང་ལྷན་
ཅིག་ཏུ་བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་དེ་ག་ལ་བ་དེར་དོང་ངོ་། །དེ་ནས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེས་བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་དེ་མཐོང་མ་ཐག་
ཏུ་འདི་ལྟར་དེའང་སྔོན་གྱི་དེ་བཞིན་གཤེགས་པ་དེ་ལ་བསྙེན་བཀུར་བྱས་པའི་ཕྱིར། དགེ་བའི་བཤེས་གཉེན་གྱིས་ཡོངས་སུ་བཟུང་བའི་ཕྱིར། དགེ་བའི་བཤེས་གཉེན་དང་སྐལ་བ་མཉམ་པར་སྤྱད་པའི་ཕྱིར། ཡུན་རིང་པོར་དགེ་བའི་བཤེས་གཉེན་
གྱིས་བསྟན་པ་ལས་འགལ་བར་མ་བྱས་པའི་ཕྱིར་དེ་སེམས་རབ་ཏུ་དད་དེ། བསྐལ་པ་བྱེ་བ་དཔག་ཏུ་མེད་པར་ཚུལ་ཁྲིམས་ཡང་དག་པར་བསྒྲུབས་ཤིང་ཆོས་ཐམས་ཅད་མཉམ་པ་ཉིད་ལ་མོས་ཏེ། སྦྱིན་པ་པོ་དང་སྦྱིན་བདག་ཏུ་གྱུར་ཅིང་སྦྱིན་པ་དང་ཚུལ་ཁྲིམས་

49-1-243b

ལ་རྣམ་པར་རྩེ་བ་དེས་བཅོམ་ལྡན་འདས་དཔའ་སྲ་རྣམ་པར་གནོན་པ་དེའི་ཞབས་ལ་མགོ་བོས་ཕྱག་འཚལ་ནས་ལན་གསུམ་དུ་བདག་གི་རིགས་དང་མིང་ནས་སྨོས་ཏེ་གསོལ་ཏོ། །བཅོམ་ལྡན་འདས་བདག་ནི་འགྲོ་བ་འཛིན་ཅེས་བགྱིའོ། །བདེ་བར་གཤེགས་པ་
བདག་ནི་འགྲོ་བ་འཛིན་ཅེས་བགྱིའོ། །བཙུན་པ་བཅོམ་ལྡན་འདས་བདག་ནི་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་ཅེས་བགྱི་བ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་དེས་
རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེ་ལ་འདི་སྐད་ཅེས་བཀའ་སྩལ་ཏོ། །འགྲོ་བ་འཛིན་ཁྱོད་ནི་བདེ་བ་དང་ལྡན་པ་ཡིན་ལ། ལྷ་དང་ལྷ་མ་ཡིན་དང་། གནོད་སྦྱིན་དང་། དྲི་ཟ་དང་། མི་དང་། སེམས་ཅན་གཞན་དག་ནི་འཁོར་བའི་བདེ་བ་འདོད་ན་
འགྲོ་བ་འཛིན་ཁྱོད་དོན་གྱི་དབང་ཅི་ཞིག་མཐོང་བས་དེ་བཞིན་གཤེགས་པའི་ཞབས་ལ་ཕྱག་འཚལ་ཏེ་མིང་ནས་འབྱིན། དེ་སྐད་ཅེས་བཀའ་སྩལ་པ་དང་། རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཐམས་ཅད་མཁྱེན་པ་ཐོབ་པར་འཚལ། སྒྲིབ་པ་མ་མཆིས་
པའི་ཡེ་ཤེས་སྐྱེད་པར་འཚལ། མུན་ནག་ལ་སྣང་བ་བགྱིད་པར་འཚལ། ལམ་གོལ་བར་ཞུགས་པའི་སེམས་ཅན་རྣམས་ལ་ལམ་སྟོན་པར་འཚལ། དེད་པ་རྣམས་དྲང་བར་འཚལ། ཤེས་རབ་མ་མཆིས་པ་རྣམས་ལ་ཤེས་རབ་རབ་ཏུ་
བསྟན་པར་འཚལ། ནོར་མ་མཆིས་པའི་སེམས་ཅན་རྣམས་ནོར་དང་ལྡན་པར་བགྱིད་པར་འཚལ། སེམས་ཅན་དབུལ་པོ་རྣམས་ལ་འཕགས་པའི་ནོར་གྱིས་ཕྱུག་པོར་བགྱིད་པར་འཚལ། བྱིང་བ་རྣམས་ལ་གཟིངས་སྩལ་བར་འཚལ། གཟིངས་
བཅིང་བར་འཚལ། གྲུ་སྦྱར་བར་འཚལ། སྟེགས་གཟུགས་པར་འཚལ། ཟམ་པ་གདགས་པར་འཚལ། སྐྲག་པ་རྣམས་ཀྱི་དཔུང་གཉེན་དུ་འགྱུར་བར་འཚལ། སྐྱབས་མ་མཆིས་པ་རྣམས་ཀྱི་སྐྱབས་སུ་འགྱུར་བར་འཚལ། མགོན་མ་མཆིས་པ་རྣམས་

49-1-244a

ཀྱི་མགོན་དུ་འགྱུར་བར་འཚལ། རྟེན་མ་མཆིས་པ་རྣམས་ཀྱི་རྟེན་དུ་འགྱུར་བར་འཚལ། གནས་མ་མཆིས་པ་རྣམས་ཀྱི་གནས་སུ་འགྱུར་བར་འཚལ། མི་ངོམས་པ་རྣམས་ངོམས་པར་བགྱིད་པར་འཚལ། ཆོག་མ་འཚལ་བ་རྣམས་
ཚིམ་པར་བགྱིད་པར་འཚལ། ཚིག་པ་རྣམས་ཞི་བར་བགྱིད་པར་འཚལ། སྔགས་པ་རྣམས་རབ་ཏུ་དགའ་བར་བགྱིད་པར་འཚལ། ན་བ་རྣམས་ལ་གསོས་བགྱིད་པར་འཚལ། འགུམ་པ་དག་གསོ་བར་འཚལ་ལགས་སོ། །བཅོམ་ལྡན་འདས་གང་
ལ་སྦྱིན་པ་སྩལ་བས་ཐར་པའི་འབྲས་བུར་འགྱུར་བ་དང་། གང་ལ་བགྱི་བ་བགྱིས་པས་མི་འཆི་བ་ལ་གཞོལ་བར་འགྱུར་བའི་སྦྱིན་པའི་གནས་ནི་དེ་བཞིན་གཤེགས་པ་འདྲ་བ་འཇིག་རྟེན་ཐམས་ཅད་ན་གཞན་གང་ཡང་མ་མཐོང་ལགས་སོ། །དེའི་སླད་དུ་
བཅོམ་ལྡན་འདས་བདག་ཞབས་ལ་ཕྱག་འཚལ་བ་བགྱིད་དོ། །དེ་སྐད་ཅེས་གསོལ་པ་དང་། དེ་བཞིན་གཤེགས་པ་དཔའ་སྲ་རྣམ་པར་གནོན་པས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེ་ལ་འདི་སྐད་ཅེས་བཀའ་སྩལ་ཏོ། །འདི་ལྟར་ཁྱོད་
སངས་རྒྱས་ཀྱི་ཆོས་ཟབ་མོ་འདི་ལྟ་སྟེ། ཐམས་ཅད་མཁྱེན་པ་ལ་སེམས་འཇུག་པ་ལེགས་སོ་ལེགས་སོ། །འགྲོ་བ་འཛིན་ཁྱོད་ཀྱི་སྤོབས་པ་ལེགས་སོ། །དམ་བཅས་པ་ལེགས་སོ། །ཡིད་ལ་བྱེད་པ་བཟང་ངོ་། །ཡང་དག་པར་ཞུགས་པ་མཚུངས་པ་མེད་
དོ། །བསམ་པ་མ་ཉམས་སོ། །ཁྱོད་ཀྱི་སེམས་ཀྱི་རྒྱུད་ནི་སྣུམ་མོ། །དེ་ལྟ་བས་ན་འགྲོ་བ་འཛིན་དགེ་བའི་བཤེས་གཉེན་ལ་བསྙེན་པར་བྱའོ། །ཚུལ་ཁྲིམས་ལ་རབ་ཏུ་གནས་ཏེ་སྦྱིན་པ་སྦྱིན་ནོ། །འགྲོ་བ་འཛིན་ཆོས་འདི་གཉིས་ལ་བརྩོན་པར་བྱ་སྟེ། 
གང་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ཀྱི་བུ་མོ། ཚུལ་ཁྲིམས་ལ་གནས་ཏེ་སྦྱིན་པ་སྦྱིན་ན་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཞུགས་པ་སྟེ། བྱང་ཆུབ་ལ་ཡང་ཉེ་བར་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། གཏོང་
བ་ལ་མོས་ཤིང་ཚུལ་ཁྲིམས་ལ་གནས་པའི་བྱང་ཆུབ་སེམས་དཔའ་ལ་བྱང་ཆུབ་རྙེད་པར་མི་དཀའ་བའི་ཕྱིར་རོ། །དེ་ནས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེས་བཅོམ་ལྡན་འདས་དེ་ལ་སྦྱིན་པ་དང་། ཚུལ་ཁྲིམས་དང་ལྡན་པའི་གཏམ་ཐོས་

49-1-244b

ནས། སངས་རྒྱས་ཀྱི་ཞིང་ཡོངས་སུ་དག་པ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་སྨོན་ལམ་རྒྱ་ཆེར་བཏབ་བོ། །དེའི་ཚེ་དེ་བཞིན་གཤེགས་པ་དཔའ་སྲ་རྣམ་པར་གནོན་པ་དེ་ལ་དེས་སྦྱིན་པ་དང་། ཚུལ་ཁྲིམས་དང་ལྡན་པའི་ཚིགས་སུ་བཅད་
པ་དག་གིས་མངོན་པར་བསྟོད་དོ། །རྐང་གཉིས་གཙོ་བོ་འདོད་པ་རྣམས་བོར་ནས། །ལམ་མཆོག་དམ་པ་འདི་ནི་རབ་ཏུ་སྟོན། །ལེགས་པར་བཤད་པའི་ཆོས་དེ་ཐོས་ནས་སུ། །བྱང་ཆུབ་མཆོག་ཏུ་སེམས་ཀྱིས་སྨོན་ལམ་འདེབས། །དཔའ་བོ་གང་དག་བླ་མེད་
བྱང་ཆུབ་ཞུགས། །དང་བའི་ཡིད་ཀྱིས་སྤྱད་པ་སྤྱོད་བགྱིད་ཅིང་། །བྱང་ཆུབ་བླ་མེད་ཞི་བ་ཞུགས་ནས་སུ། །འགྲོ་ལ་སྨན་པའི་སླད་དུ་ཆོས་སྤྱོད་པ། །དེ་དག་རྗེས་སུ་བདག་ནི་སློབ་འཚལ་བས། །རྒྱལ་བ་རྣམས་ལ་དད་པས་བསླབ་པར་བགྱི། །འགྲོ་བ་བཅིངས་པ་
རྣམས་ནི་དགྲོལ་སླད་དུ། །བླ་ན་མེད་པའི་བྱང་ཆུབ་ཐོབ་པར་བགྱི། །མདོངས་པར་གྱུར་པ་རྣམས་ཀྱི་མིག་དབྱེ་སླད། །ལོག་པའི་ལམ་དུ་མཆིས་པ་སླར་བཟློག་སླད། །བླ་ན་མེད་པའི་ལམ་དུ་དགོད་འཚལ་བས། །སྟོན་ལ་ཕྱག་འཚལ་བགྱི་བ་བདག་གིས་བགྱི། །
སྔོན་གྱི་སངས་རྒྱས་བརྒྱ་ལ་བདག་གིས་སྤྱད། །སྔོན་གྱི་རྒྱལ་བའི་ལམ་དུ་མཆི་བར་སེམས། །དེ་བཞིན་གཤེགས་པའི་དགེ་འདུན་བསྙེན་པར་འཚལ། །སྟོན་པ་ལ་ནི་ཕྱག་འཚལ་བགྱི་བ་བགྱི། །སྔོན་གྱི་རྒྱལ་བའི་རྗེས་སུ་སློབ་འཚལ་ཏེ། །ཞི་བ་རྟོགས་པའི་
རྗེས་སུ་མཆི་བར་འཚལ། །ཉོན་མོངས་པ་རྣམས་མ་ལུས་འདོར་འཚལ་ཏེ། །དེ་བས་རྒྱལ་བ་རྣམས་ལ་བགྱི་བ་བགྱི། །ལམ་སྟོར་སེམས་ཅན་རབ་ཏུ་མདོངས་པ་རྣམས། །བདག་གིས་མཆོག་གི་ལམ་ལ་དགོད་པར་འཚལ། །བདེ་བ་དམ་པར་རབ་ཏུ་
གཞག་པར་འཚལ། །དེ་བས་རྒྱལ་བ་རྣམས་ལ་བགྱི་བ་བགྱི། །འགྲོ་བ་ཐམས་ཅད་དགའ་བར་བདག་བགྱིད་འཚལ། །ཤུལ་རྣམས་ཆབ་ཀྱིས་ཆག་ཆག་གདབ་པར་འཚལ། །བསིལ་བའི་ས་དེ་རབ་ཏུ་བསྟན་པར་འཚལ། །དེ་བས་རྒྱལ་བ་ལ་ནི་མཆོད་པ་བགྱི། །
འགྲོ་བ་རྣམས་ནི་ཉོན་མོངས་སྲེད་པས་སྐོམ། །ཉོན་མོངས་མེ་ཡིས་ཚིག་པའི་སེམས་ཅན་ཀུན། །ཞི་བ་མ་མཐོང་མགོན་མེད་དུབ་པ་རྣམས། །དགྲོལ་བར་འཚལ་བས་བདག་ནི་བགྱི་བ་བགྱི། །འདོད་པའི་ཡོན་ཏན་དག་གིས་མི་ངོམས་པས། །ཆགས་པའི་སྟོབས་

49-1-245a

ཀྱིས་འཁོར་བར་འཁོར་གྱུར་ཅིང་། །ཡོངས་འཛིན་ཚོལ་བའི་སེམས་ཅན་བྱིས་པ་རྣམས། །དགྲོལ་བར་འཚལ་བས་བདག་ནི་བགྱི་བ་བགྱིད། །ཞེ་སྡང་སྟོབས་ཀྱིས་བྱིས་པ་རྣམ་པར་རྨོངས། །ལེགས་པར་མ་བསྡམས་སེམས་ཀྱིས་ཞེ་སྡང་
སྐྱེད། །དེ་དག་བདག་གིས་ཡོངས་སུ་དགྲོལ་སླད་དུ། །རྒྱལ་བ་རྣམས་ལ་བགྱི་བ་རྒྱ་ཆེན་བགྱི། །གཏི་མུག་སྟོབས་ཀྱིས་སེམས་ཅན་བྱིས་པ་བསྒྲིབས། །བགྱི་དང་མི་བགྱི་མ་འཚལ་གྱུར་པ་རྣམས། །དེ་དག་བདག་གིས་ཡོངས་སུ་དགྲོལ་སླད་དུ། །རྒྱལ་བ་
ལ་ནི་བགྱི་བ་རྒྱ་ཆེན་བགྱི། །ཕྲག་དོག་སྟོབས་ཀྱིས་བྱིས་པ་རྣམས་བྱུང་སྟེ། །ཞི་བ་མ་འཚལ་སྲིད་པར་བཅིངས་གྱུར་པ། །དེ་དག་བདག་གིས་ཡོངས་སུ་དགྲོལ་སླད་དུ། །རྒྱལ་བ་རྣམས་ལ་བགྱི་བ་རྒྱ་ཆེན་བགྱི། །སེར་སྣའི་སྟོབས་ཀྱིས་བྱིས་པ་རྣམས་བྱུང་
སྟེ། །གཏོང་དང་ཐར་དང་འབྲས་བུ་མ་འཚལ་བས། །ཀུན་ནས་སོགས་ཤིང་སྡུག་བསྔལ་མྱོང་གྱུར་པ། །དེ་དག་སླད་དུ་མཆོད་པ་ཤིན་དུ་བགྱི། །ཉོན་མོངས་སྟོབས་ཀྱིས་བྱིས་པ་རྣམས་གཙེས་ཏེ། །མ་འཚལ་བས་ནི་སྡིག་པའི་སུག་ལས་བགྱིད། །
དེ་སླད་འགྲོ་བ་རྣམས་སུ་སྡུག་བསྔལ་མྱོང་། །དེ་དག་སླད་དུ་བདག་ནི་མཆོད་པ་བགྱི། །སེམས་ཅན་གང་དག་ཁྱོད་ཀྱི་བསྟན་ལ་དད། །དེ་དག་རྣམས་ཀྱང་ཉེས་པ་འདིས་མི་རེག །རྒྱལ་བ་དེ་དག་རྗེས་སུ་སློབ་འཚལ་བས། །དེ་སླད་རྒྱལ་བ་རྣམས་ལ་བགྱི་
བ་བགྱིད། །སུ་དག་འདོད་ཆགས་བྲལ་བ་རབ་ཚོལ་ཞིང་། །རང་འབྱུང་འགྱུར་ཞེས་སྤྱོད་པ་རྣམས་སྤྱོད་པ། །དེ་དག་གི་ཡང་རྗེས་སུ་བདག་སློབ་སྟེ། །དེ་བས་རྒྱལ་བ་བགྱི་བ་བདག་བགྱིད་ལགས། །སུ་དག་ཐམས་ཅད་མཁྱེན་ཉིད་རབ་ཚོལ་ཞིང་། །རྒྱལ་བ་ལ་ནི་མཆོད་
པ་རྒྱ་ཆེན་བགྱིད། །དེ་དག་གི་ཡང་རྗེས་སུ་བདག་སློབ་ཅིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱི། །སུ་དག་སྟོབས་རྣམས་ཡོངས་སུ་ཚོལ་བ་ན། །རྒྱལ་བ་ལ་ནི་མཆོད་པ་རྒྱ་ཆེན་བགྱིད། །དེ་དག་གི་ཡང་རྗེས་སུ་བདག་སློབ་སྟེ། །རྒྱལ་བ་ལ་ནི་མཆོད་པ་
རྒྱ་ཆེན་བགྱི། །སུ་དག་འཇིགས་པ་མ་མཆིས་རབ་ཚོལ་ཞིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱིད། །དེ་དག་གི་ཡང་རྗེས་སུ་བདག་སློབ་ཅིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱི། །སུ་དག་སོ་སོ་ཡང་དག་རིག་ཚོལ་ཞིང་། །རྒྱལ་བ་ལ་ནི་མཆོད་པ་

49-1-245b

རྒྱ་ཆེན་བགྱིད། །དེ་དག་གི་ཡང་རྗེས་སུ་བདག་སློབ་ཅིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱི། །སུ་དག་དབང་པོ་ལྔ་རྣམས་རབ་ཚོལ་ཞིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱིད། །དེ་དག་གི་ཡང་རྗེས་སུ་བདག་སློབ་ཅིང་། །རྒྱལ་བ་ལ་ནི་མཆོད་པ་རྒྱ་
ཆེན་བགྱི། །བདེ་གཤེགས་རྣམས་ཀྱི་བཅྭ་བརྒྱད་ཆོས་གང་དག །རྒྱལ་བའི་སྐུ་ལ་མ་འདྲེས་མངའ་བ་རྣམས། །སུ་དག་ཚོལ་ཞིང་སངས་རྒྱས་རྣམས་མཆོད་པ། །དེ་དག་རྗེས་སུ་སློབ་ཅིང་མཆོད་པར་བགྱི། །སྤྱོད་ཡུལ་སྤྱོད་དང་དབང་པོ་དྲུག་དག་
པ། །ཡེ་ཤེས་རྣམ་དག་ཏིང་འཛིན་རྣམ་དག་དང་། །ཚུལ་ཁྲིམས་ཏིང་ངེ་འཛིན་རྣམས་རབ་ཚོལ་ཞིང་། །དེར་ནི་བདག་གིས་སངས་རྒྱས་འདྲེན་པ་མཆོད། །དེ་ནས་དགེ་སློང་ལེགས་པར་བརྟགས་སྤྱོད་ཀྱིས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་
བ་འཛིན་ལས་སྟོབས་བཅུའི་བསྔགས་པ་བརྗོད་པ་ཐོས་ནས་བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཀྱང་དེ་བཞིན་སྤོབས་ལགས་སོ། །བདེ་བར་གཤེགས་
པ་བདག་ཀྱང་དེ་བཞིན་སྤོབས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་པར་བརྟགས་སྤྱོད་སྤོབས་པར་གྱིས་ཤིག །དེ་ནས་དགེ་སློང་ལེགས་པར་བརྟགས་སྤྱོད་ཀྱིས་བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་
པར་གནོན་པ་དེ་ལ་སྟོབས་བཅུ་དང་ལྡན་པའི་ཚིགས་སུ་བཅད་པ་དག་གིས་མངོན་པར་བསྟོད་དོ། །བདེ་བར་གཤེགས་པས་བསྐལ་པ་བྱེར་སྤྱད་པས། །མ་ཉམས་འདུས་མ་བྱས་པའི་གནས་བརྙེས་པ། །དེ་ཐོབ་བགྱིད་སླད་འདྲེན་པ་སྤྱད་པར་བགྱི། །མི་མཆོག་ཁྱོད་འདྲའི་སངས་
རྒྱས་ཐོབ་པར་ཤོག །སྤྱད་པ་སྤྱོད་ཚེ་འདས་པའི་རྣམ་པར་འདྲེན། །སངས་རྒྱས་བྱེ་བ་ཁྲག་ཁྲིག་ཁྱོད་ཀྱིས་མཆོད། །རྒྱལ་བ་དེ་དག་རིམ་གྲོ་མཛད་ནས་སུ། །མཚུངས་པ་མ་མཆིས་བླ་མེད་བྱང་ཆུབ་བརྙེས། །འདྲེན་པ་དུང་དང་རྔ་ཆེན་ཁར་རྔ་ཡིས། །རྒྱལ་བ་
བྱེ་བ་སྟོང་དག་རབ་མཆོད་པས། །དེ་སླད་དབྱངས་ཀྱིས་ཁམས་གསུམ་གོ་བར་མཛད། །འགྲོ་བ་རྣམས་ཀྱི་ཡིད་ཀྱང་ཤིན་དུ་ཆགས། །རྒྱུད་སྒྲ་འཇམ་པོ་ཤིན་དུ་དྲངས་སྤྱོད་ཅིང་། །སྟོབས་བཅུའི་མཆོད་རྟེན་རྣམས་ལ་བླངས་པས་ན། །དེ་སླད་རྒྱལ་བ་ཡིད་

49-1-246a

མཆི་དགའ་བ་ཡི། །དབྱངས་ཀྱིས་སེམས་ཅན་ཁྲག་ཁྲིག་རྣམ་པར་འགྲེལ། །བདེ་གཤེགས་རྣམས་ཀྱི་སྤྱན་སྔར་བཞུགས་ནས་སུ། །གླུ་དང་རོལ་མོའི་སྒྲ་སྙན་ཀུན་བླངས་པས། །དེ་སླད་འདྲེན་པ་ཁྱོད་ཀྱི་གསུང་ཡང་མཉེན། །སྐྱེས་པ་བུད་
མེད་རྣམས་ཀྱི་སེམས་ཀྱང་སྡུད། །ཟས་མཆོག་མཚུངས་པ་མ་མཆིས་ཡིད་མཆི་རྣམས། །ཁྱོད་ཀྱིས་རྒྱལ་བ་ཉན་ཐོས་བཅས་རྣམས་གསོལ། །ཟས་སྐོམ་ཤིན་དུ་རྣམ་མང་ལེགས་མཛད་པས། །དེ་སླད་ལོངས་སྤྱོད་མང་པོ་རྣམས་ཀྱང་བརྙེས། །ལ་བ་འཇམ་
པོ་དུ་ཀུལ་ཀ་ཤི་པ། །གསེར་གྱི་ཁ་དོག་དྲི་མེད་ཡིད་མཆི་བ། །ན་བཟའ་རིགས་ཆེ་མཛེས་ལ་ཕུལ་བས་ན། །དེ་སླད་བདེ་གཤེགས་སྐུ་མདོག་བསམ་མི་ཁྱབ། །དགའ་ཞིང་གུས་པ་བཟང་པོ་བསྐྱེད་ནས་སུ། །སྔན་ཆད་སྦྱིན་གནས་བླ་མ་བསྙེན་བཀུར་ཅིང་། །
ཟས་དང་སྐོམ་རྣམས་རྒྱ་ཆེར་ཕུལ་བས་ན། །འཇིག་རྟེན་འདྲེན་པས་མཐོ་བ་བདུན་ཀྱང་བརྙེས། །ལྷ་ཟས་རོ་འདྲ་ཡིད་དུ་མཆི་བ་རྣམས། །རྒྱལ་བ་ཉན་ཐོས་བཅས་ལ་གསོལ་བས་ན། །དེ་སླད་རོ་ཡི་རོ་མཆོག་མཚན་རྣམས་ཀྱང་། །འཇིག་རྟེན་མཁྱེན་པས་
ཡིད་དུ་མཆི་བ་བརྙེས། །རྟག་ཏུ་བདེ་གཤེགས་རྣམས་ཀྱི་མཆོད་རྟེན་ལ། །མེ་ཏོག་དྲི་རབ་དེ་བཞིན་འབྲས་བུའི་མཆོག །ཁ་དོག་ལྡན་པ་འཇམ་ཞིང་མཛེས་པ་ཕུལ། །དེ་སླད་འདྲེན་པས་འབྲས་བུ་མཆོག་བརྙེས་སོ། །དྲི་དང་བྱུག་པ་བདེ་གཤེགས་
མཆོད་རྟེན་ལ། །ཁྱོད་ཀྱིས་རྟག་ཏུ་ཡིད་དུ་མཆི་བ་ཕུལ། །དེ་སླད་བདེ་གཤེགས་སྐུ་ལ་དྲི་དག་ནི། །ཇི་ལྟར་ཙན་དན་སྣོད་བཞིན་རབ་ཏུ་གསུང་། །སྤྲི་ཀ་གུར་ཀུམ་དྲི་རབ་བཟང་བ་དག །བདེ་གཤེགས་མཆོད་རྟེན་དག་ལ་ཕུལ་བས་ན། །དེ་སླད་
སྐུ་ལས་གུར་ཀུམ་སྤོས་རབ་རྣམས། །ཕྱོགས་བཅུ་ཀུན་དུ་དྲི་དེ་ལྡང་བར་གྱུར། །མེ་ཏོག་ཕྲེང་མཆོག་མཛེས་ཤིང་སྣ་ཚོགས་པ། །རྟག་ཏུ་བདེ་བར་གཤེགས་པའི་སྐུ་ལ་བཏགས། །དེ་སླད་ཁྱོད་ཀྱིས་གསུང་འཇམ་བཤད་པ་རྣམས། །ཨུད་པ་
ལ་ཡི་ཕྲེང་བ་བཞིན་དུ་ལེན། །འཇིག་རྟེན་མགོན་པོ་བདེ་གཤེགས་གསུང་བ་ལ། །གཏམ་སྨྲ་རྣམས་ཀྱི་བར་ཆད་མ་མཛད་པས། །དེ་སླད་འཁོར་ལ་ཚིག་རྣམས་སྟོན་པ་ན། །གཞན་གྱིས་བར་ཆད་བགྱི་བ་ཡོངས་མ་མཆིས། །སེམས་ཀྱང་

49-1-246b

ཐམས་ཅད་ཉེ་བར་བཞག་ནས་སུ། །རང་བྱུང་བ་ཡི་ཆོས་རྣམས་བཤད་པ་གསན། །ཡིད་ནི་ཀུན་དུ་གར་ཡང་མ་གཡེངས་པས། །དེ་སླད་སྟོན་པས་བཤད་པ་ཆབ་མི་འཚལ། །སྔོན་གྱི་བདེ་བར་གཤེགས་པས་ཆོས་བསྟན་ལ། །སྨན་
བཞིན་དུ་ནི་འདུ་ཤེས་ཉེར་བཞག་སྟེ། །བདག་ཉིད་ལ་ནི་ནད་པར་འདུ་ཤེས་བསྐྱེད། །དེ་སླད་ཁྱོད་ཀྱི་གསུང་བསྟན་ཀུན་གྱིས་བཟུང་། །བདེ་བར་གཤེགས་པ་ལ་ནི་སྨན་པར་བསྒོམས། །བདག་ཉིད་ལ་ཡང་ནད་པར་འདུ་ཤེས་
བསྐྱེད། །ཆོས་ལ་སྨན་ཡིན་སྙམ་དུ་ཉེར་གཞག་ནས། །ཇི་སྙེད་དུས་ཀྱི་རྒྱལ་བ་ཁྱོད་ཀྱིས་མཆོད། །བདེ་བར་གཤེགས་པ་དག་ལས་ཆོས་གསན་ནས། །གང་གིས་སེར་སྣ་ནམ་ཡང་མ་སྙེན་པ། །དེ་དག་ཐམས་ཅད་དེ་བཞིན་གཤེགས་
པ་ཡིས། །རབ་ཏུ་བསྟན་ཅིང་རྒྱལ་བ་མཉེས་པར་མཛད། །བདེ་བར་གཤེགས་པ་དག་ལས་ཆོས་གསན་པས། །སེར་སྣ་མ་མཆིས་གྱུར་པས་ཤིན་དུ་བསྟན། །དེ་སླད་འདྲེན་པ་འཁོར་ལ་འཆད་པ་ན། །ཁྱོད་ཀྱི་སྤོབས་པ་དག་ནི་ཤིན་དུ་བརྗོད། །
རྫོགས་པའི་བྱང་ཆུབ་དམ་པ་འཚལ་སླད་དུ། །སྔོན་ཆད་ཁྱོད་ཀྱིས་ཆོས་རྣམས་གང་བསྙེན་པ། །འདྲེན་པ་བདག་ཀྱང་དེ་དག་ཡོངས་སུ་ཚོལ། །འདྲེན་པའི་ཡོན་ཏན་ཡང་དག་རབ་སྔགས་པས། །དེས་ནི་རྐང་གཉིས་མཆོག་ཏུ་འགྱུར་བར་ཤོག །
སེམས་ཅན་ཐམས་ཅད་རྣམ་པར་འདྲེན་གྱུར་ཅིག །དེ་ནས་བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་གཉིས་ཀྱིས་མངོན་པར་བསྟོད་པའི་ཚེ་མ་ཐོས་པར་ཡང་མི་དགོངས། 
དམས་པར་ཡང་མི་དགོངས་པ་དེ་ནི་རྒྱ་མཚོ་བཞིན་དུ་བརྟན་པ་ཉིད་དུས་ལས་མི་ཡོལ་ལོ། །དེ་མ་ཐོས་པར་ཡང་མི་དགོངས་དམས་པར་ཡང་མི་དགོངས་ནས་བྱང་ཆུབ་སེམས་དཔའ་ཤིན་དུ་བརྟགས་སྤྱོད་དང་། འགྲོ་བ་འཛིན་དེ་གཉིས་ལ་འདི་སྐད་ཅེས་བཀའ་སྩལ་ཏོ། །
སྐྱེས་བུ་དམ་པ་དག་ལེགས་སོ་ལེགས་སོ། །སྐྱེས་བུ་དམ་པ་དག་དེ་དེ་བཞིན་ནོ། །སྐྱེས་བུ་དམ་པ་ཁྱེད་ཀྱིས་དེ་བཞིན་གཤེགས་པའི་ཡོན་ཏན་དང་ལྡན་པའི་ཚིགས་སུ་བཅད་པ་སྨྲས་པས། སེམས་ཅན་བྱེ་བ་ཁྲག་ཁྲིག་གིས་སངས་རྒྱས་ཀྱི་ཞིང་ཡོངས་སུ་དག་པ་དང་། སེམས་

49-1-247a

ཅན་ཡོངས་སུ་སྨིན་པར་བྱ་བའི་ཕྱིར་དགེ་བའི་རྩ་བ་བསྐྲུན་ཅིང་བསྐྱེད་དེ། ཁམས་སོ་སོར་སོང་བའི་སེམས་ཅན་རྣམས་རིག་ནས་ཇི་ལྟ་བུར་འཐུན་པར་སྤྲུལ་པས་ཆོས་བསྟན་པའི་ཕྱིར་ཡོངས་སུ་བསྔོས་སོ། །འཇམ་དཔལ་འདི་ཇི་སྙམ་
དུ་སེམས། དེའི་ཚེ་དེའི་དུས་ན་དགེ་སློང་ལེགས་པར་བརྟགས་སྤྱོད་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཤིན་དུ་མཐོར་བཞུད་དེ་དེའི་ཚེ་དེའི་དུས་ན་
བྱང་ཆུབ་སེམས་དཔའ་ལེགས་པར་བརྟགས་སྤྱོད་ཅེས་བྱ་བར་གྱུར་ཏོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་
ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་ཅེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་
པོ་སངས་རྒྱས་ཀྱི་ཞིང་བརྗོད་དུ་མེད་པ་ཡོངས་སུ་སྦྱང་བར་འདོད་པ་དང་། ཆོ་འཕྲུལ་རྣམ་པ་མང་པོས་སེམས་ཅན་ཡོངས་སུ་སྨིན་པར་བྱེད་འདོད་པས་དེ་བཞིན་གཤེགས་པའི་ཡོན་ཏན་ཡོངས་སུ་བརྗོད་པ་ལ་རྣལ་འབྱོར་དུ་བྱའོ། །མངོན་པར་བརྩོན་པར་བྱའོ། །
འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པས་བྱང་ཆུབ་སེམས་དཔའི་སྤྱད་པ་སྤྱོད་པ་ན་སངས་རྒྱས་རྗེས་སུ་དྲན་པ་བསྟེན་ཅིང་བསྒོམས་ཏེ་མང་དུ་བྱས་སོ།། །། བམ་པོ་ལྔ་པ། འཇམ་དཔལ་སྔོན་བྱུང་བ་
འདས་པའི་དུས་ན་བསྐལ་པ་དཔག་ཏུ་མེད་ཅིང་བསམ་གྱིས་མི་ཁྱབ་པ་ནས་བརྗོད་དུ་མེད་པའི་བར་དུ་དེའི་ཕ་རོལ་གྱི་ཡང་ཆེས་ཕ་རོལ་དེའི་ཚེ་དེའི་དུས་ན་ཨུད་པ་ལ་འབྱུང་བ་ཞེས་བྱ་བའི་བསྐལ་པ་བྱུང་སྟེ། འཇམ་དཔལ་ཨུད་པ་ལ་འབྱུང་བ་ཞེས་པའི་བསྐལ་
པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་

49-1-247b

བཅོམ་ལྡན་འདས་ཤིན་དུ་ཕྲ་སེམས་ཤེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་ཤིན་དུ་ཕྲ་སེམས་དེའི་གསུང་རབ་ལ་དགེ་སློང་ཞི་བའི་བློ་གྲོས་ཞེས་བྱ་བ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་ཞིག་བྱུང་སྟེ། སངས་རྒྱས་
ཀྱི་ཞིང་དེ་ན་བྱང་ཆུབ་སེམས་དཔའ་ཐམས་ཅད་ཀྱི་མཆོག་ཏུ་གྱུར་ཏོ། །དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་དེ་དེ་བཞིན་གཤེགས་པ་ཤིན་དུ་ཕྲ་སེམས་དེ་ག་ལ་བ་དེར་སོང་ནས་བཅོམ་ལྡན་འདས་ཤིན་དུ་ཕྲ་སེམས་དེའི་ཞབས་ལ་མགོ་བོས་ཕྱག་འཚལ་ནས་
ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་དགེ་སློང་ཞི་བའི་བློ་གྲོས་དེས་བཅོམ་ལྡན་འདས་དེ་བཞིན་གཤེགས་པ་ཤིན་དུ་ཕྲ་སེམས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་གང་གིས་བྱང་ཆུབ་སེམས་དཔའ་སེམས་དཔའ་ཆེན་
པོ་རྣམས་ཕྱིར་མི་ལྡོག་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་ཤིན་དུ་ཕྲ་སེམས་ཀྱིས་དགེ་སློང་ཞི་བའི་བློ་གྲོས་དེ་ལ་འདི་
སྐད་ཅེས་བཀའ་སྩལ་ཏོ། །འདི་ལ་དགེ་སློང་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པ་ཐོབ་པར་འདོད་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཆོས་ཟབ་མོ་ལ་བཟོད་
པར་མངོན་པར་བརྩོན་པར་བྱའོ། །ཟབ་མོ་ལ་བཟོད་པར་མོས་པ་དེ་ནི་བཟོད་པས་ཆོས་དེ་དག་ལ་འདོད་པར་བྱེད་དོ། །འདོད་པར་བྱེད་པས་སྒྲུབ་པར་འགྱུར། སྒྲུབ་པས་ནན་ཏན་བྱེད་དོ། །ཇི་ལྟར་དེ་བཞིན་གཤེགས་པས་གསུངས་པ་དེ་བཞིན་དུ་ཆོས་དེ་དག་ཁོང་དུ་
ཆུད་པར་བྱ་སྟེ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཕྱིར་མི་ལྡོག་པར་འགྱུར་བའི་ཆོས་གཅིག་གོ། །ཞི་བའི་བློ་གྲོས་བྱང་ཆུབ་སེམས་དཔའ་སེམས་དཔའ་ཆེན་པོ་གང་བཟོད་པ་དེ་ལ་བློ་རབ་ཏུ་གནས་པར་འགྱུར་བ་དེ་སེམས་ཅན་རྣམས་
ལ་སྙིང་རྗེ་ཆེན་པོ་གནས་པར་འགྱུར་རོ། །དེ་ཅིའི་ཕྱིར་ཞེ་ན། བཟོད་པ་འདི་ལ་རབ་ཏུ་གནས་པའི་བྱང་ཆུབ་སེམས་དཔའ་ནི་སངས་རྒྱས་རྣམས་ཀྱིས་ཀྱང་བཟོད་པ་འདི་ལས་བསྐྱོད་མི་ནུས་སོ། །འདི་ལྟར་ཡང་ཞི་བའི་བློ་གྲོས་ཆོས་དེ་དག་གི་ཆོས་ཉིད་ནི་འདི་ཡིན་ཏེ། 

49-1-248a

མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དོ། །འདི་ལ་གནས་པའི་བྱང་ཆུབ་སེམས་དཔའ་ནི་ཆོས་ཐམས་ཅད་ལ་ཐེ་ཚོམ་མེད་པར་འགྱུར་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །བཟོད་
པ་འདི་ཐོབ་པས་སངས་རྒྱས་ཞེས་བྱ་སྟེ། འདིས་ཆོས་ཐམས་ཅད་ཀྱི་ངོ་བོ་ཉིད་རྟོགས་པ་ཡིན། འདིས་ཆོས་ཐམས་ཅད་ཀྱི་ཚུལ་མཐོང་བར་བྱ་བ་ཡིན། འདིས་ཆོས་ཐམས་ཅད་ཀྱི་ཡུལ་རྟོགས་པ་ཡིན་ཏེ། དེ་བས་ན་སངས་རྒྱས་ཤེས་བྱའོ། །
འདི་ནི་ཆོས་རྣམས་ཀྱི་ཆོས་ཉིད་མ་ཡིན་ནོ་ཞེས་དེ་ལ་སུས་ཀྱང་བསྒྱུར་བ་འམ་བཟློག་པར་མི་ནུས་སོ། །ཞི་བའི་བློ་གྲོས་འདི་ལྟ་སྟེ། དཔེར་ན་སྐྱེས་པ་འམ་བུད་མེད་ཀྱང་རུང་ཟས་ཟོས་པ་དེ་ལ་སུས་ཀྱང་ཁྱོད་ཀྱིས་ཟས་མ་ཟོས་སོ་ཞེས་བསྒྱུར་མི་ནུས་སོ། །
དེ་ཅིའི་ཕྱིར་ཞེ་ན། དེ་མངོན་སུམ་སྟེ། གཞན་གྱི་རྐྱེན་མ་ཡིན་པ་དེ་བཞིན་དུ་ཞི་བའི་བློ་གྲོས་ཆོས་ཉིད་འདི་ལ་རབ་ཏུ་གནས་པའི་བྱང་ཆུབ་སེམས་དཔའ་ལ་འདི་ནི་ཆོས་རྣམས་ཀྱི་ཆོས་ཉིད་མ་ཡིན་ནོ་ཞེས་སུས་ཀྱང་འཛིན་དུ་གཞུག་པར་མི་ནུས་སོ། །དེ་ཅིའི་ཕྱིར་
ཞེ་ན། གཞན་གྱི་རྐྱེན་གྱིས་མ་ཡིན་གྱི། ཆོས་ཉིད་དེ་ལ་མངོན་སུམ་པའི་ཕྱིར་རོ། །ཞི་བའི་བློ་གྲོས་འདི་ལྟ་སྟེ། དཔེར་ན་སྐྱེས་པའམ་བུད་མེད་ཀྱང་རུང་སྟེ། སྐོམ་འཐུངས་པ་དེ་ལ་ཁྱོད་ཀྱིས་སྐོམ་མ་འཐུངས་སོ་ཞེས་སུས་ཀྱང་བསླུ་བ་འམ་ལོག་པར་འཛིན་དུ་
གཞུག་མི་ནུས་སོ། །དེ་ཅིའི་ཕྱིར་ཞེ་ན། འདི་ལྟར་དེ་ལ་མངོན་སུམ་སྟེ། གཞན་གྱི་རྐྱེན་མ་ཡིན་པ་དེ་བཞིན་དུ་ཆོས་ཉིད་འདི་ལ་རབ་ཏུ་གནས་པའི་བྱང་ཆུབ་སེམས་དཔའ་ཡང་འདི་ཆོས་རྣམས་ཀྱི་ཆོས་ཉིད་མ་ཡིན་ནོ་ཞེས་སུས་ཀྱང་བསྒྱུར་བ་འམ་བསླུ་བར་མི་ནུས་སོ། །
ཞི་བའི་བློ་གྲོས་འདི་ལྟ་སྟེ། དཔེར་ན་བདེན་པ་མཐོང་བའི་ཉན་ཐོས་ལ་འདི་ལམ་མ་ཡིན་ནོ། །འདི་ནི་ལམ་གྱི་འབྲས་བུ་མ་ཡིན་ནོ་ཞེས་དེ་ལ་སུས་ཀྱང་བསླུ་བ་འམ་ལོག་པར་འཛིན་དུ་གཞུག་མི་ནུས་པ་དེ་བཞིན་དུ་ཞི་བའི་བློ་གྲོས་ཆོས་ཉིད་འདི་ལ་གནས་པའི་བྱང་
ཆུབ་སེམས་དཔའ་སེམས་དཔའ་ཆེན་པོ་ཡང་འདི་ཆོས་ཉིད་མ་ཡིན་ནོ་ཞེས་སུས་ཀྱང་དེ་ལ་བསླུ་བ་འམ་ལོག་པར་འཛིན་དུ་གཞུག་མི་ནུས་སོ། །དེ་ཅིའི་ཕྱིར་ཞེ་ན། དེ་ནི་མངོན་སུམ་སྟེ། གཞན་གྱི་རྐྱེན་མ་ཡིན་པས་ཇི་ལྟར་སངས་རྒྱས་ཀྱིས་བསྟན་པ་དེ་བཞིན་དུ་ཆོས་

49-1-248b

རྣམས་ལ་བཟོད་དོ། །ཞི་བའི་བློ་གྲོས་འདི་ཇི་སྙམ་དུ་སེམས། གང་གིས་སོ་སོའི་སྐྱེ་བོ་ཡང་མ་དམིགས། སོ་སོའི་སྐྱེ་བོའི་ཆོས་ཀྱང་མ་ཡིན། ཉན་ཐོས་ཀྱང་མ་ཡིན། ཉན་ཐོས་ཀྱི་ཆོས་ཀྱང་མ་ཡིན། རང་སངས་རྒྱས་ཀྱང་མ་ཡིན། རང་སངས་རྒྱས་ཀྱི་
ཆོས་ཀྱང་མ་ཡིན། བྱང་ཆུབ་སེམས་དཔའ་ཡང་མ་ཡིན། བྱང་ཆུབ་སེམས་དཔའི་ཆོས་ཀྱང་མ་ཡིན། སངས་རྒྱས་ཀྱང་མ་ཡིན། སངས་རྒྱས་ཀྱི་ཆོས་ཀྱང་མ་དམིགས་ན་དེ་ཆོས་གང་ལ་ཡང་གནས་པ་མ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །
དེ་ཅིའི་སླད་དུ་ཞེ་ན། འདི་ལྟར་དེས་གང་ལ་གནས་པར་འགྱུར་བའི་ཆོས་དེའང་མི་དམིགས་ཏེ། ཆོས་རྣམས་མི་དམིགས་པ་ནི་མི་དམིགས་པ་ཞེས་བགྱིའོ། །བཅོམ་ལྡན་འདས་དེས་བཀའ་སྩལ་པ། ཞི་བའི་བློ་གྲོས་ལེགས་སོ་ལེགས་སོ། །ཞི་བའི་བློ་གྲོས་འདི་ལྟ་སྟེ། 
དཔེར་ན་ནམ་མཁའ་ནི་ཅི་ལ་ཡང་མི་གནས་པ་དེ་བཞིན་དུ་ཞི་བའི་བློ་གྲོས་ཆོས་ཐམས་ཅད་ཀྱང་མི་གནས་པའོ། །ཞི་བའི་བློ་གྲོས་ཆོས་ཐམས་ཅད་ནི་ནམ་མཁའ་དང་མཚུངས་པ་སྟེ་མི་གནས་པའོ། །ཞི་བའི་བློ་གྲོས་རྗེས་སུ་འཐུན་པའི་བཟོད་པ་འདི་ནི་གསུམ་སྟེ། 
གསུམ་གང་ཞེ་ན། ཆུང་ངུ་རྗེས་སུ་འཐུན་པའི་བཟོད་པ་དང་། འབྲིང་དུ་རྗེས་སུ་འཐུན་པའི་བཟོད་པ་དང་། ཆེར་རྗེས་སུ་འཐུན་པའི་བཟོད་པའོ། །ཆུང་ངུ་རྗེས་སུ་འཐུན་པའི་བཟོད་པ་ནི་ཤུགས་དང་ལྡན་པའི་ཏིང་ངེ་འཛིན་དུ་བཤད་པར་བྱ། འབྲིང་དུ་རྗེས་སུ་འཐུན་
པའི་བཟོད་པ་ནི་ཞི་གནས་ཀྱི་ཏིང་ངེ་འཛིན་དུ་བཤད་པར་བྱ། ཆེར་རྗེས་སུ་འཐུན་པའི་བཟོད་པ་ནི་ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་དུ་བཤད་པར་བྱའོ། །དེ་ཅིའི་ཕྱིར་ཞེ་ན། ཆུང་ངུ་རྗེས་སུ་འཐུན་པའི་བཟོད་པ་ལས་ནི་དགེ་བའི་རྩ་བའི་ཤུགས་སྐྱེའོ། །འབྲིང་དུ་རྗེས་སུ་འཐུན་པའི་བཟོད་པ་ལས་ནི་རབ་ཏུ་ཞི་བ་དམིགས་པར་
འགྱུར་རོ། །ཆེར་རྗེས་སུ་འཐུན་པའི་བཟོད་པ་ལས་ནི་རབ་ཏུ་སྣང་བ་ལ་སེམས་འཇུག་སྟེ། དེའི་དམིགས་པ་ཐམས་ཅད་ཡོངས་སུ་རྟོགས་པར་འགྱུར་རོ། ཆོས་ཉིད་ལ་རབ་ཏུ་གནས་པས་ན་དོན་རྣམས་ལེགས་པར་ཡོངས་སུ་ཟིན་པར་འགྱུར་རོ། །དེ་ནི་དོན་སོ་
སོ་ཡང་དག་པར་རིག་པ་ཡིན་ནོ། །དེས་ཆོས་ཐམས་ཅད་ཀྱི་མཚན་ཉིད་གཅིག་ཏུ་རྟོགས་པར་འགྱུར་ཏེ། དེ་ནི་དེའི་དོན་སོ་སོ་ཡང་དག་པར་རིག་པ་ཡིན་ནོ། །ཆོས་དེ་རྣམས་ཀྱང་སྐྱེ་བོ་རྣམས་ཀྱི་ངེས་པའི་ཚིག་བཞིན་དུ་འཆད་དེ། ངེས་པའི་ཚིག་དེ་ལ་ཡང་མངོན་པར་ཞེན་

49-1-249a

པར་མི་བྱེད་དོ། །སྐྱེ་བོ་དེ་དང་དེ་དག་ངེས་པའི་ཚིག་དེ་དག་ལ་མོས་པར་བྱས་ཀྱང་དེ་ལ་མངོན་པར་ཞེན་པར་མི་བྱེད་པ་དེ་ནི་དེའི་ངེས་པའི་ཚིག་སོ་སོ་ཡང་དག་པར་རིག་པ་ཡིན་ནོ། །དེའི་ངེས་པའི་ཚིག་ལ་དུས་ཇི་ལྟ་བ་བཞིན་དུ་སྤོབས། ཇི་
ལྟར་ཆོས་ཉན་པ་རྣམས་ཀྱིས་གོ་བ་དེ་ལྟ་བུར་སྤོབས། །ཆོས་རྣམས་ཀྱི་ཆོས་ཉིད་ཇི་ལྟ་བ་དེ་བཞིན་སྤོབས། ཆོས་རྣམས་ཀྱི་ངོ་བོ་ཉིད་སྟོང་པ་ཇི་ལྟ་བ་བཞིན་སྤོབས། ཇི་ལྟར་ཆོས་རྣམས་མི་སྐྱེ་མི་འགག་པ་དེ་བཞིན་སྤོབས། ཇི་ལྟར་ཆོས་རྣམས་འགྲོ་བ་ཡང་
མེད། འོང་བ་ཡང་མེད་པ་དེ་བཞིན་སྤོབས། ཇི་ལྟར་ཆོས་རྣམས་འཆི་འཕོ་བ་འང་མེད། སྐྱེ་བ་འང་མེད་པ་དེ་བཞིན་སྤོབས། ཇི་ལྟར་ཆོས་རྣམས་ཡོད་པ་མ་ཡིན་པ་དེ་ལྟ་བུར་སྤོབས། ཇི་ལྟར་ཆོས་རྣམས་མི་རིག་ཅིང་མི་སྣང་བ་དེ་ལྟ་བུར་སྤོབས། 
ཇི་ལྟར་འཆད་པའང་མེད་ཉན་པའང་མི་དམིགས་པ་དེ་ལྟ་བུར་སྤོབས། ཇི་ལྟར་ལས་ཀྱང་མེད་ལས་ཀྱི་རྣམ་པར་སྨིན་པ་ཡང་མེད་པ་དེ་ལྟར་སྤོབས། ཇི་ལྟར་འཁོར་བ་ཡང་མེད་མྱ་ངན་ལས་འདས་པ་ཡང་མི་དམིགས་པ་དེ་ལྟ་བུར་སྤོབས། ཇི་ལྟར་གང་ཡང་
འཁོར་བ་ཡང་མེད། མྱ་ངན་ལས་འདས་པར་འགྱུར་བའང་མི་དམིགས་པ་དེ་ལྟ་བུར་སྤོབས། ཇི་ལྟར་བྱང་ཆུབ་དང་བྱང་ཆུབ་པར་བྱ་བ་མི་དམིགས་པ་དེ་ལྟ་བུར་སྤོབས། ཇི་ལྟར་ཀུན་ནས་ཉོན་མོངས་པ་མེད་པ་དང་། རྣམ་པར་བྱང་བའང་མི་དམིགས་པ་དེ་ལྟ་བུར་
སྤོབས། ཇི་ལྟར་ཆོས་གང་ལའང་ཐོབ་པ་མི་དམིགས་པ་དེ་ལྟ་བུར་སྤོབས། ཇི་ལྟར་སོ་སོའི་སྐྱེ་བོའི་ཆོས་རྣམས་སྤོང་བ་མེད་ཅིང་ཉན་ཐོས་ཀྱི་ཆོས་རྣམས་ཀྱང་ཐོབ་པ་མེད་པ་དེ་ལྟ་བུར་སྤོབས། ཇི་ལྟར་ཉན་ཐོས་ཀྱི་ཆོས་རྣམས་ལས་མི་འདའ་ཞིང་རང་སངས་རྒྱས་ཀྱི་ཆོས་རྣམས་ཀྱང་ཐོབ་
པར་མི་འགྱུར་བ་དེ་ལྟ་བུར་སྤོབས། ཇི་ལྟར་རང་སངས་རྒྱས་ཀྱི་ཆོས་རྣམས་ལས་མི་འདའ་ཞིང་སངས་རྒྱས་ཀྱི་ཆོས་རྣམས་ཀྱང་རྙེད་པར་མི་འགྱུར་བ་དེ་ལྟར་སྤོབས་སོ། །ཇི་ལྟར་སངས་རྒྱས་ཀྱི་ཆོས་རྣམས་ཀྱང་མི་འདོར་ཞིང་མྱ་ངན་ལས་ཀྱང་ཡོངས་སུ་མི་འདའ་བ་དེ་ལྟར་སྤོབས་
ཏེ། དེ་ནི་དེ་སྤོབས་པ་སོ་སོ་ཡང་དག་པ་རིག་པ་ཡིན་ནོ། །སྤོབས་པ་སོ་སོ་ཡང་དག་པར་རིག་པ་དེ་ཡང་ཆོས་གང་ལ་ཡང་སྤོབས་པར་འགྱུར་བ་མེད་དེ། དེ་ལྟར་ན་ཆེར་རྗེས་སུ་འཐུན་པའི་བཟོད་པ་དེ་ཐོབ་པས་ཐམས་ཅད་ལ་དབང་བྱེད་པ་སྒྲུབ་པར་འགྱུར་རོ། །ཆེར་རྗེས་སུ་འཐུན་

49-1-249b

པའི་བཟོད་པ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་ལ་གནས་ནས་དེ་རེ་ཤིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་ཏེ། སངས་རྒྱས་རྣམས་
ཀྱི་བྱ་བ་རྣམས་ཀྱང་བྱེད་དོ། །དེ་བཞིན་གཤེགས་པའི་ཆོ་ག་དང་སྤྱོད་ཡུལ་ཅི་འདྲ་བ་བྱང་ཆུབ་སེམས་དཔའ་དེའི་ཆོ་ག་དང་སྤྱོད་ཡུལ་ཡང་དེ་འདྲ་བར་འགྱུར་རོ། །དེ་བཞིན་གཤེགས་པའི་བཞུད་པ་དང་ལྡོག་པ་ཅི་འདྲ་བ་དེའི་འགྲོ་བ་དང་ལྡོག་པ་ཡང་དེ་དང་འདྲ་
བར་འགྱུར་རོ། །ཇི་ལྟ་བུར་དེ་བཞིན་གཤེགས་པའི་གཟིགས་པ་དང་། རྣམ་པར་གཟིགས་པ་དང་། སྨྱང་བ་དང་། བསྐུམ་པ་དང་། ཆོས་གོས་སྣམ་སྦྱར་དང་། ཆག་རྐང་དང་། ལྷུང་བཟེད་བསྣམས་པ་དང་། ཟོས་པ་དང་། འཐུངས་པ་ཅི་འདྲ་བར་དེའི་ལྟ་བ་དང་། 
ཀུན་དུ་ལྟ་བ་ནས་ཉལ་བ་དང་། སྨྲ་བ་དང་། ཅང་མི་ཟེར་བ་དེ་འདྲ་བར་འགྱུར་རོ། །ཀུན་དུ་སྤྱོད་པ་གང་གིས་དེ་བཞིན་གཤེགས་པ་ཀུན་དུ་སྤྱོད་པ་དེའི་སྤྱོད་པའང་དེ་འདྲ་བར་འགྱུར་རོ། །ཆེར་འཐུན་པའི་བཟོད་པ་ཐོབ་པས་ལུས་དེ་ཉིད་ཀྱིས་བྱང་ཆུབ་མངོན་པར་རྫོགས་པར་
སངས་རྒྱས་ནས་འདོད་ན་བསྐལ་པ་བརྗོད་དུ་མེད་པའི་བར་དུ་འདུག་གོ། །དེ་ལྟར་ཆེར་འཐུན་པའི་བཟོད་པ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སངས་རྒྱས་ཤེས་བྱའོ། །དེ་སྐད་ཅེས་བཀའ་སྩལ་པ་དང་། དགེ་སློང་ཞི་བའི་བློ་གྲོས་ཀྱིས་བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་ཚེ་དང་པོ་སེམས་བསྐྱེད་པའི་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དང་པོ་སེམས་བསྐྱེད་ན་ཅི་དང་པོ་སེམས་བསྐྱེད་པ་དེ་ཉིད་ཀྱིས་བྱང་ཆུབ་སེམས་དཔའ་ལགས་སམ། བཀའ་སྩལ་
པ། ཞི་བའི་བློ་གྲོས་དེ་ནི་མ་ཡིན་ནོ། །ཞི་བའི་བློ་གྲོས་སེམས་གང་གིས་ཐོག་མ་ཆོས་ལ་ངེས་པར་འགྱུར་བའི་སེམས་དེས་དང་པོ་སེམས་བསྐྱེད་པའི་བྱང་ཆུབ་སེམས་དཔའ་ཞེས་བྱའོ། །དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་དེ་བཞིན་གཤེགས་པ་ཤིན་
དུ་ཕྲ་སེམས་དེ་ལ་བཟོད་པའི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཆོས་གང་སྐྱེ་བ་མ་མཆིས་འབྱུང་མ་མཆིས། །འཆི་འཕོ་མ་མཆིས་རྒ་བར་མི་འགྱུར་བ། །སྐྱེས་བུ་རྒྱལ་བ་སེང་གེ་དེ་སྟོན་ཅིང་། །དྲང་སྲོང་ཆེན་པོས་སེམས་

49-1-250a

ཅན་དེ་ལ་བཀོད། །གང་ལ་དངོས་པོ་ཅི་ཡང་མ་མཆིས་ཤིང་། །གཞན་གྱི་དངོས་པོའང་སུས་ཀྱང་མ་རྙེད་པ། །ནང་ན་མ་ལགས་སླད་རོལ་དག་ན་ཡང་། །དངོས་པོ་མི་རྙེད་དེ་ལ་མགོན་པོས་བཀོད། །བདེ་བར་གཤེགས་པས་ཞི་བའི་བློ་གསུངས་ཀྱང་། །
འགྲོ་བ་གང་ཡང་རྙེད་པར་མི་འགྱུར་ཏེ། །དེ་དག་འགྲོ་ལས་གྲོལ་བར་རྣམ་པར་གསུངས། །གྲོལ་ནས་སེམས་ཅན་མང་པོ་རབ་ཏུ་འགྲོལ། །ཆོས་ཀུན་བདག་མ་མཆིས་པར་སྟོན་མཛད་ཅིང་། །སེམས་ཅན་འཛིན་ལས་འཇིག་རྟེན་རྣམ་པར་འགྲོལ། །བདག་ཉིད་འགྲོ་
ལས་གྲོལ་ཞིང་འགྲོ་གྲོལ་བས། །དེ་སླད་ཕ་རོལ་གཤེགས་ཀྱང་རྒལ་མ་མཆིས། །དྲང་སྲོང་ཆེན་པོ་སྲིད་པའི་ཕ་རོལ་བྱོན། །ཕ་རོལ་གཤེགས་པའང་གང་ཡང་རྙེད་མི་འགྱུར། །ཕ་རོལ་མ་མཆིས་ཚུ་རོལ་མ་མཆིས་ན། །ཕ་རོལ་སོང་ངོ་ཞེས་ཀྱང་གསུང་དུ་བརྗོད། །
གང་གིས་ཚིག་ཏུ་སྨྲ་བ་དེ་མ་མཆིས། །གང་སྨྲས་དེ་ཡི་ཚིག་ཀྱང་ཡོང་མ་མཆིས། །གང་ལ་སྨྲས་པ་དེ་ཡང་རྙེད་མི་འགྱུར། །གང་གིས་རིག་པ་དེ་ཡང་མཆིས་མ་ལགས། །ལོག་པར་རྟོག་ལ་ཆགས་པའི་དབང་གིས་སུ། །འདིར་ནི་འགྲོ་བ་འདི་ཀུན་རབ་ཏུ་འཁྱམས། །མི་གང་
ཞིག་གིས་ཞི་བའི་ཆོས་རིག་པ། །དེས་ནི་རང་བྱུང་དེ་བཞིན་གཤེགས་པ་མཐོང་། །ཆོས་མཆོག་ཞི་བའི་རྣམས་ཀྱང་རབ་ཏུ་རྟོགས། །དགའ་བ་རྙེད་ནས་སེམས་ཅན་ཚིམ་པར་བགྱིད། །ཉོན་མོངས་རྒྱལ་ནས་དེ་ནི་རྒྱལ་བར་འགྱུར། །བདག་ཉིད་རྒྱལ་བར་གྱུར་ཅིང་བདག་མི་གནས། །
དེས་ནི་རྒྱལ་བའི་བྱང་ཆུབ་རབ་ཏུ་རྟོགས། །སངས་རྒྱས་ནས་ནི་འགྲོ་བ་རྟོགས་པ་མཛད། །གང་ནས་བླ་མེད་བྱང་ཆུབ་མཆི་བ་ཡི། །ཤུལ་དེར་སེམས་ཅན་ལམ་གོལ་ཞུགས་པ་བཀྱེ། །རྒྱལ་བ་ཞི་གནས་འགྲོ་བ་ཞི་བར་མཛད། །འབྱུང་བའི་ངོ་བོ་རྣམ་པར་གྲོལ་བར་བསྒོམ། །སེམས་
ཅན་གང་དག་ཤིན་དུ་ལོག་གྱུར་པ། །ཡེ་ཤེས་ལྡན་པས་མི་ཤེས་ཤེས་པར་མཛད། །འདས་པའི་དྲང་སྲོང་ཆེན་པོ་གང་བྱུང་སྟེ། །རྒྱལ་བ་དེ་དག་གི་ཡང་ཤུལ་མཆོག་འདི། །དྲང་སྲོང་མཆོག་ཀྱང་དེའི་ཤུལ་ནས་གཤེགས། །མ་བྱོན་གང་དེ་རྣམས་ཀྱང་གཤེགས་པར་
འགྱུར། །དེ་བཞིན་ཆོས་འདི་རབ་ཏུ་སུས་རྟོགས་པ། །དེ་ལ་གལ་ཏེ་སངས་རྒྱས་བྱེ་སྟོང་གིས། །འདི་ནི་ཚུལ་མ་ཡིན་ཞེས་གསུངས་ན་ཡང་། །ཁྱེད་ནི་རྒྱལ་བ་མ་ཡིན་དེ་ཞེས་སྨྲ། །གཞན་གྱི་བློ་ཕྱིར་གང་དག་མི་མཆི་བ། །དེ་ཡི་སེམས་ནི་དེ་ལས་ཡོངས་མི་འགྱུར། །རྒྱལ་བའི་ཚུལ་

49-1-250b

ལ་བདག་ནི་མངོན་སུམ་གྱུར། །མི་ཡི་རྒྱལ་པོ་ཁྱོད་ནི་མི་གསུང་བཞུགས། །བདེ་བར་གཤེགས་པས་ཆོས་གང་རབ་བཤད་པ། །དེ་ལ་བདག་ནི་གང་ལ་འང་དོགས་མ་མཆིས། །བདག་གི་ཆོས་ཉིད་འདི་འཚལ་འཕྲོག་མི་ནུས། །གང་གིས་བཟོད་པ་གསུམ་པོ་དེ་འཚལ་བ། །དེ་ནི་ཇི་
ལྟར་རྒྱལ་བའི་སྤྱོད་བཞིན་ཏེ། །མཆི་བ་དང་ནི་སླར་མཆི་ཉལ་བ་དང་། །སྨྲ་ཞིང་འཆག་པ་དག་ཀྱང་སྟོན་པ་བཞིན། །དེ་ཡི་སྤྱོད་ལམ་རྣམས་ཀྱང་དེ་དང་འདྲ། །ལུང་སྟོན་པ་ཡང་རྒྱལ་བའི་རང་བཞིན་ཏེ། །རྒྱལ་བའི་བློ་གྲོས་ལ་ནི་དེ་ཡང་གནས། །འགྲོ་བ་ཐམས་ཅད་ཀྱིས་ནི་བསྐྱོད་
མི་ནུས། །ཟླ་བ་སྐར་བཅས་ས་ལ་ལྷུང་ཡང་གདའ། །དེ་ལ་རྣམ་པར་འགྱུར་བ་ཡོང་མི་འབྱུང་། །ནམ་མཁར་འབྲས་ཆགས་ལྷུན་པོ་རྡིབ་ཀྱང་གདའ། །དེ་ཡི་ཆོས་ཉིད་གཞན་དུ་ཡོད་མི་འགྱུར། །སྐྱེས་བུ་དེས་ནི་བཟོད་པ་འདི་རྙེད་ནས། །སེམས་ཅན་རིག་པར་མཛད་པའི་
སངས་རྒྱས་འགྱུར། །གང་གིས་སངས་རྒྱས་རང་འབྱུང་འགྱུར་བ་ཡི། །དེ་འདྲ་བ་ཡི་ཆོས་ཉིད་དེས་རྟོགས་སོ། །རྒྱལ་ལས་མངོན་སུམ་བདག་གིས་འདི་ཐོས་ཏེ། །བཟོད་པ་འདི་རྙེད་ནས་ནི་ཕྱིར་མི་ལྡོག །སངས་རྒྱས་གྱུར་ནས་རྣམ་པར་རྟོགས་བགྱིད་འགྱུར། །འགྲོ་བ་རྣམས་ལ་
འང་ཆོས་འདི་གོ་བར་མཛད། །ཇི་ལྟར་བདག་གི་ཆོས་ཉིད་མཐོང་བའི་རྣམས། །དེ་ནི་གཞན་ལ་རབ་ཏུ་བཤད་པར་བགྱི། །རྒྱལ་བ་རྣམས་ཀྱི་བློ་གྲོས་བསྟན་བགྱི་སྟེ། །སེམས་ཅན་མི་རྟོགས་རྣམས་ཀྱང་རྟོགས་པར་བགྱི། །རྒྱལ་བ་རྣམས་ཀྱིས་ཇི་ལྟར་ཆོས་གཟིགས་པ། །དེ་འདྲའི་ཆོས་
ཉིད་རྣམས་ནི་རབ་ཏུ་བསྟན། །གང་ལ་གནས་པས་རང་འབྱུང་འགྱུར་བ་ཡི། །དེ་རིང་བླ་མེད་བཟོད་པ་བདག་གིས་ཐོབ། །རང་བྱུང་ཐུབ་དབང་དེ་ལ་སྐྱབས་སུ་མཆི། །འཇིག་རྟེན་སྨན་སླད་སྤྱོད་པ་བདག་གིས་སྤྱད། །རང་བྱུང་རྒྱལ་བའི་ཞིང་རྣམས་ཡོངས་སུ་སྤྱད། །འགྲོ་བ་སྡུག་
བསྔལ་དུབ་པ་རབ་ཏུ་དགྲོལ། །དེ་བཞིན་རྒྱལ་བའི་རྗེས་སུ་སློབ་བགྱིད་ཅིང་། །སེམས་ཅན་འགྲོ་བ་ཐོབ་པར་རྣམ་པར་གྲོལ། །སངས་རྒྱས་ཚུལ་ལ་བདག་གིས་ཚུལ་ཡང་འཚལ། །སེམས་ཅན་སྤྱོད་པ་འདི་འདྲ་བདག་གིས་སྤྱད། །ཞི་བའི་བློ་གྲོས་ཆོས་ཉིད་འདི་རིག་ནས། །ཞིང་
བརྒྱ་དག་ཏུ་སྤྲུལ་པ་སྤྲུལ་པ་བགྱིས། །སེམས་ཅན་ཀུན་གྱི་ཚུལ་ལ་རབ་ཞུགས་ནས། །སོ་སོར་འཐུན་པར་སྤྲུལ་པ་ཤིན་དུ་སྤྲུལ། །དེས་ནི་བསམ་མི་ཁྱབ་པའི་ཞིང་རྣམས་སྦྱངས། །སེམས་ཅན་བསམ་མི་ཁྱབ་ལ་གདམས་ངག་སྩལ། །ཆོས་ཚུལ་ཤིན་དུ་བཟང་བ་འཛིན་

49-1-251a

དུ་སྩལ། །སྟོན་པའི་བློ་གྲོས་ལ་ནི་ཐམས་ཅད་བཙུད། །དེ་ནས་དགེ་སློང་ཞི་བའི་བློ་གྲོས་དེས་ཆེར་རྗེས་སུ་འཐུན་པའི་བཟོད་པ་རབ་ཏུ་ཐོབ་ནས་བརྗོད་དུ་མེད་པའི་ཞིང་རྣམས་སྤྲུལ་པས་ཀུན་དུ་གང་བར་བྱས་སོ། །འཇམ་དཔལ་དེའི་ཚེ་དེའི་དུས་ན་དགེ་སློང་
ཞི་བའི་བློ་གྲོས་ཤེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཡིད་གཉིས་དང་ཐེ་ཚོམ་ཟ་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་ཚེ་དེའི་དུས་ན་དགེ་སློང་ཞི་བའི་བློ་གྲོས་ཞེས་བྱ་བར་གྱུར་
ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་མི་སྐྱེ་བའི་ཆོས་ལ་བཟོད་པ་ཐོབ་པར་འདོད་པས་བརྩོན་འགྲུས་བརྩམ་མོ། །ཇི་ལྟར་ན་བདག་གི་སེམས་སྤྱོད་ཡུལ་མ་ཡིན་པ་ལ་མི་སྤྱོད་ཅིང་ཇི་ལྟར་ན་བདག་གི་སེམས་ཆོས་ཉིད་ཀྱིས་ལམ་གོལ་བ་ལ་གནས་
པར་མི་འགྱུར་སྙམ་དུ་དེ་སེམས་མི་གཡེང་བར་བྱ་བའི་ཕྱིར་བརྩོན་འགྲུས་རྩོམ་ཞིང་བརྩོན་འགྲུས་བརྩམས་ཏེ་གནས་པའི་བྱང་ཆུབ་སེམས་དཔའ་ལ་མྱུར་དུ་མི་སྐྱེ་བའི་ཆོས་ལ་བཟོད་པ་སྐྱེ་བར་འགྱུར་རོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད་གྲངས་མེད་པ་ནས་
བརྗོད་དུ་མེད་པའི་བར་དེའི་ཕ་རོལ་གྱི་ཡང་ཆེས་ཕ་རོལ་ན་དེའི་ཚེ་དེའི་དུས་ན་བསྐལ་པ་རྟག་གི་འོད་ཅེས་བྱ་བ་བྱུང་སྟེ། བསྐལ་པ་རྟག་གི་འོད་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། 
འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དྲི་མ་མེད་པའི་ཟླ་འོད་གཟི་བརྗིད་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མ་
མེད་པའི་ཟླ་འོད་གཟི་བརྗིད་རྒྱལ་པོ་དེའི་སྟན་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་ཞེས་བྱ་བ་བྱུང་སྟེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་དེས་བརྩོན་འགྲུས་རྩོམས་པ་བདག་དང་འདྲ་བ་མཐོང་སྟེ། 
དེའི་ཚེ་ན་བཅོམ་ལྡན་འདས་དེའི་སངས་རྒྱས་ཀྱི་ཞིང་ན་བྱང་ཆུབ་སེམས་དཔའ་ཚངས་པར་སྤྱོད་པ་ཇི་སྙེད་པ་དེ་དག་གི་ནང་ན་བྱང་ཆུབ་སེམས་དཔའ་བརྩོན་འགྲུས་བརྩམས་པ་དེ་མཆོག་ཏུ་བརྗོད་དོ། །དེ་ནས་དེ་བཞིན་གཤེགས་པ་དྲི་མ་མེད་པའི་ཟླ་འོད་གཟི་བརྗིད་རྒྱལ་པོ་འཁོར་བརྒྱ་

49-1-251b

སྟོང་དུ་མས་བསྐོར་ཅིང་མདུན་གྱིས་བལྟས་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་སྟན་ལས་ལངས་ཏེ། གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ། བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་
པ་དང་། བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པའི་ཟླ་འོད་གཟི་བརྗིད་རྒྱལ་པོས་བྱང་ཆུབ་སེམས་དཔའ་བརྩོན་འགྲུས་བརྩམས་པ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ལ་ཅི་འདོད་པ་དྲིས་ཤིག་དང་། དྲིས་པ་དེ་དང་དེའི་ལུང་བསྟན་པས་སེམས་རངས་པར་བྱའོ། །དེ་ནས་བྱང་ཆུབ་སེམས་དཔའ་བརྩོན་འགྲུས་བརྩམས་པས་བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པའི་ཟླ་འོད་གཟི་བརྗིད་རྒྱལ་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་བརྩོན་འགྲུས་བརྩམས་པ་བརྩོན་འགྲུས་བརྩམས་པ་ཞེས་བགྱི་བ་བཅོམ་ལྡན་འདས་ཇི་ཙམ་གྱིས་ན་བྱང་ཆུབ་སེམས་དཔའ་བརྩོན་འགྲུས་བརྩམས་པ་ལགས་དེ་སྐད་ཅེས་གསོལ་པ་དང་། དེ་བཞིན་གཤེགས་པ་དྲི་མ་མེད་པའི་ཟླ་འོད་གཟི་བརྗིད་རྒྱལ་པོས་བྱང་ཆུབ་སེམས་
དཔའ་བརྩོན་འགྲུས་བརྩམས་པ་ལ་འདི་སྐད་ཅེས་བཀའ་སྩལ་ཏོ། །ལེགས་སོ་ལེགས་སོ། །རིགས་ཀྱི་བུ་ཁྱོད་དེ་བཞིན་གཤེགས་པ་ལ་དེ་ལྟ་བུའི་དོན་འདྲི་བ་ནི་རིགས་ཀྱི་བུ་ཁྱོད་སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་
མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་ཞུགས་པ་སྟེ། རིགས་ཀྱི་བུ་དེའི་ཕྱིར་ཤིན་དུ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས་བྱང་ཆུབ་སེམས་དཔའ་བརྩོན་འགྲུས་བརྩམས་པས་བཅོམ་ལྡན་འདས་
དེའི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ནམ་བྱང་ཆུབ་སེམས་དཔའ་མཉམ་པ་ཉིད་རབ་ཏུ་རྟོགས་པར་བྱ་བའི་ཕྱིར་བརྩོན་པ་མི་འདོར་བར་གྱུར་ཏེ། སྐད་ཅིག་ཀྱང་མི་འདུག་ཅིང་འདི་ལྟར་ཆོས་ཐམས་ཅད་ལ་རབ་ཏུ་རྟོགས་པར་

49-1-252a

བྱ་བའི་ཕྱིར་བློ་གྲོས་གཞན་དུ་མི་འགྱུར་ཏེ་ཡིད་གཞན་དུ་མི་འཇུག་གོ། །དེ་ཙམ་གྱིས་རིགས་ཀྱི་བུ་བྱང་ཆུབ་ཀུན་བསྒྲུབ་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་ཡིན་ནོ། །གཞན་ཡང་རིགས་ཀྱི་བུ་བྱང་ཆུབ་སེམས་
དཔའ་སེམས་དཔའ་ཆེན་པོ་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བརྩོན་འགྲུས་རྗེས་སུ་དྲན་ཏེ། དེ་ལྟར་སྔོན་གྱི་དེ་བཞིན་གཤེགས་པ་དེ་དག་བྱང་ཆུབ་སེམས་དཔའི་སྤྱད་པ་སྤྱོད་པ་ན་ལུས་དང་སེམས་གཉིས་ཡང་དག་
པར་རབ་ཏུ་བཟུང་ནས་སྦྱིན་པ་སྦྱིན་པ་དེ་བཞིན་དུ་བདག་གིས་ཀྱང་སྦྱིན་པ་སྦྱིན་ནོ། །དེ་ལྟར་སྦྱིན་པ་ན་དེ་བཞིན་དུ་རབ་ཏུ་རྟོགས་ན་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་དག་པར་འགྱུར་རོ། །ཇི་ལྟར་ན་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ཞེ་ན། འདི་ལྟ་སྟེ། དེ་ནི་སྦྱིན་པ་དང་། 
སྦྱིན་པ་པོ་དང་། ལེན་པ་དང་། ལེན་པ་པོ་མི་དམིགས་པ་སྟེ། དེ་ནི་དེའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །སངས་རྒྱས་ཀྱི་ཞིང་བརྗོད་དུ་མེད་པ་དེ་དག་གིས་ཡོངས་སུ་སྦྱང་ངོ་སྙམ་པ་ནི་ལུས་དང་སེམས་ཡང་དག་པར་བཟུང་བ་ཡིན་ཏེ། འདི་ལྟར་སངས་རྒྱས་ཀྱི་ཞིང་བརྗོད་དུ་མེད་པ་
ཡོངས་སུ་དག་པར་བྱའོ་སྙམ་པ་ནི་ལུས་དང་སེམས་ཡང་དག་པར་བཟུང་བ་ཡིན་ནོ། །འདི་ལྟར་བདག་གིས་བརྗོད་དུ་མེད་པའི་སེམས་ཅན་རྣམས་ཡོངས་སུ་སྨིན་པར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་བདག་གིས་དེ་བཞིན་གཤེགས་
པའི་སྟོབས་རྣམས་ཡོངས་སུ་རྫོགས་པར་བྱའོ་སྙམ་པ་ནི་ལུས་དང་སེམས་ཡང་དག་པར་བཟུང་བ་ཡིན་ནོ། །འདི་ལྟར་བདག་གིས་དེ་བཞིན་གཤེགས་པའི་མི་འཇིགས་པ་རྣམས་ཡོངས་སུ་བཟུང་བར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་དེ་བཞིན་གཤེགས་
པའི་དབང་པོ་རྣམས་ཡོངས་སུ་གཟུང་ངོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཡོངས་སུ་གཟུང་བ་ཡིན་ནོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་ཐམས་ཅད་མཁྱེན་
པ་ཡོངས་སུ་བཟུང་བ་ཡིན་ནོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་ཐབས་མཁས་པ་ལ་བསླབ་པར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་སེམས་ཅན་རྣམས་ཀྱི་བསམ་པ་ལ་འཇུག་པར་བྱའོ་སྙམ་

49-1-252b

པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་དུས་ཤེས་པ་ལ་བསླབ་པོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་ཚོད་ཤེས་པ་དང་། དོན་ཤེས་པ་དང་། ཆོས་ཤེས་པ་དང་། བདག་ཤེས་པ་དང་། ཕ་རོལ་ཤེས་པ་དང་། 
གང་ཟག་མཆོག་དང་། མཆོག་མ་ཡིན་པ་ཤེས་པ་ལ་བསླབ་པར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །དེ་ལྟར་ཡོངས་སུ་སྤང་བའི་རིགས་པ་ནི་ཡོངས་སུ་སྤང་བར་བྱ། འདི་ལྟར་བསྙེན་པའི་རིགས་པ་ནི་བསྙེན་པར་བྱའོ་སྙམ་པ་ནི་ལུས་
དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་ལུས་བརྟག་པར་མཁས་པ་ལ་བསླབ་པོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ཏེ། དེ་ལ་ལུས་ཡང་དག་པར་རབ་ཏུ་འཛིན་པ་དང་། སེམས་ཡང་དག་པར་རབ་ཏུ་འཛིན་པ་འདི་ནི་བརྩོན་འགྲུས་
ཤེས་བྱའོ། །གང་མི་གཡོ་བ་དང་མི་ལྷོད་པར་འཇུག་པ་དང་། རྒྱུན་མི་འཆད་པ་དང་རྒྱུན་ཆགས་པ་དང་། རྗེས་སུ་འཛིན་པ་དེ་ནི་བརྩོན་པ་ཞེས་བྱའོ། །གང་བརྩོན་འགྲུས་འདི་དང་། གང་རྩོམ་པ་འདི་ལ་མངོན་པར་བརྩོན་པ་དེ་ནི་བརྩོན་འགྲུས་བརྩམས་པ་ཞེས་བྱའོ། །དེ་ནས་བྱང་
ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་དེས་བརྩོན་འགྲུས་ཀྱི་ཕ་རོལ་དུ་ཕྱིན་པ་འདི་ཐོས་ནས་ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་ལ་གནས་པར་གྱུར་ཏོ། །བརྩོན་འགྲུས་རྩོམ་པ་འདི་ལ་ཡང་གནས་པར་གྱུར་ཏོ། །འཇིག་རྟེན་གྱི་ཁམས་དཔག་ཏུ་
མེད་པ་ན་སེམས་ཅན་རྣམས་དད་པ་ཇི་ལྟ་བ་བཞིན་ཡོངས་སུ་སྨིན་པར་བྱ་བའི་ཕྱིར་སྤྲུལ་པ་རྣམ་པ་དུ་མ་མངོན་པར་སྤྲུལ་ཏེ། ཐབས་མཁས་པ་དཔག་ཏུ་མེད་པ་དང་ལྡན་པས་སེམས་ཅན་དཔག་ཏུ་མེད་པ་དག་ཡོངས་སུ་སྨིན་པར་བྱས་སོ། །སངས་རྒྱས་ཀྱི་ཞིང་དེ་དང་དེ་དག་ཏུ་སངས་རྒྱས་བྱེ་
བ་ཁྲག་ཁྲིག་དཔག་ཏུ་མེད་པ་རྣམས་མཉེས་པར་བྱས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་དེས་བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པ་ཟླ་འོད་གཟི་བརྗིད་རྒྱལ་པོ་དེ་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་
བཅད་པ་དག་གིས་མངོན་པར་བསྟོད་དོ། །སྟོབས་བཅུ་ལྡན་པ་ཁྱོད་ནི་བརྩོན་འགྲུས་ཀྱིས། །མཚུངས་འདྲའི་སེམས་ཅན་གང་ཡང་མི་རྙེད་དེ། །ཐུབ་པ་དམ་པ་ཁྱོད་ནི་བརྩོན་འགྲུས་ཀྱིས། །ཆོས་ཉིད་མཆོག་ལ་ཡང་དག་རེག་པར་གྱུར། །སྟོབས་བཅུ་ལྡན་པ་ཁྱོད་ནི་བརྩོན་

49-1-253a

འགྲུས་ཀྱིས། །སངས་རྒྱས་ཞིང་ནི་དཔག་ཡས་ཡོངས་སུ་དག །སེམས་ཅན་རྣམས་ནི་ཡོངས་སུ་སྨིན་པར་མཛད། །ཤེས་རབ་ཚད་ནི་དཔེ་ཟླ་མ་མཆིས་ལགས། །སྟོབས་བཅུ་ལྡན་པ་མི་ཡི་སེང་གེ་ཁྱོད། །བརྩོན་འགྲུས་ཀྱིས་ནི་སེམས་ཅན་འདུ་ཤེས་
བཤིག །ཁྱོད་ཀྱིས་སྟོང་པ་ཉིད་ནི་རབ་ཏུ་མཁྱེན། །སེམས་ཅན་འདུ་ཤེས་དེ་ཡང་ཁྱོད་ཀྱིས་སྤངས། །ཁྱོད་ཀྱིས་སྟོང་པ་ཉིད་ནི་མི་དམིགས་པར། །བརྩོན་འགྲུས་ཀྱིས་ནི་ཆོས་ཀུན་རབ་ཏུ་མཁྱེན། །བརྩོན་འགྲུས་སྟོབས་ཀྱིས་ཕ་རོལ་ཕྱིན་པས་ན། །ཞི་བའི་ས་རྣམས་ལ་
ཡང་རབ་ཏུ་བཞུགས། །བདེ་གཤེགས་ཁྱོད་ཀྱི་སྲས་རྣམས་རྗེས་སློབ་པས། །བླ་ན་མེད་པའི་བྱང་ཆུབ་རབ་ཏུ་མཆིས། །སྟོབས་བཅུ་ལྡན་པ་ཁྱོད་ཀྱི་བརྩོན་འགྲུས་ཀྱིས། །ཡང་དག་ཆེ་བའི་བདག་ཉིད་རབ་ཏུ་བསྟན། །བརྩོན་འགྲུས་སྟོབས་ཀྱིས་ཕ་རོལ་ཕྱིན་པ་ལ། །བདེ་བར་
གཤེགས་པ་ཁྱོད་ཀྱི་སྲས་རྣམས་སློབ། །སྤྲུལ་པ་རྣམ་པ་སྣ་ཚོགས་བརྒྱ་དག་གིས། །སེམས་ཅན་རྣམས་ནི་ཡོངས་སུ་སྨིན་པར་བགྱིད། །འགྲོ་བ་རྣམས་ནི་རབ་ཏུ་དགྲོལ་སླད་དུ། །ཁྱོད་ཀྱི་སྲས་རྣམས་བྱང་ཆུབ་གང་ཞུགས་པ། །དེ་དག་བཅོམ་ལྡན་ཁྱོད་ཀྱི་གོ་འཕང་
འདིར། །བདེ་བར་གཤེགས་པའི་སྲས་རྣམས་རྗེས་སུ་མཆི། །འགྲོ་བ་རྣམས་ནི་ཡོངས་སྨིན་བགྱི་སླད་དུ། །ཁྱོད་ཀྱི་སྲས་རྣམས་གོ་བགོས་སྤྱོད་པ་ནི། །ཁྱོད་ཀྱི་རྗེས་སུ་ཐམས་ཅད་རབ་སློབ་ཅིང་། །སེམས་ཅན་མང་པོ་བྱང་ཆུབ་ལ་ཡང་འགོད། །མི་ཡི་དབང་པོ་སེང་
གེ་ཁྱོད་ཀྱི་སྲས། །ཁྲག་ཁྲིག་བརྩོན་འགྲུས་དག་ལ་གནས་ནས་སུ། །དེ་དག་འགྲོ་བ་ཡོངས་སུ་དགྲོལ་སླད་དུ། །རྒྱལ་བའི་ཞིང་ནི་ཁྲག་ཁྲིག་རྣམས་སུ་མཆི། །རྒྱལ་བའི་ཞལ་ནི་དྲི་མེད་ཟླ་བ་ལྟར། །ཤིན་དུ་ཟིལ་གྱིས་མི་གནོན་མཐའ་ཡས་འོད། །ཐུབ་པ་
ཁྱོད་སྲས་མཚུངས་པ་མ་མཆིས་པ། །སྤྱད་པས་དག་པར་གྱུར་པའི་སྤྱད་པ་སྤྱོད། །ཁྱོད་ཀྱི་སྲས་པོ་མི་བློ་རྣམ་དག་རྣམས། །སངས་རྒྱས་ཞིང་རྣམས་ཡོངས་སུ་དག་བགྱིད་ཅིང་། །མི་མཆོག་དབང་པོས་སེམས་ཅན་ཁྲག་ཁྲིག་རྣམས། །བདག་མ་མཆིས་
པར་རབ་ཏུ་འཚལ་བར་བགྱིས། །བརྩོན་འགྲུས་ཀྱིས་ནི་བརྩོན་འགྲུས་མཚུངས་མ་མཆིས། །ཏིང་འཛིན་མི་གཡོ་བརྟན་པའི་ཏིང་ངེ་འཛིན། །བརྩོན་འགྲུས་སྟོབས་ཀྱིས་ཕ་རོལ་ཕྱིན་ནས་སུ། །ལྷ་དང་མི་རྣམས་བརྩོན་འགྲུས་སྐྱེད་དུ་བཅུག །ལྷ་མི་དྲི་ཟར་བཅས་

49-1-253b

པའི་འཇིག་རྟེན་དག །བརྩོན་འགྲུས་ཀྱིས་ནི་ཤིན་དུ་ཟིལ་གྱིས་གནོན། །བྱང་ཆུབ་འཚལ་བས་བརྩོན་འགྲུས་རབ་ཏུ་བརྟན། །སྲིད་པ་དག་ལས་སྐྱེ་བོ་སྒྲོལ་བར་འཚལ། །གང་གིས་འདུས་བྱས་མཚན་མ་རྣམས་བཤིག་ཅིང་། །དེ་དག་གིས་ནི་བྱང་ཆུབ་ཐོབ་མ་
མཆིས། །བརྩོན་འགྲུས་དག་ཀྱང་ནམ་དུའང་མི་ཉམས་པ། །དེ་དག་ལ་ནི་རབ་ཏུ་ཕྱག་འཚལ་ལོ། །གང་རྣམས་བསམ་པ་རྟག་ཏུ་བྱང་ཆུབ་ཕྱིར། །གང་དེ་རྒྱལ་བའི་རིགས་རྣམས་འཛིན་པ་དག །བདེ་གཤེགས་གོ་འཕང་གཞོལ་ཞིང་བརྟན་པ་རྣམས། །དེ་དག་
ལ་ཡང་རབ་ཏུ་ཕྱག་འཚལ་ལོ། །སྐྱེ་བོ་དག་གི་དོན་དང་སྨན་སླད་དུ། །གང་དག་རབ་ཏུ་ཞུམ་པར་མི་འགྱུར་ཞིང་། །རྟག་ཏུ་བདེ་བར་གཤེགས་པའི་གོ་འཕང་ནི། །རྒ་ཤི་མ་མཆིས་པ་ལ་དད་པ་རྣམས། །དེ་དག་ལ་ཡང་རབ་ཏུ་ཕྱག་འཚལ་ལོ། །ནད་དང་རྒ་ཤི་དག་ལས་
རབ་ཐར་བ། །དྲི་མ་གསུམ་བཅོམ་ཁྱོད་ཀྱི་སྐྱབས་མཆིས་པས། །དགེ་བ་དེ་ཡིས་བདེ་བར་གཤེགས་གྱུར་ཏེ། །མི་རྒ་མི་འཆི་བྱང་ཆུབ་རེག་པར་ཤོག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པས་བཅོམ་ལྡན་འདས་དེ་བཞིན་
གཤེགས་པ་དྲི་མ་མེད་པ་ཟླ་འོད་གཟི་བརྗིད་རྒྱལ་པོ་དེ་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་དག་གིས་མངོན་པར་བསྟོད་ནས་དེ་བརྩོན་འགྲུས་རྩོམ་པ་དང་ལྡན་པར་གྱུར་ཏོ། །དེ་བསྐལ་པ་བྱེ་བ་དགུ་བཅུའི་འཁོར་བ་ཕྱིར་བསྙིལ་བར་གྱུར་ཏོ། །
འདི་ལྟར་ཡང་འཇམ་དཔལ་དེའི་ཚེ་དེའི་དུས་ན་བྱང་ཆུབ་སེམས་དཔའ་བརྩོན་འགྲུས་བརྩམས་པར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་
ན་བྱང་ཆུབ་སེམས་དཔའ་བརྩོན་འགྲུས་བརྩམས་པར་གྱུར་ཏོ། །འཇམ་དཔལ་དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ལ་ཡང་དག་པར་ཞུགས་པ། སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་སྦྱང་བར་འདོད་པ་དང་སེམས་ཅན་དཔག་ཏུ་
མེད་པ་རྣམས་ཡོངས་སུ་སྨིན་པར་བྱ་བར་འདོད་པས་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཕྱིར་དགེ་བའི་རྩ་བ་དག་ཡོངས་སུ་བསྔོ་བར་བྱའོ། །སྒྲིབ་པ་མེད་པའི་རྣམ་པར་ཐར་པ་རྟོགས་པར་བྱ་བའི་ཕྱིར་བརྩོན་འགྲུས་ཀྱང་མི་གཏང་བར་བྱ་སྟེ། བྱང་ཆུབ་སེམས་

49-1-254a

དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་སྒྲིབ་པ་མེད་པའི་རྣམ་པར་ཐར་པ་ལ་གནས་པ་ནི་སེམས་ཅན་གྱི་བསམ་པ་རིག་པར་བྱ་བའི་ཕྱིར་སེམས་གནས་ཏེ། དེ་བཞིན་གཤེགས་པའི་སྟོབས་ཡོངས་སུ་གྲུབ་ནས་སེམས་ཅན་
ཐམས་ཅད་ཀྱི་བསམ་པའི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་དེ་འཐོབ་པོ། །དེས་ཏིང་ངེ་འཛིན་དེ་ཐོབ་ནས་སེམས་ཅན་ཕུང་པོ་གསུམ་དུ་འབྱེད་དེ། གསུམ་གང་ཞེ་ན། ཡང་དག་པ་ཉིད་དུ་ངེས་པའི་ཕུང་པོ་དང་། ལོག་པ་ཉིད་དུ་ངེས་པའི་ཕུང་པོ་དང་། མ་ངེས་པའི་ཕུང་
པོའོ། །དེ་སེམས་ཅན་གང་དག་ལོག་པ་ཉིད་དུ་ངེས་པའི་ཕུང་པོ་ལ་གནས་པ་དེ་དག་ཡོངས་སུ་སྨིན་པར་བྱ་བའི་ཕྱིར་ཐབས་མཁས་པ་ལ་སློབ་ཅིང་སེམས་ཅན་གང་དག་ལོག་པ་ཉིད་དུ་ངེས་པའི་ཕུང་པོ་ལ་གནས་པ་དེ་དག་ཅི་ནས་དྲང་བའི་ཕྱིར་ཐབས་མཁས་པ་ལ་སློབ་སྟེ། དེ་
ཐབས་མཁས་པ་དེ་དང་ལྡན་པས་ལོག་པ་ཉིད་དུ་ངེས་པའི་སེམས་ཅན་རྣམས་རབ་ཏུ་དྲང་བའི་ཕྱིར་བསྐལ་པ་བརྗོད་དུ་མེད་པར་འཁོར་བ་ན་འདུག་གོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད་བསམ་གྱིས་མི་ཁྱབ་མཚུངས་པ་མེད་བརྗོད་དུ་མེད་པ་དེའི་ཕ་
རོལ་གྱི་ཡང་ཆེས་ཕ་རོལ་ན་བདུད་རྩིའི་སྙིང་པོ་ཞེས་བྱ་བའི་བསྐལ་པ་བྱུང་སྟེ། བདུད་རྩིའི་སྙིང་པོའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིགས་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་
རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་ཏོག་རྒྱུན་མི་འཆད་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། འཇམ་དཔལ་དེ་བཞིན་གཤེགས་པ་རིན་ཆེན་ཏོག་རྒྱུན་
མི་འཆད་པའི་རྒྱལ་པོ་དེའི་སངས་རྒྱས་ཀྱི་ཞིང་དེར་ཡང་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་དབང་པོས་བྱིན་ཞེས་བྱ་བ་སངས་རྒྱས་ཁྲག་ཁྲིག་ཚད་མེད་པ་ལ་བསྙེན་བཀུར་བྱས་པ་དགེ་བའི་རྩ་བ་ཚད་མེད་པ་དང་ལྡན་པ་ཞིག་བྱུང་ངོ་། །དེ་ནས་བྲམ་ཟེའི་རིགས་ཤིང་ས་ལ་ཆེན་པོ་
ལྟ་བུ་དབང་པོས་བྱིན་དེ། བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་རྒྱུན་མི་འཆད་པའི་རྒྱལ་པོ་དེ་ག་ལ་བ་དེར་སོང་སྟེ་ཕྱིན་ནས་དེ་བཞིན་གཤེགས་པ་དེའི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་

49-1-254b

བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་དབང་པོས་བྱིན་དེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་རྒྱུན་མི་འཆད་པའི་རྒྱལ་པོ་དེ་ལ་འདི་སྐད་ཅེས་གསོལ་ཏོ། །ཇི་ཙམ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་
ཡོངས་སུ་སྨིན་པར་བགྱི་བ་དང་། སངས་རྒྱས་ཀྱི་ཞིང་ཡོངས་སུ་སྦྱང་བའི་ཐབས་མཁས་པ་དང་ལྡན་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་རྒྱུན་མི་འཆད་པའི་རྒྱལ་པོས་བྲམ་ཟེའི་རིགས་ཤིང་ས་ལ་
ཆེན་པོ་ལྟ་བུ་དབང་པོས་བྱིན་ལ་འདི་སྐད་ཅེས་བཀའ་སྩལ་ཏོ། །དབང་པོས་བྱིན་བྱང་ཆུབ་སེམས་དཔའ་སེམས་དཔའ་ཆེན་པོས་བྱང་ཆུབ་སེམས་དཔའི་ཏིང་ངེ་འཛིན་སེམས་ཅན་ཐམས་ཅད་ཀྱི་བསམ་པའི་རྗེས་སུ་སོང་བ་ཞེས་བྱ་བ་ཐོབ་པ་དེ་ན་བྱང་ཆུབ་སེམས་དཔའ་
སེམས་དཔའ་ཆེན་པོ་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཐབས་མཁས་པ་དང་ལྡན་པར་འགྱུར་རོ། །དེ་བྱང་ཆུབ་སེམས་དཔའི་ཏིང་ངེ་འཛིན་སེམས་ཅན་ཐམས་ཅད་ཀྱི་བསམ་པའི་རྗེས་སུ་སོང་བ་དེ་
དང་ལྡན་པས་སྨོན་ལམ་གང་དང་གང་བཏབ་པ་དེ་དང་དེས་ངེས་པར་འབྱུང་བར་འགྱུར་ཏེ། དེས་ཡིད་བཞིན་དུ་རབ་ཏུ་རྙེད་ཅིང་སྒྲུབ་བོ། །དེ་འདོད་ན་དེ་བཞིན་གཤེགས་པ་གཅིག་གི་སྨོན་ལམ་ཡོངས་སུ་རྫོགས་པར་བྱེད། དེ་འདོད་ན་དེ་བཞིན་གཤེགས་པ་གཉིས་ཀྱི་སྨོན་
ལམ་ཡོངས་སུ་རྫོགས་པར་བྱེད། དེ་འདོད་ན་དེ་བཞིན་གཤེགས་པ་གསུམ་གྱི་སྨོན་ལམ་ཡོངས་སུ་རྫོགས་པར་བྱེད་དེ། དེ་བཞིན་གཤེགས་པ་གྲངས་མེད་པའི་བར་གྱི་སྨོན་ལམ་ཡོངས་སུ་རྫོགས་པར་བྱེད་དོ། །དེ་བཞིན་གཤེགས་པ་བསམ་གྱིས་མི་ཁྱབ་པའི་སྨོན་ལམ་ཀུན་
རྫོགས་པར་བྱེད་པས་སངས་རྒྱས་ཀྱི་ཞིང་བསམ་གྱིས་མི་ཁྱབ་པ་ཡོངས་སུ་དག་པར་འགྱུར་རོ། །དབང་པོས་བྱིན་ཤར་གྱི་ཕྱོགས་ཆ་ན་གང་གཱའི་ཀླུང་གི་བྱེ་མ་སྙེད་དང་མཉམ་པའི་སངས་རྒྱས་ཀྱི་ཞིང་འདས་པ་ན་རིན་ཆེན་ཅན་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་བའི་ཟླ་བ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ། །དབང་པོས་བྱིན་དེ་བཞིན་གཤེགས་པ་དགེ་བའི་ཟླ་བ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྨོན་ལམ་གང་བཏབ་པ་དེ་ཐམས་

49-1-255a

ཅད་ཡོངས་སུ་རྫོགས་པར་གྱུར་ཏེ། དེས་སྨོན་ལམ་འདི་སྐད་ཅེས་བཏབ་བོ། །བདག་གི་སངས་རྒྱས་ཀྱི་ཞིང་གི་མཐའ་རྟོགས་པར་སླ་བ་མ་ཡིན་པར་ཤོག་ཤིག་ཅེས་བྱས་ནས་དེའི་སྨོན་ལམ་དེ་ཡོངས་སུ་རྫོགས་ཏེ། ད་ལྟར་དེའི་སངས་རྒྱས་
ཀྱི་ཞིང་གི་ཚད་གཟུང་སླ་བ་མ་ཡིན་ནོ། །གཞན་ཡང་བདག་གི་སངས་རྒྱས་ཀྱི་ཞིང་གི་བཀོད་པ་ཚད་གཟུང་སླ་བར་མ་གྱུར་ཅིག །བདག་གི་སངས་རྒྱས་ཀྱི་ཞིང་ན་རིན་པོ་ཆེ་འདི་སྙེད་ཡོད་དོ་ཞེས་རིན་པོ་ཆེའི་མཐའ་བདེ་བར་རྟོགས་སླ་བར་མ་གྱུར་ཅིག །བདག་གི་སངས་
རྒྱས་ཀྱི་ཞིང་ན་བྱང་ཆུབ་སེམས་དཔའ་རྣམས་ཚད་གཟུང་སླ་བར་མ་གྱུར་ཅིག །བདག་གི་སངས་རྒྱས་ཀྱི་ཞིང་ན་རིན་པོ་ཆེ་མིག་མངས་རིས་སུ་བྲིས་པ་འདི་ཉིད་དོ་ཞེས་ཚད་གཟུང་ནུས་པར་མ་གྱུར་ཅིག །བདག་གི་སངས་རྒྱས་ཀྱི་ཞིང་ན་འདི་སྙེད་ཀྱི་གཟུགས་དང་། 
སྒྲ་དང་དྲི་དང་། རོ་དང་། རེག་བྱའི་ལོངས་སྤྱོད་དང་ལྡན་ནོ་ཞེས་ཚད་གཟུང་ནུས་པར་མ་གྱུར་ཅིག །བདག་གི་སངས་རྒྱས་ཀྱི་ཞིང་དེ་ན་དགེ་བར་སྤྱོད་པ་དང་ལྡན་པའི་སེམས་ཅན་རྣམས་ཚད་གཟུང་ནུས་པར་མ་གྱུར་ཅིག །བདག་གི་སངས་རྒྱས་ཀྱི་ཞིང་དེ་ན་སེམས་ཅན་
རྣམས་ཀྱི་དགེ་བ་ལ་མོས་པའི་སྤྱོད་པ་དང་ལྡན་པ་ཚད་གཟུང་ནུས་པར་མ་གྱུར་ཅིག །བདག་གི་སངས་རྒྱས་ཀྱི་ཞིང་དེ་ན་སེམས་ཅན་རྣམས་ཀྱི་དགེ་བ་ཀུན་དུ་སྤྱོད་པ་དང་ལྡན་པ་ཚད་གཟུང་སླ་བར་མ་གྱུར་ཅིག་ཅེས་བྱས་ནས་དེ་སྨོན་ལམ་རྣམས་ཡོངས་སུ་རྫོགས་ཏེ། དེ་ལྟར་དེའི་
སངས་རྒྱས་ཀྱི་ཞིང་དེ་ན་སངས་རྒྱས་ཀྱི་ཞིང་བཀོད་པ་རྣམས་ཀྱི་ཚད་གཟུང་སླ་བ་མ་ཡིན། རིན་པོ་ཆེའི་མཐའ་རྟོགས་པར་སླ་བ་མ་ཡིན། བྱང་ཆུབ་སེམས་དཔའ་རྣམས་ཀྱི་ཚད་གཟུང་སླ་བ་མ་ཡིན། རིན་པོ་ཆེ་མིག་མངས་རིས་སུ་བྲེས་པ་རྣམས་ཀྱི་ཚད་གཟུང་སླ་བ་མ་ཡིན། 
གཟུགས་དང་། སྒྲ་དང་། དྲི་དང་། རོ་དང་། རེག་བྱའི་ལོངས་སྤྱོད་དང་ལྡན་པའི་ཚད་གཟུང་སླ་བ་མ་ཡིན། སེམས་ཅན་རྣམས་ཀྱི་དགེ་བར་སྤྱོད་པ་དང་ལྡན་པའི་ཚད་གཟུང་སླ་བ་མ་ཡིན་ནོ། །དེ་ལྟར་དེའི་སངས་རྒྱས་ཀྱི་ཞིང་དེ་ན་སེམས་ཅན་རྣམས་ཀྱི་དགེ་བ་ལ་མོས་པ་དང་ལྡན་
པའི་ཚད་གཟུང་སླ་བ་མ་ཡིན་ནོ། །དེ་ལྟར་དེ་བཞིན་གཤེགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྨོན་ལམ་འདི་དག་དང་། གཞན་ཡང་ཚད་མེད་པ་དག་བཏབ་པར་གྱུར་ཏེ། དེ་དག་ཐམས་ཅད་བྱང་ཆུབ་སེམས་དཔའི་ཏིང་ངེ་འཛིན་བསམ་པའི་རྗེས་སུ་སོང་བ་ལ་

49-1-255b

བརྟེན་ནས་ཡོངས་སུ་རྫོགས་སོ། །དབང་པོས་བྱིན་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་ཀྱི་བསམ་པའི་རྗེས་སུ་སོང་བའི་ཏིང་ངེ་འཛིན་རབ་ཏུ་རྙེད་པར་བྱ་བའི་ཕྱིར་བརྩོན་པར་བྱའོ། །དེ་ནས་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་
དབང་པོས་བྱིན་དེས་དེ་བཞིན་གཤེགས་པ་རིན་ཆེན་ཏོག་རྒྱུན་མི་འཆད་པའི་རྒྱལ་པོ་དེས་སྨོན་ལམ་དེ་དག་བསྒྲགས་མ་ཐག་ཏུ་སྨོན་ལམ་དེ་དག་ཐམས་ཅད་བཏབ་བོ། །དེ་ནས་བཅོམ་ལྡན་འདས་དེས་དེའི་སངས་རྒྱས་ཀྱི་ཞིང་ཡོན་ཏན་བསམ་གྱིས་མི་ཁྱབ་པ་དང་ལྡན་པར་འགྱུར་
རོ་ཞེས་ལུང་བསྟན་ཏོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་དབང་པོས་བྱིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། 
དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་དབང་པོས་བྱིན་ཞེས་བྱ་བར་གྱུར་ཏེ། དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་ཡོན་ཏན་དེ་སྙེད་དང་ལྡན་ནོ། །དེ་ལྟ་བས་
ན་འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་སྨོན་པའི་སྨོན་ལམ་དེ་དག་ལ་བསླབ་པར་བྱའོ། །ཇི་ལྟར་སྨོན་པའི་སྨོན་ལམ་ལ་སློབ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་མཁས་པ་དང་ལྡན་པས་སེམས་ཅན་ཁྲག་ཁྲིག་
དཔག་ཏུ་མེད་པ་ཡོངས་སུ་སྨིན་པར་བྱེད་དོ། །དེའི་ཚེའི་ཚད་དཔག་ཏུ་མེད་པར་འཛིན་ཏེ། སེམས་ཅན་ཁྲག་ཁྲིག་དཔག་ཏུ་མེད་པ་ཡང་ཚེའི་ཚད་དཔག་ཏུ་མེད་པ་འཛིན་དུ་འཇུག་གོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད། བསམ་
གྱིས་མི་ཁྱབ། མཚུངས་པ་མེད། གཞལ་དུ་མེད། ཚད་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དགེ་བ་འབྱུང་བ་ཞེས་བྱ་བའི་བསྐལ་པ་བྱུང་སྟེ། དགེ་བ་འབྱུང་བའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་རིགས་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སྤོས་མཆོག་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། 

49-1-256a

འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་མཆོག་རྒྱལ་པོ་དེའི་སངས་རྒྱས་ཀྱི་ཞིང་དེར་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཙན་དན་གྱི་སྙིང་པོ་ཞེས་བྱ་བ་ཞིག་བྱུང་ངོ་། །བྲམ་ཟེའི་
རིགས་ཤིང་ས་ལ་ཆེན་པོ་ལྟ་བུ་ཙན་དན་གྱི་སྙིང་པོ་དེ་དེ་བཞིན་གཤེགས་པ་སྤོས་མཆོག་རྒྱལ་པོ་དེ་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་དེ་བཞིན་གཤེགས་པ་སྤོས་མཆོག་རྒྱལ་པོའི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །
ཕྱོགས་གཅིག་ཏུ་འདུག་ནས་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཙན་དན་གྱི་སྙིང་པོ་དེས་དེ་བཞིན་གཤེགས་པ་སྤོས་མཆོག་རྒྱལ་པོ་དེ་ལ་འདི་སྐད་ཅེས་གསོལ་ཏོ། །ཐབས་མཁས་པ་དང་ལྡན་པ་ཐབས་མཁས་པ་དང་ལྡན་པ་ཞེས་བགྱི་བ་བཅོམ་ལྡན་
འདས་ཇི་ཙམ་གྱིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་མཁས་པ་དང་ལྡན་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་སྤོས་མཆོག་རྒྱལ་པོས་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཙན་དན་གྱི་སྙིང་པོ་དེ་ལ་འདི་སྐད་
ཅེས་བཀའ་སྩལ་ཏོ། །ཙན་དན་གྱི་སྙིང་པོ་ནམ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་ཀྱི་བསམ་པ་ལ་ཞུགས་ཏེ། བསམ་པ་ལ་ཞུགས་ནས་སོ་སོ་ཅི་རིགས་པར་ཆོས་སྟོན་པ་དེ་ཙམ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་
ལ་མཁས་པ་དང་ལྡན་པ་ཡིན་ནོ། །དེ་ཐབས་ལ་མཁས་པ་དེ་དང་ལྡན་པས་མོས་པ་ཇི་ལྟ་བ་བཞིན་དུ་སེམས་ཅན་རྣམས་ལ་འཐུན་པར་ཆོས་སྟོན་པར་བྱེད་དོ། །དེ་ཐབས་ལ་མཁས་པ་དེ་ལྟ་བུ་དང་ལྡན་པས་ན་སངས་རྒྱས་ཀྱི་ཞིང་ཡོངས་སུ་སྦྱོང་བ་དང་། སེམས་ཅན་ཡོངས་སུ་
སྨིན་པར་བྱ་བའི་ཕྱིར་བསྐལ་པ་བརྗོད་དུ་མེད་པར་ཡང་བརྩོན་པ་མི་འདོར་རོ། །དེ་ཐབས་མཁས་པས་ཡོངས་སུ་ཟིན་པའི་ཤེས་རབ་ཀྱི་ཕ་རོལ་དུ་ཕྱིན་པ་སྤྱོད་པ་ན་ནམ་ཡང་ཐབས་མཁས་པ་དང་བྲལ་བའི་སེམས་མི་སྐྱེད་དོ། །མྱུར་དུ་སངས་རྒྱས་ཀྱི་ཞིང་བརྗོད་དུ་མེད་
པ་ཡང་ཡོངས་སུ་སྦྱོང་ངོ་། །དེ་ནས་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཙན་དན་གྱི་སྙིང་པོ་དེ་བཅོམ་ལྡན་འདས་དེ་བཞིན་གཤེགས་པ་སྤོས་མཆོག་རྒྱལ་པོ་དེས་ཐབས་ལ་མཁས་པ་དང་། ཤེས་རབ་ཀྱི་ཕ་རོལ་དུ་ཕྱིན་པ་བསྟན་མ་ཐག་ཏུ་ཇི་ལྟར་བསྟན་པ་

49-1-256b

བཞིན་རབ་ཏུ་སྒྲུབས་སོ། །ཇི་ལྟར་བསྟན་པ་བཞིན་རབ་ཏུ་སྒྲུབས་པས་ན་སེམས་ཅན་རྣམས་ཀྱི་བསམ་པ་ལ་འཇུག་པ་ཤེས་པ་རབ་ཏུ་ཐོབ་པར་གྱུར་ཏོ། །དེ་ཐབས་ལ་མཁས་པ་དེ་དང་ལྡན་པས་སངས་རྒྱས་ཀྱི་ཞིང་ཡོངས་སུ་སྦྱང་བ་དང་སེམས་ཅན་ཡོངས་སུ་སྨིན་
པར་བྱ་བའི་ཕྱིར་བསྐལ་པ་བརྗོད་དུ་མེད་པར་ཡང་བརྩོན་པ་མ་བོར་རོ། །དེས་ཐབས་ལ་མཁས་པས་ཡོངས་སུ་ཟིན་པའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་ན་བསྐལ་པ་བརྗོད་དུ་མེད་པར་ནམ་ཡང་ཐབས་ལ་མཁས་པ་དང་བྲལ་བའི་སེམས་མ་སྐྱེས་སོ། །སེམས་བསྐྱེད་
པ་དེས་ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་ཀྱི་ཞིང་ཁྲག་ཁྲིག་བརྗོད་དུ་མེད་པ་རྣམས་ཡོངས་སུ་སྦྱངས་སོ། །སངས་རྒྱས་ཀྱི་ཞིང་རེ་རེར་ཡང་སེམས་ཅན་དཀྲིགས་ཕྲག་ཁྲག་ཁྲིག་བརྗོད་དུ་མེད་པ་ཡོངས་སུ་སྨིན་པར་བྱས་སོ། །སངས་རྒྱས་ཀྱི་ཞིང་རེ་རེར་
ཡང་སེམས་ཅན་ཁྲག་ཁྲིག་ཚད་མེད་པ་རྣམས་ཟབ་མོའི་ཆོས་ཀྱི་བཟོད་པ་ལ་རབ་ཏུ་བཀོད་དོ། །འཇམ་དཔལ་དེའི་ཚེ་དེའི་དུས་ན་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཙན་དན་གྱི་སྙིང་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་
དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་ཚེ་དེའི་དུས་ན་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་ཙན་དན་གྱི་སྙིང་པོ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཀྱི་
མཚན་མ་ལ་ངེས་པར་རྟོག་པའི་བཟོད་པ་ལ་བརྩོན་པར་བྱའོ།། །། བམ་པོ་དྲུག་པ། འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་ཚད་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་
དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིགས་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་
པ། སངས་རྒྱས་བཅོམ་ལྡན་འདས་ཡེ་ཤེས་འབྱུང་གནས་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་ཡེ་ཤེས་འབྱུང་གནས་དེའི་སངས་རྒྱས་ཀྱི་ཞིང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་བླ་མ་ཞེས་བྱ་བ་བྱུང་སྟེ། དེ་ནས་བྱང་ཆུབ་

49-1-257a

སེམས་དཔའ་སེམས་དཔའ་ཆེན་པོ་ཤེས་རབ་བླ་མས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་འབྱུང་གནས་དེ་ལ་ཞུས་ནས་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཡུལ་རྒྱུ་ཞིང་སོང་ངོ་། །དེ་ཡུལ་རྒྱུ་ཞིང་སོང་ནས་སངས་རྒྱས་
ཀྱི་ཞིང་བརྗོད་དུ་མེད་པ་ཡོངས་སུ་སྦྱངས་ཏེ་སངས་རྒྱས་ཀྱི་ཞིང་རེ་རེར་ཡང་སེམས་ཅན་བྱེ་བ་ཁྲག་ཁྲིག་བརྗོད་དུ་མེད་པ་རྣམས་བླ་ན་མེད་པའི་ཆོས་ལ་ངེས་པར་སེམས་པའི་བརྗོད་པར་ཡོངས་སུ་སྨིན་པར་བྱས་ནས་དེས་སྨོན་ལམ་འདི་སྐད་བཏབ་བོ། །བདག་སངས་རྒྱས་ཀྱི་ཞིང་གང་དུ་
སྐྱེས་པ་དེར་སེམས་ཅན་རྣམས་ཀྱིས་སངས་རྒྱས་བྱུང་བ་ཤེས་པར་ཤོག་ཤིག །བདག་སངས་རྒྱས་ཀྱི་ཞིང་གང་དུ་སྐྱེས་པར་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ལྷ་མ་ཡིན་གྱི་རིས་དང་། མི་ཁོམ་པ་ཐམས་ཅད་ཆད་
པར་ཤོག་ཤིག་ཅེས་དེས་སྨོན་ལམ་བཏབ་པ་ཡོངས་སུ་རྫོགས་པར་གྱུར་ཏེ། འཇམ་དཔལ་བྱང་ཆུབ་སེམས་དཔའ་ཤེས་རབ་བླ་མ་དེ་བྱང་ཆུབ་སེམས་དཔའི་སྤྱད་པ་སྤྱོད་ཅིང་སངས་རྒྱས་ཀྱི་ཞིང་གང་དུ་སྐྱེས་པ་དེར་སེམས་ཅན་རྣམས་ཀྱིས་སངས་རྒྱས་བྱུང་བར་ཤེས་
ཤིང་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ལྷ་མ་ཡིན་གྱི་རིས་དང་། མི་ཁོམ་པ་ཐམས་ཅད་ཡོངས་སུ་ཆད་པར་གྱུར་ཏོ། །ཆད་པར་གྱུར་ནས་ཀྱང་སངས་རྒྱས་ཀྱི་ཞིང་དེར་སླར་མ་བྱུང་ངོ་། །དེས་ཡང་སྨོན་ལམ་
འདི་སྐད་དུ་བཏབ་ཏེ། གང་བདག་གིས་བྱང་ཆུབ་སེམས་དཔའི་སྤྱད་པ་སྤྱོད་པ་ན་སའི་ཕྱོགས་སུ་རྐང་པའི་མཐིལ་གྱིས་རེག་པར་གྱུར་པ་དེ་དག་བསྐལ་པ་བརྗེས་ཀྱི་བར་དུ་མཆོད་རྟེན་དུ་གྱུར་པར་ཤོག་ཤིག །སེམས་ཅན་གང་གིས་མཆོད་རྟེན་དེའི་གནས་མཐོང་ཡང་རུང་། 
ཐོས་ཀྱང་རུང་། དེར་སོང་ཡང་རུང་། དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཅིག །མཆོད་རྟེན་གྱི་གནས་དེ་ཇི་སྲིད་དུ་འདུག་པ་དེའི་བར་དུ་སངས་རྒྱས་ཀྱི་ཞིང་དེར་དམ་པའི་ཆོས་ནུབ་པར་མི་འགྱུར་བར་ཤོག་ཤིག །
མཆོད་རྟེན་གྱི་གནས་ཇི་སྲིད་དུ་འདུག་པ་དེ་སྲིད་དུ་སངས་རྒྱས་ཀྱི་ཞིང་དེ་ན་སེམས་ཅན་རྣམས་དམ་པའི་ཆོས་ཉན་པ་རྒྱུན་མི་འཆད་པར་ཤོག་ཤིག །སེམས་ཅན་གང་གིས་བདག་གི་མིང་ཐོས་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་

49-1-257b

ཕྱིར་མི་ལྡོག་པར་གྱུར་ཅིག་ཅེས་བྱས་ནས་དེའི་སྨོན་ལམ་དེ་ཡོངས་སུ་རྫོགས་པར་གྱུར་ཏེ། དེ་སྤྱོད་པ་ལ་ཞུགས་པས་སངས་རྒྱས་ཀྱི་ཞིང་དེ་འདྲ་བར་ཀུན་འཛིན་ཅིང་ཡོངས་སུ་སྦྱངས་སོ། །སངས་རྒྱས་བྱེ་བ་ཕྲག་བཅྭ་བརྒྱད་ཀྱི་སྨོན་ལམ་ཇི་ལྟ་བུ་ཇི་སྙེད་པ་དེ་དག་ཐམས་ཅད་
ཀྱང་དེས་བཟུང་ངོ་། །སངས་རྒྱས་བྱེ་བ་ཕྲག་བཅྭ་བརྒྱད་ཀྱི་ཚེའི་ཚད་ཇི་སྲིད་པ་དེ་དག་ཐམས་ཅད་ཀྱང་དེས་ཡོངས་སུ་བཟུང་ངོ་། །སངས་རྒྱས་བྱེ་བ་ཕྲག་བཅྭ་བརྒྱད་ཀྱི་ཉན་ཐོས་འདུས་པ་ཇི་སྙེད་པ་དེ་སྙེད་ཀྱི་ཉན་ཐོས་འདུས་པའང་དེས་ཡོངས་སུ་བཟུང་ངོ་། །སངས་རྒྱས་
བྱེ་བ་ཕྲག་བཅྭ་བརྒྱད་ཀྱི་བྱང་ཆུབ་སེམས་དཔའི་ཚོགས་ཇི་སྙེད་པ་དེ་སྙེད་ཀྱི་བྱང་ཆུབ་སེམས་དཔའི་ཚོགས་ཀྱང་དེས་ཡོངས་སུ་བསྡུས་སོ། །སངས་རྒྱས་བྱེ་བ་ཕྲག་བཅྭ་བརྒྱད་དེ་དག་གི་སངས་རྒྱས་ཀྱི་ཞིང་གི་ཕུན་སུམ་ཚོགས་པ་ཇི་སྙེད་པ་དེ་དག་ཐམས་ཅད་ཀྱང་དེས་ཡོངས་སུ་བཟུང་
ངོ་། །དེས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྗོད་དུ་མེད་པ་ཡོངས་སུ་སྦྱངས་ནས། དེ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་འབྱུང་གནས་དེ་ག་ལ་བ་དེར་སོང་སྟེ་ཕྱིན་ནས་དེ་བཞིན་གཤེགས་པ་ཡེ་ཤེས་འབྱུང་གནས་དེའི་ཞབས་ལ་མགོ་བོས་ཕྱག་
འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་ཤེས་རབ་བླ་མས་དེ་བཞིན་གཤེགས་པ་ཡེ་ཤེས་འབྱུང་གནས་དེ་ལ་འདི་སྐད་ཅེས་གསོལ་ཏོ། །གང་བཅོམ་ལྡན་འདས་ཀྱི་སྲས་རྣམས་ཡབ་ལས་སྐྱེས་པ་དེ་དག་སྤུན་ལགས་
ཏེ། བཅོམ་ལྡན་འདས་བདག་གི་ནུ་བོ་དེ་དག་ལ་དེ་བཞིན་གཤེགས་པས་ཅི་ནས་ཀྱང་བྱང་ཆུབ་སེམས་དཔའ་དག་སྐྱེ་བོ་མང་པོ་ལ་སྨན་པར་འཇུག་པ་དེ་ལྟ་བུའི་ཆོས་བཤད་དུ་གསོལ། །དེ་སྐད་ཅེས་གསོལ་པ་དང་། དེ་བཞིན་གཤེགས་པ་ཡེ་ཤེས་འབྱུང་གནས་དེས་
བྱང་ཆུབ་སེམས་དཔའ་ཤེས་རབ་བླ་མ་དེ་ལ་འདི་སྐད་ཅེས་བཀའ་སྩལ་ཏོ། །ཤེས་རབ་བླ་མ་ཁྱོད་ཤེས་རབ་ཀྱི་ཕ་རོལ་དུ་ཕྱིན་པ་ལ་ཞུགས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱང་སངས་རྒྱས་ཀྱི་བྱ་བ་བྱེད་པ་ལེགས་སོ། །
ལེགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་འབྱུང་གནས་ཀྱིས་དགེ་སློང་གི་དགེ་འདུན་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་བྱང་ཆུབ་སེམས་དཔའ་ཤེས་རབ་བླ་མས་ཇི་ལྟ་བུར་ལས་བྱས་པ་ལ་ལྟོས། དགེ་སློང་བྱང་ཆུབ་སེམས་

49-1-258a

དཔའ་ཤེས་རབ་བླ་མས་སེམས་ཅན་ཇི་སྙེད་སྨིན་པར་བྱས་པ་ནི་རྩིས་མཁན་ནམ་རྩིས་མཁན་གྱི་སློབ་མས་བསྐལ་པར་ཡང་རུང་། བསྐལ་པ་བརྒྱར་ཡང་རུང་། བསྐལ་པ་ཁྲག་ཁྲིག་ཏུ་ཡང་རུང་སྟེ། དེ་དག་གིས་རྩི་བར་མི་ནུས་སོ། །
འཇམ་དཔལ་དེ་ན་བྱང་ཆུབ་སེམས་དཔའ་ཤེས་རབ་བླ་མ་དེས་སེམས་ཅན་ཚད་མེད་པ་ཉན་ཐོས་ཀྱི་མྱ་ངན་ལས་འདའ་བར་ཡོངས་སུ་མྱ་ངན་ལས་བཟླས་སོ། །དེའི་ཉིས་འགྱུར་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལ་རབ་ཏུ་བཀོད་དོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཚད་མེད་པའི་སེམས་ཅན་རྣམས་ཡོངས་སུ་མྱ་ངན་ལས་བཟླས་ཏེ། ཡོངས་སུ་མྱ་ངན་ལས་
འདས་སོ། །དེ་ལྟ་བུར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་བླ་མ་དེས་སེམས་ཅན་རྣམས་ཡོངས་སུ་མྱང་ལས་བཟླས་སོ། །སེམས་ཅན་ཤིན་དུ་མང་པོ་བྱང་ཆུབ་ལ་རབ་ཏུ་བཀོད་དོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་
དཔའ་ཤེས་རབ་བླ་མ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་བྱང་ཆུབ་སེམས་དཔའ་ཤེས་རབ་བླ་མ་ཞེས་བྱ་བར་གྱུར་
ཏོ། །འཇམ་དཔལ་དེ་ལྟར་དེ་བཞིན་གཤེགས་པ་དོན་ཐམས་ཅད་གྲུབ་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྒྲིབ་པ་མེད་པའི་སངས་རྒྱས་ཀྱི་རྣམ་པར་ཐར་པ་ལ་གནས་པས་ཐབས་མཁས་པ་དང་ལྡན་པར་གྱུར་ཏོ། །དེ་ལྟ་བས་ན་འཇམ་དཔལ་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱིས་ཐབས་མཁས་པ་དང་ལྡན་པར་བྱའོ། །ཐབས་མཁས་པ་ཡོངས་སུ་རྫོགས་པར་བྱ་བའི་ཕྱིར་བྱང་ཆུབ་སེམས་དཔའ་ལ་ཆོས་ཐམས་ཅད་ལ་དབང་དང་ལྡན་པའི་ཏིང་ངེ་འཛིན་བཤད་པར་བྱའོ། །ཆོས་ཐམས་ཅད་ལ་དབང་དང་ལྡན་
པའི་ཏིང་ངེ་འཛིན་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་པ་གཅིག་གིས་ཀྱང་སངས་རྒྱས་ཀྱི་ཞིང་བརྗོད་དུ་མེད་པར་སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་བྱས་ནས། དེ་དག་ཀུན་དུ་སྤྱད་པ་སྤྱོད་པ་ནི་འཇམ་དཔལ་

49-1-258b

འདི་ལྟ་སྟེ། དཔེར་ན་མཚོ་ཆུས་གང་ནས་འགགས་པ་མེད་ཅིང་ཆུ་འབབ་པ་ནི་ས་གང་ལོགས་སུ་གཞོལ་བ་དེར་འབབ་བོ། །དེ་བཞིན་དུ་ཆོས་ཐམས་ཅད་ལ་དབང་དང་ལྡན་པའི་ཏིང་ངེ་འཛིན་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ག་ལས་
གར་བལྟས་པ་དེ་དང་དེར་སངས་རྒྱས་ཀྱི་ཆོས་རྣམས་ཀྱིས་རླན་པར་བྱེད་དེ། དེ་ལྟར་ན་བྱང་ཆུབ་སེམས་དཔའ་དེ་སངས་རྒྱས་ཀྱི་ཆོས་ཐམས་ཅད་ལ་དམིགས་པ་ཡིན་ནོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་ཚིགས་སུ་བཅད་པ་དག་
གིས་མངོན་པར་བསྟོད་དོ། །བཅོམ་ལྡན་ཆོས་རྣམས་གཉིས་མ་མཆིས། །ཆོས་རྣམས་བྱེ་བྲག་མཆིས་མ་ལགས། །དེ་ནི་ཆོས་ཀྱི་མཚན་ཉིད་དེ། །ཆོས་ཀུན་མཚན་ཉིད་མ་མཆིས་ལགས། །ནམ་མཁའ་ཇི་ལྟར་ནམ་མཁའ་ཡིས། །དཔེར་བགྱིར་
རུང་བ་མ་ལགས་ཏེ། །ཆོས་ཀྱི་དཔེར་ཡང་དེ་བཞིན་དུ། །རྣམ་པ་ཐམས་ཅད་བགྱིར་མི་རུང་། །ཆོས་ལ་ཆོས་ཀྱིས་མཐོང་མ་མཆིས། །ཆོས་ཀྱིས་ཆོས་རྣམས་མི་རིག་སྟེ། །ཤེས་པ་པོ་དང་ཆོས་རྣམས་ཀྱང་། །གཉིས་ག་འདི་ནི་ཡོང་མ་མཆིས། །
སངས་རྒྱས་ཆོས་དང་སངས་རྒྱས་སུ། །མི་མཁས་གང་དག་རྣམ་པར་རིག །དེ་དག་སངས་རྒྱས་དེ་བཞིན་དུ། །སངས་རྒྱས་ཆོས་རྣམས་མི་རིག་ལགས། །སངས་རྒྱས་ཆོས་དང་སངས་རྒྱས་ཤེས། །དེ་ནི་བྱིས་པའི་སྤྱོད་ཡུལ་ཏེ། །སངས་རྒྱས་ཆོས་དང་
སངས་རྒྱས་ནི། །སུས་ཀྱང་རྟོགས་པར་རྔོ་མི་ཐོག །ཇི་ལྟར་ཚིག་གིས་བརྗོད་པ་ལྟར། །ཆོས་འདི་དག་ལ་གདགས་མ་མཆིས། །ཆོས་དེ་གདགས་པ་མ་ལགས་ཏེ། །བདག་དང་འདྲ་བར་རྟོགས་པར་བགྱི། །བདག་ནི་གདགས་སུ་མ་མཆིས་ཏེ། །འོན་ཀྱང་
བདག་ཅེས་སྨྲ་བ་བཞིན། །ཆོས་རྣམས་ལ་ནི་བཏགས་པ་ཡང་། །བདག་དང་འདྲ་བར་རྟོགས་པར་བགྱི། །བདག་ནི་བཏགས་པར་མ་མཆིས་ཏེ། །འོན་ཀྱང་བདག་ཅེས་སྨྲ་བ་བཞིན། །ཆོས་རྣམས་བཏགས་པ་མ་མཆིས་པར། །མཁས་པ་རྣམས་ཀྱིས་རྟག་ཏུ་རྟོགས། །
ཇི་ལྟར་ནམ་མཁའི་རི་མོ་ནི། །མ་བྱུང་འབྱུང་བར་མི་འགྱུར་ཏེ། །དེ་བཞིན་ཆོས་རྣམས་གདགས་པ་ཡང་། །མ་བྱུང་འབྱུང་བར་མི་འགྱུར་ལགས། །རྫས་མ་མ་ལགས་པའི་འདོགས་པ་ཡིས། །མི་གང་འདི་ལ་འདོགས་པ་ནི། །འཛངས་པ་རྣམས་ཀྱིས་མི་

49-1-259a

བསྔགས་ཏེ། །དེ་ནི་མཁས་པས་དཔྱ་བ་ལགས། །འདོགས་པ་དེ་བཞིན་ཆོས་རྣམས་ལ། །མི་གང་འདི་ལ་འདོགས་པ་ནི། །འཛངས་པ་རྣམས་ཀྱིས་མི་བསྔགས་ཏེ། །མཁས་པས་དེ་ནི་དཔྱ་བ་ལགས། །འགྲོ་བ་མ་
མཆིས་འགྲོ་བའི་སྒྲས། །སངས་རྒྱས་རྣམས་ཀྱིས་བསྟན་པ་ནི། །ནམ་མཁའི་རི་མོ་བྲིས་པ་ལྟར། །དེ་བཞིན་ཆོས་རྣམས་རྟོགས་པར་བགྱི། །བར་སྣང་བྱ་རྗེས་ཇི་བཞིན་དུ། །འགྲོ་དེ་ངེས་པར་མ་མཆིས་ལགས། །སྦལ་པའི་སྤུ་ཡི་ལ་བ་ལྟར། །དེ་བཞིན་
ཞི་བའི་ཆོས་ཉིད་བལྟ། །བཞིན་གྱི་གཟུགས་བརྙན་མེ་ལོང་ལ། །རང་བཞིན་སྟོན་པར་མཁས་པས་བཤད། །དཀྱིལ་འཁོར་དེ་ན་བཞིན་གཟུགས་ལྟར། །དེ་བཞིན་ཆོས་རྣམས་ཐམས་ཅད་བལྟ། །ཇི་ལྟར་མི་དག་རི་ཡི་བར་མཆིས་ཏེ། །སྐད་ཕྱུང་ནས་ནི་བྲག་
ཕུག་སྒྲ་ཡང་གྲག །བྲག་ཆ་དེ་ལ་བྱེད་པ་མ་མཆིས་ལྟར། །དེ་བཞིན་ཆོས་ལ་བྱེད་པ་སུ་མ་མཆིས། །ཆོས་འདི་དག་ནི་རྒྱལ་བས་དེ་ལྟར་བསྟན། །མཆིས་པ་མ་ལགས་འདི་ལ་བྱེད་མ་མཆིས། །རང་བྱུང་འདི་དག་རྟོགས་ནས་རབ་བསྟན་ཏེ། །དེ་བཞིན་གཤེགས་
པས་ཤིན་དུ་ངོ་མཚར་མཛད། །རྒྱལ་བས་བསྟན་པའི་ཆོས་རྣམས་གང་རྟོགས་པ། །མི་ཡི་འདྲེན་པ་དེ་དག་ངོ་མཚར་ཏེ། །མིག་དང་ལྡན་པས་བསྟན་ནས་ལོང་བ་གང་། །གཟུགས་རྣམས་མཐོང་བ་བཞིན་དུ་ངོ་མཚར་ལགས། །ལོང་བ་གཞན་གྱིས་བསྟན་པའི་གཟུགས་རྣམས་ལ། །
མཐོང་བར་གྱུར་ན་དེ་ནི་ངོ་མཚར་ཏེ། །དེ་བཞིན་འདྲེན་པ་ཁྱོད་ཀྱི་གསུང་ཐོས་ནས། །གང་དག་དད་པར་གྱུར་པ་ངོ་མཚར་ལགས། །ཆོས་རྣམས་བསྟན་པ་དག་ཀྱང་དེ་བཞིན་དུ། །ཐར་པར་འཚལ་བས་རབ་ཏུ་རྟོགས་པར་བགྱི། །གང་དག་ཆོས་རྣམས་རིག་པར་མི་འགྱུར་བ། །དེ་དག་གིས་ནི་དེ་
བཞིན་གཤེགས་པ་མཐོང་། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་པ་དེ་དག་སྨྲས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱིས་པ་སོ་སོའི་སྐྱེ་བོ་གང་ཆོས་ཐམས་ཅད་ངོ་བོ་ཉིད་མ་མཆིས་པར་སྟོན་པ་
དང་། ཆོས་ཐམས་ཅད་ངོ་བོ་ཉིད་མ་མཆིས་པར་སྨྲ་བ་དེ་དག་ནི་བཅོམ་ལྡན་འདས་ཀྱི་ལྡེམ་པོའི་ངག་མ་འཚལ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་རྣམས་ནི་ཐོག་མ་ནས་དམིགས་སུ་མ་མཆིས་ན་ངོ་བོ་ཉིད་མ་མཆིས་པར་བསྟན་དུ་ག་ལ་མཆིས། བཅོམ་ལྡན་འདས་

49-1-259b

ཆོས་གང་དམིགས་སུ་མ་མཆིས་པ་དེ་དག་ནི་གང་ཡང་བགྲང་བར་མ་བགྱིས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་ནམ་མཁའ་དང་མཚུངས་ཏེ་གཉིས་སུ་མ་མཆིས་ཤིང་གཉིས་སུ་དབྱེར་མ་མཆིས་ལགས་སོ། །བཅོམ་ལྡན་འདས་
གཟུགས་ཤེས་བགྱི་བ་འདི་ནི་གཉིས་སུ་མ་མཆིས་པ་ལ་བགྲང་བར་བགྱིས་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གཟུགས་ནི་ནམ་མཁའ་དང་མཚུངས་ཏེ་གཉིས་སུ་མ་མཆིས་ཤིང་གཉིས་སུ་དབྱེར་མ་མཆིས་པ་ལགས་སོ། །བཅོམ་ལྡན་འདས་དཔེར་
བགྱི་ན་ནམ་མཁའ་ལ་གཉིས་སུ་མི་དམིགས་པ་དེ་བཞིན་དུ་གཟུགས་ལ་ཡང་གཉིས་སུ་མི་དམིགས་ལགས་སོ། །བཅོམ་ལྡན་འདས་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའང་གཉིས་སུ་མ་མཆིས་ཏེ། གཉིས་སུ་དབྱེར་མ་
མཆིས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་རྣམས་པར་ཤེས་པ་ནི་ནམ་མཁའ་དང་མཚུངས་ཏེ། བཅོམ་ལྡན་འདས་གཟུགས་གང་ལགས་པ་དང་། རྣམ་པར་ཤེས་པ་གང་ལགས་པ་དང་། གཉིས་སུ་མ་མཆིས་པ་གང་ལགས་པ་དང་། འདུས་
མ་བྱས་པ་གང་ལགས་པ་དེ་ནི་གཉིས་སུ་མ་མཆིས་ཏེ་གཉིས་སུ་དབྱེར་མ་མཆིས་པ་ལགས་སོ། །བཅོམ་ལྡན་འདས་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་གང་ལགས་པ་དང་། གཉིས་སུ་མ་མཆིས་པ་དང་། གཉིས་སུ་དབྱེར་མ་མཆིས་པ་གང་
ལགས་པ་དང་། བཅོམ་ལྡན་འདས་འདུས་བྱས་གང་ལགས་པ་དང་། འདུས་མ་བྱས་གང་ལགས་པ་དེ་དག་ནི་གཉིས་སུ་མ་མཆིས་ཏེ་གཉིས་སུ་དབྱེར་མ་མཆིས་པ་ལགས་སོ། །འདི་ནི་འདུས་བྱས་སོ། །འདི་ནི་འདུས་མ་བྱས་སོ་ཞེས་བགྱི་བ་དེ་ཡང་བཅོམ་ལྡན་འདས་གཉིས་སུ་
མ་མཆིས་པ་ལ་བགྲང་བར་བགྱི་ལགས་སོ། །བཅོམ་ལྡན་འདས་སྒྲིབ་པ་མ་མཆིས་པའི་རྣམ་པར་ཐར་པ་འདི་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་གཉིས་སུ་མེད་པར་སྤྱོད་པ་ཞེས་བགྱི་སྟེ། བཅོམ་ལྡན་འདས་འདས་པའི་དགེ་བའི་རྩ་བ་གང་ལགས་པ་དང་། 
མ་འོངས་པའི་དགེ་བའི་རྩ་བ་གང་ལགས་པ་དང་། ད་ལྟར་བྱུང་བའི་དགེ་བའི་རྩ་བ་གང་ལགས་པ་དེ་ནི་གཉིས་སུ་མ་མཆིས་པའི་ཚིག་བླ་དགས་ལགས་སོ། །འདོད་པའི་ཁམས་དང་ལྡན་པ་གང་ལགས་པ་རྣམས་དང་། གཟུགས་ཀྱི་ཁམས་དང་ལྡན་པ་གང་ལགས་པ་རྣམས་དང་། 

49-1-260a

གཟུགས་མ་མཆིས་པའི་ཁམས་དང་ལྡན་པ་གང་ལགས་པ་རྣམས་དང་། མྱ་ངན་ལས་འདས་པའི་དབྱིངས་དང་ལྡན་པ་གང་ལགས་པའི་དགེ་བའི་རྩ་བ་དེ་དག་ཀྱང་གཉིས་སུ་མ་མཆིས་པའི་ཚིག་བླ་དགས་ལགས་སོ། །ཟག་པ་དང་
བཅས་པའི་དགེ་བའི་རྩ་བ་གང་ལགས་པ་རྣམས་དང་། ཟག་པ་མེད་པའི་དགེ་བའི་རྩ་བ་གང་ལགས་པ་དེ་དག་ཀྱང་གཉིས་སུ་མ་མཆིས་པའི་ཚིག་བླ་དགས་ལགས་སོ། །ཉན་ཐོས་ཀྱི་དགེ་བའི་རྩ་བ་གང་ལགས་པ་རྣམས་དང་། རང་སངས་རྒྱས་ཀྱི་དགེ་བའི་རྩ་བ་གང་ལགས་
པ་རྣམས་དང་། སངས་རྒྱས་ཀྱི་དགེ་བའི་རྩ་བ་གང་ལགས་པ་དེ་དག་ནི་གཉིས་སུ་མ་མཆིས་ཤིང་གཉིས་སུ་དབྱེར་མ་མཆིས་ལགས་སོ། །དགེ་བའི་རྩ་བ་གང་ལགས་པ་དང་མི་དགེ་བའི་རྩ་བ་གང་ལགས་པ་དེ་ཡང་གཉིས་སུ་མ་མཆིས་ཏེ་གཉིས་སུ་དབྱེར་མ་མཆིས་ལགས་སོ། །འཁོར་
བ་གང་ལགས་པ་དང་མྱ་ངན་ལས་འདས་པ་གང་ལགས་པ་དེ་དག་ཀྱང་གཉིས་སུ་མ་མཆིས་ཏེ། གཉིས་སུ་དབྱེར་མ་མཆིས་ལགས་སོ། །བཅོམ་ལྡན་འདས་དེ་ལྟར་གཉིས་སུ་མ་མཆིས་པའི་ཆོས་ཀྱི་ཚུལ་འདི་ལ་ནེམ་ནུར་མ་མཆིས་ཤིང་ཐེ་ཚོམ་མི་འཚལ་བ་དེ་ནི་གཉིས་སུ་མ་
མཆིས་པ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བགྱིའོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །གང་དག་རྒྱལ་བའི་མི་གཉིས་ཚུལ་རྟོགས་པ། །དེ་དག་ཐེ་ཚོམ་མ་མཆིས་བདེ་བར་གཤེགས། །
དེ་དག་རྒ་ཤི་མ་མཆིས་གནས་མཐོང་སྟེ། །དེ་དག་རྒྱལ་བ་ཉན་ཐོས་བཅས་པ་མཆོད། །མི་གཉིས་བྱེ་བྲག་མ་མཆིས་ཆོས་ཉིད་དུ། །བདེ་བར་གཤེགས་པས་ཆོས་ཀུན་བསྟན་པ་མཛད། །གཞན་མ་ལགས་པའི་ཚིག་འདི་ཐོས་ནས་སུ། །མཁས་པ་རྣམས་ཀྱི་ཐེ་ཚོམ་མ་
མཆིས་གྱུར། །གང་དག་སྐྱོན་བྲལ་ཞི་བར་རབ་ཞུགས་པ། །མཚུངས་པ་མེད་པར་བྱང་ཆུབ་རབ་ཏུ་བསྟན། །དེ་ནི་སྟོན་པའི་ཡུལ་ལ་རབ་ཞུགས་ཏེ། །དེ་དག་སྟོན་པའི་བཀའ་ལ་རབ་ཏུ་གནས། །གང་དག་འདི་ནི་གཟུགས་ཤེས་བྱ་ཞེས་བརྗོད། །ཚོར་བ་དང་ནི་འདུ་ཤེས་
སེམས་པ་དག །དེ་ནི་འདུས་བྱས་རྣམ་ཤེས་དེ་སྐད་སྟོན། །དེ་དག་སྟོན་པའི་བཀའ་ལ་གནས་མ་ལགས། །གང་དག་དགེ་བ་རབ་ཏུ་བཟང་ཞེས་འམ། །དགེ་བ་མ་ཡིན་ཆོས་རྣམས་ངན་ཤེས་མཆི། །དེ་དག་སྟོན་པའི་བཀའ་ལ་མི་གནས་ཏེ། །དེ་དག་གཉིས་ལ་སྤྱོད་

49-1-260b

པའི་མི་ཞེས་བསྟན། །ཁམས་གསུམ་པ་ཞེས་གང་དག་བརྗོད་པའི་མི། །དེ་དག་ཐུབ་པའི་བསྟན་པ་བརྩོན་མ་བགྱིས། །དམ་པའི་དོན་དུ་ཁམས་གཅིག་མ་མཆིས་ན། །དེ་ལ་གསུམ་དུ་མཆིས་པར་ག་ལ་འགྱུར། །གང་དག་དེ་བཞིན་འདི་དག་འདུས་བྱས་ཏེ། །གཅིག་
ཤོས་འདུས་མ་བྱས་ཤེས་རྣམ་གཉིས་སྨྲ། །དེ་དག་བདེ་གཤེགས་བསྟན་པའི་ཆོས་རྣམས་ལ། །ནན་ཏན་བགྱིད་པ་སྤྲོ་བའི་མི་མ་ལགས། །འདི་ནི་མི་གཉིས་ཆོས་ཤེས་གང་སྨྲ་བ། །དེ་དག་སྟོན་པའི་བཀའ་ལ་མི་གནས་ཏེ། །བདེ་བར་གཤེགས་
པས་ཆོས་རྣམས་གང་བསྟན་པ། །དེ་ལ་གཉིས་དང་མི་གཉིས་ཆོས་མ་མཆིས། །གང་དག་བདེ་གཤེགས་བསྟན་ཅེས་སྨྲ་བགྱིད་པ། །སྟོན་དང་དེ་དག་དམིགས་སུ་མ་མཆིས་ཏེ། །གང་གིས་བསྟན་པ་དེ་ཡང་སྟོན་མ་མཆིས། །གང་ལ་བཤད་པ་དེ་ཡང་མཆིས་
མ་ལགས། །གང་བསྟན་དེ་ཡང་དམིགས་སུ་མ་མཆིས་ལགས། །གང་ལ་རིག་བགྱི་དེ་ཡང་སྐྱེ་མ་མཆིས། །ཀུན་དུ་ཐམས་ཅད་ཅི་ཡང་དམིགས་མ་མཆིས། །རྒྱལ་བའི་སྲས་རྣམས་དེ་ལྟར་རྟོགས་པར་བགྱིད། །ཆོས་གང་བདེ་བར་གཤེགས་པ་སྟོན་པ་ཡང་། །དེ་ལ་
ཆོས་དེ་དམིགས་པར་མི་འགྱུར་ཏེ། །སྟོང་པ་སྟོང་ཉིད་ཅི་ཡང་ཡོང་མི་དམིགས། །མཚན་མེད་མཚན་མ་མེད་ཉིད་ཀྱང་དེ་བཞིན། །གང་དུ་སྨོན་པ་མེད་པར་བཤད་པ་ཡང་། །དེ་ལ་སྨོན་པ་མེད་པ་མི་དམིགས་ལགས། །དེ་བཞིན་གྲོལ་དང་གྲོལ་བར་བགྱིད་མི་དམིགས། །བདེ་
བར་གཤེགས་པས་དེ་འདྲའི་ཆོས་བསྟན་ཏེ། །བདེ་བར་གཤེགས་པས་དེ་འདྲའི་ཆོས་བསྟན་པ། །གང་དག་དེ་མ་རྟོགས་ནས་གཞན་རྟོགས་པ། །དེ་དག་སྐྱེ་བོ་རྟག་ཏུ་བཅིངས་ནས་སུ། །སྲིན་བུ་བརྒྱ་བགྱིད་དེ་བཞིན་གནོན་པ་བགྱིད། །གང་ཟག་དམ་པ་སྟོན་པ་
ཐུགས་རྗེ་ཅན། །འཇིག་རྟེན་མགོན་པོ་སྲོག་ཆགས་ཕན་བཞེད་པས། །སྔོན་ཆད་དཀའ་བ་སྤྱད་པ་བརྒྱ་སྤྱད་དེ། །ཐུགས་རྗེ་རབ་ཏུ་བསྐྱེད་ནས་ཀུན་དུ་བྱུང་། །གང་གིས་འགྲོ་བ་རྟོག་ལྡན་མགུ་བགྱིད་པ། །ལམ་མཆོག་དེ་ནི་དེ་ཡིས་རབ་ཏུ་བསྟན། །དགའ་
སེམས་བདེ་གཤེགས་འཐུན་པའི་བརྟུལ་ཤུགས་ཅན། །དེ་དག་བདེ་གཤེགས་བསྟན་པའི་འགྲོ་བས་མཆིས། །འོང་དང་འགྲོ་བར་སྒྲ་ཡིས་བཤད་པ་ཡང་། །དེ་ལ་འོང་བ་དམིགས་སུ་ཡོད་མ་མཆིས། །བདག་གིས་བསྟན་པ་དེ་ཡང་མི་དམིགས་ལ། །

49-1-261a

བདེ་བར་གཤེགས་པས་ཆོས་ཉིད་རབ་ཏུ་བསྟན། །ཞི་དང་ཞི་བ་གང་ནའང་ཡོང་མ་མཆིས། །རབ་ཏུ་མ་ཞི་དེ་ཡང་མཆིས་མ་ལགས། །ཞི་བའི་སྟོན་པའང་དེ་བཞིན་མ་མཆིས་ལགས། །ཞི་བ་གང་ལགས་དེ་ཡང་ཡོང་
མི་དམིགས། །ཀུན་ནས་ཉོན་མོངས་གང་ནའང་མ་མཆིས་ཏེ། །ཀུན་ནས་ཉོན་མོངས་གྱུར་པའང་མཆིས་མ་ལགས། །ཤེས་ལྡན་གང་ལགས་དེ་ཡང་མ་མཆིས་ཏེ། །གང་གིས་བསྟན་པ་དེ་ཡང་མཆིས་མ་ལགས། །དེ་བཞིན་ཆོས་རྒྱལ་བ་ཡིས་
ཤིན་དུ་བསྟན། །སྟོན་པ་དང་ནི་བརྗོད་པའང་མ་མཆིས་ཏེ། །མིང་དུ་བསྟན་པའང་དེ་བཞིན་མཆིས་མ་ལགས། །དེ་ལྟར་རྒྱལ་བའི་ཆོས་ཉིད་རྟོགས་པར་བགྱིད། །སྟོན་དང་བསྟན་པ་ཚོར་དང་ཚོར་བགྱིད་དང་། །འདྲེན་དང་འདྲེན་པ་ཞི་དང་ཞི་བགྱིད་པ། །
ནམ་མཁའ་བར་སྣང་བྱ་ཡི་རྗེས་འདྲ་བར། །ཐུབ་པས་ཡང་དག་ཆོས་ཉིད་རབ་ཏུ་བསྟན། །དེ་བཞིན་ཆོས་ཉིད་ལ་ཡང་གང་རྟོག་པ། །དེས་ནི་དེ་བཞིན་གཤེགས་པ་ཡང་མཐོང་ཞིང་། །དེ་ཡིས་མི་ཡི་གཙོ་བོ་བཀུར་སྟི་བགྱིས། །སངས་རྒྱས་ས་ལ་མཁས་ཤིང་རྣམ་
པར་རྟོགས། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཆོས་བཤད་པ་འདི་རྣམས་སུས་ཤེས་པར་འགྱུར། གསོལ་པ། བཅོམ་ལྡན་འདས་མ་སྐྱེས་མ་འགགས་པས་ཆོས་བཤད་པ་འདི་རྣམས་
འཚལ་བར་འགྱུར་རོ། །བཀའ་སྩལ་པ། འཇམ་དཔལ་གལ་ཏེ་མ་སྐྱེས་མ་འགགས་པས་ཤེས་པར་འགྱུར་ན་ཇི་ལྟར་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་བཤད་པར་འགྱུར། །གསོལ་པ། 
བཅོམ་ལྡན་འདས་གལ་ཏེ་བདག་ཀྱང་གཞན་ལ། བྱང་ཆུབ་ཀྱང་གཞན་ན་ནི་བདག་བྱང་ཆུབ་མངོན་པར་རྫོགས་པར་འཚང་རྒྱ་ལགས་སོ། །བཀའ་སྩལ་པ། འཇམ་དཔལ་དེ་སྐད་དུ་བཤད་ན་བྱིས་པ་སོ་སོའི་སྐྱེ་བོ་རྣམས་སྐྲག་པར་འགྱུར་རོ། །གསོལ་པ། 
གལ་ཏེ་སྐྲག་པའི་ཆོས་འགའ་ཞིག་མཆིས་ན་ནི་དེ་ལ་སྐྲག་པར་ཡང་འགྱུར་ན་བཅོམ་ལྡན་འདས་ཆོས་ཐམས་ཅད་ལ་སྐྲག་པ་མ་མཆིས་ལགས་སོ། །བཀའ་སྩལ་པ། འཇམ་དཔལ་སྐྲག་ཅེས་བྱ་བ་དེ་ཆོས་གང་གི་ཚིག་བླ་དགས་ཡིན། །གསོལ་པ། བཅོམ་ལྡན་

49-1-261b

འདས་སྐྲག་ཅེས་བགྱི་བ་དེ་ནི་ཕྱིན་ཅི་ལོག་གི་ཚིག་བླ་དགས་ལགས་སོ། །བཀའ་སྩལ་པ། འཇམ་དཔལ་ཕྱིན་ཅི་ལོག་ཅེས་བྱ་བ་དེ་ཆོས་གང་གི་ཚིག་བླ་དགས་ཡིན། གསོལ་པ། བཅོམ་ལྡན་འདས་ཕྱིན་ཅི་ལོག་ཅེས་བགྱི་བ་དེ་ནི་ཡང་དག་པ་ཉིད་ཀྱི་མཐའི་
ཚིག་བླ་དགས་ལགས་སོ། །བཀའ་སྩལ་པ། འཇམ་དཔལ་ཡང་དག་པ་ཉིད་ཀྱི་མཐའ་ནི་སྐྲག་པར་མི་འགྱུར་རོ། །གསོལ་པ། བཅོམ་ལྡན་འདས་དེ་དེ་ལྟ་ལགས་ཏེ། ཡང་དག་པ་ཉིད་ཀྱི་མཐའ་ནི་སྐྲག་པར་མི་འགྱུར་ཏེ། མི་སྐྲག་པ་ཞེས་བཤད་པ་
ལགས་སོ། །བཅོམ་ལྡན་འདས་འདི་ལྟ་སྟེ། དཔེར་བགྱི་ན་ཡང་དག་པའི་མཐའ་ཡང་ཡང་དག་པའི་མཐའ་ཞེས་བརྗོད་ལགས་མོད་ཀྱི། དོན་དམ་པར་ན་ཡང་དག་པའི་མཐའ་ཡང་མི་དམིགས་ཏེ། དེ་བཞིན་དུ་བཅོམ་ལྡན་འདས་སྐྲག་པ་ཡང་མི་དམིགས། 
མི་སྐྲག་པ་ཡང་མི་དམིགས་ལགས་སོ། །བཅོམ་ལྡན་འདས་ཆོས་ཐམས་ཅད་བརྗོད་དུ་མ་མཆིས་ཏེ། བརྗོད་དུ་མ་མཆིས་པ་ཡང་མི་དམིགས་ལགས་སོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ཆོས་
རྣམས་ཐམས་ཅད་མི་སྐྲག་སྟེ། །མི་སྐྲག་པ་ཡང་མ་མཆིས་ལགས། །ཆོས་རྣམས་བརྗོད་པ་ཙམ་དུ་བསམ། །ཡང་དག་མཚན་ཉིད་དེ་མ་ལགས། །མ་སྐྱེས་པ་ཡི་བུ་ལ་ཡང་། །བུ་ཞེས་གདགས་པར་འགྱུར་མོད་ཀྱི། །དེ་ན་བུ་ནི་རྙེད་མི་འགྱུར། །ཀུན་
རྫོབ་ཆོས་རྣམས་དེ་འདྲ་ལགས། །ཇི་ལྟར་བར་སྣང་ནམ་མཁའ་ལ། །བར་སྣང་འགྱུར་བ་མི་དམིགས་པ། །དེ་བཞིན་ཀུན་རྫོབ་ཆོས་རྣམས་ཀྱང་། །རྣམ་པ་ཀུན་དུ་མི་དམིགས་ལགས། །ཀུན་རྫོབ་རྣམས་ཀྱང་ཀུན་རྫོབ་དུ། །མ་བྱུང་འབྱུང་བར་མི་འགྱུར་
ཏེ། །ཇི་ལྟར་བར་སྣང་ནམ་མཁའ་ལ། །རི་མོ་བྲིས་པ་མ་མཆིས་བཞིན། །ཀུན་རྫོབ་ལ་ཡང་ཀུན་རྫོབ་ཅེས། །མི་གང་རྗེས་སུ་འབྲང་བ་ནི། །དེ་ལ་ཕྱིན་ཅི་ལོག་ཅེས་ཀྱང་། །མིག་ལྡན་རྣམ་པར་མཐོང་བ་སྟེ། །ཀུན་རྫོབ་དང་ནི་དམ་པའི་དོན། །
དེ་དག་གཉི་ག་མི་རྟོགས་ཏེ། །གང་གིས་དེ་དག་མི་རྟོགས་པ། །དེ་ནི་ཆོས་ཉིད་མི་རྟོགས་སོ། །གང་དག་ཆོས་ཉིད་མི་རྟོགས་པ། །དེ་དག་སོ་སོའི་སྐྱེ་བོར་གསུངས། །དེ་དག་འཇིག་རྟེན་མགོན་ཀུན་གྱིས། །མུ་སྟེགས་གཞན་ཞེས་རབ་ཏུ་གསུངས། །

49-1-262a

གང་གིས་ཆོས་ཉིད་རིག་པ་ནི། །དེ་དག་སངས་རྒྱས་བསྟན་ལ་སྐྱེས། །བདུད་སྟོང་བྱེ་བ་རྣམས་ཀྱིས་ཀྱང་། །དེ་ལ་བསྐྱོད་པར་རྔོ་མི་ཐོག །གང་དག་བླ་མེད་སངས་རྒྱས་ས། །ཞི་བ་དེ་ནི་རྣམ་རྟོགས་པ། །མཁས་པ་དེ་དག་སྐྲག་
པ་དང་། །མི་སྐྲག་པར་ནི་རྨོངས་མི་འགྱུར། །གང་དག་སངས་རྒྱས་བྱེ་བ་ལས། །ཞི་བའི་ས་ལ་སྤྱད་བགྱིས་པ། །མཁས་པ་དེ་དག་སྐྲག་པ་དང་། །མི་སྐྲག་པར་ཡང་རྟོགས་མི་བགྱིད། །གཉིས་སུ་མ་མཆིས་ས་ཐོབ་ནས། །མཁས་པ་གང་དག་མི་ཞེན་པ། །དེ་ནི་
མི་དབང་སྲས་ལགས་ཏེ། །ཆོས་ཀྱི་སྤྲུལ་པ་ཐུགས་ཀྱི་སྲས། །རྟོགས་ཤིང་བློ་བགྱིས་མཐོང་བ་དང་། །ཆོས་མཆོག་གང་གིས་རྙེད་དེ་དག ། །གུམ་ནའང་མྱ་ངན་མི་བགྱིད་ལ། །དགའ་བར་འགྱུར་བའང་མ་མཆིས་ལགས། །འགུམ་པ་ལ་ཡང་དགའ་མི་བགྱིད། །
འཚོ་བའང་ཡོངས་སུ་ཚོལ་མི་བགྱིད། །གཏང་སྙོམས་སྨྲ་བ་དགའ་བ་དག །དགེ་བའི་ཆོས་ནི་མང་པོ་བགྱིད། །བྱང་ཆུབ་ཆེད་དུ་ལམ་སྦྱོང་ཞིང་། །སངས་རྒྱས་རིགས་འཛིན་འདི་དག་ནི། །སངས་རྒྱས་སྤྱོད་ཡུལ་གང་ལགས་པ། །ཡབ་ཀྱི་རྗེས་སུ་རབ་ཏུ་སློབ། །བརྩོན་
འགྲུས་ལྡན་ཞིང་འཇིགས་མ་མཆིས། །སེམས་ཅན་ཀུན་ལ་སྨན་སླད་དུ། །ཐམས་ཅད་མཁྱེན་པ་ཡོངས་ཚོལ་ཏེ། །ཞི་བ་མྱ་ངན་འདའ་བར་ཞུགས། །འཇིག་རྟེན་ཤིན་དུ་བསྲེགས་པ་ལ། །དེ་དག་མྱ་ངན་འདའ་སྟོན་ཏེ། །བདག་ཉིད་ལ་ནི་མི་ལྟ་ཞིང་། །བདེ་དང་སྡུག་
བསྔལ་མི་གནས་ལགས། །ཇི་ལྟར་མགོ་ལ་མེ་འབར་བ། །ཞི་བར་བགྱིད་པ་ཚོལ་བ་བཞིན། །སེམས་ཅན་ཀུན་གྱི་དོན་སླད་དུ། །དེ་དག་དེ་བཞིན་ཚོལ་རྣམས་ཚོལ། །འགྲོ་ལ་དགའ་བས་ཉིན་མཚན་དུ། །དེ་གང་རང་བྱུང་ཤིན་དུ་ཚོལ། །བསྐལ་པ་བྱེ་བ་
སྟོང་དུ་ཡང་། །ནམས་ཀྱང་བརྩོན་འགྲུས་མི་འདོར་རོ། །བུ་དང་ཆུང་མ་ནོར་དང་འབྲུ། །མགོ་དང་དེ་བཞིན་རྒྱལ་པོའི་སྲིད། །ཞུམ་པ་མ་མཆིས་ཀུན་བཏང་ཞིང་། །དེ་དག་གཏོང་བ་རབ་ཏུ་བསྒོམས། །སྲོག་ཆགས་ཀུན་གྱི་དོན་སླད་དུ། །དེ་དག་བྱང་ཆུབ་མཆོག་རེག་
འགྱུར། །བློ་མཆོག་ལྡན་པ་དེ་དག་ནི། །མཐོང་ཞིང་ཐོས་པ་རྙེད་པར་དཀའ། །དེ་ནས་འཁོར་དེར་བྱང་ཆུབ་སེམས་དཔའ་ཐམས་ཅད་ཟིལ་གྱིས་གནོན་པ་ཞེས་བྱ་བ་འདུས་ཏེ་འདུག་པར་གྱུར་པ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་

49-1-262b

ལྟ་སྟེ། དཔེར་བགྱི་ན་བར་སྣང་ལ་མཆི་བའི་བྱ་རྟེན་པ་མ་མཆིས་ཤིང་ནམ་མཁའི་ཁམས་ལ་མི་ཆགས་པར་གང་དང་གང་དུ་འཚལ་བ་དེ་དང་དེར་མཆི་བ་དེ་བཞིན་དུ་བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ཡང་ཆོས་ཀྱི་དབྱིངས་ལ་གནས་ཏེ་མི་ཆགས་པར་ཆོས་འཆད་
ལགས་སོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་འདི་ཆོས་ཀྱི་དབྱིངས་ལ་ཞུགས་ནས་ཇི་སྲིད་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཐམས་ཅད་ཟིལ་གྱིས་གནོན་པ་ལ་འདི་སྐད་ཅེས་བཀའ་སྩལ་ཏོ། །ཐམས་
ཅད་ཟིལ་གྱིས་གནོན་པ་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་པ་གང་དག་གང་ཡོངས་སུ་མྱ་ངན་ལས་འདས་པ་ཡང་འཇམ་དཔལ་གཞོན་ནུར་གྱུར་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཙུད་དེ། དེ་བཞིན་གཤེགས་པ་དེ་དག་ཐམས་ཅད་
ཀྱང་སངས་རྒྱས་ཀྱི་ཞིང་ཡོངས་སུ་དག་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཡོངས་སུ་མྱ་ངན་ལས་འདས་སོ། །རིགས་ཀྱི་བུ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། 
མཚུངས་པ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་ཀྱི་དཔལ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་ཤེས་འབྱུང་
གནས་ཤེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་ཤེས་བླ་མ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་ཤེས་མཐོང་བ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་
ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་ཤེས་སྤྱོད་ཡུལ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་ཤེས་མཛོད་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་
ཤེས་དཔལ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སེང་གེ་སྒྲོག་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སེང་གེ་རྣམ་པར་གནོན་པ་ཞེས་བྱ་བ་འཇིག་རྟེན་དུ་

49-1-263a

བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སེང་གེ་བློ་གྲོས་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སྟོབས་རབ་ཏུ་འཇོམས་པ་ཞེས་བྱ་བ་འཇིག་རྟེན་དུ་བྱུང་ངོ་། །
དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཤུག་འཆང་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དཔལ་བརྩེགས་སྙིང་པོ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་
གཤེགས་པ་དཔལ་བརྩེགས་རྣམ་པར་འཇོམས་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མཆོག་ཏུ་དགའ་བའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་
སྟོབས་ཀྱི་ཤུགས་རྣམ་པར་གནོན་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་རབ་ཏུ་ཞི་བར་སྤྱོད་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཞི་བའི་འོད་ཟེར་ཏོག་གི་རྒྱལ་
པོ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མཐའ་ཡས་བློ་གྲོས་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མཐའ་ཡས་འདུལ་བ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་
བཞིན་གཤེགས་པ་པདྨའི་ཏོག་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲི་མ་མེད་པའི་ཞལ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཟླ་འོད་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་
གཤེགས་པ་དྲི་མ་མེད་པའི་འོད་ཟེར་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དོགས་པ་ཐམས་ཅད་ལེགས་པར་འཇོམས་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སྣང་བྱེད་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་
ཆེས་ཕ་རོལ་ན་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་བདུད་རྩི་འཆང་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་བདུད་རྩི་གྲགས་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་

49-1-263b

གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲི་མ་མེད་པའི་སྤྱན་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཕྱིར་མི་ལྡོག་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲི་མ་མེད་པའི་མིག་ཅེས་བྱ་བ་འཇིག་རྟེན་དུ་བྱུང་ངོ་། །དེའི་
ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲི་མཆོག་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲི་མཆོག་དཔལ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲིའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །
དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་བློ་གྲོས་སྤོས་ཤེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཨུད་པ་ལའི་སྤྱན་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མཐའ་ཡས་སྣང་བའི་སྤྱན་ཞེས་བྱ་བ་འཇིག་རྟེན་དུ་བྱུང་ངོ་། །
དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དགྲ་ཐམས་ཅད་འདུལ་བ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མངོན་པར་འཕགས་པའི་རི་རྒྱལ་བ་རྒྱན་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཚངས་པའི་ཏོག་ཅེས་
བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཚངས་པས་སྐྱབས་ཤེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་བསྐལ་པ་གཅིག་ལ་སངས་རྒྱས་དྲུག་ཁྲི་འཇིག་རྟེན་དུ་བྱུང་སྟེ། དེ་དག་གི་ཐོག་མ་ནི་འོད་ཅེས་བྱ། ཐ་མར་ནི་དེ་བཞིན་གཤེགས་པ་གྲགས་པའི་འོད་ཅེས་བྱ་བ་འཇིག་རྟེན་དུ་བྱུང་ངོ་། །
དེའི་ཕ་རོལ་གྱི་ཡང་ཆེས་ཕ་རོལ་ན་སངས་རྒྱས་བྱེ་བ་ཕྲག་བཞི་འཇིག་རྟེན་དུ་བྱུང་སྟེ། དེ་དག་གི་ཐོག་མར་ནི་དེ་བཞིན་གཤེགས་པ་མར་མེ་མཛད་ཅེས་བྱ་བ་འཇིག་རྟེན་དུ་བྱུང་ངོ་། །དེ་དག་གི་ཐ་མར་ནི་དེ་བཞིན་གཤེགས་པ་སྤྱན་རིག་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་བསྐལ་པ་གཅིག་ལ་
སངས་རྒྱས་བྱེ་བ་ཕྲག་དགུ་བྱུང་སྟེ། དེ་དག་གི་ཐོག་མར་ནི་དེ་བཞིན་གཤེགས་པ་བདེ་སྤྱན་ཞེས་བྱ་བ་འཇིག་རྟེན་དུ་བྱུང་ངོ་། །ཐ་མར་ནི་དེ་བཞིན་གཤེགས་པ་རྣམ་པར་འབྱེད་པས་རྣམ་པར་ཕྱེ་བ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་
དགའ་མཆོག་ཞེས་བྱ་བ་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་དགའ་མཆོག་དེའི་སངས་རྒྱས་ཀྱི་ཞིང་ན་གྲགས་སྦྱིན་ཞེས་བྱ་བ་དང་། དཔའ་མཁས་ཞེས་བྱ་བ་དང་། ཚངས་པའི་མིག་ཅེས་བྱ་བ་དང་། ཙན་དན་ཞེས་བྱ་བ་དང་། རབ་མཛེས་ཤེས་བྱ་བ་དང་། སེང་གེ་འཛིན་ཅེས་བྱ་བ་དང་། 

49-1-264a

ཀུན་ནས་མཛེས་ཞེས་བྱ་བ་དང་། སྤོབས་པ་མཐའ་ཡས་ཞེས་བྱ་བ་དང་། བློ་གྲོས་མི་ཞན་ཞེས་བྱ་བ་དང་། དེས་པ་ཞེས་བྱ་བ་དང་། འགྲོགས་ན་བདེ་ཞེས་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཤིང་འགྲོགས་ན་བདེ་བ་ཡོན་
ཏན་འབུམ་ཕྲག་མང་པོ་དང་ལྡན་པ་བཅུ་གཅིག་ཚངས་པར་སྤྱད་པ་སྤྱོད་དོ། །དེའི་ཚེ་ན་ཡང་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཉི་མས་བྱིན་ཞེས་བྱ་བ་མཁས་ཤིང་ཡིད་རྣོ་བ་ཤེས་རབ་ཀྱི་རང་བཞིན་ཅན་ཞིག་ཡོད་དེ། དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཉི་མས་
བྱིན་གྲོགས་པོ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ལྔ་བརྒྱ་ཙམ་དང་ལྷན་ཅིག་ཏུ་རིན་ཆེན་ལྡན་ཞེས་བྱ་བའི་གྲོང་ཁྱེར་ཆེན་པོ་ནས་ཕྱི་རོལ་དུ་འཁྱམ་པའི་ཕྱིར་བྱུང་ནས་དོང་སྟེ། དེ་དག་དགའ་བ་སྣ་ཚོགས་ཞེས་བྱ་བའི་ཚལ་ག་ལ་བ་དེར་ཕྱིན་ཏོ། །དེའི་ཚེ་དགའ་བ་སྣ་
ཚོགས་ཞེས་བྱ་བའི་ཚལ་དེ་ནི་བྱང་ཆུབ་སེམས་དཔའ་བཅུ་གཅིག་འཇིག་རྟེན་རྣམས་ཀྱི་དོན་ལ་སེམས། ཕན་པར་སེམས། བདེ་བར་སེམས་ཤིང་འཁོད་པ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་དེ་དགའ་བ་སྣ་ཚོགས་ཤེས་བྱ་བའི་ཚལ་
དེ་ན་འཁྱམ་པས་དགའ་བ་སྣ་ཚོགས་ཀྱི་ཚལ་དེ་ན་འཁོད་པའི་སྐྱེས་བུ་དམ་པ་དེ་དག་དེས་ཤིང་འགྲོགས་ན་བདེ་ལ་མི་རྒོད་མ་ཁེངས་མི་གཡེང་། མུ་ཅོར་མི་སྨྲ། སྨྲ་བ་མི་མངའ་ཞིང་དྲན་པ་ཉེ་བར་གཞག་ལ། ཤེས་རབ་ཅན། ཤེས་རབ་དང་ལྡན་པ། ཤིན་དུ་གྲིམས་པར་གནས་པར་
མཐོང་ངོ་། །མཐོང་ནས་དེས་དགེ་བའི་རྩ་བ་བསྐྱེད་ཅིང་ཡུན་རིང་པོར་ཤེས་རབ་ཡོངས་སུ་བསྒོམས་པ་དང་འཕགས་པའི་རིགས་ལ་བསྟེན་པས་སྐྱེས་བུ་དམ་པ་དེ་དག་ལ་སེམས་རབ་ཏུ་དང་བར་གྱུར་ཏོ། །དེ་སེམས་རབ་ཏུ་དང་བས་སྐྱེས་བུ་དམ་པ་བཅུ་གཅིག་པོ་དེ་དག་ག་ལ་བ་
དེར་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་གཡོག་རྣམས་དང་ལྷན་ཅིག་ཏུ་དོང་ངོ་། །སྐྱེས་བུ་དམ་པ་གྲགས་བྱིན་དེས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་རྒྱང་རིང་པོ་ནས་འོང་བ་མཐོང་ངོ་། །མཐོང་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་
དེའི་འགྲོ་བ་དང་། ལྡོག་པ་དང་། ལྟ་བ་དང་། སྨྱང་བ་དང་། བསྐུམ་པའི་སྤྱོད་པ་ཀུན་ཀྱང་ཚངས་པར་སྤྱད་པ་ཡུན་རིང་དུ་སྤྱད་པའི་སྤྱོད་ལམ་བཞིན་ཏེ། སྐྱེས་བུ་དམ་པ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྣོད་དུ་འགྱུར་རོ་སྙམ་དུ་སེམས་སོ། །དེ་ནས་

49-1-264b

རིགས་ཀྱི་བུ་གྲགས་བྱིན་གྱིས་སྐྱེས་བུ་དམ་པ་བཅུ་གཅིག་པོ་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་འདི་ལྟར་ཉི་མས་བྱིན་སྐྱེས་བུ་དམ་པ་སངས་རྒྱས་ཀྱི་སྲས་ཀྱི་ཚུལ་དུ་འགྲོ་བ། བླ་ན་མེད་པ་སངས་རྒྱས་ཀྱི་ཆོས་རྣམས་ཀྱི་སྣོད་དུ་གྱུར་པ་འོང་གིས་བྱང་
ཆུབ་སེམས་དཔའ་འདི་ལ་སྐྱེས་བུ་དམ་པ་རྣམས་ཀྱིས་སྙིང་རྗེ་བསྐྱེད་ལ་གདམས་པ་དང་། རྗེས་སུ་བསྟན་པས་ཅི་ནས་རིགས་ཀྱི་བུ་འདི་སྐྱེ་བོ་ཕལ་པོ་ཆེའི་དོན་བྱེད་ཅིང་སྣང་བ་སྟོན་པ་སྣང་བར་བྱ་བའི་ཕྱིར་ལེགས་པར་དགོངས་ཤིག །དེ་ནས་བྲམ་ཟེའི་རིགས་ཤིང་སཱ་ལ་
ཆེན་པོ་ལྟ་བུའི་བུ་ཉི་མས་བྱིན་སྐྱེས་བུ་དམ་པ་བཅུ་གཅིག་པོ་དེ་དག་གི་གན་དུ་སོང་ནས་འདི་དག་ནི་སྟོན་པའོ། །འདི་དག་ནི་འཕགས་པའོ་ཞེས་སྐྱེས་བུ་དམ་པ་དེ་དག་ལ་སྟོན་པར་འདུ་ཤེས་བསྐྱེད་དེ། དེས་སྐྱེས་བུ་དམ་པ་དེ་དག་གི་རྐང་པ་ལ་མགོ་བོས་ཕྱག་འཚལ་
ནས་ཕྱོགས་གཅིག་ཏུ་འགྲེང་ངོ་། །དེ་ནས་རིགས་ཀྱི་བུ་གྲགས་བྱིན་གྱིས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་དེ་ལ་ཀྱེ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་ཁྱོད་འདུག་ཅིག་ཅེས་སྨྲས་ནས་བྲམ་ཟེའི་རིགས་ཤིང་སཱ་ལ་ཆེན་པོ་
ལྟ་བུའི་བུ་ཉི་མས་བྱིན་སྐྱེས་བུ་དམ་པ་དེ་དག་ལ་ཤིན་ཏུ་རི་མོ་བསྐྱེད་དེ་འདུག་པ་ནི་འདི་ལྟ་སྟེ། དཔེར་ན་རིགས་ཀྱི་མནའ་མ་གྱོས་སྒྱུག་གི་མདུན་ན་འདུག་པ་བཞིན་དུ་དམ་པ་དེ་དག་ལ་རི་མོ་སྐྱེས་པར་གྱུར་ཏོ། །འདི་ལྟ་སྟེ། དཔེར་ན་ནད་པ་ནད་ཀྱིས་བཏབ་ནས་ཡུན་རིང་མོ་
ལས་སྨན་པ་མཐོང་ན་དབུགས་བྱུང་བ་དེ་བཞིན་དུ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་དེ་ཡང་རིགས་ཀྱི་བུ་དེ་དག་མཐོང་མ་ཐག་ཏུ་དབུགས་བྱུང་བར་གྱུར་ཏོ། །འདི་ལྟ་སྟེ། དཔེར་ན་གསད་པ་ལ་ཐུག་པའི་མི་གསད་དུ་བཀྲི་བ་ལས་དོན་བྱ་བར་འདོད་ཕན་
པར་འདོད་བདེ་བར་འདོད་པའི་མི་ལ་ལ་ཞིག་བྱུང་སྟེ། དེས་དེ་གསད་པ་ལས་ཐར་བར་བྱས་ནས་དེ་མི་དེ་ལ་འདི་ནི་བདག་གི་སྐྱབས། བདག་ལ་སྙིང་བརྩེ་བ་ཅན་ནོ་ཞེས་བྱས་པ་གཟོ་བ་སྐྱེས་སོ། །དེ་ནས་རིགས་ཀྱི་བུ་གྲགས་བྱིན་གྱིས་བྲམ་ཟེའི་རིགས་ཤིང་
སཱ་ལ་ཆེན་པོ་ལྟ་བུའི་བུ་ཉི་མས་བྱིན་ལ་སྨྲས་པ། ཉི་མས་བྱིན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་རྙེད་པར་དཀའོ། །འདི་ལྟ་སྟེ། དཔེར་ན་ཨུ་དུམ་ཝ་རའི་མེ་ཏོག་བརྒྱ་ལ་བརྒྱ་

49-1-265a

ལམ་ན་འཇིག་རྟེན་དུ་འབྱུང་བར་འགྱུར་བ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་བརྒྱ་ལ་བརྒྱ་ལམ་ན་འཇིག་རྟེན་དུ་འབྱུང་སྟེ། གང་འཇིག་རྟེན་ཐམས་ཅད་དང་མི་མཐུན་པ། འཇིག་རྟེན་
ཐམས་ཅད་དང་འགལ་བ། ཟབ་པ་མཐོང་བར་དཀའ་བ། རྟོགས་པར་དཀའ་བ། བརྟག་ཏུ་མེད་པ། མུ་སྟེགས་ཅན་གཞན་ཐམས་ཅད་ཀྱི་རྟོག་གེའི་སྤྱོད་ཡུལ་མ་ཡིན་པ། ཉན་ཐོས་རྣམས་ཀྱིས་མ་ཆུད་པ། རང་སངས་རྒྱས་རྣམས་ཀྱིས་མི་ཤེས་པ། བྱང་ཆུབ་སེམས་དཔའ་
རྣམས་ཀྱི་སྤྱོད་ཡུལ་མ་ཡིན་པའི་ཆོས་སྟོན་ཏོ། །དེ་བཞིན་གཤེགས་པ་དེ་ལ་ཁྱོད་ཀྱིས་གུས་པ་བསྐྱེད་པར་བྱའོ། །སྟི་སྟང་དང་བཅས། རི་མོ་དང་བཅས་པ་ལ་ནི་ཤེས་རབ་ཡང་དག་པར་གནས་ཤིང་བྱམས་པ་བསྐྱེད། ཡེ་ཤེས་རབ་ཏུ་འབྱུང་། རིག་པ་བསྐྱེད། མངོན་པར་
ཤེས་པ་མངོན་དུ་འགྱུར། བྱང་ཆུབ་ཀྱི་ཕྱོགས་ཀྱི་ཆོས་རྣམས་མདུན་ན་གནས་པར་འགྱུར་རོ། །དེ་བཞིན་གཤེགས་པ་འཇིག་རྟེན་ཐམས་ཅད་དང་མི་མཐུན་པའི་ཆོས་ཇི་ལྟར་སྟོན་ཅེ་ན། ཉི་མས་བྱིན་ཆོས་ཐམས་ཅད་ནི་ནམ་མཁའ་ལ་བྲིས་པ་བཞིན་དུ་དངོས་པོ་མེད་པ་སྟེ། 
ཆོས་དེ་དག་ནི་འཇིག་རྟེན་ཐམས་ཅད་དང་མི་མཐུན་པའོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་མ་བྱུང་མི་འབྱུང་བ་དེ་བཞིན་དུ་ཉི་མས་བྱིན་གཟུགས་ནི་ནམ་མཁའ་ལྟ་བུ་སྟེ་ངོ་བོ་ཉིད་ཀྱིས་འགགས་པའོ། །ཚོར་བ་དང་། འདུ་ཤེས་དང་འདུ་བྱེད་དང་། 
རྣམ་པར་ཤེས་པ་ཡང་ནམ་མཁའ་ལྟ་བུ་སྟེ་ངོ་བོ་ཉིད་ཀྱིས་འགགས་པའོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་མ་སྐྱེས་པ་སྟེ། དེ་བཞིན་དུ་གཟུགས་ཀྱང་མ་སྐྱེས་པའོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་མ་སྐྱེས་
པའོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་མ་འགགས་པ་སྟེ། དེ་བཞིན་དུ་ཉི་མས་བྱིན་གཟུགས་ཀྱང་མ་འགགས་པའོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའང་མ་འགགས་པའོ། །ཉི་མས་བྱིན་འདི་ལྟ་སྟེ། དཔེར་ན་
ནམ་མཁའ་ལ་བྲིས་པ་ནི་མི་འོང་མི་འགྲོ་བ་དེ་བཞིན་དུ་ཉི་མས་བྱིན་གཟུགས་ཀྱང་མི་འོང་མི་འགྲོ་སྟེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་མི་འོང་མི་འགྲོ་བའོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་ནི་བྲིས་པ་མ་སྐྱེས་མ་བྱུང་

49-1-265b

བ་དེ་བཞིན་དུ་གཟུགས་ཀྱང་མ་སྐྱེས་མ་བྱུང་སྟེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་མ་སྐྱེས་མ་བྱུང་ངོ་། །ཉི་མས་བྱིན་འདི་ལྟ་སྟེ་དཔེར་ན་ནམ་མཁའ་ལ་བྲིས་པ་ནི་མ་འཕོས་མ་སྐྱེས་པ་དེ་བཞིན་དུ་གཟུགས་ཀྱང་མ་འཕོས་མ་སྐྱེས་ཏེ། ཚོར་བ་
དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའང་མ་འཕོས་མ་སྐྱེས་སོ། །ཉི་མས་བྱིན་འདི་ལྟ་སྟེ་དཔེར་ན་ནམ་མཁའ་ལ་བྲིས་པ་ནི་མ་བྱུང་ཀུན་ནས་མ་བྱུང་བ་དེ་བཞིན་དུ་གཟུགས་མ་བྱུང་ཀུན་ནས་མ་བྱུང་སྟེ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་
པའང་མ་བྱུང་ཀུན་ནས་མ་བྱུང་ངོ་། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་མ་སྐྱེས་ཤིང་མེད་པ་དེ་བཞིན་དུ་གཟུགས་ཀྱང་མ་སྐྱེས་ཤིང་མེད་པ་སྟེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའང་མ་སྐྱེས་ཤིང་མེད་པའོ། །ཉི་མས་
བྱིན་འདི་ལྟ་སྟེ་དཔེར་ན་ནམ་མཁའ་ལ་བྲིས་པ་ནི་མ་གྲུབ་མངོན་པར་མ་གྲུབ་པ་དེ་བཞིན་དུ་གཟུགས་ཀྱང་མ་གྲུབ་མངོན་པར་མ་གྲུབ་སྟེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་མ་གྲུབ་མངོན་པར་མ་གྲུབ་བོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་
ལ་བྲིས་པ་ནི་བརྗོད་དུ་མེད་ཅིང་བརྗོད་པ་མ་ཡིན་པ་དེ་བཞིན་དུ་གཟུགས་ཀྱང་བརྗོད་དུ་མེད་ཅིང་བརྗོད་པ་མ་ཡིན་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་བརྗོད་དུ་མེད་ཅིང་བརྗོད་པ་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་
ནམ་མཁའ་ལ་བྲིས་པ་བརྟགས་པ་མེད་ཅིང་གདགས་པ་མ་ཡིན་པ་དེ་བཞིན་དུ་གཟུགས་ཀྱང་བརྟགས་པ་མེད་ཅིང་གདགས་པ་མ་ཡིན་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་བརྟགས་པ་མེད་ཅིང་གདགས་པ་མ་ཡིན་ནོ། །ཉི་
མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་ཐ་སྙད་ཙམ་སྟེ། ནམ་མཁའ་ལ་བྲིས་པ་ཐ་སྙད་ཙམ་ལས་གཞན་མ་ཡིན་པ་དེ་བཞིན་དུ་གཟུགས་ཀྱང་ཐ་སྙད་ཙམ་སྟེ། གཟུགས་ཐ་སྙད་ཙམ་ལས་གཞན་མ་ཡིན་ནོ། །ཚོར་བ་དང་། འདུ་ཤེས་
དང་། འདུ་བྱེད་དང་། རྣམ་པར་ཤེས་པ་ཡང་ཐ་སྙད་ཙམ་སྟེ། ཐ་སྙད་ཙམ་ལས་རྣམ་པར་ཤེས་པ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་འདི་ལྟར་ཀུན་རྫོབ་ཙམ་སྟེ། ཀུན་རྫོབ་ལས་ནམ་མཁའ་ལ་བྲིས་

49-1-266a

པ་གཞན་མ་ཡིན་པ་དེ་བཞིན་དུ་ཉི་མས་བྱིན་གཟུགས་ཀྱང་འདི་ལྟར་ཀུན་རྫོབ་ཙམ་སྟེ། ཀུན་རྫོབ་ལས་གཟུགས་གཞན་མ་ཡིན། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་འདི་ལྟར་ཀུན་རྫོབ་ཙམ་སྟེ། ཀུན་རྫོབ་
ལས་རྣམ་པར་ཤེས་པའི་བར་དུ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་འདི་ལྟར་མིང་ཙམ་སྟེ། མིང་ཙམ་ལས་ནམ་མཁའ་ལ་བྲིས་པ་གཞན་མ་ཡིན་པ་དེ་བཞིན་དུ་གཟུགས་ཀྱང་མིང་ཙམ་སྟེ། མིང་ཙམ་ལས་གཞན་མ་ཡིན་ནོ། །དེ་བཞིན་
དུ་རྣམ་པར་ཤེས་པའི་བར་དུ་ཡང་འདི་ལྟར་མིང་ཙམ་སྟེ། མིང་ཙམ་ལས་རྣམ་པར་ཤེས་པའི་བར་དུ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་འདི་ལྟར་བརྗོད་པ་ཙམ་སྟེ། བརྗོད་པ་ཙམ་ལས་ནམ་མཁའ་ལ་བྲིས་པ་གཞན་མ་ཡིན་པ་དེ་
བཞིན་དུ་གཟུགས་ཀྱང་འདི་ལྟར་བརྗོད་པ་ཙམ་སྟེ། བརྗོད་པ་ཙམ་ལས་གཟུགས་གཞན་མ་ཡིན་ནོ། །དེ་བཞིན་དུ་རྣམ་པར་ཤེས་པའི་བར་དུ་ཡང་འདི་ལྟར་བརྗོད་པ་ཙམ་སྟེ། བརྗོད་པ་ཙམ་ལས་རྣམ་པར་ཤེས་པའི་བར་དུ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། 
དཔེར་ན་ནམ་མཁའ་ལ་བྲིས་པ་ནི་འདི་ལྟར་བཏགས་པ་ཙམ་སྟེ། བཏགས་པ་ཙམ་ལས་ནམ་མཁའ་ལ་བྲིས་པ་གཞན་མ་ཡིན་པ་དེ་བཞིན་དུ་གཟུགས་ཀྱང་འདི་ལྟར་བཏགས་པ་ཙམ་སྟེ། བཏགས་པ་ཙམ་ལས་གཟུགས་གཞན་མ་ཡིན་ནོ། །ཚོར་བ་དང་། འདུ་
ཤེས་དང་། འདུ་བྱེད་དང་། རྣམ་པར་ཤེས་པ་ཡང་འདི་ལྟར་བཏགས་པ་ཙམ་སྟེ། བཏགས་པ་ཙམ་ལས་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་འདི་ལྟར་
འདུ་ཤེས་ཙམ་སྟེ། འདུ་ཤེས་ཙམ་ལས་ནམ་མཁའ་ལ་བྲིས་པ་གཞན་མ་ཡིན་པ་དེ་བཞིན་དུ་གཟུགས་ནས་རྣམ་པར་ཤེས་པའི་བར་དུ་ཡང་འདི་ལྟར་འདུ་ཤེས་ཙམ་སྟེ། འདུ་ཤེས་ཙམ་ལས་གཟུགས་ནས་རྣམ་པར་ཤེས་པའི་བར་དུ་གཞན་མ་ཡིན་ནོ། །ཉི་མས་
བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་བརྡ་ཙམ་སྟེ། བརྡ་ཙམ་ལས་ནམ་མཁའ་ལ་བྲིས་པ་གཞན་མ་ཡིན་པ་དེ་བཞིན་དུ་གཟུགས་ནས་རྣམ་པར་ཤེས་པའི་བར་དུ་ཡང་འདི་ལྟར་བརྡ་ཙམ་སྟེ། བརྡ་ཙམ་ལས་གཟུགས་ནས་རྣམ་པར་ཤེས་པའི་བར་དུ་གཞན་

49-1-266b

མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ཚིག་གང་གིས་ནམ་མཁའ་ལ་བྲིས་པ་གཞན་མ་ཡིན་དོན་དམ་པར་མི་དམིགས་པ་དེ་བཞིན་དུ་འདི་ལྟ་སྟེ། གཟུགས་དང་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཞེས་བྱ་བའི་ཆོས་དེ་དག་ཀྱང་འདས་པའི་དེ་
བཞིན་གཤེགས་པ་རྣམས་ཀྱིས་ཀྱང་མ་དམིགས། མ་བྱོན་པ་དང་། ད་ལྟར་གྱི་དེ་བཞིན་གཤེགས་པ་རྣམས་ཀྱིས་ཀྱང་མ་དམིགས་སོ། །ཉི་མས་བྱིན་ཡེ་ཤེས་དེ་རྟོགས་པར་བྱ་བའི་ཕྱིར་སངས་རྒྱས་བཅོམ་ལྡན་འདས་རྣམས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྡུག་ཅིང་
ཕངས་པའི་དངོས་པོ་ཐམས་ཅད་ཡོངས་སུ་བཏང་ཡང་ཞུམ་པར་མི་འགྱུར་ཏེ། གང་ཡེ་ཤེས་འདི་ལ་གནས་པ་དེ་དག་ནི་འཇིག་རྟེན་དུ་རྟོགས་པར་མི་བལྟའོ། །གང་ཡེ་ཤེས་འདི་ལ་གནས་པ་དེ་དག་ནི་འཇིག་རྟེན་གྱི་གྲངས་སུ་མི་འགྲོའོ། །གང་ཡེ་ཤེས་འདི་ལ་གནས་པ་དེ་དག་
ནི་གདགས་པར་བྱ་བ་མ་ཡིན་ནོ། །གང་ཡེ་ཤེས་འདི་ལ་གནས་པ་དེ་དག་ནི་བྱང་ཆུབ་མངོན་པར་རྫོགས་པར་སངས་རྒྱས་ཏེ། གང་ཡེ་ཤེས་འདི་ལ་གནས་པ་དེ་དག་ནི་འཁོར་བ་ལས་བསྐྱོད་པ་མ་ཡིན་ནོ། །གང་ཡེ་ཤེས་འདི་ལ་གནས་པ་དེ་དག་ནི་འཁོར་བའི་ཆོས་ཅན་
ཡང་མ་ཡིན་ནོ། །མྱ་ངན་ལས་འདས་པའི་ཆོས་ཅན་ཡང་མ་ཡིན་ནོ། །གང་ཡེ་ཤེས་འདི་ལ་གནས་པ་དེ་དག་ནི་ཀུན་ནས་ཉོན་མོངས་པའི་ཆོས་ཅན་མ་ཡིན། རྣམ་པར་བྱང་བའི་ཆོས་ཅན་མ་ཡིན་ནོ། །གང་ཡེ་ཤེས་འདི་ལ་གནས་པ་དེ་དག་ནི་ཞི་བར་སྤྱོད་པ་ཡང་མ་ཡིན། མ་ཞི་
བར་སྤྱོད་པ་ཡང་མ་ཡིན་ནོ། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་གྱིས་སྐྱེས་བུ་དམ་པ་གྲགས་བྱིན་གྱིས་བཤད་པ་ལ་ལེགས་སོ་ཞེས་ཤིན་དུ་བསྟོད་དེ་རྗེས་སུ་ཡི་རང་ངོ་། །དེ་ནས་ཡང་སྐྱེས་བུ་དམ་པ་བཅུ་གཅིག་པོ་དེ་དག་གིས་བྲམ་ཟེའི་རིགས་ཤིང་སཱ་
ལ་ཆེན་པོ་ལྟ་བུའི་བུ་ཉི་མས་བྱིན་དེ་རབ་ཏུ་དགའ་བར་བྱ་བའི་ཕྱིར་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་ཆོས་ཟབ་མོ་འདི་ཐོས་ཀྱང་སྐྲག་པར་མ་གྱུར། ཤིན་ཏུ་སྐྲག་པར་མ་གྱུར། མ་མྱོས་མྱོས་པར་མ་གྱུར་
པ་ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་གང་ལ་བསླབ་པར་བྱ་བའི་ས་ནི་འདི་ཡིན་ནོ། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་ཟབ་མོ་གོས་པ་མེད་པའི་ཆོས་བསྟན་པ་འདི་ཐོས་ནས་ཚིམ་ཞིང་མགུ་སྟེ་ཡིད་རངས་ནས་རབ་ཏུ་དགའ་སྟེ། དགའ་བ་

49-1-267a

དང་། ཡིད་བདེ་བ་སྐྱེས་ནས་སངས་རྒྱས་ཀྱི་ཆོས་ཟབ་མོ་མཐར་ཕྱིན་པར་གྱུར་ཏོ།། །། བམ་པོ་བདུན་པ་སྟེ་ཐ་མ། དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་དང་། སྐྱེས་བུ་དམ་པ་བཅུ་གཅིག་པོ་དེ་དག་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགའ་མཆོག་ཅེས་བྱ་བ་དེ་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་སྐྱེས་བུ་དམ་པ་གྲགས་བྱིན་དེས་བཅོམ་ལྡན་འདས་དེ་བཞིན་
གཤེགས་པ་དགའ་མཆོག་དེ་ལ་ཚིགས་སུ་བཅད་པ་འདི་དག་གསོལ་ཏོ། །ཞི་བའི་དབྱིངས་ལ་རབ་ཞུགས་ཚུལ་རྣམས་ལ། །མཁས་པ་འདྲེན་པ་རྣམས་ནི་ལེགས་སོ་ལེགས། །གང་གིས་མི་མཆོག་ཤིན་དུ་འཐོབ་འགྱུར་བ། །དེ་ནི་མི་རྣམས་དམ་པ་བསྟན་དུ་གསོལ། །འཇིག་རྟེན་མཁས་
པས་བསྟན་པ་ཐོས་ནས་སུ། །བྱང་ཆུབ་མཆོག་ལ་མི་རྣམས་རབ་ཏུ་འཇུག །གང་ཐོས་དྲང་སྲོང་ཆེན་པོར་འགྱུར་བ་དང་། །ཚུལ་དེ་སྲོག་ཆགས་རྣམས་ལ་སྨན་སླད་གསུངས། །བདེ་གཤེགས་བདག་གི་རིགས་ལ་གནས་ནས་སུ། །ཐུབ་པས་སངས་རྒྱས་ཡེ་ཤེས་
མངོན་པར་བསྟོད། །རྒྱལ་བས་དེ་ཡིད་རབ་ཏུ་དགའ་བར་མཛད། །དེ་དག་ཐོས་ནས་ཤིན་དུ་གནས་པར་འགྱུར། །རྒྱལ་བ་བདག་གིས་ཇི་ཙམ་འཆལ་བ་རྣམས། །འདྲེན་པ་བདག་གིས་ཆོས་རྣམས་བཤད་ལགས་ཏེ། །སྟོན་པས་ཇི་ལྟར་ཆོས་རྣམས་ཀུན་མཁྱེན་པ། །
འདྲེན་པས་ལེགས་པར་མ་ལུས་བསྟན་དུ་གསོལ། །དེ་ལ་དགའ་མཆོག་འཇིག་རྟེན་འདྲེན་པ་ཡིས། །རྒྱལ་སྲས་སྤྱོད་པ་གང་ལ་སྤྱད་པས་ན། །མི་ཡི་གཙོ་བོ་འདྲེན་པར་འགྱུར་བ་ཡི། །སངས་རྒྱས་ཆོས་རྣམས་མ་ལུས་ངེས་པར་བསྟན། །ཐམས་ཅད་ཆོས་
ཤེས་བྱ་བ་མཚན་ཉིད་གཅིག །མཚན་ཉིད་བྲལ་ཞིང་མཚན་ཉིད་མེད་པ་སྟེ། །ཞི་བ་ང་མེད་མི་གཡོ་ཡོན་ཏན་མེད། །སྤོབས་པ་མེད་ཅིང་ཞི་བ་འཚོ་བ་མེད། །ཀུན་ནས་ཉོན་མོངས་རྣམ་པར་བྱང་བས་སྟོང་། །དངོས་པོ་ཉིད་མེད་ཅུང་ཟད་མེད་པ་སྟེ། །འདི་ནི་བསྟན་པ་མ་
ཡིན་སྟོན་པ་མེད། །བཤད་པ་མེད་ཅིང་འཆད་པར་བྱེད་པའང་མེད། །ཚོར་བ་མ་ཡིན་ཚོར་བ་པོ་ཡང་མེད། །ཤེས་པ་མ་ཡིན་ཤེས་པར་བྱེད་པའང་མེད། །སུ་ལའང་མ་ཡིན་གང་གིས་ཀྱང་མིན་ཏེ། །འདི་དག་མ་བྱས་བྱེད་དུ་བཅུག་པའང་མེད། །སུས་ཀྱང་བླངས་

49-1-267b

པ་མེད་ཅིང་བཏང་བའང་མེད། །སུས་ཀྱང་བསྒྲགས་པ་མེད་ལ་ཐོས་པའང་མེད། །སུས་ཀྱང་མི་ཤེས་རྣམ་པར་ཤེས་པའང་མེད། །འདི་དག་དངོས་པོར་སུས་ཀྱང་མཐོང་བ་མེད། །འདི་ནི་ཞི་བ་མ་ཡིན་རྒོད་པའང་མིན། །ཞི་བར་མི་བྱེད་ཞི་བར་བྱས་པའང་མེད། །
བྱེད་པ་མ་ཡིན་བྱེད་པ་མེད་པའང་མིན། །སེམས་པ་མེད་ཅིང་ཚོར་བར་བྱེད་པའང་མེད། །འདུས་བྱས་མ་ཡིན་འདུས་མ་བྱས་པའང་མིན། །འཕོ་བ་མ་ཡིན་མི་འཕོ་བ་ཡང་མིན། །འོངས་པ་མེད་ཅིང་འགྲོ་བ་ཡོད་པ་མིན། །འདི་ནི་ཀུན་དུ་མི་འཆི་སྐྱེ་བ་མེད། །སྐྱེ་བ་
མེད་ཅིང་བསྐྱེད་པའང་མ་ཡིན་ཏེ། །འདི་ནི་འགགས་པ་མེད་ལ་འགགས་པའང་མིན། །འདི་ནི་བརྟན་པ་མེད་ཅིང་བཤིག་པའང་མེད། །དེ་ལྟར་རྒྱལ་བའི་ཆོས་རྣམས་བཤིག་པའང་མེད། །དེ་ལྟར་རྒྱལ་བའི་ཆོས་རྣམས་ཤེས་པར་གྱིས། །འདྲེན་པ་བདེ་བར་
གཤེགས་པ་གང་འདས་པ། །དེ་དག་གིས་ཀྱང་ཚུལ་འདི་རབ་ཏུ་བསྟན། །འདྲེན་པ་སངས་རྒྱས་མ་བྱོན་འབྱུང་བ་རྣམས། །དེ་དག་ཀྱང་ནི་ཚུལ་འདི་འཆད་པར་འགྱུར། །རྣམ་པར་འདྲེན་པ་ད་ལྟར་གང་བྱུང་བ། །རྒྱལ་བ་དེ་དག་ཀུན་ཀྱང་ཚུལ་འདི་སྟོན། །
ཆོས་ཉིད་འདི་དག་རབ་ཏུ་ཤེས་པ་ཡི། །བྱང་ཆུབ་སེམས་དཔའ་འཇིགས་པ་མེད་པར་འགྱུར། །ཞི་བའི་ས་ཡང་རབ་ཏུ་ཤེས་འགྱུར་ཏེ། །མཁས་པས་ཤེས་པར་དཀའ་བ་རབ་ཏུ་བསྟན། །རྒྱལ་བའི་ཐུགས་སྲས་ཇི་ཙམ་ཤེས་པ་དག །འགྲོ་བ་གཙེས་པ་འདི་ལ་མྱ་ངན་མེད། །
དེ་ལ་སྙིང་རྗེ་བླ་ན་མེད་པ་སྟེ། །འགྲོ་བ་ཀུན་ལ་བྱམས་པར་ཤིན་དུ་གནས། །སྟོང་པ་ཉིད་ལ་གནས་པར་གྱུར་པས་ན། །རྒྱལ་བའི་བསྟན་པ་དག་ལ་ཐེ་ཙོམ་མེད། །མཚན་མ་མེད་པར་གནས་པར་གྱུར་པས་ན། །དེ་ལ་སྨོན་ལམ་འདེབས་པའང་ཡོང་མེད་དེ། །རླུང་རྣམས་
ནམ་མཁའ་དག་ལ་མི་ཐོགས་བཞིན། །དཔའ་བོ་དེ་དག་འགྲོ་བར་མི་ཆགས་སོ། །བསྐལ་པ་མང་པོར་བྱེ་བར་ཀུན་འཁོར་ཞིང་། །སེམས་ཅན་བྱེ་བ་མང་པོ་སྟོན་པར་བྱེད། །ཀུན་དུ་ཀུན་ནས་ཉོན་མོངས་མི་འགྱུར་ཏེ། །དེ་ནི་བྱང་ཆུབ་དམ་པ་འཚང་རྒྱ་ནུས། །གལ་ཏེ་བདུད་ཀྱིས་
སངས་རྒྱས་བྱེ་བསྟན་ཏེ། །དེ་དག་ཉན་ཐོས་གྱིས་ཤེས་སྨྲ་ན་ཡང་། །ངས་ནི་ཆོས་ཉིད་ཡང་དག་རབ་རྟོགས་ཏེ། །ཁྱོད་ནི་འདྲེན་པ་མིན་ཞེས་དེ་སྨྲའོ། །དྲི་མ་མེད་པའི་ཡེ་ཤེས་མིག་སྦྱངས་ཏེ། །བདག་ནི་ཐེ་ཚོམ་མ་ལུས་རྣམ་པར་བྱང་། །སྟོང་པར་བདག་ནི་གཞན་དྲིང་གྱི་མི་

49-1-268a

འཇོག །ཁྱོད་ནི་གང་ཟག་མཆོག་མིན་ཕར་དེང་ཤིག །དེ་ལྟར་རྒྱལ་བས་ཆོས་ཉིད་བསྟན་པས་ན། །གང་ལ་འདྲེན་པའི་སྲས་རྣམས་གནས་པ་ལ། །བྱེ་བ་ཁྲག་ཁྲིག་བདུད་གྱིས་ཐུག་དཀའ་ཏེ། །ཇི་ལྟར་རི་བོ་བསྐྱོད་པར་མི་ནུས་བཞིན། །དེ་ནས་
བྲམ་ཟེའི་རིགས་ཤིང་ས་ལ་ཆེན་པོ་ལྟ་བུའི་བུ་ཉི་མས་བྱིན་བཅོམ་ལྡན་འདས་དེ་བཞིན་གཤེགས་པ་དགའ་མཆོག་དེ་ལས་སྟོང་པ་ཉིད་དང་ལྡན་པའི་ཚིགས་སུ་བཅད་པ་དེ་དག་ཐོས་ནས་འདི་ལྟ་བུའི་དགེ་བའི་རྩ་བའི་ཤུགས་ཐོབ་སྟེ། དགེ་བའི་རྩ་བ་ཇི་ལྟ་བུའི་ཐོབ་པས་ཏ་ལ་
བདུན་སྲིད་དུ་ནམ་མཁའ་ལ་འཕགས་ཏེ། དེས་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་པ་དག་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་ཕྲག་དཔག་ཏུ་མེད་པ་རྣམས་ཐབས་མཁས་པ་རྣམ་པ་ཐ་དད་པས་བྱང་ཆུབ་སེམས་དཔའ་ཡང་དག་པར་སྒྲུབ་པ་མཐོང་། 
བྱང་ཆུབ་སེམས་དཔའ་བྱེ་བ་ཁྲག་ཁྲིག་དཔག་ཏུ་མེད་པ་རྣམས་དགའ་ལྡན་གྱི་གནས་ནས་ཤི་འཕོས་ཏེ། ཡུམ་གྱི་ལྷུམས་སུ་ཞུགས་པ་ཡང་མཐོང་། བྱང་ཆུབ་སེམས་དཔའ་བྱེ་བ་དཔག་ཏུ་མེད་པ་རྣམས་ལྷ་འབུམ་གྱིས་མཆོད་ཅིང་ཡུམ་གྱི་རུམ་དུ་འགྲོ་བ་ཡང་མཐོང་། བྱང་
ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་པ་རྣམས་བཙས་ནས་གོམ་པ་བདུན་འདོར་བ་ཡང་མཐོང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་དཔག་ཏུ་མེད་པ་རྣམས་མངོན་པར་འབྱུང་བ་ཡང་མཐོང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་
པ་རྣམས་བྱང་ཆུབ་མངོན་པར་རྫོགས་པར་བྱང་ཆུབ་པ་ཡང་མཐོང་། སངས་རྒྱས་བྱེ་བ་ཁྲག་ཁྲིག་དཔག་ཏུ་མེད་པ་རྣམས་ལ་བརྒྱ་བྱིན་དང་ཚངས་པ་དག་གིས་ཆོས་ཀྱི་འཁོར་ལོ་བསྐོར་བར་གསོལ་པ་ཡང་མཐོང་། སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་ཆོས་ཀྱི་འཁོར་ལོ་བསྐོར་བ་ཡང་
མཐོང་། སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་སྤྱོད་ལམ་དཔག་ཏུ་མེད་པ་རྣམས་ཀྱིས་སེམས་ཅན་རྣམས་འདུལ་བ་ཡང་མཐོང་། སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་ཕྱོགས་བཅུའི་འཇིག་རྟེན་ན་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་
སུ་མྱ་ངན་ལས་འདའ་བ་ཡང་མཐོང་ངོ་། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་བར་སྣང་ལ་འདུག་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགའ་མཆོག་དེ་ལ་ཚིགས་སུ་བཅད་པས་མངོན་པར་བསྟོད་པ། ལེགསོ་ལེགས་སོ་རྐང་གཉིས་ཀུན་གྱི་མཆོག །འདྲེན་པ་ཁྱོད་

49-1-268b

ཀྱིས་འདི་དག་ཆོས་བསྟན་པ། །བར་སྣང་གནས་ཀྱི་བྱ་ཡི་རྗེས་བཞིན་དུ། །དངོས་བྲལ་མཚུངས་མེད་ཅི་ཡང་མ་ལགས་པ། །མཚན་མ་མ་མཆིས་ནམ་མཁའ་བྲིས་པ་བཞིན། །དེ་ལྟར་བདེ་བར་གཤེགས་པས་ཆོས་བསྟན་ཏེ། །སྤྲུལ་པ་དག་གིས་ཇི་ལྟར་གཞན་སྤྲུལ་བཞིན། །ཡང་དག་ཏུ་ན་རྒྱལ་བས་བསྟན་མ་
མཆིས། །སོས་ཀའི་དུས་ཀྱི་སྨིག་རྒྱུ་ཇི་བཞིན་དུ། །སྣང་ཡང་ཡང་དག་པར་ནི་མཆིས་མ་ལགས། དེ་བཞིན་བདེ་བར་གཤེགས་པས་ཆོས་བསྟན་ཏེ། །སྟོན་པ་གང་ལགས་དེ་ཡང་དེ་དང་འདྲ། །སྔོན་ཆད་ཐེ་ཚོམ་ནེམ་ནུར་གང་བྱུང་བ། །དེ་ཡང་འདྲེན་པའི་དྲུང་དུ་བྲལ་གྱུར་ཏེ། །བདེ་བར་གཤེགས་པས་
གསུངས་པའི་ཆོས་ཀྱང་རིག །འགྲོ་བ་སྒྲོལ་མཛད་རྣམ་པར་འདྲེན་པར་ཤོག །སྟོབས་བཅུ་དག་གིས་བསྒྲུབས་པ་ཅི་འདྲ་བར། །རྒྱལ་བའི་ཞིང་མཆོག་བཟང་པོ་སྦྱང་བར་བགྱི། །སངས་རྒྱས་རྒྱལ་བ་རྐང་གཉིས་གཙོར་གྱུར་ཏེ། །སྐྱེ་བོ་མ་རྟོགས་པ་རྣམས་རྟོགས་པར་བགྱི། །སྲིད་པའི་རྒྱ་མཚོས་ཁྱེར་
བའི་འགྲོ་བ་རྣམས། །གནས་དང་སྐྱབས་དང་རྟེན་ཀྱང་མ་མཆིས་པའི། །སྐྱབས་སུ་འགྱུར་ཞིང་སྡུག་བསྔལ་ཐར་བགྱི་སྟེ། །རྒ་ཤི་བྲལ་བའི་གནས་ཀྱང་བསྟན་པར་བགྱི། །བྱེ་བ་ཁྲག་ཁྲིག་བདུད་ཀྱི་སྤྱོད་ཡུལ་ནི། །ཐམས་ཅད་རྒྱལ་བའི་སྤྱོད་ཡུལ་དུ་ཡང་བགྱི། །སེམས་ཅན་བདུད་ཀྱི་ཡུལ་ནས་སྟོངས་ནས་སུ། །དྲང་
སྲོང་ཆེན་པོའི་ཡུལ་དུ་དྲང་བར་བགྱི། །བདེ་བར་གཤེགས་པས་ཞི་བའི་ཆོས་བསྟན་པ། །གང་གིས་ཐོས་ནས་གང་ལའང་མི་རེག་པ། །དེ་དག་མཆོག་གི་ཚུལ་ལ་གནས་པར་འགྱུར། །འདྲེན་པ་སྲོག་ཆགས་རྣམས་ཀྱི་སྟོན་པར་འགྱུར། །ཆོས་ཉིད་འདི་ལྟར་མི་གང་རབ་རྟོགས་ཤིང་། །སྟོན་པ་རྒྱལ་བའི་དབང་པོའི་
སྤྱན་སྔ་ནས། །བསྟན་བཅོས་ཀུན་ལ་མཁས་ཤིང་འཇིགས་བྲལ་བ། །དེ་དག་བླ་ན་མེད་པའི་བདེ་གཤེགས་འགྱུར། །སྟོང་པ་འདི་ཉིད་གང་གིས་རབ་རྟོགས་ཤིང་། །སྟོང་པར་དམིགས་པའི་འདུ་ཤེས་བྲལ་གྱུར་ན། །དེ་དག་མ་སྨས་བདེ་བར་གཤེགས་པར་འགྱུར། །སྲོག་ཆགས་བྱེ་བ་མང་པོ་འགྲོལ་བར་བགྱིད། །མཁས་
པ་བཙོག་པ་ལ་ནི་མི་དགའ་སྟེ། །ཟས་ཀྱི་རོ་རྣམས་ལ་ཡང་ཆགས་མ་མཆིས། །རྟོགས་པ་དགོན་པའི་གནས་ལ་ཤིན་དུ་མོས། །དེ་དག་རྐང་གཉིས་དམ་པ་མཁས་པར་འགྱུར། །སྦྱངས་པ་གང་དག་སྟོབས་བཅུས་བསྔགས་པ་དག །དེ་དག་རྟག་ཏུ་རབ་ཏུ་གནས་པར་འགྱུར། །འཕགས་པའི་རིགས་
ལ་དེ་དག་རྟག་ཏུ་དགའ། །རབ་ཏུ་དགའ་བས་བྱང་ཆུབ་མཆོག་ཀྱང་ཐོབ། །དེ་དག་ཆོས་རྣམས་བདེ་བར་གཤེགས་པས་བསྔགས། །དེ་ལ་མཁས་པ་གནས་པས་འདི་མཐོང་སྟེ། །ཞི་བ་གང་ལ་བདེ་གཤེགས་གནས་པ་ཡི། །བྱང་ཆུབ་དེ་ནི་འཇིག་རྟེན་འདྲེན་པས་བསྔགས། །འདྲེན་པ་ཁྱོད་ལས་སྟོང་པ་

49-1-269a

དེང་ཐོས་ཏེ། །ཡེ་ཤེས་བླ་ན་མེད་པའང་བདག་གིས་བསྒྲུབས། །སངས་རྒྱས་རྐང་གཉིས་གཙོ་བོར་འགྱུར་བར་བགྱི། །མི་མཁས་འགྲོ་བ་དག་ཀྱང་རྣམ་པར་དགྲོལ། །ཐུབ་པ་ཁྱོད་ལ་བདག་ནི་སྐྱབས་སུ་མཆི། །གང་ལ་ལོག་པའི་བློ་གྲོས་མི་དམིགས་ཤིང་། །ཆོས་རྣམས་
ཀུན་ལ་ཁྱོད་ནི་ཐེ་ཚོམ་བྲལ། །དེ་སླད་འཇིག་རྟེན་ཁྱོད་དང་འདྲ་མ་མཆིས། །འདྲེན་པ་བདེ་བར་གཤེགས་ལ་གང་བསྟོད་པའི། །བསོད་ནམས་མི་ཆུང་བདག་གིས་བསགས་པས་ན། །བདག་ནི་དེ་ཡི་དགེ་བའི་ལས་འདི་ཡིས། །མི་ཡི་གཙོ་བོ་འདྲེན་པར་འགྱུར་བར་ཤོག །དེ་ནས་བྲམ་ཟེའི་རིགས་ཤིང་
སཱ་ལ་ཆེན་པོ་ལྟ་བུའི་བུ་ཉི་མས་བྱིན་གྱིས་བཅོམ་ལྡན་འདས་དེ་བཞིན་གཤེགས་པ་དགའ་མཆོག་དེ་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས་དགེ་བའི་རྩ་བ་དེས་བསྐལ་པ་བརྗོད་དུ་མེད་པར་ནམས་ཀྱང་སྨྱོས་པ་དང་གླེན་པར་མ་གྱུར་ཏོ། །གང་དང་གང་དུ་སྐྱེས་པ་དེ་དང་དེར་འདྲེན་པ་སྐྱེས་བུ་ཆེན་
པོར་གྱུར་ཏོ། །ནམས་ཀྱང་ལོག་པར་ལྟུང་བར་མ་གྱུར་ཏོ། །ནམས་ཀྱང་གཞན་གྱི་དྲིང་ལ་འཇོག་པར་མ་གྱུར་ཏོ། །ནམས་ཀྱང་གཞན་གྱི་ངོར་ལྟ་བར་མ་གྱུར་ཏོ། །ནམས་ཀྱང་བསྐལ་པ་བརྗོད་དུ་མེད་པར་ཐ་ན་སེ་གོལ་གཏོགས་པ་ཙམ་གྱི་བར་དུ་སེམས་ཅན་རྣམས་ཡོངས་སུ་སྨིན་པར་མ་བྱས་པར་མ་གྱུར་ཏོ། །ཐམས་ཅད་ཟིལ་
གྱིས་གནོན་པ་འདི་ཇི་སྙམ་དུ་སེམས། དེའི་ཚེ་དེའི་དུས་ན་རིགས་ཀྱི་བུ་གྲགས་བྱིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་ཐམས་ཅད་ཟིལ་གྱིས་གནོན་པ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ་བཟང་སྐྱོང་ཞེས་བྱ་བ་དེ་དེའི་ཚེ་དེའི་དུས་ན་རིགས་ཀྱི་བུ་གྲགས་བྱིན་ཞེས་བྱ་བར་
གྱུར་ཏོ། །ཐམས་ཅད་ཟིལ་གྱིས་གནོན་པ་འདི་ཇི་སྙམ་དུ་སེམས། །དེའི་ཚེ་དེའི་དུས་ན་མཁས་པའི་སྙིང་པོར་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དཀོན་མཆོག་འབྱུང་གནས་ཞེས་བྱ་བ་དེ་དེའི་ཚེ་དེའི་དུས་ན་རིགས་ཀྱི་བུ་མཁས་པའི་
སྙིང་པོ་ཞེས་བྱ་བར་གྱུར་ཏོ། །ཐམས་ཅད་ཟིལ་གྱིས་གནོན་པ་འདི་ཇི་སྙམ་དུ་སེམས། དེའི་ཚེ་དེའི་དུས་ན་ཙན་དན་སྙིང་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སྐྱོབ་བྱིན་ཞེས་བྱ་བ་དེའི་ཚེ་དེའི་དུས་ན་རིགས་ཀྱི་བུ་ཙན་དན་
སྙིང་པོ་ཞེས་བྱ་བར་གྱུར་ཏོ། །ཐམས་ཅད་ཟིལ་གྱིས་གནོན་པ་འདི་ཇི་སྙམ་དུ་སེམས། དེའི་ཚེ་དེའི་དུས་ན་རིགས་ཀྱི་བུ་ཚངས་པའི་མིག་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དེད་དཔོན་བཟང་པོ་དེ་དེའི་ཚེ་དེའི་དུས་ན་རིགས་ཀྱི་བུ་ཚངས་པའི་

49-1-269b

མིག་ཅེས་བྱ་བར་གྱུར་ཏོ། །དེ་བཞིན་དུ་སྦྱར་ཏེ། གང་རིགས་ཀྱི་བུ་དེས་པ་ཞེས་བྱ་བར་གྱུར་པ་དེ་ནི་བྱང་ཆུབ་སེམས་དཔའ་མེས་བྱིན་ཡིན་ནོ། །གང་དེའི་ཚེ་དེའི་དུས་ན་རིགས་ཀྱི་བུ་བློ་གྲོས་འཆང་ཞེས་བྱ་བར་གྱུར་པ་དེ་ནི་བྱང་ཆུབ་སེམས་དཔའ་བཟང་སྐྱོང་ཡིན་ནོ། །དེའི་ཚེ་དེའི་དུས་ན་གང་རིགས་ཀྱི་བུ་ཀུན་དུ་འཛིན་པར་གྱུར་པ་དེ་ནི་བྱང་
ཆུབ་སེམས་དཔའ་དབང་པོས་བྱིན་ཡིན་ནོ། །དེའི་ཚེ་དེའི་དུས་ན་གང་རིགས་ཀྱི་བུ་སྤོབས་པ་མཐའ་ཡས་སུ་གྱུར་པ་དེ་ནི་བྱང་ཆུབ་སེམས་དཔའ་ཆུའི་ལྷ་ཡིན་ནོ། །ཐམས་ཅད་ཟིལ་གྱིས་གནོན་པ་འདི་ཇི་སྙམ་དུ་སེམས། དེའི་ཚེ་དེའི་དུས་ན་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུའི་བུ་ཉི་མས་བྱིན་ཞེས་བྱ་
བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་ཐམས་ཅད་ཟིལ་གྱིས་གནོན་པ་ཁྱོད་ཀྱིས་དེ་ལྟར་མི་བལྟའོ། །འཇམ་དཔལ་གཞོན་ནུར་གྱུར་པ་འདི་དེའི་ཚེ་དེའི་དུས་ན་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུའི་བུ་ཉི་མས་བྱིན་ཞེས་བྱ་བར་གྱུར་ཏོ། །ཐམས་ཅད་ཟིལ་གྱིས་གནོན་པ་དེ་ལྟ་བས་ན། བྱང་ཆུབ་སེམས་
དཔའ་སེམས་དཔའ་ཆེན་པོ་གཞན་གྱི་དྲིང་ལ་མི་འཇོག་པ་དང་། གཞན་གྱིས་མི་བཀྲི་བར་འདོད་པ་དང་། གཞན་གྱི་ངོར་མི་བལྟ་བར་འདོད་ན་ཆོས་ཀྱི་དབྱིངས་ལ་རབ་ཏུ་འཇུག་པའི་ཕྱིར་དགེ་བའི་བཤེས་གཉེན་རྣམས་ལ་བསྟེན་པར་བྱ། འགྲོགས་པར་བྱ། བསྙེན་བཀུར་བྱའོ། །ཆོས་ཟབ་མོ་མཉན་པའི་ཕྱིར་ཡོངས་སུ་འདྲི་བའི་
ངང་ཚུལ་ཅན་དུ་བྱའོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་སྟོབས་བསྐྱེད་པས་ཆོས་ཀྱི་དབྱིངས་ལ་ཞུགས་པ། བྱང་ཆུབ་སེམས་དཔའ་ཐམས་ཅད་ཟིལ་གྱིས་གནོན་པ་འདིས་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་
དགེ་བའི་རྩ་བ་བསྐྱེད་ལགས། སངས་རྒྱས་བཅོམ་ལྡན་འདས་ཇི་སྙེད་ཅིག་ལ་ཡོངས་སུ་ཞུ་བ་ཞུས་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ས་དང་རྩྭ་དང་ཤིང་
དང་ཡལ་ག་དང་། ལོ་མ་རྣམས་རྡུལ་ཕྲ་རབ་ཏུ་བྱས་ཀྱང་བགྲང་བར་ནུས་ཀྱི། བྱང་ཆུབ་སེམས་དཔའ་ཐམས་ཅད་ཟིལ་གྱིས་གནོན་པས་སངས་རྒྱས་བཅོམ་ལྡན་འདས་དེ་དག་ལས་དགེ་བའི་རྩ་བ་བསྐྱེད་པ་དང་། སངས་རྒྱས་བཅོམ་ལྡན་འདས་རྣམས་ལ་ཆོས་ཀྱི་དབྱིངས་སུ་ཡོངས་སུ་ཞུགས་པ་དང་། ཆོས་ཀྱི་དབྱིང་
ལ་འཇུག་པ་དང་། ཐབས་མཁས་པ་ལ་འཇུག་པ་ཡོངས་སུ་དྲིས་པ་ནི་བགྲང་བར་མི་ནུས་སོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད། དཔག་ཏུ་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན། ཞི་བའི་ཕུང་པོའི་བསྐལ་པ་ལ་

49-1-270a

སངས་རྒྱས་ཀྱི་ཞིང་དཔག་ཏུ་མེད་ཅིང་སངས་རྒྱས་ཀྱི་ཞིང་ཚད་མེད་པར་ཡོངས་སུ་དག་པ་དང་ལྡན་པ་བརྗོད་དུ་མེད་པའི་སངས་རྒྱས་ཀྱི་ཞིང་ཡོངས་སུ་དག་པ་དང་ལྡན་པར་དེ་བཞིན་གཤེགས་པ། རིགས་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་
བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དབང་པོའི་རྒྱལ་མཚན་ཞེས་བྱ་བ་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་དབང་པོའི་རྒྱལ་མཚན་དེའི་སངས་རྒྱས་ཀྱི་ཞིང་དེ་ན་ཡང་དགེ་སློང་དཔའ་སྲ་ཞེས་བྱ་བ་མཁས་པ། ཡིད་གཞུངས་པ། བྱེ་བྲག་ཕྱེད་པ། རྟོགས་པ། ཤེས་རབ་ཀྱི་རང་
བཞིན་ཅན་ཞིག་བྱུང་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་རྒྱལ་མཚན་དེ་ལ་རིམ་གྲོ་བྱེད་པར་གྱུར་ཏོ། །དེས་དེ་བཞིན་གཤེགས་པ་དབང་པོའི་རྒྱལ་མཚན་དེ་ལ་ལོ་བྱེ་བ་ཁྲག་ཁྲིག་བརྒྱད་བཅུའི་བར་དུ་ཤིན་དུ་གུས་པར་བྱས་ཏེ་བཤད་པ་རྣམས་
ཀྱང་གཟུངས་སུ་འཛིན་ཅིང་རང་གི་དོན་ཀྱང་མི་གཏོང་སྟེ། དེས་དེ་བཞིན་གཤེགས་པ་ལ་ལོ་བྱེ་བ་ཁྲག་ཁྲིག་བརྒྱད་བཅུའི་བར་དུ་ཐམས་ཅད་མཁྱེན་པ་ཉིད་ཀྱི་སེམས་ཀྱིས་རིམ་གྲོ་བྱས་ཏེ། དེའི་དགེ་བའི་རྩ་བས་སངས་རྒྱས་བྱེ་བ་ཁྲག་ཁྲིག་དཔག་ཏུ་མེད་པ་རྣམས་མཉེས་པར་བྱས་ནས་དེ་བཞིན་གཤེགས་
པ་དེ་དག་ཐམས་ཅད་ཀྱི་རིམ་གྲོ་བྱེད་པར་གྱུར་ཏེ། དེ་བཞིན་གཤེགས་པ་དེ་དག་ཐམས་ཅད་ལའང་ཐམས་ཅད་མཁྱེན་པ་ཉིད་ཀྱི་སེམས་ཀྱིས་བསྙེན་བཀུར་བྱས་སོ། །དེ་བཞིན་གཤེགས་པ་དེ་དག་ཐམས་ཅད་ཀྱིས་ཐོག་མ་དང་། བར་དང་། ཐ་མར་དུས་གསུམ་དུ་བསྟན་པ་རྣམས་ཡོངས་སུ་
བཟུང་བར་གྱུར་ཏོ། །དེའི་འོག་ཏུ་ཞི་བའི་སྙིང་པོ་ཞེས་བྱ་བའི་བསྐལ་པ་དེ་ལ་སངས་རྒྱས་བྱེ་བ་ཕྲག་དགུ་བྱུང་སྟེ། སངས་རྒྱས་བཅོམ་ལྡན་འདས་དེ་དག་ཐམས་ཅད་བྱང་ཆུབ་སེམས་དཔའ་དེས་ཡང་མཉེས་པར་བྱས་ནས་དེ་བཞིན་གཤེགས་པ་དེ་དག་ཐམས་ཅད་ཀྱི་རིམ་གྲོ་བྱེད་པར་གྱུར་ཏེ། དེ་དག་
ཐམས་ཅད་ལ་ཡང་ཐམས་ཅད་མཁྱེན་པ་ཉིད་ཀྱི་སེམས་ཀྱི་རིམ་གྲོ་བྱས་ནས་དེ་བཞིན་གཤེགས་པ་དེ་དག་ཐམས་ཅད་ཀྱི་ཐོག་མ་དང་། བར་དང་། ཐ་མ་དུས་གསུམ་དུ་བསྟན་པ་རྣམས་ཡོངས་སུ་བཟུང་ངོ་། །དེའི་འོག་ཏུ་ཟླ་འོད་ཅེས་བྱ་བའི་བསྐལ་པ་བྱུང་སྟེ། དེ་ལ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་དཀོན་མཆོག་མཁས་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་དཀོན་མཆོག་མཁས་པའི་རྒྱལ་པོ་དེའི་ཚེའི་ཚད་ནི་བསྐལ་པ་བྱེ་བ་ཕྲག་བརྒྱད་བཅུར་གྱུར་ཏེ། དེ་ལ་ཡང་བྱང་ཆུབ་སེམས་དཔའ་དཔའ་སྲ་དེས་བསྐལ་པ་བྱེ་བ་བརྒྱད་བཅུའི་

49-1-270b

བར་དུ་ཡིད་དུ་འོང་བས་བསྙེན་བཀུར་བྱས་ཏེ། ཡིད་དུ་མི་འོང་བས་མ་ཡིན་ནོ། །དེ་ལ་དེ་བཞིན་གཤེགས་པ་དཀོན་མཆོག་མཁས་པའི་རྒྱལ་པོ་ཞེས་བྱ་བ་དེས་བསྐལ་པ་བརྒྱད་བཅུའི་བར་དུ་ཇི་ལྟར་ཆོས་ཀྱི་དབྱིངས་ལ་འཇུག་པར་འགྱུར་ཏེ། ནམ་མཁའ་ལ་བྲིས་པ་ལྟ་བུར་ཆོས་ཀྱི་དབྱིངས་སུ་འཇུག་པ་
བསྟན་ཏོ། །བསྐལ་པ་བྱེ་བ་བརྒྱད་བཅུའི་བར་དུ་ཆོས་ཐམས་ཅད་ནམ་མཁའ་ལ་བྲིས་པ་ལྟ་བུར་བསྟན་ཏེ། དཔའ་སྲ་འབྱུང་བ་ཆེན་པོ་བཞི་ནི་གཞན་དུ་འགྱུར་ཡང་སྲིད་ཀྱི་ནམ་མཁའ་ལ་བྲིས་པ་ལྟ་བུའི་ཆོས་ཐམས་ཅད་ནི་ཆུང་ཟད་ཀྱང་གཞན་དུ་འགྱུར་བ་མེད་དོ། །དེ་ནས་བྱང་ཆུབ་སེམས་དཔའ་
དཔའ་སྲ་ཆོས་ཀྱི་དབྱིངས་ལ་འཇུག་པ་འདི་ཐོས་ནས་འདི་ལྟ་བུའི་དགེ་བའི་རྩ་བའི་ཤུགས་ཐོབ་སྟེ། ཇི་ལྟ་བུའི་དགེ་བའི་རྩ་བའི་ཤུགས་ཐོབ་པས་ནམ་མཁའ་ལ་ཏ་ལ་བདུན་སྲིད་དུ་འཕགས་ཏེ། དེས་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་པ་ན་བྱང་ཆུབ་སེམས་དཔའ་དཔག་ཏུ་
མེད་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མཐོང་། ཁ་ཅིག་ནི་བླ་ན་མེད་པའི་ཆོས་ཀྱི་འཁོར་ལོ་བསྐོར། ཁ་ཅིག་ནི་རྫུ་འཕྲུལ་གྱི་ཆོ་འཕྲུལ་རྣམ་པ་དུ་མས་སེམས་ཅན་རྣམས་འདུལ། ཁ་ཅིག་ནི་ཚེའི་འདུ་བྱེད་འདོར། ཁ་ཅིག་ནི་ཕུང་པོའི་
ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བ་མཐོང་ནས་བཅོམ་ལྡན་འདས་དེ་བཞིན་གཤེགས་པ་དཀོན་མཆོག་མཁས་པའི་རྒྱལ་པོ་དེ་ལ་ཟབ་མོའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཞི་བ་བྱང་ཆུབ་མཚུངས་མེད་བཙལ་
སླད་དུ། །བདག་གིས་སངས་རྒྱས་འདས་པ་བྱེ་སྟོང་ལ། །ཤིན་དུ་གུས་པ་ཆེན་པོ་བསྐྱེད་ནས་སུ། །སྔོན་གྱི་འདྲེན་པ་དག་ལ་བསྙེན་བཀུར་བགྱིས། །སེམས་ནི་ནམས་ཀྱང་གཞན་དུ་མ་བསམས་ཏེ། །རྟག་པར་ཡིད་ནི་སྟོང་པ་ཉིད་ལ་བཞག །ཆོས་རྣམས་སྟོང་པར་བདེ་བར་
གཤེགས་པས་བསྟན། །དེ་དག་ཆོས་ཀྱང་ཡིད་ཀྱིས་རྣམ་པར་བསམས། །བདག་ཏུ་མྲ་བ་མི་གང་མི་མཁས་པ། །མུ་སྟེགས་ཅན་ཀུན་བདག་གིས་ཟིལ་གྱིས་མནན། །ཆོས་རྣམས་ཐམས་ཅད་ཆུ་ཡི་ཟླ་བ་བཞིན། །དེ་ལ་བདག་ནི་ཐེ་ཚོམ་ཅང་མ་མཆིས། །མིག་འདི་
དམ་པའི་དོན་དུ་སྟོང་པར་ནི། །བདེ་བར་གཤེགས་པས་བཤད་པ་ཐོས་ནས་རྟོགས། །མིག་འདི་མིག་དུ་མཆིས་པ་མ་ལགས་ཏེ། །འཛངས་པ་མ་ལགས་མི་རྣམས་འདི་ལ་སླད། །ངེས་པར་སྣ་ལྕེ་རྣ་བ་དེ་བཞིན་ཏེ། །ལུས་ཀྱང་ངོ་བོ་ཉིད་ཀྱིས་མཆིས་མ་

49-1-271a

ལགས། །དེ་བཞིན་སེམས་དང་སེམས་པའང་སྟོང་པ་ཉིད། །སེམས་ནི་དབེན་ཞིང་རབ་ཏུ་སྟོང་པ་ལགས། །གཟུགས་ཀྱང་གཟུགས་ཀྱིས་རྣམ་པར་དབེན་ཞིང་སྟོང་། །སྒྲ་དང་དྲི་དང་རོ་དང་རེག་ཀྱང་སྟོང་། །ཆོས་རྣམས་
ཐམས་ཅད་ངོ་བོ་ཉིད་སྟོང་སྟེ། །སྐྱེ་མཆེད་དེ་དག་ངོ་བོ་ཉིད་ཀྱིས་སྟོང་། །དེ་བཞིན་ཁམས་ཀྱང་ཁམས་རྣམས་ཉིད་ཀྱིས་སྟོང་། །བདེན་པའང་བདེན་པས་དེ་བཞིན་སྟོང་པ་སྟེ། །འདི་ལ་འཛངས་པ་མ་ལགས་འགྲོ་བ་རྣམས་ཀྱང་བསླད། །གང་ནའང་
སྟོང་པར་རིག་པ་མ་མཆིས་པར། །ནམ་མཁའ་བར་སྣང་བྱ་ཡི་རྗེས་དང་མཚུངས། །གང་ནའང་ངོ་བོ་ཉིད་ནི་མ་མཆིས་པ། །དེ་ནི་ནམས་ཀྱང་གཞན་གྱི་རྒྱུར་མི་འགྱུར། །གང་གིས་ངོ་བོ་ཉིད་ནི་མི་རྙེད་པར། །རང་བཞིན་དེ་མེད་ཇི་ལྟར་གཞན་གྱི་རྐྱེན། །
རང་བཞིན་མེད་པ་གཞན་གྱིས་ཅི་ཞིག་སྐྱེད། །རྒྱུ་དེ་བདེ་བར་གཤེགས་པས་བསྟན་པའོ། །ཐམས་ཅད་ཆོས་ཀྱང་མི་གཡོ་བརྟན་པར་གནས། །མི་འགྱུར་འཚེ་བ་མ་མཆིས་ཞི་བ་སྟེ། །ཇི་ལྟར་ནམ་མཁའ་རིག་པ་མ་མཆིས་ལྟར། །དེ་ལ་མི་
འཛངས་འགྲོ་བ་མྱོས་པར་འགྱུར། །ཇི་ལྟར་རི་བོ་དག་ནི་མི་སྒུལ་བ། །དེ་བཞིན་ཆོས་རྣམས་རྟག་ཏུ་བསྐྱོད་མི་ནུས། །འཆི་འཕོ་མ་མཆིས་སྐྱེ་བ་མ་མཆིས་པའི། །ཆོས་རྣམས་དེ་ལྟར་རྒྱལ་བས་རབ་ཏུ་བསྟན། །གང་གིས་ཡང་དག་ཆོས་
རྣམས་ངེས་རྟོགས་པ། །དེས་ནི་རྒྱལ་བ་རྣམ་འདྲེན་བསྙེན་བཀུར་བགྱིས། །གང་ལ་འདི་འདྲའི་ནན་ཏན་མ་མཆིས་པ། །དེ་དག་རྒྱལ་བའི་ཆོས་ཉིད་མཆོད་མ་བགྱིས། །གང་གིས་ཚུལ་བཞིན་རབ་ཏུ་ཆོས་རྟོགས་པ། །དེས་
ནི་རྒྱལ་བ་བདེ་གཤེགས་བཀུར་སྟིར་བགྱིས། །དེ་དག་རྒྱལ་བ་ཆོས་ཀྱིས་མཆོད་བགྱིས་ཏེ། །བྱང་ཆུབ་མཆོག་ཏུ་དེ་དག་འཚང་ཡང་རྒྱ། །གང་གིས་ཚུལ་བཞིན་ཆོས་རྣམས་རབ་རྟོགས་པ། །མཁས་པ་དེ་དག་རྒྱལ་བའི་རིགས་ཀྱང་འཛིན། །
བདེ་བར་གཤེགས་པའི་བསྟན་པ་དེས་བཟུང་སྟེ། །བྱང་ཆུབ་དམ་པ་མཆོག་ཏུ་འཚང་ཡང་རྒྱ། །རྒྱལ་བ་བརྒྱ་ཡིས་སྟོང་པ་ཉིད་བཤད་དེ། །བྱང་ཆུབ་སེམས་དཔའ་ཁྲག་ཁྲིག་རྣམས་ཀྱིས་བཟུང་། །བདེ་བར་གཤེགས་པའི་ཤུལ་འདིར་བྱང་

49-1-271b

ཆུབ་ཕྱིར། །དེ་ལ་མཁས་པ་ཐེ་ཚོམ་གཞར་མི་འབྱུང་། །བདེ་བར་གཤེགས་པས་ཆོས་རྣམས་གང་བསྟན་པ། །ཆོས་ཉིད་དེ་ནི་དེ་རིང་བདག་གིས་འཚལ། །འདྲེན་པ་མི་རྣམས་ཀྱི་ཡང་མཆོག་ཏུ་འགྱུར། །ཤིན་དུ་སྡུག་བསྔལ་སྐྱེ་བོ་རྣམ་
པར་དགྲོལ། །འདི་ལྟར་སྟོང་པ་ཉིད་ནི་རིག་པས་ན། །བདག་གིས་དེ་རིང་ཆོས་ཀྱི་ཡབ་ལ་མཆོད། །གང་སླད་མི་ཡི་གཙོ་བོ་ཁྱོད་འཕགས་པས། །དེ་བཞིན་གཤེགས་པ་དེ་ལ་སྐྱབས་སུ་མཆི། །དེ་ནས་བྱང་ཆུབ་སེམས་དཔའ་དཔའ་སྲས་བཅོམ་ལྡན་འདས་དེ་
བཞིན་གཤེགས་པ་དཀོན་མཆོག་མཁས་པའི་རྒྱལ་པོ་ལ་སྟོང་པ་ཉིད་དང་ལྡན་པའི་ཚིགས་སུ་བཅད་པ་དེ་དག་གིས་མངོན་པར་བསྟོད་པའི་དགེ་བའི་རྩ་བ་དེས་གང་དང་གང་དུ་སྐྱེས་པ་དེ་དང་དེར་ཡང་གཟུངས་དང་། ཞི་གནས་དང་། ཤེས་རབ་ཀྱིས་སེམས་ཅན་ཐམས་ཅད་ཟིལ་གྱིས་
མནན་ཏོ། །འཇམ་དཔལ་དེའི་ཚེ་དེའི་དུས་ན་བྱང་ཆུབ་སེམས་དཔའ་དཔའ་སྲར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཐམས་ཅད་ཟིལ་གྱིས་མནོན་པ་འདི་
དེའི་ཚེ་དེའི་དུས་ན་བྱང་ཆུབ་སེམས་དཔའ་དཔའ་སྲ་ཞེས་བྱ་བར་གྱུར་ཏོ། །དེ་ལྟ་བས་ན་འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བརྗོད་དུ་མེད་པ་རྣམས་ཡོངས་སུ་སྦྱང་བར་འདོད་པས་སྟོང་པ་ཉིད་
རྣམ་པར་ཐར་པའི་སྒོ་ལ་བསླབ་པར་བྱའོ། །དེ་ལ་སློབ་པའི་ཚེ་ཡང་སེམས་གང་ལ་ཡང་མི་ཆགས་མི་ཐོགས་ཏེ། དེའི་སེམས་མ་ཆགས་ཤིང་ཐོགས་པ་མེད་པས་བྱ་བ་གང་དང་གང་ལ་དམིགས་པ་དེ་དང་དེ་ཡང་མངོན་སུམ་དུ་འགྱུར་
རོ། །འཇམ་དཔལ་ང་སྟོང་པ་ཉིད་འདི་ལ་སློབ་པ་ན། ཡེ་ཤེས་ཇི་ལྟ་བུ་རབ་ཏུ་ཐོབ་པས་ཇི་ལྟར་བསམས་པ་དེ་བཞིན་དུ་འགྱུར་ཞིང་གར་འདོད་པ་དེར་འགྱུར་བའི་ཡེ་ཤེས་དེ་ལྟ་བུ་རབ་ཏུ་ཐོབ་བོ། །འཇམ་དཔལ་ཤར་གྱི་
ཕྱོགས་ཆར་སངས་རྒྱས་ཀྱི་ཞིང་བཅུ་འདས་པ་ན་རྟག་ཏུ་སྣང་བར་བྱས་ཤེས་བྱའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་

49-1-272a

རྫོགས་པའི་སངས་རྒྱས་ཤུགས་འཆང་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བཅྭ་བརྒྱད་འདས་པ་ན་རིན་ཆེན་ཡོད་ཅེས་བྱ་བའི་འཇིག་རྟེན་གྱི་ཁམས་ཡོད་དེ་དེ་ན་ང་ལ་སེམས་ཅན་
རྣམས་ཀྱིས་དེ་བཞིན་གཤེགས་པ་དག་པའི་སྤྱན་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་དྲུག་བཅུ་འདས་པ་ན་དགེ་བ་བསགས་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་སེམས་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྒྱ་འདས་པ་ན་བཻ་དཱུརྱའི་སྙིང་པོ་ཞེས་བྱ་བའི་འཇིག་རྟེན་གྱི་ཁམས་
ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་གསེར་གྱི་ཕུང་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་ས་ཡ་ཕྲག་གཉིས་འདས་པ་ན་གསེར་དུ་སྣང་བ་ཞེས་བྱ་བའི་འཇིག་རྟེན་གྱི་ཁམས་
ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གྱི་སྙིང་པོ་ཞེས་བྱ་བར་ཤེས་སོ། །འཇམ་དཔལ་སངས་རྒྱས་ཀྱི་ཞིང་འདི་ནས་ཤར་གྱི་ཕྱོགས་ཆར་སངས་རྒྱས་ཀྱི་
ཞིང་སྟོང་བརྒྱད་བརྒྱ་འདས་པ་ན་ཞི་བ་སྤྱོད་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་རྒྱལ་པོ་ཞེས་བྱ་བར་ཤེས་སོ། །འཇམ་
དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འབུམ་འདས་པ་ན་སྤྲིན་གྱི་ཁ་དོག་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་ཀྱི་
རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་སུམ་བརྒྱ་འདས་པ་ན་ཡིད་དུ་འོང་བའི་དྲི་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་

49-1-272b

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིའི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་སུམ་ཁྲི་བརྒྱད་སྟོང་འདས་པ་ན་མེ་ལོང་དཀྱིལ་འཁོར་སྣང་ཞེས་བྱ་བའི་འཇིག་རྟེན་གྱི་ཁམས་
ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་ཀྱི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འདིར་སངས་རྒྱས་ཀྱི་ཞིང་བྱེ་བ་
ཕྲག་བརྒྱད་བཅུ་འདས་པ་ན་ཟླ་བ་སྣང་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒ་ཤི་འཇོམས་པ་ཞེས་བྱ་བར་ཤེས་སོ། །འཇམ་
དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བྱེ་བ་ཕྲག་དགུ་བཅུ་འདས་པ་ན་དུས་ལས་འདས་ཤེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་དགེ་སྦྱོང་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཞིང་འདས་པ་ན། ཚེ་མཉམ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་
རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་མཆོག་ཅེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དང་མཉམ་པ་ཕྲག་སུམ་བཅུ་རྩ་བརྒྱད་
འདས་པ་ན་ཞི་བའི་ཆོ་ག་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བློ་གྲོས་དག་པ་ཞེས་བྱ་བར་ཤེས་སོ། །འཇམ་དཔལ་ཤར་
གྱི་ཕྱོགས་ཆར་སངས་རྒྱས་ཀྱི་ཞིང་དྲུག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་མ་སྨད་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་

49-1-273a

རྫོགས་པའི་སངས་རྒྱས་རིན་ཆེན་བཀོད་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་རིན་པོ་ཆེ་ཀུན་ཏུ་
གནས་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟི་བརྗིད་འཕགས་པའི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་
གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་དཀོན་མཆོག་འབྱུང་གནས་ཤེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་བརྟུལ་ཞུགས་སྤྱད་ཅེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་བཅྭ་བརྒྱད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་ཡིད་གྲུབ་ཅེས་
བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཙུག་ཕུད་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་
སངས་རྒྱས་ཀྱི་ཞིང་བརྗོད་དུ་མེད་པ་ཉི་ཤུ་རྩ་ལྔའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་ངེས་པར་སོང་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་གཙུག་ཕུད་འབྱུང་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་ཉི་ཤུ་རྩ་ལྔའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་གྲོང་རྡལ་
ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཟིལ་གྱིས་གནོན་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་

49-1-273b

ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་བདེ་བའི་དྲི་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་གནས་མེད་པར་སྤྱོད་ཅེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་བཅུ་རྩ་གཅིག་གི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་མེ་
ཏོག་བཀྲམ་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་ཕྱུག་ཅེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་
སངས་རྒྱས་ཀྱི་ཞིང་བརྗོད་དུ་མེད་པ་སུམ་བཅུ་རྩ་བརྒྱད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་ཙམ་པའི་ཁ་དོག་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་གྲགས་པའི་ལྷ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་ལྷས་སྤྲུལ་པ་ཞེས་བྱ་བའི་
འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་མི་གནས་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུ་རྩ་
གཅིག་གི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་རབ་ཏུ་གྲུབ་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
དབྱངས་ཀྱི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་བདུན་བཅུ་རྩ་གཅིག་གི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་མ་སྨད་པ་ཞེས་བྱ་བའི་འཇིག་རྟེན་གྱི་ཁམས་

49-1-274a

ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་སྨན་གྱི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་བདུན་བཅུ་རྩ་བཞིའི་རྡུལ་ཕྲ་རབ་ཀྱི་རྡུལ་སྙེད་
ཀྱི་འཇིག་རྟེན་གྱི་ཁམས་འདས་པ་ན་གསེར་དུ་སྣང་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་མི་རྟག་གཟི་བརྗིད་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་
གསེར་གྱིས་རབ་ཏུ་བརྒྱན་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་གསོལ་བ་བྱེད་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་གསེར་གྱི་གཙུག་ཅེས་བྱ་བའི་འཇིག་རྟེན་གྱི་
ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་ཉོན་མོངས་དྲི་མ་སྦྱངས་ཤེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུ་རྩ་བཞིའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་
རྟེན་གྱི་ཁམས་འདས་པ་ན་མངོན་པར་འཕགས་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དཔལ་གྱི་སྙིང་པོ་ཤེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སྣང་བ་ཅན་ཞེས་བྱ་
བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དཔལ་བརྩེགས་ཤེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་བཅུ་རྩ་གཅིག་གི་རྡུལ་ཕྲ་རབ་ཀྱི་རྡུལ་
སྙེད་ཀྱི་སངས་རྒྱས་ཀྱི་ཞིང་འདས་པ་ན་གྲགས་ཅན་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་ཉོན་མོངས་པ་ཞི་བར་བྱེད་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་
རྒྱས་ཀྱི་ཞིང་བརྗོད་དུ་མེད་པ་སུམ་བཅུ་རྩ་ལྔའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་གཟི་བརྗིད་ཅན་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་བློ་གྲོས་འཛིན་ཅེས་བྱ་བར་

49-1-274b

ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་བཅུ་རྩ་དྲུག་གི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་ཚངས་པ་འབྱུང་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་
རྣམས་ཀྱིས་དེ་བཞིན་གཤེགས་པ་དཔལ་གྱི་གཟི་བརྗིད་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་བཅུ་རྩ་བདུན་གྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་སངས་
རྒྱས་དགྱེས་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་བློ་གྲོས་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་སངས་རྒྱས་ཀྱི་ཞིང་འདི་ནས་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་
དུ་མེད་པ་སུམ་བཅུ་རྩ་བརྒྱད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་རིན་ཆེན་སྒོ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་འཇིག་རྟེན་སློབ་དཔོན་ཞེས་བྱ་བར་ཤེས་
སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་བཅུ་རྩ་བཞིའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་རིན་པོ་ཆེའི་རྩེ་མོ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་
རྣམས་ཀྱིས་དེ་བཞིན་གཤེགས་པ་སྐར་རྒྱལ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བརྗོད་དུ་མེད་པ་སུམ་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་རིན་
ཆེན་མེ་ཏོག་ཤིན་ཏུ་རྒྱས་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་ས་དང་མཉམ་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་
མེད་པ་སུམ་བཅུ་རྩ་བཞིའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་ཤིན་ཏུ་མཛེས་ཤེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དོན་ཐམས་ཅད་གཟིགས་པ་ཞེས་བྱ་བར་

49-1-275a

ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་བཅུ་རྩ་ལྔའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་ཙན་དན་གྱི་དྲི་ཞེས་བྱ་བའི་འཇིག་རྟེན་གྱི་ཁམས་ཡོད་
དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་མཐའ་ཡས་སྣང་བ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུའི་རྡུལ་ཕྲ་རབ་ཀྱི་རྡུལ་
སྙེད་ཀྱི་སངས་རྒྱས་ཀྱི་ཞིང་འདས་པ་ན་ཟིལ་གྱིས་མི་ནོན་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་ཞེས་
བྱ་བར་ཤེས་སོ། །འཇམ་དཔལ་དེ་ལྟ་བུའི་རྣམ་གྲངས་སུ་སངས་རྒྱས་ཀྱི་ཞིང་ཐ་དད་པ་རྣམས་སུ་སངས་རྒྱས་ཀྱི་བྱ་བ་བྱེད་པའི་ཚེ་དེ་ལ་སེམས་ཅན་རྣམས་ཀྱིས་མིང་ཐ་དད་པར་ཤེས་པ་ནི་བརྗོད་དུ་མེད་པའི་བསྐལ་པར་སྨྲས་ཀྱང་ཤར་གྱི་ཕྱོགས་
ཆའི་སངས་རྒྱས་ཀྱི་ཞིང་གི་མཐའ་རྟོགས་པར་མི་ནུས་སོ། །དེ་བཞིན་དུ་ཕྱོགས་ཆ་ཐམས་ཅད་ཀྱི་སངས་རྒྱས་ཀྱི་ཞིང་དུ་ང་ལ་སེམས་ཅན་རྣམས་ཀྱིས་མིང་ཐ་དད་པའི་དེ་བཞིན་གཤེགས་པར་ཤེས་པ་ཡང་བརྗོད་དུ་མེད་པའི་བསྐལ་པར་སྨྲས་ཀྱང་
སངས་རྒྱས་ཀྱི་ཞིང་ཐ་དད་པའི་མཐའ་བདེ་བར་མི་རིག་གོ། །འཇམ་དཔལ་སེམས་ཅན་དགེ་བའི་རྩ་བ་ཆུང་བ་རྣམས་ཀྱིས་ངའི་སངས་རྒྱས་ཀྱི་ཞིང་ཚད་མེད་པ་ཐོས་ན་མོས་པར་འགྱུར་རོ། །འཇམ་དཔལ་བྱང་ཆུབ་སེམས་དཔའ་གང་ཐེག་པ་འདི་ལ་
ཡང་དག་པར་ཞུགས་པ་དང་། ཐེག་པ་འདི་ལ་ཡང་དག་པར་ཞུགས་པའི་དགེ་བའི་བཤེས་གཉེན་རབ་ཏུ་མགུ་བར་བྱས་པ་དེ་དག་ཀྱང་འཇམ་དཔལ་ངའི་སངས་རྒྱས་ཀྱི་ཞིང་ཚད་མེད་པ་ཐོས་ན་ཐེ་ཚོམ་སྐྱེ་བར་འགྱུར་ན་ཉན་ཐོས་ཀྱི་ཐེག་པ་ཅན་དང་། 
རང་སངས་རྒྱས་ཀྱི་ཐེག་པ་ཅན་དང་། དེ་མ་ཡིན་པའི་བྱིས་པ་སོ་སོའི་སྐྱེ་བོ་རྣམས་ལྟ་ཅི་སྨོས། འཇམ་དཔལ་ངས་མངོན་པར་ཤེས་པ་འདས་པའི་དུས་ན་བསྐལ་པ་དཔག་ཏུ་མེད་གྲངས་མེད། བསམ་གྱིས་མི་ཁྱབ་པ་དེའི་ཕ་རོལ་གྱི་

49-1-275b

ཡང་ཆེས་ཕ་རོལ་ན་ཡོན་ཏན་རབ་ཏུ་བསྐྱེད་པ་ཞེས་བྱ་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་འགྲུས་མཐའ་ཡས་ཤེས་བྱ་བ་འཇིག་རྟེན་དུ་འབྱུང་སྟེ། དེའི་ཚེ་དེའི་དུས་ན་ང་ནི་
བྲམ་ཟེའི་བུ་མོ་བློ་གྲོས་མཐའ་ཡས་ཤེས་བྱ་བར་གྱུར་ཏོ། །དེ་བཞིན་གཤེགས་པ་བརྩོན་འགྲུས་མཐའ་ཡས་དེ་ཡང་བྱང་ཆུབ་སེམས་དཔའ་ཁྲག་ཁྲིག་བརྒྱད་བཅུས་ཡོངས་སུ་བསྐོར་བར་གྱུར་ཏེ། བྱང་ཆུབ་སེམས་དཔའ་དེ་དག་ཐམས་ཅད་
ཀྱང་ཐེག་པ་ཆེན་པོ་ལ་ཡང་དག་པར་ཞུགས་པ་ཐེག་པ་དཔག་ཏུ་མེད་པ་ལ་ཡང་དག་པར་ཞུགས་པ་ནས་ཐེག་པ་བརྗོད་དུ་མེད་པའི་བར་ལ་ཡང་དག་པར་ཞུགས་པ་ཤ་སྟག་སྟེ། དེ་དག་ལ་བཅོམ་ལྡན་འདས་དེ་བཞིན་གཤེགས་པ་བརྩོན་
འགྲུས་མཐའ་ཡས་དེའི་རང་གི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་འཆད་དེ། ང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་ཕྱིར་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་མཐའ་ཡས་དེ་ལ་
རིམ་གྲོ་དང་བསྙེན་བཀུར་བྱས་སོ། །དེ་ནས་ངས་དེའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་ཐོས་ནས་བདག་གི་སངས་རྒྱས་ཀྱི་ཞིང་ཡང་དེ་བས་ཀྱང་ཤིན་ཏུ་རྒྱ་ཆེ་བ་དེ་འདྲ་བར་གྱུར་ཅིག་ཅེས་དེ་ལྟ་བུའི་སྨོན་ལམ་བཏབ་ནས་བདག་
གིས་དགེ་བའི་རྩ་བ་ཐམས་ཅད་ཀྱང་སངས་རྒྱས་ཀྱི་ཞིང་རྒྱ་ཆེར་ཡོངས་སུ་དག་པར་བྱ་བའི་ཕྱིར་བསྔོས་ཏེ། བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་མཐའ་ཡས་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་། 
སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པར་ལུང་བསྟན་མོད་ཀྱི་འོན་ཀྱང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་སངས་རྒྱས་ཀྱི་ཞིང་རྒྱ་ཆེར་ཡོངས་སུ་དག་པར་བྱ་བའི་ཕྱིར་བརྩོན་འགྲུས་མ་བཏང་བར་གྱུར་ནས་དེ་ལྟར་ངས་དེའི་
འོག་ཏུ་སངས་རྒྱས་བྱེ་བ་ཁྲག་ཁྲིག་ཚད་མེད་པ་རྣམས་ལ་བསྙེན་བཀུར་བྱས་ཏེ། དེའི་དགེ་བའི་རྩ་བ་བསགས་པས་ང་སངས་རྒྱས་ཀྱི་ཞིང་རྒྱ་ཆེར་ཡོངས་སུ་དག་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་

49-1-276a

རྒྱས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བརྗོད་ཀྱིས་མི་ལང་འཁོར་བ་ན། །བསམ་གྱིས་མི་ཁྱབ་འདས་པའི་དུས། །སངས་རྒྱས་
ཞིང་གི་རྒྱ་བསྐྱེད་ཕྱིར། །དེ་ན་ང་ཡིས་བརྩོན་འགྲུས་བརྩམས། །བརྩོན་འགྲུས་མཐའ་ཡས་ཤེས་བྱ་བ། །གང་ཟག་མཚུངས་པ་མེད་པ་བྱུང་། །སེམས་ཅན་བྱེ་བ་རྣམ་པར་འདུལ། །ལྷར་བཅས་འཇིག་རྟེན་རྣམས་ལ་
སྟོན། །སངས་རྒྱས་ཆོས་ལ་དབང་བྱེད་ཅིང་། །སྟོབས་རྣམས་ཀྱི་ཡང་ཕ་རོལ་ཕྱིན། །མི་འཇིགས་པ་ལ་ཤིན་ཏུ་གནས། །སོ་སོ་ཡང་དག་རིག་ལ་མཁས། །གནས་དང་གནས་མིན་དབང་ཡང་ཐོབ། །ལས་དང་ཡེ་ཤེས་
རྟོགས་པར་རིག །ལས་རྣམས་ཡང་དག་འཛིན་པ་དང་། །རྣམ་པར་སྨིན་ལ་ཐེ་ཚོམ་མེད། །ཁམས་རྣམས་དུ་མར་ཤེས་པ་དང་། །རྣམ་པར་འདྲེན་པ་ཤིན་ཏུ་ལྡན། །སེམས་ཅན་རྣམས་ཀྱི་དད་པ་རྣམས། །མ་ལུས་ཡང་དག་
རབ་ཏུ་མཁྱེན། །སེམས་ཅན་རྣམས་ཀྱི་དབང་པོ་ཡི། །རིམ་པ་བཞིན་དུ་ཡང་དག་མཁྱེན། །དབང་པོ་མཆོག་དང་ཐ་མ་རྣམས། །མ་ལུས་པར་ཡང་རབ་ཏུ་མཁྱེན། །བསམ་གཏན་ཡེ་ཤེས་རྣམ་ཐར་དང་། །ཏིང་ངེ་འཛིན་
གྱི་ཕ་རོལ་ཕྱིན། །སྙོམས་པར་འཇུག་དང་ཚད་མེད་ལ། །རྐང་གཉིས་དམ་པ་ཤིན་ཏུ་བསླབས། །སངས་རྒྱས་རྣམས་ཀྱི་ཏིང་ངེ་འཛིན། །དེས་ནི་མི་མཁྱེན་གང་ཡང་མེད། །ཐམས་ཅད་མཁྱེན་ཅིང་ཐམས་ཅད་གཟིགས། །
གཟིགས་པ་ལ་ཡང་སྒྲིབ་པ་མེད། །དེ་བཞིན་གཤེགས་པ་དེ་ལ་ངས། །སངས་རྒྱས་ཞིང་གི་རྒྱ་དྲིས་ཏེ། །སངས་རྒྱས་ཞིང་གི་རྒྱ་ཆེ་བ། །བསྐལ་པ་ཆེན་པོ་བདག་ལ་གསུངས། །ཀུན་ནས་ཉོན་མོངས་རྣམ་པར་བྱང་། །མ་ལུས་
ཡང་དག་རབ་ཏུ་མཁྱེན། །གང་རྣམས་ཁྱོད་ཀྱིས་མི་མཁྱེན་པ། །དེ་འདྲའི་ཆོས་ནི་ཡོང་མ་མཆིས། །སངས་རྒྱས་ཞིང་གི་སྐྱོན་རྣམས་དང་། །ཡོན་ཏན་ཐམས་ཅད་རབ་ཏུ་མཁྱེན། །སངས་རྒྱས་བསྟན་པ་རྒྱ་ཆེ་བ། །རྐང་གཉིས་གཙོ་

49-1-276b

བོ་བཤད་དུ་གསོལ། །སེམས་ཅན་རྣམས་ཀྱི་སྨིན་པ་དང་། །ཇི་ལྟར་མི་རྣམས་འཚང་རྒྱ་བ། །ཉོན་མོངས་གང་གིས་ཉོན་མོངས་པས། །མི་མཁས་འཁོར་བར་རབ་ཏུ་འཁོར། །མི་རྣམས་གང་གིས་ཉོན་མོངས་པ། །ཉོན་མོངས་
དེ་དག་ཁྱོད་ཀྱིས་མཁྱེན། །དེ་ཡི་ལམ་དང་བསམ་པ་རྣམས། །འདྲེན་པ་ཁྱོད་ཀྱིས་རྣམ་པར་མཁྱེན། །ཇི་ལྟར་ཏིང་འཛིན་འབྱུང་བ་དང་། །བྱུང་ནས་ཇི་ལྟར་གནས་པ་དང་། །ཇི་ལྟར་དེ་ལས་ལྡང་བ་རྣམས། །སྟོན་པ་ཁྱོད་ཀྱིས་རབ་ཏུ་
མཁྱེན། །བསམ་གཏན་རྣམས་དང་ཚད་མེད་པ། །ཇི་སྙེད་ཏིང་ངེ་འཛིན་རྣམས་དང་། །ཞི་གནས་དང་ནི་ལྷག་མཐོང་རྣམས། །རྣམ་པ་ཐམས་ཅད་ཤིན་ཏུ་མཁྱེན། །ཇི་ལྟར་ཆོས་ལ་འདོགས་པ་དང་། གང་གི་རྐྱེན་གྱིས་བཤད་པ་
ཡང་། །དེ་ཡང་སྟོན་པས་རབ་མཁྱེན་ཏེ། །དེ་ལ་ཐེ་ཚོམ་མི་མངའ་ཁྱོད། །ཁྱོད་ཀྱིས་བསྐལ་པ་བྱེར་སྤྱད་པས། །ཡེ་ཤེས་འདི་ལས་ངེས་པར་འབྱུང་། །སྟོན་པས་སྟོབས་ཀྱི་མཐུ་ཡང་བརྙེས། །དྲང་སྲོང་ཆེན་པོ་སྟོབས་དང་ལྡན། །
བསྐལ་པ་སྟོང་ཕྲག་བྱེ་བ་ཡི། །བདག་དང་ཕ་རོལ་རྣམས་ཀྱི་ཡང་། །སྤྱོད་པ་དཔག་ཏུ་མ་མཆིས་ཤིང་། །བསམ་གྱིས་མི་ཁྱབ་ཐམས་ཅད་མཁྱེན། །གང་དུ་བྱང་ཆུབ་ཅི་འདྲ་བ། །སྐྱེ་བ་ཐམས་ཅད་དུ་ཡང་འཇུག །དེ་དག་མ་ལུས་འདྲེན་པ་
ཡིས། །ཇི་ལྟ་བུ་ཡང་རབ་ཏུ་མཁྱེན། །གང་དུ་ཇི་འདྲ་སྐྱེ་བ་དང་། །གང་དུ་རིགས་ཀྱང་ཅི་འདྲ་བ། །ཇི་ལྟར་ཀུན་ཏུ་སྤྱད་པ་རྣམས། །དེ་དག་འདྲེན་པས་རབ་ཏུ་མཁྱེན། །ཐ་མའི་ཆོས་རྣམས་ཅི་འདྲ་བ། །འདྲེན་པས་འཁོར་བ་དེ་རྣམས་
ཀྱང་། །འགྲོ་བ་གང་དུ་སྐྱེ་བ་ནི། །དེ་བཞིན་གཤེགས་པས་རབ་ཏུ་མཁྱེན། །ཅི་འདྲ་བ་ཡི་ཡེ་ཤེས་ཀྱིས། །སྔོན་ཆད་རྣམ་པར་ལུང་བསྟན་པ། །མཁས་པ་ཁྱོད་ཀྱིས་དེ་མཁྱེན་པས། །དེ་ལ་ཐེ་ཚོམ་མི་མངའ་ཁྱོད། །ཚུལ་ཁྲིམས་གང་དང་
ཆོས་གང་དང་། །ཅི་འདྲའི་སྤྱོད་པ་སྤྱད་པ་དང་། །ཡེ་ཤེས་གང་ལ་ཞུགས་པ་ཡང་། །དེ་དག་འདྲེན་པས་རབ་ཏུ་མཁྱེན། །གང་དང་གང་གི་ལས་ཀྱིས་སུ། །སྐྱེ་བ་རྣམས་སུ་འགྲོ་བར་འགྱུར། །རྣམ་སྨིན་ཅི་འདྲ་འཐོབ་པ་ཡང་། །དེ་དག་

49-1-277a

མགོན་པོས་རབ་ཏུ་མཁྱེན། །གང་དུ་གནས་པ་དེ་དག་གི། །རྒྱུན་དུ་མཆི་བར་ངེས་པ་ཡང་། །དེ་ཡང་ཁྱོད་ཀྱིས་མ་ལུས་མཁྱེན། །དེ་སླད་ཡིད་གཉིས་མི་མངའ་ཁྱོད། །གང་གི་ལུས་ཀྱིས་སེམས་གང་སྐྱེས། །
དེ་ཡང་ཁྱོད་ཀྱིས་རྣམ་པར་མཁྱེན། །སེམས་དེའི་རྒྱུ་ནི་གང་ལགས་པ། །དེ་ཡང་འདྲེན་པས་ཤིན་ཏུ་མཁྱེན། །སྔོན་ཆད་གནས་པ་མཁྱེན་པ་ནི། །ཁྱོད་དང་འདྲ་བ་ཡོང་མ་མཆིས། །སངས་རྒྱས་བྱེ་བ་སྟོང་རྣམས་དང་། །འདྲེན་པ་ཁྱོད་ནི་དེ་དང་
འདྲ། །སྲོག་ཆགས་སོ་སོའི་དགེ་བ་རྣམས། །རྗེས་སུ་དྲན་པས་རབ་ཏུ་མཁྱེན། །དེ་སླད་སངས་རྒྱས་ཆོས་རྣམས་ལ། །འདྲེན་པའི་ཡེ་ཤེས་ཐོགས་མི་མངའ། །གང་དང་གང་གིས་ལུས་ཀྱིས་སུ། །ཇི་ལྟ་བུ་ཡི་རྒྱུད་དུ་མཆི། །དེ་
ཡང་ཐམས་ཅད་མཁྱེན་པས་མཁྱེན། །དེ་སླད་རྒྱལ་བས་ལྷག་མ་མཆིས། །འདྲེན་པ་ཆོས་རྣམས་ཐམས་ཅད་ལ། །ཁྱོད་ནི་ཐེ་ཚོམ་ཡོང་མི་མངའ། །སེམས་ཅན་ཀུན་གྱི་སྤྱོད་ཡུལ་ཡང་། །སངས་རྒྱས་སྤྱན་གྱིས་རབ་ཏུ་གཟིགས། །སྐྱེ་བ་དང་
ནི་འཆི་འཕོ་མཁྱེན། །ཁྱོད་འདྲ་བ་ནི་ཡོང་མི་གདའ། །ལྷར་བཅས་འཇིག་རྟེན་ཐམས་ཅད་ན། །ཐུབ་པ་ཁྱོད་ལས་ལྷག་མ་མཆིས། །ཟག་པ་ཟད་པའང་རབ་ཏུ་མཁྱེན། །མ་ལུས་པ་ཡང་རྟོགས་པར་གྱུར། །ཉོན་མོངས་ཐམས་ཅད་ཡོངས་
སུ་སྤངས། །ཁྱོད་ཀྱིས་བག་ཆགས་ཀུན་ཀྱང་བཅོམ། །སེམས་ཅན་ཀུན་གྱི་ཉོན་མོངས་དང་། །སྤྱོད་པ་རྣམས་ཀྱང་འདྲེན་པས་མཁྱེན། །གང་ལ་ཉོན་མོངས་སྤྱོད་ཡུལ་དང་། །ཉོན་མོངས་འདི་དག་གང་འབྱུང་མཁྱེན། །ཉོན་མོངས་དག་ལ་སྤྱད་པས་
ན། །བག་ཆགས་རྗེས་སུ་འཇུག་པའི་རྣམས། །དེ་དག་ཀུན་ཀྱང་ཁྱེད་མཁྱེན་ཏེ། །དེ་ལས་ཁྱོད་ནི་ཕ་རོལ་ཕྱིན། །བདག་དང་ཕ་རོལ་རྣམས་ཀྱི་ཡང་། །ཉོན་མོངས་གང་གིས་སྤོང་བ་ཡི། །ལམ་དེ་རྣམས་ཀྱང་རབ་ཏུ་མཁྱེན། །དེ་སླད་ཁྱོད་ནི་ལམ་
ལ་མཁས། །འཇིག་རྟེན་ཀུན་མགོན་རྣམས་འདྲེན་པ། །མཐའ་ཡས་བརྩོན་འགྲུས་དེ་བསྟོད་ནས། །བསྐལ་བྱེ་ཁྲག་ཁྲིག་མཐའ་ཡས་པར། །འགྲོ་བ་གཉིས་སུ་དེ་སྐྱེས་སོ། །འདི་ནས་ལྷ་རིས་ང་སྐྱེས་ཏེ། །རྟག་པར་ལྷ་

49-1-277b

ཡི་དབང་པོར་གྱུར། །བྱེ་བ་མཐའ་ཡས་ལྷ་རྣམས་ལ། །རྒྱལ་བའི་ཡེ་ཤེས་འཐོབ་པར་བསྟན། །ལྷ་ཡི་གནས་ནས་ཤི་འཕོས་ཏེ། །མི་ཡི་དབང་པོ་རྒྱལ་པོར་གྱུར། །སེམས་ཅན་ཁྲག་ཁྲིག་མཐའ་ཡས་པ། །རྒྱལ་བའི་ཡེ་ཤེས་
ཐོབ་པར་བསྟན། །དེ་དག་ང་ཡི་ཆོས་ཐོས་ནས། །སྟི་སྟང་མཚུངས་མེད་བསྐྱེད་ནས་སུ། །སེམས་ཀྱི་ཐམས་ཅད་ཉེར་གཞག་སྟེ། །དྲི་མེད་སེམས་ཀྱིས་དེ་དག་ཉན། །སེམས་ཅན་བྱེ་བ་མཐའ་ཡས་པ། །བྱང་ཆུབ་མཆོག་ལ་
ངེས་པར་གྱུར། །ང་ཡི་ཚིག་ཐོས་རྟོགས་པ་ནི། །སངས་རྒྱས་བྱང་ཆུབ་ངེས་པར་གྱུར། །སངས་རྒྱས་བྱེ་བ་མཐའ་ཡས་པ། །སངས་རྒྱས་ཞིང་གི་རྒྱ་བཤད་ཀྱང་། །བསྐལ་པ་ཁྲག་ཁྲིག་མཐའ་ཡས་སུ། །རྒྱ་ཆེན་བཤད་པ་
མི་ཟད་དོ། །སངས་རྒྱས་ཡོན་ཏན་གང་བརྗོད་དང་། །དྲང་སྲོང་ཆེན་པོས་ཞིང་བསྔགས་པ། །ཐམས་ཅད་རང་བཞིན་སྟོང་པར་བཤད། །དེ་དག་མ་སྐྱེས་མི་འགག་བསྟན། །གང་འདིར་སངས་རྒྱས་བསྔགས་པ་དང་། །སངས་
རྒྱས་ཡོན་ཏན་གང་བསྟན་དང་། །བདེ་བར་གཤེགས་པས་ཞིང་བརྗོད་པ། །གང་གིས་བཤད་པའང་དེ་དང་འདྲ། །ཆོས་རྣམས་ཞི་བར་བདེ་གཤེགས་བཤད། །ཞི་བའི་རང་བཞིན་དེ་མི་རྙེད། །གང་ལ་བཤད་པ་དེ་ཡང་སྟོང་། །
འདི་ལ་མགོན་མེད་འགྲོ་བ་མྱོས། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་མོ་བློ་གྲོས་མཐའ་ཡས་ཀྱིས་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་མཐའ་ཡས་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས་
བུད་མེད་ཀྱི་དབང་པོ་ལས་གྱུར་ཏེ། དེ་ཕྱིན་ཆད་བུད་མེད་ཀྱི་ལུས་སུ་མི་སྐྱེ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཚད་མེད་པ་ཡོངས་སུ་སྦྱང་བར་འདོད་ཅིང་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་བྱང་ཆུབ་སེམས་དཔའི་རྣམ་པར་ཐར་པའི་སྟོང་པ་ཉིད་སྒྲིབ་པ་མེད་པ་ལ་བསླབ་པར་བྱའོ། །ཆོས་ཀྱི་རྣམ་གྲངས་འདི་བཤད་པའི་ཚེ། སངས་རྒྱས་ཀྱི་ཞིང་

49-1-278a

འདི་ཐམས་ཅད་རྣམ་པར་འགྱུར་བ་དྲུག་ཏུ་གཡོས་ཏེ། འགུལ་རབ་ཏུ་འགུལ། ཀུན་ཏུ་རབ་ཏུ་འགུལ། གཡོས་རབ་ཏུ་གཡོས། ཀུན་ཏུ་རབ་ཏུ་གཡོས། ལྡེག །རབ་ཏུ་ལྡེག །ཀུན་ཏུ་རབ་ཏུ་
ལྡེག །འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར། ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ། ཤར་ཕྱོགས་
དམའ་ན་ནུབ་ཕྱོགས་མཐོ། ནུབ་ཕྱོགས་དམའ་ན་ཤར་ཕྱོགས་མཐོ། ལྷོ་ཕྱོགས་དམའ་ན་བྱང་ཕྱོགས་མཐོ། བྱང་ཕྱོགས་དམའ་ན་ལྷོ་ཕྱོགས་མཐོ། དབུས་དམའ་ན་མཐའ་མཐོ། མཐའ་དམའ་ན་དབུས་མཐོ་བར་གྱུར་ཏོ། །
སྲོག་ཆགས་བྱེ་བ་ཁྲག་ཁྲིག་ཕྲག་དྲུག་བཅུ་རྩ་དྲུག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ཚད་མེད་པ་ཕྲག་བརྒྱ་ནི་ཆོས་རྣམས་ལ་ཆོས་
ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །བྱང་ཆུབ་སེམས་དཔའ་བྱེ་བ་ཁྲག་ཁྲིག་དཔག་ཏུ་མེད་པ་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་སྟོང་ཕྲག་དཔག་ཏུ་མེད་པ་རྣམས་དང་། ལྷ་དང་མིར་བཅས་པའི་
སྐྱེ་དགུ་སྔོན་སེམས་མ་བསྐྱེད་པ་རྣམས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་བརྒྱད་ཁྲི་བཞི་སྟོང་པོ་དེ་དག་དང་། དགེ་
སློང་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།
འཕགས་པ་དཀོན་མཆོག་འབྱུང་གནས་ཤེས་བྱ་བ་ཐེག་པ་ཆེན་པོའི་མདོ་རྫོགས་སྷོ།། །། རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙ་བ་བན་དྷེ་ཡེ་ཤེས་སྡེས་སྐད་གསར་ཆད་ཀྱིས་བཅོས་ནས་སླད་ཀྱིས་གཏན་ལ་ཕབ་པ།། །།

49-1-278b

This is a blank page without image

49-1-279a

༄༅༅།   །རྒྱ་གར་སྐད་དུ།  ཨཱརྱ་སུ་བརྞྞ་སཱུ་ཏྲ་མ་ཧཱ་ཡཱ་ནྣཱ་མ་སཱུ་ཏྲ།  བོད་སྐད་དུ། འཕགས་པ་གསེར་གྱི་མདོ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་
ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེའི་ཚེ་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་
གསོལ་ཏོ། །བཅོམ་ལྡན་འདས་བྱང་ཆུབ་ཀྱི་སེམས་ཅི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཚེ་དང་ལྡན་པ་ཀུན་དགའ་བོ་བྱང་ཆུབ་ཀྱི་སེམས་ནི་གསེར་དང་རང་བཞིན་འདྲ་བར་གནས་པར་བལྟ་བར་བགྱིའོ། །གསེར་
རང་བཞིན་གྱིས་རྣམ་པར་དག་པ་ལྟར་བྱང་ཆུབ་ཀྱི་སེམས་རང་བཞིན་གྱིས་རྣམ་པར་དག་པར་གནས་སོ། །མགར་བས་གསེར་ལ་བཟོའི་བྱེ་བྲག་ཐ་དད་པར་བྱས་ཀྱང་གསེར་རང་བཞིན་མི་འགྱུར་བ་ལྟར། བྱང་ཆུབ་ཀྱི་སེམས་ལ་ཡོན་ཏན་ཁྱད་པར་སྣ་ཚོགས་
པར་སྣང་ཡང་དོན་དམ་པར་བྱང་ཆུབ་ཀྱི་སེམས་ལས་མ་གཡོས་པས་རང་བཞིན་མི་འགྱུར་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་ཉིད་རྣམ་པར་དག །བདག་དང་གཞན་
གྱི་དོན་ལ་བརྩོན། །དངོས་མེད་ངོ་བོ་ཉིད་དུ་སྒོམ། །ཤེས་རབ་སྐྱེ་བའི་རྒྱུ་ལ་མོས། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོ་དང་། ཐམས་ཅད་དང་ལྡན་པའི་འཁོར་དེ་
དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།
འཕགས་པ་གསེར་གྱི་མདོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སྷོ།། །།

49-1-279b

༄༅༅།   །རྒྱ་གར་སྐད་དུ།  ཨརྱ་སུ་བརྞྞ་བཱ་ལུ་ཀོ་པ་མ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ། འཕགས་པ་གསེར་གྱི་བྱེ་མ་ལྟ་བུ་ཞེས་བྱ་བ་ཐེག་པ་ཆེན་པོའི་མདོ། འཕགས་པ་གསེར་གྱི་བྱེ་མ་ལྟ་བུ་ཞེས་བྱ་བ་ཐེག་པ་ཆེན་པོའི་མདོ། །སངས་རྒྱས་དང་། བྱང་ཆུབ་སེམས་དཔའ་
ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་
ཆེན་པོ་དང་། བྱང་ཆུབ་སེམས་དཔའ་སྟོང་ཕྲག་མང་པོ་དག་དང་ཐབས་གཅིག་ཏུ་བཞུགས་ཏེ། དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། 
བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དཔག་ཏུ་མ་
མཆིས་པ་ལགས་སམ། བཅོམ་ལྡན་འདས་ཅི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཡོན་ཏན་དཔག་ཏུ་མ་མཆིས་པ་དང་ལྡན་ལགས་སམ། དེ་སྐད་ཅེས་གསོལ་པ་དང་། བཅོམ་
ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་དོ། །ཀུན་དགའ་བོ་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཡོན་ཏན་དཔག་ཏུ་མེད་པ་དང་ལྡན་ནོ། །ཚེ་དང་ལྡན་པ་ཀུན་དགའ་བོས་ལན་གཉིས་སུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
ཅི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དཔག་ཏུ་མ་མཆིས་པ་ལགས་སམ། བཅོམ་ལྡན་འདས་ཅི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་

49-1-280a

ཡོན་ཏན་དཔག་ཏུ་མ་མཆིས་པ་དང་ལྡན་ལགས་སམ། བཅོམ་ལྡན་འདས་ཀྱིས་ཀྱང་ལན་གཉིས་ལན་གསུམ་དུ་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་དོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཡོན་ཏན་དཔག་ཏུ་མེད་པ་དང་ཡང་ལྡན་ནོ། །ཀུན་དགའ་
བོ་ཁྱོད་དེ་བཞིན་གཤེགས་པ་རྣམས་ཀྱི་དཔག་ཏུ་མེད་པ་མཉན་པའམ། དེ་བཞིན་གཤེགས་པ་རྣམས་ཀྱི་ཡུལ་ཤེས་པའམ། དེ་བཞིན་གཤེགས་པ་རྣམས་ཀྱི་ཡོན་ཏན་ཤེས་པར་འདོད་དམ། དེ་སྐད་ཅེས་བཀའ་སྩལ་པ་དང་། 
བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །དགེ་སློང་རྣམས་ལ་བཅོམ་ལྡན་འདས་ཀྱིས་བསྟན་དུ་གསོལ། བདེ་བར་གཤེགས་པས་བསྟན་དུ་གསོལ། དགེ་སློང་རྣམས་ཀྱིས་མངོན་སུམ་དུ་
ཐོས་ན་ཡང་དག་པར་འཛིན་པར་འགྱུར་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་མཽད་གལ་གྱི་བུ་ཆེན་པོ་རྫུ་འཕྲུལ་
ཇི་ལྟ་བུས་ཕྱོགས་དང་ཕྱོགས་མཚམས་དག་ཏུ་འགྲོ་བ་ཤེས་སམ། ཀུན་དགའ་བོས་གསོལ་པ། མཽད་གལ་གྱི་བུ་ཆེན་པོ་རྫུ་འཕྲུལ་ཇི་ལྟ་བུས་ཕྱོགས་དང་ཕྱོགས་མཚམས་དག་ཏུ་མཆི་བ་བཅོམ་ལྡན་འདས་ཀྱིས་བསྟན་དུ་གསོལ། 
བདེ་བར་གཤེགས་པས་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ལ་དོན་འདི་དཔེས་བསྟན་པར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་སྐྱེས་བུ་མཁས་པ་གང་དག་དཔེས་དོན་རྟོགས་
པར་འགྱུར་བ་ཡོད་པའི་ཕྱིར་རོ། །ཀུན་དགའ་བོ་དཔེར་ན་རྫིང་དཔག་ཚད་བརྒྱད་སྟོང་པ། ཆུས་གང་བ། བྱ་ཁྭས་བཏུང་དུ་རུང་བར་མུ་དང་ཁ་ད་ཆད་དུ་འདུག་པ། པད་མའི་ལོ་མས་ཁེབས་པ་ཞིག་ཡོད་ལ་དེ་ནས་མི་ལ་ལ་ཞིག་གིས་

49-1-280b

རླུང་གི་ཤུགས་ལས་འདས་པའི་རྟ་མཆོག་དག་དང་ལྡན་པའི་ལྕགས་ཀྱི་ཤིང་རྟ་ལ་ཞོན་ཏེ། དེ་ཡང་མུ་ཁྱུད་ཀྱི་ཤིང་ཡང་ཆུ་ལ་མི་རེག །རྟ་རྣམས་ཀྱི་རྨིག་པ་ཡང་ཆུ་ལ་མི་རེག །པད་མའི་ལོ་མ་རྣམས་ཀྱང་རྟའི་རྨིག་པ་དག་གིས་མི་
བརྟོལ་བ་ཙམ་གྱི་སྟོབས་དང་ཤུགས་དང་མགྱོགས་པ་དེ་ལྟ་བུས་རྒྱུག་ལ། ཀུན་དགའ་བོ་དེ་ནས་རྫིང་དེའི་ནང་ནས་སྦྲུལ་གདུག་པ་ཞིག་བྱུང་བས་ཤིང་རྟ་དེ་མཚོའི་ནང་ནས་ཕྱིར་མ་ལོག་པ་དེའི་བར་སྐབས་སུ་ཤིང་རྟ་དེ་ལན་བརྒྱད་བསྐོར་ན། 
ཀུན་དགའ་བོ་སྦྲུལ་གདུག་པས་ཤིང་རྟ་ལན་ཅིག་བསྐོར་བའི་ཡུན་ཇི་ཙམ་པ་དེའི་བར་སྐབས་སུ་ཀུན་དགའ་བོ་ཁྱོད་ཆོས་བསྟན་པ་རྣམ་པ་བརྒྱད་སྟོན་ཅིང་དོན་ཀྱང་གོ་བར་བྱེད་དོ། །ཀུན་དགའ་བོ་ཁྱོད་ཚིག་གཅིག་སྨྲ་བའི་ཡུན་ཇི་ཙམ་པ་
དེའི་བར་སྐབས་སུ་མཽད་གལ་གྱི་བུ་ཆེན་པོ་ཆོས་བསྟན་པ་རྣམ་པ་བརྒྱད་སྟོན་ཅིང་དོན་ཀྱང་གོ་བར་བྱེད་དོ། །ཀུན་དགའ་བོ་མཽད་གལ་གྱི་བུ་ཆེན་པོ་ཚིག་གཅིག་སྨྲ་བའི་ཡུན་ཇི་ཙམ་པ་དེའི་བར་སྐབས་སུ་གནས་བརྟན་ཤ་ར་དྭ་ཏིའི་བུ་
ཆོས་བསྟན་པ་རྣམ་པ་བརྒྱད་སྟོན་ཅིང་དོན་ཀྱང་གོ་བར་བྱེད་དོ། །གནས་བརྟན་ཤ་ར་དྭ་ཏིའི་བུ་ཚིག་གཅིག་སྨྲ་བའི་ཡུན་ཇི་ཙམ་པ་དེའི་བར་སྐབས་སུ་རང་སངས་རྒྱས་ཆོས་བསྟན་པ་རྣམ་པ་གྲངས་མེད་པ་སྟོན་ཏོ། །རང་སངས་
རྒྱས་ཚིག་གཅིག་སྨྲ་བའི་ཡུན་ཇི་ཙམ་པ་དེའི་བར་སྐབས་སུ་བྱང་ཆུབ་སེམས་དཔའ་ཆོས་བསྟན་པ་རྣམ་པ་གྲངས་མེད་བསམ་གྱིས་མི་ཁྱབ་བརྗོད་དུ་མེད་པ་སྟོན་ཅིང་དོན་ཀྱང་གོ་བར་བྱེད་དོ། །ཀུན་དགའ་བོ་བྱང་ཆུབ་སེམས་དཔའ་
ཚིག་གཅིག་སྨྲ་བའི་ཡུན་ཇི་ཙམ་པ་དེའི་བར་སྐབས་སུ་ཀུན་དགའ་བོ་གནས་བརྟན་མཽད་གལ་གྱི་བུ་ཆེན་པོ་འཇིག་རྟེན་གྱི་ཁམས་བརྒྱད་ཁྲི་འདའོ། །ཀུན་དགའ་བོ་རྫུ་འཕྲུལ་གྱི་སྟོབས་བསྐྱེད་པ་དེ་ལྟ་བུའི་འགྲོས་ཀྱིས་ཉིན་མཚན་བདུན་
གྱི་བར་དུ་ངལ་མི་བསོ་བར་ཤར་ཕྱོགས་སུ་འཇིག་རྟེན་གྱི་ཁམས་ཇི་སྙེད་དུ་འགྲོ་བ་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། དེ་བཞིན་དུ་ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་མཚམས་དང་། 

49-1-281a

ནུབ་བྱང་གི་མཚམས་དང་། བྱང་ཤར་གྱི་མཚམས་དང་། དེ་བཞིན་དུ་སྟེང་དང་འོག་གི་ཕྱོགས་སུ་ཉིན་མཚན་བདུན་གྱི་བར་དུ་ངལ་མི་བསོ་བར་སོང་ལ། དེ་ནས་མི་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་
ཁམས་དེ་དག་ཐམས་ཅད་ར་བས་བསྐོར་ཏེ་ར་བས་བསྐོར་ནས་རྡོ་དང་། གསེག་མ་དང་། གྱོ་མོ་དང་། གྱོ་དུམ་མེད་པར་བྱས་ཏེ་མཐོན་དམན་མེད་པར་བྱས་ནས་གྲོང་ཁྱེར་གཅིག་ཏུ་བྱས་ལ་གྲོང་ཁྱེར་གཅིག་ཏུ་བྱས་ནས་ཀྱང་ཡུངས་འབྲུས་བཀང་
སྟེ་བྱུར་བུར་བྱས་ན། ཀུན་དགའ་བོ་གྲོང་ཁྱེར་དེའི་ནང་གི་ཡུངས་འབྲུ་ཇི་སྙེད་པ་དེ་དག་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་སེམས་ཅན་བྱང་ཆུབ་ལ་ཞུགས་པ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་
དག་ན་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱད་པ་སྤྱོད་པ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་དགའ་ལྡན་གྱི་ལྷའི་རིས་དག་ཏུ་སྐྱེ་བ་དག་ངས་མཐོང་ངོ་། །
དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་དགའ་ལྡན་གྱི་ལྷའི་རིས་དག་ན་འཁོད་པ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་དགའ་
ལྡན་གྱི་ལྷའི་རིས་དག་ནས་འཆི་འཕོ་བ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་མའི་མངལ་དུ་འཇུག་པ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་
དག་ན་བྱང་ཆུབ་སེམས་དཔའ་རྣམས་མའི་མངལ་ནས་འབྱུང་བ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་བྱིས་པའི་རྩེད་མོ་སྟོན་པ་དག་ངས་མཐོང་ངོ་། །དེ་བས་ཀྱང་ཆེས་མང་བའི་
འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་རྒྱལ་སྲིད་སྤངས་ནས་རབ་ཏུ་བྱུང་བ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་དཀའ་བ་སྤྱོད་པའི་སྦྱོར་བ་སྟོན་པ་དག་ངས་

49-1-281b

མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་བྱང་ཆུབ་ཀྱི་སྙིང་པོར་འགྲོ་བར་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་བྱང་ཆུབ་
ཀྱི་སྙིང་པོ་ལ་ལྟ་བ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་བྱང་ཆུབ་ཀྱི་སྙིང་པོ་ལ་གཅེས་པར་བྱེད་པའི་མཆོག་དང་གུས་པ་ཆེན་པོས་ལན་གསུམ་བསྐོར་བ་བྱེད་པ་དག་ངས་མཐོང་ངོ་། །
དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་བྱང་ཆུབ་ཀྱི་སྙིང་པོ་ལ་འདུག་པ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་བྱང་ཆུབ་ཀྱི་ཤིང་
དྲུང་ན་འདུག་པ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་
དག་ན་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་སངས་རྒྱས་བཅོམ་ལྡན་འདས་
རྣམས་ཆོས་ཀྱི་འཁོར་ལོ་སྐོར་བ་དག་ངས་མཐོང་ངོ་། །དེ་བས་ཀྱང་ཆེས་མང་བའི་འཇིག་རྟེན་གྱི་ཁམས་དག་ན་སངས་རྒྱས་བཅོམ་ལྡན་འདས་རྣམས་ཡོངས་སུ་མྱ་ངན་ལས་འདས་པ་ཆེན་པོ་སྟོན་པ་དག་ངས་མཐོང་སྟེ་དེ་དག་ཐམས་ཅད་ཀྱང་
མཚན་འཐུན་པ་དང་གདུང་འཐུན་པ་ཤ་སྟག་ཡིན་ན་འཇིག་རྟེན་གྱི་ཁམས་གང་དག་ན་བྱང་ཆུབ་སེམས་དཔའ་ཆེན་པོ་རྣམས་མངོན་པར་འབྱུང་བ་དང་། བྱང་ཆུབ་ཀྱི་སྙིང་པོར་འགྲོ་བ་དང་། བྱང་ཆུབ་ཀྱི་སྙིང་པོ་ལ་ལྟ་བ་དང་། བྱང་ཆུབ་ཀྱི་སྙིང་པོ་ལ་
སྐོར་བ་བྱེད་པ་དང་། བྱང་ཆུབ་ཀྱི་སྙིང་པོ་ལ་འདུག་པ་དང་། བྱང་ཆུབ་ཀྱི་ཤིང་དྲུང་ན་འདུག་པ་དང་། མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདས་པ་ཆེན་པོ་སྟོན་པ་མཚན་ཐ་དད་པ་དང་

49-1-282a

གདུང་ཐ་དད་པ་དག་ལྟ་ཅི་སྨོས། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་གང་དག་ཏུ་སངས་རྒྱས་
བཅོམ་ལྡན་འདས་རྣམས་མི་འབྱུང་བ་དང་། བྱང་ཆུབ་སེམས་དཔའ་རྣམས་ཀྱང་བྱང་ཆུབ་སེམས་དཔའི་སྤྱད་པ་མི་སྤྱོད་པའི་འཇིག་རྟེན་གྱི་ཁམས་ཇི་སྙེད་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་འཇིག་རྟེན་
གྱི་ཁམས་ངས་བསྟན་པ་གང་དག་ཏུ་སངས་རྒྱས་བཅོམ་ལྡན་འདས་རྣམས་འབྱུང་བ་དང་། བྱང་ཆུབ་སེམས་དཔའ་རྣམས་ཀྱང་བྱང་ཆུབ་སེམས་དཔའི་སྤྱད་པ་སྤྱོད་པ་གང་ཡིན་པ་དེ་དག་ནི་ཀུན་དགའ་བོ་དཔེར་ན་རྒྱ་མཚོ་ཆེན་པོའི་བྱེ་མ་དང་
གང་གཱའི་ཀླུང་གི་བྱེ་མའི་ནང་ན་གསེར་གྱི་བྱེ་མ་དཀོན་པ་དང་འདྲ་སྟེ། ཀུན་དགའ་བོ་དེ་བཞིན་དུ་འཇིག་རྟེན་གྱི་ཁམས་གང་དག་ཏུ་སངས་རྒྱས་བཅོམ་ལྡན་འདས་རྣམས་འབྱུང་བ་དང་། བྱང་ཆུབ་སེམས་དཔའ་རྣམས་ཀྱང་བྱང་ཆུབ་སེམས་
དཔའི་སྤྱད་པ་སྤྱོད་པའི་འཇིག་རྟེན་གྱི་ཁམས་དེ་དག་ནི་དཀོན་ཏེ། ཀུན་དགའ་བོ་ཇི་ལྟར་རྒྱ་མཚོ་ཆེན་པོའི་བྱེ་མ་དང་གང་གཱའི་ཀླུང་གི་བྱེ་མ་དེ་དག་ལས་ལ་ལ་ཞིག་གིས་བྱེ་མ་འབྲུ་གཅིག་བླངས་པ་དེ་བཞིན་དུ་གང་དུ་སངས་རྒྱས་བཅོམ་ལྡན་འདས་
རྣམས་འབྱུང་བ་དང་། བྱང་ཆུབ་སེམས་དཔའ་རྣམས་ཀྱང་བྱང་ཆུབ་སེམས་དཔའི་སྤྱད་པ་སྤྱོད་པའི་འཇིག་རྟེན་གྱི་ཁམས་དེ་དག་ནི་ཉུང་ངོ་། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། དགེ་
སློང་དེ་དག་དང་། བྱང་ཆུབ་སེམས་དཔའ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡིད་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་གསེར་གྱི་བྱེ་
མ་ལྟ་བུ་ཞེས་བྱ་བ་ཐེག་པ་ཆེན་པོའི་མདོ་རྫོགས་སྷོ།། །། རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། པྲཛྙཱ་བར་མ་དང་། ཞུ་ཆེན་གྱི་ལོ་ཙ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །། མངྒཱ་ལྃ།། །།

50-1-1a